| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
9. பி⁴க்கு²னீஸுத்தவண்ணனா
9. Bhikkhunīsuttavaṇṇanā
159. நவமே ஏஹி த்வந்தி தே²ரே படிப³த்³த⁴சித்தா தங் பஹிணிதுங் ஏவமாஹ. ஸஸீஸங் பாருபித்வாதி ஸஹ ஸீஸேன காயங் பாருபித்வா. மஞ்சகே நிபஜ்ஜீதி வேகே³ன மஞ்சகங் பஞ்ஞாபெத்வா தத்த² நிபஜ்ஜி. ஏதத³வோசாதி தஸ்ஸாகாரங் ஸல்லக்கெ²த்வா லோப⁴ப்பஹானத்தா²ய ஸண்ஹேனேவ அஸுப⁴கத²ங் கதே²துங் ஏதங் அவோச. ஆஹாரஸம்பூ⁴தோதி ஆஹாரேன ஸம்பூ⁴தோ ஆஹாரங் நிஸ்ஸாய வட்³டி⁴தோ. ஆஹாரங் நிஸ்ஸாய ஆஹாரங் பஜஹதீதி பச்சுப்பன்னங் கப³ளீகாராஹாரங் நிஸ்ஸாய தங் ஏவங் யோனிஸோ ஸேவமானோ புப்³ப³கம்மஸங்கா²தங் ஆஹாரங் பஜஹதி. பச்சுப்பன்னேபி பன கப³ளீகாராஹாரே நிகந்திதண்ஹா பஜஹிதப்³பா³.
159. Navame ehi tvanti there paṭibaddhacittā taṃ pahiṇituṃ evamāha. Sasīsaṃ pārupitvāti saha sīsena kāyaṃ pārupitvā. Mañcake nipajjīti vegena mañcakaṃ paññāpetvā tattha nipajji. Etadavocāti tassākāraṃ sallakkhetvā lobhappahānatthāya saṇheneva asubhakathaṃ kathetuṃ etaṃ avoca. Āhārasambhūtoti āhārena sambhūto āhāraṃ nissāya vaḍḍhito. Āhāraṃ nissāya āhāraṃ pajahatīti paccuppannaṃ kabaḷīkārāhāraṃ nissāya taṃ evaṃ yoniso sevamāno pubbakammasaṅkhātaṃ āhāraṃ pajahati. Paccuppannepi pana kabaḷīkārāhāre nikantitaṇhā pajahitabbā.
தண்ஹங் பஜஹதீதி இதா³னி ஏவங் பவத்தங் பச்சுப்பன்னதண்ஹங் நிஸ்ஸாய வட்டமூலிகங் புப்³ப³தண்ஹங் பஜஹதி. அயங் பன பச்சுப்பன்னதண்ஹா குஸலா அகுஸலாதி? அகுஸலா. ஸேவிதப்³பா³ ந ஸேவிதப்³பா³தி? ஸேவிதப்³பா³. படிஸந்தி⁴ங் ஆகட்³ட⁴தி நாகட்³ட⁴தீதி? நாகட்³ட⁴தி. ஏதிஸ்ஸாபி பன பச்சுப்பன்னாய ஸேவிதப்³ப³தண்ஹாய நிகந்தி பஜஹிதப்³பா³யேவ. ஸோ ஹி நாம ஆயஸ்மா ஆஸவானங் க²யா உபஸம்பஜ்ஜ விஹரிஸ்ஸதி, கிமங்க³ங் பனாஹந்தி எத்த² கிமங்க³ங் பனாதி காரணபரிவிதக்கனமேதங். இத³ங் வுத்தங் ஹோதி – ஸோ ஆயஸ்மா அரஹத்தப²லங் ஸச்சி²கத்வா விஹரிஸ்ஸதி, அஹங் கேன காரணேன ந ஸச்சி²கத்வா விஹரிஸ்ஸாமி. ஸோபி ஹி ஆயஸ்மா ஸம்மாஸம்பு³த்³த⁴ஸ்ஸேவ புத்தோ, அஹம்பி ஸம்மாஸம்பு³த்³த⁴ஸ்ஸேவ புத்தோ, மய்ஹம்பேதங் உப்பஜ்ஜிஸ்ஸதீதி. மானங் நிஸ்ஸாயாதி இத³ங் ஏவங் உப்பன்னஸேவிதப்³ப³மானங் நிஸ்ஸாய. மானங் பஜஹதீதி வட்டமூலகங் புப்³ப³மானங் பஜஹதி. யங் நிஸ்ஸாய பனேஸ தங் பஜஹதி, ஸோபி தண்ஹா விய அகுஸலோ சேவ ஸேவிதப்³போ³ ச, நோ ச படிஸந்தி⁴ங் ஆகட்³ட⁴தி. நிகந்தி பன தஸ்மிம்பி பஜஹிதப்³பா³வ.
Taṇhaṃ pajahatīti idāni evaṃ pavattaṃ paccuppannataṇhaṃ nissāya vaṭṭamūlikaṃ pubbataṇhaṃ pajahati. Ayaṃ pana paccuppannataṇhā kusalā akusalāti? Akusalā. Sevitabbā na sevitabbāti? Sevitabbā. Paṭisandhiṃ ākaḍḍhati nākaḍḍhatīti? Nākaḍḍhati. Etissāpi pana paccuppannāya sevitabbataṇhāya nikanti pajahitabbāyeva. So hi nāma āyasmā āsavānaṃ khayā upasampajja viharissati, kimaṅgaṃ panāhanti ettha kimaṅgaṃ panāti kāraṇaparivitakkanametaṃ. Idaṃ vuttaṃ hoti – so āyasmā arahattaphalaṃ sacchikatvā viharissati, ahaṃ kena kāraṇena na sacchikatvā viharissāmi. Sopi hi āyasmā sammāsambuddhasseva putto, ahampi sammāsambuddhasseva putto, mayhampetaṃ uppajjissatīti. Mānaṃ nissāyāti idaṃ evaṃ uppannasevitabbamānaṃ nissāya. Mānaṃpajahatīti vaṭṭamūlakaṃ pubbamānaṃ pajahati. Yaṃ nissāya panesa taṃ pajahati, sopi taṇhā viya akusalo ceva sevitabbo ca, no ca paṭisandhiṃ ākaḍḍhati. Nikanti pana tasmimpi pajahitabbāva.
ஸேதுகா⁴தோ வுத்தோ ப⁴க³வதாதி பத³கா⁴தோ பச்சயகா⁴தோ பு³த்³தே⁴ன ப⁴க³வதா கதி²தோ. இதி இமேஹி சதூஹி அங்கே³ஹி தே²ரே தே³ஸனங் வினிவட்டெந்தே தஸ்ஸா பி⁴க்கு²னியா தே²ரங் ஆரப்³ப⁴ உப்பன்னோ ச²ந்த³ராகோ³ அபக³ஞ்சி². ஸாபி தே²ரங் க²மாபேதுங் அச்சயங் தே³ஸேஸி, தே²ரோபிஸ்ஸா படிக்³க³ண்ஹி. தங் த³ஸ்ஸேதுங் அத² கோ² ஸா பி⁴க்கு²னீதிஆதி³ வுத்தங்.
Setughātovutto bhagavatāti padaghāto paccayaghāto buddhena bhagavatā kathito. Iti imehi catūhi aṅgehi there desanaṃ vinivaṭṭente tassā bhikkhuniyā theraṃ ārabbha uppanno chandarāgo apagañchi. Sāpi theraṃ khamāpetuṃ accayaṃ desesi, theropissā paṭiggaṇhi. Taṃ dassetuṃ atha kho sā bhikkhunītiādi vuttaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. பி⁴க்கு²னீஸுத்தங் • 9. Bhikkhunīsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 9. பி⁴க்கு²னீஸுத்தவண்ணனா • 9. Bhikkhunīsuttavaṇṇanā
