| Library / Tipiṭaka / තිපිටක • Tipiṭaka / පරිවාර-අට්‌ඨකථා • Parivāra-aṭṭhakathā |
භික්‌ඛුනොවාදවග්‌ගවණ්‌ණනා
Bhikkhunovādavaggavaṇṇanā
450. භික්‌ඛුනිවග්‌ගෙ – අලාභායාති චතුන්‌නං පච්‌චයානං අලාභත්‌ථාය; යථා පච්‌චයෙ න ලභන්‌ති, තථා පරිසක්‌කති වායමතීති අත්‌ථො. අනත්‌ථායාති අනත්‌ථං කලිසාසනං ආරොපෙන්‌තො පරිසක්‌කති. අවාසායාති අවාසත්‌ථාය; යස්‌මිං ගාමඛෙත්‌තෙ වසන්‌ති, තතො නීහරණත්‌ථාය. සම්‌පයොජෙතීති අසද්‌ධම්‌මපටිසෙවනත්‌ථාය සම්‌පයොජෙති.
450. Bhikkhunivagge – alābhāyāti catunnaṃ paccayānaṃ alābhatthāya; yathā paccaye na labhanti, tathā parisakkati vāyamatīti attho. Anatthāyāti anatthaṃ kalisāsanaṃ āropento parisakkati. Avāsāyāti avāsatthāya; yasmiṃ gāmakhette vasanti, tato nīharaṇatthāya. Sampayojetīti asaddhammapaṭisevanatthāya sampayojeti.
451. ‘‘කතිහි නු ඛො භන්‌තෙ අඞ්‌ගෙහි සමන්‌නාගතාය භික්‌ඛුනියා කම්‌මං කාතබ්‌බ’’න්‌ති සත්‌තන්‌නං කම්‌මානං අඤ්‌ඤතරං සන්‌ධාය පුච්‌ඡති.
451. ‘‘Katihi nu kho bhante aṅgehi samannāgatāya bhikkhuniyā kammaṃ kātabba’’nti sattannaṃ kammānaṃ aññataraṃ sandhāya pucchati.
454. න සාකච්‌ඡාතබ්‌බොති කප්‌පියාකප්‌පියනාමරූපපරිච්‌ඡෙදසමථවිපස්‌සනාදිභෙදො කථාමග්‌ගො න කථෙතබ්‌බො. යස්‌මා පන ඛීණාසවො භික්‌ඛු න විසංවාදෙති, තථාරූපස්‌ස කථාමග්‌ගස්‌ස සාමී හුත්‌වා කථෙති, න ඉතරො; තස්‌මා පඨමපඤ්‌චකෙ ‘‘න අසෙක්‌ඛෙනා’’ති පටික්‌ඛිපිත්‌වා දුතියපඤ්‌චකෙ ‘‘අසෙක්‌ඛෙනා’’තිආදි වුත්‌තං.
454.Na sākacchātabboti kappiyākappiyanāmarūpaparicchedasamathavipassanādibhedo kathāmaggo na kathetabbo. Yasmā pana khīṇāsavo bhikkhu na visaṃvādeti, tathārūpassa kathāmaggassa sāmī hutvā katheti, na itaro; tasmā paṭhamapañcake ‘‘na asekkhenā’’ti paṭikkhipitvā dutiyapañcake ‘‘asekkhenā’’tiādi vuttaṃ.
න අත්‌ථපටිසම්‌භිදාපත්‌තොති අට්‌ඨකථාය පටිසම්‌භිදාපත්‌තො පභෙදගතඤාණප්‌පත්‌තො න හොති. න ධම්‌මපටිසම්‌භිදාපත්‌තොති පාළිධම්‌මෙ පටිසම්‌භිදාපත්‌තො න හොති. න නිරුත්‌තිපටිසම්‌භිදාපත්‌තොති වොහාරනිරුත්‌තියං පටිසම්‌භිදාපත්‌තො න හොති. න පටිභානපටිසම්‌භිදාපත්‌තොති යානි තානි පටිභානසඞ්‌ඛාතානි අත්‌ථපටිසම්‌භිදාදීනි ඤාණානි, තෙසු පටිසම්‌භිදාපත්‌තො න හොති. යථාවිමුත්‌තං චිත්‌තං න පච්‌චවෙක්‌ඛිතාති චතුන්‌නං ඵලවිමුත්‌තීනං වසෙන යථාවිමුත්‌තං චිත්‌තං එකූනවීසතිභෙදාය පච්‌චවෙක්‌ඛණාය න පච්‌චවෙක්‌ඛිතා හොති. සෙසං සබ්‌බත්‌ථ උත්‌තානමෙවාති.
Na atthapaṭisambhidāpattoti aṭṭhakathāya paṭisambhidāpatto pabhedagatañāṇappatto na hoti. Na dhammapaṭisambhidāpattoti pāḷidhamme paṭisambhidāpatto na hoti. Na niruttipaṭisambhidāpattoti vohāraniruttiyaṃ paṭisambhidāpatto na hoti. Na paṭibhānapaṭisambhidāpattoti yāni tāni paṭibhānasaṅkhātāni atthapaṭisambhidādīni ñāṇāni, tesu paṭisambhidāpatto na hoti. Yathāvimuttaṃcittaṃ na paccavekkhitāti catunnaṃ phalavimuttīnaṃ vasena yathāvimuttaṃ cittaṃ ekūnavīsatibhedāya paccavekkhaṇāya na paccavekkhitā hoti. Sesaṃ sabbattha uttānamevāti.
භික්‌ඛුනොවාදවග්‌ගවණ්‌ණනා නිට්‌ඨිතා.
Bhikkhunovādavaggavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi / 8. භික්‌ඛුනොවාදවග්‌ගො • 8. Bhikkhunovādavaggo
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / භික්‌ඛුනොවාදවග්‌ගවණ්‌ණනා • Bhikkhunovādavaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / භික්‌ඛුනොවාදවග්‌ගවණ්‌ණනා • Bhikkhunovādavaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / වොහාරවග්‌ගාදිවණ්‌ණනා • Vohāravaggādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / භික්‌ඛුනොවාදවග්‌ගවණ්‌ණනා • Bhikkhunovādavaggavaṇṇanā
