| Library / Tipiṭaka / திபிடக • Tipiṭaka / சூளவக்³க³-அட்ட²கதா² • Cūḷavagga-aṭṭhakathā |
பி⁴க்கு²னீஉபஸம்பதா³னுஜானநகதா²
Bhikkhunīupasampadānujānanakathā
404. அனுஜானாமி பி⁴க்க²வே பி⁴க்கூ²ஹி பி⁴க்கு²னியோ உபஸம்பாதே³துந்தி இமாய அனுபஞ்ஞத்தியா பி⁴க்கூ² பஞ்சஸதா ஸாகியானியோ மஹாபஜாபதியா ஸத்³தி⁴விஹாரினியோ கத்வா உபஸம்பாதே³ஸுங். இதி தா ஸப்³பா³பி ஏகதோஉபஸம்பன்னா நாம அஹேஸுங். யே கோ² த்வங் கோ³தமீதி இமினா ஓவாதே³ன கோ³தமீ அரஹத்தங் பத்தா.
404.Anujānāmi bhikkhave bhikkhūhi bhikkhuniyo upasampādetunti imāya anupaññattiyā bhikkhū pañcasatā sākiyāniyo mahāpajāpatiyā saddhivihāriniyo katvā upasampādesuṃ. Iti tā sabbāpi ekatoupasampannā nāma ahesuṃ. Ye kho tvaṃ gotamīti iminā ovādena gotamī arahattaṃ pattā.
409. கம்மங் ந கரீயதீதி தஜ்ஜனீயாதி³ ஸத்தவித⁴ம்பி கம்மங் ந கரீயதி. க²மாபெந்தீதி ந புன ஏவங் கரிஸ்ஸாமீதி க²மாபெந்தி.
409.Kammaṃ na karīyatīti tajjanīyādi sattavidhampi kammaṃ na karīyati. Khamāpentīti na puna evaṃ karissāmīti khamāpenti.
410. அனுஜானாமி, பி⁴க்க²வே, பி⁴க்கூ²ஹி பி⁴க்கு²னீனங் கம்மங் ரோபெத்வா நிய்யாதே³துந்தி எத்த² தஜ்ஜனீயாதீ³ஸு ‘‘இத³ங் நாம கம்மங் ஏதிஸ்ஸா காதப்³ப³’’ந்தி ஏவங் ரோபெத்வா ‘‘தங் தா³னி தும்ஹேவ கரோதா²’’தி நிய்யாதே³தப்³ப³ங். ஸசே பன அஞ்ஞஸ்மிங் ரோபிதே அஞ்ஞங் கரொந்தி, ‘‘தஜ்ஜனீயகம்மாரஹஸ்ஸ நியஸ்ஸகம்மங் கரோதீ’’தி எத்த² வுத்தனயேன காரேதப்³ப³தங் ஆபஜ்ஜந்தி.
410.Anujānāmi, bhikkhave, bhikkhūhi bhikkhunīnaṃ kammaṃ ropetvā niyyādetunti ettha tajjanīyādīsu ‘‘idaṃ nāma kammaṃ etissā kātabba’’nti evaṃ ropetvā ‘‘taṃ dāni tumheva karothā’’ti niyyādetabbaṃ. Sace pana aññasmiṃ ropite aññaṃ karonti, ‘‘tajjanīyakammārahassa niyassakammaṃ karotī’’ti ettha vuttanayena kāretabbataṃ āpajjanti.
411. கத்³த³மோத³கேனாதி எத்த² ந கேவலங் கத்³த³மோத³கேன, விப்பஸன்னஉத³கரஜனகத்³த³மாதீ³ஸுபி யேன கேனசி ஓஸிஞ்சந்தஸ்ஸ து³க்கடமேவ. அவந்தி³யோ ஸோ பி⁴க்க²வே பி⁴க்கு² பி⁴க்கு²னிஸங்கே⁴ன காதப்³போ³தி பி⁴க்கு²னுபஸ்ஸயே ஸன்னிபதித்வா ‘‘அஸுகோ நாம அய்யோ பி⁴க்கு²னீனங் அபஸாத³னீயங் த³ஸ்ஸேதி, ஏதஸ்ஸ அய்யஸ்ஸ அவந்தி³யகரணங் ருச்சதீ’’தி ஏவங் திக்க²த்துங் ஸாவேதப்³ப³ங். எத்தாவதா அவந்தி³யோ கதோ ஹோதி. ததோ பட்டா²ய யதா² ஸாமணேரே தி³ஸ்வா ந வந்த³ந்தி; ஏவமேவ தி³ஸ்வாபி ந வந்தி³தப்³போ³. தேன பி⁴க்கு²னா ஸம்மா வத்தந்தேன பி⁴க்கு²னுபஸ்ஸயங் ஆக³ந்த்வா விஹாரேயேவ ஸங்க⁴ங் வா க³ணங் வா ஏகபுக்³க³லங் வா உபஸங்கமித்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ‘‘பி⁴க்கு²னிஸங்கோ⁴ மய்ஹங் க²மதூ’’தி க²மாபேதப்³ப³ங். தேன பி⁴க்கு²னா பி⁴க்கு²னீனங் ஸந்திகங் ஆக³ந்த்வா ‘‘ஏஸோ பி⁴க்கு² தும்ஹே க²மாபேதீ’’தி வத்தப்³ப³ங். ததோ பட்டா²ய ஸோ வந்தி³தப்³போ³. அயமெத்த² ஸங்கே²போ, வித்தா²ரங் பன கம்மவிப⁴ங்கே³ வக்கா²ம.
411.Kaddamodakenāti ettha na kevalaṃ kaddamodakena, vippasannaudakarajanakaddamādīsupi yena kenaci osiñcantassa dukkaṭameva. Avandiyo so bhikkhave bhikkhu bhikkhunisaṅghena kātabboti bhikkhunupassaye sannipatitvā ‘‘asuko nāma ayyo bhikkhunīnaṃ apasādanīyaṃ dasseti, etassa ayyassa avandiyakaraṇaṃ ruccatī’’ti evaṃ tikkhattuṃ sāvetabbaṃ. Ettāvatā avandiyo kato hoti. Tato paṭṭhāya yathā sāmaṇere disvā na vandanti; evameva disvāpi na vanditabbo. Tena bhikkhunā sammā vattantena bhikkhunupassayaṃ āgantvā vihāreyeva saṅghaṃ vā gaṇaṃ vā ekapuggalaṃ vā upasaṅkamitvā ukkuṭikaṃ nisīditvā añjaliṃ paggahetvā ‘‘bhikkhunisaṅgho mayhaṃ khamatū’’ti khamāpetabbaṃ. Tena bhikkhunā bhikkhunīnaṃ santikaṃ āgantvā ‘‘eso bhikkhu tumhe khamāpetī’’ti vattabbaṃ. Tato paṭṭhāya so vanditabbo. Ayamettha saṅkhepo, vitthāraṃ pana kammavibhaṅge vakkhāma.
ஓபா⁴ஸெந்தீதி அஸத்³த⁴ம்மேன ஓபா⁴ஸெந்தி. பி⁴க்கு²னீஹி ஸத்³தி⁴ங் ஸம்பயோஜெந்தீதி பி⁴க்கு²னீஹி ஸத்³தி⁴ங் புரிஸே அஸத்³த⁴ம்மேன ஸம்பயோஜெந்தி. அவந்தி³யகரணங் வுத்தனயமேவ. ஆவரணந்தி விஹாரப்பவேஸனே நிவாரணங் . ஓவாத³ங் ட²பேதுந்தி எத்த² ந பி⁴க்கு²னுபஸ்ஸயங் க³ந்த்வா ட²பேதப்³போ³. ஓவாத³த்தா²ய பன ஆக³தா பி⁴க்கு²னியோ வத்தப்³பா³ ‘‘அஸுகா நாம பி⁴க்கு²னீ ஸாபத்திகா, தஸ்ஸா ஓவாத³ங் ட²பேமி, மா தாய ஸத்³தி⁴ங் உபோஸத²ங் கரித்தா²’’தி. காயவிவரணாதீ³ஸுபி த³ண்ட³கம்மங் வுத்தனயமேவ.
Obhāsentīti asaddhammena obhāsenti. Bhikkhunīhi saddhiṃ sampayojentīti bhikkhunīhi saddhiṃ purise asaddhammena sampayojenti. Avandiyakaraṇaṃ vuttanayameva. Āvaraṇanti vihārappavesane nivāraṇaṃ . Ovādaṃ ṭhapetunti ettha na bhikkhunupassayaṃ gantvā ṭhapetabbo. Ovādatthāya pana āgatā bhikkhuniyo vattabbā ‘‘asukā nāma bhikkhunī sāpattikā, tassā ovādaṃ ṭhapemi, mā tāya saddhiṃ uposathaṃ karitthā’’ti. Kāyavivaraṇādīsupi daṇḍakammaṃ vuttanayameva.
413. ந பி⁴க்க²வே பி⁴க்கு²னியா ஓவாதோ³ ந க³ந்தப்³போ³திஆதி³ பி⁴க்கு²னிவிப⁴ங்க³வண்ணனாயங் வுத்தமேவ.
413.Na bhikkhave bhikkhuniyā ovādo na gantabbotiādi bhikkhunivibhaṅgavaṇṇanāyaṃ vuttameva.
416. பா²ஸுகா நமெந்தீதி கி³ஹிதா³ரிகாயோ விய க⁴னபட்டகேன காயப³ந்த⁴னேன பா²ஸுகா நமனத்தா²ய ப³ந்த⁴ந்தி. ஏகபரியாகதந்தி ஏகவாரங் பரிக்கி²பனகங்.
416.Phāsukā namentīti gihidārikāyo viya ghanapaṭṭakena kāyabandhanena phāsukā namanatthāya bandhanti. Ekapariyākatanti ekavāraṃ parikkhipanakaṃ.
விலீவேன பட்டேனாதி ஸண்ஹேஹி வேளுவிலீவேஹி கதபட்டேன. து³ஸ்ஸபட்டேனாதி ஸேதவத்த²பட்டேன. து³ஸ்ஸவேணியாதி து³ஸ்ஸேன கதவேணியா. து³ஸ்ஸவட்டியாதி து³ஸ்ஸேன கதவட்டியா. சோளபட்டாதீ³ஸு சோளகாஸாவங் சோளந்தி வேதி³தப்³ப³ங்.
Vilīvena paṭṭenāti saṇhehi veḷuvilīvehi katapaṭṭena. Dussapaṭṭenāti setavatthapaṭṭena. Dussaveṇiyāti dussena kataveṇiyā. Dussavaṭṭiyāti dussena katavaṭṭiyā. Coḷapaṭṭādīsu coḷakāsāvaṃ coḷanti veditabbaṃ.
அட்டி²ல்லேனாதி கோ³ஜங்க⁴ட்டி²கேன. ஜக⁴னந்தி கடிப்பதே³ஸோ வுச்சதி. ஹத்த²ங் கொட்டாபெந்தீதி அக்³க³பா³ஹங் கொட்டாபெத்வா மோரபத்தாதீ³ஹி சித்தாலங்காரங் கரொந்தி. ஹத்த²கொச்ச²ந்தி பிட்டி²ஹத்த²ங். பாத³ந்தி ஜங்க⁴ங். பாத³கொச்ச²ந்தி பிட்டி²பாத³ங்.
Aṭṭhillenāti gojaṅghaṭṭhikena. Jaghananti kaṭippadeso vuccati. Hatthaṃ koṭṭāpentīti aggabāhaṃ koṭṭāpetvā morapattādīhi cittālaṅkāraṃ karonti. Hatthakocchanti piṭṭhihatthaṃ. Pādanti jaṅghaṃ. Pādakocchanti piṭṭhipādaṃ.
417. முக²லிம்பனாதீ³னி வுத்தனயானேவ. அவங்க³ங் கரொந்தீதி அக்கீ² அஞ்ஜந்தியோ அவங்க³தே³ஸே அதோ⁴முக²ங் லேக²ங் கரொந்தி. விஸேஸகந்தி க³ண்ட³ப்பதே³ஸே விசித்ரஸண்டா²னங் விஸேஸகங் கரொந்தி. ஓலோகெந்தீதி வாதபானங் விவரித்வா வீதி²ங் ஓலோகெந்தி. ஸாலோகே திட்ட²ந்தீதி த்³வாரங் விவரித்வா உபட்³ட⁴காயங் த³ஸ்ஸெந்தியோ திட்ட²ந்தி. நச்சந்தி நடஸமஜ்ஜங் காரெந்தி. வேஸிங் வுட்டா²பெந்தீதி க³ணிகங் வுட்டா²பெந்தி. பானாகா³ரங் ட²பெந்தீதி ஸுரங் விக்கிணந்தி. ஸூனங் ட²பெந்தீதி மங்ஸங் விக்கிணந்தி. ஆபணந்தி நானாப⁴ண்டா³னங் அனேகவித⁴ங் ஆபணங் பஸாரெந்தி. தா³ஸங் உபட்டா²பெந்தீதி தா³ஸங் க³ஹெத்வா தேன அத்தனோ வெய்யாவச்சங் காரெந்தி. தா³ஸீஆதீ³ஸுபி ஏஸேவ நயோ. ஹரிதகபக்கிகங் பகிணந்தீதி ஹரிதகஞ்சேவ பக்கஞ்ச பகிணந்தி; பகிண்ணகாபணங் பஸாரெந்தீதி வுத்தங் ஹோதி.
417.Mukhalimpanādīni vuttanayāneva. Avaṅgaṃ karontīti akkhī añjantiyo avaṅgadese adhomukhaṃ lekhaṃ karonti. Visesakanti gaṇḍappadese vicitrasaṇṭhānaṃ visesakaṃ karonti. Olokentīti vātapānaṃ vivaritvā vīthiṃ olokenti. Sāloke tiṭṭhantīti dvāraṃ vivaritvā upaḍḍhakāyaṃ dassentiyo tiṭṭhanti. Naccanti naṭasamajjaṃ kārenti. Vesiṃ vuṭṭhāpentīti gaṇikaṃ vuṭṭhāpenti. Pānāgāraṃ ṭhapentīti suraṃ vikkiṇanti. Sūnaṃ ṭhapentīti maṃsaṃ vikkiṇanti. Āpaṇanti nānābhaṇḍānaṃ anekavidhaṃ āpaṇaṃ pasārenti. Dāsaṃ upaṭṭhāpentīti dāsaṃ gahetvā tena attano veyyāvaccaṃ kārenti. Dāsīādīsupi eseva nayo. Haritakapakkikaṃpakiṇantīti haritakañceva pakkañca pakiṇanti; pakiṇṇakāpaṇaṃ pasārentīti vuttaṃ hoti.
418. ஸப்³ப³னீலகாதி³கதா² கதி²தாயேவ.
418.Sabbanīlakādikathā kathitāyeva.
419. பி⁴க்கு²னீ சே, பி⁴க்க²வே, காலங் கரொந்தீதிஆதீ³ஸு அயங் பாளிமுத்தகவினிச்ச²யோ – ஸசே ஹி பஞ்சஸு ஸஹத⁴ம்மிகேஸு யோ கோசி காலங் கரொந்தோ ‘‘மமச்சயேன மய்ஹங் பரிக்கா²ரோ உபஜ்ஜா²யஸ்ஸ ஹோது, ஆசரியஸ்ஸ ஹோது, ஸத்³தி⁴விஹாரிகஸ்ஸ ஹோது, அந்தேவாஸிகஸ்ஸ ஹோது, மாது ஹோது, பிது ஹோது, அஞ்ஞஸ்ஸ வா யஸ்ஸ கஸ்ஸசி ஹோதூ’’தி வத³தி தேஸங் ந ஹோதி, ஸங்க⁴ஸ்ஸேவ ஹோதி. ந ஹி பஞ்சன்னங் ஸஹத⁴ம்மிகானங் அச்சயதா³னங் ருஹதி, கி³ஹீனங் பன ருஹதி. பி⁴க்கு² ஹி பி⁴க்கு²னிவிஹாரே காலங் கரோதி, தஸ்ஸ பரிக்கா²ரோ பி⁴க்கூ²னங்யேவ ஹோதி. பி⁴க்கு²னீ பி⁴க்கு²விஹாரே காலங் கரோதி, தஸ்ஸா பரிக்கா²ரோ பி⁴க்கு²னீனங்யேவ ஹோதி.
419.Bhikkhunī ce, bhikkhave, kālaṃ karontītiādīsu ayaṃ pāḷimuttakavinicchayo – sace hi pañcasu sahadhammikesu yo koci kālaṃ karonto ‘‘mamaccayena mayhaṃ parikkhāro upajjhāyassa hotu, ācariyassa hotu, saddhivihārikassa hotu, antevāsikassa hotu, mātu hotu, pitu hotu, aññassa vā yassa kassaci hotū’’ti vadati tesaṃ na hoti, saṅghasseva hoti. Na hi pañcannaṃ sahadhammikānaṃ accayadānaṃ ruhati, gihīnaṃ pana ruhati. Bhikkhu hi bhikkhunivihāre kālaṃ karoti, tassa parikkhāro bhikkhūnaṃyeva hoti. Bhikkhunī bhikkhuvihāre kālaṃ karoti, tassā parikkhāro bhikkhunīnaṃyeva hoti.
420. புராணமல்லீதி புராணே கி³ஹிகாலே மல்லகஸ்ஸ ப⁴ரியா. புரிஸப்³யஞ்ஜனந்தி புரிஸனிமித்தங், சி²ன்னங் வா ஹோது அச்சி²ன்னங் வா, படிச்ச²ன்னங் வா அப்படிச்ச²ன்னங் வா. ஸசே ஏதஸ்மிங் டா²னே புரிஸப்³யஞ்ஜனந்தி சித்தங் உப்பாதெ³த்வா உபனிஜ்ஜா²யதி, து³க்கடங்.
420.Purāṇamallīti purāṇe gihikāle mallakassa bhariyā. Purisabyañjananti purisanimittaṃ, chinnaṃ vā hotu acchinnaṃ vā, paṭicchannaṃ vā appaṭicchannaṃ vā. Sace etasmiṃ ṭhāne purisabyañjananti cittaṃ uppādetvā upanijjhāyati, dukkaṭaṃ.
421. அத்தனோ பரிபோ⁴க³த்தா²ய தி³ன்னங் நாம யங் ‘‘தும்ஹேயேவ பரிபு⁴ஞ்ஜதா²’’தி வத்வா தி³ன்னங், தங் அஞ்ஞஸ்ஸ த³த³தோ து³க்கடங். அக்³க³ங் க³ஹெத்வா பன தா³துங் வட்டதி. ஸசே அஸப்பாயங், ஸப்³ப³ங் அபனேதுங் வட்டதி. சீவரங் ஏகாஹங் வா த்³வீஹங் வா பரிபு⁴ஞ்ஜித்வா தா³துங் வட்டதி. பத்தாதீ³ஸுபி ஏஸேவ நயோ.
421.Attano paribhogatthāya dinnaṃ nāma yaṃ ‘‘tumheyeva paribhuñjathā’’ti vatvā dinnaṃ, taṃ aññassa dadato dukkaṭaṃ. Aggaṃ gahetvā pana dātuṃ vaṭṭati. Sace asappāyaṃ, sabbaṃ apanetuṃ vaṭṭati. Cīvaraṃ ekāhaṃ vā dvīhaṃ vā paribhuñjitvā dātuṃ vaṭṭati. Pattādīsupi eseva nayo.
பி⁴க்கூ²னங் ஸன்னிதி⁴ங் பி⁴க்கு²னீஹி படிக்³கா³ஹாபெத்வாதி ஹிய்யோ படிக்³க³ஹெத்வா ட²பிதமங்ஸங் அஜ்ஜ அஞ்ஞஸ்மிங் அனுபஸம்பன்னே அஸதி பி⁴க்கூ²ஹி படிக்³கா³ஹாபெத்வா பி⁴க்கு²னீஹி பரிபு⁴ஞ்ஜிதப்³ப³ங். பி⁴க்கூ²ஹி படிக்³க³ஹிதஞ்ஹி பி⁴க்கு²னீனங் அப்படிக்³க³ஹிதகட்டா²னே திட்ட²தி, பி⁴க்கு²னீனங் படிக்³க³ஹிதம்பி பி⁴க்கூ²ஸு ஏஸேவ நயோ.
Bhikkhūnaṃsannidhiṃ bhikkhunīhi paṭiggāhāpetvāti hiyyo paṭiggahetvā ṭhapitamaṃsaṃ ajja aññasmiṃ anupasampanne asati bhikkhūhi paṭiggāhāpetvā bhikkhunīhi paribhuñjitabbaṃ. Bhikkhūhi paṭiggahitañhi bhikkhunīnaṃ appaṭiggahitakaṭṭhāne tiṭṭhati, bhikkhunīnaṃ paṭiggahitampi bhikkhūsu eseva nayo.
426. ஆஸனங் ஸங்கஸாயந்தியோ காலங் வீதினாமேஸுந்தி அஞ்ஞங் வுட்டா²பெத்வா அஞ்ஞங் நிஸீதா³பெந்தியோ போ⁴ஜனகாலங் அதிக்காமேஸுங்.
426.Āsanaṃ saṃkasāyantiyo kālaṃ vītināmesunti aññaṃ vuṭṭhāpetvā aññaṃ nisīdāpentiyo bhojanakālaṃ atikkāmesuṃ.
அட்ட²ன்னங் பி⁴க்கு²னீனங் யதா²வுட்³ட⁴ந்தி எத்த² ஸசே புரே அட்ட²ஸு நிஸின்னாஸு தாஸங் அப்³ப⁴ந்தரிமா அஞ்ஞா ஆக³ச்ச²தி, ஸா அத்தனோ நவகங் உட்டா²பெத்வா நிஸீதி³துங் லப⁴தி. யா பன அட்ட²ஹிபி நவகதரா, ஸா ஸசேபி ஸட்டி²வஸ்ஸா ஹோதி, ஆக³தபடிபாடியாவ நிஸீதி³துங் லப⁴தி. அஞ்ஞத்த² ஸப்³ப³த்த² யதா²வுட்³ட⁴ங் ந படிபா³ஹிதப்³ப³ந்தி ட²பெத்வா ப⁴த்தக்³க³ங் அஞ்ஞஸ்மிங் சதுபச்சயபா⁴ஜனீயட்டா²னே ‘‘அஹங் புப்³பே³ ஆக³தா’’தி வுட்³ட⁴ங் படிபா³ஹித்வா கிஞ்சி ந க³ஹேதப்³ப³ங்; யதா²வுட்³ட⁴மேவ வட்டதி. பவாரணாகதா² கதி²தாயேவ.
Aṭṭhannaṃbhikkhunīnaṃ yathāvuḍḍhanti ettha sace pure aṭṭhasu nisinnāsu tāsaṃ abbhantarimā aññā āgacchati, sā attano navakaṃ uṭṭhāpetvā nisīdituṃ labhati. Yā pana aṭṭhahipi navakatarā, sā sacepi saṭṭhivassā hoti, āgatapaṭipāṭiyāva nisīdituṃ labhati. Aññattha sabbattha yathāvuḍḍhaṃ na paṭibāhitabbanti ṭhapetvā bhattaggaṃ aññasmiṃ catupaccayabhājanīyaṭṭhāne ‘‘ahaṃ pubbe āgatā’’ti vuḍḍhaṃ paṭibāhitvā kiñci na gahetabbaṃ; yathāvuḍḍhameva vaṭṭati. Pavāraṇākathā kathitāyeva.
429. இத்தி²யுத்தந்திஆதீ³ஹி ஸப்³ப³யானானி அனுஞ்ஞாதானி. பாடங்கிந்தி படபொட்டலிகங்.
429.Itthiyuttantiādīhi sabbayānāni anuññātāni. Pāṭaṅkinti paṭapoṭṭalikaṃ.
430. தூ³தேன உபஸம்பதா³ த³ஸன்னங் அந்தராயானங் யேன கேனசி வட்டதி. கம்மவாசாபரியோஸானே ஸா பி⁴க்கு²னீ பி⁴க்கு²னுபஸ்ஸயே டி²தா வா ஹோது நிபன்னா வா ஜாக³ரா வா நித்³த³ங் ஓக்கந்தா வா, உபஸம்பன்னாவ ஹோதி. தாவதே³வ சா²யாதீ³னி ஆக³தாய தூ³தபி⁴க்கு²னியா ஆசிக்கி²தப்³பா³னி.
430.Dūtena upasampadā dasannaṃ antarāyānaṃ yena kenaci vaṭṭati. Kammavācāpariyosāne sā bhikkhunī bhikkhunupassaye ṭhitā vā hotu nipannā vā jāgarā vā niddaṃ okkantā vā, upasampannāva hoti. Tāvadeva chāyādīni āgatāya dūtabhikkhuniyā ācikkhitabbāni.
431. உதோ³ஸிதோதி ப⁴ண்ட³ஸாலா. ந ஸம்மதீதி நப்பஹோதி. உபஸ்ஸயந்தி க⁴ரங். நவகம்மந்தி ஸங்க⁴ஸ்ஸத்தா²ய பி⁴க்கு²னியா நவகம்மம்பி காதுங் அனுஜானாமீதி அத்தோ².
431.Udositoti bhaṇḍasālā. Na sammatīti nappahoti. Upassayanti gharaṃ. Navakammanti saṅghassatthāya bhikkhuniyā navakammampi kātuṃ anujānāmīti attho.
432. தஸ்ஸா பப்³ப³ஜிதாயாதி தஸ்ஸா பப்³ப³ஜிதகாலே. யாவ ஸோ தா³ரகோ விஞ்ஞுதங் பாபுணாதீதி யாவ கா²தி³துங் பு⁴ஞ்ஜிதுங் நஹாயிதுஞ்ச மண்டி³துஞ்ச அத்தனோ த⁴ம்மதாய ஸக்கோதீதி அத்தோ².
432.Tassā pabbajitāyāti tassā pabbajitakāle. Yāva so dārako viññutaṃ pāpuṇātīti yāva khādituṃ bhuñjituṃ nahāyituñca maṇḍituñca attano dhammatāya sakkotīti attho.
ட²பெத்வா ஸாகா³ரந்தி ஸஹகா³ரஸெய்யமத்தங் ட²பெத்வா. யதா² அஞ்ஞஸ்மிங் புரிஸே; ஏவங் து³தியிகாய பி⁴க்கு²னியா தஸ்மிங் தா³ரகே படிபஜ்ஜிதப்³ப³ந்தி த³ஸ்ஸேதி. மாதா பன நஹாபேதுங் பாயேதுங் போ⁴ஜேதுங் மண்டே³துங் உரே கத்வா ஸயிதுஞ்ச லப⁴தி.
Ṭhapetvāsāgāranti sahagāraseyyamattaṃ ṭhapetvā. Yathā aññasmiṃ purise; evaṃ dutiyikāya bhikkhuniyā tasmiṃ dārake paṭipajjitabbanti dasseti. Mātā pana nahāpetuṃ pāyetuṃ bhojetuṃ maṇḍetuṃ ure katvā sayituñca labhati.
434. யதே³வ ஸா விப்³ப⁴ந்தாதி யஸ்மா ஸா விப்³ப⁴ந்தா அத்தனோ ருசியா க²ந்தியா ஓதா³தானி வத்தா²னி நிவத்தா², தஸ்மாயேவ ஸா அபி⁴க்கு²னீ, ந ஸிக்கா²பச்சக்கா²னேனாதி த³ஸ்ஸேதி. ஸா புன உபஸம்பத³ங் ந லப⁴தி.
434.Yadeva sā vibbhantāti yasmā sā vibbhantā attano ruciyā khantiyā odātāni vatthāni nivatthā, tasmāyeva sā abhikkhunī, na sikkhāpaccakkhānenāti dasseti. Sā puna upasampadaṃ na labhati.
ஸா ஆக³தா ந உபஸம்பாதே³தப்³பா³தி ந கேவலங் ந உபஸம்பாதே³தப்³பா³, பப்³ப³ஜ்ஜம்பி ந லப⁴தி. ஓதா³தானி க³ஹெத்வா விப்³ப⁴ந்தா பன பப்³ப³ஜ்ஜாமத்தங் லப⁴தி.
Sāāgatā na upasampādetabbāti na kevalaṃ na upasampādetabbā, pabbajjampi na labhati. Odātāni gahetvā vibbhantā pana pabbajjāmattaṃ labhati.
அபி⁴வாத³னந்திஆதீ³ஸு புரிஸா பாதே³ ஸம்பா³ஹந்தா வந்த³ந்தி, கேஸே சி²ந்த³ந்தி, நகே² சி²ந்த³ந்தி, வணபடிகம்மங் கரொந்தி, தங் ஸப்³ப³ங் குக்குச்சாயந்தா ந ஸாதி³யந்தீதி அத்தோ². தத்ரேகே ஆசரியா ‘‘ஸசே ஏகதோ வா உப⁴தோ வா அவஸ்ஸுதா ஹொந்தி ஸாரத்தா, யதா²வத்து²கமேவ’’. ஏகே ஆசரியா ‘‘நத்தி² எத்த² ஆபத்தீ’’தி வத³ந்தி. ஏவங் ஆசரியவாத³ங் த³ஸ்ஸெத்வா இத³ங் ஓதி³ஸ்ஸ அனுஞ்ஞாதங் வட்டதீதி அட்ட²கதா²ஸு வுத்தங். தங் பமாணங். ‘‘அனுஜானாமி பி⁴க்க²வே ஸாதி³து’’ந்தி ஹி வசனேனேவ தங் கப்பியங்.
Abhivādanantiādīsu purisā pāde sambāhantā vandanti, kese chindanti, nakhe chindanti, vaṇapaṭikammaṃ karonti, taṃ sabbaṃ kukkuccāyantā na sādiyantīti attho. Tatreke ācariyā ‘‘sace ekato vā ubhato vā avassutā honti sārattā, yathāvatthukameva’’. Eke ācariyā ‘‘natthi ettha āpattī’’ti vadanti. Evaṃ ācariyavādaṃ dassetvā idaṃ odissa anuññātaṃ vaṭṭatīti aṭṭhakathāsu vuttaṃ. Taṃ pamāṇaṃ. ‘‘Anujānāmi bhikkhave sāditu’’nti hi vacaneneva taṃ kappiyaṃ.
435. பல்லங்கேன நிஸீத³ந்தீதி பல்லங்கங் ஆபு⁴ஜித்வா நிஸீத³ந்தி. அட்³ட⁴பல்லங்கந்தி ஏகங் பாத³ங் ஆபு⁴ஜித்வா கதபல்லங்கங். ஹெட்டா² விவடே உபரி படிச்ச²ன்னேதி எத்த² ஸசே கூபோ க²தோ ஹோதி, உபரி பன பத³ரமத்தமேவ ஸப்³ப³தி³ஸாஸு பஞ்ஞாயதி, ஏவரூபேபி வட்டதி.
435.Pallaṅkena nisīdantīti pallaṅkaṃ ābhujitvā nisīdanti. Aḍḍhapallaṅkanti ekaṃ pādaṃ ābhujitvā katapallaṅkaṃ. Heṭṭhā vivaṭe upari paṭicchanneti ettha sace kūpo khato hoti, upari pana padaramattameva sabbadisāsu paññāyati, evarūpepi vaṭṭati.
436. குக்குஸங் மத்திகந்தி குண்ட³கஞ்சேவ மத்திகஞ்ச. ஸேஸமெத்த² உத்தானமேவாதி.
436.Kukkusaṃ mattikanti kuṇḍakañceva mattikañca. Sesamettha uttānamevāti.
பி⁴க்கு²னீஉபஸம்பதா³னுஜானநகதா² நிட்டி²தா.
Bhikkhunīupasampadānujānanakathā niṭṭhitā.
பி⁴க்கு²னிக்க²ந்த⁴கவண்ணனா நிட்டி²தா.
Bhikkhunikkhandhakavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi
பி⁴க்கு²னீஉபஸம்பதா³னுஜானநங் • Bhikkhunīupasampadānujānanaṃ
2. து³தியபா⁴ணவாரோ • 2. Dutiyabhāṇavāro
3. ததியபா⁴ணவாரோ • 3. Tatiyabhāṇavāro
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பி⁴க்கு²னீஉபஸம்பன்னானுஜானநகதா²வண்ணனா • Bhikkhunīupasampannānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பி⁴க்கு²னீஉபஸம்பதா³னுஜானநகதா²வண்ணனா • Bhikkhunīupasampadānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பி⁴க்கு²னீஉபஸம்பதா³னுஜானநகதா²வண்ணனா • Bhikkhunīupasampadānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / பி⁴க்கு²னீஉபஸம்பதா³னுஜானநகதா² • Bhikkhunīupasampadānujānanakathā
