| Library / Tipiṭaka / তিপিটক • Tipiṭaka / ৰিনযৰিনিচ্ছয-টীকা • Vinayavinicchaya-ṭīkā |
ভিক্খুনিৰিভঙ্গো
Bhikkhunivibhaṅgo
১৭০. ৰিনযস্স ৰিনিচ্ছযে ভিক্খূনং পাটৰত্থাযাতি ভিক্খুনীনং পাটৰস্সাপি তদধীনত্তা পধানদস্সনৰসেন ৰুত্তং। অথ ৰা দস্সনলিঙ্গন্তরসাধারণত্তে ইচ্ছিতে পুল্লিঙ্গেন, নপুংসকলিঙ্গেন ৰা নিদ্দেসো সদ্দসত্থানুযোগতোতি ‘‘ভিক্খূন’’ন্তি পুল্লিঙ্গেন ৰুত্তং।
170.Vinayassa vinicchaye bhikkhūnaṃ pāṭavatthāyāti bhikkhunīnaṃ pāṭavassāpi tadadhīnattā padhānadassanavasena vuttaṃ. Atha vā dassanaliṅgantarasādhāraṇatte icchite pulliṅgena, napuṃsakaliṅgena vā niddeso saddasatthānuyogatoti ‘‘bhikkhūna’’nti pulliṅgena vuttaṃ.
১৭১. নন্দন্তী সাদিযন্তী।
171.Nandantī sādiyantī.
১৭২. তিস্সো আপত্তিযো ফুসেতি যোজনা। জাণুস্স উদ্ধং, অক্খকস্স অধো গহণং সাদিযন্তিযা তস্সা পারাজিকন্তি যোজনা।
172. Tisso āpattiyo phuseti yojanā. Jāṇussa uddhaṃ, akkhakassa adho gahaṇaṃ sādiyantiyā tassā pārājikanti yojanā.
১৭৩. কাযপটিবদ্ধে ৰা গহণং সাদিযন্তিযা দুক্কটং।
173. Kāyapaṭibaddhe vā gahaṇaṃ sādiyantiyā dukkaṭaṃ.
১৭৪. ৰজ্জন্তি অঞ্ঞিস্সা ভিক্খুনিযা পারাজিকাপত্তিং।
174.Vajjanti aññissā bhikkhuniyā pārājikāpattiṃ.
১৭৬. তং লদ্ধিন্তি উক্খিত্তস্স যং লদ্ধিং অত্তনো রোচেসি, তং লদ্ধিং ন নিস্সজ্জন্তীতি যোজনা।
176.Taṃladdhinti ukkhittassa yaṃ laddhiṃ attano rocesi, taṃ laddhiṃ na nissajjantīti yojanā.
১৭৮. ‘‘ইধ আগচ্ছা’’তি পদচ্ছেদো। ‘‘ৰুত্তা আগচ্ছতী’’তি পদচ্ছেদো।
178. ‘‘Idha āgacchā’’ti padacchedo. ‘‘Vuttā āgacchatī’’ti padacchedo.
১৭৯. হত্থপাসপ্পৰেসনেতি হত্থপাসূপগমনে। ‘‘হত্থগতপ্পৰেসনে’’তি ৰা পাঠো, সোযেৰ অত্থো।
179.Hatthapāsappavesaneti hatthapāsūpagamane. ‘‘Hatthagatappavesane’’ti vā pāṭho, soyeva attho.
ইতি উত্তরে লীনত্থপকাসনিযা ভিক্খুনিৰিভঙ্গে
Iti uttare līnatthapakāsaniyā bhikkhunivibhaṅge
পারাজিককথাৰণ্ণনা নিট্ঠিতা।
Pārājikakathāvaṇṇanā niṭṭhitā.
১৮০. একস্সাতি অত্তনো অত্তনো অট্টকারস্স ৰা। আরোচনেতি ৰত্তব্বস্স ৰোহারিকানং নিৰেদনে।
180.Ekassāti attano attano aṭṭakārassa vā. Ārocaneti vattabbassa vohārikānaṃ nivedane.
১৮১. দুতিযারোচনেতি দুতিযস্স, দুতিযং এৰং আরোচনে।
181.Dutiyārocaneti dutiyassa, dutiyaṃ evaṃ ārocane.
১৮২. দ্ৰীহীতি দ্ৰীহি কম্মৰাচাহি। কম্মৰাচোসানেতি কম্মৰাচাওসানে।
182.Dvīhīti dvīhi kammavācāhi. Kammavācosāneti kammavācāosāne.
১৮৩. পরিক্খেপে অতিক্কন্তেতি অত্তনো গামতো গন্ত্ৰা ইতরং গামং পৰিসন্তিযা পঠমেন পাদেন তস্স গামস্স পরিক্খেপে অতিক্কন্তে, পঠমপাদে পরিক্খেপং অতিক্কমেত্ৰা অন্তোগামসঙ্খেপং গতেতি অত্থো।
183.Parikkhepe atikkanteti attano gāmato gantvā itaraṃ gāmaṃ pavisantiyā paṭhamena pādena tassa gāmassa parikkhepe atikkante, paṭhamapāde parikkhepaṃ atikkametvā antogāmasaṅkhepaṃ gateti attho.
১৮৪. দুতিযেনাতি গামপরিক্খেপতো বহি ঠিতেন দুতিযপাদেন। অতিক্কন্তেতি তস্মিং গামপরিক্খেপে অতিক্কন্তে, তস্মিং পাদে অন্তোগামং পৰেসিতেতি অত্থো। সেসং উত্তানত্থমেৰ।
184.Dutiyenāti gāmaparikkhepato bahi ṭhitena dutiyapādena. Atikkanteti tasmiṃ gāmaparikkhepe atikkante, tasmiṃ pāde antogāmaṃ pavesiteti attho. Sesaṃ uttānatthameva.
ইতি উত্তরে লীনত্থপকাসনিযা ভিক্খুনিৰিভঙ্গে
Iti uttare līnatthapakāsaniyā bhikkhunivibhaṅge
সঙ্ঘাদিসেসকথাৰণ্ণনা নিট্ঠিতা।
Saṅghādisesakathāvaṇṇanā niṭṭhitā.
১৯৩. ইহ ভিক্খুনী পত্তসন্নিচযং করোন্তী হোতি, সা একং নিস্সগ্গিযং পাচিত্তিযংযেৰ ফুসেতি যোজনা।
193. Iha bhikkhunī pattasannicayaṃ karontī hoti, sā ekaṃ nissaggiyaṃ pācittiyaṃyeva phuseti yojanā.
১৯৪. অকালচীৰরং কালচীৰরং কত্ৰা ভাজাপেন্তিযাতি যোজনা। পযোগেতি ভাজনপযোগে।
194.Akālacīvaraṃ kālacīvaraṃ katvā bhājāpentiyāti yojanā. Payogeti bhājanapayoge.
১৯৫. ছিন্নেতি অচ্ছিন্নে।
195.Chinneti acchinne.
১৯৬. ততো পরন্তি ততো পঠমতো অঞ্ঞং।
196.Tato paranti tato paṭhamato aññaṃ.
ইতি উত্তরে লীনত্থপকাসনিযা ভিক্খুনিৰিভঙ্গে
Iti uttare līnatthapakāsaniyā bhikkhunivibhaṅge
নিস্সগ্গিযকথাৰণ্ণনা নিট্ঠিতা।
Nissaggiyakathāvaṇṇanā niṭṭhitā.
১৯৯. লসুণং খাদতি চে, দ্ৰে আপত্তিযো ফুটাতি যোজনা।
199. Lasuṇaṃ khādati ce, dve āpattiyo phuṭāti yojanā.
২০০. পযোগেতি সংহারাপনপযোগে। সংহটেতি অত্তনা সংহটে, পরেন সংহরাপিতে চ আপত্তি পাচিত্তি হোতি।
200.Payogeti saṃhārāpanapayoge. Saṃhaṭeti attanā saṃhaṭe, parena saṃharāpite ca āpatti pācitti hoti.
২০১. কতেতি তলঘাতে কতে।
201.Kateti talaghāte kate.
২০২. জতুনা মট্ঠকন্তি জতুনা কতং মট্ঠদণ্ডকং। ‘‘দুক্কটং আদিন্নে’’তি পদচ্ছেদো।
202.Jatunā maṭṭhakanti jatunā kataṃ maṭṭhadaṇḍakaṃ. ‘‘Dukkaṭaṃ ādinne’’ti padacchedo.
২০৪. ভুঞ্জমানস্স ভিক্খুস্স হত্থপাসেতি যোজনা। হিত্ৰা হত্থপাসং।
204. Bhuñjamānassa bhikkhussa hatthapāseti yojanā. Hitvā hatthapāsaṃ.
২০৫. ৰিঞ্ঞাপেত্ৰাতি অন্তমসো মাতরম্পি যাচিত্ৰা। অজ্ঝোহারে পাচিত্তিং দীপযেতি যোজনা।
205.Viññāpetvāti antamaso mātarampi yācitvā. Ajjhohāre pācittiṃ dīpayeti yojanā.
২০৬. উচ্চারাদিন্তি আদি-সদ্দেন ৰিঘাসসঙ্কারমুত্তানং গহণং।
206.Uccārādinti ādi-saddena vighāsasaṅkāramuttānaṃ gahaṇaṃ.
লসুণৰগ্গৰণ্ণনা পঠমা।
Lasuṇavaggavaṇṇanā paṭhamā.
২০৯. ইধ ইমস্মিং রত্তন্ধকারৰগ্গে। পঠমে, দুতিযে, ততিযে, চতুত্থেপি ৰিনিচ্ছযো লসুণৰগ্গস্স ছট্ঠেন সিক্খাপদেন তুল্যো সদিসোতি যোজনা।
209.Idha imasmiṃ rattandhakāravagge. Paṭhame, dutiye, tatiye, catutthepi vinicchayo lasuṇavaggassa chaṭṭhena sikkhāpadena tulyo sadisoti yojanā.
২১০. আসনেতি পল্লঙ্কে তস্সোকাসভূতে। সামিকে অনাপুচ্ছাতি তস্মিং কুলে যং কিঞ্চি ৰিঞ্ঞুমনুস্সং অনাপুচ্ছা।
210.Āsaneti pallaṅke tassokāsabhūte. Sāmike anāpucchāti tasmiṃ kule yaṃ kiñci viññumanussaṃ anāpucchā.
২১১. অনোৰস্সন্তি ভিত্তিযা বহি নিব্বকোসব্ভন্তরং। দুতিযাতিক্কমেতি দুতিযেন পাদেন নিব্বকোসস্স উদকপাতট্ঠানাতিক্কমে।
211.Anovassanti bhittiyā bahi nibbakosabbhantaraṃ. Dutiyātikkameti dutiyena pādena nibbakosassa udakapātaṭṭhānātikkame.
২১২. নিসীদিতেতি নিসিন্নে।
212.Nisīditeti nisinne.
২১৩. পযোগেতি উজ্ঝাপনপযোগে।
213.Payogeti ujjhāpanapayoge.
২১৪. নিরযাদিনা অত্তানং ৰা পরং ৰা অভিসপ্পেন্তী সপথং করোন্তী দ্ৰে ফুসেতি যোজনা। অভিসপ্পিতেতি অভিসপিতে।
214. Nirayādinā attānaṃ vā paraṃ vā abhisappentī sapathaṃ karontī dve phuseti yojanā. Abhisappiteti abhisapite.
২১৫. ৰধিত্ৰাতি হত্থাদীহি পহরিত্ৰা। ‘‘করোতি এক’’ন্তি পদচ্ছেদো।
215.Vadhitvāti hatthādīhi paharitvā. ‘‘Karoti eka’’nti padacchedo.
রত্তন্ধকারৰগ্গৰণ্ণনা দুতিযা।
Rattandhakāravaggavaṇṇanā dutiyā.
২১৬. নগ্গাতি অনিৰত্থা ৰা অপারুতা ৰা। পযোগেতি চুণ্ণমত্তিকাঅভিসঙ্খরণাদিপযোগে।
216.Naggāti anivatthā vā apārutā vā. Payogeti cuṇṇamattikāabhisaṅkharaṇādipayoge.
২১৭. পমাণাতিক্কন্তন্তি ‘‘দীঘসোচতস্সো ৰিদত্থিযো সুগতৰিদত্থিযা, তিরিযং দ্ৰে ৰিদত্থিযো’’তি (পাচি॰ ৮৮৮) ৰুত্তপমাণমতিক্কন্তং। পযোগেতি কারাপনপযোগে।
217.Pamāṇātikkantanti ‘‘dīghasocatasso vidatthiyo sugatavidatthiyā, tiriyaṃ dve vidatthiyo’’ti (pāci. 888) vuttapamāṇamatikkantaṃ. Payogeti kārāpanapayoge.
২১৮. ৰিসিব্বেত্ৰাতি দুস্সিব্বিতং পুন সিব্বনত্থায ৰিসিব্বেত্ৰা।
218.Visibbetvāti dussibbitaṃ puna sibbanatthāya visibbetvā.
২১৯. পঞ্চ অহানি পঞ্চাহং, পঞ্চাহমেৰ পঞ্চাহিকং। সঙ্ঘাটীনং চারো সঙ্ঘাটিচারো, পরিভোগৰসেন ৰা ওতাপনৰসেন ৰা সঙ্ঘটিতট্ঠেন ‘‘সঙ্ঘাটী’’তি লদ্ধনামানং ‘‘তিচীৰরং, উদকসাটিকা, সংকচ্চিকা’’তি ইমেসং পঞ্চন্নং চীৰরানং পরিৰত্তনং। অতিক্কমেতি ভিক্খুনী অতিক্কমেয্য। অস্সা পন একাৰ পাচিত্তি পরিদীপিতাতি যোজনা।
219. Pañca ahāni pañcāhaṃ, pañcāhameva pañcāhikaṃ. Saṅghāṭīnaṃ cāro saṅghāṭicāro, paribhogavasena vā otāpanavasena vā saṅghaṭitaṭṭhena ‘‘saṅghāṭī’’ti laddhanāmānaṃ ‘‘ticīvaraṃ, udakasāṭikā, saṃkaccikā’’ti imesaṃ pañcannaṃ cīvarānaṃ parivattanaṃ. Atikkameti bhikkhunī atikkameyya. Assā pana ekāva pācitti paridīpitāti yojanā.
২২০. সঙ্কমনীযন্তি সঙ্কমেতব্বং। অঞ্ঞিস্সা সন্তকং অনাপুচ্ছা গহিতং পুন দাতব্বং পঞ্চন্নং অঞ্ঞতরং।
220.Saṅkamanīyanti saṅkametabbaṃ. Aññissā santakaṃ anāpucchā gahitaṃ puna dātabbaṃ pañcannaṃ aññataraṃ.
২২১. গণচীৰরলাভস্সাতি ভিক্খুনিসঙ্ঘেন লভিতব্বচীৰরস্স। অন্তরাযং করোতীতি যথা তে দাতুকামা ন দেন্তি, এৰং পরক্কমতি।
221.Gaṇacīvaralābhassāti bhikkhunisaṅghena labhitabbacīvarassa. Antarāyaṃ karotīti yathā te dātukāmā na denti, evaṃ parakkamati.
২২২. ধম্মিকন্তি সমগ্গেন সঙ্ঘেন সন্নিপতিত্ৰা করিযমানং। পটিবাহন্তীতি পটিসেধেন্তী। পটিবাহিতে পটিসেধিতে।
222.Dhammikanti samaggena saṅghena sannipatitvā kariyamānaṃ. Paṭibāhantīti paṭisedhentī. Paṭibāhite paṭisedhite.
২২৩. অগারিকাদিনোতি আদি-সদ্দেন ‘‘পরিব্বাজকস্স ৰা পরিব্বাজিকায ৰা’’তি (পারা॰ ৯১৭) ৰুত্তে সঙ্গণ্হাতি। সমণচীৰরন্তি কপ্পকতং নিৰাসনপারুপনুপগং। পযোগেতি দানপযোগে।
223.Agārikādinoti ādi-saddena ‘‘paribbājakassa vā paribbājikāya vā’’ti (pārā. 917) vutte saṅgaṇhāti. Samaṇacīvaranti kappakataṃ nivāsanapārupanupagaṃ. Payogeti dānapayoge.
২২৪. চীৰরে দুব্বলাসাযাতি দুব্বলচীৰরপচ্চাসায ‘‘সচে সক্কোম, দস্সামা’’তি এত্তকমত্তং সুত্ৰা উপ্পাদিতায আসাযাতি অত্থো। কালন্তি চীৰরকালসমযং। সমতিক্কমেতি ভিক্খুনীহি কালচীৰরে ভাজিযমানে ‘‘আগমেথ, অয্যে, অত্থি সঙ্ঘস্স চীৰরপচ্চাসা’’তি ৰত্ৰা তং চীৰরৰিভঙ্গং সমতিক্কমেয্য।
224.Cīvare dubbalāsāyāti dubbalacīvarapaccāsāya ‘‘sace sakkoma, dassāmā’’ti ettakamattaṃ sutvā uppāditāya āsāyāti attho. Kālanti cīvarakālasamayaṃ. Samatikkameti bhikkhunīhi kālacīvare bhājiyamāne ‘‘āgametha, ayye, atthi saṅghassa cīvarapaccāsā’’ti vatvā taṃ cīvaravibhaṅgaṃ samatikkameyya.
২২৫. ধম্মিকং কথিনুদ্ধারন্তি সমগ্গেন সঙ্ঘেন করিযমানং কথিনস্স অন্তরুব্ভারং। পটিবাহন্তিযাতি নিৰারেন্তিযা।
225.Dhammikaṃ kathinuddhāranti samaggena saṅghena kariyamānaṃ kathinassa antarubbhāraṃ. Paṭibāhantiyāti nivārentiyā.
ন্হানৰগ্গৰণ্ণনা ততিযা।
Nhānavaggavaṇṇanā tatiyā.
২২৬. তুৰট্টেয্যুন্তি নিপজ্জেয্যুং। ইতরং পাচিত্তিযং।
226.Tuvaṭṭeyyunti nipajjeyyuṃ. Itaraṃ pācittiyaṃ.
২২৭. পযোগেতি ভিক্খুনিযা অফাসুককরণপযোগে করিযমানে।
227.Payogeti bhikkhuniyā aphāsukakaraṇapayoge kariyamāne.
২২৮. দুক্খিতন্তি গিলানং। নুপট্ঠাপেন্তিযা ৰাপীতি তস্সা উপট্ঠানং পরেহি অকারাপেন্তিযা, সযং ৰা অকরোন্তিযা।
228.Dukkhitanti gilānaṃ. Nupaṭṭhāpentiyā vāpīti tassā upaṭṭhānaṃ parehi akārāpentiyā, sayaṃ vā akarontiyā.
২২৯. উপস্সযং দত্ৰাতি কৰাটবন্ধং অত্তনো পুগ্গলিকৰিহারং দত্ৰা। কড্ঢিতেতি নিক্কড্ঢিতে।
229.Upassayaṃ datvāti kavāṭabandhaṃ attano puggalikavihāraṃ datvā. Kaḍḍhiteti nikkaḍḍhite.
২৩০. সংসট্ঠাতি গহপতিনা ৰা গহপতিপুত্তেন ৰা সংসট্ঠৰিহারী ভিক্খুনী সঙ্ঘেন সংসট্ঠৰিহারতো নিৰত্তিযমানা। ঞত্তিযা দুক্কটং ফুসেতি সমনুভাসনকম্মঞত্তিযা দুক্কটং আপজ্জেয্য।
230.Saṃsaṭṭhāti gahapatinā vā gahapatiputtena vā saṃsaṭṭhavihārī bhikkhunī saṅghena saṃsaṭṭhavihārato nivattiyamānā. Ñattiyā dukkaṭaṃ phuseti samanubhāsanakammañattiyā dukkaṭaṃ āpajjeyya.
২৩১. অন্তোরট্ঠেতি যস্স ৰিজিতে ৰিহরতি, তস্স রট্ঠে। পটিপন্নাযাতি চারিকং কপ্পেন্তিযা। সেসকন্তি পাচিত্তিযং।
231.Antoraṭṭheti yassa vijite viharati, tassa raṭṭhe. Paṭipannāyāti cārikaṃ kappentiyā. Sesakanti pācittiyaṃ.
তুৰট্টৰগ্গৰণ্ণনা চতুত্থা।
Tuvaṭṭavaggavaṇṇanā catutthā.
২৩৩. রাজাগারাদিকন্তি আদি-সদ্দেন চিত্তাগারাদীনং গহণং।
233.Rājāgārādikanti ādi-saddena cittāgārādīnaṃ gahaṇaṃ.
২৩৫. পযোগেতি কপ্পাসৰিচারণং আদিং কত্ৰা সব্বপযোগে। উজ্জৰুজ্জৰনেতি যত্তকং হত্থেন অঞ্ছিতং হোতি, তস্মিং তক্কম্হি ৰেঠিতে।
235.Payogeti kappāsavicāraṇaṃ ādiṃ katvā sabbapayoge. Ujjavujjavaneti yattakaṃ hatthena añchitaṃ hoti, tasmiṃ takkamhi veṭhite.
২৩৭. পযোগেতি অগারিকস্স ৰা পরিব্বাজকস্স ৰা পরিব্বাজিকায ৰা সহত্থা খাদনীযাদীনং দানপযোগে।
237.Payogeti agārikassa vā paribbājakassa vā paribbājikāya vā sahatthā khādanīyādīnaṃ dānapayoge.
২৩৮. ‘‘সমং আপত্তিপভেদতো’’তি পদচ্ছেদো।
238. ‘‘Samaṃ āpattipabhedato’’ti padacchedo.
২৩৯. তিরচ্ছানগতং ৰিজ্জন্তি যং কিঞ্চি বাহিরকং অনত্থসংহিতং পরূপঘাতকরং হত্থিসিক্খাদিসিপ্পং । পঠন্তিযাতি সিক্খন্তিযা। পযোগেতি দুরুপসঙ্কমনাদিপযোগে। পদে পদেতি পদাদিৰসেন পরিযাপুণন্তিযা পদে পদে অক্খরপদানং ৰসেন।
239.Tiracchānagataṃvijjanti yaṃ kiñci bāhirakaṃ anatthasaṃhitaṃ parūpaghātakaraṃ hatthisikkhādisippaṃ . Paṭhantiyāti sikkhantiyā. Payogeti durupasaṅkamanādipayoge. Pade padeti padādivasena pariyāpuṇantiyā pade pade akkharapadānaṃ vasena.
২৪০. নৰমে ‘‘পরিযাপুণাতী’’তি পদং, দসমে ‘‘ৰাচেতী’’তি পদন্তি এৰং পদমত্তমেৰ উভিন্নং ৰিসেসকং ভেদকং।
240. Navame ‘‘pariyāpuṇātī’’ti padaṃ, dasame ‘‘vācetī’’ti padanti evaṃ padamattameva ubhinnaṃ visesakaṃ bhedakaṃ.
চিত্তাগারৰগ্গৰণ্ণনা পঞ্চমা।
Cittāgāravaggavaṇṇanā pañcamā.
২৪১. তমারামন্তি যত্থ ভিক্খূ রুক্খমূলেপি ৰসন্তি, তং সভিক্খুকং পদেসং।
241.Tamārāmanti yattha bhikkhū rukkhamūlepi vasanti, taṃ sabhikkhukaṃ padesaṃ.
২৪৩. অক্কোসতীতি দসন্নং অক্কোসৰত্থূনং অঞ্ঞতরেন সম্মুখা ৰা পরম্মুখা ৰা অক্কোসতি। পরিভাসতীতি ভযদস্সনেন তজ্জেতি। ‘‘পাচিত্তি অক্কোসিতে’’তি পদচ্ছেদো।
243.Akkosatīti dasannaṃ akkosavatthūnaṃ aññatarena sammukhā vā parammukhā vā akkosati. Paribhāsatīti bhayadassanena tajjeti. ‘‘Pācitti akkosite’’ti padacchedo.
২৪৪. চণ্ডিকভাৰেনাতি কোধেন। গণন্তি ভিক্খুনিসঙ্ঘং। পরিভাসতীতি ‘‘বালা এতা’’তিআদীহি ৰচনেহি অক্কোসতি। পযোগেতি পরিভাসনপযোগে। পরিভট্ঠেতি অক্কোসিতে। ইতরং পাচিত্তিযং।
244.Caṇḍikabhāvenāti kodhena. Gaṇanti bhikkhunisaṅghaṃ. Paribhāsatīti ‘‘bālā etā’’tiādīhi vacanehi akkosati. Payogeti paribhāsanapayoge. Paribhaṭṭheti akkosite. Itaraṃ pācittiyaṃ.
২৪৫. নিমন্তিতাতি গণভোজনে ৰুত্তনযেন নিমন্তিতা। পৰারিতাতি পৰারণসিক্খাপদে ৰুত্তনযেন ৰারিতা। খাদনং ভোজনম্পি ৰাতি যাগুপূৰখজ্জকং, যাৰকালিকং মূলখাদনীযাদিখাদনীযং, ওদনাদিভোজনম্পি ৰা যা ভিক্খুনী ভুঞ্জন্তী হোতি, সা পন দ্ৰেযেৰ আপত্তিযো ফুসেতি যোজনা।
245.Nimantitāti gaṇabhojane vuttanayena nimantitā. Pavāritāti pavāraṇasikkhāpade vuttanayena vāritā. Khādanaṃ bhojanampi vāti yāgupūvakhajjakaṃ, yāvakālikaṃ mūlakhādanīyādikhādanīyaṃ, odanādibhojanampi vā yā bhikkhunī bhuñjantī hoti, sā pana dveyeva āpattiyo phuseti yojanā.
২৪৭. মচ্ছরাযন্তীতি মচ্ছরং করোন্তী, অত্তনো পচ্চযদাযককুলস্স অঞ্ঞেহি সাধারণভাৰং অসহন্তীতি অত্থো । পযোগেতি তদনুরূপে কাযৰচীপযোগে। মচ্ছরিতেতি মচ্ছরৰসেন কতপযোগে নিপ্ফন্নে।
247.Maccharāyantīti maccharaṃ karontī, attano paccayadāyakakulassa aññehi sādhāraṇabhāvaṃ asahantīti attho . Payogeti tadanurūpe kāyavacīpayoge. Macchariteti maccharavasena katapayoge nipphanne.
২৪৮. অভিক্খুকে পনাৰাসেতি যতো ভিক্খুনুপস্সযতো অদ্ধযোজনব্ভন্তরে ওৰাদদাযকা ভিক্খূ ন ৰসন্তি, মগ্গো ৰা অখেমো হোতি, ন সক্কা অনন্তরাযেন গন্তুং, এৰরূপে আৰাসে। পুব্বকিচ্চেসূতি ‘‘ৰস্সং ৰসিস্সামী’’তি সেনাসনপঞ্ঞাপনপানীযউপট্ঠাপনাদিপুব্বকিচ্চে পন করিযমানে দুক্কটং ভৰেতি যোজনা।
248.Abhikkhuke panāvāseti yato bhikkhunupassayato addhayojanabbhantare ovādadāyakā bhikkhū na vasanti, maggo vā akhemo hoti, na sakkā anantarāyena gantuṃ, evarūpe āvāse. Pubbakiccesūti ‘‘vassaṃ vasissāmī’’ti senāsanapaññāpanapānīyaupaṭṭhāpanādipubbakicce pana kariyamāne dukkaṭaṃ bhaveti yojanā.
২৪৯. ৰস্সংৰুত্থাতি পুরিমং ৰা পচ্ছিমং ৰা তেমাসং ৰুত্থা। উভতোসঙ্ঘেতি ভিক্খুনিসঙ্ঘে, ভিক্খুসঙ্ঘে চ। তীহিপি ঠানেহীতি ‘‘দিট্ঠেন ৰা’’তিআদিনা ৰুত্তেহি তীহি কারণেহি।
249.Vassaṃvutthāti purimaṃ vā pacchimaṃ vā temāsaṃ vutthā. Ubhatosaṅgheti bhikkhunisaṅghe, bhikkhusaṅghe ca. Tīhipi ṭhānehīti ‘‘diṭṭhena vā’’tiādinā vuttehi tīhi kāraṇehi.
২৫০. ওৰাদত্থাযাতি গরুধম্মোৰাদনত্থায। সংৰাসত্থাযাতি উপোসথপুচ্ছনত্থায চেৰ পৰারণত্থায চ। ন গচ্ছতীতি ভিক্খুং ন উপগচ্ছতি।
250.Ovādatthāyāti garudhammovādanatthāya. Saṃvāsatthāyāti uposathapucchanatthāya ceva pavāraṇatthāya ca. Na gacchatīti bhikkhuṃ na upagacchati.
২৫১. ওৰাদম্পি ন যাচন্তীতি উপোসথাদিৰসেন ওৰাদূপসঙ্কমনং ভিক্খুং ন যাচন্তী ন পুচ্ছন্তী। উপোসথন্তি উপোসথদিৰসতো পুরিমদিৰসে তেরসিযং ৰা চাতুদ্দসিযং ৰা উপোসথং ন পুচ্ছন্তী।
251.Ovādampi na yācantīti uposathādivasena ovādūpasaṅkamanaṃ bhikkhuṃ na yācantī na pucchantī. Uposathanti uposathadivasato purimadivase terasiyaṃ vā cātuddasiyaṃ vā uposathaṃ na pucchantī.
২৫২. অপুচ্ছিত্ৰাৰ সঙ্ঘং ৰাতি সঙ্ঘং ৰা গণং ৰা অনপলোকেত্ৰাৰ। ‘‘ভেদাপেতী’’তি ইদং নিদস্সনমত্তং ‘‘ফালাপেয্য ৰা ধোৰাপেয্য ৰা আলিম্পাপেয্য ৰা বন্ধাপেয্য ৰা মোচাপেয্য ৰা’’তি ইমেসম্পি কিরিযাৰিকপ্পানং সঙ্গহেতব্বত্তা। পসাখজন্তি নাভিযা হেট্ঠা, জাণুমণ্ডলানং উপরি পদেসে জাতং গণ্ডং ৰা রুধিতং ৰা। পযোগেতি ভেদাপনাদিপযোগে।
252.Apucchitvāva saṅghaṃ vāti saṅghaṃ vā gaṇaṃ vā anapaloketvāva. ‘‘Bhedāpetī’’ti idaṃ nidassanamattaṃ ‘‘phālāpeyya vā dhovāpeyya vā ālimpāpeyya vā bandhāpeyya vā mocāpeyya vā’’ti imesampi kiriyāvikappānaṃ saṅgahetabbattā. Pasākhajanti nābhiyā heṭṭhā, jāṇumaṇḍalānaṃ upari padese jātaṃ gaṇḍaṃ vā rudhitaṃ vā. Payogeti bhedāpanādipayoge.
আরামৰগ্গৰণ্ণনা ছট্ঠা।
Ārāmavaggavaṇṇanā chaṭṭhā.
২৫৩. গব্ভিনিন্তি আপন্নসত্তং সিক্খমানং। ৰুট্ঠাপেন্তীতি উপজ্ঝাযা হুত্ৰা উপসম্পাদেন্তী। পযোগেতি গণপরিযেসনাদিপযোগে। ৰুট্ঠাপিতেতি উপসম্পাদিতে, কম্মৰাচাপরিযোসানেতি অত্থো।
253.Gabbhininti āpannasattaṃ sikkhamānaṃ. Vuṭṭhāpentīti upajjhāyā hutvā upasampādentī. Payogeti gaṇapariyesanādipayoge. Vuṭṭhāpiteti upasampādite, kammavācāpariyosāneti attho.
২৫৫. সহজীৰিনিন্তি সদ্ধিৰিহারিনিং। নানুগ্গণ্হন্তীতি উদ্দেসদানাদীহি ন সঙ্গণ্হন্তী।
255.Sahajīvininti saddhivihāriniṃ. Nānuggaṇhantīti uddesadānādīhi na saṅgaṇhantī.
গব্ভিনিৰগ্গৰণ্ণনা সত্তমা।
Gabbhinivaggavaṇṇanā sattamā.
২৫৮. ‘‘অলং ৰুট্ঠাপিতেনা’’তি ৰুচ্চমানা ভিক্খুনীহি নিৰারিযমানা। খীযতীতি অঞ্ঞাসং ব্যত্তানং লজ্জীনং ৰুট্ঠানসম্মুতিং দীযমানং দিস্ৰা ‘‘অহমেৰ নূন বালা’’তিআদিনা ভণমানা খীযতি। পযোগেতি খীযমানপযোগে। খীযিতেতি খীযনপযোগে নিট্ঠিতে।
258. ‘‘Alaṃ vuṭṭhāpitenā’’ti vuccamānā bhikkhunīhi nivāriyamānā. Khīyatīti aññāsaṃ byattānaṃ lajjīnaṃ vuṭṭhānasammutiṃ dīyamānaṃ disvā ‘‘ahameva nūna bālā’’tiādinā bhaṇamānā khīyati. Payogeti khīyamānapayoge. Khīyiteti khīyanapayoge niṭṭhite.
কুমারিভূতৰগ্গৰণ্ণনা অট্ঠমা।
Kumāribhūtavaggavaṇṇanā aṭṭhamā.
২৬০. ছত্তুপাহনন্তি ৰুত্তলক্খণং ছত্তঞ্চ উপাহনাযো চ। পযোগেতি ধারণপযোগে।
260.Chattupāhananti vuttalakkhaṇaṃ chattañca upāhanāyo ca. Payogeti dhāraṇapayoge.
২৬১. যানেনাতি ৰয্হাদিনা। যাযন্তীতি সচে যানেন গতা হোতি।
261.Yānenāti vayhādinā. Yāyantīti sace yānena gatā hoti.
২৬২. সঙ্ঘাণিন্তি যং কিঞ্চি কটূপগং। ধারেন্তিযাতি কটিযং পটিমুচ্চন্তিযা।
262.Saṅghāṇinti yaṃ kiñci kaṭūpagaṃ. Dhārentiyāti kaṭiyaṃ paṭimuccantiyā.
২৬৩. গন্ধৰণ্ণেনাতি যেন কেনচি ৰণ্ণেন চ যেন কেনচি গন্ধেন চ। গন্ধো নাম চন্দনালেপাদি। ৰণ্ণো নাম কুঙ্কুমহলিদ্দাদি। পযোগেতি গন্ধাদিপযোগে রচনতো পট্ঠায পুব্বপযোগে।
263.Gandhavaṇṇenāti yena kenaci vaṇṇena ca yena kenaci gandhena ca. Gandho nāma candanālepādi. Vaṇṇo nāma kuṅkumahaliddādi. Payogeti gandhādipayoge racanato paṭṭhāya pubbapayoge.
২৬৬. অনাপুচ্ছাতি ‘‘নিসীদামি, অয্যা’’তি অনাপুচ্ছিত্ৰা। নিসীদিতে ভিক্খুস্স উপচারে অন্তমসো ছমায নিসিন্নে।
266.Anāpucchāti ‘‘nisīdāmi, ayyā’’ti anāpucchitvā. Nisīdite bhikkhussa upacāre antamaso chamāya nisinne.
২৬৭. অনোকাসকতন্তি ‘‘অসুকস্মিং নাম ঠানে পুচ্ছিস্সামী’’তি এৰং অকতওকাসং।
267.Anokāsakatanti ‘‘asukasmiṃ nāma ṭhāne pucchissāmī’’ti evaṃ akataokāsaṃ.
২৬৮. পৰিসন্তিযাতি ৰিনিচ্ছযং আরামৰগ্গস্স পঠমেনেৰ সিক্খাপদেন সদিসং কত্ৰা ৰদেয্যাতি যোজনা।
268.Pavisantiyāti vinicchayaṃ ārāmavaggassa paṭhameneva sikkhāpadena sadisaṃ katvā vadeyyāti yojanā.
ছত্তুপাহনৰগ্গৰণ্ণনা নৰমা।
Chattupāhanavaggavaṇṇanā navamā.
ইতি উত্তরে লীনত্থপকাসনিযা ভিক্খুনিৰিভঙ্গে
Iti uttare līnatthapakāsaniyā bhikkhunivibhaṅge
পাচিত্তিযকথাৰণ্ণনা নিট্ঠিতা।
Pācittiyakathāvaṇṇanā niṭṭhitā.
২৬৯-৭০. অট্ঠসু পাটিদেসনীযসিক্খাপদেসুপি দ্ৰিধা আপত্তি হোতীতি যোজনা। ততোতি গহণহেতু। সব্বেসূতি পাটিদেসনীযসিক্খাপদেসু।
269-70. Aṭṭhasu pāṭidesanīyasikkhāpadesupi dvidhā āpatti hotīti yojanā. Tatoti gahaṇahetu. Sabbesūti pāṭidesanīyasikkhāpadesu.
পাটিদেসনীযকথাৰণ্ণনা।
Pāṭidesanīyakathāvaṇṇanā.
২৭১-২. ইমং পরমং উত্তমং নিরুত্তরং কেনচি ৰা ৰত্তব্বেন উত্তরেন রহিতং নিদ্দোসং উত্তরং এৰংনামকং ধীরো পঞ্ঞৰা ভিক্খু অত্থৰসেন ৰিদিত্ৰা দুরুত্তরং কিচ্ছেন উত্তরিতব্বং পঞ্ঞত্তমহাসমুদ্দং ৰিনযমহাসাগরং সুখেনেৰ যস্মা উত্তরতি, তস্মা কঙ্খচ্ছেদে ৰিনযৰিচিকিচ্ছায ছিন্দনে সত্থে সত্থসদিসে অস্মিং সত্থে ইমস্মিং উত্তরপকরণে উস্মাযুত্তো কম্মজতেজোধাতুযা সমন্নাগতো জীৰমানো ভিক্খু নিচ্চং নিরন্তরং সত্তো অভিরতো নিচ্চং যোগং সততাভিযোগং কাতুং যুত্তো অনুরূপোতি যোজনা।
271-2. Imaṃ paramaṃ uttamaṃ niruttaraṃ kenaci vā vattabbena uttarena rahitaṃ niddosaṃ uttaraṃ evaṃnāmakaṃ dhīro paññavā bhikkhu atthavasena viditvā duruttaraṃ kicchena uttaritabbaṃ paññattamahāsamuddaṃ vinayamahāsāgaraṃ sukheneva yasmā uttarati, tasmā kaṅkhacchede vinayavicikicchāya chindane satthe satthasadise asmiṃ satthe imasmiṃ uttarapakaraṇe usmāyutto kammajatejodhātuyā samannāgato jīvamāno bhikkhu niccaṃ nirantaraṃ satto abhirato niccaṃ yogaṃ satatābhiyogaṃ kātuṃ yutto anurūpoti yojanā.
ভিক্খুনিৰিভঙ্গো নিট্ঠিতোতি এত্থাপি উপ্পত্তি ৰুত্তনযেনেৰ ৰেদিতব্বা।
Bhikkhunivibhaṅgo niṭṭhitoti etthāpi uppatti vuttanayeneva veditabbā.
ইতি উত্তরে লীনত্থপকাসনিযা
Iti uttare līnatthapakāsaniyā
ভিক্খুনিৰিভঙ্গৰণ্ণনা নিট্ঠিতা।
Bhikkhunivibhaṅgavaṇṇanā niṭṭhitā.
