| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
ভিক্খুনীউপসম্পন্নানুজাননকথাৰণ্ণনা
Bhikkhunīupasampannānujānanakathāvaṇṇanā
৪০৪-৪০৫. যদগ্গেনাতি যং দিৰসং আদিং কত্ৰা। তদেৰাতি তস্মিঞ্ঞেৰ দিৰসে। অনুঞ্ঞত্তিযাতি অনুঞ্ঞায। একাহং, ভন্তে আনন্দ, ভগৰন্তং ৰরং যাচামীতি ‘‘এৰমেৰ খো অহং, ভন্তে আনন্দ, ইমে অট্ঠ গরুধম্মে পটিগ্গণ্হামি যাৰজীৰং অনতিক্কমনীযে’’তি পটিজানিত্ৰা ইদানি কস্মা ৰরং যাচতীতি চে? পরূপৰাদৰিৰজ্জনত্থং। এৰঞ্হি কেচি ৰদেয্যুং ‘‘মহাপজাপতিযা পঠমং সম্পটিচ্ছিতত্তা ভিক্খূনং ভিক্খুনীনঞ্চ যথাৰুড্ঢং অভিৰাদনং নাহোসি, সা চে ৰরং যাচেয্য, ভগৰা অনুজানেয্যা’’তি।
404-405.Yadaggenāti yaṃ divasaṃ ādiṃ katvā. Tadevāti tasmiññeva divase. Anuññattiyāti anuññāya. Ekāhaṃ, bhante ānanda, bhagavantaṃ varaṃ yācāmīti ‘‘evameva kho ahaṃ, bhante ānanda, ime aṭṭha garudhamme paṭiggaṇhāmi yāvajīvaṃ anatikkamanīye’’ti paṭijānitvā idāni kasmā varaṃ yācatīti ce? Parūpavādavivajjanatthaṃ. Evañhi keci vadeyyuṃ ‘‘mahāpajāpatiyā paṭhamaṃ sampaṭicchitattā bhikkhūnaṃ bhikkhunīnañca yathāvuḍḍhaṃ abhivādanaṃ nāhosi, sā ce varaṃ yāceyya, bhagavā anujāneyyā’’ti.
৪০৬. সরাগাযাতি সরাগভাৰায কামরাগভৰরাগপরিব্রূহনায। সঞ্ঞোগাযাতি ৰট্টে সংযোজনত্থায। আচযাযাতি ৰট্টস্স ৰড্ঢনত্থায। মহিচ্ছতাযাতি মহিচ্ছভাৰায। অসন্তুট্ঠিযাতি অসন্তুট্ঠিভাৰায। সঙ্গণিকাযাতি কিলেসসঙ্গণগণসঙ্গণৰিহারায। কোসজ্জাযাতি কুসীতভাৰায। দুব্ভরতাযাতি দুপ্পোসতায। ৰিরাগাযাতি সকলৰট্টতো ৰিরজ্জনত্থায। ৰিসঞ্ঞোগাযাতি কামরাগাদীহি ৰিসংযুজ্জনত্থায। অপচযাযাতি সব্বস্সপি ৰট্টস্স অপচযত্থায, নিব্বানাযাতি অত্থো। অপ্পিচ্ছতাযাতি পচ্চযপ্পিচ্ছতাদিৰসেন সব্বসো ইচ্ছাপগমায। সন্তুট্ঠিযাতি দ্ৰাদসৰিধসন্তুট্ঠিভাৰায। পৰিৰেকাযাতি পৰিৰিত্তভাৰায কাযৰিৰেকাদিতদঙ্গৰিৰেকাদিৰিৰেকসিদ্ধিযা। ৰীরিযারম্ভাযাতি কাযিকস্স চেৰ চেতসিকস্স চ ৰীরিযস্স পগ্গণ্হনত্থায। সুভরতাযাতি সুখপোসনত্থায। এৰং যো পরিযত্তিধম্মো উগ্গহণধারণপরিপুচ্ছামনসিকারৰসেন যোনিসো পটিপজ্জন্তস্স সরাগাদিভাৰপরিৰজ্জনস্স কারণং হুত্ৰা ৰিরাগাদিভাৰায সংৰত্ততি, একংসতো এসো ধম্মো, এসো ৰিনযো সম্মদেৰ অপাযাদীসু অপতনৰসেন ধারণতো কিলেসানং ৰিনযনতো, সত্থু সম্মাসম্বুদ্ধস্স ওৰাদানুসিট্ঠিভাৰতো এতং সত্থুসাসনন্তি ধারেয্যাসি জানেয্যাসি, অৰবুজ্ঝেয্যাসীতি অত্থো। ইমস্মিং সুত্তে পঠমৰারেন ৰট্টং, দুতিযৰারেন ৰিৰট্টং কথিতং।
406.Sarāgāyāti sarāgabhāvāya kāmarāgabhavarāgaparibrūhanāya. Saññogāyāti vaṭṭe saṃyojanatthāya. Ācayāyāti vaṭṭassa vaḍḍhanatthāya. Mahicchatāyāti mahicchabhāvāya. Asantuṭṭhiyāti asantuṭṭhibhāvāya. Saṅgaṇikāyāti kilesasaṅgaṇagaṇasaṅgaṇavihārāya. Kosajjāyāti kusītabhāvāya. Dubbharatāyāti dupposatāya. Virāgāyāti sakalavaṭṭato virajjanatthāya. Visaññogāyāti kāmarāgādīhi visaṃyujjanatthāya. Apacayāyāti sabbassapi vaṭṭassa apacayatthāya, nibbānāyāti attho. Appicchatāyāti paccayappicchatādivasena sabbaso icchāpagamāya. Santuṭṭhiyāti dvādasavidhasantuṭṭhibhāvāya. Pavivekāyāti pavivittabhāvāya kāyavivekāditadaṅgavivekādivivekasiddhiyā. Vīriyārambhāyāti kāyikassa ceva cetasikassa ca vīriyassa paggaṇhanatthāya. Subharatāyāti sukhaposanatthāya. Evaṃ yo pariyattidhammo uggahaṇadhāraṇaparipucchāmanasikāravasena yoniso paṭipajjantassa sarāgādibhāvaparivajjanassa kāraṇaṃ hutvā virāgādibhāvāya saṃvattati, ekaṃsato eso dhammo, eso vinayo sammadeva apāyādīsu apatanavasena dhāraṇato kilesānaṃ vinayanato, satthu sammāsambuddhassa ovādānusiṭṭhibhāvato etaṃ satthusāsananti dhāreyyāsi jāneyyāsi, avabujjheyyāsīti attho. Imasmiṃ sutte paṭhamavārena vaṭṭaṃ, dutiyavārena vivaṭṭaṃ kathitaṃ.
৪০৯-৪১০. ৰিমানেত্ৰাতি অপরজ্ঝিত্ৰা। কম্মপ্পত্তাযোপীতি কম্মারহাপি। আপত্তিগামিনিযোপীতি আপত্তিআপন্নাযোপি। ৰুত্তনযেনেৰ কারেতব্বতং আপজ্জন্তীতি তথাকরণস্স পটিক্খিত্তত্তা দুক্কটেন কারেতব্বতং আপজ্জন্তি।
409-410.Vimānetvāti aparajjhitvā. Kammappattāyopīti kammārahāpi. Āpattigāminiyopīti āpattiāpannāyopi. Vuttanayeneva kāretabbataṃ āpajjantīti tathākaraṇassa paṭikkhittattā dukkaṭena kāretabbataṃ āpajjanti.
৪১৩-৫. দ্ৰে তিস্সো ভিক্খুনিযোতি দ্ৰীহি তীহি ভিক্খুনীহি। ন আরোচেন্তীতি পাতিমোক্খুদ্দেসকস্স ন আরোচেন্তি। ন পচ্চাহরন্তীতি ভিক্খুনীনং ন পচ্চাহরন্তি। ৰিসেসকন্তি ৰত্তভঙ্গং।
413-5.Dve tisso bhikkhuniyoti dvīhi tīhi bhikkhunīhi. Na ārocentīti pātimokkhuddesakassa na ārocenti. Na paccāharantīti bhikkhunīnaṃ na paccāharanti. Visesakanti vattabhaṅgaṃ.
৪২০. তেন চ ভিক্খু নিমন্তেতব্বোতি সামীচিদস্সনমেতং, ন পন অনিমন্তিযা আপত্তি।
420.Tena ca bhikkhu nimantetabboti sāmīcidassanametaṃ, na pana animantiyā āpatti.
৪২৫. তযো নিস্সযেতি সেনাসননিস্সযং অপনেত্ৰা অপরে তযো নিস্সযে। রুক্খমূলসেনাসনঞ্হি সা ন লভতি।
425.Tayo nissayeti senāsananissayaṃ apanetvā apare tayo nissaye. Rukkhamūlasenāsanañhi sā na labhati.
৪২৮. অনুৰাদং পট্ঠপেন্তীতি ইস্সরিযং পৰত্তেন্তি।
428.Anuvādaṃ paṭṭhapentīti issariyaṃ pavattenti.
৪৩০. ভিক্খুদূতেন উপসম্পাদেন্তীতি ভিক্খুযেৰ দূতো ভিক্খুদূতো, তেন ভিক্খুদূতেন, ভিক্খুদূতং কত্ৰা উপসম্পাদেন্তীতি অত্থো।
430.Bhikkhudūtena upasampādentīti bhikkhuyeva dūto bhikkhudūto, tena bhikkhudūtena, bhikkhudūtaṃ katvā upasampādentīti attho.
৪৩১. ন সম্মতীতি নপ্পহোতি। নৰকম্মন্তি নৰকম্মং কত্ৰা ‘‘এত্তকানি ৰস্সানি ৰসতূ’’তি অপলোকেত্ৰা সঙ্ঘিকভূমিদানং।
431.Na sammatīti nappahoti. Navakammanti navakammaṃ katvā ‘‘ettakāni vassāni vasatū’’ti apaloketvā saṅghikabhūmidānaṃ.
৪৩২. সন্নিসিন্নগব্ভাতি পতিট্ঠিতগব্ভা।
432.Sannisinnagabbhāti patiṭṭhitagabbhā.
৪৩৪. পব্বজ্জম্পি ন লভতীতি তিত্থাযতনসঙ্কন্তায অভব্বভাৰূপগমনতো ন লভতি। ইদং ওদিস্স অনুঞ্ঞাতং ৰট্টতীতি একতো ৰা উভতো ৰা অৰস্সৰে সতিপি ওদিস্স অনুঞ্ঞাতত্তা ৰট্টতি। সেসমেত্থ পাল়িতো অট্ঠকথাতো চ সুৰিঞ্ঞেয্যমেৰাতি।
434.Pabbajjampi na labhatīti titthāyatanasaṅkantāya abhabbabhāvūpagamanato na labhati. Idaṃ odissa anuññātaṃ vaṭṭatīti ekato vā ubhato vā avassave satipi odissa anuññātattā vaṭṭati. Sesamettha pāḷito aṭṭhakathāto ca suviññeyyamevāti.
ভিক্খুনীউপসম্পন্নানুজাননকথাৰণ্ণনা নিট্ঠিতা।
Bhikkhunīupasampannānujānanakathāvaṇṇanā niṭṭhitā.
ভিক্খুনিক্খন্ধকৰণ্ণনা নিট্ঠিতা।
Bhikkhunikkhandhakavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi
ভিক্খুনীউপসম্পদানুজাননং • Bhikkhunīupasampadānujānanaṃ
২. দুতিযভাণৰারো • 2. Dutiyabhāṇavāro
৩. ততিযভাণৰারো • 3. Tatiyabhāṇavāro
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / ভিক্খুনীউপসম্পদানুজাননকথা • Bhikkhunīupasampadānujānanakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ভিক্খুনীউপসম্পদানুজাননকথাৰণ্ণনা • Bhikkhunīupasampadānujānanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ভিক্খুনীউপসম্পদানুজাননকথাৰণ্ণনা • Bhikkhunīupasampadānujānanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ভিক্খুনীউপসম্পদানুজাননকথা • Bhikkhunīupasampadānujānanakathā
