| Library / Tipiṭaka / ཏིཔིཊཀ • Tipiṭaka / པཱཙིཏྱཱདིཡོཛནཱཔཱལི༹ • Pācityādiyojanāpāḷi |
བྷིཀྑུནཱིཨུཔསམྤདཱནུཛཱནནཀཐཱ
Bhikkhunīupasampadānujānanakathā
༤༠༤. ཨིམཱཡ ཨནུཔཉྙཏྟིཡཱཏི མཧཱཔཛཱཔཏིཡཱ ཨཊྛགརུདྷམྨཔཊིགྒཧཎཱུཔསམྤདཾ ཨུཔནིདྷཱཡ ཨཡཾ པཉྙཏྟི ཨནུཔཉྙཏྟི ནཱམ, ཏཱཡ ཨནུཔཉྙཏྟིཡཱ ཨུཔསམྤཱདེཏུནྟི ཨཏྠོ། མཧཱཔཛཱཔཏིཡཱ སདྡྷིཝིཧཱརིནིཡོ ཀཏྭཱཏི མཧཱཔཛཱཔཏིཾ ཨུཔཛ྄ཛྷཾ ཀཏྭཱ པཉྩསཏཱ སཱཀིཡཱནིཡོ ཏསྶཱ སདྡྷིཝིཧཱརིནིཡོ ཀཏྭཱཏི ཨཏྠོ། ཨིཏཱིཏི ཏསྨཱ ཨཧེསུནྟི སམྦནྡྷོ། ཨིམིནཱ ཨོཝཱདེནཱཏི བྷགཝཏོ ཨིམིནཱ ཨོཝཱདེན།
404.Imāya anupaññattiyāti mahāpajāpatiyā aṭṭhagarudhammapaṭiggahaṇūpasampadaṃ upanidhāya ayaṃ paññatti anupaññatti nāma, tāya anupaññattiyā upasampādetunti attho. Mahāpajāpatiyā saddhivihāriniyo katvāti mahāpajāpatiṃ upajjhaṃ katvā pañcasatā sākiyāniyo tassā saddhivihāriniyo katvāti attho. Itīti tasmā ahesunti sambandho. Iminā ovādenāti bhagavato iminā ovādena.
༤༡༠. ཨེཏིསྶཱཏི ཨེཏིསྶཱ བྷིཀྑུནིཡཱ། ཏནྟི ཀམྨཾ། ཨཉྙསྨིནྟི ཨཉྙསྨིཾ ཀམྨེ། ཨཉྙནྟི རོཔིཏབྦཀམྨཏོ ཨཉྙཾ ཀམྨཾ།
410.Etissāti etissā bhikkhuniyā. Tanti kammaṃ. Aññasminti aññasmiṃ kamme. Aññanti ropitabbakammato aññaṃ kammaṃ.
༤༡༡. ཀདྡམོདཀེནཱཏི ཀདྡམེན ཨཱལུལི༹ཏེན ཨུདཀེནེཝ། ཀདྡམཱདཱིསུཔཱིཏི པཱིསདྡོ ‘‘ཡེན ཀེནཙཱི’’ཏི ཨེཏྠ ཡོཛེཏབྦོ། ཡེན ཀེནཙིཔཱིཏི ཧི ཨཏྠོ། སནྣིཔཏིཏྭཱཏི བྷིཀྑུནིསངྒྷེན སནྣིཔཏིཏྭཱ། ཨཔསཱདནཱིཡནྟི ཨཔསཱདེཏབྦཾ ཀམྨཾ། ཨེཏྟཱཝཏཱཏི ཨེཏྟཀེན སཱཝནམཏྟེན། ཨཝནྡིཡོཏི ན ཝནྡེཏབྦོ, ཝནྡིཏུཾ ན ཨརཧོཏི ཨཏྠོ། ཏཏོཏི ཏིཀྑཏྟུཾ སཱཝེཏབྦཏོ། ན ཝནྡནྟཱིཏི བྷིཀྑུནིཡོ ན ཝནྡནྟི། དིསྭཱཔཱིཏི ཏཾ བྷིཀྑུཾ དིསྭཱཔི། ཏེན བྷིཀྑུནཱཏི ཨཔསཱདནཱིཡཾ དསྶེནྟེན བྷིཀྑུནཱ, ཁམཱཔེཏབྦནྟི སམྦནྡྷོ། ཝིཧཱརེཡེཝཱཏི བྷིཀྑཱུནཾ ཝིཧཱརེཡེཝ། ཏེན བྷིཀྑུནཱཏི ཨུཔསངྐམིཏབྦེན བྷིཀྑུནཱ, ཝཏྟབྦནྟི སམྦནྡྷོ། ཏཏོཏི ཝཏྟབྦཀཱལཏོ། སོཏི ཨཔསཱདནཱིཡཾ དསྶེནྟོ བྷིཀྑུ། ཨེཏྠཱཏི བྷིཀྑུནིཀྑནྡྷཀེ། ཀམྨཝིབྷངྒེཏི པརིཝཱརཱཝསཱནེ ཀམྨཱནཾ ཝིབྷངྒཊྛཱནེ (པརི॰ ཨཊྛ॰ ༤༩༥-༤༩༦)།
411.Kaddamodakenāti kaddamena āluḷitena udakeneva. Kaddamādīsupīti pīsaddo ‘‘yena kenacī’’ti ettha yojetabbo. Yena kenacipīti hi attho. Sannipatitvāti bhikkhunisaṅghena sannipatitvā. Apasādanīyanti apasādetabbaṃ kammaṃ. Ettāvatāti ettakena sāvanamattena. Avandiyoti na vandetabbo, vandituṃ na arahoti attho. Tatoti tikkhattuṃ sāvetabbato. Na vandantīti bhikkhuniyo na vandanti. Disvāpīti taṃ bhikkhuṃ disvāpi. Tena bhikkhunāti apasādanīyaṃ dassentena bhikkhunā, khamāpetabbanti sambandho. Vihāreyevāti bhikkhūnaṃ vihāreyeva. Tena bhikkhunāti upasaṅkamitabbena bhikkhunā, vattabbanti sambandho. Tatoti vattabbakālato. Soti apasādanīyaṃ dassento bhikkhu. Etthāti bhikkhunikkhandhake. Kammavibhaṅgeti parivārāvasāne kammānaṃ vibhaṅgaṭṭhāne (pari. aṭṭha. 495-496).
ཨོབྷཱསནྟཱིཏི ཨཝ ཧཱིནེན བྷཱསནྟཱིཏི དསྶེནྟོ ཨཱཧ ‘‘ཨསདྡྷམྨེན ཨོབྷཱསནྟཱི’’ཏི། ‘‘བྷིཀྑུནཱིཧི སདྡྷིཾ སམྤཡོཛེནྟཱི’’ཏི ཨེཏྠ ཀམྨཀརཎེ དསྶེནྟོ ཨཱཧ ‘‘པུརིསེ ཨསདྡྷམྨེནཱ’’ཏི། ཨེཏྠ ‘‘པུརིསེ’’ཏི ཨིམིནཱ ཀམྨཾ དསྶེཏི, ‘‘ཨསདྡྷམྨེནཱ’’ཏི ཨིམིནཱ ཀརཎཾ། ཝིཧཱརཔྤཝེསནེཏི བྷིཀྑཱུནཾ ཝིཧཱརཔྤཝེསནེ། ཨོཝཱདཾ ཋཔེཏུནྟི ཨེཏྠ ཨོཝཱདཊྛཔནཱཀཱརཾ དསྶེནྟོ ཨཱཧ ‘‘ན བྷིཀྑུནུཔསྶཡ’’ནྟིཨཱདི། ཨོཝཱདཏྠཱཡཱཏི ཨོཝཱདཔཊིགྒཧཎཏྠཱཡ། མཱ ཀརིཏྠཱཏི མཱ ཀརེཡྻཱཐ།
Obhāsantīti ava hīnena bhāsantīti dassento āha ‘‘asaddhammena obhāsantī’’ti. ‘‘Bhikkhunīhi saddhiṃ sampayojentī’’ti ettha kammakaraṇe dassento āha ‘‘purise asaddhammenā’’ti. Ettha ‘‘purise’’ti iminā kammaṃ dasseti, ‘‘asaddhammenā’’ti iminā karaṇaṃ. Vihārappavesaneti bhikkhūnaṃ vihārappavesane. Ovādaṃ ṭhapetunti ettha ovādaṭṭhapanākāraṃ dassento āha ‘‘na bhikkhunupassaya’’ntiādi. Ovādatthāyāti ovādapaṭiggahaṇatthāya. Mā karitthāti mā kareyyātha.
༤༡༦. གིཧིདཱརིཀཱཡོཏི གིཧིབྷཱུཏཱ དཱརིཀཱཡོ བནྡྷནྟི ཝིཡཱཏི ཡོཛནཱ། གྷནཔཊྚཀེནཱཏི གྷནབྷཱུཏེན པཊྚེན ནིཡུཏྟེན། ཨེཀཔརིཡཀནྟི ཨེཏྠ ཨེཀཝཱརཾ ཀཊིཡཾ པརིཀྑིཔིཏྭཱ ཀཏཾ ཀཱཡབནྡྷནཾ ཨེཀཔརིཡཀནྟི དསྶེནྟོ ཨཱཧ ‘‘ཨེཀཝཱརཾ པརིཀྑིཔནཀ’’ནྟི། ཏཏྠ པརིཀྑིཔནཀནྟི ཀཊིཡཾ པརིཀྑིཔནཱརཧཾ།
416.Gihidārikāyoti gihibhūtā dārikāyo bandhanti viyāti yojanā. Ghanapaṭṭakenāti ghanabhūtena paṭṭena niyuttena. Ekapariyakanti ettha ekavāraṃ kaṭiyaṃ parikkhipitvā kataṃ kāyabandhanaṃ ekapariyakanti dassento āha ‘‘ekavāraṃ parikkhipanaka’’nti. Tattha parikkhipanakanti kaṭiyaṃ parikkhipanārahaṃ.
ཝིལཱིཝེནཱཏི ཨེཏྠ བཧུཏྠེ ཨེཀཝཙནནྟི ཨཱཧ ‘‘སཎྷེཧི ཝིལཱིཝེཧཱི’’ཏི། ‘‘ཀཏཔཊྚེནཱ’’ཏི ཨིམིནཱ པཱལི༹ཡཾ ‘‘ཀཏེནཱ’’ཏི པཱཋསེསཾ དསྶེཏི། སེཏཝཏྠཔཊྚེནཱཏི སེཏཝཏྠེན ཀཏེན པཊྚེན། ཀཏཝེཎིཡཱཏི ཀཏཱཡ ཝེཎིཡཱ། ཨིམིནཱ དུསྶེན ཀཏཱ ཝེཎི དུསྶཝེཎཱིཏི ཝཙནཏྠཾ དསྶེཏི། ཨེསེཝ ནཡོ པུརིམཔཙྪིམཔདེསུཔི། ཙོལ༹ཀཱསཱཝནྟི ཙོལ༹མེཝ ཀསཱཝེན རཏྟཏྟཱ ཙོལ༹ཀཱསཱཝཾ།
Vilīvenāti ettha bahutthe ekavacananti āha ‘‘saṇhehi vilīvehī’’ti. ‘‘Katapaṭṭenā’’ti iminā pāḷiyaṃ ‘‘katenā’’ti pāṭhasesaṃ dasseti. Setavatthapaṭṭenāti setavatthena katena paṭṭena. Kataveṇiyāti katāya veṇiyā. Iminā dussena katā veṇi dussaveṇīti vacanatthaṃ dasseti. Eseva nayo purimapacchimapadesupi. Coḷakāsāvanti coḷameva kasāvena rattattā coḷakāsāvaṃ.
ཨཊྛིལླེནཱཏི ཨདྡེན ཨཊྛིནཱ། ‘‘གོཛངྒྷཊྛིཀེ’’ཏི ཨིམིནཱ ཨཊྛིནོ སམྦནྡྷཾ དསྶེཏི། ཧཏྠཾ ཀོཊྚཱཔེནྟཱིཏི ཨེཏྠ ཧཏྠཾ ནཱམ ཨགྒབཱཧམེཝཱདྷིཔྤེཏཾ, ན ཀཔྤརཏོ པཊྛཱཡཱཏི དསྶེནྟོ ཨཱཧ ‘‘ཨགྒབཱཧ’’ནྟི། པིཊྛིཧཏྠནྟི ཧཏྠཔིཊྛིཾ། པིཊྛིཔཱདནྟི པཱདཔིཊྛིཾ།
Aṭṭhillenāti addena aṭṭhinā. ‘‘Gojaṅghaṭṭhike’’ti iminā aṭṭhino sambandhaṃ dasseti. Hatthaṃ koṭṭāpentīti ettha hatthaṃ nāma aggabāhamevādhippetaṃ, na kapparato paṭṭhāyāti dassento āha ‘‘aggabāha’’nti. Piṭṭhihatthanti hatthapiṭṭhiṃ. Piṭṭhipādanti pādapiṭṭhiṃ.
༤༡༧. ཝུཏྟནཡཱནེཝཱཏི ཚབྦགྒིཡཱནཾ མུཁལིམྤནཱདཱིསུ (ཙཱུལ༹ཝ॰ ཨཊྛ॰ ༢༤༧) ཝུཏྟནཡཱནེཝ། ཨངྒདེསེཏི སརཱིརཔྤདེསེ། གཎྜཔྤདེསེཏི ཀཔོལཔྤདེསེ། སཱལོཀེ ཏིཊྛནྟཱིཏི ཨེཏྠ སཾཝིཛྫཏི ཨཱལོཀོ ཨེཏྠཱཏི སཱལོཀནྟི ཀཏྭཱ དྭཱརཾ གཧེཏབྦཾ། ཏེན ཝུཏྟཾ ‘‘དྭཱརཾ ཝིཝརིཏྭཱ’’ཏི། ཝུཊྛཱཔེནྟཱིཏི ཨུཔསམྤཱདེནྟི། སཱུནཾ ཋཔེནྟཱིཏི ཨེཏྠ སཱུནཱསདྡོ མཾསཔརིཡཱཡོཏི ཨཱཧ ‘‘མཾསཾ ཝིཀྐིཎནྟཱི’’ཏི། ཏེནཱཏི དཱསེན། ཨིདཾ པདཾ ‘‘ཀཱརེནྟཱི’’ཏི པདེ ཀཱརིཏཀམྨཾ། ‘‘ཧརིཏཀཉྩེཝ པཀྐཉྩཱ’’ཏི ཨིམིནཱ ཧརིཏཀཔཀྐིཀནྟི པདསྶ དྭནྡཝཱཀྱཾ དསྶེཏི། ཏཏྠ ཧརིཏཀནྟི ཧརིཏམེཝ པཎྞཾ། པཀྐནྟི སེདིཏཾ པཎྞཾ།
417.Vuttanayānevāti chabbaggiyānaṃ mukhalimpanādīsu (cūḷava. aṭṭha. 247) vuttanayāneva. Aṅgadeseti sarīrappadese. Gaṇḍappadeseti kapolappadese. Sāloke tiṭṭhantīti ettha saṃvijjati āloko etthāti sālokanti katvā dvāraṃ gahetabbaṃ. Tena vuttaṃ ‘‘dvāraṃ vivaritvā’’ti. Vuṭṭhāpentīti upasampādenti. Sūnaṃ ṭhapentīti ettha sūnāsaddo maṃsapariyāyoti āha ‘‘maṃsaṃ vikkiṇantī’’ti. Tenāti dāsena. Idaṃ padaṃ ‘‘kārentī’’ti pade kāritakammaṃ. ‘‘Haritakañceva pakkañcā’’ti iminā haritakapakkikanti padassa dvandavākyaṃ dasseti. Tattha haritakanti haritameva paṇṇaṃ. Pakkanti seditaṃ paṇṇaṃ.
༤༡༨. ཀཐིཏཱཡེཝཱཏི ཙཱིཝརཀྑནྡྷཀེ ཀཐིཏཱཡེཝ།
418.Kathitāyevāti cīvarakkhandhake kathitāyeva.
༤༡༩. པཱལི༹མུཏྟཀཝིནིཙྪཡོཏི པཱལི༹ཡཾ ཝུཏྟཝིནིཙྪཡཏོ མུཏྟོ ཝིནིཙྪཡོ། པཱལི༹མུཏྟཀཝིནིཙྪཡཾ ཝིཏྠཱརེནྟོ ཨཱཧ ‘‘སཙེ ཧཱི’’ཏིཨཱདི། ཡོ ཀོཙི ཀཱལཾ ཀརོནྟོ ཝདཏཱིཏི སམྦནྡྷོ། མམཙྩཡེནཱཏི མམ ཨཏིཀྐམེན། ཨཉྙསྶཱཏི ཝུཏྟེཧི ཨུཔཛ྄ཛྷཱཡཱདཱིཧི ཨཉྙསྶ ། ཏེསནྟི ཨུཔཛ྄ཛྷཱཡཱདཱིནཾ། ན ཧོཏཱིཏི པརིཀྑཱརོ ན ཧོཏི། ཧཱིཏི སཙྩཾ, ཡསྨཱ ཝཱ། ཨཙྩཡདཱནནྟི ཨཙྩཡེན ཧོཏཱུཏི དཱནཾ། ན རུཧཏཱིཏི པཉྩནྣཾ སཧདྷམྨིཀཱནཾ པབྦཛིཏསྶ ཝཱ གཧཊྛསྶ ཝཱ ཡསྶ ཀསྶཙི ཨཙྩཡདཱནཾ ཏེསཾ ན རུཧཏི, སངྒྷསྶེཝ རུཧཏཱིཏི ཨདྷིཔྤཱཡོ། གིཧཱིནཾ པན ཨཙྩཡདཱནནྟི སམྦནྡྷོ། རུཧཏཱིཏི གིཧཱིནཾ པབྦཛིཏསྶ ཝཱ གཧཊྛསྶ ཝཱ ཡསྶ ཀསྶཙི ཨཙྩཡདཱནཾ ཏེསཾ རུཧཏི, ཏེསཾཡེཝ སནྟཀོ ཧོཏཱིཏི ཨདྷིཔྤཱཡོ།
419.Pāḷimuttakavinicchayoti pāḷiyaṃ vuttavinicchayato mutto vinicchayo. Pāḷimuttakavinicchayaṃ vitthārento āha ‘‘sace hī’’tiādi. Yo koci kālaṃ karonto vadatīti sambandho. Mamaccayenāti mama atikkamena. Aññassāti vuttehi upajjhāyādīhi aññassa . Tesanti upajjhāyādīnaṃ. Na hotīti parikkhāro na hoti. Hīti saccaṃ, yasmā vā. Accayadānanti accayena hotūti dānaṃ. Na ruhatīti pañcannaṃ sahadhammikānaṃ pabbajitassa vā gahaṭṭhassa vā yassa kassaci accayadānaṃ tesaṃ na ruhati, saṅghasseva ruhatīti adhippāyo. Gihīnaṃ pana accayadānanti sambandho. Ruhatīti gihīnaṃ pabbajitassa vā gahaṭṭhassa vā yassa kassaci accayadānaṃ tesaṃ ruhati, tesaṃyeva santako hotīti adhippāyo.
༤༢༠. པུརཱཎམལླཱིཏི ཨེཏྠ མལླསྶ བྷརིཡཱ མལླཱི, པུརཱཎེ མལླཱི པུརཱཎམལླཱིཏི དསྶེནྟོ ཨཱཧ ‘‘པུརཱཎེ’’ཏིཨཱདི། ‘‘གིཧིཀཱལེ’’ཏི ཨིམིནཱ ‘‘པུརཱཎེ’’ཏི ཨེཏྠ ཎཔཙྩཡསྶ སརཱུཔཾ དསྶེཏི། མལླསྶཱཏི མུཊྛིམལླསྶ། པུརིསབྱཉྫནནྟི ཨེཏྠ བྱཉྫནསདྡོ ནིམིཏྟཔརིཡཱཡོཏི ཨཱཧ ‘‘པུརིསནིམིཏྟ’’ནྟི། ཙིཏྟནྟི རཱགཙིཏྟཾ།
420.Purāṇamallīti ettha mallassa bhariyā mallī, purāṇe mallī purāṇamallīti dassento āha ‘‘purāṇe’’tiādi. ‘‘Gihikāle’’ti iminā ‘‘purāṇe’’ti ettha ṇapaccayassa sarūpaṃ dasseti. Mallassāti muṭṭhimallassa. Purisabyañjananti ettha byañjanasaddo nimittapariyāyoti āha ‘‘purisanimitta’’nti. Cittanti rāgacittaṃ.
༤༢༡. ཡནྟི ཡཾ ཝཏྠུ, ཨགྒནྟི པཋམབྷཱགཾ། ཨསཔྤཱཡནྟི ཨཏྟནོ ཨསཔྤཱཡཾ།
421.Yanti yaṃ vatthu, agganti paṭhamabhāgaṃ. Asappāyanti attano asappāyaṃ.
ཧིཡྻོཏི ཨཏཱིཏཱནནྟརཱཧནི། ཨཉྙསྨིནྟི བྷིཀྑུནཱིཧི ཨཉྙསྨིཾ། ‘‘བྷིཀྑུནཱིཧཱི’’ཏི པདཾ ‘‘པཊིགྒཱཧཱཔེཏྭཱ’’ཏི པདེ ཀཱརིཏཀམྨཾ། ཧཱིཏི སཙྩཾ, ཡསྨཱ ཝཱ།
Hiyyoti atītānantarāhani. Aññasminti bhikkhunīhi aññasmiṃ. ‘‘Bhikkhunīhī’’ti padaṃ ‘‘paṭiggāhāpetvā’’ti pade kāritakammaṃ. Hīti saccaṃ, yasmā vā.
༤༢༦. ‘‘བྷོཛནཀཱལ’’ནྟི ཨིམིནཱ ‘‘ཀཱལཾ ཝཱིཏིནཱམེསུ’’ནྟི ཨེཏྠ ཀཱལཝིསེསཾ དསྶེཏི།
426. ‘‘Bhojanakāla’’nti iminā ‘‘kālaṃ vītināmesu’’nti ettha kālavisesaṃ dasseti.
པུརེཏི ཨཱདིམྷི། ཏཱསནྟི ཨཊྛནྣཾ བྷིཀྑུནཱིནཾ། ཨབྦྷནྟརིམཱཏི ཨབྦྷནྟརེ པརིཡཱཔནྣཱ། ཨཉྙཱཏི ཨཊྛཧི བྷིཀྑུནཱིཧི ཨཉྙཱ། ནཝཀཏརཱ ཧོཏཱིཏི སམྦནྡྷོ། ‘‘ཋཔེཏྭཱ བྷཏྟགྒ’’ནྟི ཨིམིནཱ ཨཉྙཏྠ སབྦཏྠ ཡཐཱཝུཌྜྷཾ ན པཊིབཱཧིཏབྦནྟི ཨེཏྠ ཨཉྙསདྡསྶ ཨཔཱདཱནཾ དསྶེཏི། ཨཉྙསྨིནྟི ཨེཏྠ སྨིཾཝཙནེན ཏྠཔཙྩཡསྶ ཨཏྠཾ དསྶེཏི། ‘‘ཙཏུཔཙྩཡབྷཱཛནཱིཡཊྛཱནེ’’ཏི ཨིམིནཱ སརཱུཔཾ དསྶེཏི།
Pureti ādimhi. Tāsanti aṭṭhannaṃ bhikkhunīnaṃ. Abbhantarimāti abbhantare pariyāpannā. Aññāti aṭṭhahi bhikkhunīhi aññā. Navakatarā hotīti sambandho. ‘‘Ṭhapetvā bhattagga’’nti iminā aññattha sabbattha yathāvuḍḍhaṃ na paṭibāhitabbanti ettha aññasaddassa apādānaṃ dasseti. Aññasminti ettha smiṃvacanena tthapaccayassa atthaṃ dasseti. ‘‘Catupaccayabhājanīyaṭṭhāne’’ti iminā sarūpaṃ dasseti.
༤༣༠. དཱུཏེནཔི ཨུཔསམྤཱདེཏུནྟི ཨེཏྠ ཀིཾ སབྦཐཱ དཱུཏེན ཨུཔསམྤདཱ ཝཊྚཏཱིཏི ཨཱཧ ‘‘དཱུཏེན…པེ॰… ཝཊྚཏཱི’’ཏི། ཡེན ཀེནཙི ཨནྟརཱཡེནཱཏི སམྦནྡྷོ, ཨསཏི ཨནྟརཱཡེ ན ཝཊྚཏཱིཏི ཨདྷིཔྤཱཡོ། ཀམྨཝཱཙཱཔརིཡོསཱནེ ཨུཔསམྤནྣཱཝ ཧོཏཱིཏི སམྦནྡྷོ། ཏཱཝདེཝཱཏི ཨུཔསམྤནྣཀྑཎེཡེཝ།
430.Dūtenapi upasampādetunti ettha kiṃ sabbathā dūtena upasampadā vaṭṭatīti āha ‘‘dūtena…pe… vaṭṭatī’’ti. Yena kenaci antarāyenāti sambandho, asati antarāye na vaṭṭatīti adhippāyo. Kammavācāpariyosāne upasampannāva hotīti sambandho. Tāvadevāti upasampannakkhaṇeyeva.
༤༣༡. ནཝཀམྨམྤཱིཏི པིསདྡོ ཨུདོསིཏཨུཔསྶཡེ ཨཔེཀྑཏི།
431.Navakammampīti pisaddo udositaupassaye apekkhati.
༤༣༢. ཏསྶཱཏི ཏསྶཱ ཨིཏྠིཡཱ། ཡཱཝ སོ དཱརཀོ ཝིཉྙུཏཾ པཱཔུཎཱཏཱིཏི ཨེཏྠ ཀཐཾ ཝིཉྙུབྷཱཝོ གཧེཏབྦོཏི ཨཱཧ ‘‘ཡཱཝ ཁཱདིཏུ’’ནྟིཨཱདི།
432.Tassāti tassā itthiyā. Yāva so dārako viññutaṃ pāpuṇātīti ettha kathaṃ viññubhāvo gahetabboti āha ‘‘yāva khāditu’’ntiādi.
ཋཔེཏྭཱ སཱགཱརནྟི ཨེཏྠ སཀཱརོ སཧསདྡཀཱརིཡོ, ཨགཱརནྟི ཙ སེཡྻཱགཱརནྟི དསྶེནྟོ ཨཱཧ ‘‘སཧཱགཱརསེཡྻམཏྟཾ ཋཔེཏྭཱ’’ཏི། ཡཐཱ ཨཉྙསྨིཾ པུརིསེ པཊིཔཛྫིཏབྦཾ, ཨེཝཾ ཏཐཱཏི ཡོཛནཱ། ‘‘ཨཉྙསྨི’’ནྟི ཨིམིནཱ པཱལི༹ཡཾ ཨཉྙེ པུརིསེཏི ཨེཏྠ སྨིཾཝཙནསྶ སབྦནཱམཏོ ཨེཀཱརཱདེསོ དསྶིཏོ, ཏཾདསྶནེན ཙ ཀཙྩཱཡནེ (ཀཙྩཱཡནེ ༡༡༠ སུཏྟེ) སབྦནཱམཏོ སྨིཾཝཙནསྶ ཨེཀཱརཱདེསནིསེདྷནཾ ཨནིཙྩནྟི དསྶེཏི།
Ṭhapetvā sāgāranti ettha sakāro sahasaddakāriyo, agāranti ca seyyāgāranti dassento āha ‘‘sahāgāraseyyamattaṃ ṭhapetvā’’ti. Yathā aññasmiṃ purise paṭipajjitabbaṃ, evaṃ tathāti yojanā. ‘‘Aññasmi’’nti iminā pāḷiyaṃ aññe puriseti ettha smiṃvacanassa sabbanāmato ekārādeso dassito, taṃdassanena ca kaccāyane (kaccāyane 110 sutte) sabbanāmato smiṃvacanassa ekārādesanisedhanaṃ aniccanti dasseti.
༤༣༤. ‘‘ཡདེཝ སཱ ཝིབྦྷནྟཱ’’ཏི ཨིམིནཱ དསྶེཏཱིཏི སམྦནྡྷོ། ‘‘ཡསྨཱ’’ཏི ཨིམིནཱ ཡདེཝཱཏི ཨེཏྠ ཡཾསདྡསྶ ཀཱརཎཏྠཾ དསྶེཏི། ཨོདཱཏཱནི ཝཏྠཱནི ནིཝཏྠཱཏི སམྦནྡྷོ། ‘‘ཏསྨཱཡེཝཱ’’ཏི ཨིམིནཱ ཏདེཝཱཏི པདསྶ ཀཱརཎཏྠམེཝ དསྶེཏི། ‘‘ན སིཀྑཱཔཙྩཀྑཱནེནཱ’’ཏི ཨིམིནཱ ཨེཝཏྠཕལཾ དསྶེཏི། སཱ པུན ཨུཔསམྤདཾ ན ལབྷཏཱིཏི སཱ ཝིབྦྷནྟཱ བྷིཀྑུནཱི པུན ཨུཔསམྤདཾ ན ལབྷཏི།
434.‘‘Yadeva sā vibbhantā’’ti iminā dassetīti sambandho. ‘‘Yasmā’’ti iminā yadevāti ettha yaṃsaddassa kāraṇatthaṃ dasseti. Odātāni vatthāni nivatthāti sambandho. ‘‘Tasmāyevā’’ti iminā tadevāti padassa kāraṇatthameva dasseti. ‘‘Na sikkhāpaccakkhānenā’’ti iminā evatthaphalaṃ dasseti. Sā puna upasampadaṃ na labhatīti sā vibbhantā bhikkhunī puna upasampadaṃ na labhati.
པབྦཛྫམྤི ན ལབྷཏཱིཏི ཏིཏྠཱཡཏནསངྐནྟཱ བྷིཀྑུནཱི པབྦཛྫམྤི ན ལབྷཏི, པགེཝ ཨུཔསམྤདཾ།
Pabbajjampi na labhatīti titthāyatanasaṅkantā bhikkhunī pabbajjampi na labhati, pageva upasampadaṃ.
པཱདེ སམྦཱཧནྟཱཏི བྷིཀྑུནཱིནཾ པཱདེ སམྦཱཧནྟཱ། ཀེསེཏི བྷིཀྑུནཱིནཾ ཀེསེ། ཏཏྲཱཏི ‘‘ཀུཀྐུཙྩཡནྟཱ ན སཱདིཡནྟཱི’’ཏི ཝཙནེ། ཨེཀེ ཨཱཙརིཡཱ ཝདནྟཱིཏི སམྦནྡྷོ། སཱརཏྟཱ ཧོནྟཱིཏི ཡོཛནཱ། ཨེཏྠཱཏི པུརིསཱནཾ ཨབྷིཝཱདནཱདཱིསུ། ཨིདནྟི པུརིསཱནཾ ཨབྷིཝཱདནཱདི, ‘‘ཨནུཉྙཱཏ’’ནྟི པདེ ཝུཏྟཀམྨཾ ‘‘ཝཊྚཏཱི’’ཏི པདེ ཝུཏྟཀཏྟཱ། ཨཐ ཝཱ ཨོདིསྶ ཨནུཉྙཱཏཾ ཨིདཾ པུརིསཱནཾ ཨབྷིཝཱདནཱདི ཝཊྚཏཱིཏི ཡོཛནཱ། ཨེཝཉྷི སཏི ‘‘ཨོདིསྶ ཨནུཉྙཱཏ’’ནྟི པདཾ ཧེཏུཨནྟོགདྷཝིསེསནཾ, ཨོདིསྶ ཨནུཉྙཱཏཏྟཱ ཝཊྚཏཱིཏི ཨདྷིཔྤཱཡོ། ཏནྟི ཨཊྛཀཐཱསུ ཝུཏྟཝཙནཾ། ཧཱིཏི སཙྩཾ, ཡསྨཱ ཝཱ།
Pāde sambāhantāti bhikkhunīnaṃ pāde sambāhantā. Keseti bhikkhunīnaṃ kese. Tatrāti ‘‘kukkuccayantā na sādiyantī’’ti vacane. Eke ācariyā vadantīti sambandho. Sārattā hontīti yojanā. Etthāti purisānaṃ abhivādanādīsu. Idanti purisānaṃ abhivādanādi, ‘‘anuññāta’’nti pade vuttakammaṃ ‘‘vaṭṭatī’’ti pade vuttakattā. Atha vā odissa anuññātaṃ idaṃ purisānaṃ abhivādanādi vaṭṭatīti yojanā. Evañhi sati ‘‘odissa anuññāta’’nti padaṃ hetuantogadhavisesanaṃ, odissa anuññātattā vaṭṭatīti adhippāyo. Tanti aṭṭhakathāsu vuttavacanaṃ. Hīti saccaṃ, yasmā vā.
༤༣༥. པལླངྐེན ནིསཱིདནྟཱིཏི ཨེཏྠ ཨཱསནཔལླངྐཾ པཊིཀྑིཔནྟོ ཨཱཧ ‘‘པལླངྐཾ ཨཱབྷུཛིཏྭཱ ནིསཱིདནྟཱི’’ཏི། ཏཏྠ ཨཱབྷུཛིཏྭཱཏི ཨཱབནྡྷིཏྭཱ། ཀཱུཔོཏི ཝཙྩཀཱུཔོ། ཨུཔརཱིཏི ཀཱུཔཏོ ཨུཔརི། ‘‘སབྦདིསཱསུ པཉྙཱཡཏཱི’’ཏི ཨིམིནཱ པཊིཙྪནྣམེཝ ཨཏྠི, ན ཨུཔརི ཚནྣནྟི དསྶེཏི།
435.Pallaṅkena nisīdantīti ettha āsanapallaṅkaṃ paṭikkhipanto āha ‘‘pallaṅkaṃ ābhujitvā nisīdantī’’ti. Tattha ābhujitvāti ābandhitvā. Kūpoti vaccakūpo. Uparīti kūpato upari. ‘‘Sabbadisāsu paññāyatī’’ti iminā paṭicchannameva atthi, na upari channanti dasseti.
༤༣༦. ཀུཎྜཀནྟི ཀཎཾ། ཨེཏྠཱཏི བྷིཀྑུནིཀྑནྡྷཀེ།
436.Kuṇḍakanti kaṇaṃ. Etthāti bhikkhunikkhandhake.
ཨིཏི བྷིཀྑུནིཀྑནྡྷཀཝཎྞནཱཡ ཡོཛནཱ སམཏྟཱ།
Iti bhikkhunikkhandhakavaṇṇanāya yojanā samattā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / ཙཱུལ༹ཝགྒཔཱལི༹ • Cūḷavaggapāḷi
བྷིཀྑུནཱིཨུཔསམྤདཱནུཛཱནནཾ • Bhikkhunīupasampadānujānanaṃ
༢. དུཏིཡབྷཱཎཝཱརོ • 2. Dutiyabhāṇavāro
༣. ཏཏིཡབྷཱཎཝཱརོ • 3. Tatiyabhāṇavāro
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / ཙཱུལ༹ཝགྒ-ཨཊྛཀཐཱ • Cūḷavagga-aṭṭhakathā / བྷིཀྑུནཱིཨུཔསམྤདཱནུཛཱནནཀཐཱ • Bhikkhunīupasampadānujānanakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / བྷིཀྑུནཱིཨུཔསམྤནྣཱནུཛཱནནཀཐཱཝཎྞནཱ • Bhikkhunīupasampannānujānanakathāvaṇṇanā
