| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
ভিক্খুনীউপসম্পদানুজাননকথা
Bhikkhunīupasampadānujānanakathā
৪০৪. ইমায অনুপঞ্ঞত্তিযাতি মহাপজাপতিযা অট্ঠগরুধম্মপটিগ্গহণূপসম্পদং উপনিধায অযং পঞ্ঞত্তি অনুপঞ্ঞত্তি নাম, তায অনুপঞ্ঞত্তিযা উপসম্পাদেতুন্তি অত্থো। মহাপজাপতিযা সদ্ধিৰিহারিনিযো কত্ৰাতি মহাপজাপতিং উপজ্ঝং কত্ৰা পঞ্চসতা সাকিযানিযো তস্সা সদ্ধিৰিহারিনিযো কত্ৰাতি অত্থো। ইতীতি তস্মা অহেসুন্তি সম্বন্ধো। ইমিনা ওৰাদেনাতি ভগৰতো ইমিনা ওৰাদেন।
404.Imāya anupaññattiyāti mahāpajāpatiyā aṭṭhagarudhammapaṭiggahaṇūpasampadaṃ upanidhāya ayaṃ paññatti anupaññatti nāma, tāya anupaññattiyā upasampādetunti attho. Mahāpajāpatiyā saddhivihāriniyo katvāti mahāpajāpatiṃ upajjhaṃ katvā pañcasatā sākiyāniyo tassā saddhivihāriniyo katvāti attho. Itīti tasmā ahesunti sambandho. Iminā ovādenāti bhagavato iminā ovādena.
৪১০. এতিস্সাতি এতিস্সা ভিক্খুনিযা। তন্তি কম্মং। অঞ্ঞস্মিন্তি অঞ্ঞস্মিং কম্মে। অঞ্ঞন্তি রোপিতব্বকম্মতো অঞ্ঞং কম্মং।
410.Etissāti etissā bhikkhuniyā. Tanti kammaṃ. Aññasminti aññasmiṃ kamme. Aññanti ropitabbakammato aññaṃ kammaṃ.
৪১১. কদ্দমোদকেনাতি কদ্দমেন আলুল়িতেন উদকেনেৰ। কদ্দমাদীসুপীতি পীসদ্দো ‘‘যেন কেনচী’’তি এত্থ যোজেতব্বো। যেন কেনচিপীতি হি অত্থো। সন্নিপতিত্ৰাতি ভিক্খুনিসঙ্ঘেন সন্নিপতিত্ৰা। অপসাদনীযন্তি অপসাদেতব্বং কম্মং। এত্তাৰতাতি এত্তকেন সাৰনমত্তেন। অৰন্দিযোতি ন ৰন্দেতব্বো, ৰন্দিতুং ন অরহোতি অত্থো। ততোতি তিক্খত্তুং সাৰেতব্বতো। ন ৰন্দন্তীতি ভিক্খুনিযো ন ৰন্দন্তি। দিস্ৰাপীতি তং ভিক্খুং দিস্ৰাপি। তেন ভিক্খুনাতি অপসাদনীযং দস্সেন্তেন ভিক্খুনা, খমাপেতব্বন্তি সম্বন্ধো। ৰিহারেযেৰাতি ভিক্খূনং ৰিহারেযেৰ। তেন ভিক্খুনাতি উপসঙ্কমিতব্বেন ভিক্খুনা, ৰত্তব্বন্তি সম্বন্ধো। ততোতি ৰত্তব্বকালতো। সোতি অপসাদনীযং দস্সেন্তো ভিক্খু। এত্থাতি ভিক্খুনিক্খন্ধকে। কম্মৰিভঙ্গেতি পরিৰারাৰসানে কম্মানং ৰিভঙ্গট্ঠানে (পরি॰ অট্ঠ॰ ৪৯৫-৪৯৬)।
411.Kaddamodakenāti kaddamena āluḷitena udakeneva. Kaddamādīsupīti pīsaddo ‘‘yena kenacī’’ti ettha yojetabbo. Yena kenacipīti hi attho. Sannipatitvāti bhikkhunisaṅghena sannipatitvā. Apasādanīyanti apasādetabbaṃ kammaṃ. Ettāvatāti ettakena sāvanamattena. Avandiyoti na vandetabbo, vandituṃ na arahoti attho. Tatoti tikkhattuṃ sāvetabbato. Na vandantīti bhikkhuniyo na vandanti. Disvāpīti taṃ bhikkhuṃ disvāpi. Tena bhikkhunāti apasādanīyaṃ dassentena bhikkhunā, khamāpetabbanti sambandho. Vihāreyevāti bhikkhūnaṃ vihāreyeva. Tena bhikkhunāti upasaṅkamitabbena bhikkhunā, vattabbanti sambandho. Tatoti vattabbakālato. Soti apasādanīyaṃ dassento bhikkhu. Etthāti bhikkhunikkhandhake. Kammavibhaṅgeti parivārāvasāne kammānaṃ vibhaṅgaṭṭhāne (pari. aṭṭha. 495-496).
ওভাসন্তীতি অৰ হীনেন ভাসন্তীতি দস্সেন্তো আহ ‘‘অসদ্ধম্মেন ওভাসন্তী’’তি। ‘‘ভিক্খুনীহি সদ্ধিং সম্পযোজেন্তী’’তি এত্থ কম্মকরণে দস্সেন্তো আহ ‘‘পুরিসে অসদ্ধম্মেনা’’তি। এত্থ ‘‘পুরিসে’’তি ইমিনা কম্মং দস্সেতি, ‘‘অসদ্ধম্মেনা’’তি ইমিনা করণং। ৰিহারপ্পৰেসনেতি ভিক্খূনং ৰিহারপ্পৰেসনে। ওৰাদং ঠপেতুন্তি এত্থ ওৰাদট্ঠপনাকারং দস্সেন্তো আহ ‘‘ন ভিক্খুনুপস্সয’’ন্তিআদি। ওৰাদত্থাযাতি ওৰাদপটিগ্গহণত্থায। মা করিত্থাতি মা করেয্যাথ।
Obhāsantīti ava hīnena bhāsantīti dassento āha ‘‘asaddhammena obhāsantī’’ti. ‘‘Bhikkhunīhi saddhiṃ sampayojentī’’ti ettha kammakaraṇe dassento āha ‘‘purise asaddhammenā’’ti. Ettha ‘‘purise’’ti iminā kammaṃ dasseti, ‘‘asaddhammenā’’ti iminā karaṇaṃ. Vihārappavesaneti bhikkhūnaṃ vihārappavesane. Ovādaṃ ṭhapetunti ettha ovādaṭṭhapanākāraṃ dassento āha ‘‘na bhikkhunupassaya’’ntiādi. Ovādatthāyāti ovādapaṭiggahaṇatthāya. Mā karitthāti mā kareyyātha.
৪১৬. গিহিদারিকাযোতি গিহিভূতা দারিকাযো বন্ধন্তি ৰিযাতি যোজনা। ঘনপট্টকেনাতি ঘনভূতেন পট্টেন নিযুত্তেন। একপরিযকন্তি এত্থ একৰারং কটিযং পরিক্খিপিত্ৰা কতং কাযবন্ধনং একপরিযকন্তি দস্সেন্তো আহ ‘‘একৰারং পরিক্খিপনক’’ন্তি। তত্থ পরিক্খিপনকন্তি কটিযং পরিক্খিপনারহং।
416.Gihidārikāyoti gihibhūtā dārikāyo bandhanti viyāti yojanā. Ghanapaṭṭakenāti ghanabhūtena paṭṭena niyuttena. Ekapariyakanti ettha ekavāraṃ kaṭiyaṃ parikkhipitvā kataṃ kāyabandhanaṃ ekapariyakanti dassento āha ‘‘ekavāraṃ parikkhipanaka’’nti. Tattha parikkhipanakanti kaṭiyaṃ parikkhipanārahaṃ.
ৰিলীৰেনাতি এত্থ বহুত্থে একৰচনন্তি আহ ‘‘সণ্হেহি ৰিলীৰেহী’’তি। ‘‘কতপট্টেনা’’তি ইমিনা পাল়িযং ‘‘কতেনা’’তি পাঠসেসং দস্সেতি। সেতৰত্থপট্টেনাতি সেতৰত্থেন কতেন পট্টেন। কতৰেণিযাতি কতায ৰেণিযা। ইমিনা দুস্সেন কতা ৰেণি দুস্সৰেণীতি ৰচনত্থং দস্সেতি। এসেৰ নযো পুরিমপচ্ছিমপদেসুপি। চোল়কাসাৰন্তি চোল়মেৰ কসাৰেন রত্তত্তা চোল়কাসাৰং।
Vilīvenāti ettha bahutthe ekavacananti āha ‘‘saṇhehi vilīvehī’’ti. ‘‘Katapaṭṭenā’’ti iminā pāḷiyaṃ ‘‘katenā’’ti pāṭhasesaṃ dasseti. Setavatthapaṭṭenāti setavatthena katena paṭṭena. Kataveṇiyāti katāya veṇiyā. Iminā dussena katā veṇi dussaveṇīti vacanatthaṃ dasseti. Eseva nayo purimapacchimapadesupi. Coḷakāsāvanti coḷameva kasāvena rattattā coḷakāsāvaṃ.
অট্ঠিল্লেনাতি অদ্দেন অট্ঠিনা। ‘‘গোজঙ্ঘট্ঠিকে’’তি ইমিনা অট্ঠিনো সম্বন্ধং দস্সেতি। হত্থং কোট্টাপেন্তীতি এত্থ হত্থং নাম অগ্গবাহমেৰাধিপ্পেতং, ন কপ্পরতো পট্ঠাযাতি দস্সেন্তো আহ ‘‘অগ্গবাহ’’ন্তি। পিট্ঠিহত্থন্তি হত্থপিট্ঠিং। পিট্ঠিপাদন্তি পাদপিট্ঠিং।
Aṭṭhillenāti addena aṭṭhinā. ‘‘Gojaṅghaṭṭhike’’ti iminā aṭṭhino sambandhaṃ dasseti. Hatthaṃ koṭṭāpentīti ettha hatthaṃ nāma aggabāhamevādhippetaṃ, na kapparato paṭṭhāyāti dassento āha ‘‘aggabāha’’nti. Piṭṭhihatthanti hatthapiṭṭhiṃ. Piṭṭhipādanti pādapiṭṭhiṃ.
৪১৭. ৰুত্তনযানেৰাতি ছব্বগ্গিযানং মুখলিম্পনাদীসু (চূল়ৰ॰ অট্ঠ॰ ২৪৭) ৰুত্তনযানেৰ। অঙ্গদেসেতি সরীরপ্পদেসে। গণ্ডপ্পদেসেতি কপোলপ্পদেসে। সালোকে তিট্ঠন্তীতি এত্থ সংৰিজ্জতি আলোকো এত্থাতি সালোকন্তি কত্ৰা দ্ৰারং গহেতব্বং। তেন ৰুত্তং ‘‘দ্ৰারং ৰিৰরিত্ৰা’’তি। ৰুট্ঠাপেন্তীতি উপসম্পাদেন্তি। সূনং ঠপেন্তীতি এত্থ সূনাসদ্দো মংসপরিযাযোতি আহ ‘‘মংসং ৰিক্কিণন্তী’’তি। তেনাতি দাসেন। ইদং পদং ‘‘কারেন্তী’’তি পদে কারিতকম্মং। ‘‘হরিতকঞ্চেৰ পক্কঞ্চা’’তি ইমিনা হরিতকপক্কিকন্তি পদস্স দ্ৰন্দৰাক্যং দস্সেতি। তত্থ হরিতকন্তি হরিতমেৰ পণ্ণং। পক্কন্তি সেদিতং পণ্ণং।
417.Vuttanayānevāti chabbaggiyānaṃ mukhalimpanādīsu (cūḷava. aṭṭha. 247) vuttanayāneva. Aṅgadeseti sarīrappadese. Gaṇḍappadeseti kapolappadese. Sāloke tiṭṭhantīti ettha saṃvijjati āloko etthāti sālokanti katvā dvāraṃ gahetabbaṃ. Tena vuttaṃ ‘‘dvāraṃ vivaritvā’’ti. Vuṭṭhāpentīti upasampādenti. Sūnaṃ ṭhapentīti ettha sūnāsaddo maṃsapariyāyoti āha ‘‘maṃsaṃ vikkiṇantī’’ti. Tenāti dāsena. Idaṃ padaṃ ‘‘kārentī’’ti pade kāritakammaṃ. ‘‘Haritakañceva pakkañcā’’ti iminā haritakapakkikanti padassa dvandavākyaṃ dasseti. Tattha haritakanti haritameva paṇṇaṃ. Pakkanti seditaṃ paṇṇaṃ.
৪১৮. কথিতাযেৰাতি চীৰরক্খন্ধকে কথিতাযেৰ।
418.Kathitāyevāti cīvarakkhandhake kathitāyeva.
৪১৯. পাল়িমুত্তকৰিনিচ্ছযোতি পাল়িযং ৰুত্তৰিনিচ্ছযতো মুত্তো ৰিনিচ্ছযো। পাল়িমুত্তকৰিনিচ্ছযং ৰিত্থারেন্তো আহ ‘‘সচে হী’’তিআদি। যো কোচি কালং করোন্তো ৰদতীতি সম্বন্ধো। মমচ্চযেনাতি মম অতিক্কমেন। অঞ্ঞস্সাতি ৰুত্তেহি উপজ্ঝাযাদীহি অঞ্ঞস্স । তেসন্তি উপজ্ঝাযাদীনং। ন হোতীতি পরিক্খারো ন হোতি। হীতি সচ্চং, যস্মা ৰা। অচ্চযদানন্তি অচ্চযেন হোতূতি দানং। ন রুহতীতি পঞ্চন্নং সহধম্মিকানং পব্বজিতস্স ৰা গহট্ঠস্স ৰা যস্স কস্সচি অচ্চযদানং তেসং ন রুহতি, সঙ্ঘস্সেৰ রুহতীতি অধিপ্পাযো। গিহীনং পন অচ্চযদানন্তি সম্বন্ধো। রুহতীতি গিহীনং পব্বজিতস্স ৰা গহট্ঠস্স ৰা যস্স কস্সচি অচ্চযদানং তেসং রুহতি, তেসংযেৰ সন্তকো হোতীতি অধিপ্পাযো।
419.Pāḷimuttakavinicchayoti pāḷiyaṃ vuttavinicchayato mutto vinicchayo. Pāḷimuttakavinicchayaṃ vitthārento āha ‘‘sace hī’’tiādi. Yo koci kālaṃ karonto vadatīti sambandho. Mamaccayenāti mama atikkamena. Aññassāti vuttehi upajjhāyādīhi aññassa . Tesanti upajjhāyādīnaṃ. Na hotīti parikkhāro na hoti. Hīti saccaṃ, yasmā vā. Accayadānanti accayena hotūti dānaṃ. Na ruhatīti pañcannaṃ sahadhammikānaṃ pabbajitassa vā gahaṭṭhassa vā yassa kassaci accayadānaṃ tesaṃ na ruhati, saṅghasseva ruhatīti adhippāyo. Gihīnaṃ pana accayadānanti sambandho. Ruhatīti gihīnaṃ pabbajitassa vā gahaṭṭhassa vā yassa kassaci accayadānaṃ tesaṃ ruhati, tesaṃyeva santako hotīti adhippāyo.
৪২০. পুরাণমল্লীতি এত্থ মল্লস্স ভরিযা মল্লী, পুরাণে মল্লী পুরাণমল্লীতি দস্সেন্তো আহ ‘‘পুরাণে’’তিআদি। ‘‘গিহিকালে’’তি ইমিনা ‘‘পুরাণে’’তি এত্থ ণপচ্চযস্স সরূপং দস্সেতি। মল্লস্সাতি মুট্ঠিমল্লস্স। পুরিসব্যঞ্জনন্তি এত্থ ব্যঞ্জনসদ্দো নিমিত্তপরিযাযোতি আহ ‘‘পুরিসনিমিত্ত’’ন্তি। চিত্তন্তি রাগচিত্তং।
420.Purāṇamallīti ettha mallassa bhariyā mallī, purāṇe mallī purāṇamallīti dassento āha ‘‘purāṇe’’tiādi. ‘‘Gihikāle’’ti iminā ‘‘purāṇe’’ti ettha ṇapaccayassa sarūpaṃ dasseti. Mallassāti muṭṭhimallassa. Purisabyañjananti ettha byañjanasaddo nimittapariyāyoti āha ‘‘purisanimitta’’nti. Cittanti rāgacittaṃ.
৪২১. যন্তি যং ৰত্থু, অগ্গন্তি পঠমভাগং। অসপ্পাযন্তি অত্তনো অসপ্পাযং।
421.Yanti yaṃ vatthu, agganti paṭhamabhāgaṃ. Asappāyanti attano asappāyaṃ.
হিয্যোতি অতীতানন্তরাহনি। অঞ্ঞস্মিন্তি ভিক্খুনীহি অঞ্ঞস্মিং। ‘‘ভিক্খুনীহী’’তি পদং ‘‘পটিগ্গাহাপেত্ৰা’’তি পদে কারিতকম্মং। হীতি সচ্চং, যস্মা ৰা।
Hiyyoti atītānantarāhani. Aññasminti bhikkhunīhi aññasmiṃ. ‘‘Bhikkhunīhī’’ti padaṃ ‘‘paṭiggāhāpetvā’’ti pade kāritakammaṃ. Hīti saccaṃ, yasmā vā.
৪২৬. ‘‘ভোজনকাল’’ন্তি ইমিনা ‘‘কালং ৰীতিনামেসু’’ন্তি এত্থ কালৰিসেসং দস্সেতি।
426. ‘‘Bhojanakāla’’nti iminā ‘‘kālaṃ vītināmesu’’nti ettha kālavisesaṃ dasseti.
পুরেতি আদিম্হি। তাসন্তি অট্ঠন্নং ভিক্খুনীনং। অব্ভন্তরিমাতি অব্ভন্তরে পরিযাপন্না। অঞ্ঞাতি অট্ঠহি ভিক্খুনীহি অঞ্ঞা। নৰকতরা হোতীতি সম্বন্ধো। ‘‘ঠপেত্ৰা ভত্তগ্গ’’ন্তি ইমিনা অঞ্ঞত্থ সব্বত্থ যথাৰুড্ঢং ন পটিবাহিতব্বন্তি এত্থ অঞ্ঞসদ্দস্স অপাদানং দস্সেতি। অঞ্ঞস্মিন্তি এত্থ স্মিংৰচনেন ত্থপচ্চযস্স অত্থং দস্সেতি। ‘‘চতুপচ্চযভাজনীযট্ঠানে’’তি ইমিনা সরূপং দস্সেতি।
Pureti ādimhi. Tāsanti aṭṭhannaṃ bhikkhunīnaṃ. Abbhantarimāti abbhantare pariyāpannā. Aññāti aṭṭhahi bhikkhunīhi aññā. Navakatarā hotīti sambandho. ‘‘Ṭhapetvā bhattagga’’nti iminā aññattha sabbattha yathāvuḍḍhaṃ na paṭibāhitabbanti ettha aññasaddassa apādānaṃ dasseti. Aññasminti ettha smiṃvacanena tthapaccayassa atthaṃ dasseti. ‘‘Catupaccayabhājanīyaṭṭhāne’’ti iminā sarūpaṃ dasseti.
৪৩০. দূতেনপি উপসম্পাদেতুন্তি এত্থ কিং সব্বথা দূতেন উপসম্পদা ৰট্টতীতি আহ ‘‘দূতেন…পে॰… ৰট্টতী’’তি। যেন কেনচি অন্তরাযেনাতি সম্বন্ধো, অসতি অন্তরাযে ন ৰট্টতীতি অধিপ্পাযো। কম্মৰাচাপরিযোসানে উপসম্পন্নাৰ হোতীতি সম্বন্ধো। তাৰদেৰাতি উপসম্পন্নক্খণেযেৰ।
430.Dūtenapi upasampādetunti ettha kiṃ sabbathā dūtena upasampadā vaṭṭatīti āha ‘‘dūtena…pe… vaṭṭatī’’ti. Yena kenaci antarāyenāti sambandho, asati antarāye na vaṭṭatīti adhippāyo. Kammavācāpariyosāne upasampannāva hotīti sambandho. Tāvadevāti upasampannakkhaṇeyeva.
৪৩১. নৰকম্মম্পীতি পিসদ্দো উদোসিতউপস্সযে অপেক্খতি।
431.Navakammampīti pisaddo udositaupassaye apekkhati.
৪৩২. তস্সাতি তস্সা ইত্থিযা। যাৰ সো দারকো ৰিঞ্ঞুতং পাপুণাতীতি এত্থ কথং ৰিঞ্ঞুভাৰো গহেতব্বোতি আহ ‘‘যাৰ খাদিতু’’ন্তিআদি।
432.Tassāti tassā itthiyā. Yāva so dārako viññutaṃ pāpuṇātīti ettha kathaṃ viññubhāvo gahetabboti āha ‘‘yāva khāditu’’ntiādi.
ঠপেত্ৰা সাগারন্তি এত্থ সকারো সহসদ্দকারিযো, অগারন্তি চ সেয্যাগারন্তি দস্সেন্তো আহ ‘‘সহাগারসেয্যমত্তং ঠপেত্ৰা’’তি। যথা অঞ্ঞস্মিং পুরিসে পটিপজ্জিতব্বং, এৰং তথাতি যোজনা। ‘‘অঞ্ঞস্মি’’ন্তি ইমিনা পাল়িযং অঞ্ঞে পুরিসেতি এত্থ স্মিংৰচনস্স সব্বনামতো একারাদেসো দস্সিতো, তংদস্সনেন চ কচ্চাযনে (কচ্চাযনে ১১০ সুত্তে) সব্বনামতো স্মিংৰচনস্স একারাদেসনিসেধনং অনিচ্চন্তি দস্সেতি।
Ṭhapetvā sāgāranti ettha sakāro sahasaddakāriyo, agāranti ca seyyāgāranti dassento āha ‘‘sahāgāraseyyamattaṃ ṭhapetvā’’ti. Yathā aññasmiṃ purise paṭipajjitabbaṃ, evaṃ tathāti yojanā. ‘‘Aññasmi’’nti iminā pāḷiyaṃ aññe puriseti ettha smiṃvacanassa sabbanāmato ekārādeso dassito, taṃdassanena ca kaccāyane (kaccāyane 110 sutte) sabbanāmato smiṃvacanassa ekārādesanisedhanaṃ aniccanti dasseti.
৪৩৪. ‘‘যদেৰ সা ৰিব্ভন্তা’’তি ইমিনা দস্সেতীতি সম্বন্ধো। ‘‘যস্মা’’তি ইমিনা যদেৰাতি এত্থ যংসদ্দস্স কারণত্থং দস্সেতি। ওদাতানি ৰত্থানি নিৰত্থাতি সম্বন্ধো। ‘‘তস্মাযেৰা’’তি ইমিনা তদেৰাতি পদস্স কারণত্থমেৰ দস্সেতি। ‘‘ন সিক্খাপচ্চক্খানেনা’’তি ইমিনা এৰত্থফলং দস্সেতি। সা পুন উপসম্পদং ন লভতীতি সা ৰিব্ভন্তা ভিক্খুনী পুন উপসম্পদং ন লভতি।
434.‘‘Yadeva sā vibbhantā’’ti iminā dassetīti sambandho. ‘‘Yasmā’’ti iminā yadevāti ettha yaṃsaddassa kāraṇatthaṃ dasseti. Odātāni vatthāni nivatthāti sambandho. ‘‘Tasmāyevā’’ti iminā tadevāti padassa kāraṇatthameva dasseti. ‘‘Na sikkhāpaccakkhānenā’’ti iminā evatthaphalaṃ dasseti. Sā puna upasampadaṃ na labhatīti sā vibbhantā bhikkhunī puna upasampadaṃ na labhati.
পব্বজ্জম্পি ন লভতীতি তিত্থাযতনসঙ্কন্তা ভিক্খুনী পব্বজ্জম্পি ন লভতি, পগেৰ উপসম্পদং।
Pabbajjampi na labhatīti titthāyatanasaṅkantā bhikkhunī pabbajjampi na labhati, pageva upasampadaṃ.
পাদে সম্বাহন্তাতি ভিক্খুনীনং পাদে সম্বাহন্তা। কেসেতি ভিক্খুনীনং কেসে। তত্রাতি ‘‘কুক্কুচ্চযন্তা ন সাদিযন্তী’’তি ৰচনে। একে আচরিযা ৰদন্তীতি সম্বন্ধো। সারত্তা হোন্তীতি যোজনা। এত্থাতি পুরিসানং অভিৰাদনাদীসু। ইদন্তি পুরিসানং অভিৰাদনাদি, ‘‘অনুঞ্ঞাত’’ন্তি পদে ৰুত্তকম্মং ‘‘ৰট্টতী’’তি পদে ৰুত্তকত্তা। অথ ৰা ওদিস্স অনুঞ্ঞাতং ইদং পুরিসানং অভিৰাদনাদি ৰট্টতীতি যোজনা। এৰঞ্হি সতি ‘‘ওদিস্স অনুঞ্ঞাত’’ন্তি পদং হেতুঅন্তোগধৰিসেসনং, ওদিস্স অনুঞ্ঞাতত্তা ৰট্টতীতি অধিপ্পাযো। তন্তি অট্ঠকথাসু ৰুত্তৰচনং। হীতি সচ্চং, যস্মা ৰা।
Pāde sambāhantāti bhikkhunīnaṃ pāde sambāhantā. Keseti bhikkhunīnaṃ kese. Tatrāti ‘‘kukkuccayantā na sādiyantī’’ti vacane. Eke ācariyā vadantīti sambandho. Sārattā hontīti yojanā. Etthāti purisānaṃ abhivādanādīsu. Idanti purisānaṃ abhivādanādi, ‘‘anuññāta’’nti pade vuttakammaṃ ‘‘vaṭṭatī’’ti pade vuttakattā. Atha vā odissa anuññātaṃ idaṃ purisānaṃ abhivādanādi vaṭṭatīti yojanā. Evañhi sati ‘‘odissa anuññāta’’nti padaṃ hetuantogadhavisesanaṃ, odissa anuññātattā vaṭṭatīti adhippāyo. Tanti aṭṭhakathāsu vuttavacanaṃ. Hīti saccaṃ, yasmā vā.
৪৩৫. পল্লঙ্কেন নিসীদন্তীতি এত্থ আসনপল্লঙ্কং পটিক্খিপন্তো আহ ‘‘পল্লঙ্কং আভুজিত্ৰা নিসীদন্তী’’তি। তত্থ আভুজিত্ৰাতি আবন্ধিত্ৰা। কূপোতি ৰচ্চকূপো। উপরীতি কূপতো উপরি। ‘‘সব্বদিসাসু পঞ্ঞাযতী’’তি ইমিনা পটিচ্ছন্নমেৰ অত্থি, ন উপরি ছন্নন্তি দস্সেতি।
435.Pallaṅkena nisīdantīti ettha āsanapallaṅkaṃ paṭikkhipanto āha ‘‘pallaṅkaṃ ābhujitvā nisīdantī’’ti. Tattha ābhujitvāti ābandhitvā. Kūpoti vaccakūpo. Uparīti kūpato upari. ‘‘Sabbadisāsu paññāyatī’’ti iminā paṭicchannameva atthi, na upari channanti dasseti.
৪৩৬. কুণ্ডকন্তি কণং। এত্থাতি ভিক্খুনিক্খন্ধকে।
436.Kuṇḍakanti kaṇaṃ. Etthāti bhikkhunikkhandhake.
ইতি ভিক্খুনিক্খন্ধকৰণ্ণনায যোজনা সমত্তা।
Iti bhikkhunikkhandhakavaṇṇanāya yojanā samattā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi
ভিক্খুনীউপসম্পদানুজাননং • Bhikkhunīupasampadānujānanaṃ
২. দুতিযভাণৰারো • 2. Dutiyabhāṇavāro
৩. ততিযভাণৰারো • 3. Tatiyabhāṇavāro
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / ভিক্খুনীউপসম্পদানুজাননকথা • Bhikkhunīupasampadānujānanakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ভিক্খুনীউপসম্পন্নানুজাননকথাৰণ্ণনা • Bhikkhunīupasampannānujānanakathāvaṇṇanā
