| Library / Tipiṭaka / д̇ибидага • Tipiṭaka / баажид̇яаад̣̇ияож̇анаабаал̣и • Pācityādiyojanāpāḷi |
бхигкунийубасамбад̣̇аануж̇аананагат̇аа
Bhikkhunīupasampadānujānanakathā
404. имааяа анубан̃н̃ад̇д̇ияаад̇и махаабаж̇аабад̇ияаа адтаг̇аруд̇хаммабадиг̇г̇ахан̣уубасамбад̣̇ам̣ убанид̇хааяа аяам̣ бан̃н̃ад̇д̇и анубан̃н̃ад̇д̇и наама, д̇ааяа анубан̃н̃ад̇д̇ияаа убасамбаад̣̇зд̇унд̇и ад̇т̇о. махаабаж̇аабад̇ияаа сад̣̇д̇хивихааринияо гад̇ваад̇и махаабаж̇аабад̇им̣ убаж̇жхам̣ гад̇ваа бан̃жасад̇аа саагияаанияо д̇ассаа сад̣̇д̇хивихааринияо гад̇ваад̇и ад̇т̇о. ид̇ийд̇и д̇асмаа ахзсунд̇и самб̣анд̇хо. иминаа оваад̣̇знаад̇и бхаг̇авад̇о иминаа оваад̣̇зна.
404.Imāya anupaññattiyāti mahāpajāpatiyā aṭṭhagarudhammapaṭiggahaṇūpasampadaṃ upanidhāya ayaṃ paññatti anupaññatti nāma, tāya anupaññattiyā upasampādetunti attho. Mahāpajāpatiyā saddhivihāriniyo katvāti mahāpajāpatiṃ upajjhaṃ katvā pañcasatā sākiyāniyo tassā saddhivihāriniyo katvāti attho. Itīti tasmā ahesunti sambandho. Iminā ovādenāti bhagavato iminā ovādena.
410. зд̇иссаад̇и зд̇иссаа бхигкунияаа. д̇анд̇и гаммам̣. ан̃н̃асминд̇и ан̃н̃асмим̣ гаммз. ан̃н̃анд̇и робид̇аб̣б̣агаммад̇о ан̃н̃ам̣ гаммам̣.
410.Etissāti etissā bhikkhuniyā. Tanti kammaṃ. Aññasminti aññasmiṃ kamme. Aññanti ropitabbakammato aññaṃ kammaṃ.
411. гад̣̇д̣̇амод̣̇агзнаад̇и гад̣̇д̣̇амзна аалул̣ид̇зна уд̣̇агзнзва. гад̣̇д̣̇амаад̣̇ийсубийд̇и бийсад̣̇д̣̇о ‘‘язна гзнажий’’д̇и зд̇т̇а яож̇зд̇аб̣б̣о. язна гзнажибийд̇и хи ад̇т̇о. саннибад̇ид̇ваад̇и бхигкунисан̇гхзна саннибад̇ид̇ваа. абасаад̣̇анийяанд̇и абасаад̣̇зд̇аб̣б̣ам̣ гаммам̣. зд̇д̇аавад̇аад̇и зд̇д̇агзна сааванамад̇д̇зна. аванд̣̇ияод̇и на ванд̣̇зд̇аб̣б̣о, ванд̣̇ид̇ум̣ на араход̇и ад̇т̇о. д̇ад̇од̇и д̇игкад̇д̇ум̣ саавзд̇аб̣б̣ад̇о. на ванд̣̇анд̇ийд̇и бхигкунияо на ванд̣̇анд̇и. д̣̇исваабийд̇и д̇ам̣ бхигкум̣ д̣̇исвааби. д̇зна бхигкунаад̇и абасаад̣̇анийяам̣ д̣̇ассзнд̇зна бхигкунаа, камаабзд̇аб̣б̣анд̇и самб̣анд̇хо. вихаарзязваад̇и бхигкуунам̣ вихаарзязва. д̇зна бхигкунаад̇и убасан̇гамид̇аб̣б̣зна бхигкунаа, вад̇д̇аб̣б̣анд̇и самб̣анд̇хо. д̇ад̇од̇и вад̇д̇аб̣б̣агаалад̇о. сод̇и абасаад̣̇анийяам̣ д̣̇ассзнд̇о бхигку. зд̇т̇аад̇и бхигкунигканд̇хагз. гаммавибхан̇г̇зд̇и бариваараавасаанз гаммаанам̣ вибхан̇г̇адтаанз (бари. адта. 495-496).
411.Kaddamodakenāti kaddamena āluḷitena udakeneva. Kaddamādīsupīti pīsaddo ‘‘yena kenacī’’ti ettha yojetabbo. Yena kenacipīti hi attho. Sannipatitvāti bhikkhunisaṅghena sannipatitvā. Apasādanīyanti apasādetabbaṃ kammaṃ. Ettāvatāti ettakena sāvanamattena. Avandiyoti na vandetabbo, vandituṃ na arahoti attho. Tatoti tikkhattuṃ sāvetabbato. Na vandantīti bhikkhuniyo na vandanti. Disvāpīti taṃ bhikkhuṃ disvāpi. Tena bhikkhunāti apasādanīyaṃ dassentena bhikkhunā, khamāpetabbanti sambandho. Vihāreyevāti bhikkhūnaṃ vihāreyeva. Tena bhikkhunāti upasaṅkamitabbena bhikkhunā, vattabbanti sambandho. Tatoti vattabbakālato. Soti apasādanīyaṃ dassento bhikkhu. Etthāti bhikkhunikkhandhake. Kammavibhaṅgeti parivārāvasāne kammānaṃ vibhaṅgaṭṭhāne (pari. aṭṭha. 495-496).
обхаасанд̇ийд̇и ава хийнзна бхаасанд̇ийд̇и д̣̇ассзнд̇о ааха ‘‘асад̣̇д̇хаммзна обхаасанд̇ий’’д̇и. ‘‘бхигкунийхи сад̣̇д̇хим̣ самбаяож̇знд̇ий’’д̇и зд̇т̇а гаммагаран̣з д̣̇ассзнд̇о ааха ‘‘бурисз асад̣̇д̇хаммзнаа’’д̇и. зд̇т̇а ‘‘бурисз’’д̇и иминаа гаммам̣ д̣̇ассзд̇и, ‘‘асад̣̇д̇хаммзнаа’’д̇и иминаа гаран̣ам̣. вихаараббавзсанзд̇и бхигкуунам̣ вихаараббавзсанз. оваад̣̇ам̣ табзд̇унд̇и зд̇т̇а оваад̣̇адтабанаагаарам̣ д̣̇ассзнд̇о ааха ‘‘на бхигкунубассаяа’’нд̇иаад̣̇и. оваад̣̇ад̇т̇ааяаад̇и оваад̣̇абадиг̇г̇ахан̣ад̇т̇ааяа. маа гарид̇т̇аад̇и маа гарзяяаат̇а.
Obhāsantīti ava hīnena bhāsantīti dassento āha ‘‘asaddhammena obhāsantī’’ti. ‘‘Bhikkhunīhi saddhiṃ sampayojentī’’ti ettha kammakaraṇe dassento āha ‘‘purise asaddhammenā’’ti. Ettha ‘‘purise’’ti iminā kammaṃ dasseti, ‘‘asaddhammenā’’ti iminā karaṇaṃ. Vihārappavesaneti bhikkhūnaṃ vihārappavesane. Ovādaṃ ṭhapetunti ettha ovādaṭṭhapanākāraṃ dassento āha ‘‘na bhikkhunupassaya’’ntiādi. Ovādatthāyāti ovādapaṭiggahaṇatthāya. Mā karitthāti mā kareyyātha.
416. г̇ихид̣̇ааригааяод̇и г̇ихибхууд̇аа д̣̇ааригааяо б̣анд̇ханд̇и вияаад̇и яож̇анаа. гханабаддагзнаад̇и гханабхууд̇зна баддзна нияуд̇д̇зна. згабарияаганд̇и зд̇т̇а згаваарам̣ гадияам̣ баригкибид̇ваа гад̇ам̣ гааяаб̣анд̇ханам̣ згабарияаганд̇и д̣̇ассзнд̇о ааха ‘‘згаваарам̣ баригкибанага’’нд̇и. д̇ад̇т̇а баригкибанаганд̇и гадияам̣ баригкибанаарахам̣.
416.Gihidārikāyoti gihibhūtā dārikāyo bandhanti viyāti yojanā. Ghanapaṭṭakenāti ghanabhūtena paṭṭena niyuttena. Ekapariyakanti ettha ekavāraṃ kaṭiyaṃ parikkhipitvā kataṃ kāyabandhanaṃ ekapariyakanti dassento āha ‘‘ekavāraṃ parikkhipanaka’’nti. Tattha parikkhipanakanti kaṭiyaṃ parikkhipanārahaṃ.
вилийвзнаад̇и зд̇т̇а б̣ахуд̇т̇з згаважананд̇и ааха ‘‘сан̣хзхи вилийвзхий’’д̇и. ‘‘гад̇абаддзнаа’’д̇и иминаа баал̣ияам̣ ‘‘гад̇знаа’’д̇и баатасзсам̣ д̣̇ассзд̇и. сзд̇авад̇т̇абаддзнаад̇и сзд̇авад̇т̇зна гад̇зна баддзна. гад̇авзн̣ияаад̇и гад̇ааяа взн̣ияаа. иминаа д̣̇уссзна гад̇аа взн̣и д̣̇уссавзн̣ийд̇и важанад̇т̇ам̣ д̣̇ассзд̇и. зсзва наяо буримабажчимабад̣̇зсуби. жол̣агаасааванд̇и жол̣амзва гасаавзна рад̇д̇ад̇д̇аа жол̣агаасаавам̣.
Vilīvenāti ettha bahutthe ekavacananti āha ‘‘saṇhehi vilīvehī’’ti. ‘‘Katapaṭṭenā’’ti iminā pāḷiyaṃ ‘‘katenā’’ti pāṭhasesaṃ dasseti. Setavatthapaṭṭenāti setavatthena katena paṭṭena. Kataveṇiyāti katāya veṇiyā. Iminā dussena katā veṇi dussaveṇīti vacanatthaṃ dasseti. Eseva nayo purimapacchimapadesupi. Coḷakāsāvanti coḷameva kasāvena rattattā coḷakāsāvaṃ.
адтиллзнаад̇и ад̣̇д̣̇зна адтинаа. ‘‘г̇ож̇ан̇гхадтигз’’д̇и иминаа адтино самб̣анд̇хам̣ д̣̇ассзд̇и. хад̇т̇ам̣ годдаабзнд̇ийд̇и зд̇т̇а хад̇т̇ам̣ наама аг̇г̇аб̣аахамзваад̇хиббзд̇ам̣, на габбарад̇о бадтааяаад̇и д̣̇ассзнд̇о ааха ‘‘аг̇г̇аб̣ааха’’нд̇и. бидтихад̇т̇анд̇и хад̇т̇абидтим̣. бидтибаад̣̇анд̇и баад̣̇абидтим̣.
Aṭṭhillenāti addena aṭṭhinā. ‘‘Gojaṅghaṭṭhike’’ti iminā aṭṭhino sambandhaṃ dasseti. Hatthaṃ koṭṭāpentīti ettha hatthaṃ nāma aggabāhamevādhippetaṃ, na kapparato paṭṭhāyāti dassento āha ‘‘aggabāha’’nti. Piṭṭhihatthanti hatthapiṭṭhiṃ. Piṭṭhipādanti pādapiṭṭhiṃ.
417. вуд̇д̇анаяаанзваад̇и чаб̣б̣аг̇г̇ияаанам̣ мукалимбанаад̣̇ийсу (жуул̣ава. адта. 247) вуд̇д̇анаяаанзва. ан̇г̇ад̣̇зсзд̇и сарийраббад̣̇зсз. г̇ан̣д̣аббад̣̇зсзд̇и габолаббад̣̇зсз. саалогз д̇идтанд̇ийд̇и зд̇т̇а сам̣виж̇ж̇ад̇и аалого зд̇т̇аад̇и саалоганд̇и гад̇ваа д̣̇ваарам̣ г̇ахзд̇аб̣б̣ам̣. д̇зна вуд̇д̇ам̣ ‘‘д̣̇ваарам̣ виварид̇ваа’’д̇и. вудтаабзнд̇ийд̇и убасамбаад̣̇знд̇и. суунам̣ табзнд̇ийд̇и зд̇т̇а суунаасад̣̇д̣̇о мам̣сабарияааяод̇и ааха ‘‘мам̣сам̣ виггин̣анд̇ий’’д̇и. д̇знаад̇и д̣̇аасзна. ид̣̇ам̣ бад̣̇ам̣ ‘‘гаарзнд̇ий’’д̇и бад̣̇з гаарид̇агаммам̣. ‘‘харид̇аган̃жзва багган̃жаа’’д̇и иминаа харид̇агабаггиганд̇и бад̣̇асса д̣̇ванд̣̇аваагяам̣ д̣̇ассзд̇и. д̇ад̇т̇а харид̇аганд̇и харид̇амзва бан̣н̣ам̣. багганд̇и сзд̣̇ид̇ам̣ бан̣н̣ам̣.
417.Vuttanayānevāti chabbaggiyānaṃ mukhalimpanādīsu (cūḷava. aṭṭha. 247) vuttanayāneva. Aṅgadeseti sarīrappadese. Gaṇḍappadeseti kapolappadese. Sāloke tiṭṭhantīti ettha saṃvijjati āloko etthāti sālokanti katvā dvāraṃ gahetabbaṃ. Tena vuttaṃ ‘‘dvāraṃ vivaritvā’’ti. Vuṭṭhāpentīti upasampādenti. Sūnaṃ ṭhapentīti ettha sūnāsaddo maṃsapariyāyoti āha ‘‘maṃsaṃ vikkiṇantī’’ti. Tenāti dāsena. Idaṃ padaṃ ‘‘kārentī’’ti pade kāritakammaṃ. ‘‘Haritakañceva pakkañcā’’ti iminā haritakapakkikanti padassa dvandavākyaṃ dasseti. Tattha haritakanti haritameva paṇṇaṃ. Pakkanti seditaṃ paṇṇaṃ.
418. гат̇ид̇ааязваад̇и жийварагканд̇хагз гат̇ид̇ааязва.
418.Kathitāyevāti cīvarakkhandhake kathitāyeva.
419. баал̣имуд̇д̇агавинижчаяод̇и баал̣ияам̣ вуд̇д̇авинижчаяад̇о муд̇д̇о винижчаяо. баал̣имуд̇д̇агавинижчаяам̣ вид̇т̇аарзнд̇о ааха ‘‘сажз хий’’д̇иаад̣̇и. яо гожи гаалам̣ гаронд̇о вад̣̇ад̇ийд̇и самб̣анд̇хо. мамажжаязнаад̇и мама ад̇иггамзна. ан̃н̃ассаад̇и вуд̇д̇зхи убаж̇жхааяаад̣̇ийхи ан̃н̃асса . д̇зсанд̇и убаж̇жхааяаад̣̇ийнам̣. на ход̇ийд̇и баригкааро на ход̇и. хийд̇и сажжам̣, яасмаа ваа. ажжаяад̣̇аананд̇и ажжаязна ход̇ууд̇и д̣̇аанам̣. на рухад̇ийд̇и бан̃жаннам̣ сахад̇хаммигаанам̣ баб̣б̣аж̇ид̇асса ваа г̇ахадтасса ваа яасса гассажи ажжаяад̣̇аанам̣ д̇зсам̣ на рухад̇и, сан̇гхассзва рухад̇ийд̇и ад̇хиббааяо. г̇ихийнам̣ бана ажжаяад̣̇аананд̇и самб̣анд̇хо. рухад̇ийд̇и г̇ихийнам̣ баб̣б̣аж̇ид̇асса ваа г̇ахадтасса ваа яасса гассажи ажжаяад̣̇аанам̣ д̇зсам̣ рухад̇и, д̇зсам̣язва санд̇аго ход̇ийд̇и ад̇хиббааяо.
419.Pāḷimuttakavinicchayoti pāḷiyaṃ vuttavinicchayato mutto vinicchayo. Pāḷimuttakavinicchayaṃ vitthārento āha ‘‘sace hī’’tiādi. Yo koci kālaṃ karonto vadatīti sambandho. Mamaccayenāti mama atikkamena. Aññassāti vuttehi upajjhāyādīhi aññassa . Tesanti upajjhāyādīnaṃ. Na hotīti parikkhāro na hoti. Hīti saccaṃ, yasmā vā. Accayadānanti accayena hotūti dānaṃ. Na ruhatīti pañcannaṃ sahadhammikānaṃ pabbajitassa vā gahaṭṭhassa vā yassa kassaci accayadānaṃ tesaṃ na ruhati, saṅghasseva ruhatīti adhippāyo. Gihīnaṃ pana accayadānanti sambandho. Ruhatīti gihīnaṃ pabbajitassa vā gahaṭṭhassa vā yassa kassaci accayadānaṃ tesaṃ ruhati, tesaṃyeva santako hotīti adhippāyo.
420. бураан̣амаллийд̇и зд̇т̇а малласса бхарияаа маллий, бураан̣з маллий бураан̣амаллийд̇и д̣̇ассзнд̇о ааха ‘‘бураан̣з’’д̇иаад̣̇и. ‘‘г̇ихигаалз’’д̇и иминаа ‘‘бураан̣з’’д̇и зд̇т̇а н̣абажжаяасса саруубам̣ д̣̇ассзд̇и. маллассаад̇и мудтималласса. бурисаб̣яан̃ж̇ананд̇и зд̇т̇а б̣яан̃ж̇анасад̣̇д̣̇о нимид̇д̇абарияааяод̇и ааха ‘‘бурисанимид̇д̇а’’нд̇и. жид̇д̇анд̇и рааг̇ажид̇д̇ам̣.
420.Purāṇamallīti ettha mallassa bhariyā mallī, purāṇe mallī purāṇamallīti dassento āha ‘‘purāṇe’’tiādi. ‘‘Gihikāle’’ti iminā ‘‘purāṇe’’ti ettha ṇapaccayassa sarūpaṃ dasseti. Mallassāti muṭṭhimallassa. Purisabyañjananti ettha byañjanasaddo nimittapariyāyoti āha ‘‘purisanimitta’’nti. Cittanti rāgacittaṃ.
421. яанд̇и яам̣ вад̇т̇у, аг̇г̇анд̇и батамабхааг̇ам̣. асаббааяанд̇и ад̇д̇ано асаббааяам̣.
421.Yanti yaṃ vatthu, agganti paṭhamabhāgaṃ. Asappāyanti attano asappāyaṃ.
хияяод̇и ад̇ийд̇аананд̇араахани. ан̃н̃асминд̇и бхигкунийхи ан̃н̃асмим̣. ‘‘бхигкунийхий’’д̇и бад̣̇ам̣ ‘‘бадиг̇г̇аахаабзд̇ваа’’д̇и бад̣̇з гаарид̇агаммам̣. хийд̇и сажжам̣, яасмаа ваа.
Hiyyoti atītānantarāhani. Aññasminti bhikkhunīhi aññasmiṃ. ‘‘Bhikkhunīhī’’ti padaṃ ‘‘paṭiggāhāpetvā’’ti pade kāritakammaṃ. Hīti saccaṃ, yasmā vā.
426. ‘‘бхож̇анагаала’’нд̇и иминаа ‘‘гаалам̣ вийд̇инаамзсу’’нд̇и зд̇т̇а гаалависзсам̣ д̣̇ассзд̇и.
426. ‘‘Bhojanakāla’’nti iminā ‘‘kālaṃ vītināmesu’’nti ettha kālavisesaṃ dasseti.
бурзд̇и аад̣̇имхи. д̇аасанд̇и адтаннам̣ бхигкунийнам̣. аб̣бханд̇аримаад̇и аб̣бханд̇арз барияаабаннаа. ан̃н̃аад̇и адтахи бхигкунийхи ан̃н̃аа. навагад̇араа ход̇ийд̇и самб̣анд̇хо. ‘‘табзд̇ваа бхад̇д̇аг̇г̇а’’нд̇и иминаа ан̃н̃ад̇т̇а саб̣б̣ад̇т̇а яат̇аавуд̣дхам̣ на бадиб̣аахид̇аб̣б̣анд̇и зд̇т̇а ан̃н̃асад̣̇д̣̇асса абаад̣̇аанам̣ д̣̇ассзд̇и. ан̃н̃асминд̇и зд̇т̇а смим̣важанзна д̇т̇абажжаяасса ад̇т̇ам̣ д̣̇ассзд̇и. ‘‘жад̇убажжаяабхааж̇анийяадтаанз’’д̇и иминаа саруубам̣ д̣̇ассзд̇и.
Pureti ādimhi. Tāsanti aṭṭhannaṃ bhikkhunīnaṃ. Abbhantarimāti abbhantare pariyāpannā. Aññāti aṭṭhahi bhikkhunīhi aññā. Navakatarā hotīti sambandho. ‘‘Ṭhapetvā bhattagga’’nti iminā aññattha sabbattha yathāvuḍḍhaṃ na paṭibāhitabbanti ettha aññasaddassa apādānaṃ dasseti. Aññasminti ettha smiṃvacanena tthapaccayassa atthaṃ dasseti. ‘‘Catupaccayabhājanīyaṭṭhāne’’ti iminā sarūpaṃ dasseti.
430. д̣̇ууд̇знаби убасамбаад̣̇зд̇унд̇и зд̇т̇а гим̣ саб̣б̣ат̇аа д̣̇ууд̇зна убасамбад̣̇аа ваддад̇ийд̇и ааха ‘‘д̣̇ууд̇зна…бз… ваддад̇ий’’д̇и. язна гзнажи анд̇арааязнаад̇и самб̣анд̇хо, асад̇и анд̇арааяз на ваддад̇ийд̇и ад̇хиббааяо. гаммаваажаабарияосаанз убасамбаннаава ход̇ийд̇и самб̣анд̇хо. д̇аавад̣̇зваад̇и убасамбаннагкан̣зязва.
430.Dūtenapi upasampādetunti ettha kiṃ sabbathā dūtena upasampadā vaṭṭatīti āha ‘‘dūtena…pe… vaṭṭatī’’ti. Yena kenaci antarāyenāti sambandho, asati antarāye na vaṭṭatīti adhippāyo. Kammavācāpariyosāne upasampannāva hotīti sambandho. Tāvadevāti upasampannakkhaṇeyeva.
431. навагаммамбийд̇и бисад̣̇д̣̇о уд̣̇осид̇аубассаяз абзгкад̇и.
431.Navakammampīti pisaddo udositaupassaye apekkhati.
432. д̇ассаад̇и д̇ассаа ид̇т̇ияаа. яаава со д̣̇аараго вин̃н̃уд̇ам̣ баабун̣аад̇ийд̇и зд̇т̇а гат̇ам̣ вин̃н̃убхааво г̇ахзд̇аб̣б̣од̇и ааха ‘‘яаава каад̣̇ид̇у’’нд̇иаад̣̇и.
432.Tassāti tassā itthiyā. Yāva so dārako viññutaṃ pāpuṇātīti ettha kathaṃ viññubhāvo gahetabboti āha ‘‘yāva khāditu’’ntiādi.
табзд̇ваа сааг̇ааранд̇и зд̇т̇а сагааро сахасад̣̇д̣̇агаарияо, аг̇ааранд̇и жа сзяяааг̇ааранд̇и д̣̇ассзнд̇о ааха ‘‘сахааг̇аарасзяяамад̇д̇ам̣ табзд̇ваа’’д̇и. яат̇аа ан̃н̃асмим̣ бурисз бадибаж̇ж̇ид̇аб̣б̣ам̣, звам̣ д̇ат̇аад̇и яож̇анаа. ‘‘ан̃н̃асми’’нд̇и иминаа баал̣ияам̣ ан̃н̃з бурисзд̇и зд̇т̇а смим̣важанасса саб̣б̣анаамад̇о згаараад̣̇зсо д̣̇ассид̇о, д̇ам̣д̣̇ассанзна жа гажжааяанз (гажжааяанз 110 суд̇д̇з) саб̣б̣анаамад̇о смим̣важанасса згаараад̣̇зсанисзд̇ханам̣ анижжанд̇и д̣̇ассзд̇и.
Ṭhapetvā sāgāranti ettha sakāro sahasaddakāriyo, agāranti ca seyyāgāranti dassento āha ‘‘sahāgāraseyyamattaṃ ṭhapetvā’’ti. Yathā aññasmiṃ purise paṭipajjitabbaṃ, evaṃ tathāti yojanā. ‘‘Aññasmi’’nti iminā pāḷiyaṃ aññe puriseti ettha smiṃvacanassa sabbanāmato ekārādeso dassito, taṃdassanena ca kaccāyane (kaccāyane 110 sutte) sabbanāmato smiṃvacanassa ekārādesanisedhanaṃ aniccanti dasseti.
434. ‘‘яад̣̇зва саа виб̣бханд̇аа’’д̇и иминаа д̣̇ассзд̇ийд̇и самб̣анд̇хо. ‘‘яасмаа’’д̇и иминаа яад̣̇зваад̇и зд̇т̇а яам̣сад̣̇д̣̇асса гааран̣ад̇т̇ам̣ д̣̇ассзд̇и. од̣̇аад̇аани вад̇т̇аани нивад̇т̇аад̇и самб̣анд̇хо. ‘‘д̇асмааязваа’’д̇и иминаа д̇ад̣̇зваад̇и бад̣̇асса гааран̣ад̇т̇амзва д̣̇ассзд̇и. ‘‘на сигкаабажжагкаанзнаа’’д̇и иминаа звад̇т̇апалам̣ д̣̇ассзд̇и. саа буна убасамбад̣̇ам̣ на лабхад̇ийд̇и саа виб̣бханд̇аа бхигкуний буна убасамбад̣̇ам̣ на лабхад̇и.
434.‘‘Yadeva sā vibbhantā’’ti iminā dassetīti sambandho. ‘‘Yasmā’’ti iminā yadevāti ettha yaṃsaddassa kāraṇatthaṃ dasseti. Odātāni vatthāni nivatthāti sambandho. ‘‘Tasmāyevā’’ti iminā tadevāti padassa kāraṇatthameva dasseti. ‘‘Na sikkhāpaccakkhānenā’’ti iminā evatthaphalaṃ dasseti. Sā puna upasampadaṃ na labhatīti sā vibbhantā bhikkhunī puna upasampadaṃ na labhati.
баб̣б̣аж̇ж̇амби на лабхад̇ийд̇и д̇ид̇т̇ааяад̇анасан̇ганд̇аа бхигкуний баб̣б̣аж̇ж̇амби на лабхад̇и, баг̇зва убасамбад̣̇ам̣.
Pabbajjampi na labhatīti titthāyatanasaṅkantā bhikkhunī pabbajjampi na labhati, pageva upasampadaṃ.
баад̣̇з самб̣ааханд̇аад̇и бхигкунийнам̣ баад̣̇з самб̣ааханд̇аа. гзсзд̇и бхигкунийнам̣ гзсз. д̇ад̇раад̇и ‘‘гуггужжаяанд̇аа на саад̣̇ияанд̇ий’’д̇и важанз. згз аажарияаа вад̣̇анд̇ийд̇и самб̣анд̇хо. саарад̇д̇аа хонд̇ийд̇и яож̇анаа. зд̇т̇аад̇и бурисаанам̣ абхиваад̣̇анаад̣̇ийсу. ид̣̇анд̇и бурисаанам̣ абхиваад̣̇анаад̣̇и, ‘‘анун̃н̃аад̇а’’нд̇и бад̣̇з вуд̇д̇агаммам̣ ‘‘ваддад̇ий’’д̇и бад̣̇з вуд̇д̇агад̇д̇аа. ат̇а ваа од̣̇исса анун̃н̃аад̇ам̣ ид̣̇ам̣ бурисаанам̣ абхиваад̣̇анаад̣̇и ваддад̇ийд̇и яож̇анаа. зван̃хи сад̇и ‘‘од̣̇исса анун̃н̃аад̇а’’нд̇и бад̣̇ам̣ хзд̇уанд̇ог̇ад̇хависзсанам̣, од̣̇исса анун̃н̃аад̇ад̇д̇аа ваддад̇ийд̇и ад̇хиббааяо. д̇анд̇и адтагат̇аасу вуд̇д̇аважанам̣. хийд̇и сажжам̣, яасмаа ваа.
Pāde sambāhantāti bhikkhunīnaṃ pāde sambāhantā. Keseti bhikkhunīnaṃ kese. Tatrāti ‘‘kukkuccayantā na sādiyantī’’ti vacane. Eke ācariyā vadantīti sambandho. Sārattā hontīti yojanā. Etthāti purisānaṃ abhivādanādīsu. Idanti purisānaṃ abhivādanādi, ‘‘anuññāta’’nti pade vuttakammaṃ ‘‘vaṭṭatī’’ti pade vuttakattā. Atha vā odissa anuññātaṃ idaṃ purisānaṃ abhivādanādi vaṭṭatīti yojanā. Evañhi sati ‘‘odissa anuññāta’’nti padaṃ hetuantogadhavisesanaṃ, odissa anuññātattā vaṭṭatīti adhippāyo. Tanti aṭṭhakathāsu vuttavacanaṃ. Hīti saccaṃ, yasmā vā.
435. баллан̇гзна нисийд̣̇анд̇ийд̇и зд̇т̇а аасанабаллан̇гам̣ бадигкибанд̇о ааха ‘‘баллан̇гам̣ аабхуж̇ид̇ваа нисийд̣̇анд̇ий’’д̇и. д̇ад̇т̇а аабхуж̇ид̇ваад̇и ааб̣анд̇хид̇ваа. гуубод̇и важжагуубо. убарийд̇и гуубад̇о убари. ‘‘саб̣б̣ад̣̇исаасу бан̃н̃ааяад̇ий’’д̇и иминаа бадижчаннамзва ад̇т̇и, на убари чаннанд̇и д̣̇ассзд̇и.
435.Pallaṅkena nisīdantīti ettha āsanapallaṅkaṃ paṭikkhipanto āha ‘‘pallaṅkaṃ ābhujitvā nisīdantī’’ti. Tattha ābhujitvāti ābandhitvā. Kūpoti vaccakūpo. Uparīti kūpato upari. ‘‘Sabbadisāsu paññāyatī’’ti iminā paṭicchannameva atthi, na upari channanti dasseti.
436. гун̣д̣аганд̇и ган̣ам̣. зд̇т̇аад̇и бхигкунигканд̇хагз.
436.Kuṇḍakanti kaṇaṃ. Etthāti bhikkhunikkhandhake.
ид̇и бхигкунигканд̇хагаван̣н̣анааяа яож̇анаа самад̇д̇аа.
Iti bhikkhunikkhandhakavaṇṇanāya yojanā samattā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / жуул̣аваг̇г̇абаал̣и • Cūḷavaggapāḷi
бхигкунийубасамбад̣̇аануж̇аананам̣ • Bhikkhunīupasampadānujānanaṃ
2. д̣̇уд̇ияабхаан̣авааро • 2. Dutiyabhāṇavāro
3. д̇ад̇ияабхаан̣авааро • 3. Tatiyabhāṇavāro
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / жуул̣аваг̇г̇а-адтагат̇аа • Cūḷavagga-aṭṭhakathā / бхигкунийубасамбад̣̇аануж̇аананагат̇аа • Bhikkhunīupasampadānujānanakathā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / бхигкунийубасамбаннаануж̇аананагат̇ааван̣н̣анаа • Bhikkhunīupasampannānujānanakathāvaṇṇanā
