| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
ಭಿಕ್ಖುನೀಉಪಸಮ್ಪದಾನುಜಾನನಕಥಾ
Bhikkhunīupasampadānujānanakathā
೪೦೪. ಇಮಾಯ ಅನುಪಞ್ಞತ್ತಿಯಾತಿ ಮಹಾಪಜಾಪತಿಯಾ ಅಟ್ಠಗರುಧಮ್ಮಪಟಿಗ್ಗಹಣೂಪಸಮ್ಪದಂ ಉಪನಿಧಾಯ ಅಯಂ ಪಞ್ಞತ್ತಿ ಅನುಪಞ್ಞತ್ತಿ ನಾಮ, ತಾಯ ಅನುಪಞ್ಞತ್ತಿಯಾ ಉಪಸಮ್ಪಾದೇತುನ್ತಿ ಅತ್ಥೋ। ಮಹಾಪಜಾಪತಿಯಾ ಸದ್ಧಿವಿಹಾರಿನಿಯೋ ಕತ್ವಾತಿ ಮಹಾಪಜಾಪತಿಂ ಉಪಜ್ಝಂ ಕತ್ವಾ ಪಞ್ಚಸತಾ ಸಾಕಿಯಾನಿಯೋ ತಸ್ಸಾ ಸದ್ಧಿವಿಹಾರಿನಿಯೋ ಕತ್ವಾತಿ ಅತ್ಥೋ। ಇತೀತಿ ತಸ್ಮಾ ಅಹೇಸುನ್ತಿ ಸಮ್ಬನ್ಧೋ। ಇಮಿನಾ ಓವಾದೇನಾತಿ ಭಗವತೋ ಇಮಿನಾ ಓವಾದೇನ।
404.Imāya anupaññattiyāti mahāpajāpatiyā aṭṭhagarudhammapaṭiggahaṇūpasampadaṃ upanidhāya ayaṃ paññatti anupaññatti nāma, tāya anupaññattiyā upasampādetunti attho. Mahāpajāpatiyā saddhivihāriniyo katvāti mahāpajāpatiṃ upajjhaṃ katvā pañcasatā sākiyāniyo tassā saddhivihāriniyo katvāti attho. Itīti tasmā ahesunti sambandho. Iminā ovādenāti bhagavato iminā ovādena.
೪೧೦. ಏತಿಸ್ಸಾತಿ ಏತಿಸ್ಸಾ ಭಿಕ್ಖುನಿಯಾ। ತನ್ತಿ ಕಮ್ಮಂ। ಅಞ್ಞಸ್ಮಿನ್ತಿ ಅಞ್ಞಸ್ಮಿಂ ಕಮ್ಮೇ। ಅಞ್ಞನ್ತಿ ರೋಪಿತಬ್ಬಕಮ್ಮತೋ ಅಞ್ಞಂ ಕಮ್ಮಂ।
410.Etissāti etissā bhikkhuniyā. Tanti kammaṃ. Aññasminti aññasmiṃ kamme. Aññanti ropitabbakammato aññaṃ kammaṃ.
೪೧೧. ಕದ್ದಮೋದಕೇನಾತಿ ಕದ್ದಮೇನ ಆಲುಳಿತೇನ ಉದಕೇನೇವ। ಕದ್ದಮಾದೀಸುಪೀತಿ ಪೀಸದ್ದೋ ‘‘ಯೇನ ಕೇನಚೀ’’ತಿ ಏತ್ಥ ಯೋಜೇತಬ್ಬೋ। ಯೇನ ಕೇನಚಿಪೀತಿ ಹಿ ಅತ್ಥೋ। ಸನ್ನಿಪತಿತ್ವಾತಿ ಭಿಕ್ಖುನಿಸಙ್ಘೇನ ಸನ್ನಿಪತಿತ್ವಾ। ಅಪಸಾದನೀಯನ್ತಿ ಅಪಸಾದೇತಬ್ಬಂ ಕಮ್ಮಂ। ಏತ್ತಾವತಾತಿ ಏತ್ತಕೇನ ಸಾವನಮತ್ತೇನ। ಅವನ್ದಿಯೋತಿ ನ ವನ್ದೇತಬ್ಬೋ, ವನ್ದಿತುಂ ನ ಅರಹೋತಿ ಅತ್ಥೋ। ತತೋತಿ ತಿಕ್ಖತ್ತುಂ ಸಾವೇತಬ್ಬತೋ। ನ ವನ್ದನ್ತೀತಿ ಭಿಕ್ಖುನಿಯೋ ನ ವನ್ದನ್ತಿ। ದಿಸ್ವಾಪೀತಿ ತಂ ಭಿಕ್ಖುಂ ದಿಸ್ವಾಪಿ। ತೇನ ಭಿಕ್ಖುನಾತಿ ಅಪಸಾದನೀಯಂ ದಸ್ಸೇನ್ತೇನ ಭಿಕ್ಖುನಾ, ಖಮಾಪೇತಬ್ಬನ್ತಿ ಸಮ್ಬನ್ಧೋ। ವಿಹಾರೇಯೇವಾತಿ ಭಿಕ್ಖೂನಂ ವಿಹಾರೇಯೇವ। ತೇನ ಭಿಕ್ಖುನಾತಿ ಉಪಸಙ್ಕಮಿತಬ್ಬೇನ ಭಿಕ್ಖುನಾ, ವತ್ತಬ್ಬನ್ತಿ ಸಮ್ಬನ್ಧೋ। ತತೋತಿ ವತ್ತಬ್ಬಕಾಲತೋ। ಸೋತಿ ಅಪಸಾದನೀಯಂ ದಸ್ಸೇನ್ತೋ ಭಿಕ್ಖು। ಏತ್ಥಾತಿ ಭಿಕ್ಖುನಿಕ್ಖನ್ಧಕೇ। ಕಮ್ಮವಿಭಙ್ಗೇತಿ ಪರಿವಾರಾವಸಾನೇ ಕಮ್ಮಾನಂ ವಿಭಙ್ಗಟ್ಠಾನೇ (ಪರಿ॰ ಅಟ್ಠ॰ ೪೯೫-೪೯೬)।
411.Kaddamodakenāti kaddamena āluḷitena udakeneva. Kaddamādīsupīti pīsaddo ‘‘yena kenacī’’ti ettha yojetabbo. Yena kenacipīti hi attho. Sannipatitvāti bhikkhunisaṅghena sannipatitvā. Apasādanīyanti apasādetabbaṃ kammaṃ. Ettāvatāti ettakena sāvanamattena. Avandiyoti na vandetabbo, vandituṃ na arahoti attho. Tatoti tikkhattuṃ sāvetabbato. Na vandantīti bhikkhuniyo na vandanti. Disvāpīti taṃ bhikkhuṃ disvāpi. Tena bhikkhunāti apasādanīyaṃ dassentena bhikkhunā, khamāpetabbanti sambandho. Vihāreyevāti bhikkhūnaṃ vihāreyeva. Tena bhikkhunāti upasaṅkamitabbena bhikkhunā, vattabbanti sambandho. Tatoti vattabbakālato. Soti apasādanīyaṃ dassento bhikkhu. Etthāti bhikkhunikkhandhake. Kammavibhaṅgeti parivārāvasāne kammānaṃ vibhaṅgaṭṭhāne (pari. aṭṭha. 495-496).
ಓಭಾಸನ್ತೀತಿ ಅವ ಹೀನೇನ ಭಾಸನ್ತೀತಿ ದಸ್ಸೇನ್ತೋ ಆಹ ‘‘ಅಸದ್ಧಮ್ಮೇನ ಓಭಾಸನ್ತೀ’’ತಿ। ‘‘ಭಿಕ್ಖುನೀಹಿ ಸದ್ಧಿಂ ಸಮ್ಪಯೋಜೇನ್ತೀ’’ತಿ ಏತ್ಥ ಕಮ್ಮಕರಣೇ ದಸ್ಸೇನ್ತೋ ಆಹ ‘‘ಪುರಿಸೇ ಅಸದ್ಧಮ್ಮೇನಾ’’ತಿ। ಏತ್ಥ ‘‘ಪುರಿಸೇ’’ತಿ ಇಮಿನಾ ಕಮ್ಮಂ ದಸ್ಸೇತಿ, ‘‘ಅಸದ್ಧಮ್ಮೇನಾ’’ತಿ ಇಮಿನಾ ಕರಣಂ। ವಿಹಾರಪ್ಪವೇಸನೇತಿ ಭಿಕ್ಖೂನಂ ವಿಹಾರಪ್ಪವೇಸನೇ। ಓವಾದಂ ಠಪೇತುನ್ತಿ ಏತ್ಥ ಓವಾದಟ್ಠಪನಾಕಾರಂ ದಸ್ಸೇನ್ತೋ ಆಹ ‘‘ನ ಭಿಕ್ಖುನುಪಸ್ಸಯ’’ನ್ತಿಆದಿ। ಓವಾದತ್ಥಾಯಾತಿ ಓವಾದಪಟಿಗ್ಗಹಣತ್ಥಾಯ। ಮಾ ಕರಿತ್ಥಾತಿ ಮಾ ಕರೇಯ್ಯಾಥ।
Obhāsantīti ava hīnena bhāsantīti dassento āha ‘‘asaddhammena obhāsantī’’ti. ‘‘Bhikkhunīhi saddhiṃ sampayojentī’’ti ettha kammakaraṇe dassento āha ‘‘purise asaddhammenā’’ti. Ettha ‘‘purise’’ti iminā kammaṃ dasseti, ‘‘asaddhammenā’’ti iminā karaṇaṃ. Vihārappavesaneti bhikkhūnaṃ vihārappavesane. Ovādaṃ ṭhapetunti ettha ovādaṭṭhapanākāraṃ dassento āha ‘‘na bhikkhunupassaya’’ntiādi. Ovādatthāyāti ovādapaṭiggahaṇatthāya. Mā karitthāti mā kareyyātha.
೪೧೬. ಗಿಹಿದಾರಿಕಾಯೋತಿ ಗಿಹಿಭೂತಾ ದಾರಿಕಾಯೋ ಬನ್ಧನ್ತಿ ವಿಯಾತಿ ಯೋಜನಾ। ಘನಪಟ್ಟಕೇನಾತಿ ಘನಭೂತೇನ ಪಟ್ಟೇನ ನಿಯುತ್ತೇನ। ಏಕಪರಿಯಕನ್ತಿ ಏತ್ಥ ಏಕವಾರಂ ಕಟಿಯಂ ಪರಿಕ್ಖಿಪಿತ್ವಾ ಕತಂ ಕಾಯಬನ್ಧನಂ ಏಕಪರಿಯಕನ್ತಿ ದಸ್ಸೇನ್ತೋ ಆಹ ‘‘ಏಕವಾರಂ ಪರಿಕ್ಖಿಪನಕ’’ನ್ತಿ। ತತ್ಥ ಪರಿಕ್ಖಿಪನಕನ್ತಿ ಕಟಿಯಂ ಪರಿಕ್ಖಿಪನಾರಹಂ।
416.Gihidārikāyoti gihibhūtā dārikāyo bandhanti viyāti yojanā. Ghanapaṭṭakenāti ghanabhūtena paṭṭena niyuttena. Ekapariyakanti ettha ekavāraṃ kaṭiyaṃ parikkhipitvā kataṃ kāyabandhanaṃ ekapariyakanti dassento āha ‘‘ekavāraṃ parikkhipanaka’’nti. Tattha parikkhipanakanti kaṭiyaṃ parikkhipanārahaṃ.
ವಿಲೀವೇನಾತಿ ಏತ್ಥ ಬಹುತ್ಥೇ ಏಕವಚನನ್ತಿ ಆಹ ‘‘ಸಣ್ಹೇಹಿ ವಿಲೀವೇಹೀ’’ತಿ। ‘‘ಕತಪಟ್ಟೇನಾ’’ತಿ ಇಮಿನಾ ಪಾಳಿಯಂ ‘‘ಕತೇನಾ’’ತಿ ಪಾಠಸೇಸಂ ದಸ್ಸೇತಿ। ಸೇತವತ್ಥಪಟ್ಟೇನಾತಿ ಸೇತವತ್ಥೇನ ಕತೇನ ಪಟ್ಟೇನ। ಕತವೇಣಿಯಾತಿ ಕತಾಯ ವೇಣಿಯಾ। ಇಮಿನಾ ದುಸ್ಸೇನ ಕತಾ ವೇಣಿ ದುಸ್ಸವೇಣೀತಿ ವಚನತ್ಥಂ ದಸ್ಸೇತಿ। ಏಸೇವ ನಯೋ ಪುರಿಮಪಚ್ಛಿಮಪದೇಸುಪಿ। ಚೋಳಕಾಸಾವನ್ತಿ ಚೋಳಮೇವ ಕಸಾವೇನ ರತ್ತತ್ತಾ ಚೋಳಕಾಸಾವಂ।
Vilīvenāti ettha bahutthe ekavacananti āha ‘‘saṇhehi vilīvehī’’ti. ‘‘Katapaṭṭenā’’ti iminā pāḷiyaṃ ‘‘katenā’’ti pāṭhasesaṃ dasseti. Setavatthapaṭṭenāti setavatthena katena paṭṭena. Kataveṇiyāti katāya veṇiyā. Iminā dussena katā veṇi dussaveṇīti vacanatthaṃ dasseti. Eseva nayo purimapacchimapadesupi. Coḷakāsāvanti coḷameva kasāvena rattattā coḷakāsāvaṃ.
ಅಟ್ಠಿಲ್ಲೇನಾತಿ ಅದ್ದೇನ ಅಟ್ಠಿನಾ। ‘‘ಗೋಜಙ್ಘಟ್ಠಿಕೇ’’ತಿ ಇಮಿನಾ ಅಟ್ಠಿನೋ ಸಮ್ಬನ್ಧಂ ದಸ್ಸೇತಿ। ಹತ್ಥಂ ಕೋಟ್ಟಾಪೇನ್ತೀತಿ ಏತ್ಥ ಹತ್ಥಂ ನಾಮ ಅಗ್ಗಬಾಹಮೇವಾಧಿಪ್ಪೇತಂ, ನ ಕಪ್ಪರತೋ ಪಟ್ಠಾಯಾತಿ ದಸ್ಸೇನ್ತೋ ಆಹ ‘‘ಅಗ್ಗಬಾಹ’’ನ್ತಿ। ಪಿಟ್ಠಿಹತ್ಥನ್ತಿ ಹತ್ಥಪಿಟ್ಠಿಂ। ಪಿಟ್ಠಿಪಾದನ್ತಿ ಪಾದಪಿಟ್ಠಿಂ।
Aṭṭhillenāti addena aṭṭhinā. ‘‘Gojaṅghaṭṭhike’’ti iminā aṭṭhino sambandhaṃ dasseti. Hatthaṃ koṭṭāpentīti ettha hatthaṃ nāma aggabāhamevādhippetaṃ, na kapparato paṭṭhāyāti dassento āha ‘‘aggabāha’’nti. Piṭṭhihatthanti hatthapiṭṭhiṃ. Piṭṭhipādanti pādapiṭṭhiṃ.
೪೧೭. ವುತ್ತನಯಾನೇವಾತಿ ಛಬ್ಬಗ್ಗಿಯಾನಂ ಮುಖಲಿಮ್ಪನಾದೀಸು (ಚೂಳವ॰ ಅಟ್ಠ॰ ೨೪೭) ವುತ್ತನಯಾನೇವ। ಅಙ್ಗದೇಸೇತಿ ಸರೀರಪ್ಪದೇಸೇ। ಗಣ್ಡಪ್ಪದೇಸೇತಿ ಕಪೋಲಪ್ಪದೇಸೇ। ಸಾಲೋಕೇ ತಿಟ್ಠನ್ತೀತಿ ಏತ್ಥ ಸಂವಿಜ್ಜತಿ ಆಲೋಕೋ ಏತ್ಥಾತಿ ಸಾಲೋಕನ್ತಿ ಕತ್ವಾ ದ್ವಾರಂ ಗಹೇತಬ್ಬಂ। ತೇನ ವುತ್ತಂ ‘‘ದ್ವಾರಂ ವಿವರಿತ್ವಾ’’ತಿ। ವುಟ್ಠಾಪೇನ್ತೀತಿ ಉಪಸಮ್ಪಾದೇನ್ತಿ। ಸೂನಂ ಠಪೇನ್ತೀತಿ ಏತ್ಥ ಸೂನಾಸದ್ದೋ ಮಂಸಪರಿಯಾಯೋತಿ ಆಹ ‘‘ಮಂಸಂ ವಿಕ್ಕಿಣನ್ತೀ’’ತಿ। ತೇನಾತಿ ದಾಸೇನ। ಇದಂ ಪದಂ ‘‘ಕಾರೇನ್ತೀ’’ತಿ ಪದೇ ಕಾರಿತಕಮ್ಮಂ। ‘‘ಹರಿತಕಞ್ಚೇವ ಪಕ್ಕಞ್ಚಾ’’ತಿ ಇಮಿನಾ ಹರಿತಕಪಕ್ಕಿಕನ್ತಿ ಪದಸ್ಸ ದ್ವನ್ದವಾಕ್ಯಂ ದಸ್ಸೇತಿ। ತತ್ಥ ಹರಿತಕನ್ತಿ ಹರಿತಮೇವ ಪಣ್ಣಂ। ಪಕ್ಕನ್ತಿ ಸೇದಿತಂ ಪಣ್ಣಂ।
417.Vuttanayānevāti chabbaggiyānaṃ mukhalimpanādīsu (cūḷava. aṭṭha. 247) vuttanayāneva. Aṅgadeseti sarīrappadese. Gaṇḍappadeseti kapolappadese. Sāloke tiṭṭhantīti ettha saṃvijjati āloko etthāti sālokanti katvā dvāraṃ gahetabbaṃ. Tena vuttaṃ ‘‘dvāraṃ vivaritvā’’ti. Vuṭṭhāpentīti upasampādenti. Sūnaṃ ṭhapentīti ettha sūnāsaddo maṃsapariyāyoti āha ‘‘maṃsaṃ vikkiṇantī’’ti. Tenāti dāsena. Idaṃ padaṃ ‘‘kārentī’’ti pade kāritakammaṃ. ‘‘Haritakañceva pakkañcā’’ti iminā haritakapakkikanti padassa dvandavākyaṃ dasseti. Tattha haritakanti haritameva paṇṇaṃ. Pakkanti seditaṃ paṇṇaṃ.
೪೧೮. ಕಥಿತಾಯೇವಾತಿ ಚೀವರಕ್ಖನ್ಧಕೇ ಕಥಿತಾಯೇವ।
418.Kathitāyevāti cīvarakkhandhake kathitāyeva.
೪೧೯. ಪಾಳಿಮುತ್ತಕವಿನಿಚ್ಛಯೋತಿ ಪಾಳಿಯಂ ವುತ್ತವಿನಿಚ್ಛಯತೋ ಮುತ್ತೋ ವಿನಿಚ್ಛಯೋ। ಪಾಳಿಮುತ್ತಕವಿನಿಚ್ಛಯಂ ವಿತ್ಥಾರೇನ್ತೋ ಆಹ ‘‘ಸಚೇ ಹೀ’’ತಿಆದಿ। ಯೋ ಕೋಚಿ ಕಾಲಂ ಕರೋನ್ತೋ ವದತೀತಿ ಸಮ್ಬನ್ಧೋ। ಮಮಚ್ಚಯೇನಾತಿ ಮಮ ಅತಿಕ್ಕಮೇನ। ಅಞ್ಞಸ್ಸಾತಿ ವುತ್ತೇಹಿ ಉಪಜ್ಝಾಯಾದೀಹಿ ಅಞ್ಞಸ್ಸ । ತೇಸನ್ತಿ ಉಪಜ್ಝಾಯಾದೀನಂ। ನ ಹೋತೀತಿ ಪರಿಕ್ಖಾರೋ ನ ಹೋತಿ। ಹೀತಿ ಸಚ್ಚಂ, ಯಸ್ಮಾ ವಾ। ಅಚ್ಚಯದಾನನ್ತಿ ಅಚ್ಚಯೇನ ಹೋತೂತಿ ದಾನಂ। ನ ರುಹತೀತಿ ಪಞ್ಚನ್ನಂ ಸಹಧಮ್ಮಿಕಾನಂ ಪಬ್ಬಜಿತಸ್ಸ ವಾ ಗಹಟ್ಠಸ್ಸ ವಾ ಯಸ್ಸ ಕಸ್ಸಚಿ ಅಚ್ಚಯದಾನಂ ತೇಸಂ ನ ರುಹತಿ, ಸಙ್ಘಸ್ಸೇವ ರುಹತೀತಿ ಅಧಿಪ್ಪಾಯೋ। ಗಿಹೀನಂ ಪನ ಅಚ್ಚಯದಾನನ್ತಿ ಸಮ್ಬನ್ಧೋ। ರುಹತೀತಿ ಗಿಹೀನಂ ಪಬ್ಬಜಿತಸ್ಸ ವಾ ಗಹಟ್ಠಸ್ಸ ವಾ ಯಸ್ಸ ಕಸ್ಸಚಿ ಅಚ್ಚಯದಾನಂ ತೇಸಂ ರುಹತಿ, ತೇಸಂಯೇವ ಸನ್ತಕೋ ಹೋತೀತಿ ಅಧಿಪ್ಪಾಯೋ।
419.Pāḷimuttakavinicchayoti pāḷiyaṃ vuttavinicchayato mutto vinicchayo. Pāḷimuttakavinicchayaṃ vitthārento āha ‘‘sace hī’’tiādi. Yo koci kālaṃ karonto vadatīti sambandho. Mamaccayenāti mama atikkamena. Aññassāti vuttehi upajjhāyādīhi aññassa . Tesanti upajjhāyādīnaṃ. Na hotīti parikkhāro na hoti. Hīti saccaṃ, yasmā vā. Accayadānanti accayena hotūti dānaṃ. Na ruhatīti pañcannaṃ sahadhammikānaṃ pabbajitassa vā gahaṭṭhassa vā yassa kassaci accayadānaṃ tesaṃ na ruhati, saṅghasseva ruhatīti adhippāyo. Gihīnaṃ pana accayadānanti sambandho. Ruhatīti gihīnaṃ pabbajitassa vā gahaṭṭhassa vā yassa kassaci accayadānaṃ tesaṃ ruhati, tesaṃyeva santako hotīti adhippāyo.
೪೨೦. ಪುರಾಣಮಲ್ಲೀತಿ ಏತ್ಥ ಮಲ್ಲಸ್ಸ ಭರಿಯಾ ಮಲ್ಲೀ, ಪುರಾಣೇ ಮಲ್ಲೀ ಪುರಾಣಮಲ್ಲೀತಿ ದಸ್ಸೇನ್ತೋ ಆಹ ‘‘ಪುರಾಣೇ’’ತಿಆದಿ। ‘‘ಗಿಹಿಕಾಲೇ’’ತಿ ಇಮಿನಾ ‘‘ಪುರಾಣೇ’’ತಿ ಏತ್ಥ ಣಪಚ್ಚಯಸ್ಸ ಸರೂಪಂ ದಸ್ಸೇತಿ। ಮಲ್ಲಸ್ಸಾತಿ ಮುಟ್ಠಿಮಲ್ಲಸ್ಸ। ಪುರಿಸಬ್ಯಞ್ಜನನ್ತಿ ಏತ್ಥ ಬ್ಯಞ್ಜನಸದ್ದೋ ನಿಮಿತ್ತಪರಿಯಾಯೋತಿ ಆಹ ‘‘ಪುರಿಸನಿಮಿತ್ತ’’ನ್ತಿ। ಚಿತ್ತನ್ತಿ ರಾಗಚಿತ್ತಂ।
420.Purāṇamallīti ettha mallassa bhariyā mallī, purāṇe mallī purāṇamallīti dassento āha ‘‘purāṇe’’tiādi. ‘‘Gihikāle’’ti iminā ‘‘purāṇe’’ti ettha ṇapaccayassa sarūpaṃ dasseti. Mallassāti muṭṭhimallassa. Purisabyañjananti ettha byañjanasaddo nimittapariyāyoti āha ‘‘purisanimitta’’nti. Cittanti rāgacittaṃ.
೪೨೧. ಯನ್ತಿ ಯಂ ವತ್ಥು, ಅಗ್ಗನ್ತಿ ಪಠಮಭಾಗಂ। ಅಸಪ್ಪಾಯನ್ತಿ ಅತ್ತನೋ ಅಸಪ್ಪಾಯಂ।
421.Yanti yaṃ vatthu, agganti paṭhamabhāgaṃ. Asappāyanti attano asappāyaṃ.
ಹಿಯ್ಯೋತಿ ಅತೀತಾನನ್ತರಾಹನಿ। ಅಞ್ಞಸ್ಮಿನ್ತಿ ಭಿಕ್ಖುನೀಹಿ ಅಞ್ಞಸ್ಮಿಂ। ‘‘ಭಿಕ್ಖುನೀಹೀ’’ತಿ ಪದಂ ‘‘ಪಟಿಗ್ಗಾಹಾಪೇತ್ವಾ’’ತಿ ಪದೇ ಕಾರಿತಕಮ್ಮಂ। ಹೀತಿ ಸಚ್ಚಂ, ಯಸ್ಮಾ ವಾ।
Hiyyoti atītānantarāhani. Aññasminti bhikkhunīhi aññasmiṃ. ‘‘Bhikkhunīhī’’ti padaṃ ‘‘paṭiggāhāpetvā’’ti pade kāritakammaṃ. Hīti saccaṃ, yasmā vā.
೪೨೬. ‘‘ಭೋಜನಕಾಲ’’ನ್ತಿ ಇಮಿನಾ ‘‘ಕಾಲಂ ವೀತಿನಾಮೇಸು’’ನ್ತಿ ಏತ್ಥ ಕಾಲವಿಸೇಸಂ ದಸ್ಸೇತಿ।
426. ‘‘Bhojanakāla’’nti iminā ‘‘kālaṃ vītināmesu’’nti ettha kālavisesaṃ dasseti.
ಪುರೇತಿ ಆದಿಮ್ಹಿ। ತಾಸನ್ತಿ ಅಟ್ಠನ್ನಂ ಭಿಕ್ಖುನೀನಂ। ಅಬ್ಭನ್ತರಿಮಾತಿ ಅಬ್ಭನ್ತರೇ ಪರಿಯಾಪನ್ನಾ। ಅಞ್ಞಾತಿ ಅಟ್ಠಹಿ ಭಿಕ್ಖುನೀಹಿ ಅಞ್ಞಾ। ನವಕತರಾ ಹೋತೀತಿ ಸಮ್ಬನ್ಧೋ। ‘‘ಠಪೇತ್ವಾ ಭತ್ತಗ್ಗ’’ನ್ತಿ ಇಮಿನಾ ಅಞ್ಞತ್ಥ ಸಬ್ಬತ್ಥ ಯಥಾವುಡ್ಢಂ ನ ಪಟಿಬಾಹಿತಬ್ಬನ್ತಿ ಏತ್ಥ ಅಞ್ಞಸದ್ದಸ್ಸ ಅಪಾದಾನಂ ದಸ್ಸೇತಿ। ಅಞ್ಞಸ್ಮಿನ್ತಿ ಏತ್ಥ ಸ್ಮಿಂವಚನೇನ ತ್ಥಪಚ್ಚಯಸ್ಸ ಅತ್ಥಂ ದಸ್ಸೇತಿ। ‘‘ಚತುಪಚ್ಚಯಭಾಜನೀಯಟ್ಠಾನೇ’’ತಿ ಇಮಿನಾ ಸರೂಪಂ ದಸ್ಸೇತಿ।
Pureti ādimhi. Tāsanti aṭṭhannaṃ bhikkhunīnaṃ. Abbhantarimāti abbhantare pariyāpannā. Aññāti aṭṭhahi bhikkhunīhi aññā. Navakatarā hotīti sambandho. ‘‘Ṭhapetvā bhattagga’’nti iminā aññattha sabbattha yathāvuḍḍhaṃ na paṭibāhitabbanti ettha aññasaddassa apādānaṃ dasseti. Aññasminti ettha smiṃvacanena tthapaccayassa atthaṃ dasseti. ‘‘Catupaccayabhājanīyaṭṭhāne’’ti iminā sarūpaṃ dasseti.
೪೩೦. ದೂತೇನಪಿ ಉಪಸಮ್ಪಾದೇತುನ್ತಿ ಏತ್ಥ ಕಿಂ ಸಬ್ಬಥಾ ದೂತೇನ ಉಪಸಮ್ಪದಾ ವಟ್ಟತೀತಿ ಆಹ ‘‘ದೂತೇನ…ಪೇ॰… ವಟ್ಟತೀ’’ತಿ। ಯೇನ ಕೇನಚಿ ಅನ್ತರಾಯೇನಾತಿ ಸಮ್ಬನ್ಧೋ, ಅಸತಿ ಅನ್ತರಾಯೇ ನ ವಟ್ಟತೀತಿ ಅಧಿಪ್ಪಾಯೋ। ಕಮ್ಮವಾಚಾಪರಿಯೋಸಾನೇ ಉಪಸಮ್ಪನ್ನಾವ ಹೋತೀತಿ ಸಮ್ಬನ್ಧೋ। ತಾವದೇವಾತಿ ಉಪಸಮ್ಪನ್ನಕ್ಖಣೇಯೇವ।
430.Dūtenapi upasampādetunti ettha kiṃ sabbathā dūtena upasampadā vaṭṭatīti āha ‘‘dūtena…pe… vaṭṭatī’’ti. Yena kenaci antarāyenāti sambandho, asati antarāye na vaṭṭatīti adhippāyo. Kammavācāpariyosāne upasampannāva hotīti sambandho. Tāvadevāti upasampannakkhaṇeyeva.
೪೩೧. ನವಕಮ್ಮಮ್ಪೀತಿ ಪಿಸದ್ದೋ ಉದೋಸಿತಉಪಸ್ಸಯೇ ಅಪೇಕ್ಖತಿ।
431.Navakammampīti pisaddo udositaupassaye apekkhati.
೪೩೨. ತಸ್ಸಾತಿ ತಸ್ಸಾ ಇತ್ಥಿಯಾ। ಯಾವ ಸೋ ದಾರಕೋ ವಿಞ್ಞುತಂ ಪಾಪುಣಾತೀತಿ ಏತ್ಥ ಕಥಂ ವಿಞ್ಞುಭಾವೋ ಗಹೇತಬ್ಬೋತಿ ಆಹ ‘‘ಯಾವ ಖಾದಿತು’’ನ್ತಿಆದಿ।
432.Tassāti tassā itthiyā. Yāva so dārako viññutaṃ pāpuṇātīti ettha kathaṃ viññubhāvo gahetabboti āha ‘‘yāva khāditu’’ntiādi.
ಠಪೇತ್ವಾ ಸಾಗಾರನ್ತಿ ಏತ್ಥ ಸಕಾರೋ ಸಹಸದ್ದಕಾರಿಯೋ, ಅಗಾರನ್ತಿ ಚ ಸೇಯ್ಯಾಗಾರನ್ತಿ ದಸ್ಸೇನ್ತೋ ಆಹ ‘‘ಸಹಾಗಾರಸೇಯ್ಯಮತ್ತಂ ಠಪೇತ್ವಾ’’ತಿ। ಯಥಾ ಅಞ್ಞಸ್ಮಿಂ ಪುರಿಸೇ ಪಟಿಪಜ್ಜಿತಬ್ಬಂ, ಏವಂ ತಥಾತಿ ಯೋಜನಾ। ‘‘ಅಞ್ಞಸ್ಮಿ’’ನ್ತಿ ಇಮಿನಾ ಪಾಳಿಯಂ ಅಞ್ಞೇ ಪುರಿಸೇತಿ ಏತ್ಥ ಸ್ಮಿಂವಚನಸ್ಸ ಸಬ್ಬನಾಮತೋ ಏಕಾರಾದೇಸೋ ದಸ್ಸಿತೋ, ತಂದಸ್ಸನೇನ ಚ ಕಚ್ಚಾಯನೇ (ಕಚ್ಚಾಯನೇ ೧೧೦ ಸುತ್ತೇ) ಸಬ್ಬನಾಮತೋ ಸ್ಮಿಂವಚನಸ್ಸ ಏಕಾರಾದೇಸನಿಸೇಧನಂ ಅನಿಚ್ಚನ್ತಿ ದಸ್ಸೇತಿ।
Ṭhapetvā sāgāranti ettha sakāro sahasaddakāriyo, agāranti ca seyyāgāranti dassento āha ‘‘sahāgāraseyyamattaṃ ṭhapetvā’’ti. Yathā aññasmiṃ purise paṭipajjitabbaṃ, evaṃ tathāti yojanā. ‘‘Aññasmi’’nti iminā pāḷiyaṃ aññe puriseti ettha smiṃvacanassa sabbanāmato ekārādeso dassito, taṃdassanena ca kaccāyane (kaccāyane 110 sutte) sabbanāmato smiṃvacanassa ekārādesanisedhanaṃ aniccanti dasseti.
೪೩೪. ‘‘ಯದೇವ ಸಾ ವಿಬ್ಭನ್ತಾ’’ತಿ ಇಮಿನಾ ದಸ್ಸೇತೀತಿ ಸಮ್ಬನ್ಧೋ। ‘‘ಯಸ್ಮಾ’’ತಿ ಇಮಿನಾ ಯದೇವಾತಿ ಏತ್ಥ ಯಂಸದ್ದಸ್ಸ ಕಾರಣತ್ಥಂ ದಸ್ಸೇತಿ। ಓದಾತಾನಿ ವತ್ಥಾನಿ ನಿವತ್ಥಾತಿ ಸಮ್ಬನ್ಧೋ। ‘‘ತಸ್ಮಾಯೇವಾ’’ತಿ ಇಮಿನಾ ತದೇವಾತಿ ಪದಸ್ಸ ಕಾರಣತ್ಥಮೇವ ದಸ್ಸೇತಿ। ‘‘ನ ಸಿಕ್ಖಾಪಚ್ಚಕ್ಖಾನೇನಾ’’ತಿ ಇಮಿನಾ ಏವತ್ಥಫಲಂ ದಸ್ಸೇತಿ। ಸಾ ಪುನ ಉಪಸಮ್ಪದಂ ನ ಲಭತೀತಿ ಸಾ ವಿಬ್ಭನ್ತಾ ಭಿಕ್ಖುನೀ ಪುನ ಉಪಸಮ್ಪದಂ ನ ಲಭತಿ।
434.‘‘Yadeva sā vibbhantā’’ti iminā dassetīti sambandho. ‘‘Yasmā’’ti iminā yadevāti ettha yaṃsaddassa kāraṇatthaṃ dasseti. Odātāni vatthāni nivatthāti sambandho. ‘‘Tasmāyevā’’ti iminā tadevāti padassa kāraṇatthameva dasseti. ‘‘Na sikkhāpaccakkhānenā’’ti iminā evatthaphalaṃ dasseti. Sā puna upasampadaṃ na labhatīti sā vibbhantā bhikkhunī puna upasampadaṃ na labhati.
ಪಬ್ಬಜ್ಜಮ್ಪಿ ನ ಲಭತೀತಿ ತಿತ್ಥಾಯತನಸಙ್ಕನ್ತಾ ಭಿಕ್ಖುನೀ ಪಬ್ಬಜ್ಜಮ್ಪಿ ನ ಲಭತಿ, ಪಗೇವ ಉಪಸಮ್ಪದಂ।
Pabbajjampi na labhatīti titthāyatanasaṅkantā bhikkhunī pabbajjampi na labhati, pageva upasampadaṃ.
ಪಾದೇ ಸಮ್ಬಾಹನ್ತಾತಿ ಭಿಕ್ಖುನೀನಂ ಪಾದೇ ಸಮ್ಬಾಹನ್ತಾ। ಕೇಸೇತಿ ಭಿಕ್ಖುನೀನಂ ಕೇಸೇ। ತತ್ರಾತಿ ‘‘ಕುಕ್ಕುಚ್ಚಯನ್ತಾ ನ ಸಾದಿಯನ್ತೀ’’ತಿ ವಚನೇ। ಏಕೇ ಆಚರಿಯಾ ವದನ್ತೀತಿ ಸಮ್ಬನ್ಧೋ। ಸಾರತ್ತಾ ಹೋನ್ತೀತಿ ಯೋಜನಾ। ಏತ್ಥಾತಿ ಪುರಿಸಾನಂ ಅಭಿವಾದನಾದೀಸು। ಇದನ್ತಿ ಪುರಿಸಾನಂ ಅಭಿವಾದನಾದಿ, ‘‘ಅನುಞ್ಞಾತ’’ನ್ತಿ ಪದೇ ವುತ್ತಕಮ್ಮಂ ‘‘ವಟ್ಟತೀ’’ತಿ ಪದೇ ವುತ್ತಕತ್ತಾ। ಅಥ ವಾ ಓದಿಸ್ಸ ಅನುಞ್ಞಾತಂ ಇದಂ ಪುರಿಸಾನಂ ಅಭಿವಾದನಾದಿ ವಟ್ಟತೀತಿ ಯೋಜನಾ। ಏವಞ್ಹಿ ಸತಿ ‘‘ಓದಿಸ್ಸ ಅನುಞ್ಞಾತ’’ನ್ತಿ ಪದಂ ಹೇತುಅನ್ತೋಗಧವಿಸೇಸನಂ, ಓದಿಸ್ಸ ಅನುಞ್ಞಾತತ್ತಾ ವಟ್ಟತೀತಿ ಅಧಿಪ್ಪಾಯೋ। ತನ್ತಿ ಅಟ್ಠಕಥಾಸು ವುತ್ತವಚನಂ। ಹೀತಿ ಸಚ್ಚಂ, ಯಸ್ಮಾ ವಾ।
Pāde sambāhantāti bhikkhunīnaṃ pāde sambāhantā. Keseti bhikkhunīnaṃ kese. Tatrāti ‘‘kukkuccayantā na sādiyantī’’ti vacane. Eke ācariyā vadantīti sambandho. Sārattā hontīti yojanā. Etthāti purisānaṃ abhivādanādīsu. Idanti purisānaṃ abhivādanādi, ‘‘anuññāta’’nti pade vuttakammaṃ ‘‘vaṭṭatī’’ti pade vuttakattā. Atha vā odissa anuññātaṃ idaṃ purisānaṃ abhivādanādi vaṭṭatīti yojanā. Evañhi sati ‘‘odissa anuññāta’’nti padaṃ hetuantogadhavisesanaṃ, odissa anuññātattā vaṭṭatīti adhippāyo. Tanti aṭṭhakathāsu vuttavacanaṃ. Hīti saccaṃ, yasmā vā.
೪೩೫. ಪಲ್ಲಙ್ಕೇನ ನಿಸೀದನ್ತೀತಿ ಏತ್ಥ ಆಸನಪಲ್ಲಙ್ಕಂ ಪಟಿಕ್ಖಿಪನ್ತೋ ಆಹ ‘‘ಪಲ್ಲಙ್ಕಂ ಆಭುಜಿತ್ವಾ ನಿಸೀದನ್ತೀ’’ತಿ। ತತ್ಥ ಆಭುಜಿತ್ವಾತಿ ಆಬನ್ಧಿತ್ವಾ। ಕೂಪೋತಿ ವಚ್ಚಕೂಪೋ। ಉಪರೀತಿ ಕೂಪತೋ ಉಪರಿ। ‘‘ಸಬ್ಬದಿಸಾಸು ಪಞ್ಞಾಯತೀ’’ತಿ ಇಮಿನಾ ಪಟಿಚ್ಛನ್ನಮೇವ ಅತ್ಥಿ, ನ ಉಪರಿ ಛನ್ನನ್ತಿ ದಸ್ಸೇತಿ।
435.Pallaṅkena nisīdantīti ettha āsanapallaṅkaṃ paṭikkhipanto āha ‘‘pallaṅkaṃ ābhujitvā nisīdantī’’ti. Tattha ābhujitvāti ābandhitvā. Kūpoti vaccakūpo. Uparīti kūpato upari. ‘‘Sabbadisāsu paññāyatī’’ti iminā paṭicchannameva atthi, na upari channanti dasseti.
೪೩೬. ಕುಣ್ಡಕನ್ತಿ ಕಣಂ। ಏತ್ಥಾತಿ ಭಿಕ್ಖುನಿಕ್ಖನ್ಧಕೇ।
436.Kuṇḍakanti kaṇaṃ. Etthāti bhikkhunikkhandhake.
ಇತಿ ಭಿಕ್ಖುನಿಕ್ಖನ್ಧಕವಣ್ಣನಾಯ ಯೋಜನಾ ಸಮತ್ತಾ।
Iti bhikkhunikkhandhakavaṇṇanāya yojanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಚೂಳವಗ್ಗಪಾಳಿ • Cūḷavaggapāḷi
ಭಿಕ್ಖುನೀಉಪಸಮ್ಪದಾನುಜಾನನಂ • Bhikkhunīupasampadānujānanaṃ
೨. ದುತಿಯಭಾಣವಾರೋ • 2. Dutiyabhāṇavāro
೩. ತತಿಯಭಾಣವಾರೋ • 3. Tatiyabhāṇavāro
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಚೂಳವಗ್ಗ-ಅಟ್ಠಕಥಾ • Cūḷavagga-aṭṭhakathā / ಭಿಕ್ಖುನೀಉಪಸಮ್ಪದಾನುಜಾನನಕಥಾ • Bhikkhunīupasampadānujānanakathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಭಿಕ್ಖುನೀಉಪಸಮ್ಪನ್ನಾನುಜಾನನಕಥಾವಣ್ಣನಾ • Bhikkhunīupasampannānujānanakathāvaṇṇanā
