| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
பி⁴க்கு²னீஉபஸம்பதா³னுஜானநகதா²
Bhikkhunīupasampadānujānanakathā
404. இமாய அனுபஞ்ஞத்தியாதி மஹாபஜாபதியா அட்ட²க³ருத⁴ம்மபடிக்³க³ஹணூபஸம்பத³ங் உபனிதா⁴ய அயங் பஞ்ஞத்தி அனுபஞ்ஞத்தி நாம, தாய அனுபஞ்ஞத்தியா உபஸம்பாதே³துந்தி அத்தோ². மஹாபஜாபதியா ஸத்³தி⁴விஹாரினியோ கத்வாதி மஹாபஜாபதிங் உபஜ்ஜ²ங் கத்வா பஞ்சஸதா ஸாகியானியோ தஸ்ஸா ஸத்³தி⁴விஹாரினியோ கத்வாதி அத்தோ². இதீதி தஸ்மா அஹேஸுந்தி ஸம்ப³ந்தோ⁴. இமினா ஓவாதே³னாதி ப⁴க³வதோ இமினா ஓவாதே³ன.
404.Imāya anupaññattiyāti mahāpajāpatiyā aṭṭhagarudhammapaṭiggahaṇūpasampadaṃ upanidhāya ayaṃ paññatti anupaññatti nāma, tāya anupaññattiyā upasampādetunti attho. Mahāpajāpatiyā saddhivihāriniyo katvāti mahāpajāpatiṃ upajjhaṃ katvā pañcasatā sākiyāniyo tassā saddhivihāriniyo katvāti attho. Itīti tasmā ahesunti sambandho. Iminā ovādenāti bhagavato iminā ovādena.
410. ஏதிஸ்ஸாதி ஏதிஸ்ஸா பி⁴க்கு²னியா. தந்தி கம்மங். அஞ்ஞஸ்மிந்தி அஞ்ஞஸ்மிங் கம்மே. அஞ்ஞந்தி ரோபிதப்³ப³கம்மதோ அஞ்ஞங் கம்மங்.
410.Etissāti etissā bhikkhuniyā. Tanti kammaṃ. Aññasminti aññasmiṃ kamme. Aññanti ropitabbakammato aññaṃ kammaṃ.
411. கத்³த³மோத³கேனாதி கத்³த³மேன ஆலுளிதேன உத³கேனேவ. கத்³த³மாதீ³ஸுபீதி பீஸத்³தோ³ ‘‘யேன கேனசீ’’தி எத்த² யோஜேதப்³போ³. யேன கேனசிபீதி ஹி அத்தோ². ஸன்னிபதித்வாதி பி⁴க்கு²னிஸங்கே⁴ன ஸன்னிபதித்வா. அபஸாத³னீயந்தி அபஸாதே³தப்³ப³ங் கம்மங். எத்தாவதாதி எத்தகேன ஸாவனமத்தேன. அவந்தி³யோதி ந வந்தே³தப்³போ³, வந்தி³துங் ந அரஹோதி அத்தோ². ததோதி திக்க²த்துங் ஸாவேதப்³ப³தோ. ந வந்த³ந்தீதி பி⁴க்கு²னியோ ந வந்த³ந்தி. தி³ஸ்வாபீதி தங் பி⁴க்கு²ங் தி³ஸ்வாபி. தேன பி⁴க்கு²னாதி அபஸாத³னீயங் த³ஸ்ஸெந்தேன பி⁴க்கு²னா, க²மாபேதப்³ப³ந்தி ஸம்ப³ந்தோ⁴. விஹாரேயேவாதி பி⁴க்கூ²னங் விஹாரேயேவ. தேன பி⁴க்கு²னாதி உபஸங்கமிதப்³பே³ன பி⁴க்கு²னா, வத்தப்³ப³ந்தி ஸம்ப³ந்தோ⁴. ததோதி வத்தப்³ப³காலதோ. ஸோதி அபஸாத³னீயங் த³ஸ்ஸெந்தோ பி⁴க்கு². எத்தா²தி பி⁴க்கு²னிக்க²ந்த⁴கே. கம்மவிப⁴ங்கே³தி பரிவாராவஸானே கம்மானங் விப⁴ங்க³ட்டா²னே (பரி॰ அட்ட²॰ 495-496).
411.Kaddamodakenāti kaddamena āluḷitena udakeneva. Kaddamādīsupīti pīsaddo ‘‘yena kenacī’’ti ettha yojetabbo. Yena kenacipīti hi attho. Sannipatitvāti bhikkhunisaṅghena sannipatitvā. Apasādanīyanti apasādetabbaṃ kammaṃ. Ettāvatāti ettakena sāvanamattena. Avandiyoti na vandetabbo, vandituṃ na arahoti attho. Tatoti tikkhattuṃ sāvetabbato. Na vandantīti bhikkhuniyo na vandanti. Disvāpīti taṃ bhikkhuṃ disvāpi. Tena bhikkhunāti apasādanīyaṃ dassentena bhikkhunā, khamāpetabbanti sambandho. Vihāreyevāti bhikkhūnaṃ vihāreyeva. Tena bhikkhunāti upasaṅkamitabbena bhikkhunā, vattabbanti sambandho. Tatoti vattabbakālato. Soti apasādanīyaṃ dassento bhikkhu. Etthāti bhikkhunikkhandhake. Kammavibhaṅgeti parivārāvasāne kammānaṃ vibhaṅgaṭṭhāne (pari. aṭṭha. 495-496).
ஓபா⁴ஸந்தீதி அவ ஹீனேன பா⁴ஸந்தீதி த³ஸ்ஸெந்தோ ஆஹ ‘‘அஸத்³த⁴ம்மேன ஓபா⁴ஸந்தீ’’தி. ‘‘பி⁴க்கு²னீஹி ஸத்³தி⁴ங் ஸம்பயோஜெந்தீ’’தி எத்த² கம்மகரணே த³ஸ்ஸெந்தோ ஆஹ ‘‘புரிஸே அஸத்³த⁴ம்மேனா’’தி. எத்த² ‘‘புரிஸே’’தி இமினா கம்மங் த³ஸ்ஸேதி, ‘‘அஸத்³த⁴ம்மேனா’’தி இமினா கரணங். விஹாரப்பவேஸனேதி பி⁴க்கூ²னங் விஹாரப்பவேஸனே. ஓவாத³ங் ட²பேதுந்தி எத்த² ஓவாத³ட்ட²பனாகாரங் த³ஸ்ஸெந்தோ ஆஹ ‘‘ந பி⁴க்கு²னுபஸ்ஸய’’ந்திஆதி³. ஓவாத³த்தா²யாதி ஓவாத³படிக்³க³ஹணத்தா²ய. மா கரித்தா²தி மா கரெய்யாத².
Obhāsantīti ava hīnena bhāsantīti dassento āha ‘‘asaddhammena obhāsantī’’ti. ‘‘Bhikkhunīhi saddhiṃ sampayojentī’’ti ettha kammakaraṇe dassento āha ‘‘purise asaddhammenā’’ti. Ettha ‘‘purise’’ti iminā kammaṃ dasseti, ‘‘asaddhammenā’’ti iminā karaṇaṃ. Vihārappavesaneti bhikkhūnaṃ vihārappavesane. Ovādaṃ ṭhapetunti ettha ovādaṭṭhapanākāraṃ dassento āha ‘‘na bhikkhunupassaya’’ntiādi. Ovādatthāyāti ovādapaṭiggahaṇatthāya. Mā karitthāti mā kareyyātha.
416. கி³ஹிதா³ரிகாயோதி கி³ஹிபூ⁴தா தா³ரிகாயோ ப³ந்த⁴ந்தி வியாதி யோஜனா. க⁴னபட்டகேனாதி க⁴னபூ⁴தேன பட்டேன நியுத்தேன. ஏகபரியகந்தி எத்த² ஏகவாரங் கடியங் பரிக்கி²பித்வா கதங் காயப³ந்த⁴னங் ஏகபரியகந்தி த³ஸ்ஸெந்தோ ஆஹ ‘‘ஏகவாரங் பரிக்கி²பனக’’ந்தி. தத்த² பரிக்கி²பனகந்தி கடியங் பரிக்கி²பனாரஹங்.
416.Gihidārikāyoti gihibhūtā dārikāyo bandhanti viyāti yojanā. Ghanapaṭṭakenāti ghanabhūtena paṭṭena niyuttena. Ekapariyakanti ettha ekavāraṃ kaṭiyaṃ parikkhipitvā kataṃ kāyabandhanaṃ ekapariyakanti dassento āha ‘‘ekavāraṃ parikkhipanaka’’nti. Tattha parikkhipanakanti kaṭiyaṃ parikkhipanārahaṃ.
விலீவேனாதி எத்த² ப³ஹுத்தே² ஏகவசனந்தி ஆஹ ‘‘ஸண்ஹேஹி விலீவேஹீ’’தி. ‘‘கதபட்டேனா’’தி இமினா பாளியங் ‘‘கதேனா’’தி பாட²ஸேஸங் த³ஸ்ஸேதி. ஸேதவத்த²பட்டேனாதி ஸேதவத்தே²ன கதேன பட்டேன. கதவேணியாதி கதாய வேணியா. இமினா து³ஸ்ஸேன கதா வேணி து³ஸ்ஸவேணீதி வசனத்த²ங் த³ஸ்ஸேதி. ஏஸேவ நயோ புரிமபச்சி²மபதே³ஸுபி. சோளகாஸாவந்தி சோளமேவ கஸாவேன ரத்தத்தா சோளகாஸாவங்.
Vilīvenāti ettha bahutthe ekavacananti āha ‘‘saṇhehi vilīvehī’’ti. ‘‘Katapaṭṭenā’’ti iminā pāḷiyaṃ ‘‘katenā’’ti pāṭhasesaṃ dasseti. Setavatthapaṭṭenāti setavatthena katena paṭṭena. Kataveṇiyāti katāya veṇiyā. Iminā dussena katā veṇi dussaveṇīti vacanatthaṃ dasseti. Eseva nayo purimapacchimapadesupi. Coḷakāsāvanti coḷameva kasāvena rattattā coḷakāsāvaṃ.
அட்டி²ல்லேனாதி அத்³தே³ன அட்டி²னா. ‘‘கோ³ஜங்க⁴ட்டி²கே’’தி இமினா அட்டி²னோ ஸம்ப³ந்த⁴ங் த³ஸ்ஸேதி. ஹத்த²ங் கொட்டாபெந்தீதி எத்த² ஹத்த²ங் நாம அக்³க³பா³ஹமேவாதி⁴ப்பேதங், ந கப்பரதோ பட்டா²யாதி த³ஸ்ஸெந்தோ ஆஹ ‘‘அக்³க³பா³ஹ’’ந்தி. பிட்டி²ஹத்த²ந்தி ஹத்த²பிட்டி²ங். பிட்டி²பாத³ந்தி பாத³பிட்டி²ங்.
Aṭṭhillenāti addena aṭṭhinā. ‘‘Gojaṅghaṭṭhike’’ti iminā aṭṭhino sambandhaṃ dasseti. Hatthaṃ koṭṭāpentīti ettha hatthaṃ nāma aggabāhamevādhippetaṃ, na kapparato paṭṭhāyāti dassento āha ‘‘aggabāha’’nti. Piṭṭhihatthanti hatthapiṭṭhiṃ. Piṭṭhipādanti pādapiṭṭhiṃ.
417. வுத்தனயானேவாதி ச²ப்³ப³க்³கி³யானங் முக²லிம்பனாதீ³ஸு (சூளவ॰ அட்ட²॰ 247) வுத்தனயானேவ. அங்க³தே³ஸேதி ஸரீரப்பதே³ஸே. க³ண்ட³ப்பதே³ஸேதி கபோலப்பதே³ஸே. ஸாலோகே திட்ட²ந்தீதி எத்த² ஸங்விஜ்ஜதி ஆலோகோ எத்தா²தி ஸாலோகந்தி கத்வா த்³வாரங் க³ஹேதப்³ப³ங். தேன வுத்தங் ‘‘த்³வாரங் விவரித்வா’’தி. வுட்டா²பெந்தீதி உபஸம்பாதெ³ந்தி. ஸூனங் ட²பெந்தீதி எத்த² ஸூனாஸத்³தோ³ மங்ஸபரியாயோதி ஆஹ ‘‘மங்ஸங் விக்கிணந்தீ’’தி. தேனாதி தா³ஸேன. இத³ங் பத³ங் ‘‘காரெந்தீ’’தி பதே³ காரிதகம்மங். ‘‘ஹரிதகஞ்சேவ பக்கஞ்சா’’தி இமினா ஹரிதகபக்கிகந்தி பத³ஸ்ஸ த்³வந்த³வாக்யங் த³ஸ்ஸேதி. தத்த² ஹரிதகந்தி ஹரிதமேவ பண்ணங். பக்கந்தி ஸேதி³தங் பண்ணங்.
417.Vuttanayānevāti chabbaggiyānaṃ mukhalimpanādīsu (cūḷava. aṭṭha. 247) vuttanayāneva. Aṅgadeseti sarīrappadese. Gaṇḍappadeseti kapolappadese. Sāloke tiṭṭhantīti ettha saṃvijjati āloko etthāti sālokanti katvā dvāraṃ gahetabbaṃ. Tena vuttaṃ ‘‘dvāraṃ vivaritvā’’ti. Vuṭṭhāpentīti upasampādenti. Sūnaṃ ṭhapentīti ettha sūnāsaddo maṃsapariyāyoti āha ‘‘maṃsaṃ vikkiṇantī’’ti. Tenāti dāsena. Idaṃ padaṃ ‘‘kārentī’’ti pade kāritakammaṃ. ‘‘Haritakañceva pakkañcā’’ti iminā haritakapakkikanti padassa dvandavākyaṃ dasseti. Tattha haritakanti haritameva paṇṇaṃ. Pakkanti seditaṃ paṇṇaṃ.
418. கதி²தாயேவாதி சீவரக்க²ந்த⁴கே கதி²தாயேவ.
418.Kathitāyevāti cīvarakkhandhake kathitāyeva.
419. பாளிமுத்தகவினிச்ச²யோதி பாளியங் வுத்தவினிச்ச²யதோ முத்தோ வினிச்ச²யோ. பாளிமுத்தகவினிச்ச²யங் வித்தா²ரெந்தோ ஆஹ ‘‘ஸசே ஹீ’’திஆதி³. யோ கோசி காலங் கரொந்தோ வத³தீதி ஸம்ப³ந்தோ⁴. மமச்சயேனாதி மம அதிக்கமேன. அஞ்ஞஸ்ஸாதி வுத்தேஹி உபஜ்ஜா²யாதீ³ஹி அஞ்ஞஸ்ஸ . தேஸந்தி உபஜ்ஜா²யாதீ³னங். ந ஹோதீதி பரிக்கா²ரோ ந ஹோதி. ஹீதி ஸச்சங், யஸ்மா வா. அச்சயதா³னந்தி அச்சயேன ஹோதூதி தா³னங். ந ருஹதீதி பஞ்சன்னங் ஸஹத⁴ம்மிகானங் பப்³ப³ஜிதஸ்ஸ வா க³ஹட்ட²ஸ்ஸ வா யஸ்ஸ கஸ்ஸசி அச்சயதா³னங் தேஸங் ந ருஹதி, ஸங்க⁴ஸ்ஸேவ ருஹதீதி அதி⁴ப்பாயோ. கி³ஹீனங் பன அச்சயதா³னந்தி ஸம்ப³ந்தோ⁴. ருஹதீதி கி³ஹீனங் பப்³ப³ஜிதஸ்ஸ வா க³ஹட்ட²ஸ்ஸ வா யஸ்ஸ கஸ்ஸசி அச்சயதா³னங் தேஸங் ருஹதி, தேஸங்யேவ ஸந்தகோ ஹோதீதி அதி⁴ப்பாயோ.
419.Pāḷimuttakavinicchayoti pāḷiyaṃ vuttavinicchayato mutto vinicchayo. Pāḷimuttakavinicchayaṃ vitthārento āha ‘‘sace hī’’tiādi. Yo koci kālaṃ karonto vadatīti sambandho. Mamaccayenāti mama atikkamena. Aññassāti vuttehi upajjhāyādīhi aññassa . Tesanti upajjhāyādīnaṃ. Na hotīti parikkhāro na hoti. Hīti saccaṃ, yasmā vā. Accayadānanti accayena hotūti dānaṃ. Na ruhatīti pañcannaṃ sahadhammikānaṃ pabbajitassa vā gahaṭṭhassa vā yassa kassaci accayadānaṃ tesaṃ na ruhati, saṅghasseva ruhatīti adhippāyo. Gihīnaṃ pana accayadānanti sambandho. Ruhatīti gihīnaṃ pabbajitassa vā gahaṭṭhassa vā yassa kassaci accayadānaṃ tesaṃ ruhati, tesaṃyeva santako hotīti adhippāyo.
420. புராணமல்லீதி எத்த² மல்லஸ்ஸ ப⁴ரியா மல்லீ, புராணே மல்லீ புராணமல்லீதி த³ஸ்ஸெந்தோ ஆஹ ‘‘புராணே’’திஆதி³. ‘‘கி³ஹிகாலே’’தி இமினா ‘‘புராணே’’தி எத்த² ணபச்சயஸ்ஸ ஸரூபங் த³ஸ்ஸேதி. மல்லஸ்ஸாதி முட்டி²மல்லஸ்ஸ. புரிஸப்³யஞ்ஜனந்தி எத்த² ப்³யஞ்ஜனஸத்³தோ³ நிமித்தபரியாயோதி ஆஹ ‘‘புரிஸனிமித்த’’ந்தி. சித்தந்தி ராக³சித்தங்.
420.Purāṇamallīti ettha mallassa bhariyā mallī, purāṇe mallī purāṇamallīti dassento āha ‘‘purāṇe’’tiādi. ‘‘Gihikāle’’ti iminā ‘‘purāṇe’’ti ettha ṇapaccayassa sarūpaṃ dasseti. Mallassāti muṭṭhimallassa. Purisabyañjananti ettha byañjanasaddo nimittapariyāyoti āha ‘‘purisanimitta’’nti. Cittanti rāgacittaṃ.
421. யந்தி யங் வத்து², அக்³க³ந்தி பட²மபா⁴க³ங். அஸப்பாயந்தி அத்தனோ அஸப்பாயங்.
421.Yanti yaṃ vatthu, agganti paṭhamabhāgaṃ. Asappāyanti attano asappāyaṃ.
ஹிய்யோதி அதீதானந்தராஹனி. அஞ்ஞஸ்மிந்தி பி⁴க்கு²னீஹி அஞ்ஞஸ்மிங். ‘‘பி⁴க்கு²னீஹீ’’தி பத³ங் ‘‘படிக்³கா³ஹாபெத்வா’’தி பதே³ காரிதகம்மங். ஹீதி ஸச்சங், யஸ்மா வா.
Hiyyoti atītānantarāhani. Aññasminti bhikkhunīhi aññasmiṃ. ‘‘Bhikkhunīhī’’ti padaṃ ‘‘paṭiggāhāpetvā’’ti pade kāritakammaṃ. Hīti saccaṃ, yasmā vā.
426. ‘‘போ⁴ஜனகால’’ந்தி இமினா ‘‘காலங் வீதினாமேஸு’’ந்தி எத்த² காலவிஸேஸங் த³ஸ்ஸேதி.
426. ‘‘Bhojanakāla’’nti iminā ‘‘kālaṃ vītināmesu’’nti ettha kālavisesaṃ dasseti.
புரேதி ஆதி³ம்ஹி. தாஸந்தி அட்ட²ன்னங் பி⁴க்கு²னீனங். அப்³ப⁴ந்தரிமாதி அப்³ப⁴ந்தரே பரியாபன்னா. அஞ்ஞாதி அட்ட²ஹி பி⁴க்கு²னீஹி அஞ்ஞா. நவகதரா ஹோதீதி ஸம்ப³ந்தோ⁴. ‘‘ட²பெத்வா ப⁴த்தக்³க³’’ந்தி இமினா அஞ்ஞத்த² ஸப்³ப³த்த² யதா²வுட்³ட⁴ங் ந படிபா³ஹிதப்³ப³ந்தி எத்த² அஞ்ஞஸத்³த³ஸ்ஸ அபாதா³னங் த³ஸ்ஸேதி. அஞ்ஞஸ்மிந்தி எத்த² ஸ்மிங்வசனேன த்த²பச்சயஸ்ஸ அத்த²ங் த³ஸ்ஸேதி. ‘‘சதுபச்சயபா⁴ஜனீயட்டா²னே’’தி இமினா ஸரூபங் த³ஸ்ஸேதி.
Pureti ādimhi. Tāsanti aṭṭhannaṃ bhikkhunīnaṃ. Abbhantarimāti abbhantare pariyāpannā. Aññāti aṭṭhahi bhikkhunīhi aññā. Navakatarā hotīti sambandho. ‘‘Ṭhapetvā bhattagga’’nti iminā aññattha sabbattha yathāvuḍḍhaṃ na paṭibāhitabbanti ettha aññasaddassa apādānaṃ dasseti. Aññasminti ettha smiṃvacanena tthapaccayassa atthaṃ dasseti. ‘‘Catupaccayabhājanīyaṭṭhāne’’ti iminā sarūpaṃ dasseti.
430. தூ³தேனபி உபஸம்பாதே³துந்தி எத்த² கிங் ஸப்³ப³தா² தூ³தேன உபஸம்பதா³ வட்டதீதி ஆஹ ‘‘தூ³தேன…பே॰… வட்டதீ’’தி. யேன கேனசி அந்தராயேனாதி ஸம்ப³ந்தோ⁴, அஸதி அந்தராயே ந வட்டதீதி அதி⁴ப்பாயோ. கம்மவாசாபரியோஸானே உபஸம்பன்னாவ ஹோதீதி ஸம்ப³ந்தோ⁴. தாவதே³வாதி உபஸம்பன்னக்க²ணேயேவ.
430.Dūtenapi upasampādetunti ettha kiṃ sabbathā dūtena upasampadā vaṭṭatīti āha ‘‘dūtena…pe… vaṭṭatī’’ti. Yena kenaci antarāyenāti sambandho, asati antarāye na vaṭṭatīti adhippāyo. Kammavācāpariyosāne upasampannāva hotīti sambandho. Tāvadevāti upasampannakkhaṇeyeva.
431. நவகம்மம்பீதி பிஸத்³தோ³ உதோ³ஸிதஉபஸ்ஸயே அபெக்க²தி.
431.Navakammampīti pisaddo udositaupassaye apekkhati.
432. தஸ்ஸாதி தஸ்ஸா இத்தி²யா. யாவ ஸோ தா³ரகோ விஞ்ஞுதங் பாபுணாதீதி எத்த² கத²ங் விஞ்ஞுபா⁴வோ க³ஹேதப்³போ³தி ஆஹ ‘‘யாவ கா²தி³து’’ந்திஆதி³.
432.Tassāti tassā itthiyā. Yāva so dārako viññutaṃ pāpuṇātīti ettha kathaṃ viññubhāvo gahetabboti āha ‘‘yāva khāditu’’ntiādi.
ட²பெத்வா ஸாகா³ரந்தி எத்த² ஸகாரோ ஸஹஸத்³த³காரியோ, அகா³ரந்தி ச ஸெய்யாகா³ரந்தி த³ஸ்ஸெந்தோ ஆஹ ‘‘ஸஹாகா³ரஸெய்யமத்தங் ட²பெத்வா’’தி. யதா² அஞ்ஞஸ்மிங் புரிஸே படிபஜ்ஜிதப்³ப³ங், ஏவங் ததா²தி யோஜனா. ‘‘அஞ்ஞஸ்மி’’ந்தி இமினா பாளியங் அஞ்ஞே புரிஸேதி எத்த² ஸ்மிங்வசனஸ்ஸ ஸப்³ப³னாமதோ ஏகாராதே³ஸோ த³ஸ்ஸிதோ, தங்த³ஸ்ஸனேன ச கச்சாயனே (கச்சாயனே 110 ஸுத்தே) ஸப்³ப³னாமதோ ஸ்மிங்வசனஸ்ஸ ஏகாராதே³ஸனிஸேத⁴னங் அனிச்சந்தி த³ஸ்ஸேதி.
Ṭhapetvā sāgāranti ettha sakāro sahasaddakāriyo, agāranti ca seyyāgāranti dassento āha ‘‘sahāgāraseyyamattaṃ ṭhapetvā’’ti. Yathā aññasmiṃ purise paṭipajjitabbaṃ, evaṃ tathāti yojanā. ‘‘Aññasmi’’nti iminā pāḷiyaṃ aññe puriseti ettha smiṃvacanassa sabbanāmato ekārādeso dassito, taṃdassanena ca kaccāyane (kaccāyane 110 sutte) sabbanāmato smiṃvacanassa ekārādesanisedhanaṃ aniccanti dasseti.
434. ‘‘யதே³வ ஸா விப்³ப⁴ந்தா’’தி இமினா த³ஸ்ஸேதீதி ஸம்ப³ந்தோ⁴. ‘‘யஸ்மா’’தி இமினா யதே³வாதி எத்த² யங்ஸத்³த³ஸ்ஸ காரணத்த²ங் த³ஸ்ஸேதி. ஓதா³தானி வத்தா²னி நிவத்தா²தி ஸம்ப³ந்தோ⁴. ‘‘தஸ்மாயேவா’’தி இமினா ததே³வாதி பத³ஸ்ஸ காரணத்த²மேவ த³ஸ்ஸேதி. ‘‘ந ஸிக்கா²பச்சக்கா²னேனா’’தி இமினா ஏவத்த²ப²லங் த³ஸ்ஸேதி. ஸா புன உபஸம்பத³ங் ந லப⁴தீதி ஸா விப்³ப⁴ந்தா பி⁴க்கு²னீ புன உபஸம்பத³ங் ந லப⁴தி.
434.‘‘Yadeva sā vibbhantā’’ti iminā dassetīti sambandho. ‘‘Yasmā’’ti iminā yadevāti ettha yaṃsaddassa kāraṇatthaṃ dasseti. Odātāni vatthāni nivatthāti sambandho. ‘‘Tasmāyevā’’ti iminā tadevāti padassa kāraṇatthameva dasseti. ‘‘Na sikkhāpaccakkhānenā’’ti iminā evatthaphalaṃ dasseti. Sā puna upasampadaṃ na labhatīti sā vibbhantā bhikkhunī puna upasampadaṃ na labhati.
பப்³ப³ஜ்ஜம்பி ந லப⁴தீதி தித்தா²யதனஸங்கந்தா பி⁴க்கு²னீ பப்³ப³ஜ்ஜம்பி ந லப⁴தி, பகே³வ உபஸம்பத³ங்.
Pabbajjampi na labhatīti titthāyatanasaṅkantā bhikkhunī pabbajjampi na labhati, pageva upasampadaṃ.
பாதே³ ஸம்பா³ஹந்தாதி பி⁴க்கு²னீனங் பாதே³ ஸம்பா³ஹந்தா. கேஸேதி பி⁴க்கு²னீனங் கேஸே. தத்ராதி ‘‘குக்குச்சயந்தா ந ஸாதி³யந்தீ’’தி வசனே. ஏகே ஆசரியா வத³ந்தீதி ஸம்ப³ந்தோ⁴. ஸாரத்தா ஹொந்தீதி யோஜனா. எத்தா²தி புரிஸானங் அபி⁴வாத³னாதீ³ஸு. இத³ந்தி புரிஸானங் அபி⁴வாத³னாதி³, ‘‘அனுஞ்ஞாத’’ந்தி பதே³ வுத்தகம்மங் ‘‘வட்டதீ’’தி பதே³ வுத்தகத்தா. அத² வா ஓதி³ஸ்ஸ அனுஞ்ஞாதங் இத³ங் புரிஸானங் அபி⁴வாத³னாதி³ வட்டதீதி யோஜனா. ஏவஞ்ஹி ஸதி ‘‘ஓதி³ஸ்ஸ அனுஞ்ஞாத’’ந்தி பத³ங் ஹேதுஅந்தோக³த⁴விஸேஸனங், ஓதி³ஸ்ஸ அனுஞ்ஞாதத்தா வட்டதீதி அதி⁴ப்பாயோ. தந்தி அட்ட²கதா²ஸு வுத்தவசனங். ஹீதி ஸச்சங், யஸ்மா வா.
Pāde sambāhantāti bhikkhunīnaṃ pāde sambāhantā. Keseti bhikkhunīnaṃ kese. Tatrāti ‘‘kukkuccayantā na sādiyantī’’ti vacane. Eke ācariyā vadantīti sambandho. Sārattā hontīti yojanā. Etthāti purisānaṃ abhivādanādīsu. Idanti purisānaṃ abhivādanādi, ‘‘anuññāta’’nti pade vuttakammaṃ ‘‘vaṭṭatī’’ti pade vuttakattā. Atha vā odissa anuññātaṃ idaṃ purisānaṃ abhivādanādi vaṭṭatīti yojanā. Evañhi sati ‘‘odissa anuññāta’’nti padaṃ hetuantogadhavisesanaṃ, odissa anuññātattā vaṭṭatīti adhippāyo. Tanti aṭṭhakathāsu vuttavacanaṃ. Hīti saccaṃ, yasmā vā.
435. பல்லங்கேன நிஸீத³ந்தீதி எத்த² ஆஸனபல்லங்கங் படிக்கி²பந்தோ ஆஹ ‘‘பல்லங்கங் ஆபு⁴ஜித்வா நிஸீத³ந்தீ’’தி. தத்த² ஆபு⁴ஜித்வாதி ஆப³ந்தி⁴த்வா. கூபோதி வச்சகூபோ. உபரீதி கூபதோ உபரி. ‘‘ஸப்³ப³தி³ஸாஸு பஞ்ஞாயதீ’’தி இமினா படிச்ச²ன்னமேவ அத்தி², ந உபரி ச²ன்னந்தி த³ஸ்ஸேதி.
435.Pallaṅkena nisīdantīti ettha āsanapallaṅkaṃ paṭikkhipanto āha ‘‘pallaṅkaṃ ābhujitvā nisīdantī’’ti. Tattha ābhujitvāti ābandhitvā. Kūpoti vaccakūpo. Uparīti kūpato upari. ‘‘Sabbadisāsu paññāyatī’’ti iminā paṭicchannameva atthi, na upari channanti dasseti.
436. குண்ட³கந்தி கணங். எத்தா²தி பி⁴க்கு²னிக்க²ந்த⁴கே.
436.Kuṇḍakanti kaṇaṃ. Etthāti bhikkhunikkhandhake.
இதி பி⁴க்கு²னிக்க²ந்த⁴கவண்ணனாய யோஜனா ஸமத்தா.
Iti bhikkhunikkhandhakavaṇṇanāya yojanā samattā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi
பி⁴க்கு²னீஉபஸம்பதா³னுஜானநங் • Bhikkhunīupasampadānujānanaṃ
2. து³தியபா⁴ணவாரோ • 2. Dutiyabhāṇavāro
3. ததியபா⁴ணவாரோ • 3. Tatiyabhāṇavāro
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / பி⁴க்கு²னீஉபஸம்பதா³னுஜானநகதா² • Bhikkhunīupasampadānujānanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பி⁴க்கு²னீஉபஸம்பன்னானுஜானநகதா²வண்ணனா • Bhikkhunīupasampannānujānanakathāvaṇṇanā
