| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
10. භික්‌ඛකසුත්‌තං
10. Bhikkhakasuttaṃ
206. සාවත්‌ථිනිදානං. අථ ඛො භික්‌ඛකො බ්‍රාහ්‌මණො යෙන භගවා තෙනුපසඞ්‌කමි; උපසඞ්‌කමිත්‌වා භගවතා සද්‌ධිං සම්‌මොදි. සම්‌මොදනීයං කථං සාරණීයං වීතිසාරෙත්‌වා එකමන්‌තං නිසීදි. එකමන්‌තං නිසින්‌නො ඛො භික්‌ඛකො බ්‍රාහ්‌මණො භගවන්‌තං එතදවොච – ‘‘අහම්‌පි ඛො, භො ගොතම, භික්‌ඛකො, භවම්‌පි භික්‌ඛකො, ඉධ නො කිං නානාකරණ’’න්‌ති?
206. Sāvatthinidānaṃ. Atha kho bhikkhako brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho bhikkhako brāhmaṇo bhagavantaṃ etadavoca – ‘‘ahampi kho, bho gotama, bhikkhako, bhavampi bhikkhako, idha no kiṃ nānākaraṇa’’nti?
‘‘න තෙන භික්‌ඛකො හොති, යාවතා භික්‌ඛතෙ පරෙ;
‘‘Na tena bhikkhako hoti, yāvatā bhikkhate pare;
විස්‌සං ධම්‌මං සමාදාය, භික්‌ඛු හොති න තාවතා.
Vissaṃ dhammaṃ samādāya, bhikkhu hoti na tāvatā.
‘‘යොධ පුඤ්‌ඤඤ්‌ච පාපඤ්‌ච, බාහිත්‌වා බ්‍රහ්‌මචරියං;
‘‘Yodha puññañca pāpañca, bāhitvā brahmacariyaṃ;
සඞ්‌ඛාය ලොකෙ චරති, ස වෙ භික්‌ඛූති වුච්‌චතී’’ති.
Saṅkhāya loke carati, sa ve bhikkhūti vuccatī’’ti.
එවං වුත්‌තෙ, භික්‌ඛකො බ්‍රාහ්‌මණො භගවන්‌තං එතදවොච – ‘‘අභික්‌කන්‌තං, භො ගොතම, අභික්‌කන්‌තං, භො ගොතම…පෙ.… උපාසකං මං භවං ගොතමො ධාරෙතු අජ්‌ජතග්‌ගෙ පාණුපෙතං සරණං ගත’’න්‌ති.
Evaṃ vutte, bhikkhako brāhmaṇo bhagavantaṃ etadavoca – ‘‘abhikkantaṃ, bho gotama, abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 10. භික්‌ඛකසුත්‌තවණ්‌ණනා • 10. Bhikkhakasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 10. භික්‌ඛකසුත්‌තවණ්‌ණනා • 10. Bhikkhakasuttavaṇṇanā
