| Library / Tipiṭaka / តិបិដក • Tipiṭaka / សារត្ថទីបនី-ដីកា • Sāratthadīpanī-ṭīkā |
ភិក្ខុនីឧបសម្បន្នានុជាននកថាវណ្ណនា
Bhikkhunīupasampannānujānanakathāvaṇṇanā
៤០៤-៤០៥. យទគ្គេនាតិ យំ ទិវសំ អាទិំ កត្វា។ តទេវាតិ តស្មិញ្ញេវ ទិវសេ។ អនុញ្ញត្តិយាតិ អនុញ្ញាយ។ ឯកាហំ, ភន្តេ អានន្ទ, ភគវន្តំ វរំ យាចាមីតិ ‘‘ឯវមេវ ខោ អហំ, ភន្តេ អានន្ទ, ឥមេ អដ្ឋ គរុធម្មេ បដិគ្គណ្ហាមិ យាវជីវំ អនតិក្កមនីយេ’’តិ បដិជានិត្វា ឥទានិ កស្មា វរំ យាចតីតិ ចេ? បរូបវាទវិវជ្ជនត្ថំ។ ឯវញ្ហិ កេចិ វទេយ្យុំ ‘‘មហាបជាបតិយា បឋមំ សម្បដិច្ឆិតត្តា ភិក្ខូនំ ភិក្ខុនីនញ្ច យថាវុឌ្ឍំ អភិវាទនំ នាហោសិ, សា ចេ វរំ យាចេយ្យ, ភគវា អនុជានេយ្យា’’តិ។
404-405.Yadaggenāti yaṃ divasaṃ ādiṃ katvā. Tadevāti tasmiññeva divase. Anuññattiyāti anuññāya. Ekāhaṃ, bhante ānanda, bhagavantaṃ varaṃ yācāmīti ‘‘evameva kho ahaṃ, bhante ānanda, ime aṭṭha garudhamme paṭiggaṇhāmi yāvajīvaṃ anatikkamanīye’’ti paṭijānitvā idāni kasmā varaṃ yācatīti ce? Parūpavādavivajjanatthaṃ. Evañhi keci vadeyyuṃ ‘‘mahāpajāpatiyā paṭhamaṃ sampaṭicchitattā bhikkhūnaṃ bhikkhunīnañca yathāvuḍḍhaṃ abhivādanaṃ nāhosi, sā ce varaṃ yāceyya, bhagavā anujāneyyā’’ti.
៤០៦. សរាគាយាតិ សរាគភាវាយ កាមរាគភវរាគបរិព្រូហនាយ។ សញ្ញោគាយាតិ វដ្ដេ សំយោជនត្ថាយ។ អាចយាយាតិ វដ្ដស្ស វឌ្ឍនត្ថាយ។ មហិច្ឆតាយាតិ មហិច្ឆភាវាយ។ អសន្តុដ្ឋិយាតិ អសន្តុដ្ឋិភាវាយ។ សង្គណិកាយាតិ កិលេសសង្គណគណសង្គណវិហារាយ។ កោសជ្ជាយាតិ កុសីតភាវាយ។ ទុព្ភរតាយាតិ ទុប្បោសតាយ។ វិរាគាយាតិ សកលវដ្ដតោ វិរជ្ជនត្ថាយ។ វិសញ្ញោគាយាតិ កាមរាគាទីហិ វិសំយុជ្ជនត្ថាយ។ អបចយាយាតិ សព្ពស្សបិ វដ្ដស្ស អបចយត្ថាយ, និព្ពានាយាតិ អត្ថោ។ អប្បិច្ឆតាយាតិ បច្ចយប្បិច្ឆតាទិវសេន សព្ពសោ ឥច្ឆាបគមាយ។ សន្តុដ្ឋិយាតិ ទ្វាទសវិធសន្តុដ្ឋិភាវាយ។ បវិវេកាយាតិ បវិវិត្តភាវាយ កាយវិវេកាទិតទង្គវិវេកាទិវិវេកសិទ្ធិយា។ វីរិយារម្ភាយាតិ កាយិកស្ស ចេវ ចេតសិកស្ស ច វីរិយស្ស បគ្គណ្ហនត្ថាយ។ សុភរតាយាតិ សុខបោសនត្ថាយ។ ឯវំ យោ បរិយត្តិធម្មោ ឧគ្គហណធារណបរិបុច្ឆាមនសិការវសេន យោនិសោ បដិបជ្ជន្តស្ស សរាគាទិភាវបរិវជ្ជនស្ស ការណំ ហុត្វា វិរាគាទិភាវាយ សំវត្តតិ, ឯកំសតោ ឯសោ ធម្មោ, ឯសោ វិនយោ សម្មទេវ អបាយាទីសុ អបតនវសេន ធារណតោ កិលេសានំ វិនយនតោ, សត្ថុ សម្មាសម្ពុទ្ធស្ស ឱវាទានុសិដ្ឋិភាវតោ ឯតំ សត្ថុសាសនន្តិ ធារេយ្យាសិ ជានេយ្យាសិ, អវពុជ្ឈេយ្យាសីតិ អត្ថោ។ ឥមស្មិំ សុត្តេ បឋមវារេន វដ្ដំ, ទុតិយវារេន វិវដ្ដំ កថិតំ។
406.Sarāgāyāti sarāgabhāvāya kāmarāgabhavarāgaparibrūhanāya. Saññogāyāti vaṭṭe saṃyojanatthāya. Ācayāyāti vaṭṭassa vaḍḍhanatthāya. Mahicchatāyāti mahicchabhāvāya. Asantuṭṭhiyāti asantuṭṭhibhāvāya. Saṅgaṇikāyāti kilesasaṅgaṇagaṇasaṅgaṇavihārāya. Kosajjāyāti kusītabhāvāya. Dubbharatāyāti dupposatāya. Virāgāyāti sakalavaṭṭato virajjanatthāya. Visaññogāyāti kāmarāgādīhi visaṃyujjanatthāya. Apacayāyāti sabbassapi vaṭṭassa apacayatthāya, nibbānāyāti attho. Appicchatāyāti paccayappicchatādivasena sabbaso icchāpagamāya. Santuṭṭhiyāti dvādasavidhasantuṭṭhibhāvāya. Pavivekāyāti pavivittabhāvāya kāyavivekāditadaṅgavivekādivivekasiddhiyā. Vīriyārambhāyāti kāyikassa ceva cetasikassa ca vīriyassa paggaṇhanatthāya. Subharatāyāti sukhaposanatthāya. Evaṃ yo pariyattidhammo uggahaṇadhāraṇaparipucchāmanasikāravasena yoniso paṭipajjantassa sarāgādibhāvaparivajjanassa kāraṇaṃ hutvā virāgādibhāvāya saṃvattati, ekaṃsato eso dhammo, eso vinayo sammadeva apāyādīsu apatanavasena dhāraṇato kilesānaṃ vinayanato, satthu sammāsambuddhassa ovādānusiṭṭhibhāvato etaṃ satthusāsananti dhāreyyāsi jāneyyāsi, avabujjheyyāsīti attho. Imasmiṃ sutte paṭhamavārena vaṭṭaṃ, dutiyavārena vivaṭṭaṃ kathitaṃ.
៤០៩-៤១០. វិមានេត្វាតិ អបរជ្ឈិត្វា។ កម្មប្បត្តាយោបីតិ កម្មារហាបិ។ អាបត្តិគាមិនិយោបីតិ អាបត្តិអាបន្នាយោបិ។ វុត្តនយេនេវ ការេតព្ពតំ អាបជ្ជន្តីតិ តថាករណស្ស បដិក្ខិត្តត្តា ទុក្កដេន ការេតព្ពតំ អាបជ្ជន្តិ។
409-410.Vimānetvāti aparajjhitvā. Kammappattāyopīti kammārahāpi. Āpattigāminiyopīti āpattiāpannāyopi. Vuttanayeneva kāretabbataṃ āpajjantīti tathākaraṇassa paṭikkhittattā dukkaṭena kāretabbataṃ āpajjanti.
៤១៣-៥. ទ្វេ តិស្សោ ភិក្ខុនិយោតិ ទ្វីហិ តីហិ ភិក្ខុនីហិ។ ន អារោចេន្តីតិ បាតិមោក្ខុទ្ទេសកស្ស ន អារោចេន្តិ។ ន បច្ចាហរន្តីតិ ភិក្ខុនីនំ ន បច្ចាហរន្តិ។ វិសេសកន្តិ វត្តភង្គំ។
413-5.Dve tisso bhikkhuniyoti dvīhi tīhi bhikkhunīhi. Na ārocentīti pātimokkhuddesakassa na ārocenti. Na paccāharantīti bhikkhunīnaṃ na paccāharanti. Visesakanti vattabhaṅgaṃ.
៤២០. តេន ច ភិក្ខុ និមន្តេតព្ពោតិ សាមីចិទស្សនមេតំ, ន បន អនិមន្តិយា អាបត្តិ។
420.Tena ca bhikkhu nimantetabboti sāmīcidassanametaṃ, na pana animantiyā āpatti.
៤២៥. តយោ និស្សយេតិ សេនាសននិស្សយំ អបនេត្វា អបរេ តយោ និស្សយេ។ រុក្ខមូលសេនាសនញ្ហិ សា ន លភតិ។
425.Tayo nissayeti senāsananissayaṃ apanetvā apare tayo nissaye. Rukkhamūlasenāsanañhi sā na labhati.
៤២៨. អនុវាទំ បដ្ឋបេន្តីតិ ឥស្សរិយំ បវត្តេន្តិ។
428.Anuvādaṃ paṭṭhapentīti issariyaṃ pavattenti.
៤៣០. ភិក្ខុទូតេន ឧបសម្បាទេន្តីតិ ភិក្ខុយេវ ទូតោ ភិក្ខុទូតោ, តេន ភិក្ខុទូតេន, ភិក្ខុទូតំ កត្វា ឧបសម្បាទេន្តីតិ អត្ថោ។
430.Bhikkhudūtena upasampādentīti bhikkhuyeva dūto bhikkhudūto, tena bhikkhudūtena, bhikkhudūtaṃ katvā upasampādentīti attho.
៤៣១. ន សម្មតីតិ នប្បហោតិ។ នវកម្មន្តិ នវកម្មំ កត្វា ‘‘ឯត្តកានិ វស្សានិ វសតូ’’តិ អបលោកេត្វា សង្ឃិកភូមិទានំ។
431.Na sammatīti nappahoti. Navakammanti navakammaṃ katvā ‘‘ettakāni vassāni vasatū’’ti apaloketvā saṅghikabhūmidānaṃ.
៤៣២. សន្និសិន្នគព្ភាតិ បតិដ្ឋិតគព្ភា។
432.Sannisinnagabbhāti patiṭṭhitagabbhā.
៤៣៤. បព្ពជ្ជម្បិ ន លភតីតិ តិត្ថាយតនសង្កន្តាយ អភព្ពភាវូបគមនតោ ន លភតិ។ ឥទំ ឱទិស្ស អនុញ្ញាតំ វដ្ដតីតិ ឯកតោ វា ឧភតោ វា អវស្សវេ សតិបិ ឱទិស្ស អនុញ្ញាតត្តា វដ្ដតិ។ សេសមេត្ថ បាឡិតោ អដ្ឋកថាតោ ច សុវិញ្ញេយ្យមេវាតិ។
434.Pabbajjampi na labhatīti titthāyatanasaṅkantāya abhabbabhāvūpagamanato na labhati. Idaṃ odissa anuññātaṃ vaṭṭatīti ekato vā ubhato vā avassave satipi odissa anuññātattā vaṭṭati. Sesamettha pāḷito aṭṭhakathāto ca suviññeyyamevāti.
ភិក្ខុនីឧបសម្បន្នានុជាននកថាវណ្ណនា និដ្ឋិតា។
Bhikkhunīupasampannānujānanakathāvaṇṇanā niṭṭhitā.
ភិក្ខុនិក្ខន្ធកវណ្ណនា និដ្ឋិតា។
Bhikkhunikkhandhakavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / ចូឡវគ្គបាឡិ • Cūḷavaggapāḷi
ភិក្ខុនីឧបសម្បទានុជាននំ • Bhikkhunīupasampadānujānanaṃ
២. ទុតិយភាណវារោ • 2. Dutiyabhāṇavāro
៣. តតិយភាណវារោ • 3. Tatiyabhāṇavāro
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / ចូឡវគ្គ-អដ្ឋកថា • Cūḷavagga-aṭṭhakathā / ភិក្ខុនីឧបសម្បទានុជាននកថា • Bhikkhunīupasampadānujānanakathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ភិក្ខុនីឧបសម្បទានុជាននកថាវណ្ណនា • Bhikkhunīupasampadānujānanakathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ភិក្ខុនីឧបសម្បទានុជាននកថាវណ្ណនា • Bhikkhunīupasampadānujānanakathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ភិក្ខុនីឧបសម្បទានុជាននកថា • Bhikkhunīupasampadānujānanakathā
