| Library / Tipiṭaka / තිපිටක • Tipiṭaka / සාරත්‌ථදීපනී-ටීකා • Sāratthadīpanī-ṭīkā |
භික්‌ඛුනීඋපසම්‌පන්‌නානුජානනකථාවණ්‌ණනා
Bhikkhunīupasampannānujānanakathāvaṇṇanā
404-405. යදග්‌ගෙනාති යං දිවසං ආදිං කත්‌වා. තදෙවාති තස්‌මිඤ්‌ඤෙව දිවසෙ. අනුඤ්‌ඤත්‌තියාති අනුඤ්‌ඤාය. එකාහං, භන්‌තෙ ආනන්‌ද, භගවන්‌තං වරං යාචාමීති ‘‘එවමෙව ඛො අහං, භන්‌තෙ ආනන්‌ද, ඉමෙ අට්‌ඨ ගරුධම්‌මෙ පටිග්‌ගණ්‌හාමි යාවජීවං අනතික්‌කමනීයෙ’’ති පටිජානිත්‌වා ඉදානි කස්‌මා වරං යාචතීති චෙ? පරූපවාදවිවජ්‌ජනත්‌ථං. එවඤ්‌හි කෙචි වදෙය්‍යුං ‘‘මහාපජාපතියා පඨමං සම්‌පටිච්‌ඡිතත්‌තා භික්‌ඛූනං භික්‌ඛුනීනඤ්‌ච යථාවුඩ්‌ඪං අභිවාදනං නාහොසි, සා චෙ වරං යාචෙය්‍ය, භගවා අනුජානෙය්‍යා’’ති.
404-405.Yadaggenāti yaṃ divasaṃ ādiṃ katvā. Tadevāti tasmiññeva divase. Anuññattiyāti anuññāya. Ekāhaṃ, bhante ānanda, bhagavantaṃ varaṃ yācāmīti ‘‘evameva kho ahaṃ, bhante ānanda, ime aṭṭha garudhamme paṭiggaṇhāmi yāvajīvaṃ anatikkamanīye’’ti paṭijānitvā idāni kasmā varaṃ yācatīti ce? Parūpavādavivajjanatthaṃ. Evañhi keci vadeyyuṃ ‘‘mahāpajāpatiyā paṭhamaṃ sampaṭicchitattā bhikkhūnaṃ bhikkhunīnañca yathāvuḍḍhaṃ abhivādanaṃ nāhosi, sā ce varaṃ yāceyya, bhagavā anujāneyyā’’ti.
406. සරාගායාති සරාගභාවාය කාමරාගභවරාගපරිබ්‍රූහනාය. සඤ්‌ඤොගායාති වට්‌ටෙ සංයොජනත්‌ථාය. ආචයායාති වට්‌ටස්‌ස වඩ්‌ඪනත්‌ථාය. මහිච්‌ඡතායාති මහිච්‌ඡභාවාය. අසන්‌තුට්‌ඨියාති අසන්‌තුට්‌ඨිභාවාය. සඞ්‌ගණිකායාති කිලෙසසඞ්‌ගණගණසඞ්‌ගණවිහාරාය. කොසජ්‌ජායාති කුසීතභාවාය. දුබ්‌භරතායාති දුප්‌පොසතාය. විරාගායාති සකලවට්‌ටතො විරජ්‌ජනත්‌ථාය. විසඤ්‌ඤොගායාති කාමරාගාදීහි විසංයුජ්‌ජනත්‌ථාය. අපචයායාති සබ්‌බස්‌සපි වට්‌ටස්‌ස අපචයත්‌ථාය, නිබ්‌බානායාති අත්‌ථො. අප්‌පිච්‌ඡතායාති පච්‌චයප්‌පිච්‌ඡතාදිවසෙන සබ්‌බසො ඉච්‌ඡාපගමාය. සන්‌තුට්‌ඨියාති ද්‌වාදසවිධසන්‌තුට්‌ඨිභාවාය. පවිවෙකායාති පවිවිත්‌තභාවාය කායවිවෙකාදිතදඞ්‌ගවිවෙකාදිවිවෙකසිද්‌ධියා. වීරියාරම්‌භායාති කායිකස්‌ස චෙව චෙතසිකස්‌ස ච වීරියස්‌ස පග්‌ගණ්‌හනත්‌ථාය. සුභරතායාති සුඛපොසනත්‌ථාය. එවං යො පරියත්‌තිධම්‌මො උග්‌ගහණධාරණපරිපුච්‌ඡාමනසිකාරවසෙන යොනිසො පටිපජ්‌ජන්‌තස්‌ස සරාගාදිභාවපරිවජ්‌ජනස්‌ස කාරණං හුත්‌වා විරාගාදිභාවාය සංවත්‌තති, එකංසතො එසො ධම්‌මො, එසො විනයො සම්‌මදෙව අපායාදීසු අපතනවසෙන ධාරණතො කිලෙසානං විනයනතො, සත්‌ථු සම්‌මාසම්‌බුද්‌ධස්‌ස ඔවාදානුසිට්‌ඨිභාවතො එතං සත්‌ථුසාසනන්‌ති ධාරෙය්‍යාසි ජානෙය්‍යාසි, අවබුජ්‌ඣෙය්‍යාසීති අත්‌ථො. ඉමස්‌මිං සුත්‌තෙ පඨමවාරෙන වට්‌ටං, දුතියවාරෙන විවට්‌ටං කථිතං.
406.Sarāgāyāti sarāgabhāvāya kāmarāgabhavarāgaparibrūhanāya. Saññogāyāti vaṭṭe saṃyojanatthāya. Ācayāyāti vaṭṭassa vaḍḍhanatthāya. Mahicchatāyāti mahicchabhāvāya. Asantuṭṭhiyāti asantuṭṭhibhāvāya. Saṅgaṇikāyāti kilesasaṅgaṇagaṇasaṅgaṇavihārāya. Kosajjāyāti kusītabhāvāya. Dubbharatāyāti dupposatāya. Virāgāyāti sakalavaṭṭato virajjanatthāya. Visaññogāyāti kāmarāgādīhi visaṃyujjanatthāya. Apacayāyāti sabbassapi vaṭṭassa apacayatthāya, nibbānāyāti attho. Appicchatāyāti paccayappicchatādivasena sabbaso icchāpagamāya. Santuṭṭhiyāti dvādasavidhasantuṭṭhibhāvāya. Pavivekāyāti pavivittabhāvāya kāyavivekāditadaṅgavivekādivivekasiddhiyā. Vīriyārambhāyāti kāyikassa ceva cetasikassa ca vīriyassa paggaṇhanatthāya. Subharatāyāti sukhaposanatthāya. Evaṃ yo pariyattidhammo uggahaṇadhāraṇaparipucchāmanasikāravasena yoniso paṭipajjantassa sarāgādibhāvaparivajjanassa kāraṇaṃ hutvā virāgādibhāvāya saṃvattati, ekaṃsato eso dhammo, eso vinayo sammadeva apāyādīsu apatanavasena dhāraṇato kilesānaṃ vinayanato, satthu sammāsambuddhassa ovādānusiṭṭhibhāvato etaṃ satthusāsananti dhāreyyāsi jāneyyāsi, avabujjheyyāsīti attho. Imasmiṃ sutte paṭhamavārena vaṭṭaṃ, dutiyavārena vivaṭṭaṃ kathitaṃ.
409-410. විමානෙත්‌වාති අපරජ්‌ඣිත්‌වා. කම්‌මප්‌පත්‌තායොපීති කම්‌මාරහාපි. ආපත්‌තිගාමිනියොපීති ආපත්‌තිආපන්‌නායොපි. වුත්‌තනයෙනෙව කාරෙතබ්‌බතං ආපජ්‌ජන්‌තීති තථාකරණස්‌ස පටික්‌ඛිත්‌තත්‌තා දුක්‌කටෙන කාරෙතබ්‌බතං ආපජ්‌ජන්‌ති.
409-410.Vimānetvāti aparajjhitvā. Kammappattāyopīti kammārahāpi. Āpattigāminiyopīti āpattiāpannāyopi. Vuttanayeneva kāretabbataṃ āpajjantīti tathākaraṇassa paṭikkhittattā dukkaṭena kāretabbataṃ āpajjanti.
413-5. ද්‌වෙ තිස්‌සො භික්‌ඛුනියොති ද්‌වීහි තීහි භික්‌ඛුනීහි. න ආරොචෙන්‌තීති පාතිමොක්‌ඛුද්‌දෙසකස්‌ස න ආරොචෙන්‌ති. න පච්‌චාහරන්‌තීති භික්‌ඛුනීනං න පච්‌චාහරන්‌ති. විසෙසකන්‌ති වත්‌තභඞ්‌ගං.
413-5.Dve tisso bhikkhuniyoti dvīhi tīhi bhikkhunīhi. Na ārocentīti pātimokkhuddesakassa na ārocenti. Na paccāharantīti bhikkhunīnaṃ na paccāharanti. Visesakanti vattabhaṅgaṃ.
420. තෙන ච භික්‌ඛු නිමන්‌තෙතබ්‌බොති සාමීචිදස්‌සනමෙතං, න පන අනිමන්‌තියා ආපත්‌ති.
420.Tena ca bhikkhu nimantetabboti sāmīcidassanametaṃ, na pana animantiyā āpatti.
425. තයො නිස්‌සයෙති සෙනාසනනිස්‌සයං අපනෙත්‌වා අපරෙ තයො නිස්‌සයෙ. රුක්‌ඛමූලසෙනාසනඤ්‌හි සා න ලභති.
425.Tayo nissayeti senāsananissayaṃ apanetvā apare tayo nissaye. Rukkhamūlasenāsanañhi sā na labhati.
428. අනුවාදං පට්‌ඨපෙන්‌තීති ඉස්‌සරියං පවත්‌තෙන්‌ති.
428.Anuvādaṃ paṭṭhapentīti issariyaṃ pavattenti.
430. භික්‌ඛුදූතෙන උපසම්‌පාදෙන්‌තීති භික්‌ඛුයෙව දූතො භික්‌ඛුදූතො, තෙන භික්‌ඛුදූතෙන, භික්‌ඛුදූතං කත්‌වා උපසම්‌පාදෙන්‌තීති අත්‌ථො.
430.Bhikkhudūtena upasampādentīti bhikkhuyeva dūto bhikkhudūto, tena bhikkhudūtena, bhikkhudūtaṃ katvā upasampādentīti attho.
431. න සම්‌මතීති නප්‌පහොති. නවකම්‌මන්‌ති නවකම්‌මං කත්‌වා ‘‘එත්‌තකානි වස්‌සානි වසතූ’’ති අපලොකෙත්‌වා සඞ්‌ඝිකභූමිදානං.
431.Na sammatīti nappahoti. Navakammanti navakammaṃ katvā ‘‘ettakāni vassāni vasatū’’ti apaloketvā saṅghikabhūmidānaṃ.
432. සන්‌නිසින්‌නගබ්‌භාති පතිට්‌ඨිතගබ්‌භා.
432.Sannisinnagabbhāti patiṭṭhitagabbhā.
434. පබ්‌බජ්‌ජම්‌පි න ලභතීති තිත්‌ථායතනසඞ්‌කන්‌තාය අභබ්‌බභාවූපගමනතො න ලභති. ඉදං ඔදිස්‌ස අනුඤ්‌ඤාතං වට්‌ටතීති එකතො වා උභතො වා අවස්‌සවෙ සතිපි ඔදිස්‌ස අනුඤ්‌ඤාතත්‌තා වට්‌ටති. සෙසමෙත්‌ථ පාළිතො අට්‌ඨකථාතො ච සුවිඤ්‌ඤෙය්‍යමෙවාති.
434.Pabbajjampi na labhatīti titthāyatanasaṅkantāya abhabbabhāvūpagamanato na labhati. Idaṃ odissa anuññātaṃ vaṭṭatīti ekato vā ubhato vā avassave satipi odissa anuññātattā vaṭṭati. Sesamettha pāḷito aṭṭhakathāto ca suviññeyyamevāti.
භික්‌ඛුනීඋපසම්‌පන්‌නානුජානනකථාවණ්‌ණනා නිට්‌ඨිතා.
Bhikkhunīupasampannānujānanakathāvaṇṇanā niṭṭhitā.
භික්‌ඛුනික්‌ඛන්‌ධකවණ්‌ණනා නිට්‌ඨිතා.
Bhikkhunikkhandhakavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / චූළවග්‌ගපාළි • Cūḷavaggapāḷi
භික්‌ඛුනීඋපසම්‌පදානුජානනං • Bhikkhunīupasampadānujānanaṃ
2. දුතියභාණවාරො • 2. Dutiyabhāṇavāro
3. තතියභාණවාරො • 3. Tatiyabhāṇavāro
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / චූළවග්‌ග-අට්‌ඨකථා • Cūḷavagga-aṭṭhakathā / භික්‌ඛුනීඋපසම්‌පදානුජානනකථා • Bhikkhunīupasampadānujānanakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / භික්‌ඛුනීඋපසම්‌පදානුජානනකථාවණ්‌ණනා • Bhikkhunīupasampadānujānanakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / භික්‌ඛුනීඋපසම්‌පදානුජානනකථාවණ්‌ණනා • Bhikkhunīupasampadānujānanakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / භික්‌ඛුනීඋපසම්‌පදානුජානනකථා • Bhikkhunīupasampadānujānanakathā
