| Library / Tipiṭaka / තිපිටක • Tipiṭaka / පාචිත්‍යාදියොජනාපාළි • Pācityādiyojanāpāḷi |
භික්‌ඛුනොවාදවග්‌ගවණ්‌ණනා
Bhikkhunovādavaggavaṇṇanā
450. භික්‌ඛුනිවග්‌ගෙ අලාභායාති එත්‌ථ ලභධාතුයා කම්‌මං, සම්‌පදානවචනස්‌ස ච තදත්‌ථං දස්‌සෙන්‌තො ආහ ‘‘චතුන්‌නං පච්‌චයානං අලාභත්‌ථායා’’ති. ‘‘වායමතී’’ති ඉමිනා පරිසක්‌කතීති එත්‌ථ සක්‌කධාතුයා සමත්‌ථත්‌ථං පටික්‌ඛිපිත්‌වා වායමත්‌ථං දස්‌සෙති. කලිසාසනන්‌ති පාපපරාජයආණං. නීහරණත්‌ථායාති නිද්‌ධරිත්‌වා අපනයනත්‌ථාය.
450. Bhikkhunivagge alābhāyāti ettha labhadhātuyā kammaṃ, sampadānavacanassa ca tadatthaṃ dassento āha ‘‘catunnaṃ paccayānaṃ alābhatthāyā’’ti. ‘‘Vāyamatī’’ti iminā parisakkatīti ettha sakkadhātuyā samatthatthaṃ paṭikkhipitvā vāyamatthaṃ dasseti. Kalisāsananti pāpaparājayaāṇaṃ. Nīharaṇatthāyāti niddharitvā apanayanatthāya.
451. ‘‘කම්‌ම’’න්‌ති සාමඤ්‌ඤතො වුත්‌තත්‌තා ‘‘සත්‌තන්‌නං කම්‌මානං අඤ්‌ඤතර’’න්‌ති.
451. ‘‘Kamma’’nti sāmaññato vuttattā ‘‘sattannaṃ kammānaṃ aññatara’’nti.
454. න සාකච්‌ඡාතබ්‌බොති එත්‌ථ කො නාම කථාමග්‌ගො න සාකච්‌ඡාතබ්‌බො, නනු විනයොයෙවාති ආහ ‘‘කප්‌පියා…පෙ.… කථාමග්‌ගො’’ති. ‘‘න කථෙතබ්‌බො’’ති ඉමිනා කච්‌ඡසද්‌දස්‌ස කථධාතුයා නිප්‌ඵන්‌නභාවං දීපෙති. කස්‌මා පන පඨමපඤ්‌චකෙ ‘‘න අසෙක්‌ඛෙනා’’ති පටික්‌ඛිපිත්‌වා දුතියපඤ්‌චකෙ ‘‘අසෙක්‌ඛෙනා’’තිආදි වුත්‌තන්‌ති ආහ ‘‘යස්‌මා පනා’’තිආදි. ඉතරො පුථුජ්‌ජනො න කථෙතීති යොජනා.
454.Nasākacchātabboti ettha ko nāma kathāmaggo na sākacchātabbo, nanu vinayoyevāti āha ‘‘kappiyā…pe… kathāmaggo’’ti. ‘‘Na kathetabbo’’ti iminā kacchasaddassa kathadhātuyā nipphannabhāvaṃ dīpeti. Kasmā pana paṭhamapañcake ‘‘na asekkhenā’’ti paṭikkhipitvā dutiyapañcake ‘‘asekkhenā’’tiādi vuttanti āha ‘‘yasmā panā’’tiādi. Itaro puthujjano na kathetīti yojanā.
න අත්‌ථපටිසම්‌භිදාපත්‌තොති එත්‌ථ අත්‌ථො නාම අට්‌ඨකථායෙවාධිප්‌පෙතාති ආහ ‘‘අට්‌ඨකථායා’’ති. ‘‘පභෙදගතඤාණප්‌පත්‌තො’’ති ඉමිනා අත්‌ථාදීසු පති විසුං සම්‌භිජ්‌ජතීති පටිසම්‌භිදා, පඤ්‌ඤා, තං පත්‌තොති පටිසම්‌භිදාපත්‌තො . අත්‌ථෙ පටිසම්‌භිදාපත්‌තො අත්‌ථපටිසම්‌භිදාපත්‌තොති දස්‌සෙති. ‘‘පාළිධම්‌මෙ’’ති ඉමිනා ධම්‌මපටිසම්‌භිදාපත්‌තොති එත්‌ථ ධම්‌මසරූපං දස්‌සෙති. වොහාරනිරුත්‌තියන්‌ති පඤ්‌ඤත්‌තිනිරුත්‌තියං. ඉමිනා නිරුත්‌තිපටිසම්‌භිදාපත්‌තොති එත්‌ථ නිරුත්‌තිසරූපං දස්‌සෙති. පටිභානපටිසම්‌භිදාපත්‌තොති එත්‌ථ පටිභානං නාම හෙට්‌ඨිමඤාණත්‌තයමෙවාති ආහ ‘‘අත්‌ථපටිසම්‌භිදාදීනි ඤාණානී’’ති, තෙසූති ඤාණෙසු, යං යං විමුත්‌තං යථාවිමුත්‌තං, චිත්‌තං. පච්‌චවෙක්‌ඛිතාති පුනප්‌පුනං ඔලොකිතා. සබ්‌බත්‌ථාති භික්‌ඛුනිවග්‌ගෙ.
Na atthapaṭisambhidāpattoti ettha attho nāma aṭṭhakathāyevādhippetāti āha ‘‘aṭṭhakathāyā’’ti. ‘‘Pabhedagatañāṇappatto’’ti iminā atthādīsu pati visuṃ sambhijjatīti paṭisambhidā, paññā, taṃ pattoti paṭisambhidāpatto. Atthe paṭisambhidāpatto atthapaṭisambhidāpattoti dasseti. ‘‘Pāḷidhamme’’ti iminā dhammapaṭisambhidāpattoti ettha dhammasarūpaṃ dasseti. Vohāraniruttiyanti paññattiniruttiyaṃ. Iminā niruttipaṭisambhidāpattoti ettha niruttisarūpaṃ dasseti. Paṭibhānapaṭisambhidāpattoti ettha paṭibhānaṃ nāma heṭṭhimañāṇattayamevāti āha ‘‘atthapaṭisambhidādīni ñāṇānī’’ti, tesūti ñāṇesu, yaṃ yaṃ vimuttaṃ yathāvimuttaṃ, cittaṃ. Paccavekkhitāti punappunaṃ olokitā. Sabbatthāti bhikkhunivagge.
ඉති භික්‌ඛුනොවාදවග්‌ගවණ්‌ණනාය යොජනා සමත්‌තා.
Iti bhikkhunovādavaggavaṇṇanāya yojanā samattā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi / 8. භික්‌ඛුනොවාදවග්‌ගො • 8. Bhikkhunovādavaggo
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / පරිවාර-අට්‌ඨකථා • Parivāra-aṭṭhakathā / භික්‌ඛුනොවාදවග්‌ගවණ්‌ණනා • Bhikkhunovādavaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / භික්‌ඛුනොවාදවග්‌ගවණ්‌ණනා • Bhikkhunovādavaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / භික්‌ඛුනොවාදවග්‌ගවණ්‌ණනා • Bhikkhunovādavaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / වොහාරවග්‌ගාදිවණ්‌ණනා • Vohāravaggādivaṇṇanā
