| Library / Tipiṭaka / ತಿಪಿಟಕ • Tipiṭaka / ವಿನಯವಿನಿಚ್ಛಯ-ಟೀಕಾ • Vinayavinicchaya-ṭīkā |
ಭಿಕ್ಖುನಿವಿಭಙ್ಗೋ
Bhikkhunivibhaṅgo
೧೭೦. ವಿನಯಸ್ಸ ವಿನಿಚ್ಛಯೇ ಭಿಕ್ಖೂನಂ ಪಾಟವತ್ಥಾಯಾತಿ ಭಿಕ್ಖುನೀನಂ ಪಾಟವಸ್ಸಾಪಿ ತದಧೀನತ್ತಾ ಪಧಾನದಸ್ಸನವಸೇನ ವುತ್ತಂ। ಅಥ ವಾ ದಸ್ಸನಲಿಙ್ಗನ್ತರಸಾಧಾರಣತ್ತೇ ಇಚ್ಛಿತೇ ಪುಲ್ಲಿಙ್ಗೇನ, ನಪುಂಸಕಲಿಙ್ಗೇನ ವಾ ನಿದ್ದೇಸೋ ಸದ್ದಸತ್ಥಾನುಯೋಗತೋತಿ ‘‘ಭಿಕ್ಖೂನ’’ನ್ತಿ ಪುಲ್ಲಿಙ್ಗೇನ ವುತ್ತಂ।
170.Vinayassa vinicchaye bhikkhūnaṃ pāṭavatthāyāti bhikkhunīnaṃ pāṭavassāpi tadadhīnattā padhānadassanavasena vuttaṃ. Atha vā dassanaliṅgantarasādhāraṇatte icchite pulliṅgena, napuṃsakaliṅgena vā niddeso saddasatthānuyogatoti ‘‘bhikkhūna’’nti pulliṅgena vuttaṃ.
೧೭೧. ನನ್ದನ್ತೀ ಸಾದಿಯನ್ತೀ।
171.Nandantī sādiyantī.
೧೭೨. ತಿಸ್ಸೋ ಆಪತ್ತಿಯೋ ಫುಸೇತಿ ಯೋಜನಾ। ಜಾಣುಸ್ಸ ಉದ್ಧಂ, ಅಕ್ಖಕಸ್ಸ ಅಧೋ ಗಹಣಂ ಸಾದಿಯನ್ತಿಯಾ ತಸ್ಸಾ ಪಾರಾಜಿಕನ್ತಿ ಯೋಜನಾ।
172. Tisso āpattiyo phuseti yojanā. Jāṇussa uddhaṃ, akkhakassa adho gahaṇaṃ sādiyantiyā tassā pārājikanti yojanā.
೧೭೩. ಕಾಯಪಟಿಬದ್ಧೇ ವಾ ಗಹಣಂ ಸಾದಿಯನ್ತಿಯಾ ದುಕ್ಕಟಂ।
173. Kāyapaṭibaddhe vā gahaṇaṃ sādiyantiyā dukkaṭaṃ.
೧೭೪. ವಜ್ಜನ್ತಿ ಅಞ್ಞಿಸ್ಸಾ ಭಿಕ್ಖುನಿಯಾ ಪಾರಾಜಿಕಾಪತ್ತಿಂ।
174.Vajjanti aññissā bhikkhuniyā pārājikāpattiṃ.
೧೭೬. ತಂ ಲದ್ಧಿನ್ತಿ ಉಕ್ಖಿತ್ತಸ್ಸ ಯಂ ಲದ್ಧಿಂ ಅತ್ತನೋ ರೋಚೇಸಿ, ತಂ ಲದ್ಧಿಂ ನ ನಿಸ್ಸಜ್ಜನ್ತೀತಿ ಯೋಜನಾ।
176.Taṃladdhinti ukkhittassa yaṃ laddhiṃ attano rocesi, taṃ laddhiṃ na nissajjantīti yojanā.
೧೭೮. ‘‘ಇಧ ಆಗಚ್ಛಾ’’ತಿ ಪದಚ್ಛೇದೋ। ‘‘ವುತ್ತಾ ಆಗಚ್ಛತೀ’’ತಿ ಪದಚ್ಛೇದೋ।
178. ‘‘Idha āgacchā’’ti padacchedo. ‘‘Vuttā āgacchatī’’ti padacchedo.
೧೭೯. ಹತ್ಥಪಾಸಪ್ಪವೇಸನೇತಿ ಹತ್ಥಪಾಸೂಪಗಮನೇ। ‘‘ಹತ್ಥಗತಪ್ಪವೇಸನೇ’’ತಿ ವಾ ಪಾಠೋ, ಸೋಯೇವ ಅತ್ಥೋ।
179.Hatthapāsappavesaneti hatthapāsūpagamane. ‘‘Hatthagatappavesane’’ti vā pāṭho, soyeva attho.
ಇತಿ ಉತ್ತರೇ ಲೀನತ್ಥಪಕಾಸನಿಯಾ ಭಿಕ್ಖುನಿವಿಭಙ್ಗೇ
Iti uttare līnatthapakāsaniyā bhikkhunivibhaṅge
ಪಾರಾಜಿಕಕಥಾವಣ್ಣನಾ ನಿಟ್ಠಿತಾ।
Pārājikakathāvaṇṇanā niṭṭhitā.
೧೮೦. ಏಕಸ್ಸಾತಿ ಅತ್ತನೋ ಅತ್ತನೋ ಅಟ್ಟಕಾರಸ್ಸ ವಾ। ಆರೋಚನೇತಿ ವತ್ತಬ್ಬಸ್ಸ ವೋಹಾರಿಕಾನಂ ನಿವೇದನೇ।
180.Ekassāti attano attano aṭṭakārassa vā. Ārocaneti vattabbassa vohārikānaṃ nivedane.
೧೮೧. ದುತಿಯಾರೋಚನೇತಿ ದುತಿಯಸ್ಸ, ದುತಿಯಂ ಏವಂ ಆರೋಚನೇ।
181.Dutiyārocaneti dutiyassa, dutiyaṃ evaṃ ārocane.
೧೮೨. ದ್ವೀಹೀತಿ ದ್ವೀಹಿ ಕಮ್ಮವಾಚಾಹಿ। ಕಮ್ಮವಾಚೋಸಾನೇತಿ ಕಮ್ಮವಾಚಾಓಸಾನೇ।
182.Dvīhīti dvīhi kammavācāhi. Kammavācosāneti kammavācāosāne.
೧೮೩. ಪರಿಕ್ಖೇಪೇ ಅತಿಕ್ಕನ್ತೇತಿ ಅತ್ತನೋ ಗಾಮತೋ ಗನ್ತ್ವಾ ಇತರಂ ಗಾಮಂ ಪವಿಸನ್ತಿಯಾ ಪಠಮೇನ ಪಾದೇನ ತಸ್ಸ ಗಾಮಸ್ಸ ಪರಿಕ್ಖೇಪೇ ಅತಿಕ್ಕನ್ತೇ, ಪಠಮಪಾದೇ ಪರಿಕ್ಖೇಪಂ ಅತಿಕ್ಕಮೇತ್ವಾ ಅನ್ತೋಗಾಮಸಙ್ಖೇಪಂ ಗತೇತಿ ಅತ್ಥೋ।
183.Parikkhepe atikkanteti attano gāmato gantvā itaraṃ gāmaṃ pavisantiyā paṭhamena pādena tassa gāmassa parikkhepe atikkante, paṭhamapāde parikkhepaṃ atikkametvā antogāmasaṅkhepaṃ gateti attho.
೧೮೪. ದುತಿಯೇನಾತಿ ಗಾಮಪರಿಕ್ಖೇಪತೋ ಬಹಿ ಠಿತೇನ ದುತಿಯಪಾದೇನ। ಅತಿಕ್ಕನ್ತೇತಿ ತಸ್ಮಿಂ ಗಾಮಪರಿಕ್ಖೇಪೇ ಅತಿಕ್ಕನ್ತೇ, ತಸ್ಮಿಂ ಪಾದೇ ಅನ್ತೋಗಾಮಂ ಪವೇಸಿತೇತಿ ಅತ್ಥೋ। ಸೇಸಂ ಉತ್ತಾನತ್ಥಮೇವ।
184.Dutiyenāti gāmaparikkhepato bahi ṭhitena dutiyapādena. Atikkanteti tasmiṃ gāmaparikkhepe atikkante, tasmiṃ pāde antogāmaṃ pavesiteti attho. Sesaṃ uttānatthameva.
ಇತಿ ಉತ್ತರೇ ಲೀನತ್ಥಪಕಾಸನಿಯಾ ಭಿಕ್ಖುನಿವಿಭಙ್ಗೇ
Iti uttare līnatthapakāsaniyā bhikkhunivibhaṅge
ಸಙ್ಘಾದಿಸೇಸಕಥಾವಣ್ಣನಾ ನಿಟ್ಠಿತಾ।
Saṅghādisesakathāvaṇṇanā niṭṭhitā.
೧೯೩. ಇಹ ಭಿಕ್ಖುನೀ ಪತ್ತಸನ್ನಿಚಯಂ ಕರೋನ್ತೀ ಹೋತಿ, ಸಾ ಏಕಂ ನಿಸ್ಸಗ್ಗಿಯಂ ಪಾಚಿತ್ತಿಯಂಯೇವ ಫುಸೇತಿ ಯೋಜನಾ।
193. Iha bhikkhunī pattasannicayaṃ karontī hoti, sā ekaṃ nissaggiyaṃ pācittiyaṃyeva phuseti yojanā.
೧೯೪. ಅಕಾಲಚೀವರಂ ಕಾಲಚೀವರಂ ಕತ್ವಾ ಭಾಜಾಪೇನ್ತಿಯಾತಿ ಯೋಜನಾ। ಪಯೋಗೇತಿ ಭಾಜನಪಯೋಗೇ।
194.Akālacīvaraṃ kālacīvaraṃ katvā bhājāpentiyāti yojanā. Payogeti bhājanapayoge.
೧೯೫. ಛಿನ್ನೇತಿ ಅಚ್ಛಿನ್ನೇ।
195.Chinneti acchinne.
೧೯೬. ತತೋ ಪರನ್ತಿ ತತೋ ಪಠಮತೋ ಅಞ್ಞಂ।
196.Tato paranti tato paṭhamato aññaṃ.
ಇತಿ ಉತ್ತರೇ ಲೀನತ್ಥಪಕಾಸನಿಯಾ ಭಿಕ್ಖುನಿವಿಭಙ್ಗೇ
Iti uttare līnatthapakāsaniyā bhikkhunivibhaṅge
ನಿಸ್ಸಗ್ಗಿಯಕಥಾವಣ್ಣನಾ ನಿಟ್ಠಿತಾ।
Nissaggiyakathāvaṇṇanā niṭṭhitā.
೧೯೯. ಲಸುಣಂ ಖಾದತಿ ಚೇ, ದ್ವೇ ಆಪತ್ತಿಯೋ ಫುಟಾತಿ ಯೋಜನಾ।
199. Lasuṇaṃ khādati ce, dve āpattiyo phuṭāti yojanā.
೨೦೦. ಪಯೋಗೇತಿ ಸಂಹಾರಾಪನಪಯೋಗೇ। ಸಂಹಟೇತಿ ಅತ್ತನಾ ಸಂಹಟೇ, ಪರೇನ ಸಂಹರಾಪಿತೇ ಚ ಆಪತ್ತಿ ಪಾಚಿತ್ತಿ ಹೋತಿ।
200.Payogeti saṃhārāpanapayoge. Saṃhaṭeti attanā saṃhaṭe, parena saṃharāpite ca āpatti pācitti hoti.
೨೦೧. ಕತೇತಿ ತಲಘಾತೇ ಕತೇ।
201.Kateti talaghāte kate.
೨೦೨. ಜತುನಾ ಮಟ್ಠಕನ್ತಿ ಜತುನಾ ಕತಂ ಮಟ್ಠದಣ್ಡಕಂ। ‘‘ದುಕ್ಕಟಂ ಆದಿನ್ನೇ’’ತಿ ಪದಚ್ಛೇದೋ।
202.Jatunā maṭṭhakanti jatunā kataṃ maṭṭhadaṇḍakaṃ. ‘‘Dukkaṭaṃ ādinne’’ti padacchedo.
೨೦೪. ಭುಞ್ಜಮಾನಸ್ಸ ಭಿಕ್ಖುಸ್ಸ ಹತ್ಥಪಾಸೇತಿ ಯೋಜನಾ। ಹಿತ್ವಾ ಹತ್ಥಪಾಸಂ।
204. Bhuñjamānassa bhikkhussa hatthapāseti yojanā. Hitvā hatthapāsaṃ.
೨೦೫. ವಿಞ್ಞಾಪೇತ್ವಾತಿ ಅನ್ತಮಸೋ ಮಾತರಮ್ಪಿ ಯಾಚಿತ್ವಾ। ಅಜ್ಝೋಹಾರೇ ಪಾಚಿತ್ತಿಂ ದೀಪಯೇತಿ ಯೋಜನಾ।
205.Viññāpetvāti antamaso mātarampi yācitvā. Ajjhohāre pācittiṃ dīpayeti yojanā.
೨೦೬. ಉಚ್ಚಾರಾದಿನ್ತಿ ಆದಿ-ಸದ್ದೇನ ವಿಘಾಸಸಙ್ಕಾರಮುತ್ತಾನಂ ಗಹಣಂ।
206.Uccārādinti ādi-saddena vighāsasaṅkāramuttānaṃ gahaṇaṃ.
ಲಸುಣವಗ್ಗವಣ್ಣನಾ ಪಠಮಾ।
Lasuṇavaggavaṇṇanā paṭhamā.
೨೦೯. ಇಧ ಇಮಸ್ಮಿಂ ರತ್ತನ್ಧಕಾರವಗ್ಗೇ। ಪಠಮೇ, ದುತಿಯೇ, ತತಿಯೇ, ಚತುತ್ಥೇಪಿ ವಿನಿಚ್ಛಯೋ ಲಸುಣವಗ್ಗಸ್ಸ ಛಟ್ಠೇನ ಸಿಕ್ಖಾಪದೇನ ತುಲ್ಯೋ ಸದಿಸೋತಿ ಯೋಜನಾ।
209.Idha imasmiṃ rattandhakāravagge. Paṭhame, dutiye, tatiye, catutthepi vinicchayo lasuṇavaggassa chaṭṭhena sikkhāpadena tulyo sadisoti yojanā.
೨೧೦. ಆಸನೇತಿ ಪಲ್ಲಙ್ಕೇ ತಸ್ಸೋಕಾಸಭೂತೇ। ಸಾಮಿಕೇ ಅನಾಪುಚ್ಛಾತಿ ತಸ್ಮಿಂ ಕುಲೇ ಯಂ ಕಿಞ್ಚಿ ವಿಞ್ಞುಮನುಸ್ಸಂ ಅನಾಪುಚ್ಛಾ।
210.Āsaneti pallaṅke tassokāsabhūte. Sāmike anāpucchāti tasmiṃ kule yaṃ kiñci viññumanussaṃ anāpucchā.
೨೧೧. ಅನೋವಸ್ಸನ್ತಿ ಭಿತ್ತಿಯಾ ಬಹಿ ನಿಬ್ಬಕೋಸಬ್ಭನ್ತರಂ। ದುತಿಯಾತಿಕ್ಕಮೇತಿ ದುತಿಯೇನ ಪಾದೇನ ನಿಬ್ಬಕೋಸಸ್ಸ ಉದಕಪಾತಟ್ಠಾನಾತಿಕ್ಕಮೇ।
211.Anovassanti bhittiyā bahi nibbakosabbhantaraṃ. Dutiyātikkameti dutiyena pādena nibbakosassa udakapātaṭṭhānātikkame.
೨೧೨. ನಿಸೀದಿತೇತಿ ನಿಸಿನ್ನೇ।
212.Nisīditeti nisinne.
೨೧೩. ಪಯೋಗೇತಿ ಉಜ್ಝಾಪನಪಯೋಗೇ।
213.Payogeti ujjhāpanapayoge.
೨೧೪. ನಿರಯಾದಿನಾ ಅತ್ತಾನಂ ವಾ ಪರಂ ವಾ ಅಭಿಸಪ್ಪೇನ್ತೀ ಸಪಥಂ ಕರೋನ್ತೀ ದ್ವೇ ಫುಸೇತಿ ಯೋಜನಾ। ಅಭಿಸಪ್ಪಿತೇತಿ ಅಭಿಸಪಿತೇ।
214. Nirayādinā attānaṃ vā paraṃ vā abhisappentī sapathaṃ karontī dve phuseti yojanā. Abhisappiteti abhisapite.
೨೧೫. ವಧಿತ್ವಾತಿ ಹತ್ಥಾದೀಹಿ ಪಹರಿತ್ವಾ। ‘‘ಕರೋತಿ ಏಕ’’ನ್ತಿ ಪದಚ್ಛೇದೋ।
215.Vadhitvāti hatthādīhi paharitvā. ‘‘Karoti eka’’nti padacchedo.
ರತ್ತನ್ಧಕಾರವಗ್ಗವಣ್ಣನಾ ದುತಿಯಾ।
Rattandhakāravaggavaṇṇanā dutiyā.
೨೧೬. ನಗ್ಗಾತಿ ಅನಿವತ್ಥಾ ವಾ ಅಪಾರುತಾ ವಾ। ಪಯೋಗೇತಿ ಚುಣ್ಣಮತ್ತಿಕಾಅಭಿಸಙ್ಖರಣಾದಿಪಯೋಗೇ।
216.Naggāti anivatthā vā apārutā vā. Payogeti cuṇṇamattikāabhisaṅkharaṇādipayoge.
೨೧೭. ಪಮಾಣಾತಿಕ್ಕನ್ತನ್ತಿ ‘‘ದೀಘಸೋಚತಸ್ಸೋ ವಿದತ್ಥಿಯೋ ಸುಗತವಿದತ್ಥಿಯಾ, ತಿರಿಯಂ ದ್ವೇ ವಿದತ್ಥಿಯೋ’’ತಿ (ಪಾಚಿ॰ ೮೮೮) ವುತ್ತಪಮಾಣಮತಿಕ್ಕನ್ತಂ। ಪಯೋಗೇತಿ ಕಾರಾಪನಪಯೋಗೇ।
217.Pamāṇātikkantanti ‘‘dīghasocatasso vidatthiyo sugatavidatthiyā, tiriyaṃ dve vidatthiyo’’ti (pāci. 888) vuttapamāṇamatikkantaṃ. Payogeti kārāpanapayoge.
೨೧೮. ವಿಸಿಬ್ಬೇತ್ವಾತಿ ದುಸ್ಸಿಬ್ಬಿತಂ ಪುನ ಸಿಬ್ಬನತ್ಥಾಯ ವಿಸಿಬ್ಬೇತ್ವಾ।
218.Visibbetvāti dussibbitaṃ puna sibbanatthāya visibbetvā.
೨೧೯. ಪಞ್ಚ ಅಹಾನಿ ಪಞ್ಚಾಹಂ, ಪಞ್ಚಾಹಮೇವ ಪಞ್ಚಾಹಿಕಂ। ಸಙ್ಘಾಟೀನಂ ಚಾರೋ ಸಙ್ಘಾಟಿಚಾರೋ, ಪರಿಭೋಗವಸೇನ ವಾ ಓತಾಪನವಸೇನ ವಾ ಸಙ್ಘಟಿತಟ್ಠೇನ ‘‘ಸಙ್ಘಾಟೀ’’ತಿ ಲದ್ಧನಾಮಾನಂ ‘‘ತಿಚೀವರಂ, ಉದಕಸಾಟಿಕಾ, ಸಂಕಚ್ಚಿಕಾ’’ತಿ ಇಮೇಸಂ ಪಞ್ಚನ್ನಂ ಚೀವರಾನಂ ಪರಿವತ್ತನಂ। ಅತಿಕ್ಕಮೇತಿ ಭಿಕ್ಖುನೀ ಅತಿಕ್ಕಮೇಯ್ಯ। ಅಸ್ಸಾ ಪನ ಏಕಾವ ಪಾಚಿತ್ತಿ ಪರಿದೀಪಿತಾತಿ ಯೋಜನಾ।
219. Pañca ahāni pañcāhaṃ, pañcāhameva pañcāhikaṃ. Saṅghāṭīnaṃ cāro saṅghāṭicāro, paribhogavasena vā otāpanavasena vā saṅghaṭitaṭṭhena ‘‘saṅghāṭī’’ti laddhanāmānaṃ ‘‘ticīvaraṃ, udakasāṭikā, saṃkaccikā’’ti imesaṃ pañcannaṃ cīvarānaṃ parivattanaṃ. Atikkameti bhikkhunī atikkameyya. Assā pana ekāva pācitti paridīpitāti yojanā.
೨೨೦. ಸಙ್ಕಮನೀಯನ್ತಿ ಸಙ್ಕಮೇತಬ್ಬಂ। ಅಞ್ಞಿಸ್ಸಾ ಸನ್ತಕಂ ಅನಾಪುಚ್ಛಾ ಗಹಿತಂ ಪುನ ದಾತಬ್ಬಂ ಪಞ್ಚನ್ನಂ ಅಞ್ಞತರಂ।
220.Saṅkamanīyanti saṅkametabbaṃ. Aññissā santakaṃ anāpucchā gahitaṃ puna dātabbaṃ pañcannaṃ aññataraṃ.
೨೨೧. ಗಣಚೀವರಲಾಭಸ್ಸಾತಿ ಭಿಕ್ಖುನಿಸಙ್ಘೇನ ಲಭಿತಬ್ಬಚೀವರಸ್ಸ। ಅನ್ತರಾಯಂ ಕರೋತೀತಿ ಯಥಾ ತೇ ದಾತುಕಾಮಾ ನ ದೇನ್ತಿ, ಏವಂ ಪರಕ್ಕಮತಿ।
221.Gaṇacīvaralābhassāti bhikkhunisaṅghena labhitabbacīvarassa. Antarāyaṃ karotīti yathā te dātukāmā na denti, evaṃ parakkamati.
೨೨೨. ಧಮ್ಮಿಕನ್ತಿ ಸಮಗ್ಗೇನ ಸಙ್ಘೇನ ಸನ್ನಿಪತಿತ್ವಾ ಕರಿಯಮಾನಂ। ಪಟಿಬಾಹನ್ತೀತಿ ಪಟಿಸೇಧೇನ್ತೀ। ಪಟಿಬಾಹಿತೇ ಪಟಿಸೇಧಿತೇ।
222.Dhammikanti samaggena saṅghena sannipatitvā kariyamānaṃ. Paṭibāhantīti paṭisedhentī. Paṭibāhite paṭisedhite.
೨೨೩. ಅಗಾರಿಕಾದಿನೋತಿ ಆದಿ-ಸದ್ದೇನ ‘‘ಪರಿಬ್ಬಾಜಕಸ್ಸ ವಾ ಪರಿಬ್ಬಾಜಿಕಾಯ ವಾ’’ತಿ (ಪಾರಾ॰ ೯೧೭) ವುತ್ತೇ ಸಙ್ಗಣ್ಹಾತಿ। ಸಮಣಚೀವರನ್ತಿ ಕಪ್ಪಕತಂ ನಿವಾಸನಪಾರುಪನುಪಗಂ। ಪಯೋಗೇತಿ ದಾನಪಯೋಗೇ।
223.Agārikādinoti ādi-saddena ‘‘paribbājakassa vā paribbājikāya vā’’ti (pārā. 917) vutte saṅgaṇhāti. Samaṇacīvaranti kappakataṃ nivāsanapārupanupagaṃ. Payogeti dānapayoge.
೨೨೪. ಚೀವರೇ ದುಬ್ಬಲಾಸಾಯಾತಿ ದುಬ್ಬಲಚೀವರಪಚ್ಚಾಸಾಯ ‘‘ಸಚೇ ಸಕ್ಕೋಮ, ದಸ್ಸಾಮಾ’’ತಿ ಏತ್ತಕಮತ್ತಂ ಸುತ್ವಾ ಉಪ್ಪಾದಿತಾಯ ಆಸಾಯಾತಿ ಅತ್ಥೋ। ಕಾಲನ್ತಿ ಚೀವರಕಾಲಸಮಯಂ। ಸಮತಿಕ್ಕಮೇತಿ ಭಿಕ್ಖುನೀಹಿ ಕಾಲಚೀವರೇ ಭಾಜಿಯಮಾನೇ ‘‘ಆಗಮೇಥ, ಅಯ್ಯೇ, ಅತ್ಥಿ ಸಙ್ಘಸ್ಸ ಚೀವರಪಚ್ಚಾಸಾ’’ತಿ ವತ್ವಾ ತಂ ಚೀವರವಿಭಙ್ಗಂ ಸಮತಿಕ್ಕಮೇಯ್ಯ।
224.Cīvare dubbalāsāyāti dubbalacīvarapaccāsāya ‘‘sace sakkoma, dassāmā’’ti ettakamattaṃ sutvā uppāditāya āsāyāti attho. Kālanti cīvarakālasamayaṃ. Samatikkameti bhikkhunīhi kālacīvare bhājiyamāne ‘‘āgametha, ayye, atthi saṅghassa cīvarapaccāsā’’ti vatvā taṃ cīvaravibhaṅgaṃ samatikkameyya.
೨೨೫. ಧಮ್ಮಿಕಂ ಕಥಿನುದ್ಧಾರನ್ತಿ ಸಮಗ್ಗೇನ ಸಙ್ಘೇನ ಕರಿಯಮಾನಂ ಕಥಿನಸ್ಸ ಅನ್ತರುಬ್ಭಾರಂ। ಪಟಿಬಾಹನ್ತಿಯಾತಿ ನಿವಾರೇನ್ತಿಯಾ।
225.Dhammikaṃ kathinuddhāranti samaggena saṅghena kariyamānaṃ kathinassa antarubbhāraṃ. Paṭibāhantiyāti nivārentiyā.
ನ್ಹಾನವಗ್ಗವಣ್ಣನಾ ತತಿಯಾ।
Nhānavaggavaṇṇanā tatiyā.
೨೨೬. ತುವಟ್ಟೇಯ್ಯುನ್ತಿ ನಿಪಜ್ಜೇಯ್ಯುಂ। ಇತರಂ ಪಾಚಿತ್ತಿಯಂ।
226.Tuvaṭṭeyyunti nipajjeyyuṃ. Itaraṃ pācittiyaṃ.
೨೨೭. ಪಯೋಗೇತಿ ಭಿಕ್ಖುನಿಯಾ ಅಫಾಸುಕಕರಣಪಯೋಗೇ ಕರಿಯಮಾನೇ।
227.Payogeti bhikkhuniyā aphāsukakaraṇapayoge kariyamāne.
೨೨೮. ದುಕ್ಖಿತನ್ತಿ ಗಿಲಾನಂ। ನುಪಟ್ಠಾಪೇನ್ತಿಯಾ ವಾಪೀತಿ ತಸ್ಸಾ ಉಪಟ್ಠಾನಂ ಪರೇಹಿ ಅಕಾರಾಪೇನ್ತಿಯಾ, ಸಯಂ ವಾ ಅಕರೋನ್ತಿಯಾ।
228.Dukkhitanti gilānaṃ. Nupaṭṭhāpentiyā vāpīti tassā upaṭṭhānaṃ parehi akārāpentiyā, sayaṃ vā akarontiyā.
೨೨೯. ಉಪಸ್ಸಯಂ ದತ್ವಾತಿ ಕವಾಟಬನ್ಧಂ ಅತ್ತನೋ ಪುಗ್ಗಲಿಕವಿಹಾರಂ ದತ್ವಾ। ಕಡ್ಢಿತೇತಿ ನಿಕ್ಕಡ್ಢಿತೇ।
229.Upassayaṃ datvāti kavāṭabandhaṃ attano puggalikavihāraṃ datvā. Kaḍḍhiteti nikkaḍḍhite.
೨೩೦. ಸಂಸಟ್ಠಾತಿ ಗಹಪತಿನಾ ವಾ ಗಹಪತಿಪುತ್ತೇನ ವಾ ಸಂಸಟ್ಠವಿಹಾರೀ ಭಿಕ್ಖುನೀ ಸಙ್ಘೇನ ಸಂಸಟ್ಠವಿಹಾರತೋ ನಿವತ್ತಿಯಮಾನಾ। ಞತ್ತಿಯಾ ದುಕ್ಕಟಂ ಫುಸೇತಿ ಸಮನುಭಾಸನಕಮ್ಮಞತ್ತಿಯಾ ದುಕ್ಕಟಂ ಆಪಜ್ಜೇಯ್ಯ।
230.Saṃsaṭṭhāti gahapatinā vā gahapatiputtena vā saṃsaṭṭhavihārī bhikkhunī saṅghena saṃsaṭṭhavihārato nivattiyamānā. Ñattiyā dukkaṭaṃ phuseti samanubhāsanakammañattiyā dukkaṭaṃ āpajjeyya.
೨೩೧. ಅನ್ತೋರಟ್ಠೇತಿ ಯಸ್ಸ ವಿಜಿತೇ ವಿಹರತಿ, ತಸ್ಸ ರಟ್ಠೇ। ಪಟಿಪನ್ನಾಯಾತಿ ಚಾರಿಕಂ ಕಪ್ಪೇನ್ತಿಯಾ। ಸೇಸಕನ್ತಿ ಪಾಚಿತ್ತಿಯಂ।
231.Antoraṭṭheti yassa vijite viharati, tassa raṭṭhe. Paṭipannāyāti cārikaṃ kappentiyā. Sesakanti pācittiyaṃ.
ತುವಟ್ಟವಗ್ಗವಣ್ಣನಾ ಚತುತ್ಥಾ।
Tuvaṭṭavaggavaṇṇanā catutthā.
೨೩೩. ರಾಜಾಗಾರಾದಿಕನ್ತಿ ಆದಿ-ಸದ್ದೇನ ಚಿತ್ತಾಗಾರಾದೀನಂ ಗಹಣಂ।
233.Rājāgārādikanti ādi-saddena cittāgārādīnaṃ gahaṇaṃ.
೨೩೫. ಪಯೋಗೇತಿ ಕಪ್ಪಾಸವಿಚಾರಣಂ ಆದಿಂ ಕತ್ವಾ ಸಬ್ಬಪಯೋಗೇ। ಉಜ್ಜವುಜ್ಜವನೇತಿ ಯತ್ತಕಂ ಹತ್ಥೇನ ಅಞ್ಛಿತಂ ಹೋತಿ, ತಸ್ಮಿಂ ತಕ್ಕಮ್ಹಿ ವೇಠಿತೇ।
235.Payogeti kappāsavicāraṇaṃ ādiṃ katvā sabbapayoge. Ujjavujjavaneti yattakaṃ hatthena añchitaṃ hoti, tasmiṃ takkamhi veṭhite.
೨೩೭. ಪಯೋಗೇತಿ ಅಗಾರಿಕಸ್ಸ ವಾ ಪರಿಬ್ಬಾಜಕಸ್ಸ ವಾ ಪರಿಬ್ಬಾಜಿಕಾಯ ವಾ ಸಹತ್ಥಾ ಖಾದನೀಯಾದೀನಂ ದಾನಪಯೋಗೇ।
237.Payogeti agārikassa vā paribbājakassa vā paribbājikāya vā sahatthā khādanīyādīnaṃ dānapayoge.
೨೩೮. ‘‘ಸಮಂ ಆಪತ್ತಿಪಭೇದತೋ’’ತಿ ಪದಚ್ಛೇದೋ।
238. ‘‘Samaṃ āpattipabhedato’’ti padacchedo.
೨೩೯. ತಿರಚ್ಛಾನಗತಂ ವಿಜ್ಜನ್ತಿ ಯಂ ಕಿಞ್ಚಿ ಬಾಹಿರಕಂ ಅನತ್ಥಸಂಹಿತಂ ಪರೂಪಘಾತಕರಂ ಹತ್ಥಿಸಿಕ್ಖಾದಿಸಿಪ್ಪಂ । ಪಠನ್ತಿಯಾತಿ ಸಿಕ್ಖನ್ತಿಯಾ। ಪಯೋಗೇತಿ ದುರುಪಸಙ್ಕಮನಾದಿಪಯೋಗೇ। ಪದೇ ಪದೇತಿ ಪದಾದಿವಸೇನ ಪರಿಯಾಪುಣನ್ತಿಯಾ ಪದೇ ಪದೇ ಅಕ್ಖರಪದಾನಂ ವಸೇನ।
239.Tiracchānagataṃvijjanti yaṃ kiñci bāhirakaṃ anatthasaṃhitaṃ parūpaghātakaraṃ hatthisikkhādisippaṃ . Paṭhantiyāti sikkhantiyā. Payogeti durupasaṅkamanādipayoge. Pade padeti padādivasena pariyāpuṇantiyā pade pade akkharapadānaṃ vasena.
೨೪೦. ನವಮೇ ‘‘ಪರಿಯಾಪುಣಾತೀ’’ತಿ ಪದಂ, ದಸಮೇ ‘‘ವಾಚೇತೀ’’ತಿ ಪದನ್ತಿ ಏವಂ ಪದಮತ್ತಮೇವ ಉಭಿನ್ನಂ ವಿಸೇಸಕಂ ಭೇದಕಂ।
240. Navame ‘‘pariyāpuṇātī’’ti padaṃ, dasame ‘‘vācetī’’ti padanti evaṃ padamattameva ubhinnaṃ visesakaṃ bhedakaṃ.
ಚಿತ್ತಾಗಾರವಗ್ಗವಣ್ಣನಾ ಪಞ್ಚಮಾ।
Cittāgāravaggavaṇṇanā pañcamā.
೨೪೧. ತಮಾರಾಮನ್ತಿ ಯತ್ಥ ಭಿಕ್ಖೂ ರುಕ್ಖಮೂಲೇಪಿ ವಸನ್ತಿ, ತಂ ಸಭಿಕ್ಖುಕಂ ಪದೇಸಂ।
241.Tamārāmanti yattha bhikkhū rukkhamūlepi vasanti, taṃ sabhikkhukaṃ padesaṃ.
೨೪೩. ಅಕ್ಕೋಸತೀತಿ ದಸನ್ನಂ ಅಕ್ಕೋಸವತ್ಥೂನಂ ಅಞ್ಞತರೇನ ಸಮ್ಮುಖಾ ವಾ ಪರಮ್ಮುಖಾ ವಾ ಅಕ್ಕೋಸತಿ। ಪರಿಭಾಸತೀತಿ ಭಯದಸ್ಸನೇನ ತಜ್ಜೇತಿ। ‘‘ಪಾಚಿತ್ತಿ ಅಕ್ಕೋಸಿತೇ’’ತಿ ಪದಚ್ಛೇದೋ।
243.Akkosatīti dasannaṃ akkosavatthūnaṃ aññatarena sammukhā vā parammukhā vā akkosati. Paribhāsatīti bhayadassanena tajjeti. ‘‘Pācitti akkosite’’ti padacchedo.
೨೪೪. ಚಣ್ಡಿಕಭಾವೇನಾತಿ ಕೋಧೇನ। ಗಣನ್ತಿ ಭಿಕ್ಖುನಿಸಙ್ಘಂ। ಪರಿಭಾಸತೀತಿ ‘‘ಬಾಲಾ ಏತಾ’’ತಿಆದೀಹಿ ವಚನೇಹಿ ಅಕ್ಕೋಸತಿ। ಪಯೋಗೇತಿ ಪರಿಭಾಸನಪಯೋಗೇ। ಪರಿಭಟ್ಠೇತಿ ಅಕ್ಕೋಸಿತೇ। ಇತರಂ ಪಾಚಿತ್ತಿಯಂ।
244.Caṇḍikabhāvenāti kodhena. Gaṇanti bhikkhunisaṅghaṃ. Paribhāsatīti ‘‘bālā etā’’tiādīhi vacanehi akkosati. Payogeti paribhāsanapayoge. Paribhaṭṭheti akkosite. Itaraṃ pācittiyaṃ.
೨೪೫. ನಿಮನ್ತಿತಾತಿ ಗಣಭೋಜನೇ ವುತ್ತನಯೇನ ನಿಮನ್ತಿತಾ। ಪವಾರಿತಾತಿ ಪವಾರಣಸಿಕ್ಖಾಪದೇ ವುತ್ತನಯೇನ ವಾರಿತಾ। ಖಾದನಂ ಭೋಜನಮ್ಪಿ ವಾತಿ ಯಾಗುಪೂವಖಜ್ಜಕಂ, ಯಾವಕಾಲಿಕಂ ಮೂಲಖಾದನೀಯಾದಿಖಾದನೀಯಂ, ಓದನಾದಿಭೋಜನಮ್ಪಿ ವಾ ಯಾ ಭಿಕ್ಖುನೀ ಭುಞ್ಜನ್ತೀ ಹೋತಿ, ಸಾ ಪನ ದ್ವೇಯೇವ ಆಪತ್ತಿಯೋ ಫುಸೇತಿ ಯೋಜನಾ।
245.Nimantitāti gaṇabhojane vuttanayena nimantitā. Pavāritāti pavāraṇasikkhāpade vuttanayena vāritā. Khādanaṃ bhojanampi vāti yāgupūvakhajjakaṃ, yāvakālikaṃ mūlakhādanīyādikhādanīyaṃ, odanādibhojanampi vā yā bhikkhunī bhuñjantī hoti, sā pana dveyeva āpattiyo phuseti yojanā.
೨೪೭. ಮಚ್ಛರಾಯನ್ತೀತಿ ಮಚ್ಛರಂ ಕರೋನ್ತೀ, ಅತ್ತನೋ ಪಚ್ಚಯದಾಯಕಕುಲಸ್ಸ ಅಞ್ಞೇಹಿ ಸಾಧಾರಣಭಾವಂ ಅಸಹನ್ತೀತಿ ಅತ್ಥೋ । ಪಯೋಗೇತಿ ತದನುರೂಪೇ ಕಾಯವಚೀಪಯೋಗೇ। ಮಚ್ಛರಿತೇತಿ ಮಚ್ಛರವಸೇನ ಕತಪಯೋಗೇ ನಿಪ್ಫನ್ನೇ।
247.Maccharāyantīti maccharaṃ karontī, attano paccayadāyakakulassa aññehi sādhāraṇabhāvaṃ asahantīti attho . Payogeti tadanurūpe kāyavacīpayoge. Macchariteti maccharavasena katapayoge nipphanne.
೨೪೮. ಅಭಿಕ್ಖುಕೇ ಪನಾವಾಸೇತಿ ಯತೋ ಭಿಕ್ಖುನುಪಸ್ಸಯತೋ ಅದ್ಧಯೋಜನಬ್ಭನ್ತರೇ ಓವಾದದಾಯಕಾ ಭಿಕ್ಖೂ ನ ವಸನ್ತಿ, ಮಗ್ಗೋ ವಾ ಅಖೇಮೋ ಹೋತಿ, ನ ಸಕ್ಕಾ ಅನನ್ತರಾಯೇನ ಗನ್ತುಂ, ಏವರೂಪೇ ಆವಾಸೇ। ಪುಬ್ಬಕಿಚ್ಚೇಸೂತಿ ‘‘ವಸ್ಸಂ ವಸಿಸ್ಸಾಮೀ’’ತಿ ಸೇನಾಸನಪಞ್ಞಾಪನಪಾನೀಯಉಪಟ್ಠಾಪನಾದಿಪುಬ್ಬಕಿಚ್ಚೇ ಪನ ಕರಿಯಮಾನೇ ದುಕ್ಕಟಂ ಭವೇತಿ ಯೋಜನಾ।
248.Abhikkhuke panāvāseti yato bhikkhunupassayato addhayojanabbhantare ovādadāyakā bhikkhū na vasanti, maggo vā akhemo hoti, na sakkā anantarāyena gantuṃ, evarūpe āvāse. Pubbakiccesūti ‘‘vassaṃ vasissāmī’’ti senāsanapaññāpanapānīyaupaṭṭhāpanādipubbakicce pana kariyamāne dukkaṭaṃ bhaveti yojanā.
೨೪೯. ವಸ್ಸಂವುತ್ಥಾತಿ ಪುರಿಮಂ ವಾ ಪಚ್ಛಿಮಂ ವಾ ತೇಮಾಸಂ ವುತ್ಥಾ। ಉಭತೋಸಙ್ಘೇತಿ ಭಿಕ್ಖುನಿಸಙ್ಘೇ, ಭಿಕ್ಖುಸಙ್ಘೇ ಚ। ತೀಹಿಪಿ ಠಾನೇಹೀತಿ ‘‘ದಿಟ್ಠೇನ ವಾ’’ತಿಆದಿನಾ ವುತ್ತೇಹಿ ತೀಹಿ ಕಾರಣೇಹಿ।
249.Vassaṃvutthāti purimaṃ vā pacchimaṃ vā temāsaṃ vutthā. Ubhatosaṅgheti bhikkhunisaṅghe, bhikkhusaṅghe ca. Tīhipi ṭhānehīti ‘‘diṭṭhena vā’’tiādinā vuttehi tīhi kāraṇehi.
೨೫೦. ಓವಾದತ್ಥಾಯಾತಿ ಗರುಧಮ್ಮೋವಾದನತ್ಥಾಯ। ಸಂವಾಸತ್ಥಾಯಾತಿ ಉಪೋಸಥಪುಚ್ಛನತ್ಥಾಯ ಚೇವ ಪವಾರಣತ್ಥಾಯ ಚ। ನ ಗಚ್ಛತೀತಿ ಭಿಕ್ಖುಂ ನ ಉಪಗಚ್ಛತಿ।
250.Ovādatthāyāti garudhammovādanatthāya. Saṃvāsatthāyāti uposathapucchanatthāya ceva pavāraṇatthāya ca. Na gacchatīti bhikkhuṃ na upagacchati.
೨೫೧. ಓವಾದಮ್ಪಿ ನ ಯಾಚನ್ತೀತಿ ಉಪೋಸಥಾದಿವಸೇನ ಓವಾದೂಪಸಙ್ಕಮನಂ ಭಿಕ್ಖುಂ ನ ಯಾಚನ್ತೀ ನ ಪುಚ್ಛನ್ತೀ। ಉಪೋಸಥನ್ತಿ ಉಪೋಸಥದಿವಸತೋ ಪುರಿಮದಿವಸೇ ತೇರಸಿಯಂ ವಾ ಚಾತುದ್ದಸಿಯಂ ವಾ ಉಪೋಸಥಂ ನ ಪುಚ್ಛನ್ತೀ।
251.Ovādampi na yācantīti uposathādivasena ovādūpasaṅkamanaṃ bhikkhuṃ na yācantī na pucchantī. Uposathanti uposathadivasato purimadivase terasiyaṃ vā cātuddasiyaṃ vā uposathaṃ na pucchantī.
೨೫೨. ಅಪುಚ್ಛಿತ್ವಾವ ಸಙ್ಘಂ ವಾತಿ ಸಙ್ಘಂ ವಾ ಗಣಂ ವಾ ಅನಪಲೋಕೇತ್ವಾವ। ‘‘ಭೇದಾಪೇತೀ’’ತಿ ಇದಂ ನಿದಸ್ಸನಮತ್ತಂ ‘‘ಫಾಲಾಪೇಯ್ಯ ವಾ ಧೋವಾಪೇಯ್ಯ ವಾ ಆಲಿಮ್ಪಾಪೇಯ್ಯ ವಾ ಬನ್ಧಾಪೇಯ್ಯ ವಾ ಮೋಚಾಪೇಯ್ಯ ವಾ’’ತಿ ಇಮೇಸಮ್ಪಿ ಕಿರಿಯಾವಿಕಪ್ಪಾನಂ ಸಙ್ಗಹೇತಬ್ಬತ್ತಾ। ಪಸಾಖಜನ್ತಿ ನಾಭಿಯಾ ಹೇಟ್ಠಾ, ಜಾಣುಮಣ್ಡಲಾನಂ ಉಪರಿ ಪದೇಸೇ ಜಾತಂ ಗಣ್ಡಂ ವಾ ರುಧಿತಂ ವಾ। ಪಯೋಗೇತಿ ಭೇದಾಪನಾದಿಪಯೋಗೇ।
252.Apucchitvāva saṅghaṃ vāti saṅghaṃ vā gaṇaṃ vā anapaloketvāva. ‘‘Bhedāpetī’’ti idaṃ nidassanamattaṃ ‘‘phālāpeyya vā dhovāpeyya vā ālimpāpeyya vā bandhāpeyya vā mocāpeyya vā’’ti imesampi kiriyāvikappānaṃ saṅgahetabbattā. Pasākhajanti nābhiyā heṭṭhā, jāṇumaṇḍalānaṃ upari padese jātaṃ gaṇḍaṃ vā rudhitaṃ vā. Payogeti bhedāpanādipayoge.
ಆರಾಮವಗ್ಗವಣ್ಣನಾ ಛಟ್ಠಾ।
Ārāmavaggavaṇṇanā chaṭṭhā.
೨೫೩. ಗಬ್ಭಿನಿನ್ತಿ ಆಪನ್ನಸತ್ತಂ ಸಿಕ್ಖಮಾನಂ। ವುಟ್ಠಾಪೇನ್ತೀತಿ ಉಪಜ್ಝಾಯಾ ಹುತ್ವಾ ಉಪಸಮ್ಪಾದೇನ್ತೀ। ಪಯೋಗೇತಿ ಗಣಪರಿಯೇಸನಾದಿಪಯೋಗೇ। ವುಟ್ಠಾಪಿತೇತಿ ಉಪಸಮ್ಪಾದಿತೇ, ಕಮ್ಮವಾಚಾಪರಿಯೋಸಾನೇತಿ ಅತ್ಥೋ।
253.Gabbhininti āpannasattaṃ sikkhamānaṃ. Vuṭṭhāpentīti upajjhāyā hutvā upasampādentī. Payogeti gaṇapariyesanādipayoge. Vuṭṭhāpiteti upasampādite, kammavācāpariyosāneti attho.
೨೫೫. ಸಹಜೀವಿನಿನ್ತಿ ಸದ್ಧಿವಿಹಾರಿನಿಂ। ನಾನುಗ್ಗಣ್ಹನ್ತೀತಿ ಉದ್ದೇಸದಾನಾದೀಹಿ ನ ಸಙ್ಗಣ್ಹನ್ತೀ।
255.Sahajīvininti saddhivihāriniṃ. Nānuggaṇhantīti uddesadānādīhi na saṅgaṇhantī.
ಗಬ್ಭಿನಿವಗ್ಗವಣ್ಣನಾ ಸತ್ತಮಾ।
Gabbhinivaggavaṇṇanā sattamā.
೨೫೮. ‘‘ಅಲಂ ವುಟ್ಠಾಪಿತೇನಾ’’ತಿ ವುಚ್ಚಮಾನಾ ಭಿಕ್ಖುನೀಹಿ ನಿವಾರಿಯಮಾನಾ। ಖೀಯತೀತಿ ಅಞ್ಞಾಸಂ ಬ್ಯತ್ತಾನಂ ಲಜ್ಜೀನಂ ವುಟ್ಠಾನಸಮ್ಮುತಿಂ ದೀಯಮಾನಂ ದಿಸ್ವಾ ‘‘ಅಹಮೇವ ನೂನ ಬಾಲಾ’’ತಿಆದಿನಾ ಭಣಮಾನಾ ಖೀಯತಿ। ಪಯೋಗೇತಿ ಖೀಯಮಾನಪಯೋಗೇ। ಖೀಯಿತೇತಿ ಖೀಯನಪಯೋಗೇ ನಿಟ್ಠಿತೇ।
258. ‘‘Alaṃ vuṭṭhāpitenā’’ti vuccamānā bhikkhunīhi nivāriyamānā. Khīyatīti aññāsaṃ byattānaṃ lajjīnaṃ vuṭṭhānasammutiṃ dīyamānaṃ disvā ‘‘ahameva nūna bālā’’tiādinā bhaṇamānā khīyati. Payogeti khīyamānapayoge. Khīyiteti khīyanapayoge niṭṭhite.
ಕುಮಾರಿಭೂತವಗ್ಗವಣ್ಣನಾ ಅಟ್ಠಮಾ।
Kumāribhūtavaggavaṇṇanā aṭṭhamā.
೨೬೦. ಛತ್ತುಪಾಹನನ್ತಿ ವುತ್ತಲಕ್ಖಣಂ ಛತ್ತಞ್ಚ ಉಪಾಹನಾಯೋ ಚ। ಪಯೋಗೇತಿ ಧಾರಣಪಯೋಗೇ।
260.Chattupāhananti vuttalakkhaṇaṃ chattañca upāhanāyo ca. Payogeti dhāraṇapayoge.
೨೬೧. ಯಾನೇನಾತಿ ವಯ್ಹಾದಿನಾ। ಯಾಯನ್ತೀತಿ ಸಚೇ ಯಾನೇನ ಗತಾ ಹೋತಿ।
261.Yānenāti vayhādinā. Yāyantīti sace yānena gatā hoti.
೨೬೨. ಸಙ್ಘಾಣಿನ್ತಿ ಯಂ ಕಿಞ್ಚಿ ಕಟೂಪಗಂ। ಧಾರೇನ್ತಿಯಾತಿ ಕಟಿಯಂ ಪಟಿಮುಚ್ಚನ್ತಿಯಾ।
262.Saṅghāṇinti yaṃ kiñci kaṭūpagaṃ. Dhārentiyāti kaṭiyaṃ paṭimuccantiyā.
೨೬೩. ಗನ್ಧವಣ್ಣೇನಾತಿ ಯೇನ ಕೇನಚಿ ವಣ್ಣೇನ ಚ ಯೇನ ಕೇನಚಿ ಗನ್ಧೇನ ಚ। ಗನ್ಧೋ ನಾಮ ಚನ್ದನಾಲೇಪಾದಿ। ವಣ್ಣೋ ನಾಮ ಕುಙ್ಕುಮಹಲಿದ್ದಾದಿ। ಪಯೋಗೇತಿ ಗನ್ಧಾದಿಪಯೋಗೇ ರಚನತೋ ಪಟ್ಠಾಯ ಪುಬ್ಬಪಯೋಗೇ।
263.Gandhavaṇṇenāti yena kenaci vaṇṇena ca yena kenaci gandhena ca. Gandho nāma candanālepādi. Vaṇṇo nāma kuṅkumahaliddādi. Payogeti gandhādipayoge racanato paṭṭhāya pubbapayoge.
೨೬೬. ಅನಾಪುಚ್ಛಾತಿ ‘‘ನಿಸೀದಾಮಿ, ಅಯ್ಯಾ’’ತಿ ಅನಾಪುಚ್ಛಿತ್ವಾ। ನಿಸೀದಿತೇ ಭಿಕ್ಖುಸ್ಸ ಉಪಚಾರೇ ಅನ್ತಮಸೋ ಛಮಾಯ ನಿಸಿನ್ನೇ।
266.Anāpucchāti ‘‘nisīdāmi, ayyā’’ti anāpucchitvā. Nisīdite bhikkhussa upacāre antamaso chamāya nisinne.
೨೬೭. ಅನೋಕಾಸಕತನ್ತಿ ‘‘ಅಸುಕಸ್ಮಿಂ ನಾಮ ಠಾನೇ ಪುಚ್ಛಿಸ್ಸಾಮೀ’’ತಿ ಏವಂ ಅಕತಓಕಾಸಂ।
267.Anokāsakatanti ‘‘asukasmiṃ nāma ṭhāne pucchissāmī’’ti evaṃ akataokāsaṃ.
೨೬೮. ಪವಿಸನ್ತಿಯಾತಿ ವಿನಿಚ್ಛಯಂ ಆರಾಮವಗ್ಗಸ್ಸ ಪಠಮೇನೇವ ಸಿಕ್ಖಾಪದೇನ ಸದಿಸಂ ಕತ್ವಾ ವದೇಯ್ಯಾತಿ ಯೋಜನಾ।
268.Pavisantiyāti vinicchayaṃ ārāmavaggassa paṭhameneva sikkhāpadena sadisaṃ katvā vadeyyāti yojanā.
ಛತ್ತುಪಾಹನವಗ್ಗವಣ್ಣನಾ ನವಮಾ।
Chattupāhanavaggavaṇṇanā navamā.
ಇತಿ ಉತ್ತರೇ ಲೀನತ್ಥಪಕಾಸನಿಯಾ ಭಿಕ್ಖುನಿವಿಭಙ್ಗೇ
Iti uttare līnatthapakāsaniyā bhikkhunivibhaṅge
ಪಾಚಿತ್ತಿಯಕಥಾವಣ್ಣನಾ ನಿಟ್ಠಿತಾ।
Pācittiyakathāvaṇṇanā niṭṭhitā.
೨೬೯-೭೦. ಅಟ್ಠಸು ಪಾಟಿದೇಸನೀಯಸಿಕ್ಖಾಪದೇಸುಪಿ ದ್ವಿಧಾ ಆಪತ್ತಿ ಹೋತೀತಿ ಯೋಜನಾ। ತತೋತಿ ಗಹಣಹೇತು। ಸಬ್ಬೇಸೂತಿ ಪಾಟಿದೇಸನೀಯಸಿಕ್ಖಾಪದೇಸು।
269-70. Aṭṭhasu pāṭidesanīyasikkhāpadesupi dvidhā āpatti hotīti yojanā. Tatoti gahaṇahetu. Sabbesūti pāṭidesanīyasikkhāpadesu.
ಪಾಟಿದೇಸನೀಯಕಥಾವಣ್ಣನಾ।
Pāṭidesanīyakathāvaṇṇanā.
೨೭೧-೨. ಇಮಂ ಪರಮಂ ಉತ್ತಮಂ ನಿರುತ್ತರಂ ಕೇನಚಿ ವಾ ವತ್ತಬ್ಬೇನ ಉತ್ತರೇನ ರಹಿತಂ ನಿದ್ದೋಸಂ ಉತ್ತರಂ ಏವಂನಾಮಕಂ ಧೀರೋ ಪಞ್ಞವಾ ಭಿಕ್ಖು ಅತ್ಥವಸೇನ ವಿದಿತ್ವಾ ದುರುತ್ತರಂ ಕಿಚ್ಛೇನ ಉತ್ತರಿತಬ್ಬಂ ಪಞ್ಞತ್ತಮಹಾಸಮುದ್ದಂ ವಿನಯಮಹಾಸಾಗರಂ ಸುಖೇನೇವ ಯಸ್ಮಾ ಉತ್ತರತಿ, ತಸ್ಮಾ ಕಙ್ಖಚ್ಛೇದೇ ವಿನಯವಿಚಿಕಿಚ್ಛಾಯ ಛಿನ್ದನೇ ಸತ್ಥೇ ಸತ್ಥಸದಿಸೇ ಅಸ್ಮಿಂ ಸತ್ಥೇ ಇಮಸ್ಮಿಂ ಉತ್ತರಪಕರಣೇ ಉಸ್ಮಾಯುತ್ತೋ ಕಮ್ಮಜತೇಜೋಧಾತುಯಾ ಸಮನ್ನಾಗತೋ ಜೀವಮಾನೋ ಭಿಕ್ಖು ನಿಚ್ಚಂ ನಿರನ್ತರಂ ಸತ್ತೋ ಅಭಿರತೋ ನಿಚ್ಚಂ ಯೋಗಂ ಸತತಾಭಿಯೋಗಂ ಕಾತುಂ ಯುತ್ತೋ ಅನುರೂಪೋತಿ ಯೋಜನಾ।
271-2. Imaṃ paramaṃ uttamaṃ niruttaraṃ kenaci vā vattabbena uttarena rahitaṃ niddosaṃ uttaraṃ evaṃnāmakaṃ dhīro paññavā bhikkhu atthavasena viditvā duruttaraṃ kicchena uttaritabbaṃ paññattamahāsamuddaṃ vinayamahāsāgaraṃ sukheneva yasmā uttarati, tasmā kaṅkhacchede vinayavicikicchāya chindane satthe satthasadise asmiṃ satthe imasmiṃ uttarapakaraṇe usmāyutto kammajatejodhātuyā samannāgato jīvamāno bhikkhu niccaṃ nirantaraṃ satto abhirato niccaṃ yogaṃ satatābhiyogaṃ kātuṃ yutto anurūpoti yojanā.
ಭಿಕ್ಖುನಿವಿಭಙ್ಗೋ ನಿಟ್ಠಿತೋತಿ ಏತ್ಥಾಪಿ ಉಪ್ಪತ್ತಿ ವುತ್ತನಯೇನೇವ ವೇದಿತಬ್ಬಾ।
Bhikkhunivibhaṅgo niṭṭhitoti etthāpi uppatti vuttanayeneva veditabbā.
ಇತಿ ಉತ್ತರೇ ಲೀನತ್ಥಪಕಾಸನಿಯಾ
Iti uttare līnatthapakāsaniyā
ಭಿಕ್ಖುನಿವಿಭಙ್ಗವಣ್ಣನಾ ನಿಟ್ಠಿತಾ।
Bhikkhunivibhaṅgavaṇṇanā niṭṭhitā.
