| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
பி⁴க்கு²னீஉபஸம்பதா³னுஜானநகதா²வண்ணனா
Bhikkhunīupasampadānujānanakathāvaṇṇanā
404. யத³க்³கே³ன யங் தி³வஸங் ஆதி³ங் கத்வா. ததே³வாதி தஸ்மிங் ஏவ தி³வஸே. ‘‘அனுஞத்தியா’’தி பாடோ². ‘‘அனுபஞ்ஞத்தியா’’தி ந ஸுந்த³ரங்.
404.Yadaggena yaṃ divasaṃ ādiṃ katvā. Tadevāti tasmiṃ eva divase. ‘‘Anuñattiyā’’ti pāṭho. ‘‘Anupaññattiyā’’ti na sundaraṃ.
405. ‘‘படிக்³க³ண்ஹாமி யாவஜீவங் அனதிக்கமனீயோ’’தி வத்வா இதா³னி கிங் காரணா வரங் யாசதீதி சே? பரூபவாத³விவஜ்ஜனத்த²ங். து³ப்³பு³த்³தி⁴னோ ஹி கேசி வதெ³ய்யுங் ‘‘மஹாபஜாபதியா பட²மங் ஸம்படிச்சி²தத்தா உப⁴தோஸங்க⁴ஸ்ஸ யதா²வுட்³ட⁴அபி⁴வாத³னங் ந ஜாதங். கோ³தமீ சே வரங் யாசெய்ய, ப⁴க³வா அனுஜானெய்யா’’தி.
405. ‘‘Paṭiggaṇhāmi yāvajīvaṃ anatikkamanīyo’’ti vatvā idāni kiṃ kāraṇā varaṃ yācatīti ce? Parūpavādavivajjanatthaṃ. Dubbuddhino hi keci vadeyyuṃ ‘‘mahāpajāpatiyā paṭhamaṃ sampaṭicchitattā ubhatosaṅghassa yathāvuḍḍhaabhivādanaṃ na jātaṃ. Gotamī ce varaṃ yāceyya, bhagavā anujāneyyā’’ti.
408. விமானெத்வாதி அபரஜ்ஜி²த்வா.
408.Vimānetvāti aparajjhitvā.
410-3. கம்மப்பத்தாயோபீதி கம்மாரஹாபி. ஆபத்திகா³மினியோபீதி ஆபத்திங் ஆபன்னாயோபி. த்³வே திஸ்ஸோ பி⁴க்கு²னியோதி த்³வீஹி தீஹி பி⁴க்கு²னீஹி. ‘‘மனோஸிலிகாயா’’தி பாடோ².
410-3.Kammappattāyopīti kammārahāpi. Āpattigāminiyopīti āpattiṃ āpannāyopi. Dve tisso bhikkhuniyoti dvīhi tīhi bhikkhunīhi. ‘‘Manosilikāyā’’ti pāṭho.
420. ‘‘தேன ச பி⁴க்கு² நிமந்தேதப்³போ³’’தி ஸாமீசிவஸேன வுத்தங்.
420. ‘‘Tena ca bhikkhu nimantetabbo’’ti sāmīcivasena vuttaṃ.
422-3. ‘‘அனுஜானாமி…பே॰… தாவகாலிக’’ந்தி புக்³க³லிகங் ஸந்தா⁴ய வுத்தங், ந ஸங்கி⁴கந்தி ஆசரியோ. ‘‘அனுஜானாமி, பி⁴க்க²வே, உதுனியா கடிஸுத்தக’’ந்தி வசனதோ பி⁴க்கு²ஸ்ஸ வினிப³ந்த⁴ங் கடிஸுத்தகங் ந வட்டதி. பக்³க⁴ரந்தீ விஸவிணா. வேபுரிஸிகா மஸ்ஸுதா³டீ².
422-3. ‘‘Anujānāmi…pe… tāvakālika’’nti puggalikaṃ sandhāya vuttaṃ, na saṅghikanti ācariyo. ‘‘Anujānāmi, bhikkhave, utuniyā kaṭisuttaka’’nti vacanato bhikkhussa vinibandhaṃ kaṭisuttakaṃ na vaṭṭati. Paggharantī visaviṇā. Vepurisikā massudāṭhī.
425. தயோ நிஸ்ஸயேதி ருக்க²மூலஞ்ஹி ஸா ந லப⁴தி.
425.Tayo nissayeti rukkhamūlañhi sā na labhati.
426. ப⁴த்தக்³கே³ ஸசே தா³யகா பி⁴க்கு²னிஸங்க⁴ஸ்ஸ பு⁴த்தவதோ சதுபச்சயே தா³துகாமா ஹொந்தி, யதா²வுட்³ட⁴மேவ.
426. Bhattagge sace dāyakā bhikkhunisaṅghassa bhuttavato catupaccaye dātukāmā honti, yathāvuḍḍhameva.
427. விகாலேதி யாவ விகாலே ஹொந்தி, தாவ பவாரேஸுந்தி அத்தோ². அஜ்ஜத்தனாதி அஜ்ஜதனா.
427.Vikāleti yāva vikāle honti, tāva pavāresunti attho. Ajjattanāti ajjatanā.
428. அனுவாத³ந்தி இஸ்ஸரியட்டா²னங். இத³ங் ஸப்³ப³ங் ‘‘அஜ்ஜதக்³கே³ ஓவடோ பி⁴க்கு²னீனங் பி⁴க்கூ²ஸு வசனபதோ²’’தி பஞ்ஞத்தஸ்ஸ க³ருத⁴ம்மஸ்ஸ வீதிக்கமஆபத்திபஞ்ஞாபனத்த²ங் வுத்தந்தி வேதி³தப்³ப³ங், அஞ்ஞதா² யேஸங் க³ருத⁴ம்மானங் படிக்³க³ஹணேன பி⁴க்கு²னீனங் உபஸம்பதா³ அனுஞ்ஞாதா, தேஸங் வீதிக்கமே அனுபஸம்பன்னாவ ஸியாதி ஆஸங்கா ப⁴வெய்ய.
428.Anuvādanti issariyaṭṭhānaṃ. Idaṃ sabbaṃ ‘‘ajjatagge ovaṭo bhikkhunīnaṃ bhikkhūsu vacanapatho’’ti paññattassa garudhammassa vītikkamaāpattipaññāpanatthaṃ vuttanti veditabbaṃ, aññathā yesaṃ garudhammānaṃ paṭiggahaṇena bhikkhunīnaṃ upasampadā anuññātā, tesaṃ vītikkame anupasampannāva siyāti āsaṅkā bhaveyya.
429. இத்தி²யுத்தேனாதி இத்தீ²ஹி கா³வீஆதீ³ஹி து⁴ரட்டா²னே யுத்தேன. புரிஸந்தரேனாதி புரிஸேன அந்தரிகேன. ‘‘புரிஸது³தியேனா’’தி லிகி²தங், புரிஸஸாரதி²னாதி அதி⁴ப்பாயோ. ‘‘பா³ள்ஹதரங் அபா²ஸூ’’தி வசனதோ கி³லானாய வட்டதிச்சேவ ஸித்³த⁴ங், ப⁴க³வந்தங் ஆபுச்சி²த்வா அனுஞ்ஞாதட்டா²னே உபஸம்பஜ்ஜிஸ்ஸாமீதி அதி⁴ப்பாயோ.
429.Itthiyuttenāti itthīhi gāvīādīhi dhuraṭṭhāne yuttena. Purisantarenāti purisena antarikena. ‘‘Purisadutiyenā’’ti likhitaṃ, purisasārathināti adhippāyo. ‘‘Bāḷhataraṃ aphāsū’’ti vacanato gilānāya vaṭṭaticceva siddhaṃ, bhagavantaṃ āpucchitvā anuññātaṭṭhāne upasampajjissāmīti adhippāyo.
430. ஸா கேனசிதே³வ அந்தராயேனாதி ஸப்³ப³ந்தராயஸங்க³ஹனவசனங், தஸ்மா தங் ந அந்தராயங் கித்தெத்வா, வுத்தந்தராயேன ‘‘ராஜந்தராயேனா’’தி ஸாதே⁴தப்³ப³ந்தி ஆசரியோ.
430.Sā kenacideva antarāyenāti sabbantarāyasaṅgahanavacanaṃ, tasmā taṃ na antarāyaṃ kittetvā, vuttantarāyena ‘‘rājantarāyenā’’ti sādhetabbanti ācariyo.
431-2. ‘‘நவகம்மந்தி கத்வா ‘எத்தகானி வஸ்ஸானி வஸதூ’தி அபலோகெத்வா ஸங்கி⁴கபூ⁴மிதா³ன’’ந்தி லிகி²தங். ‘‘ஸாகா³ர’’ந்தி வுத்தத்தா அகா³ரபடிஸங்யுத்தரஹோனிஸஜ்ஜஸிக்கா²தி³வஜ்ஜிதாதி கேசி, யுத்தமேதங். கஸ்மா? ‘‘ஸஹாகா³ரஸெய்யமத்தங் ட²பெத்வா’’தி அட்ட²கதா²யங் வுத்தத்தா. ‘‘அனுஜானாமி, பி⁴க்க²வே, போஸேது’’ந்தி வசனதோ போஸனயுத்தகம்மங் ஸப்³ப³ங் வட்டதி மாதுயா, ந அஞ்ஞேஸங். வஸிதுங் சே ந ஸக்கோதி து³தியங் வினா, ஸம்மன்னித்வாவ தா³தப்³பா³ தாய இதி நோ மதி. கித்தகங் காலங்? வஸித்வா சே து³தியா க³ந்துமிச்ச²தி, அஞ்ஞங் ஸம்மன்னிதுங் யுத்தாவ. ஸா விஜாதா லபே⁴தி ஆசரியோ.
431-2. ‘‘Navakammanti katvā ‘ettakāni vassāni vasatū’ti apaloketvā saṅghikabhūmidāna’’nti likhitaṃ. ‘‘Sāgāra’’nti vuttattā agārapaṭisaṃyuttarahonisajjasikkhādivajjitāti keci, yuttametaṃ. Kasmā? ‘‘Sahāgāraseyyamattaṃ ṭhapetvā’’ti aṭṭhakathāyaṃ vuttattā. ‘‘Anujānāmi, bhikkhave, posetu’’nti vacanato posanayuttakammaṃ sabbaṃ vaṭṭati mātuyā, na aññesaṃ. Vasituṃ ce na sakkoti dutiyaṃ vinā, sammannitvāva dātabbā tāya iti no mati. Kittakaṃ kālaṃ? Vasitvā ce dutiyā gantumicchati, aññaṃ sammannituṃ yuttāva. Sā vijātā labheti ācariyo.
434. ‘‘இத³ங் ஓதி³ஸ்ஸ அனுஞ்ஞாதங் வட்டதீதி ஏகதோ வா உப⁴தோ வா அவஸ்ஸவே ஸதிபி வட்டதீ’’தி லிகி²தங். ‘‘கேஸச்சே²தா³தி³கங் கம்மங் அனுஜானாமி ஸாதி³துங் ’’இச்சேவ வுத்தத்தா வுத்தங் ‘‘தத³ஞ்ஞே ஸாதி³து’’ந்தி. ‘‘கேஸச்சே²தா³தி³கங் கம்மங் அனுஜானாமி, பி⁴க்க²வே’’தி அவத்வா எத்தகங் யஸ்மா ‘‘ஸாதி³து’’ந்தி பா⁴ஸிதங், தஸ்மா ஸா விசிகிச்சா²ய உப⁴தோபி அவஸ்ஸவே அபி பாராஜிககெ²த்தேன ஸா பாராஜிகங் பு²ஸதி. இதி அட்ட²கதா²ஸ்வேதங் ஸப்³பா³ஸுபி வினிச்சி²தங். ஓதி³ஸ்ஸகாபி⁴லாபோ ஹி அஞ்ஞதா² நிப்³பி³ஸேஸதோ தங் பமாணங். யதி³ ததா² பி⁴க்கு²ஸ்ஸ கப்பதி விசிகிச்சா².
434. ‘‘Idaṃ odissa anuññātaṃ vaṭṭatīti ekato vā ubhato vā avassave satipi vaṭṭatī’’ti likhitaṃ. ‘‘Kesacchedādikaṃ kammaṃ anujānāmi sādituṃ ’’icceva vuttattā vuttaṃ ‘‘tadaññe sāditu’’nti. ‘‘Kesacchedādikaṃ kammaṃ anujānāmi, bhikkhave’’ti avatvā ettakaṃ yasmā ‘‘sāditu’’nti bhāsitaṃ, tasmā sā vicikicchāya ubhatopi avassave api pārājikakhettena sā pārājikaṃ phusati. Iti aṭṭhakathāsvetaṃ sabbāsupi vinicchitaṃ. Odissakābhilāpo hi aññathā nibbisesato taṃ pamāṇaṃ. Yadi tathā bhikkhussa kappati vicikicchā.
காலமோதி³ஸ்ஸ நங் பத³ங், ந ஸத்தோதி³ஸ்ஸகஞ்ஹி தங்;
Kālamodissa naṃ padaṃ, na sattodissakañhi taṃ;
அத² பி⁴க்கு²னியா ஏவ, காலமோதி³ஸ்ஸ பா⁴ஸிதங்.
Atha bhikkhuniyā eva, kālamodissa bhāsitaṃ.
ஏவங் பாராஜிகாபத்தி, ஸிதி²லாவ கதா ஸியா;
Evaṃ pārājikāpatti, sithilāva katā siyā;
ஸப்³ப³ஸோ பிஹிதங் த்³வாரங், ஸப்³ப³பாராஜிகஸ்மிந்தி.
Sabbaso pihitaṃ dvāraṃ, sabbapārājikasminti.
நிரத்த²கபா⁴வதோ, உப்³ப⁴ஜாணுமண்ட³லே;
Niratthakabhāvato, ubbhajāṇumaṇḍale;
தஸ்மா ந ஸாதி³யந்தீதி, நிதா³னவசனக்கமங்.
Tasmā na sādiyantīti, nidānavacanakkamaṃ.
நிஸ்ஸாய ஸத்து²னா வுத்தங், ஸாதி³துந்தி ந அஞ்ஞதா²;
Nissāya satthunā vuttaṃ, sāditunti na aññathā;
அத்தனோ பண்ஹிஸம்ப²ஸ்ஸங், ஸாதி³துங் யேன வாரிதங்.
Attano paṇhisamphassaṃ, sādituṃ yena vāritaṃ.
அபி பாராஜிகக்கெ²த்தே, கத²ங் த்³வாரங் த³தெ³ய்ய ஸோ;
Api pārājikakkhette, kathaṃ dvāraṃ dadeyya so;
ததா²பி பு³த்³த⁴புத்தானங், பு³த்³த⁴பா⁴ஸிதபா⁴ஸிதங்.
Tathāpi buddhaputtānaṃ, buddhabhāsitabhāsitaṃ.
வசனஞ்ச ஸமானெந்தோ, நோ செத்த² யுத்திகதா² தீ⁴ரா;
Vacanañca samānento, no cettha yuttikathā dhīrā;
கேஸச்சே²தா³தி³கம்மஸ்ஸ, அவஸ்ஸங் கரணீயதோ.
Kesacchedādikammassa, avassaṃ karaṇīyato.
சித்தஸ்ஸ சாதிலோலத்தா, க³ணஸ்ஸ ச அங்க³ஸம்பதா³-
Cittassa cātilolattā, gaṇassa ca aṅgasampadā-
பா⁴வா பி⁴க்கு²னீனங் மஹேஸினா, ரக்கி²துஞ்ச அஸங்கத்தா;
Bhāvā bhikkhunīnaṃ mahesinā, rakkhituñca asaṅkattā;
நனு மோதி³ஸ்ஸகங் கதந்தி.
Nanu modissakaṃ katanti.
பி⁴க்கு²னிக்க²ந்த⁴கவண்ணனா நிட்டி²தா.
Bhikkhunikkhandhakavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi
பி⁴க்கு²னீஉபஸம்பதா³னுஜானநங் • Bhikkhunīupasampadānujānanaṃ
2. து³தியபா⁴ணவாரோ • 2. Dutiyabhāṇavāro
3. ததியபா⁴ணவாரோ • 3. Tatiyabhāṇavāro
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / பி⁴க்கு²னீஉபஸம்பதா³னுஜானநகதா² • Bhikkhunīupasampadānujānanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பி⁴க்கு²னீஉபஸம்பன்னானுஜானநகதா²வண்ணனா • Bhikkhunīupasampannānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பி⁴க்கு²னீஉபஸம்பதா³னுஜானநகதா²வண்ணனா • Bhikkhunīupasampadānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / பி⁴க்கு²னீஉபஸம்பதா³னுஜானநகதா² • Bhikkhunīupasampadānujānanakathā
