| Library / Tipiṭaka / ཏིཔིཊཀ • Tipiṭaka / ཙཱུལ༹ཝགྒཔཱལི༹ • Cūḷavaggapāḷi |
བྷིཀྑུནཱིཨུཔསམྤདཱནུཛཱནནཾ
Bhikkhunīupasampadānujānanaṃ
༤༠༤. ཨཐ ཁོ མཧཱཔཛཱཔཏི གོཏམཱི ཡེན བྷགཝཱ ཏེནུཔསངྐམི, ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ཨཊྛཱསི། ཨེཀམནྟཾ ཋིཏཱ ཁོ མཧཱཔཛཱཔཏཱི གོཏམཱི བྷགཝནྟཾ ཨེཏདཝོཙ – ‘‘ཀཐཱཧཾ, བྷནྟེ, ཨིམཱསུ སཱཀིཡཱནཱིསུ པཊིཔཛྫཱམཱི’’ཏི? ཨཐ ཁོ བྷགཝཱ མཧཱཔཛཱཔཏིཾ གོཏམིཾ དྷམྨིཡཱ ཀཐཱཡ སནྡསྶེསི སམཱདཔེསི སམུཏྟེཛེསི སམྤཧཾསེསི། ཨཐ ཁོ མཧཱཔཛཱཔཏི གོཏམཱི བྷགཝཏཱ དྷམྨིཡཱ ཀཐཱཡ སནྡསྶིཏཱ སམཱདཔིཏཱ སམུཏྟེཛིཏཱ སམྤཧཾསིཏཱ བྷགཝནྟཾ ཨབྷིཝཱདེཏྭཱ པདཀྑིཎཾ ཀཏྭཱ པཀྐཱམི། ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཨནུཛཱནཱམི, བྷིཀྑཝེ, བྷིཀྑཱུཧི བྷིཀྑུནིཡོ ཨུཔསམྤཱདེཏུ’’ནྟི།
404. Atha kho mahāpajāpati gotamī yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho mahāpajāpatī gotamī bhagavantaṃ etadavoca – ‘‘kathāhaṃ, bhante, imāsu sākiyānīsu paṭipajjāmī’’ti? Atha kho bhagavā mahāpajāpatiṃ gotamiṃ dhammiyā kathāya sandassesi samādapesi samuttejesi sampahaṃsesi. Atha kho mahāpajāpati gotamī bhagavatā dhammiyā kathāya sandassitā samādapitā samuttejitā sampahaṃsitā bhagavantaṃ abhivādetvā padakkhiṇaṃ katvā pakkāmi. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, bhikkhūhi bhikkhuniyo upasampādetu’’nti.
ཨཐ ཁོ ཏཱ བྷིཀྑུནིཡོ མཧཱཔཛཱཔཏིཾ གོཏམིཾ ཨེཏདཝོཙུཾ – ‘‘ཨཡྻཱ ཨནུཔསམྤནྣཱ, མཡཉྩམྷཱ ཨུཔསམྤནྣཱ; ཨེཝཉྷི བྷགཝཏཱ པཉྙཏྟཾ བྷིཀྑཱུཧི བྷིཀྑུནིཡོ ཨུཔསམྤཱདེཏབྦཱ’’ཏི། ཨཐ ཁོ མཧཱཔཛཱཔཏི གོཏམཱི ཡེནཱཡསྨཱ ཨཱནནྡོ ཏེནུཔསངྐམི, ཨུཔསངྐམིཏྭཱ ཨཱཡསྨནྟཾ ཨཱནནྡཾ ཨབྷིཝཱདེཏྭཱ ཨེཀམནྟཾ ཨཊྛཱསི། ཨེཀམནྟཾ ཋིཏཱ ཁོ མཧཱཔཛཱཔཏི གོཏམཱི ཨཱཡསྨནྟཾ ཨཱནནྡཾ ཨེཏདཝོཙ – ‘‘ཨིམཱ མཾ, བྷནྟེ ཨཱནནྡ, བྷིཀྑུནིཡོ ཨེཝམཱཧཾསུ – ‘ཨཡྻཱ ཨནུཔསམྤནྣཱ, མཡཉྩམྷཱ ཨུཔསམྤནྣཱ; ཨེཝཉྷི བྷགཝཏཱ པཉྙཏྟཾ བྷིཀྑཱུཧི བྷིཀྑུནིཡོ ཨུཔསམྤཱདེཏབྦཱ’’’ཏི།
Atha kho tā bhikkhuniyo mahāpajāpatiṃ gotamiṃ etadavocuṃ – ‘‘ayyā anupasampannā, mayañcamhā upasampannā; evañhi bhagavatā paññattaṃ bhikkhūhi bhikkhuniyo upasampādetabbā’’ti. Atha kho mahāpajāpati gotamī yenāyasmā ānando tenupasaṅkami, upasaṅkamitvā āyasmantaṃ ānandaṃ abhivādetvā ekamantaṃ aṭṭhāsi. Ekamantaṃ ṭhitā kho mahāpajāpati gotamī āyasmantaṃ ānandaṃ etadavoca – ‘‘imā maṃ, bhante ānanda, bhikkhuniyo evamāhaṃsu – ‘ayyā anupasampannā, mayañcamhā upasampannā; evañhi bhagavatā paññattaṃ bhikkhūhi bhikkhuniyo upasampādetabbā’’’ti.
ཨཐ ཁོ ཨཱཡསྨཱ ཨཱནནྡོ ཡེན བྷགཝཱ ཏེནུཔསངྐམི, ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ཨཱཡསྨཱ ཨཱནནྡོ བྷགཝནྟཾ ཨེཏདཝོཙ – ‘‘མཧཱཔཛཱཔཏི, བྷནྟེ, གོཏམཱི ཨེཝམཱཧ – ‘ཨིམཱ མཾ, བྷནྟེ ཨཱནནྡ, བྷིཀྑུནིཡོ ཨེཝམཱཧཾསུ – ཨཡྻཱ ཨནུཔསམྤནྣཱ, མཡཉྩམྷཱ ཨུཔསམྤནྣཱ; ཨེཝཉྷི བྷགཝཏཱ པཉྙཏྟཾ བྷིཀྑཱུཧི བྷིཀྑུནིཡོ ཨུཔསམྤཱདེཏབྦཱ’’’ཏི།
Atha kho āyasmā ānando yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca – ‘‘mahāpajāpati, bhante, gotamī evamāha – ‘imā maṃ, bhante ānanda, bhikkhuniyo evamāhaṃsu – ayyā anupasampannā, mayañcamhā upasampannā; evañhi bhagavatā paññattaṃ bhikkhūhi bhikkhuniyo upasampādetabbā’’’ti.
‘‘ཡདགྒེན, ཨཱནནྡ, མཧཱཔཛཱཔཏིཡཱ གོཏམིཡཱ ཨཊྛ གརུདྷམྨཱ པཊིགྒཧིཏཱ, ཏདེཝ སཱ 1 ཨུཔསམྤནྣཱ’’ཏི།
‘‘Yadaggena, ānanda, mahāpajāpatiyā gotamiyā aṭṭha garudhammā paṭiggahitā, tadeva sā 2 upasampannā’’ti.
༤༠༥. ཨཐ ཁོ མཧཱཔཛཱཔཏི གོཏམཱི ཡེནཱཡསྨཱ ཨཱནནྡོ ཏེནུཔསངྐམི, ཨུཔསངྐམིཏྭཱ ཨཱཡསྨནྟཾ ཨཱནནྡཾ ཨབྷིཝཱདེཏྭཱ ཨེཀམནྟཾ ཨཊྛཱསི། ཨེཀམནྟཾ ཋིཏཱ ཁོ མཧཱཔཛཱཔཏི གོཏམཱི ཨཱཡསྨནྟཾ ཨཱནནྡཾ ཨེཏདཝོཙ – ‘‘ཨེཀཱཧཾ, བྷནྟེ ཨཱནནྡ, བྷགཝནྟཾ ཝརཾ ཡཱཙཱམི། སཱདྷུ, བྷནྟེ, བྷགཝཱ ཨནུཛཱནེཡྻ བྷིཀྑཱུནཉྩ བྷིཀྑུནཱིནཉྩ ཡཐཱཝུཌྜྷཾ ཨབྷིཝཱདནཾ པཙྩུཊྛཱནཾ ཨཉྫལིཀམྨཾ སཱམཱིཙིཀམྨ’’ནྟི།
405. Atha kho mahāpajāpati gotamī yenāyasmā ānando tenupasaṅkami, upasaṅkamitvā āyasmantaṃ ānandaṃ abhivādetvā ekamantaṃ aṭṭhāsi. Ekamantaṃ ṭhitā kho mahāpajāpati gotamī āyasmantaṃ ānandaṃ etadavoca – ‘‘ekāhaṃ, bhante ānanda, bhagavantaṃ varaṃ yācāmi. Sādhu, bhante, bhagavā anujāneyya bhikkhūnañca bhikkhunīnañca yathāvuḍḍhaṃ abhivādanaṃ paccuṭṭhānaṃ añjalikammaṃ sāmīcikamma’’nti.
ཨཐ ཁོ ཨཱཡསྨཱ ཨཱནནྡོ ཡེན བྷགཝཱ ཏེནུཔསངྐམི, ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ཨཱཡསྨཱ ཨཱནནྡོ བྷགཝནྟཾ ཨེཏདཝོཙ – ‘‘མཧཱཔཛཱཔཏི, བྷནྟེ, གོཏམཱི ཨེཝམཱཧ – ‘ཨེཀཱཧཾ, བྷནྟེ ཨཱནནྡ, བྷགཝནྟཾ ཝརཾ ཡཱཙཱམི། སཱདྷུ, བྷནྟེ, བྷགཝཱ ཨནུཛཱནེཡྻ བྷིཀྑཱུནཉྩ བྷིཀྑུནཱིནཉྩ ཡཐཱཝུཌྜྷཾ ཨབྷིཝཱདནཾ པཙྩུཊྛཱནཾ ཨཉྫལིཀམྨཾ སཱམཱིཙིཀམྨ’’’ནྟི།
Atha kho āyasmā ānando yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca – ‘‘mahāpajāpati, bhante, gotamī evamāha – ‘ekāhaṃ, bhante ānanda, bhagavantaṃ varaṃ yācāmi. Sādhu, bhante, bhagavā anujāneyya bhikkhūnañca bhikkhunīnañca yathāvuḍḍhaṃ abhivādanaṃ paccuṭṭhānaṃ añjalikammaṃ sāmīcikamma’’’nti.
‘‘ཨཊྛཱནམེཏཾ, ཨཱནནྡ, ཨནཝཀཱསོ , ཡཾ ཏཐཱགཏོ ཨནུཛཱནེཡྻ མཱཏུགཱམསྶ ཨབྷིཝཱདནཾ པཙྩུཊྛཱནཾ ཨཉྫལིཀམྨཾ སཱམཱིཙིཀམྨཾ། ཨིམེཧི ནཱམ, ཨཱནནྡ, ཨཉྙཏིཏྠིཡཱ དུརཀྑཱཏདྷམྨཱ མཱཏུགཱམསྶ ཨབྷིཝཱདནཾ པཙྩུཊྛཱནཾ ཨཉྫལིཀམྨཾ སཱམཱིཙིཀམྨཾ ན ཀརིསྶནྟི ; ཀིམངྒཾ པན ཏཐཱགཏོ ཨནུཛཱནིསྶཏི མཱཏུགཱམསྶ ཨབྷིཝཱདནཾ པཙྩུཊྛཱནཾ ཨཉྫལིཀམྨཾ སཱམཱིཙིཀམྨ’’ནྟི?
‘‘Aṭṭhānametaṃ, ānanda, anavakāso , yaṃ tathāgato anujāneyya mātugāmassa abhivādanaṃ paccuṭṭhānaṃ añjalikammaṃ sāmīcikammaṃ. Imehi nāma, ānanda, aññatitthiyā durakkhātadhammā mātugāmassa abhivādanaṃ paccuṭṭhānaṃ añjalikammaṃ sāmīcikammaṃ na karissanti ; kimaṅgaṃ pana tathāgato anujānissati mātugāmassa abhivādanaṃ paccuṭṭhānaṃ añjalikammaṃ sāmīcikamma’’nti?
ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ན, བྷིཀྑཝེ, མཱཏུགཱམསྶ ཨབྷིཝཱདནཾ པཙྩུཊྛཱནཾ ཨཉྫལིཀམྨཾ སཱམཱིཙིཀམྨཾ ཀཱཏབྦཾ། ཡོ ཀརེཡྻ, ཨཱཔཏྟི དུཀྐཊསྶཱ’’ཏི།
Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘na, bhikkhave, mātugāmassa abhivādanaṃ paccuṭṭhānaṃ añjalikammaṃ sāmīcikammaṃ kātabbaṃ. Yo kareyya, āpatti dukkaṭassā’’ti.
ཨཐ ཁོ མཧཱཔཛཱཔཏི གོཏམཱི ཡེན བྷགཝཱ ཏེནུཔསངྐམི, ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ཨཊྛཱསི། ཨེཀམནྟཾ ཋིཏཱ ཁོ མཧཱཔཛཱཔཏི གོཏམཱི བྷགཝནྟཾ ཨེཏདཝོཙ – ‘‘ཡཱནི ཏཱནི, བྷནྟེ, བྷིཀྑུནཱིནཾ སིཀྑཱཔདཱནི བྷིཀྑཱུཧི སཱདྷཱརཎཱནི, ཀཐཾ མཡཾ, བྷནྟེ, ཏེསུ སིཀྑཱཔདེསུ པཊིཔཛྫཱམཱ’’ཏི? ‘‘ཡཱནི ཏཱནི, གོཏམི, བྷིཀྑུནཱིནཾ སིཀྑཱཔདཱནི བྷིཀྑཱུཧི སཱདྷཱརཎཱནི, ཡཐཱ བྷིཀྑཱུ སིཀྑནྟི ཏཐཱ ཏེསུ སིཀྑཱཔདེསུ སིཀྑཐཱ’’ཏི། ‘‘ཡཱནི པན ཏཱནི, བྷནྟེ, བྷིཀྑུནཱིནཾ སིཀྑཱཔདཱནི བྷིཀྑཱུཧི ཨསཱདྷཱརཎཱནི, ཀཐཾ མཡཾ, བྷནྟེ, ཏེསུ སིཀྑཱཔདེསུ པཊིཔཛྫཱམཱ’’ཏི? ‘‘ཡཱནི ཏཱནི, གོཏམི, བྷིཀྑུནཱིནཾ སིཀྑཱཔདཱནི བྷིཀྑཱུཧི ཨསཱདྷཱརཎཱནི, ཡཐཱཔཉྙཏྟེསུ སིཀྑཱཔདེསུ སིཀྑཐཱ’’ཏི།
Atha kho mahāpajāpati gotamī yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho mahāpajāpati gotamī bhagavantaṃ etadavoca – ‘‘yāni tāni, bhante, bhikkhunīnaṃ sikkhāpadāni bhikkhūhi sādhāraṇāni, kathaṃ mayaṃ, bhante, tesu sikkhāpadesu paṭipajjāmā’’ti? ‘‘Yāni tāni, gotami, bhikkhunīnaṃ sikkhāpadāni bhikkhūhi sādhāraṇāni, yathā bhikkhū sikkhanti tathā tesu sikkhāpadesu sikkhathā’’ti. ‘‘Yāni pana tāni, bhante, bhikkhunīnaṃ sikkhāpadāni bhikkhūhi asādhāraṇāni, kathaṃ mayaṃ, bhante, tesu sikkhāpadesu paṭipajjāmā’’ti? ‘‘Yāni tāni, gotami, bhikkhunīnaṃ sikkhāpadāni bhikkhūhi asādhāraṇāni, yathāpaññattesu sikkhāpadesu sikkhathā’’ti.
༤༠༦. 3 ཨཐ ཁོ མཧཱཔཛཱཔཏི གོཏམཱི ཡེན བྷགཝཱ ཏེནུཔསངྐམི, ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ཨཊྛཱསི། ཨེཀམནྟཾ ཋིཏཱ ཁོ མཧཱཔཛཱཔཏི གོཏམཱི བྷགཝནྟཾ ཨེཏདཝོཙ – ‘‘སཱདྷུ མེ, བྷནྟེ, བྷགཝཱ སཾཁིཏྟེན དྷམྨཾ དེསེཏུ, ཡམཧཾ བྷགཝཏོ དྷམྨཾ སུཏྭཱ ཨེཀཱ ཝཱུཔཀཊྛཱ ཨཔྤམཏྟཱ ཨཱཏཱཔིནཱི པཧིཏཏྟཱ ཝིཧརེཡྻ’’ནྟི། ‘‘ཡེ ཁོ ཏྭཾ, གོཏམི, དྷམྨེ ཛཱནེཡྻཱསི – ཨིམེ དྷམྨཱ སརཱགཱཡ སཾཝཏྟནྟི ནོ ཝིརཱགཱཡ, སཉྙོགཱཡ སཾཝཏྟནྟི ནོ ཝིསཉྙོགཱཡ, ཨཱཙཡཱཡ སཾཝཏྟནྟི ནོ ཨཔཙཡཱཡ, མཧིཙྪཏཱཡ སཾཝཏྟནྟི ནོ ཨཔྤིཙྪཏཱཡ, ཨསནྟུཊྛིཡཱ སཾཝཏྟནྟི ནོ སནྟུཊྛིཡཱ, སངྒཎིཀཱཡ སཾཝཏྟནྟི ནོ པཝིཝེཀཱཡ, ཀོསཛྫཱཡ སཾཝཏྟནྟི ནོ ཝཱིརིཡཱརམྦྷཱཡ, དུབྦྷརཏཱཡ སཾཝཏྟནྟི ནོ སུབྷརཏཱཡ; ཨེཀཾསེན, གོཏམི, དྷཱརེཡྻཱསི – ནེསོ དྷམྨོ, ནེསོ ཝིནཡོ, ནེཏཾ སཏྠུསཱསནནྟི། ཡེ ཙ ཁོ ཏྭཾ, གོཏམི, དྷམྨེ ཛཱནེཡྻཱསི – ཨིམེ དྷམྨཱ ཝིརཱགཱཡ སཾཝཏྟནྟི ནོ སརཱགཱཡ, ཝིསཉྙོགཱཡ སཾཝཏྟནྟི ནོ སཉྙོགཱཡ, ཨཔཙཡཱཡ སཾཝཏྟནྟི ནོ ཨཱཙཡཱཡ, ཨཔྤིཙྪཏཱཡ སཾཝཏྟནྟི ནོ མཧིཙྪཏཱཡ, སནྟུཊྛིཡཱ སཾཝཏྟནྟི ནོ ཨསནྟུཊྛིཡཱ, པཝིཝེཀཱཡ སཾཝཏྟནྟི ནོ སངྒཎིཀཱཡ, ཝཱིརིཡཱརམྦྷཱཡ སཾཝཏྟནྟི ནོ ཀོསཛྫཱཡ, སུབྷརཏཱཡ སཾཝཏྟནྟི ནོ དུབྦྷརཏཱཡ; ཨེཀཾསེན, གོཏམི, དྷཱརེཡྻཱསི – ཨེསོ དྷམྨོ, ཨེསོ ཝིནཡོ, ཨེཏཾ སཏྠུསཱསན’’ནྟི།
406.4 Atha kho mahāpajāpati gotamī yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho mahāpajāpati gotamī bhagavantaṃ etadavoca – ‘‘sādhu me, bhante, bhagavā saṃkhittena dhammaṃ desetu, yamahaṃ bhagavato dhammaṃ sutvā ekā vūpakaṭṭhā appamattā ātāpinī pahitattā vihareyya’’nti. ‘‘Ye kho tvaṃ, gotami, dhamme jāneyyāsi – ime dhammā sarāgāya saṃvattanti no virāgāya, saññogāya saṃvattanti no visaññogāya, ācayāya saṃvattanti no apacayāya, mahicchatāya saṃvattanti no appicchatāya, asantuṭṭhiyā saṃvattanti no santuṭṭhiyā, saṅgaṇikāya saṃvattanti no pavivekāya, kosajjāya saṃvattanti no vīriyārambhāya, dubbharatāya saṃvattanti no subharatāya; ekaṃsena, gotami, dhāreyyāsi – neso dhammo, neso vinayo, netaṃ satthusāsananti. Ye ca kho tvaṃ, gotami, dhamme jāneyyāsi – ime dhammā virāgāya saṃvattanti no sarāgāya, visaññogāya saṃvattanti no saññogāya, apacayāya saṃvattanti no ācayāya, appicchatāya saṃvattanti no mahicchatāya, santuṭṭhiyā saṃvattanti no asantuṭṭhiyā, pavivekāya saṃvattanti no saṅgaṇikāya, vīriyārambhāya saṃvattanti no kosajjāya, subharatāya saṃvattanti no dubbharatāya; ekaṃsena, gotami, dhāreyyāsi – eso dhammo, eso vinayo, etaṃ satthusāsana’’nti.
༤༠༧. ཏེན ཁོ པན སམཡེན བྷིཀྑུནཱིནཾ པཱཏིམོཀྑཾ ན ཨུདྡིསཱིཡཏི། བྷགཝཏོ ཨེཏམཏྠཾ ཨཱརོཙེསུཾ…པེ॰… ‘‘ཨནུཛཱནཱམི, བྷིཀྑཝེ, བྷིཀྑུནཱིནཾ པཱཏིམོཀྑཾ ཨུདྡིསིཏུ’’ནྟི། ཨཐ ཁོ བྷིཀྑཱུནཾ ཨེཏདཧོསི – ‘‘ཀེན ནུ ཁོ བྷིཀྑུནཱིནཾ པཱཏིམོཀྑཾ ཨུདྡིསིཏབྦ’’ནྟི? བྷགཝཏོ ཨེཏམཏྠཾ ཨཱརོཙེསུཾ། ‘‘ཨནུཛཱནཱམི, བྷིཀྑཝེ, བྷིཀྑཱུཧི བྷིཀྑུནཱིནཾ པཱཏིམོཀྑཾ ཨུདྡིསིཏུ’’ནྟི།
407. Tena kho pana samayena bhikkhunīnaṃ pātimokkhaṃ na uddisīyati. Bhagavato etamatthaṃ ārocesuṃ…pe… ‘‘anujānāmi, bhikkhave, bhikkhunīnaṃ pātimokkhaṃ uddisitu’’nti. Atha kho bhikkhūnaṃ etadahosi – ‘‘kena nu kho bhikkhunīnaṃ pātimokkhaṃ uddisitabba’’nti? Bhagavato etamatthaṃ ārocesuṃ. ‘‘Anujānāmi, bhikkhave, bhikkhūhi bhikkhunīnaṃ pātimokkhaṃ uddisitu’’nti.
ཏེན ཁོ པན སམཡེན བྷིཀྑཱུ བྷིཀྑུནུཔསྶཡཾ ཨུཔསངྐམིཏྭཱ བྷིཀྑུནཱིནཾ པཱཏིམོཀྑཾ ཨུདྡིསནྟི། མནུསྶཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཛཱཡཱཡོ ཨིམཱ ཨིམེསཾ, ཛཱརིཡོ ཨིམཱ ཨིམེསཾ, ཨིདཱནི ཨིམེ ཨིམཱཧི སདྡྷིཾ ཨབྷིརམིསྶནྟཱི’’ཏི! བྷགཝཏོ ཨེཏམཏྠཾ ཨཱརོཙེསུཾ། ‘‘ན, བྷིཀྑཝེ, བྷིཀྑཱུཧི བྷིཀྑུནཱིནཾ པཱཏིམོཀྑཾ ཨུདྡིསིཏབྦཾ། ཡོ ཨུདྡིསེཡྻ, ཨཱཔཏྟི དུཀྐཊསྶ། ཨནུཛཱནཱམི, བྷིཀྑཝེ, བྷིཀྑུནཱིཧི བྷིཀྑུནཱིནཾ པཱཏིམོཀྑཾ ཨུདྡིསིཏུ’’ནྟི། བྷིཀྑུནིཡོ ན ཛཱནནྟི – ‘‘ཨེཝཾ པཱཏིམོཀྑཾ ཨུདྡིསིཏབྦ’’ནྟི། བྷགཝཏོ ཨེཏམཏྠཾ ཨཱརོཙེསུཾ། ‘‘ཨནུཛཱནཱམི, བྷིཀྑཝེ, བྷིཀྑཱུཧི བྷིཀྑུནཱིནཾ ཨཱཙིཀྑིཏུཾ – ‘ཨེཝཾ པཱཏིམོཀྑཾ ཨུདྡིསེཡྻཱཐཱ’’’ཏི།
Tena kho pana samayena bhikkhū bhikkhunupassayaṃ upasaṅkamitvā bhikkhunīnaṃ pātimokkhaṃ uddisanti. Manussā ujjhāyanti khiyyanti vipācenti – ‘‘jāyāyo imā imesaṃ, jāriyo imā imesaṃ, idāni ime imāhi saddhiṃ abhiramissantī’’ti! Bhagavato etamatthaṃ ārocesuṃ. ‘‘Na, bhikkhave, bhikkhūhi bhikkhunīnaṃ pātimokkhaṃ uddisitabbaṃ. Yo uddiseyya, āpatti dukkaṭassa. Anujānāmi, bhikkhave, bhikkhunīhi bhikkhunīnaṃ pātimokkhaṃ uddisitu’’nti. Bhikkhuniyo na jānanti – ‘‘evaṃ pātimokkhaṃ uddisitabba’’nti. Bhagavato etamatthaṃ ārocesuṃ. ‘‘Anujānāmi, bhikkhave, bhikkhūhi bhikkhunīnaṃ ācikkhituṃ – ‘evaṃ pātimokkhaṃ uddiseyyāthā’’’ti.
༤༠༨. ཏེན ཁོ པན སམཡེན བྷིཀྑུནིཡོ ཨཱཔཏྟིཾ ན པཊིཀརོནྟི། བྷགཝཏོ ཨེཏམཏྠཾ ཨཱརོཙེསུཾ། ‘‘ན, བྷིཀྑཝེ, བྷིཀྑུནིཡཱ ཨཱཔཏྟི ན པཊིཀཱཏབྦཱ། ཡཱ ན པཊིཀརེཡྻ, ཨཱཔཏྟི དུཀྐཊསྶཱ’’ཏི། བྷིཀྑུནིཡོ ན ཛཱནནྟི – ‘‘ཨེཝཾ ཨཱཔཏྟི པཊིཀཱཏབྦཱ’’ཏི ། བྷགཝཏོ ཨེཏམཏྠཾ ཨཱརོཙེསུཾ། ‘‘ཨནུཛཱནཱམི, བྷིཀྑཝེ, བྷིཀྑཱུཧི བྷིཀྑུནཱིནཾ ཨཱཙིཀྑིཏུཾ – ‘ཨེཝཾ ཨཱཔཏྟིཾ པཊིཀརེཡྻཱཐཱ’’’ཏི། ཨཐ ཁོ བྷིཀྑཱུནཾ ཨེཏདཧོསི – ‘‘ཀེན ནུ ཁོ བྷིཀྑུནཱིནཾ ཨཱཔཏྟི པཊིགྒཧེཏབྦཱ’’ཏི? བྷགཝཏོ ཨེཏམཏྠཾ ཨཱརོཙེསུཾ། ‘‘ཨནུཛཱནཱམི, བྷིཀྑཝེ, བྷིཀྑཱུཧི བྷིཀྑུནཱིནཾ ཨཱཔཏྟིཾ པཊིགྒཧེཏུ’’ནྟི།
408. Tena kho pana samayena bhikkhuniyo āpattiṃ na paṭikaronti. Bhagavato etamatthaṃ ārocesuṃ. ‘‘Na, bhikkhave, bhikkhuniyā āpatti na paṭikātabbā. Yā na paṭikareyya, āpatti dukkaṭassā’’ti. Bhikkhuniyo na jānanti – ‘‘evaṃ āpatti paṭikātabbā’’ti . Bhagavato etamatthaṃ ārocesuṃ. ‘‘Anujānāmi, bhikkhave, bhikkhūhi bhikkhunīnaṃ ācikkhituṃ – ‘evaṃ āpattiṃ paṭikareyyāthā’’’ti. Atha kho bhikkhūnaṃ etadahosi – ‘‘kena nu kho bhikkhunīnaṃ āpatti paṭiggahetabbā’’ti? Bhagavato etamatthaṃ ārocesuṃ. ‘‘Anujānāmi, bhikkhave, bhikkhūhi bhikkhunīnaṃ āpattiṃ paṭiggahetu’’nti.
ཏེན ཁོ པན སམཡེན བྷིཀྑུནིཡོ རཐིཀཱཡཔི བྱཱུཧེཔི སིངྒྷཱཊཀེཔི བྷིཀྑུཾ པསྶིཏྭཱ པཏྟཾ བྷཱུམིཡཾ ནིཀྑིཔིཏྭཱ ཨེཀཾསཾ ཨུཏྟརཱསངྒཾ ཀརིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ཨཱཔཏྟིཾ པཊིཀརོནྟི། མནུསྶཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཛཱཡཱཡོ ཨིམཱ ཨིམེསཾ, ཛཱརིཡོ ཨིམཱ ཨིམེསཾ, རཏྟིཾ ཝིམཱནེཏྭཱ ཨིདཱནི ཁམཱཔེནྟཱི’’ཏི། བྷགཝཏོ ཨེཏམཏྠཾ ཨཱརོཙེསུཾ ། ‘‘ན, བྷིཀྑཝེ, བྷིཀྑཱུཧི བྷིཀྑུནཱིནཾ ཨཱཔཏྟི པཊིགྒཧེཏབྦཱ། ཡོ པཊིགྒཎྷེཡྻ, ཨཱཔཏྟི དུཀྐཊསྶ། ཨནུཛཱནཱམི, བྷིཀྑཝེ, བྷིཀྑུནཱིཧི བྷིཀྑུནཱིནཾ ཨཱཔཏྟིཾ པཊིགྒཧེཏུ’’ནྟི། བྷིཀྑུནིཡོ ན ཛཱནནྟི – ‘‘ཨེཝཾ ཨཱཔཏྟི པཊིགྒཧེཏབྦཱ’’ཏི། བྷགཝཏོ ཨེཏམཏྠཾ ཨཱརོཙེསུཾ། ‘‘ཨནུཛཱནཱམི, བྷིཀྑཝེ, བྷིཀྑཱུཧི བྷིཀྑུནཱིནཾ ཨཱཙིཀྑིཏུཾ – ‘ཨེཝཾ ཨཱཔཏྟིཾ པཊིགྒཎྷེཡྻཱཐཱ’’’ཏི།
Tena kho pana samayena bhikkhuniyo rathikāyapi byūhepi siṅghāṭakepi bhikkhuṃ passitvā pattaṃ bhūmiyaṃ nikkhipitvā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā āpattiṃ paṭikaronti. Manussā ujjhāyanti khiyyanti vipācenti – ‘‘jāyāyo imā imesaṃ, jāriyo imā imesaṃ, rattiṃ vimānetvā idāni khamāpentī’’ti. Bhagavato etamatthaṃ ārocesuṃ . ‘‘Na, bhikkhave, bhikkhūhi bhikkhunīnaṃ āpatti paṭiggahetabbā. Yo paṭiggaṇheyya, āpatti dukkaṭassa. Anujānāmi, bhikkhave, bhikkhunīhi bhikkhunīnaṃ āpattiṃ paṭiggahetu’’nti. Bhikkhuniyo na jānanti – ‘‘evaṃ āpatti paṭiggahetabbā’’ti. Bhagavato etamatthaṃ ārocesuṃ. ‘‘Anujānāmi, bhikkhave, bhikkhūhi bhikkhunīnaṃ ācikkhituṃ – ‘evaṃ āpattiṃ paṭiggaṇheyyāthā’’’ti.
༤༠༩. ཏེན ཁོ པན སམཡེན བྷིཀྑུནཱིནཾ ཀམྨཾ ན ཀརིཡཏི ། བྷགཝཏོ ཨེཏམཏྠཾ ཨཱརོཙེསུཾ། ‘‘ཨནུཛཱནཱམི, བྷིཀྑཝེ, བྷིཀྑུནཱིནཾ ཀམྨཾ ཀཱཏུ’’ནྟི། ཨཐ ཁོ བྷིཀྑཱུནཾ ཨེཏདཧོསི – ‘‘ཀེན ནུ ཁོ བྷིཀྑུནཱིནཾ ཀམྨཾ ཀཱཏབྦ’’ནྟི? བྷགཝཏོ ཨེཏམཏྠཾ ཨཱརོཙེསུཾ། ‘‘ཨནུཛཱནཱམི, བྷིཀྑཝེ, བྷིཀྑཱུཧི བྷིཀྑུནཱིནཾ ཀམྨཾ ཀཱཏུ’’ནྟི།
409. Tena kho pana samayena bhikkhunīnaṃ kammaṃ na kariyati . Bhagavato etamatthaṃ ārocesuṃ. ‘‘Anujānāmi, bhikkhave, bhikkhunīnaṃ kammaṃ kātu’’nti. Atha kho bhikkhūnaṃ etadahosi – ‘‘kena nu kho bhikkhunīnaṃ kammaṃ kātabba’’nti? Bhagavato etamatthaṃ ārocesuṃ. ‘‘Anujānāmi, bhikkhave, bhikkhūhi bhikkhunīnaṃ kammaṃ kātu’’nti.
ཏེན ཁོ པན སམཡེན ཀཏཀམྨཱ བྷིཀྑུནིཡོ རཐིཀཱཡཔི བྱཱུཧེཔི སིངྒྷཱཊཀེཔི བྷིཀྑུཾ པསྶིཏྭཱ པཏྟཾ བྷཱུམིཡཾ ནིཀྑིཔིཏྭཱ ཨེཀཾསཾ ཨུཏྟརཱསངྒཾ ཀརིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ཁམཱཔེནྟི ‘ཨེཝཾ ནཱུན ཀཱཏབྦ’ནྟི མཉྙམཱནཱ། མནུསྶཱ ཏཐེཝ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཛཱཡཱཡོ ཨིམཱ ཨིམེསཾ, ཛཱརིཡོ ཨིམཱ ཨིམེསཾ, རཏྟིཾ ཝིམཱནེཏྭཱ ཨིདཱནི ཁམཱཔེནྟཱི’’ཏི། བྷགཝཏོ ཨེཏམཏྠཾ ཨཱརོཙེསུཾ། ‘‘ན, བྷིཀྑཝེ, བྷིཀྑཱུཧི བྷིཀྑུནཱིནཾ ཀམྨཾ ཀཱཏབྦཾ། ཡོ ཀརེཡྻ, ཨཱཔཏྟི དུཀྐཊསྶ། ཨནུཛཱནཱམི, བྷིཀྑཝེ, བྷིཀྑུནཱིཧི བྷིཀྑུནཱིནཾ ཀམྨཾ ཀཱཏུ’’ནྟི། བྷིཀྑུནིཡོ ན ཛཱནནྟི – ‘‘ཨེཝཾ ཀམྨཾ ཀཱཏབྦ’’ནྟི། བྷགཝཏོ ཨེཏམཏྠཾ ཨཱརོཙེསུཾ། ‘‘ཨནུཛཱནཱམི, བྷིཀྑཝེ, བྷིཀྑཱུཧི བྷིཀྑུནཱིནཾ ཨཱཙིཀྑིཏུཾ – ‘ཨེཝཾ ཀམྨཾ ཀརེཡྻཱཐཱ’’’ཏི།
Tena kho pana samayena katakammā bhikkhuniyo rathikāyapi byūhepi siṅghāṭakepi bhikkhuṃ passitvā pattaṃ bhūmiyaṃ nikkhipitvā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā khamāpenti ‘evaṃ nūna kātabba’nti maññamānā. Manussā tatheva ujjhāyanti khiyyanti vipācenti – ‘‘jāyāyo imā imesaṃ, jāriyo imā imesaṃ, rattiṃ vimānetvā idāni khamāpentī’’ti. Bhagavato etamatthaṃ ārocesuṃ. ‘‘Na, bhikkhave, bhikkhūhi bhikkhunīnaṃ kammaṃ kātabbaṃ. Yo kareyya, āpatti dukkaṭassa. Anujānāmi, bhikkhave, bhikkhunīhi bhikkhunīnaṃ kammaṃ kātu’’nti. Bhikkhuniyo na jānanti – ‘‘evaṃ kammaṃ kātabba’’nti. Bhagavato etamatthaṃ ārocesuṃ. ‘‘Anujānāmi, bhikkhave, bhikkhūhi bhikkhunīnaṃ ācikkhituṃ – ‘evaṃ kammaṃ kareyyāthā’’’ti.
༤༡༠. ཏེན ཁོ པན སམཡེན བྷིཀྑུནིཡོ སངྒྷམཛ྄ཛྷེ བྷཎྜནཛཱཏཱ ཀལཧཛཱཏཱ ཝིཝཱདཱཔནྣཱ ཨཉྙམཉྙཾ མུཁསཏྟཱིཧི ཝིཏུདནྟཱ ཝིཧརནྟི། ན སཀྐོནྟི ཏཾ ཨདྷིཀརཎཾ ཝཱུཔསམེཏུཾ། བྷགཝཏོ ཨེཏམཏྠཾ ཨཱརོཙེསུཾ། ‘‘ཨནུཛཱནཱམི, བྷིཀྑཝེ, བྷིཀྑཱུཧི བྷིཀྑུནཱིནཾ ཨདྷིཀརཎཾ ཝཱུཔསམེཏུ’’ནྟི།
410. Tena kho pana samayena bhikkhuniyo saṅghamajjhe bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti. Na sakkonti taṃ adhikaraṇaṃ vūpasametuṃ. Bhagavato etamatthaṃ ārocesuṃ. ‘‘Anujānāmi, bhikkhave, bhikkhūhi bhikkhunīnaṃ adhikaraṇaṃ vūpasametu’’nti.
ཏེན ཁོ པན སམཡེན བྷིཀྑཱུ བྷིཀྑུནཱིནཾ ཨདྷིཀརཎཾ ཝཱུཔསམེནྟི། ཏསྨིཾ ཁོ པན ཨདྷིཀརཎེ ཝིནིཙྪིཡམཱནེ དིསྶནྟི བྷིཀྑུནིཡོ ཀམྨཔྤཏྟཱཡོཔི ཨཱཔཏྟིགཱམིནིཡོཔི། བྷིཀྑུནིཡོ ཨེཝམཱཧཾསུ – ‘‘སཱདྷུ, བྷནྟེ, ཨཡྻཱཝ བྷིཀྑུནཱིནཾ ཀམྨཾ ཀརོནྟུ, ཨཡྻཱཝ བྷིཀྑུནཱིནཾ ཨཱཔཏྟིཾ པཊིགྒཎྷནྟུ; ཨེཝཉྷི བྷགཝཏཱ པཉྙཏྟཾ བྷིཀྑཱུཧི བྷིཀྑུནཱིནཾ ཨདྷིཀརཎཾ ཝཱུཔསམེཏབྦ’’ནྟི། བྷགཝཏོ ཨེཏམཏྠཾ ཨཱརོཙེསུཾ། ‘‘ཨནུཛཱནཱམི, བྷིཀྑཝེ, བྷིཀྑཱུཧི བྷིཀྑུནཱིནཾ ཀམྨཾ ཨཱརོཔེཏྭཱ བྷིཀྑུནཱིནཾ ནིཡྻཱདེཏུཾ – བྷིཀྑུནཱིཧི བྷིཀྑུནཱིནཾ ཀམྨཾ ཀཱཏུཾ, བྷིཀྑཱུཧི བྷིཀྑུནཱིནཾ ཨཱཔཏྟིཾ ཨཱརོཔེཏྭཱ བྷིཀྑུནཱིནཾ ནིཡྻཱདེཏུཾ, བྷིཀྑུནཱིཧི བྷིཀྑུནཱིནཾ ཨཱཔཏྟིཾ པཊིགྒཧེཏུ’’ནྟི།
Tena kho pana samayena bhikkhū bhikkhunīnaṃ adhikaraṇaṃ vūpasamenti. Tasmiṃ kho pana adhikaraṇe vinicchiyamāne dissanti bhikkhuniyo kammappattāyopi āpattigāminiyopi. Bhikkhuniyo evamāhaṃsu – ‘‘sādhu, bhante, ayyāva bhikkhunīnaṃ kammaṃ karontu, ayyāva bhikkhunīnaṃ āpattiṃ paṭiggaṇhantu; evañhi bhagavatā paññattaṃ bhikkhūhi bhikkhunīnaṃ adhikaraṇaṃ vūpasametabba’’nti. Bhagavato etamatthaṃ ārocesuṃ. ‘‘Anujānāmi, bhikkhave, bhikkhūhi bhikkhunīnaṃ kammaṃ āropetvā bhikkhunīnaṃ niyyādetuṃ – bhikkhunīhi bhikkhunīnaṃ kammaṃ kātuṃ, bhikkhūhi bhikkhunīnaṃ āpattiṃ āropetvā bhikkhunīnaṃ niyyādetuṃ, bhikkhunīhi bhikkhunīnaṃ āpattiṃ paṭiggahetu’’nti.
ཏེན ཁོ པན སམཡེན ཨུཔྤལཝཎྞཱཡ བྷིཀྑུནིཡཱ ཨནྟེཝཱསིནཱི བྷིཀྑུནཱི སཏྟ ཝསྶཱནི བྷགཝནྟཾ ཨནུབནྡྷཱ ཧོཏི ཝིནཡཾ པརིཡཱཔུཎནྟཱི། ཏསྶཱ མུཊྛསྶཏིནིཡཱ གཧིཏོ གཧིཏོ མུསྶཏི། ཨསྶོསི ཁོ སཱ བྷིཀྑུནཱི – ‘‘བྷགཝཱ ཀིར སཱཝཏྠིཾ གནྟུཀཱམོ’’ཏི། ཨཐ ཁོ ཏསྶཱ བྷིཀྑུནིཡཱ ཨེཏདཧོསི – ‘‘ཨཧཾ ཁོ སཏྟ ཝསྶཱནི བྷགཝནྟཾ ཨནུབནྡྷིཾ ཝིནཡཾ པརིཡཱཔུཎནྟཱི། ཏསྶཱ མེ མུཊྛསྶཏིནིཡཱ གཧིཏོ གཧིཏོ མུསྶཏི། དུཀྐརཾ ཁོ པན མཱཏུགཱམེན ཡཱཝཛཱིཝཾ སཏྠཱརཾ ཨནུབནྡྷིཏུཾ། ཀཐཾ ནུ ཁོ མཡཱ པཊིཔཛྫིཏབྦ’’ནྟི? ཨཐ ཁོ སཱ བྷིཀྑུནཱི བྷིཀྑུནཱིནཾ ཨེཏམཏྠཾ ཨཱརོཙེསི། བྷིཀྑུནིཡོ བྷིཀྑཱུནཾ ཨེཏམཏྠཾ ཨཱརོཙེསུཾ། བྷིཀྑཱུ བྷགཝཏོ ཨེཏམཏྠཾ ཨཱརོཙེསུཾ། ‘‘ཨནུཛཱནཱམི, བྷིཀྑཝེ, བྷིཀྑཱུཧི བྷིཀྑུནཱིནཾ ཝིནཡཾ ཝཱཙེཏུ’’ནྟི།
Tena kho pana samayena uppalavaṇṇāya bhikkhuniyā antevāsinī bhikkhunī satta vassāni bhagavantaṃ anubandhā hoti vinayaṃ pariyāpuṇantī. Tassā muṭṭhassatiniyā gahito gahito mussati. Assosi kho sā bhikkhunī – ‘‘bhagavā kira sāvatthiṃ gantukāmo’’ti. Atha kho tassā bhikkhuniyā etadahosi – ‘‘ahaṃ kho satta vassāni bhagavantaṃ anubandhiṃ vinayaṃ pariyāpuṇantī. Tassā me muṭṭhassatiniyā gahito gahito mussati. Dukkaraṃ kho pana mātugāmena yāvajīvaṃ satthāraṃ anubandhituṃ. Kathaṃ nu kho mayā paṭipajjitabba’’nti? Atha kho sā bhikkhunī bhikkhunīnaṃ etamatthaṃ ārocesi. Bhikkhuniyo bhikkhūnaṃ etamatthaṃ ārocesuṃ. Bhikkhū bhagavato etamatthaṃ ārocesuṃ. ‘‘Anujānāmi, bhikkhave, bhikkhūhi bhikkhunīnaṃ vinayaṃ vācetu’’nti.
པཋམབྷཱཎཝཱརོ ནིཊྛིཏོ།
Paṭhamabhāṇavāro niṭṭhito.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / ཙཱུལ༹ཝགྒ-ཨཊྛཀཐཱ • Cūḷavagga-aṭṭhakathā / བྷིཀྑུནཱིཨུཔསམྤདཱནུཛཱནནཀཐཱ • Bhikkhunīupasampadānujānanakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / བྷིཀྑུནཱིཨུཔསམྤནྣཱནུཛཱནནཀཐཱཝཎྞནཱ • Bhikkhunīupasampannānujānanakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / བྷིཀྑུནཱིཨུཔསམྤདཱནུཛཱནནཀཐཱཝཎྞནཱ • Bhikkhunīupasampadānujānanakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / བྷིཀྑུནཱིཨུཔསམྤདཱནུཛཱནནཀཐཱཝཎྞནཱ • Bhikkhunīupasampadānujānanakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / བྷིཀྑུནཱིཨུཔསམྤདཱནུཛཱནནཀཐཱ • Bhikkhunīupasampadānujānanakathā
