| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
பி⁴க்கு²னீஉபஸம்பன்னானுஜானநகதா²வண்ணனா
Bhikkhunīupasampannānujānanakathāvaṇṇanā
404-405. யத³க்³கே³னாதி யங் தி³வஸங் ஆதி³ங் கத்வா. ததே³வாதி தஸ்மிஞ்ஞேவ தி³வஸே. அனுஞ்ஞத்தியாதி அனுஞ்ஞாய. ஏகாஹங், ப⁴ந்தே ஆனந்த³, ப⁴க³வந்தங் வரங் யாசாமீதி ‘‘ஏவமேவ கோ² அஹங், ப⁴ந்தே ஆனந்த³, இமே அட்ட² க³ருத⁴ம்மே படிக்³க³ண்ஹாமி யாவஜீவங் அனதிக்கமனீயே’’தி படிஜானித்வா இதா³னி கஸ்மா வரங் யாசதீதி சே? பரூபவாத³விவஜ்ஜனத்த²ங். ஏவஞ்ஹி கேசி வதெ³ய்யுங் ‘‘மஹாபஜாபதியா பட²மங் ஸம்படிச்சி²தத்தா பி⁴க்கூ²னங் பி⁴க்கு²னீனஞ்ச யதா²வுட்³ட⁴ங் அபி⁴வாத³னங் நாஹோஸி, ஸா சே வரங் யாசெய்ய, ப⁴க³வா அனுஜானெய்யா’’தி.
404-405.Yadaggenāti yaṃ divasaṃ ādiṃ katvā. Tadevāti tasmiññeva divase. Anuññattiyāti anuññāya. Ekāhaṃ, bhante ānanda, bhagavantaṃ varaṃ yācāmīti ‘‘evameva kho ahaṃ, bhante ānanda, ime aṭṭha garudhamme paṭiggaṇhāmi yāvajīvaṃ anatikkamanīye’’ti paṭijānitvā idāni kasmā varaṃ yācatīti ce? Parūpavādavivajjanatthaṃ. Evañhi keci vadeyyuṃ ‘‘mahāpajāpatiyā paṭhamaṃ sampaṭicchitattā bhikkhūnaṃ bhikkhunīnañca yathāvuḍḍhaṃ abhivādanaṃ nāhosi, sā ce varaṃ yāceyya, bhagavā anujāneyyā’’ti.
406. ஸராகா³யாதி ஸராக³பா⁴வாய காமராக³ப⁴வராக³பரிப்³ரூஹனாய. ஸஞ்ஞோகா³யாதி வட்டே ஸங்யோஜனத்தா²ய. ஆசயாயாதி வட்டஸ்ஸ வட்³ட⁴னத்தா²ய. மஹிச்ச²தாயாதி மஹிச்ச²பா⁴வாய. அஸந்துட்டி²யாதி அஸந்துட்டி²பா⁴வாய. ஸங்க³ணிகாயாதி கிலேஸஸங்க³ணக³ணஸங்க³ணவிஹாராய. கோஸஜ்ஜாயாதி குஸீதபா⁴வாய. து³ப்³ப⁴ரதாயாதி து³ப்போஸதாய. விராகா³யாதி ஸகலவட்டதோ விரஜ்ஜனத்தா²ய. விஸஞ்ஞோகா³யாதி காமராகா³தீ³ஹி விஸங்யுஜ்ஜனத்தா²ய. அபசயாயாதி ஸப்³ப³ஸ்ஸபி வட்டஸ்ஸ அபசயத்தா²ய, நிப்³பா³னாயாதி அத்தோ². அப்பிச்ச²தாயாதி பச்சயப்பிச்ச²தாதி³வஸேன ஸப்³ப³ஸோ இச்சா²பக³மாய. ஸந்துட்டி²யாதி த்³வாத³ஸவித⁴ஸந்துட்டி²பா⁴வாய. பவிவேகாயாதி பவிவித்தபா⁴வாய காயவிவேகாதி³தத³ங்க³விவேகாதி³விவேகஸித்³தி⁴யா. வீரியாரம்பா⁴யாதி காயிகஸ்ஸ சேவ சேதஸிகஸ்ஸ ச வீரியஸ்ஸ பக்³க³ண்ஹனத்தா²ய. ஸுப⁴ரதாயாதி ஸுக²போஸனத்தா²ய. ஏவங் யோ பரியத்தித⁴ம்மோ உக்³க³ஹணதா⁴ரணபரிபுச்சா²மனஸிகாரவஸேன யோனிஸோ படிபஜ்ஜந்தஸ்ஸ ஸராகா³தி³பா⁴வபரிவஜ்ஜனஸ்ஸ காரணங் ஹுத்வா விராகா³தி³பா⁴வாய ஸங்வத்ததி, ஏகங்ஸதோ ஏஸோ த⁴ம்மோ, ஏஸோ வினயோ ஸம்மதே³வ அபாயாதீ³ஸு அபதனவஸேன தா⁴ரணதோ கிலேஸானங் வினயனதோ, ஸத்து² ஸம்மாஸம்பு³த்³த⁴ஸ்ஸ ஓவாதா³னுஸிட்டி²பா⁴வதோ ஏதங் ஸத்து²ஸாஸனந்தி தா⁴ரெய்யாஸி ஜானெய்யாஸி, அவபு³ஜ்ஜெ²ய்யாஸீதி அத்தோ². இமஸ்மிங் ஸுத்தே பட²மவாரேன வட்டங், து³தியவாரேன விவட்டங் கதி²தங்.
406.Sarāgāyāti sarāgabhāvāya kāmarāgabhavarāgaparibrūhanāya. Saññogāyāti vaṭṭe saṃyojanatthāya. Ācayāyāti vaṭṭassa vaḍḍhanatthāya. Mahicchatāyāti mahicchabhāvāya. Asantuṭṭhiyāti asantuṭṭhibhāvāya. Saṅgaṇikāyāti kilesasaṅgaṇagaṇasaṅgaṇavihārāya. Kosajjāyāti kusītabhāvāya. Dubbharatāyāti dupposatāya. Virāgāyāti sakalavaṭṭato virajjanatthāya. Visaññogāyāti kāmarāgādīhi visaṃyujjanatthāya. Apacayāyāti sabbassapi vaṭṭassa apacayatthāya, nibbānāyāti attho. Appicchatāyāti paccayappicchatādivasena sabbaso icchāpagamāya. Santuṭṭhiyāti dvādasavidhasantuṭṭhibhāvāya. Pavivekāyāti pavivittabhāvāya kāyavivekāditadaṅgavivekādivivekasiddhiyā. Vīriyārambhāyāti kāyikassa ceva cetasikassa ca vīriyassa paggaṇhanatthāya. Subharatāyāti sukhaposanatthāya. Evaṃ yo pariyattidhammo uggahaṇadhāraṇaparipucchāmanasikāravasena yoniso paṭipajjantassa sarāgādibhāvaparivajjanassa kāraṇaṃ hutvā virāgādibhāvāya saṃvattati, ekaṃsato eso dhammo, eso vinayo sammadeva apāyādīsu apatanavasena dhāraṇato kilesānaṃ vinayanato, satthu sammāsambuddhassa ovādānusiṭṭhibhāvato etaṃ satthusāsananti dhāreyyāsi jāneyyāsi, avabujjheyyāsīti attho. Imasmiṃ sutte paṭhamavārena vaṭṭaṃ, dutiyavārena vivaṭṭaṃ kathitaṃ.
409-410. விமானெத்வாதி அபரஜ்ஜி²த்வா. கம்மப்பத்தாயோபீதி கம்மாரஹாபி. ஆபத்திகா³மினியோபீதி ஆபத்திஆபன்னாயோபி. வுத்தனயேனேவ காரேதப்³ப³தங் ஆபஜ்ஜந்தீதி ததா²கரணஸ்ஸ படிக்கி²த்தத்தா து³க்கடேன காரேதப்³ப³தங் ஆபஜ்ஜந்தி.
409-410.Vimānetvāti aparajjhitvā. Kammappattāyopīti kammārahāpi. Āpattigāminiyopīti āpattiāpannāyopi. Vuttanayeneva kāretabbataṃ āpajjantīti tathākaraṇassa paṭikkhittattā dukkaṭena kāretabbataṃ āpajjanti.
413-5. த்³வே திஸ்ஸோ பி⁴க்கு²னியோதி த்³வீஹி தீஹி பி⁴க்கு²னீஹி. ந ஆரோசெந்தீதி பாதிமொக்கு²த்³தே³ஸகஸ்ஸ ந ஆரோசெந்தி. ந பச்சாஹரந்தீதி பி⁴க்கு²னீனங் ந பச்சாஹரந்தி. விஸேஸகந்தி வத்தப⁴ங்க³ங்.
413-5.Dve tisso bhikkhuniyoti dvīhi tīhi bhikkhunīhi. Na ārocentīti pātimokkhuddesakassa na ārocenti. Na paccāharantīti bhikkhunīnaṃ na paccāharanti. Visesakanti vattabhaṅgaṃ.
420. தேன ச பி⁴க்கு² நிமந்தேதப்³போ³தி ஸாமீசித³ஸ்ஸனமேதங், ந பன அனிமந்தியா ஆபத்தி.
420.Tena ca bhikkhu nimantetabboti sāmīcidassanametaṃ, na pana animantiyā āpatti.
425. தயோ நிஸ்ஸயேதி ஸேனாஸனநிஸ்ஸயங் அபனெத்வா அபரே தயோ நிஸ்ஸயே. ருக்க²மூலஸேனாஸனஞ்ஹி ஸா ந லப⁴தி.
425.Tayo nissayeti senāsananissayaṃ apanetvā apare tayo nissaye. Rukkhamūlasenāsanañhi sā na labhati.
428. அனுவாத³ங் பட்ட²பெந்தீதி இஸ்ஸரியங் பவத்தெந்தி.
428.Anuvādaṃ paṭṭhapentīti issariyaṃ pavattenti.
430. பி⁴க்கு²தூ³தேன உபஸம்பாதெ³ந்தீதி பி⁴க்கு²யேவ தூ³தோ பி⁴க்கு²தூ³தோ, தேன பி⁴க்கு²தூ³தேன, பி⁴க்கு²தூ³தங் கத்வா உபஸம்பாதெ³ந்தீதி அத்தோ².
430.Bhikkhudūtena upasampādentīti bhikkhuyeva dūto bhikkhudūto, tena bhikkhudūtena, bhikkhudūtaṃ katvā upasampādentīti attho.
431. ந ஸம்மதீதி நப்பஹோதி. நவகம்மந்தி நவகம்மங் கத்வா ‘‘எத்தகானி வஸ்ஸானி வஸதூ’’தி அபலோகெத்வா ஸங்கி⁴கபூ⁴மிதா³னங்.
431.Na sammatīti nappahoti. Navakammanti navakammaṃ katvā ‘‘ettakāni vassāni vasatū’’ti apaloketvā saṅghikabhūmidānaṃ.
432. ஸன்னிஸின்னக³ப்³பா⁴தி பதிட்டி²தக³ப்³பா⁴.
432.Sannisinnagabbhāti patiṭṭhitagabbhā.
434. பப்³ப³ஜ்ஜம்பி ந லப⁴தீதி தித்தா²யதனஸங்கந்தாய அப⁴ப்³ப³பா⁴வூபக³மனதோ ந லப⁴தி. இத³ங் ஓதி³ஸ்ஸ அனுஞ்ஞாதங் வட்டதீதி ஏகதோ வா உப⁴தோ வா அவஸ்ஸவே ஸதிபி ஓதி³ஸ்ஸ அனுஞ்ஞாதத்தா வட்டதி. ஸேஸமெத்த² பாளிதோ அட்ட²கதா²தோ ச ஸுவிஞ்ஞெய்யமேவாதி.
434.Pabbajjampi na labhatīti titthāyatanasaṅkantāya abhabbabhāvūpagamanato na labhati. Idaṃ odissa anuññātaṃ vaṭṭatīti ekato vā ubhato vā avassave satipi odissa anuññātattā vaṭṭati. Sesamettha pāḷito aṭṭhakathāto ca suviññeyyamevāti.
பி⁴க்கு²னீஉபஸம்பன்னானுஜானநகதா²வண்ணனா நிட்டி²தா.
Bhikkhunīupasampannānujānanakathāvaṇṇanā niṭṭhitā.
பி⁴க்கு²னிக்க²ந்த⁴கவண்ணனா நிட்டி²தா.
Bhikkhunikkhandhakavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi
பி⁴க்கு²னீஉபஸம்பதா³னுஜானநங் • Bhikkhunīupasampadānujānanaṃ
2. து³தியபா⁴ணவாரோ • 2. Dutiyabhāṇavāro
3. ததியபா⁴ணவாரோ • 3. Tatiyabhāṇavāro
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / பி⁴க்கு²னீஉபஸம்பதா³னுஜானநகதா² • Bhikkhunīupasampadānujānanakathā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பி⁴க்கு²னீஉபஸம்பதா³னுஜானநகதா²வண்ணனா • Bhikkhunīupasampadānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பி⁴க்கு²னீஉபஸம்பதா³னுஜானநகதா²வண்ணனா • Bhikkhunīupasampadānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / பி⁴க்கு²னீஉபஸம்பதா³னுஜானநகதா² • Bhikkhunīupasampadānujānanakathā
