| Library / Tipiṭaka / ਤਿਪਿਟਕ • Tipiṭaka / વਿਨਯવਿਨਿਚ੍ਛਯ-ਟੀਕਾ • Vinayavinicchaya-ṭīkā |
ਭਿਕ੍ਖੁਨਿવਿਭਙ੍ਗੋ
Bhikkhunivibhaṅgo
੧੭੦. વਿਨਯਸ੍ਸ વਿਨਿਚ੍ਛਯੇ ਭਿਕ੍ਖੂਨਂ ਪਾਟવਤ੍ਥਾਯਾਤਿ ਭਿਕ੍ਖੁਨੀਨਂ ਪਾਟવਸ੍ਸਾਪਿ ਤਦਧੀਨਤ੍ਤਾ ਪਧਾਨਦਸ੍ਸਨવਸੇਨ વੁਤ੍ਤਂ। ਅਥ વਾ ਦਸ੍ਸਨਲਿਙ੍ਗਨ੍ਤਰਸਾਧਾਰਣਤ੍ਤੇ ਇਚ੍ਛਿਤੇ ਪੁਲ੍ਲਿਙ੍ਗੇਨ, ਨਪੁਂਸਕਲਿਙ੍ਗੇਨ વਾ ਨਿਦ੍ਦੇਸੋ ਸਦ੍ਦਸਤ੍ਥਾਨੁਯੋਗਤੋਤਿ ‘‘ਭਿਕ੍ਖੂਨ’’ਨ੍ਤਿ ਪੁਲ੍ਲਿਙ੍ਗੇਨ વੁਤ੍ਤਂ।
170.Vinayassa vinicchaye bhikkhūnaṃ pāṭavatthāyāti bhikkhunīnaṃ pāṭavassāpi tadadhīnattā padhānadassanavasena vuttaṃ. Atha vā dassanaliṅgantarasādhāraṇatte icchite pulliṅgena, napuṃsakaliṅgena vā niddeso saddasatthānuyogatoti ‘‘bhikkhūna’’nti pulliṅgena vuttaṃ.
੧੭੧. ਨਨ੍ਦਨ੍ਤੀ ਸਾਦਿਯਨ੍ਤੀ।
171.Nandantī sādiyantī.
੧੭੨. ਤਿਸ੍ਸੋ ਆਪਤ੍ਤਿਯੋ ਫੁਸੇਤਿ ਯੋਜਨਾ। ਜਾਣੁਸ੍ਸ ਉਦ੍ਧਂ, ਅਕ੍ਖਕਸ੍ਸ ਅਧੋ ਗਹਣਂ ਸਾਦਿਯਨ੍ਤਿਯਾ ਤਸ੍ਸਾ ਪਾਰਾਜਿਕਨ੍ਤਿ ਯੋਜਨਾ।
172. Tisso āpattiyo phuseti yojanā. Jāṇussa uddhaṃ, akkhakassa adho gahaṇaṃ sādiyantiyā tassā pārājikanti yojanā.
੧੭੩. ਕਾਯਪਟਿਬਦ੍ਧੇ વਾ ਗਹਣਂ ਸਾਦਿਯਨ੍ਤਿਯਾ ਦੁਕ੍ਕਟਂ।
173. Kāyapaṭibaddhe vā gahaṇaṃ sādiyantiyā dukkaṭaṃ.
੧੭੪. વਜ੍ਜਨ੍ਤਿ ਅਞ੍ਞਿਸ੍ਸਾ ਭਿਕ੍ਖੁਨਿਯਾ ਪਾਰਾਜਿਕਾਪਤ੍ਤਿਂ।
174.Vajjanti aññissā bhikkhuniyā pārājikāpattiṃ.
੧੭੬. ਤਂ ਲਦ੍ਧਿਨ੍ਤਿ ਉਕ੍ਖਿਤ੍ਤਸ੍ਸ ਯਂ ਲਦ੍ਧਿਂ ਅਤ੍ਤਨੋ ਰੋਚੇਸਿ, ਤਂ ਲਦ੍ਧਿਂ ਨ ਨਿਸ੍ਸਜ੍ਜਨ੍ਤੀਤਿ ਯੋਜਨਾ।
176.Taṃladdhinti ukkhittassa yaṃ laddhiṃ attano rocesi, taṃ laddhiṃ na nissajjantīti yojanā.
੧੭੮. ‘‘ਇਧ ਆਗਚ੍ਛਾ’’ਤਿ ਪਦਚ੍ਛੇਦੋ। ‘‘વੁਤ੍ਤਾ ਆਗਚ੍ਛਤੀ’’ਤਿ ਪਦਚ੍ਛੇਦੋ।
178. ‘‘Idha āgacchā’’ti padacchedo. ‘‘Vuttā āgacchatī’’ti padacchedo.
੧੭੯. ਹਤ੍ਥਪਾਸਪ੍ਪવੇਸਨੇਤਿ ਹਤ੍ਥਪਾਸੂਪਗਮਨੇ। ‘‘ਹਤ੍ਥਗਤਪ੍ਪવੇਸਨੇ’’ਤਿ વਾ ਪਾਠੋ, ਸੋਯੇવ ਅਤ੍ਥੋ।
179.Hatthapāsappavesaneti hatthapāsūpagamane. ‘‘Hatthagatappavesane’’ti vā pāṭho, soyeva attho.
ਇਤਿ ਉਤ੍ਤਰੇ ਲੀਨਤ੍ਥਪਕਾਸਨਿਯਾ ਭਿਕ੍ਖੁਨਿવਿਭਙ੍ਗੇ
Iti uttare līnatthapakāsaniyā bhikkhunivibhaṅge
ਪਾਰਾਜਿਕਕਥਾવਣ੍ਣਨਾ ਨਿਟ੍ਠਿਤਾ।
Pārājikakathāvaṇṇanā niṭṭhitā.
੧੮੦. ਏਕਸ੍ਸਾਤਿ ਅਤ੍ਤਨੋ ਅਤ੍ਤਨੋ ਅਟ੍ਟਕਾਰਸ੍ਸ વਾ। ਆਰੋਚਨੇਤਿ વਤ੍ਤਬ੍ਬਸ੍ਸ વੋਹਾਰਿਕਾਨਂ ਨਿવੇਦਨੇ।
180.Ekassāti attano attano aṭṭakārassa vā. Ārocaneti vattabbassa vohārikānaṃ nivedane.
੧੮੧. ਦੁਤਿਯਾਰੋਚਨੇਤਿ ਦੁਤਿਯਸ੍ਸ, ਦੁਤਿਯਂ ਏવਂ ਆਰੋਚਨੇ।
181.Dutiyārocaneti dutiyassa, dutiyaṃ evaṃ ārocane.
੧੮੨. ਦ੍વੀਹੀਤਿ ਦ੍વੀਹਿ ਕਮ੍ਮવਾਚਾਹਿ। ਕਮ੍ਮવਾਚੋਸਾਨੇਤਿ ਕਮ੍ਮવਾਚਾਓਸਾਨੇ।
182.Dvīhīti dvīhi kammavācāhi. Kammavācosāneti kammavācāosāne.
੧੮੩. ਪਰਿਕ੍ਖੇਪੇ ਅਤਿਕ੍ਕਨ੍ਤੇਤਿ ਅਤ੍ਤਨੋ ਗਾਮਤੋ ਗਨ੍ਤ੍વਾ ਇਤਰਂ ਗਾਮਂ ਪવਿਸਨ੍ਤਿਯਾ ਪਠਮੇਨ ਪਾਦੇਨ ਤਸ੍ਸ ਗਾਮਸ੍ਸ ਪਰਿਕ੍ਖੇਪੇ ਅਤਿਕ੍ਕਨ੍ਤੇ, ਪਠਮਪਾਦੇ ਪਰਿਕ੍ਖੇਪਂ ਅਤਿਕ੍ਕਮੇਤ੍વਾ ਅਨ੍ਤੋਗਾਮਸਙ੍ਖੇਪਂ ਗਤੇਤਿ ਅਤ੍ਥੋ।
183.Parikkhepe atikkanteti attano gāmato gantvā itaraṃ gāmaṃ pavisantiyā paṭhamena pādena tassa gāmassa parikkhepe atikkante, paṭhamapāde parikkhepaṃ atikkametvā antogāmasaṅkhepaṃ gateti attho.
੧੮੪. ਦੁਤਿਯੇਨਾਤਿ ਗਾਮਪਰਿਕ੍ਖੇਪਤੋ ਬਹਿ ਠਿਤੇਨ ਦੁਤਿਯਪਾਦੇਨ। ਅਤਿਕ੍ਕਨ੍ਤੇਤਿ ਤਸ੍ਮਿਂ ਗਾਮਪਰਿਕ੍ਖੇਪੇ ਅਤਿਕ੍ਕਨ੍ਤੇ, ਤਸ੍ਮਿਂ ਪਾਦੇ ਅਨ੍ਤੋਗਾਮਂ ਪવੇਸਿਤੇਤਿ ਅਤ੍ਥੋ। ਸੇਸਂ ਉਤ੍ਤਾਨਤ੍ਥਮੇવ।
184.Dutiyenāti gāmaparikkhepato bahi ṭhitena dutiyapādena. Atikkanteti tasmiṃ gāmaparikkhepe atikkante, tasmiṃ pāde antogāmaṃ pavesiteti attho. Sesaṃ uttānatthameva.
ਇਤਿ ਉਤ੍ਤਰੇ ਲੀਨਤ੍ਥਪਕਾਸਨਿਯਾ ਭਿਕ੍ਖੁਨਿવਿਭਙ੍ਗੇ
Iti uttare līnatthapakāsaniyā bhikkhunivibhaṅge
ਸਙ੍ਘਾਦਿਸੇਸਕਥਾવਣ੍ਣਨਾ ਨਿਟ੍ਠਿਤਾ।
Saṅghādisesakathāvaṇṇanā niṭṭhitā.
੧੯੩. ਇਹ ਭਿਕ੍ਖੁਨੀ ਪਤ੍ਤਸਨ੍ਨਿਚਯਂ ਕਰੋਨ੍ਤੀ ਹੋਤਿ, ਸਾ ਏਕਂ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂਯੇવ ਫੁਸੇਤਿ ਯੋਜਨਾ।
193. Iha bhikkhunī pattasannicayaṃ karontī hoti, sā ekaṃ nissaggiyaṃ pācittiyaṃyeva phuseti yojanā.
੧੯੪. ਅਕਾਲਚੀવਰਂ ਕਾਲਚੀવਰਂ ਕਤ੍વਾ ਭਾਜਾਪੇਨ੍ਤਿਯਾਤਿ ਯੋਜਨਾ। ਪਯੋਗੇਤਿ ਭਾਜਨਪਯੋਗੇ।
194.Akālacīvaraṃ kālacīvaraṃ katvā bhājāpentiyāti yojanā. Payogeti bhājanapayoge.
੧੯੫. ਛਿਨ੍ਨੇਤਿ ਅਚ੍ਛਿਨ੍ਨੇ।
195.Chinneti acchinne.
੧੯੬. ਤਤੋ ਪਰਨ੍ਤਿ ਤਤੋ ਪਠਮਤੋ ਅਞ੍ਞਂ।
196.Tato paranti tato paṭhamato aññaṃ.
ਇਤਿ ਉਤ੍ਤਰੇ ਲੀਨਤ੍ਥਪਕਾਸਨਿਯਾ ਭਿਕ੍ਖੁਨਿવਿਭਙ੍ਗੇ
Iti uttare līnatthapakāsaniyā bhikkhunivibhaṅge
ਨਿਸ੍ਸਗ੍ਗਿਯਕਥਾવਣ੍ਣਨਾ ਨਿਟ੍ਠਿਤਾ।
Nissaggiyakathāvaṇṇanā niṭṭhitā.
੧੯੯. ਲਸੁਣਂ ਖਾਦਤਿ ਚੇ, ਦ੍વੇ ਆਪਤ੍ਤਿਯੋ ਫੁਟਾਤਿ ਯੋਜਨਾ।
199. Lasuṇaṃ khādati ce, dve āpattiyo phuṭāti yojanā.
੨੦੦. ਪਯੋਗੇਤਿ ਸਂਹਾਰਾਪਨਪਯੋਗੇ। ਸਂਹਟੇਤਿ ਅਤ੍ਤਨਾ ਸਂਹਟੇ, ਪਰੇਨ ਸਂਹਰਾਪਿਤੇ ਚ ਆਪਤ੍ਤਿ ਪਾਚਿਤ੍ਤਿ ਹੋਤਿ।
200.Payogeti saṃhārāpanapayoge. Saṃhaṭeti attanā saṃhaṭe, parena saṃharāpite ca āpatti pācitti hoti.
੨੦੧. ਕਤੇਤਿ ਤਲਘਾਤੇ ਕਤੇ।
201.Kateti talaghāte kate.
੨੦੨. ਜਤੁਨਾ ਮਟ੍ਠਕਨ੍ਤਿ ਜਤੁਨਾ ਕਤਂ ਮਟ੍ਠਦਣ੍ਡਕਂ। ‘‘ਦੁਕ੍ਕਟਂ ਆਦਿਨ੍ਨੇ’’ਤਿ ਪਦਚ੍ਛੇਦੋ।
202.Jatunā maṭṭhakanti jatunā kataṃ maṭṭhadaṇḍakaṃ. ‘‘Dukkaṭaṃ ādinne’’ti padacchedo.
੨੦੪. ਭੁਞ੍ਜਮਾਨਸ੍ਸ ਭਿਕ੍ਖੁਸ੍ਸ ਹਤ੍ਥਪਾਸੇਤਿ ਯੋਜਨਾ। ਹਿਤ੍વਾ ਹਤ੍ਥਪਾਸਂ।
204. Bhuñjamānassa bhikkhussa hatthapāseti yojanā. Hitvā hatthapāsaṃ.
੨੦੫. વਿਞ੍ਞਾਪੇਤ੍વਾਤਿ ਅਨ੍ਤਮਸੋ ਮਾਤਰਮ੍ਪਿ ਯਾਚਿਤ੍વਾ। ਅਜ੍ਝੋਹਾਰੇ ਪਾਚਿਤ੍ਤਿਂ ਦੀਪਯੇਤਿ ਯੋਜਨਾ।
205.Viññāpetvāti antamaso mātarampi yācitvā. Ajjhohāre pācittiṃ dīpayeti yojanā.
੨੦੬. ਉਚ੍ਚਾਰਾਦਿਨ੍ਤਿ ਆਦਿ-ਸਦ੍ਦੇਨ વਿਘਾਸਸਙ੍ਕਾਰਮੁਤ੍ਤਾਨਂ ਗਹਣਂ।
206.Uccārādinti ādi-saddena vighāsasaṅkāramuttānaṃ gahaṇaṃ.
ਲਸੁਣવਗ੍ਗવਣ੍ਣਨਾ ਪਠਮਾ।
Lasuṇavaggavaṇṇanā paṭhamā.
੨੦੯. ਇਧ ਇਮਸ੍ਮਿਂ ਰਤ੍ਤਨ੍ਧਕਾਰવਗ੍ਗੇ। ਪਠਮੇ, ਦੁਤਿਯੇ, ਤਤਿਯੇ, ਚਤੁਤ੍ਥੇਪਿ વਿਨਿਚ੍ਛਯੋ ਲਸੁਣવਗ੍ਗਸ੍ਸ ਛਟ੍ਠੇਨ ਸਿਕ੍ਖਾਪਦੇਨ ਤੁਲ੍ਯੋ ਸਦਿਸੋਤਿ ਯੋਜਨਾ।
209.Idha imasmiṃ rattandhakāravagge. Paṭhame, dutiye, tatiye, catutthepi vinicchayo lasuṇavaggassa chaṭṭhena sikkhāpadena tulyo sadisoti yojanā.
੨੧੦. ਆਸਨੇਤਿ ਪਲ੍ਲਙ੍ਕੇ ਤਸ੍ਸੋਕਾਸਭੂਤੇ। ਸਾਮਿਕੇ ਅਨਾਪੁਚ੍ਛਾਤਿ ਤਸ੍ਮਿਂ ਕੁਲੇ ਯਂ ਕਿਞ੍ਚਿ વਿਞ੍ਞੁਮਨੁਸ੍ਸਂ ਅਨਾਪੁਚ੍ਛਾ।
210.Āsaneti pallaṅke tassokāsabhūte. Sāmike anāpucchāti tasmiṃ kule yaṃ kiñci viññumanussaṃ anāpucchā.
੨੧੧. ਅਨੋવਸ੍ਸਨ੍ਤਿ ਭਿਤ੍ਤਿਯਾ ਬਹਿ ਨਿਬ੍ਬਕੋਸਬ੍ਭਨ੍ਤਰਂ। ਦੁਤਿਯਾਤਿਕ੍ਕਮੇਤਿ ਦੁਤਿਯੇਨ ਪਾਦੇਨ ਨਿਬ੍ਬਕੋਸਸ੍ਸ ਉਦਕਪਾਤਟ੍ਠਾਨਾਤਿਕ੍ਕਮੇ।
211.Anovassanti bhittiyā bahi nibbakosabbhantaraṃ. Dutiyātikkameti dutiyena pādena nibbakosassa udakapātaṭṭhānātikkame.
੨੧੨. ਨਿਸੀਦਿਤੇਤਿ ਨਿਸਿਨ੍ਨੇ।
212.Nisīditeti nisinne.
੨੧੩. ਪਯੋਗੇਤਿ ਉਜ੍ਝਾਪਨਪਯੋਗੇ।
213.Payogeti ujjhāpanapayoge.
੨੧੪. ਨਿਰਯਾਦਿਨਾ ਅਤ੍ਤਾਨਂ વਾ ਪਰਂ વਾ ਅਭਿਸਪ੍ਪੇਨ੍ਤੀ ਸਪਥਂ ਕਰੋਨ੍ਤੀ ਦ੍વੇ ਫੁਸੇਤਿ ਯੋਜਨਾ। ਅਭਿਸਪ੍ਪਿਤੇਤਿ ਅਭਿਸਪਿਤੇ।
214. Nirayādinā attānaṃ vā paraṃ vā abhisappentī sapathaṃ karontī dve phuseti yojanā. Abhisappiteti abhisapite.
੨੧੫. વਧਿਤ੍વਾਤਿ ਹਤ੍ਥਾਦੀਹਿ ਪਹਰਿਤ੍વਾ। ‘‘ਕਰੋਤਿ ਏਕ’’ਨ੍ਤਿ ਪਦਚ੍ਛੇਦੋ।
215.Vadhitvāti hatthādīhi paharitvā. ‘‘Karoti eka’’nti padacchedo.
ਰਤ੍ਤਨ੍ਧਕਾਰવਗ੍ਗવਣ੍ਣਨਾ ਦੁਤਿਯਾ।
Rattandhakāravaggavaṇṇanā dutiyā.
੨੧੬. ਨਗ੍ਗਾਤਿ ਅਨਿવਤ੍ਥਾ વਾ ਅਪਾਰੁਤਾ વਾ। ਪਯੋਗੇਤਿ ਚੁਣ੍ਣਮਤ੍ਤਿਕਾਅਭਿਸਙ੍ਖਰਣਾਦਿਪਯੋਗੇ।
216.Naggāti anivatthā vā apārutā vā. Payogeti cuṇṇamattikāabhisaṅkharaṇādipayoge.
੨੧੭. ਪਮਾਣਾਤਿਕ੍ਕਨ੍ਤਨ੍ਤਿ ‘‘ਦੀਘਸੋਚਤਸ੍ਸੋ વਿਦਤ੍ਥਿਯੋ ਸੁਗਤવਿਦਤ੍ਥਿਯਾ, ਤਿਰਿਯਂ ਦ੍વੇ વਿਦਤ੍ਥਿਯੋ’’ਤਿ (ਪਾਚਿ॰ ੮੮੮) વੁਤ੍ਤਪਮਾਣਮਤਿਕ੍ਕਨ੍ਤਂ। ਪਯੋਗੇਤਿ ਕਾਰਾਪਨਪਯੋਗੇ।
217.Pamāṇātikkantanti ‘‘dīghasocatasso vidatthiyo sugatavidatthiyā, tiriyaṃ dve vidatthiyo’’ti (pāci. 888) vuttapamāṇamatikkantaṃ. Payogeti kārāpanapayoge.
੨੧੮. વਿਸਿਬ੍ਬੇਤ੍વਾਤਿ ਦੁਸ੍ਸਿਬ੍ਬਿਤਂ ਪੁਨ ਸਿਬ੍ਬਨਤ੍ਥਾਯ વਿਸਿਬ੍ਬੇਤ੍વਾ।
218.Visibbetvāti dussibbitaṃ puna sibbanatthāya visibbetvā.
੨੧੯. ਪਞ੍ਚ ਅਹਾਨਿ ਪਞ੍ਚਾਹਂ, ਪਞ੍ਚਾਹਮੇવ ਪਞ੍ਚਾਹਿਕਂ। ਸਙ੍ਘਾਟੀਨਂ ਚਾਰੋ ਸਙ੍ਘਾਟਿਚਾਰੋ, ਪਰਿਭੋਗવਸੇਨ વਾ ਓਤਾਪਨવਸੇਨ વਾ ਸਙ੍ਘਟਿਤਟ੍ਠੇਨ ‘‘ਸਙ੍ਘਾਟੀ’’ਤਿ ਲਦ੍ਧਨਾਮਾਨਂ ‘‘ਤਿਚੀવਰਂ, ਉਦਕਸਾਟਿਕਾ, ਸਂਕਚ੍ਚਿਕਾ’’ਤਿ ਇਮੇਸਂ ਪਞ੍ਚਨ੍ਨਂ ਚੀવਰਾਨਂ ਪਰਿવਤ੍ਤਨਂ। ਅਤਿਕ੍ਕਮੇਤਿ ਭਿਕ੍ਖੁਨੀ ਅਤਿਕ੍ਕਮੇਯ੍ਯ। ਅਸ੍ਸਾ ਪਨ ਏਕਾવ ਪਾਚਿਤ੍ਤਿ ਪਰਿਦੀਪਿਤਾਤਿ ਯੋਜਨਾ।
219. Pañca ahāni pañcāhaṃ, pañcāhameva pañcāhikaṃ. Saṅghāṭīnaṃ cāro saṅghāṭicāro, paribhogavasena vā otāpanavasena vā saṅghaṭitaṭṭhena ‘‘saṅghāṭī’’ti laddhanāmānaṃ ‘‘ticīvaraṃ, udakasāṭikā, saṃkaccikā’’ti imesaṃ pañcannaṃ cīvarānaṃ parivattanaṃ. Atikkameti bhikkhunī atikkameyya. Assā pana ekāva pācitti paridīpitāti yojanā.
੨੨੦. ਸਙ੍ਕਮਨੀਯਨ੍ਤਿ ਸਙ੍ਕਮੇਤਬ੍ਬਂ। ਅਞ੍ਞਿਸ੍ਸਾ ਸਨ੍ਤਕਂ ਅਨਾਪੁਚ੍ਛਾ ਗਹਿਤਂ ਪੁਨ ਦਾਤਬ੍ਬਂ ਪਞ੍ਚਨ੍ਨਂ ਅਞ੍ਞਤਰਂ।
220.Saṅkamanīyanti saṅkametabbaṃ. Aññissā santakaṃ anāpucchā gahitaṃ puna dātabbaṃ pañcannaṃ aññataraṃ.
੨੨੧. ਗਣਚੀવਰਲਾਭਸ੍ਸਾਤਿ ਭਿਕ੍ਖੁਨਿਸਙ੍ਘੇਨ ਲਭਿਤਬ੍ਬਚੀવਰਸ੍ਸ। ਅਨ੍ਤਰਾਯਂ ਕਰੋਤੀਤਿ ਯਥਾ ਤੇ ਦਾਤੁਕਾਮਾ ਨ ਦੇਨ੍ਤਿ, ਏવਂ ਪਰਕ੍ਕਮਤਿ।
221.Gaṇacīvaralābhassāti bhikkhunisaṅghena labhitabbacīvarassa. Antarāyaṃ karotīti yathā te dātukāmā na denti, evaṃ parakkamati.
੨੨੨. ਧਮ੍ਮਿਕਨ੍ਤਿ ਸਮਗ੍ਗੇਨ ਸਙ੍ਘੇਨ ਸਨ੍ਨਿਪਤਿਤ੍વਾ ਕਰਿਯਮਾਨਂ। ਪਟਿਬਾਹਨ੍ਤੀਤਿ ਪਟਿਸੇਧੇਨ੍ਤੀ। ਪਟਿਬਾਹਿਤੇ ਪਟਿਸੇਧਿਤੇ।
222.Dhammikanti samaggena saṅghena sannipatitvā kariyamānaṃ. Paṭibāhantīti paṭisedhentī. Paṭibāhite paṭisedhite.
੨੨੩. ਅਗਾਰਿਕਾਦਿਨੋਤਿ ਆਦਿ-ਸਦ੍ਦੇਨ ‘‘ਪਰਿਬ੍ਬਾਜਕਸ੍ਸ વਾ ਪਰਿਬ੍ਬਾਜਿਕਾਯ વਾ’’ਤਿ (ਪਾਰਾ॰ ੯੧੭) વੁਤ੍ਤੇ ਸਙ੍ਗਣ੍ਹਾਤਿ। ਸਮਣਚੀવਰਨ੍ਤਿ ਕਪ੍ਪਕਤਂ ਨਿવਾਸਨਪਾਰੁਪਨੁਪਗਂ। ਪਯੋਗੇਤਿ ਦਾਨਪਯੋਗੇ।
223.Agārikādinoti ādi-saddena ‘‘paribbājakassa vā paribbājikāya vā’’ti (pārā. 917) vutte saṅgaṇhāti. Samaṇacīvaranti kappakataṃ nivāsanapārupanupagaṃ. Payogeti dānapayoge.
੨੨੪. ਚੀવਰੇ ਦੁਬ੍ਬਲਾਸਾਯਾਤਿ ਦੁਬ੍ਬਲਚੀવਰਪਚ੍ਚਾਸਾਯ ‘‘ਸਚੇ ਸਕ੍ਕੋਮ, ਦਸ੍ਸਾਮਾ’’ਤਿ ਏਤ੍ਤਕਮਤ੍ਤਂ ਸੁਤ੍વਾ ਉਪ੍ਪਾਦਿਤਾਯ ਆਸਾਯਾਤਿ ਅਤ੍ਥੋ। ਕਾਲਨ੍ਤਿ ਚੀવਰਕਾਲਸਮਯਂ। ਸਮਤਿਕ੍ਕਮੇਤਿ ਭਿਕ੍ਖੁਨੀਹਿ ਕਾਲਚੀવਰੇ ਭਾਜਿਯਮਾਨੇ ‘‘ਆਗਮੇਥ, ਅਯ੍ਯੇ, ਅਤ੍ਥਿ ਸਙ੍ਘਸ੍ਸ ਚੀવਰਪਚ੍ਚਾਸਾ’’ਤਿ વਤ੍વਾ ਤਂ ਚੀવਰવਿਭਙ੍ਗਂ ਸਮਤਿਕ੍ਕਮੇਯ੍ਯ।
224.Cīvare dubbalāsāyāti dubbalacīvarapaccāsāya ‘‘sace sakkoma, dassāmā’’ti ettakamattaṃ sutvā uppāditāya āsāyāti attho. Kālanti cīvarakālasamayaṃ. Samatikkameti bhikkhunīhi kālacīvare bhājiyamāne ‘‘āgametha, ayye, atthi saṅghassa cīvarapaccāsā’’ti vatvā taṃ cīvaravibhaṅgaṃ samatikkameyya.
੨੨੫. ਧਮ੍ਮਿਕਂ ਕਥਿਨੁਦ੍ਧਾਰਨ੍ਤਿ ਸਮਗ੍ਗੇਨ ਸਙ੍ਘੇਨ ਕਰਿਯਮਾਨਂ ਕਥਿਨਸ੍ਸ ਅਨ੍ਤਰੁਬ੍ਭਾਰਂ। ਪਟਿਬਾਹਨ੍ਤਿਯਾਤਿ ਨਿવਾਰੇਨ੍ਤਿਯਾ।
225.Dhammikaṃ kathinuddhāranti samaggena saṅghena kariyamānaṃ kathinassa antarubbhāraṃ. Paṭibāhantiyāti nivārentiyā.
ਨ੍ਹਾਨવਗ੍ਗવਣ੍ਣਨਾ ਤਤਿਯਾ।
Nhānavaggavaṇṇanā tatiyā.
੨੨੬. ਤੁવਟ੍ਟੇਯ੍ਯੁਨ੍ਤਿ ਨਿਪਜ੍ਜੇਯ੍ਯੁਂ। ਇਤਰਂ ਪਾਚਿਤ੍ਤਿਯਂ।
226.Tuvaṭṭeyyunti nipajjeyyuṃ. Itaraṃ pācittiyaṃ.
੨੨੭. ਪਯੋਗੇਤਿ ਭਿਕ੍ਖੁਨਿਯਾ ਅਫਾਸੁਕਕਰਣਪਯੋਗੇ ਕਰਿਯਮਾਨੇ।
227.Payogeti bhikkhuniyā aphāsukakaraṇapayoge kariyamāne.
੨੨੮. ਦੁਕ੍ਖਿਤਨ੍ਤਿ ਗਿਲਾਨਂ। ਨੁਪਟ੍ਠਾਪੇਨ੍ਤਿਯਾ વਾਪੀਤਿ ਤਸ੍ਸਾ ਉਪਟ੍ਠਾਨਂ ਪਰੇਹਿ ਅਕਾਰਾਪੇਨ੍ਤਿਯਾ, ਸਯਂ વਾ ਅਕਰੋਨ੍ਤਿਯਾ।
228.Dukkhitanti gilānaṃ. Nupaṭṭhāpentiyā vāpīti tassā upaṭṭhānaṃ parehi akārāpentiyā, sayaṃ vā akarontiyā.
੨੨੯. ਉਪਸ੍ਸਯਂ ਦਤ੍વਾਤਿ ਕવਾਟਬਨ੍ਧਂ ਅਤ੍ਤਨੋ ਪੁਗ੍ਗਲਿਕવਿਹਾਰਂ ਦਤ੍વਾ। ਕਡ੍ਢਿਤੇਤਿ ਨਿਕ੍ਕਡ੍ਢਿਤੇ।
229.Upassayaṃ datvāti kavāṭabandhaṃ attano puggalikavihāraṃ datvā. Kaḍḍhiteti nikkaḍḍhite.
੨੩੦. ਸਂਸਟ੍ਠਾਤਿ ਗਹਪਤਿਨਾ વਾ ਗਹਪਤਿਪੁਤ੍ਤੇਨ વਾ ਸਂਸਟ੍ਠવਿਹਾਰੀ ਭਿਕ੍ਖੁਨੀ ਸਙ੍ਘੇਨ ਸਂਸਟ੍ਠવਿਹਾਰਤੋ ਨਿવਤ੍ਤਿਯਮਾਨਾ। ਞਤ੍ਤਿਯਾ ਦੁਕ੍ਕਟਂ ਫੁਸੇਤਿ ਸਮਨੁਭਾਸਨਕਮ੍ਮਞਤ੍ਤਿਯਾ ਦੁਕ੍ਕਟਂ ਆਪਜ੍ਜੇਯ੍ਯ।
230.Saṃsaṭṭhāti gahapatinā vā gahapatiputtena vā saṃsaṭṭhavihārī bhikkhunī saṅghena saṃsaṭṭhavihārato nivattiyamānā. Ñattiyā dukkaṭaṃ phuseti samanubhāsanakammañattiyā dukkaṭaṃ āpajjeyya.
੨੩੧. ਅਨ੍ਤੋਰਟ੍ਠੇਤਿ ਯਸ੍ਸ વਿਜਿਤੇ વਿਹਰਤਿ, ਤਸ੍ਸ ਰਟ੍ਠੇ। ਪਟਿਪਨ੍ਨਾਯਾਤਿ ਚਾਰਿਕਂ ਕਪ੍ਪੇਨ੍ਤਿਯਾ। ਸੇਸਕਨ੍ਤਿ ਪਾਚਿਤ੍ਤਿਯਂ।
231.Antoraṭṭheti yassa vijite viharati, tassa raṭṭhe. Paṭipannāyāti cārikaṃ kappentiyā. Sesakanti pācittiyaṃ.
ਤੁવਟ੍ਟવਗ੍ਗવਣ੍ਣਨਾ ਚਤੁਤ੍ਥਾ।
Tuvaṭṭavaggavaṇṇanā catutthā.
੨੩੩. ਰਾਜਾਗਾਰਾਦਿਕਨ੍ਤਿ ਆਦਿ-ਸਦ੍ਦੇਨ ਚਿਤ੍ਤਾਗਾਰਾਦੀਨਂ ਗਹਣਂ।
233.Rājāgārādikanti ādi-saddena cittāgārādīnaṃ gahaṇaṃ.
੨੩੫. ਪਯੋਗੇਤਿ ਕਪ੍ਪਾਸવਿਚਾਰਣਂ ਆਦਿਂ ਕਤ੍વਾ ਸਬ੍ਬਪਯੋਗੇ। ਉਜ੍ਜવੁਜ੍ਜવਨੇਤਿ ਯਤ੍ਤਕਂ ਹਤ੍ਥੇਨ ਅਞ੍ਛਿਤਂ ਹੋਤਿ, ਤਸ੍ਮਿਂ ਤਕ੍ਕਮ੍ਹਿ વੇਠਿਤੇ।
235.Payogeti kappāsavicāraṇaṃ ādiṃ katvā sabbapayoge. Ujjavujjavaneti yattakaṃ hatthena añchitaṃ hoti, tasmiṃ takkamhi veṭhite.
੨੩੭. ਪਯੋਗੇਤਿ ਅਗਾਰਿਕਸ੍ਸ વਾ ਪਰਿਬ੍ਬਾਜਕਸ੍ਸ વਾ ਪਰਿਬ੍ਬਾਜਿਕਾਯ વਾ ਸਹਤ੍ਥਾ ਖਾਦਨੀਯਾਦੀਨਂ ਦਾਨਪਯੋਗੇ।
237.Payogeti agārikassa vā paribbājakassa vā paribbājikāya vā sahatthā khādanīyādīnaṃ dānapayoge.
੨੩੮. ‘‘ਸਮਂ ਆਪਤ੍ਤਿਪਭੇਦਤੋ’’ਤਿ ਪਦਚ੍ਛੇਦੋ।
238. ‘‘Samaṃ āpattipabhedato’’ti padacchedo.
੨੩੯. ਤਿਰਚ੍ਛਾਨਗਤਂ વਿਜ੍ਜਨ੍ਤਿ ਯਂ ਕਿਞ੍ਚਿ ਬਾਹਿਰਕਂ ਅਨਤ੍ਥਸਂਹਿਤਂ ਪਰੂਪਘਾਤਕਰਂ ਹਤ੍ਥਿਸਿਕ੍ਖਾਦਿਸਿਪ੍ਪਂ । ਪਠਨ੍ਤਿਯਾਤਿ ਸਿਕ੍ਖਨ੍ਤਿਯਾ। ਪਯੋਗੇਤਿ ਦੁਰੁਪਸਙ੍ਕਮਨਾਦਿਪਯੋਗੇ। ਪਦੇ ਪਦੇਤਿ ਪਦਾਦਿવਸੇਨ ਪਰਿਯਾਪੁਣਨ੍ਤਿਯਾ ਪਦੇ ਪਦੇ ਅਕ੍ਖਰਪਦਾਨਂ વਸੇਨ।
239.Tiracchānagataṃvijjanti yaṃ kiñci bāhirakaṃ anatthasaṃhitaṃ parūpaghātakaraṃ hatthisikkhādisippaṃ . Paṭhantiyāti sikkhantiyā. Payogeti durupasaṅkamanādipayoge. Pade padeti padādivasena pariyāpuṇantiyā pade pade akkharapadānaṃ vasena.
੨੪੦. ਨવਮੇ ‘‘ਪਰਿਯਾਪੁਣਾਤੀ’’ਤਿ ਪਦਂ, ਦਸਮੇ ‘‘વਾਚੇਤੀ’’ਤਿ ਪਦਨ੍ਤਿ ਏવਂ ਪਦਮਤ੍ਤਮੇવ ਉਭਿਨ੍ਨਂ વਿਸੇਸਕਂ ਭੇਦਕਂ।
240. Navame ‘‘pariyāpuṇātī’’ti padaṃ, dasame ‘‘vācetī’’ti padanti evaṃ padamattameva ubhinnaṃ visesakaṃ bhedakaṃ.
ਚਿਤ੍ਤਾਗਾਰવਗ੍ਗવਣ੍ਣਨਾ ਪਞ੍ਚਮਾ।
Cittāgāravaggavaṇṇanā pañcamā.
੨੪੧. ਤਮਾਰਾਮਨ੍ਤਿ ਯਤ੍ਥ ਭਿਕ੍ਖੂ ਰੁਕ੍ਖਮੂਲੇਪਿ વਸਨ੍ਤਿ, ਤਂ ਸਭਿਕ੍ਖੁਕਂ ਪਦੇਸਂ।
241.Tamārāmanti yattha bhikkhū rukkhamūlepi vasanti, taṃ sabhikkhukaṃ padesaṃ.
੨੪੩. ਅਕ੍ਕੋਸਤੀਤਿ ਦਸਨ੍ਨਂ ਅਕ੍ਕੋਸવਤ੍ਥੂਨਂ ਅਞ੍ਞਤਰੇਨ ਸਮ੍ਮੁਖਾ વਾ ਪਰਮ੍ਮੁਖਾ વਾ ਅਕ੍ਕੋਸਤਿ। ਪਰਿਭਾਸਤੀਤਿ ਭਯਦਸ੍ਸਨੇਨ ਤਜ੍ਜੇਤਿ। ‘‘ਪਾਚਿਤ੍ਤਿ ਅਕ੍ਕੋਸਿਤੇ’’ਤਿ ਪਦਚ੍ਛੇਦੋ।
243.Akkosatīti dasannaṃ akkosavatthūnaṃ aññatarena sammukhā vā parammukhā vā akkosati. Paribhāsatīti bhayadassanena tajjeti. ‘‘Pācitti akkosite’’ti padacchedo.
੨੪੪. ਚਣ੍ਡਿਕਭਾવੇਨਾਤਿ ਕੋਧੇਨ। ਗਣਨ੍ਤਿ ਭਿਕ੍ਖੁਨਿਸਙ੍ਘਂ। ਪਰਿਭਾਸਤੀਤਿ ‘‘ਬਾਲਾ ਏਤਾ’’ਤਿਆਦੀਹਿ વਚਨੇਹਿ ਅਕ੍ਕੋਸਤਿ। ਪਯੋਗੇਤਿ ਪਰਿਭਾਸਨਪਯੋਗੇ। ਪਰਿਭਟ੍ਠੇਤਿ ਅਕ੍ਕੋਸਿਤੇ। ਇਤਰਂ ਪਾਚਿਤ੍ਤਿਯਂ।
244.Caṇḍikabhāvenāti kodhena. Gaṇanti bhikkhunisaṅghaṃ. Paribhāsatīti ‘‘bālā etā’’tiādīhi vacanehi akkosati. Payogeti paribhāsanapayoge. Paribhaṭṭheti akkosite. Itaraṃ pācittiyaṃ.
੨੪੫. ਨਿਮਨ੍ਤਿਤਾਤਿ ਗਣਭੋਜਨੇ વੁਤ੍ਤਨਯੇਨ ਨਿਮਨ੍ਤਿਤਾ। ਪવਾਰਿਤਾਤਿ ਪવਾਰਣਸਿਕ੍ਖਾਪਦੇ વੁਤ੍ਤਨਯੇਨ વਾਰਿਤਾ। ਖਾਦਨਂ ਭੋਜਨਮ੍ਪਿ વਾਤਿ ਯਾਗੁਪੂવਖਜ੍ਜਕਂ, ਯਾવਕਾਲਿਕਂ ਮੂਲਖਾਦਨੀਯਾਦਿਖਾਦਨੀਯਂ, ਓਦਨਾਦਿਭੋਜਨਮ੍ਪਿ વਾ ਯਾ ਭਿਕ੍ਖੁਨੀ ਭੁਞ੍ਜਨ੍ਤੀ ਹੋਤਿ, ਸਾ ਪਨ ਦ੍વੇਯੇવ ਆਪਤ੍ਤਿਯੋ ਫੁਸੇਤਿ ਯੋਜਨਾ।
245.Nimantitāti gaṇabhojane vuttanayena nimantitā. Pavāritāti pavāraṇasikkhāpade vuttanayena vāritā. Khādanaṃ bhojanampi vāti yāgupūvakhajjakaṃ, yāvakālikaṃ mūlakhādanīyādikhādanīyaṃ, odanādibhojanampi vā yā bhikkhunī bhuñjantī hoti, sā pana dveyeva āpattiyo phuseti yojanā.
੨੪੭. ਮਚ੍ਛਰਾਯਨ੍ਤੀਤਿ ਮਚ੍ਛਰਂ ਕਰੋਨ੍ਤੀ, ਅਤ੍ਤਨੋ ਪਚ੍ਚਯਦਾਯਕਕੁਲਸ੍ਸ ਅਞ੍ਞੇਹਿ ਸਾਧਾਰਣਭਾવਂ ਅਸਹਨ੍ਤੀਤਿ ਅਤ੍ਥੋ । ਪਯੋਗੇਤਿ ਤਦਨੁਰੂਪੇ ਕਾਯવਚੀਪਯੋਗੇ। ਮਚ੍ਛਰਿਤੇਤਿ ਮਚ੍ਛਰવਸੇਨ ਕਤਪਯੋਗੇ ਨਿਪ੍ਫਨ੍ਨੇ।
247.Maccharāyantīti maccharaṃ karontī, attano paccayadāyakakulassa aññehi sādhāraṇabhāvaṃ asahantīti attho . Payogeti tadanurūpe kāyavacīpayoge. Macchariteti maccharavasena katapayoge nipphanne.
੨੪੮. ਅਭਿਕ੍ਖੁਕੇ ਪਨਾવਾਸੇਤਿ ਯਤੋ ਭਿਕ੍ਖੁਨੁਪਸ੍ਸਯਤੋ ਅਦ੍ਧਯੋਜਨਬ੍ਭਨ੍ਤਰੇ ਓવਾਦਦਾਯਕਾ ਭਿਕ੍ਖੂ ਨ વਸਨ੍ਤਿ, ਮਗ੍ਗੋ વਾ ਅਖੇਮੋ ਹੋਤਿ, ਨ ਸਕ੍ਕਾ ਅਨਨ੍ਤਰਾਯੇਨ ਗਨ੍ਤੁਂ, ਏવਰੂਪੇ ਆવਾਸੇ। ਪੁਬ੍ਬਕਿਚ੍ਚੇਸੂਤਿ ‘‘વਸ੍ਸਂ વਸਿਸ੍ਸਾਮੀ’’ਤਿ ਸੇਨਾਸਨਪਞ੍ਞਾਪਨਪਾਨੀਯਉਪਟ੍ਠਾਪਨਾਦਿਪੁਬ੍ਬਕਿਚ੍ਚੇ ਪਨ ਕਰਿਯਮਾਨੇ ਦੁਕ੍ਕਟਂ ਭવੇਤਿ ਯੋਜਨਾ।
248.Abhikkhuke panāvāseti yato bhikkhunupassayato addhayojanabbhantare ovādadāyakā bhikkhū na vasanti, maggo vā akhemo hoti, na sakkā anantarāyena gantuṃ, evarūpe āvāse. Pubbakiccesūti ‘‘vassaṃ vasissāmī’’ti senāsanapaññāpanapānīyaupaṭṭhāpanādipubbakicce pana kariyamāne dukkaṭaṃ bhaveti yojanā.
੨੪੯. વਸ੍ਸਂવੁਤ੍ਥਾਤਿ ਪੁਰਿਮਂ વਾ ਪਚ੍ਛਿਮਂ વਾ ਤੇਮਾਸਂ વੁਤ੍ਥਾ। ਉਭਤੋਸਙ੍ਘੇਤਿ ਭਿਕ੍ਖੁਨਿਸਙ੍ਘੇ, ਭਿਕ੍ਖੁਸਙ੍ਘੇ ਚ। ਤੀਹਿਪਿ ਠਾਨੇਹੀਤਿ ‘‘ਦਿਟ੍ਠੇਨ વਾ’’ਤਿਆਦਿਨਾ વੁਤ੍ਤੇਹਿ ਤੀਹਿ ਕਾਰਣੇਹਿ।
249.Vassaṃvutthāti purimaṃ vā pacchimaṃ vā temāsaṃ vutthā. Ubhatosaṅgheti bhikkhunisaṅghe, bhikkhusaṅghe ca. Tīhipi ṭhānehīti ‘‘diṭṭhena vā’’tiādinā vuttehi tīhi kāraṇehi.
੨੫੦. ਓવਾਦਤ੍ਥਾਯਾਤਿ ਗਰੁਧਮ੍ਮੋવਾਦਨਤ੍ਥਾਯ। ਸਂવਾਸਤ੍ਥਾਯਾਤਿ ਉਪੋਸਥਪੁਚ੍ਛਨਤ੍ਥਾਯ ਚੇવ ਪવਾਰਣਤ੍ਥਾਯ ਚ। ਨ ਗਚ੍ਛਤੀਤਿ ਭਿਕ੍ਖੁਂ ਨ ਉਪਗਚ੍ਛਤਿ।
250.Ovādatthāyāti garudhammovādanatthāya. Saṃvāsatthāyāti uposathapucchanatthāya ceva pavāraṇatthāya ca. Na gacchatīti bhikkhuṃ na upagacchati.
੨੫੧. ਓવਾਦਮ੍ਪਿ ਨ ਯਾਚਨ੍ਤੀਤਿ ਉਪੋਸਥਾਦਿવਸੇਨ ਓવਾਦੂਪਸਙ੍ਕਮਨਂ ਭਿਕ੍ਖੁਂ ਨ ਯਾਚਨ੍ਤੀ ਨ ਪੁਚ੍ਛਨ੍ਤੀ। ਉਪੋਸਥਨ੍ਤਿ ਉਪੋਸਥਦਿવਸਤੋ ਪੁਰਿਮਦਿવਸੇ ਤੇਰਸਿਯਂ વਾ ਚਾਤੁਦ੍ਦਸਿਯਂ વਾ ਉਪੋਸਥਂ ਨ ਪੁਚ੍ਛਨ੍ਤੀ।
251.Ovādampi na yācantīti uposathādivasena ovādūpasaṅkamanaṃ bhikkhuṃ na yācantī na pucchantī. Uposathanti uposathadivasato purimadivase terasiyaṃ vā cātuddasiyaṃ vā uposathaṃ na pucchantī.
੨੫੨. ਅਪੁਚ੍ਛਿਤ੍વਾવ ਸਙ੍ਘਂ વਾਤਿ ਸਙ੍ਘਂ વਾ ਗਣਂ વਾ ਅਨਪਲੋਕੇਤ੍વਾવ। ‘‘ਭੇਦਾਪੇਤੀ’’ਤਿ ਇਦਂ ਨਿਦਸ੍ਸਨਮਤ੍ਤਂ ‘‘ਫਾਲਾਪੇਯ੍ਯ વਾ ਧੋવਾਪੇਯ੍ਯ વਾ ਆਲਿਮ੍ਪਾਪੇਯ੍ਯ વਾ ਬਨ੍ਧਾਪੇਯ੍ਯ વਾ ਮੋਚਾਪੇਯ੍ਯ વਾ’’ਤਿ ਇਮੇਸਮ੍ਪਿ ਕਿਰਿਯਾવਿਕਪ੍ਪਾਨਂ ਸਙ੍ਗਹੇਤਬ੍ਬਤ੍ਤਾ। ਪਸਾਖਜਨ੍ਤਿ ਨਾਭਿਯਾ ਹੇਟ੍ਠਾ, ਜਾਣੁਮਣ੍ਡਲਾਨਂ ਉਪਰਿ ਪਦੇਸੇ ਜਾਤਂ ਗਣ੍ਡਂ વਾ ਰੁਧਿਤਂ વਾ। ਪਯੋਗੇਤਿ ਭੇਦਾਪਨਾਦਿਪਯੋਗੇ।
252.Apucchitvāva saṅghaṃ vāti saṅghaṃ vā gaṇaṃ vā anapaloketvāva. ‘‘Bhedāpetī’’ti idaṃ nidassanamattaṃ ‘‘phālāpeyya vā dhovāpeyya vā ālimpāpeyya vā bandhāpeyya vā mocāpeyya vā’’ti imesampi kiriyāvikappānaṃ saṅgahetabbattā. Pasākhajanti nābhiyā heṭṭhā, jāṇumaṇḍalānaṃ upari padese jātaṃ gaṇḍaṃ vā rudhitaṃ vā. Payogeti bhedāpanādipayoge.
ਆਰਾਮવਗ੍ਗવਣ੍ਣਨਾ ਛਟ੍ਠਾ।
Ārāmavaggavaṇṇanā chaṭṭhā.
੨੫੩. ਗਬ੍ਭਿਨਿਨ੍ਤਿ ਆਪਨ੍ਨਸਤ੍ਤਂ ਸਿਕ੍ਖਮਾਨਂ। વੁਟ੍ਠਾਪੇਨ੍ਤੀਤਿ ਉਪਜ੍ਝਾਯਾ ਹੁਤ੍વਾ ਉਪਸਮ੍ਪਾਦੇਨ੍ਤੀ। ਪਯੋਗੇਤਿ ਗਣਪਰਿਯੇਸਨਾਦਿਪਯੋਗੇ। વੁਟ੍ਠਾਪਿਤੇਤਿ ਉਪਸਮ੍ਪਾਦਿਤੇ, ਕਮ੍ਮવਾਚਾਪਰਿਯੋਸਾਨੇਤਿ ਅਤ੍ਥੋ।
253.Gabbhininti āpannasattaṃ sikkhamānaṃ. Vuṭṭhāpentīti upajjhāyā hutvā upasampādentī. Payogeti gaṇapariyesanādipayoge. Vuṭṭhāpiteti upasampādite, kammavācāpariyosāneti attho.
੨੫੫. ਸਹਜੀવਿਨਿਨ੍ਤਿ ਸਦ੍ਧਿવਿਹਾਰਿਨਿਂ। ਨਾਨੁਗ੍ਗਣ੍ਹਨ੍ਤੀਤਿ ਉਦ੍ਦੇਸਦਾਨਾਦੀਹਿ ਨ ਸਙ੍ਗਣ੍ਹਨ੍ਤੀ।
255.Sahajīvininti saddhivihāriniṃ. Nānuggaṇhantīti uddesadānādīhi na saṅgaṇhantī.
ਗਬ੍ਭਿਨਿવਗ੍ਗવਣ੍ਣਨਾ ਸਤ੍ਤਮਾ।
Gabbhinivaggavaṇṇanā sattamā.
੨੫੮. ‘‘ਅਲਂ વੁਟ੍ਠਾਪਿਤੇਨਾ’’ਤਿ વੁਚ੍ਚਮਾਨਾ ਭਿਕ੍ਖੁਨੀਹਿ ਨਿવਾਰਿਯਮਾਨਾ। ਖੀਯਤੀਤਿ ਅਞ੍ਞਾਸਂ ਬ੍ਯਤ੍ਤਾਨਂ ਲਜ੍ਜੀਨਂ વੁਟ੍ਠਾਨਸਮ੍ਮੁਤਿਂ ਦੀਯਮਾਨਂ ਦਿਸ੍વਾ ‘‘ਅਹਮੇવ ਨੂਨ ਬਾਲਾ’’ਤਿਆਦਿਨਾ ਭਣਮਾਨਾ ਖੀਯਤਿ। ਪਯੋਗੇਤਿ ਖੀਯਮਾਨਪਯੋਗੇ। ਖੀਯਿਤੇਤਿ ਖੀਯਨਪਯੋਗੇ ਨਿਟ੍ਠਿਤੇ।
258. ‘‘Alaṃ vuṭṭhāpitenā’’ti vuccamānā bhikkhunīhi nivāriyamānā. Khīyatīti aññāsaṃ byattānaṃ lajjīnaṃ vuṭṭhānasammutiṃ dīyamānaṃ disvā ‘‘ahameva nūna bālā’’tiādinā bhaṇamānā khīyati. Payogeti khīyamānapayoge. Khīyiteti khīyanapayoge niṭṭhite.
ਕੁਮਾਰਿਭੂਤવਗ੍ਗવਣ੍ਣਨਾ ਅਟ੍ਠਮਾ।
Kumāribhūtavaggavaṇṇanā aṭṭhamā.
੨੬੦. ਛਤ੍ਤੁਪਾਹਨਨ੍ਤਿ વੁਤ੍ਤਲਕ੍ਖਣਂ ਛਤ੍ਤਞ੍ਚ ਉਪਾਹਨਾਯੋ ਚ। ਪਯੋਗੇਤਿ ਧਾਰਣਪਯੋਗੇ।
260.Chattupāhananti vuttalakkhaṇaṃ chattañca upāhanāyo ca. Payogeti dhāraṇapayoge.
੨੬੧. ਯਾਨੇਨਾਤਿ વਯ੍ਹਾਦਿਨਾ। ਯਾਯਨ੍ਤੀਤਿ ਸਚੇ ਯਾਨੇਨ ਗਤਾ ਹੋਤਿ।
261.Yānenāti vayhādinā. Yāyantīti sace yānena gatā hoti.
੨੬੨. ਸਙ੍ਘਾਣਿਨ੍ਤਿ ਯਂ ਕਿਞ੍ਚਿ ਕਟੂਪਗਂ। ਧਾਰੇਨ੍ਤਿਯਾਤਿ ਕਟਿਯਂ ਪਟਿਮੁਚ੍ਚਨ੍ਤਿਯਾ।
262.Saṅghāṇinti yaṃ kiñci kaṭūpagaṃ. Dhārentiyāti kaṭiyaṃ paṭimuccantiyā.
੨੬੩. ਗਨ੍ਧવਣ੍ਣੇਨਾਤਿ ਯੇਨ ਕੇਨਚਿ વਣ੍ਣੇਨ ਚ ਯੇਨ ਕੇਨਚਿ ਗਨ੍ਧੇਨ ਚ। ਗਨ੍ਧੋ ਨਾਮ ਚਨ੍ਦਨਾਲੇਪਾਦਿ। વਣ੍ਣੋ ਨਾਮ ਕੁਙ੍ਕੁਮਹਲਿਦ੍ਦਾਦਿ। ਪਯੋਗੇਤਿ ਗਨ੍ਧਾਦਿਪਯੋਗੇ ਰਚਨਤੋ ਪਟ੍ਠਾਯ ਪੁਬ੍ਬਪਯੋਗੇ।
263.Gandhavaṇṇenāti yena kenaci vaṇṇena ca yena kenaci gandhena ca. Gandho nāma candanālepādi. Vaṇṇo nāma kuṅkumahaliddādi. Payogeti gandhādipayoge racanato paṭṭhāya pubbapayoge.
੨੬੬. ਅਨਾਪੁਚ੍ਛਾਤਿ ‘‘ਨਿਸੀਦਾਮਿ, ਅਯ੍ਯਾ’’ਤਿ ਅਨਾਪੁਚ੍ਛਿਤ੍વਾ। ਨਿਸੀਦਿਤੇ ਭਿਕ੍ਖੁਸ੍ਸ ਉਪਚਾਰੇ ਅਨ੍ਤਮਸੋ ਛਮਾਯ ਨਿਸਿਨ੍ਨੇ।
266.Anāpucchāti ‘‘nisīdāmi, ayyā’’ti anāpucchitvā. Nisīdite bhikkhussa upacāre antamaso chamāya nisinne.
੨੬੭. ਅਨੋਕਾਸਕਤਨ੍ਤਿ ‘‘ਅਸੁਕਸ੍ਮਿਂ ਨਾਮ ਠਾਨੇ ਪੁਚ੍ਛਿਸ੍ਸਾਮੀ’’ਤਿ ਏવਂ ਅਕਤਓਕਾਸਂ।
267.Anokāsakatanti ‘‘asukasmiṃ nāma ṭhāne pucchissāmī’’ti evaṃ akataokāsaṃ.
੨੬੮. ਪવਿਸਨ੍ਤਿਯਾਤਿ વਿਨਿਚ੍ਛਯਂ ਆਰਾਮવਗ੍ਗਸ੍ਸ ਪਠਮੇਨੇવ ਸਿਕ੍ਖਾਪਦੇਨ ਸਦਿਸਂ ਕਤ੍વਾ વਦੇਯ੍ਯਾਤਿ ਯੋਜਨਾ।
268.Pavisantiyāti vinicchayaṃ ārāmavaggassa paṭhameneva sikkhāpadena sadisaṃ katvā vadeyyāti yojanā.
ਛਤ੍ਤੁਪਾਹਨવਗ੍ਗવਣ੍ਣਨਾ ਨવਮਾ।
Chattupāhanavaggavaṇṇanā navamā.
ਇਤਿ ਉਤ੍ਤਰੇ ਲੀਨਤ੍ਥਪਕਾਸਨਿਯਾ ਭਿਕ੍ਖੁਨਿવਿਭਙ੍ਗੇ
Iti uttare līnatthapakāsaniyā bhikkhunivibhaṅge
ਪਾਚਿਤ੍ਤਿਯਕਥਾવਣ੍ਣਨਾ ਨਿਟ੍ਠਿਤਾ।
Pācittiyakathāvaṇṇanā niṭṭhitā.
੨੬੯-੭੦. ਅਟ੍ਠਸੁ ਪਾਟਿਦੇਸਨੀਯਸਿਕ੍ਖਾਪਦੇਸੁਪਿ ਦ੍વਿਧਾ ਆਪਤ੍ਤਿ ਹੋਤੀਤਿ ਯੋਜਨਾ। ਤਤੋਤਿ ਗਹਣਹੇਤੁ। ਸਬ੍ਬੇਸੂਤਿ ਪਾਟਿਦੇਸਨੀਯਸਿਕ੍ਖਾਪਦੇਸੁ।
269-70. Aṭṭhasu pāṭidesanīyasikkhāpadesupi dvidhā āpatti hotīti yojanā. Tatoti gahaṇahetu. Sabbesūti pāṭidesanīyasikkhāpadesu.
ਪਾਟਿਦੇਸਨੀਯਕਥਾવਣ੍ਣਨਾ।
Pāṭidesanīyakathāvaṇṇanā.
੨੭੧-੨. ਇਮਂ ਪਰਮਂ ਉਤ੍ਤਮਂ ਨਿਰੁਤ੍ਤਰਂ ਕੇਨਚਿ વਾ વਤ੍ਤਬ੍ਬੇਨ ਉਤ੍ਤਰੇਨ ਰਹਿਤਂ ਨਿਦ੍ਦੋਸਂ ਉਤ੍ਤਰਂ ਏવਂਨਾਮਕਂ ਧੀਰੋ ਪਞ੍ਞવਾ ਭਿਕ੍ਖੁ ਅਤ੍ਥવਸੇਨ વਿਦਿਤ੍વਾ ਦੁਰੁਤ੍ਤਰਂ ਕਿਚ੍ਛੇਨ ਉਤ੍ਤਰਿਤਬ੍ਬਂ ਪਞ੍ਞਤ੍ਤਮਹਾਸਮੁਦ੍ਦਂ વਿਨਯਮਹਾਸਾਗਰਂ ਸੁਖੇਨੇવ ਯਸ੍ਮਾ ਉਤ੍ਤਰਤਿ, ਤਸ੍ਮਾ ਕਙ੍ਖਚ੍ਛੇਦੇ વਿਨਯવਿਚਿਕਿਚ੍ਛਾਯ ਛਿਨ੍ਦਨੇ ਸਤ੍ਥੇ ਸਤ੍ਥਸਦਿਸੇ ਅਸ੍ਮਿਂ ਸਤ੍ਥੇ ਇਮਸ੍ਮਿਂ ਉਤ੍ਤਰਪਕਰਣੇ ਉਸ੍ਮਾਯੁਤ੍ਤੋ ਕਮ੍ਮਜਤੇਜੋਧਾਤੁਯਾ ਸਮਨ੍ਨਾਗਤੋ ਜੀવਮਾਨੋ ਭਿਕ੍ਖੁ ਨਿਚ੍ਚਂ ਨਿਰਨ੍ਤਰਂ ਸਤ੍ਤੋ ਅਭਿਰਤੋ ਨਿਚ੍ਚਂ ਯੋਗਂ ਸਤਤਾਭਿਯੋਗਂ ਕਾਤੁਂ ਯੁਤ੍ਤੋ ਅਨੁਰੂਪੋਤਿ ਯੋਜਨਾ।
271-2. Imaṃ paramaṃ uttamaṃ niruttaraṃ kenaci vā vattabbena uttarena rahitaṃ niddosaṃ uttaraṃ evaṃnāmakaṃ dhīro paññavā bhikkhu atthavasena viditvā duruttaraṃ kicchena uttaritabbaṃ paññattamahāsamuddaṃ vinayamahāsāgaraṃ sukheneva yasmā uttarati, tasmā kaṅkhacchede vinayavicikicchāya chindane satthe satthasadise asmiṃ satthe imasmiṃ uttarapakaraṇe usmāyutto kammajatejodhātuyā samannāgato jīvamāno bhikkhu niccaṃ nirantaraṃ satto abhirato niccaṃ yogaṃ satatābhiyogaṃ kātuṃ yutto anurūpoti yojanā.
ਭਿਕ੍ਖੁਨਿવਿਭਙ੍ਗੋ ਨਿਟ੍ਠਿਤੋਤਿ ਏਤ੍ਥਾਪਿ ਉਪ੍ਪਤ੍ਤਿ વੁਤ੍ਤਨਯੇਨੇવ વੇਦਿਤਬ੍ਬਾ।
Bhikkhunivibhaṅgo niṭṭhitoti etthāpi uppatti vuttanayeneva veditabbā.
ਇਤਿ ਉਤ੍ਤਰੇ ਲੀਨਤ੍ਥਪਕਾਸਨਿਯਾ
Iti uttare līnatthapakāsaniyā
ਭਿਕ੍ਖੁਨਿવਿਭਙ੍ਗવਣ੍ਣਨਾ ਨਿਟ੍ਠਿਤਾ।
Bhikkhunivibhaṅgavaṇṇanā niṭṭhitā.
