| Library / Tipiṭaka / តិបិដក • Tipiṭaka / បរិវារ-អដ្ឋកថា • Parivāra-aṭṭhakathā |
ភិក្ខុនោវាទវគ្គវណ្ណនា
Bhikkhunovādavaggavaṇṇanā
៤៥០. ភិក្ខុនិវគ្គេ – អលាភាយាតិ ចតុន្នំ បច្ចយានំ អលាភត្ថាយ; យថា បច្ចយេ ន លភន្តិ, តថា បរិសក្កតិ វាយមតីតិ អត្ថោ។ អនត្ថាយាតិ អនត្ថំ កលិសាសនំ អារោបេន្តោ បរិសក្កតិ។ អវាសាយាតិ អវាសត្ថាយ; យស្មិំ គាមខេត្តេ វសន្តិ, តតោ នីហរណត្ថាយ។ សម្បយោជេតីតិ អសទ្ធម្មបដិសេវនត្ថាយ សម្បយោជេតិ។
450. Bhikkhunivagge – alābhāyāti catunnaṃ paccayānaṃ alābhatthāya; yathā paccaye na labhanti, tathā parisakkati vāyamatīti attho. Anatthāyāti anatthaṃ kalisāsanaṃ āropento parisakkati. Avāsāyāti avāsatthāya; yasmiṃ gāmakhette vasanti, tato nīharaṇatthāya. Sampayojetīti asaddhammapaṭisevanatthāya sampayojeti.
៤៥១. ‘‘កតិហិ នុ ខោ ភន្តេ អង្គេហិ សមន្នាគតាយ ភិក្ខុនិយា កម្មំ កាតព្ព’’ន្តិ សត្តន្នំ កម្មានំ អញ្ញតរំ សន្ធាយ បុច្ឆតិ។
451. ‘‘Katihi nu kho bhante aṅgehi samannāgatāya bhikkhuniyā kammaṃ kātabba’’nti sattannaṃ kammānaṃ aññataraṃ sandhāya pucchati.
៤៥៤. ន សាកច្ឆាតព្ពោតិ កប្បិយាកប្បិយនាមរូបបរិច្ឆេទសមថវិបស្សនាទិភេទោ កថាមគ្គោ ន កថេតព្ពោ។ យស្មា បន ខីណាសវោ ភិក្ខុ ន វិសំវាទេតិ, តថារូបស្ស កថាមគ្គស្ស សាមី ហុត្វា កថេតិ, ន ឥតរោ; តស្មា បឋមបញ្ចកេ ‘‘ន អសេក្ខេនា’’តិ បដិក្ខិបិត្វា ទុតិយបញ្ចកេ ‘‘អសេក្ខេនា’’តិអាទិ វុត្តំ។
454.Na sākacchātabboti kappiyākappiyanāmarūpaparicchedasamathavipassanādibhedo kathāmaggo na kathetabbo. Yasmā pana khīṇāsavo bhikkhu na visaṃvādeti, tathārūpassa kathāmaggassa sāmī hutvā katheti, na itaro; tasmā paṭhamapañcake ‘‘na asekkhenā’’ti paṭikkhipitvā dutiyapañcake ‘‘asekkhenā’’tiādi vuttaṃ.
ន អត្ថបដិសម្ភិទាបត្តោតិ អដ្ឋកថាយ បដិសម្ភិទាបត្តោ បភេទគតញាណប្បត្តោ ន ហោតិ។ ន ធម្មបដិសម្ភិទាបត្តោតិ បាឡិធម្មេ បដិសម្ភិទាបត្តោ ន ហោតិ។ ន និរុត្តិបដិសម្ភិទាបត្តោតិ វោហារនិរុត្តិយំ បដិសម្ភិទាបត្តោ ន ហោតិ។ ន បដិភានបដិសម្ភិទាបត្តោតិ យានិ តានិ បដិភានសង្ខាតានិ អត្ថបដិសម្ភិទាទីនិ ញាណានិ, តេសុ បដិសម្ភិទាបត្តោ ន ហោតិ។ យថាវិមុត្តំ ចិត្តំ ន បច្ចវេក្ខិតាតិ ចតុន្នំ ផលវិមុត្តីនំ វសេន យថាវិមុត្តំ ចិត្តំ ឯកូនវីសតិភេទាយ បច្ចវេក្ខណាយ ន បច្ចវេក្ខិតា ហោតិ។ សេសំ សព្ពត្ថ ឧត្តានមេវាតិ។
Na atthapaṭisambhidāpattoti aṭṭhakathāya paṭisambhidāpatto pabhedagatañāṇappatto na hoti. Na dhammapaṭisambhidāpattoti pāḷidhamme paṭisambhidāpatto na hoti. Na niruttipaṭisambhidāpattoti vohāraniruttiyaṃ paṭisambhidāpatto na hoti. Na paṭibhānapaṭisambhidāpattoti yāni tāni paṭibhānasaṅkhātāni atthapaṭisambhidādīni ñāṇāni, tesu paṭisambhidāpatto na hoti. Yathāvimuttaṃcittaṃ na paccavekkhitāti catunnaṃ phalavimuttīnaṃ vasena yathāvimuttaṃ cittaṃ ekūnavīsatibhedāya paccavekkhaṇāya na paccavekkhitā hoti. Sesaṃ sabbattha uttānamevāti.
ភិក្ខុនោវាទវគ្គវណ្ណនា និដ្ឋិតា។
Bhikkhunovādavaggavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / បរិវារបាឡិ • Parivārapāḷi / ៨. ភិក្ខុនោវាទវគ្គោ • 8. Bhikkhunovādavaggo
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ភិក្ខុនោវាទវគ្គវណ្ណនា • Bhikkhunovādavaggavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ភិក្ខុនោវាទវគ្គវណ្ណនា • Bhikkhunovādavaggavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / វោហារវគ្គាទិវណ្ណនា • Vohāravaggādivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ភិក្ខុនោវាទវគ្គវណ្ណនា • Bhikkhunovādavaggavaṇṇanā
