| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
ভিক্খুনোৰাদৰগ্গৰণ্ণনা
Bhikkhunovādavaggavaṇṇanā
৪৫০. ভিক্খুনিৰগ্গে অলাভাযাতি এত্থ লভধাতুযা কম্মং, সম্পদানৰচনস্স চ তদত্থং দস্সেন্তো আহ ‘‘চতুন্নং পচ্চযানং অলাভত্থাযা’’তি। ‘‘ৰাযমতী’’তি ইমিনা পরিসক্কতীতি এত্থ সক্কধাতুযা সমত্থত্থং পটিক্খিপিত্ৰা ৰাযমত্থং দস্সেতি। কলিসাসনন্তি পাপপরাজযআণং। নীহরণত্থাযাতি নিদ্ধরিত্ৰা অপনযনত্থায।
450. Bhikkhunivagge alābhāyāti ettha labhadhātuyā kammaṃ, sampadānavacanassa ca tadatthaṃ dassento āha ‘‘catunnaṃ paccayānaṃ alābhatthāyā’’ti. ‘‘Vāyamatī’’ti iminā parisakkatīti ettha sakkadhātuyā samatthatthaṃ paṭikkhipitvā vāyamatthaṃ dasseti. Kalisāsananti pāpaparājayaāṇaṃ. Nīharaṇatthāyāti niddharitvā apanayanatthāya.
৪৫১. ‘‘কম্ম’’ন্তি সামঞ্ঞতো ৰুত্তত্তা ‘‘সত্তন্নং কম্মানং অঞ্ঞতর’’ন্তি।
451. ‘‘Kamma’’nti sāmaññato vuttattā ‘‘sattannaṃ kammānaṃ aññatara’’nti.
৪৫৪. ন সাকচ্ছাতব্বোতি এত্থ কো নাম কথামগ্গো ন সাকচ্ছাতব্বো, ননু ৰিনযোযেৰাতি আহ ‘‘কপ্পিযা…পে॰… কথামগ্গো’’তি। ‘‘ন কথেতব্বো’’তি ইমিনা কচ্ছসদ্দস্স কথধাতুযা নিপ্ফন্নভাৰং দীপেতি। কস্মা পন পঠমপঞ্চকে ‘‘ন অসেক্খেনা’’তি পটিক্খিপিত্ৰা দুতিযপঞ্চকে ‘‘অসেক্খেনা’’তিআদি ৰুত্তন্তি আহ ‘‘যস্মা পনা’’তিআদি। ইতরো পুথুজ্জনো ন কথেতীতি যোজনা।
454.Nasākacchātabboti ettha ko nāma kathāmaggo na sākacchātabbo, nanu vinayoyevāti āha ‘‘kappiyā…pe… kathāmaggo’’ti. ‘‘Na kathetabbo’’ti iminā kacchasaddassa kathadhātuyā nipphannabhāvaṃ dīpeti. Kasmā pana paṭhamapañcake ‘‘na asekkhenā’’ti paṭikkhipitvā dutiyapañcake ‘‘asekkhenā’’tiādi vuttanti āha ‘‘yasmā panā’’tiādi. Itaro puthujjano na kathetīti yojanā.
ন অত্থপটিসম্ভিদাপত্তোতি এত্থ অত্থো নাম অট্ঠকথাযেৰাধিপ্পেতাতি আহ ‘‘অট্ঠকথাযা’’তি। ‘‘পভেদগতঞাণপ্পত্তো’’তি ইমিনা অত্থাদীসু পতি ৰিসুং সম্ভিজ্জতীতি পটিসম্ভিদা, পঞ্ঞা, তং পত্তোতি পটিসম্ভিদাপত্তো । অত্থে পটিসম্ভিদাপত্তো অত্থপটিসম্ভিদাপত্তোতি দস্সেতি। ‘‘পাল়িধম্মে’’তি ইমিনা ধম্মপটিসম্ভিদাপত্তোতি এত্থ ধম্মসরূপং দস্সেতি। ৰোহারনিরুত্তিযন্তি পঞ্ঞত্তিনিরুত্তিযং। ইমিনা নিরুত্তিপটিসম্ভিদাপত্তোতি এত্থ নিরুত্তিসরূপং দস্সেতি। পটিভানপটিসম্ভিদাপত্তোতি এত্থ পটিভানং নাম হেট্ঠিমঞাণত্তযমেৰাতি আহ ‘‘অত্থপটিসম্ভিদাদীনি ঞাণানী’’তি, তেসূতি ঞাণেসু, যং যং ৰিমুত্তং যথাৰিমুত্তং, চিত্তং। পচ্চৰেক্খিতাতি পুনপ্পুনং ওলোকিতা। সব্বত্থাতি ভিক্খুনিৰগ্গে।
Na atthapaṭisambhidāpattoti ettha attho nāma aṭṭhakathāyevādhippetāti āha ‘‘aṭṭhakathāyā’’ti. ‘‘Pabhedagatañāṇappatto’’ti iminā atthādīsu pati visuṃ sambhijjatīti paṭisambhidā, paññā, taṃ pattoti paṭisambhidāpatto. Atthe paṭisambhidāpatto atthapaṭisambhidāpattoti dasseti. ‘‘Pāḷidhamme’’ti iminā dhammapaṭisambhidāpattoti ettha dhammasarūpaṃ dasseti. Vohāraniruttiyanti paññattiniruttiyaṃ. Iminā niruttipaṭisambhidāpattoti ettha niruttisarūpaṃ dasseti. Paṭibhānapaṭisambhidāpattoti ettha paṭibhānaṃ nāma heṭṭhimañāṇattayamevāti āha ‘‘atthapaṭisambhidādīni ñāṇānī’’ti, tesūti ñāṇesu, yaṃ yaṃ vimuttaṃ yathāvimuttaṃ, cittaṃ. Paccavekkhitāti punappunaṃ olokitā. Sabbatthāti bhikkhunivagge.
ইতি ভিক্খুনোৰাদৰগ্গৰণ্ণনায যোজনা সমত্তা।
Iti bhikkhunovādavaggavaṇṇanāya yojanā samattā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ৮. ভিক্খুনোৰাদৰগ্গো • 8. Bhikkhunovādavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / ভিক্খুনোৰাদৰগ্গৰণ্ণনা • Bhikkhunovādavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ভিক্খুনোৰাদৰগ্গৰণ্ণনা • Bhikkhunovādavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ভিক্খুনোৰাদৰগ্গৰণ্ণনা • Bhikkhunovādavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৰোহারৰগ্গাদিৰণ্ণনা • Vohāravaggādivaṇṇanā
