Library / Tipiṭaka / ติปิฎก • Tipiṭaka / เทฺวมาติกาปาฬิ • Dvemātikāpāḷi

    ฯ นโม ตสฺส ภควโต อรหโต สมฺมาสมฺพุทฺธสฺสฯ

    Namo tassa bhagavato arahato sammāsambuddhassa

    ภิกฺขุนีปาติโมกฺขปาฬิ

    Bhikkhunīpātimokkhapāḷi

    ปุพฺพกรณํ-๔

    Pubbakaraṇaṃ-4

    สมฺมชฺชนี ปทีโป จ, อุทกํ อาสเนน จ;

    Sammajjanī padīpo ca, udakaṃ āsanena ca;

    อุโปสถสฺส เอตานิ, ‘‘ปุพฺพกรณ’’นฺติ วุจฺจติฯ

    Uposathassa etāni, ‘‘pubbakaraṇa’’nti vuccati.

    ปุพฺพกิจฺจํ-๕

    Pubbakiccaṃ-5

    ฉนฺท, ปาริสุทฺธิ, อุตุกฺขานํ, ภิกฺขุนิคณนา จ โอวาโท;

    Chanda, pārisuddhi, utukkhānaṃ, bhikkhunigaṇanā ca ovādo;

    อุโปสถสฺส เอตานิ, ‘‘ปุพฺพกิจฺจ’’นฺติ วุจฺจติฯ

    Uposathassa etāni, ‘‘pubbakicca’’nti vuccati.

    ปตฺตกลฺลองฺคา-๔

    Pattakallaaṅgā-4

    อุโปสโถ, ยาวติกา จ ภิกฺขุนี กมฺมปฺปตฺตา;

    Uposatho, yāvatikā ca bhikkhunī kammappattā;

    สภาคาปตฺติโย จ น วิชฺชนฺติ;

    Sabhāgāpattiyo ca na vijjanti;

    วชฺชนียา จ ปุคฺคลา ตสฺมิํ น โหนฺติ, ‘‘ปตฺตกลฺล’’นฺติ วุจฺจติฯ

    Vajjanīyā ca puggalā tasmiṃ na honti, ‘‘pattakalla’’nti vuccati.

    ปุพฺพกรณปุพฺพกิจฺจานิ สมาเปตฺวา เทสิตาปตฺติกสฺส สมคฺคสฺส ภิกฺขุนิสงฺฆสฺส อนุมติยา ปาติโมกฺขํ อุทฺทิสิตุํ อาราธนํ กโรมฯ

    Pubbakaraṇapubbakiccāni samāpetvā desitāpattikassa samaggassa bhikkhunisaṅghassa anumatiyā pātimokkhaṃ uddisituṃ ārādhanaṃ karoma.

    นิทานุเทฺทโส

    Nidānuddeso

    สุณาตุ เม อเยฺย สโงฺฆ, อชฺชุโปสโถ ปนฺนรโส, ยทิ สงฺฆสฺส ปตฺตกลฺลํ, สโงฺฆ อุโปสถํ กเรยฺย, ปาติโมกฺขํ อุทฺทิเสยฺยฯ

    Suṇātu me ayye saṅgho, ajjuposatho pannaraso, yadi saṅghassa pattakallaṃ, saṅgho uposathaṃ kareyya, pātimokkhaṃ uddiseyya.

    กิํ สงฺฆสฺส ปุพฺพกิจฺจํ? ปาริสุทฺธิํ อยฺยาโย อาโรเจถ, ปาติโมกฺขํ อุทฺทิสิสฺสามิ, ตํ สพฺพาว สนฺตา สาธุกํ สุโณม มนสิ กโรมฯ ยสฺสา สิยา อาปตฺติ, สา อาวิกเรยฺย, อสนฺติยา อาปตฺติยา ตุณฺหี ภวิตพฺพํ, ตุณฺหีภาเวน โข ปนายฺยาโย, ‘‘ปริสุทฺธา’’ติ เวทิสฺสามิฯ ยถา โข ปน ปเจฺจกปุฎฺฐสฺสา เวยฺยากรณํ โหติ, เอวเมวํ เอวรูปาย ปริสาย ยาวตติยํ อนุสาวิตํ โหติฯ ยา ปน ภิกฺขุนี ยาวตติยํ อนุสาวิยมาเน สรมานา สนฺติํ อาปตฺติํ นาวิกเรยฺย, สมฺปชานมุสาวาทสฺสา โหติฯ สมฺปชานมุสาวาโท โข ปนายฺยาโย, อนฺตรายิโก ธโมฺม วุโตฺต ภควตา, ตสฺมา สรมานาย ภิกฺขุนิยา อาปนฺนาย วิสุทฺธาเปกฺขาย สนฺตี อาปตฺติ อาวิกาตพฺพา, อาวิกตา หิสฺสา ผาสุ โหติฯ

    Kiṃ saṅghassa pubbakiccaṃ? Pārisuddhiṃ ayyāyo ārocetha, pātimokkhaṃ uddisissāmi, taṃ sabbāva santā sādhukaṃ suṇoma manasi karoma. Yassā siyā āpatti, sā āvikareyya, asantiyā āpattiyā tuṇhī bhavitabbaṃ, tuṇhībhāvena kho panāyyāyo, ‘‘parisuddhā’’ti vedissāmi. Yathā kho pana paccekapuṭṭhassā veyyākaraṇaṃ hoti, evamevaṃ evarūpāya parisāya yāvatatiyaṃ anusāvitaṃ hoti. Yā pana bhikkhunī yāvatatiyaṃ anusāviyamāne saramānā santiṃ āpattiṃ nāvikareyya, sampajānamusāvādassā hoti. Sampajānamusāvādo kho panāyyāyo, antarāyiko dhammo vutto bhagavatā, tasmā saramānāya bhikkhuniyā āpannāya visuddhāpekkhāya santī āpatti āvikātabbā, āvikatā hissā phāsu hoti.

    อุทฺทิฎฺฐํ โข, อยฺยาโย, นิทานํฯ ตตฺถายฺยาโย ปุจฺฉามิ, กจฺจิตฺถ ปริสุทฺธา, ทุติยมฺปิ ปุจฺฉามิ, กจฺจิตฺถ ปริสุทฺธา, ตติยมฺปิ ปุจฺฉามิ, กจฺจิตฺถ ปริสุทฺธา, ปริสุเทฺธตฺถายฺยาโย, ตสฺมา ตุณฺหี, เอวเมตํ ธารยามีติฯ

    Uddiṭṭhaṃ kho, ayyāyo, nidānaṃ. Tatthāyyāyo pucchāmi, kaccittha parisuddhā, dutiyampi pucchāmi, kaccittha parisuddhā, tatiyampi pucchāmi, kaccittha parisuddhā, parisuddhetthāyyāyo, tasmā tuṇhī, evametaṃ dhārayāmīti.

    นิทานํ นิฎฺฐิตํฯ

    Nidānaṃ niṭṭhitaṃ.

    ปาราชิกุเทฺทโส

    Pārājikuddeso

    ตตฺริเม อฎฺฐ ปาราชิกา ธมฺมา อุเทฺทสํ อาคจฺฉนฺติฯ

    Tatrime aṭṭha pārājikā dhammā uddesaṃ āgacchanti.

    เมถุนธมฺมสิกฺขาปทํ

    Methunadhammasikkhāpadaṃ

    ๑. ยา ปน ภิกฺขุนี ฉนฺทโส เมถุนํ ธมฺมํ ปฎิเสเวยฺย, อนฺตมโส ติรจฺฉานคเตนปิ, ปาราชิกา โหติ อสํวาสาฯ

    1. Yā pana bhikkhunī chandaso methunaṃ dhammaṃ paṭiseveyya, antamaso tiracchānagatenapi, pārājikā hoti asaṃvāsā.

    อทินฺนาทานสิกฺขาปทํ

    Adinnādānasikkhāpadaṃ

    ๒. ยา ปน ภิกฺขุนี คามา วา อรญฺญา วา อทินฺนํ เถยฺยสงฺขาตํ อาทิเยยฺย, ยถารูเป อทินฺนาทาเน ราชาโน โจรํ คเหตฺวา หเนยฺยุํ วา พเนฺธยฺยุํ วา ปพฺพาเชยฺยุํ วา โจราสิ พาลาสิ มูฬฺหาสิ เถนาสีติ, ตถารูปํ ภิกฺขุนี อทินฺนํ อาทิยมานา อยมฺปิ ปาราชิกา โหติ อสํวาสาฯ

    2. Yā pana bhikkhunī gāmā vā araññā vā adinnaṃ theyyasaṅkhātaṃ ādiyeyya, yathārūpe adinnādāne rājāno coraṃ gahetvā haneyyuṃ vā bandheyyuṃ vā pabbājeyyuṃ vā corāsi bālāsi mūḷhāsi thenāsīti, tathārūpaṃ bhikkhunī adinnaṃ ādiyamānā ayampi pārājikā hoti asaṃvāsā.

    มนุสฺสวิคฺคหสิกฺขาปทํ

    Manussaviggahasikkhāpadaṃ

    ๓. ยา ปน ภิกฺขุนี สญฺจิจฺจ มนุสฺสวิคฺคหํ ชีวิตา โวโรเปยฺย, สตฺถหารกํ วาสฺส ปริเยเสยฺย, มรณวณฺณํ วา สํวเณฺณยฺย, มรณาย วา สมาทเปยฺย ‘‘อโมฺภ ปุริส, กิํ ตุยฺหิมินา ปาปเกน ทุชฺชีวิเตน, มตํ เต ชีวิตา เสโยฺย’’ติ, อิติ จิตฺตมนา จิตฺตสงฺกปฺปา อเนกปริยาเยน มรณวณฺณํ วา สํวเณฺณยฺย, มรณาย วา สมาทเปยฺย, อยมฺปิ ปาราชิกา โหติ อสํวาสาฯ

    3. Yā pana bhikkhunī sañcicca manussaviggahaṃ jīvitā voropeyya, satthahārakaṃ vāssa pariyeseyya, maraṇavaṇṇaṃ vā saṃvaṇṇeyya, maraṇāya vā samādapeyya ‘‘ambho purisa, kiṃ tuyhiminā pāpakena dujjīvitena, mataṃ te jīvitā seyyo’’ti, iti cittamanā cittasaṅkappā anekapariyāyena maraṇavaṇṇaṃ vā saṃvaṇṇeyya, maraṇāya vā samādapeyya, ayampi pārājikā hoti asaṃvāsā.

    อุตฺตริมนุสฺสธมฺมสิกฺขาปทํ

    Uttarimanussadhammasikkhāpadaṃ

    ๔. ยา ปน ภิกฺขุนี อนภิชานํ อุตฺตริมนุสฺสธมฺมํ อตฺตุปนายิกํ อลมริยญาณทสฺสนํ สมุทาจเรยฺย ‘‘อิติ ชานามิ, อิติ ปสฺสามี’’ติ, ตโต อปเรน สมเยน สมนุคฺคาหียมานา วา อสมนุคฺคาหียมานา วา อาปนฺนา วิสุทฺธาเปกฺขา เอวํ วเทยฺย ‘‘อชานเมวํ, อเยฺย, อวจํ ชานามิ, อปสฺสํ ปสฺสามิ, ตุจฺฉํ มุสา วิลปิ’’นฺติ, อญฺญตฺร อธิมานา, อยมฺปิ ปาราชิกา โหติ อสํวาสาฯ

    4. Yā pana bhikkhunī anabhijānaṃ uttarimanussadhammaṃ attupanāyikaṃ alamariyañāṇadassanaṃ samudācareyya ‘‘iti jānāmi, iti passāmī’’ti, tato aparena samayena samanuggāhīyamānā vā asamanuggāhīyamānā vā āpannā visuddhāpekkhā evaṃ vadeyya ‘‘ajānamevaṃ, ayye, avacaṃ jānāmi, apassaṃ passāmi, tucchaṃ musā vilapi’’nti, aññatra adhimānā, ayampi pārājikā hoti asaṃvāsā.

    อุพฺภชาณุมณฺฑลิกาสิกฺขาปทํ

    Ubbhajāṇumaṇḍalikāsikkhāpadaṃ

    ๕. ยา ปน ภิกฺขุนี อวสฺสุตา อวสฺสุตสฺส ปุริสปุคฺคลสฺส, อธกฺขกํ อุพฺภชาณุมณฺฑลํ อามสนํ วา ปรามสนํ วา คหณํ วา ฉุปนํ วา ปฎิปีฬนํ วา สาทิเยยฺย, อยมฺปิ ปาราชิกา โหติ อสํวาสา อุพฺภชาณุมณฺฑลิกาฯ

    5. Yā pana bhikkhunī avassutā avassutassa purisapuggalassa, adhakkhakaṃ ubbhajāṇumaṇḍalaṃ āmasanaṃ vā parāmasanaṃ vā gahaṇaṃ vā chupanaṃ vā paṭipīḷanaṃ vā sādiyeyya, ayampi pārājikā hoti asaṃvāsā ubbhajāṇumaṇḍalikā.

    วชฺชปฺปฎิจฺฉาทิกาสิกฺขาปทํ

    Vajjappaṭicchādikāsikkhāpadaṃ

    ๖. ยา ปน ภิกฺขุนี ชานํ ปาราชิกํ ธมฺมํ อชฺฌาปนฺนํ ภิกฺขุนิํ เนวตฺตนา ปฎิโจเทยฺย, น คณสฺส อาโรเจยฺย, ยทา จ สา ฐิตา วา อสฺส จุตา วา นาสิตา วา อวสฺสฎา วา, สา ปจฺฉา เอวํ วเทยฺย ‘‘ปุเพฺพวาหํ, อเยฺย, อญฺญาสิํ เอตํ ภิกฺขุนิํ ‘เอวรูปา จ เอวรูปา จ สา ภคินี’ติ, โน จ โข อตฺตนา ปฎิโจเทสฺสํ, น คณสฺส อาโรเจสฺส’’นฺติ, อยมฺปิ ปาราชิกา โหติ อสํวาสา วชฺชปฺปฎิจฺฉาทิกาฯ

    6. Yā pana bhikkhunī jānaṃ pārājikaṃ dhammaṃ ajjhāpannaṃ bhikkhuniṃ nevattanā paṭicodeyya, na gaṇassa āroceyya, yadā ca sā ṭhitā vā assa cutā vā nāsitā vā avassaṭā vā, sā pacchā evaṃ vadeyya ‘‘pubbevāhaṃ, ayye, aññāsiṃ etaṃ bhikkhuniṃ ‘evarūpā ca evarūpā ca sā bhaginī’ti, no ca kho attanā paṭicodessaṃ, na gaṇassa ārocessa’’nti, ayampi pārājikā hoti asaṃvāsā vajjappaṭicchādikā.

    อุกฺขิตฺตานุวตฺติกาสิกฺขาปทํ

    Ukkhittānuvattikāsikkhāpadaṃ

    ๗. ยา ปน ภิกฺขุนี สมเคฺคน สเงฺฆน อุกฺขิตฺตํ ภิกฺขุํ ธเมฺมน วินเยน สตฺถุสาสเนน อนาทรํ อปฺปฎิการํ อกตสหายํ ตมนุวเตฺตยฺย, สา ภิกฺขุนี ภิกฺขุนีหิ เอวมสฺส วจนียา ‘‘เอโส โข, อเยฺย, ภิกฺขุ สมเคฺคน สเงฺฆน อุกฺขิโตฺต, ธเมฺมน วินเยน สตฺถุสาสเนน อนาทโร อปฺปฎิกาโร อกตสหาโย, มาเยฺย, เอตํ ภิกฺขุํ อนุวตฺตี’’ติ, เอวญฺจ สา ภิกฺขุนี ภิกฺขุนีหิ วุจฺจมานา ตเถว ปคฺคเณฺหยฺย, สา ภิกฺขุนี ภิกฺขุนีหิ ยาวตติยํ สมนุภาสิตพฺพา ตสฺส ปฎินิสฺสคฺคาย, ยาวตติยํ เจ สมนุภาสิยมานา ตํ ปฎินิสฺสเชฺชยฺย, อิเจฺจตํ กุสลํ, โน เจ ปฎินิสฺสเชฺชยฺย, อยมฺปิ ปาราชิกา โหติ อสํวาสา อุกฺขิตฺตานุวตฺติกาฯ

    7. Yā pana bhikkhunī samaggena saṅghena ukkhittaṃ bhikkhuṃ dhammena vinayena satthusāsanena anādaraṃ appaṭikāraṃ akatasahāyaṃ tamanuvatteyya, sā bhikkhunī bhikkhunīhi evamassa vacanīyā ‘‘eso kho, ayye, bhikkhu samaggena saṅghena ukkhitto, dhammena vinayena satthusāsanena anādaro appaṭikāro akatasahāyo, māyye, etaṃ bhikkhuṃ anuvattī’’ti, evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṃ samanubhāsitabbā tassa paṭinissaggāya, yāvatatiyaṃ ce samanubhāsiyamānā taṃ paṭinissajjeyya, iccetaṃ kusalaṃ, no ce paṭinissajjeyya, ayampi pārājikā hoti asaṃvāsā ukkhittānuvattikā.

    อฎฺฐวตฺถุกาสิกฺขาปทํ

    Aṭṭhavatthukāsikkhāpadaṃ

    ๘. ยา ปน ภิกฺขุนี อวสฺสุตา อวสฺสุตสฺส ปุริสปุคฺคลสฺส หตฺถคฺคหณํ วา สาทิเยยฺย, สงฺฆาฎิกณฺณคฺคหณํ วา สาทิเยยฺย, สนฺติเฎฺฐยฺย วา, สลฺลเปยฺย วา, สเงฺกตํ วา คเจฺฉยฺย, ปุริสสฺส วา อพฺภาคมนํ สาทิเยยฺย, ฉนฺนํ วา อนุปวิเสยฺย, กายํ วา ตทตฺถาย อุปสํหเรยฺย เอตสฺส อสทฺธมฺมสฺส ปฎิเสวนตฺถาย, อยมฺปิ ปาราชิกา โหติ อสํวาสา อฎฺฐวตฺถุกาฯ

    8. Yā pana bhikkhunī avassutā avassutassa purisapuggalassa hatthaggahaṇaṃ vā sādiyeyya, saṅghāṭikaṇṇaggahaṇaṃ vā sādiyeyya, santiṭṭheyya vā, sallapeyya vā, saṅketaṃ vā gaccheyya, purisassa vā abbhāgamanaṃ sādiyeyya, channaṃ vā anupaviseyya, kāyaṃ vā tadatthāya upasaṃhareyya etassa asaddhammassa paṭisevanatthāya, ayampi pārājikā hoti asaṃvāsā aṭṭhavatthukā.

    อุทฺทิฎฺฐา โข, อยฺยาโย, อฎฺฐ ปาราชิกา ธมฺมาฯ เยสํ ภิกฺขุนี อญฺญตรํ วา อญฺญตรํ วา อาปชฺชิตฺวา น ลภติ ภิกฺขุนีหิ สทฺธิํ สํวาสํ ยถา ปุเร, ตถา ปจฺฉา, ปาราชิกา โหติ อสํวาสาฯ ตตฺถายฺยาโย, ปุจฺฉามิ, กจฺจิตฺถ ปริสุทฺธา, ทุติยมฺปิ ปุจฺฉามิ, กจฺจิตฺถ ปริสุทฺธา, ตติยมฺปิ ปุจฺฉามิ, กจฺจิตฺถ ปริสุทฺธา, ปริสุเทฺธตฺถายฺยาโย, ตสฺมา ตุณฺหี, เอวเมตํ ธารยามีติฯ

    Uddiṭṭhā kho, ayyāyo, aṭṭha pārājikā dhammā. Yesaṃ bhikkhunī aññataraṃ vā aññataraṃ vā āpajjitvā na labhati bhikkhunīhi saddhiṃ saṃvāsaṃ yathā pure, tathā pacchā, pārājikā hoti asaṃvāsā. Tatthāyyāyo, pucchāmi, kaccittha parisuddhā, dutiyampi pucchāmi, kaccittha parisuddhā, tatiyampi pucchāmi, kaccittha parisuddhā, parisuddhetthāyyāyo, tasmā tuṇhī, evametaṃ dhārayāmīti.

    ปาราชิกํ นิฎฺฐิตํฯ

    Pārājikaṃ niṭṭhitaṃ.

    สงฺฆาทิเสสุเทฺทโส

    Saṅghādisesuddeso

    อิเม โข ปนายฺยาโย สตฺตรส สงฺฆาทิเสสา

    Ime kho panāyyāyo sattarasa saṅghādisesā

    ธมฺมา อุเทฺทสํ อาคจฺฉนฺติฯ

    Dhammā uddesaṃ āgacchanti.

    อุสฺสยวาทิกาสิกฺขาปทํ

    Ussayavādikāsikkhāpadaṃ

    ๑. ยา ปน ภิกฺขุนี อุสฺสยวาทิกา วิหเรยฺย คหปตินา วา คหปติปุเตฺตน วา ทาเสน วา กมฺมกาเรน วา อนฺตมโส สมณปริพฺพาชเกนาปิ, อยมฺปิ ภิกฺขุนี ปฐมาปตฺติกํ ธมฺมํ อาปนฺนา นิสฺสารณียํ สงฺฆาทิเสสํฯ

    1. Yā pana bhikkhunī ussayavādikā vihareyya gahapatinā vā gahapatiputtena vā dāsena vā kammakārena vā antamaso samaṇaparibbājakenāpi, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesaṃ.

    โจรีวุฎฺฐาปิกาสิกฺขาปทํ

    Corīvuṭṭhāpikāsikkhāpadaṃ

    ๒. ยา ปน ภิกฺขุนี ชานํ โจริํ วชฺฌํ วิทิตํ อนปโลเกตฺวา ราชานํ วา สงฺฆํ วา คณํ วา ปูคํ วา เสณิํ วา, อญฺญตฺร กปฺปา วุฎฺฐาเปยฺย, อยมฺปิ ภิกฺขุนี ปฐมาปตฺติกํ ธมฺมํ อาปนฺนา นิสฺสารณียํ สงฺฆาทิเสสํฯ

    2. Yā pana bhikkhunī jānaṃ coriṃ vajjhaṃ viditaṃ anapaloketvā rājānaṃ vā saṅghaṃ vā gaṇaṃ vā pūgaṃ vā seṇiṃ vā, aññatra kappā vuṭṭhāpeyya, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesaṃ.

    เอกคามนฺตรคมนสิกฺขาปทํ

    Ekagāmantaragamanasikkhāpadaṃ

    ๓. ยา ปน ภิกฺขุนี เอกา วา คามนฺตรํ คเจฺฉยฺย, เอกา วา นทีปารํ คเจฺฉยฺย, เอกา วา รตฺติํ วิปฺปวเสยฺย, เอกา วา คณมฺหา โอหิเยยฺย, อยมฺปิ ภิกฺขุนี ปฐมาปตฺติกํ ธมฺมํ อาปนฺนา นิสฺสารณียํ สงฺฆาทิเสสํฯ

    3. Yā pana bhikkhunī ekā vā gāmantaraṃ gaccheyya, ekā vā nadīpāraṃ gaccheyya, ekā vā rattiṃ vippavaseyya, ekā vā gaṇamhā ohiyeyya, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesaṃ.

    อุกฺขิตฺตกโอสารณสิกฺขาปทํ

    Ukkhittakaosāraṇasikkhāpadaṃ

    ๔. ยา ปน ภิกฺขุนี สมเคฺคน สเงฺฆน อุกฺขิตฺตํ ภิกฺขุนิํ ธเมฺมน วินเยน สตฺถุสาสเนน อนปโลเกตฺวา การกสงฺฆํ, อนญฺญาย คณสฺส ฉนฺทํ โอสาเรยฺย, อยมฺปิ ภิกฺขุนี ปฐมาปตฺติกํ ธมฺมํ อาปนฺนา นิสฺสารณียํ สงฺฆาทิเสสํฯ

    4. Yā pana bhikkhunī samaggena saṅghena ukkhittaṃ bhikkhuniṃ dhammena vinayena satthusāsanena anapaloketvā kārakasaṅghaṃ, anaññāya gaṇassa chandaṃ osāreyya, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesaṃ.

    โภชนปฎิคฺคหณปฐมสิกฺขาปทํ

    Bhojanapaṭiggahaṇapaṭhamasikkhāpadaṃ

    ๕. ยา ปน ภิกฺขุนี อวสฺสุตา อวสฺสุตสฺส ปุริสปุคฺคลสฺส หตฺถโต ขาทนียํ วา, โภชนียํ วา สหตฺถา ปฎิคฺคเหตฺวา ขาเทยฺย วา ภุเญฺชยฺย วา, อยมฺปิ ภิกฺขุนี ปฐมาปตฺติกํ ธมฺมํ อาปนฺนา นิสฺสารณียํ สงฺฆาทิเสสํฯ

    5. Yā pana bhikkhunī avassutā avassutassa purisapuggalassa hatthato khādanīyaṃ vā, bhojanīyaṃ vā sahatthā paṭiggahetvā khādeyya vā bhuñjeyya vā, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesaṃ.

    โภชนปฎิคฺคหณทุติยสิกฺขาปทํ

    Bhojanapaṭiggahaṇadutiyasikkhāpadaṃ

    ๖. ยา ปน ภิกฺขุนี เอวํ วเทยฺย ‘‘กิํ เต, อเยฺย, เอโส ปุริสปุคฺคโล กริสฺสติ อวสฺสุโต วา อนวสฺสุโต วา, ยโต ตฺวํ อนวสฺสุตา, อิงฺฆ, อเยฺย, ยํ เต เอโส ปุริสปุคฺคโล เทติ ขาทนียํ วา โภชนียํ วา, ตํ ตฺวํ สหตฺถา ปฎิคฺคเหตฺวา ขาท วา ภุญฺช วา’’ติ, อยมฺปิ ภิกฺขุนี ปฐมาปตฺติกํ ธมฺมํ อาปนฺนา นิสฺสารณียํ สงฺฆาทิเสสํฯ

    6. Yā pana bhikkhunī evaṃ vadeyya ‘‘kiṃ te, ayye, eso purisapuggalo karissati avassuto vā anavassuto vā, yato tvaṃ anavassutā, iṅgha, ayye, yaṃ te eso purisapuggalo deti khādanīyaṃ vā bhojanīyaṃ vā, taṃ tvaṃ sahatthā paṭiggahetvā khāda vā bhuñja vā’’ti, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesaṃ.

    สญฺจริตฺตสิกฺขาปทํ

    Sañcarittasikkhāpadaṃ

    ๗. ยา ปน ภิกฺขุนี สญฺจริตฺตํ สมาปเชฺชยฺย อิตฺถิยา วา ปุริสมติํ, ปุริสสฺส วา อิตฺถิมติํ, ชายตฺตเน วา ชารตฺตเน วา อนฺตมโส ตงฺขณิกายปิ, อยมฺปิ ภิกฺขุนี ปฐมาปตฺติกํ ธมฺมํ อาปนฺนา นิสฺสารณียํ สงฺฆาทิเสสํฯ

    7. Yā pana bhikkhunī sañcarittaṃ samāpajjeyya itthiyā vā purisamatiṃ, purisassa vā itthimatiṃ, jāyattane vā jārattane vā antamaso taṅkhaṇikāyapi, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesaṃ.

    ทุฎฺฐโทสสิกฺขาปทํ

    Duṭṭhadosasikkhāpadaṃ

    ๘. ยา ปน ภิกฺขุนี ภิกฺขุนิํ ทุฎฺฐา โทสา อปฺปตีตา อมูลเกน ปาราชิเกน ธเมฺมน อนุทฺธํเสยฺย ‘‘อเปฺปว นาม นํ อิมมฺหา พฺรหฺมจริยา จาเวยฺย’’นฺติ, ตโต อปเรน สมเยน สมนุคฺคาหียมานา วา อส มนุคฺคาหียมานา วา อมูลกเญฺจว ตํ อธิกรณํ โหติ, ภิกฺขุนี จ โทสํ ปติฎฺฐาติ, อยมฺปิ ภิกฺขุนี ปฐมาปตฺติกํ ธมฺมํ อาปนฺนา นิสฺสารณียํ สงฺฆาทิเสสํฯ

    8. Yā pana bhikkhunī bhikkhuniṃ duṭṭhā dosā appatītā amūlakena pārājikena dhammena anuddhaṃseyya ‘‘appeva nāma naṃ imamhā brahmacariyā cāveyya’’nti, tato aparena samayena samanuggāhīyamānā vā asa manuggāhīyamānā vā amūlakañceva taṃ adhikaraṇaṃ hoti, bhikkhunī ca dosaṃ patiṭṭhāti, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesaṃ.

    อญฺญภาคิยสิกฺขาปทํ

    Aññabhāgiyasikkhāpadaṃ

    ๙. ยา ปน ภิกฺขุนี ภิกฺขุนิํ ทุฎฺฐา โทสา อปฺปตีตา อญฺญภาคิยสฺส อธิกรณสฺส กิญฺจิเทสํ เลสมตฺตํ อุปาทาย ปาราชิเกน ธเมฺมน อนุทฺธํเสยฺย ‘‘อเปฺปว นาม นํ อิมมฺหา พฺรหฺมจริยา จาเวยฺย’’นฺติ, ตโต อปเรน สมเยน สมนุคฺคาหียมานา วา อสมนุคฺคาหียมานา วา อญฺญภาคิยเญฺจว ตํ อธิกรณํ โหติฯ โกจิเทโส เลสมโตฺต อุปาทิโนฺน, ภิกฺขุนี จ โทสํ ปติฎฺฐาติ, อยมฺปิ ภิกฺขุนี ปฐมาปตฺติกํ ธมฺมํ อาปนฺนา นิสฺสารณียํ สงฺฆาทิเสสํฯ

    9. Yā pana bhikkhunī bhikkhuniṃ duṭṭhā dosā appatītā aññabhāgiyassa adhikaraṇassa kiñcidesaṃ lesamattaṃ upādāya pārājikena dhammena anuddhaṃseyya ‘‘appeva nāma naṃ imamhā brahmacariyā cāveyya’’nti, tato aparena samayena samanuggāhīyamānā vā asamanuggāhīyamānā vā aññabhāgiyañceva taṃ adhikaraṇaṃ hoti. Kocideso lesamatto upādinno, bhikkhunī ca dosaṃ patiṭṭhāti, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesaṃ.

    สิกฺขํปจฺจาจิกฺขณสิกฺขาปทํ

    Sikkhaṃpaccācikkhaṇasikkhāpadaṃ

    ๑๐. ยา ปน ภิกฺขุนี กุปิตา อนตฺตมนา เอวํ วเทยฺย ‘‘พุทฺธํ ปจฺจาจิกฺขามิ ธมฺมํ ปจฺจาจิกฺขามิ, สงฺฆํ ปจฺจาจิกฺขามิ, สิกฺขํ ปจฺจาจิกฺขามิ, กินฺนุมาว สมณิโย ยา สมณิโย สกฺยธีตโร, สนฺตญฺญาปิ สมณิโย ลชฺชินิโย กุกฺกุจฺจิกา สิกฺขากามา, ตาสาหํ สนฺติเก พฺรหฺมจริยํ จริสฺสามี’’ติฯ สา ภิกฺขุนี ภิกฺขุนีหิ เอวมสฺส วจนียา ‘‘มาเยฺย กุปิตา อนตฺตมนา เอวํ อวจ ‘พุทฺธํ ปจฺจาจิกฺขามิ, ธมฺมํ ปจฺจาจิกฺขามิ, สงฺฆํ ปจฺจาจิกฺขามิ, สิกฺขํ ปจฺจาจิกฺขามิ, กินฺนุมาว สมณิโย ยา สมณิโย สกฺยธีตโร, สนฺตญฺญาปิ สมณิโย ลชฺชินิโย กุกฺกุจฺจิกา สิกฺขากามา, ตาสาหํ สนฺติเก พฺรหฺมจริยํ จริสฺสามี’ติ, อภิรมาเยฺย, สฺวากฺขาโต ธโมฺม, จร พฺรหฺมจริยํ สมฺมา ทุกฺขสฺส อนฺตกิริยายา’’ติ, เอวญฺจ สา ภิกฺขุนี ภิกฺขุนีหิ วุจฺจมานา ตเถว ปคฺคเณฺหยฺย, สา ภิกฺขุนี ภิกฺขุนีหิ ยาวตติยํ สมนุภาสิตพฺพา ตสฺส ปฎินิสฺสคฺคาย, ยาวตติยเญฺจ สมนุภาสิยมานา ตํ ปฎินิสฺสเชฺชยฺย, อิเจฺจตํ กุสลํ, โน เจ ปฎินิสฺสเชฺชยฺย, อยมฺปิ ภิกฺขุนี ยาวตติยกํ ธมฺมํ อาปนฺนา นิสฺสารณียํ สงฺฆาทิเสสํฯ

    10. Yā pana bhikkhunī kupitā anattamanā evaṃ vadeyya ‘‘buddhaṃ paccācikkhāmi dhammaṃ paccācikkhāmi, saṅghaṃ paccācikkhāmi, sikkhaṃ paccācikkhāmi, kinnumāva samaṇiyo yā samaṇiyo sakyadhītaro, santaññāpi samaṇiyo lajjiniyo kukkuccikā sikkhākāmā, tāsāhaṃ santike brahmacariyaṃ carissāmī’’ti. Sā bhikkhunī bhikkhunīhi evamassa vacanīyā ‘‘māyye kupitā anattamanā evaṃ avaca ‘buddhaṃ paccācikkhāmi, dhammaṃ paccācikkhāmi, saṅghaṃ paccācikkhāmi, sikkhaṃ paccācikkhāmi, kinnumāva samaṇiyo yā samaṇiyo sakyadhītaro, santaññāpi samaṇiyo lajjiniyo kukkuccikā sikkhākāmā, tāsāhaṃ santike brahmacariyaṃ carissāmī’ti, abhiramāyye, svākkhāto dhammo, cara brahmacariyaṃ sammā dukkhassa antakiriyāyā’’ti, evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṃ samanubhāsitabbā tassa paṭinissaggāya, yāvatatiyañce samanubhāsiyamānā taṃ paṭinissajjeyya, iccetaṃ kusalaṃ, no ce paṭinissajjeyya, ayampi bhikkhunī yāvatatiyakaṃ dhammaṃ āpannā nissāraṇīyaṃ saṅghādisesaṃ.

    อธิกรณกุปิตสิกฺขาปทํ

    Adhikaraṇakupitasikkhāpadaṃ

    ๑๑. ยา ปน ภิกฺขุนี กิสฺมิญฺจิเทว อธิกรเณ ปจฺจากตา กุปิตา อนตฺตมนา เอวํ วเทยฺย ‘‘ฉนฺทคามินิโย จ ภิกฺขุนิโย, โทสคามินิโย จ ภิกฺขุนิโย, โมหคามินิโย จ ภิกฺขุนิโย, ภยคามินิโย จ ภิกฺขุนิโย’’ติ, สา ภิกฺขุนี ภิกฺขุนีหิ เอวมสฺส วจนียา ‘‘มาเยฺย, กิสฺมิญฺจิเทว อธิกรเณ ปจฺจากตา กุปิตา อนตฺตมนา เอวํ อวจ ‘ฉนฺทคามินิโย จ ภิกฺขุนิโย, โทสคามินิโย จ ภิกฺขุนิโย, โมหคามินิโย จ ภิกฺขุนิโย, ภยคามินิโย จ ภิกฺขุนิโย’ติ, อยฺยา โข ฉนฺทาปิ คเจฺฉยฺย, โทสาปิ คเจฺฉยฺย, โมหาปิ คเจฺฉยฺย, ภยาปิ คเจฺฉยฺยา’’ติฯ เอวญฺจ สา ภิกฺขุนี ภิกฺขุนีหิ วุจฺจมานา ตเถว ปคฺคเณฺหยฺย, สา ภิกฺขุนี ภิกฺขุนีหิ ยาวตติยํ สมนุภาสิตพฺพา ตสฺส ปฎินิสฺสคฺคาย, ยาวตติยเญฺจ สมนุภาสิยมานา ตํ ปฎินิสฺสเชฺชยฺย, อิเจฺจตํ กุสลํ, โน เจ ปฎินิสฺสเชฺชยฺย, อยมฺปิ ภิกฺขุนี ยาวตติยกํ ธมฺมํ อาปนฺนา นิสฺสารณียํ สงฺฆาทิเสสํฯ

    11. Yā pana bhikkhunī kismiñcideva adhikaraṇe paccākatā kupitā anattamanā evaṃ vadeyya ‘‘chandagāminiyo ca bhikkhuniyo, dosagāminiyo ca bhikkhuniyo, mohagāminiyo ca bhikkhuniyo, bhayagāminiyo ca bhikkhuniyo’’ti, sā bhikkhunī bhikkhunīhi evamassa vacanīyā ‘‘māyye, kismiñcideva adhikaraṇe paccākatā kupitā anattamanā evaṃ avaca ‘chandagāminiyo ca bhikkhuniyo, dosagāminiyo ca bhikkhuniyo, mohagāminiyo ca bhikkhuniyo, bhayagāminiyo ca bhikkhuniyo’ti, ayyā kho chandāpi gaccheyya, dosāpi gaccheyya, mohāpi gaccheyya, bhayāpi gaccheyyā’’ti. Evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṃ samanubhāsitabbā tassa paṭinissaggāya, yāvatatiyañce samanubhāsiyamānā taṃ paṭinissajjeyya, iccetaṃ kusalaṃ, no ce paṭinissajjeyya, ayampi bhikkhunī yāvatatiyakaṃ dhammaṃ āpannā nissāraṇīyaṃ saṅghādisesaṃ.

    ปาปสมาจารปฐมสิกฺขาปทํ

    Pāpasamācārapaṭhamasikkhāpadaṃ

    ๑๒. ภิกฺขุนิโย ปเนว สํสฎฺฐา วิหรนฺติ ปาปาจารา ปาปสทฺทา ปาปสิโลกา ภิกฺขุนิสงฺฆสฺส วิเหสิกา อญฺญมญฺญิสฺสา วชฺชปฺปฎิจฺฉาทิกา, ตา ภิกฺขุนิโย ภิกฺขุนีหิ เอวมสฺสุ วจนียา ‘‘ภคินิโย โข สํสฎฺฐา วิหรนฺติ ปาปาจารา ปาปสทฺทา ปาปสิโลกา ภิกฺขุนิสงฺฆสฺส วิเหสิกา อญฺญมญฺญิสฺสา วชฺชปฺปฎิจฺฉาทิกา, วิวิจฺจถาเยฺย, วิเวกเญฺญว ภคินีนํ สโงฺฆ วเณฺณตี’’ติ, เอวญฺจ ตา ภิกฺขุนิโย ภิกฺขุนีหิ วุจฺจมานา ตเถว ปคฺคเณฺหยฺยุํ, ตา ภิกฺขุนิโย ภิกฺขุนีหิ ยาวตติยํ สมนุภาสิตพฺพา ตสฺส ปฎินิสฺสคฺคาย, ยาวตติยเญฺจ สมนุภาสิยมานา ตํ ปฎินิสฺสเชฺชยฺยุํ, อิเจฺจตํ กุสลํ, โน เจ ปฎินิสฺสเชฺชยฺยุํ, อิมาปิ ภิกฺขุนิโย ยาวตติยกํ ธมฺมํ อาปนฺนา นิสฺสารณียํ สงฺฆาทิเสสํฯ

    12. Bhikkhuniyo paneva saṃsaṭṭhā viharanti pāpācārā pāpasaddā pāpasilokā bhikkhunisaṅghassa vihesikā aññamaññissā vajjappaṭicchādikā, tā bhikkhuniyo bhikkhunīhi evamassu vacanīyā ‘‘bhaginiyo kho saṃsaṭṭhā viharanti pāpācārā pāpasaddā pāpasilokā bhikkhunisaṅghassa vihesikā aññamaññissā vajjappaṭicchādikā, viviccathāyye, vivekaññeva bhaginīnaṃ saṅgho vaṇṇetī’’ti, evañca tā bhikkhuniyo bhikkhunīhi vuccamānā tatheva paggaṇheyyuṃ, tā bhikkhuniyo bhikkhunīhi yāvatatiyaṃ samanubhāsitabbā tassa paṭinissaggāya, yāvatatiyañce samanubhāsiyamānā taṃ paṭinissajjeyyuṃ, iccetaṃ kusalaṃ, no ce paṭinissajjeyyuṃ, imāpi bhikkhuniyo yāvatatiyakaṃ dhammaṃ āpannā nissāraṇīyaṃ saṅghādisesaṃ.

    ปาปสมาจารทุติยสิกฺขาปทํ

    Pāpasamācāradutiyasikkhāpadaṃ

    ๑๓. ยา ปน ภิกฺขุนี เอวํ วเทยฺย ‘‘สํสฎฺฐาว, อเยฺย, ตุเมฺห วิหรถ, มา ตุเมฺห นานา วิหริตฺถ, สนฺติ สเงฺฆ อญฺญาปิ ภิกฺขุนิโย เอวาจารา เอวํสทฺทา เอวํสิโลกา ภิกฺขุนิสงฺฆสฺส วิเหสิกา อญฺญมญฺญิสฺสา วชฺชปฺปฎิจฺฉาทิกา, ตา สโงฺฆ น กิญฺจิ อาห ตุมฺหเญฺญว สโงฺฆ อุญฺญาย ปริภเวน อกฺขนฺติยา เวภสฺสิยา ทุพฺพลฺยา เอวมาห – ‘ภคินิโย โข สํสฎฺฐา วิหรนฺติ ปาปาจารา ปาปสทฺทา ปาปสิโลกา ภิกฺขุนิสงฺฆสฺส วิเหสิกา อญฺญมญฺญิสฺสา วชฺชปฺปฎิจฺฉาทิกา, วิวิจฺจถาเยฺย, วิเวกเญฺญว ภคินีนํ สโงฺฆ วเณฺณตี’’’ติ, สา ภิกฺขุนี ภิกฺขุนีหิ เอวมสฺส วจนียา ‘‘มาเยฺย, เอวํ อวจ, สํสฎฺฐาว อเยฺย ตุเมฺห วิหรถ, มา ตุเมฺห นานา วิหริตฺถ, สนฺติ สเงฺฆ อญฺญาปิ ภิกฺขุนิโย เอวาจารา เอวํสทฺทา เอวํสิโลกา ภิกฺขุนิสงฺฆสฺส วิเหสิกา อญฺญมญฺญิสฺสา วชฺชปฺปฎิจฺฉาทิกา, ตา สโงฺฆ น กิญฺจิ อาห, ตุมฺหเญฺญว สโงฺฆ อุญฺญาย ปริภเวน อกฺขนฺติยา เวภสฺสิยา ทุพฺพลฺยา เอวมาห – ‘ภคินิโย โข สํสฎฺฐา วิหรนฺติ ปาปาจารา ปาปสทฺทา ปาปสิโลกา ภิกฺขุนิสงฺฆสฺส วิเหสิกา อญฺญมญฺญิสฺสา วชฺชปฺปฎิจฺฉาทิกา, วิวิจฺจถาเยฺย, วิเวกเญฺญว ภคินีนํ สโงฺฆ วเณฺณตี’’’ติ, เอวญฺจ สา ภิกฺขุนี ภิกฺขุนีหิ วุจฺจมานา ตเถว ปคฺคเณฺหยฺย, สา ภิกฺขุนี ภิกฺขุนีหิ ยาวตติยํ สมนุภาสิตพฺพา ตสฺส ปฎินิสฺสคฺคาย, ยาวตติยเญฺจ สมนุภาสิยมานา ตํ ปฎินิสฺสเชฺชยฺย, อิเจฺจตํ กุสลํ, โน เจ ปฎินิสฺสเชฺชยฺย, อยมฺปิ ภิกฺขุนี ยาวตติยกํ ธมฺมํ อาปนฺนา นิสฺสารณียํ สงฺฆาทิเสสํฯ

    13. Yā pana bhikkhunī evaṃ vadeyya ‘‘saṃsaṭṭhāva, ayye, tumhe viharatha, mā tumhe nānā viharittha, santi saṅghe aññāpi bhikkhuniyo evācārā evaṃsaddā evaṃsilokā bhikkhunisaṅghassa vihesikā aññamaññissā vajjappaṭicchādikā, tā saṅgho na kiñci āha tumhaññeva saṅgho uññāya paribhavena akkhantiyā vebhassiyā dubbalyā evamāha – ‘bhaginiyo kho saṃsaṭṭhā viharanti pāpācārā pāpasaddā pāpasilokā bhikkhunisaṅghassa vihesikā aññamaññissā vajjappaṭicchādikā, viviccathāyye, vivekaññeva bhaginīnaṃ saṅgho vaṇṇetī’’’ti, sā bhikkhunī bhikkhunīhi evamassa vacanīyā ‘‘māyye, evaṃ avaca, saṃsaṭṭhāva ayye tumhe viharatha, mā tumhe nānā viharittha, santi saṅghe aññāpi bhikkhuniyo evācārā evaṃsaddā evaṃsilokā bhikkhunisaṅghassa vihesikā aññamaññissā vajjappaṭicchādikā, tā saṅgho na kiñci āha, tumhaññeva saṅgho uññāya paribhavena akkhantiyā vebhassiyā dubbalyā evamāha – ‘bhaginiyo kho saṃsaṭṭhā viharanti pāpācārā pāpasaddā pāpasilokā bhikkhunisaṅghassa vihesikā aññamaññissā vajjappaṭicchādikā, viviccathāyye, vivekaññeva bhaginīnaṃ saṅgho vaṇṇetī’’’ti, evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṃ samanubhāsitabbā tassa paṭinissaggāya, yāvatatiyañce samanubhāsiyamānā taṃ paṭinissajjeyya, iccetaṃ kusalaṃ, no ce paṭinissajjeyya, ayampi bhikkhunī yāvatatiyakaṃ dhammaṃ āpannā nissāraṇīyaṃ saṅghādisesaṃ.

    สงฺฆเภทกสิกฺขาปทํ

    Saṅghabhedakasikkhāpadaṃ

    ๑๔. ยา ปน ภิกฺขุนี สมคฺคสฺส สงฺฆสฺส เภทาย ปรกฺกเมยฺย, เภทนสํวตฺตนิกํ วา อธิกรณํ สมาทาย ปคฺคยฺห ติเฎฺฐยฺย, สา ภิกฺขุนี ภิกฺขุนีหิ เอวมสฺส วจนียา ‘‘มายฺยา, สมคฺคสฺส สงฺฆสฺส เภทาย ปรกฺกมิ, เภทนสํวตฺตนิกํ วา อธิกรณํ สมาทาย ปคฺคยฺห อฎฺฐาสิ, สเมตายฺยา, สเงฺฆน, สมโคฺค หิ สโงฺฆ สโมฺมทมาโน อวิวทมาโน เอกุเทฺทโส ผาสุ วิหรตี’’ติฯ เอวญฺจ สา ภิกฺขุนี ภิกฺขุนีหิ วุจฺจมานา ตเถว ปคฺคเณฺหยฺย, สา ภิกฺขุนี ภิกฺขุนีหิ ยาวตติยํ สมนุภาสิตพฺพา ตสฺส ปฎินิสฺสคฺคาย, ยาวตติยเญฺจ สมนุภาสิยมานา ตํ ปฎินิสฺสเชฺชยฺย, อิเจฺจตํ กุสลํฯ โน เจ ปฎินิสฺสเชฺชยฺย, อยมฺปิ ภิกฺขุนี ยาวตติยกํ ธมฺมํ อาปนฺนา นิสฺสารณียํ สงฺฆาทิเสสํฯ

    14. Yā pana bhikkhunī samaggassa saṅghassa bhedāya parakkameyya, bhedanasaṃvattanikaṃ vā adhikaraṇaṃ samādāya paggayha tiṭṭheyya, sā bhikkhunī bhikkhunīhi evamassa vacanīyā ‘‘māyyā, samaggassa saṅghassa bhedāya parakkami, bhedanasaṃvattanikaṃ vā adhikaraṇaṃ samādāya paggayha aṭṭhāsi, sametāyyā, saṅghena, samaggo hi saṅgho sammodamāno avivadamāno ekuddeso phāsu viharatī’’ti. Evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṃ samanubhāsitabbā tassa paṭinissaggāya, yāvatatiyañce samanubhāsiyamānā taṃ paṭinissajjeyya, iccetaṃ kusalaṃ. No ce paṭinissajjeyya, ayampi bhikkhunī yāvatatiyakaṃ dhammaṃ āpannā nissāraṇīyaṃ saṅghādisesaṃ.

    เภทานุวตฺตกสิกฺขาปทํ

    Bhedānuvattakasikkhāpadaṃ

    ๑๕. ตสฺสาเยว โข ปน ภิกฺขุนิยา ภิกฺขุนิโย โหนฺติ อนุวตฺติกา วคฺควาทิกา เอกา วา เทฺว วา ติโสฺส วา, ตา เอวํ วเทยฺยุํ ‘‘มายฺยาโย, เอตํ ภิกฺขุนิํ กิญฺจิ อวจุตฺถ ธมฺมวาทินี เจสา ภิกฺขุนี, วินยวาทินี เจสา ภิกฺขุนี, อมฺหากเญฺจสา ภิกฺขุนี ฉนฺทญฺจ รุจิญฺจ อาทาย โวหรติ, ชานาติ, โน ภาสติ, อมฺหากเมฺปตํ ขมตี’’ติ, ตา ภิกฺขุนิโย ภิกฺขุนีหิ เอวมสฺสุ วจนียา ‘‘มายฺยาโย, เอวํ อวจุตฺถ, น เจสา ภิกฺขุนี ธมฺมวาทินี, น เจสา ภิกฺขุนี วินยวาทินี, มายฺยานมฺปิ สงฺฆเภโท รุจฺจิตฺถ, สเมตายฺยานํ สเงฺฆน, สมโคฺค หิ สโงฺฆ สโมฺมทมาโน อวิวทมาโน เอกุเทฺทโส ผาสุ วิหรตี’’ติ, เอวญฺจ ตา ภิกฺขุนิโย ภิกฺขุนีหิ วุจฺจมานา ตเถว ปคฺคเณฺหยฺยุํ, ตา ภิกฺขุนิโย ภิกฺขุนีหิ ยาวตติยํ สมนุภาสิตพฺพา ตสฺส ปฎินิสฺสคฺคาย, ยาวตติยเญฺจ สมนุภาสิยมานา ตํ ปฎินิสฺสเชฺชยฺยุํฯ อิเจฺจตํ กุสลํฯ โน เจ ปฎินิสฺสเชฺชยฺยุํ, อิมาปิ ภิกฺขุนิโย ยาวตติยกํ ธมฺมํ อาปนฺนา นิสฺสารณียํ สงฺฆาทิเสสํฯ

    15. Tassāyeva kho pana bhikkhuniyā bhikkhuniyo honti anuvattikā vaggavādikā ekā vā dve vā tisso vā, tā evaṃ vadeyyuṃ ‘‘māyyāyo, etaṃ bhikkhuniṃ kiñci avacuttha dhammavādinī cesā bhikkhunī, vinayavādinī cesā bhikkhunī, amhākañcesā bhikkhunī chandañca ruciñca ādāya voharati, jānāti, no bhāsati, amhākampetaṃ khamatī’’ti, tā bhikkhuniyo bhikkhunīhi evamassu vacanīyā ‘‘māyyāyo, evaṃ avacuttha, na cesā bhikkhunī dhammavādinī, na cesā bhikkhunī vinayavādinī, māyyānampi saṅghabhedo ruccittha, sametāyyānaṃ saṅghena, samaggo hi saṅgho sammodamāno avivadamāno ekuddeso phāsu viharatī’’ti, evañca tā bhikkhuniyo bhikkhunīhi vuccamānā tatheva paggaṇheyyuṃ, tā bhikkhuniyo bhikkhunīhi yāvatatiyaṃ samanubhāsitabbā tassa paṭinissaggāya, yāvatatiyañce samanubhāsiyamānā taṃ paṭinissajjeyyuṃ. Iccetaṃ kusalaṃ. No ce paṭinissajjeyyuṃ, imāpi bhikkhuniyo yāvatatiyakaṃ dhammaṃ āpannā nissāraṇīyaṃ saṅghādisesaṃ.

    ทุพฺพจสิกฺขาปทํ

    Dubbacasikkhāpadaṃ

    ๑๖. ภิกฺขุนี ปเนว ทุพฺพจชาติกา โหติ อุเทฺทสปริยาปเนฺนสุ สิกฺขาปเทสุ ภิกฺขุนีหิ สหธมฺมิกํ วุจฺจมานา อตฺตานํ อวจนียํ กโรติ ‘‘มา มํ อยฺยาโย กิญฺจิ อวจุตฺถ กลฺยาณํ วา ปาปกํ วา, อหมฺปายฺยาโย, น กิญฺจิ วกฺขามิ กลฺยาณํ วา ปาปกํ วา, วิรมถายฺยาโย, มม วจนายา’’ติ, สา ภิกฺขุนี ภิกฺขุนีหิ เอวมสฺส วจนียา ‘‘มายฺยา, อตฺตานํ อวจนียํ อกาสิ, วจนียเมว, อยฺยา, อตฺตานํ กโรตุ, อยฺยาปิ ภิกฺขุนิโย วทตุ สหธเมฺมน, ภิกฺขุนิโยปิ อยฺยํ วกฺขนฺติ สหธเมฺมน, เอวํ สํวทฺธา หิ ตสฺส ภควโต ปริสา ยทิทํ อญฺญมญฺญวจเนน อญฺญมญฺญวุฎฺฐาปเนนา’’ติฯ เอวญฺจ สา ภิกฺขุนี ภิกฺขุนีหิ วุจฺจมานา ตเถว ปคฺคเณฺหยฺย, สา ภิกฺขุนี ภิกฺขุนีหิ ยาวตติยํ สมนุภาสิตพฺพา ตสฺส ปฎินิสฺสคฺคาย, ยาวตติยเญฺจ สมนุภาสิยมานา ตํ ปฎินิสฺสเชฺชยฺย, อิเจฺจตํ กุสลํฯ โน เจ ปฎินิสฺสเชฺชยฺย, อยมฺปิ ภิกฺขุนี ยาวตติยกํ ธมฺมํ อาปนฺนา นิสฺสารณียํ สงฺฆาทิเสสํฯ

    16. Bhikkhunī paneva dubbacajātikā hoti uddesapariyāpannesu sikkhāpadesu bhikkhunīhi sahadhammikaṃ vuccamānā attānaṃ avacanīyaṃ karoti ‘‘mā maṃ ayyāyo kiñci avacuttha kalyāṇaṃ vā pāpakaṃ vā, ahampāyyāyo, na kiñci vakkhāmi kalyāṇaṃ vā pāpakaṃ vā, viramathāyyāyo, mama vacanāyā’’ti, sā bhikkhunī bhikkhunīhi evamassa vacanīyā ‘‘māyyā, attānaṃ avacanīyaṃ akāsi, vacanīyameva, ayyā, attānaṃ karotu, ayyāpi bhikkhuniyo vadatu sahadhammena, bhikkhuniyopi ayyaṃ vakkhanti sahadhammena, evaṃ saṃvaddhā hi tassa bhagavato parisā yadidaṃ aññamaññavacanena aññamaññavuṭṭhāpanenā’’ti. Evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṃ samanubhāsitabbā tassa paṭinissaggāya, yāvatatiyañce samanubhāsiyamānā taṃ paṭinissajjeyya, iccetaṃ kusalaṃ. No ce paṭinissajjeyya, ayampi bhikkhunī yāvatatiyakaṃ dhammaṃ āpannā nissāraṇīyaṃ saṅghādisesaṃ.

    กุลทูสกสิกฺขาปทํ

    Kuladūsakasikkhāpadaṃ

    ๑๗. ภิกฺขุนี ปเนว อญฺญตรํ คามํ วา นิคมํ วา อุปนิสฺสาย วิหรติ กุลทูสิกา ปาปสมาจารา, ตสฺสา โข ปาปกา สมาจารา ทิสฺสนฺติ เจว สุยฺยนฺติ จ, กุลานิ จ ตาย ทุฎฺฐานิ ทิสฺสนฺติ เจว สุยฺยนฺติ จ, สา ภิกฺขุนี ภิกฺขุนีหิ เอวมสฺส วจนียา ‘‘อยฺยา, โข กุลทูสิกา ปาปสมาจารา, อยฺยาย โข ปาปกา สมาจารา ทิสฺสนฺติ เจว สุยฺยนฺติ จ, กุลานิ จายฺยาย, ทุฎฺฐานิ ทิสฺสนฺติ เจว สุยฺยนฺติ จ, ปกฺกมตายฺยา อิมมฺหา อาวาสา, อลํ เต อิธ วาเสนา’’ติฯ เอวญฺจ สา ภิกฺขุนี ภิกฺขุนีหิ วุจฺจมานา ตา ภิกฺขุนิโย เอวํ วเทยฺย ‘‘ฉนฺทคามินิโย จ ภิกฺขุนิโย, โทสคามินิโย จ ภิกฺขุนิโย, โมหคามินิโย จ ภิกฺขุนิโย, ภยคามินิโย จ ภิกฺขุนิโย, ตาทิสิกาย อาปตฺติยา เอกจฺจํ ปพฺพาเชนฺติ เอกจฺจํ น ปพฺพาเชนฺตี’’ติ, สา ภิกฺขุนี ภิกฺขุนีหิ เอวมสฺส วจนียา ‘‘มายฺยา, เอวํ อวจ, น จ ภิกฺขุนิโย ฉนฺทคามินิโย, น จ ภิกฺขุนิโย โทสคามินิโย , น จ ภิกฺขุนิโย โมหคามินิโย, น จ ภิกฺขุนิโย ภยคามินิโย, อยฺยา โข กุลทูสิกา ปาปสมาจารา, อยฺยาย โข ปาปกา สมาจารา ทิสฺสนฺติ เจว สุยฺยนฺติ จ, กุลานิ จายฺยาย ทุฎฺฐานิ ทิสฺสนฺติ เจว สุยฺยนฺติ จ, ปกฺกมตายฺยา, อิมมฺหา อาวาสา อลํ เต อิธ วาเสนา’’ติฯ เอวญฺจ สา ภิกฺขุนี ภิกฺขุนีหิ วุจฺจมานา ตเถว ปคฺคเณฺหยฺย, สา ภิกฺขุนี ภิกฺขุนีหิ ยาวตติยํ สมนุภาสิตพฺพา ตสฺส ปฎินิสฺสคฺคาย, ยาวตติยเญฺจ สมนุภาสิยมานา ตํ ปฎินิสฺสเชฺชยฺย, อิเจฺจตํ กุสลํฯ โน เจ ปฎินิสฺสเชฺชยฺย, อยมฺปิ ภิกฺขุนี ยาวตติยกํ ธมฺมํ อาปนฺนา นิสฺสารณียํ สงฺฆาทิเสสํฯ

    17. Bhikkhunī paneva aññataraṃ gāmaṃ vā nigamaṃ vā upanissāya viharati kuladūsikā pāpasamācārā, tassā kho pāpakā samācārā dissanti ceva suyyanti ca, kulāni ca tāya duṭṭhāni dissanti ceva suyyanti ca, sā bhikkhunī bhikkhunīhi evamassa vacanīyā ‘‘ayyā, kho kuladūsikā pāpasamācārā, ayyāya kho pāpakā samācārā dissanti ceva suyyanti ca, kulāni cāyyāya, duṭṭhāni dissanti ceva suyyanti ca, pakkamatāyyā imamhā āvāsā, alaṃ te idha vāsenā’’ti. Evañca sā bhikkhunī bhikkhunīhi vuccamānā tā bhikkhuniyo evaṃ vadeyya ‘‘chandagāminiyo ca bhikkhuniyo, dosagāminiyo ca bhikkhuniyo, mohagāminiyo ca bhikkhuniyo, bhayagāminiyo ca bhikkhuniyo, tādisikāya āpattiyā ekaccaṃ pabbājenti ekaccaṃ na pabbājentī’’ti, sā bhikkhunī bhikkhunīhi evamassa vacanīyā ‘‘māyyā, evaṃ avaca, na ca bhikkhuniyo chandagāminiyo, na ca bhikkhuniyo dosagāminiyo , na ca bhikkhuniyo mohagāminiyo, na ca bhikkhuniyo bhayagāminiyo, ayyā kho kuladūsikā pāpasamācārā, ayyāya kho pāpakā samācārā dissanti ceva suyyanti ca, kulāni cāyyāya duṭṭhāni dissanti ceva suyyanti ca, pakkamatāyyā, imamhā āvāsā alaṃ te idha vāsenā’’ti. Evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṃ samanubhāsitabbā tassa paṭinissaggāya, yāvatatiyañce samanubhāsiyamānā taṃ paṭinissajjeyya, iccetaṃ kusalaṃ. No ce paṭinissajjeyya, ayampi bhikkhunī yāvatatiyakaṃ dhammaṃ āpannā nissāraṇīyaṃ saṅghādisesaṃ.

    อุทฺทิฎฺฐา โข อยฺยาโย สตฺตรส สงฺฆาทิเสสา ธมฺมา นว ปฐมาปตฺติกา, อฎฺฐ ยาวตติยกา,

    Uddiṭṭhā kho ayyāyo sattarasa saṅghādisesā dhammā nava paṭhamāpattikā, aṭṭha yāvatatiyakā,

    เยสํ ภิกฺขุนี อญฺญตรํ วา อญฺญตรํ วา อาปชฺชติ, ตาย ภิกฺขุนิยา อุภโตสเงฺฆ ปกฺขมานตฺตํ จริตพฺพํฯ จิณฺณมานตฺตา ภิกฺขุนี ยตฺถ สิยา วีสติคโณ ภิกฺขุนิสโงฺฆ, ตตฺถ สา ภิกฺขุนี อเพฺภตพฺพาฯ เอกายปิ เจ อูโน วีสติคโณ ภิกฺขุนิสโงฺฆ ตํ ภิกฺขุนิํ อเพฺภยฺย, สา จ ภิกฺขุนี อนพฺภิตา, ตา จ ภิกฺขุนิโย คารยฺหา, อยํ ตตฺถ สามีจิฯ ตตฺถายฺยาโย ปุจฺฉามิ, กจฺจิตฺถ ปริสุทฺธา, ทุติยมฺปิ, ปุจฺฉามิ, กจฺจิตฺถ ปริสุทฺธา, ตติยมฺปิ ปุจฺฉามิ, กจฺจิตฺถ ปริสุทฺธา, ปริสุเทฺธตฺถายฺยาโย, ตสฺมา ตุณฺหี, เอวเมตํ ธารยามีติฯ

    Yesaṃ bhikkhunī aññataraṃ vā aññataraṃ vā āpajjati, tāya bhikkhuniyā ubhatosaṅghe pakkhamānattaṃ caritabbaṃ. Ciṇṇamānattā bhikkhunī yattha siyā vīsatigaṇo bhikkhunisaṅgho, tattha sā bhikkhunī abbhetabbā. Ekāyapi ce ūno vīsatigaṇo bhikkhunisaṅgho taṃ bhikkhuniṃ abbheyya, sā ca bhikkhunī anabbhitā, tā ca bhikkhuniyo gārayhā, ayaṃ tattha sāmīci. Tatthāyyāyo pucchāmi, kaccittha parisuddhā, dutiyampi, pucchāmi, kaccittha parisuddhā, tatiyampi pucchāmi, kaccittha parisuddhā, parisuddhetthāyyāyo, tasmā tuṇhī, evametaṃ dhārayāmīti.

    สงฺฆาทิเสโส นิฎฺฐิโตฯ

    Saṅghādiseso niṭṭhito.

    นิสฺสคฺคิย ปาจิตฺติยา

    Nissaggiya pācittiyā

    อิเม โข ปนายฺยาโย ติํส นิสฺสคฺคิยา ปาจิตฺติยา

    Ime kho panāyyāyo tiṃsa nissaggiyā pācittiyā

    ธมฺมา อุเทฺทสํ อาคจฺฉนฺติฯ

    Dhammā uddesaṃ āgacchanti.

    ปตฺตสนฺนิจยสิกฺขาปทํ

    Pattasannicayasikkhāpadaṃ

    ๑. ยา ปน ภิกฺขุนี ปตฺตสนฺนิจยํ กเรยฺย, นิสฺสคฺคิยํ ปาจิตฺติยํฯ

    1. Yā pana bhikkhunī pattasannicayaṃ kareyya, nissaggiyaṃ pācittiyaṃ.

    อกาลจีวรภาชนสิกฺขาปทํ

    Akālacīvarabhājanasikkhāpadaṃ

    ๒. ยา ปน ภิกฺขุนี อกาลจีวรํ ‘‘กาลจีวร’’นฺติ อธิฎฺฐหิตฺวา ภาชาเปยฺย, นิสฺสคฺคิยํ ปาจิตฺติยํฯ

    2. Yā pana bhikkhunī akālacīvaraṃ ‘‘kālacīvara’’nti adhiṭṭhahitvā bhājāpeyya, nissaggiyaṃ pācittiyaṃ.

    จีวรปริวตฺตนสิกฺขาปทํ

    Cīvaraparivattanasikkhāpadaṃ

    ๓. ยา ปน ภิกฺขุนี ภิกฺขุนิยา สทฺธิํ จีวรํ ปริวเตฺตตฺวา สา ปจฺฉา เอวํ วเทยฺย ‘‘หนฺทาเยฺย, ตุยฺหํ จีวรํ, อาหร เมตํ จีวรํ, ยํ ตุยฺหํ ตุยฺหเมเวตํ, ยํ มยฺหํ มยฺหเมเวตํ, อาหร เมตํ จีวรํ, สกํ ปจฺจาหรา’’ติ อจฺฉิเนฺทยฺย วา อจฺฉินฺทาเปยฺย วา, นิสฺสคฺคิยํ ปาจิตฺติยํฯ

    3. Yā pana bhikkhunī bhikkhuniyā saddhiṃ cīvaraṃ parivattetvā sā pacchā evaṃ vadeyya ‘‘handāyye, tuyhaṃ cīvaraṃ, āhara metaṃ cīvaraṃ, yaṃ tuyhaṃ tuyhamevetaṃ, yaṃ mayhaṃ mayhamevetaṃ, āhara metaṃ cīvaraṃ, sakaṃ paccāharā’’ti acchindeyya vā acchindāpeyya vā, nissaggiyaṃ pācittiyaṃ.

    อญฺญวิญฺญาปนสิกฺขาปทํ

    Aññaviññāpanasikkhāpadaṃ

    ๔. ยา ปน ภิกฺขุนี อญฺญํ วิญฺญาเปตฺวา อญฺญํ วิญฺญาเปยฺย, นิสฺสคฺคิยํ ปาจิตฺติยํฯ

    4. Yā pana bhikkhunī aññaṃ viññāpetvā aññaṃ viññāpeyya, nissaggiyaṃ pācittiyaṃ.

    อญฺญเจตาปน สิกฺขาปทํ

    Aññacetāpana sikkhāpadaṃ

    ๕. ยา ปน ภิกฺขุนี อญฺญํ เจตาเปตฺวา อญฺญํ เจตาเปยฺย, นิสฺสคฺคิยํ ปาจิตฺติยํฯ

    5. Yā pana bhikkhunī aññaṃ cetāpetvā aññaṃ cetāpeyya, nissaggiyaṃ pācittiyaṃ.

    ปฐมสงฺฆิกเจตาปนสิกฺขาปทํ

    Paṭhamasaṅghikacetāpanasikkhāpadaṃ

    ๖. ยา ปน ภิกฺขุนี อญฺญทตฺถิเกน ปริกฺขาเรน อญฺญุทฺทิสิเกน สงฺฆิเกน อญฺญํ เจตาเปยฺย, นิสฺสคฺคิยํ ปาจิตฺติยํฯ

    6. Yā pana bhikkhunī aññadatthikena parikkhārena aññuddisikena saṅghikena aññaṃ cetāpeyya, nissaggiyaṃ pācittiyaṃ.

    ทุติยสงฺฆิกเจตาปนสิกฺขาปทํ

    Dutiyasaṅghikacetāpanasikkhāpadaṃ

    ๗. ยา ปน ภิกฺขุนี อญฺญทตฺถิเกน ปริกฺขาเรน อญฺญุทฺทิสิเกน สงฺฆิเกน สญฺญาจิเกน อญฺญํ เจตาเปยฺย, นิสฺสคฺคิยํ ปาจิตฺติยํฯ

    7. Yā pana bhikkhunī aññadatthikena parikkhārena aññuddisikena saṅghikena saññācikena aññaṃ cetāpeyya, nissaggiyaṃ pācittiyaṃ.

    ปฐมคณิกเจตาปนสิกฺขาปทํ

    Paṭhamagaṇikacetāpanasikkhāpadaṃ

    ๘. ยา ปน ภิกฺขุนี อญฺญทตฺถิเกน ปริกฺขาเรน อญฺญุทฺทิสิเกน มหาชนิเกน อญฺญํ เจตาเปยฺย, นิสฺสคฺคิยํ ปาจิตฺติยํฯ

    8. Yā pana bhikkhunī aññadatthikena parikkhārena aññuddisikena mahājanikena aññaṃ cetāpeyya, nissaggiyaṃ pācittiyaṃ.

    ทุติยคณิกเจตาปนสิกฺขาปทํ

    Dutiyagaṇikacetāpanasikkhāpadaṃ

    ๙. ยา ปน ภิกฺขุนี อญฺญทตฺถิเกน ปริกฺขาเรน อญฺญุทฺทิสิเกน มหาชนิเกน สญฺญาจิเกน อญฺญํ เจตาเปยฺย, นิสฺสคฺคิยํ ปาจิตฺติยํฯ

    9. Yā pana bhikkhunī aññadatthikena parikkhārena aññuddisikena mahājanikena saññācikena aññaṃ cetāpeyya, nissaggiyaṃ pācittiyaṃ.

    ปุคฺคลิกเจตาปนสิกฺขาปทํ

    Puggalikacetāpanasikkhāpadaṃ

    ๑๐. ยา ปน ภิกฺขุนี อญฺญทตฺถิเกน ปริกฺขาเรน อญฺญุทฺทิสิเกน ปุคฺคลิเกน สญฺญาจิเกน อญฺญํ เจตาเปยฺย, นิสฺสคฺคิยํ ปาจิตฺติยํฯ

    10. Yā pana bhikkhunī aññadatthikena parikkhārena aññuddisikena puggalikena saññācikena aññaṃ cetāpeyya, nissaggiyaṃ pācittiyaṃ.

    ปตฺตวโคฺค ปฐโมฯ

    Pattavaggo paṭhamo.

    ครุปาวุรณสิกฺขาปทํ

    Garupāvuraṇasikkhāpadaṃ

    ๑๑. ครุปาวุรณํ ปน ภิกฺขุนิยา เจตาเปนฺติยา จตุกฺกํสปรมํ เจตาเปตพฺพํฯ ตโต เจ อุตฺตริ เจตาเปยฺย, นิสฺสคฺคิยํ ปาจิตฺติยํฯ

    11. Garupāvuraṇaṃ pana bhikkhuniyā cetāpentiyā catukkaṃsaparamaṃ cetāpetabbaṃ. Tato ce uttari cetāpeyya, nissaggiyaṃ pācittiyaṃ.

    ลหุปาวุรณสิกฺขาปทํ

    Lahupāvuraṇasikkhāpadaṃ

    ๑๒. ลหุปาวุรณํ ปน ภิกฺขุนิยา เจตาเปนฺติยา อฑฺฒเตยฺยกํสปรมํ เจตาเปตพฺพํฯ ตโต เจ อุตฺตริ เจตาเปยฺย, นิสฺสคฺคิยํ ปาจิตฺติยํฯ

    12. Lahupāvuraṇaṃ pana bhikkhuniyā cetāpentiyā aḍḍhateyyakaṃsaparamaṃ cetāpetabbaṃ. Tato ce uttari cetāpeyya, nissaggiyaṃ pācittiyaṃ.

    กถินสิกฺขาปทํ

    Kathinasikkhāpadaṃ

    ๑๓. นิฎฺฐิตจีวรสฺมิํ ภิกฺขุนิยา อุพฺภตสฺมิํ กถิเน ทสาหปรมํ อติเรกจีวรํ ธาเรตพฺพํฯ ตํ อติกฺกาเมนฺติยา, นิสฺสคฺคิยํ ปาจิตฺติยํฯ

    13. Niṭṭhitacīvarasmiṃ bhikkhuniyā ubbhatasmiṃ kathine dasāhaparamaṃ atirekacīvaraṃ dhāretabbaṃ. Taṃ atikkāmentiyā, nissaggiyaṃ pācittiyaṃ.

    อุโทสิตสิกฺขาปทํ

    Udositasikkhāpadaṃ

    ๑๔. นิฎฺฐิตจีวรสฺมิํ ภิกฺขุนิยา อุพฺภตสฺมิํ กถิเน เอกรตฺตมฺปิ เจ ภิกฺขุนี ติจีวเรน วิปฺปวเสยฺย, อญฺญตฺร ภิกฺขุนิสมฺมุติยา นิสฺสคฺคิยํ ปาจิตฺติยํฯ

    14. Niṭṭhitacīvarasmiṃ bhikkhuniyā ubbhatasmiṃ kathine ekarattampi ce bhikkhunī ticīvarena vippavaseyya, aññatra bhikkhunisammutiyā nissaggiyaṃ pācittiyaṃ.

    อกาลจีวรสิกฺขาปทํ

    Akālacīvarasikkhāpadaṃ

    ๑๕. นิฎฺฐิตจีวรสฺมิํ ภิกฺขุนิยา อุพฺภตสฺมิํ กถิเน ภิกฺขุนิยา ปเนว อกาลจีวรํ อุปฺปเชฺชยฺย, อากงฺขมานาย ภิกฺขุนิยา ปฎิคฺคเหตพฺพํ, ปฎิคฺคเหตฺวา ขิปฺปเมว กาเรตพฺพํ, โน จสฺส ปาริปูริ, มาสปรมํ ตาย ภิกฺขุนิยา ตํ จีวรํ นิกฺขิปิตพฺพํ อูนสฺส ปาริปูริยา สติยา ปจฺจาสายฯ ตโต เจ อุตฺตริ นิกฺขิเปยฺย สติยาปิ ปจฺจาสาย, นิสฺสคฺคิยํ ปาจิตฺติยํฯ

    15. Niṭṭhitacīvarasmiṃ bhikkhuniyā ubbhatasmiṃ kathine bhikkhuniyā paneva akālacīvaraṃ uppajjeyya, ākaṅkhamānāya bhikkhuniyā paṭiggahetabbaṃ, paṭiggahetvā khippameva kāretabbaṃ, no cassa pāripūri, māsaparamaṃ tāya bhikkhuniyā taṃ cīvaraṃ nikkhipitabbaṃ ūnassa pāripūriyā satiyā paccāsāya. Tato ce uttari nikkhipeyya satiyāpi paccāsāya, nissaggiyaṃ pācittiyaṃ.

    อญฺญาตกวิญฺญตฺติสิกฺขาปทํ

    Aññātakaviññattisikkhāpadaṃ

    ๑๖. ยา ปน ภิกฺขุนี อญฺญาตกํ คหปติํ วา คหปตานิํ วา จีวรํ วิญฺญาเปยฺย อญฺญตฺร สมยา, นิสฺสคฺคิยํ ปาจิตฺติยํฯ ตตฺถายํ สมโย อจฺฉินฺนจีวรา วา โหติ ภิกฺขุนี, นฎฺฐจีวรา วา, อยํ ตตฺถ สมโยฯ

    16. Yā pana bhikkhunī aññātakaṃ gahapatiṃ vā gahapatāniṃ vā cīvaraṃ viññāpeyya aññatra samayā, nissaggiyaṃ pācittiyaṃ. Tatthāyaṃ samayo acchinnacīvarā vā hoti bhikkhunī, naṭṭhacīvarā vā, ayaṃ tattha samayo.

    ตตุตฺตริสิกฺขาปทํ

    Tatuttarisikkhāpadaṃ

    ๑๗. ตเญฺจ อญฺญาตโก คหปติ วา คหปตานี วา พหูหิ จีวเรหิ อภิหฎฺฐุํ ปวาเรยฺย, สนฺตรุตฺตรปรมํ ตาย ภิกฺขุนิยา ตโต จีวรํ สาทิตพฺพํฯ ตโต เจ อุตฺตริ สาทิเยยฺย, นิสฺสคฺคิยํ ปาจิตฺติยํฯ

    17. Tañce aññātako gahapati vā gahapatānī vā bahūhi cīvarehi abhihaṭṭhuṃ pavāreyya, santaruttaraparamaṃ tāya bhikkhuniyā tato cīvaraṃ sāditabbaṃ. Tato ce uttari sādiyeyya, nissaggiyaṃ pācittiyaṃ.

    ปฐมอุปกฺขฎสิกฺขาปทํ

    Paṭhamaupakkhaṭasikkhāpadaṃ

    ๑๘. ภิกฺขุนิํ ปเนว อุทฺทิสฺส อญฺญาตกสฺส คหปติสฺส วา คหปตานิยา วา จีวรเจตาปนฺนํ อุปกฺขฎํ โหติ ‘‘อิมินา จีวรเจตาปเนฺนน จีวรํ เจตาเปตฺวา อิตฺถนฺนามํ ภิกฺขุนิํ จีวเรน อจฺฉาเทสฺสามี’’ติฯ ตตฺร เจสา ภิกฺขุนี ปุเพฺพ อปฺปวาริตา อุปสงฺกมิตฺวา จีวเร วิกปฺปํ อาปเชฺชยฺย ‘‘สาธุ วต, มํ อายสฺมา อิมินา จีวรเจตาปเนฺนน เอวรูปํ วา เอวรูปํ วา จีวรํ เจตาเปตฺวา อจฺฉาเทหี’’ติ กลฺยาณกมฺยตํ อุปาทาย, นิสฺสคฺคิยํ ปาจิตฺติยํฯ

    18. Bhikkhuniṃ paneva uddissa aññātakassa gahapatissa vā gahapatāniyā vā cīvaracetāpannaṃ upakkhaṭaṃ hoti ‘‘iminā cīvaracetāpannena cīvaraṃ cetāpetvā itthannāmaṃ bhikkhuniṃ cīvarena acchādessāmī’’ti. Tatra cesā bhikkhunī pubbe appavāritā upasaṅkamitvā cīvare vikappaṃ āpajjeyya ‘‘sādhu vata, maṃ āyasmā iminā cīvaracetāpannena evarūpaṃ vā evarūpaṃ vā cīvaraṃ cetāpetvā acchādehī’’ti kalyāṇakamyataṃ upādāya, nissaggiyaṃ pācittiyaṃ.

    ทุติยอุปกฺขฎสิกฺขาปทํ

    Dutiyaupakkhaṭasikkhāpadaṃ

    ๑๙. ภิกฺขุนิํ ปเนว อุทฺทิสฺส อุภินฺนํ อญฺญาตกานํ คหปตีนํ วา คหปตานีนํ วา ปเจฺจกจีวรเจตาปนฺนานิ อุปกฺขฎานิ โหนฺติ ‘‘อิเมหิ มยํ ปเจฺจกจีวรเจตาปเนฺนหิ ปเจฺจกจีวรานิ เจตาเปตฺวา อิตฺถนฺนามํ ภิกฺขุนิํ จีวเรหิ อจฺฉาเทสฺสามา’’ติฯ ตตฺร เจสา ภิกฺขูนี ปุเพฺพ อปฺปวาริตา อุปสงฺกมิตฺวา จีวเร วิกปฺปํ อาปเชฺชยฺย ‘‘สาธุ วต มํ อายสฺมโนฺต อิเมหิ ปเจฺจกจีวรเจตาปเนฺนหิ เอวรูปํ วา เอวรูปํ วา จีวรํ เจตาเปตฺวา อจฺฉาเทถ อุโภว สนฺตา เอเกนา’’ติ กลฺยาณกมฺยตํ อุปาทาย, นิสฺสคฺคิยํ ปาจิตฺติยํฯ

    19. Bhikkhuniṃ paneva uddissa ubhinnaṃ aññātakānaṃ gahapatīnaṃ vā gahapatānīnaṃ vā paccekacīvaracetāpannāni upakkhaṭāni honti ‘‘imehi mayaṃ paccekacīvaracetāpannehi paccekacīvarāni cetāpetvā itthannāmaṃ bhikkhuniṃ cīvarehi acchādessāmā’’ti. Tatra cesā bhikkhūnī pubbe appavāritā upasaṅkamitvā cīvare vikappaṃ āpajjeyya ‘‘sādhu vata maṃ āyasmanto imehi paccekacīvaracetāpannehi evarūpaṃ vā evarūpaṃ vā cīvaraṃ cetāpetvā acchādetha ubhova santā ekenā’’ti kalyāṇakamyataṃ upādāya, nissaggiyaṃ pācittiyaṃ.

    ราชสิกฺขาปทํ

    Rājasikkhāpadaṃ

    ๒๐. ภิกฺขุนิํ ปเนว อุทฺทิสฺส ราชา วา ราชโภโคฺค วา พฺราหฺมโณ วา คหปติโก วา ทูเตน จีวรเจตาปนฺนํ ปหิเณยฺย ‘‘อิมินา จีวรเจตาปเนฺนน จีวรํ เจตาเปตฺวา อิตฺถนฺนามํ ภิกฺขุนิํ จีวเรน อจฺฉาเทหี’’ติฯ โส เจ ทูโต ตํ ภิกฺขุนิํ อุปสงฺกมิตฺวา เอวํ วเทยฺย ‘‘อิทํ โข, อเยฺย, อยฺยํ อุทฺทิสฺส จีวรเจตาปนฺนํ อาภตํ, ปฎิคฺคณฺหาตายฺยา จีวรเจตาปนฺน’’นฺติฯ ตาย ภิกฺขุนิยา โส ทูโต เอวมสฺส วจนีโย ‘‘น โข มยํ, อาวุโส, จีวรเจตาปนฺนํ ปฎิคฺคณฺหาม, จีวรญฺจ โข มยํ ปฎิคฺคณฺหาม กาเลน กปฺปิย’’นฺติฯ โส เจ ทูโต ตํ ภิกฺขุนิํ เอวํ วเทยฺย ‘‘อตฺถิ ปนายฺยาย, โกจิ เวยฺยาวจฺจกโร’’ติ, จีวรตฺถิกาย, ภิกฺขเว, ภิกฺขุนิยา เวยฺยาวจฺจกโร นิทฺทิสิตโพฺพ อารามิโก วา อุปาสโก วา ‘‘เอโส โข, อาวุโส, ภิกฺขุนีนํ เวยฺยาวจฺจกโร’’ติฯ โส เจ ทูโต ตํ เวยฺยาวจฺจกรํ สญฺญาเปตฺวา ตํ ภิกฺขุนิํ อุปสงฺกมิตฺวา เอวํ วเทยฺย ‘‘ยํ โข, อเยฺย, อยฺยา เวยฺยาวจฺจกรํ นิทฺทิสิ, สญฺญโตฺต โส มยา, อุปสงฺกมตายฺยา กาเลน, จีวเรน ตํ อจฺฉาเทสฺสตี’’ติฯ จีวรตฺถิกาย, ภิกฺขเว, ภิกฺขุนิยา เวยฺยาวจฺจกโร อุปสงฺกมิตฺวา ทฺวตฺติกฺขตฺตุํ โจเทตโพฺพ สาเรตโพฺพ ‘‘อโตฺถ เม, อาวุโส, จีวเรนา’’ติ, ทฺวตฺติกฺขตฺตุํ โจทยมานา สารยมานา ตํ จีวรํ อภินิปฺผาเทยฺย, อิเจฺจตํ กุสลํ, โน เจ อภินิปฺผาเทยฺย, จตุกฺขตฺตุํ ปญฺจกฺขตฺตุํ ฉกฺขตฺตุปรมํ ตุณฺหีภูตาย อุทฺทิสฺส ฐาตพฺพํ, จตุกฺขตฺตุํ ปญฺจกฺขตฺตุํ ฉกฺขตฺตุปรมํ ตุณฺหีภูตา อุทฺทิสฺส ติฎฺฐมานา ตํ จีวรํ อภินิปฺผาเทยฺย, อิเจฺจตํ กุสลํฯ ตโต เจ อุตฺตริ วายมมานา ตํ จีวรํ อภินิปฺผาเทยฺย, นิสฺสคฺคิยํ ปาจิตฺติยํฯ โน เจ อภินิปฺผาเทยฺย, ยตสฺสา จีวรเจตาปนฺนํ อาภตํ, ตตฺถ สามํ วา คนฺตพฺพํ, ทูโต วา ปาเหตโพฺพ ‘‘ยํ โข ตุเมฺห อายสฺมโนฺต ภิกฺขุนิํ อุทฺทิสฺส จีวรเจตาปนฺนํ ปหิณิตฺถ, น ตํ ตสฺสา ภิกฺขุนิยา กิญฺจิ อตฺถํ อนุโภติ, ยุญฺชนฺตายสฺมโนฺต สกํ, มา โว สกํ วินสฺสา’’ติ, อยํ ตตฺถ สามีจิฯ

    20. Bhikkhuniṃ paneva uddissa rājā vā rājabhoggo vā brāhmaṇo vā gahapatiko vā dūtena cīvaracetāpannaṃ pahiṇeyya ‘‘iminā cīvaracetāpannena cīvaraṃ cetāpetvā itthannāmaṃ bhikkhuniṃ cīvarena acchādehī’’ti. So ce dūto taṃ bhikkhuniṃ upasaṅkamitvā evaṃ vadeyya ‘‘idaṃ kho, ayye, ayyaṃ uddissa cīvaracetāpannaṃ ābhataṃ, paṭiggaṇhātāyyā cīvaracetāpanna’’nti. Tāya bhikkhuniyā so dūto evamassa vacanīyo ‘‘na kho mayaṃ, āvuso, cīvaracetāpannaṃ paṭiggaṇhāma, cīvarañca kho mayaṃ paṭiggaṇhāma kālena kappiya’’nti. So ce dūto taṃ bhikkhuniṃ evaṃ vadeyya ‘‘atthi panāyyāya, koci veyyāvaccakaro’’ti, cīvaratthikāya, bhikkhave, bhikkhuniyā veyyāvaccakaro niddisitabbo ārāmiko vā upāsako vā ‘‘eso kho, āvuso, bhikkhunīnaṃ veyyāvaccakaro’’ti. So ce dūto taṃ veyyāvaccakaraṃ saññāpetvā taṃ bhikkhuniṃ upasaṅkamitvā evaṃ vadeyya ‘‘yaṃ kho, ayye, ayyā veyyāvaccakaraṃ niddisi, saññatto so mayā, upasaṅkamatāyyā kālena, cīvarena taṃ acchādessatī’’ti. Cīvaratthikāya, bhikkhave, bhikkhuniyā veyyāvaccakaro upasaṅkamitvā dvattikkhattuṃ codetabbo sāretabbo ‘‘attho me, āvuso, cīvarenā’’ti, dvattikkhattuṃ codayamānā sārayamānā taṃ cīvaraṃ abhinipphādeyya, iccetaṃ kusalaṃ, no ce abhinipphādeyya, catukkhattuṃ pañcakkhattuṃ chakkhattuparamaṃ tuṇhībhūtāya uddissa ṭhātabbaṃ, catukkhattuṃ pañcakkhattuṃ chakkhattuparamaṃ tuṇhībhūtā uddissa tiṭṭhamānā taṃ cīvaraṃ abhinipphādeyya, iccetaṃ kusalaṃ. Tato ce uttari vāyamamānā taṃ cīvaraṃ abhinipphādeyya, nissaggiyaṃ pācittiyaṃ. No ce abhinipphādeyya, yatassā cīvaracetāpannaṃ ābhataṃ, tattha sāmaṃ vā gantabbaṃ, dūto vā pāhetabbo ‘‘yaṃ kho tumhe āyasmanto bhikkhuniṃ uddissa cīvaracetāpannaṃ pahiṇittha, na taṃ tassā bhikkhuniyā kiñci atthaṃ anubhoti, yuñjantāyasmanto sakaṃ, mā vo sakaṃ vinassā’’ti, ayaṃ tattha sāmīci.

    จีวรวโคฺค ทุติโยฯ

    Cīvaravaggo dutiyo.

    รูปิยสิกฺขาปทํ

    Rūpiyasikkhāpadaṃ

    ๒๑. ยา ปน ภิกฺขุนี ชาตรูปรชตํ อุคฺคเณฺหยฺย วา อุคฺคณฺหาเปยฺย วา อุปนิกฺขิตฺตํ วา สาทิเยยฺย, นิสฺสคฺคิยํ ปาจิตฺติยํฯ

    21. Yā pana bhikkhunī jātarūparajataṃ uggaṇheyya vā uggaṇhāpeyya vā upanikkhittaṃ vā sādiyeyya, nissaggiyaṃ pācittiyaṃ.

    รูปิยสํโวหารสิกฺขาปทํ

    Rūpiyasaṃvohārasikkhāpadaṃ

    ๒๒. ยา ปน ภิกฺขุนี นานปฺปการกํ รูปิยสํโวหารํ สมาปเชฺชยฺย, นิสฺสคฺคิยํ ปาจิตฺติยํฯ

    22. Yā pana bhikkhunī nānappakārakaṃ rūpiyasaṃvohāraṃ samāpajjeyya, nissaggiyaṃ pācittiyaṃ.

    กยวิกฺกยสิกฺขาปทํ

    Kayavikkayasikkhāpadaṃ

    ๒๓. ยา ปน ภิกฺขุนี นานปฺปการกํ กยวิกฺกยํ สมาปเชฺชยฺย, นิสฺสคฺคิยํ ปาจิตฺติยํฯ

    23. Yā pana bhikkhunī nānappakārakaṃ kayavikkayaṃ samāpajjeyya, nissaggiyaṃ pācittiyaṃ.

    อูนปญฺจพนฺธนสิกฺขาปทํ

    Ūnapañcabandhanasikkhāpadaṃ

    ๒๔. ยา ปน ภิกฺขุนี อูนปญฺจพนฺธเนน ปเตฺตน อญฺญํ นวํ ปตฺตํ เจตาเปยฺย, นิสฺสคฺคิยํ ปาจิตฺติยํฯ ตาย ภิกฺขุนิยา โส ปโตฺต ภิกฺขุนิปริสาย นิสฺสชฺชิตโพฺพ, โย จ ตสฺสา ภิกฺขุนิปริสาย ปตฺตปริยโนฺต, โส ตสฺสา ภิกฺขุนิยา ปทาตโพฺพ ‘‘อยํ เต ภิกฺขุนิ ปโตฺต ยาวเภทนาย ธาเรตโพฺพ’’ติ, อยํ ตตฺถ สามีจิฯ

    24. Yā pana bhikkhunī ūnapañcabandhanena pattena aññaṃ navaṃ pattaṃ cetāpeyya, nissaggiyaṃ pācittiyaṃ. Tāya bhikkhuniyā so patto bhikkhuniparisāya nissajjitabbo, yo ca tassā bhikkhuniparisāya pattapariyanto, so tassā bhikkhuniyā padātabbo ‘‘ayaṃ te bhikkhuni patto yāvabhedanāya dhāretabbo’’ti, ayaṃ tattha sāmīci.

    เภสชฺชสิกฺขาปทํ

    Bhesajjasikkhāpadaṃ

    ๒๕. ยานิ โข ปน ตานิ คิลานานํ ภิกฺขุนีนํ ปฎิสายนียานิ เภสชฺชานิ, เสยฺยถิทํ – สปฺปิ นวนีตํ เตลํ มธุ ผาณิตํ, ตานิ ปฎิคฺคเหตฺวา สตฺตาหปรมํ สนฺนิธิการกํ ปริภุญฺชิตพฺพานิฯ ตํ อติกฺกาเมนฺติยา, นิสฺสคฺคิยํ ปาจิตฺติยํฯ

    25. Yāni kho pana tāni gilānānaṃ bhikkhunīnaṃ paṭisāyanīyāni bhesajjāni, seyyathidaṃ – sappi navanītaṃ telaṃ madhu phāṇitaṃ, tāni paṭiggahetvā sattāhaparamaṃ sannidhikārakaṃ paribhuñjitabbāni. Taṃ atikkāmentiyā, nissaggiyaṃ pācittiyaṃ.

    จีวรอจฺฉินฺทนสิกฺขาปทํ

    Cīvaraacchindanasikkhāpadaṃ

    ๒๖. ยา ปน ภิกฺขุนี ภิกฺขุนิยา สามํ จีวรํ ทตฺวา กุปิตา อนตฺตมนา อจฺฉิเนฺทยฺย วา อจฺฉินฺทาเปยฺย วา, นิสฺสคฺคิยํ ปาจิตฺติยํฯ

    26. Yā pana bhikkhunī bhikkhuniyā sāmaṃ cīvaraṃ datvā kupitā anattamanā acchindeyya vā acchindāpeyya vā, nissaggiyaṃ pācittiyaṃ.

    สุตฺตวิญฺญตฺติสิกฺขาปทํ

    Suttaviññattisikkhāpadaṃ

    ๒๗. ยา ปน ภิกฺขุนี สามํ สุตฺตํ วิญฺญาเปตฺวา ตนฺตวาเยหิ จีวรํ วายาเปยฺย, นิสฺสคฺคิยํ ปาจิตฺติยํฯ

    27. Yā pana bhikkhunī sāmaṃ suttaṃ viññāpetvā tantavāyehi cīvaraṃ vāyāpeyya, nissaggiyaṃ pācittiyaṃ.

    มหาเปสการสิกฺขาปทํ

    Mahāpesakārasikkhāpadaṃ

    ๒๘. ภิกฺขุนิํ ปเนว อุทฺทิสฺส อญฺญาตโก คหปติ วา คหปตานี วา ตนฺตวาเยหิ จีวรํ วายาเปยฺย, ตตฺร เจสา ภิกฺขุนี ปุเพฺพ อปฺปวาริตา ตนฺตวาเย อุปสงฺกมิตฺวา จีวเร วิกปฺปํ อาปเชฺชยฺย ‘‘อิทํ โข อาวุโส จีวรํ มํ อุทฺทิสฺส วิยฺยติ, อายตญฺจ กโรถ, วิตฺถตญฺจ อปฺปิตญฺจ สุวีตญฺจ สุปฺปวายิตญฺจ สุวิเลขิตญฺจ สุวิตจฺฉิตญฺจ กโรถ, อเปฺปว นาม มยมฺปิ อายสฺมนฺตานํ กิญฺจิมตฺตํ อนุปทเชฺชยฺยามา’’ติ, เอวญฺจ สา ภิกฺขุนี วตฺวา กิญฺจิมตฺตํ อนุปทเชฺชยฺย อนฺตมโส ปิณฺฑปาตมตฺตมฺปิ, นิสฺสคฺคิยํ ปาจิตฺติยํฯ

    28. Bhikkhuniṃ paneva uddissa aññātako gahapati vā gahapatānī vā tantavāyehi cīvaraṃ vāyāpeyya, tatra cesā bhikkhunī pubbe appavāritā tantavāye upasaṅkamitvā cīvare vikappaṃ āpajjeyya ‘‘idaṃ kho āvuso cīvaraṃ maṃ uddissa viyyati, āyatañca karotha, vitthatañca appitañca suvītañca suppavāyitañca suvilekhitañca suvitacchitañca karotha, appeva nāma mayampi āyasmantānaṃ kiñcimattaṃ anupadajjeyyāmā’’ti, evañca sā bhikkhunī vatvā kiñcimattaṃ anupadajjeyya antamaso piṇḍapātamattampi, nissaggiyaṃ pācittiyaṃ.

    อเจฺจกจีวรสิกฺขาปทํ

    Accekacīvarasikkhāpadaṃ

    ๒๙. ทสาหานาคตํ กตฺติกเตมาสิกปุณฺณมํ ภิกฺขุนิยา ปเนว อเจฺจกจีวรํ อุปฺปเชฺชยฺย, อเจฺจกํ มญฺญมานาย ภิกฺขุนิยา ปฎิคฺคเหตพฺพํ, ปฎิคฺคเหตฺวา ยาว จีวรกาลสมยํ นิกฺขิปิตพฺพํฯ ตโต เจ อุตฺตริ นิกฺขิเปยฺย, นิสฺสคฺคิยํ ปาจิตฺติยํฯ

    29. Dasāhānāgataṃ kattikatemāsikapuṇṇamaṃ bhikkhuniyā paneva accekacīvaraṃ uppajjeyya, accekaṃ maññamānāya bhikkhuniyā paṭiggahetabbaṃ, paṭiggahetvā yāva cīvarakālasamayaṃ nikkhipitabbaṃ. Tato ce uttari nikkhipeyya, nissaggiyaṃ pācittiyaṃ.

    ปริณตสิกฺขาปทํ

    Pariṇatasikkhāpadaṃ

    ๓๐. ยา ปน ภิกฺขุนี ชานํ สงฺฆิกํ ลาภํ ปริณตํ อตฺตโน ปริณาเมยฺย, นิสฺสคฺคิยํ ปาจิตฺติยํฯ

    30. Yā pana bhikkhunī jānaṃ saṅghikaṃ lābhaṃ pariṇataṃ attano pariṇāmeyya, nissaggiyaṃ pācittiyaṃ.

    ปตฺตวโคฺค ตติโยฯ

    Pattavaggo tatiyo.

    อุทฺทิฎฺฐา โข, อยฺยาโย, ติํส นิสฺสคฺคิยา ปาจิตฺติยา ธมฺมาฯ ตตฺถายฺยาโย, ปุจฺฉามิ, กจฺจิตฺถ ปริสุทฺธา, ทุติยมฺปิ ปุจฺฉามิ, กจฺจิตฺถ ปริสุทฺธา, ตติยมฺปิ ปุจฺฉามิ, กจฺจิตฺถ ปริสุทฺธา, ปริสุเทฺธตฺถายฺยาโย, ตสฺมา ตุณฺหี, เอวเมตํ ธารยามีติฯ

    Uddiṭṭhā kho, ayyāyo, tiṃsa nissaggiyā pācittiyā dhammā. Tatthāyyāyo, pucchāmi, kaccittha parisuddhā, dutiyampi pucchāmi, kaccittha parisuddhā, tatiyampi pucchāmi, kaccittha parisuddhā, parisuddhetthāyyāyo, tasmā tuṇhī, evametaṃ dhārayāmīti.

    นิสฺสคฺคิยปาจิตฺติยา นิฎฺฐิตาฯ

    Nissaggiyapācittiyā niṭṭhitā.

    สุทฺธปาจิตฺติยา

    Suddhapācittiyā

    อิเม โข ปนายฺยาโย, ฉสฎฺฐิสตา ปาจิตฺติยา

    Ime kho panāyyāyo, chasaṭṭhisatā pācittiyā

    ธมฺมา อุเทฺทสํ อาคจฺฉนฺติฯ

    Dhammā uddesaṃ āgacchanti.

    ลสุณสิกฺขาปทํ

    Lasuṇasikkhāpadaṃ

    ๑. ยา ปน ภิกฺขุนี ลสุณํ ขาเทยฺย ปาจิตฺติยํฯ

    1. Yā pana bhikkhunī lasuṇaṃ khādeyya pācittiyaṃ.

    สมฺพาธโลมสิกฺขาปทํ

    Sambādhalomasikkhāpadaṃ

    ๒. ยา ปน ภิกฺขุนี สมฺพาเธ โลมํ สํหราเปยฺย, ปาจิตฺติยํฯ

    2. Yā pana bhikkhunī sambādhe lomaṃ saṃharāpeyya, pācittiyaṃ.

    ตลฆาตกสิกฺขาปทํ

    Talaghātakasikkhāpadaṃ

    ๓. ตลฆาตเก ปาจิตฺติยํฯ

    3. Talaghātake pācittiyaṃ.

    ชตุมฎฺฐกสิกฺขาปทํ

    Jatumaṭṭhakasikkhāpadaṃ

    ๔. ชตุมฎฺฐเก ปาจิตฺติยํฯ

    4. Jatumaṭṭhake pācittiyaṃ.

    อุทกสุทฺธิกสิกฺขาปทํ

    Udakasuddhikasikkhāpadaṃ

    ๕. อุทกสุทฺธิกํ ปน ภิกฺขุนิยา อาทิยมานาย ทฺวงฺคุลปพฺพปรมํ อาทาตพฺพํฯ ตํ อติกฺกาเมนฺติยา ปาจิตฺติยํฯ

    5. Udakasuddhikaṃ pana bhikkhuniyā ādiyamānāya dvaṅgulapabbaparamaṃ ādātabbaṃ. Taṃ atikkāmentiyā pācittiyaṃ.

    อุปติฎฺฐนสิกฺขาปทํ

    Upatiṭṭhanasikkhāpadaṃ

    ๖. ยา ปน ภิกฺขุนี ภิกฺขุสฺส ภุญฺชนฺตสฺส ปานีเยน วา วิธูปเนน วา อุปติเฎฺฐยฺย, ปาจิตฺติยํฯ

    6. Yā pana bhikkhunī bhikkhussa bhuñjantassa pānīyena vā vidhūpanena vā upatiṭṭheyya, pācittiyaṃ.

    อามกธญฺญสิกฺขาปทํ

    Āmakadhaññasikkhāpadaṃ

    ๗. ยา ปน ภิกฺขุนี อามกธญฺญํ วิญฺญตฺวา วา วิญฺญาเปตฺวา วา ภชฺชิตฺวา วา ภชฺชาเปตฺวา วา โกเฎฺฎตฺวา วา โกฎฺฎาเปตฺวา วา ปจิตฺวา วา ปจาเปตฺวา วา ภุเญฺชยฺย, ปาจิตฺติยํฯ

    7. Yā pana bhikkhunī āmakadhaññaṃ viññatvā vā viññāpetvā vā bhajjitvā vā bhajjāpetvā vā koṭṭetvā vā koṭṭāpetvā vā pacitvā vā pacāpetvā vā bhuñjeyya, pācittiyaṃ.

    ปฐมอุจฺจารฉฑฺฑนสิกฺขาปทํ

    Paṭhamauccārachaḍḍanasikkhāpadaṃ

    ๘. ยา ปน ภิกฺขุนี อุจฺจารํ วา ปสฺสาวํ วา สงฺการํ วา วิฆาสํ วา ติโรกุเฎฺฎ วา ติโรปากาเร วา ฉเฑฺฑยฺย วา ฉฑฺฑาเปยฺย วา, ปาจิตฺติยํฯ

    8. Yā pana bhikkhunī uccāraṃ vā passāvaṃ vā saṅkāraṃ vā vighāsaṃ vā tirokuṭṭe vā tiropākāre vā chaḍḍeyya vā chaḍḍāpeyya vā, pācittiyaṃ.

    ทุติยอุจฺจารฉฑฺฑนสิกฺขาปทํ

    Dutiyauccārachaḍḍanasikkhāpadaṃ

    ๙. ยา ปน ภิกฺขุนี อุจฺจารํ วา ปสฺสาวํ วา สงฺการํ วา วิฆาสํ วา หริเต ฉเฑฺฑยฺย วา ฉฑฺฑาเปยฺย วา, ปาจิตฺติยํฯ

    9. Yā pana bhikkhunī uccāraṃ vā passāvaṃ vā saṅkāraṃ vā vighāsaṃ vā harite chaḍḍeyya vā chaḍḍāpeyya vā, pācittiyaṃ.

    นจฺจคีตสิกฺขาปทํ

    Naccagītasikkhāpadaṃ

    ๑๐. ยา ปน ภิกฺขุนี นจฺจํ วา คีตํ วา วาทิตํ วา ทสฺสนาย คเจฺฉยฺย, ปาจิตฺติยํฯ

    10. Yā pana bhikkhunī naccaṃ vā gītaṃ vā vāditaṃ vā dassanāya gaccheyya, pācittiyaṃ.

    ลสุณวโคฺค ปฐโมฯ

    Lasuṇavaggo paṭhamo.

    รตฺตนฺธการสิกฺขาปทํ

    Rattandhakārasikkhāpadaṃ

    ๑๑. ยา ปน ภิกฺขุนี รตฺตนฺธกาเร อปฺปทีเป ปุริเสน สทฺธิํ เอเกเนกา สนฺติเฎฺฐยฺย วา สลฺลเปยฺย วา, ปาจิตฺติยํฯ

    11. Yā pana bhikkhunī rattandhakāre appadīpe purisena saddhiṃ ekenekā santiṭṭheyya vā sallapeyya vā, pācittiyaṃ.

    ปฎิจฺฉโนฺนกาสสิกฺขาปทํ

    Paṭicchannokāsasikkhāpadaṃ

    ๑๒. ยา ปน ภิกฺขุนี ปฎิจฺฉเนฺน โอกาเส ปุริเสน สทฺธิํ เอเกเนกา สนฺติเฎฺฐยฺย วา สลฺลเปยฺย วา, ปาจิตฺติยํฯ

    12. Yā pana bhikkhunī paṭicchanne okāse purisena saddhiṃ ekenekā santiṭṭheyya vā sallapeyya vā, pācittiyaṃ.

    อโชฺฌกาสสลฺลปนสิกฺขาปทํ

    Ajjhokāsasallapanasikkhāpadaṃ

    ๑๓. ยา ปน ภิกฺขุนี อโชฺฌกาเส ปุริเสน สทฺธิํ เอเกเนกา สนฺติเฎฺฐยฺย วา สลฺลเปยฺย วา, ปาจิตฺติยํฯ

    13. Yā pana bhikkhunī ajjhokāse purisena saddhiṃ ekenekā santiṭṭheyya vā sallapeyya vā, pācittiyaṃ.

    ทุติยิกอุโยฺยชนสิกฺขาปทํ

    Dutiyikauyyojanasikkhāpadaṃ

    ๑๔. ยา ปน ภิกฺขุนี รถิกาย วา พฺยูเห วา สิงฺฆาฎเก วา ปุริเสน สทฺธิํ เอเกเนกา สนฺติเฎฺฐยฺย วา สลฺลเปยฺย วา นิกณฺณิกํ วา ชเปฺปยฺย ทุติยิกํ วา ภิกฺขุนิํ อุโยฺยเชยฺย, ปาจิตฺติยํฯ

    14. Yā pana bhikkhunī rathikāya vā byūhe vā siṅghāṭake vā purisena saddhiṃ ekenekā santiṭṭheyya vā sallapeyya vā nikaṇṇikaṃ vā jappeyya dutiyikaṃ vā bhikkhuniṃ uyyojeyya, pācittiyaṃ.

    อนาปุจฺฉาปกฺกมนสิกฺขาปทํ

    Anāpucchāpakkamanasikkhāpadaṃ

    ๑๕. ยา ปน ภิกฺขุนี ปุเรภตฺตํ กุลานิ อุปสงฺกมิตฺวา อาสเน นิสีทิตฺวา สามิเก อนาปุจฺฉา ปกฺกเมยฺย, ปาจิตฺติยํฯ

    15. Yā pana bhikkhunī purebhattaṃ kulāni upasaṅkamitvā āsane nisīditvā sāmike anāpucchā pakkameyya, pācittiyaṃ.

    อนาปุจฺฉาอภินิสีทนสิกฺขาปทํ

    Anāpucchāabhinisīdanasikkhāpadaṃ

    ๑๖. ยา ปน ภิกฺขุนี ปจฺฉาภตฺตํ กุลานิ อุปสงฺกมิตฺวา สามิเก อนาปุจฺฉา อาสเน อภินิสีเทยฺย วา อภินิปเชฺชยฺย วา, ปาจิตฺติยํฯ

    16. Yā pana bhikkhunī pacchābhattaṃ kulāni upasaṅkamitvā sāmike anāpucchā āsane abhinisīdeyya vā abhinipajjeyya vā, pācittiyaṃ.

    อนาปุจฺฉาสนฺถรณสิกฺขาปทํ

    Anāpucchāsantharaṇasikkhāpadaṃ

    ๑๗. ยา ปน ภิกฺขุนี วิกาเล กุลานิ อุปสงฺกมิตฺวา สามิเก อนาปุจฺฉา เสยฺยํ สนฺถริตฺวา วา สนฺถราเปตฺวา วา อภินิสีเทยฺย วา อภินิปเชฺชยฺย วา, ปาจิตฺติยํฯ

    17. Yā pana bhikkhunī vikāle kulāni upasaṅkamitvā sāmike anāpucchā seyyaṃ santharitvā vā santharāpetvā vā abhinisīdeyya vā abhinipajjeyya vā, pācittiyaṃ.

    ปรอุชฺฌาปนกสิกฺขาปทํ

    Paraujjhāpanakasikkhāpadaṃ

    ๑๘. ยา ปน ภิกฺขุนี ทุคฺคหิเตน ทูปธาริเตน ปรํ อุชฺฌาเปยฺย, ปาจิตฺติยํฯ

    18. Yā pana bhikkhunī duggahitena dūpadhāritena paraṃ ujjhāpeyya, pācittiyaṃ.

    ปรอภิสปนสิกฺขาปทํ

    Paraabhisapanasikkhāpadaṃ

    ๑๙. ยา ปน ภิกฺขุนี อตฺตานํ วา ปรํ วา นิรเยน วา พฺรหฺมจริเยน วา อภิสเปยฺย, ปาจิตฺติยํฯ

    19. Yā pana bhikkhunī attānaṃ vā paraṃ vā nirayena vā brahmacariyena vā abhisapeyya, pācittiyaṃ.

    โรทนสิกฺขาปทํ

    Rodanasikkhāpadaṃ

    ๒๐. ยา ปน ภิกฺขุนี อตฺตานํ วธิตฺวา วธิตฺวา โรเทยฺย, ปาจิตฺติยํฯ

    20. Yā pana bhikkhunī attānaṃ vadhitvā vadhitvā rodeyya, pācittiyaṃ.

    รตฺตนฺธการวโคฺค ทุติโยฯ

    Rattandhakāravaggo dutiyo.

    นคฺคสิกฺขาปทํ

    Naggasikkhāpadaṃ

    ๒๑. ยา ปน ภิกฺขุนี นคฺคา นหาเยยฺย, ปาจิตฺติยํฯ

    21. Yā pana bhikkhunī naggā nahāyeyya, pācittiyaṃ.

    อุทกสาฎิกสิกฺขาปทํ

    Udakasāṭikasikkhāpadaṃ

    ๒๒. อุทกสาฎิกํ ปน ภิกฺขุนิยา การยมานาย ปมาณิกา กาเรตพฺพา, ตตฺริทํ ปมาณํ , ทีฆโส จตโสฺส วิทตฺถิโย สุคตวิทตฺถิยา, ติริยํ เทฺว วิทตฺถิโยฯ ตํ อติกฺกาเมนฺติยา เฉทนกํ ปาจิตฺติยํฯ

    22. Udakasāṭikaṃ pana bhikkhuniyā kārayamānāya pamāṇikā kāretabbā, tatridaṃ pamāṇaṃ , dīghaso catasso vidatthiyo sugatavidatthiyā, tiriyaṃ dve vidatthiyo. Taṃ atikkāmentiyā chedanakaṃ pācittiyaṃ.

    จีวรสิพฺพนสิกฺขาปทํ

    Cīvarasibbanasikkhāpadaṃ

    ๒๓. ยา ปน ภิกฺขุนี ภิกฺขุนิยา จีวรํ วิสิเพฺพตฺวา วา วิสิพฺพาเปตฺวา วา สา ปจฺฉา อนนฺตรายิกินี เนว สิเพฺพยฺย, น สิพฺพาปนาย อุสฺสุกฺกํ กเรยฺย อญฺญตฺร จตูหปญฺจาหา, ปาจิตฺติยํฯ

    23. Yā pana bhikkhunī bhikkhuniyā cīvaraṃ visibbetvā vā visibbāpetvā vā sā pacchā anantarāyikinī neva sibbeyya, na sibbāpanāya ussukkaṃ kareyya aññatra catūhapañcāhā, pācittiyaṃ.

    สงฺฆาฎิจารสิกฺขาปทํ

    Saṅghāṭicārasikkhāpadaṃ

    ๒๔. ยา ปน ภิกฺขุนี ปญฺจาหิกํ สงฺฆาฎิจารํ อติกฺกาเมยฺย, ปาจิตฺติยํฯ

    24. Yā pana bhikkhunī pañcāhikaṃ saṅghāṭicāraṃ atikkāmeyya, pācittiyaṃ.

    จีวรสงฺกมนียสิกฺขาปทํ

    Cīvarasaṅkamanīyasikkhāpadaṃ

    ๒๕. ยา ปน ภิกฺขุนี จีวรสงฺกมนียํ ธาเรยฺย, ปาจิตฺติยํฯ

    25. Yā pana bhikkhunī cīvarasaṅkamanīyaṃ dhāreyya, pācittiyaṃ.

    คณจีวรสิกฺขาปทํ

    Gaṇacīvarasikkhāpadaṃ

    ๒๖. ยา ปน ภิกฺขุนี คณสฺส จีวรลาภํ อนฺตรายํ กเรยฺย, ปาจิตฺติยํฯ

    26. Yā pana bhikkhunī gaṇassa cīvaralābhaṃ antarāyaṃ kareyya, pācittiyaṃ.

    ปฎิพาหนสิกฺขาปทํ

    Paṭibāhanasikkhāpadaṃ

    ๒๗. ยา ปน ภิกฺขุนี ธมฺมิกํ จีวรวิภงฺคํ ปฎิพาเหยฺย, ปาจิตฺติยํฯ

    27. Yā pana bhikkhunī dhammikaṃ cīvaravibhaṅgaṃ paṭibāheyya, pācittiyaṃ.

    จีวรทานสิกฺขาปทํ

    Cīvaradānasikkhāpadaṃ

    ๒๘. ยา ปน ภิกฺขุนี อคาริกสฺส วา ปริพฺพาชกสฺส วา ปริพฺพาชิกาย วา สมณจีวรํ ทเทยฺย, ปาจิตฺติยํฯ

    28. Yā pana bhikkhunī agārikassa vā paribbājakassa vā paribbājikāya vā samaṇacīvaraṃ dadeyya, pācittiyaṃ.

    กาลอติกฺกมนสิกฺขาปทํ

    Kālaatikkamanasikkhāpadaṃ

    ๒๙. ยา ปน ภิกฺขุนี ทุพฺพลจีวรปจฺจาสาย จีวรกาลสมยํ อติกฺกาเมยฺย, ปาจิตฺติยํฯ

    29. Yā pana bhikkhunī dubbalacīvarapaccāsāya cīvarakālasamayaṃ atikkāmeyya, pācittiyaṃ.

    กถินุทฺธารสิกฺขาปทํ

    Kathinuddhārasikkhāpadaṃ

    ๓๐. ยา ปน ภิกฺขุนี ธมฺมิกํ กถินุทฺธารํ ปฎิพาเหยฺย, ปาจิตฺติยํฯ

    30. Yā pana bhikkhunī dhammikaṃ kathinuddhāraṃ paṭibāheyya, pācittiyaṃ.

    นคฺควโคฺค ตติโยฯ

    Naggavaggo tatiyo.

    เอกมญฺจตุวฎฺฎนสิกฺขาปทํ

    Ekamañcatuvaṭṭanasikkhāpadaṃ

    ๓๑. ยา ปน ภิกฺขุนิโย เทฺว เอกมเญฺจ ตุวเฎฺฎยฺยุํ, ปาจิตฺติยํฯ

    31. Yā pana bhikkhuniyo dve ekamañce tuvaṭṭeyyuṃ, pācittiyaṃ.

    เอกตฺถรณตุวฎฺฎนสิกฺขาปทํ

    Ekattharaṇatuvaṭṭanasikkhāpadaṃ

    ๓๒. ยา ปน ภิกฺขุนิโย เทฺว เอกตฺถรณปาวุรณา ตุวเฎฺฎยฺยุํ, ปาจิตฺติยํฯ

    32. Yā pana bhikkhuniyo dve ekattharaṇapāvuraṇā tuvaṭṭeyyuṃ, pācittiyaṃ.

    อผาสุกรณสิกฺขาปทํ

    Aphāsukaraṇasikkhāpadaṃ

    ๓๓. ยา ปน ภิกฺขุนี ภิกฺขุนิยา สญฺจิจฺจ อผาสุํ กเรยฺย, ปาจิตฺติยํฯ

    33. Yā pana bhikkhunī bhikkhuniyā sañcicca aphāsuṃ kareyya, pācittiyaṃ.

    นอุปฎฺฐาปนสิกฺขาปทํ

    Naupaṭṭhāpanasikkhāpadaṃ

    ๓๔. ยา ปน ภิกฺขุนี ทุกฺขิตํ สหชีวินิํ เนว อุปฎฺฐเหยฺย, น อุปฎฺฐาปนาย อุสฺสุกฺกํ กเรยฺย, ปาจิตฺติยํฯ

    34. Yā pana bhikkhunī dukkhitaṃ sahajīviniṃ neva upaṭṭhaheyya, na upaṭṭhāpanāya ussukkaṃ kareyya, pācittiyaṃ.

    นิกฺกฑฺฒนสิกฺขาปทํ

    Nikkaḍḍhanasikkhāpadaṃ

    ๓๕. ยา ปน ภิกฺขุนี ภิกฺขุนิยา อุปสฺสยํ ทตฺวา กุปิตา อนตฺตมนา นิกฺกเฑฺฒยฺย วา นิกฺกฑฺฒาเปยฺย วา, ปาจิตฺติยํฯ

    35. Yā pana bhikkhunī bhikkhuniyā upassayaṃ datvā kupitā anattamanā nikkaḍḍheyya vā nikkaḍḍhāpeyya vā, pācittiyaṃ.

    สํสฎฺฐสิกฺขาปทํ

    Saṃsaṭṭhasikkhāpadaṃ

    ๓๖. ยา ปน ภิกฺขุนี สํสฎฺฐา วิหเรยฺย คหปตินา วา คหปติปุเตฺตน วา, สา ภิกฺขุนี ภิกฺขุนีหิ เอวมสฺส วจนียา ‘‘มาเยฺย, สํสฎฺฐา วิหริ คหปตินาปิ คหปติปุเตฺตนาปิ, วิวิจฺจาเยฺย, วิเวกเญฺญว ภคินิยา สโงฺฆ วเณฺณตี’’ติฯ เอวญฺจ สา ภิกฺขุนี ภิกฺขุนีหิ วุจฺจมานา ตเถว ปคฺคเณฺหยฺย, สา ภิกฺขุนี ภิกฺขุนีหิ ยาวตติยํ สมนุภาสิตพฺพา ตสฺส ปฎินิสฺสคฺคาย, ยาวตติยเญฺจ สมนุภาสิยมานา ตํ ปฎินิสฺสเชฺชยฺย, อิเจฺจตํ กุสลํฯ โน เจ ปฎินิสฺสเชฺชยฺย, ปาจิตฺติยํฯ

    36. Yā pana bhikkhunī saṃsaṭṭhā vihareyya gahapatinā vā gahapatiputtena vā, sā bhikkhunī bhikkhunīhi evamassa vacanīyā ‘‘māyye, saṃsaṭṭhā vihari gahapatināpi gahapatiputtenāpi, viviccāyye, vivekaññeva bhaginiyā saṅgho vaṇṇetī’’ti. Evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṃ samanubhāsitabbā tassa paṭinissaggāya, yāvatatiyañce samanubhāsiyamānā taṃ paṭinissajjeyya, iccetaṃ kusalaṃ. No ce paṭinissajjeyya, pācittiyaṃ.

    อโนฺตรฎฺฐสิกฺขาปทํ

    Antoraṭṭhasikkhāpadaṃ

    ๓๗. ยา ปน ภิกฺขุนี อโนฺตรเฎฺฐ สาสงฺกสมฺมเต สปฺปฎิภเย อสตฺถิกา จาริกํ จเรยฺย, ปาจิตฺติยํฯ

    37. Yā pana bhikkhunī antoraṭṭhe sāsaṅkasammate sappaṭibhaye asatthikā cārikaṃ careyya, pācittiyaṃ.

    ติโรรฎฺฐสิกฺขาปทํ

    Tiroraṭṭhasikkhāpadaṃ

    ๓๘. ยา ปน ภิกฺขุนี ติโรรเฎฺฐ สาสงฺกสมฺมเต สปฺปฎิภเย อสตฺถิกา จาริกํ จเรยฺย, ปาจิตฺติยํฯ

    38. Yā pana bhikkhunī tiroraṭṭhe sāsaṅkasammate sappaṭibhaye asatthikā cārikaṃ careyya, pācittiyaṃ.

    อโนฺตวสฺสสิกฺขาปทํ

    Antovassasikkhāpadaṃ

    ๓๙. ยา ปน ภิกฺขุนี อโนฺตวสฺสํ จาริกํ จเรยฺย, ปาจิตฺติยํฯ

    39. Yā pana bhikkhunī antovassaṃ cārikaṃ careyya, pācittiyaṃ.

    จาริกนปกฺกมนสิกฺขาปทํ

    Cārikanapakkamanasikkhāpadaṃ

    ๔๐. ยา ปน ภิกฺขุนี วสฺสํวุฎฺฐา จาริกํ น ปกฺกเมยฺย อนฺตมโส ฉปฺปญฺจโยชนานิปิ, ปาจิตฺติยํฯ

    40. Yā pana bhikkhunī vassaṃvuṭṭhā cārikaṃ na pakkameyya antamaso chappañcayojanānipi, pācittiyaṃ.

    ตุวฎฺฎวโคฺค จตุโตฺถฯ

    Tuvaṭṭavaggo catuttho.

    ราชาคารสิกฺขาปทํ

    Rājāgārasikkhāpadaṃ

    ๔๑. ยา ปน ภิกฺขุนี ราชาคารํ วา จิตฺตาคารํ วา อารามํ วา อุยฺยานํ วา โปกฺขรณิํ วา ทสฺสนาย คเจฺฉยฺย, ปาจิตฺติยํฯ

    41. Yā pana bhikkhunī rājāgāraṃ vā cittāgāraṃ vā ārāmaṃ vā uyyānaṃ vā pokkharaṇiṃ vā dassanāya gaccheyya, pācittiyaṃ.

    อาสนฺทิปริภุญฺชนสิกฺขาปทํ

    Āsandiparibhuñjanasikkhāpadaṃ

    ๔๒. ยา ปน ภิกฺขุนี อาสนฺทิํ วา ปลฺลงฺกํ วา ปริภุเญฺชยฺย, ปาจิตฺติยํฯ

    42. Yā pana bhikkhunī āsandiṃ vā pallaṅkaṃ vā paribhuñjeyya, pācittiyaṃ.

    สุตฺตกนฺตนสิกฺขาปทํ

    Suttakantanasikkhāpadaṃ

    ๔๓. ยา ปน ภิกฺขุนี สุตฺตํ กเนฺตยฺย, ปาจิตฺติยํฯ

    43. Yā pana bhikkhunī suttaṃ kanteyya, pācittiyaṃ.

    คิหิเวยฺยาวจฺจสิกฺขาปทํ

    Gihiveyyāvaccasikkhāpadaṃ

    ๔๔. ยา ปน ภิกฺขุนี คิหิเวยฺยาวจฺจํ กเรยฺย, ปาจิตฺติยํฯ

    44. Yā pana bhikkhunī gihiveyyāvaccaṃ kareyya, pācittiyaṃ.

    อธิกรณสิกฺขาปทํ

    Adhikaraṇasikkhāpadaṃ

    ๔๕. ยา ปน ภิกฺขุนี ภิกฺขุนิยา ‘‘เอหาเยฺย, อิมํ อธิกรณํ วูปสเมหี’’ติ วุจฺจมานา ‘‘สาธู’’ติ ปฎิสฺสุณิตฺวา สา ปจฺฉา อนนฺตรายิกินี เนว วูปสเมยฺย, น วูปสมาย อุสฺสุกฺกํ กเรยฺย, ปาจิตฺติยํฯ

    45. Yā pana bhikkhunī bhikkhuniyā ‘‘ehāyye, imaṃ adhikaraṇaṃ vūpasamehī’’ti vuccamānā ‘‘sādhū’’ti paṭissuṇitvā sā pacchā anantarāyikinī neva vūpasameyya, na vūpasamāya ussukkaṃ kareyya, pācittiyaṃ.

    โภชนทานสิกฺขาปทํ

    Bhojanadānasikkhāpadaṃ

    ๔๖. ยา ปน ภิกฺขุนี อคาริกสฺส วา ปริพฺพาชกสฺส วา ปริพฺพาชิกาย วา สหตฺถา ขาทนียํ วา โภชนียํ วา ทเทยฺย, ปาจิตฺติยํฯ

    46. Yā pana bhikkhunī agārikassa vā paribbājakassa vā paribbājikāya vā sahatthā khādanīyaṃ vā bhojanīyaṃ vā dadeyya, pācittiyaṃ.

    อาวสถจีวรสิกฺขาปทํ

    Āvasathacīvarasikkhāpadaṃ

    ๔๗. ยา ปน ภิกฺขุนี อาวสถจีวรํ อนิสฺสเชฺชตฺวา ปริภุเญฺชยฺย, ปาจิตฺติยํฯ

    47. Yā pana bhikkhunī āvasathacīvaraṃ anissajjetvā paribhuñjeyya, pācittiyaṃ.

    อาวสถวิหารสิกฺขาปทํ

    Āvasathavihārasikkhāpadaṃ

    ๔๘. ยา ปน ภิกฺขุนี อาวสถํ อนิสฺสชฺชิตฺวา จาริกํ ปกฺกเมยฺย, ปาจิตฺติยํฯ

    48. Yā pana bhikkhunī āvasathaṃ anissajjitvā cārikaṃ pakkameyya, pācittiyaṃ.

    ติรจฺฉานวิชฺชาปริยาปุณนสิกฺขาปทํ

    Tiracchānavijjāpariyāpuṇanasikkhāpadaṃ

    ๔๙. ยา ปน ภิกฺขุนี ติรจฺฉานวิชฺชํ ปริยาปุเณยฺย, ปาจิตฺติยํฯ

    49. Yā pana bhikkhunī tiracchānavijjaṃ pariyāpuṇeyya, pācittiyaṃ.

    ติรจฺฉานวิชฺชาวาจนสิกฺขาปทํ

    Tiracchānavijjāvācanasikkhāpadaṃ

    ๕๐. ยา ปน ภิกฺขุนี ติรจฺฉานวิชฺชํ วาเจยฺย, ปาจิตฺติยํฯ

    50. Yā pana bhikkhunī tiracchānavijjaṃ vāceyya, pācittiyaṃ.

    จิตฺตาคารวโคฺค ปญฺจโมฯ

    Cittāgāravaggo pañcamo.

    อารามปวิสนสิกฺขาปทํ

    Ārāmapavisanasikkhāpadaṃ

    ๕๑. ยา ปน ภิกฺขุนี ชานํ สภิกฺขุกํ อารามํ อนาปุจฺฉา ปวิเสยฺย, ปาจิตฺติยํฯ

    51. Yā pana bhikkhunī jānaṃ sabhikkhukaṃ ārāmaṃ anāpucchā paviseyya, pācittiyaṃ.

    ภิกฺขุอโกฺกสนสิกฺขาปทํ

    Bhikkhuakkosanasikkhāpadaṃ

    ๕๒. ยา ปน ภิกฺขุนี ภิกฺขุํ อโกฺกเสยฺย วา ปริภาเสยฺย วา, ปาจิตฺติยํฯ

    52. Yā pana bhikkhunī bhikkhuṃ akkoseyya vā paribhāseyya vā, pācittiyaṃ.

    คณปริภาสนสิกฺขาปทํ

    Gaṇaparibhāsanasikkhāpadaṃ

    ๕๓. ยา ปน ภิกฺขุนี จณฺฑีกตา คณํ ปริภาเสยฺย, ปาจิตฺติยํฯ

    53. Yā pana bhikkhunī caṇḍīkatā gaṇaṃ paribhāseyya, pācittiyaṃ.

    ปวาริตสิกฺขาปทํ

    Pavāritasikkhāpadaṃ

    ๕๔. ยา ปน ภิกฺขุนี นิมนฺติตา วา ปวาริตา วา ขาทนียํ วา โภชนียํ วา ขาเทยฺย วา ภุเญฺชยฺย วา, ปาจิตฺติยํฯ

    54. Yā pana bhikkhunī nimantitā vā pavāritā vā khādanīyaṃ vā bhojanīyaṃ vā khādeyya vā bhuñjeyya vā, pācittiyaṃ.

    กุลมจฺฉรินีสิกฺขาปทํ

    Kulamaccharinīsikkhāpadaṃ

    ๕๕. ยา ปน ภิกฺขุนี กุลมจฺฉรินี อสฺส, ปาจิตฺติยํฯ

    55. Yā pana bhikkhunī kulamaccharinī assa, pācittiyaṃ.

    อภิกฺขุกาวาสสิกฺขาปทํ

    Abhikkhukāvāsasikkhāpadaṃ

    ๕๖. ยา ปน ภิกฺขุนี อภิกฺขุเก อาวาเส วสฺสํ วเสยฺย, ปาจิตฺติยํฯ

    56. Yā pana bhikkhunī abhikkhuke āvāse vassaṃ vaseyya, pācittiyaṃ.

    อปวารณาสิกฺขาปทํ

    Apavāraṇāsikkhāpadaṃ

    ๕๗. ยา ปน ภิกฺขุนี วสฺสํวุฎฺฐา อุภโตสเงฺฆ ตีหิ ฐาเนหิ น ปวาเรยฺย ทิเฎฺฐน วา สุเตน วา ปริสงฺกาย วา, ปาจิตฺติยํฯ

    57. Yā pana bhikkhunī vassaṃvuṭṭhā ubhatosaṅghe tīhi ṭhānehi na pavāreyya diṭṭhena vā sutena vā parisaṅkāya vā, pācittiyaṃ.

    โอวาทสิกฺขาปทํ

    Ovādasikkhāpadaṃ

    ๕๘. ยา ปน ภิกฺขุนี โอวาทาย วา สํวาสาย วา น คเจฺฉยฺย, ปาจิตฺติยํฯ

    58. Yā pana bhikkhunī ovādāya vā saṃvāsāya vā na gaccheyya, pācittiyaṃ.

    โอวาทูปสงฺกมนสิกฺขาปทํ

    Ovādūpasaṅkamanasikkhāpadaṃ

    ๕๙. อนฺวทฺธมาสํ ภิกฺขุนิยา ภิกฺขุสงฺฆโต เทฺว ธมฺมา ปจฺจาสีสิตพฺพา อุโปสถปุจฺฉกญฺจ โอวาทูปสงฺกมนญฺจฯ ตํ อติกฺกาเมนฺติยา ปาจิตฺติยํฯ

    59. Anvaddhamāsaṃ bhikkhuniyā bhikkhusaṅghato dve dhammā paccāsīsitabbā uposathapucchakañca ovādūpasaṅkamanañca. Taṃ atikkāmentiyā pācittiyaṃ.

    ปสาเขชาตสิกฺขาปทํ

    Pasākhejātasikkhāpadaṃ

    ๖๐. ยา ปน ภิกฺขุนี ปสาเข ชาตํ คณฺฑํ วา รุธิตํ วา อนปโลเกตฺวา สงฺฆํ วา คณํ วา ปุริเสน สทฺธิํ เอเกเนกา เภทาเปยฺย วา ผาลาเปยฺย วา โธวาเปยฺย วา อาลิมฺปาเปยฺย วา พนฺธาเปยฺย วา โมจาเปยฺย วา, ปาจิตฺติยํฯ

    60. Yā pana bhikkhunī pasākhe jātaṃ gaṇḍaṃ vā rudhitaṃ vā anapaloketvā saṅghaṃ vā gaṇaṃ vā purisena saddhiṃ ekenekā bhedāpeyya vā phālāpeyya vā dhovāpeyya vā ālimpāpeyya vā bandhāpeyya vā mocāpeyya vā, pācittiyaṃ.

    อารามวโคฺค ฉโฎฺฐฯ

    Ārāmavaggo chaṭṭho.

    คพฺภินีสิกฺขาปทํ

    Gabbhinīsikkhāpadaṃ

    ๖๑. ยา ปน ภิกฺขุนี คพฺภินิํ วุฎฺฐาเปยฺย, ปาจิตฺติยํฯ

    61. Yā pana bhikkhunī gabbhiniṃ vuṭṭhāpeyya, pācittiyaṃ.

    ปายนฺตีสิกฺขาปทํ

    Pāyantīsikkhāpadaṃ

    ๖๒. ยา ปน ภิกฺขุนี ปายนฺติํ วุฎฺฐาเปยฺย, ปาจิตฺติยํฯ

    62. Yā pana bhikkhunī pāyantiṃ vuṭṭhāpeyya, pācittiyaṃ.

    ปฐมสิกฺขมานสิกฺขาปทํ

    Paṭhamasikkhamānasikkhāpadaṃ

    ๖๓. ยา ปน ภิกฺขุนี เทฺว วสฺสานิ ฉสุ ธเมฺมสุ อสิกฺขิตสิกฺขํ สิกฺขมานํ วุฎฺฐาเปยฺย, ปาจิตฺติยํฯ

    63. Yā pana bhikkhunī dve vassāni chasu dhammesu asikkhitasikkhaṃ sikkhamānaṃ vuṭṭhāpeyya, pācittiyaṃ.

    ทุติยสิกฺขมานสิกฺขาปทํ

    Dutiyasikkhamānasikkhāpadaṃ

    ๖๔. ยา ปน ภิกฺขุนี เทฺว วสฺสานิ ฉสุ ธเมฺมสุ สิกฺขิตสิกฺขํ สิกฺขมานํ สเงฺฆน อสมฺมตํ วุฎฺฐาเปยฺย, ปาจิตฺติยํฯ

    64. Yā pana bhikkhunī dve vassāni chasu dhammesu sikkhitasikkhaṃ sikkhamānaṃ saṅghena asammataṃ vuṭṭhāpeyya, pācittiyaṃ.

    ปฐมคิหิคตสิกฺขาปทํ

    Paṭhamagihigatasikkhāpadaṃ

    ๖๕. ยา ปน ภิกฺขุนี อูนทฺวาทสวสฺสํ คิหิคตํ วุฎฺฐาเปยฺย, ปาจิตฺติยํฯ

    65. Yā pana bhikkhunī ūnadvādasavassaṃ gihigataṃ vuṭṭhāpeyya, pācittiyaṃ.

    ทุติยคิหิคตสิกฺขาปทํ

    Dutiyagihigatasikkhāpadaṃ

    ๖๖. ยา ปน ภิกฺขุนี ปริปุณฺณทฺวาทสวสฺสํ คิหิคตํ เทฺว วสฺสานิ ฉสุ ธเมฺมสุ อสิกฺขิตสิกฺขํ วุฎฺฐาเปยฺย, ปาจิตฺติยํฯ

    66. Yā pana bhikkhunī paripuṇṇadvādasavassaṃ gihigataṃ dve vassāni chasu dhammesu asikkhitasikkhaṃ vuṭṭhāpeyya, pācittiyaṃ.

    ตติยคิหิคตสิกฺขาปทํ

    Tatiyagihigatasikkhāpadaṃ

    ๖๗. ยา ปน ภิกฺขุนี ปริปุณฺณทฺวาทสวสฺสํ คิหิคตํ เทฺว วสฺสานิ ฉสุ ธเมฺมสุ สิกฺขิตสิกฺขํ สเงฺฆน อสมฺมตํ วุฎฺฐาเปยฺย, ปาจิตฺติยํฯ

    67. Yā pana bhikkhunī paripuṇṇadvādasavassaṃ gihigataṃ dve vassāni chasu dhammesu sikkhitasikkhaṃ saṅghena asammataṃ vuṭṭhāpeyya, pācittiyaṃ.

    ปฐมสหชีวินีสิกฺขาปทํ

    Paṭhamasahajīvinīsikkhāpadaṃ

    ๖๘. ยา ปน ภิกฺขุนี สหชีวินิํ วุฎฺฐาเปตฺวา เทฺว วสฺสานิ เนว อนุคฺคเณฺหยฺย น อนุคฺคณฺหาเปยฺย, ปาจิตฺติยํฯ

    68. Yā pana bhikkhunī sahajīviniṃ vuṭṭhāpetvā dve vassāni neva anuggaṇheyya na anuggaṇhāpeyya, pācittiyaṃ.

    ปวตฺตินีนานุพนฺธนสิกฺขาปทํ

    Pavattinīnānubandhanasikkhāpadaṃ

    ๖๙. ยา ปน ภิกฺขุนี วุฎฺฐาปิตํ ปวตฺตินิํ เทฺว วสฺสานิ นานุพเนฺธยฺย, ปาจิตฺติยํฯ

    69. Yā pana bhikkhunī vuṭṭhāpitaṃ pavattiniṃ dve vassāni nānubandheyya, pācittiyaṃ.

    ทุติยสหชีวินีสิกฺขาปทํ

    Dutiyasahajīvinīsikkhāpadaṃ

    ๗๐. ยา ปน ภิกฺขุนี สหชีวินิํ วุฎฺฐาเปตฺวา เนว วูปกาเสยฺย น วูปกาสาเปยฺย อนฺตมโส ฉปฺปญฺจโยชนานิปิ, ปาจิตฺติยํฯ

    70. Yā pana bhikkhunī sahajīviniṃ vuṭṭhāpetvā neva vūpakāseyya na vūpakāsāpeyya antamaso chappañcayojanānipi, pācittiyaṃ.

    คพฺภินิวโคฺค สตฺตโมฯ

    Gabbhinivaggo sattamo.

    ปฐมกุมาริภูตสิกฺขาปทํ

    Paṭhamakumāribhūtasikkhāpadaṃ

    ๗๑. ยา ปน ภิกฺขุนี อูนวีสติวสฺสํ กุมาริภูตํ วุฎฺฐาเปยฺย, ปาจิตฺติยํฯ

    71. Yā pana bhikkhunī ūnavīsativassaṃ kumāribhūtaṃ vuṭṭhāpeyya, pācittiyaṃ.

    ทุติยกุมาริภูตสิกฺขาปทํ

    Dutiyakumāribhūtasikkhāpadaṃ

    ๗๒. ยา ปน ภิกฺขุนี ปริปุณฺณวีสติวสฺสํ กุมาริภูตํ เทฺว วสฺสานิ ฉสุ ธเมฺมสุ อสิกฺขิตสิกฺขํ วุฎฺฐาเปยฺย, ปาจิตฺติยํฯ

    72. Yā pana bhikkhunī paripuṇṇavīsativassaṃ kumāribhūtaṃ dve vassāni chasu dhammesu asikkhitasikkhaṃ vuṭṭhāpeyya, pācittiyaṃ.

    ตติยกุมาริภูตสิกฺขาปทํ

    Tatiyakumāribhūtasikkhāpadaṃ

    ๗๓. ยา ปน ภิกฺขุนี ปริปุณฺณวีสติวสฺสํ กุมาริภูตํ เทฺว วสฺสานิ ฉสุ ธเมฺมสุ สิกฺขิตสิกฺขํ สเงฺฆน อสมฺมตํ วุฎฺฐาเปยฺย, ปาจิตฺติยํฯ

    73. Yā pana bhikkhunī paripuṇṇavīsativassaṃ kumāribhūtaṃ dve vassāni chasu dhammesu sikkhitasikkhaṃ saṅghena asammataṃ vuṭṭhāpeyya, pācittiyaṃ.

    อูนทฺวาทสวสฺสสิกฺขาปทํ

    Ūnadvādasavassasikkhāpadaṃ

    ๗๔. ยา ปน ภิกฺขุนี อูนทฺวาทสวสฺสา วุฎฺฐาเปยฺย, ปาจิตฺติยํฯ

    74. Yā pana bhikkhunī ūnadvādasavassā vuṭṭhāpeyya, pācittiyaṃ.

    ปริปุณฺณทฺวาทสวสฺสสิกฺขาปทํ

    Paripuṇṇadvādasavassasikkhāpadaṃ

    ๗๕. ยา ปน ภิกฺขุนี ปริปุณฺณทฺวาทสวสฺสา สเงฺฆน อสมฺมตา วุฎฺฐาเปยฺย, ปาจิตฺติยํฯ

    75. Yā pana bhikkhunī paripuṇṇadvādasavassā saṅghena asammatā vuṭṭhāpeyya, pācittiyaṃ.

    ขิยฺยนธมฺมสิกฺขาปทํ

    Khiyyanadhammasikkhāpadaṃ

    ๗๖. ยา ปน ภิกฺขุนี ‘‘อลํ ตาว เต, อเยฺย, วุฎฺฐาปิเตนา’’ติ วุจฺจมานา ‘‘สาธู’’ติ ปฎิสฺสุณิตฺวา สา ปจฺฉา ขิยฺยนธมฺมํ อาปเชฺชยฺย, ปาจิตฺติยํฯ

    76. Yā pana bhikkhunī ‘‘alaṃ tāva te, ayye, vuṭṭhāpitenā’’ti vuccamānā ‘‘sādhū’’ti paṭissuṇitvā sā pacchā khiyyanadhammaṃ āpajjeyya, pācittiyaṃ.

    ปฐมสิกฺขมานนวุฎฺฐาปนสิกฺขาปทํ

    Paṭhamasikkhamānanavuṭṭhāpanasikkhāpadaṃ

    ๗๗. ยา ปน ภิกฺขุนี สิกฺขมานํ ‘‘สเจ เม ตฺวํ, อเยฺย, จีวรํ ทสฺสสิ, เอวาหํ ตํ วุฎฺฐาเปสฺสามี’’ติ วตฺวา สา ปจฺฉา อนนฺตรายิกินี เนว วุฎฺฐาเปยฺย, น วุฎฺฐาปนาย อุสฺสุกฺกํ กเรยฺย, ปาจิตฺติยํฯ

    77. Yā pana bhikkhunī sikkhamānaṃ ‘‘sace me tvaṃ, ayye, cīvaraṃ dassasi, evāhaṃ taṃ vuṭṭhāpessāmī’’ti vatvā sā pacchā anantarāyikinī neva vuṭṭhāpeyya, na vuṭṭhāpanāya ussukkaṃ kareyya, pācittiyaṃ.

    ทุติยสิกฺขมานนวุฎฺฐาปนสิกฺขาปทํ

    Dutiyasikkhamānanavuṭṭhāpanasikkhāpadaṃ

    ๗๘. ยา ปน ภิกฺขุนี สิกฺขมานํ ‘‘สเจ มํ ตฺวํ, อเยฺย, เทฺว วสฺสานิ อนุพนฺธิสฺสสิ, เอวาหํ ตํ วุฎฺฐาเปสฺสามี’’ติ วตฺวา สา ปจฺฉา อนนฺตรายิกินี เนว วุฎฺฐาเปยฺย, น วุฎฺฐาปนาย อุสฺสุกฺกํ กเรยฺย, ปาจิตฺติยํฯ

    78. Yā pana bhikkhunī sikkhamānaṃ ‘‘sace maṃ tvaṃ, ayye, dve vassāni anubandhissasi, evāhaṃ taṃ vuṭṭhāpessāmī’’ti vatvā sā pacchā anantarāyikinī neva vuṭṭhāpeyya, na vuṭṭhāpanāya ussukkaṃ kareyya, pācittiyaṃ.

    โสกาวาสสิกฺขาปทํ

    Sokāvāsasikkhāpadaṃ

    ๗๙. ยา ปน ภิกฺขุนี ปุริสสํสฎฺฐํ กุมารกสํสฎฺฐํ จณฺฑิํ โสกาวาสํ สิกฺขมานํ วุฎฺฐาเปยฺย, ปาจิตฺติยํฯ

    79. Yā pana bhikkhunī purisasaṃsaṭṭhaṃ kumārakasaṃsaṭṭhaṃ caṇḍiṃ sokāvāsaṃ sikkhamānaṃ vuṭṭhāpeyya, pācittiyaṃ.

    อนนุญฺญาตสิกฺขาปทํ

    Ananuññātasikkhāpadaṃ

    ๘๐. ยา ปน ภิกฺขุนี มาตาปิตูหิ วา สามิเกน วา อนนุญฺญาตํ สิกฺขมานํ วุฎฺฐาเปยฺย, ปาจิตฺติยํฯ

    80. Yā pana bhikkhunī mātāpitūhi vā sāmikena vā ananuññātaṃ sikkhamānaṃ vuṭṭhāpeyya, pācittiyaṃ.

    ปาริวาสิกสิกฺขาปทํ

    Pārivāsikasikkhāpadaṃ

    ๘๑. ยา ปน ภิกฺขุนี ปาริวาสิกฉนฺททาเนน สิกฺขมานํ วุฎฺฐาเปยฺย, ปาจิตฺติยํฯ

    81. Yā pana bhikkhunī pārivāsikachandadānena sikkhamānaṃ vuṭṭhāpeyya, pācittiyaṃ.

    อนุวสฺสสิกฺขาปทํ

    Anuvassasikkhāpadaṃ

    ๘๒. ยา ปน ภิกฺขุนี อนุวสฺสํ วุฎฺฐาเปยฺย, ปาจิตฺติยํฯ

    82. Yā pana bhikkhunī anuvassaṃ vuṭṭhāpeyya, pācittiyaṃ.

    เอกวสฺสสิกฺขาปทํ

    Ekavassasikkhāpadaṃ

    ๘๓. ยา ปน ภิกฺขุนี เอกํ วสฺสํ เทฺว วุฎฺฐาเปยฺย, ปาจิตฺติยํฯ

    83. Yā pana bhikkhunī ekaṃ vassaṃ dve vuṭṭhāpeyya, pācittiyaṃ.

    กุมาริภูตวโคฺค อฎฺฐโมฯ

    Kumāribhūtavaggo aṭṭhamo.

    ฉตฺตุปาหนสิกฺขาปทํ

    Chattupāhanasikkhāpadaṃ

    ๘๔. ยา ปน ภิกฺขุนี อคิลานา ฉตฺตุปาหนํ ธาเรยฺย, ปาจิตฺติยํฯ

    84. Yā pana bhikkhunī agilānā chattupāhanaṃ dhāreyya, pācittiyaṃ.

    ยานสิกฺขาปทํ

    Yānasikkhāpadaṃ

    ๘๕. ยา ปน ภิกฺขุนี อคิลานา ยาเนน ยาเยยฺย, ปาจิตฺติยํฯ

    85. Yā pana bhikkhunī agilānā yānena yāyeyya, pācittiyaṃ.

    สงฺฆาณิสิกฺขาปทํ

    Saṅghāṇisikkhāpadaṃ

    ๘๖. ยา ปน ภิกฺขุนี สงฺฆาณิํ ธาเรยฺย, ปาจิตฺติยํฯ

    86. Yā pana bhikkhunī saṅghāṇiṃ dhāreyya, pācittiyaṃ.

    อิตฺถาลงฺการสิกฺขาปทํ

    Itthālaṅkārasikkhāpadaṃ

    ๘๗. ยา ปน ภิกฺขุนี อิตฺถาลงฺการํ ธาเรยฺย, ปาจิตฺติยํฯ

    87. Yā pana bhikkhunī itthālaṅkāraṃ dhāreyya, pācittiyaṃ.

    คนฺธวณฺณกสิกฺขาปทํ

    Gandhavaṇṇakasikkhāpadaṃ

    ๘๘. ยา ปน ภิกฺขุนี คนฺธวณฺณเกน นหาเยยฺย, ปาจิตฺติยํฯ

    88. Yā pana bhikkhunī gandhavaṇṇakena nahāyeyya, pācittiyaṃ.

    วาสิตกสิกฺขาปทํ

    Vāsitakasikkhāpadaṃ

    ๘๙. ยา ปน ภิกฺขุนี วาสิตเกน ปิญฺญาเกน นหาเยยฺย, ปาจิตฺติยํฯ

    89. Yā pana bhikkhunī vāsitakena piññākena nahāyeyya, pācittiyaṃ.

    ภิกฺขุนิอุมฺมทฺทาปนสิกฺขาปทํ

    Bhikkhuniummaddāpanasikkhāpadaṃ

    ๙๐. ยา ปน ภิกฺขุนี ภิกฺขุนิยา อุมฺมทฺทาเปยฺย วา ปริมทฺทาเปยฺย วา, ปาจิตฺติยํฯ

    90. Yā pana bhikkhunī bhikkhuniyā ummaddāpeyya vā parimaddāpeyya vā, pācittiyaṃ.

    สิกฺขมานอุมฺมทฺทาปนสิกฺขาปทํ

    Sikkhamānaummaddāpanasikkhāpadaṃ

    ๙๑. ยา ปน ภิกฺขุนี สิกฺขมานาย อุมฺมทฺทาเปยฺย วา ปริมทฺทาเปยฺย วา, ปาจิตฺติยํฯ

    91. Yā pana bhikkhunī sikkhamānāya ummaddāpeyya vā parimaddāpeyya vā, pācittiyaṃ.

    สามเณรีอุมฺมทฺทาปนสิกฺขาปทํ

    Sāmaṇerīummaddāpanasikkhāpadaṃ

    ๙๒. ยา ปน ภิกฺขุนี สามเณริยา อุมฺมทฺทาเปยฺย วา ปริมทฺทาเปยฺย วา, ปาจิตฺติยํฯ

    92. Yā pana bhikkhunī sāmaṇeriyā ummaddāpeyya vā parimaddāpeyya vā, pācittiyaṃ.

    คิหินิอุมฺมทฺทาปนสิกฺขาปทํ

    Gihiniummaddāpanasikkhāpadaṃ

    ๙๓. ยา ปน ภิกฺขุนี คิหินิยา อุมฺมทฺทาเปยฺย วา ปริมทฺทาเปยฺย วา, ปาจิตฺติยํฯ

    93. Yā pana bhikkhunī gihiniyā ummaddāpeyya vā parimaddāpeyya vā, pācittiyaṃ.

    อนาปุจฺฉาสิกฺขาปทํ

    Anāpucchāsikkhāpadaṃ

    ๙๔. ยา ปน ภิกฺขุนี ภิกฺขุสฺส ปุรโต อนาปุจฺฉา อาสเน นิสีเทยฺย, ปาจิตฺติยํฯ

    94. Yā pana bhikkhunī bhikkhussa purato anāpucchā āsane nisīdeyya, pācittiyaṃ.

    ปญฺหาปุจฺฉนสิกฺขาปทํ

    Pañhāpucchanasikkhāpadaṃ

    ๙๕. ยา ปน ภิกฺขุนี อโนกาสกตํ ภิกฺขุํ ปญฺหํ ปุเจฺฉยฺย, ปาจิตฺติยํฯ

    95. Yā pana bhikkhunī anokāsakataṃ bhikkhuṃ pañhaṃ puccheyya, pācittiyaṃ.

    อสํกจฺจิกสิกฺขาปทํ

    Asaṃkaccikasikkhāpadaṃ

    ๙๖. ยา ปน ภิกฺขุนี อสํกจฺจิกา คามํ ปวิเสยฺย, ปาจิตฺติยํฯ

    96. Yā pana bhikkhunī asaṃkaccikā gāmaṃ paviseyya, pācittiyaṃ.

    ฉตฺตุปาหนวโคฺค นวโมฯ

    Chattupāhanavaggo navamo.

    มุสาวาทสิกฺขาปทํ

    Musāvādasikkhāpadaṃ

    ๙๗. สมฺปชานมุสาวาเท ปาจิตฺติยํฯ

    97. Sampajānamusāvāde pācittiyaṃ.

    โอมสวาทสิกฺขาปทํ

    Omasavādasikkhāpadaṃ

    ๙๘. โอมสวาเท ปาจิตฺติยํฯ

    98. Omasavāde pācittiyaṃ.

    เปสุญฺญสิกฺขาปทํ

    Pesuññasikkhāpadaṃ

    ๙๙. ภิกฺขุนิเปสุเญฺญ ปาจิตฺติยํฯ

    99. Bhikkhunipesuññe pācittiyaṃ.

    ปทโสธมฺมสิกฺขาปทํ

    Padasodhammasikkhāpadaṃ

    ๑๐๐. ยา ปน ภิกฺขุนี อนุปสมฺปนฺนํ ปทโส ธมฺมํ วาเจยฺย, ปาจิตฺติยํฯ

    100. Yā pana bhikkhunī anupasampannaṃ padaso dhammaṃ vāceyya, pācittiyaṃ.

    ปฐมสหเสยฺยสิกฺขาปทํ

    Paṭhamasahaseyyasikkhāpadaṃ

    ๑๐๑. ยา ปน ภิกฺขุนี อนุปสมฺปนฺนาย อุตฺตริทิรตฺตติรตฺตํ สหเสยฺยํ กเปฺปยฺย, ปาจิตฺติยํฯ

    101. Yā pana bhikkhunī anupasampannāya uttaridirattatirattaṃ sahaseyyaṃ kappeyya, pācittiyaṃ.

    ทุติยสหเสยฺยสิกฺขาปทํ

    Dutiyasahaseyyasikkhāpadaṃ

    ๑๐๒. ยา ปน ภิกฺขุนี ปุริเสน สหเสยฺยํ กเปฺปยฺย, ปาจิตฺติยํฯ

    102. Yā pana bhikkhunī purisena sahaseyyaṃ kappeyya, pācittiyaṃ.

    ธมฺมเทสนาสิกฺขาปทํ

    Dhammadesanāsikkhāpadaṃ

    ๑๐๓. ยา ปน ภิกฺขุนี ปุริสสฺส อุตฺตริฉปฺปญฺจวาจาหิ ธมฺมํ เทเสยฺย อญฺญตฺร วิญฺญุนา อิตฺถิวิคฺคเหน, ปาจิตฺติยํฯ

    103. Yā pana bhikkhunī purisassa uttarichappañcavācāhi dhammaṃ deseyya aññatra viññunā itthiviggahena, pācittiyaṃ.

    ภูตาโรจนสิกฺขาปทํ

    Bhūtārocanasikkhāpadaṃ

    ๑๐๔. ยา ปน ภิกฺขุนี อนุปสมฺปนฺนาย อุตฺตริมนุสฺสธมฺมํ อาโรเจยฺย, ภูตสฺมิํ ปาจิตฺติยํฯ

    104. Yā pana bhikkhunī anupasampannāya uttarimanussadhammaṃ āroceyya, bhūtasmiṃ pācittiyaṃ.

    ทุฎฺฐุลฺลาโรจนสิกฺขาปทํ

    Duṭṭhullārocanasikkhāpadaṃ

    ๑๐๕. ยา ปน ภิกฺขุนี ภิกฺขุนิยา ทุฎฺฐุลฺลํ อาปตฺติํ อนุปสมฺปนฺนาย อาโรเจยฺย อญฺญตฺร ภิกฺขุนิสมฺมุติยา, ปาจิตฺติยํฯ

    105. Yā pana bhikkhunī bhikkhuniyā duṭṭhullaṃ āpattiṃ anupasampannāya āroceyya aññatra bhikkhunisammutiyā, pācittiyaṃ.

    ปถวีขณนสิกฺขาปทํ

    Pathavīkhaṇanasikkhāpadaṃ

    ๑๐๖. ยา ปน ภิกฺขุนี ปถวิํ ขเณยฺย วา ขณาเปยฺย วา, ปาจิตฺติยํฯ

    106. Yā pana bhikkhunī pathaviṃ khaṇeyya vā khaṇāpeyya vā, pācittiyaṃ.

    มุสาวาทวโคฺค ทสโมฯ

    Musāvādavaggo dasamo.

    ภูตคามสิกฺขาปทํ

    Bhūtagāmasikkhāpadaṃ

    ๑๐๗. ภูตคามปาตพฺยตาย ปาจิตฺติยํฯ

    107. Bhūtagāmapātabyatāya pācittiyaṃ.

    อญฺญวาทกสิกฺขาปทํ

    Aññavādakasikkhāpadaṃ

    ๑๐๘. อญฺญวาทเก, วิเหสเก ปาจิตฺติยํฯ

    108. Aññavādake, vihesake pācittiyaṃ.

    อุชฺฌาปนกสิกฺขาปทํ

    Ujjhāpanakasikkhāpadaṃ

    ๑๐๙. อุชฺฌาปนเก, ขิยฺยนเก ปาจิตฺติยํฯ

    109. Ujjhāpanake, khiyyanake pācittiyaṃ.

    ปฐมเสนาสนสิกฺขาปทํ

    Paṭhamasenāsanasikkhāpadaṃ

    ๑๑๐. ยา ปน ภิกฺขุนี สงฺฆิกํ มญฺจํ วา ปีฐํ วา ภิสิํ วา โกจฺฉํ วา อโชฺฌกาเส สนฺถริตฺวา วา สนฺถราเปตฺวา วา ตํ ปกฺกมนฺตี เนว อุทฺธเรยฺย, น อุทฺธราเปยฺย, อนาปุจฺฉํ วา คเจฺฉยฺย, ปาจิตฺติยํฯ

    110. Yā pana bhikkhunī saṅghikaṃ mañcaṃ vā pīṭhaṃ vā bhisiṃ vā kocchaṃ vā ajjhokāse santharitvā vā santharāpetvā vā taṃ pakkamantī neva uddhareyya, na uddharāpeyya, anāpucchaṃ vā gaccheyya, pācittiyaṃ.

    ทุติยเสนาสนสิกฺขาปทํ

    Dutiyasenāsanasikkhāpadaṃ

    ๑๑๑. ยา ปน ภิกฺขุนี สงฺฆิเก วิหาเร เสยฺยํ สนฺถริตฺวา วา สนฺถราเปตฺวา วา ตํ ปกฺกมนฺตี เนว อุทฺธเรยฺย, น อุทฺธราเปยฺย, อนาปุจฺฉํ วา คเจฺฉยฺย, ปาจิตฺติยํฯ

    111. Yā pana bhikkhunī saṅghike vihāre seyyaṃ santharitvā vā santharāpetvā vā taṃ pakkamantī neva uddhareyya, na uddharāpeyya, anāpucchaṃ vā gaccheyya, pācittiyaṃ.

    อนุปขชฺชสิกฺขาปทํ

    Anupakhajjasikkhāpadaṃ

    ๑๑๒. ยา ปน ภิกฺขุนี สงฺฆิเก วิหาเร ชานํ ปุพฺพุปคตํ ภิกฺขุนิํ อนุปขชฺช เสยฺยํ กเปฺปยฺย ‘‘ยสฺสา สมฺพาโธ ภวิสฺสติ, สา ปกฺกมิสฺสตี’’ติ เอตเทว ปจฺจยํ กริตฺวา อนญฺญํ, ปาจิตฺติยํฯ

    112. Yā pana bhikkhunī saṅghike vihāre jānaṃ pubbupagataṃ bhikkhuniṃ anupakhajja seyyaṃ kappeyya ‘‘yassā sambādho bhavissati, sā pakkamissatī’’ti etadeva paccayaṃ karitvā anaññaṃ, pācittiyaṃ.

    นิกฺกฑฺฒนสิกฺขาปทํ

    Nikkaḍḍhanasikkhāpadaṃ

    ๑๑๓. ยา ปน ภิกฺขุนี ภิกฺขุนิํ กุปิตา อนตฺตมนา สงฺฆิกา วิหารา นิกฺกเฑฺฒยฺย วา นิกฺกฑฺฒาเปยฺย วา, ปาจิตฺติยํฯ

    113. Yā pana bhikkhunī bhikkhuniṃ kupitā anattamanā saṅghikā vihārā nikkaḍḍheyya vā nikkaḍḍhāpeyya vā, pācittiyaṃ.

    เวหาสกุฎิสิกฺขาปทํ

    Vehāsakuṭisikkhāpadaṃ

    ๑๑๔. ยา ปน ภิกฺขุนี สงฺฆิเก วิหาเร อุปริเวหาสกุฎิยา อาหจฺจปาทกํ มญฺจํ วา ปีฐํ วา อภินิสีเทยฺย วา อภินิปเชฺชยฺย วา, ปาจิตฺติยํฯ

    114. Yā pana bhikkhunī saṅghike vihāre uparivehāsakuṭiyā āhaccapādakaṃ mañcaṃ vā pīṭhaṃ vā abhinisīdeyya vā abhinipajjeyya vā, pācittiyaṃ.

    มหลฺลกวิหารสิกฺขาปทํ

    Mahallakavihārasikkhāpadaṃ

    ๑๑๕. มหลฺลกํ ปน ภิกฺขุนิยา วิหารํ การยมานาย ยาว ทฺวารโกสา อคฺคฬฎฺฐปนาย, อาโลกสนฺธิปริกมฺมาย ทฺวตฺติจฺฉทนสฺส ปริยายํ อปฺปหริเต ฐิตาย อธิฎฺฐาตพฺพํฯ ตโต เจ อุตฺตริ อปฺปหริเตปิ ฐิตา อธิฎฺฐเหยฺย, ปาจิตฺติยํฯ

    115. Mahallakaṃ pana bhikkhuniyā vihāraṃ kārayamānāya yāva dvārakosā aggaḷaṭṭhapanāya, ālokasandhiparikammāya dvatticchadanassa pariyāyaṃ appaharite ṭhitāya adhiṭṭhātabbaṃ. Tato ce uttari appaharitepi ṭhitā adhiṭṭhaheyya, pācittiyaṃ.

    สปฺปาณกสิกฺขาปทํ

    Sappāṇakasikkhāpadaṃ

    ๑๑๖. ยา ปน ภิกฺขุนี ชานํ สปฺปาณกํ อุทกํ ติณํ วา มตฺติกํ วา สิเญฺจยฺย วา สิญฺจาเปยฺย วา, ปาจิตฺติยํฯ

    116. Yā pana bhikkhunī jānaṃ sappāṇakaṃ udakaṃ tiṇaṃ vā mattikaṃ vā siñceyya vā siñcāpeyya vā, pācittiyaṃ.

    ภูตคามวโคฺค เอกาทสโมฯ

    Bhūtagāmavaggo ekādasamo.

    อาวสถปิณฺฑสิกฺขาปทํ

    Āvasathapiṇḍasikkhāpadaṃ

    ๑๑๗. อคิลานาย ภิกฺขุนิยา เอโก อาวสถปิโณฺฑ ภุญฺชิตโพฺพฯ ตโต เจ อุตฺตริ ภุเญฺชยฺย, ปาจิตฺติยํฯ

    117. Agilānāya bhikkhuniyā eko āvasathapiṇḍo bhuñjitabbo. Tato ce uttari bhuñjeyya, pācittiyaṃ.

    คณโภชนสิกฺขาปทํ

    Gaṇabhojanasikkhāpadaṃ

    ๑๑๘. คณโภชเน อญฺญตฺร สมยา ปาจิตฺติยํฯ ตตฺถายํ สมโย, คิลานสมโย, จีวรทานสมโย , จีวรการสมโย, อทฺธานคมนสมโย, นาวาภิรุหนสมโย, มหาสมโย, สมณภตฺตสมโย, อยํ ตตฺถ สมโยฯ

    118. Gaṇabhojane aññatra samayā pācittiyaṃ. Tatthāyaṃ samayo, gilānasamayo, cīvaradānasamayo , cīvarakārasamayo, addhānagamanasamayo, nāvābhiruhanasamayo, mahāsamayo, samaṇabhattasamayo, ayaṃ tattha samayo.

    กาณมาตุสิกฺขาปทํ

    Kāṇamātusikkhāpadaṃ

    ๑๑๙. ภิกฺขุนิํ ปเนว กุลํ อุปคตํ ปูเวหิ วา มเนฺถหิ วา อภิหฎฺฐุํ ปวาเรยฺย, อากงฺขมานาย ภิกฺขุนิยา ทฺวตฺติปตฺตปูรา ปฎิคฺคเหตพฺพาฯ ตโต เจ อุตฺตริ ปฎิคฺคเณฺหยฺย, ปาจิตฺติยํฯ ทฺวตฺติปตฺตปูเร ปฎิคฺคเหตฺวา ตโต นีหริตฺวา ภิกฺขุนีหิ สทฺธิํ สํวิภชิตพฺพํ, อยํ ตตฺถ สามีจิฯ

    119. Bhikkhuniṃ paneva kulaṃ upagataṃ pūvehi vā manthehi vā abhihaṭṭhuṃ pavāreyya, ākaṅkhamānāya bhikkhuniyā dvattipattapūrā paṭiggahetabbā. Tato ce uttari paṭiggaṇheyya, pācittiyaṃ. Dvattipattapūre paṭiggahetvā tato nīharitvā bhikkhunīhi saddhiṃ saṃvibhajitabbaṃ, ayaṃ tattha sāmīci.

    วิกาลโภชนสิกฺขาปทํ

    Vikālabhojanasikkhāpadaṃ

    ๑๒๐. ยา ปน ภิกฺขุนี วิกาเล ขาทนียํ วา โภชนียํ วา ขาเทยฺย วา ภุเญฺชยฺย วา, ปาจิตฺติยํฯ

    120. Yā pana bhikkhunī vikāle khādanīyaṃ vā bhojanīyaṃ vā khādeyya vā bhuñjeyya vā, pācittiyaṃ.

    สนฺนิธิการกสิกฺขาปทํ

    Sannidhikārakasikkhāpadaṃ

    ๑๒๑. ยา ปน ภิกฺขุนี สนฺนิธิการกํ ขาทนียํ วา โภชนียํ วา ขาเทยฺย วา ภุเญฺชยฺย วา, ปาจิตฺติยํฯ

    121. Yā pana bhikkhunī sannidhikārakaṃ khādanīyaṃ vā bhojanīyaṃ vā khādeyya vā bhuñjeyya vā, pācittiyaṃ.

    ทนฺตโปนสิกฺขาปทํ

    Dantaponasikkhāpadaṃ

    ๑๒๒. ยา ปน ภิกฺขุนี อทินฺนํ มุขทฺวารํ อาหารํ อาหเรยฺย อญฺญตฺร อุทกทนฺตโปนา, ปาจิตฺติยํฯ

    122. Yā pana bhikkhunī adinnaṃ mukhadvāraṃ āhāraṃ āhareyya aññatra udakadantaponā, pācittiyaṃ.

    อุโยฺยชนสิกฺขาปทํ

    Uyyojanasikkhāpadaṃ

    ๑๒๓. ยา ปน ภิกฺขุนี ภิกฺขุนิํ ‘‘เอหาเยฺย, คามํ วา นิคมํ วา ปิณฺฑาย ปวิสิสฺสามา’’ติ ตสฺสา ทาเปตฺวา วา อทาเปตฺวา วา อุโยฺยเชยฺย ‘‘คจฺฉาเยฺย, น เม ตยา สทฺธิํ กถา วา นิสชฺชา วา ผาสุ โหติ, เอกิกาย เม กถา วา นิสชฺชา วา ผาสุ โหตี’’ติ เอตเทว ปจฺจยํ กริตฺวา อนญฺญํ, ปาจิตฺติยํฯ

    123. Yā pana bhikkhunī bhikkhuniṃ ‘‘ehāyye, gāmaṃ vā nigamaṃ vā piṇḍāya pavisissāmā’’ti tassā dāpetvā vā adāpetvā vā uyyojeyya ‘‘gacchāyye, na me tayā saddhiṃ kathā vā nisajjā vā phāsu hoti, ekikāya me kathā vā nisajjā vā phāsu hotī’’ti etadeva paccayaṃ karitvā anaññaṃ, pācittiyaṃ.

    สโภชนสิกฺขาปทํ

    Sabhojanasikkhāpadaṃ

    ๑๒๔. ยา ปน ภิกฺขุนี สโภชเน กุเล อนุปขชฺช นิสชฺชํ กเปฺปยฺย, ปาจิตฺติยํฯ

    124. Yā pana bhikkhunī sabhojane kule anupakhajja nisajjaṃ kappeyya, pācittiyaṃ.

    รโหปฎิจฺฉนฺนสิกฺขาปทํ

    Rahopaṭicchannasikkhāpadaṃ

    ๑๒๕. ยา ปน ภิกฺขุนี ปุริเสน สทฺธิํ รโห ปฎิจฺฉเนฺน อาสเน นิสชฺชํ กเปฺปยฺย, ปาจิตฺติยํฯ

    125. Yā pana bhikkhunī purisena saddhiṃ raho paṭicchanne āsane nisajjaṃ kappeyya, pācittiyaṃ.

    รโหนิสชฺชสิกฺขาปทํ

    Rahonisajjasikkhāpadaṃ

    ๑๒๖. ยา ปน ภิกฺขุนี ปุริเสน สทฺธิํ เอเกเนกา รโห นิสชฺชํ กเปฺปยฺย, ปาจิตฺติยํฯ

    126. Yā pana bhikkhunī purisena saddhiṃ ekenekā raho nisajjaṃ kappeyya, pācittiyaṃ.

    โภชนวโคฺค ทฺวาทสโมฯ

    Bhojanavaggo dvādasamo.

    จาริตฺตสิกฺขาปทํ

    Cārittasikkhāpadaṃ

    ๑๒๗. ยา ปน ภิกฺขุนี นิมนฺติตา สภตฺตา สมานา สนฺติํ ภิกฺขุนิํ อนาปุจฺฉา ปุเรภตฺตํ วา ปจฺฉาภตฺตํ วา กุเลสุ จาริตฺตํ อาปเชฺชยฺย อญฺญตฺร สมยา, ปาจิตฺติยํฯ ตตฺถายํ สมโย, จีวรทานสมโย, จีวรการสมโย, อยํ ตตฺถ สมโยฯ

    127. Yā pana bhikkhunī nimantitā sabhattā samānā santiṃ bhikkhuniṃ anāpucchā purebhattaṃ vā pacchābhattaṃ vā kulesu cārittaṃ āpajjeyya aññatra samayā, pācittiyaṃ. Tatthāyaṃ samayo, cīvaradānasamayo, cīvarakārasamayo, ayaṃ tattha samayo.

    มหานามสิกฺขาปทํ

    Mahānāmasikkhāpadaṃ

    ๑๒๘. อคิลานาย ภิกฺขุนิยา จตุมาสปฺปจฺจยปวารณา สาทิตพฺพา อญฺญตฺร ปุนปวารณาย, อญฺญตฺร นิจฺจปวารณายฯ ตโต เจ อุตฺตริ สาทิเยยฺย, ปาจิตฺติยํฯ

    128. Agilānāya bhikkhuniyā catumāsappaccayapavāraṇā sāditabbā aññatra punapavāraṇāya, aññatra niccapavāraṇāya. Tato ce uttari sādiyeyya, pācittiyaṃ.

    อุยฺยุตฺตเสนาสิกฺขาปทํ

    Uyyuttasenāsikkhāpadaṃ

    ๑๒๙. ยา ปน ภิกฺขุนี อุยฺยุตฺตํ เสนํ ทสฺสนาย คเจฺฉยฺย อญฺญตฺร ตถารูปปฺปจฺจยา, ปาจิตฺติยํฯ

    129. Yā pana bhikkhunī uyyuttaṃ senaṃ dassanāya gaccheyya aññatra tathārūpappaccayā, pācittiyaṃ.

    เสนาวาสสิกฺขาปทํ

    Senāvāsasikkhāpadaṃ

    ๑๓๐. สิยา จ ตสฺสา ภิกฺขุนิยา โกจิเทว ปจฺจโย เสนํ คมนาย, ทิรตฺตติรตฺตํ ตาย ภิกฺขุนิยา เสนาย วสิตพฺพํฯ ตโต เจ อุตฺตริ วเสยฺย, ปาจิตฺติยํฯ

    130. Siyā ca tassā bhikkhuniyā kocideva paccayo senaṃ gamanāya, dirattatirattaṃ tāya bhikkhuniyā senāya vasitabbaṃ. Tato ce uttari vaseyya, pācittiyaṃ.

    อุโยฺยธิกสิกฺขาปทํ

    Uyyodhikasikkhāpadaṃ

    ๑๓๑. ทิรตฺตติรตฺตํ เจ ภิกฺขุนี เสนาย วสมานา อุโยฺยธิกํ วา พลคฺคํ วา เสนาพฺยูหํ วา อนีกทสฺสนํ วา คเจฺฉยฺย, ปาจิตฺติยํฯ

    131. Dirattatirattaṃ ce bhikkhunī senāya vasamānā uyyodhikaṃ vā balaggaṃ vā senābyūhaṃ vā anīkadassanaṃ vā gaccheyya, pācittiyaṃ.

    สุราปานสิกฺขาปทํ

    Surāpānasikkhāpadaṃ

    ๑๓๒. สุราเมรยปาเน ปาจิตฺติยํฯ

    132. Surāmerayapāne pācittiyaṃ.

    องฺคุลิปโตทกสิกฺขาปทํ

    Aṅgulipatodakasikkhāpadaṃ

    ๑๓๓. องฺคุลิปโตทเก ปาจิตฺติยํฯ

    133. Aṅgulipatodake pācittiyaṃ.

    หสธมฺมสิกฺขาปทํ

    Hasadhammasikkhāpadaṃ

    ๑๓๔. อุทเก หสธเมฺม ปาจิตฺติยํฯ

    134. Udake hasadhamme pācittiyaṃ.

    อนาทริยสิกฺขาปทํ

    Anādariyasikkhāpadaṃ

    ๑๓๕. อนาทริเย ปาจิตฺติยํฯ

    135. Anādariye pācittiyaṃ.

    ภิํสาปนสิกฺขาปทํ

    Bhiṃsāpanasikkhāpadaṃ

    ๑๓๖. ยา ปน ภิกฺขุนี ภิกฺขุนิํ ภิํสาเปยฺย, ปาจิตฺติยํฯ

    136. Yā pana bhikkhunī bhikkhuniṃ bhiṃsāpeyya, pācittiyaṃ.

    จาริตฺตวโคฺค เตรสโมฯ

    Cārittavaggo terasamo.

    โชติสิกฺขาปทํ

    Jotisikkhāpadaṃ

    ๑๓๗. ยา ปน ภิกฺขุนี อคิลานา วิสิพฺพนาเปกฺขา โชติํ สมาทเหยฺย วา สมาทหาเปยฺย วา อญฺญตฺร ตถารูปปฺปจฺจยา, ปาจิตฺติยํฯ

    137. Yā pana bhikkhunī agilānā visibbanāpekkhā jotiṃ samādaheyya vā samādahāpeyya vā aññatra tathārūpappaccayā, pācittiyaṃ.

    นหานสิกฺขาปทํ

    Nahānasikkhāpadaṃ

    ๑๓๘. ยา ปน ภิกฺขุนี โอเรนทฺธมาสํ นหาเยยฺย อญฺญตฺร สมยา, ปาจิตฺติยํฯ ตตฺถายํ สมโย ‘‘ทิยโฑฺฒ มาโส เสโส คิมฺหาน’’นฺติ ‘‘วสฺสานสฺส ปฐโม มาโส’’ อิเจฺจเต อฑฺฒเตยฺยมาสา อุณฺหสมโย, ปริฬาหสมโย, คิลานสมโย, กมฺมสมโย, อทฺธานคมนสมโย, วาตวุฎฺฐิสมโย, อยํ ตตฺถ สมโยฯ

    138. Yā pana bhikkhunī orenaddhamāsaṃ nahāyeyya aññatra samayā, pācittiyaṃ. Tatthāyaṃ samayo ‘‘diyaḍḍho māso seso gimhāna’’nti ‘‘vassānassa paṭhamo māso’’ iccete aḍḍhateyyamāsā uṇhasamayo, pariḷāhasamayo, gilānasamayo, kammasamayo, addhānagamanasamayo, vātavuṭṭhisamayo, ayaṃ tattha samayo.

    ทุพฺพณฺณกรณสิกฺขาปทํ

    Dubbaṇṇakaraṇasikkhāpadaṃ

    ๑๓๙. นวํ ปน ภิกฺขุนิยา จีวรลาภาย ติณฺณํ ทุพฺพณฺณกรณานํ อญฺญตรํ ทุพฺพณฺณกรณํ อาทาตพฺพํ นีลํ วา กทฺทมํ วา กาฬสามํ วาฯ อนาทา เจ ภิกฺขุนี ติณฺณํ ทุพฺพณฺณกรณานํ อญฺญตรํ ทุพฺพณฺณกรณํ นวํ จีวรํ ปริภุเญฺชยฺย, ปาจิตฺติยํฯ

    139. Navaṃ pana bhikkhuniyā cīvaralābhāya tiṇṇaṃ dubbaṇṇakaraṇānaṃ aññataraṃ dubbaṇṇakaraṇaṃ ādātabbaṃ nīlaṃ vā kaddamaṃ vā kāḷasāmaṃ vā. Anādā ce bhikkhunī tiṇṇaṃ dubbaṇṇakaraṇānaṃ aññataraṃ dubbaṇṇakaraṇaṃ navaṃ cīvaraṃ paribhuñjeyya, pācittiyaṃ.

    วิกปฺปนสิกฺขาปทํ

    Vikappanasikkhāpadaṃ

    ๑๔๐. ยา ปน ภิกฺขุนี ภิกฺขุสฺส วา ภิกฺขุนิยา วา สิกฺขมานาย วา สามเณรสฺส วา สามเณริยา วา สามํ จีวรํ วิกเปฺปตฺวา อปจฺจุทฺธารณํ ปริภุเญฺชยฺย, ปาจิตฺติยํฯ

    140. Yā pana bhikkhunī bhikkhussa vā bhikkhuniyā vā sikkhamānāya vā sāmaṇerassa vā sāmaṇeriyā vā sāmaṃ cīvaraṃ vikappetvā apaccuddhāraṇaṃ paribhuñjeyya, pācittiyaṃ.

    อปนิธาปนสิกฺขาปทํ

    Apanidhāpanasikkhāpadaṃ

    ๑๔๑. ยา ปน ภิกฺขุนี ภิกฺขุนิยา ปตฺตํ วา จีวรํ วา นิสีทนํ วา สูจิฆรํ วา กายพนฺธนํ วา อปนิเธยฺย วา อปนิธาเปยฺย วา อนฺตมโส หสาเปกฺขาปิ, ปาจิตฺติยํฯ

    141. Yā pana bhikkhunī bhikkhuniyā pattaṃ vā cīvaraṃ vā nisīdanaṃ vā sūcigharaṃ vā kāyabandhanaṃ vā apanidheyya vā apanidhāpeyya vā antamaso hasāpekkhāpi, pācittiyaṃ.

    สญฺจิจฺจสิกฺขาปทํ

    Sañciccasikkhāpadaṃ

    ๑๔๒. ยา ปน ภิกฺขุนี สญฺจิจฺจ ปาณํ ชีวิตา โวโรเปยฺย, ปาจิตฺติยํฯ

    142. Yā pana bhikkhunī sañcicca pāṇaṃ jīvitā voropeyya, pācittiyaṃ.

    สปฺปาณกสิกฺขาปทํ

    Sappāṇakasikkhāpadaṃ

    ๑๔๓. ยา ปน ภิกฺขุนี ชานํ สปฺปาณกํ อุทกํ ปริภุเญฺชยฺย, ปาจิตฺติยํฯ

    143. Yā pana bhikkhunī jānaṃ sappāṇakaṃ udakaṃ paribhuñjeyya, pācittiyaṃ.

    อุโกฺกฎนสิกฺขาปทํ

    Ukkoṭanasikkhāpadaṃ

    ๑๔๔. ยา ปน ภิกฺขุนี ชานํ ยถาธมฺมํ นิหตาธิกรณํ ปุนกมฺมาย อุโกฺกเฎยฺย, ปาจิตฺติยํฯ

    144. Yā pana bhikkhunī jānaṃ yathādhammaṃ nihatādhikaraṇaṃ punakammāya ukkoṭeyya, pācittiyaṃ.

    เถยฺยสตฺถสิกฺขาปทํ

    Theyyasatthasikkhāpadaṃ

    ๑๔๕. ยา ปน ภิกฺขุนี ชานํ เถยฺยสเตฺถน สทฺธิํ สํวิธาย เอกทฺธานมคฺคํ ปฎิปเชฺชยฺย อนฺตมโส คามนฺตรมฺปิ, ปาจิตฺติยํฯ

    145. Yā pana bhikkhunī jānaṃ theyyasatthena saddhiṃ saṃvidhāya ekaddhānamaggaṃ paṭipajjeyya antamaso gāmantarampi, pācittiyaṃ.

    อริฎฺฐสิกฺขาปทํ

    Ariṭṭhasikkhāpadaṃ

    ๑๔๖. ยา ปน ภิกฺขุนี เอวํ วเทยฺย ‘‘ตถาหํ ภควตา ธมฺมํ เทสิตํ อาชานามิ, ยถา เยเม อนฺตรายิกา ธมฺมา วุตฺตา ภควตา, เต ปฎิเสวโต นาลํ อนฺตรายายา’’ติฯ สา ภิกฺขุนี ภิกฺขุนีหิ เอวมสฺส วจนียา ‘‘มาเยฺย เอวํ อวจ, มา ภควนฺตํ อพฺภาจิกฺขิ, น หิ สาธุ ภควโต อพฺภกฺขานํ, น หิ ภควา เอวํ วเทยฺย, อเนกปริยาเยนาเยฺย อนฺตรายิกา ธมฺมา อนฺตรายิกา วุตฺตา ภควตา, อลญฺจ ปน เต ปฎิเสวโต อนฺตรายายา’’ติฯ เอวญฺจ สา ภิกฺขุนี ภิกฺขุนีหิ วุจฺจมานา ตเถว ปคฺคเณฺหยฺย, สา ภิกฺขุนี ภิกฺขุนีหิ ยาวตติยํ สมนุภาสิตพฺพา ตสฺส ปฎินิสฺสคฺคายฯ ยาวตติยเญฺจ สมนุภาสิยมานา ตํ ปฎินิสฺสเชฺชยฺย, อิเจฺจตํ กุสลํฯ โน เจ ปฎินิสฺสเชฺชยฺย, ปาจิตฺติยํฯ

    146. Yā pana bhikkhunī evaṃ vadeyya ‘‘tathāhaṃ bhagavatā dhammaṃ desitaṃ ājānāmi, yathā yeme antarāyikā dhammā vuttā bhagavatā, te paṭisevato nālaṃ antarāyāyā’’ti. Sā bhikkhunī bhikkhunīhi evamassa vacanīyā ‘‘māyye evaṃ avaca, mā bhagavantaṃ abbhācikkhi, na hi sādhu bhagavato abbhakkhānaṃ, na hi bhagavā evaṃ vadeyya, anekapariyāyenāyye antarāyikā dhammā antarāyikā vuttā bhagavatā, alañca pana te paṭisevato antarāyāyā’’ti. Evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṃ samanubhāsitabbā tassa paṭinissaggāya. Yāvatatiyañce samanubhāsiyamānā taṃ paṭinissajjeyya, iccetaṃ kusalaṃ. No ce paṭinissajjeyya, pācittiyaṃ.

    โชติวโคฺค จุทฺทสโมฯ

    Jotivaggo cuddasamo.

    อุกฺขิตฺตสโมฺภคสิกฺขาปทํ

    Ukkhittasambhogasikkhāpadaṃ

    ๑๔๗. ยา ปน ภิกฺขุนี ชานํ ตถาวาทินิยา ภิกฺขุนิยา อกฎานุธมฺมาย ตํ ทิฎฺฐิํ อปฺปฎินิสฺสฎฺฐาย สทฺธิํ สมฺภุเญฺชยฺย วา, สํวเสยฺย วา, สห วา เสยฺยํ กเปฺปยฺย, ปาจิตฺติยํฯ

    147. Yā pana bhikkhunī jānaṃ tathāvādiniyā bhikkhuniyā akaṭānudhammāya taṃ diṭṭhiṃ appaṭinissaṭṭhāya saddhiṃ sambhuñjeyya vā, saṃvaseyya vā, saha vā seyyaṃ kappeyya, pācittiyaṃ.

    กณฺฎกสิกฺขาปทํ

    Kaṇṭakasikkhāpadaṃ

    ๑๔๘. สมณุเทฺทสาปิ เจ เอวํ วเทยฺย ‘‘ตถาหํ ภควตา ธมฺมํ เทสิตํ อาชานามิ, ยถา เยเม อนฺตรายิกา ธมฺมา วุตฺตา ภควตา, เต ปฎิเสวโต นาลํ อนฺตรายายา’’ติฯ สา สมณุเทฺทสา ภิกฺขุนีหิ เอวมสฺส วจนียา ‘‘มาเยฺย, สมณุเทฺทเส เอวํ อวจ, มา ภควนฺตํ อพฺภาจิกฺขิ, น หิ สาธุ ภควโต อพฺภกฺขานํ, น หิ ภควา เอวํ วเทยฺย, อเนกปริยาเยนาเยฺย, สมณุเทฺทเส อนฺตรายิกา ธมฺมา อนฺตรายิกา วุตฺตา ภควตา, อลญฺจ ปน เต ปฎิเสวโต อนฺตรายายา’’ติฯ เอวญฺจ สา สมณุเทฺทสา ภิกฺขุนีหิ วุจฺจมานา ตเถว ปคฺคเณฺหยฺย, สา สมณุเทฺทสา ภิกฺขุนีหิ เอวมสฺส วจนียา ‘‘อชฺชตเคฺค เต, อเยฺย, สมณุเทฺทเส น เจว โส ภควา สตฺถา อปทิสิตโพฺพ, ยมฺปิ จญฺญา สมณุเทฺทสา ลภนฺติ ภิกฺขุนีหิ สทฺธิํ ทิรตฺตติรตฺตํ สหเสยฺยํ, สาปิ เต นตฺถิ, จร ปิเร, วินสฺสา’’ติฯ ยา ปน ภิกฺขุนี ชานํ ตถานาสิตํ สมณุเทฺทสํ อุปลาเปยฺย วา, อุปฎฺฐาเปยฺย วา, สมฺภุเญฺชยฺย วา, สห วา เสยฺยํ กเปฺปยฺย, ปาจิตฺติยํฯ

    148. Samaṇuddesāpi ce evaṃ vadeyya ‘‘tathāhaṃ bhagavatā dhammaṃ desitaṃ ājānāmi, yathā yeme antarāyikā dhammā vuttā bhagavatā, te paṭisevato nālaṃ antarāyāyā’’ti. Sā samaṇuddesā bhikkhunīhi evamassa vacanīyā ‘‘māyye, samaṇuddese evaṃ avaca, mā bhagavantaṃ abbhācikkhi, na hi sādhu bhagavato abbhakkhānaṃ, na hi bhagavā evaṃ vadeyya, anekapariyāyenāyye, samaṇuddese antarāyikā dhammā antarāyikā vuttā bhagavatā, alañca pana te paṭisevato antarāyāyā’’ti. Evañca sā samaṇuddesā bhikkhunīhi vuccamānā tatheva paggaṇheyya, sā samaṇuddesā bhikkhunīhi evamassa vacanīyā ‘‘ajjatagge te, ayye, samaṇuddese na ceva so bhagavā satthā apadisitabbo, yampi caññā samaṇuddesā labhanti bhikkhunīhi saddhiṃ dirattatirattaṃ sahaseyyaṃ, sāpi te natthi, cara pire, vinassā’’ti. Yā pana bhikkhunī jānaṃ tathānāsitaṃ samaṇuddesaṃ upalāpeyya vā, upaṭṭhāpeyya vā, sambhuñjeyya vā, saha vā seyyaṃ kappeyya, pācittiyaṃ.

    สหธมฺมิกสิกฺขาปทํ

    Sahadhammikasikkhāpadaṃ

    ๑๔๙. ยา ปน ภิกฺขุนี ภิกฺขุนีหิ สหธมฺมิกํ วุจฺจมานา เอวํ วเทยฺย ‘‘น ตาวาหํ, อเยฺย, เอตสฺมิํ สิกฺขาปเท สิกฺขิสฺสามิ, ยาว น อญฺญํ ภิกฺขุนิํ พฺยตฺตํ วินยธรํ ปริปุจฺฉามี’’ติ, ปาจิตฺติยํฯ สิกฺขมานาย, ภิกฺขเว, ภิกฺขุนิยา อญฺญาตพฺพํ ปริปุจฺฉิตพฺพํ ปริปญฺหิตพฺพํ, อยํ ตตฺถ สามีจิฯ

    149. Yā pana bhikkhunī bhikkhunīhi sahadhammikaṃ vuccamānā evaṃ vadeyya ‘‘na tāvāhaṃ, ayye, etasmiṃ sikkhāpade sikkhissāmi, yāva na aññaṃ bhikkhuniṃ byattaṃ vinayadharaṃ paripucchāmī’’ti, pācittiyaṃ. Sikkhamānāya, bhikkhave, bhikkhuniyā aññātabbaṃ paripucchitabbaṃ paripañhitabbaṃ, ayaṃ tattha sāmīci.

    วิเลขนสิกฺขาปทํ

    Vilekhanasikkhāpadaṃ

    ๑๕๐. ยา ปน ภิกฺขุนี ปาติโมเกฺข อุทฺทิสฺสมาเน เอวํ วเทยฺย ‘‘กิํ ปนิเมหิ ขุทฺทานุขุทฺทเกหิ สิกฺขาปเทหิ อุทฺทิเฎฺฐหิ, ยาวเทว กุกฺกุจฺจาย วิเหสาย วิเลขาย สํวตฺตนฺตี’’ติ, สิกฺขาปทวิวณฺณเก ปาจิตฺติยํฯ

    150. Yā pana bhikkhunī pātimokkhe uddissamāne evaṃ vadeyya ‘‘kiṃ panimehi khuddānukhuddakehi sikkhāpadehi uddiṭṭhehi, yāvadeva kukkuccāya vihesāya vilekhāya saṃvattantī’’ti, sikkhāpadavivaṇṇake pācittiyaṃ.

    โมหนสิกฺขาปทํ

    Mohanasikkhāpadaṃ

    ๑๕๑. ยา ปน ภิกฺขุนี อนฺวทฺธมาสํ ปาติโมเกฺข อุทฺทิสฺสมาเน เอวํ วเทยฺย ‘‘อิทาเนว โข อหํ, อเยฺย, ชานามิ อยมฺปิ กิร ธโมฺม สุตฺตาคโต สุตฺตปริยาปโนฺน อนฺวทฺธมาสํ อุเทฺทสํ อาคจฺฉตี’’ติ, ตเญฺจ ภิกฺขุนิํ อญฺญา ภิกฺขุนิโย ชาเนยฺยุํ นิสินฺนปุพฺพํ อิมาย ภิกฺขุนิยา ทฺวตฺติกฺขตฺตุํ ปาติโมเกฺข อุทฺทิสฺสมาเน, โก ปน วาโท ภิโยฺย, น จ ตสฺสา ภิกฺขุนิยา อญฺญาณเกน มุตฺติ อตฺถิ, ยญฺจ ตตฺถ อาปตฺติํ อาปนฺนา, ตญฺจ ยถาธโมฺม กาเรตโพฺพ, อุตฺตริ จสฺสา โมโห อาโรเปตโพฺพ ‘‘ตสฺสา เต, อเยฺย, อลาภา, ตสฺสา เต ทุลฺลทฺธํ, ยํ ตฺวํ ปาติโมเกฺข อุทฺทิสฺสมาเน น สาธุกํ อฎฺฐิํ กตฺวา มนสิ กโรสี’’ติ, อิทํ ตสฺมิํ โมหนเก ปาจิตฺติยํฯ

    151. Yā pana bhikkhunī anvaddhamāsaṃ pātimokkhe uddissamāne evaṃ vadeyya ‘‘idāneva kho ahaṃ, ayye, jānāmi ayampi kira dhammo suttāgato suttapariyāpanno anvaddhamāsaṃ uddesaṃ āgacchatī’’ti, tañce bhikkhuniṃ aññā bhikkhuniyo jāneyyuṃ nisinnapubbaṃ imāya bhikkhuniyā dvattikkhattuṃ pātimokkhe uddissamāne, ko pana vādo bhiyyo, na ca tassā bhikkhuniyā aññāṇakena mutti atthi, yañca tattha āpattiṃ āpannā, tañca yathādhammo kāretabbo, uttari cassā moho āropetabbo ‘‘tassā te, ayye, alābhā, tassā te dulladdhaṃ, yaṃ tvaṃ pātimokkhe uddissamāne na sādhukaṃ aṭṭhiṃ katvā manasi karosī’’ti, idaṃ tasmiṃ mohanake pācittiyaṃ.

    ปหารสิกฺขาปทํ

    Pahārasikkhāpadaṃ

    ๑๕๒. ยา ปน ภิกฺขุนี ภิกฺขุนิยา กุปิตา อนตฺตมนา ปหารํ ทเทยฺย, ปาจิตฺติยํฯ

    152. Yā pana bhikkhunī bhikkhuniyā kupitā anattamanā pahāraṃ dadeyya, pācittiyaṃ.

    ตลสตฺติกสิกฺขาปทํ

    Talasattikasikkhāpadaṃ

    ๑๕๓. ยา ปน ภิกฺขุนี ภิกฺขุนิยา กุปิตา อนตฺตมนา ตลสตฺติกํ อุคฺคิเรยฺย, ปาจิตฺติยํฯ

    153. Yā pana bhikkhunī bhikkhuniyā kupitā anattamanā talasattikaṃ uggireyya, pācittiyaṃ.

    อมูลกสิกฺขาปทํ

    Amūlakasikkhāpadaṃ

    ๑๕๔. ยา ปน ภิกฺขุนี ภิกฺขุนิํ อมูลเกน สงฺฆาทิเสเสน อนุทฺธํเสยฺย, ปาจิตฺติยํฯ

    154. Yā pana bhikkhunī bhikkhuniṃ amūlakena saṅghādisesena anuddhaṃseyya, pācittiyaṃ.

    สญฺจิจฺจสิกฺขาปทํ

    Sañciccasikkhāpadaṃ

    ๑๕๕. ยา ปน ภิกฺขุนี ภิกฺขุนิยา สญฺจิจฺจ กุกฺกุจฺจํ อุปทเหยฺย ‘‘อิติสฺสา มุหุตฺตมฺปิ อผาสุ ภวิสฺสตี’’ติ เอตเทว ปจฺจยํ กริตฺวา อนญฺญํ, ปาจิตฺติยํฯ

    155. Yā pana bhikkhunī bhikkhuniyā sañcicca kukkuccaṃ upadaheyya ‘‘itissā muhuttampi aphāsu bhavissatī’’ti etadeva paccayaṃ karitvā anaññaṃ, pācittiyaṃ.

    อุปสฺสุติ สิกฺขาปทํ

    Upassuti sikkhāpadaṃ

    ๑๕๖. ยา ปน ภิกฺขุนี ภิกฺขุนีนํ ภณฺฑนชาตานํ กลหชาตานํ วิวาทาปนฺนานํ อุปสฺสุติํ ติเฎฺฐยฺย ‘‘ยํ อิมา ภณิสฺสนฺติ, ตํ โสสฺสามี’’ติ เอตเทว ปจฺจยํ กริตฺวา อนญฺญํ, ปาจิตฺติยํฯ

    156. Yā pana bhikkhunī bhikkhunīnaṃ bhaṇḍanajātānaṃ kalahajātānaṃ vivādāpannānaṃ upassutiṃ tiṭṭheyya ‘‘yaṃ imā bhaṇissanti, taṃ sossāmī’’ti etadeva paccayaṃ karitvā anaññaṃ, pācittiyaṃ.

    ทิฎฺฐิวโคฺค ปนฺนรสโมฯ

    Diṭṭhivaggo pannarasamo.

    กมฺมปฺปฎิพาหนสิกฺขาปทํ

    Kammappaṭibāhanasikkhāpadaṃ

    ๑๕๗. ยา ปน ภิกฺขุนี ธมฺมิกานํ กมฺมานํ ฉนฺทํ ทตฺวา ปจฺฉา ขียนธมฺมํ อาปเชฺชยฺย, ปาจิตฺติยํฯ

    157. Yā pana bhikkhunī dhammikānaṃ kammānaṃ chandaṃ datvā pacchā khīyanadhammaṃ āpajjeyya, pācittiyaṃ.

    ฉนฺทํอทตฺวาคมนสิกฺขาปทํ

    Chandaṃadatvāgamanasikkhāpadaṃ

    ๑๕๘. ยา ปน ภิกฺขุนี สเงฺฆ วินิจฺฉยกถาย วตฺตมานาย ฉนฺทํ อทตฺวา อุฎฺฐายาสนา ปกฺกเมยฺย, ปาจิตฺติยํฯ

    158. Yā pana bhikkhunī saṅghe vinicchayakathāya vattamānāya chandaṃ adatvā uṭṭhāyāsanā pakkameyya, pācittiyaṃ.

    ทุพฺพลสิกฺขาปทํ

    Dubbalasikkhāpadaṃ

    ๑๕๙. ยา ปน ภิกฺขุนี สมเคฺคน สเงฺฆน จีวรํ ทตฺวา ปจฺฉา ขียนธมฺมํ อาปเชฺชยฺย ‘‘ยถาสนฺถุตํ ภิกฺขุนิโย สงฺฆิกํ ลาภํ ปริณาเมนฺตี’’ติ, ปาจิตฺติยํฯ

    159. Yā pana bhikkhunī samaggena saṅghena cīvaraṃ datvā pacchā khīyanadhammaṃ āpajjeyya ‘‘yathāsanthutaṃ bhikkhuniyo saṅghikaṃ lābhaṃ pariṇāmentī’’ti, pācittiyaṃ.

    ปริณามนสิกฺขาปทํ

    Pariṇāmanasikkhāpadaṃ

    ๑๖๐. ยา ปน ภิกฺขุนี ชานํ สงฺฆิกํ ลาภํ ปริณตํ ปุคฺคลสฺส ปริณาเมยฺย, ปาจิตฺติยํฯ

    160. Yā pana bhikkhunī jānaṃ saṅghikaṃ lābhaṃ pariṇataṃ puggalassa pariṇāmeyya, pācittiyaṃ.

    รตนสิกฺขาปทํ

    Ratanasikkhāpadaṃ

    ๑๖๑. ยา ปน ภิกฺขุนี รตนํ วา รตนสมฺมตํ วา อญฺญตฺร อชฺฌารามา วา อชฺฌาวสถา วา อุคฺคเณฺหยฺย วา อุคฺคณฺหาเปยฺย วา, ปาจิตฺติยํฯ รตนํ วา ปน ภิกฺขุนิยา รตนสมฺมตํ วา อชฺฌาราเม วา อชฺฌาวสเถ วา อุคฺคเหตฺวา วา อุคฺคหาเปตฺวา วา นิกฺขิปิตพฺพํ ‘‘ยสฺส ภวิสฺสติ, โส หริสฺสตี’’ติ, อยํ ตตฺถ สามีจิฯ

    161. Yā pana bhikkhunī ratanaṃ vā ratanasammataṃ vā aññatra ajjhārāmā vā ajjhāvasathā vā uggaṇheyya vā uggaṇhāpeyya vā, pācittiyaṃ. Ratanaṃ vā pana bhikkhuniyā ratanasammataṃ vā ajjhārāme vā ajjhāvasathe vā uggahetvā vā uggahāpetvā vā nikkhipitabbaṃ ‘‘yassa bhavissati, so harissatī’’ti, ayaṃ tattha sāmīci.

    สูจิฆรสิกฺขาปทํ

    Sūcigharasikkhāpadaṃ

    ๑๖๒. ยา ปน ภิกฺขุนี อฎฺฐิมยํ วา ทนฺตมยํ วา วิสาณมยํ วา สูจิฆรํ การาเปยฺย, เภทนกํ ปาจิตฺติยํฯ

    162. Yā pana bhikkhunī aṭṭhimayaṃ vā dantamayaṃ vā visāṇamayaṃ vā sūcigharaṃ kārāpeyya, bhedanakaṃ pācittiyaṃ.

    มญฺจปีฐสิกฺขาปทํ

    Mañcapīṭhasikkhāpadaṃ

    ๑๖๓. นวํ ปน ภิกฺขุนิยา มญฺจํ วา ปีฐํ วา การยมานาย อฎฺฐงฺคุลปาทกํ กาเรตพฺพํ สุคตงฺคุเลน อญฺญตฺร เหฎฺฐิมาย อฎนิยาฯ ตํ อติกฺกาเมนฺติยา เฉทนกํ ปาจิตฺติยํฯ

    163. Navaṃ pana bhikkhuniyā mañcaṃ vā pīṭhaṃ vā kārayamānāya aṭṭhaṅgulapādakaṃ kāretabbaṃ sugataṅgulena aññatra heṭṭhimāya aṭaniyā. Taṃ atikkāmentiyā chedanakaṃ pācittiyaṃ.

    ตูโลนทฺธสิกฺขาปทํ

    Tūlonaddhasikkhāpadaṃ

    ๑๖๔. ยา ปน ภิกฺขุนี มญฺจํ วา ปีฐํ วา ตูโลนทฺธํ การาเปยฺย, อุทฺทาลนกํ ปาจิตฺติยํฯ

    164. Yā pana bhikkhunī mañcaṃ vā pīṭhaṃ vā tūlonaddhaṃ kārāpeyya, uddālanakaṃ pācittiyaṃ.

    กณฺฑุปฺปฎิจฺฉาทิสิกฺขาปทํ

    Kaṇḍuppaṭicchādisikkhāpadaṃ

    ๑๖๕. กณฺฑุปฺปฎิจฺฉาทิํ ปน ภิกฺขุนิยา การยมานาย ปมาณิกา กาเรตพฺพา, ตตฺริทํ ปมาณํ, ทีฆโส จตโสฺส วิทตฺถิโย สุคตวิทตฺถิยา, ติริยํ เทฺว วิทตฺถิโยฯ ตํ อติกฺกาเมนฺติยา เฉทนกํ ปาจิตฺติยํฯ

    165. Kaṇḍuppaṭicchādiṃ pana bhikkhuniyā kārayamānāya pamāṇikā kāretabbā, tatridaṃ pamāṇaṃ, dīghaso catasso vidatthiyo sugatavidatthiyā, tiriyaṃ dve vidatthiyo. Taṃ atikkāmentiyā chedanakaṃ pācittiyaṃ.

    นนฺทสิกฺขาปทํ

    Nandasikkhāpadaṃ

    ๑๖๖. ยา ปน ภิกฺขุนี สุคตจีวรปฺปมาณํ จีวรํ การาเปยฺย, อติเรกํ วา, เฉทนกํ ปาจิตฺติยํฯ ตตฺริทํ สุคตสฺส สุคตจีวรปฺปมาณํ, ทีฆโส นว วิทตฺถิโย สุคตวิทตฺถิยา, ติริยํ ฉ วิทตฺถิโย, อิทํ สุคตสฺส สุคตจีวรปฺปมาณนฺติฯ

    166. Yā pana bhikkhunī sugatacīvarappamāṇaṃ cīvaraṃ kārāpeyya, atirekaṃ vā, chedanakaṃ pācittiyaṃ. Tatridaṃ sugatassa sugatacīvarappamāṇaṃ, dīghaso nava vidatthiyo sugatavidatthiyā, tiriyaṃ cha vidatthiyo, idaṃ sugatassa sugatacīvarappamāṇanti.

    ธมฺมิกวโคฺค โสฬสโมฯ

    Dhammikavaggo soḷasamo.

    อุทฺทิฎฺฐา โข, อยฺยาโย, ฉสฎฺฐิสตา ปาจิตฺติยา ธมฺมาฯ ตตฺถายฺยาโย, ปุจฺฉามิ, กจฺจิตฺถ ปริสุทฺธา, ทุติยมฺปิ ปุจฺฉามิ, กจฺจิตฺถ ปริสุทฺธา, ตติยมฺปิ ปุจฺฉามิ, กจฺจิตฺถ ปริสุทฺธา, ปริสุเทฺธตฺถายฺยาโย, ตสฺมา ตุณฺหี, เอวเมตํ ธารยามีติฯ

    Uddiṭṭhā kho, ayyāyo, chasaṭṭhisatā pācittiyā dhammā. Tatthāyyāyo, pucchāmi, kaccittha parisuddhā, dutiyampi pucchāmi, kaccittha parisuddhā, tatiyampi pucchāmi, kaccittha parisuddhā, parisuddhetthāyyāyo, tasmā tuṇhī, evametaṃ dhārayāmīti.

    ปาจิตฺติยา นิฎฺฐิตาฯ

    Pācittiyā niṭṭhitā.

    ปาฎิเทสนียา

    Pāṭidesanīyā

    อิเม โข ปนายฺยาโย อฎฺฐ ปาฎิเทสนียา

    Ime kho panāyyāyo aṭṭha pāṭidesanīyā

    ธมฺมา อุเทฺทสํ อาคจฺฉนฺติฯ

    Dhammā uddesaṃ āgacchanti.

    สปฺปิวิญฺญาปนสิกฺขาปทํ

    Sappiviññāpanasikkhāpadaṃ

    ๑. ยา ปน ภิกฺขุนี อคิลานา สปฺปิํ วิญฺญาเปตฺวา ภุเญฺชยฺย, ปฎิเทเสตพฺพํ ตาย ภิกฺขุนิยา ‘‘คารยฺหํ, อเยฺย, ธมฺมํ อาปชฺชิํ อสปฺปายํ ปาฎิเทสนียํ, ตํ ปฎิเทเสมี’’ติฯ

    1. Yā pana bhikkhunī agilānā sappiṃ viññāpetvā bhuñjeyya, paṭidesetabbaṃ tāya bhikkhuniyā ‘‘gārayhaṃ, ayye, dhammaṃ āpajjiṃ asappāyaṃ pāṭidesanīyaṃ, taṃ paṭidesemī’’ti.

    เตลวิญฺญาปนสิกฺขาปทํ

    Telaviññāpanasikkhāpadaṃ

    ๒. ยา ปน ภิกฺขุนี อคิลานา เตลํ วิญฺญาเปตฺวา ภุเญฺชยฺย…เป.… ตํ ปฎิเทเสมีติฯ

    2. Yā pana bhikkhunī agilānā telaṃ viññāpetvā bhuñjeyya…pe… taṃ paṭidesemīti.

    มธุวิญฺญาปนสิกฺขาปทํ

    Madhuviññāpanasikkhāpadaṃ

    ๓. ยา ปน ภิกฺขุนี อคิลานา มธุํ วิญฺญาเปตฺวา ภุเญฺชยฺย…เป.… ตํ ปฎิเทเสมีติฯ

    3. Yā pana bhikkhunī agilānā madhuṃ viññāpetvā bhuñjeyya…pe… taṃ paṭidesemīti.

    ผาณิตวิญฺญาปนสิกฺขาปทํ

    Phāṇitaviññāpanasikkhāpadaṃ

    ๔. ยา ปน ภิกฺขุนี อคิลานา ผาณิตํ วิญฺญาเปตฺวา ภุเญฺชยฺย…เป.… ตํ ปฎิเทเสมีติฯ

    4. Yā pana bhikkhunī agilānā phāṇitaṃ viññāpetvā bhuñjeyya…pe… taṃ paṭidesemīti.

    มจฺฉวิญฺญาปนสิกฺขาปทํ

    Macchaviññāpanasikkhāpadaṃ

    ๕. ยา ปน ภิกฺขุนี อคิลานา มจฺฉํ วิญฺญาเปตฺวา ภุเญฺชยฺย…เป.… ตํ ปฎิเทเสมีติฯ

    5. Yā pana bhikkhunī agilānā macchaṃ viññāpetvā bhuñjeyya…pe… taṃ paṭidesemīti.

    มํสวิญฺญาปนสิกฺขาปทํ

    Maṃsaviññāpanasikkhāpadaṃ

    ๖. ยา ปน ภิกฺขุนี อคิลานา มํสํ วิญฺญาเปตฺวา ภุเญฺชยฺย…เป.… ตํ ปฎิเทเสมีติฯ

    6. Yā pana bhikkhunī agilānā maṃsaṃ viññāpetvā bhuñjeyya…pe… taṃ paṭidesemīti.

    ขีรวิญฺญาปนสิกฺขาปทํ

    Khīraviññāpanasikkhāpadaṃ

    ๗. ยา ปน ภิกฺขุนี อคิลานา ขีรํ วิญฺญาเปตฺวา ภุเญฺชยฺย…เป.… ตํ ปฎิเทเสมีติฯ

    7. Yā pana bhikkhunī agilānā khīraṃ viññāpetvā bhuñjeyya…pe… taṃ paṭidesemīti.

    ทธิวิญฺญาปนสิกฺขาปทํ

    Dadhiviññāpanasikkhāpadaṃ

    ๘. ยา ปน ภิกฺขุนี อคิลานา ทธิํ วิญฺญาเปตฺวา ภุเญฺชยฺย, ปฎิเทเสตพฺพํ ตาย ภิกฺขุนิยา ‘‘คารยฺหํ, อเยฺย, ธมฺมํ อาปชฺชิํ อสปฺปายํ ปาฎิเทสนียํ, ตํ ปฎิเทเสมี’’ติฯ

    8. Yā pana bhikkhunī agilānā dadhiṃ viññāpetvā bhuñjeyya, paṭidesetabbaṃ tāya bhikkhuniyā ‘‘gārayhaṃ, ayye, dhammaṃ āpajjiṃ asappāyaṃ pāṭidesanīyaṃ, taṃ paṭidesemī’’ti.

    อุทฺทิฎฺฐา โข, อยฺยาโย, อฎฺฐ ปาฎิเทสนียา ธมฺมาฯ ตตฺถายฺยาโย, ปุจฺฉามิ, กจฺจิตฺถ ปริสุทฺธา, ทุติยมฺปิ ปุจฺฉามิ, กจฺจิตฺถ ปริสุทฺธา, ตติยมฺปิ ปุจฺฉามิ, กจฺจิตฺถ ปริสุทฺธา, ปริสุเทฺธตฺถายฺยาโย, ตสฺมา ตุณฺหี, เอวเมตํ ธารยามีติฯ

    Uddiṭṭhā kho, ayyāyo, aṭṭha pāṭidesanīyā dhammā. Tatthāyyāyo, pucchāmi, kaccittha parisuddhā, dutiyampi pucchāmi, kaccittha parisuddhā, tatiyampi pucchāmi, kaccittha parisuddhā, parisuddhetthāyyāyo, tasmā tuṇhī, evametaṃ dhārayāmīti.

    ปาฎิเทสนียา นิฎฺฐิตาฯ

    Pāṭidesanīyā niṭṭhitā.

    เสขิยา

    Sekhiyā

    อิเม โข ปนายฺยาโย, เสขิยา ธมฺมา อุเทฺทสํ อาคจฺฉนฺติฯ

    Ime kho panāyyāyo, sekhiyā dhammā uddesaṃ āgacchanti.

    ปริมณฺฑลสิกฺขาปทํ

    Parimaṇḍalasikkhāpadaṃ

    ๑. ปริมณฺฑลํ นิวาเสสฺสามีติ สิกฺขา กรณียาฯ

    1. Parimaṇḍalaṃ nivāsessāmīti sikkhā karaṇīyā.

    ๒. ปริมณฺฑลํ ปารุปิสฺสามีติ สิกฺขา กรณียาฯ

    2. Parimaṇḍalaṃ pārupissāmīti sikkhā karaṇīyā.

    สุปฺปฎิจฺฉนฺนสิกฺขาปทํ

    Suppaṭicchannasikkhāpadaṃ

    ๓. สุปฺปฎิจฺฉนฺนา อนฺตรฆเร คมิสฺสามีติ สิกฺขา กรณียาฯ

    3. Suppaṭicchannā antaraghare gamissāmīti sikkhā karaṇīyā.

    ๔. สุปฺปฎิจฺฉนฺนา อนฺตรฆเร นิสีทิสฺสามีติ สิกฺขา กรณียาฯ

    4. Suppaṭicchannā antaraghare nisīdissāmīti sikkhā karaṇīyā.

    สุสํวุตสิกฺขาปทํ

    Susaṃvutasikkhāpadaṃ

    ๕. สุสํวุตา อนฺตรฆเร คมิสฺสามีติ สิกฺขา กรณียาฯ

    5. Susaṃvutā antaraghare gamissāmīti sikkhā karaṇīyā.

    ๖. สุสํวุตา อนฺตรฆเร นิสีทิสฺสามีติ สิกฺขา กรณียาฯ

    6. Susaṃvutā antaraghare nisīdissāmīti sikkhā karaṇīyā.

    โอกฺขิตฺตจกฺขุสิกฺขาปทํ

    Okkhittacakkhusikkhāpadaṃ

    ๗. โอกฺขิตฺตจกฺขุนี อนฺตรฆเร คมิสฺสามีติ สิกฺขา กรณียาฯ

    7. Okkhittacakkhunī antaraghare gamissāmīti sikkhā karaṇīyā.

    ๘. โอกฺขิตฺตจกฺขุนี อนฺตรฆเร นิสีทิสฺสามีติ สิกฺขา กรณียาฯ

    8. Okkhittacakkhunī antaraghare nisīdissāmīti sikkhā karaṇīyā.

    อุกฺขิตฺตกสิกฺขาปทํ

    Ukkhittakasikkhāpadaṃ

    ๙. น อุกฺขิตฺตกาย อนฺตรฆเร คมิสฺสามีติ สิกฺขา กรณียาฯ

    9. Na ukkhittakāya antaraghare gamissāmīti sikkhā karaṇīyā.

    ๑๐. น อุกฺขิตฺตกาย อนฺตรฆเร นิสีทิสฺสามีติ สิกฺขา กรณียาฯ

    10. Na ukkhittakāya antaraghare nisīdissāmīti sikkhā karaṇīyā.

    ปริมณฺฑลวโคฺค ปฐโมฯ

    Parimaṇḍalavaggo paṭhamo.

    อุชฺชคฺฆิกสิกฺขาปทํ

    Ujjagghikasikkhāpadaṃ

    ๑๑. น อุชฺชคฺฆิกาย อนฺตรฆเร คมิสฺสามีติ สิกฺขา กรณียาฯ

    11. Na ujjagghikāya antaraghare gamissāmīti sikkhā karaṇīyā.

    ๑๒. น อุชฺชคฺฆิกาย อนฺตรฆเร นิสีทิสฺสามีติ สิกฺขา กรณียาฯ

    12. Na ujjagghikāya antaraghare nisīdissāmīti sikkhā karaṇīyā.

    อุจฺจสทฺทสิกฺขาปทํ

    Uccasaddasikkhāpadaṃ

    ๑๓. อปฺปสทฺทา อนฺตรฆเร คมิสฺสามีติ สิกฺขา กรณียาฯ

    13. Appasaddā antaraghare gamissāmīti sikkhā karaṇīyā.

    ๑๔. อปฺปสทฺทา อนฺตรฆเร นิสีทิสฺสามีติ สิกฺขา กรณียาฯ

    14. Appasaddā antaraghare nisīdissāmīti sikkhā karaṇīyā.

    กายปฺปจาลกสิกฺขาปทํ

    Kāyappacālakasikkhāpadaṃ

    ๑๕. น กายปฺปจาลกํ อนฺตรฆเร คมิสฺสามีติ สิกฺขา กรณียาฯ

    15. Na kāyappacālakaṃ antaraghare gamissāmīti sikkhā karaṇīyā.

    ๑๖. น กายปฺปจาลกํ อนฺตรฆเร นิสีทิสฺสามีติ สิกฺขา กรณียาฯ

    16. Na kāyappacālakaṃ antaraghare nisīdissāmīti sikkhā karaṇīyā.

    พาหุปฺปจาลกสิกฺขาปทํ

    Bāhuppacālakasikkhāpadaṃ

    ๑๗. น พาหุปฺปจาลกํ อนฺตรฆเร คมิสฺสามีติ สิกฺขา กรณียาฯ

    17. Na bāhuppacālakaṃ antaraghare gamissāmīti sikkhā karaṇīyā.

    ๑๘. น พาหุปฺปจาลกํ อนฺตรฆเร นิสีทิสฺสามีติ สิกฺขา กรณียาฯ

    18. Na bāhuppacālakaṃ antaraghare nisīdissāmīti sikkhā karaṇīyā.

    สีสปฺปจาลกสิกฺขาปทํ

    Sīsappacālakasikkhāpadaṃ

    ๑๙. น สีสปฺปจาลกํ อนฺตรฆเร คมิสฺสามีติ สิกฺขา กรณียาฯ

    19. Na sīsappacālakaṃ antaraghare gamissāmīti sikkhā karaṇīyā.

    ๒๐. น สีสปฺปจาลกํ อนฺตรฆเร นิสีทิสฺสามีติ สิกฺขา กรณียาฯ

    20. Na sīsappacālakaṃ antaraghare nisīdissāmīti sikkhā karaṇīyā.

    อุชฺชคฺฆิกวโคฺค ทุติโยฯ

    Ujjagghikavaggo dutiyo.

    ขมฺภกตสิกฺขาปทํ

    Khambhakatasikkhāpadaṃ

    ๒๑. น ขมฺภกตา อนฺตรฆเร คมิสฺสามีติ สิกฺขา กรณียาฯ

    21. Na khambhakatā antaraghare gamissāmīti sikkhā karaṇīyā.

    ๒๒. น ขมฺภกตา อนฺตรฆเร นิสีทิสฺสามีติ สิกฺขา กรณียาฯ

    22. Na khambhakatā antaraghare nisīdissāmīti sikkhā karaṇīyā.

    โอคุณฺฐิตสิกฺขาปทํ

    Oguṇṭhitasikkhāpadaṃ

    ๒๓. น โอคุณฺฐิตา อนฺตรฆเร คมิสฺสามีติ สิกฺขา กรณียาฯ

    23. Na oguṇṭhitā antaraghare gamissāmīti sikkhā karaṇīyā.

    ๒๔. น โอคุณฺฐิตา อนฺตรฆเร นิสีทิสฺสามีติ สิกฺขา กรณียาฯ

    24. Na oguṇṭhitā antaraghare nisīdissāmīti sikkhā karaṇīyā.

    อุกฺกุฎิกสิกฺขาปทํ

    Ukkuṭikasikkhāpadaṃ

    ๒๕. น อุกฺกุฎิกาย อนฺตรฆเร คมิสฺสามีติ สิกฺขา กรณียาฯ

    25. Na ukkuṭikāya antaraghare gamissāmīti sikkhā karaṇīyā.

    ปลฺลตฺถิกสิกฺขาปทํ

    Pallatthikasikkhāpadaṃ

    ๒๖. น ปลฺลตฺถิกาย อนฺตรฆเร นิสีทิสฺสามีติ สิกฺขา กรณียาฯ

    26. Na pallatthikāya antaraghare nisīdissāmīti sikkhā karaṇīyā.

    สกฺกจฺจปฎิคฺคหณสิกฺขาปทํ

    Sakkaccapaṭiggahaṇasikkhāpadaṃ

    ๒๗. สกฺกจฺจํ ปิณฺฑปาตํ ปฎิคฺคเหสฺสามีติ สิกฺขา กรณียาฯ

    27. Sakkaccaṃ piṇḍapātaṃ paṭiggahessāmīti sikkhā karaṇīyā.

    ปตฺตสญฺญินีปฎิคฺคหณสิกฺขาปทํ

    Pattasaññinīpaṭiggahaṇasikkhāpadaṃ

    ๒๘. ปตฺตสญฺญินี ปิณฺฑปาตํ ปฎิคฺคเหสฺสามีติ สิกฺขา กรณียาฯ

    28. Pattasaññinī piṇḍapātaṃ paṭiggahessāmīti sikkhā karaṇīyā.

    สมสูปกปฎิคฺคหณสิกฺขาปทํ

    Samasūpakapaṭiggahaṇasikkhāpadaṃ

    ๒๙. สมสูปกํ ปิณฺฑปาตํ ปฎิคฺคเหสฺสามีติ สิกฺขา กรณียาฯ

    29. Samasūpakaṃ piṇḍapātaṃ paṭiggahessāmīti sikkhā karaṇīyā.

    สมติตฺติกสิกฺขาปทํ

    Samatittikasikkhāpadaṃ

    ๓๐. สมติตฺติกํ ปิณฺฑปาตํ ปฎิคฺคเหสฺสามีติ สิกฺขา กรณียาฯ

    30. Samatittikaṃ piṇḍapātaṃ paṭiggahessāmīti sikkhā karaṇīyā.

    ขมฺภกตวโคฺค ตติโยฯ

    Khambhakatavaggo tatiyo.

    สกฺกจฺจภุญฺชนสิกฺขาปทํ

    Sakkaccabhuñjanasikkhāpadaṃ

    ๓๑. สกฺกจฺจํ ปิณฺฑปาตํ ภุญฺชิสฺสามีติ สิกฺขา กรณียาฯ

    31. Sakkaccaṃ piṇḍapātaṃ bhuñjissāmīti sikkhā karaṇīyā.

    ปตฺตสญฺญินีภุญฺชนสิกฺขาปทํ

    Pattasaññinībhuñjanasikkhāpadaṃ

    ๓๒. ปตฺตสญฺญินี ปิณฺฑปาตํ ภุญฺชิสฺสามีติ สิกฺขา กรณียาฯ

    32. Pattasaññinī piṇḍapātaṃ bhuñjissāmīti sikkhā karaṇīyā.

    สปทานสิกฺขาปทํ

    Sapadānasikkhāpadaṃ

    ๓๓. สปทานํ ปิณฺฑปาตํ ภุญฺชิสฺสามีติ สิกฺขา กรณียาฯ

    33. Sapadānaṃ piṇḍapātaṃ bhuñjissāmīti sikkhā karaṇīyā.

    สมสูปกสิกฺขาปทํ

    Samasūpakasikkhāpadaṃ

    ๓๔. สมสูปกํ ปิณฺฑปาตํ ภุญฺชิสฺสามีติ สิกฺขา กรณียาฯ

    34. Samasūpakaṃ piṇḍapātaṃ bhuñjissāmīti sikkhā karaṇīyā.

    น ถูปกตสิกฺขาปทํ

    Na thūpakatasikkhāpadaṃ

    ๓๕. น ถูปกโต โอมทฺทิตฺวา ปิณฺฑปาตํ ภุญฺชิสฺสามีติ สิกฺขา กรณียาฯ

    35. Na thūpakato omadditvā piṇḍapātaṃ bhuñjissāmīti sikkhā karaṇīyā.

    โอทนปฺปฎิจฺฉาทนสิกฺขาปทํ

    Odanappaṭicchādanasikkhāpadaṃ

    ๓๖. น สูปํ วา พฺยญฺชนํ วา โอทเนน ปฎิจฺฉาเทสฺสามิ ภิโยฺยกมฺยตํ อุปาทายาติ สิกฺขา กรณียาฯ

    36. Na sūpaṃ vā byañjanaṃ vā odanena paṭicchādessāmi bhiyyokamyataṃ upādāyāti sikkhā karaṇīyā.

    สูโปทนวิญฺญตฺติสิกฺขาปทํ

    Sūpodanaviññattisikkhāpadaṃ

    ๓๗. น สูปํ วา โอทนํ วา อคิลานา อตฺตโน อตฺถาย วิญฺญาเปตฺวา ภุญฺชิสฺสามีติ สิกฺขา กรณียาฯ

    37. Na sūpaṃ vā odanaṃ vā agilānā attano atthāya viññāpetvā bhuñjissāmīti sikkhā karaṇīyā.

    อุชฺฌานสญฺญินีสิกฺขาปทํ

    Ujjhānasaññinīsikkhāpadaṃ

    ๓๘. น อุชฺฌานสญฺญินี ปเรสํ ปตฺตํ โอโลเกสฺสามีติ สิกฺขา กรณียาฯ

    38. Na ujjhānasaññinī paresaṃ pattaṃ olokessāmīti sikkhā karaṇīyā.

    กพฬสิกฺขาปทํ

    Kabaḷasikkhāpadaṃ

    ๓๙. นาติมหนฺตํ กพฬํ กริสฺสามีติ สิกฺขา กรณียาฯ

    39. Nātimahantaṃ kabaḷaṃ karissāmīti sikkhā karaṇīyā.

    อาโลปสิกฺขาปทํ

    Ālopasikkhāpadaṃ

    ๔๐. ปริมณฺฑลํ อาโลปํ กริสฺสามีติ สิกฺขา กรณียาฯ

    40. Parimaṇḍalaṃ ālopaṃ karissāmīti sikkhā karaṇīyā.

    สกฺกจฺจวโคฺค จตุโตฺถฯ

    Sakkaccavaggo catuttho.

    อนาหฎสิกฺขาปทํ

    Anāhaṭasikkhāpadaṃ

    ๔๑. น อนาหเฎ กพเฬ มุขทฺวารํ วิวริสฺสามีติ สิกฺขา กรณียาฯ

    41. Na anāhaṭe kabaḷe mukhadvāraṃ vivarissāmīti sikkhā karaṇīyā.

    ภุญฺชมานสิกฺขาปทํ

    Bhuñjamānasikkhāpadaṃ

    ๔๒. น ภุญฺชมานา สพฺพหตฺถํ มุเข ปกฺขิปิสฺสามีติ สิกฺขา กรณียาฯ

    42. Na bhuñjamānā sabbahatthaṃ mukhe pakkhipissāmīti sikkhā karaṇīyā.

    สกพฬสิกฺขาปทํ

    Sakabaḷasikkhāpadaṃ

    ๔๓. น สกพเฬน มุเขน พฺยาหริสฺสามีติ สิกฺขา กรณียาฯ

    43. Na sakabaḷena mukhena byāharissāmīti sikkhā karaṇīyā.

    ปิณฺฑุเกฺขปกสิกฺขาปทํ

    Piṇḍukkhepakasikkhāpadaṃ

    ๔๔. น ปิณฺฑุเกฺขปกํ ภุญฺชิสฺสามีติ สิกฺขา กรณียาฯ

    44. Na piṇḍukkhepakaṃ bhuñjissāmīti sikkhā karaṇīyā.

    กพฬาวเจฺฉทกสิกฺขาปทํ

    Kabaḷāvacchedakasikkhāpadaṃ

    ๔๕. น กพฬาวเจฺฉทกํ ภุญฺชิสฺสามีติ สิกฺขา กรณียาฯ

    45. Na kabaḷāvacchedakaṃ bhuñjissāmīti sikkhā karaṇīyā.

    อวคณฺฑการกสิกฺขาปทํ

    Avagaṇḍakārakasikkhāpadaṃ

    ๔๖. น อวคณฺฑการกํ ภุญฺชิสฺสามีติ สิกฺขา กรณียาฯ

    46. Na avagaṇḍakārakaṃ bhuñjissāmīti sikkhā karaṇīyā.

    หตฺถนิทฺธุนกสิกฺขาปทํ

    Hatthaniddhunakasikkhāpadaṃ

    ๔๗. น หตฺถนิทฺธุนกํ ภุญฺชิสฺสามีติ สิกฺขา กรณียาฯ

    47. Na hatthaniddhunakaṃ bhuñjissāmīti sikkhā karaṇīyā.

    สิตฺถาวการกสิกฺขาปทํ

    Sitthāvakārakasikkhāpadaṃ

    ๔๘. น สิตฺถาวการกํ ภุญฺชิสฺสามีติ สิกฺขา กรณียาฯ

    48. Na sitthāvakārakaṃ bhuñjissāmīti sikkhā karaṇīyā.

    ชิวฺหานิจฺฉารกสิกฺขาปทํ

    Jivhānicchārakasikkhāpadaṃ

    ๔๙. น ชิวฺหานิจฺฉารกํ ภุญฺชิสฺสามีติ สิกฺขา กรณียาฯ

    49. Na jivhānicchārakaṃ bhuñjissāmīti sikkhā karaṇīyā.

    จปุจปุการกสิกฺขาปทํ

    Capucapukārakasikkhāpadaṃ

    ๕๐. น จปุจปุการกํ ภุญฺชิสฺสามีติ สิกฺขา กรณียาฯ

    50. Na capucapukārakaṃ bhuñjissāmīti sikkhā karaṇīyā.

    กพฬวโคฺค ปญฺจโมฯ

    Kabaḷavaggo pañcamo.

    สุรุสุรุการกสิกฺขาปทํ

    Surusurukārakasikkhāpadaṃ

    ๕๑. น สุรุสุรุการกํ ภุญฺชิสฺสามีติ สิกฺขา กรณียาฯ

    51. Na surusurukārakaṃ bhuñjissāmīti sikkhā karaṇīyā.

    หตฺถนิเลฺลหกสิกฺขาปทํ

    Hatthanillehakasikkhāpadaṃ

    ๕๒. น หตฺถนิเลฺลหกํ ภุญฺชิสฺสามีติ สิกฺขา กรณียาฯ

    52. Na hatthanillehakaṃ bhuñjissāmīti sikkhā karaṇīyā.

    ปตฺตนิเลฺลหกสิกฺขาปทํ

    Pattanillehakasikkhāpadaṃ

    ๕๓. น ปตฺตนิเลฺลหกํ ภุญฺชิสฺสามีติ สิกฺขา กรณียาฯ

    53. Na pattanillehakaṃ bhuñjissāmīti sikkhā karaṇīyā.

    โอฎฺฐนิเลฺลหกสิกฺขาปทํ

    Oṭṭhanillehakasikkhāpadaṃ

    ๕๔. น โอฎฺฐนิเลฺลหกํ ภุญฺชิสฺสามีติ สิกฺขา กรณียาฯ

    54. Na oṭṭhanillehakaṃ bhuñjissāmīti sikkhā karaṇīyā.

    สามิสสิกฺขาปทํ

    Sāmisasikkhāpadaṃ

    ๕๕. น สามิเสน หเตฺถน ปานียถาลกํ ปฎิคฺคเหสฺสามีติ สิกฺขา กรณียาฯ

    55. Na sāmisena hatthena pānīyathālakaṃ paṭiggahessāmīti sikkhā karaṇīyā.

    สสิตฺถกสิกฺขาปทํ

    Sasitthakasikkhāpadaṃ

    ๕๖. น สสิตฺถกํ ปตฺตโธวนํ อนฺตรฆเร ฉเฑฺฑสฺสามีติ สิกฺขา กรณียาฯ

    56. Na sasitthakaṃ pattadhovanaṃ antaraghare chaḍḍessāmīti sikkhā karaṇīyā.

    ฉตฺตปาณิสิกฺขาปทํ

    Chattapāṇisikkhāpadaṃ

    ๕๗. น ฉตฺตปาณิสฺส อคิลานสฺส ธมฺมํ เทเสสฺสามีติ สิกฺขา กรณียาฯ

    57. Na chattapāṇissa agilānassa dhammaṃ desessāmīti sikkhā karaṇīyā.

    ทณฺฑปาณิสิกฺขาปทํ

    Daṇḍapāṇisikkhāpadaṃ

    ๕๘. น ทณฺฑปาณิสฺส อคิลานสฺส ธมฺมํ เทเสสฺสามีติ สิกฺขา กรณียาฯ

    58. Na daṇḍapāṇissa agilānassa dhammaṃ desessāmīti sikkhā karaṇīyā.

    สตฺถปาณิสิกฺขาปทํ

    Satthapāṇisikkhāpadaṃ

    ๕๙. น สตฺถปาณิสฺส อคิลานสฺส ธมฺมํ เทเสสฺสามีติ สิกฺขา กรณียาฯ

    59. Na satthapāṇissa agilānassa dhammaṃ desessāmīti sikkhā karaṇīyā.

    อาวุธปาณิสิกฺขาปทํ

    Āvudhapāṇisikkhāpadaṃ

    ๖๐. น อาวุธปาณิสฺส อคิลานสฺส ธมฺมํ เทเสสฺสามีติ สิกฺขา กรณียาฯ

    60. Na āvudhapāṇissa agilānassa dhammaṃ desessāmīti sikkhā karaṇīyā.

    สุรุสุรุวโคฺค ฉโฎฺฐฯ

    Surusuruvaggo chaṭṭho.

    ปาทุกสิกฺขาปทํ

    Pādukasikkhāpadaṃ

    ๖๑. น ปาทุการุฬฺหสฺส อคิลานสฺส ธมฺมํ เทเสสฺสามีติ สิกฺขา กรณียาฯ

    61. Na pādukāruḷhassa agilānassa dhammaṃ desessāmīti sikkhā karaṇīyā.

    อุปาหนสิกฺขาปทํ

    Upāhanasikkhāpadaṃ

    ๖๒. น อุปาหนารุฬฺหสฺส อคิลานสฺส ธมฺมํ เทเสสฺสามีติ สิกฺขา กรณียาฯ

    62. Na upāhanāruḷhassa agilānassa dhammaṃ desessāmīti sikkhā karaṇīyā.

    ยานสิกฺขาปทํ

    Yānasikkhāpadaṃ

    ๖๓. น ยานคตสฺส อคิลานสฺส ธมฺมํ เทเสสฺสามีติ สิกฺขา กรณียาฯ

    63. Na yānagatassa agilānassa dhammaṃ desessāmīti sikkhā karaṇīyā.

    สยนสิกฺขาปทํ

    Sayanasikkhāpadaṃ

    ๖๔. น สยนคตสฺส อคิลานสฺส ธมฺมํ เทเสสฺสามีติ สิกฺขา กรณียาฯ

    64. Na sayanagatassa agilānassa dhammaṃ desessāmīti sikkhā karaṇīyā.

    ปลฺลตฺถิกสิกฺขาปทํ

    Pallatthikasikkhāpadaṃ

    ๖๕. น ปลฺลตฺถิกาย นิสินฺนสฺส อคิลานสฺส ธมฺมํ เทเสสฺสามีติ สิกฺขา กรณียาฯ

    65. Na pallatthikāya nisinnassa agilānassa dhammaṃ desessāmīti sikkhā karaṇīyā.

    เวฐิตสิกฺขาปทํ

    Veṭhitasikkhāpadaṃ

    ๖๖. น เวฐิตสีสสฺส อคิลานสฺส ธมฺมํ เทเสสฺสามีติ สิกฺขา กรณียาฯ

    66. Na veṭhitasīsassa agilānassa dhammaṃ desessāmīti sikkhā karaṇīyā.

    โอคุณฺฐิตสิกฺขาปทํ

    Oguṇṭhitasikkhāpadaṃ

    ๖๗. น โอคุณฺฐิตสีสสฺส อคิลานสฺส ธมฺมํ เทเสสฺสามีติ สิกฺขา กรณียาฯ

    67. Na oguṇṭhitasīsassa agilānassa dhammaṃ desessāmīti sikkhā karaṇīyā.

    ฉมาสิกฺขาปทํ

    Chamāsikkhāpadaṃ

    ๖๘. น ฉมายํ นิสีทิตฺวา อาสเน นิสินฺนสฺส อคิลานสฺส ธมฺมํ เทเสสฺสามีติ สิกฺขา กรณียาฯ

    68. Na chamāyaṃ nisīditvā āsane nisinnassa agilānassa dhammaṃ desessāmīti sikkhā karaṇīyā.

    นีจาสนสิกฺขาปทํ

    Nīcāsanasikkhāpadaṃ

    ๖๙. น นีเจ อาสเน นิสีทิตฺวา อุเจฺจ อาสเน นิสินฺนสฺส อคิลานสฺส ธมฺมํ เทเสสฺสามีติ สิกฺขา กรณียาฯ

    69. Na nīce āsane nisīditvā ucce āsane nisinnassa agilānassa dhammaṃ desessāmīti sikkhā karaṇīyā.

    ฐิตาสิกฺขาปทํ

    Ṭhitāsikkhāpadaṃ

    ๗๐. น ฐิตา นิสินฺนสฺส อคิลานสฺส ธมฺมํ เทเสสฺสามีติ สิกฺขา กรณียาฯ

    70. Na ṭhitā nisinnassa agilānassa dhammaṃ desessāmīti sikkhā karaṇīyā.

    ปจฺฉโตคจฺฉนฺตีสิกฺขาปทํ

    Pacchatogacchantīsikkhāpadaṃ

    ๗๑. น ปจฺฉโต คจฺฉนฺตี ปุรโต คจฺฉนฺตสฺส อคิลานสฺส ธมฺมํ เทเสสฺสามีติ สิกฺขา กรณียาฯ

    71. Na pacchato gacchantī purato gacchantassa agilānassa dhammaṃ desessāmīti sikkhā karaṇīyā.

    อุปฺปเถนคจฺฉนฺตีสิกฺขาปทํ

    Uppathenagacchantīsikkhāpadaṃ

    ๗๒. น อุปฺปเถน คจฺฉนฺตี ปเถน คจฺฉนฺตสฺส อคิลานสฺส ธมฺมํ เทเสสฺสามีติ สิกฺขา กรณียาฯ

    72. Na uppathena gacchantī pathena gacchantassa agilānassa dhammaṃ desessāmīti sikkhā karaṇīyā.

    ฐิตาอุจฺจารสิกฺขาปทํ

    Ṭhitāuccārasikkhāpadaṃ

    ๗๓. น ฐิตา อคิลานา อุจฺจารํ วา ปสฺสาวํ วา กริสฺสามีติ สิกฺขา กรณียาฯ

    73. Na ṭhitā agilānā uccāraṃ vā passāvaṃ vā karissāmīti sikkhā karaṇīyā.

    หริเตอุจฺจารสิกฺขาปทํ

    Hariteuccārasikkhāpadaṃ

    ๗๔. น หริเต อคิลานา อุจฺจารํ วา ปสฺสาวํ วา เขฬํ วา กริสฺสามีติ สิกฺขา กรณียาฯ

    74. Na harite agilānā uccāraṃ vā passāvaṃ vā kheḷaṃ vā karissāmīti sikkhā karaṇīyā.

    อุทเกอุจฺจารสิกฺขาปทํ

    Udakeuccārasikkhāpadaṃ

    ๗๕. น อุทเก อคิลานา อุจฺจารํ วา ปสฺสาวํ วา เขฬํ วา กริสฺสามีติ สิกฺขา กรณียาฯ

    75. Na udake agilānā uccāraṃ vā passāvaṃ vā kheḷaṃ vā karissāmīti sikkhā karaṇīyā.

    ปาทุกวโคฺค สตฺตโมฯ

    Pādukavaggo sattamo.

    อุทฺทิฎฺฐา โข, อยฺยาโย, เสขิยา ธมฺมาฯ ตตฺถายฺยาโย, ปุจฺฉามิ, กจฺจิตฺถ ปริสุทฺธา, ทุติยมฺปิ ปุจฺฉามิ, กจฺจิตฺถ ปริสุทฺธา, ตติยมฺปิ ปุจฺฉามิ, กจฺจิตฺถ ปริสุทฺธา, ปริสุเทฺธตฺถายฺยาโย, ตสฺมา ตุณฺหี, เอวเมตํ ธารยามีติฯ

    Uddiṭṭhā kho, ayyāyo, sekhiyā dhammā. Tatthāyyāyo, pucchāmi, kaccittha parisuddhā, dutiyampi pucchāmi, kaccittha parisuddhā, tatiyampi pucchāmi, kaccittha parisuddhā, parisuddhetthāyyāyo, tasmā tuṇhī, evametaṃ dhārayāmīti.

    เสขิยา นิฎฺฐิตาฯ

    Sekhiyā niṭṭhitā.

    อธิกรณสมถา

    Adhikaraṇasamathā

    อิเม โข ปนายฺยาโย, สตฺต อธิกรณสมถา

    Ime kho panāyyāyo, satta adhikaraṇasamathā

    ธมฺมา อุเทฺทสํ อาคจฺฉนฺติฯ

    Dhammā uddesaṃ āgacchanti.

    อุปฺปนฺนุปฺปนฺนานํ อธิกรณานํ สมถาย วูปสมาย สมฺมุขาวินโย ทาตโพฺพฯ

    Uppannuppannānaṃ adhikaraṇānaṃ samathāya vūpasamāya sammukhāvinayo dātabbo.

    สติวินโย ทาตโพฺพฯ

    Sativinayo dātabbo.

    อมูฬฺหวินโย ทาตโพฺพฯ

    Amūḷhavinayo dātabbo.

    ปฎิญฺญาย กาเรตพฺพํฯ

    Paṭiññāya kāretabbaṃ.

    เยภุยฺยสิกาฯ

    Yebhuyyasikā.

    ตสฺสปาปิยสิกาฯ

    Tassapāpiyasikā.

    ติณวตฺถารโกติฯ

    Tiṇavatthārakoti.

    อุทฺทิฎฺฐา โข อยฺยาโย สตฺต อธิกรณสมถา ธมฺมาฯ ตตฺถายฺยาโย ปุจฺฉามิ, กจฺจิตฺถ ปริสุทฺธา, ทุติยมฺปิ ปุจฺฉามิ, กจฺจิตฺถ ปริสุทฺธา , ตติยมฺปิ ปุจฺฉามิ, กจฺจิตฺถ ปริสุทฺธา, ปริสุเทฺธตฺถายฺยาโย, ตสฺมา ตุณฺหี, เอวเมตํ ธารยามีติฯ

    Uddiṭṭhā kho ayyāyo satta adhikaraṇasamathā dhammā. Tatthāyyāyo pucchāmi, kaccittha parisuddhā, dutiyampi pucchāmi, kaccittha parisuddhā , tatiyampi pucchāmi, kaccittha parisuddhā, parisuddhetthāyyāyo, tasmā tuṇhī, evametaṃ dhārayāmīti.

    อธิกรณสมถา นิฎฺฐิตาฯ

    Adhikaraṇasamathā niṭṭhitā.

    อุทฺทิฎฺฐํ โข อยฺยาโย นิทานํ,

    Uddiṭṭhaṃ kho ayyāyo nidānaṃ,

    อุทฺทิฎฺฐา อฎฺฐ ปาราชิกา ธมฺมา,

    Uddiṭṭhā aṭṭha pārājikā dhammā,

    อุทฺทิฎฺฐา สตฺตรส สงฺฆาทิเสสา ธมฺมา,

    Uddiṭṭhā sattarasa saṅghādisesā dhammā,

    อุทฺทิฎฺฐา ติํส นิสฺสคฺคิยา ปาจิตฺติยา ธมฺมา,

    Uddiṭṭhā tiṃsa nissaggiyā pācittiyā dhammā,

    อุทฺทิฎฺฐา ฉสฎฺฐิ สตา ปาจิตฺติยา ธมฺมา,

    Uddiṭṭhā chasaṭṭhi satā pācittiyā dhammā,

    อุทฺทิฎฺฐา อฎฺฐ ปาฎิเทสนียา ธมฺมา,

    Uddiṭṭhā aṭṭha pāṭidesanīyā dhammā,

    อุทฺทิฎฺฐา เสขิยา ธมฺมา,

    Uddiṭṭhā sekhiyā dhammā,

    อุทฺทิฎฺฐา สตฺต อธิกรณสมถา ธมฺมา, เอตฺตกํ ตสฺส ภควโต สุตฺตาคตํ สุตฺตปริยาปนฺนํ อนฺวทฺธมาสํ อุเทฺทสํ อาคจฺฉติ, ตตฺถ สพฺพาเหว สมคฺคาหิ สโมฺมทมานาหิ อวิวทมานาหิ สิกฺขิตพฺพนฺติฯ

    Uddiṭṭhā satta adhikaraṇasamathā dhammā, ettakaṃ tassa bhagavato suttāgataṃ suttapariyāpannaṃ anvaddhamāsaṃ uddesaṃ āgacchati, tattha sabbāheva samaggāhi sammodamānāhi avivadamānāhi sikkhitabbanti.

    วิตฺถารุเทฺทโส จตุโตฺถฯ

    Vitthāruddeso catuttho.

    ภิกฺขุนิปาติโมกฺขํ นิฎฺฐิตํฯ

    Bhikkhunipātimokkhaṃ niṭṭhitaṃ.




    Next: กงฺขาวิตรณี-อฎฺฐกถา • Kaṅkhāvitaraṇī-aṭṭhakathā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact