| Library / Tipiṭaka / তিপিটক • Tipiṭaka / চূল়ৰগ্গ-অট্ঠকথা • Cūḷavagga-aṭṭhakathā |
ভিক্খুনীউপসম্পদানুজাননকথা
Bhikkhunīupasampadānujānanakathā
৪০৪. অনুজানামি ভিক্খৰে ভিক্খূহি ভিক্খুনিযো উপসম্পাদেতুন্তি ইমায অনুপঞ্ঞত্তিযা ভিক্খূ পঞ্চসতা সাকিযানিযো মহাপজাপতিযা সদ্ধিৰিহারিনিযো কত্ৰা উপসম্পাদেসুং। ইতি তা সব্বাপি একতোউপসম্পন্না নাম অহেসুং। যে খো ত্ৰং গোতমীতি ইমিনা ওৰাদেন গোতমী অরহত্তং পত্তা।
404.Anujānāmi bhikkhave bhikkhūhi bhikkhuniyo upasampādetunti imāya anupaññattiyā bhikkhū pañcasatā sākiyāniyo mahāpajāpatiyā saddhivihāriniyo katvā upasampādesuṃ. Iti tā sabbāpi ekatoupasampannā nāma ahesuṃ. Ye kho tvaṃ gotamīti iminā ovādena gotamī arahattaṃ pattā.
৪০৯. কম্মং ন করীযতীতি তজ্জনীযাদি সত্তৰিধম্পি কম্মং ন করীযতি। খমাপেন্তীতি ন পুন এৰং করিস্সামীতি খমাপেন্তি।
409.Kammaṃ na karīyatīti tajjanīyādi sattavidhampi kammaṃ na karīyati. Khamāpentīti na puna evaṃ karissāmīti khamāpenti.
৪১০. অনুজানামি, ভিক্খৰে, ভিক্খূহি ভিক্খুনীনং কম্মং রোপেত্ৰা নিয্যাদেতুন্তি এত্থ তজ্জনীযাদীসু ‘‘ইদং নাম কম্মং এতিস্সা কাতব্ব’’ন্তি এৰং রোপেত্ৰা ‘‘তং দানি তুম্হেৰ করোথা’’তি নিয্যাদেতব্বং। সচে পন অঞ্ঞস্মিং রোপিতে অঞ্ঞং করোন্তি, ‘‘তজ্জনীযকম্মারহস্স নিযস্সকম্মং করোতী’’তি এত্থ ৰুত্তনযেন কারেতব্বতং আপজ্জন্তি।
410.Anujānāmi, bhikkhave, bhikkhūhi bhikkhunīnaṃ kammaṃ ropetvā niyyādetunti ettha tajjanīyādīsu ‘‘idaṃ nāma kammaṃ etissā kātabba’’nti evaṃ ropetvā ‘‘taṃ dāni tumheva karothā’’ti niyyādetabbaṃ. Sace pana aññasmiṃ ropite aññaṃ karonti, ‘‘tajjanīyakammārahassa niyassakammaṃ karotī’’ti ettha vuttanayena kāretabbataṃ āpajjanti.
৪১১. কদ্দমোদকেনাতি এত্থ ন কেৰলং কদ্দমোদকেন, ৰিপ্পসন্নউদকরজনকদ্দমাদীসুপি যেন কেনচি ওসিঞ্চন্তস্স দুক্কটমেৰ। অৰন্দিযো সো ভিক্খৰে ভিক্খু ভিক্খুনিসঙ্ঘেন কাতব্বোতি ভিক্খুনুপস্সযে সন্নিপতিত্ৰা ‘‘অসুকো নাম অয্যো ভিক্খুনীনং অপসাদনীযং দস্সেতি, এতস্স অয্যস্স অৰন্দিযকরণং রুচ্চতী’’তি এৰং তিক্খত্তুং সাৰেতব্বং। এত্তাৰতা অৰন্দিযো কতো হোতি। ততো পট্ঠায যথা সামণেরে দিস্ৰা ন ৰন্দন্তি; এৰমেৰ দিস্ৰাপি ন ৰন্দিতব্বো। তেন ভিক্খুনা সম্মা ৰত্তন্তেন ভিক্খুনুপস্সযং আগন্ত্ৰা ৰিহারেযেৰ সঙ্ঘং ৰা গণং ৰা একপুগ্গলং ৰা উপসঙ্কমিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা ‘‘ভিক্খুনিসঙ্ঘো ময্হং খমতূ’’তি খমাপেতব্বং। তেন ভিক্খুনা ভিক্খুনীনং সন্তিকং আগন্ত্ৰা ‘‘এসো ভিক্খু তুম্হে খমাপেতী’’তি ৰত্তব্বং। ততো পট্ঠায সো ৰন্দিতব্বো। অযমেত্থ সঙ্খেপো, ৰিত্থারং পন কম্মৰিভঙ্গে ৰক্খাম।
411.Kaddamodakenāti ettha na kevalaṃ kaddamodakena, vippasannaudakarajanakaddamādīsupi yena kenaci osiñcantassa dukkaṭameva. Avandiyo so bhikkhave bhikkhu bhikkhunisaṅghena kātabboti bhikkhunupassaye sannipatitvā ‘‘asuko nāma ayyo bhikkhunīnaṃ apasādanīyaṃ dasseti, etassa ayyassa avandiyakaraṇaṃ ruccatī’’ti evaṃ tikkhattuṃ sāvetabbaṃ. Ettāvatā avandiyo kato hoti. Tato paṭṭhāya yathā sāmaṇere disvā na vandanti; evameva disvāpi na vanditabbo. Tena bhikkhunā sammā vattantena bhikkhunupassayaṃ āgantvā vihāreyeva saṅghaṃ vā gaṇaṃ vā ekapuggalaṃ vā upasaṅkamitvā ukkuṭikaṃ nisīditvā añjaliṃ paggahetvā ‘‘bhikkhunisaṅgho mayhaṃ khamatū’’ti khamāpetabbaṃ. Tena bhikkhunā bhikkhunīnaṃ santikaṃ āgantvā ‘‘eso bhikkhu tumhe khamāpetī’’ti vattabbaṃ. Tato paṭṭhāya so vanditabbo. Ayamettha saṅkhepo, vitthāraṃ pana kammavibhaṅge vakkhāma.
ওভাসেন্তীতি অসদ্ধম্মেন ওভাসেন্তি। ভিক্খুনীহি সদ্ধিং সম্পযোজেন্তীতি ভিক্খুনীহি সদ্ধিং পুরিসে অসদ্ধম্মেন সম্পযোজেন্তি। অৰন্দিযকরণং ৰুত্তনযমেৰ। আৰরণন্তি ৰিহারপ্পৰেসনে নিৰারণং । ওৰাদং ঠপেতুন্তি এত্থ ন ভিক্খুনুপস্সযং গন্ত্ৰা ঠপেতব্বো। ওৰাদত্থায পন আগতা ভিক্খুনিযো ৰত্তব্বা ‘‘অসুকা নাম ভিক্খুনী সাপত্তিকা, তস্সা ওৰাদং ঠপেমি, মা তায সদ্ধিং উপোসথং করিত্থা’’তি। কাযৰিৰরণাদীসুপি দণ্ডকম্মং ৰুত্তনযমেৰ।
Obhāsentīti asaddhammena obhāsenti. Bhikkhunīhi saddhiṃ sampayojentīti bhikkhunīhi saddhiṃ purise asaddhammena sampayojenti. Avandiyakaraṇaṃ vuttanayameva. Āvaraṇanti vihārappavesane nivāraṇaṃ . Ovādaṃ ṭhapetunti ettha na bhikkhunupassayaṃ gantvā ṭhapetabbo. Ovādatthāya pana āgatā bhikkhuniyo vattabbā ‘‘asukā nāma bhikkhunī sāpattikā, tassā ovādaṃ ṭhapemi, mā tāya saddhiṃ uposathaṃ karitthā’’ti. Kāyavivaraṇādīsupi daṇḍakammaṃ vuttanayameva.
৪১৩. ন ভিক্খৰে ভিক্খুনিযা ওৰাদো ন গন্তব্বোতিআদি ভিক্খুনিৰিভঙ্গৰণ্ণনাযং ৰুত্তমেৰ।
413.Na bhikkhave bhikkhuniyā ovādo na gantabbotiādi bhikkhunivibhaṅgavaṇṇanāyaṃ vuttameva.
৪১৬. ফাসুকা নমেন্তীতি গিহিদারিকাযো ৰিয ঘনপট্টকেন কাযবন্ধনেন ফাসুকা নমনত্থায বন্ধন্তি। একপরিযাকতন্তি একৰারং পরিক্খিপনকং।
416.Phāsukā namentīti gihidārikāyo viya ghanapaṭṭakena kāyabandhanena phāsukā namanatthāya bandhanti. Ekapariyākatanti ekavāraṃ parikkhipanakaṃ.
ৰিলীৰেন পট্টেনাতি সণ্হেহি ৰেল়ুৰিলীৰেহি কতপট্টেন। দুস্সপট্টেনাতি সেতৰত্থপট্টেন। দুস্সৰেণিযাতি দুস্সেন কতৰেণিযা। দুস্সৰট্টিযাতি দুস্সেন কতৰট্টিযা। চোল়পট্টাদীসু চোল়কাসাৰং চোল়ন্তি ৰেদিতব্বং।
Vilīvena paṭṭenāti saṇhehi veḷuvilīvehi katapaṭṭena. Dussapaṭṭenāti setavatthapaṭṭena. Dussaveṇiyāti dussena kataveṇiyā. Dussavaṭṭiyāti dussena katavaṭṭiyā. Coḷapaṭṭādīsu coḷakāsāvaṃ coḷanti veditabbaṃ.
অট্ঠিল্লেনাতি গোজঙ্ঘট্ঠিকেন। জঘনন্তি কটিপ্পদেসো ৰুচ্চতি। হত্থং কোট্টাপেন্তীতি অগ্গবাহং কোট্টাপেত্ৰা মোরপত্তাদীহি চিত্তালঙ্কারং করোন্তি। হত্থকোচ্ছন্তি পিট্ঠিহত্থং। পাদন্তি জঙ্ঘং। পাদকোচ্ছন্তি পিট্ঠিপাদং।
Aṭṭhillenāti gojaṅghaṭṭhikena. Jaghananti kaṭippadeso vuccati. Hatthaṃ koṭṭāpentīti aggabāhaṃ koṭṭāpetvā morapattādīhi cittālaṅkāraṃ karonti. Hatthakocchanti piṭṭhihatthaṃ. Pādanti jaṅghaṃ. Pādakocchanti piṭṭhipādaṃ.
৪১৭. মুখলিম্পনাদীনি ৰুত্তনযানেৰ। অৰঙ্গং করোন্তীতি অক্খী অঞ্জন্তিযো অৰঙ্গদেসে অধোমুখং লেখং করোন্তি। ৰিসেসকন্তি গণ্ডপ্পদেসে ৰিচিত্রসণ্ঠানং ৰিসেসকং করোন্তি। ওলোকেন্তীতি ৰাতপানং ৰিৰরিত্ৰা ৰীথিং ওলোকেন্তি। সালোকে তিট্ঠন্তীতি দ্ৰারং ৰিৰরিত্ৰা উপড্ঢকাযং দস্সেন্তিযো তিট্ঠন্তি। নচ্চন্তি নটসমজ্জং কারেন্তি। ৰেসিং ৰুট্ঠাপেন্তীতি গণিকং ৰুট্ঠাপেন্তি। পানাগারং ঠপেন্তীতি সুরং ৰিক্কিণন্তি। সূনং ঠপেন্তীতি মংসং ৰিক্কিণন্তি। আপণন্তি নানাভণ্ডানং অনেকৰিধং আপণং পসারেন্তি। দাসং উপট্ঠাপেন্তীতি দাসং গহেত্ৰা তেন অত্তনো ৰেয্যাৰচ্চং কারেন্তি। দাসীআদীসুপি এসেৰ নযো। হরিতকপক্কিকং পকিণন্তীতি হরিতকঞ্চেৰ পক্কঞ্চ পকিণন্তি; পকিণ্ণকাপণং পসারেন্তীতি ৰুত্তং হোতি।
417.Mukhalimpanādīni vuttanayāneva. Avaṅgaṃ karontīti akkhī añjantiyo avaṅgadese adhomukhaṃ lekhaṃ karonti. Visesakanti gaṇḍappadese vicitrasaṇṭhānaṃ visesakaṃ karonti. Olokentīti vātapānaṃ vivaritvā vīthiṃ olokenti. Sāloke tiṭṭhantīti dvāraṃ vivaritvā upaḍḍhakāyaṃ dassentiyo tiṭṭhanti. Naccanti naṭasamajjaṃ kārenti. Vesiṃ vuṭṭhāpentīti gaṇikaṃ vuṭṭhāpenti. Pānāgāraṃ ṭhapentīti suraṃ vikkiṇanti. Sūnaṃ ṭhapentīti maṃsaṃ vikkiṇanti. Āpaṇanti nānābhaṇḍānaṃ anekavidhaṃ āpaṇaṃ pasārenti. Dāsaṃ upaṭṭhāpentīti dāsaṃ gahetvā tena attano veyyāvaccaṃ kārenti. Dāsīādīsupi eseva nayo. Haritakapakkikaṃpakiṇantīti haritakañceva pakkañca pakiṇanti; pakiṇṇakāpaṇaṃ pasārentīti vuttaṃ hoti.
৪১৮. সব্বনীলকাদিকথা কথিতাযেৰ।
418.Sabbanīlakādikathā kathitāyeva.
৪১৯. ভিক্খুনী চে, ভিক্খৰে, কালং করোন্তীতিআদীসু অযং পাল়িমুত্তকৰিনিচ্ছযো – সচে হি পঞ্চসু সহধম্মিকেসু যো কোচি কালং করোন্তো ‘‘মমচ্চযেন ময্হং পরিক্খারো উপজ্ঝাযস্স হোতু, আচরিযস্স হোতু, সদ্ধিৰিহারিকস্স হোতু, অন্তেৰাসিকস্স হোতু, মাতু হোতু, পিতু হোতু, অঞ্ঞস্স ৰা যস্স কস্সচি হোতূ’’তি ৰদতি তেসং ন হোতি, সঙ্ঘস্সেৰ হোতি। ন হি পঞ্চন্নং সহধম্মিকানং অচ্চযদানং রুহতি, গিহীনং পন রুহতি। ভিক্খু হি ভিক্খুনিৰিহারে কালং করোতি, তস্স পরিক্খারো ভিক্খূনংযেৰ হোতি। ভিক্খুনী ভিক্খুৰিহারে কালং করোতি, তস্সা পরিক্খারো ভিক্খুনীনংযেৰ হোতি।
419.Bhikkhunī ce, bhikkhave, kālaṃ karontītiādīsu ayaṃ pāḷimuttakavinicchayo – sace hi pañcasu sahadhammikesu yo koci kālaṃ karonto ‘‘mamaccayena mayhaṃ parikkhāro upajjhāyassa hotu, ācariyassa hotu, saddhivihārikassa hotu, antevāsikassa hotu, mātu hotu, pitu hotu, aññassa vā yassa kassaci hotū’’ti vadati tesaṃ na hoti, saṅghasseva hoti. Na hi pañcannaṃ sahadhammikānaṃ accayadānaṃ ruhati, gihīnaṃ pana ruhati. Bhikkhu hi bhikkhunivihāre kālaṃ karoti, tassa parikkhāro bhikkhūnaṃyeva hoti. Bhikkhunī bhikkhuvihāre kālaṃ karoti, tassā parikkhāro bhikkhunīnaṃyeva hoti.
৪২০. পুরাণমল্লীতি পুরাণে গিহিকালে মল্লকস্স ভরিযা। পুরিসব্যঞ্জনন্তি পুরিসনিমিত্তং, ছিন্নং ৰা হোতু অচ্ছিন্নং ৰা, পটিচ্ছন্নং ৰা অপ্পটিচ্ছন্নং ৰা। সচে এতস্মিং ঠানে পুরিসব্যঞ্জনন্তি চিত্তং উপ্পাদেত্ৰা উপনিজ্ঝাযতি, দুক্কটং।
420.Purāṇamallīti purāṇe gihikāle mallakassa bhariyā. Purisabyañjananti purisanimittaṃ, chinnaṃ vā hotu acchinnaṃ vā, paṭicchannaṃ vā appaṭicchannaṃ vā. Sace etasmiṃ ṭhāne purisabyañjananti cittaṃ uppādetvā upanijjhāyati, dukkaṭaṃ.
৪২১. অত্তনো পরিভোগত্থায দিন্নং নাম যং ‘‘তুম্হেযেৰ পরিভুঞ্জথা’’তি ৰত্ৰা দিন্নং, তং অঞ্ঞস্স দদতো দুক্কটং। অগ্গং গহেত্ৰা পন দাতুং ৰট্টতি। সচে অসপ্পাযং, সব্বং অপনেতুং ৰট্টতি। চীৰরং একাহং ৰা দ্ৰীহং ৰা পরিভুঞ্জিত্ৰা দাতুং ৰট্টতি। পত্তাদীসুপি এসেৰ নযো।
421.Attano paribhogatthāya dinnaṃ nāma yaṃ ‘‘tumheyeva paribhuñjathā’’ti vatvā dinnaṃ, taṃ aññassa dadato dukkaṭaṃ. Aggaṃ gahetvā pana dātuṃ vaṭṭati. Sace asappāyaṃ, sabbaṃ apanetuṃ vaṭṭati. Cīvaraṃ ekāhaṃ vā dvīhaṃ vā paribhuñjitvā dātuṃ vaṭṭati. Pattādīsupi eseva nayo.
ভিক্খূনং সন্নিধিং ভিক্খুনীহি পটিগ্গাহাপেত্ৰাতি হিয্যো পটিগ্গহেত্ৰা ঠপিতমংসং অজ্জ অঞ্ঞস্মিং অনুপসম্পন্নে অসতি ভিক্খূহি পটিগ্গাহাপেত্ৰা ভিক্খুনীহি পরিভুঞ্জিতব্বং। ভিক্খূহি পটিগ্গহিতঞ্হি ভিক্খুনীনং অপ্পটিগ্গহিতকট্ঠানে তিট্ঠতি, ভিক্খুনীনং পটিগ্গহিতম্পি ভিক্খূসু এসেৰ নযো।
Bhikkhūnaṃsannidhiṃ bhikkhunīhi paṭiggāhāpetvāti hiyyo paṭiggahetvā ṭhapitamaṃsaṃ ajja aññasmiṃ anupasampanne asati bhikkhūhi paṭiggāhāpetvā bhikkhunīhi paribhuñjitabbaṃ. Bhikkhūhi paṭiggahitañhi bhikkhunīnaṃ appaṭiggahitakaṭṭhāne tiṭṭhati, bhikkhunīnaṃ paṭiggahitampi bhikkhūsu eseva nayo.
৪২৬. আসনং সংকসাযন্তিযো কালং ৰীতিনামেসুন্তি অঞ্ঞং ৰুট্ঠাপেত্ৰা অঞ্ঞং নিসীদাপেন্তিযো ভোজনকালং অতিক্কামেসুং।
426.Āsanaṃ saṃkasāyantiyo kālaṃ vītināmesunti aññaṃ vuṭṭhāpetvā aññaṃ nisīdāpentiyo bhojanakālaṃ atikkāmesuṃ.
অট্ঠন্নং ভিক্খুনীনং যথাৰুড্ঢন্তি এত্থ সচে পুরে অট্ঠসু নিসিন্নাসু তাসং অব্ভন্তরিমা অঞ্ঞা আগচ্ছতি, সা অত্তনো নৰকং উট্ঠাপেত্ৰা নিসীদিতুং লভতি। যা পন অট্ঠহিপি নৰকতরা, সা সচেপি সট্ঠিৰস্সা হোতি, আগতপটিপাটিযাৰ নিসীদিতুং লভতি। অঞ্ঞত্থ সব্বত্থ যথাৰুড্ঢং ন পটিবাহিতব্বন্তি ঠপেত্ৰা ভত্তগ্গং অঞ্ঞস্মিং চতুপচ্চযভাজনীযট্ঠানে ‘‘অহং পুব্বে আগতা’’তি ৰুড্ঢং পটিবাহিত্ৰা কিঞ্চি ন গহেতব্বং; যথাৰুড্ঢমেৰ ৰট্টতি। পৰারণাকথা কথিতাযেৰ।
Aṭṭhannaṃbhikkhunīnaṃ yathāvuḍḍhanti ettha sace pure aṭṭhasu nisinnāsu tāsaṃ abbhantarimā aññā āgacchati, sā attano navakaṃ uṭṭhāpetvā nisīdituṃ labhati. Yā pana aṭṭhahipi navakatarā, sā sacepi saṭṭhivassā hoti, āgatapaṭipāṭiyāva nisīdituṃ labhati. Aññattha sabbattha yathāvuḍḍhaṃ na paṭibāhitabbanti ṭhapetvā bhattaggaṃ aññasmiṃ catupaccayabhājanīyaṭṭhāne ‘‘ahaṃ pubbe āgatā’’ti vuḍḍhaṃ paṭibāhitvā kiñci na gahetabbaṃ; yathāvuḍḍhameva vaṭṭati. Pavāraṇākathā kathitāyeva.
৪২৯. ইত্থিযুত্তন্তিআদীহি সব্বযানানি অনুঞ্ঞাতানি। পাটঙ্কিন্তি পটপোট্টলিকং।
429.Itthiyuttantiādīhi sabbayānāni anuññātāni. Pāṭaṅkinti paṭapoṭṭalikaṃ.
৪৩০. দূতেন উপসম্পদা দসন্নং অন্তরাযানং যেন কেনচি ৰট্টতি। কম্মৰাচাপরিযোসানে সা ভিক্খুনী ভিক্খুনুপস্সযে ঠিতা ৰা হোতু নিপন্না ৰা জাগরা ৰা নিদ্দং ওক্কন্তা ৰা, উপসম্পন্নাৰ হোতি। তাৰদেৰ ছাযাদীনি আগতায দূতভিক্খুনিযা আচিক্খিতব্বানি।
430.Dūtena upasampadā dasannaṃ antarāyānaṃ yena kenaci vaṭṭati. Kammavācāpariyosāne sā bhikkhunī bhikkhunupassaye ṭhitā vā hotu nipannā vā jāgarā vā niddaṃ okkantā vā, upasampannāva hoti. Tāvadeva chāyādīni āgatāya dūtabhikkhuniyā ācikkhitabbāni.
৪৩১. উদোসিতোতি ভণ্ডসালা। ন সম্মতীতি নপ্পহোতি। উপস্সযন্তি ঘরং। নৰকম্মন্তি সঙ্ঘস্সত্থায ভিক্খুনিযা নৰকম্মম্পি কাতুং অনুজানামীতি অত্থো।
431.Udositoti bhaṇḍasālā. Na sammatīti nappahoti. Upassayanti gharaṃ. Navakammanti saṅghassatthāya bhikkhuniyā navakammampi kātuṃ anujānāmīti attho.
৪৩২. তস্সা পব্বজিতাযাতি তস্সা পব্বজিতকালে। যাৰ সো দারকো ৰিঞ্ঞুতং পাপুণাতীতি যাৰ খাদিতুং ভুঞ্জিতুং নহাযিতুঞ্চ মণ্ডিতুঞ্চ অত্তনো ধম্মতায সক্কোতীতি অত্থো।
432.Tassā pabbajitāyāti tassā pabbajitakāle. Yāva so dārako viññutaṃ pāpuṇātīti yāva khādituṃ bhuñjituṃ nahāyituñca maṇḍituñca attano dhammatāya sakkotīti attho.
ঠপেত্ৰা সাগারন্তি সহগারসেয্যমত্তং ঠপেত্ৰা। যথা অঞ্ঞস্মিং পুরিসে; এৰং দুতিযিকায ভিক্খুনিযা তস্মিং দারকে পটিপজ্জিতব্বন্তি দস্সেতি। মাতা পন নহাপেতুং পাযেতুং ভোজেতুং মণ্ডেতুং উরে কত্ৰা সযিতুঞ্চ লভতি।
Ṭhapetvāsāgāranti sahagāraseyyamattaṃ ṭhapetvā. Yathā aññasmiṃ purise; evaṃ dutiyikāya bhikkhuniyā tasmiṃ dārake paṭipajjitabbanti dasseti. Mātā pana nahāpetuṃ pāyetuṃ bhojetuṃ maṇḍetuṃ ure katvā sayituñca labhati.
৪৩৪. যদেৰ সা ৰিব্ভন্তাতি যস্মা সা ৰিব্ভন্তা অত্তনো রুচিযা খন্তিযা ওদাতানি ৰত্থানি নিৰত্থা, তস্মাযেৰ সা অভিক্খুনী, ন সিক্খাপচ্চক্খানেনাতি দস্সেতি। সা পুন উপসম্পদং ন লভতি।
434.Yadeva sā vibbhantāti yasmā sā vibbhantā attano ruciyā khantiyā odātāni vatthāni nivatthā, tasmāyeva sā abhikkhunī, na sikkhāpaccakkhānenāti dasseti. Sā puna upasampadaṃ na labhati.
সা আগতা ন উপসম্পাদেতব্বাতি ন কেৰলং ন উপসম্পাদেতব্বা, পব্বজ্জম্পি ন লভতি। ওদাতানি গহেত্ৰা ৰিব্ভন্তা পন পব্বজ্জামত্তং লভতি।
Sāāgatā na upasampādetabbāti na kevalaṃ na upasampādetabbā, pabbajjampi na labhati. Odātāni gahetvā vibbhantā pana pabbajjāmattaṃ labhati.
অভিৰাদনন্তিআদীসু পুরিসা পাদে সম্বাহন্তা ৰন্দন্তি, কেসে ছিন্দন্তি, নখে ছিন্দন্তি, ৰণপটিকম্মং করোন্তি, তং সব্বং কুক্কুচ্চাযন্তা ন সাদিযন্তীতি অত্থো। তত্রেকে আচরিযা ‘‘সচে একতো ৰা উভতো ৰা অৰস্সুতা হোন্তি সারত্তা, যথাৰত্থুকমেৰ’’। একে আচরিযা ‘‘নত্থি এত্থ আপত্তী’’তি ৰদন্তি। এৰং আচরিযৰাদং দস্সেত্ৰা ইদং ওদিস্স অনুঞ্ঞাতং ৰট্টতীতি অট্ঠকথাসু ৰুত্তং। তং পমাণং। ‘‘অনুজানামি ভিক্খৰে সাদিতু’’ন্তি হি ৰচনেনেৰ তং কপ্পিযং।
Abhivādanantiādīsu purisā pāde sambāhantā vandanti, kese chindanti, nakhe chindanti, vaṇapaṭikammaṃ karonti, taṃ sabbaṃ kukkuccāyantā na sādiyantīti attho. Tatreke ācariyā ‘‘sace ekato vā ubhato vā avassutā honti sārattā, yathāvatthukameva’’. Eke ācariyā ‘‘natthi ettha āpattī’’ti vadanti. Evaṃ ācariyavādaṃ dassetvā idaṃ odissa anuññātaṃ vaṭṭatīti aṭṭhakathāsu vuttaṃ. Taṃ pamāṇaṃ. ‘‘Anujānāmi bhikkhave sāditu’’nti hi vacaneneva taṃ kappiyaṃ.
৪৩৫. পল্লঙ্কেন নিসীদন্তীতি পল্লঙ্কং আভুজিত্ৰা নিসীদন্তি। অড্ঢপল্লঙ্কন্তি একং পাদং আভুজিত্ৰা কতপল্লঙ্কং। হেট্ঠা ৰিৰটে উপরি পটিচ্ছন্নেতি এত্থ সচে কূপো খতো হোতি, উপরি পন পদরমত্তমেৰ সব্বদিসাসু পঞ্ঞাযতি, এৰরূপেপি ৰট্টতি।
435.Pallaṅkena nisīdantīti pallaṅkaṃ ābhujitvā nisīdanti. Aḍḍhapallaṅkanti ekaṃ pādaṃ ābhujitvā katapallaṅkaṃ. Heṭṭhā vivaṭe upari paṭicchanneti ettha sace kūpo khato hoti, upari pana padaramattameva sabbadisāsu paññāyati, evarūpepi vaṭṭati.
৪৩৬. কুক্কুসং মত্তিকন্তি কুণ্ডকঞ্চেৰ মত্তিকঞ্চ। সেসমেত্থ উত্তানমেৰাতি।
436.Kukkusaṃ mattikanti kuṇḍakañceva mattikañca. Sesamettha uttānamevāti.
ভিক্খুনীউপসম্পদানুজাননকথা নিট্ঠিতা।
Bhikkhunīupasampadānujānanakathā niṭṭhitā.
ভিক্খুনিক্খন্ধকৰণ্ণনা নিট্ঠিতা।
Bhikkhunikkhandhakavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi
ভিক্খুনীউপসম্পদানুজাননং • Bhikkhunīupasampadānujānanaṃ
২. দুতিযভাণৰারো • 2. Dutiyabhāṇavāro
৩. ততিযভাণৰারো • 3. Tatiyabhāṇavāro
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ভিক্খুনীউপসম্পন্নানুজাননকথাৰণ্ণনা • Bhikkhunīupasampannānujānanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ভিক্খুনীউপসম্পদানুজাননকথাৰণ্ণনা • Bhikkhunīupasampadānujānanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ভিক্খুনীউপসম্পদানুজাননকথাৰণ্ণনা • Bhikkhunīupasampadānujānanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ভিক্খুনীউপসম্পদানুজাননকথা • Bhikkhunīupasampadānujānanakathā
