Library / Tipiṭaka / ತಿಪಿಟಕ • Tipiṭaka / ದ್ವೇಮಾತಿಕಾಪಾಳಿ • Dvemātikāpāḷi

    ॥ ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ॥

    Namo tassa bhagavato arahato sammāsambuddhassa

    ಭಿಕ್ಖುನೀಪಾತಿಮೋಕ್ಖಪಾಳಿ

    Bhikkhunīpātimokkhapāḷi

    ಪುಬ್ಬಕರಣಂ-೪

    Pubbakaraṇaṃ-4

    ಸಮ್ಮಜ್ಜನೀ ಪದೀಪೋ ಚ, ಉದಕಂ ಆಸನೇನ ಚ।

    Sammajjanī padīpo ca, udakaṃ āsanena ca;

    ಉಪೋಸಥಸ್ಸ ಏತಾನಿ, ‘‘ಪುಬ್ಬಕರಣ’’ನ್ತಿ ವುಚ್ಚತಿ॥

    Uposathassa etāni, ‘‘pubbakaraṇa’’nti vuccati.

    ಪುಬ್ಬಕಿಚ್ಚಂ-೫

    Pubbakiccaṃ-5

    ಛನ್ದ, ಪಾರಿಸುದ್ಧಿ, ಉತುಕ್ಖಾನಂ, ಭಿಕ್ಖುನಿಗಣನಾ ಚ ಓವಾದೋ।

    Chanda, pārisuddhi, utukkhānaṃ, bhikkhunigaṇanā ca ovādo;

    ಉಪೋಸಥಸ್ಸ ಏತಾನಿ, ‘‘ಪುಬ್ಬಕಿಚ್ಚ’’ನ್ತಿ ವುಚ್ಚತಿ॥

    Uposathassa etāni, ‘‘pubbakicca’’nti vuccati.

    ಪತ್ತಕಲ್ಲಅಙ್ಗಾ-೪

    Pattakallaaṅgā-4

    ಉಪೋಸಥೋ, ಯಾವತಿಕಾ ಚ ಭಿಕ್ಖುನೀ ಕಮ್ಮಪ್ಪತ್ತಾ।

    Uposatho, yāvatikā ca bhikkhunī kammappattā;

    ಸಭಾಗಾಪತ್ತಿಯೋ ಚ ನ ವಿಜ್ಜನ್ತಿ।

    Sabhāgāpattiyo ca na vijjanti;

    ವಜ್ಜನೀಯಾ ಚ ಪುಗ್ಗಲಾ ತಸ್ಮಿಂ ನ ಹೋನ್ತಿ, ‘‘ಪತ್ತಕಲ್ಲ’’ನ್ತಿ ವುಚ್ಚತಿ॥

    Vajjanīyā ca puggalā tasmiṃ na honti, ‘‘pattakalla’’nti vuccati.

    ಪುಬ್ಬಕರಣಪುಬ್ಬಕಿಚ್ಚಾನಿ ಸಮಾಪೇತ್ವಾ ದೇಸಿತಾಪತ್ತಿಕಸ್ಸ ಸಮಗ್ಗಸ್ಸ ಭಿಕ್ಖುನಿಸಙ್ಘಸ್ಸ ಅನುಮತಿಯಾ ಪಾತಿಮೋಕ್ಖಂ ಉದ್ದಿಸಿತುಂ ಆರಾಧನಂ ಕರೋಮ।

    Pubbakaraṇapubbakiccāni samāpetvā desitāpattikassa samaggassa bhikkhunisaṅghassa anumatiyā pātimokkhaṃ uddisituṃ ārādhanaṃ karoma.

    ನಿದಾನುದ್ದೇಸೋ

    Nidānuddeso

    ಸುಣಾತು ಮೇ ಅಯ್ಯೇ ಸಙ್ಘೋ, ಅಜ್ಜುಪೋಸಥೋ ಪನ್ನರಸೋ, ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಉಪೋಸಥಂ ಕರೇಯ್ಯ, ಪಾತಿಮೋಕ್ಖಂ ಉದ್ದಿಸೇಯ್ಯ।

    Suṇātu me ayye saṅgho, ajjuposatho pannaraso, yadi saṅghassa pattakallaṃ, saṅgho uposathaṃ kareyya, pātimokkhaṃ uddiseyya.

    ಕಿಂ ಸಙ್ಘಸ್ಸ ಪುಬ್ಬಕಿಚ್ಚಂ? ಪಾರಿಸುದ್ಧಿಂ ಅಯ್ಯಾಯೋ ಆರೋಚೇಥ, ಪಾತಿಮೋಕ್ಖಂ ಉದ್ದಿಸಿಸ್ಸಾಮಿ, ತಂ ಸಬ್ಬಾವ ಸನ್ತಾ ಸಾಧುಕಂ ಸುಣೋಮ ಮನಸಿ ಕರೋಮ। ಯಸ್ಸಾ ಸಿಯಾ ಆಪತ್ತಿ, ಸಾ ಆವಿಕರೇಯ್ಯ, ಅಸನ್ತಿಯಾ ಆಪತ್ತಿಯಾ ತುಣ್ಹೀ ಭವಿತಬ್ಬಂ, ತುಣ್ಹೀಭಾವೇನ ಖೋ ಪನಾಯ್ಯಾಯೋ, ‘‘ಪರಿಸುದ್ಧಾ’’ತಿ ವೇದಿಸ್ಸಾಮಿ। ಯಥಾ ಖೋ ಪನ ಪಚ್ಚೇಕಪುಟ್ಠಸ್ಸಾ ವೇಯ್ಯಾಕರಣಂ ಹೋತಿ, ಏವಮೇವಂ ಏವರೂಪಾಯ ಪರಿಸಾಯ ಯಾವತತಿಯಂ ಅನುಸಾವಿತಂ ಹೋತಿ। ಯಾ ಪನ ಭಿಕ್ಖುನೀ ಯಾವತತಿಯಂ ಅನುಸಾವಿಯಮಾನೇ ಸರಮಾನಾ ಸನ್ತಿಂ ಆಪತ್ತಿಂ ನಾವಿಕರೇಯ್ಯ, ಸಮ್ಪಜಾನಮುಸಾವಾದಸ್ಸಾ ಹೋತಿ। ಸಮ್ಪಜಾನಮುಸಾವಾದೋ ಖೋ ಪನಾಯ್ಯಾಯೋ, ಅನ್ತರಾಯಿಕೋ ಧಮ್ಮೋ ವುತ್ತೋ ಭಗವತಾ, ತಸ್ಮಾ ಸರಮಾನಾಯ ಭಿಕ್ಖುನಿಯಾ ಆಪನ್ನಾಯ ವಿಸುದ್ಧಾಪೇಕ್ಖಾಯ ಸನ್ತೀ ಆಪತ್ತಿ ಆವಿಕಾತಬ್ಬಾ, ಆವಿಕತಾ ಹಿಸ್ಸಾ ಫಾಸು ಹೋತಿ।

    Kiṃ saṅghassa pubbakiccaṃ? Pārisuddhiṃ ayyāyo ārocetha, pātimokkhaṃ uddisissāmi, taṃ sabbāva santā sādhukaṃ suṇoma manasi karoma. Yassā siyā āpatti, sā āvikareyya, asantiyā āpattiyā tuṇhī bhavitabbaṃ, tuṇhībhāvena kho panāyyāyo, ‘‘parisuddhā’’ti vedissāmi. Yathā kho pana paccekapuṭṭhassā veyyākaraṇaṃ hoti, evamevaṃ evarūpāya parisāya yāvatatiyaṃ anusāvitaṃ hoti. Yā pana bhikkhunī yāvatatiyaṃ anusāviyamāne saramānā santiṃ āpattiṃ nāvikareyya, sampajānamusāvādassā hoti. Sampajānamusāvādo kho panāyyāyo, antarāyiko dhammo vutto bhagavatā, tasmā saramānāya bhikkhuniyā āpannāya visuddhāpekkhāya santī āpatti āvikātabbā, āvikatā hissā phāsu hoti.

    ಉದ್ದಿಟ್ಠಂ ಖೋ, ಅಯ್ಯಾಯೋ, ನಿದಾನಂ। ತತ್ಥಾಯ್ಯಾಯೋ ಪುಚ್ಛಾಮಿ, ಕಚ್ಚಿತ್ಥ ಪರಿಸುದ್ಧಾ, ದುತಿಯಮ್ಪಿ ಪುಚ್ಛಾಮಿ, ಕಚ್ಚಿತ್ಥ ಪರಿಸುದ್ಧಾ, ತತಿಯಮ್ಪಿ ಪುಚ್ಛಾಮಿ, ಕಚ್ಚಿತ್ಥ ಪರಿಸುದ್ಧಾ, ಪರಿಸುದ್ಧೇತ್ಥಾಯ್ಯಾಯೋ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀತಿ।

    Uddiṭṭhaṃ kho, ayyāyo, nidānaṃ. Tatthāyyāyo pucchāmi, kaccittha parisuddhā, dutiyampi pucchāmi, kaccittha parisuddhā, tatiyampi pucchāmi, kaccittha parisuddhā, parisuddhetthāyyāyo, tasmā tuṇhī, evametaṃ dhārayāmīti.

    ನಿದಾನಂ ನಿಟ್ಠಿತಂ।

    Nidānaṃ niṭṭhitaṃ.

    ಪಾರಾಜಿಕುದ್ದೇಸೋ

    Pārājikuddeso

    ತತ್ರಿಮೇ ಅಟ್ಠ ಪಾರಾಜಿಕಾ ಧಮ್ಮಾ ಉದ್ದೇಸಂ ಆಗಚ್ಛನ್ತಿ।

    Tatrime aṭṭha pārājikā dhammā uddesaṃ āgacchanti.

    ಮೇಥುನಧಮ್ಮಸಿಕ್ಖಾಪದಂ

    Methunadhammasikkhāpadaṃ

    ೧. ಯಾ ಪನ ಭಿಕ್ಖುನೀ ಛನ್ದಸೋ ಮೇಥುನಂ ಧಮ್ಮಂ ಪಟಿಸೇವೇಯ್ಯ, ಅನ್ತಮಸೋ ತಿರಚ್ಛಾನಗತೇನಪಿ, ಪಾರಾಜಿಕಾ ಹೋತಿ ಅಸಂವಾಸಾ।

    1. Yā pana bhikkhunī chandaso methunaṃ dhammaṃ paṭiseveyya, antamaso tiracchānagatenapi, pārājikā hoti asaṃvāsā.

    ಅದಿನ್ನಾದಾನಸಿಕ್ಖಾಪದಂ

    Adinnādānasikkhāpadaṃ

    ೨. ಯಾ ಪನ ಭಿಕ್ಖುನೀ ಗಾಮಾ ವಾ ಅರಞ್ಞಾ ವಾ ಅದಿನ್ನಂ ಥೇಯ್ಯಸಙ್ಖಾತಂ ಆದಿಯೇಯ್ಯ, ಯಥಾರೂಪೇ ಅದಿನ್ನಾದಾನೇ ರಾಜಾನೋ ಚೋರಂ ಗಹೇತ್ವಾ ಹನೇಯ್ಯುಂ ವಾ ಬನ್ಧೇಯ್ಯುಂ ವಾ ಪಬ್ಬಾಜೇಯ್ಯುಂ ವಾ ಚೋರಾಸಿ ಬಾಲಾಸಿ ಮೂಳ್ಹಾಸಿ ಥೇನಾಸೀತಿ, ತಥಾರೂಪಂ ಭಿಕ್ಖುನೀ ಅದಿನ್ನಂ ಆದಿಯಮಾನಾ ಅಯಮ್ಪಿ ಪಾರಾಜಿಕಾ ಹೋತಿ ಅಸಂವಾಸಾ।

    2. Yā pana bhikkhunī gāmā vā araññā vā adinnaṃ theyyasaṅkhātaṃ ādiyeyya, yathārūpe adinnādāne rājāno coraṃ gahetvā haneyyuṃ vā bandheyyuṃ vā pabbājeyyuṃ vā corāsi bālāsi mūḷhāsi thenāsīti, tathārūpaṃ bhikkhunī adinnaṃ ādiyamānā ayampi pārājikā hoti asaṃvāsā.

    ಮನುಸ್ಸವಿಗ್ಗಹಸಿಕ್ಖಾಪದಂ

    Manussaviggahasikkhāpadaṃ

    ೩. ಯಾ ಪನ ಭಿಕ್ಖುನೀ ಸಞ್ಚಿಚ್ಚ ಮನುಸ್ಸವಿಗ್ಗಹಂ ಜೀವಿತಾ ವೋರೋಪೇಯ್ಯ, ಸತ್ಥಹಾರಕಂ ವಾಸ್ಸ ಪರಿಯೇಸೇಯ್ಯ, ಮರಣವಣ್ಣಂ ವಾ ಸಂವಣ್ಣೇಯ್ಯ, ಮರಣಾಯ ವಾ ಸಮಾದಪೇಯ್ಯ ‘‘ಅಮ್ಭೋ ಪುರಿಸ, ಕಿಂ ತುಯ್ಹಿಮಿನಾ ಪಾಪಕೇನ ದುಜ್ಜೀವಿತೇನ, ಮತಂ ತೇ ಜೀವಿತಾ ಸೇಯ್ಯೋ’’ತಿ, ಇತಿ ಚಿತ್ತಮನಾ ಚಿತ್ತಸಙ್ಕಪ್ಪಾ ಅನೇಕಪರಿಯಾಯೇನ ಮರಣವಣ್ಣಂ ವಾ ಸಂವಣ್ಣೇಯ್ಯ, ಮರಣಾಯ ವಾ ಸಮಾದಪೇಯ್ಯ, ಅಯಮ್ಪಿ ಪಾರಾಜಿಕಾ ಹೋತಿ ಅಸಂವಾಸಾ।

    3. Yā pana bhikkhunī sañcicca manussaviggahaṃ jīvitā voropeyya, satthahārakaṃ vāssa pariyeseyya, maraṇavaṇṇaṃ vā saṃvaṇṇeyya, maraṇāya vā samādapeyya ‘‘ambho purisa, kiṃ tuyhiminā pāpakena dujjīvitena, mataṃ te jīvitā seyyo’’ti, iti cittamanā cittasaṅkappā anekapariyāyena maraṇavaṇṇaṃ vā saṃvaṇṇeyya, maraṇāya vā samādapeyya, ayampi pārājikā hoti asaṃvāsā.

    ಉತ್ತರಿಮನುಸ್ಸಧಮ್ಮಸಿಕ್ಖಾಪದಂ

    Uttarimanussadhammasikkhāpadaṃ

    ೪. ಯಾ ಪನ ಭಿಕ್ಖುನೀ ಅನಭಿಜಾನಂ ಉತ್ತರಿಮನುಸ್ಸಧಮ್ಮಂ ಅತ್ತುಪನಾಯಿಕಂ ಅಲಮರಿಯಞಾಣದಸ್ಸನಂ ಸಮುದಾಚರೇಯ್ಯ ‘‘ಇತಿ ಜಾನಾಮಿ, ಇತಿ ಪಸ್ಸಾಮೀ’’ತಿ, ತತೋ ಅಪರೇನ ಸಮಯೇನ ಸಮನುಗ್ಗಾಹೀಯಮಾನಾ ವಾ ಅಸಮನುಗ್ಗಾಹೀಯಮಾನಾ ವಾ ಆಪನ್ನಾ ವಿಸುದ್ಧಾಪೇಕ್ಖಾ ಏವಂ ವದೇಯ್ಯ ‘‘ಅಜಾನಮೇವಂ, ಅಯ್ಯೇ, ಅವಚಂ ಜಾನಾಮಿ, ಅಪಸ್ಸಂ ಪಸ್ಸಾಮಿ, ತುಚ್ಛಂ ಮುಸಾ ವಿಲಪಿ’’ನ್ತಿ, ಅಞ್ಞತ್ರ ಅಧಿಮಾನಾ, ಅಯಮ್ಪಿ ಪಾರಾಜಿಕಾ ಹೋತಿ ಅಸಂವಾಸಾ।

    4. Yā pana bhikkhunī anabhijānaṃ uttarimanussadhammaṃ attupanāyikaṃ alamariyañāṇadassanaṃ samudācareyya ‘‘iti jānāmi, iti passāmī’’ti, tato aparena samayena samanuggāhīyamānā vā asamanuggāhīyamānā vā āpannā visuddhāpekkhā evaṃ vadeyya ‘‘ajānamevaṃ, ayye, avacaṃ jānāmi, apassaṃ passāmi, tucchaṃ musā vilapi’’nti, aññatra adhimānā, ayampi pārājikā hoti asaṃvāsā.

    ಉಬ್ಭಜಾಣುಮಣ್ಡಲಿಕಾಸಿಕ್ಖಾಪದಂ

    Ubbhajāṇumaṇḍalikāsikkhāpadaṃ

    ೫. ಯಾ ಪನ ಭಿಕ್ಖುನೀ ಅವಸ್ಸುತಾ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ, ಅಧಕ್ಖಕಂ ಉಬ್ಭಜಾಣುಮಣ್ಡಲಂ ಆಮಸನಂ ವಾ ಪರಾಮಸನಂ ವಾ ಗಹಣಂ ವಾ ಛುಪನಂ ವಾ ಪಟಿಪೀಳನಂ ವಾ ಸಾದಿಯೇಯ್ಯ, ಅಯಮ್ಪಿ ಪಾರಾಜಿಕಾ ಹೋತಿ ಅಸಂವಾಸಾ ಉಬ್ಭಜಾಣುಮಣ್ಡಲಿಕಾ।

    5. Yā pana bhikkhunī avassutā avassutassa purisapuggalassa, adhakkhakaṃ ubbhajāṇumaṇḍalaṃ āmasanaṃ vā parāmasanaṃ vā gahaṇaṃ vā chupanaṃ vā paṭipīḷanaṃ vā sādiyeyya, ayampi pārājikā hoti asaṃvāsā ubbhajāṇumaṇḍalikā.

    ವಜ್ಜಪ್ಪಟಿಚ್ಛಾದಿಕಾಸಿಕ್ಖಾಪದಂ

    Vajjappaṭicchādikāsikkhāpadaṃ

    ೬. ಯಾ ಪನ ಭಿಕ್ಖುನೀ ಜಾನಂ ಪಾರಾಜಿಕಂ ಧಮ್ಮಂ ಅಜ್ಝಾಪನ್ನಂ ಭಿಕ್ಖುನಿಂ ನೇವತ್ತನಾ ಪಟಿಚೋದೇಯ್ಯ, ನ ಗಣಸ್ಸ ಆರೋಚೇಯ್ಯ, ಯದಾ ಚ ಸಾ ಠಿತಾ ವಾ ಅಸ್ಸ ಚುತಾ ವಾ ನಾಸಿತಾ ವಾ ಅವಸ್ಸಟಾ ವಾ, ಸಾ ಪಚ್ಛಾ ಏವಂ ವದೇಯ್ಯ ‘‘ಪುಬ್ಬೇವಾಹಂ, ಅಯ್ಯೇ, ಅಞ್ಞಾಸಿಂ ಏತಂ ಭಿಕ್ಖುನಿಂ ‘ಏವರೂಪಾ ಚ ಏವರೂಪಾ ಚ ಸಾ ಭಗಿನೀ’ತಿ, ನೋ ಚ ಖೋ ಅತ್ತನಾ ಪಟಿಚೋದೇಸ್ಸಂ, ನ ಗಣಸ್ಸ ಆರೋಚೇಸ್ಸ’’ನ್ತಿ, ಅಯಮ್ಪಿ ಪಾರಾಜಿಕಾ ಹೋತಿ ಅಸಂವಾಸಾ ವಜ್ಜಪ್ಪಟಿಚ್ಛಾದಿಕಾ।

    6. Yā pana bhikkhunī jānaṃ pārājikaṃ dhammaṃ ajjhāpannaṃ bhikkhuniṃ nevattanā paṭicodeyya, na gaṇassa āroceyya, yadā ca sā ṭhitā vā assa cutā vā nāsitā vā avassaṭā vā, sā pacchā evaṃ vadeyya ‘‘pubbevāhaṃ, ayye, aññāsiṃ etaṃ bhikkhuniṃ ‘evarūpā ca evarūpā ca sā bhaginī’ti, no ca kho attanā paṭicodessaṃ, na gaṇassa ārocessa’’nti, ayampi pārājikā hoti asaṃvāsā vajjappaṭicchādikā.

    ಉಕ್ಖಿತ್ತಾನುವತ್ತಿಕಾಸಿಕ್ಖಾಪದಂ

    Ukkhittānuvattikāsikkhāpadaṃ

    ೭. ಯಾ ಪನ ಭಿಕ್ಖುನೀ ಸಮಗ್ಗೇನ ಸಙ್ಘೇನ ಉಕ್ಖಿತ್ತಂ ಭಿಕ್ಖುಂ ಧಮ್ಮೇನ ವಿನಯೇನ ಸತ್ಥುಸಾಸನೇನ ಅನಾದರಂ ಅಪ್ಪಟಿಕಾರಂ ಅಕತಸಹಾಯಂ ತಮನುವತ್ತೇಯ್ಯ, ಸಾ ಭಿಕ್ಖುನೀ ಭಿಕ್ಖುನೀಹಿ ಏವಮಸ್ಸ ವಚನೀಯಾ ‘‘ಏಸೋ ಖೋ, ಅಯ್ಯೇ, ಭಿಕ್ಖು ಸಮಗ್ಗೇನ ಸಙ್ಘೇನ ಉಕ್ಖಿತ್ತೋ, ಧಮ್ಮೇನ ವಿನಯೇನ ಸತ್ಥುಸಾಸನೇನ ಅನಾದರೋ ಅಪ್ಪಟಿಕಾರೋ ಅಕತಸಹಾಯೋ, ಮಾಯ್ಯೇ, ಏತಂ ಭಿಕ್ಖುಂ ಅನುವತ್ತೀ’’ತಿ, ಏವಞ್ಚ ಸಾ ಭಿಕ್ಖುನೀ ಭಿಕ್ಖುನೀಹಿ ವುಚ್ಚಮಾನಾ ತಥೇವ ಪಗ್ಗಣ್ಹೇಯ್ಯ, ಸಾ ಭಿಕ್ಖುನೀ ಭಿಕ್ಖುನೀಹಿ ಯಾವತತಿಯಂ ಸಮನುಭಾಸಿತಬ್ಬಾ ತಸ್ಸ ಪಟಿನಿಸ್ಸಗ್ಗಾಯ, ಯಾವತತಿಯಂ ಚೇ ಸಮನುಭಾಸಿಯಮಾನಾ ತಂ ಪಟಿನಿಸ್ಸಜ್ಜೇಯ್ಯ, ಇಚ್ಚೇತಂ ಕುಸಲಂ, ನೋ ಚೇ ಪಟಿನಿಸ್ಸಜ್ಜೇಯ್ಯ, ಅಯಮ್ಪಿ ಪಾರಾಜಿಕಾ ಹೋತಿ ಅಸಂವಾಸಾ ಉಕ್ಖಿತ್ತಾನುವತ್ತಿಕಾ।

    7. Yā pana bhikkhunī samaggena saṅghena ukkhittaṃ bhikkhuṃ dhammena vinayena satthusāsanena anādaraṃ appaṭikāraṃ akatasahāyaṃ tamanuvatteyya, sā bhikkhunī bhikkhunīhi evamassa vacanīyā ‘‘eso kho, ayye, bhikkhu samaggena saṅghena ukkhitto, dhammena vinayena satthusāsanena anādaro appaṭikāro akatasahāyo, māyye, etaṃ bhikkhuṃ anuvattī’’ti, evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṃ samanubhāsitabbā tassa paṭinissaggāya, yāvatatiyaṃ ce samanubhāsiyamānā taṃ paṭinissajjeyya, iccetaṃ kusalaṃ, no ce paṭinissajjeyya, ayampi pārājikā hoti asaṃvāsā ukkhittānuvattikā.

    ಅಟ್ಠವತ್ಥುಕಾಸಿಕ್ಖಾಪದಂ

    Aṭṭhavatthukāsikkhāpadaṃ

    ೮. ಯಾ ಪನ ಭಿಕ್ಖುನೀ ಅವಸ್ಸುತಾ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ ಹತ್ಥಗ್ಗಹಣಂ ವಾ ಸಾದಿಯೇಯ್ಯ, ಸಙ್ಘಾಟಿಕಣ್ಣಗ್ಗಹಣಂ ವಾ ಸಾದಿಯೇಯ್ಯ, ಸನ್ತಿಟ್ಠೇಯ್ಯ ವಾ, ಸಲ್ಲಪೇಯ್ಯ ವಾ, ಸಙ್ಕೇತಂ ವಾ ಗಚ್ಛೇಯ್ಯ, ಪುರಿಸಸ್ಸ ವಾ ಅಬ್ಭಾಗಮನಂ ಸಾದಿಯೇಯ್ಯ, ಛನ್ನಂ ವಾ ಅನುಪವಿಸೇಯ್ಯ, ಕಾಯಂ ವಾ ತದತ್ಥಾಯ ಉಪಸಂಹರೇಯ್ಯ ಏತಸ್ಸ ಅಸದ್ಧಮ್ಮಸ್ಸ ಪಟಿಸೇವನತ್ಥಾಯ, ಅಯಮ್ಪಿ ಪಾರಾಜಿಕಾ ಹೋತಿ ಅಸಂವಾಸಾ ಅಟ್ಠವತ್ಥುಕಾ।

    8. Yā pana bhikkhunī avassutā avassutassa purisapuggalassa hatthaggahaṇaṃ vā sādiyeyya, saṅghāṭikaṇṇaggahaṇaṃ vā sādiyeyya, santiṭṭheyya vā, sallapeyya vā, saṅketaṃ vā gaccheyya, purisassa vā abbhāgamanaṃ sādiyeyya, channaṃ vā anupaviseyya, kāyaṃ vā tadatthāya upasaṃhareyya etassa asaddhammassa paṭisevanatthāya, ayampi pārājikā hoti asaṃvāsā aṭṭhavatthukā.

    ಉದ್ದಿಟ್ಠಾ ಖೋ, ಅಯ್ಯಾಯೋ, ಅಟ್ಠ ಪಾರಾಜಿಕಾ ಧಮ್ಮಾ। ಯೇಸಂ ಭಿಕ್ಖುನೀ ಅಞ್ಞತರಂ ವಾ ಅಞ್ಞತರಂ ವಾ ಆಪಜ್ಜಿತ್ವಾ ನ ಲಭತಿ ಭಿಕ್ಖುನೀಹಿ ಸದ್ಧಿಂ ಸಂವಾಸಂ ಯಥಾ ಪುರೇ, ತಥಾ ಪಚ್ಛಾ, ಪಾರಾಜಿಕಾ ಹೋತಿ ಅಸಂವಾಸಾ। ತತ್ಥಾಯ್ಯಾಯೋ, ಪುಚ್ಛಾಮಿ, ಕಚ್ಚಿತ್ಥ ಪರಿಸುದ್ಧಾ, ದುತಿಯಮ್ಪಿ ಪುಚ್ಛಾಮಿ, ಕಚ್ಚಿತ್ಥ ಪರಿಸುದ್ಧಾ, ತತಿಯಮ್ಪಿ ಪುಚ್ಛಾಮಿ, ಕಚ್ಚಿತ್ಥ ಪರಿಸುದ್ಧಾ, ಪರಿಸುದ್ಧೇತ್ಥಾಯ್ಯಾಯೋ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀತಿ।

    Uddiṭṭhā kho, ayyāyo, aṭṭha pārājikā dhammā. Yesaṃ bhikkhunī aññataraṃ vā aññataraṃ vā āpajjitvā na labhati bhikkhunīhi saddhiṃ saṃvāsaṃ yathā pure, tathā pacchā, pārājikā hoti asaṃvāsā. Tatthāyyāyo, pucchāmi, kaccittha parisuddhā, dutiyampi pucchāmi, kaccittha parisuddhā, tatiyampi pucchāmi, kaccittha parisuddhā, parisuddhetthāyyāyo, tasmā tuṇhī, evametaṃ dhārayāmīti.

    ಪಾರಾಜಿಕಂ ನಿಟ್ಠಿತಂ।

    Pārājikaṃ niṭṭhitaṃ.

    ಸಙ್ಘಾದಿಸೇಸುದ್ದೇಸೋ

    Saṅghādisesuddeso

    ಇಮೇ ಖೋ ಪನಾಯ್ಯಾಯೋ ಸತ್ತರಸ ಸಙ್ಘಾದಿಸೇಸಾ

    Ime kho panāyyāyo sattarasa saṅghādisesā

    ಧಮ್ಮಾ ಉದ್ದೇಸಂ ಆಗಚ್ಛನ್ತಿ।

    Dhammā uddesaṃ āgacchanti.

    ಉಸ್ಸಯವಾದಿಕಾಸಿಕ್ಖಾಪದಂ

    Ussayavādikāsikkhāpadaṃ

    ೧. ಯಾ ಪನ ಭಿಕ್ಖುನೀ ಉಸ್ಸಯವಾದಿಕಾ ವಿಹರೇಯ್ಯ ಗಹಪತಿನಾ ವಾ ಗಹಪತಿಪುತ್ತೇನ ವಾ ದಾಸೇನ ವಾ ಕಮ್ಮಕಾರೇನ ವಾ ಅನ್ತಮಸೋ ಸಮಣಪರಿಬ್ಬಾಜಕೇನಾಪಿ, ಅಯಮ್ಪಿ ಭಿಕ್ಖುನೀ ಪಠಮಾಪತ್ತಿಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸಂ।

    1. Yā pana bhikkhunī ussayavādikā vihareyya gahapatinā vā gahapatiputtena vā dāsena vā kammakārena vā antamaso samaṇaparibbājakenāpi, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesaṃ.

    ಚೋರೀವುಟ್ಠಾಪಿಕಾಸಿಕ್ಖಾಪದಂ

    Corīvuṭṭhāpikāsikkhāpadaṃ

    ೨. ಯಾ ಪನ ಭಿಕ್ಖುನೀ ಜಾನಂ ಚೋರಿಂ ವಜ್ಝಂ ವಿದಿತಂ ಅನಪಲೋಕೇತ್ವಾ ರಾಜಾನಂ ವಾ ಸಙ್ಘಂ ವಾ ಗಣಂ ವಾ ಪೂಗಂ ವಾ ಸೇಣಿಂ ವಾ, ಅಞ್ಞತ್ರ ಕಪ್ಪಾ ವುಟ್ಠಾಪೇಯ್ಯ, ಅಯಮ್ಪಿ ಭಿಕ್ಖುನೀ ಪಠಮಾಪತ್ತಿಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸಂ।

    2. Yā pana bhikkhunī jānaṃ coriṃ vajjhaṃ viditaṃ anapaloketvā rājānaṃ vā saṅghaṃ vā gaṇaṃ vā pūgaṃ vā seṇiṃ vā, aññatra kappā vuṭṭhāpeyya, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesaṃ.

    ಏಕಗಾಮನ್ತರಗಮನಸಿಕ್ಖಾಪದಂ

    Ekagāmantaragamanasikkhāpadaṃ

    ೩. ಯಾ ಪನ ಭಿಕ್ಖುನೀ ಏಕಾ ವಾ ಗಾಮನ್ತರಂ ಗಚ್ಛೇಯ್ಯ, ಏಕಾ ವಾ ನದೀಪಾರಂ ಗಚ್ಛೇಯ್ಯ, ಏಕಾ ವಾ ರತ್ತಿಂ ವಿಪ್ಪವಸೇಯ್ಯ, ಏಕಾ ವಾ ಗಣಮ್ಹಾ ಓಹಿಯೇಯ್ಯ, ಅಯಮ್ಪಿ ಭಿಕ್ಖುನೀ ಪಠಮಾಪತ್ತಿಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸಂ।

    3. Yā pana bhikkhunī ekā vā gāmantaraṃ gaccheyya, ekā vā nadīpāraṃ gaccheyya, ekā vā rattiṃ vippavaseyya, ekā vā gaṇamhā ohiyeyya, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesaṃ.

    ಉಕ್ಖಿತ್ತಕಓಸಾರಣಸಿಕ್ಖಾಪದಂ

    Ukkhittakaosāraṇasikkhāpadaṃ

    ೪. ಯಾ ಪನ ಭಿಕ್ಖುನೀ ಸಮಗ್ಗೇನ ಸಙ್ಘೇನ ಉಕ್ಖಿತ್ತಂ ಭಿಕ್ಖುನಿಂ ಧಮ್ಮೇನ ವಿನಯೇನ ಸತ್ಥುಸಾಸನೇನ ಅನಪಲೋಕೇತ್ವಾ ಕಾರಕಸಙ್ಘಂ, ಅನಞ್ಞಾಯ ಗಣಸ್ಸ ಛನ್ದಂ ಓಸಾರೇಯ್ಯ, ಅಯಮ್ಪಿ ಭಿಕ್ಖುನೀ ಪಠಮಾಪತ್ತಿಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸಂ।

    4. Yā pana bhikkhunī samaggena saṅghena ukkhittaṃ bhikkhuniṃ dhammena vinayena satthusāsanena anapaloketvā kārakasaṅghaṃ, anaññāya gaṇassa chandaṃ osāreyya, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesaṃ.

    ಭೋಜನಪಟಿಗ್ಗಹಣಪಠಮಸಿಕ್ಖಾಪದಂ

    Bhojanapaṭiggahaṇapaṭhamasikkhāpadaṃ

    ೫. ಯಾ ಪನ ಭಿಕ್ಖುನೀ ಅವಸ್ಸುತಾ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ ಹತ್ಥತೋ ಖಾದನೀಯಂ ವಾ, ಭೋಜನೀಯಂ ವಾ ಸಹತ್ಥಾ ಪಟಿಗ್ಗಹೇತ್ವಾ ಖಾದೇಯ್ಯ ವಾ ಭುಞ್ಜೇಯ್ಯ ವಾ, ಅಯಮ್ಪಿ ಭಿಕ್ಖುನೀ ಪಠಮಾಪತ್ತಿಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸಂ।

    5. Yā pana bhikkhunī avassutā avassutassa purisapuggalassa hatthato khādanīyaṃ vā, bhojanīyaṃ vā sahatthā paṭiggahetvā khādeyya vā bhuñjeyya vā, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesaṃ.

    ಭೋಜನಪಟಿಗ್ಗಹಣದುತಿಯಸಿಕ್ಖಾಪದಂ

    Bhojanapaṭiggahaṇadutiyasikkhāpadaṃ

    ೬. ಯಾ ಪನ ಭಿಕ್ಖುನೀ ಏವಂ ವದೇಯ್ಯ ‘‘ಕಿಂ ತೇ, ಅಯ್ಯೇ, ಏಸೋ ಪುರಿಸಪುಗ್ಗಲೋ ಕರಿಸ್ಸತಿ ಅವಸ್ಸುತೋ ವಾ ಅನವಸ್ಸುತೋ ವಾ, ಯತೋ ತ್ವಂ ಅನವಸ್ಸುತಾ, ಇಙ್ಘ, ಅಯ್ಯೇ, ಯಂ ತೇ ಏಸೋ ಪುರಿಸಪುಗ್ಗಲೋ ದೇತಿ ಖಾದನೀಯಂ ವಾ ಭೋಜನೀಯಂ ವಾ, ತಂ ತ್ವಂ ಸಹತ್ಥಾ ಪಟಿಗ್ಗಹೇತ್ವಾ ಖಾದ ವಾ ಭುಞ್ಜ ವಾ’’ತಿ, ಅಯಮ್ಪಿ ಭಿಕ್ಖುನೀ ಪಠಮಾಪತ್ತಿಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸಂ।

    6. Yā pana bhikkhunī evaṃ vadeyya ‘‘kiṃ te, ayye, eso purisapuggalo karissati avassuto vā anavassuto vā, yato tvaṃ anavassutā, iṅgha, ayye, yaṃ te eso purisapuggalo deti khādanīyaṃ vā bhojanīyaṃ vā, taṃ tvaṃ sahatthā paṭiggahetvā khāda vā bhuñja vā’’ti, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesaṃ.

    ಸಞ್ಚರಿತ್ತಸಿಕ್ಖಾಪದಂ

    Sañcarittasikkhāpadaṃ

    ೭. ಯಾ ಪನ ಭಿಕ್ಖುನೀ ಸಞ್ಚರಿತ್ತಂ ಸಮಾಪಜ್ಜೇಯ್ಯ ಇತ್ಥಿಯಾ ವಾ ಪುರಿಸಮತಿಂ, ಪುರಿಸಸ್ಸ ವಾ ಇತ್ಥಿಮತಿಂ, ಜಾಯತ್ತನೇ ವಾ ಜಾರತ್ತನೇ ವಾ ಅನ್ತಮಸೋ ತಙ್ಖಣಿಕಾಯಪಿ, ಅಯಮ್ಪಿ ಭಿಕ್ಖುನೀ ಪಠಮಾಪತ್ತಿಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸಂ।

    7. Yā pana bhikkhunī sañcarittaṃ samāpajjeyya itthiyā vā purisamatiṃ, purisassa vā itthimatiṃ, jāyattane vā jārattane vā antamaso taṅkhaṇikāyapi, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesaṃ.

    ದುಟ್ಠದೋಸಸಿಕ್ಖಾಪದಂ

    Duṭṭhadosasikkhāpadaṃ

    ೮. ಯಾ ಪನ ಭಿಕ್ಖುನೀ ಭಿಕ್ಖುನಿಂ ದುಟ್ಠಾ ದೋಸಾ ಅಪ್ಪತೀತಾ ಅಮೂಲಕೇನ ಪಾರಾಜಿಕೇನ ಧಮ್ಮೇನ ಅನುದ್ಧಂಸೇಯ್ಯ ‘‘ಅಪ್ಪೇವ ನಾಮ ನಂ ಇಮಮ್ಹಾ ಬ್ರಹ್ಮಚರಿಯಾ ಚಾವೇಯ್ಯ’’ನ್ತಿ, ತತೋ ಅಪರೇನ ಸಮಯೇನ ಸಮನುಗ್ಗಾಹೀಯಮಾನಾ ವಾ ಅಸ ಮನುಗ್ಗಾಹೀಯಮಾನಾ ವಾ ಅಮೂಲಕಞ್ಚೇವ ತಂ ಅಧಿಕರಣಂ ಹೋತಿ, ಭಿಕ್ಖುನೀ ಚ ದೋಸಂ ಪತಿಟ್ಠಾತಿ, ಅಯಮ್ಪಿ ಭಿಕ್ಖುನೀ ಪಠಮಾಪತ್ತಿಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸಂ।

    8. Yā pana bhikkhunī bhikkhuniṃ duṭṭhā dosā appatītā amūlakena pārājikena dhammena anuddhaṃseyya ‘‘appeva nāma naṃ imamhā brahmacariyā cāveyya’’nti, tato aparena samayena samanuggāhīyamānā vā asa manuggāhīyamānā vā amūlakañceva taṃ adhikaraṇaṃ hoti, bhikkhunī ca dosaṃ patiṭṭhāti, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesaṃ.

    ಅಞ್ಞಭಾಗಿಯಸಿಕ್ಖಾಪದಂ

    Aññabhāgiyasikkhāpadaṃ

    ೯. ಯಾ ಪನ ಭಿಕ್ಖುನೀ ಭಿಕ್ಖುನಿಂ ದುಟ್ಠಾ ದೋಸಾ ಅಪ್ಪತೀತಾ ಅಞ್ಞಭಾಗಿಯಸ್ಸ ಅಧಿಕರಣಸ್ಸ ಕಿಞ್ಚಿದೇಸಂ ಲೇಸಮತ್ತಂ ಉಪಾದಾಯ ಪಾರಾಜಿಕೇನ ಧಮ್ಮೇನ ಅನುದ್ಧಂಸೇಯ್ಯ ‘‘ಅಪ್ಪೇವ ನಾಮ ನಂ ಇಮಮ್ಹಾ ಬ್ರಹ್ಮಚರಿಯಾ ಚಾವೇಯ್ಯ’’ನ್ತಿ, ತತೋ ಅಪರೇನ ಸಮಯೇನ ಸಮನುಗ್ಗಾಹೀಯಮಾನಾ ವಾ ಅಸಮನುಗ್ಗಾಹೀಯಮಾನಾ ವಾ ಅಞ್ಞಭಾಗಿಯಞ್ಚೇವ ತಂ ಅಧಿಕರಣಂ ಹೋತಿ। ಕೋಚಿದೇಸೋ ಲೇಸಮತ್ತೋ ಉಪಾದಿನ್ನೋ, ಭಿಕ್ಖುನೀ ಚ ದೋಸಂ ಪತಿಟ್ಠಾತಿ, ಅಯಮ್ಪಿ ಭಿಕ್ಖುನೀ ಪಠಮಾಪತ್ತಿಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸಂ।

    9. Yā pana bhikkhunī bhikkhuniṃ duṭṭhā dosā appatītā aññabhāgiyassa adhikaraṇassa kiñcidesaṃ lesamattaṃ upādāya pārājikena dhammena anuddhaṃseyya ‘‘appeva nāma naṃ imamhā brahmacariyā cāveyya’’nti, tato aparena samayena samanuggāhīyamānā vā asamanuggāhīyamānā vā aññabhāgiyañceva taṃ adhikaraṇaṃ hoti. Kocideso lesamatto upādinno, bhikkhunī ca dosaṃ patiṭṭhāti, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesaṃ.

    ಸಿಕ್ಖಂಪಚ್ಚಾಚಿಕ್ಖಣಸಿಕ್ಖಾಪದಂ

    Sikkhaṃpaccācikkhaṇasikkhāpadaṃ

    ೧೦. ಯಾ ಪನ ಭಿಕ್ಖುನೀ ಕುಪಿತಾ ಅನತ್ತಮನಾ ಏವಂ ವದೇಯ್ಯ ‘‘ಬುದ್ಧಂ ಪಚ್ಚಾಚಿಕ್ಖಾಮಿ ಧಮ್ಮಂ ಪಚ್ಚಾಚಿಕ್ಖಾಮಿ, ಸಙ್ಘಂ ಪಚ್ಚಾಚಿಕ್ಖಾಮಿ, ಸಿಕ್ಖಂ ಪಚ್ಚಾಚಿಕ್ಖಾಮಿ, ಕಿನ್ನುಮಾವ ಸಮಣಿಯೋ ಯಾ ಸಮಣಿಯೋ ಸಕ್ಯಧೀತರೋ, ಸನ್ತಞ್ಞಾಪಿ ಸಮಣಿಯೋ ಲಜ್ಜಿನಿಯೋ ಕುಕ್ಕುಚ್ಚಿಕಾ ಸಿಕ್ಖಾಕಾಮಾ, ತಾಸಾಹಂ ಸನ್ತಿಕೇ ಬ್ರಹ್ಮಚರಿಯಂ ಚರಿಸ್ಸಾಮೀ’’ತಿ। ಸಾ ಭಿಕ್ಖುನೀ ಭಿಕ್ಖುನೀಹಿ ಏವಮಸ್ಸ ವಚನೀಯಾ ‘‘ಮಾಯ್ಯೇ ಕುಪಿತಾ ಅನತ್ತಮನಾ ಏವಂ ಅವಚ ‘ಬುದ್ಧಂ ಪಚ್ಚಾಚಿಕ್ಖಾಮಿ, ಧಮ್ಮಂ ಪಚ್ಚಾಚಿಕ್ಖಾಮಿ, ಸಙ್ಘಂ ಪಚ್ಚಾಚಿಕ್ಖಾಮಿ, ಸಿಕ್ಖಂ ಪಚ್ಚಾಚಿಕ್ಖಾಮಿ, ಕಿನ್ನುಮಾವ ಸಮಣಿಯೋ ಯಾ ಸಮಣಿಯೋ ಸಕ್ಯಧೀತರೋ, ಸನ್ತಞ್ಞಾಪಿ ಸಮಣಿಯೋ ಲಜ್ಜಿನಿಯೋ ಕುಕ್ಕುಚ್ಚಿಕಾ ಸಿಕ್ಖಾಕಾಮಾ, ತಾಸಾಹಂ ಸನ್ತಿಕೇ ಬ್ರಹ್ಮಚರಿಯಂ ಚರಿಸ್ಸಾಮೀ’ತಿ, ಅಭಿರಮಾಯ್ಯೇ, ಸ್ವಾಕ್ಖಾತೋ ಧಮ್ಮೋ, ಚರ ಬ್ರಹ್ಮಚರಿಯಂ ಸಮ್ಮಾ ದುಕ್ಖಸ್ಸ ಅನ್ತಕಿರಿಯಾಯಾ’’ತಿ, ಏವಞ್ಚ ಸಾ ಭಿಕ್ಖುನೀ ಭಿಕ್ಖುನೀಹಿ ವುಚ್ಚಮಾನಾ ತಥೇವ ಪಗ್ಗಣ್ಹೇಯ್ಯ, ಸಾ ಭಿಕ್ಖುನೀ ಭಿಕ್ಖುನೀಹಿ ಯಾವತತಿಯಂ ಸಮನುಭಾಸಿತಬ್ಬಾ ತಸ್ಸ ಪಟಿನಿಸ್ಸಗ್ಗಾಯ, ಯಾವತತಿಯಞ್ಚೇ ಸಮನುಭಾಸಿಯಮಾನಾ ತಂ ಪಟಿನಿಸ್ಸಜ್ಜೇಯ್ಯ, ಇಚ್ಚೇತಂ ಕುಸಲಂ, ನೋ ಚೇ ಪಟಿನಿಸ್ಸಜ್ಜೇಯ್ಯ, ಅಯಮ್ಪಿ ಭಿಕ್ಖುನೀ ಯಾವತತಿಯಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸಂ।

    10. Yā pana bhikkhunī kupitā anattamanā evaṃ vadeyya ‘‘buddhaṃ paccācikkhāmi dhammaṃ paccācikkhāmi, saṅghaṃ paccācikkhāmi, sikkhaṃ paccācikkhāmi, kinnumāva samaṇiyo yā samaṇiyo sakyadhītaro, santaññāpi samaṇiyo lajjiniyo kukkuccikā sikkhākāmā, tāsāhaṃ santike brahmacariyaṃ carissāmī’’ti. Sā bhikkhunī bhikkhunīhi evamassa vacanīyā ‘‘māyye kupitā anattamanā evaṃ avaca ‘buddhaṃ paccācikkhāmi, dhammaṃ paccācikkhāmi, saṅghaṃ paccācikkhāmi, sikkhaṃ paccācikkhāmi, kinnumāva samaṇiyo yā samaṇiyo sakyadhītaro, santaññāpi samaṇiyo lajjiniyo kukkuccikā sikkhākāmā, tāsāhaṃ santike brahmacariyaṃ carissāmī’ti, abhiramāyye, svākkhāto dhammo, cara brahmacariyaṃ sammā dukkhassa antakiriyāyā’’ti, evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṃ samanubhāsitabbā tassa paṭinissaggāya, yāvatatiyañce samanubhāsiyamānā taṃ paṭinissajjeyya, iccetaṃ kusalaṃ, no ce paṭinissajjeyya, ayampi bhikkhunī yāvatatiyakaṃ dhammaṃ āpannā nissāraṇīyaṃ saṅghādisesaṃ.

    ಅಧಿಕರಣಕುಪಿತಸಿಕ್ಖಾಪದಂ

    Adhikaraṇakupitasikkhāpadaṃ

    ೧೧. ಯಾ ಪನ ಭಿಕ್ಖುನೀ ಕಿಸ್ಮಿಞ್ಚಿದೇವ ಅಧಿಕರಣೇ ಪಚ್ಚಾಕತಾ ಕುಪಿತಾ ಅನತ್ತಮನಾ ಏವಂ ವದೇಯ್ಯ ‘‘ಛನ್ದಗಾಮಿನಿಯೋ ಚ ಭಿಕ್ಖುನಿಯೋ, ದೋಸಗಾಮಿನಿಯೋ ಚ ಭಿಕ್ಖುನಿಯೋ, ಮೋಹಗಾಮಿನಿಯೋ ಚ ಭಿಕ್ಖುನಿಯೋ, ಭಯಗಾಮಿನಿಯೋ ಚ ಭಿಕ್ಖುನಿಯೋ’’ತಿ, ಸಾ ಭಿಕ್ಖುನೀ ಭಿಕ್ಖುನೀಹಿ ಏವಮಸ್ಸ ವಚನೀಯಾ ‘‘ಮಾಯ್ಯೇ, ಕಿಸ್ಮಿಞ್ಚಿದೇವ ಅಧಿಕರಣೇ ಪಚ್ಚಾಕತಾ ಕುಪಿತಾ ಅನತ್ತಮನಾ ಏವಂ ಅವಚ ‘ಛನ್ದಗಾಮಿನಿಯೋ ಚ ಭಿಕ್ಖುನಿಯೋ, ದೋಸಗಾಮಿನಿಯೋ ಚ ಭಿಕ್ಖುನಿಯೋ, ಮೋಹಗಾಮಿನಿಯೋ ಚ ಭಿಕ್ಖುನಿಯೋ, ಭಯಗಾಮಿನಿಯೋ ಚ ಭಿಕ್ಖುನಿಯೋ’ತಿ, ಅಯ್ಯಾ ಖೋ ಛನ್ದಾಪಿ ಗಚ್ಛೇಯ್ಯ, ದೋಸಾಪಿ ಗಚ್ಛೇಯ್ಯ, ಮೋಹಾಪಿ ಗಚ್ಛೇಯ್ಯ, ಭಯಾಪಿ ಗಚ್ಛೇಯ್ಯಾ’’ತಿ। ಏವಞ್ಚ ಸಾ ಭಿಕ್ಖುನೀ ಭಿಕ್ಖುನೀಹಿ ವುಚ್ಚಮಾನಾ ತಥೇವ ಪಗ್ಗಣ್ಹೇಯ್ಯ, ಸಾ ಭಿಕ್ಖುನೀ ಭಿಕ್ಖುನೀಹಿ ಯಾವತತಿಯಂ ಸಮನುಭಾಸಿತಬ್ಬಾ ತಸ್ಸ ಪಟಿನಿಸ್ಸಗ್ಗಾಯ, ಯಾವತತಿಯಞ್ಚೇ ಸಮನುಭಾಸಿಯಮಾನಾ ತಂ ಪಟಿನಿಸ್ಸಜ್ಜೇಯ್ಯ, ಇಚ್ಚೇತಂ ಕುಸಲಂ, ನೋ ಚೇ ಪಟಿನಿಸ್ಸಜ್ಜೇಯ್ಯ, ಅಯಮ್ಪಿ ಭಿಕ್ಖುನೀ ಯಾವತತಿಯಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸಂ।

    11. Yā pana bhikkhunī kismiñcideva adhikaraṇe paccākatā kupitā anattamanā evaṃ vadeyya ‘‘chandagāminiyo ca bhikkhuniyo, dosagāminiyo ca bhikkhuniyo, mohagāminiyo ca bhikkhuniyo, bhayagāminiyo ca bhikkhuniyo’’ti, sā bhikkhunī bhikkhunīhi evamassa vacanīyā ‘‘māyye, kismiñcideva adhikaraṇe paccākatā kupitā anattamanā evaṃ avaca ‘chandagāminiyo ca bhikkhuniyo, dosagāminiyo ca bhikkhuniyo, mohagāminiyo ca bhikkhuniyo, bhayagāminiyo ca bhikkhuniyo’ti, ayyā kho chandāpi gaccheyya, dosāpi gaccheyya, mohāpi gaccheyya, bhayāpi gaccheyyā’’ti. Evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṃ samanubhāsitabbā tassa paṭinissaggāya, yāvatatiyañce samanubhāsiyamānā taṃ paṭinissajjeyya, iccetaṃ kusalaṃ, no ce paṭinissajjeyya, ayampi bhikkhunī yāvatatiyakaṃ dhammaṃ āpannā nissāraṇīyaṃ saṅghādisesaṃ.

    ಪಾಪಸಮಾಚಾರಪಠಮಸಿಕ್ಖಾಪದಂ

    Pāpasamācārapaṭhamasikkhāpadaṃ

    ೧೨. ಭಿಕ್ಖುನಿಯೋ ಪನೇವ ಸಂಸಟ್ಠಾ ವಿಹರನ್ತಿ ಪಾಪಾಚಾರಾ ಪಾಪಸದ್ದಾ ಪಾಪಸಿಲೋಕಾ ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ, ತಾ ಭಿಕ್ಖುನಿಯೋ ಭಿಕ್ಖುನೀಹಿ ಏವಮಸ್ಸು ವಚನೀಯಾ ‘‘ಭಗಿನಿಯೋ ಖೋ ಸಂಸಟ್ಠಾ ವಿಹರನ್ತಿ ಪಾಪಾಚಾರಾ ಪಾಪಸದ್ದಾ ಪಾಪಸಿಲೋಕಾ ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ, ವಿವಿಚ್ಚಥಾಯ್ಯೇ, ವಿವೇಕಞ್ಞೇವ ಭಗಿನೀನಂ ಸಙ್ಘೋ ವಣ್ಣೇತೀ’’ತಿ, ಏವಞ್ಚ ತಾ ಭಿಕ್ಖುನಿಯೋ ಭಿಕ್ಖುನೀಹಿ ವುಚ್ಚಮಾನಾ ತಥೇವ ಪಗ್ಗಣ್ಹೇಯ್ಯುಂ, ತಾ ಭಿಕ್ಖುನಿಯೋ ಭಿಕ್ಖುನೀಹಿ ಯಾವತತಿಯಂ ಸಮನುಭಾಸಿತಬ್ಬಾ ತಸ್ಸ ಪಟಿನಿಸ್ಸಗ್ಗಾಯ, ಯಾವತತಿಯಞ್ಚೇ ಸಮನುಭಾಸಿಯಮಾನಾ ತಂ ಪಟಿನಿಸ್ಸಜ್ಜೇಯ್ಯುಂ, ಇಚ್ಚೇತಂ ಕುಸಲಂ, ನೋ ಚೇ ಪಟಿನಿಸ್ಸಜ್ಜೇಯ್ಯುಂ, ಇಮಾಪಿ ಭಿಕ್ಖುನಿಯೋ ಯಾವತತಿಯಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸಂ।

    12. Bhikkhuniyo paneva saṃsaṭṭhā viharanti pāpācārā pāpasaddā pāpasilokā bhikkhunisaṅghassa vihesikā aññamaññissā vajjappaṭicchādikā, tā bhikkhuniyo bhikkhunīhi evamassu vacanīyā ‘‘bhaginiyo kho saṃsaṭṭhā viharanti pāpācārā pāpasaddā pāpasilokā bhikkhunisaṅghassa vihesikā aññamaññissā vajjappaṭicchādikā, viviccathāyye, vivekaññeva bhaginīnaṃ saṅgho vaṇṇetī’’ti, evañca tā bhikkhuniyo bhikkhunīhi vuccamānā tatheva paggaṇheyyuṃ, tā bhikkhuniyo bhikkhunīhi yāvatatiyaṃ samanubhāsitabbā tassa paṭinissaggāya, yāvatatiyañce samanubhāsiyamānā taṃ paṭinissajjeyyuṃ, iccetaṃ kusalaṃ, no ce paṭinissajjeyyuṃ, imāpi bhikkhuniyo yāvatatiyakaṃ dhammaṃ āpannā nissāraṇīyaṃ saṅghādisesaṃ.

    ಪಾಪಸಮಾಚಾರದುತಿಯಸಿಕ್ಖಾಪದಂ

    Pāpasamācāradutiyasikkhāpadaṃ

    ೧೩. ಯಾ ಪನ ಭಿಕ್ಖುನೀ ಏವಂ ವದೇಯ್ಯ ‘‘ಸಂಸಟ್ಠಾವ, ಅಯ್ಯೇ, ತುಮ್ಹೇ ವಿಹರಥ, ಮಾ ತುಮ್ಹೇ ನಾನಾ ವಿಹರಿತ್ಥ, ಸನ್ತಿ ಸಙ್ಘೇ ಅಞ್ಞಾಪಿ ಭಿಕ್ಖುನಿಯೋ ಏವಾಚಾರಾ ಏವಂಸದ್ದಾ ಏವಂಸಿಲೋಕಾ ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ, ತಾ ಸಙ್ಘೋ ನ ಕಿಞ್ಚಿ ಆಹ ತುಮ್ಹಞ್ಞೇವ ಸಙ್ಘೋ ಉಞ್ಞಾಯ ಪರಿಭವೇನ ಅಕ್ಖನ್ತಿಯಾ ವೇಭಸ್ಸಿಯಾ ದುಬ್ಬಲ್ಯಾ ಏವಮಾಹ – ‘ಭಗಿನಿಯೋ ಖೋ ಸಂಸಟ್ಠಾ ವಿಹರನ್ತಿ ಪಾಪಾಚಾರಾ ಪಾಪಸದ್ದಾ ಪಾಪಸಿಲೋಕಾ ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ, ವಿವಿಚ್ಚಥಾಯ್ಯೇ, ವಿವೇಕಞ್ಞೇವ ಭಗಿನೀನಂ ಸಙ್ಘೋ ವಣ್ಣೇತೀ’’’ತಿ, ಸಾ ಭಿಕ್ಖುನೀ ಭಿಕ್ಖುನೀಹಿ ಏವಮಸ್ಸ ವಚನೀಯಾ ‘‘ಮಾಯ್ಯೇ, ಏವಂ ಅವಚ, ಸಂಸಟ್ಠಾವ ಅಯ್ಯೇ ತುಮ್ಹೇ ವಿಹರಥ, ಮಾ ತುಮ್ಹೇ ನಾನಾ ವಿಹರಿತ್ಥ, ಸನ್ತಿ ಸಙ್ಘೇ ಅಞ್ಞಾಪಿ ಭಿಕ್ಖುನಿಯೋ ಏವಾಚಾರಾ ಏವಂಸದ್ದಾ ಏವಂಸಿಲೋಕಾ ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ, ತಾ ಸಙ್ಘೋ ನ ಕಿಞ್ಚಿ ಆಹ, ತುಮ್ಹಞ್ಞೇವ ಸಙ್ಘೋ ಉಞ್ಞಾಯ ಪರಿಭವೇನ ಅಕ್ಖನ್ತಿಯಾ ವೇಭಸ್ಸಿಯಾ ದುಬ್ಬಲ್ಯಾ ಏವಮಾಹ – ‘ಭಗಿನಿಯೋ ಖೋ ಸಂಸಟ್ಠಾ ವಿಹರನ್ತಿ ಪಾಪಾಚಾರಾ ಪಾಪಸದ್ದಾ ಪಾಪಸಿಲೋಕಾ ಭಿಕ್ಖುನಿಸಙ್ಘಸ್ಸ ವಿಹೇಸಿಕಾ ಅಞ್ಞಮಞ್ಞಿಸ್ಸಾ ವಜ್ಜಪ್ಪಟಿಚ್ಛಾದಿಕಾ, ವಿವಿಚ್ಚಥಾಯ್ಯೇ, ವಿವೇಕಞ್ಞೇವ ಭಗಿನೀನಂ ಸಙ್ಘೋ ವಣ್ಣೇತೀ’’’ತಿ, ಏವಞ್ಚ ಸಾ ಭಿಕ್ಖುನೀ ಭಿಕ್ಖುನೀಹಿ ವುಚ್ಚಮಾನಾ ತಥೇವ ಪಗ್ಗಣ್ಹೇಯ್ಯ, ಸಾ ಭಿಕ್ಖುನೀ ಭಿಕ್ಖುನೀಹಿ ಯಾವತತಿಯಂ ಸಮನುಭಾಸಿತಬ್ಬಾ ತಸ್ಸ ಪಟಿನಿಸ್ಸಗ್ಗಾಯ, ಯಾವತತಿಯಞ್ಚೇ ಸಮನುಭಾಸಿಯಮಾನಾ ತಂ ಪಟಿನಿಸ್ಸಜ್ಜೇಯ್ಯ, ಇಚ್ಚೇತಂ ಕುಸಲಂ, ನೋ ಚೇ ಪಟಿನಿಸ್ಸಜ್ಜೇಯ್ಯ, ಅಯಮ್ಪಿ ಭಿಕ್ಖುನೀ ಯಾವತತಿಯಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸಂ।

    13. Yā pana bhikkhunī evaṃ vadeyya ‘‘saṃsaṭṭhāva, ayye, tumhe viharatha, mā tumhe nānā viharittha, santi saṅghe aññāpi bhikkhuniyo evācārā evaṃsaddā evaṃsilokā bhikkhunisaṅghassa vihesikā aññamaññissā vajjappaṭicchādikā, tā saṅgho na kiñci āha tumhaññeva saṅgho uññāya paribhavena akkhantiyā vebhassiyā dubbalyā evamāha – ‘bhaginiyo kho saṃsaṭṭhā viharanti pāpācārā pāpasaddā pāpasilokā bhikkhunisaṅghassa vihesikā aññamaññissā vajjappaṭicchādikā, viviccathāyye, vivekaññeva bhaginīnaṃ saṅgho vaṇṇetī’’’ti, sā bhikkhunī bhikkhunīhi evamassa vacanīyā ‘‘māyye, evaṃ avaca, saṃsaṭṭhāva ayye tumhe viharatha, mā tumhe nānā viharittha, santi saṅghe aññāpi bhikkhuniyo evācārā evaṃsaddā evaṃsilokā bhikkhunisaṅghassa vihesikā aññamaññissā vajjappaṭicchādikā, tā saṅgho na kiñci āha, tumhaññeva saṅgho uññāya paribhavena akkhantiyā vebhassiyā dubbalyā evamāha – ‘bhaginiyo kho saṃsaṭṭhā viharanti pāpācārā pāpasaddā pāpasilokā bhikkhunisaṅghassa vihesikā aññamaññissā vajjappaṭicchādikā, viviccathāyye, vivekaññeva bhaginīnaṃ saṅgho vaṇṇetī’’’ti, evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṃ samanubhāsitabbā tassa paṭinissaggāya, yāvatatiyañce samanubhāsiyamānā taṃ paṭinissajjeyya, iccetaṃ kusalaṃ, no ce paṭinissajjeyya, ayampi bhikkhunī yāvatatiyakaṃ dhammaṃ āpannā nissāraṇīyaṃ saṅghādisesaṃ.

    ಸಙ್ಘಭೇದಕಸಿಕ್ಖಾಪದಂ

    Saṅghabhedakasikkhāpadaṃ

    ೧೪. ಯಾ ಪನ ಭಿಕ್ಖುನೀ ಸಮಗ್ಗಸ್ಸ ಸಙ್ಘಸ್ಸ ಭೇದಾಯ ಪರಕ್ಕಮೇಯ್ಯ, ಭೇದನಸಂವತ್ತನಿಕಂ ವಾ ಅಧಿಕರಣಂ ಸಮಾದಾಯ ಪಗ್ಗಯ್ಹ ತಿಟ್ಠೇಯ್ಯ, ಸಾ ಭಿಕ್ಖುನೀ ಭಿಕ್ಖುನೀಹಿ ಏವಮಸ್ಸ ವಚನೀಯಾ ‘‘ಮಾಯ್ಯಾ, ಸಮಗ್ಗಸ್ಸ ಸಙ್ಘಸ್ಸ ಭೇದಾಯ ಪರಕ್ಕಮಿ, ಭೇದನಸಂವತ್ತನಿಕಂ ವಾ ಅಧಿಕರಣಂ ಸಮಾದಾಯ ಪಗ್ಗಯ್ಹ ಅಟ್ಠಾಸಿ, ಸಮೇತಾಯ್ಯಾ, ಸಙ್ಘೇನ, ಸಮಗ್ಗೋ ಹಿ ಸಙ್ಘೋ ಸಮ್ಮೋದಮಾನೋ ಅವಿವದಮಾನೋ ಏಕುದ್ದೇಸೋ ಫಾಸು ವಿಹರತೀ’’ತಿ। ಏವಞ್ಚ ಸಾ ಭಿಕ್ಖುನೀ ಭಿಕ್ಖುನೀಹಿ ವುಚ್ಚಮಾನಾ ತಥೇವ ಪಗ್ಗಣ್ಹೇಯ್ಯ, ಸಾ ಭಿಕ್ಖುನೀ ಭಿಕ್ಖುನೀಹಿ ಯಾವತತಿಯಂ ಸಮನುಭಾಸಿತಬ್ಬಾ ತಸ್ಸ ಪಟಿನಿಸ್ಸಗ್ಗಾಯ, ಯಾವತತಿಯಞ್ಚೇ ಸಮನುಭಾಸಿಯಮಾನಾ ತಂ ಪಟಿನಿಸ್ಸಜ್ಜೇಯ್ಯ, ಇಚ್ಚೇತಂ ಕುಸಲಂ। ನೋ ಚೇ ಪಟಿನಿಸ್ಸಜ್ಜೇಯ್ಯ, ಅಯಮ್ಪಿ ಭಿಕ್ಖುನೀ ಯಾವತತಿಯಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸಂ।

    14. Yā pana bhikkhunī samaggassa saṅghassa bhedāya parakkameyya, bhedanasaṃvattanikaṃ vā adhikaraṇaṃ samādāya paggayha tiṭṭheyya, sā bhikkhunī bhikkhunīhi evamassa vacanīyā ‘‘māyyā, samaggassa saṅghassa bhedāya parakkami, bhedanasaṃvattanikaṃ vā adhikaraṇaṃ samādāya paggayha aṭṭhāsi, sametāyyā, saṅghena, samaggo hi saṅgho sammodamāno avivadamāno ekuddeso phāsu viharatī’’ti. Evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṃ samanubhāsitabbā tassa paṭinissaggāya, yāvatatiyañce samanubhāsiyamānā taṃ paṭinissajjeyya, iccetaṃ kusalaṃ. No ce paṭinissajjeyya, ayampi bhikkhunī yāvatatiyakaṃ dhammaṃ āpannā nissāraṇīyaṃ saṅghādisesaṃ.

    ಭೇದಾನುವತ್ತಕಸಿಕ್ಖಾಪದಂ

    Bhedānuvattakasikkhāpadaṃ

    ೧೫. ತಸ್ಸಾಯೇವ ಖೋ ಪನ ಭಿಕ್ಖುನಿಯಾ ಭಿಕ್ಖುನಿಯೋ ಹೋನ್ತಿ ಅನುವತ್ತಿಕಾ ವಗ್ಗವಾದಿಕಾ ಏಕಾ ವಾ ದ್ವೇ ವಾ ತಿಸ್ಸೋ ವಾ, ತಾ ಏವಂ ವದೇಯ್ಯುಂ ‘‘ಮಾಯ್ಯಾಯೋ, ಏತಂ ಭಿಕ್ಖುನಿಂ ಕಿಞ್ಚಿ ಅವಚುತ್ಥ ಧಮ್ಮವಾದಿನೀ ಚೇಸಾ ಭಿಕ್ಖುನೀ, ವಿನಯವಾದಿನೀ ಚೇಸಾ ಭಿಕ್ಖುನೀ, ಅಮ್ಹಾಕಞ್ಚೇಸಾ ಭಿಕ್ಖುನೀ ಛನ್ದಞ್ಚ ರುಚಿಞ್ಚ ಆದಾಯ ವೋಹರತಿ, ಜಾನಾತಿ, ನೋ ಭಾಸತಿ, ಅಮ್ಹಾಕಮ್ಪೇತಂ ಖಮತೀ’’ತಿ, ತಾ ಭಿಕ್ಖುನಿಯೋ ಭಿಕ್ಖುನೀಹಿ ಏವಮಸ್ಸು ವಚನೀಯಾ ‘‘ಮಾಯ್ಯಾಯೋ, ಏವಂ ಅವಚುತ್ಥ, ನ ಚೇಸಾ ಭಿಕ್ಖುನೀ ಧಮ್ಮವಾದಿನೀ, ನ ಚೇಸಾ ಭಿಕ್ಖುನೀ ವಿನಯವಾದಿನೀ, ಮಾಯ್ಯಾನಮ್ಪಿ ಸಙ್ಘಭೇದೋ ರುಚ್ಚಿತ್ಥ, ಸಮೇತಾಯ್ಯಾನಂ ಸಙ್ಘೇನ, ಸಮಗ್ಗೋ ಹಿ ಸಙ್ಘೋ ಸಮ್ಮೋದಮಾನೋ ಅವಿವದಮಾನೋ ಏಕುದ್ದೇಸೋ ಫಾಸು ವಿಹರತೀ’’ತಿ, ಏವಞ್ಚ ತಾ ಭಿಕ್ಖುನಿಯೋ ಭಿಕ್ಖುನೀಹಿ ವುಚ್ಚಮಾನಾ ತಥೇವ ಪಗ್ಗಣ್ಹೇಯ್ಯುಂ, ತಾ ಭಿಕ್ಖುನಿಯೋ ಭಿಕ್ಖುನೀಹಿ ಯಾವತತಿಯಂ ಸಮನುಭಾಸಿತಬ್ಬಾ ತಸ್ಸ ಪಟಿನಿಸ್ಸಗ್ಗಾಯ, ಯಾವತತಿಯಞ್ಚೇ ಸಮನುಭಾಸಿಯಮಾನಾ ತಂ ಪಟಿನಿಸ್ಸಜ್ಜೇಯ್ಯುಂ। ಇಚ್ಚೇತಂ ಕುಸಲಂ। ನೋ ಚೇ ಪಟಿನಿಸ್ಸಜ್ಜೇಯ್ಯುಂ, ಇಮಾಪಿ ಭಿಕ್ಖುನಿಯೋ ಯಾವತತಿಯಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸಂ।

    15. Tassāyeva kho pana bhikkhuniyā bhikkhuniyo honti anuvattikā vaggavādikā ekā vā dve vā tisso vā, tā evaṃ vadeyyuṃ ‘‘māyyāyo, etaṃ bhikkhuniṃ kiñci avacuttha dhammavādinī cesā bhikkhunī, vinayavādinī cesā bhikkhunī, amhākañcesā bhikkhunī chandañca ruciñca ādāya voharati, jānāti, no bhāsati, amhākampetaṃ khamatī’’ti, tā bhikkhuniyo bhikkhunīhi evamassu vacanīyā ‘‘māyyāyo, evaṃ avacuttha, na cesā bhikkhunī dhammavādinī, na cesā bhikkhunī vinayavādinī, māyyānampi saṅghabhedo ruccittha, sametāyyānaṃ saṅghena, samaggo hi saṅgho sammodamāno avivadamāno ekuddeso phāsu viharatī’’ti, evañca tā bhikkhuniyo bhikkhunīhi vuccamānā tatheva paggaṇheyyuṃ, tā bhikkhuniyo bhikkhunīhi yāvatatiyaṃ samanubhāsitabbā tassa paṭinissaggāya, yāvatatiyañce samanubhāsiyamānā taṃ paṭinissajjeyyuṃ. Iccetaṃ kusalaṃ. No ce paṭinissajjeyyuṃ, imāpi bhikkhuniyo yāvatatiyakaṃ dhammaṃ āpannā nissāraṇīyaṃ saṅghādisesaṃ.

    ದುಬ್ಬಚಸಿಕ್ಖಾಪದಂ

    Dubbacasikkhāpadaṃ

    ೧೬. ಭಿಕ್ಖುನೀ ಪನೇವ ದುಬ್ಬಚಜಾತಿಕಾ ಹೋತಿ ಉದ್ದೇಸಪರಿಯಾಪನ್ನೇಸು ಸಿಕ್ಖಾಪದೇಸು ಭಿಕ್ಖುನೀಹಿ ಸಹಧಮ್ಮಿಕಂ ವುಚ್ಚಮಾನಾ ಅತ್ತಾನಂ ಅವಚನೀಯಂ ಕರೋತಿ ‘‘ಮಾ ಮಂ ಅಯ್ಯಾಯೋ ಕಿಞ್ಚಿ ಅವಚುತ್ಥ ಕಲ್ಯಾಣಂ ವಾ ಪಾಪಕಂ ವಾ, ಅಹಮ್ಪಾಯ್ಯಾಯೋ, ನ ಕಿಞ್ಚಿ ವಕ್ಖಾಮಿ ಕಲ್ಯಾಣಂ ವಾ ಪಾಪಕಂ ವಾ, ವಿರಮಥಾಯ್ಯಾಯೋ, ಮಮ ವಚನಾಯಾ’’ತಿ, ಸಾ ಭಿಕ್ಖುನೀ ಭಿಕ್ಖುನೀಹಿ ಏವಮಸ್ಸ ವಚನೀಯಾ ‘‘ಮಾಯ್ಯಾ, ಅತ್ತಾನಂ ಅವಚನೀಯಂ ಅಕಾಸಿ, ವಚನೀಯಮೇವ, ಅಯ್ಯಾ, ಅತ್ತಾನಂ ಕರೋತು, ಅಯ್ಯಾಪಿ ಭಿಕ್ಖುನಿಯೋ ವದತು ಸಹಧಮ್ಮೇನ, ಭಿಕ್ಖುನಿಯೋಪಿ ಅಯ್ಯಂ ವಕ್ಖನ್ತಿ ಸಹಧಮ್ಮೇನ, ಏವಂ ಸಂವದ್ಧಾ ಹಿ ತಸ್ಸ ಭಗವತೋ ಪರಿಸಾ ಯದಿದಂ ಅಞ್ಞಮಞ್ಞವಚನೇನ ಅಞ್ಞಮಞ್ಞವುಟ್ಠಾಪನೇನಾ’’ತಿ। ಏವಞ್ಚ ಸಾ ಭಿಕ್ಖುನೀ ಭಿಕ್ಖುನೀಹಿ ವುಚ್ಚಮಾನಾ ತಥೇವ ಪಗ್ಗಣ್ಹೇಯ್ಯ, ಸಾ ಭಿಕ್ಖುನೀ ಭಿಕ್ಖುನೀಹಿ ಯಾವತತಿಯಂ ಸಮನುಭಾಸಿತಬ್ಬಾ ತಸ್ಸ ಪಟಿನಿಸ್ಸಗ್ಗಾಯ, ಯಾವತತಿಯಞ್ಚೇ ಸಮನುಭಾಸಿಯಮಾನಾ ತಂ ಪಟಿನಿಸ್ಸಜ್ಜೇಯ್ಯ, ಇಚ್ಚೇತಂ ಕುಸಲಂ। ನೋ ಚೇ ಪಟಿನಿಸ್ಸಜ್ಜೇಯ್ಯ, ಅಯಮ್ಪಿ ಭಿಕ್ಖುನೀ ಯಾವತತಿಯಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸಂ।

    16. Bhikkhunī paneva dubbacajātikā hoti uddesapariyāpannesu sikkhāpadesu bhikkhunīhi sahadhammikaṃ vuccamānā attānaṃ avacanīyaṃ karoti ‘‘mā maṃ ayyāyo kiñci avacuttha kalyāṇaṃ vā pāpakaṃ vā, ahampāyyāyo, na kiñci vakkhāmi kalyāṇaṃ vā pāpakaṃ vā, viramathāyyāyo, mama vacanāyā’’ti, sā bhikkhunī bhikkhunīhi evamassa vacanīyā ‘‘māyyā, attānaṃ avacanīyaṃ akāsi, vacanīyameva, ayyā, attānaṃ karotu, ayyāpi bhikkhuniyo vadatu sahadhammena, bhikkhuniyopi ayyaṃ vakkhanti sahadhammena, evaṃ saṃvaddhā hi tassa bhagavato parisā yadidaṃ aññamaññavacanena aññamaññavuṭṭhāpanenā’’ti. Evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṃ samanubhāsitabbā tassa paṭinissaggāya, yāvatatiyañce samanubhāsiyamānā taṃ paṭinissajjeyya, iccetaṃ kusalaṃ. No ce paṭinissajjeyya, ayampi bhikkhunī yāvatatiyakaṃ dhammaṃ āpannā nissāraṇīyaṃ saṅghādisesaṃ.

    ಕುಲದೂಸಕಸಿಕ್ಖಾಪದಂ

    Kuladūsakasikkhāpadaṃ

    ೧೭. ಭಿಕ್ಖುನೀ ಪನೇವ ಅಞ್ಞತರಂ ಗಾಮಂ ವಾ ನಿಗಮಂ ವಾ ಉಪನಿಸ್ಸಾಯ ವಿಹರತಿ ಕುಲದೂಸಿಕಾ ಪಾಪಸಮಾಚಾರಾ, ತಸ್ಸಾ ಖೋ ಪಾಪಕಾ ಸಮಾಚಾರಾ ದಿಸ್ಸನ್ತಿ ಚೇವ ಸುಯ್ಯನ್ತಿ ಚ, ಕುಲಾನಿ ಚ ತಾಯ ದುಟ್ಠಾನಿ ದಿಸ್ಸನ್ತಿ ಚೇವ ಸುಯ್ಯನ್ತಿ ಚ, ಸಾ ಭಿಕ್ಖುನೀ ಭಿಕ್ಖುನೀಹಿ ಏವಮಸ್ಸ ವಚನೀಯಾ ‘‘ಅಯ್ಯಾ, ಖೋ ಕುಲದೂಸಿಕಾ ಪಾಪಸಮಾಚಾರಾ, ಅಯ್ಯಾಯ ಖೋ ಪಾಪಕಾ ಸಮಾಚಾರಾ ದಿಸ್ಸನ್ತಿ ಚೇವ ಸುಯ್ಯನ್ತಿ ಚ, ಕುಲಾನಿ ಚಾಯ್ಯಾಯ, ದುಟ್ಠಾನಿ ದಿಸ್ಸನ್ತಿ ಚೇವ ಸುಯ್ಯನ್ತಿ ಚ, ಪಕ್ಕಮತಾಯ್ಯಾ ಇಮಮ್ಹಾ ಆವಾಸಾ, ಅಲಂ ತೇ ಇಧ ವಾಸೇನಾ’’ತಿ। ಏವಞ್ಚ ಸಾ ಭಿಕ್ಖುನೀ ಭಿಕ್ಖುನೀಹಿ ವುಚ್ಚಮಾನಾ ತಾ ಭಿಕ್ಖುನಿಯೋ ಏವಂ ವದೇಯ್ಯ ‘‘ಛನ್ದಗಾಮಿನಿಯೋ ಚ ಭಿಕ್ಖುನಿಯೋ, ದೋಸಗಾಮಿನಿಯೋ ಚ ಭಿಕ್ಖುನಿಯೋ, ಮೋಹಗಾಮಿನಿಯೋ ಚ ಭಿಕ್ಖುನಿಯೋ, ಭಯಗಾಮಿನಿಯೋ ಚ ಭಿಕ್ಖುನಿಯೋ, ತಾದಿಸಿಕಾಯ ಆಪತ್ತಿಯಾ ಏಕಚ್ಚಂ ಪಬ್ಬಾಜೇನ್ತಿ ಏಕಚ್ಚಂ ನ ಪಬ್ಬಾಜೇನ್ತೀ’’ತಿ, ಸಾ ಭಿಕ್ಖುನೀ ಭಿಕ್ಖುನೀಹಿ ಏವಮಸ್ಸ ವಚನೀಯಾ ‘‘ಮಾಯ್ಯಾ, ಏವಂ ಅವಚ, ನ ಚ ಭಿಕ್ಖುನಿಯೋ ಛನ್ದಗಾಮಿನಿಯೋ, ನ ಚ ಭಿಕ್ಖುನಿಯೋ ದೋಸಗಾಮಿನಿಯೋ , ನ ಚ ಭಿಕ್ಖುನಿಯೋ ಮೋಹಗಾಮಿನಿಯೋ, ನ ಚ ಭಿಕ್ಖುನಿಯೋ ಭಯಗಾಮಿನಿಯೋ, ಅಯ್ಯಾ ಖೋ ಕುಲದೂಸಿಕಾ ಪಾಪಸಮಾಚಾರಾ, ಅಯ್ಯಾಯ ಖೋ ಪಾಪಕಾ ಸಮಾಚಾರಾ ದಿಸ್ಸನ್ತಿ ಚೇವ ಸುಯ್ಯನ್ತಿ ಚ, ಕುಲಾನಿ ಚಾಯ್ಯಾಯ ದುಟ್ಠಾನಿ ದಿಸ್ಸನ್ತಿ ಚೇವ ಸುಯ್ಯನ್ತಿ ಚ, ಪಕ್ಕಮತಾಯ್ಯಾ, ಇಮಮ್ಹಾ ಆವಾಸಾ ಅಲಂ ತೇ ಇಧ ವಾಸೇನಾ’’ತಿ। ಏವಞ್ಚ ಸಾ ಭಿಕ್ಖುನೀ ಭಿಕ್ಖುನೀಹಿ ವುಚ್ಚಮಾನಾ ತಥೇವ ಪಗ್ಗಣ್ಹೇಯ್ಯ, ಸಾ ಭಿಕ್ಖುನೀ ಭಿಕ್ಖುನೀಹಿ ಯಾವತತಿಯಂ ಸಮನುಭಾಸಿತಬ್ಬಾ ತಸ್ಸ ಪಟಿನಿಸ್ಸಗ್ಗಾಯ, ಯಾವತತಿಯಞ್ಚೇ ಸಮನುಭಾಸಿಯಮಾನಾ ತಂ ಪಟಿನಿಸ್ಸಜ್ಜೇಯ್ಯ, ಇಚ್ಚೇತಂ ಕುಸಲಂ। ನೋ ಚೇ ಪಟಿನಿಸ್ಸಜ್ಜೇಯ್ಯ, ಅಯಮ್ಪಿ ಭಿಕ್ಖುನೀ ಯಾವತತಿಯಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸಂ।

    17. Bhikkhunī paneva aññataraṃ gāmaṃ vā nigamaṃ vā upanissāya viharati kuladūsikā pāpasamācārā, tassā kho pāpakā samācārā dissanti ceva suyyanti ca, kulāni ca tāya duṭṭhāni dissanti ceva suyyanti ca, sā bhikkhunī bhikkhunīhi evamassa vacanīyā ‘‘ayyā, kho kuladūsikā pāpasamācārā, ayyāya kho pāpakā samācārā dissanti ceva suyyanti ca, kulāni cāyyāya, duṭṭhāni dissanti ceva suyyanti ca, pakkamatāyyā imamhā āvāsā, alaṃ te idha vāsenā’’ti. Evañca sā bhikkhunī bhikkhunīhi vuccamānā tā bhikkhuniyo evaṃ vadeyya ‘‘chandagāminiyo ca bhikkhuniyo, dosagāminiyo ca bhikkhuniyo, mohagāminiyo ca bhikkhuniyo, bhayagāminiyo ca bhikkhuniyo, tādisikāya āpattiyā ekaccaṃ pabbājenti ekaccaṃ na pabbājentī’’ti, sā bhikkhunī bhikkhunīhi evamassa vacanīyā ‘‘māyyā, evaṃ avaca, na ca bhikkhuniyo chandagāminiyo, na ca bhikkhuniyo dosagāminiyo , na ca bhikkhuniyo mohagāminiyo, na ca bhikkhuniyo bhayagāminiyo, ayyā kho kuladūsikā pāpasamācārā, ayyāya kho pāpakā samācārā dissanti ceva suyyanti ca, kulāni cāyyāya duṭṭhāni dissanti ceva suyyanti ca, pakkamatāyyā, imamhā āvāsā alaṃ te idha vāsenā’’ti. Evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṃ samanubhāsitabbā tassa paṭinissaggāya, yāvatatiyañce samanubhāsiyamānā taṃ paṭinissajjeyya, iccetaṃ kusalaṃ. No ce paṭinissajjeyya, ayampi bhikkhunī yāvatatiyakaṃ dhammaṃ āpannā nissāraṇīyaṃ saṅghādisesaṃ.

    ಉದ್ದಿಟ್ಠಾ ಖೋ ಅಯ್ಯಾಯೋ ಸತ್ತರಸ ಸಙ್ಘಾದಿಸೇಸಾ ಧಮ್ಮಾ ನವ ಪಠಮಾಪತ್ತಿಕಾ, ಅಟ್ಠ ಯಾವತತಿಯಕಾ,

    Uddiṭṭhā kho ayyāyo sattarasa saṅghādisesā dhammā nava paṭhamāpattikā, aṭṭha yāvatatiyakā,

    ಯೇಸಂ ಭಿಕ್ಖುನೀ ಅಞ್ಞತರಂ ವಾ ಅಞ್ಞತರಂ ವಾ ಆಪಜ್ಜತಿ, ತಾಯ ಭಿಕ್ಖುನಿಯಾ ಉಭತೋಸಙ್ಘೇ ಪಕ್ಖಮಾನತ್ತಂ ಚರಿತಬ್ಬಂ। ಚಿಣ್ಣಮಾನತ್ತಾ ಭಿಕ್ಖುನೀ ಯತ್ಥ ಸಿಯಾ ವೀಸತಿಗಣೋ ಭಿಕ್ಖುನಿಸಙ್ಘೋ, ತತ್ಥ ಸಾ ಭಿಕ್ಖುನೀ ಅಬ್ಭೇತಬ್ಬಾ। ಏಕಾಯಪಿ ಚೇ ಊನೋ ವೀಸತಿಗಣೋ ಭಿಕ್ಖುನಿಸಙ್ಘೋ ತಂ ಭಿಕ್ಖುನಿಂ ಅಬ್ಭೇಯ್ಯ, ಸಾ ಚ ಭಿಕ್ಖುನೀ ಅನಬ್ಭಿತಾ, ತಾ ಚ ಭಿಕ್ಖುನಿಯೋ ಗಾರಯ್ಹಾ, ಅಯಂ ತತ್ಥ ಸಾಮೀಚಿ। ತತ್ಥಾಯ್ಯಾಯೋ ಪುಚ್ಛಾಮಿ, ಕಚ್ಚಿತ್ಥ ಪರಿಸುದ್ಧಾ, ದುತಿಯಮ್ಪಿ, ಪುಚ್ಛಾಮಿ, ಕಚ್ಚಿತ್ಥ ಪರಿಸುದ್ಧಾ, ತತಿಯಮ್ಪಿ ಪುಚ್ಛಾಮಿ, ಕಚ್ಚಿತ್ಥ ಪರಿಸುದ್ಧಾ, ಪರಿಸುದ್ಧೇತ್ಥಾಯ್ಯಾಯೋ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀತಿ।

    Yesaṃ bhikkhunī aññataraṃ vā aññataraṃ vā āpajjati, tāya bhikkhuniyā ubhatosaṅghe pakkhamānattaṃ caritabbaṃ. Ciṇṇamānattā bhikkhunī yattha siyā vīsatigaṇo bhikkhunisaṅgho, tattha sā bhikkhunī abbhetabbā. Ekāyapi ce ūno vīsatigaṇo bhikkhunisaṅgho taṃ bhikkhuniṃ abbheyya, sā ca bhikkhunī anabbhitā, tā ca bhikkhuniyo gārayhā, ayaṃ tattha sāmīci. Tatthāyyāyo pucchāmi, kaccittha parisuddhā, dutiyampi, pucchāmi, kaccittha parisuddhā, tatiyampi pucchāmi, kaccittha parisuddhā, parisuddhetthāyyāyo, tasmā tuṇhī, evametaṃ dhārayāmīti.

    ಸಙ್ಘಾದಿಸೇಸೋ ನಿಟ್ಠಿತೋ।

    Saṅghādiseso niṭṭhito.

    ನಿಸ್ಸಗ್ಗಿಯ ಪಾಚಿತ್ತಿಯಾ

    Nissaggiya pācittiyā

    ಇಮೇ ಖೋ ಪನಾಯ್ಯಾಯೋ ತಿಂಸ ನಿಸ್ಸಗ್ಗಿಯಾ ಪಾಚಿತ್ತಿಯಾ

    Ime kho panāyyāyo tiṃsa nissaggiyā pācittiyā

    ಧಮ್ಮಾ ಉದ್ದೇಸಂ ಆಗಚ್ಛನ್ತಿ।

    Dhammā uddesaṃ āgacchanti.

    ಪತ್ತಸನ್ನಿಚಯಸಿಕ್ಖಾಪದಂ

    Pattasannicayasikkhāpadaṃ

    ೧. ಯಾ ಪನ ಭಿಕ್ಖುನೀ ಪತ್ತಸನ್ನಿಚಯಂ ಕರೇಯ್ಯ, ನಿಸ್ಸಗ್ಗಿಯಂ ಪಾಚಿತ್ತಿಯಂ।

    1. Yā pana bhikkhunī pattasannicayaṃ kareyya, nissaggiyaṃ pācittiyaṃ.

    ಅಕಾಲಚೀವರಭಾಜನಸಿಕ್ಖಾಪದಂ

    Akālacīvarabhājanasikkhāpadaṃ

    ೨. ಯಾ ಪನ ಭಿಕ್ಖುನೀ ಅಕಾಲಚೀವರಂ ‘‘ಕಾಲಚೀವರ’’ನ್ತಿ ಅಧಿಟ್ಠಹಿತ್ವಾ ಭಾಜಾಪೇಯ್ಯ, ನಿಸ್ಸಗ್ಗಿಯಂ ಪಾಚಿತ್ತಿಯಂ।

    2. Yā pana bhikkhunī akālacīvaraṃ ‘‘kālacīvara’’nti adhiṭṭhahitvā bhājāpeyya, nissaggiyaṃ pācittiyaṃ.

    ಚೀವರಪರಿವತ್ತನಸಿಕ್ಖಾಪದಂ

    Cīvaraparivattanasikkhāpadaṃ

    ೩. ಯಾ ಪನ ಭಿಕ್ಖುನೀ ಭಿಕ್ಖುನಿಯಾ ಸದ್ಧಿಂ ಚೀವರಂ ಪರಿವತ್ತೇತ್ವಾ ಸಾ ಪಚ್ಛಾ ಏವಂ ವದೇಯ್ಯ ‘‘ಹನ್ದಾಯ್ಯೇ, ತುಯ್ಹಂ ಚೀವರಂ, ಆಹರ ಮೇತಂ ಚೀವರಂ, ಯಂ ತುಯ್ಹಂ ತುಯ್ಹಮೇವೇತಂ, ಯಂ ಮಯ್ಹಂ ಮಯ್ಹಮೇವೇತಂ, ಆಹರ ಮೇತಂ ಚೀವರಂ, ಸಕಂ ಪಚ್ಚಾಹರಾ’’ತಿ ಅಚ್ಛಿನ್ದೇಯ್ಯ ವಾ ಅಚ್ಛಿನ್ದಾಪೇಯ್ಯ ವಾ, ನಿಸ್ಸಗ್ಗಿಯಂ ಪಾಚಿತ್ತಿಯಂ।

    3. Yā pana bhikkhunī bhikkhuniyā saddhiṃ cīvaraṃ parivattetvā sā pacchā evaṃ vadeyya ‘‘handāyye, tuyhaṃ cīvaraṃ, āhara metaṃ cīvaraṃ, yaṃ tuyhaṃ tuyhamevetaṃ, yaṃ mayhaṃ mayhamevetaṃ, āhara metaṃ cīvaraṃ, sakaṃ paccāharā’’ti acchindeyya vā acchindāpeyya vā, nissaggiyaṃ pācittiyaṃ.

    ಅಞ್ಞವಿಞ್ಞಾಪನಸಿಕ್ಖಾಪದಂ

    Aññaviññāpanasikkhāpadaṃ

    ೪. ಯಾ ಪನ ಭಿಕ್ಖುನೀ ಅಞ್ಞಂ ವಿಞ್ಞಾಪೇತ್ವಾ ಅಞ್ಞಂ ವಿಞ್ಞಾಪೇಯ್ಯ, ನಿಸ್ಸಗ್ಗಿಯಂ ಪಾಚಿತ್ತಿಯಂ।

    4. Yā pana bhikkhunī aññaṃ viññāpetvā aññaṃ viññāpeyya, nissaggiyaṃ pācittiyaṃ.

    ಅಞ್ಞಚೇತಾಪನ ಸಿಕ್ಖಾಪದಂ

    Aññacetāpana sikkhāpadaṃ

    ೫. ಯಾ ಪನ ಭಿಕ್ಖುನೀ ಅಞ್ಞಂ ಚೇತಾಪೇತ್ವಾ ಅಞ್ಞಂ ಚೇತಾಪೇಯ್ಯ, ನಿಸ್ಸಗ್ಗಿಯಂ ಪಾಚಿತ್ತಿಯಂ।

    5. Yā pana bhikkhunī aññaṃ cetāpetvā aññaṃ cetāpeyya, nissaggiyaṃ pācittiyaṃ.

    ಪಠಮಸಙ್ಘಿಕಚೇತಾಪನಸಿಕ್ಖಾಪದಂ

    Paṭhamasaṅghikacetāpanasikkhāpadaṃ

    ೬. ಯಾ ಪನ ಭಿಕ್ಖುನೀ ಅಞ್ಞದತ್ಥಿಕೇನ ಪರಿಕ್ಖಾರೇನ ಅಞ್ಞುದ್ದಿಸಿಕೇನ ಸಙ್ಘಿಕೇನ ಅಞ್ಞಂ ಚೇತಾಪೇಯ್ಯ, ನಿಸ್ಸಗ್ಗಿಯಂ ಪಾಚಿತ್ತಿಯಂ।

    6. Yā pana bhikkhunī aññadatthikena parikkhārena aññuddisikena saṅghikena aññaṃ cetāpeyya, nissaggiyaṃ pācittiyaṃ.

    ದುತಿಯಸಙ್ಘಿಕಚೇತಾಪನಸಿಕ್ಖಾಪದಂ

    Dutiyasaṅghikacetāpanasikkhāpadaṃ

    ೭. ಯಾ ಪನ ಭಿಕ್ಖುನೀ ಅಞ್ಞದತ್ಥಿಕೇನ ಪರಿಕ್ಖಾರೇನ ಅಞ್ಞುದ್ದಿಸಿಕೇನ ಸಙ್ಘಿಕೇನ ಸಞ್ಞಾಚಿಕೇನ ಅಞ್ಞಂ ಚೇತಾಪೇಯ್ಯ, ನಿಸ್ಸಗ್ಗಿಯಂ ಪಾಚಿತ್ತಿಯಂ।

    7. Yā pana bhikkhunī aññadatthikena parikkhārena aññuddisikena saṅghikena saññācikena aññaṃ cetāpeyya, nissaggiyaṃ pācittiyaṃ.

    ಪಠಮಗಣಿಕಚೇತಾಪನಸಿಕ್ಖಾಪದಂ

    Paṭhamagaṇikacetāpanasikkhāpadaṃ

    ೮. ಯಾ ಪನ ಭಿಕ್ಖುನೀ ಅಞ್ಞದತ್ಥಿಕೇನ ಪರಿಕ್ಖಾರೇನ ಅಞ್ಞುದ್ದಿಸಿಕೇನ ಮಹಾಜನಿಕೇನ ಅಞ್ಞಂ ಚೇತಾಪೇಯ್ಯ, ನಿಸ್ಸಗ್ಗಿಯಂ ಪಾಚಿತ್ತಿಯಂ।

    8. Yā pana bhikkhunī aññadatthikena parikkhārena aññuddisikena mahājanikena aññaṃ cetāpeyya, nissaggiyaṃ pācittiyaṃ.

    ದುತಿಯಗಣಿಕಚೇತಾಪನಸಿಕ್ಖಾಪದಂ

    Dutiyagaṇikacetāpanasikkhāpadaṃ

    ೯. ಯಾ ಪನ ಭಿಕ್ಖುನೀ ಅಞ್ಞದತ್ಥಿಕೇನ ಪರಿಕ್ಖಾರೇನ ಅಞ್ಞುದ್ದಿಸಿಕೇನ ಮಹಾಜನಿಕೇನ ಸಞ್ಞಾಚಿಕೇನ ಅಞ್ಞಂ ಚೇತಾಪೇಯ್ಯ, ನಿಸ್ಸಗ್ಗಿಯಂ ಪಾಚಿತ್ತಿಯಂ।

    9. Yā pana bhikkhunī aññadatthikena parikkhārena aññuddisikena mahājanikena saññācikena aññaṃ cetāpeyya, nissaggiyaṃ pācittiyaṃ.

    ಪುಗ್ಗಲಿಕಚೇತಾಪನಸಿಕ್ಖಾಪದಂ

    Puggalikacetāpanasikkhāpadaṃ

    ೧೦. ಯಾ ಪನ ಭಿಕ್ಖುನೀ ಅಞ್ಞದತ್ಥಿಕೇನ ಪರಿಕ್ಖಾರೇನ ಅಞ್ಞುದ್ದಿಸಿಕೇನ ಪುಗ್ಗಲಿಕೇನ ಸಞ್ಞಾಚಿಕೇನ ಅಞ್ಞಂ ಚೇತಾಪೇಯ್ಯ, ನಿಸ್ಸಗ್ಗಿಯಂ ಪಾಚಿತ್ತಿಯಂ।

    10. Yā pana bhikkhunī aññadatthikena parikkhārena aññuddisikena puggalikena saññācikena aññaṃ cetāpeyya, nissaggiyaṃ pācittiyaṃ.

    ಪತ್ತವಗ್ಗೋ ಪಠಮೋ।

    Pattavaggo paṭhamo.

    ಗರುಪಾವುರಣಸಿಕ್ಖಾಪದಂ

    Garupāvuraṇasikkhāpadaṃ

    ೧೧. ಗರುಪಾವುರಣಂ ಪನ ಭಿಕ್ಖುನಿಯಾ ಚೇತಾಪೇನ್ತಿಯಾ ಚತುಕ್ಕಂಸಪರಮಂ ಚೇತಾಪೇತಬ್ಬಂ। ತತೋ ಚೇ ಉತ್ತರಿ ಚೇತಾಪೇಯ್ಯ, ನಿಸ್ಸಗ್ಗಿಯಂ ಪಾಚಿತ್ತಿಯಂ।

    11. Garupāvuraṇaṃ pana bhikkhuniyā cetāpentiyā catukkaṃsaparamaṃ cetāpetabbaṃ. Tato ce uttari cetāpeyya, nissaggiyaṃ pācittiyaṃ.

    ಲಹುಪಾವುರಣಸಿಕ್ಖಾಪದಂ

    Lahupāvuraṇasikkhāpadaṃ

    ೧೨. ಲಹುಪಾವುರಣಂ ಪನ ಭಿಕ್ಖುನಿಯಾ ಚೇತಾಪೇನ್ತಿಯಾ ಅಡ್ಢತೇಯ್ಯಕಂಸಪರಮಂ ಚೇತಾಪೇತಬ್ಬಂ। ತತೋ ಚೇ ಉತ್ತರಿ ಚೇತಾಪೇಯ್ಯ, ನಿಸ್ಸಗ್ಗಿಯಂ ಪಾಚಿತ್ತಿಯಂ।

    12. Lahupāvuraṇaṃ pana bhikkhuniyā cetāpentiyā aḍḍhateyyakaṃsaparamaṃ cetāpetabbaṃ. Tato ce uttari cetāpeyya, nissaggiyaṃ pācittiyaṃ.

    ಕಥಿನಸಿಕ್ಖಾಪದಂ

    Kathinasikkhāpadaṃ

    ೧೩. ನಿಟ್ಠಿತಚೀವರಸ್ಮಿಂ ಭಿಕ್ಖುನಿಯಾ ಉಬ್ಭತಸ್ಮಿಂ ಕಥಿನೇ ದಸಾಹಪರಮಂ ಅತಿರೇಕಚೀವರಂ ಧಾರೇತಬ್ಬಂ। ತಂ ಅತಿಕ್ಕಾಮೇನ್ತಿಯಾ, ನಿಸ್ಸಗ್ಗಿಯಂ ಪಾಚಿತ್ತಿಯಂ।

    13. Niṭṭhitacīvarasmiṃ bhikkhuniyā ubbhatasmiṃ kathine dasāhaparamaṃ atirekacīvaraṃ dhāretabbaṃ. Taṃ atikkāmentiyā, nissaggiyaṃ pācittiyaṃ.

    ಉದೋಸಿತಸಿಕ್ಖಾಪದಂ

    Udositasikkhāpadaṃ

    ೧೪. ನಿಟ್ಠಿತಚೀವರಸ್ಮಿಂ ಭಿಕ್ಖುನಿಯಾ ಉಬ್ಭತಸ್ಮಿಂ ಕಥಿನೇ ಏಕರತ್ತಮ್ಪಿ ಚೇ ಭಿಕ್ಖುನೀ ತಿಚೀವರೇನ ವಿಪ್ಪವಸೇಯ್ಯ, ಅಞ್ಞತ್ರ ಭಿಕ್ಖುನಿಸಮ್ಮುತಿಯಾ ನಿಸ್ಸಗ್ಗಿಯಂ ಪಾಚಿತ್ತಿಯಂ।

    14. Niṭṭhitacīvarasmiṃ bhikkhuniyā ubbhatasmiṃ kathine ekarattampi ce bhikkhunī ticīvarena vippavaseyya, aññatra bhikkhunisammutiyā nissaggiyaṃ pācittiyaṃ.

    ಅಕಾಲಚೀವರಸಿಕ್ಖಾಪದಂ

    Akālacīvarasikkhāpadaṃ

    ೧೫. ನಿಟ್ಠಿತಚೀವರಸ್ಮಿಂ ಭಿಕ್ಖುನಿಯಾ ಉಬ್ಭತಸ್ಮಿಂ ಕಥಿನೇ ಭಿಕ್ಖುನಿಯಾ ಪನೇವ ಅಕಾಲಚೀವರಂ ಉಪ್ಪಜ್ಜೇಯ್ಯ, ಆಕಙ್ಖಮಾನಾಯ ಭಿಕ್ಖುನಿಯಾ ಪಟಿಗ್ಗಹೇತಬ್ಬಂ, ಪಟಿಗ್ಗಹೇತ್ವಾ ಖಿಪ್ಪಮೇವ ಕಾರೇತಬ್ಬಂ, ನೋ ಚಸ್ಸ ಪಾರಿಪೂರಿ, ಮಾಸಪರಮಂ ತಾಯ ಭಿಕ್ಖುನಿಯಾ ತಂ ಚೀವರಂ ನಿಕ್ಖಿಪಿತಬ್ಬಂ ಊನಸ್ಸ ಪಾರಿಪೂರಿಯಾ ಸತಿಯಾ ಪಚ್ಚಾಸಾಯ। ತತೋ ಚೇ ಉತ್ತರಿ ನಿಕ್ಖಿಪೇಯ್ಯ ಸತಿಯಾಪಿ ಪಚ್ಚಾಸಾಯ, ನಿಸ್ಸಗ್ಗಿಯಂ ಪಾಚಿತ್ತಿಯಂ।

    15. Niṭṭhitacīvarasmiṃ bhikkhuniyā ubbhatasmiṃ kathine bhikkhuniyā paneva akālacīvaraṃ uppajjeyya, ākaṅkhamānāya bhikkhuniyā paṭiggahetabbaṃ, paṭiggahetvā khippameva kāretabbaṃ, no cassa pāripūri, māsaparamaṃ tāya bhikkhuniyā taṃ cīvaraṃ nikkhipitabbaṃ ūnassa pāripūriyā satiyā paccāsāya. Tato ce uttari nikkhipeyya satiyāpi paccāsāya, nissaggiyaṃ pācittiyaṃ.

    ಅಞ್ಞಾತಕವಿಞ್ಞತ್ತಿಸಿಕ್ಖಾಪದಂ

    Aññātakaviññattisikkhāpadaṃ

    ೧೬. ಯಾ ಪನ ಭಿಕ್ಖುನೀ ಅಞ್ಞಾತಕಂ ಗಹಪತಿಂ ವಾ ಗಹಪತಾನಿಂ ವಾ ಚೀವರಂ ವಿಞ್ಞಾಪೇಯ್ಯ ಅಞ್ಞತ್ರ ಸಮಯಾ, ನಿಸ್ಸಗ್ಗಿಯಂ ಪಾಚಿತ್ತಿಯಂ। ತತ್ಥಾಯಂ ಸಮಯೋ ಅಚ್ಛಿನ್ನಚೀವರಾ ವಾ ಹೋತಿ ಭಿಕ್ಖುನೀ, ನಟ್ಠಚೀವರಾ ವಾ, ಅಯಂ ತತ್ಥ ಸಮಯೋ।

    16. Yā pana bhikkhunī aññātakaṃ gahapatiṃ vā gahapatāniṃ vā cīvaraṃ viññāpeyya aññatra samayā, nissaggiyaṃ pācittiyaṃ. Tatthāyaṃ samayo acchinnacīvarā vā hoti bhikkhunī, naṭṭhacīvarā vā, ayaṃ tattha samayo.

    ತತುತ್ತರಿಸಿಕ್ಖಾಪದಂ

    Tatuttarisikkhāpadaṃ

    ೧೭. ತಞ್ಚೇ ಅಞ್ಞಾತಕೋ ಗಹಪತಿ ವಾ ಗಹಪತಾನೀ ವಾ ಬಹೂಹಿ ಚೀವರೇಹಿ ಅಭಿಹಟ್ಠುಂ ಪವಾರೇಯ್ಯ, ಸನ್ತರುತ್ತರಪರಮಂ ತಾಯ ಭಿಕ್ಖುನಿಯಾ ತತೋ ಚೀವರಂ ಸಾದಿತಬ್ಬಂ। ತತೋ ಚೇ ಉತ್ತರಿ ಸಾದಿಯೇಯ್ಯ, ನಿಸ್ಸಗ್ಗಿಯಂ ಪಾಚಿತ್ತಿಯಂ।

    17. Tañce aññātako gahapati vā gahapatānī vā bahūhi cīvarehi abhihaṭṭhuṃ pavāreyya, santaruttaraparamaṃ tāya bhikkhuniyā tato cīvaraṃ sāditabbaṃ. Tato ce uttari sādiyeyya, nissaggiyaṃ pācittiyaṃ.

    ಪಠಮಉಪಕ್ಖಟಸಿಕ್ಖಾಪದಂ

    Paṭhamaupakkhaṭasikkhāpadaṃ

    ೧೮. ಭಿಕ್ಖುನಿಂ ಪನೇವ ಉದ್ದಿಸ್ಸ ಅಞ್ಞಾತಕಸ್ಸ ಗಹಪತಿಸ್ಸ ವಾ ಗಹಪತಾನಿಯಾ ವಾ ಚೀವರಚೇತಾಪನ್ನಂ ಉಪಕ್ಖಟಂ ಹೋತಿ ‘‘ಇಮಿನಾ ಚೀವರಚೇತಾಪನ್ನೇನ ಚೀವರಂ ಚೇತಾಪೇತ್ವಾ ಇತ್ಥನ್ನಾಮಂ ಭಿಕ್ಖುನಿಂ ಚೀವರೇನ ಅಚ್ಛಾದೇಸ್ಸಾಮೀ’’ತಿ। ತತ್ರ ಚೇಸಾ ಭಿಕ್ಖುನೀ ಪುಬ್ಬೇ ಅಪ್ಪವಾರಿತಾ ಉಪಸಙ್ಕಮಿತ್ವಾ ಚೀವರೇ ವಿಕಪ್ಪಂ ಆಪಜ್ಜೇಯ್ಯ ‘‘ಸಾಧು ವತ, ಮಂ ಆಯಸ್ಮಾ ಇಮಿನಾ ಚೀವರಚೇತಾಪನ್ನೇನ ಏವರೂಪಂ ವಾ ಏವರೂಪಂ ವಾ ಚೀವರಂ ಚೇತಾಪೇತ್ವಾ ಅಚ್ಛಾದೇಹೀ’’ತಿ ಕಲ್ಯಾಣಕಮ್ಯತಂ ಉಪಾದಾಯ, ನಿಸ್ಸಗ್ಗಿಯಂ ಪಾಚಿತ್ತಿಯಂ।

    18. Bhikkhuniṃ paneva uddissa aññātakassa gahapatissa vā gahapatāniyā vā cīvaracetāpannaṃ upakkhaṭaṃ hoti ‘‘iminā cīvaracetāpannena cīvaraṃ cetāpetvā itthannāmaṃ bhikkhuniṃ cīvarena acchādessāmī’’ti. Tatra cesā bhikkhunī pubbe appavāritā upasaṅkamitvā cīvare vikappaṃ āpajjeyya ‘‘sādhu vata, maṃ āyasmā iminā cīvaracetāpannena evarūpaṃ vā evarūpaṃ vā cīvaraṃ cetāpetvā acchādehī’’ti kalyāṇakamyataṃ upādāya, nissaggiyaṃ pācittiyaṃ.

    ದುತಿಯಉಪಕ್ಖಟಸಿಕ್ಖಾಪದಂ

    Dutiyaupakkhaṭasikkhāpadaṃ

    ೧೯. ಭಿಕ್ಖುನಿಂ ಪನೇವ ಉದ್ದಿಸ್ಸ ಉಭಿನ್ನಂ ಅಞ್ಞಾತಕಾನಂ ಗಹಪತೀನಂ ವಾ ಗಹಪತಾನೀನಂ ವಾ ಪಚ್ಚೇಕಚೀವರಚೇತಾಪನ್ನಾನಿ ಉಪಕ್ಖಟಾನಿ ಹೋನ್ತಿ ‘‘ಇಮೇಹಿ ಮಯಂ ಪಚ್ಚೇಕಚೀವರಚೇತಾಪನ್ನೇಹಿ ಪಚ್ಚೇಕಚೀವರಾನಿ ಚೇತಾಪೇತ್ವಾ ಇತ್ಥನ್ನಾಮಂ ಭಿಕ್ಖುನಿಂ ಚೀವರೇಹಿ ಅಚ್ಛಾದೇಸ್ಸಾಮಾ’’ತಿ। ತತ್ರ ಚೇಸಾ ಭಿಕ್ಖೂನೀ ಪುಬ್ಬೇ ಅಪ್ಪವಾರಿತಾ ಉಪಸಙ್ಕಮಿತ್ವಾ ಚೀವರೇ ವಿಕಪ್ಪಂ ಆಪಜ್ಜೇಯ್ಯ ‘‘ಸಾಧು ವತ ಮಂ ಆಯಸ್ಮನ್ತೋ ಇಮೇಹಿ ಪಚ್ಚೇಕಚೀವರಚೇತಾಪನ್ನೇಹಿ ಏವರೂಪಂ ವಾ ಏವರೂಪಂ ವಾ ಚೀವರಂ ಚೇತಾಪೇತ್ವಾ ಅಚ್ಛಾದೇಥ ಉಭೋವ ಸನ್ತಾ ಏಕೇನಾ’’ತಿ ಕಲ್ಯಾಣಕಮ್ಯತಂ ಉಪಾದಾಯ, ನಿಸ್ಸಗ್ಗಿಯಂ ಪಾಚಿತ್ತಿಯಂ।

    19. Bhikkhuniṃ paneva uddissa ubhinnaṃ aññātakānaṃ gahapatīnaṃ vā gahapatānīnaṃ vā paccekacīvaracetāpannāni upakkhaṭāni honti ‘‘imehi mayaṃ paccekacīvaracetāpannehi paccekacīvarāni cetāpetvā itthannāmaṃ bhikkhuniṃ cīvarehi acchādessāmā’’ti. Tatra cesā bhikkhūnī pubbe appavāritā upasaṅkamitvā cīvare vikappaṃ āpajjeyya ‘‘sādhu vata maṃ āyasmanto imehi paccekacīvaracetāpannehi evarūpaṃ vā evarūpaṃ vā cīvaraṃ cetāpetvā acchādetha ubhova santā ekenā’’ti kalyāṇakamyataṃ upādāya, nissaggiyaṃ pācittiyaṃ.

    ರಾಜಸಿಕ್ಖಾಪದಂ

    Rājasikkhāpadaṃ

    ೨೦. ಭಿಕ್ಖುನಿಂ ಪನೇವ ಉದ್ದಿಸ್ಸ ರಾಜಾ ವಾ ರಾಜಭೋಗ್ಗೋ ವಾ ಬ್ರಾಹ್ಮಣೋ ವಾ ಗಹಪತಿಕೋ ವಾ ದೂತೇನ ಚೀವರಚೇತಾಪನ್ನಂ ಪಹಿಣೇಯ್ಯ ‘‘ಇಮಿನಾ ಚೀವರಚೇತಾಪನ್ನೇನ ಚೀವರಂ ಚೇತಾಪೇತ್ವಾ ಇತ್ಥನ್ನಾಮಂ ಭಿಕ್ಖುನಿಂ ಚೀವರೇನ ಅಚ್ಛಾದೇಹೀ’’ತಿ। ಸೋ ಚೇ ದೂತೋ ತಂ ಭಿಕ್ಖುನಿಂ ಉಪಸಙ್ಕಮಿತ್ವಾ ಏವಂ ವದೇಯ್ಯ ‘‘ಇದಂ ಖೋ, ಅಯ್ಯೇ, ಅಯ್ಯಂ ಉದ್ದಿಸ್ಸ ಚೀವರಚೇತಾಪನ್ನಂ ಆಭತಂ, ಪಟಿಗ್ಗಣ್ಹಾತಾಯ್ಯಾ ಚೀವರಚೇತಾಪನ್ನ’’ನ್ತಿ। ತಾಯ ಭಿಕ್ಖುನಿಯಾ ಸೋ ದೂತೋ ಏವಮಸ್ಸ ವಚನೀಯೋ ‘‘ನ ಖೋ ಮಯಂ, ಆವುಸೋ, ಚೀವರಚೇತಾಪನ್ನಂ ಪಟಿಗ್ಗಣ್ಹಾಮ, ಚೀವರಞ್ಚ ಖೋ ಮಯಂ ಪಟಿಗ್ಗಣ್ಹಾಮ ಕಾಲೇನ ಕಪ್ಪಿಯ’’ನ್ತಿ। ಸೋ ಚೇ ದೂತೋ ತಂ ಭಿಕ್ಖುನಿಂ ಏವಂ ವದೇಯ್ಯ ‘‘ಅತ್ಥಿ ಪನಾಯ್ಯಾಯ, ಕೋಚಿ ವೇಯ್ಯಾವಚ್ಚಕರೋ’’ತಿ, ಚೀವರತ್ಥಿಕಾಯ, ಭಿಕ್ಖವೇ, ಭಿಕ್ಖುನಿಯಾ ವೇಯ್ಯಾವಚ್ಚಕರೋ ನಿದ್ದಿಸಿತಬ್ಬೋ ಆರಾಮಿಕೋ ವಾ ಉಪಾಸಕೋ ವಾ ‘‘ಏಸೋ ಖೋ, ಆವುಸೋ, ಭಿಕ್ಖುನೀನಂ ವೇಯ್ಯಾವಚ್ಚಕರೋ’’ತಿ। ಸೋ ಚೇ ದೂತೋ ತಂ ವೇಯ್ಯಾವಚ್ಚಕರಂ ಸಞ್ಞಾಪೇತ್ವಾ ತಂ ಭಿಕ್ಖುನಿಂ ಉಪಸಙ್ಕಮಿತ್ವಾ ಏವಂ ವದೇಯ್ಯ ‘‘ಯಂ ಖೋ, ಅಯ್ಯೇ, ಅಯ್ಯಾ ವೇಯ್ಯಾವಚ್ಚಕರಂ ನಿದ್ದಿಸಿ, ಸಞ್ಞತ್ತೋ ಸೋ ಮಯಾ, ಉಪಸಙ್ಕಮತಾಯ್ಯಾ ಕಾಲೇನ, ಚೀವರೇನ ತಂ ಅಚ್ಛಾದೇಸ್ಸತೀ’’ತಿ। ಚೀವರತ್ಥಿಕಾಯ, ಭಿಕ್ಖವೇ, ಭಿಕ್ಖುನಿಯಾ ವೇಯ್ಯಾವಚ್ಚಕರೋ ಉಪಸಙ್ಕಮಿತ್ವಾ ದ್ವತ್ತಿಕ್ಖತ್ತುಂ ಚೋದೇತಬ್ಬೋ ಸಾರೇತಬ್ಬೋ ‘‘ಅತ್ಥೋ ಮೇ, ಆವುಸೋ, ಚೀವರೇನಾ’’ತಿ, ದ್ವತ್ತಿಕ್ಖತ್ತುಂ ಚೋದಯಮಾನಾ ಸಾರಯಮಾನಾ ತಂ ಚೀವರಂ ಅಭಿನಿಪ್ಫಾದೇಯ್ಯ, ಇಚ್ಚೇತಂ ಕುಸಲಂ, ನೋ ಚೇ ಅಭಿನಿಪ್ಫಾದೇಯ್ಯ, ಚತುಕ್ಖತ್ತುಂ ಪಞ್ಚಕ್ಖತ್ತುಂ ಛಕ್ಖತ್ತುಪರಮಂ ತುಣ್ಹೀಭೂತಾಯ ಉದ್ದಿಸ್ಸ ಠಾತಬ್ಬಂ, ಚತುಕ್ಖತ್ತುಂ ಪಞ್ಚಕ್ಖತ್ತುಂ ಛಕ್ಖತ್ತುಪರಮಂ ತುಣ್ಹೀಭೂತಾ ಉದ್ದಿಸ್ಸ ತಿಟ್ಠಮಾನಾ ತಂ ಚೀವರಂ ಅಭಿನಿಪ್ಫಾದೇಯ್ಯ, ಇಚ್ಚೇತಂ ಕುಸಲಂ। ತತೋ ಚೇ ಉತ್ತರಿ ವಾಯಮಮಾನಾ ತಂ ಚೀವರಂ ಅಭಿನಿಪ್ಫಾದೇಯ್ಯ, ನಿಸ್ಸಗ್ಗಿಯಂ ಪಾಚಿತ್ತಿಯಂ। ನೋ ಚೇ ಅಭಿನಿಪ್ಫಾದೇಯ್ಯ, ಯತಸ್ಸಾ ಚೀವರಚೇತಾಪನ್ನಂ ಆಭತಂ, ತತ್ಥ ಸಾಮಂ ವಾ ಗನ್ತಬ್ಬಂ, ದೂತೋ ವಾ ಪಾಹೇತಬ್ಬೋ ‘‘ಯಂ ಖೋ ತುಮ್ಹೇ ಆಯಸ್ಮನ್ತೋ ಭಿಕ್ಖುನಿಂ ಉದ್ದಿಸ್ಸ ಚೀವರಚೇತಾಪನ್ನಂ ಪಹಿಣಿತ್ಥ, ನ ತಂ ತಸ್ಸಾ ಭಿಕ್ಖುನಿಯಾ ಕಿಞ್ಚಿ ಅತ್ಥಂ ಅನುಭೋತಿ, ಯುಞ್ಜನ್ತಾಯಸ್ಮನ್ತೋ ಸಕಂ, ಮಾ ವೋ ಸಕಂ ವಿನಸ್ಸಾ’’ತಿ, ಅಯಂ ತತ್ಥ ಸಾಮೀಚಿ।

    20. Bhikkhuniṃ paneva uddissa rājā vā rājabhoggo vā brāhmaṇo vā gahapatiko vā dūtena cīvaracetāpannaṃ pahiṇeyya ‘‘iminā cīvaracetāpannena cīvaraṃ cetāpetvā itthannāmaṃ bhikkhuniṃ cīvarena acchādehī’’ti. So ce dūto taṃ bhikkhuniṃ upasaṅkamitvā evaṃ vadeyya ‘‘idaṃ kho, ayye, ayyaṃ uddissa cīvaracetāpannaṃ ābhataṃ, paṭiggaṇhātāyyā cīvaracetāpanna’’nti. Tāya bhikkhuniyā so dūto evamassa vacanīyo ‘‘na kho mayaṃ, āvuso, cīvaracetāpannaṃ paṭiggaṇhāma, cīvarañca kho mayaṃ paṭiggaṇhāma kālena kappiya’’nti. So ce dūto taṃ bhikkhuniṃ evaṃ vadeyya ‘‘atthi panāyyāya, koci veyyāvaccakaro’’ti, cīvaratthikāya, bhikkhave, bhikkhuniyā veyyāvaccakaro niddisitabbo ārāmiko vā upāsako vā ‘‘eso kho, āvuso, bhikkhunīnaṃ veyyāvaccakaro’’ti. So ce dūto taṃ veyyāvaccakaraṃ saññāpetvā taṃ bhikkhuniṃ upasaṅkamitvā evaṃ vadeyya ‘‘yaṃ kho, ayye, ayyā veyyāvaccakaraṃ niddisi, saññatto so mayā, upasaṅkamatāyyā kālena, cīvarena taṃ acchādessatī’’ti. Cīvaratthikāya, bhikkhave, bhikkhuniyā veyyāvaccakaro upasaṅkamitvā dvattikkhattuṃ codetabbo sāretabbo ‘‘attho me, āvuso, cīvarenā’’ti, dvattikkhattuṃ codayamānā sārayamānā taṃ cīvaraṃ abhinipphādeyya, iccetaṃ kusalaṃ, no ce abhinipphādeyya, catukkhattuṃ pañcakkhattuṃ chakkhattuparamaṃ tuṇhībhūtāya uddissa ṭhātabbaṃ, catukkhattuṃ pañcakkhattuṃ chakkhattuparamaṃ tuṇhībhūtā uddissa tiṭṭhamānā taṃ cīvaraṃ abhinipphādeyya, iccetaṃ kusalaṃ. Tato ce uttari vāyamamānā taṃ cīvaraṃ abhinipphādeyya, nissaggiyaṃ pācittiyaṃ. No ce abhinipphādeyya, yatassā cīvaracetāpannaṃ ābhataṃ, tattha sāmaṃ vā gantabbaṃ, dūto vā pāhetabbo ‘‘yaṃ kho tumhe āyasmanto bhikkhuniṃ uddissa cīvaracetāpannaṃ pahiṇittha, na taṃ tassā bhikkhuniyā kiñci atthaṃ anubhoti, yuñjantāyasmanto sakaṃ, mā vo sakaṃ vinassā’’ti, ayaṃ tattha sāmīci.

    ಚೀವರವಗ್ಗೋ ದುತಿಯೋ।

    Cīvaravaggo dutiyo.

    ರೂಪಿಯಸಿಕ್ಖಾಪದಂ

    Rūpiyasikkhāpadaṃ

    ೨೧. ಯಾ ಪನ ಭಿಕ್ಖುನೀ ಜಾತರೂಪರಜತಂ ಉಗ್ಗಣ್ಹೇಯ್ಯ ವಾ ಉಗ್ಗಣ್ಹಾಪೇಯ್ಯ ವಾ ಉಪನಿಕ್ಖಿತ್ತಂ ವಾ ಸಾದಿಯೇಯ್ಯ, ನಿಸ್ಸಗ್ಗಿಯಂ ಪಾಚಿತ್ತಿಯಂ।

    21. Yā pana bhikkhunī jātarūparajataṃ uggaṇheyya vā uggaṇhāpeyya vā upanikkhittaṃ vā sādiyeyya, nissaggiyaṃ pācittiyaṃ.

    ರೂಪಿಯಸಂವೋಹಾರಸಿಕ್ಖಾಪದಂ

    Rūpiyasaṃvohārasikkhāpadaṃ

    ೨೨. ಯಾ ಪನ ಭಿಕ್ಖುನೀ ನಾನಪ್ಪಕಾರಕಂ ರೂಪಿಯಸಂವೋಹಾರಂ ಸಮಾಪಜ್ಜೇಯ್ಯ, ನಿಸ್ಸಗ್ಗಿಯಂ ಪಾಚಿತ್ತಿಯಂ।

    22. Yā pana bhikkhunī nānappakārakaṃ rūpiyasaṃvohāraṃ samāpajjeyya, nissaggiyaṃ pācittiyaṃ.

    ಕಯವಿಕ್ಕಯಸಿಕ್ಖಾಪದಂ

    Kayavikkayasikkhāpadaṃ

    ೨೩. ಯಾ ಪನ ಭಿಕ್ಖುನೀ ನಾನಪ್ಪಕಾರಕಂ ಕಯವಿಕ್ಕಯಂ ಸಮಾಪಜ್ಜೇಯ್ಯ, ನಿಸ್ಸಗ್ಗಿಯಂ ಪಾಚಿತ್ತಿಯಂ।

    23. Yā pana bhikkhunī nānappakārakaṃ kayavikkayaṃ samāpajjeyya, nissaggiyaṃ pācittiyaṃ.

    ಊನಪಞ್ಚಬನ್ಧನಸಿಕ್ಖಾಪದಂ

    Ūnapañcabandhanasikkhāpadaṃ

    ೨೪. ಯಾ ಪನ ಭಿಕ್ಖುನೀ ಊನಪಞ್ಚಬನ್ಧನೇನ ಪತ್ತೇನ ಅಞ್ಞಂ ನವಂ ಪತ್ತಂ ಚೇತಾಪೇಯ್ಯ, ನಿಸ್ಸಗ್ಗಿಯಂ ಪಾಚಿತ್ತಿಯಂ। ತಾಯ ಭಿಕ್ಖುನಿಯಾ ಸೋ ಪತ್ತೋ ಭಿಕ್ಖುನಿಪರಿಸಾಯ ನಿಸ್ಸಜ್ಜಿತಬ್ಬೋ, ಯೋ ಚ ತಸ್ಸಾ ಭಿಕ್ಖುನಿಪರಿಸಾಯ ಪತ್ತಪರಿಯನ್ತೋ, ಸೋ ತಸ್ಸಾ ಭಿಕ್ಖುನಿಯಾ ಪದಾತಬ್ಬೋ ‘‘ಅಯಂ ತೇ ಭಿಕ್ಖುನಿ ಪತ್ತೋ ಯಾವಭೇದನಾಯ ಧಾರೇತಬ್ಬೋ’’ತಿ, ಅಯಂ ತತ್ಥ ಸಾಮೀಚಿ।

    24. Yā pana bhikkhunī ūnapañcabandhanena pattena aññaṃ navaṃ pattaṃ cetāpeyya, nissaggiyaṃ pācittiyaṃ. Tāya bhikkhuniyā so patto bhikkhuniparisāya nissajjitabbo, yo ca tassā bhikkhuniparisāya pattapariyanto, so tassā bhikkhuniyā padātabbo ‘‘ayaṃ te bhikkhuni patto yāvabhedanāya dhāretabbo’’ti, ayaṃ tattha sāmīci.

    ಭೇಸಜ್ಜಸಿಕ್ಖಾಪದಂ

    Bhesajjasikkhāpadaṃ

    ೨೫. ಯಾನಿ ಖೋ ಪನ ತಾನಿ ಗಿಲಾನಾನಂ ಭಿಕ್ಖುನೀನಂ ಪಟಿಸಾಯನೀಯಾನಿ ಭೇಸಜ್ಜಾನಿ, ಸೇಯ್ಯಥಿದಂ – ಸಪ್ಪಿ ನವನೀತಂ ತೇಲಂ ಮಧು ಫಾಣಿತಂ, ತಾನಿ ಪಟಿಗ್ಗಹೇತ್ವಾ ಸತ್ತಾಹಪರಮಂ ಸನ್ನಿಧಿಕಾರಕಂ ಪರಿಭುಞ್ಜಿತಬ್ಬಾನಿ। ತಂ ಅತಿಕ್ಕಾಮೇನ್ತಿಯಾ, ನಿಸ್ಸಗ್ಗಿಯಂ ಪಾಚಿತ್ತಿಯಂ।

    25. Yāni kho pana tāni gilānānaṃ bhikkhunīnaṃ paṭisāyanīyāni bhesajjāni, seyyathidaṃ – sappi navanītaṃ telaṃ madhu phāṇitaṃ, tāni paṭiggahetvā sattāhaparamaṃ sannidhikārakaṃ paribhuñjitabbāni. Taṃ atikkāmentiyā, nissaggiyaṃ pācittiyaṃ.

    ಚೀವರಅಚ್ಛಿನ್ದನಸಿಕ್ಖಾಪದಂ

    Cīvaraacchindanasikkhāpadaṃ

    ೨೬. ಯಾ ಪನ ಭಿಕ್ಖುನೀ ಭಿಕ್ಖುನಿಯಾ ಸಾಮಂ ಚೀವರಂ ದತ್ವಾ ಕುಪಿತಾ ಅನತ್ತಮನಾ ಅಚ್ಛಿನ್ದೇಯ್ಯ ವಾ ಅಚ್ಛಿನ್ದಾಪೇಯ್ಯ ವಾ, ನಿಸ್ಸಗ್ಗಿಯಂ ಪಾಚಿತ್ತಿಯಂ।

    26. Yā pana bhikkhunī bhikkhuniyā sāmaṃ cīvaraṃ datvā kupitā anattamanā acchindeyya vā acchindāpeyya vā, nissaggiyaṃ pācittiyaṃ.

    ಸುತ್ತವಿಞ್ಞತ್ತಿಸಿಕ್ಖಾಪದಂ

    Suttaviññattisikkhāpadaṃ

    ೨೭. ಯಾ ಪನ ಭಿಕ್ಖುನೀ ಸಾಮಂ ಸುತ್ತಂ ವಿಞ್ಞಾಪೇತ್ವಾ ತನ್ತವಾಯೇಹಿ ಚೀವರಂ ವಾಯಾಪೇಯ್ಯ, ನಿಸ್ಸಗ್ಗಿಯಂ ಪಾಚಿತ್ತಿಯಂ।

    27. Yā pana bhikkhunī sāmaṃ suttaṃ viññāpetvā tantavāyehi cīvaraṃ vāyāpeyya, nissaggiyaṃ pācittiyaṃ.

    ಮಹಾಪೇಸಕಾರಸಿಕ್ಖಾಪದಂ

    Mahāpesakārasikkhāpadaṃ

    ೨೮. ಭಿಕ್ಖುನಿಂ ಪನೇವ ಉದ್ದಿಸ್ಸ ಅಞ್ಞಾತಕೋ ಗಹಪತಿ ವಾ ಗಹಪತಾನೀ ವಾ ತನ್ತವಾಯೇಹಿ ಚೀವರಂ ವಾಯಾಪೇಯ್ಯ, ತತ್ರ ಚೇಸಾ ಭಿಕ್ಖುನೀ ಪುಬ್ಬೇ ಅಪ್ಪವಾರಿತಾ ತನ್ತವಾಯೇ ಉಪಸಙ್ಕಮಿತ್ವಾ ಚೀವರೇ ವಿಕಪ್ಪಂ ಆಪಜ್ಜೇಯ್ಯ ‘‘ಇದಂ ಖೋ ಆವುಸೋ ಚೀವರಂ ಮಂ ಉದ್ದಿಸ್ಸ ವಿಯ್ಯತಿ, ಆಯತಞ್ಚ ಕರೋಥ, ವಿತ್ಥತಞ್ಚ ಅಪ್ಪಿತಞ್ಚ ಸುವೀತಞ್ಚ ಸುಪ್ಪವಾಯಿತಞ್ಚ ಸುವಿಲೇಖಿತಞ್ಚ ಸುವಿತಚ್ಛಿತಞ್ಚ ಕರೋಥ, ಅಪ್ಪೇವ ನಾಮ ಮಯಮ್ಪಿ ಆಯಸ್ಮನ್ತಾನಂ ಕಿಞ್ಚಿಮತ್ತಂ ಅನುಪದಜ್ಜೇಯ್ಯಾಮಾ’’ತಿ, ಏವಞ್ಚ ಸಾ ಭಿಕ್ಖುನೀ ವತ್ವಾ ಕಿಞ್ಚಿಮತ್ತಂ ಅನುಪದಜ್ಜೇಯ್ಯ ಅನ್ತಮಸೋ ಪಿಣ್ಡಪಾತಮತ್ತಮ್ಪಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ।

    28. Bhikkhuniṃ paneva uddissa aññātako gahapati vā gahapatānī vā tantavāyehi cīvaraṃ vāyāpeyya, tatra cesā bhikkhunī pubbe appavāritā tantavāye upasaṅkamitvā cīvare vikappaṃ āpajjeyya ‘‘idaṃ kho āvuso cīvaraṃ maṃ uddissa viyyati, āyatañca karotha, vitthatañca appitañca suvītañca suppavāyitañca suvilekhitañca suvitacchitañca karotha, appeva nāma mayampi āyasmantānaṃ kiñcimattaṃ anupadajjeyyāmā’’ti, evañca sā bhikkhunī vatvā kiñcimattaṃ anupadajjeyya antamaso piṇḍapātamattampi, nissaggiyaṃ pācittiyaṃ.

    ಅಚ್ಚೇಕಚೀವರಸಿಕ್ಖಾಪದಂ

    Accekacīvarasikkhāpadaṃ

    ೨೯. ದಸಾಹಾನಾಗತಂ ಕತ್ತಿಕತೇಮಾಸಿಕಪುಣ್ಣಮಂ ಭಿಕ್ಖುನಿಯಾ ಪನೇವ ಅಚ್ಚೇಕಚೀವರಂ ಉಪ್ಪಜ್ಜೇಯ್ಯ, ಅಚ್ಚೇಕಂ ಮಞ್ಞಮಾನಾಯ ಭಿಕ್ಖುನಿಯಾ ಪಟಿಗ್ಗಹೇತಬ್ಬಂ, ಪಟಿಗ್ಗಹೇತ್ವಾ ಯಾವ ಚೀವರಕಾಲಸಮಯಂ ನಿಕ್ಖಿಪಿತಬ್ಬಂ। ತತೋ ಚೇ ಉತ್ತರಿ ನಿಕ್ಖಿಪೇಯ್ಯ, ನಿಸ್ಸಗ್ಗಿಯಂ ಪಾಚಿತ್ತಿಯಂ।

    29. Dasāhānāgataṃ kattikatemāsikapuṇṇamaṃ bhikkhuniyā paneva accekacīvaraṃ uppajjeyya, accekaṃ maññamānāya bhikkhuniyā paṭiggahetabbaṃ, paṭiggahetvā yāva cīvarakālasamayaṃ nikkhipitabbaṃ. Tato ce uttari nikkhipeyya, nissaggiyaṃ pācittiyaṃ.

    ಪರಿಣತಸಿಕ್ಖಾಪದಂ

    Pariṇatasikkhāpadaṃ

    ೩೦. ಯಾ ಪನ ಭಿಕ್ಖುನೀ ಜಾನಂ ಸಙ್ಘಿಕಂ ಲಾಭಂ ಪರಿಣತಂ ಅತ್ತನೋ ಪರಿಣಾಮೇಯ್ಯ, ನಿಸ್ಸಗ್ಗಿಯಂ ಪಾಚಿತ್ತಿಯಂ।

    30. Yā pana bhikkhunī jānaṃ saṅghikaṃ lābhaṃ pariṇataṃ attano pariṇāmeyya, nissaggiyaṃ pācittiyaṃ.

    ಪತ್ತವಗ್ಗೋ ತತಿಯೋ।

    Pattavaggo tatiyo.

    ಉದ್ದಿಟ್ಠಾ ಖೋ, ಅಯ್ಯಾಯೋ, ತಿಂಸ ನಿಸ್ಸಗ್ಗಿಯಾ ಪಾಚಿತ್ತಿಯಾ ಧಮ್ಮಾ। ತತ್ಥಾಯ್ಯಾಯೋ, ಪುಚ್ಛಾಮಿ, ಕಚ್ಚಿತ್ಥ ಪರಿಸುದ್ಧಾ, ದುತಿಯಮ್ಪಿ ಪುಚ್ಛಾಮಿ, ಕಚ್ಚಿತ್ಥ ಪರಿಸುದ್ಧಾ, ತತಿಯಮ್ಪಿ ಪುಚ್ಛಾಮಿ, ಕಚ್ಚಿತ್ಥ ಪರಿಸುದ್ಧಾ, ಪರಿಸುದ್ಧೇತ್ಥಾಯ್ಯಾಯೋ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀತಿ।

    Uddiṭṭhā kho, ayyāyo, tiṃsa nissaggiyā pācittiyā dhammā. Tatthāyyāyo, pucchāmi, kaccittha parisuddhā, dutiyampi pucchāmi, kaccittha parisuddhā, tatiyampi pucchāmi, kaccittha parisuddhā, parisuddhetthāyyāyo, tasmā tuṇhī, evametaṃ dhārayāmīti.

    ನಿಸ್ಸಗ್ಗಿಯಪಾಚಿತ್ತಿಯಾ ನಿಟ್ಠಿತಾ।

    Nissaggiyapācittiyā niṭṭhitā.

    ಸುದ್ಧಪಾಚಿತ್ತಿಯಾ

    Suddhapācittiyā

    ಇಮೇ ಖೋ ಪನಾಯ್ಯಾಯೋ, ಛಸಟ್ಠಿಸತಾ ಪಾಚಿತ್ತಿಯಾ

    Ime kho panāyyāyo, chasaṭṭhisatā pācittiyā

    ಧಮ್ಮಾ ಉದ್ದೇಸಂ ಆಗಚ್ಛನ್ತಿ।

    Dhammā uddesaṃ āgacchanti.

    ಲಸುಣಸಿಕ್ಖಾಪದಂ

    Lasuṇasikkhāpadaṃ

    ೧. ಯಾ ಪನ ಭಿಕ್ಖುನೀ ಲಸುಣಂ ಖಾದೇಯ್ಯ ಪಾಚಿತ್ತಿಯಂ।

    1. Yā pana bhikkhunī lasuṇaṃ khādeyya pācittiyaṃ.

    ಸಮ್ಬಾಧಲೋಮಸಿಕ್ಖಾಪದಂ

    Sambādhalomasikkhāpadaṃ

    ೨. ಯಾ ಪನ ಭಿಕ್ಖುನೀ ಸಮ್ಬಾಧೇ ಲೋಮಂ ಸಂಹರಾಪೇಯ್ಯ, ಪಾಚಿತ್ತಿಯಂ।

    2. Yā pana bhikkhunī sambādhe lomaṃ saṃharāpeyya, pācittiyaṃ.

    ತಲಘಾತಕಸಿಕ್ಖಾಪದಂ

    Talaghātakasikkhāpadaṃ

    ೩. ತಲಘಾತಕೇ ಪಾಚಿತ್ತಿಯಂ।

    3. Talaghātake pācittiyaṃ.

    ಜತುಮಟ್ಠಕಸಿಕ್ಖಾಪದಂ

    Jatumaṭṭhakasikkhāpadaṃ

    ೪. ಜತುಮಟ್ಠಕೇ ಪಾಚಿತ್ತಿಯಂ।

    4. Jatumaṭṭhake pācittiyaṃ.

    ಉದಕಸುದ್ಧಿಕಸಿಕ್ಖಾಪದಂ

    Udakasuddhikasikkhāpadaṃ

    ೫. ಉದಕಸುದ್ಧಿಕಂ ಪನ ಭಿಕ್ಖುನಿಯಾ ಆದಿಯಮಾನಾಯ ದ್ವಙ್ಗುಲಪಬ್ಬಪರಮಂ ಆದಾತಬ್ಬಂ। ತಂ ಅತಿಕ್ಕಾಮೇನ್ತಿಯಾ ಪಾಚಿತ್ತಿಯಂ।

    5. Udakasuddhikaṃ pana bhikkhuniyā ādiyamānāya dvaṅgulapabbaparamaṃ ādātabbaṃ. Taṃ atikkāmentiyā pācittiyaṃ.

    ಉಪತಿಟ್ಠನಸಿಕ್ಖಾಪದಂ

    Upatiṭṭhanasikkhāpadaṃ

    ೬. ಯಾ ಪನ ಭಿಕ್ಖುನೀ ಭಿಕ್ಖುಸ್ಸ ಭುಞ್ಜನ್ತಸ್ಸ ಪಾನೀಯೇನ ವಾ ವಿಧೂಪನೇನ ವಾ ಉಪತಿಟ್ಠೇಯ್ಯ, ಪಾಚಿತ್ತಿಯಂ।

    6. Yā pana bhikkhunī bhikkhussa bhuñjantassa pānīyena vā vidhūpanena vā upatiṭṭheyya, pācittiyaṃ.

    ಆಮಕಧಞ್ಞಸಿಕ್ಖಾಪದಂ

    Āmakadhaññasikkhāpadaṃ

    ೭. ಯಾ ಪನ ಭಿಕ್ಖುನೀ ಆಮಕಧಞ್ಞಂ ವಿಞ್ಞತ್ವಾ ವಾ ವಿಞ್ಞಾಪೇತ್ವಾ ವಾ ಭಜ್ಜಿತ್ವಾ ವಾ ಭಜ್ಜಾಪೇತ್ವಾ ವಾ ಕೋಟ್ಟೇತ್ವಾ ವಾ ಕೋಟ್ಟಾಪೇತ್ವಾ ವಾ ಪಚಿತ್ವಾ ವಾ ಪಚಾಪೇತ್ವಾ ವಾ ಭುಞ್ಜೇಯ್ಯ, ಪಾಚಿತ್ತಿಯಂ।

    7. Yā pana bhikkhunī āmakadhaññaṃ viññatvā vā viññāpetvā vā bhajjitvā vā bhajjāpetvā vā koṭṭetvā vā koṭṭāpetvā vā pacitvā vā pacāpetvā vā bhuñjeyya, pācittiyaṃ.

    ಪಠಮಉಚ್ಚಾರಛಡ್ಡನಸಿಕ್ಖಾಪದಂ

    Paṭhamauccārachaḍḍanasikkhāpadaṃ

    ೮. ಯಾ ಪನ ಭಿಕ್ಖುನೀ ಉಚ್ಚಾರಂ ವಾ ಪಸ್ಸಾವಂ ವಾ ಸಙ್ಕಾರಂ ವಾ ವಿಘಾಸಂ ವಾ ತಿರೋಕುಟ್ಟೇ ವಾ ತಿರೋಪಾಕಾರೇ ವಾ ಛಡ್ಡೇಯ್ಯ ವಾ ಛಡ್ಡಾಪೇಯ್ಯ ವಾ, ಪಾಚಿತ್ತಿಯಂ।

    8. Yā pana bhikkhunī uccāraṃ vā passāvaṃ vā saṅkāraṃ vā vighāsaṃ vā tirokuṭṭe vā tiropākāre vā chaḍḍeyya vā chaḍḍāpeyya vā, pācittiyaṃ.

    ದುತಿಯಉಚ್ಚಾರಛಡ್ಡನಸಿಕ್ಖಾಪದಂ

    Dutiyauccārachaḍḍanasikkhāpadaṃ

    ೯. ಯಾ ಪನ ಭಿಕ್ಖುನೀ ಉಚ್ಚಾರಂ ವಾ ಪಸ್ಸಾವಂ ವಾ ಸಙ್ಕಾರಂ ವಾ ವಿಘಾಸಂ ವಾ ಹರಿತೇ ಛಡ್ಡೇಯ್ಯ ವಾ ಛಡ್ಡಾಪೇಯ್ಯ ವಾ, ಪಾಚಿತ್ತಿಯಂ।

    9. Yā pana bhikkhunī uccāraṃ vā passāvaṃ vā saṅkāraṃ vā vighāsaṃ vā harite chaḍḍeyya vā chaḍḍāpeyya vā, pācittiyaṃ.

    ನಚ್ಚಗೀತಸಿಕ್ಖಾಪದಂ

    Naccagītasikkhāpadaṃ

    ೧೦. ಯಾ ಪನ ಭಿಕ್ಖುನೀ ನಚ್ಚಂ ವಾ ಗೀತಂ ವಾ ವಾದಿತಂ ವಾ ದಸ್ಸನಾಯ ಗಚ್ಛೇಯ್ಯ, ಪಾಚಿತ್ತಿಯಂ।

    10. Yā pana bhikkhunī naccaṃ vā gītaṃ vā vāditaṃ vā dassanāya gaccheyya, pācittiyaṃ.

    ಲಸುಣವಗ್ಗೋ ಪಠಮೋ।

    Lasuṇavaggo paṭhamo.

    ರತ್ತನ್ಧಕಾರಸಿಕ್ಖಾಪದಂ

    Rattandhakārasikkhāpadaṃ

    ೧೧. ಯಾ ಪನ ಭಿಕ್ಖುನೀ ರತ್ತನ್ಧಕಾರೇ ಅಪ್ಪದೀಪೇ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠೇಯ್ಯ ವಾ ಸಲ್ಲಪೇಯ್ಯ ವಾ, ಪಾಚಿತ್ತಿಯಂ।

    11. Yā pana bhikkhunī rattandhakāre appadīpe purisena saddhiṃ ekenekā santiṭṭheyya vā sallapeyya vā, pācittiyaṃ.

    ಪಟಿಚ್ಛನ್ನೋಕಾಸಸಿಕ್ಖಾಪದಂ

    Paṭicchannokāsasikkhāpadaṃ

    ೧೨. ಯಾ ಪನ ಭಿಕ್ಖುನೀ ಪಟಿಚ್ಛನ್ನೇ ಓಕಾಸೇ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠೇಯ್ಯ ವಾ ಸಲ್ಲಪೇಯ್ಯ ವಾ, ಪಾಚಿತ್ತಿಯಂ।

    12. Yā pana bhikkhunī paṭicchanne okāse purisena saddhiṃ ekenekā santiṭṭheyya vā sallapeyya vā, pācittiyaṃ.

    ಅಜ್ಝೋಕಾಸಸಲ್ಲಪನಸಿಕ್ಖಾಪದಂ

    Ajjhokāsasallapanasikkhāpadaṃ

    ೧೩. ಯಾ ಪನ ಭಿಕ್ಖುನೀ ಅಜ್ಝೋಕಾಸೇ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠೇಯ್ಯ ವಾ ಸಲ್ಲಪೇಯ್ಯ ವಾ, ಪಾಚಿತ್ತಿಯಂ।

    13. Yā pana bhikkhunī ajjhokāse purisena saddhiṃ ekenekā santiṭṭheyya vā sallapeyya vā, pācittiyaṃ.

    ದುತಿಯಿಕಉಯ್ಯೋಜನಸಿಕ್ಖಾಪದಂ

    Dutiyikauyyojanasikkhāpadaṃ

    ೧೪. ಯಾ ಪನ ಭಿಕ್ಖುನೀ ರಥಿಕಾಯ ವಾ ಬ್ಯೂಹೇ ವಾ ಸಿಙ್ಘಾಟಕೇ ವಾ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠೇಯ್ಯ ವಾ ಸಲ್ಲಪೇಯ್ಯ ವಾ ನಿಕಣ್ಣಿಕಂ ವಾ ಜಪ್ಪೇಯ್ಯ ದುತಿಯಿಕಂ ವಾ ಭಿಕ್ಖುನಿಂ ಉಯ್ಯೋಜೇಯ್ಯ, ಪಾಚಿತ್ತಿಯಂ।

    14. Yā pana bhikkhunī rathikāya vā byūhe vā siṅghāṭake vā purisena saddhiṃ ekenekā santiṭṭheyya vā sallapeyya vā nikaṇṇikaṃ vā jappeyya dutiyikaṃ vā bhikkhuniṃ uyyojeyya, pācittiyaṃ.

    ಅನಾಪುಚ್ಛಾಪಕ್ಕಮನಸಿಕ್ಖಾಪದಂ

    Anāpucchāpakkamanasikkhāpadaṃ

    ೧೫. ಯಾ ಪನ ಭಿಕ್ಖುನೀ ಪುರೇಭತ್ತಂ ಕುಲಾನಿ ಉಪಸಙ್ಕಮಿತ್ವಾ ಆಸನೇ ನಿಸೀದಿತ್ವಾ ಸಾಮಿಕೇ ಅನಾಪುಚ್ಛಾ ಪಕ್ಕಮೇಯ್ಯ, ಪಾಚಿತ್ತಿಯಂ।

    15. Yā pana bhikkhunī purebhattaṃ kulāni upasaṅkamitvā āsane nisīditvā sāmike anāpucchā pakkameyya, pācittiyaṃ.

    ಅನಾಪುಚ್ಛಾಅಭಿನಿಸೀದನಸಿಕ್ಖಾಪದಂ

    Anāpucchāabhinisīdanasikkhāpadaṃ

    ೧೬. ಯಾ ಪನ ಭಿಕ್ಖುನೀ ಪಚ್ಛಾಭತ್ತಂ ಕುಲಾನಿ ಉಪಸಙ್ಕಮಿತ್ವಾ ಸಾಮಿಕೇ ಅನಾಪುಚ್ಛಾ ಆಸನೇ ಅಭಿನಿಸೀದೇಯ್ಯ ವಾ ಅಭಿನಿಪಜ್ಜೇಯ್ಯ ವಾ, ಪಾಚಿತ್ತಿಯಂ।

    16. Yā pana bhikkhunī pacchābhattaṃ kulāni upasaṅkamitvā sāmike anāpucchā āsane abhinisīdeyya vā abhinipajjeyya vā, pācittiyaṃ.

    ಅನಾಪುಚ್ಛಾಸನ್ಥರಣಸಿಕ್ಖಾಪದಂ

    Anāpucchāsantharaṇasikkhāpadaṃ

    ೧೭. ಯಾ ಪನ ಭಿಕ್ಖುನೀ ವಿಕಾಲೇ ಕುಲಾನಿ ಉಪಸಙ್ಕಮಿತ್ವಾ ಸಾಮಿಕೇ ಅನಾಪುಚ್ಛಾ ಸೇಯ್ಯಂ ಸನ್ಥರಿತ್ವಾ ವಾ ಸನ್ಥರಾಪೇತ್ವಾ ವಾ ಅಭಿನಿಸೀದೇಯ್ಯ ವಾ ಅಭಿನಿಪಜ್ಜೇಯ್ಯ ವಾ, ಪಾಚಿತ್ತಿಯಂ।

    17. Yā pana bhikkhunī vikāle kulāni upasaṅkamitvā sāmike anāpucchā seyyaṃ santharitvā vā santharāpetvā vā abhinisīdeyya vā abhinipajjeyya vā, pācittiyaṃ.

    ಪರಉಜ್ಝಾಪನಕಸಿಕ್ಖಾಪದಂ

    Paraujjhāpanakasikkhāpadaṃ

    ೧೮. ಯಾ ಪನ ಭಿಕ್ಖುನೀ ದುಗ್ಗಹಿತೇನ ದೂಪಧಾರಿತೇನ ಪರಂ ಉಜ್ಝಾಪೇಯ್ಯ, ಪಾಚಿತ್ತಿಯಂ।

    18. Yā pana bhikkhunī duggahitena dūpadhāritena paraṃ ujjhāpeyya, pācittiyaṃ.

    ಪರಅಭಿಸಪನಸಿಕ್ಖಾಪದಂ

    Paraabhisapanasikkhāpadaṃ

    ೧೯. ಯಾ ಪನ ಭಿಕ್ಖುನೀ ಅತ್ತಾನಂ ವಾ ಪರಂ ವಾ ನಿರಯೇನ ವಾ ಬ್ರಹ್ಮಚರಿಯೇನ ವಾ ಅಭಿಸಪೇಯ್ಯ, ಪಾಚಿತ್ತಿಯಂ।

    19. Yā pana bhikkhunī attānaṃ vā paraṃ vā nirayena vā brahmacariyena vā abhisapeyya, pācittiyaṃ.

    ರೋದನಸಿಕ್ಖಾಪದಂ

    Rodanasikkhāpadaṃ

    ೨೦. ಯಾ ಪನ ಭಿಕ್ಖುನೀ ಅತ್ತಾನಂ ವಧಿತ್ವಾ ವಧಿತ್ವಾ ರೋದೇಯ್ಯ, ಪಾಚಿತ್ತಿಯಂ।

    20. Yā pana bhikkhunī attānaṃ vadhitvā vadhitvā rodeyya, pācittiyaṃ.

    ರತ್ತನ್ಧಕಾರವಗ್ಗೋ ದುತಿಯೋ।

    Rattandhakāravaggo dutiyo.

    ನಗ್ಗಸಿಕ್ಖಾಪದಂ

    Naggasikkhāpadaṃ

    ೨೧. ಯಾ ಪನ ಭಿಕ್ಖುನೀ ನಗ್ಗಾ ನಹಾಯೇಯ್ಯ, ಪಾಚಿತ್ತಿಯಂ।

    21. Yā pana bhikkhunī naggā nahāyeyya, pācittiyaṃ.

    ಉದಕಸಾಟಿಕಸಿಕ್ಖಾಪದಂ

    Udakasāṭikasikkhāpadaṃ

    ೨೨. ಉದಕಸಾಟಿಕಂ ಪನ ಭಿಕ್ಖುನಿಯಾ ಕಾರಯಮಾನಾಯ ಪಮಾಣಿಕಾ ಕಾರೇತಬ್ಬಾ, ತತ್ರಿದಂ ಪಮಾಣಂ , ದೀಘಸೋ ಚತಸ್ಸೋ ವಿದತ್ಥಿಯೋ ಸುಗತವಿದತ್ಥಿಯಾ, ತಿರಿಯಂ ದ್ವೇ ವಿದತ್ಥಿಯೋ। ತಂ ಅತಿಕ್ಕಾಮೇನ್ತಿಯಾ ಛೇದನಕಂ ಪಾಚಿತ್ತಿಯಂ।

    22. Udakasāṭikaṃ pana bhikkhuniyā kārayamānāya pamāṇikā kāretabbā, tatridaṃ pamāṇaṃ , dīghaso catasso vidatthiyo sugatavidatthiyā, tiriyaṃ dve vidatthiyo. Taṃ atikkāmentiyā chedanakaṃ pācittiyaṃ.

    ಚೀವರಸಿಬ್ಬನಸಿಕ್ಖಾಪದಂ

    Cīvarasibbanasikkhāpadaṃ

    ೨೩. ಯಾ ಪನ ಭಿಕ್ಖುನೀ ಭಿಕ್ಖುನಿಯಾ ಚೀವರಂ ವಿಸಿಬ್ಬೇತ್ವಾ ವಾ ವಿಸಿಬ್ಬಾಪೇತ್ವಾ ವಾ ಸಾ ಪಚ್ಛಾ ಅನನ್ತರಾಯಿಕಿನೀ ನೇವ ಸಿಬ್ಬೇಯ್ಯ, ನ ಸಿಬ್ಬಾಪನಾಯ ಉಸ್ಸುಕ್ಕಂ ಕರೇಯ್ಯ ಅಞ್ಞತ್ರ ಚತೂಹಪಞ್ಚಾಹಾ, ಪಾಚಿತ್ತಿಯಂ।

    23. Yā pana bhikkhunī bhikkhuniyā cīvaraṃ visibbetvā vā visibbāpetvā vā sā pacchā anantarāyikinī neva sibbeyya, na sibbāpanāya ussukkaṃ kareyya aññatra catūhapañcāhā, pācittiyaṃ.

    ಸಙ್ಘಾಟಿಚಾರಸಿಕ್ಖಾಪದಂ

    Saṅghāṭicārasikkhāpadaṃ

    ೨೪. ಯಾ ಪನ ಭಿಕ್ಖುನೀ ಪಞ್ಚಾಹಿಕಂ ಸಙ್ಘಾಟಿಚಾರಂ ಅತಿಕ್ಕಾಮೇಯ್ಯ, ಪಾಚಿತ್ತಿಯಂ।

    24. Yā pana bhikkhunī pañcāhikaṃ saṅghāṭicāraṃ atikkāmeyya, pācittiyaṃ.

    ಚೀವರಸಙ್ಕಮನೀಯಸಿಕ್ಖಾಪದಂ

    Cīvarasaṅkamanīyasikkhāpadaṃ

    ೨೫. ಯಾ ಪನ ಭಿಕ್ಖುನೀ ಚೀವರಸಙ್ಕಮನೀಯಂ ಧಾರೇಯ್ಯ, ಪಾಚಿತ್ತಿಯಂ।

    25. Yā pana bhikkhunī cīvarasaṅkamanīyaṃ dhāreyya, pācittiyaṃ.

    ಗಣಚೀವರಸಿಕ್ಖಾಪದಂ

    Gaṇacīvarasikkhāpadaṃ

    ೨೬. ಯಾ ಪನ ಭಿಕ್ಖುನೀ ಗಣಸ್ಸ ಚೀವರಲಾಭಂ ಅನ್ತರಾಯಂ ಕರೇಯ್ಯ, ಪಾಚಿತ್ತಿಯಂ।

    26. Yā pana bhikkhunī gaṇassa cīvaralābhaṃ antarāyaṃ kareyya, pācittiyaṃ.

    ಪಟಿಬಾಹನಸಿಕ್ಖಾಪದಂ

    Paṭibāhanasikkhāpadaṃ

    ೨೭. ಯಾ ಪನ ಭಿಕ್ಖುನೀ ಧಮ್ಮಿಕಂ ಚೀವರವಿಭಙ್ಗಂ ಪಟಿಬಾಹೇಯ್ಯ, ಪಾಚಿತ್ತಿಯಂ।

    27. Yā pana bhikkhunī dhammikaṃ cīvaravibhaṅgaṃ paṭibāheyya, pācittiyaṃ.

    ಚೀವರದಾನಸಿಕ್ಖಾಪದಂ

    Cīvaradānasikkhāpadaṃ

    ೨೮. ಯಾ ಪನ ಭಿಕ್ಖುನೀ ಅಗಾರಿಕಸ್ಸ ವಾ ಪರಿಬ್ಬಾಜಕಸ್ಸ ವಾ ಪರಿಬ್ಬಾಜಿಕಾಯ ವಾ ಸಮಣಚೀವರಂ ದದೇಯ್ಯ, ಪಾಚಿತ್ತಿಯಂ।

    28. Yā pana bhikkhunī agārikassa vā paribbājakassa vā paribbājikāya vā samaṇacīvaraṃ dadeyya, pācittiyaṃ.

    ಕಾಲಅತಿಕ್ಕಮನಸಿಕ್ಖಾಪದಂ

    Kālaatikkamanasikkhāpadaṃ

    ೨೯. ಯಾ ಪನ ಭಿಕ್ಖುನೀ ದುಬ್ಬಲಚೀವರಪಚ್ಚಾಸಾಯ ಚೀವರಕಾಲಸಮಯಂ ಅತಿಕ್ಕಾಮೇಯ್ಯ, ಪಾಚಿತ್ತಿಯಂ।

    29. Yā pana bhikkhunī dubbalacīvarapaccāsāya cīvarakālasamayaṃ atikkāmeyya, pācittiyaṃ.

    ಕಥಿನುದ್ಧಾರಸಿಕ್ಖಾಪದಂ

    Kathinuddhārasikkhāpadaṃ

    ೩೦. ಯಾ ಪನ ಭಿಕ್ಖುನೀ ಧಮ್ಮಿಕಂ ಕಥಿನುದ್ಧಾರಂ ಪಟಿಬಾಹೇಯ್ಯ, ಪಾಚಿತ್ತಿಯಂ।

    30. Yā pana bhikkhunī dhammikaṃ kathinuddhāraṃ paṭibāheyya, pācittiyaṃ.

    ನಗ್ಗವಗ್ಗೋ ತತಿಯೋ।

    Naggavaggo tatiyo.

    ಏಕಮಞ್ಚತುವಟ್ಟನಸಿಕ್ಖಾಪದಂ

    Ekamañcatuvaṭṭanasikkhāpadaṃ

    ೩೧. ಯಾ ಪನ ಭಿಕ್ಖುನಿಯೋ ದ್ವೇ ಏಕಮಞ್ಚೇ ತುವಟ್ಟೇಯ್ಯುಂ, ಪಾಚಿತ್ತಿಯಂ।

    31. Yā pana bhikkhuniyo dve ekamañce tuvaṭṭeyyuṃ, pācittiyaṃ.

    ಏಕತ್ಥರಣತುವಟ್ಟನಸಿಕ್ಖಾಪದಂ

    Ekattharaṇatuvaṭṭanasikkhāpadaṃ

    ೩೨. ಯಾ ಪನ ಭಿಕ್ಖುನಿಯೋ ದ್ವೇ ಏಕತ್ಥರಣಪಾವುರಣಾ ತುವಟ್ಟೇಯ್ಯುಂ, ಪಾಚಿತ್ತಿಯಂ।

    32. Yā pana bhikkhuniyo dve ekattharaṇapāvuraṇā tuvaṭṭeyyuṃ, pācittiyaṃ.

    ಅಫಾಸುಕರಣಸಿಕ್ಖಾಪದಂ

    Aphāsukaraṇasikkhāpadaṃ

    ೩೩. ಯಾ ಪನ ಭಿಕ್ಖುನೀ ಭಿಕ್ಖುನಿಯಾ ಸಞ್ಚಿಚ್ಚ ಅಫಾಸುಂ ಕರೇಯ್ಯ, ಪಾಚಿತ್ತಿಯಂ।

    33. Yā pana bhikkhunī bhikkhuniyā sañcicca aphāsuṃ kareyya, pācittiyaṃ.

    ನಉಪಟ್ಠಾಪನಸಿಕ್ಖಾಪದಂ

    Naupaṭṭhāpanasikkhāpadaṃ

    ೩೪. ಯಾ ಪನ ಭಿಕ್ಖುನೀ ದುಕ್ಖಿತಂ ಸಹಜೀವಿನಿಂ ನೇವ ಉಪಟ್ಠಹೇಯ್ಯ, ನ ಉಪಟ್ಠಾಪನಾಯ ಉಸ್ಸುಕ್ಕಂ ಕರೇಯ್ಯ, ಪಾಚಿತ್ತಿಯಂ।

    34. Yā pana bhikkhunī dukkhitaṃ sahajīviniṃ neva upaṭṭhaheyya, na upaṭṭhāpanāya ussukkaṃ kareyya, pācittiyaṃ.

    ನಿಕ್ಕಡ್ಢನಸಿಕ್ಖಾಪದಂ

    Nikkaḍḍhanasikkhāpadaṃ

    ೩೫. ಯಾ ಪನ ಭಿಕ್ಖುನೀ ಭಿಕ್ಖುನಿಯಾ ಉಪಸ್ಸಯಂ ದತ್ವಾ ಕುಪಿತಾ ಅನತ್ತಮನಾ ನಿಕ್ಕಡ್ಢೇಯ್ಯ ವಾ ನಿಕ್ಕಡ್ಢಾಪೇಯ್ಯ ವಾ, ಪಾಚಿತ್ತಿಯಂ।

    35. Yā pana bhikkhunī bhikkhuniyā upassayaṃ datvā kupitā anattamanā nikkaḍḍheyya vā nikkaḍḍhāpeyya vā, pācittiyaṃ.

    ಸಂಸಟ್ಠಸಿಕ್ಖಾಪದಂ

    Saṃsaṭṭhasikkhāpadaṃ

    ೩೬. ಯಾ ಪನ ಭಿಕ್ಖುನೀ ಸಂಸಟ್ಠಾ ವಿಹರೇಯ್ಯ ಗಹಪತಿನಾ ವಾ ಗಹಪತಿಪುತ್ತೇನ ವಾ, ಸಾ ಭಿಕ್ಖುನೀ ಭಿಕ್ಖುನೀಹಿ ಏವಮಸ್ಸ ವಚನೀಯಾ ‘‘ಮಾಯ್ಯೇ, ಸಂಸಟ್ಠಾ ವಿಹರಿ ಗಹಪತಿನಾಪಿ ಗಹಪತಿಪುತ್ತೇನಾಪಿ, ವಿವಿಚ್ಚಾಯ್ಯೇ, ವಿವೇಕಞ್ಞೇವ ಭಗಿನಿಯಾ ಸಙ್ಘೋ ವಣ್ಣೇತೀ’’ತಿ। ಏವಞ್ಚ ಸಾ ಭಿಕ್ಖುನೀ ಭಿಕ್ಖುನೀಹಿ ವುಚ್ಚಮಾನಾ ತಥೇವ ಪಗ್ಗಣ್ಹೇಯ್ಯ, ಸಾ ಭಿಕ್ಖುನೀ ಭಿಕ್ಖುನೀಹಿ ಯಾವತತಿಯಂ ಸಮನುಭಾಸಿತಬ್ಬಾ ತಸ್ಸ ಪಟಿನಿಸ್ಸಗ್ಗಾಯ, ಯಾವತತಿಯಞ್ಚೇ ಸಮನುಭಾಸಿಯಮಾನಾ ತಂ ಪಟಿನಿಸ್ಸಜ್ಜೇಯ್ಯ, ಇಚ್ಚೇತಂ ಕುಸಲಂ। ನೋ ಚೇ ಪಟಿನಿಸ್ಸಜ್ಜೇಯ್ಯ, ಪಾಚಿತ್ತಿಯಂ।

    36. Yā pana bhikkhunī saṃsaṭṭhā vihareyya gahapatinā vā gahapatiputtena vā, sā bhikkhunī bhikkhunīhi evamassa vacanīyā ‘‘māyye, saṃsaṭṭhā vihari gahapatināpi gahapatiputtenāpi, viviccāyye, vivekaññeva bhaginiyā saṅgho vaṇṇetī’’ti. Evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṃ samanubhāsitabbā tassa paṭinissaggāya, yāvatatiyañce samanubhāsiyamānā taṃ paṭinissajjeyya, iccetaṃ kusalaṃ. No ce paṭinissajjeyya, pācittiyaṃ.

    ಅನ್ತೋರಟ್ಠಸಿಕ್ಖಾಪದಂ

    Antoraṭṭhasikkhāpadaṃ

    ೩೭. ಯಾ ಪನ ಭಿಕ್ಖುನೀ ಅನ್ತೋರಟ್ಠೇ ಸಾಸಙ್ಕಸಮ್ಮತೇ ಸಪ್ಪಟಿಭಯೇ ಅಸತ್ಥಿಕಾ ಚಾರಿಕಂ ಚರೇಯ್ಯ, ಪಾಚಿತ್ತಿಯಂ।

    37. Yā pana bhikkhunī antoraṭṭhe sāsaṅkasammate sappaṭibhaye asatthikā cārikaṃ careyya, pācittiyaṃ.

    ತಿರೋರಟ್ಠಸಿಕ್ಖಾಪದಂ

    Tiroraṭṭhasikkhāpadaṃ

    ೩೮. ಯಾ ಪನ ಭಿಕ್ಖುನೀ ತಿರೋರಟ್ಠೇ ಸಾಸಙ್ಕಸಮ್ಮತೇ ಸಪ್ಪಟಿಭಯೇ ಅಸತ್ಥಿಕಾ ಚಾರಿಕಂ ಚರೇಯ್ಯ, ಪಾಚಿತ್ತಿಯಂ।

    38. Yā pana bhikkhunī tiroraṭṭhe sāsaṅkasammate sappaṭibhaye asatthikā cārikaṃ careyya, pācittiyaṃ.

    ಅನ್ತೋವಸ್ಸಸಿಕ್ಖಾಪದಂ

    Antovassasikkhāpadaṃ

    ೩೯. ಯಾ ಪನ ಭಿಕ್ಖುನೀ ಅನ್ತೋವಸ್ಸಂ ಚಾರಿಕಂ ಚರೇಯ್ಯ, ಪಾಚಿತ್ತಿಯಂ।

    39. Yā pana bhikkhunī antovassaṃ cārikaṃ careyya, pācittiyaṃ.

    ಚಾರಿಕನಪಕ್ಕಮನಸಿಕ್ಖಾಪದಂ

    Cārikanapakkamanasikkhāpadaṃ

    ೪೦. ಯಾ ಪನ ಭಿಕ್ಖುನೀ ವಸ್ಸಂವುಟ್ಠಾ ಚಾರಿಕಂ ನ ಪಕ್ಕಮೇಯ್ಯ ಅನ್ತಮಸೋ ಛಪ್ಪಞ್ಚಯೋಜನಾನಿಪಿ, ಪಾಚಿತ್ತಿಯಂ।

    40. Yā pana bhikkhunī vassaṃvuṭṭhā cārikaṃ na pakkameyya antamaso chappañcayojanānipi, pācittiyaṃ.

    ತುವಟ್ಟವಗ್ಗೋ ಚತುತ್ಥೋ।

    Tuvaṭṭavaggo catuttho.

    ರಾಜಾಗಾರಸಿಕ್ಖಾಪದಂ

    Rājāgārasikkhāpadaṃ

    ೪೧. ಯಾ ಪನ ಭಿಕ್ಖುನೀ ರಾಜಾಗಾರಂ ವಾ ಚಿತ್ತಾಗಾರಂ ವಾ ಆರಾಮಂ ವಾ ಉಯ್ಯಾನಂ ವಾ ಪೋಕ್ಖರಣಿಂ ವಾ ದಸ್ಸನಾಯ ಗಚ್ಛೇಯ್ಯ, ಪಾಚಿತ್ತಿಯಂ।

    41. Yā pana bhikkhunī rājāgāraṃ vā cittāgāraṃ vā ārāmaṃ vā uyyānaṃ vā pokkharaṇiṃ vā dassanāya gaccheyya, pācittiyaṃ.

    ಆಸನ್ದಿಪರಿಭುಞ್ಜನಸಿಕ್ಖಾಪದಂ

    Āsandiparibhuñjanasikkhāpadaṃ

    ೪೨. ಯಾ ಪನ ಭಿಕ್ಖುನೀ ಆಸನ್ದಿಂ ವಾ ಪಲ್ಲಙ್ಕಂ ವಾ ಪರಿಭುಞ್ಜೇಯ್ಯ, ಪಾಚಿತ್ತಿಯಂ।

    42. Yā pana bhikkhunī āsandiṃ vā pallaṅkaṃ vā paribhuñjeyya, pācittiyaṃ.

    ಸುತ್ತಕನ್ತನಸಿಕ್ಖಾಪದಂ

    Suttakantanasikkhāpadaṃ

    ೪೩. ಯಾ ಪನ ಭಿಕ್ಖುನೀ ಸುತ್ತಂ ಕನ್ತೇಯ್ಯ, ಪಾಚಿತ್ತಿಯಂ।

    43. Yā pana bhikkhunī suttaṃ kanteyya, pācittiyaṃ.

    ಗಿಹಿವೇಯ್ಯಾವಚ್ಚಸಿಕ್ಖಾಪದಂ

    Gihiveyyāvaccasikkhāpadaṃ

    ೪೪. ಯಾ ಪನ ಭಿಕ್ಖುನೀ ಗಿಹಿವೇಯ್ಯಾವಚ್ಚಂ ಕರೇಯ್ಯ, ಪಾಚಿತ್ತಿಯಂ।

    44. Yā pana bhikkhunī gihiveyyāvaccaṃ kareyya, pācittiyaṃ.

    ಅಧಿಕರಣಸಿಕ್ಖಾಪದಂ

    Adhikaraṇasikkhāpadaṃ

    ೪೫. ಯಾ ಪನ ಭಿಕ್ಖುನೀ ಭಿಕ್ಖುನಿಯಾ ‘‘ಏಹಾಯ್ಯೇ, ಇಮಂ ಅಧಿಕರಣಂ ವೂಪಸಮೇಹೀ’’ತಿ ವುಚ್ಚಮಾನಾ ‘‘ಸಾಧೂ’’ತಿ ಪಟಿಸ್ಸುಣಿತ್ವಾ ಸಾ ಪಚ್ಛಾ ಅನನ್ತರಾಯಿಕಿನೀ ನೇವ ವೂಪಸಮೇಯ್ಯ, ನ ವೂಪಸಮಾಯ ಉಸ್ಸುಕ್ಕಂ ಕರೇಯ್ಯ, ಪಾಚಿತ್ತಿಯಂ।

    45. Yā pana bhikkhunī bhikkhuniyā ‘‘ehāyye, imaṃ adhikaraṇaṃ vūpasamehī’’ti vuccamānā ‘‘sādhū’’ti paṭissuṇitvā sā pacchā anantarāyikinī neva vūpasameyya, na vūpasamāya ussukkaṃ kareyya, pācittiyaṃ.

    ಭೋಜನದಾನಸಿಕ್ಖಾಪದಂ

    Bhojanadānasikkhāpadaṃ

    ೪೬. ಯಾ ಪನ ಭಿಕ್ಖುನೀ ಅಗಾರಿಕಸ್ಸ ವಾ ಪರಿಬ್ಬಾಜಕಸ್ಸ ವಾ ಪರಿಬ್ಬಾಜಿಕಾಯ ವಾ ಸಹತ್ಥಾ ಖಾದನೀಯಂ ವಾ ಭೋಜನೀಯಂ ವಾ ದದೇಯ್ಯ, ಪಾಚಿತ್ತಿಯಂ।

    46. Yā pana bhikkhunī agārikassa vā paribbājakassa vā paribbājikāya vā sahatthā khādanīyaṃ vā bhojanīyaṃ vā dadeyya, pācittiyaṃ.

    ಆವಸಥಚೀವರಸಿಕ್ಖಾಪದಂ

    Āvasathacīvarasikkhāpadaṃ

    ೪೭. ಯಾ ಪನ ಭಿಕ್ಖುನೀ ಆವಸಥಚೀವರಂ ಅನಿಸ್ಸಜ್ಜೇತ್ವಾ ಪರಿಭುಞ್ಜೇಯ್ಯ, ಪಾಚಿತ್ತಿಯಂ।

    47. Yā pana bhikkhunī āvasathacīvaraṃ anissajjetvā paribhuñjeyya, pācittiyaṃ.

    ಆವಸಥವಿಹಾರಸಿಕ್ಖಾಪದಂ

    Āvasathavihārasikkhāpadaṃ

    ೪೮. ಯಾ ಪನ ಭಿಕ್ಖುನೀ ಆವಸಥಂ ಅನಿಸ್ಸಜ್ಜಿತ್ವಾ ಚಾರಿಕಂ ಪಕ್ಕಮೇಯ್ಯ, ಪಾಚಿತ್ತಿಯಂ।

    48. Yā pana bhikkhunī āvasathaṃ anissajjitvā cārikaṃ pakkameyya, pācittiyaṃ.

    ತಿರಚ್ಛಾನವಿಜ್ಜಾಪರಿಯಾಪುಣನಸಿಕ್ಖಾಪದಂ

    Tiracchānavijjāpariyāpuṇanasikkhāpadaṃ

    ೪೯. ಯಾ ಪನ ಭಿಕ್ಖುನೀ ತಿರಚ್ಛಾನವಿಜ್ಜಂ ಪರಿಯಾಪುಣೇಯ್ಯ, ಪಾಚಿತ್ತಿಯಂ।

    49. Yā pana bhikkhunī tiracchānavijjaṃ pariyāpuṇeyya, pācittiyaṃ.

    ತಿರಚ್ಛಾನವಿಜ್ಜಾವಾಚನಸಿಕ್ಖಾಪದಂ

    Tiracchānavijjāvācanasikkhāpadaṃ

    ೫೦. ಯಾ ಪನ ಭಿಕ್ಖುನೀ ತಿರಚ್ಛಾನವಿಜ್ಜಂ ವಾಚೇಯ್ಯ, ಪಾಚಿತ್ತಿಯಂ।

    50. Yā pana bhikkhunī tiracchānavijjaṃ vāceyya, pācittiyaṃ.

    ಚಿತ್ತಾಗಾರವಗ್ಗೋ ಪಞ್ಚಮೋ।

    Cittāgāravaggo pañcamo.

    ಆರಾಮಪವಿಸನಸಿಕ್ಖಾಪದಂ

    Ārāmapavisanasikkhāpadaṃ

    ೫೧. ಯಾ ಪನ ಭಿಕ್ಖುನೀ ಜಾನಂ ಸಭಿಕ್ಖುಕಂ ಆರಾಮಂ ಅನಾಪುಚ್ಛಾ ಪವಿಸೇಯ್ಯ, ಪಾಚಿತ್ತಿಯಂ।

    51. Yā pana bhikkhunī jānaṃ sabhikkhukaṃ ārāmaṃ anāpucchā paviseyya, pācittiyaṃ.

    ಭಿಕ್ಖುಅಕ್ಕೋಸನಸಿಕ್ಖಾಪದಂ

    Bhikkhuakkosanasikkhāpadaṃ

    ೫೨. ಯಾ ಪನ ಭಿಕ್ಖುನೀ ಭಿಕ್ಖುಂ ಅಕ್ಕೋಸೇಯ್ಯ ವಾ ಪರಿಭಾಸೇಯ್ಯ ವಾ, ಪಾಚಿತ್ತಿಯಂ।

    52. Yā pana bhikkhunī bhikkhuṃ akkoseyya vā paribhāseyya vā, pācittiyaṃ.

    ಗಣಪರಿಭಾಸನಸಿಕ್ಖಾಪದಂ

    Gaṇaparibhāsanasikkhāpadaṃ

    ೫೩. ಯಾ ಪನ ಭಿಕ್ಖುನೀ ಚಣ್ಡೀಕತಾ ಗಣಂ ಪರಿಭಾಸೇಯ್ಯ, ಪಾಚಿತ್ತಿಯಂ।

    53. Yā pana bhikkhunī caṇḍīkatā gaṇaṃ paribhāseyya, pācittiyaṃ.

    ಪವಾರಿತಸಿಕ್ಖಾಪದಂ

    Pavāritasikkhāpadaṃ

    ೫೪. ಯಾ ಪನ ಭಿಕ್ಖುನೀ ನಿಮನ್ತಿತಾ ವಾ ಪವಾರಿತಾ ವಾ ಖಾದನೀಯಂ ವಾ ಭೋಜನೀಯಂ ವಾ ಖಾದೇಯ್ಯ ವಾ ಭುಞ್ಜೇಯ್ಯ ವಾ, ಪಾಚಿತ್ತಿಯಂ।

    54. Yā pana bhikkhunī nimantitā vā pavāritā vā khādanīyaṃ vā bhojanīyaṃ vā khādeyya vā bhuñjeyya vā, pācittiyaṃ.

    ಕುಲಮಚ್ಛರಿನೀಸಿಕ್ಖಾಪದಂ

    Kulamaccharinīsikkhāpadaṃ

    ೫೫. ಯಾ ಪನ ಭಿಕ್ಖುನೀ ಕುಲಮಚ್ಛರಿನೀ ಅಸ್ಸ, ಪಾಚಿತ್ತಿಯಂ।

    55. Yā pana bhikkhunī kulamaccharinī assa, pācittiyaṃ.

    ಅಭಿಕ್ಖುಕಾವಾಸಸಿಕ್ಖಾಪದಂ

    Abhikkhukāvāsasikkhāpadaṃ

    ೫೬. ಯಾ ಪನ ಭಿಕ್ಖುನೀ ಅಭಿಕ್ಖುಕೇ ಆವಾಸೇ ವಸ್ಸಂ ವಸೇಯ್ಯ, ಪಾಚಿತ್ತಿಯಂ।

    56. Yā pana bhikkhunī abhikkhuke āvāse vassaṃ vaseyya, pācittiyaṃ.

    ಅಪವಾರಣಾಸಿಕ್ಖಾಪದಂ

    Apavāraṇāsikkhāpadaṃ

    ೫೭. ಯಾ ಪನ ಭಿಕ್ಖುನೀ ವಸ್ಸಂವುಟ್ಠಾ ಉಭತೋಸಙ್ಘೇ ತೀಹಿ ಠಾನೇಹಿ ನ ಪವಾರೇಯ್ಯ ದಿಟ್ಠೇನ ವಾ ಸುತೇನ ವಾ ಪರಿಸಙ್ಕಾಯ ವಾ, ಪಾಚಿತ್ತಿಯಂ।

    57. Yā pana bhikkhunī vassaṃvuṭṭhā ubhatosaṅghe tīhi ṭhānehi na pavāreyya diṭṭhena vā sutena vā parisaṅkāya vā, pācittiyaṃ.

    ಓವಾದಸಿಕ್ಖಾಪದಂ

    Ovādasikkhāpadaṃ

    ೫೮. ಯಾ ಪನ ಭಿಕ್ಖುನೀ ಓವಾದಾಯ ವಾ ಸಂವಾಸಾಯ ವಾ ನ ಗಚ್ಛೇಯ್ಯ, ಪಾಚಿತ್ತಿಯಂ।

    58. Yā pana bhikkhunī ovādāya vā saṃvāsāya vā na gaccheyya, pācittiyaṃ.

    ಓವಾದೂಪಸಙ್ಕಮನಸಿಕ್ಖಾಪದಂ

    Ovādūpasaṅkamanasikkhāpadaṃ

    ೫೯. ಅನ್ವದ್ಧಮಾಸಂ ಭಿಕ್ಖುನಿಯಾ ಭಿಕ್ಖುಸಙ್ಘತೋ ದ್ವೇ ಧಮ್ಮಾ ಪಚ್ಚಾಸೀಸಿತಬ್ಬಾ ಉಪೋಸಥಪುಚ್ಛಕಞ್ಚ ಓವಾದೂಪಸಙ್ಕಮನಞ್ಚ। ತಂ ಅತಿಕ್ಕಾಮೇನ್ತಿಯಾ ಪಾಚಿತ್ತಿಯಂ।

    59. Anvaddhamāsaṃ bhikkhuniyā bhikkhusaṅghato dve dhammā paccāsīsitabbā uposathapucchakañca ovādūpasaṅkamanañca. Taṃ atikkāmentiyā pācittiyaṃ.

    ಪಸಾಖೇಜಾತಸಿಕ್ಖಾಪದಂ

    Pasākhejātasikkhāpadaṃ

    ೬೦. ಯಾ ಪನ ಭಿಕ್ಖುನೀ ಪಸಾಖೇ ಜಾತಂ ಗಣ್ಡಂ ವಾ ರುಧಿತಂ ವಾ ಅನಪಲೋಕೇತ್ವಾ ಸಙ್ಘಂ ವಾ ಗಣಂ ವಾ ಪುರಿಸೇನ ಸದ್ಧಿಂ ಏಕೇನೇಕಾ ಭೇದಾಪೇಯ್ಯ ವಾ ಫಾಲಾಪೇಯ್ಯ ವಾ ಧೋವಾಪೇಯ್ಯ ವಾ ಆಲಿಮ್ಪಾಪೇಯ್ಯ ವಾ ಬನ್ಧಾಪೇಯ್ಯ ವಾ ಮೋಚಾಪೇಯ್ಯ ವಾ, ಪಾಚಿತ್ತಿಯಂ।

    60. Yā pana bhikkhunī pasākhe jātaṃ gaṇḍaṃ vā rudhitaṃ vā anapaloketvā saṅghaṃ vā gaṇaṃ vā purisena saddhiṃ ekenekā bhedāpeyya vā phālāpeyya vā dhovāpeyya vā ālimpāpeyya vā bandhāpeyya vā mocāpeyya vā, pācittiyaṃ.

    ಆರಾಮವಗ್ಗೋ ಛಟ್ಠೋ।

    Ārāmavaggo chaṭṭho.

    ಗಬ್ಭಿನೀಸಿಕ್ಖಾಪದಂ

    Gabbhinīsikkhāpadaṃ

    ೬೧. ಯಾ ಪನ ಭಿಕ್ಖುನೀ ಗಬ್ಭಿನಿಂ ವುಟ್ಠಾಪೇಯ್ಯ, ಪಾಚಿತ್ತಿಯಂ।

    61. Yā pana bhikkhunī gabbhiniṃ vuṭṭhāpeyya, pācittiyaṃ.

    ಪಾಯನ್ತೀಸಿಕ್ಖಾಪದಂ

    Pāyantīsikkhāpadaṃ

    ೬೨. ಯಾ ಪನ ಭಿಕ್ಖುನೀ ಪಾಯನ್ತಿಂ ವುಟ್ಠಾಪೇಯ್ಯ, ಪಾಚಿತ್ತಿಯಂ।

    62. Yā pana bhikkhunī pāyantiṃ vuṭṭhāpeyya, pācittiyaṃ.

    ಪಠಮಸಿಕ್ಖಮಾನಸಿಕ್ಖಾಪದಂ

    Paṭhamasikkhamānasikkhāpadaṃ

    ೬೩. ಯಾ ಪನ ಭಿಕ್ಖುನೀ ದ್ವೇ ವಸ್ಸಾನಿ ಛಸು ಧಮ್ಮೇಸು ಅಸಿಕ್ಖಿತಸಿಕ್ಖಂ ಸಿಕ್ಖಮಾನಂ ವುಟ್ಠಾಪೇಯ್ಯ, ಪಾಚಿತ್ತಿಯಂ।

    63. Yā pana bhikkhunī dve vassāni chasu dhammesu asikkhitasikkhaṃ sikkhamānaṃ vuṭṭhāpeyya, pācittiyaṃ.

    ದುತಿಯಸಿಕ್ಖಮಾನಸಿಕ್ಖಾಪದಂ

    Dutiyasikkhamānasikkhāpadaṃ

    ೬೪. ಯಾ ಪನ ಭಿಕ್ಖುನೀ ದ್ವೇ ವಸ್ಸಾನಿ ಛಸು ಧಮ್ಮೇಸು ಸಿಕ್ಖಿತಸಿಕ್ಖಂ ಸಿಕ್ಖಮಾನಂ ಸಙ್ಘೇನ ಅಸಮ್ಮತಂ ವುಟ್ಠಾಪೇಯ್ಯ, ಪಾಚಿತ್ತಿಯಂ।

    64. Yā pana bhikkhunī dve vassāni chasu dhammesu sikkhitasikkhaṃ sikkhamānaṃ saṅghena asammataṃ vuṭṭhāpeyya, pācittiyaṃ.

    ಪಠಮಗಿಹಿಗತಸಿಕ್ಖಾಪದಂ

    Paṭhamagihigatasikkhāpadaṃ

    ೬೫. ಯಾ ಪನ ಭಿಕ್ಖುನೀ ಊನದ್ವಾದಸವಸ್ಸಂ ಗಿಹಿಗತಂ ವುಟ್ಠಾಪೇಯ್ಯ, ಪಾಚಿತ್ತಿಯಂ।

    65. Yā pana bhikkhunī ūnadvādasavassaṃ gihigataṃ vuṭṭhāpeyya, pācittiyaṃ.

    ದುತಿಯಗಿಹಿಗತಸಿಕ್ಖಾಪದಂ

    Dutiyagihigatasikkhāpadaṃ

    ೬೬. ಯಾ ಪನ ಭಿಕ್ಖುನೀ ಪರಿಪುಣ್ಣದ್ವಾದಸವಸ್ಸಂ ಗಿಹಿಗತಂ ದ್ವೇ ವಸ್ಸಾನಿ ಛಸು ಧಮ್ಮೇಸು ಅಸಿಕ್ಖಿತಸಿಕ್ಖಂ ವುಟ್ಠಾಪೇಯ್ಯ, ಪಾಚಿತ್ತಿಯಂ।

    66. Yā pana bhikkhunī paripuṇṇadvādasavassaṃ gihigataṃ dve vassāni chasu dhammesu asikkhitasikkhaṃ vuṭṭhāpeyya, pācittiyaṃ.

    ತತಿಯಗಿಹಿಗತಸಿಕ್ಖಾಪದಂ

    Tatiyagihigatasikkhāpadaṃ

    ೬೭. ಯಾ ಪನ ಭಿಕ್ಖುನೀ ಪರಿಪುಣ್ಣದ್ವಾದಸವಸ್ಸಂ ಗಿಹಿಗತಂ ದ್ವೇ ವಸ್ಸಾನಿ ಛಸು ಧಮ್ಮೇಸು ಸಿಕ್ಖಿತಸಿಕ್ಖಂ ಸಙ್ಘೇನ ಅಸಮ್ಮತಂ ವುಟ್ಠಾಪೇಯ್ಯ, ಪಾಚಿತ್ತಿಯಂ।

    67. Yā pana bhikkhunī paripuṇṇadvādasavassaṃ gihigataṃ dve vassāni chasu dhammesu sikkhitasikkhaṃ saṅghena asammataṃ vuṭṭhāpeyya, pācittiyaṃ.

    ಪಠಮಸಹಜೀವಿನೀಸಿಕ್ಖಾಪದಂ

    Paṭhamasahajīvinīsikkhāpadaṃ

    ೬೮. ಯಾ ಪನ ಭಿಕ್ಖುನೀ ಸಹಜೀವಿನಿಂ ವುಟ್ಠಾಪೇತ್ವಾ ದ್ವೇ ವಸ್ಸಾನಿ ನೇವ ಅನುಗ್ಗಣ್ಹೇಯ್ಯ ನ ಅನುಗ್ಗಣ್ಹಾಪೇಯ್ಯ, ಪಾಚಿತ್ತಿಯಂ।

    68. Yā pana bhikkhunī sahajīviniṃ vuṭṭhāpetvā dve vassāni neva anuggaṇheyya na anuggaṇhāpeyya, pācittiyaṃ.

    ಪವತ್ತಿನೀನಾನುಬನ್ಧನಸಿಕ್ಖಾಪದಂ

    Pavattinīnānubandhanasikkhāpadaṃ

    ೬೯. ಯಾ ಪನ ಭಿಕ್ಖುನೀ ವುಟ್ಠಾಪಿತಂ ಪವತ್ತಿನಿಂ ದ್ವೇ ವಸ್ಸಾನಿ ನಾನುಬನ್ಧೇಯ್ಯ, ಪಾಚಿತ್ತಿಯಂ।

    69. Yā pana bhikkhunī vuṭṭhāpitaṃ pavattiniṃ dve vassāni nānubandheyya, pācittiyaṃ.

    ದುತಿಯಸಹಜೀವಿನೀಸಿಕ್ಖಾಪದಂ

    Dutiyasahajīvinīsikkhāpadaṃ

    ೭೦. ಯಾ ಪನ ಭಿಕ್ಖುನೀ ಸಹಜೀವಿನಿಂ ವುಟ್ಠಾಪೇತ್ವಾ ನೇವ ವೂಪಕಾಸೇಯ್ಯ ನ ವೂಪಕಾಸಾಪೇಯ್ಯ ಅನ್ತಮಸೋ ಛಪ್ಪಞ್ಚಯೋಜನಾನಿಪಿ, ಪಾಚಿತ್ತಿಯಂ।

    70. Yā pana bhikkhunī sahajīviniṃ vuṭṭhāpetvā neva vūpakāseyya na vūpakāsāpeyya antamaso chappañcayojanānipi, pācittiyaṃ.

    ಗಬ್ಭಿನಿವಗ್ಗೋ ಸತ್ತಮೋ।

    Gabbhinivaggo sattamo.

    ಪಠಮಕುಮಾರಿಭೂತಸಿಕ್ಖಾಪದಂ

    Paṭhamakumāribhūtasikkhāpadaṃ

    ೭೧. ಯಾ ಪನ ಭಿಕ್ಖುನೀ ಊನವೀಸತಿವಸ್ಸಂ ಕುಮಾರಿಭೂತಂ ವುಟ್ಠಾಪೇಯ್ಯ, ಪಾಚಿತ್ತಿಯಂ।

    71. Yā pana bhikkhunī ūnavīsativassaṃ kumāribhūtaṃ vuṭṭhāpeyya, pācittiyaṃ.

    ದುತಿಯಕುಮಾರಿಭೂತಸಿಕ್ಖಾಪದಂ

    Dutiyakumāribhūtasikkhāpadaṃ

    ೭೨. ಯಾ ಪನ ಭಿಕ್ಖುನೀ ಪರಿಪುಣ್ಣವೀಸತಿವಸ್ಸಂ ಕುಮಾರಿಭೂತಂ ದ್ವೇ ವಸ್ಸಾನಿ ಛಸು ಧಮ್ಮೇಸು ಅಸಿಕ್ಖಿತಸಿಕ್ಖಂ ವುಟ್ಠಾಪೇಯ್ಯ, ಪಾಚಿತ್ತಿಯಂ।

    72. Yā pana bhikkhunī paripuṇṇavīsativassaṃ kumāribhūtaṃ dve vassāni chasu dhammesu asikkhitasikkhaṃ vuṭṭhāpeyya, pācittiyaṃ.

    ತತಿಯಕುಮಾರಿಭೂತಸಿಕ್ಖಾಪದಂ

    Tatiyakumāribhūtasikkhāpadaṃ

    ೭೩. ಯಾ ಪನ ಭಿಕ್ಖುನೀ ಪರಿಪುಣ್ಣವೀಸತಿವಸ್ಸಂ ಕುಮಾರಿಭೂತಂ ದ್ವೇ ವಸ್ಸಾನಿ ಛಸು ಧಮ್ಮೇಸು ಸಿಕ್ಖಿತಸಿಕ್ಖಂ ಸಙ್ಘೇನ ಅಸಮ್ಮತಂ ವುಟ್ಠಾಪೇಯ್ಯ, ಪಾಚಿತ್ತಿಯಂ।

    73. Yā pana bhikkhunī paripuṇṇavīsativassaṃ kumāribhūtaṃ dve vassāni chasu dhammesu sikkhitasikkhaṃ saṅghena asammataṃ vuṭṭhāpeyya, pācittiyaṃ.

    ಊನದ್ವಾದಸವಸ್ಸಸಿಕ್ಖಾಪದಂ

    Ūnadvādasavassasikkhāpadaṃ

    ೭೪. ಯಾ ಪನ ಭಿಕ್ಖುನೀ ಊನದ್ವಾದಸವಸ್ಸಾ ವುಟ್ಠಾಪೇಯ್ಯ, ಪಾಚಿತ್ತಿಯಂ।

    74. Yā pana bhikkhunī ūnadvādasavassā vuṭṭhāpeyya, pācittiyaṃ.

    ಪರಿಪುಣ್ಣದ್ವಾದಸವಸ್ಸಸಿಕ್ಖಾಪದಂ

    Paripuṇṇadvādasavassasikkhāpadaṃ

    ೭೫. ಯಾ ಪನ ಭಿಕ್ಖುನೀ ಪರಿಪುಣ್ಣದ್ವಾದಸವಸ್ಸಾ ಸಙ್ಘೇನ ಅಸಮ್ಮತಾ ವುಟ್ಠಾಪೇಯ್ಯ, ಪಾಚಿತ್ತಿಯಂ।

    75. Yā pana bhikkhunī paripuṇṇadvādasavassā saṅghena asammatā vuṭṭhāpeyya, pācittiyaṃ.

    ಖಿಯ್ಯನಧಮ್ಮಸಿಕ್ಖಾಪದಂ

    Khiyyanadhammasikkhāpadaṃ

    ೭೬. ಯಾ ಪನ ಭಿಕ್ಖುನೀ ‘‘ಅಲಂ ತಾವ ತೇ, ಅಯ್ಯೇ, ವುಟ್ಠಾಪಿತೇನಾ’’ತಿ ವುಚ್ಚಮಾನಾ ‘‘ಸಾಧೂ’’ತಿ ಪಟಿಸ್ಸುಣಿತ್ವಾ ಸಾ ಪಚ್ಛಾ ಖಿಯ್ಯನಧಮ್ಮಂ ಆಪಜ್ಜೇಯ್ಯ, ಪಾಚಿತ್ತಿಯಂ।

    76. Yā pana bhikkhunī ‘‘alaṃ tāva te, ayye, vuṭṭhāpitenā’’ti vuccamānā ‘‘sādhū’’ti paṭissuṇitvā sā pacchā khiyyanadhammaṃ āpajjeyya, pācittiyaṃ.

    ಪಠಮಸಿಕ್ಖಮಾನನವುಟ್ಠಾಪನಸಿಕ್ಖಾಪದಂ

    Paṭhamasikkhamānanavuṭṭhāpanasikkhāpadaṃ

    ೭೭. ಯಾ ಪನ ಭಿಕ್ಖುನೀ ಸಿಕ್ಖಮಾನಂ ‘‘ಸಚೇ ಮೇ ತ್ವಂ, ಅಯ್ಯೇ, ಚೀವರಂ ದಸ್ಸಸಿ, ಏವಾಹಂ ತಂ ವುಟ್ಠಾಪೇಸ್ಸಾಮೀ’’ತಿ ವತ್ವಾ ಸಾ ಪಚ್ಛಾ ಅನನ್ತರಾಯಿಕಿನೀ ನೇವ ವುಟ್ಠಾಪೇಯ್ಯ, ನ ವುಟ್ಠಾಪನಾಯ ಉಸ್ಸುಕ್ಕಂ ಕರೇಯ್ಯ, ಪಾಚಿತ್ತಿಯಂ।

    77. Yā pana bhikkhunī sikkhamānaṃ ‘‘sace me tvaṃ, ayye, cīvaraṃ dassasi, evāhaṃ taṃ vuṭṭhāpessāmī’’ti vatvā sā pacchā anantarāyikinī neva vuṭṭhāpeyya, na vuṭṭhāpanāya ussukkaṃ kareyya, pācittiyaṃ.

    ದುತಿಯಸಿಕ್ಖಮಾನನವುಟ್ಠಾಪನಸಿಕ್ಖಾಪದಂ

    Dutiyasikkhamānanavuṭṭhāpanasikkhāpadaṃ

    ೭೮. ಯಾ ಪನ ಭಿಕ್ಖುನೀ ಸಿಕ್ಖಮಾನಂ ‘‘ಸಚೇ ಮಂ ತ್ವಂ, ಅಯ್ಯೇ, ದ್ವೇ ವಸ್ಸಾನಿ ಅನುಬನ್ಧಿಸ್ಸಸಿ, ಏವಾಹಂ ತಂ ವುಟ್ಠಾಪೇಸ್ಸಾಮೀ’’ತಿ ವತ್ವಾ ಸಾ ಪಚ್ಛಾ ಅನನ್ತರಾಯಿಕಿನೀ ನೇವ ವುಟ್ಠಾಪೇಯ್ಯ, ನ ವುಟ್ಠಾಪನಾಯ ಉಸ್ಸುಕ್ಕಂ ಕರೇಯ್ಯ, ಪಾಚಿತ್ತಿಯಂ।

    78. Yā pana bhikkhunī sikkhamānaṃ ‘‘sace maṃ tvaṃ, ayye, dve vassāni anubandhissasi, evāhaṃ taṃ vuṭṭhāpessāmī’’ti vatvā sā pacchā anantarāyikinī neva vuṭṭhāpeyya, na vuṭṭhāpanāya ussukkaṃ kareyya, pācittiyaṃ.

    ಸೋಕಾವಾಸಸಿಕ್ಖಾಪದಂ

    Sokāvāsasikkhāpadaṃ

    ೭೯. ಯಾ ಪನ ಭಿಕ್ಖುನೀ ಪುರಿಸಸಂಸಟ್ಠಂ ಕುಮಾರಕಸಂಸಟ್ಠಂ ಚಣ್ಡಿಂ ಸೋಕಾವಾಸಂ ಸಿಕ್ಖಮಾನಂ ವುಟ್ಠಾಪೇಯ್ಯ, ಪಾಚಿತ್ತಿಯಂ।

    79. Yā pana bhikkhunī purisasaṃsaṭṭhaṃ kumārakasaṃsaṭṭhaṃ caṇḍiṃ sokāvāsaṃ sikkhamānaṃ vuṭṭhāpeyya, pācittiyaṃ.

    ಅನನುಞ್ಞಾತಸಿಕ್ಖಾಪದಂ

    Ananuññātasikkhāpadaṃ

    ೮೦. ಯಾ ಪನ ಭಿಕ್ಖುನೀ ಮಾತಾಪಿತೂಹಿ ವಾ ಸಾಮಿಕೇನ ವಾ ಅನನುಞ್ಞಾತಂ ಸಿಕ್ಖಮಾನಂ ವುಟ್ಠಾಪೇಯ್ಯ, ಪಾಚಿತ್ತಿಯಂ।

    80. Yā pana bhikkhunī mātāpitūhi vā sāmikena vā ananuññātaṃ sikkhamānaṃ vuṭṭhāpeyya, pācittiyaṃ.

    ಪಾರಿವಾಸಿಕಸಿಕ್ಖಾಪದಂ

    Pārivāsikasikkhāpadaṃ

    ೮೧. ಯಾ ಪನ ಭಿಕ್ಖುನೀ ಪಾರಿವಾಸಿಕಛನ್ದದಾನೇನ ಸಿಕ್ಖಮಾನಂ ವುಟ್ಠಾಪೇಯ್ಯ, ಪಾಚಿತ್ತಿಯಂ।

    81. Yā pana bhikkhunī pārivāsikachandadānena sikkhamānaṃ vuṭṭhāpeyya, pācittiyaṃ.

    ಅನುವಸ್ಸಸಿಕ್ಖಾಪದಂ

    Anuvassasikkhāpadaṃ

    ೮೨. ಯಾ ಪನ ಭಿಕ್ಖುನೀ ಅನುವಸ್ಸಂ ವುಟ್ಠಾಪೇಯ್ಯ, ಪಾಚಿತ್ತಿಯಂ।

    82. Yā pana bhikkhunī anuvassaṃ vuṭṭhāpeyya, pācittiyaṃ.

    ಏಕವಸ್ಸಸಿಕ್ಖಾಪದಂ

    Ekavassasikkhāpadaṃ

    ೮೩. ಯಾ ಪನ ಭಿಕ್ಖುನೀ ಏಕಂ ವಸ್ಸಂ ದ್ವೇ ವುಟ್ಠಾಪೇಯ್ಯ, ಪಾಚಿತ್ತಿಯಂ।

    83. Yā pana bhikkhunī ekaṃ vassaṃ dve vuṭṭhāpeyya, pācittiyaṃ.

    ಕುಮಾರಿಭೂತವಗ್ಗೋ ಅಟ್ಠಮೋ।

    Kumāribhūtavaggo aṭṭhamo.

    ಛತ್ತುಪಾಹನಸಿಕ್ಖಾಪದಂ

    Chattupāhanasikkhāpadaṃ

    ೮೪. ಯಾ ಪನ ಭಿಕ್ಖುನೀ ಅಗಿಲಾನಾ ಛತ್ತುಪಾಹನಂ ಧಾರೇಯ್ಯ, ಪಾಚಿತ್ತಿಯಂ।

    84. Yā pana bhikkhunī agilānā chattupāhanaṃ dhāreyya, pācittiyaṃ.

    ಯಾನಸಿಕ್ಖಾಪದಂ

    Yānasikkhāpadaṃ

    ೮೫. ಯಾ ಪನ ಭಿಕ್ಖುನೀ ಅಗಿಲಾನಾ ಯಾನೇನ ಯಾಯೇಯ್ಯ, ಪಾಚಿತ್ತಿಯಂ।

    85. Yā pana bhikkhunī agilānā yānena yāyeyya, pācittiyaṃ.

    ಸಙ್ಘಾಣಿಸಿಕ್ಖಾಪದಂ

    Saṅghāṇisikkhāpadaṃ

    ೮೬. ಯಾ ಪನ ಭಿಕ್ಖುನೀ ಸಙ್ಘಾಣಿಂ ಧಾರೇಯ್ಯ, ಪಾಚಿತ್ತಿಯಂ।

    86. Yā pana bhikkhunī saṅghāṇiṃ dhāreyya, pācittiyaṃ.

    ಇತ್ಥಾಲಙ್ಕಾರಸಿಕ್ಖಾಪದಂ

    Itthālaṅkārasikkhāpadaṃ

    ೮೭. ಯಾ ಪನ ಭಿಕ್ಖುನೀ ಇತ್ಥಾಲಙ್ಕಾರಂ ಧಾರೇಯ್ಯ, ಪಾಚಿತ್ತಿಯಂ।

    87. Yā pana bhikkhunī itthālaṅkāraṃ dhāreyya, pācittiyaṃ.

    ಗನ್ಧವಣ್ಣಕಸಿಕ್ಖಾಪದಂ

    Gandhavaṇṇakasikkhāpadaṃ

    ೮೮. ಯಾ ಪನ ಭಿಕ್ಖುನೀ ಗನ್ಧವಣ್ಣಕೇನ ನಹಾಯೇಯ್ಯ, ಪಾಚಿತ್ತಿಯಂ।

    88. Yā pana bhikkhunī gandhavaṇṇakena nahāyeyya, pācittiyaṃ.

    ವಾಸಿತಕಸಿಕ್ಖಾಪದಂ

    Vāsitakasikkhāpadaṃ

    ೮೯. ಯಾ ಪನ ಭಿಕ್ಖುನೀ ವಾಸಿತಕೇನ ಪಿಞ್ಞಾಕೇನ ನಹಾಯೇಯ್ಯ, ಪಾಚಿತ್ತಿಯಂ।

    89. Yā pana bhikkhunī vāsitakena piññākena nahāyeyya, pācittiyaṃ.

    ಭಿಕ್ಖುನಿಉಮ್ಮದ್ದಾಪನಸಿಕ್ಖಾಪದಂ

    Bhikkhuniummaddāpanasikkhāpadaṃ

    ೯೦. ಯಾ ಪನ ಭಿಕ್ಖುನೀ ಭಿಕ್ಖುನಿಯಾ ಉಮ್ಮದ್ದಾಪೇಯ್ಯ ವಾ ಪರಿಮದ್ದಾಪೇಯ್ಯ ವಾ, ಪಾಚಿತ್ತಿಯಂ।

    90. Yā pana bhikkhunī bhikkhuniyā ummaddāpeyya vā parimaddāpeyya vā, pācittiyaṃ.

    ಸಿಕ್ಖಮಾನಉಮ್ಮದ್ದಾಪನಸಿಕ್ಖಾಪದಂ

    Sikkhamānaummaddāpanasikkhāpadaṃ

    ೯೧. ಯಾ ಪನ ಭಿಕ್ಖುನೀ ಸಿಕ್ಖಮಾನಾಯ ಉಮ್ಮದ್ದಾಪೇಯ್ಯ ವಾ ಪರಿಮದ್ದಾಪೇಯ್ಯ ವಾ, ಪಾಚಿತ್ತಿಯಂ।

    91. Yā pana bhikkhunī sikkhamānāya ummaddāpeyya vā parimaddāpeyya vā, pācittiyaṃ.

    ಸಾಮಣೇರೀಉಮ್ಮದ್ದಾಪನಸಿಕ್ಖಾಪದಂ

    Sāmaṇerīummaddāpanasikkhāpadaṃ

    ೯೨. ಯಾ ಪನ ಭಿಕ್ಖುನೀ ಸಾಮಣೇರಿಯಾ ಉಮ್ಮದ್ದಾಪೇಯ್ಯ ವಾ ಪರಿಮದ್ದಾಪೇಯ್ಯ ವಾ, ಪಾಚಿತ್ತಿಯಂ।

    92. Yā pana bhikkhunī sāmaṇeriyā ummaddāpeyya vā parimaddāpeyya vā, pācittiyaṃ.

    ಗಿಹಿನಿಉಮ್ಮದ್ದಾಪನಸಿಕ್ಖಾಪದಂ

    Gihiniummaddāpanasikkhāpadaṃ

    ೯೩. ಯಾ ಪನ ಭಿಕ್ಖುನೀ ಗಿಹಿನಿಯಾ ಉಮ್ಮದ್ದಾಪೇಯ್ಯ ವಾ ಪರಿಮದ್ದಾಪೇಯ್ಯ ವಾ, ಪಾಚಿತ್ತಿಯಂ।

    93. Yā pana bhikkhunī gihiniyā ummaddāpeyya vā parimaddāpeyya vā, pācittiyaṃ.

    ಅನಾಪುಚ್ಛಾಸಿಕ್ಖಾಪದಂ

    Anāpucchāsikkhāpadaṃ

    ೯೪. ಯಾ ಪನ ಭಿಕ್ಖುನೀ ಭಿಕ್ಖುಸ್ಸ ಪುರತೋ ಅನಾಪುಚ್ಛಾ ಆಸನೇ ನಿಸೀದೇಯ್ಯ, ಪಾಚಿತ್ತಿಯಂ।

    94. Yā pana bhikkhunī bhikkhussa purato anāpucchā āsane nisīdeyya, pācittiyaṃ.

    ಪಞ್ಹಾಪುಚ್ಛನಸಿಕ್ಖಾಪದಂ

    Pañhāpucchanasikkhāpadaṃ

    ೯೫. ಯಾ ಪನ ಭಿಕ್ಖುನೀ ಅನೋಕಾಸಕತಂ ಭಿಕ್ಖುಂ ಪಞ್ಹಂ ಪುಚ್ಛೇಯ್ಯ, ಪಾಚಿತ್ತಿಯಂ।

    95. Yā pana bhikkhunī anokāsakataṃ bhikkhuṃ pañhaṃ puccheyya, pācittiyaṃ.

    ಅಸಂಕಚ್ಚಿಕಸಿಕ್ಖಾಪದಂ

    Asaṃkaccikasikkhāpadaṃ

    ೯೬. ಯಾ ಪನ ಭಿಕ್ಖುನೀ ಅಸಂಕಚ್ಚಿಕಾ ಗಾಮಂ ಪವಿಸೇಯ್ಯ, ಪಾಚಿತ್ತಿಯಂ।

    96. Yā pana bhikkhunī asaṃkaccikā gāmaṃ paviseyya, pācittiyaṃ.

    ಛತ್ತುಪಾಹನವಗ್ಗೋ ನವಮೋ।

    Chattupāhanavaggo navamo.

    ಮುಸಾವಾದಸಿಕ್ಖಾಪದಂ

    Musāvādasikkhāpadaṃ

    ೯೭. ಸಮ್ಪಜಾನಮುಸಾವಾದೇ ಪಾಚಿತ್ತಿಯಂ।

    97. Sampajānamusāvāde pācittiyaṃ.

    ಓಮಸವಾದಸಿಕ್ಖಾಪದಂ

    Omasavādasikkhāpadaṃ

    ೯೮. ಓಮಸವಾದೇ ಪಾಚಿತ್ತಿಯಂ।

    98. Omasavāde pācittiyaṃ.

    ಪೇಸುಞ್ಞಸಿಕ್ಖಾಪದಂ

    Pesuññasikkhāpadaṃ

    ೯೯. ಭಿಕ್ಖುನಿಪೇಸುಞ್ಞೇ ಪಾಚಿತ್ತಿಯಂ।

    99. Bhikkhunipesuññe pācittiyaṃ.

    ಪದಸೋಧಮ್ಮಸಿಕ್ಖಾಪದಂ

    Padasodhammasikkhāpadaṃ

    ೧೦೦. ಯಾ ಪನ ಭಿಕ್ಖುನೀ ಅನುಪಸಮ್ಪನ್ನಂ ಪದಸೋ ಧಮ್ಮಂ ವಾಚೇಯ್ಯ, ಪಾಚಿತ್ತಿಯಂ।

    100. Yā pana bhikkhunī anupasampannaṃ padaso dhammaṃ vāceyya, pācittiyaṃ.

    ಪಠಮಸಹಸೇಯ್ಯಸಿಕ್ಖಾಪದಂ

    Paṭhamasahaseyyasikkhāpadaṃ

    ೧೦೧. ಯಾ ಪನ ಭಿಕ್ಖುನೀ ಅನುಪಸಮ್ಪನ್ನಾಯ ಉತ್ತರಿದಿರತ್ತತಿರತ್ತಂ ಸಹಸೇಯ್ಯಂ ಕಪ್ಪೇಯ್ಯ, ಪಾಚಿತ್ತಿಯಂ।

    101. Yā pana bhikkhunī anupasampannāya uttaridirattatirattaṃ sahaseyyaṃ kappeyya, pācittiyaṃ.

    ದುತಿಯಸಹಸೇಯ್ಯಸಿಕ್ಖಾಪದಂ

    Dutiyasahaseyyasikkhāpadaṃ

    ೧೦೨. ಯಾ ಪನ ಭಿಕ್ಖುನೀ ಪುರಿಸೇನ ಸಹಸೇಯ್ಯಂ ಕಪ್ಪೇಯ್ಯ, ಪಾಚಿತ್ತಿಯಂ।

    102. Yā pana bhikkhunī purisena sahaseyyaṃ kappeyya, pācittiyaṃ.

    ಧಮ್ಮದೇಸನಾಸಿಕ್ಖಾಪದಂ

    Dhammadesanāsikkhāpadaṃ

    ೧೦೩. ಯಾ ಪನ ಭಿಕ್ಖುನೀ ಪುರಿಸಸ್ಸ ಉತ್ತರಿಛಪ್ಪಞ್ಚವಾಚಾಹಿ ಧಮ್ಮಂ ದೇಸೇಯ್ಯ ಅಞ್ಞತ್ರ ವಿಞ್ಞುನಾ ಇತ್ಥಿವಿಗ್ಗಹೇನ, ಪಾಚಿತ್ತಿಯಂ।

    103. Yā pana bhikkhunī purisassa uttarichappañcavācāhi dhammaṃ deseyya aññatra viññunā itthiviggahena, pācittiyaṃ.

    ಭೂತಾರೋಚನಸಿಕ್ಖಾಪದಂ

    Bhūtārocanasikkhāpadaṃ

    ೧೦೪. ಯಾ ಪನ ಭಿಕ್ಖುನೀ ಅನುಪಸಮ್ಪನ್ನಾಯ ಉತ್ತರಿಮನುಸ್ಸಧಮ್ಮಂ ಆರೋಚೇಯ್ಯ, ಭೂತಸ್ಮಿಂ ಪಾಚಿತ್ತಿಯಂ।

    104. Yā pana bhikkhunī anupasampannāya uttarimanussadhammaṃ āroceyya, bhūtasmiṃ pācittiyaṃ.

    ದುಟ್ಠುಲ್ಲಾರೋಚನಸಿಕ್ಖಾಪದಂ

    Duṭṭhullārocanasikkhāpadaṃ

    ೧೦೫. ಯಾ ಪನ ಭಿಕ್ಖುನೀ ಭಿಕ್ಖುನಿಯಾ ದುಟ್ಠುಲ್ಲಂ ಆಪತ್ತಿಂ ಅನುಪಸಮ್ಪನ್ನಾಯ ಆರೋಚೇಯ್ಯ ಅಞ್ಞತ್ರ ಭಿಕ್ಖುನಿಸಮ್ಮುತಿಯಾ, ಪಾಚಿತ್ತಿಯಂ।

    105. Yā pana bhikkhunī bhikkhuniyā duṭṭhullaṃ āpattiṃ anupasampannāya āroceyya aññatra bhikkhunisammutiyā, pācittiyaṃ.

    ಪಥವೀಖಣನಸಿಕ್ಖಾಪದಂ

    Pathavīkhaṇanasikkhāpadaṃ

    ೧೦೬. ಯಾ ಪನ ಭಿಕ್ಖುನೀ ಪಥವಿಂ ಖಣೇಯ್ಯ ವಾ ಖಣಾಪೇಯ್ಯ ವಾ, ಪಾಚಿತ್ತಿಯಂ।

    106. Yā pana bhikkhunī pathaviṃ khaṇeyya vā khaṇāpeyya vā, pācittiyaṃ.

    ಮುಸಾವಾದವಗ್ಗೋ ದಸಮೋ।

    Musāvādavaggo dasamo.

    ಭೂತಗಾಮಸಿಕ್ಖಾಪದಂ

    Bhūtagāmasikkhāpadaṃ

    ೧೦೭. ಭೂತಗಾಮಪಾತಬ್ಯತಾಯ ಪಾಚಿತ್ತಿಯಂ।

    107. Bhūtagāmapātabyatāya pācittiyaṃ.

    ಅಞ್ಞವಾದಕಸಿಕ್ಖಾಪದಂ

    Aññavādakasikkhāpadaṃ

    ೧೦೮. ಅಞ್ಞವಾದಕೇ, ವಿಹೇಸಕೇ ಪಾಚಿತ್ತಿಯಂ।

    108. Aññavādake, vihesake pācittiyaṃ.

    ಉಜ್ಝಾಪನಕಸಿಕ್ಖಾಪದಂ

    Ujjhāpanakasikkhāpadaṃ

    ೧೦೯. ಉಜ್ಝಾಪನಕೇ, ಖಿಯ್ಯನಕೇ ಪಾಚಿತ್ತಿಯಂ।

    109. Ujjhāpanake, khiyyanake pācittiyaṃ.

    ಪಠಮಸೇನಾಸನಸಿಕ್ಖಾಪದಂ

    Paṭhamasenāsanasikkhāpadaṃ

    ೧೧೦. ಯಾ ಪನ ಭಿಕ್ಖುನೀ ಸಙ್ಘಿಕಂ ಮಞ್ಚಂ ವಾ ಪೀಠಂ ವಾ ಭಿಸಿಂ ವಾ ಕೋಚ್ಛಂ ವಾ ಅಜ್ಝೋಕಾಸೇ ಸನ್ಥರಿತ್ವಾ ವಾ ಸನ್ಥರಾಪೇತ್ವಾ ವಾ ತಂ ಪಕ್ಕಮನ್ತೀ ನೇವ ಉದ್ಧರೇಯ್ಯ, ನ ಉದ್ಧರಾಪೇಯ್ಯ, ಅನಾಪುಚ್ಛಂ ವಾ ಗಚ್ಛೇಯ್ಯ, ಪಾಚಿತ್ತಿಯಂ।

    110. Yā pana bhikkhunī saṅghikaṃ mañcaṃ vā pīṭhaṃ vā bhisiṃ vā kocchaṃ vā ajjhokāse santharitvā vā santharāpetvā vā taṃ pakkamantī neva uddhareyya, na uddharāpeyya, anāpucchaṃ vā gaccheyya, pācittiyaṃ.

    ದುತಿಯಸೇನಾಸನಸಿಕ್ಖಾಪದಂ

    Dutiyasenāsanasikkhāpadaṃ

    ೧೧೧. ಯಾ ಪನ ಭಿಕ್ಖುನೀ ಸಙ್ಘಿಕೇ ವಿಹಾರೇ ಸೇಯ್ಯಂ ಸನ್ಥರಿತ್ವಾ ವಾ ಸನ್ಥರಾಪೇತ್ವಾ ವಾ ತಂ ಪಕ್ಕಮನ್ತೀ ನೇವ ಉದ್ಧರೇಯ್ಯ, ನ ಉದ್ಧರಾಪೇಯ್ಯ, ಅನಾಪುಚ್ಛಂ ವಾ ಗಚ್ಛೇಯ್ಯ, ಪಾಚಿತ್ತಿಯಂ।

    111. Yā pana bhikkhunī saṅghike vihāre seyyaṃ santharitvā vā santharāpetvā vā taṃ pakkamantī neva uddhareyya, na uddharāpeyya, anāpucchaṃ vā gaccheyya, pācittiyaṃ.

    ಅನುಪಖಜ್ಜಸಿಕ್ಖಾಪದಂ

    Anupakhajjasikkhāpadaṃ

    ೧೧೨. ಯಾ ಪನ ಭಿಕ್ಖುನೀ ಸಙ್ಘಿಕೇ ವಿಹಾರೇ ಜಾನಂ ಪುಬ್ಬುಪಗತಂ ಭಿಕ್ಖುನಿಂ ಅನುಪಖಜ್ಜ ಸೇಯ್ಯಂ ಕಪ್ಪೇಯ್ಯ ‘‘ಯಸ್ಸಾ ಸಮ್ಬಾಧೋ ಭವಿಸ್ಸತಿ, ಸಾ ಪಕ್ಕಮಿಸ್ಸತೀ’’ತಿ ಏತದೇವ ಪಚ್ಚಯಂ ಕರಿತ್ವಾ ಅನಞ್ಞಂ, ಪಾಚಿತ್ತಿಯಂ।

    112. Yā pana bhikkhunī saṅghike vihāre jānaṃ pubbupagataṃ bhikkhuniṃ anupakhajja seyyaṃ kappeyya ‘‘yassā sambādho bhavissati, sā pakkamissatī’’ti etadeva paccayaṃ karitvā anaññaṃ, pācittiyaṃ.

    ನಿಕ್ಕಡ್ಢನಸಿಕ್ಖಾಪದಂ

    Nikkaḍḍhanasikkhāpadaṃ

    ೧೧೩. ಯಾ ಪನ ಭಿಕ್ಖುನೀ ಭಿಕ್ಖುನಿಂ ಕುಪಿತಾ ಅನತ್ತಮನಾ ಸಙ್ಘಿಕಾ ವಿಹಾರಾ ನಿಕ್ಕಡ್ಢೇಯ್ಯ ವಾ ನಿಕ್ಕಡ್ಢಾಪೇಯ್ಯ ವಾ, ಪಾಚಿತ್ತಿಯಂ।

    113. Yā pana bhikkhunī bhikkhuniṃ kupitā anattamanā saṅghikā vihārā nikkaḍḍheyya vā nikkaḍḍhāpeyya vā, pācittiyaṃ.

    ವೇಹಾಸಕುಟಿಸಿಕ್ಖಾಪದಂ

    Vehāsakuṭisikkhāpadaṃ

    ೧೧೪. ಯಾ ಪನ ಭಿಕ್ಖುನೀ ಸಙ್ಘಿಕೇ ವಿಹಾರೇ ಉಪರಿವೇಹಾಸಕುಟಿಯಾ ಆಹಚ್ಚಪಾದಕಂ ಮಞ್ಚಂ ವಾ ಪೀಠಂ ವಾ ಅಭಿನಿಸೀದೇಯ್ಯ ವಾ ಅಭಿನಿಪಜ್ಜೇಯ್ಯ ವಾ, ಪಾಚಿತ್ತಿಯಂ।

    114. Yā pana bhikkhunī saṅghike vihāre uparivehāsakuṭiyā āhaccapādakaṃ mañcaṃ vā pīṭhaṃ vā abhinisīdeyya vā abhinipajjeyya vā, pācittiyaṃ.

    ಮಹಲ್ಲಕವಿಹಾರಸಿಕ್ಖಾಪದಂ

    Mahallakavihārasikkhāpadaṃ

    ೧೧೫. ಮಹಲ್ಲಕಂ ಪನ ಭಿಕ್ಖುನಿಯಾ ವಿಹಾರಂ ಕಾರಯಮಾನಾಯ ಯಾವ ದ್ವಾರಕೋಸಾ ಅಗ್ಗಳಟ್ಠಪನಾಯ, ಆಲೋಕಸನ್ಧಿಪರಿಕಮ್ಮಾಯ ದ್ವತ್ತಿಚ್ಛದನಸ್ಸ ಪರಿಯಾಯಂ ಅಪ್ಪಹರಿತೇ ಠಿತಾಯ ಅಧಿಟ್ಠಾತಬ್ಬಂ। ತತೋ ಚೇ ಉತ್ತರಿ ಅಪ್ಪಹರಿತೇಪಿ ಠಿತಾ ಅಧಿಟ್ಠಹೇಯ್ಯ, ಪಾಚಿತ್ತಿಯಂ।

    115. Mahallakaṃ pana bhikkhuniyā vihāraṃ kārayamānāya yāva dvārakosā aggaḷaṭṭhapanāya, ālokasandhiparikammāya dvatticchadanassa pariyāyaṃ appaharite ṭhitāya adhiṭṭhātabbaṃ. Tato ce uttari appaharitepi ṭhitā adhiṭṭhaheyya, pācittiyaṃ.

    ಸಪ್ಪಾಣಕಸಿಕ್ಖಾಪದಂ

    Sappāṇakasikkhāpadaṃ

    ೧೧೬. ಯಾ ಪನ ಭಿಕ್ಖುನೀ ಜಾನಂ ಸಪ್ಪಾಣಕಂ ಉದಕಂ ತಿಣಂ ವಾ ಮತ್ತಿಕಂ ವಾ ಸಿಞ್ಚೇಯ್ಯ ವಾ ಸಿಞ್ಚಾಪೇಯ್ಯ ವಾ, ಪಾಚಿತ್ತಿಯಂ।

    116. Yā pana bhikkhunī jānaṃ sappāṇakaṃ udakaṃ tiṇaṃ vā mattikaṃ vā siñceyya vā siñcāpeyya vā, pācittiyaṃ.

    ಭೂತಗಾಮವಗ್ಗೋ ಏಕಾದಸಮೋ।

    Bhūtagāmavaggo ekādasamo.

    ಆವಸಥಪಿಣ್ಡಸಿಕ್ಖಾಪದಂ

    Āvasathapiṇḍasikkhāpadaṃ

    ೧೧೭. ಅಗಿಲಾನಾಯ ಭಿಕ್ಖುನಿಯಾ ಏಕೋ ಆವಸಥಪಿಣ್ಡೋ ಭುಞ್ಜಿತಬ್ಬೋ। ತತೋ ಚೇ ಉತ್ತರಿ ಭುಞ್ಜೇಯ್ಯ, ಪಾಚಿತ್ತಿಯಂ।

    117. Agilānāya bhikkhuniyā eko āvasathapiṇḍo bhuñjitabbo. Tato ce uttari bhuñjeyya, pācittiyaṃ.

    ಗಣಭೋಜನಸಿಕ್ಖಾಪದಂ

    Gaṇabhojanasikkhāpadaṃ

    ೧೧೮. ಗಣಭೋಜನೇ ಅಞ್ಞತ್ರ ಸಮಯಾ ಪಾಚಿತ್ತಿಯಂ। ತತ್ಥಾಯಂ ಸಮಯೋ, ಗಿಲಾನಸಮಯೋ, ಚೀವರದಾನಸಮಯೋ , ಚೀವರಕಾರಸಮಯೋ, ಅದ್ಧಾನಗಮನಸಮಯೋ, ನಾವಾಭಿರುಹನಸಮಯೋ, ಮಹಾಸಮಯೋ, ಸಮಣಭತ್ತಸಮಯೋ, ಅಯಂ ತತ್ಥ ಸಮಯೋ।

    118. Gaṇabhojane aññatra samayā pācittiyaṃ. Tatthāyaṃ samayo, gilānasamayo, cīvaradānasamayo , cīvarakārasamayo, addhānagamanasamayo, nāvābhiruhanasamayo, mahāsamayo, samaṇabhattasamayo, ayaṃ tattha samayo.

    ಕಾಣಮಾತುಸಿಕ್ಖಾಪದಂ

    Kāṇamātusikkhāpadaṃ

    ೧೧೯. ಭಿಕ್ಖುನಿಂ ಪನೇವ ಕುಲಂ ಉಪಗತಂ ಪೂವೇಹಿ ವಾ ಮನ್ಥೇಹಿ ವಾ ಅಭಿಹಟ್ಠುಂ ಪವಾರೇಯ್ಯ, ಆಕಙ್ಖಮಾನಾಯ ಭಿಕ್ಖುನಿಯಾ ದ್ವತ್ತಿಪತ್ತಪೂರಾ ಪಟಿಗ್ಗಹೇತಬ್ಬಾ। ತತೋ ಚೇ ಉತ್ತರಿ ಪಟಿಗ್ಗಣ್ಹೇಯ್ಯ, ಪಾಚಿತ್ತಿಯಂ। ದ್ವತ್ತಿಪತ್ತಪೂರೇ ಪಟಿಗ್ಗಹೇತ್ವಾ ತತೋ ನೀಹರಿತ್ವಾ ಭಿಕ್ಖುನೀಹಿ ಸದ್ಧಿಂ ಸಂವಿಭಜಿತಬ್ಬಂ, ಅಯಂ ತತ್ಥ ಸಾಮೀಚಿ।

    119. Bhikkhuniṃ paneva kulaṃ upagataṃ pūvehi vā manthehi vā abhihaṭṭhuṃ pavāreyya, ākaṅkhamānāya bhikkhuniyā dvattipattapūrā paṭiggahetabbā. Tato ce uttari paṭiggaṇheyya, pācittiyaṃ. Dvattipattapūre paṭiggahetvā tato nīharitvā bhikkhunīhi saddhiṃ saṃvibhajitabbaṃ, ayaṃ tattha sāmīci.

    ವಿಕಾಲಭೋಜನಸಿಕ್ಖಾಪದಂ

    Vikālabhojanasikkhāpadaṃ

    ೧೨೦. ಯಾ ಪನ ಭಿಕ್ಖುನೀ ವಿಕಾಲೇ ಖಾದನೀಯಂ ವಾ ಭೋಜನೀಯಂ ವಾ ಖಾದೇಯ್ಯ ವಾ ಭುಞ್ಜೇಯ್ಯ ವಾ, ಪಾಚಿತ್ತಿಯಂ।

    120. Yā pana bhikkhunī vikāle khādanīyaṃ vā bhojanīyaṃ vā khādeyya vā bhuñjeyya vā, pācittiyaṃ.

    ಸನ್ನಿಧಿಕಾರಕಸಿಕ್ಖಾಪದಂ

    Sannidhikārakasikkhāpadaṃ

    ೧೨೧. ಯಾ ಪನ ಭಿಕ್ಖುನೀ ಸನ್ನಿಧಿಕಾರಕಂ ಖಾದನೀಯಂ ವಾ ಭೋಜನೀಯಂ ವಾ ಖಾದೇಯ್ಯ ವಾ ಭುಞ್ಜೇಯ್ಯ ವಾ, ಪಾಚಿತ್ತಿಯಂ।

    121. Yā pana bhikkhunī sannidhikārakaṃ khādanīyaṃ vā bhojanīyaṃ vā khādeyya vā bhuñjeyya vā, pācittiyaṃ.

    ದನ್ತಪೋನಸಿಕ್ಖಾಪದಂ

    Dantaponasikkhāpadaṃ

    ೧೨೨. ಯಾ ಪನ ಭಿಕ್ಖುನೀ ಅದಿನ್ನಂ ಮುಖದ್ವಾರಂ ಆಹಾರಂ ಆಹರೇಯ್ಯ ಅಞ್ಞತ್ರ ಉದಕದನ್ತಪೋನಾ, ಪಾಚಿತ್ತಿಯಂ।

    122. Yā pana bhikkhunī adinnaṃ mukhadvāraṃ āhāraṃ āhareyya aññatra udakadantaponā, pācittiyaṃ.

    ಉಯ್ಯೋಜನಸಿಕ್ಖಾಪದಂ

    Uyyojanasikkhāpadaṃ

    ೧೨೩. ಯಾ ಪನ ಭಿಕ್ಖುನೀ ಭಿಕ್ಖುನಿಂ ‘‘ಏಹಾಯ್ಯೇ, ಗಾಮಂ ವಾ ನಿಗಮಂ ವಾ ಪಿಣ್ಡಾಯ ಪವಿಸಿಸ್ಸಾಮಾ’’ತಿ ತಸ್ಸಾ ದಾಪೇತ್ವಾ ವಾ ಅದಾಪೇತ್ವಾ ವಾ ಉಯ್ಯೋಜೇಯ್ಯ ‘‘ಗಚ್ಛಾಯ್ಯೇ, ನ ಮೇ ತಯಾ ಸದ್ಧಿಂ ಕಥಾ ವಾ ನಿಸಜ್ಜಾ ವಾ ಫಾಸು ಹೋತಿ, ಏಕಿಕಾಯ ಮೇ ಕಥಾ ವಾ ನಿಸಜ್ಜಾ ವಾ ಫಾಸು ಹೋತೀ’’ತಿ ಏತದೇವ ಪಚ್ಚಯಂ ಕರಿತ್ವಾ ಅನಞ್ಞಂ, ಪಾಚಿತ್ತಿಯಂ।

    123. Yā pana bhikkhunī bhikkhuniṃ ‘‘ehāyye, gāmaṃ vā nigamaṃ vā piṇḍāya pavisissāmā’’ti tassā dāpetvā vā adāpetvā vā uyyojeyya ‘‘gacchāyye, na me tayā saddhiṃ kathā vā nisajjā vā phāsu hoti, ekikāya me kathā vā nisajjā vā phāsu hotī’’ti etadeva paccayaṃ karitvā anaññaṃ, pācittiyaṃ.

    ಸಭೋಜನಸಿಕ್ಖಾಪದಂ

    Sabhojanasikkhāpadaṃ

    ೧೨೪. ಯಾ ಪನ ಭಿಕ್ಖುನೀ ಸಭೋಜನೇ ಕುಲೇ ಅನುಪಖಜ್ಜ ನಿಸಜ್ಜಂ ಕಪ್ಪೇಯ್ಯ, ಪಾಚಿತ್ತಿಯಂ।

    124. Yā pana bhikkhunī sabhojane kule anupakhajja nisajjaṃ kappeyya, pācittiyaṃ.

    ರಹೋಪಟಿಚ್ಛನ್ನಸಿಕ್ಖಾಪದಂ

    Rahopaṭicchannasikkhāpadaṃ

    ೧೨೫. ಯಾ ಪನ ಭಿಕ್ಖುನೀ ಪುರಿಸೇನ ಸದ್ಧಿಂ ರಹೋ ಪಟಿಚ್ಛನ್ನೇ ಆಸನೇ ನಿಸಜ್ಜಂ ಕಪ್ಪೇಯ್ಯ, ಪಾಚಿತ್ತಿಯಂ।

    125. Yā pana bhikkhunī purisena saddhiṃ raho paṭicchanne āsane nisajjaṃ kappeyya, pācittiyaṃ.

    ರಹೋನಿಸಜ್ಜಸಿಕ್ಖಾಪದಂ

    Rahonisajjasikkhāpadaṃ

    ೧೨೬. ಯಾ ಪನ ಭಿಕ್ಖುನೀ ಪುರಿಸೇನ ಸದ್ಧಿಂ ಏಕೇನೇಕಾ ರಹೋ ನಿಸಜ್ಜಂ ಕಪ್ಪೇಯ್ಯ, ಪಾಚಿತ್ತಿಯಂ।

    126. Yā pana bhikkhunī purisena saddhiṃ ekenekā raho nisajjaṃ kappeyya, pācittiyaṃ.

    ಭೋಜನವಗ್ಗೋ ದ್ವಾದಸಮೋ।

    Bhojanavaggo dvādasamo.

    ಚಾರಿತ್ತಸಿಕ್ಖಾಪದಂ

    Cārittasikkhāpadaṃ

    ೧೨೭. ಯಾ ಪನ ಭಿಕ್ಖುನೀ ನಿಮನ್ತಿತಾ ಸಭತ್ತಾ ಸಮಾನಾ ಸನ್ತಿಂ ಭಿಕ್ಖುನಿಂ ಅನಾಪುಚ್ಛಾ ಪುರೇಭತ್ತಂ ವಾ ಪಚ್ಛಾಭತ್ತಂ ವಾ ಕುಲೇಸು ಚಾರಿತ್ತಂ ಆಪಜ್ಜೇಯ್ಯ ಅಞ್ಞತ್ರ ಸಮಯಾ, ಪಾಚಿತ್ತಿಯಂ। ತತ್ಥಾಯಂ ಸಮಯೋ, ಚೀವರದಾನಸಮಯೋ, ಚೀವರಕಾರಸಮಯೋ, ಅಯಂ ತತ್ಥ ಸಮಯೋ।

    127. Yā pana bhikkhunī nimantitā sabhattā samānā santiṃ bhikkhuniṃ anāpucchā purebhattaṃ vā pacchābhattaṃ vā kulesu cārittaṃ āpajjeyya aññatra samayā, pācittiyaṃ. Tatthāyaṃ samayo, cīvaradānasamayo, cīvarakārasamayo, ayaṃ tattha samayo.

    ಮಹಾನಾಮಸಿಕ್ಖಾಪದಂ

    Mahānāmasikkhāpadaṃ

    ೧೨೮. ಅಗಿಲಾನಾಯ ಭಿಕ್ಖುನಿಯಾ ಚತುಮಾಸಪ್ಪಚ್ಚಯಪವಾರಣಾ ಸಾದಿತಬ್ಬಾ ಅಞ್ಞತ್ರ ಪುನಪವಾರಣಾಯ, ಅಞ್ಞತ್ರ ನಿಚ್ಚಪವಾರಣಾಯ। ತತೋ ಚೇ ಉತ್ತರಿ ಸಾದಿಯೇಯ್ಯ, ಪಾಚಿತ್ತಿಯಂ।

    128. Agilānāya bhikkhuniyā catumāsappaccayapavāraṇā sāditabbā aññatra punapavāraṇāya, aññatra niccapavāraṇāya. Tato ce uttari sādiyeyya, pācittiyaṃ.

    ಉಯ್ಯುತ್ತಸೇನಾಸಿಕ್ಖಾಪದಂ

    Uyyuttasenāsikkhāpadaṃ

    ೧೨೯. ಯಾ ಪನ ಭಿಕ್ಖುನೀ ಉಯ್ಯುತ್ತಂ ಸೇನಂ ದಸ್ಸನಾಯ ಗಚ್ಛೇಯ್ಯ ಅಞ್ಞತ್ರ ತಥಾರೂಪಪ್ಪಚ್ಚಯಾ, ಪಾಚಿತ್ತಿಯಂ।

    129. Yā pana bhikkhunī uyyuttaṃ senaṃ dassanāya gaccheyya aññatra tathārūpappaccayā, pācittiyaṃ.

    ಸೇನಾವಾಸಸಿಕ್ಖಾಪದಂ

    Senāvāsasikkhāpadaṃ

    ೧೩೦. ಸಿಯಾ ಚ ತಸ್ಸಾ ಭಿಕ್ಖುನಿಯಾ ಕೋಚಿದೇವ ಪಚ್ಚಯೋ ಸೇನಂ ಗಮನಾಯ, ದಿರತ್ತತಿರತ್ತಂ ತಾಯ ಭಿಕ್ಖುನಿಯಾ ಸೇನಾಯ ವಸಿತಬ್ಬಂ। ತತೋ ಚೇ ಉತ್ತರಿ ವಸೇಯ್ಯ, ಪಾಚಿತ್ತಿಯಂ।

    130. Siyā ca tassā bhikkhuniyā kocideva paccayo senaṃ gamanāya, dirattatirattaṃ tāya bhikkhuniyā senāya vasitabbaṃ. Tato ce uttari vaseyya, pācittiyaṃ.

    ಉಯ್ಯೋಧಿಕಸಿಕ್ಖಾಪದಂ

    Uyyodhikasikkhāpadaṃ

    ೧೩೧. ದಿರತ್ತತಿರತ್ತಂ ಚೇ ಭಿಕ್ಖುನೀ ಸೇನಾಯ ವಸಮಾನಾ ಉಯ್ಯೋಧಿಕಂ ವಾ ಬಲಗ್ಗಂ ವಾ ಸೇನಾಬ್ಯೂಹಂ ವಾ ಅನೀಕದಸ್ಸನಂ ವಾ ಗಚ್ಛೇಯ್ಯ, ಪಾಚಿತ್ತಿಯಂ।

    131. Dirattatirattaṃ ce bhikkhunī senāya vasamānā uyyodhikaṃ vā balaggaṃ vā senābyūhaṃ vā anīkadassanaṃ vā gaccheyya, pācittiyaṃ.

    ಸುರಾಪಾನಸಿಕ್ಖಾಪದಂ

    Surāpānasikkhāpadaṃ

    ೧೩೨. ಸುರಾಮೇರಯಪಾನೇ ಪಾಚಿತ್ತಿಯಂ।

    132. Surāmerayapāne pācittiyaṃ.

    ಅಙ್ಗುಲಿಪತೋದಕಸಿಕ್ಖಾಪದಂ

    Aṅgulipatodakasikkhāpadaṃ

    ೧೩೩. ಅಙ್ಗುಲಿಪತೋದಕೇ ಪಾಚಿತ್ತಿಯಂ।

    133. Aṅgulipatodake pācittiyaṃ.

    ಹಸಧಮ್ಮಸಿಕ್ಖಾಪದಂ

    Hasadhammasikkhāpadaṃ

    ೧೩೪. ಉದಕೇ ಹಸಧಮ್ಮೇ ಪಾಚಿತ್ತಿಯಂ।

    134. Udake hasadhamme pācittiyaṃ.

    ಅನಾದರಿಯಸಿಕ್ಖಾಪದಂ

    Anādariyasikkhāpadaṃ

    ೧೩೫. ಅನಾದರಿಯೇ ಪಾಚಿತ್ತಿಯಂ।

    135. Anādariye pācittiyaṃ.

    ಭಿಂಸಾಪನಸಿಕ್ಖಾಪದಂ

    Bhiṃsāpanasikkhāpadaṃ

    ೧೩೬. ಯಾ ಪನ ಭಿಕ್ಖುನೀ ಭಿಕ್ಖುನಿಂ ಭಿಂಸಾಪೇಯ್ಯ, ಪಾಚಿತ್ತಿಯಂ।

    136. Yā pana bhikkhunī bhikkhuniṃ bhiṃsāpeyya, pācittiyaṃ.

    ಚಾರಿತ್ತವಗ್ಗೋ ತೇರಸಮೋ।

    Cārittavaggo terasamo.

    ಜೋತಿಸಿಕ್ಖಾಪದಂ

    Jotisikkhāpadaṃ

    ೧೩೭. ಯಾ ಪನ ಭಿಕ್ಖುನೀ ಅಗಿಲಾನಾ ವಿಸಿಬ್ಬನಾಪೇಕ್ಖಾ ಜೋತಿಂ ಸಮಾದಹೇಯ್ಯ ವಾ ಸಮಾದಹಾಪೇಯ್ಯ ವಾ ಅಞ್ಞತ್ರ ತಥಾರೂಪಪ್ಪಚ್ಚಯಾ, ಪಾಚಿತ್ತಿಯಂ।

    137. Yā pana bhikkhunī agilānā visibbanāpekkhā jotiṃ samādaheyya vā samādahāpeyya vā aññatra tathārūpappaccayā, pācittiyaṃ.

    ನಹಾನಸಿಕ್ಖಾಪದಂ

    Nahānasikkhāpadaṃ

    ೧೩೮. ಯಾ ಪನ ಭಿಕ್ಖುನೀ ಓರೇನದ್ಧಮಾಸಂ ನಹಾಯೇಯ್ಯ ಅಞ್ಞತ್ರ ಸಮಯಾ, ಪಾಚಿತ್ತಿಯಂ। ತತ್ಥಾಯಂ ಸಮಯೋ ‘‘ದಿಯಡ್ಢೋ ಮಾಸೋ ಸೇಸೋ ಗಿಮ್ಹಾನ’’ನ್ತಿ ‘‘ವಸ್ಸಾನಸ್ಸ ಪಠಮೋ ಮಾಸೋ’’ ಇಚ್ಚೇತೇ ಅಡ್ಢತೇಯ್ಯಮಾಸಾ ಉಣ್ಹಸಮಯೋ, ಪರಿಳಾಹಸಮಯೋ, ಗಿಲಾನಸಮಯೋ, ಕಮ್ಮಸಮಯೋ, ಅದ್ಧಾನಗಮನಸಮಯೋ, ವಾತವುಟ್ಠಿಸಮಯೋ, ಅಯಂ ತತ್ಥ ಸಮಯೋ।

    138. Yā pana bhikkhunī orenaddhamāsaṃ nahāyeyya aññatra samayā, pācittiyaṃ. Tatthāyaṃ samayo ‘‘diyaḍḍho māso seso gimhāna’’nti ‘‘vassānassa paṭhamo māso’’ iccete aḍḍhateyyamāsā uṇhasamayo, pariḷāhasamayo, gilānasamayo, kammasamayo, addhānagamanasamayo, vātavuṭṭhisamayo, ayaṃ tattha samayo.

    ದುಬ್ಬಣ್ಣಕರಣಸಿಕ್ಖಾಪದಂ

    Dubbaṇṇakaraṇasikkhāpadaṃ

    ೧೩೯. ನವಂ ಪನ ಭಿಕ್ಖುನಿಯಾ ಚೀವರಲಾಭಾಯ ತಿಣ್ಣಂ ದುಬ್ಬಣ್ಣಕರಣಾನಂ ಅಞ್ಞತರಂ ದುಬ್ಬಣ್ಣಕರಣಂ ಆದಾತಬ್ಬಂ ನೀಲಂ ವಾ ಕದ್ದಮಂ ವಾ ಕಾಳಸಾಮಂ ವಾ। ಅನಾದಾ ಚೇ ಭಿಕ್ಖುನೀ ತಿಣ್ಣಂ ದುಬ್ಬಣ್ಣಕರಣಾನಂ ಅಞ್ಞತರಂ ದುಬ್ಬಣ್ಣಕರಣಂ ನವಂ ಚೀವರಂ ಪರಿಭುಞ್ಜೇಯ್ಯ, ಪಾಚಿತ್ತಿಯಂ।

    139. Navaṃ pana bhikkhuniyā cīvaralābhāya tiṇṇaṃ dubbaṇṇakaraṇānaṃ aññataraṃ dubbaṇṇakaraṇaṃ ādātabbaṃ nīlaṃ vā kaddamaṃ vā kāḷasāmaṃ vā. Anādā ce bhikkhunī tiṇṇaṃ dubbaṇṇakaraṇānaṃ aññataraṃ dubbaṇṇakaraṇaṃ navaṃ cīvaraṃ paribhuñjeyya, pācittiyaṃ.

    ವಿಕಪ್ಪನಸಿಕ್ಖಾಪದಂ

    Vikappanasikkhāpadaṃ

    ೧೪೦. ಯಾ ಪನ ಭಿಕ್ಖುನೀ ಭಿಕ್ಖುಸ್ಸ ವಾ ಭಿಕ್ಖುನಿಯಾ ವಾ ಸಿಕ್ಖಮಾನಾಯ ವಾ ಸಾಮಣೇರಸ್ಸ ವಾ ಸಾಮಣೇರಿಯಾ ವಾ ಸಾಮಂ ಚೀವರಂ ವಿಕಪ್ಪೇತ್ವಾ ಅಪಚ್ಚುದ್ಧಾರಣಂ ಪರಿಭುಞ್ಜೇಯ್ಯ, ಪಾಚಿತ್ತಿಯಂ।

    140. Yā pana bhikkhunī bhikkhussa vā bhikkhuniyā vā sikkhamānāya vā sāmaṇerassa vā sāmaṇeriyā vā sāmaṃ cīvaraṃ vikappetvā apaccuddhāraṇaṃ paribhuñjeyya, pācittiyaṃ.

    ಅಪನಿಧಾಪನಸಿಕ್ಖಾಪದಂ

    Apanidhāpanasikkhāpadaṃ

    ೧೪೧. ಯಾ ಪನ ಭಿಕ್ಖುನೀ ಭಿಕ್ಖುನಿಯಾ ಪತ್ತಂ ವಾ ಚೀವರಂ ವಾ ನಿಸೀದನಂ ವಾ ಸೂಚಿಘರಂ ವಾ ಕಾಯಬನ್ಧನಂ ವಾ ಅಪನಿಧೇಯ್ಯ ವಾ ಅಪನಿಧಾಪೇಯ್ಯ ವಾ ಅನ್ತಮಸೋ ಹಸಾಪೇಕ್ಖಾಪಿ, ಪಾಚಿತ್ತಿಯಂ।

    141. Yā pana bhikkhunī bhikkhuniyā pattaṃ vā cīvaraṃ vā nisīdanaṃ vā sūcigharaṃ vā kāyabandhanaṃ vā apanidheyya vā apanidhāpeyya vā antamaso hasāpekkhāpi, pācittiyaṃ.

    ಸಞ್ಚಿಚ್ಚಸಿಕ್ಖಾಪದಂ

    Sañciccasikkhāpadaṃ

    ೧೪೨. ಯಾ ಪನ ಭಿಕ್ಖುನೀ ಸಞ್ಚಿಚ್ಚ ಪಾಣಂ ಜೀವಿತಾ ವೋರೋಪೇಯ್ಯ, ಪಾಚಿತ್ತಿಯಂ।

    142. Yā pana bhikkhunī sañcicca pāṇaṃ jīvitā voropeyya, pācittiyaṃ.

    ಸಪ್ಪಾಣಕಸಿಕ್ಖಾಪದಂ

    Sappāṇakasikkhāpadaṃ

    ೧೪೩. ಯಾ ಪನ ಭಿಕ್ಖುನೀ ಜಾನಂ ಸಪ್ಪಾಣಕಂ ಉದಕಂ ಪರಿಭುಞ್ಜೇಯ್ಯ, ಪಾಚಿತ್ತಿಯಂ।

    143. Yā pana bhikkhunī jānaṃ sappāṇakaṃ udakaṃ paribhuñjeyya, pācittiyaṃ.

    ಉಕ್ಕೋಟನಸಿಕ್ಖಾಪದಂ

    Ukkoṭanasikkhāpadaṃ

    ೧೪೪. ಯಾ ಪನ ಭಿಕ್ಖುನೀ ಜಾನಂ ಯಥಾಧಮ್ಮಂ ನಿಹತಾಧಿಕರಣಂ ಪುನಕಮ್ಮಾಯ ಉಕ್ಕೋಟೇಯ್ಯ, ಪಾಚಿತ್ತಿಯಂ।

    144. Yā pana bhikkhunī jānaṃ yathādhammaṃ nihatādhikaraṇaṃ punakammāya ukkoṭeyya, pācittiyaṃ.

    ಥೇಯ್ಯಸತ್ಥಸಿಕ್ಖಾಪದಂ

    Theyyasatthasikkhāpadaṃ

    ೧೪೫. ಯಾ ಪನ ಭಿಕ್ಖುನೀ ಜಾನಂ ಥೇಯ್ಯಸತ್ಥೇನ ಸದ್ಧಿಂ ಸಂವಿಧಾಯ ಏಕದ್ಧಾನಮಗ್ಗಂ ಪಟಿಪಜ್ಜೇಯ್ಯ ಅನ್ತಮಸೋ ಗಾಮನ್ತರಮ್ಪಿ, ಪಾಚಿತ್ತಿಯಂ।

    145. Yā pana bhikkhunī jānaṃ theyyasatthena saddhiṃ saṃvidhāya ekaddhānamaggaṃ paṭipajjeyya antamaso gāmantarampi, pācittiyaṃ.

    ಅರಿಟ್ಠಸಿಕ್ಖಾಪದಂ

    Ariṭṭhasikkhāpadaṃ

    ೧೪೬. ಯಾ ಪನ ಭಿಕ್ಖುನೀ ಏವಂ ವದೇಯ್ಯ ‘‘ತಥಾಹಂ ಭಗವತಾ ಧಮ್ಮಂ ದೇಸಿತಂ ಆಜಾನಾಮಿ, ಯಥಾ ಯೇಮೇ ಅನ್ತರಾಯಿಕಾ ಧಮ್ಮಾ ವುತ್ತಾ ಭಗವತಾ, ತೇ ಪಟಿಸೇವತೋ ನಾಲಂ ಅನ್ತರಾಯಾಯಾ’’ತಿ। ಸಾ ಭಿಕ್ಖುನೀ ಭಿಕ್ಖುನೀಹಿ ಏವಮಸ್ಸ ವಚನೀಯಾ ‘‘ಮಾಯ್ಯೇ ಏವಂ ಅವಚ, ಮಾ ಭಗವನ್ತಂ ಅಬ್ಭಾಚಿಕ್ಖಿ, ನ ಹಿ ಸಾಧು ಭಗವತೋ ಅಬ್ಭಕ್ಖಾನಂ, ನ ಹಿ ಭಗವಾ ಏವಂ ವದೇಯ್ಯ, ಅನೇಕಪರಿಯಾಯೇನಾಯ್ಯೇ ಅನ್ತರಾಯಿಕಾ ಧಮ್ಮಾ ಅನ್ತರಾಯಿಕಾ ವುತ್ತಾ ಭಗವತಾ, ಅಲಞ್ಚ ಪನ ತೇ ಪಟಿಸೇವತೋ ಅನ್ತರಾಯಾಯಾ’’ತಿ। ಏವಞ್ಚ ಸಾ ಭಿಕ್ಖುನೀ ಭಿಕ್ಖುನೀಹಿ ವುಚ್ಚಮಾನಾ ತಥೇವ ಪಗ್ಗಣ್ಹೇಯ್ಯ, ಸಾ ಭಿಕ್ಖುನೀ ಭಿಕ್ಖುನೀಹಿ ಯಾವತತಿಯಂ ಸಮನುಭಾಸಿತಬ್ಬಾ ತಸ್ಸ ಪಟಿನಿಸ್ಸಗ್ಗಾಯ। ಯಾವತತಿಯಞ್ಚೇ ಸಮನುಭಾಸಿಯಮಾನಾ ತಂ ಪಟಿನಿಸ್ಸಜ್ಜೇಯ್ಯ, ಇಚ್ಚೇತಂ ಕುಸಲಂ। ನೋ ಚೇ ಪಟಿನಿಸ್ಸಜ್ಜೇಯ್ಯ, ಪಾಚಿತ್ತಿಯಂ।

    146. Yā pana bhikkhunī evaṃ vadeyya ‘‘tathāhaṃ bhagavatā dhammaṃ desitaṃ ājānāmi, yathā yeme antarāyikā dhammā vuttā bhagavatā, te paṭisevato nālaṃ antarāyāyā’’ti. Sā bhikkhunī bhikkhunīhi evamassa vacanīyā ‘‘māyye evaṃ avaca, mā bhagavantaṃ abbhācikkhi, na hi sādhu bhagavato abbhakkhānaṃ, na hi bhagavā evaṃ vadeyya, anekapariyāyenāyye antarāyikā dhammā antarāyikā vuttā bhagavatā, alañca pana te paṭisevato antarāyāyā’’ti. Evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṃ samanubhāsitabbā tassa paṭinissaggāya. Yāvatatiyañce samanubhāsiyamānā taṃ paṭinissajjeyya, iccetaṃ kusalaṃ. No ce paṭinissajjeyya, pācittiyaṃ.

    ಜೋತಿವಗ್ಗೋ ಚುದ್ದಸಮೋ।

    Jotivaggo cuddasamo.

    ಉಕ್ಖಿತ್ತಸಮ್ಭೋಗಸಿಕ್ಖಾಪದಂ

    Ukkhittasambhogasikkhāpadaṃ

    ೧೪೭. ಯಾ ಪನ ಭಿಕ್ಖುನೀ ಜಾನಂ ತಥಾವಾದಿನಿಯಾ ಭಿಕ್ಖುನಿಯಾ ಅಕಟಾನುಧಮ್ಮಾಯ ತಂ ದಿಟ್ಠಿಂ ಅಪ್ಪಟಿನಿಸ್ಸಟ್ಠಾಯ ಸದ್ಧಿಂ ಸಮ್ಭುಞ್ಜೇಯ್ಯ ವಾ, ಸಂವಸೇಯ್ಯ ವಾ, ಸಹ ವಾ ಸೇಯ್ಯಂ ಕಪ್ಪೇಯ್ಯ, ಪಾಚಿತ್ತಿಯಂ।

    147. Yā pana bhikkhunī jānaṃ tathāvādiniyā bhikkhuniyā akaṭānudhammāya taṃ diṭṭhiṃ appaṭinissaṭṭhāya saddhiṃ sambhuñjeyya vā, saṃvaseyya vā, saha vā seyyaṃ kappeyya, pācittiyaṃ.

    ಕಣ್ಟಕಸಿಕ್ಖಾಪದಂ

    Kaṇṭakasikkhāpadaṃ

    ೧೪೮. ಸಮಣುದ್ದೇಸಾಪಿ ಚೇ ಏವಂ ವದೇಯ್ಯ ‘‘ತಥಾಹಂ ಭಗವತಾ ಧಮ್ಮಂ ದೇಸಿತಂ ಆಜಾನಾಮಿ, ಯಥಾ ಯೇಮೇ ಅನ್ತರಾಯಿಕಾ ಧಮ್ಮಾ ವುತ್ತಾ ಭಗವತಾ, ತೇ ಪಟಿಸೇವತೋ ನಾಲಂ ಅನ್ತರಾಯಾಯಾ’’ತಿ। ಸಾ ಸಮಣುದ್ದೇಸಾ ಭಿಕ್ಖುನೀಹಿ ಏವಮಸ್ಸ ವಚನೀಯಾ ‘‘ಮಾಯ್ಯೇ, ಸಮಣುದ್ದೇಸೇ ಏವಂ ಅವಚ, ಮಾ ಭಗವನ್ತಂ ಅಬ್ಭಾಚಿಕ್ಖಿ, ನ ಹಿ ಸಾಧು ಭಗವತೋ ಅಬ್ಭಕ್ಖಾನಂ, ನ ಹಿ ಭಗವಾ ಏವಂ ವದೇಯ್ಯ, ಅನೇಕಪರಿಯಾಯೇನಾಯ್ಯೇ, ಸಮಣುದ್ದೇಸೇ ಅನ್ತರಾಯಿಕಾ ಧಮ್ಮಾ ಅನ್ತರಾಯಿಕಾ ವುತ್ತಾ ಭಗವತಾ, ಅಲಞ್ಚ ಪನ ತೇ ಪಟಿಸೇವತೋ ಅನ್ತರಾಯಾಯಾ’’ತಿ। ಏವಞ್ಚ ಸಾ ಸಮಣುದ್ದೇಸಾ ಭಿಕ್ಖುನೀಹಿ ವುಚ್ಚಮಾನಾ ತಥೇವ ಪಗ್ಗಣ್ಹೇಯ್ಯ, ಸಾ ಸಮಣುದ್ದೇಸಾ ಭಿಕ್ಖುನೀಹಿ ಏವಮಸ್ಸ ವಚನೀಯಾ ‘‘ಅಜ್ಜತಗ್ಗೇ ತೇ, ಅಯ್ಯೇ, ಸಮಣುದ್ದೇಸೇ ನ ಚೇವ ಸೋ ಭಗವಾ ಸತ್ಥಾ ಅಪದಿಸಿತಬ್ಬೋ, ಯಮ್ಪಿ ಚಞ್ಞಾ ಸಮಣುದ್ದೇಸಾ ಲಭನ್ತಿ ಭಿಕ್ಖುನೀಹಿ ಸದ್ಧಿಂ ದಿರತ್ತತಿರತ್ತಂ ಸಹಸೇಯ್ಯಂ, ಸಾಪಿ ತೇ ನತ್ಥಿ, ಚರ ಪಿರೇ, ವಿನಸ್ಸಾ’’ತಿ। ಯಾ ಪನ ಭಿಕ್ಖುನೀ ಜಾನಂ ತಥಾನಾಸಿತಂ ಸಮಣುದ್ದೇಸಂ ಉಪಲಾಪೇಯ್ಯ ವಾ, ಉಪಟ್ಠಾಪೇಯ್ಯ ವಾ, ಸಮ್ಭುಞ್ಜೇಯ್ಯ ವಾ, ಸಹ ವಾ ಸೇಯ್ಯಂ ಕಪ್ಪೇಯ್ಯ, ಪಾಚಿತ್ತಿಯಂ।

    148. Samaṇuddesāpi ce evaṃ vadeyya ‘‘tathāhaṃ bhagavatā dhammaṃ desitaṃ ājānāmi, yathā yeme antarāyikā dhammā vuttā bhagavatā, te paṭisevato nālaṃ antarāyāyā’’ti. Sā samaṇuddesā bhikkhunīhi evamassa vacanīyā ‘‘māyye, samaṇuddese evaṃ avaca, mā bhagavantaṃ abbhācikkhi, na hi sādhu bhagavato abbhakkhānaṃ, na hi bhagavā evaṃ vadeyya, anekapariyāyenāyye, samaṇuddese antarāyikā dhammā antarāyikā vuttā bhagavatā, alañca pana te paṭisevato antarāyāyā’’ti. Evañca sā samaṇuddesā bhikkhunīhi vuccamānā tatheva paggaṇheyya, sā samaṇuddesā bhikkhunīhi evamassa vacanīyā ‘‘ajjatagge te, ayye, samaṇuddese na ceva so bhagavā satthā apadisitabbo, yampi caññā samaṇuddesā labhanti bhikkhunīhi saddhiṃ dirattatirattaṃ sahaseyyaṃ, sāpi te natthi, cara pire, vinassā’’ti. Yā pana bhikkhunī jānaṃ tathānāsitaṃ samaṇuddesaṃ upalāpeyya vā, upaṭṭhāpeyya vā, sambhuñjeyya vā, saha vā seyyaṃ kappeyya, pācittiyaṃ.

    ಸಹಧಮ್ಮಿಕಸಿಕ್ಖಾಪದಂ

    Sahadhammikasikkhāpadaṃ

    ೧೪೯. ಯಾ ಪನ ಭಿಕ್ಖುನೀ ಭಿಕ್ಖುನೀಹಿ ಸಹಧಮ್ಮಿಕಂ ವುಚ್ಚಮಾನಾ ಏವಂ ವದೇಯ್ಯ ‘‘ನ ತಾವಾಹಂ, ಅಯ್ಯೇ, ಏತಸ್ಮಿಂ ಸಿಕ್ಖಾಪದೇ ಸಿಕ್ಖಿಸ್ಸಾಮಿ, ಯಾವ ನ ಅಞ್ಞಂ ಭಿಕ್ಖುನಿಂ ಬ್ಯತ್ತಂ ವಿನಯಧರಂ ಪರಿಪುಚ್ಛಾಮೀ’’ತಿ, ಪಾಚಿತ್ತಿಯಂ। ಸಿಕ್ಖಮಾನಾಯ, ಭಿಕ್ಖವೇ, ಭಿಕ್ಖುನಿಯಾ ಅಞ್ಞಾತಬ್ಬಂ ಪರಿಪುಚ್ಛಿತಬ್ಬಂ ಪರಿಪಞ್ಹಿತಬ್ಬಂ, ಅಯಂ ತತ್ಥ ಸಾಮೀಚಿ।

    149. Yā pana bhikkhunī bhikkhunīhi sahadhammikaṃ vuccamānā evaṃ vadeyya ‘‘na tāvāhaṃ, ayye, etasmiṃ sikkhāpade sikkhissāmi, yāva na aññaṃ bhikkhuniṃ byattaṃ vinayadharaṃ paripucchāmī’’ti, pācittiyaṃ. Sikkhamānāya, bhikkhave, bhikkhuniyā aññātabbaṃ paripucchitabbaṃ paripañhitabbaṃ, ayaṃ tattha sāmīci.

    ವಿಲೇಖನಸಿಕ್ಖಾಪದಂ

    Vilekhanasikkhāpadaṃ

    ೧೫೦. ಯಾ ಪನ ಭಿಕ್ಖುನೀ ಪಾತಿಮೋಕ್ಖೇ ಉದ್ದಿಸ್ಸಮಾನೇ ಏವಂ ವದೇಯ್ಯ ‘‘ಕಿಂ ಪನಿಮೇಹಿ ಖುದ್ದಾನುಖುದ್ದಕೇಹಿ ಸಿಕ್ಖಾಪದೇಹಿ ಉದ್ದಿಟ್ಠೇಹಿ, ಯಾವದೇವ ಕುಕ್ಕುಚ್ಚಾಯ ವಿಹೇಸಾಯ ವಿಲೇಖಾಯ ಸಂವತ್ತನ್ತೀ’’ತಿ, ಸಿಕ್ಖಾಪದವಿವಣ್ಣಕೇ ಪಾಚಿತ್ತಿಯಂ।

    150. Yā pana bhikkhunī pātimokkhe uddissamāne evaṃ vadeyya ‘‘kiṃ panimehi khuddānukhuddakehi sikkhāpadehi uddiṭṭhehi, yāvadeva kukkuccāya vihesāya vilekhāya saṃvattantī’’ti, sikkhāpadavivaṇṇake pācittiyaṃ.

    ಮೋಹನಸಿಕ್ಖಾಪದಂ

    Mohanasikkhāpadaṃ

    ೧೫೧. ಯಾ ಪನ ಭಿಕ್ಖುನೀ ಅನ್ವದ್ಧಮಾಸಂ ಪಾತಿಮೋಕ್ಖೇ ಉದ್ದಿಸ್ಸಮಾನೇ ಏವಂ ವದೇಯ್ಯ ‘‘ಇದಾನೇವ ಖೋ ಅಹಂ, ಅಯ್ಯೇ, ಜಾನಾಮಿ ಅಯಮ್ಪಿ ಕಿರ ಧಮ್ಮೋ ಸುತ್ತಾಗತೋ ಸುತ್ತಪರಿಯಾಪನ್ನೋ ಅನ್ವದ್ಧಮಾಸಂ ಉದ್ದೇಸಂ ಆಗಚ್ಛತೀ’’ತಿ, ತಞ್ಚೇ ಭಿಕ್ಖುನಿಂ ಅಞ್ಞಾ ಭಿಕ್ಖುನಿಯೋ ಜಾನೇಯ್ಯುಂ ನಿಸಿನ್ನಪುಬ್ಬಂ ಇಮಾಯ ಭಿಕ್ಖುನಿಯಾ ದ್ವತ್ತಿಕ್ಖತ್ತುಂ ಪಾತಿಮೋಕ್ಖೇ ಉದ್ದಿಸ್ಸಮಾನೇ, ಕೋ ಪನ ವಾದೋ ಭಿಯ್ಯೋ, ನ ಚ ತಸ್ಸಾ ಭಿಕ್ಖುನಿಯಾ ಅಞ್ಞಾಣಕೇನ ಮುತ್ತಿ ಅತ್ಥಿ, ಯಞ್ಚ ತತ್ಥ ಆಪತ್ತಿಂ ಆಪನ್ನಾ, ತಞ್ಚ ಯಥಾಧಮ್ಮೋ ಕಾರೇತಬ್ಬೋ, ಉತ್ತರಿ ಚಸ್ಸಾ ಮೋಹೋ ಆರೋಪೇತಬ್ಬೋ ‘‘ತಸ್ಸಾ ತೇ, ಅಯ್ಯೇ, ಅಲಾಭಾ, ತಸ್ಸಾ ತೇ ದುಲ್ಲದ್ಧಂ, ಯಂ ತ್ವಂ ಪಾತಿಮೋಕ್ಖೇ ಉದ್ದಿಸ್ಸಮಾನೇ ನ ಸಾಧುಕಂ ಅಟ್ಠಿಂ ಕತ್ವಾ ಮನಸಿ ಕರೋಸೀ’’ತಿ, ಇದಂ ತಸ್ಮಿಂ ಮೋಹನಕೇ ಪಾಚಿತ್ತಿಯಂ।

    151. Yā pana bhikkhunī anvaddhamāsaṃ pātimokkhe uddissamāne evaṃ vadeyya ‘‘idāneva kho ahaṃ, ayye, jānāmi ayampi kira dhammo suttāgato suttapariyāpanno anvaddhamāsaṃ uddesaṃ āgacchatī’’ti, tañce bhikkhuniṃ aññā bhikkhuniyo jāneyyuṃ nisinnapubbaṃ imāya bhikkhuniyā dvattikkhattuṃ pātimokkhe uddissamāne, ko pana vādo bhiyyo, na ca tassā bhikkhuniyā aññāṇakena mutti atthi, yañca tattha āpattiṃ āpannā, tañca yathādhammo kāretabbo, uttari cassā moho āropetabbo ‘‘tassā te, ayye, alābhā, tassā te dulladdhaṃ, yaṃ tvaṃ pātimokkhe uddissamāne na sādhukaṃ aṭṭhiṃ katvā manasi karosī’’ti, idaṃ tasmiṃ mohanake pācittiyaṃ.

    ಪಹಾರಸಿಕ್ಖಾಪದಂ

    Pahārasikkhāpadaṃ

    ೧೫೨. ಯಾ ಪನ ಭಿಕ್ಖುನೀ ಭಿಕ್ಖುನಿಯಾ ಕುಪಿತಾ ಅನತ್ತಮನಾ ಪಹಾರಂ ದದೇಯ್ಯ, ಪಾಚಿತ್ತಿಯಂ।

    152. Yā pana bhikkhunī bhikkhuniyā kupitā anattamanā pahāraṃ dadeyya, pācittiyaṃ.

    ತಲಸತ್ತಿಕಸಿಕ್ಖಾಪದಂ

    Talasattikasikkhāpadaṃ

    ೧೫೩. ಯಾ ಪನ ಭಿಕ್ಖುನೀ ಭಿಕ್ಖುನಿಯಾ ಕುಪಿತಾ ಅನತ್ತಮನಾ ತಲಸತ್ತಿಕಂ ಉಗ್ಗಿರೇಯ್ಯ, ಪಾಚಿತ್ತಿಯಂ।

    153. Yā pana bhikkhunī bhikkhuniyā kupitā anattamanā talasattikaṃ uggireyya, pācittiyaṃ.

    ಅಮೂಲಕಸಿಕ್ಖಾಪದಂ

    Amūlakasikkhāpadaṃ

    ೧೫೪. ಯಾ ಪನ ಭಿಕ್ಖುನೀ ಭಿಕ್ಖುನಿಂ ಅಮೂಲಕೇನ ಸಙ್ಘಾದಿಸೇಸೇನ ಅನುದ್ಧಂಸೇಯ್ಯ, ಪಾಚಿತ್ತಿಯಂ।

    154. Yā pana bhikkhunī bhikkhuniṃ amūlakena saṅghādisesena anuddhaṃseyya, pācittiyaṃ.

    ಸಞ್ಚಿಚ್ಚಸಿಕ್ಖಾಪದಂ

    Sañciccasikkhāpadaṃ

    ೧೫೫. ಯಾ ಪನ ಭಿಕ್ಖುನೀ ಭಿಕ್ಖುನಿಯಾ ಸಞ್ಚಿಚ್ಚ ಕುಕ್ಕುಚ್ಚಂ ಉಪದಹೇಯ್ಯ ‘‘ಇತಿಸ್ಸಾ ಮುಹುತ್ತಮ್ಪಿ ಅಫಾಸು ಭವಿಸ್ಸತೀ’’ತಿ ಏತದೇವ ಪಚ್ಚಯಂ ಕರಿತ್ವಾ ಅನಞ್ಞಂ, ಪಾಚಿತ್ತಿಯಂ।

    155. Yā pana bhikkhunī bhikkhuniyā sañcicca kukkuccaṃ upadaheyya ‘‘itissā muhuttampi aphāsu bhavissatī’’ti etadeva paccayaṃ karitvā anaññaṃ, pācittiyaṃ.

    ಉಪಸ್ಸುತಿ ಸಿಕ್ಖಾಪದಂ

    Upassuti sikkhāpadaṃ

    ೧೫೬. ಯಾ ಪನ ಭಿಕ್ಖುನೀ ಭಿಕ್ಖುನೀನಂ ಭಣ್ಡನಜಾತಾನಂ ಕಲಹಜಾತಾನಂ ವಿವಾದಾಪನ್ನಾನಂ ಉಪಸ್ಸುತಿಂ ತಿಟ್ಠೇಯ್ಯ ‘‘ಯಂ ಇಮಾ ಭಣಿಸ್ಸನ್ತಿ, ತಂ ಸೋಸ್ಸಾಮೀ’’ತಿ ಏತದೇವ ಪಚ್ಚಯಂ ಕರಿತ್ವಾ ಅನಞ್ಞಂ, ಪಾಚಿತ್ತಿಯಂ।

    156. Yā pana bhikkhunī bhikkhunīnaṃ bhaṇḍanajātānaṃ kalahajātānaṃ vivādāpannānaṃ upassutiṃ tiṭṭheyya ‘‘yaṃ imā bhaṇissanti, taṃ sossāmī’’ti etadeva paccayaṃ karitvā anaññaṃ, pācittiyaṃ.

    ದಿಟ್ಠಿವಗ್ಗೋ ಪನ್ನರಸಮೋ।

    Diṭṭhivaggo pannarasamo.

    ಕಮ್ಮಪ್ಪಟಿಬಾಹನಸಿಕ್ಖಾಪದಂ

    Kammappaṭibāhanasikkhāpadaṃ

    ೧೫೭. ಯಾ ಪನ ಭಿಕ್ಖುನೀ ಧಮ್ಮಿಕಾನಂ ಕಮ್ಮಾನಂ ಛನ್ದಂ ದತ್ವಾ ಪಚ್ಛಾ ಖೀಯನಧಮ್ಮಂ ಆಪಜ್ಜೇಯ್ಯ, ಪಾಚಿತ್ತಿಯಂ।

    157. Yā pana bhikkhunī dhammikānaṃ kammānaṃ chandaṃ datvā pacchā khīyanadhammaṃ āpajjeyya, pācittiyaṃ.

    ಛನ್ದಂಅದತ್ವಾಗಮನಸಿಕ್ಖಾಪದಂ

    Chandaṃadatvāgamanasikkhāpadaṃ

    ೧೫೮. ಯಾ ಪನ ಭಿಕ್ಖುನೀ ಸಙ್ಘೇ ವಿನಿಚ್ಛಯಕಥಾಯ ವತ್ತಮಾನಾಯ ಛನ್ದಂ ಅದತ್ವಾ ಉಟ್ಠಾಯಾಸನಾ ಪಕ್ಕಮೇಯ್ಯ, ಪಾಚಿತ್ತಿಯಂ।

    158. Yā pana bhikkhunī saṅghe vinicchayakathāya vattamānāya chandaṃ adatvā uṭṭhāyāsanā pakkameyya, pācittiyaṃ.

    ದುಬ್ಬಲಸಿಕ್ಖಾಪದಂ

    Dubbalasikkhāpadaṃ

    ೧೫೯. ಯಾ ಪನ ಭಿಕ್ಖುನೀ ಸಮಗ್ಗೇನ ಸಙ್ಘೇನ ಚೀವರಂ ದತ್ವಾ ಪಚ್ಛಾ ಖೀಯನಧಮ್ಮಂ ಆಪಜ್ಜೇಯ್ಯ ‘‘ಯಥಾಸನ್ಥುತಂ ಭಿಕ್ಖುನಿಯೋ ಸಙ್ಘಿಕಂ ಲಾಭಂ ಪರಿಣಾಮೇನ್ತೀ’’ತಿ, ಪಾಚಿತ್ತಿಯಂ।

    159. Yā pana bhikkhunī samaggena saṅghena cīvaraṃ datvā pacchā khīyanadhammaṃ āpajjeyya ‘‘yathāsanthutaṃ bhikkhuniyo saṅghikaṃ lābhaṃ pariṇāmentī’’ti, pācittiyaṃ.

    ಪರಿಣಾಮನಸಿಕ್ಖಾಪದಂ

    Pariṇāmanasikkhāpadaṃ

    ೧೬೦. ಯಾ ಪನ ಭಿಕ್ಖುನೀ ಜಾನಂ ಸಙ್ಘಿಕಂ ಲಾಭಂ ಪರಿಣತಂ ಪುಗ್ಗಲಸ್ಸ ಪರಿಣಾಮೇಯ್ಯ, ಪಾಚಿತ್ತಿಯಂ।

    160. Yā pana bhikkhunī jānaṃ saṅghikaṃ lābhaṃ pariṇataṃ puggalassa pariṇāmeyya, pācittiyaṃ.

    ರತನಸಿಕ್ಖಾಪದಂ

    Ratanasikkhāpadaṃ

    ೧೬೧. ಯಾ ಪನ ಭಿಕ್ಖುನೀ ರತನಂ ವಾ ರತನಸಮ್ಮತಂ ವಾ ಅಞ್ಞತ್ರ ಅಜ್ಝಾರಾಮಾ ವಾ ಅಜ್ಝಾವಸಥಾ ವಾ ಉಗ್ಗಣ್ಹೇಯ್ಯ ವಾ ಉಗ್ಗಣ್ಹಾಪೇಯ್ಯ ವಾ, ಪಾಚಿತ್ತಿಯಂ। ರತನಂ ವಾ ಪನ ಭಿಕ್ಖುನಿಯಾ ರತನಸಮ್ಮತಂ ವಾ ಅಜ್ಝಾರಾಮೇ ವಾ ಅಜ್ಝಾವಸಥೇ ವಾ ಉಗ್ಗಹೇತ್ವಾ ವಾ ಉಗ್ಗಹಾಪೇತ್ವಾ ವಾ ನಿಕ್ಖಿಪಿತಬ್ಬಂ ‘‘ಯಸ್ಸ ಭವಿಸ್ಸತಿ, ಸೋ ಹರಿಸ್ಸತೀ’’ತಿ, ಅಯಂ ತತ್ಥ ಸಾಮೀಚಿ।

    161. Yā pana bhikkhunī ratanaṃ vā ratanasammataṃ vā aññatra ajjhārāmā vā ajjhāvasathā vā uggaṇheyya vā uggaṇhāpeyya vā, pācittiyaṃ. Ratanaṃ vā pana bhikkhuniyā ratanasammataṃ vā ajjhārāme vā ajjhāvasathe vā uggahetvā vā uggahāpetvā vā nikkhipitabbaṃ ‘‘yassa bhavissati, so harissatī’’ti, ayaṃ tattha sāmīci.

    ಸೂಚಿಘರಸಿಕ್ಖಾಪದಂ

    Sūcigharasikkhāpadaṃ

    ೧೬೨. ಯಾ ಪನ ಭಿಕ್ಖುನೀ ಅಟ್ಠಿಮಯಂ ವಾ ದನ್ತಮಯಂ ವಾ ವಿಸಾಣಮಯಂ ವಾ ಸೂಚಿಘರಂ ಕಾರಾಪೇಯ್ಯ, ಭೇದನಕಂ ಪಾಚಿತ್ತಿಯಂ।

    162. Yā pana bhikkhunī aṭṭhimayaṃ vā dantamayaṃ vā visāṇamayaṃ vā sūcigharaṃ kārāpeyya, bhedanakaṃ pācittiyaṃ.

    ಮಞ್ಚಪೀಠಸಿಕ್ಖಾಪದಂ

    Mañcapīṭhasikkhāpadaṃ

    ೧೬೩. ನವಂ ಪನ ಭಿಕ್ಖುನಿಯಾ ಮಞ್ಚಂ ವಾ ಪೀಠಂ ವಾ ಕಾರಯಮಾನಾಯ ಅಟ್ಠಙ್ಗುಲಪಾದಕಂ ಕಾರೇತಬ್ಬಂ ಸುಗತಙ್ಗುಲೇನ ಅಞ್ಞತ್ರ ಹೇಟ್ಠಿಮಾಯ ಅಟನಿಯಾ। ತಂ ಅತಿಕ್ಕಾಮೇನ್ತಿಯಾ ಛೇದನಕಂ ಪಾಚಿತ್ತಿಯಂ।

    163. Navaṃ pana bhikkhuniyā mañcaṃ vā pīṭhaṃ vā kārayamānāya aṭṭhaṅgulapādakaṃ kāretabbaṃ sugataṅgulena aññatra heṭṭhimāya aṭaniyā. Taṃ atikkāmentiyā chedanakaṃ pācittiyaṃ.

    ತೂಲೋನದ್ಧಸಿಕ್ಖಾಪದಂ

    Tūlonaddhasikkhāpadaṃ

    ೧೬೪. ಯಾ ಪನ ಭಿಕ್ಖುನೀ ಮಞ್ಚಂ ವಾ ಪೀಠಂ ವಾ ತೂಲೋನದ್ಧಂ ಕಾರಾಪೇಯ್ಯ, ಉದ್ದಾಲನಕಂ ಪಾಚಿತ್ತಿಯಂ।

    164. Yā pana bhikkhunī mañcaṃ vā pīṭhaṃ vā tūlonaddhaṃ kārāpeyya, uddālanakaṃ pācittiyaṃ.

    ಕಣ್ಡುಪ್ಪಟಿಚ್ಛಾದಿಸಿಕ್ಖಾಪದಂ

    Kaṇḍuppaṭicchādisikkhāpadaṃ

    ೧೬೫. ಕಣ್ಡುಪ್ಪಟಿಚ್ಛಾದಿಂ ಪನ ಭಿಕ್ಖುನಿಯಾ ಕಾರಯಮಾನಾಯ ಪಮಾಣಿಕಾ ಕಾರೇತಬ್ಬಾ, ತತ್ರಿದಂ ಪಮಾಣಂ, ದೀಘಸೋ ಚತಸ್ಸೋ ವಿದತ್ಥಿಯೋ ಸುಗತವಿದತ್ಥಿಯಾ, ತಿರಿಯಂ ದ್ವೇ ವಿದತ್ಥಿಯೋ। ತಂ ಅತಿಕ್ಕಾಮೇನ್ತಿಯಾ ಛೇದನಕಂ ಪಾಚಿತ್ತಿಯಂ।

    165. Kaṇḍuppaṭicchādiṃ pana bhikkhuniyā kārayamānāya pamāṇikā kāretabbā, tatridaṃ pamāṇaṃ, dīghaso catasso vidatthiyo sugatavidatthiyā, tiriyaṃ dve vidatthiyo. Taṃ atikkāmentiyā chedanakaṃ pācittiyaṃ.

    ನನ್ದಸಿಕ್ಖಾಪದಂ

    Nandasikkhāpadaṃ

    ೧೬೬. ಯಾ ಪನ ಭಿಕ್ಖುನೀ ಸುಗತಚೀವರಪ್ಪಮಾಣಂ ಚೀವರಂ ಕಾರಾಪೇಯ್ಯ, ಅತಿರೇಕಂ ವಾ, ಛೇದನಕಂ ಪಾಚಿತ್ತಿಯಂ। ತತ್ರಿದಂ ಸುಗತಸ್ಸ ಸುಗತಚೀವರಪ್ಪಮಾಣಂ, ದೀಘಸೋ ನವ ವಿದತ್ಥಿಯೋ ಸುಗತವಿದತ್ಥಿಯಾ, ತಿರಿಯಂ ಛ ವಿದತ್ಥಿಯೋ, ಇದಂ ಸುಗತಸ್ಸ ಸುಗತಚೀವರಪ್ಪಮಾಣನ್ತಿ।

    166. Yā pana bhikkhunī sugatacīvarappamāṇaṃ cīvaraṃ kārāpeyya, atirekaṃ vā, chedanakaṃ pācittiyaṃ. Tatridaṃ sugatassa sugatacīvarappamāṇaṃ, dīghaso nava vidatthiyo sugatavidatthiyā, tiriyaṃ cha vidatthiyo, idaṃ sugatassa sugatacīvarappamāṇanti.

    ಧಮ್ಮಿಕವಗ್ಗೋ ಸೋಳಸಮೋ।

    Dhammikavaggo soḷasamo.

    ಉದ್ದಿಟ್ಠಾ ಖೋ, ಅಯ್ಯಾಯೋ, ಛಸಟ್ಠಿಸತಾ ಪಾಚಿತ್ತಿಯಾ ಧಮ್ಮಾ। ತತ್ಥಾಯ್ಯಾಯೋ, ಪುಚ್ಛಾಮಿ, ಕಚ್ಚಿತ್ಥ ಪರಿಸುದ್ಧಾ, ದುತಿಯಮ್ಪಿ ಪುಚ್ಛಾಮಿ, ಕಚ್ಚಿತ್ಥ ಪರಿಸುದ್ಧಾ, ತತಿಯಮ್ಪಿ ಪುಚ್ಛಾಮಿ, ಕಚ್ಚಿತ್ಥ ಪರಿಸುದ್ಧಾ, ಪರಿಸುದ್ಧೇತ್ಥಾಯ್ಯಾಯೋ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀತಿ।

    Uddiṭṭhā kho, ayyāyo, chasaṭṭhisatā pācittiyā dhammā. Tatthāyyāyo, pucchāmi, kaccittha parisuddhā, dutiyampi pucchāmi, kaccittha parisuddhā, tatiyampi pucchāmi, kaccittha parisuddhā, parisuddhetthāyyāyo, tasmā tuṇhī, evametaṃ dhārayāmīti.

    ಪಾಚಿತ್ತಿಯಾ ನಿಟ್ಠಿತಾ।

    Pācittiyā niṭṭhitā.

    ಪಾಟಿದೇಸನೀಯಾ

    Pāṭidesanīyā

    ಇಮೇ ಖೋ ಪನಾಯ್ಯಾಯೋ ಅಟ್ಠ ಪಾಟಿದೇಸನೀಯಾ

    Ime kho panāyyāyo aṭṭha pāṭidesanīyā

    ಧಮ್ಮಾ ಉದ್ದೇಸಂ ಆಗಚ್ಛನ್ತಿ।

    Dhammā uddesaṃ āgacchanti.

    ಸಪ್ಪಿವಿಞ್ಞಾಪನಸಿಕ್ಖಾಪದಂ

    Sappiviññāpanasikkhāpadaṃ

    ೧. ಯಾ ಪನ ಭಿಕ್ಖುನೀ ಅಗಿಲಾನಾ ಸಪ್ಪಿಂ ವಿಞ್ಞಾಪೇತ್ವಾ ಭುಞ್ಜೇಯ್ಯ, ಪಟಿದೇಸೇತಬ್ಬಂ ತಾಯ ಭಿಕ್ಖುನಿಯಾ ‘‘ಗಾರಯ್ಹಂ, ಅಯ್ಯೇ, ಧಮ್ಮಂ ಆಪಜ್ಜಿಂ ಅಸಪ್ಪಾಯಂ ಪಾಟಿದೇಸನೀಯಂ, ತಂ ಪಟಿದೇಸೇಮೀ’’ತಿ।

    1. Yā pana bhikkhunī agilānā sappiṃ viññāpetvā bhuñjeyya, paṭidesetabbaṃ tāya bhikkhuniyā ‘‘gārayhaṃ, ayye, dhammaṃ āpajjiṃ asappāyaṃ pāṭidesanīyaṃ, taṃ paṭidesemī’’ti.

    ತೇಲವಿಞ್ಞಾಪನಸಿಕ್ಖಾಪದಂ

    Telaviññāpanasikkhāpadaṃ

    ೨. ಯಾ ಪನ ಭಿಕ್ಖುನೀ ಅಗಿಲಾನಾ ತೇಲಂ ವಿಞ್ಞಾಪೇತ್ವಾ ಭುಞ್ಜೇಯ್ಯ…ಪೇ॰… ತಂ ಪಟಿದೇಸೇಮೀತಿ।

    2. Yā pana bhikkhunī agilānā telaṃ viññāpetvā bhuñjeyya…pe… taṃ paṭidesemīti.

    ಮಧುವಿಞ್ಞಾಪನಸಿಕ್ಖಾಪದಂ

    Madhuviññāpanasikkhāpadaṃ

    ೩. ಯಾ ಪನ ಭಿಕ್ಖುನೀ ಅಗಿಲಾನಾ ಮಧುಂ ವಿಞ್ಞಾಪೇತ್ವಾ ಭುಞ್ಜೇಯ್ಯ…ಪೇ॰… ತಂ ಪಟಿದೇಸೇಮೀತಿ।

    3. Yā pana bhikkhunī agilānā madhuṃ viññāpetvā bhuñjeyya…pe… taṃ paṭidesemīti.

    ಫಾಣಿತವಿಞ್ಞಾಪನಸಿಕ್ಖಾಪದಂ

    Phāṇitaviññāpanasikkhāpadaṃ

    ೪. ಯಾ ಪನ ಭಿಕ್ಖುನೀ ಅಗಿಲಾನಾ ಫಾಣಿತಂ ವಿಞ್ಞಾಪೇತ್ವಾ ಭುಞ್ಜೇಯ್ಯ…ಪೇ॰… ತಂ ಪಟಿದೇಸೇಮೀತಿ।

    4. Yā pana bhikkhunī agilānā phāṇitaṃ viññāpetvā bhuñjeyya…pe… taṃ paṭidesemīti.

    ಮಚ್ಛವಿಞ್ಞಾಪನಸಿಕ್ಖಾಪದಂ

    Macchaviññāpanasikkhāpadaṃ

    ೫. ಯಾ ಪನ ಭಿಕ್ಖುನೀ ಅಗಿಲಾನಾ ಮಚ್ಛಂ ವಿಞ್ಞಾಪೇತ್ವಾ ಭುಞ್ಜೇಯ್ಯ…ಪೇ॰… ತಂ ಪಟಿದೇಸೇಮೀತಿ।

    5. Yā pana bhikkhunī agilānā macchaṃ viññāpetvā bhuñjeyya…pe… taṃ paṭidesemīti.

    ಮಂಸವಿಞ್ಞಾಪನಸಿಕ್ಖಾಪದಂ

    Maṃsaviññāpanasikkhāpadaṃ

    ೬. ಯಾ ಪನ ಭಿಕ್ಖುನೀ ಅಗಿಲಾನಾ ಮಂಸಂ ವಿಞ್ಞಾಪೇತ್ವಾ ಭುಞ್ಜೇಯ್ಯ…ಪೇ॰… ತಂ ಪಟಿದೇಸೇಮೀತಿ।

    6. Yā pana bhikkhunī agilānā maṃsaṃ viññāpetvā bhuñjeyya…pe… taṃ paṭidesemīti.

    ಖೀರವಿಞ್ಞಾಪನಸಿಕ್ಖಾಪದಂ

    Khīraviññāpanasikkhāpadaṃ

    ೭. ಯಾ ಪನ ಭಿಕ್ಖುನೀ ಅಗಿಲಾನಾ ಖೀರಂ ವಿಞ್ಞಾಪೇತ್ವಾ ಭುಞ್ಜೇಯ್ಯ…ಪೇ॰… ತಂ ಪಟಿದೇಸೇಮೀತಿ।

    7. Yā pana bhikkhunī agilānā khīraṃ viññāpetvā bhuñjeyya…pe… taṃ paṭidesemīti.

    ದಧಿವಿಞ್ಞಾಪನಸಿಕ್ಖಾಪದಂ

    Dadhiviññāpanasikkhāpadaṃ

    ೮. ಯಾ ಪನ ಭಿಕ್ಖುನೀ ಅಗಿಲಾನಾ ದಧಿಂ ವಿಞ್ಞಾಪೇತ್ವಾ ಭುಞ್ಜೇಯ್ಯ, ಪಟಿದೇಸೇತಬ್ಬಂ ತಾಯ ಭಿಕ್ಖುನಿಯಾ ‘‘ಗಾರಯ್ಹಂ, ಅಯ್ಯೇ, ಧಮ್ಮಂ ಆಪಜ್ಜಿಂ ಅಸಪ್ಪಾಯಂ ಪಾಟಿದೇಸನೀಯಂ, ತಂ ಪಟಿದೇಸೇಮೀ’’ತಿ।

    8. Yā pana bhikkhunī agilānā dadhiṃ viññāpetvā bhuñjeyya, paṭidesetabbaṃ tāya bhikkhuniyā ‘‘gārayhaṃ, ayye, dhammaṃ āpajjiṃ asappāyaṃ pāṭidesanīyaṃ, taṃ paṭidesemī’’ti.

    ಉದ್ದಿಟ್ಠಾ ಖೋ, ಅಯ್ಯಾಯೋ, ಅಟ್ಠ ಪಾಟಿದೇಸನೀಯಾ ಧಮ್ಮಾ। ತತ್ಥಾಯ್ಯಾಯೋ, ಪುಚ್ಛಾಮಿ, ಕಚ್ಚಿತ್ಥ ಪರಿಸುದ್ಧಾ, ದುತಿಯಮ್ಪಿ ಪುಚ್ಛಾಮಿ, ಕಚ್ಚಿತ್ಥ ಪರಿಸುದ್ಧಾ, ತತಿಯಮ್ಪಿ ಪುಚ್ಛಾಮಿ, ಕಚ್ಚಿತ್ಥ ಪರಿಸುದ್ಧಾ, ಪರಿಸುದ್ಧೇತ್ಥಾಯ್ಯಾಯೋ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀತಿ।

    Uddiṭṭhā kho, ayyāyo, aṭṭha pāṭidesanīyā dhammā. Tatthāyyāyo, pucchāmi, kaccittha parisuddhā, dutiyampi pucchāmi, kaccittha parisuddhā, tatiyampi pucchāmi, kaccittha parisuddhā, parisuddhetthāyyāyo, tasmā tuṇhī, evametaṃ dhārayāmīti.

    ಪಾಟಿದೇಸನೀಯಾ ನಿಟ್ಠಿತಾ।

    Pāṭidesanīyā niṭṭhitā.

    ಸೇಖಿಯಾ

    Sekhiyā

    ಇಮೇ ಖೋ ಪನಾಯ್ಯಾಯೋ, ಸೇಖಿಯಾ ಧಮ್ಮಾ ಉದ್ದೇಸಂ ಆಗಚ್ಛನ್ತಿ।

    Ime kho panāyyāyo, sekhiyā dhammā uddesaṃ āgacchanti.

    ಪರಿಮಣ್ಡಲಸಿಕ್ಖಾಪದಂ

    Parimaṇḍalasikkhāpadaṃ

    ೧. ಪರಿಮಣ್ಡಲಂ ನಿವಾಸೇಸ್ಸಾಮೀತಿ ಸಿಕ್ಖಾ ಕರಣೀಯಾ।

    1. Parimaṇḍalaṃ nivāsessāmīti sikkhā karaṇīyā.

    ೨. ಪರಿಮಣ್ಡಲಂ ಪಾರುಪಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    2. Parimaṇḍalaṃ pārupissāmīti sikkhā karaṇīyā.

    ಸುಪ್ಪಟಿಚ್ಛನ್ನಸಿಕ್ಖಾಪದಂ

    Suppaṭicchannasikkhāpadaṃ

    ೩. ಸುಪ್ಪಟಿಚ್ಛನ್ನಾ ಅನ್ತರಘರೇ ಗಮಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    3. Suppaṭicchannā antaraghare gamissāmīti sikkhā karaṇīyā.

    ೪. ಸುಪ್ಪಟಿಚ್ಛನ್ನಾ ಅನ್ತರಘರೇ ನಿಸೀದಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    4. Suppaṭicchannā antaraghare nisīdissāmīti sikkhā karaṇīyā.

    ಸುಸಂವುತಸಿಕ್ಖಾಪದಂ

    Susaṃvutasikkhāpadaṃ

    ೫. ಸುಸಂವುತಾ ಅನ್ತರಘರೇ ಗಮಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    5. Susaṃvutā antaraghare gamissāmīti sikkhā karaṇīyā.

    ೬. ಸುಸಂವುತಾ ಅನ್ತರಘರೇ ನಿಸೀದಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    6. Susaṃvutā antaraghare nisīdissāmīti sikkhā karaṇīyā.

    ಓಕ್ಖಿತ್ತಚಕ್ಖುಸಿಕ್ಖಾಪದಂ

    Okkhittacakkhusikkhāpadaṃ

    ೭. ಓಕ್ಖಿತ್ತಚಕ್ಖುನೀ ಅನ್ತರಘರೇ ಗಮಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    7. Okkhittacakkhunī antaraghare gamissāmīti sikkhā karaṇīyā.

    ೮. ಓಕ್ಖಿತ್ತಚಕ್ಖುನೀ ಅನ್ತರಘರೇ ನಿಸೀದಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    8. Okkhittacakkhunī antaraghare nisīdissāmīti sikkhā karaṇīyā.

    ಉಕ್ಖಿತ್ತಕಸಿಕ್ಖಾಪದಂ

    Ukkhittakasikkhāpadaṃ

    ೯. ನ ಉಕ್ಖಿತ್ತಕಾಯ ಅನ್ತರಘರೇ ಗಮಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    9. Na ukkhittakāya antaraghare gamissāmīti sikkhā karaṇīyā.

    ೧೦. ನ ಉಕ್ಖಿತ್ತಕಾಯ ಅನ್ತರಘರೇ ನಿಸೀದಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    10. Na ukkhittakāya antaraghare nisīdissāmīti sikkhā karaṇīyā.

    ಪರಿಮಣ್ಡಲವಗ್ಗೋ ಪಠಮೋ।

    Parimaṇḍalavaggo paṭhamo.

    ಉಜ್ಜಗ್ಘಿಕಸಿಕ್ಖಾಪದಂ

    Ujjagghikasikkhāpadaṃ

    ೧೧. ನ ಉಜ್ಜಗ್ಘಿಕಾಯ ಅನ್ತರಘರೇ ಗಮಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    11. Na ujjagghikāya antaraghare gamissāmīti sikkhā karaṇīyā.

    ೧೨. ನ ಉಜ್ಜಗ್ಘಿಕಾಯ ಅನ್ತರಘರೇ ನಿಸೀದಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    12. Na ujjagghikāya antaraghare nisīdissāmīti sikkhā karaṇīyā.

    ಉಚ್ಚಸದ್ದಸಿಕ್ಖಾಪದಂ

    Uccasaddasikkhāpadaṃ

    ೧೩. ಅಪ್ಪಸದ್ದಾ ಅನ್ತರಘರೇ ಗಮಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    13. Appasaddā antaraghare gamissāmīti sikkhā karaṇīyā.

    ೧೪. ಅಪ್ಪಸದ್ದಾ ಅನ್ತರಘರೇ ನಿಸೀದಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    14. Appasaddā antaraghare nisīdissāmīti sikkhā karaṇīyā.

    ಕಾಯಪ್ಪಚಾಲಕಸಿಕ್ಖಾಪದಂ

    Kāyappacālakasikkhāpadaṃ

    ೧೫. ನ ಕಾಯಪ್ಪಚಾಲಕಂ ಅನ್ತರಘರೇ ಗಮಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    15. Na kāyappacālakaṃ antaraghare gamissāmīti sikkhā karaṇīyā.

    ೧೬. ನ ಕಾಯಪ್ಪಚಾಲಕಂ ಅನ್ತರಘರೇ ನಿಸೀದಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    16. Na kāyappacālakaṃ antaraghare nisīdissāmīti sikkhā karaṇīyā.

    ಬಾಹುಪ್ಪಚಾಲಕಸಿಕ್ಖಾಪದಂ

    Bāhuppacālakasikkhāpadaṃ

    ೧೭. ನ ಬಾಹುಪ್ಪಚಾಲಕಂ ಅನ್ತರಘರೇ ಗಮಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    17. Na bāhuppacālakaṃ antaraghare gamissāmīti sikkhā karaṇīyā.

    ೧೮. ನ ಬಾಹುಪ್ಪಚಾಲಕಂ ಅನ್ತರಘರೇ ನಿಸೀದಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    18. Na bāhuppacālakaṃ antaraghare nisīdissāmīti sikkhā karaṇīyā.

    ಸೀಸಪ್ಪಚಾಲಕಸಿಕ್ಖಾಪದಂ

    Sīsappacālakasikkhāpadaṃ

    ೧೯. ನ ಸೀಸಪ್ಪಚಾಲಕಂ ಅನ್ತರಘರೇ ಗಮಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    19. Na sīsappacālakaṃ antaraghare gamissāmīti sikkhā karaṇīyā.

    ೨೦. ನ ಸೀಸಪ್ಪಚಾಲಕಂ ಅನ್ತರಘರೇ ನಿಸೀದಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    20. Na sīsappacālakaṃ antaraghare nisīdissāmīti sikkhā karaṇīyā.

    ಉಜ್ಜಗ್ಘಿಕವಗ್ಗೋ ದುತಿಯೋ।

    Ujjagghikavaggo dutiyo.

    ಖಮ್ಭಕತಸಿಕ್ಖಾಪದಂ

    Khambhakatasikkhāpadaṃ

    ೨೧. ನ ಖಮ್ಭಕತಾ ಅನ್ತರಘರೇ ಗಮಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    21. Na khambhakatā antaraghare gamissāmīti sikkhā karaṇīyā.

    ೨೨. ನ ಖಮ್ಭಕತಾ ಅನ್ತರಘರೇ ನಿಸೀದಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    22. Na khambhakatā antaraghare nisīdissāmīti sikkhā karaṇīyā.

    ಓಗುಣ್ಠಿತಸಿಕ್ಖಾಪದಂ

    Oguṇṭhitasikkhāpadaṃ

    ೨೩. ನ ಓಗುಣ್ಠಿತಾ ಅನ್ತರಘರೇ ಗಮಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    23. Na oguṇṭhitā antaraghare gamissāmīti sikkhā karaṇīyā.

    ೨೪. ನ ಓಗುಣ್ಠಿತಾ ಅನ್ತರಘರೇ ನಿಸೀದಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    24. Na oguṇṭhitā antaraghare nisīdissāmīti sikkhā karaṇīyā.

    ಉಕ್ಕುಟಿಕಸಿಕ್ಖಾಪದಂ

    Ukkuṭikasikkhāpadaṃ

    ೨೫. ನ ಉಕ್ಕುಟಿಕಾಯ ಅನ್ತರಘರೇ ಗಮಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    25. Na ukkuṭikāya antaraghare gamissāmīti sikkhā karaṇīyā.

    ಪಲ್ಲತ್ಥಿಕಸಿಕ್ಖಾಪದಂ

    Pallatthikasikkhāpadaṃ

    ೨೬. ನ ಪಲ್ಲತ್ಥಿಕಾಯ ಅನ್ತರಘರೇ ನಿಸೀದಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    26. Na pallatthikāya antaraghare nisīdissāmīti sikkhā karaṇīyā.

    ಸಕ್ಕಚ್ಚಪಟಿಗ್ಗಹಣಸಿಕ್ಖಾಪದಂ

    Sakkaccapaṭiggahaṇasikkhāpadaṃ

    ೨೭. ಸಕ್ಕಚ್ಚಂ ಪಿಣ್ಡಪಾತಂ ಪಟಿಗ್ಗಹೇಸ್ಸಾಮೀತಿ ಸಿಕ್ಖಾ ಕರಣೀಯಾ।

    27. Sakkaccaṃ piṇḍapātaṃ paṭiggahessāmīti sikkhā karaṇīyā.

    ಪತ್ತಸಞ್ಞಿನೀಪಟಿಗ್ಗಹಣಸಿಕ್ಖಾಪದಂ

    Pattasaññinīpaṭiggahaṇasikkhāpadaṃ

    ೨೮. ಪತ್ತಸಞ್ಞಿನೀ ಪಿಣ್ಡಪಾತಂ ಪಟಿಗ್ಗಹೇಸ್ಸಾಮೀತಿ ಸಿಕ್ಖಾ ಕರಣೀಯಾ।

    28. Pattasaññinī piṇḍapātaṃ paṭiggahessāmīti sikkhā karaṇīyā.

    ಸಮಸೂಪಕಪಟಿಗ್ಗಹಣಸಿಕ್ಖಾಪದಂ

    Samasūpakapaṭiggahaṇasikkhāpadaṃ

    ೨೯. ಸಮಸೂಪಕಂ ಪಿಣ್ಡಪಾತಂ ಪಟಿಗ್ಗಹೇಸ್ಸಾಮೀತಿ ಸಿಕ್ಖಾ ಕರಣೀಯಾ।

    29. Samasūpakaṃ piṇḍapātaṃ paṭiggahessāmīti sikkhā karaṇīyā.

    ಸಮತಿತ್ತಿಕಸಿಕ್ಖಾಪದಂ

    Samatittikasikkhāpadaṃ

    ೩೦. ಸಮತಿತ್ತಿಕಂ ಪಿಣ್ಡಪಾತಂ ಪಟಿಗ್ಗಹೇಸ್ಸಾಮೀತಿ ಸಿಕ್ಖಾ ಕರಣೀಯಾ।

    30. Samatittikaṃ piṇḍapātaṃ paṭiggahessāmīti sikkhā karaṇīyā.

    ಖಮ್ಭಕತವಗ್ಗೋ ತತಿಯೋ।

    Khambhakatavaggo tatiyo.

    ಸಕ್ಕಚ್ಚಭುಞ್ಜನಸಿಕ್ಖಾಪದಂ

    Sakkaccabhuñjanasikkhāpadaṃ

    ೩೧. ಸಕ್ಕಚ್ಚಂ ಪಿಣ್ಡಪಾತಂ ಭುಞ್ಜಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    31. Sakkaccaṃ piṇḍapātaṃ bhuñjissāmīti sikkhā karaṇīyā.

    ಪತ್ತಸಞ್ಞಿನೀಭುಞ್ಜನಸಿಕ್ಖಾಪದಂ

    Pattasaññinībhuñjanasikkhāpadaṃ

    ೩೨. ಪತ್ತಸಞ್ಞಿನೀ ಪಿಣ್ಡಪಾತಂ ಭುಞ್ಜಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    32. Pattasaññinī piṇḍapātaṃ bhuñjissāmīti sikkhā karaṇīyā.

    ಸಪದಾನಸಿಕ್ಖಾಪದಂ

    Sapadānasikkhāpadaṃ

    ೩೩. ಸಪದಾನಂ ಪಿಣ್ಡಪಾತಂ ಭುಞ್ಜಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    33. Sapadānaṃ piṇḍapātaṃ bhuñjissāmīti sikkhā karaṇīyā.

    ಸಮಸೂಪಕಸಿಕ್ಖಾಪದಂ

    Samasūpakasikkhāpadaṃ

    ೩೪. ಸಮಸೂಪಕಂ ಪಿಣ್ಡಪಾತಂ ಭುಞ್ಜಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    34. Samasūpakaṃ piṇḍapātaṃ bhuñjissāmīti sikkhā karaṇīyā.

    ನ ಥೂಪಕತಸಿಕ್ಖಾಪದಂ

    Na thūpakatasikkhāpadaṃ

    ೩೫. ನ ಥೂಪಕತೋ ಓಮದ್ದಿತ್ವಾ ಪಿಣ್ಡಪಾತಂ ಭುಞ್ಜಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    35. Na thūpakato omadditvā piṇḍapātaṃ bhuñjissāmīti sikkhā karaṇīyā.

    ಓದನಪ್ಪಟಿಚ್ಛಾದನಸಿಕ್ಖಾಪದಂ

    Odanappaṭicchādanasikkhāpadaṃ

    ೩೬. ನ ಸೂಪಂ ವಾ ಬ್ಯಞ್ಜನಂ ವಾ ಓದನೇನ ಪಟಿಚ್ಛಾದೇಸ್ಸಾಮಿ ಭಿಯ್ಯೋಕಮ್ಯತಂ ಉಪಾದಾಯಾತಿ ಸಿಕ್ಖಾ ಕರಣೀಯಾ।

    36. Na sūpaṃ vā byañjanaṃ vā odanena paṭicchādessāmi bhiyyokamyataṃ upādāyāti sikkhā karaṇīyā.

    ಸೂಪೋದನವಿಞ್ಞತ್ತಿಸಿಕ್ಖಾಪದಂ

    Sūpodanaviññattisikkhāpadaṃ

    ೩೭. ನ ಸೂಪಂ ವಾ ಓದನಂ ವಾ ಅಗಿಲಾನಾ ಅತ್ತನೋ ಅತ್ಥಾಯ ವಿಞ್ಞಾಪೇತ್ವಾ ಭುಞ್ಜಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    37. Na sūpaṃ vā odanaṃ vā agilānā attano atthāya viññāpetvā bhuñjissāmīti sikkhā karaṇīyā.

    ಉಜ್ಝಾನಸಞ್ಞಿನೀಸಿಕ್ಖಾಪದಂ

    Ujjhānasaññinīsikkhāpadaṃ

    ೩೮. ನ ಉಜ್ಝಾನಸಞ್ಞಿನೀ ಪರೇಸಂ ಪತ್ತಂ ಓಲೋಕೇಸ್ಸಾಮೀತಿ ಸಿಕ್ಖಾ ಕರಣೀಯಾ।

    38. Na ujjhānasaññinī paresaṃ pattaṃ olokessāmīti sikkhā karaṇīyā.

    ಕಬಳಸಿಕ್ಖಾಪದಂ

    Kabaḷasikkhāpadaṃ

    ೩೯. ನಾತಿಮಹನ್ತಂ ಕಬಳಂ ಕರಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    39. Nātimahantaṃ kabaḷaṃ karissāmīti sikkhā karaṇīyā.

    ಆಲೋಪಸಿಕ್ಖಾಪದಂ

    Ālopasikkhāpadaṃ

    ೪೦. ಪರಿಮಣ್ಡಲಂ ಆಲೋಪಂ ಕರಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    40. Parimaṇḍalaṃ ālopaṃ karissāmīti sikkhā karaṇīyā.

    ಸಕ್ಕಚ್ಚವಗ್ಗೋ ಚತುತ್ಥೋ।

    Sakkaccavaggo catuttho.

    ಅನಾಹಟಸಿಕ್ಖಾಪದಂ

    Anāhaṭasikkhāpadaṃ

    ೪೧. ನ ಅನಾಹಟೇ ಕಬಳೇ ಮುಖದ್ವಾರಂ ವಿವರಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    41. Na anāhaṭe kabaḷe mukhadvāraṃ vivarissāmīti sikkhā karaṇīyā.

    ಭುಞ್ಜಮಾನಸಿಕ್ಖಾಪದಂ

    Bhuñjamānasikkhāpadaṃ

    ೪೨. ನ ಭುಞ್ಜಮಾನಾ ಸಬ್ಬಹತ್ಥಂ ಮುಖೇ ಪಕ್ಖಿಪಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    42. Na bhuñjamānā sabbahatthaṃ mukhe pakkhipissāmīti sikkhā karaṇīyā.

    ಸಕಬಳಸಿಕ್ಖಾಪದಂ

    Sakabaḷasikkhāpadaṃ

    ೪೩. ನ ಸಕಬಳೇನ ಮುಖೇನ ಬ್ಯಾಹರಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    43. Na sakabaḷena mukhena byāharissāmīti sikkhā karaṇīyā.

    ಪಿಣ್ಡುಕ್ಖೇಪಕಸಿಕ್ಖಾಪದಂ

    Piṇḍukkhepakasikkhāpadaṃ

    ೪೪. ನ ಪಿಣ್ಡುಕ್ಖೇಪಕಂ ಭುಞ್ಜಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    44. Na piṇḍukkhepakaṃ bhuñjissāmīti sikkhā karaṇīyā.

    ಕಬಳಾವಚ್ಛೇದಕಸಿಕ್ಖಾಪದಂ

    Kabaḷāvacchedakasikkhāpadaṃ

    ೪೫. ನ ಕಬಳಾವಚ್ಛೇದಕಂ ಭುಞ್ಜಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    45. Na kabaḷāvacchedakaṃ bhuñjissāmīti sikkhā karaṇīyā.

    ಅವಗಣ್ಡಕಾರಕಸಿಕ್ಖಾಪದಂ

    Avagaṇḍakārakasikkhāpadaṃ

    ೪೬. ನ ಅವಗಣ್ಡಕಾರಕಂ ಭುಞ್ಜಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    46. Na avagaṇḍakārakaṃ bhuñjissāmīti sikkhā karaṇīyā.

    ಹತ್ಥನಿದ್ಧುನಕಸಿಕ್ಖಾಪದಂ

    Hatthaniddhunakasikkhāpadaṃ

    ೪೭. ನ ಹತ್ಥನಿದ್ಧುನಕಂ ಭುಞ್ಜಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    47. Na hatthaniddhunakaṃ bhuñjissāmīti sikkhā karaṇīyā.

    ಸಿತ್ಥಾವಕಾರಕಸಿಕ್ಖಾಪದಂ

    Sitthāvakārakasikkhāpadaṃ

    ೪೮. ನ ಸಿತ್ಥಾವಕಾರಕಂ ಭುಞ್ಜಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    48. Na sitthāvakārakaṃ bhuñjissāmīti sikkhā karaṇīyā.

    ಜಿವ್ಹಾನಿಚ್ಛಾರಕಸಿಕ್ಖಾಪದಂ

    Jivhānicchārakasikkhāpadaṃ

    ೪೯. ನ ಜಿವ್ಹಾನಿಚ್ಛಾರಕಂ ಭುಞ್ಜಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    49. Na jivhānicchārakaṃ bhuñjissāmīti sikkhā karaṇīyā.

    ಚಪುಚಪುಕಾರಕಸಿಕ್ಖಾಪದಂ

    Capucapukārakasikkhāpadaṃ

    ೫೦. ನ ಚಪುಚಪುಕಾರಕಂ ಭುಞ್ಜಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    50. Na capucapukārakaṃ bhuñjissāmīti sikkhā karaṇīyā.

    ಕಬಳವಗ್ಗೋ ಪಞ್ಚಮೋ।

    Kabaḷavaggo pañcamo.

    ಸುರುಸುರುಕಾರಕಸಿಕ್ಖಾಪದಂ

    Surusurukārakasikkhāpadaṃ

    ೫೧. ನ ಸುರುಸುರುಕಾರಕಂ ಭುಞ್ಜಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    51. Na surusurukārakaṃ bhuñjissāmīti sikkhā karaṇīyā.

    ಹತ್ಥನಿಲ್ಲೇಹಕಸಿಕ್ಖಾಪದಂ

    Hatthanillehakasikkhāpadaṃ

    ೫೨. ನ ಹತ್ಥನಿಲ್ಲೇಹಕಂ ಭುಞ್ಜಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    52. Na hatthanillehakaṃ bhuñjissāmīti sikkhā karaṇīyā.

    ಪತ್ತನಿಲ್ಲೇಹಕಸಿಕ್ಖಾಪದಂ

    Pattanillehakasikkhāpadaṃ

    ೫೩. ನ ಪತ್ತನಿಲ್ಲೇಹಕಂ ಭುಞ್ಜಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    53. Na pattanillehakaṃ bhuñjissāmīti sikkhā karaṇīyā.

    ಓಟ್ಠನಿಲ್ಲೇಹಕಸಿಕ್ಖಾಪದಂ

    Oṭṭhanillehakasikkhāpadaṃ

    ೫೪. ನ ಓಟ್ಠನಿಲ್ಲೇಹಕಂ ಭುಞ್ಜಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    54. Na oṭṭhanillehakaṃ bhuñjissāmīti sikkhā karaṇīyā.

    ಸಾಮಿಸಸಿಕ್ಖಾಪದಂ

    Sāmisasikkhāpadaṃ

    ೫೫. ನ ಸಾಮಿಸೇನ ಹತ್ಥೇನ ಪಾನೀಯಥಾಲಕಂ ಪಟಿಗ್ಗಹೇಸ್ಸಾಮೀತಿ ಸಿಕ್ಖಾ ಕರಣೀಯಾ।

    55. Na sāmisena hatthena pānīyathālakaṃ paṭiggahessāmīti sikkhā karaṇīyā.

    ಸಸಿತ್ಥಕಸಿಕ್ಖಾಪದಂ

    Sasitthakasikkhāpadaṃ

    ೫೬. ನ ಸಸಿತ್ಥಕಂ ಪತ್ತಧೋವನಂ ಅನ್ತರಘರೇ ಛಡ್ಡೇಸ್ಸಾಮೀತಿ ಸಿಕ್ಖಾ ಕರಣೀಯಾ।

    56. Na sasitthakaṃ pattadhovanaṃ antaraghare chaḍḍessāmīti sikkhā karaṇīyā.

    ಛತ್ತಪಾಣಿಸಿಕ್ಖಾಪದಂ

    Chattapāṇisikkhāpadaṃ

    ೫೭. ನ ಛತ್ತಪಾಣಿಸ್ಸ ಅಗಿಲಾನಸ್ಸ ಧಮ್ಮಂ ದೇಸೇಸ್ಸಾಮೀತಿ ಸಿಕ್ಖಾ ಕರಣೀಯಾ।

    57. Na chattapāṇissa agilānassa dhammaṃ desessāmīti sikkhā karaṇīyā.

    ದಣ್ಡಪಾಣಿಸಿಕ್ಖಾಪದಂ

    Daṇḍapāṇisikkhāpadaṃ

    ೫೮. ನ ದಣ್ಡಪಾಣಿಸ್ಸ ಅಗಿಲಾನಸ್ಸ ಧಮ್ಮಂ ದೇಸೇಸ್ಸಾಮೀತಿ ಸಿಕ್ಖಾ ಕರಣೀಯಾ।

    58. Na daṇḍapāṇissa agilānassa dhammaṃ desessāmīti sikkhā karaṇīyā.

    ಸತ್ಥಪಾಣಿಸಿಕ್ಖಾಪದಂ

    Satthapāṇisikkhāpadaṃ

    ೫೯. ನ ಸತ್ಥಪಾಣಿಸ್ಸ ಅಗಿಲಾನಸ್ಸ ಧಮ್ಮಂ ದೇಸೇಸ್ಸಾಮೀತಿ ಸಿಕ್ಖಾ ಕರಣೀಯಾ।

    59. Na satthapāṇissa agilānassa dhammaṃ desessāmīti sikkhā karaṇīyā.

    ಆವುಧಪಾಣಿಸಿಕ್ಖಾಪದಂ

    Āvudhapāṇisikkhāpadaṃ

    ೬೦. ನ ಆವುಧಪಾಣಿಸ್ಸ ಅಗಿಲಾನಸ್ಸ ಧಮ್ಮಂ ದೇಸೇಸ್ಸಾಮೀತಿ ಸಿಕ್ಖಾ ಕರಣೀಯಾ।

    60. Na āvudhapāṇissa agilānassa dhammaṃ desessāmīti sikkhā karaṇīyā.

    ಸುರುಸುರುವಗ್ಗೋ ಛಟ್ಠೋ।

    Surusuruvaggo chaṭṭho.

    ಪಾದುಕಸಿಕ್ಖಾಪದಂ

    Pādukasikkhāpadaṃ

    ೬೧. ನ ಪಾದುಕಾರುಳ್ಹಸ್ಸ ಅಗಿಲಾನಸ್ಸ ಧಮ್ಮಂ ದೇಸೇಸ್ಸಾಮೀತಿ ಸಿಕ್ಖಾ ಕರಣೀಯಾ।

    61. Na pādukāruḷhassa agilānassa dhammaṃ desessāmīti sikkhā karaṇīyā.

    ಉಪಾಹನಸಿಕ್ಖಾಪದಂ

    Upāhanasikkhāpadaṃ

    ೬೨. ನ ಉಪಾಹನಾರುಳ್ಹಸ್ಸ ಅಗಿಲಾನಸ್ಸ ಧಮ್ಮಂ ದೇಸೇಸ್ಸಾಮೀತಿ ಸಿಕ್ಖಾ ಕರಣೀಯಾ।

    62. Na upāhanāruḷhassa agilānassa dhammaṃ desessāmīti sikkhā karaṇīyā.

    ಯಾನಸಿಕ್ಖಾಪದಂ

    Yānasikkhāpadaṃ

    ೬೩. ನ ಯಾನಗತಸ್ಸ ಅಗಿಲಾನಸ್ಸ ಧಮ್ಮಂ ದೇಸೇಸ್ಸಾಮೀತಿ ಸಿಕ್ಖಾ ಕರಣೀಯಾ।

    63. Na yānagatassa agilānassa dhammaṃ desessāmīti sikkhā karaṇīyā.

    ಸಯನಸಿಕ್ಖಾಪದಂ

    Sayanasikkhāpadaṃ

    ೬೪. ನ ಸಯನಗತಸ್ಸ ಅಗಿಲಾನಸ್ಸ ಧಮ್ಮಂ ದೇಸೇಸ್ಸಾಮೀತಿ ಸಿಕ್ಖಾ ಕರಣೀಯಾ।

    64. Na sayanagatassa agilānassa dhammaṃ desessāmīti sikkhā karaṇīyā.

    ಪಲ್ಲತ್ಥಿಕಸಿಕ್ಖಾಪದಂ

    Pallatthikasikkhāpadaṃ

    ೬೫. ನ ಪಲ್ಲತ್ಥಿಕಾಯ ನಿಸಿನ್ನಸ್ಸ ಅಗಿಲಾನಸ್ಸ ಧಮ್ಮಂ ದೇಸೇಸ್ಸಾಮೀತಿ ಸಿಕ್ಖಾ ಕರಣೀಯಾ।

    65. Na pallatthikāya nisinnassa agilānassa dhammaṃ desessāmīti sikkhā karaṇīyā.

    ವೇಠಿತಸಿಕ್ಖಾಪದಂ

    Veṭhitasikkhāpadaṃ

    ೬೬. ನ ವೇಠಿತಸೀಸಸ್ಸ ಅಗಿಲಾನಸ್ಸ ಧಮ್ಮಂ ದೇಸೇಸ್ಸಾಮೀತಿ ಸಿಕ್ಖಾ ಕರಣೀಯಾ।

    66. Na veṭhitasīsassa agilānassa dhammaṃ desessāmīti sikkhā karaṇīyā.

    ಓಗುಣ್ಠಿತಸಿಕ್ಖಾಪದಂ

    Oguṇṭhitasikkhāpadaṃ

    ೬೭. ನ ಓಗುಣ್ಠಿತಸೀಸಸ್ಸ ಅಗಿಲಾನಸ್ಸ ಧಮ್ಮಂ ದೇಸೇಸ್ಸಾಮೀತಿ ಸಿಕ್ಖಾ ಕರಣೀಯಾ।

    67. Na oguṇṭhitasīsassa agilānassa dhammaṃ desessāmīti sikkhā karaṇīyā.

    ಛಮಾಸಿಕ್ಖಾಪದಂ

    Chamāsikkhāpadaṃ

    ೬೮. ನ ಛಮಾಯಂ ನಿಸೀದಿತ್ವಾ ಆಸನೇ ನಿಸಿನ್ನಸ್ಸ ಅಗಿಲಾನಸ್ಸ ಧಮ್ಮಂ ದೇಸೇಸ್ಸಾಮೀತಿ ಸಿಕ್ಖಾ ಕರಣೀಯಾ।

    68. Na chamāyaṃ nisīditvā āsane nisinnassa agilānassa dhammaṃ desessāmīti sikkhā karaṇīyā.

    ನೀಚಾಸನಸಿಕ್ಖಾಪದಂ

    Nīcāsanasikkhāpadaṃ

    ೬೯. ನ ನೀಚೇ ಆಸನೇ ನಿಸೀದಿತ್ವಾ ಉಚ್ಚೇ ಆಸನೇ ನಿಸಿನ್ನಸ್ಸ ಅಗಿಲಾನಸ್ಸ ಧಮ್ಮಂ ದೇಸೇಸ್ಸಾಮೀತಿ ಸಿಕ್ಖಾ ಕರಣೀಯಾ।

    69. Na nīce āsane nisīditvā ucce āsane nisinnassa agilānassa dhammaṃ desessāmīti sikkhā karaṇīyā.

    ಠಿತಾಸಿಕ್ಖಾಪದಂ

    Ṭhitāsikkhāpadaṃ

    ೭೦. ನ ಠಿತಾ ನಿಸಿನ್ನಸ್ಸ ಅಗಿಲಾನಸ್ಸ ಧಮ್ಮಂ ದೇಸೇಸ್ಸಾಮೀತಿ ಸಿಕ್ಖಾ ಕರಣೀಯಾ।

    70. Na ṭhitā nisinnassa agilānassa dhammaṃ desessāmīti sikkhā karaṇīyā.

    ಪಚ್ಛತೋಗಚ್ಛನ್ತೀಸಿಕ್ಖಾಪದಂ

    Pacchatogacchantīsikkhāpadaṃ

    ೭೧. ನ ಪಚ್ಛತೋ ಗಚ್ಛನ್ತೀ ಪುರತೋ ಗಚ್ಛನ್ತಸ್ಸ ಅಗಿಲಾನಸ್ಸ ಧಮ್ಮಂ ದೇಸೇಸ್ಸಾಮೀತಿ ಸಿಕ್ಖಾ ಕರಣೀಯಾ।

    71. Na pacchato gacchantī purato gacchantassa agilānassa dhammaṃ desessāmīti sikkhā karaṇīyā.

    ಉಪ್ಪಥೇನಗಚ್ಛನ್ತೀಸಿಕ್ಖಾಪದಂ

    Uppathenagacchantīsikkhāpadaṃ

    ೭೨. ನ ಉಪ್ಪಥೇನ ಗಚ್ಛನ್ತೀ ಪಥೇನ ಗಚ್ಛನ್ತಸ್ಸ ಅಗಿಲಾನಸ್ಸ ಧಮ್ಮಂ ದೇಸೇಸ್ಸಾಮೀತಿ ಸಿಕ್ಖಾ ಕರಣೀಯಾ।

    72. Na uppathena gacchantī pathena gacchantassa agilānassa dhammaṃ desessāmīti sikkhā karaṇīyā.

    ಠಿತಾಉಚ್ಚಾರಸಿಕ್ಖಾಪದಂ

    Ṭhitāuccārasikkhāpadaṃ

    ೭೩. ನ ಠಿತಾ ಅಗಿಲಾನಾ ಉಚ್ಚಾರಂ ವಾ ಪಸ್ಸಾವಂ ವಾ ಕರಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    73. Na ṭhitā agilānā uccāraṃ vā passāvaṃ vā karissāmīti sikkhā karaṇīyā.

    ಹರಿತೇಉಚ್ಚಾರಸಿಕ್ಖಾಪದಂ

    Hariteuccārasikkhāpadaṃ

    ೭೪. ನ ಹರಿತೇ ಅಗಿಲಾನಾ ಉಚ್ಚಾರಂ ವಾ ಪಸ್ಸಾವಂ ವಾ ಖೇಳಂ ವಾ ಕರಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    74. Na harite agilānā uccāraṃ vā passāvaṃ vā kheḷaṃ vā karissāmīti sikkhā karaṇīyā.

    ಉದಕೇಉಚ್ಚಾರಸಿಕ್ಖಾಪದಂ

    Udakeuccārasikkhāpadaṃ

    ೭೫. ನ ಉದಕೇ ಅಗಿಲಾನಾ ಉಚ್ಚಾರಂ ವಾ ಪಸ್ಸಾವಂ ವಾ ಖೇಳಂ ವಾ ಕರಿಸ್ಸಾಮೀತಿ ಸಿಕ್ಖಾ ಕರಣೀಯಾ।

    75. Na udake agilānā uccāraṃ vā passāvaṃ vā kheḷaṃ vā karissāmīti sikkhā karaṇīyā.

    ಪಾದುಕವಗ್ಗೋ ಸತ್ತಮೋ।

    Pādukavaggo sattamo.

    ಉದ್ದಿಟ್ಠಾ ಖೋ, ಅಯ್ಯಾಯೋ, ಸೇಖಿಯಾ ಧಮ್ಮಾ। ತತ್ಥಾಯ್ಯಾಯೋ, ಪುಚ್ಛಾಮಿ, ಕಚ್ಚಿತ್ಥ ಪರಿಸುದ್ಧಾ, ದುತಿಯಮ್ಪಿ ಪುಚ್ಛಾಮಿ, ಕಚ್ಚಿತ್ಥ ಪರಿಸುದ್ಧಾ, ತತಿಯಮ್ಪಿ ಪುಚ್ಛಾಮಿ, ಕಚ್ಚಿತ್ಥ ಪರಿಸುದ್ಧಾ, ಪರಿಸುದ್ಧೇತ್ಥಾಯ್ಯಾಯೋ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀತಿ।

    Uddiṭṭhā kho, ayyāyo, sekhiyā dhammā. Tatthāyyāyo, pucchāmi, kaccittha parisuddhā, dutiyampi pucchāmi, kaccittha parisuddhā, tatiyampi pucchāmi, kaccittha parisuddhā, parisuddhetthāyyāyo, tasmā tuṇhī, evametaṃ dhārayāmīti.

    ಸೇಖಿಯಾ ನಿಟ್ಠಿತಾ।

    Sekhiyā niṭṭhitā.

    ಅಧಿಕರಣಸಮಥಾ

    Adhikaraṇasamathā

    ಇಮೇ ಖೋ ಪನಾಯ್ಯಾಯೋ, ಸತ್ತ ಅಧಿಕರಣಸಮಥಾ

    Ime kho panāyyāyo, satta adhikaraṇasamathā

    ಧಮ್ಮಾ ಉದ್ದೇಸಂ ಆಗಚ್ಛನ್ತಿ।

    Dhammā uddesaṃ āgacchanti.

    ಉಪ್ಪನ್ನುಪ್ಪನ್ನಾನಂ ಅಧಿಕರಣಾನಂ ಸಮಥಾಯ ವೂಪಸಮಾಯ ಸಮ್ಮುಖಾವಿನಯೋ ದಾತಬ್ಬೋ।

    Uppannuppannānaṃ adhikaraṇānaṃ samathāya vūpasamāya sammukhāvinayo dātabbo.

    ಸತಿವಿನಯೋ ದಾತಬ್ಬೋ।

    Sativinayo dātabbo.

    ಅಮೂಳ್ಹವಿನಯೋ ದಾತಬ್ಬೋ।

    Amūḷhavinayo dātabbo.

    ಪಟಿಞ್ಞಾಯ ಕಾರೇತಬ್ಬಂ।

    Paṭiññāya kāretabbaṃ.

    ಯೇಭುಯ್ಯಸಿಕಾ।

    Yebhuyyasikā.

    ತಸ್ಸಪಾಪಿಯಸಿಕಾ।

    Tassapāpiyasikā.

    ತಿಣವತ್ಥಾರಕೋತಿ।

    Tiṇavatthārakoti.

    ಉದ್ದಿಟ್ಠಾ ಖೋ ಅಯ್ಯಾಯೋ ಸತ್ತ ಅಧಿಕರಣಸಮಥಾ ಧಮ್ಮಾ। ತತ್ಥಾಯ್ಯಾಯೋ ಪುಚ್ಛಾಮಿ, ಕಚ್ಚಿತ್ಥ ಪರಿಸುದ್ಧಾ, ದುತಿಯಮ್ಪಿ ಪುಚ್ಛಾಮಿ, ಕಚ್ಚಿತ್ಥ ಪರಿಸುದ್ಧಾ , ತತಿಯಮ್ಪಿ ಪುಚ್ಛಾಮಿ, ಕಚ್ಚಿತ್ಥ ಪರಿಸುದ್ಧಾ, ಪರಿಸುದ್ಧೇತ್ಥಾಯ್ಯಾಯೋ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀತಿ।

    Uddiṭṭhā kho ayyāyo satta adhikaraṇasamathā dhammā. Tatthāyyāyo pucchāmi, kaccittha parisuddhā, dutiyampi pucchāmi, kaccittha parisuddhā , tatiyampi pucchāmi, kaccittha parisuddhā, parisuddhetthāyyāyo, tasmā tuṇhī, evametaṃ dhārayāmīti.

    ಅಧಿಕರಣಸಮಥಾ ನಿಟ್ಠಿತಾ।

    Adhikaraṇasamathā niṭṭhitā.

    ಉದ್ದಿಟ್ಠಂ ಖೋ ಅಯ್ಯಾಯೋ ನಿದಾನಂ,

    Uddiṭṭhaṃ kho ayyāyo nidānaṃ,

    ಉದ್ದಿಟ್ಠಾ ಅಟ್ಠ ಪಾರಾಜಿಕಾ ಧಮ್ಮಾ,

    Uddiṭṭhā aṭṭha pārājikā dhammā,

    ಉದ್ದಿಟ್ಠಾ ಸತ್ತರಸ ಸಙ್ಘಾದಿಸೇಸಾ ಧಮ್ಮಾ,

    Uddiṭṭhā sattarasa saṅghādisesā dhammā,

    ಉದ್ದಿಟ್ಠಾ ತಿಂಸ ನಿಸ್ಸಗ್ಗಿಯಾ ಪಾಚಿತ್ತಿಯಾ ಧಮ್ಮಾ,

    Uddiṭṭhā tiṃsa nissaggiyā pācittiyā dhammā,

    ಉದ್ದಿಟ್ಠಾ ಛಸಟ್ಠಿ ಸತಾ ಪಾಚಿತ್ತಿಯಾ ಧಮ್ಮಾ,

    Uddiṭṭhā chasaṭṭhi satā pācittiyā dhammā,

    ಉದ್ದಿಟ್ಠಾ ಅಟ್ಠ ಪಾಟಿದೇಸನೀಯಾ ಧಮ್ಮಾ,

    Uddiṭṭhā aṭṭha pāṭidesanīyā dhammā,

    ಉದ್ದಿಟ್ಠಾ ಸೇಖಿಯಾ ಧಮ್ಮಾ,

    Uddiṭṭhā sekhiyā dhammā,

    ಉದ್ದಿಟ್ಠಾ ಸತ್ತ ಅಧಿಕರಣಸಮಥಾ ಧಮ್ಮಾ, ಏತ್ತಕಂ ತಸ್ಸ ಭಗವತೋ ಸುತ್ತಾಗತಂ ಸುತ್ತಪರಿಯಾಪನ್ನಂ ಅನ್ವದ್ಧಮಾಸಂ ಉದ್ದೇಸಂ ಆಗಚ್ಛತಿ, ತತ್ಥ ಸಬ್ಬಾಹೇವ ಸಮಗ್ಗಾಹಿ ಸಮ್ಮೋದಮಾನಾಹಿ ಅವಿವದಮಾನಾಹಿ ಸಿಕ್ಖಿತಬ್ಬನ್ತಿ।

    Uddiṭṭhā satta adhikaraṇasamathā dhammā, ettakaṃ tassa bhagavato suttāgataṃ suttapariyāpannaṃ anvaddhamāsaṃ uddesaṃ āgacchati, tattha sabbāheva samaggāhi sammodamānāhi avivadamānāhi sikkhitabbanti.

    ವಿತ್ಥಾರುದ್ದೇಸೋ ಚತುತ್ಥೋ।

    Vitthāruddeso catuttho.

    ಭಿಕ್ಖುನಿಪಾತಿಮೋಕ್ಖಂ ನಿಟ್ಠಿತಂ।

    Bhikkhunipātimokkhaṃ niṭṭhitaṃ.




    Next: ಕಙ್ಖಾವಿತರಣೀ-ಅಟ್ಠಕಥಾ • Kaṅkhāvitaraṇī-aṭṭhakathā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact