| Library / Tipiṭaka / তিপিটক • Tipiṭaka / ৰিনযৰিনিচ্ছয-টীকা • Vinayavinicchaya-ṭīkā |
ভিক্খুনিক্খন্ধককথাৰণ্ণনা
Bhikkhunikkhandhakakathāvaṇṇanā
২৯৫২. ৰিৰরিত্ৰান চীৰরং অপনেত্ৰা।
2952.Vivaritvāna cīvaraṃ apanetvā.
২৯৫৩. যং কিঞ্চি সম্পযোজেন্তিযাতি যং কিঞ্চি অনাচারং করোন্তিযা। ততোতি তেন অনাচারসঙ্খাতেন অসদ্ধম্মেন। ভাসন্তিযাতি ৰাচায ভাসন্তিযা।
2953.Yaṃ kiñci sampayojentiyāti yaṃ kiñci anācāraṃ karontiyā. Tatoti tena anācārasaṅkhātena asaddhammena. Bhāsantiyāti vācāya bhāsantiyā.
২৯৫৪-৬. দীঘন্তি একপরিক্খেপতো দীঘং। ৰিলীৰেন চ পট্টেনাতি সণ্হেহিপি ৰিলীৰেহি কতপট্টেন। চম্মপট্টেনাতি চম্মমযপট্টেন। দুস্সপট্টেনাতি সেতৰত্থেন। দুস্সৰেণিযাতি দুস্সেন গণ্ঠিতৰেণিযা। দুস্সৰট্টিযাতি দুস্সেন কতৰট্টিযা । ন ফাসুকা নমেতব্বাতি মজ্ঝিমস্স তনুভাৰত্থায গামদারিকা ৰিয ফাসুলিকা ন নামেতব্বা। জঘনন্তি মুত্তকরণপ্পদেসং। অট্ঠিকাদিনাতি গোজাণুট্ঠিকাদিনা। ন ঘংসাপেয্যাতি ন ঘট্টাপেয্য। ‘‘অট্ঠিকাদিনা’’তি ইদং ‘‘ন ঘংসাপেয্যা’’তি ইমিনা চ ‘‘কোট্টাপেতী’’তি ইমিনা কিরিযাপদেন চ সম্বন্ধিতব্বং।
2954-6.Dīghanti ekaparikkhepato dīghaṃ. Vilīvena ca paṭṭenāti saṇhehipi vilīvehi katapaṭṭena. Cammapaṭṭenāti cammamayapaṭṭena. Dussapaṭṭenāti setavatthena. Dussaveṇiyāti dussena gaṇṭhitaveṇiyā. Dussavaṭṭiyāti dussena katavaṭṭiyā . Na phāsukā nametabbāti majjhimassa tanubhāvatthāya gāmadārikā viya phāsulikā na nāmetabbā. Jaghananti muttakaraṇappadesaṃ. Aṭṭhikādināti gojāṇuṭṭhikādinā. Na ghaṃsāpeyyāti na ghaṭṭāpeyya. ‘‘Aṭṭhikādinā’’ti idaṃ ‘‘na ghaṃsāpeyyā’’ti iminā ca ‘‘koṭṭāpetī’’ti iminā kiriyāpadena ca sambandhitabbaṃ.
২৯৫৭. ‘‘কোট্টাপেতী’’তি ইদং ‘‘হত্থং ৰা’’তিআদীহি উপযোগন্তপদেহি পচ্চেকং যোজেতব্বং। হত্থন্তি অগ্গবাহং। হত্থকোচ্ছন্তি পিট্ঠিহত্থং। পাদন্তি জঙ্ঘং।
2957.‘‘Koṭṭāpetī’’ti idaṃ ‘‘hatthaṃ vā’’tiādīhi upayogantapadehi paccekaṃ yojetabbaṃ. Hatthanti aggabāhaṃ. Hatthakocchanti piṭṭhihatthaṃ. Pādanti jaṅghaṃ.
২৯৫৮. ন মুখং লিম্পিতব্বন্তি ছৰিপসাদকরেন তিলসাসপকক্কাদিনা অনেকৰিধেন লিম্পনেন ন লিম্পিতব্বং। ন চুণ্ণেতব্বন্তি মুখচুণ্ণলেপনং ন কাতব্বং। মনোসিলায মুখং লঞ্জন্তিযা আপত্তি সিযাতি যোজনা।
2958.Na mukhaṃ limpitabbanti chavipasādakarena tilasāsapakakkādinā anekavidhena limpanena na limpitabbaṃ. Na cuṇṇetabbanti mukhacuṇṇalepanaṃ na kātabbaṃ. Manosilāya mukhaṃ lañjantiyā āpatti siyāti yojanā.
২৯৫৯. অঙ্গরাগো ন কাতব্বোতি হলিদ্দিকুঙ্কুমাদীহি সরীরচ্ছৰিরাগো ন কাতব্বো। অৰঙ্গং ন চ কাতব্বন্তি অঞ্জনং বহি অক্খিকোটিযা লেখং ঠপেত্ৰা ন অঞ্জিতব্বং। ন কাতব্বং ৰিসেসকন্তি গণ্ডপদেসে ৰিচিত্রসণ্ঠানং ৰিসেসকং ৰত্তভঙ্গং ন কাতব্বং।
2959.Aṅgarāgo na kātabboti haliddikuṅkumādīhi sarīracchavirāgo na kātabbo. Avaṅgaṃ na ca kātabbanti añjanaṃ bahi akkhikoṭiyā lekhaṃ ṭhapetvā na añjitabbaṃ. Na kātabbaṃ visesakanti gaṇḍapadese vicitrasaṇṭhānaṃ visesakaṃ vattabhaṅgaṃ na kātabbaṃ.
২৯৬০. ওলোকনকতোতি ৰাতপানতো। রাগাতি কামরাগেন। ওলোকেতুন্তি অন্তরৰীথিং ৰিলোকেতুং, সালোকে ন চ ঠাতব্বন্তি যোজনা। সালোকে দ্ৰারং ৰিৰরিত্ৰা উপড্ঢকাযং দস্সেন্তীহি ন ঠাতব্বং। সনচ্চন্তি নটসমজ্জং।
2960.Olokanakatoti vātapānato. Rāgāti kāmarāgena. Oloketunti antaravīthiṃ viloketuṃ, sāloke na ca ṭhātabbanti yojanā. Sāloke dvāraṃ vivaritvā upaḍḍhakāyaṃ dassentīhi na ṭhātabbaṃ. Sanaccanti naṭasamajjaṃ.
২৯৬১. গণিকং ৰুট্ঠাপেন্তিযা ৰেসিং ৰুট্ঠাপেন্তিযা। ‘‘ৰিক্কিণন্তিযা’’তি ইদং ‘‘সুর’’ন্তিআদীহি উপযোগন্তপদেহি পচ্চেকং যোজেতব্বং।
2961.Gaṇikaṃ vuṭṭhāpentiyā vesiṃ vuṭṭhāpentiyā. ‘‘Vikkiṇantiyā’’ti idaṃ ‘‘sura’’ntiādīhi upayogantapadehi paccekaṃ yojetabbaṃ.
২৯৬৩. ন চেৰুপট্ঠাপেতব্বোতি অত্তনো ৰেয্যাৰচ্চং নেৰ কারাপেতব্বো। তিরচ্ছানগতোপি দাসো ৰা দাসী ৰা তিরচ্ছানগতোপি কম্মকরো ৰা ন চেৰ উপট্ঠাপেতব্বো নেৰ অত্তনো ৰেয্যাৰচ্চং কারাপেতব্বো। অপি-সদ্দেন পগেৰ মনুস্সভূতোতি দীপেতি।
2963.Nacevupaṭṭhāpetabboti attano veyyāvaccaṃ neva kārāpetabbo. Tiracchānagatopi dāso vā dāsī vā tiracchānagatopi kammakaro vā na ceva upaṭṭhāpetabbo neva attano veyyāvaccaṃ kārāpetabbo. Api-saddena pageva manussabhūtoti dīpeti.
২৯৬৪. ‘‘সব্বনীলাদি’’ন্তি ইমিনা –
2964.‘‘Sabbanīlādi’’nti iminā –
‘‘সব্বনীলকমঞ্জেট্ঠ-কণ্হলোহিতপীতকে।
‘‘Sabbanīlakamañjeṭṭha-kaṇhalohitapītake;
মহানামমহারঙ্গ-রত্তেসূ’’তি॥ (ৰি॰ ৰি॰ ৫৯৮) –
Mahānāmamahāraṅga-rattesū’’ti. (vi. vi. 598) –
ৰুত্তানি অকপ্পিযচীৰরানি সঙ্গহিতানি। ‘‘নমতকং নাম এল়কলোমেহি কতং অৰাযিমং চম্মখণ্ডপরিভোগেন পরিভুঞ্জিতব্ব’’ন্তি (চূল়ৰ॰ অট্ঠ॰ ২৬৪) অট্ঠকথায ৰুত্তত্তা, গণ্ঠিপদে চ ‘‘সন্থরণসদিসো পিলোতিকাহি কতো পরিক্খারৰিসেসো’’তি ৰুত্তত্তা চ নিপজ্জায পরিভুঞ্জিতব্বো পরিক্খারৰিসেসো নমতকং নাম।
Vuttāni akappiyacīvarāni saṅgahitāni. ‘‘Namatakaṃ nāma eḷakalomehi kataṃ avāyimaṃ cammakhaṇḍaparibhogena paribhuñjitabba’’nti (cūḷava. aṭṭha. 264) aṭṭhakathāya vuttattā, gaṇṭhipade ca ‘‘santharaṇasadiso pilotikāhi kato parikkhāraviseso’’ti vuttattā ca nipajjāya paribhuñjitabbo parikkhāraviseso namatakaṃ nāma.
২৯৬৫. ছন্নম্পি পুরিসব্যঞ্জনং ‘‘এত্থা’’তি চিন্তেত্ৰা রাগচিত্তেন ওলোকেন্তিযা দুক্কটং হোতি। সব্বন্তি ৰুত্তপ্পকারং সব্বং।
2965. Channampi purisabyañjanaṃ ‘‘etthā’’ti cintetvā rāgacittena olokentiyā dukkaṭaṃ hoti. Sabbanti vuttappakāraṃ sabbaṃ.
২৯৬৬. ভিক্খুং দূরতোৰ পস্সিত্ৰা তস্স ভিক্খুনো দূরতো ওক্কমিত্ৰান মগ্গো দাতব্বোতি যোজনা।
2966. Bhikkhuṃ dūratova passitvā tassa bhikkhuno dūrato okkamitvāna maggo dātabboti yojanā.
২৯৬৭. ভিক্খং চরন্তিযা ভিক্খুনিযা ভিক্খুং পস্সিত্ৰা পন যেন ভিক্খায চরতি, তং পত্তং নীহরিত্ৰা উপরি ছাদেত্ৰা ঠিতং সঙ্ঘাটিচীৰরং অপনেত্ৰা উক্কুজ্জং উদ্ধংমুখং কত্ৰা ভিক্খুনো দস্সেতব্বন্তি যোজনা।
2967. Bhikkhaṃ carantiyā bhikkhuniyā bhikkhuṃ passitvā pana yena bhikkhāya carati, taṃ pattaṃ nīharitvā upari chādetvā ṭhitaṃ saṅghāṭicīvaraṃ apanetvā ukkujjaṃ uddhaṃmukhaṃ katvā bhikkhuno dassetabbanti yojanā.
২৯৬৮. উতুনীনং ভিক্খুনীনং উতুকালে সঞ্জাতপুপ্ফে কালে সংৰেল্লিকং কাতুং কচ্ছং বন্ধিতুং মহেসিনা কটিসুত্তকং অনুঞ্ঞাতন্তি যোজনা, ইমিনা অঞ্ঞস্মিং কালে কটিসুত্তকং বন্ধিতুং ন ৰট্টতীতি দীপেতি। যথাহ – ‘‘ন, ভিক্খৰে, ভিক্খুনিযা সব্বকালং কটিসুত্তকং ধারেতব্বং, যা ধারেয্য, আপত্তি দুক্কটস্স। অনুজানামি, ভিক্খৰে, উতুনিযা কটিসুত্তক’’ন্তি (চূল়ৰ॰ ৪২২)।
2968.Utunīnaṃ bhikkhunīnaṃ utukāle sañjātapupphe kāle saṃvellikaṃ kātuṃ kacchaṃ bandhituṃ mahesinā kaṭisuttakaṃ anuññātanti yojanā, iminā aññasmiṃ kāle kaṭisuttakaṃ bandhituṃ na vaṭṭatīti dīpeti. Yathāha – ‘‘na, bhikkhave, bhikkhuniyā sabbakālaṃ kaṭisuttakaṃ dhāretabbaṃ, yā dhāreyya, āpatti dukkaṭassa. Anujānāmi, bhikkhave, utuniyā kaṭisuttaka’’nti (cūḷava. 422).
২৯৬৯. ইত্থিপোসযুতন্তি ইত্থীহি ৰা পুরিসেহি ৰা ইত্থিপুরিসেহি ৰা যুত্তং। ইত্থিপোসযুত্তং হত্থৰট্টকমেৰ ৰা। পাটঙ্কীতি পটপোট্টলিকং।
2969.Itthiposayutanti itthīhi vā purisehi vā itthipurisehi vā yuttaṃ. Itthiposayuttaṃ hatthavaṭṭakameva vā. Pāṭaṅkīti paṭapoṭṭalikaṃ.
২৯৭০. গরুধম্মেতি সঙ্ঘাদিসেসে। মানত্তন্তি পক্খমানত্তং। সম্মন্নিত্ৰাতি ঞত্তিদুতিযায কম্মৰাচায সম্মন্নিত্ৰা।
2970.Garudhammeti saṅghādisese. Mānattanti pakkhamānattaṃ. Sammannitvāti ñattidutiyāya kammavācāya sammannitvā.
২৯৭১. যস্সা ইত্থিযা পব্বজিতকালে গব্ভো ৰুট্ঠাতি ৰিজাযতি যদি, পুত্তো চে, তস্সাপি দারকমাতু যাৰ সো দারকো ৰিঞ্ঞুতং পাপুণাতি, যাৰ খাদিতুং, ভুঞ্জিতুং, নহাযিতুঞ্চ অত্তনো ধম্মতায সক্কোতি, তাৰ দুতিযা ভিক্খুনী তথা সম্মন্নিত্ৰা দাতব্বাতি যোজনা।
2971. Yassā itthiyā pabbajitakāle gabbho vuṭṭhāti vijāyati yadi, putto ce, tassāpi dārakamātu yāva so dārako viññutaṃ pāpuṇāti, yāva khādituṃ, bhuñjituṃ, nahāyituñca attano dhammatāya sakkoti, tāva dutiyā bhikkhunī tathā sammannitvā dātabbāti yojanā.
২৯৭২. সা পন মাতা ভিক্খুনী অত্তনো পুত্তং পাযেতুং, ভোজেতুং, মণ্ডেতুং, উরে কত্ৰা সযিতুঞ্চ লভতীতি যোজনা।
2972.Sāpana mātā bhikkhunī attano puttaṃ pāyetuṃ, bhojetuṃ, maṇḍetuṃ, ure katvā sayituñca labhatīti yojanā.
২৯৭৩. দুতিযিকায ভিক্খুনিযা দারকেন সহসেয্যং ঠপেত্ৰা যথা অঞ্ঞেসু পুরিসেসু ৰত্তিতব্বং পটিপজ্জিতব্বং, তথা এৰ তস্মিং দারকে ৰত্তিতব্বন্তি যোজনা।
2973.Dutiyikāya bhikkhuniyā dārakena sahaseyyaṃ ṭhapetvā yathā aññesu purisesu vattitabbaṃ paṭipajjitabbaṃ, tathā eva tasmiṃ dārake vattitabbanti yojanā.
২৯৭৪. ৰিব্ভমেনেৰাতি অত্তনো রুচিযা সেতৰত্থানং গহণেনেৰ। যথাহ – ‘‘যস্মা সা ৰিব্ভন্তা অত্তনো রুচিযা খন্তিযা ওদাতানি ৰত্থানি নিৰত্থা, তস্মাযেৰ সা অভিক্খুনী, ন সিক্খাপচ্চক্খানেনা’’তি (চূল়ৰ॰ অট্ঠ॰ ৪৩৪)। ইধাতি ইমস্মিং সাসনে।
2974.Vibbhamenevāti attano ruciyā setavatthānaṃ gahaṇeneva. Yathāha – ‘‘yasmā sā vibbhantā attano ruciyā khantiyā odātāni vatthāni nivatthā, tasmāyeva sā abhikkhunī, na sikkhāpaccakkhānenā’’ti (cūḷava. aṭṭha. 434). Idhāti imasmiṃ sāsane.
২৯৭৫. গতাযাতি এত্থ ‘‘সকাৰাসা’’তি সেসো। যথাহ – ‘‘যা সা, ভিক্খৰে, ভিক্খুনী সকাৰাসা তিত্থাযতনং সঙ্কন্তা, সা আগতা ন উপসম্পাদেতব্বা’’তি। ন কেৰলং ন উপসম্পাদেতব্বা, পব্বজ্জম্পি ন লভতি। ওদাতানি গহেত্ৰা ৰিব্ভন্তা পন পব্বজ্জামত্তং লভতি।
2975.Gatāyāti ettha ‘‘sakāvāsā’’ti seso. Yathāha – ‘‘yā sā, bhikkhave, bhikkhunī sakāvāsā titthāyatanaṃ saṅkantā, sā āgatā na upasampādetabbā’’ti. Na kevalaṃ na upasampādetabbā, pabbajjampi na labhati. Odātāni gahetvā vibbhantā pana pabbajjāmattaṃ labhati.
২৯৭৬. ৰন্দনন্তি পাদে সম্বাহেত্ৰা ৰন্দনং। সাদিতুং ৰট্টতীতি ‘‘অনুজানামি, ভিক্খৰে, সাদিতু’’ন্তি (চূল়ৰ॰ ৪৩৪) অনুঞ্ঞাতত্তা ৰট্টতি। তত্রেকে আচরিযা ‘‘সচে একতো ৰা উভতো ৰা অৰস্সুতা হোন্তি সারত্তা, যথাৰত্থুকমেৰা’’তি ৰদন্তি। একে আচরিযা ‘‘নত্থি এত্থ আপত্তী’’তি ৰদন্তীতি এৰং আচরিযৰাদং দস্সেত্ৰা ‘‘ইদং ওদিস্স অনুঞ্ঞাতং ৰট্টতী’’তি অট্ঠকথাসু ৰুত্তং, তং পমাণং। ‘‘অনুজানামি, ভিক্খৰে, সাদিতু’’ন্তি (চূল়ৰ॰ ৪৩৪) হি ৰচনেনেৰ কপ্পিযং।
2976.Vandananti pāde sambāhetvā vandanaṃ. Sādituṃ vaṭṭatīti ‘‘anujānāmi, bhikkhave, sāditu’’nti (cūḷava. 434) anuññātattā vaṭṭati. Tatreke ācariyā ‘‘sace ekato vā ubhato vā avassutā honti sārattā, yathāvatthukamevā’’ti vadanti. Eke ācariyā ‘‘natthi ettha āpattī’’ti vadantīti evaṃ ācariyavādaṃ dassetvā ‘‘idaṃ odissa anuññātaṃ vaṭṭatī’’ti aṭṭhakathāsu vuttaṃ, taṃ pamāṇaṃ. ‘‘Anujānāmi, bhikkhave, sāditu’’nti (cūḷava. 434) hi vacaneneva kappiyaṃ.
২৯৭৭. যায কাযচি ৰচ্চকুটিযা ৰচ্চো ন কাতব্বো, হেট্ঠা ৰিৰটে উদ্ধং পটিচ্ছন্নে পন ৰচ্চং কাতুং ৰট্টতি। হেট্ঠা ৰিৰটে উপরি পটিচ্ছন্নেতি অট্ঠকথাযং ‘‘সচে কূপো খতো হোতি, উপরি পন পদরমত্তমেৰ সব্বদিসাসু পঞ্ঞাযতি, এৰরূপেপি ৰট্টতী’’তি (চূল়ৰ॰ অট্ঠ॰ ৪৩৫) ৰুত্তং।
2977. Yāya kāyaci vaccakuṭiyā vacco na kātabbo, heṭṭhā vivaṭe uddhaṃ paṭicchanne pana vaccaṃ kātuṃ vaṭṭati. Heṭṭhā vivaṭe upari paṭicchanneti aṭṭhakathāyaṃ ‘‘sace kūpo khato hoti, upari pana padaramattameva sabbadisāsu paññāyati, evarūpepi vaṭṭatī’’ti (cūḷava. aṭṭha. 435) vuttaṃ.
২৯৭৮. সব্বত্থাতি ভিক্খুনিউপস্সযঅন্তরঘরাদিসব্বট্ঠানেসু। গিলানাযাতি যস্সা ৰিনা পল্লঙ্কং ন ফাসু হোতি। অড্ঢপল্লঙ্কন্তি একপাদং আভুজিত্ৰা কতপল্লঙ্কং। সো একং পণ্হিং ঊরুমূলাসন্নং কত্ৰা ইতরং দূরে কত্ৰা আভুজিতপল্লঙ্কো নাম।
2978.Sabbatthāti bhikkhuniupassayaantaragharādisabbaṭṭhānesu. Gilānāyāti yassā vinā pallaṅkaṃ na phāsu hoti. Aḍḍhapallaṅkanti ekapādaṃ ābhujitvā katapallaṅkaṃ. So ekaṃ paṇhiṃ ūrumūlāsannaṃ katvā itaraṃ dūre katvā ābhujitapallaṅko nāma.
২৯৭৯. নরতিত্থেতি পুরিসানং নহানতিত্থে। যথাহ – ‘‘ন, ভিক্খৰে, ভিক্খুনিযা পুরিসতিত্থে নহাযিতব্বং, যা নহাযেয্য, আপত্তি দুক্কটস্স। অনুজানামি, ভিক্খৰে, মহিলাতিত্থে নহাযিতু’’ন্তি (চূল়ৰ॰ ৪৩৬)।
2979.Naratittheti purisānaṃ nahānatitthe. Yathāha – ‘‘na, bhikkhave, bhikkhuniyā purisatitthe nahāyitabbaṃ, yā nahāyeyya, āpatti dukkaṭassa. Anujānāmi, bhikkhave, mahilātitthe nahāyitu’’nti (cūḷava. 436).
২৯৮০. যা সমণী গন্ধচুণ্ণেন ৰা ৰাসিতমত্তিযা ৰাসিতকায মত্তিকায ৰা পটিসোতে ৰা ন্হাযেয্য, তস্সা আপত্তি দুক্কটন্তি যোজনা। ৰাসিতৰিসেসনেন অৰাসিতা ৰট্টতীতি দীপেতি। যথাহ – ‘‘অনুজানামি, ভিক্খৰে, পকতিমত্তিক’’ন্তি (চূল়ৰ॰ ৪৩৬)।
2980. Yā samaṇī gandhacuṇṇena vā vāsitamattiyā vāsitakāya mattikāya vā paṭisote vā nhāyeyya, tassā āpatti dukkaṭanti yojanā. Vāsitavisesanena avāsitā vaṭṭatīti dīpeti. Yathāha – ‘‘anujānāmi, bhikkhave, pakatimattika’’nti (cūḷava. 436).
২৯৮১. অভুত্ৰাতি এত্থ আমিসঅগ্গং গহণমত্তম্পি অকত্ৰা, পত্তচীৰরং কতিপযদিৰসানিপি অপরিভুঞ্জিত্ৰাতি অত্থো। সচে অসপ্পাযং, সব্বম্পি অপনেতুং ৰট্টতি।
2981.Abhutvāti ettha āmisaaggaṃ gahaṇamattampi akatvā, pattacīvaraṃ katipayadivasānipi aparibhuñjitvāti attho. Sace asappāyaṃ, sabbampi apanetuṃ vaṭṭati.
২৯৮২. অনুপসম্পন্নে অসন্তে সব্বং ভিক্খূহি পটিগ্গহিতং ৰা অপ্পটিগ্গহিতং ৰা সন্নিধিকতং ৰা সব্বং অজ্ঝোহরণীযং ভিক্খূহি পটিগ্গহাপেত্ৰা পরিভুঞ্জিতুং ভিক্খুনীনং ৰট্টতীতি যোজনা। ‘‘ভিক্খুনীনং ৰট্টতী’’তি ইদং পকরণৰসেন ৰুত্তং। ভিক্খুনীহিপি পটিগ্গহাপেত্ৰা ভিক্খূনম্পি তথাৰিধং পরিভুঞ্জিতুং ৰট্টতি। যথাহ – ‘‘অনুজানামি, ভিক্খৰে, ভিক্খূনং সন্নিধিং ভিক্খুনীহি পটিগ্গাহাপেত্ৰা পরিভুঞ্জিতু’’ন্তি (চূল়ৰ॰ ৪২১)।
2982. Anupasampanne asante sabbaṃ bhikkhūhi paṭiggahitaṃ vā appaṭiggahitaṃ vā sannidhikataṃ vā sabbaṃ ajjhoharaṇīyaṃ bhikkhūhi paṭiggahāpetvā paribhuñjituṃ bhikkhunīnaṃ vaṭṭatīti yojanā. ‘‘Bhikkhunīnaṃ vaṭṭatī’’ti idaṃ pakaraṇavasena vuttaṃ. Bhikkhunīhipi paṭiggahāpetvā bhikkhūnampi tathāvidhaṃ paribhuñjituṃ vaṭṭati. Yathāha – ‘‘anujānāmi, bhikkhave, bhikkhūnaṃ sannidhiṃ bhikkhunīhi paṭiggāhāpetvā paribhuñjitu’’nti (cūḷava. 421).
ভিক্খুনিক্খন্ধককথাৰণ্ণনা।
Bhikkhunikkhandhakakathāvaṇṇanā.
ইতি ৰিনযত্থসারসন্দীপনিযা ৰিনযৰিনিচ্ছযৰণ্ণনায
Iti vinayatthasārasandīpaniyā vinayavinicchayavaṇṇanāya
খন্ধককথাৰণ্ণনা নিট্ঠিতা।
Khandhakakathāvaṇṇanā niṭṭhitā.
