| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
8. භික්‌ඛුනොවාදවග්‌ගො
8. Bhikkhunovādavaggo
450. ‘‘කතිහි නු ඛො, භන්‌තෙ, අඞ්‌ගෙහි සමන්‌නාගතස්‌ස භික්‌ඛුනො භික්‌ඛුනිසඞ්‌ඝෙනෙව කම්‌මං කාතබ්‌බ’’න්‌ති? ‘‘පඤ්‌චහුපාලි, අඞ්‌ගෙහි සමන්‌නාගතස්‌ස භික්‌ඛුනො භික්‌ඛුනිසඞ්‌ඝෙනෙව කම්‌මං කාතබ්‌බං, අවන්‌දියො සො භික්‌ඛු භික්‌ඛුනිසඞ්‌ඝෙන. කතමෙහි පඤ්‌චහි? විවරිත්‌වා කායං භික්‌ඛුනීනං දස්‌සෙති, ඌරුං දස්‌සෙති, අඞ්‌ගජාතං දස්‌සෙති, උභො අංසකූටෙ දස්‌සෙති, ඔභාසති, ගිහී සම්‌පයොජෙති – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතස්‌ස භික්‌ඛුනො භික්‌ඛුනිසඞ්‌ඝෙනෙව කම්‌මං කාතබ්‌බං. අවන්‌දියො සො භික්‌ඛු භික්‌ඛුනිසඞ්‌ඝෙන.
450. ‘‘Katihi nu kho, bhante, aṅgehi samannāgatassa bhikkhuno bhikkhunisaṅgheneva kammaṃ kātabba’’nti? ‘‘Pañcahupāli, aṅgehi samannāgatassa bhikkhuno bhikkhunisaṅgheneva kammaṃ kātabbaṃ, avandiyo so bhikkhu bhikkhunisaṅghena. Katamehi pañcahi? Vivaritvā kāyaṃ bhikkhunīnaṃ dasseti, ūruṃ dasseti, aṅgajātaṃ dasseti, ubho aṃsakūṭe dasseti, obhāsati, gihī sampayojeti – imehi kho, upāli, pañcahaṅgehi samannāgatassa bhikkhuno bhikkhunisaṅgheneva kammaṃ kātabbaṃ. Avandiyo so bhikkhu bhikkhunisaṅghena.
‘‘අපරෙහිපි, උපාලි, පඤ්‌චහඞ්‌ගෙහි සමන්‌නාගතස්‌ස භික්‌ඛුනො භික්‌ඛුනිසඞ්‌ඝෙනෙව කම්‌මං කාතබ්‌බං, අවන්‌දියො සො භික්‌ඛු භික්‌ඛුනිසඞ්‌ඝෙන. කතමෙහි පඤ්‌චහි? භික්‌ඛුනීනං අලාභාය පරිසක්‌කති, භික්‌ඛුනීනං අනත්‌ථාය පරිසක්‌කති, භික්‌ඛුනීනං අවාසාය පරිසක්‌කති, භික්‌ඛුනියො අක්‌කොසති පරිභාසති, භික්‌ඛූ භික්‌ඛුනීහි භෙදෙති – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතස්‌ස භික්‌ඛුනො භික්‌ඛුනිසඞ්‌ඝෙනෙව කම්‌මං කාතබ්‌බං, අවන්‌දියො සො භික්‌ඛු භික්‌ඛුනිසඞ්‌ඝෙන.
‘‘Aparehipi, upāli, pañcahaṅgehi samannāgatassa bhikkhuno bhikkhunisaṅgheneva kammaṃ kātabbaṃ, avandiyo so bhikkhu bhikkhunisaṅghena. Katamehi pañcahi? Bhikkhunīnaṃ alābhāya parisakkati, bhikkhunīnaṃ anatthāya parisakkati, bhikkhunīnaṃ avāsāya parisakkati, bhikkhuniyo akkosati paribhāsati, bhikkhū bhikkhunīhi bhedeti – imehi kho, upāli, pañcahaṅgehi samannāgatassa bhikkhuno bhikkhunisaṅgheneva kammaṃ kātabbaṃ, avandiyo so bhikkhu bhikkhunisaṅghena.
‘‘අපරෙහිපි, උපාලි, පඤ්‌චහඞ්‌ගෙහි සමන්‌නාගතස්‌ස භික්‌ඛුනො භික්‌ඛුනිසඞ්‌ඝෙනෙව කම්‌මං කාතබ්‌බං, අවන්‌දියො සො භික්‌ඛු භික්‌ඛුනිසඞ්‌ඝෙන. කතමෙහි පඤ්‌චහි? භික්‌ඛුනීනං අලාභාය පරිසක්‌කති, භික්‌ඛුනීනං අනත්‌ථාය පරිසක්‌කති, භික්‌ඛුනීනං අවාසාය පරිසක්‌කති, භික්‌ඛුනියො අක්‌කොසති පරිභාසති, භික්‌ඛූ භික්‌ඛුනීහි සම්‌පයොජෙති – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතස්‌ස භික්‌ඛුනො භික්‌ඛුනිසඞ්‌ඝෙනෙව කම්‌මං කාතබ්‌බං, අවන්‌දියො සො භික්‌ඛු භික්‌ඛුනිසඞ්‌ඝෙනා’’ති.
‘‘Aparehipi, upāli, pañcahaṅgehi samannāgatassa bhikkhuno bhikkhunisaṅgheneva kammaṃ kātabbaṃ, avandiyo so bhikkhu bhikkhunisaṅghena. Katamehi pañcahi? Bhikkhunīnaṃ alābhāya parisakkati, bhikkhunīnaṃ anatthāya parisakkati, bhikkhunīnaṃ avāsāya parisakkati, bhikkhuniyo akkosati paribhāsati, bhikkhū bhikkhunīhi sampayojeti – imehi kho, upāli, pañcahaṅgehi samannāgatassa bhikkhuno bhikkhunisaṅgheneva kammaṃ kātabbaṃ, avandiyo so bhikkhu bhikkhunisaṅghenā’’ti.
451. ‘‘කතිහි නු ඛො, භන්‌තෙ, අඞ්‌ගෙහි සමන්‌නාගතාය භික්‌ඛුනියා කම්‌මං කාතබ්‌බ’’න්‌ති? පඤ්‌චහුපාලි, අඞ්‌ගෙහි සමන්‌නාගතාය භික්‌ඛුනියා කම්‌මං කාතබ්‌බං. කතමෙහි පඤ්‌චහි? විවරිත්‌වා කායං භික්‌ඛූනං දස්‌සෙති, ඌරුං දස්‌සෙති, අඞ්‌ගජාතං දස්‌සෙති, උභො අංසකූටෙ දස්‌සෙති, ඔභාසති, ගිහී සම්‌පයොජෙති – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතාය භික්‌ඛුනියා කම්‌මං කාතබ්‌බං.
451. ‘‘Katihi nu kho, bhante, aṅgehi samannāgatāya bhikkhuniyā kammaṃ kātabba’’nti? Pañcahupāli, aṅgehi samannāgatāya bhikkhuniyā kammaṃ kātabbaṃ. Katamehi pañcahi? Vivaritvā kāyaṃ bhikkhūnaṃ dasseti, ūruṃ dasseti, aṅgajātaṃ dasseti, ubho aṃsakūṭe dasseti, obhāsati, gihī sampayojeti – imehi kho, upāli, pañcahaṅgehi samannāgatāya bhikkhuniyā kammaṃ kātabbaṃ.
‘‘අපරෙහිපි , උපාලි, පඤ්‌චහඞ්‌ගෙහි සමන්‌නාගතාය භික්‌ඛුනියා කම්‌මං කාතබ්‌බං. කතමෙහි පඤ්‌චහි? භික්‌ඛූනං අලාභාය පරිසක්‌කති, භික්‌ඛූනං අනත්‌ථාය පරිසක්‌කති, භික්‌ඛූනං අවාසාය පරිසක්‌කති, භික්‌ඛූ අක්‌කොසති පරිභාසති, භික්‌ඛුනියො භික්‌ඛූහි භෙදෙති – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතාය භික්‌ඛුනියා කම්‌මං කාතබ්‌බං.
‘‘Aparehipi , upāli, pañcahaṅgehi samannāgatāya bhikkhuniyā kammaṃ kātabbaṃ. Katamehi pañcahi? Bhikkhūnaṃ alābhāya parisakkati, bhikkhūnaṃ anatthāya parisakkati, bhikkhūnaṃ avāsāya parisakkati, bhikkhū akkosati paribhāsati, bhikkhuniyo bhikkhūhi bhedeti – imehi kho, upāli, pañcahaṅgehi samannāgatāya bhikkhuniyā kammaṃ kātabbaṃ.
‘‘අපරෙහිපි, උපාලි, පඤ්‌චහඞ්‌ගෙහි සමන්‌නාගතාය භික්‌ඛුනියා කම්‌මං කාතබ්‌බං. කතමෙහි පඤ්‌චහි? භික්‌ඛූනං අලාභාය පරිසක්‌කති, භික්‌ඛූනං අනත්‌ථාය පරිසක්‌කති, භික්‌ඛූනං අවාසාය පරිසක්‌කති, භික්‌ඛූ අක්‌කොසති පරිභාසති, භික්‌ඛුනියො භික්‌ඛූහි සම්‌පයොජෙති – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතාය භික්‌ඛුනියා කම්‌මං කාතබ්‌බ’’න්‌ති.
‘‘Aparehipi, upāli, pañcahaṅgehi samannāgatāya bhikkhuniyā kammaṃ kātabbaṃ. Katamehi pañcahi? Bhikkhūnaṃ alābhāya parisakkati, bhikkhūnaṃ anatthāya parisakkati, bhikkhūnaṃ avāsāya parisakkati, bhikkhū akkosati paribhāsati, bhikkhuniyo bhikkhūhi sampayojeti – imehi kho, upāli, pañcahaṅgehi samannāgatāya bhikkhuniyā kammaṃ kātabba’’nti.
452. ‘‘කතිහි නු ඛො, භන්‌තෙ, අඞ්‌ගෙහි සමන්‌නාගතෙන භික්‌ඛුනා භික්‌ඛුනීනං ඔවාදො න ඨපෙතබ්‌බො’’ති? ‘‘පඤ්‌චහුපාලි, අඞ්‌ගෙහි සමන්‌නාගතෙන භික්‌ඛුනා භික්‌ඛුනීනං ඔවාදො න ඨපෙතබ්‌බො. කතමෙහි පඤ්‌චහි? අලජ්‌ජී ච හොති, බාලො ච, අපකතත්‌තො ච, චාවනාධිප්‌පායො වත්‌තා හොති, නො වුට්‌ඨානාධිප්‌පායො – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතෙන භික්‌ඛුනා භික්‌ඛුනීනං ඔවාදො න ඨපෙතබ්‌බො.
452. ‘‘Katihi nu kho, bhante, aṅgehi samannāgatena bhikkhunā bhikkhunīnaṃ ovādo na ṭhapetabbo’’ti? ‘‘Pañcahupāli, aṅgehi samannāgatena bhikkhunā bhikkhunīnaṃ ovādo na ṭhapetabbo. Katamehi pañcahi? Alajjī ca hoti, bālo ca, apakatatto ca, cāvanādhippāyo vattā hoti, no vuṭṭhānādhippāyo – imehi kho, upāli, pañcahaṅgehi samannāgatena bhikkhunā bhikkhunīnaṃ ovādo na ṭhapetabbo.
‘‘අපරෙහිපි, උපාලි, පඤ්‌චහඞ්‌ගෙහි සමන්‌නාගතෙන භික්‌ඛුනා භික්‌ඛුනීනං ඔවාදො න ඨපෙතබ්‌බො. කතමෙහි පඤ්‌චහි? අපරිසුද්‌ධකායසමාචාරො හොති, අපරිසුද්‌ධවචීසමාචාරො හොති, අපරිසුද්‌ධාජීවො හොති, බාලො හොති, අබ්‍යත්‌තො, න පටිබලො අනුයුඤ්‌ජියමානො අනුයොගං දාතුං – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතෙන භික්‌ඛුනා භික්‌ඛුනීනං ඔවාදො න ඨපෙතබ්‌බො.
‘‘Aparehipi, upāli, pañcahaṅgehi samannāgatena bhikkhunā bhikkhunīnaṃ ovādo na ṭhapetabbo. Katamehi pañcahi? Aparisuddhakāyasamācāro hoti, aparisuddhavacīsamācāro hoti, aparisuddhājīvo hoti, bālo hoti, abyatto, na paṭibalo anuyuñjiyamāno anuyogaṃ dātuṃ – imehi kho, upāli, pañcahaṅgehi samannāgatena bhikkhunā bhikkhunīnaṃ ovādo na ṭhapetabbo.
‘‘අපරෙහිපි, උපාලි, පඤ්‌චහඞ්‌ගෙහි සමන්‌නාගතෙන භික්‌ඛුනා භික්‌ඛුනීනං ඔවාදො න ඨපෙතබ්‌බො. කතමෙහි පඤ්‌චහි? කායිකෙන අනාචාරෙන සමන්‌නාගතො හොති, වාචසිකෙන අනාචාරෙන සමන්‌නාගතො හොති, කායිකවාචසිකෙන අනාචාරෙන සමන්‌නාගතො හොති, භික්‌ඛුනීනං අක්‌කොසකපරිභාසකො හොති, භික්‌ඛුනීහි සද්‌ධිං සංසට්‌ඨො විහරති අනනුලොමිකෙන සංසග්‌ගෙන – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතෙන භික්‌ඛුනා භික්‌ඛුනීනං ඔවාදො න ඨපෙතබ්‌බො.
‘‘Aparehipi, upāli, pañcahaṅgehi samannāgatena bhikkhunā bhikkhunīnaṃ ovādo na ṭhapetabbo. Katamehi pañcahi? Kāyikena anācārena samannāgato hoti, vācasikena anācārena samannāgato hoti, kāyikavācasikena anācārena samannāgato hoti, bhikkhunīnaṃ akkosakaparibhāsako hoti, bhikkhunīhi saddhiṃ saṃsaṭṭho viharati ananulomikena saṃsaggena – imehi kho, upāli, pañcahaṅgehi samannāgatena bhikkhunā bhikkhunīnaṃ ovādo na ṭhapetabbo.
‘‘අපරෙහිපි , උපාලි, පඤ්‌චහඞ්‌ගෙහි සමන්‌නාගතෙන භික්‌ඛුනා භික්‌ඛුනීනං ඔවාදො න ඨපෙතබ්‌බො. කතමෙහි පඤ්‌චහි? අලජ්‌ජී ච හොති, බාලො ච, අපකතත්‌තො ච, භණ්‌ඩනකාරකො ච හොති කලහකාරකො, සික්‌ඛාය ච න පරිපූරිකාරී – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතෙන භික්‌ඛුනා භික්‌ඛුනීනං ඔවාදො න ඨපෙතබ්‌බො’’ති.
‘‘Aparehipi , upāli, pañcahaṅgehi samannāgatena bhikkhunā bhikkhunīnaṃ ovādo na ṭhapetabbo. Katamehi pañcahi? Alajjī ca hoti, bālo ca, apakatatto ca, bhaṇḍanakārako ca hoti kalahakārako, sikkhāya ca na paripūrikārī – imehi kho, upāli, pañcahaṅgehi samannāgatena bhikkhunā bhikkhunīnaṃ ovādo na ṭhapetabbo’’ti.
453. ‘‘කතිහි නු ඛො, භන්‌තෙ, අඞ්‌ගෙහි සමන්‌නාගතෙන භික්‌ඛුනා භික්‌ඛුනීනං ඔවාදො න ගහෙතබ්‌බො’’ති? ‘‘පඤ්‌චහුපාලි, අඞ්‌ගෙහි සමන්‌නාගතෙන භික්‌ඛුනා භික්‌ඛුනීනං ඔවාදො න ගහෙතබ්‌බො. කතමෙහි පඤ්‌චහි? කායිකෙන අනාචාරෙන සමන්‌නාගතො හොති, වාචසිකෙන අනාචාරෙන සමන්‌නාගතො හොති, කායිකවාචසිකෙන අනාචාරෙන සමන්‌නාගතො හොති, භික්‌ඛුනීනං අක්‌කොසකපරිභාසකො හොති, භික්‌ඛුනීහි සද්‌ධිං සංසට්‌ඨො විහරති අනනුලොමිකෙන සංසග්‌ගෙන – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතෙන භික්‌ඛුනා භික්‌ඛුනීනං ඔවාදො න ගහෙතබ්‌බො.
453. ‘‘Katihi nu kho, bhante, aṅgehi samannāgatena bhikkhunā bhikkhunīnaṃ ovādo na gahetabbo’’ti? ‘‘Pañcahupāli, aṅgehi samannāgatena bhikkhunā bhikkhunīnaṃ ovādo na gahetabbo. Katamehi pañcahi? Kāyikena anācārena samannāgato hoti, vācasikena anācārena samannāgato hoti, kāyikavācasikena anācārena samannāgato hoti, bhikkhunīnaṃ akkosakaparibhāsako hoti, bhikkhunīhi saddhiṃ saṃsaṭṭho viharati ananulomikena saṃsaggena – imehi kho, upāli, pañcahaṅgehi samannāgatena bhikkhunā bhikkhunīnaṃ ovādo na gahetabbo.
‘‘අපරෙහිපි, උපාලි, පඤ්‌චහඞ්‌ගෙහි සමන්‌නාගතෙන භික්‌ඛුනා භික්‌ඛුනීනං ඔවාදො න ගහෙතබ්‌බො. කතමෙහි පඤ්‌චහි? අලජ්‌ජී ච හොති, බාලො ච, අපකතත්‌තො ච, ගමිකො වා හොති, ගිලානො වා – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතෙන භික්‌ඛුනා භික්‌ඛුනීනං ඔවාදො න ගහෙතබ්‌බො’’ති.
‘‘Aparehipi, upāli, pañcahaṅgehi samannāgatena bhikkhunā bhikkhunīnaṃ ovādo na gahetabbo. Katamehi pañcahi? Alajjī ca hoti, bālo ca, apakatatto ca, gamiko vā hoti, gilāno vā – imehi kho, upāli, pañcahaṅgehi samannāgatena bhikkhunā bhikkhunīnaṃ ovādo na gahetabbo’’ti.
454. ‘‘කතිහි නු ඛො, භන්‌තෙ, අඞ්‌ගෙහි සමන්‌නාගතෙන භික්‌ඛුනා සද්‌ධිං න සාකච්‌ඡිතබ්‌බො’’ති? ‘‘පඤ්‌චහුපාලි, අඞ්‌ගෙහි සමන්‌නාගතෙන භික්‌ඛුනා සද්‌ධිං න සාකච්‌ඡිතබ්‌බො. කතමෙහි පඤ්‌චහි? න අසෙක්‌ඛෙන සීලක්‌ඛන්‌ධෙන සමන්‌නාගතො හොති, න අසෙක්‌ඛෙන සමාධික්‌ඛන්‌ධෙන සමන්‌නාගතො හොති, න අසෙක්‌ඛෙන පඤ්‌ඤාක්‌ඛන්‌ධෙන සමන්‌නාගතො හොති, න අසෙක්‌ඛෙන විමුත්‌තික්‌ඛන්‌ධෙන සමන්‌නාගතො හොති, න අසෙක්‌ඛෙන විමුත්‌තිඤාණදස්‌සනක්‌ඛන්‌ධෙන සමන්‌නාගතො හොති – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතෙන භික්‌ඛුනා සද්‌ධිං න සාකච්‌ඡිතබ්‌බො. පඤ්‌චහුපාලි, අඞ්‌ගෙහි සමන්‌නාගතෙන භික්‌ඛුනා සද්‌ධිං සාකච්‌ඡිතබ්‌බො. කතමෙහි පඤ්‌චහි? අසෙක්‌ඛෙන සීලක්‌ඛන්‌ධෙන සමන්‌නාගතො හොති, අසෙක්‌ඛෙන සමාධික්‌ඛන්‌ධෙන සමන්‌නාගතො හොති, අසෙක්‌ඛෙන පඤ්‌ඤාක්‌ඛන්‌ධෙන සමන්‌නාගතො හොති , අසෙක්‌ඛෙන විමුත්‌තික්‌ඛන්‌ධෙන සමන්‌නාගතො හොති, අසෙක්‌ඛෙන විමුත්‌තිඤාණදස්‌සනක්‌ඛන්‌ධෙන සමන්‌නාගතො හොති – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතෙන භික්‌ඛුනා සද්‌ධිං සාකච්‌ඡිතබ්‌බො.
454. ‘‘Katihi nu kho, bhante, aṅgehi samannāgatena bhikkhunā saddhiṃ na sākacchitabbo’’ti? ‘‘Pañcahupāli, aṅgehi samannāgatena bhikkhunā saddhiṃ na sākacchitabbo. Katamehi pañcahi? Na asekkhena sīlakkhandhena samannāgato hoti, na asekkhena samādhikkhandhena samannāgato hoti, na asekkhena paññākkhandhena samannāgato hoti, na asekkhena vimuttikkhandhena samannāgato hoti, na asekkhena vimuttiñāṇadassanakkhandhena samannāgato hoti – imehi kho, upāli, pañcahaṅgehi samannāgatena bhikkhunā saddhiṃ na sākacchitabbo. Pañcahupāli, aṅgehi samannāgatena bhikkhunā saddhiṃ sākacchitabbo. Katamehi pañcahi? Asekkhena sīlakkhandhena samannāgato hoti, asekkhena samādhikkhandhena samannāgato hoti, asekkhena paññākkhandhena samannāgato hoti , asekkhena vimuttikkhandhena samannāgato hoti, asekkhena vimuttiñāṇadassanakkhandhena samannāgato hoti – imehi kho, upāli, pañcahaṅgehi samannāgatena bhikkhunā saddhiṃ sākacchitabbo.
‘‘අපරෙහිපි, උපාලි, පඤ්‌චහඞ්‌ගෙහි සමන්‌නාගතෙන භික්‌ඛුනා සද්‌ධිං න සාකච්‌ඡිතබ්‌බො. කතමෙහි පඤ්‌චහි? න අත්‌ථපටිසම්‌භිදාපත්‌තො හොති, න ධම්‌මපටිසම්‌භිදාපත්‌තො හොති, න නිරුත්‌තිපටිසම්‌භිදාපත්‌තො හොති, න පටිභානපටිසම්‌භිදාපත්‌තො හොති, යථාවිමුත්‌තං චිත්‌තං න පච්‌චවෙක්‌ඛිතා – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතෙන භික්‌ඛුනා සද්‌ධිං න සාකච්‌ඡිතබ්‌බො. පඤ්‌චහුපාලි , අඞ්‌ගෙහි සමන්‌නාගතෙන භික්‌ඛුනා සද්‌ධිං සාකච්‌ඡිතබ්‌බො. කතමෙහි පඤ්‌චහි? අත්‌ථපටිසම්‌භිදාපත්‌තො හොති, ධම්‌මපටිසම්‌භිදාපත්‌තො හොති, නිරුත්‌තිපටිසම්‌භිදාපත්‌තො හොති, පටිභානපටිසම්‌භිදාපත්‌තො හොති, යථාවිමුත්‌තං චිත්‌තං පච්‌චවෙක්‌ඛිතා – ඉමෙහි ඛො, උපාලි, පඤ්‌චහඞ්‌ගෙහි සමන්‌නාගතෙන භික්‌ඛුනා සද්‌ධිං සාකච්‌ඡිතබ්‌බො’’ති.
‘‘Aparehipi, upāli, pañcahaṅgehi samannāgatena bhikkhunā saddhiṃ na sākacchitabbo. Katamehi pañcahi? Na atthapaṭisambhidāpatto hoti, na dhammapaṭisambhidāpatto hoti, na niruttipaṭisambhidāpatto hoti, na paṭibhānapaṭisambhidāpatto hoti, yathāvimuttaṃ cittaṃ na paccavekkhitā – imehi kho, upāli, pañcahaṅgehi samannāgatena bhikkhunā saddhiṃ na sākacchitabbo. Pañcahupāli , aṅgehi samannāgatena bhikkhunā saddhiṃ sākacchitabbo. Katamehi pañcahi? Atthapaṭisambhidāpatto hoti, dhammapaṭisambhidāpatto hoti, niruttipaṭisambhidāpatto hoti, paṭibhānapaṭisambhidāpatto hoti, yathāvimuttaṃ cittaṃ paccavekkhitā – imehi kho, upāli, pañcahaṅgehi samannāgatena bhikkhunā saddhiṃ sākacchitabbo’’ti.
භික්‌ඛුනොවාදවග්‌ගො නිට්‌ඨිතො අට්‌ඨමො.
Bhikkhunovādavaggo niṭṭhito aṭṭhamo.
තස්‌සුද්‌දානං –
Tassuddānaṃ –
භික්‌ඛුනීහෙව කාතබ්‌බං, අපරෙහි තථා දුවෙ;
Bhikkhunīheva kātabbaṃ, aparehi tathā duve;
භික්‌ඛුනීනං තයො කම්‌මා, න ඨපෙතබ්‌බා ද්‌වෙ දුකා;
Bhikkhunīnaṃ tayo kammā, na ṭhapetabbā dve dukā;
න ගහෙතබ්‌බා ද්‌වෙ වුත්‌තා, සාකච්‌ඡාසු ච ද්‌වෙ දුකාති.
Na gahetabbā dve vuttā, sākacchāsu ca dve dukāti.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / පරිවාර-අට්‌ඨකථා • Parivāra-aṭṭhakathā / භික්‌ඛුනොවාදවග්‌ගවණ්‌ණනා • Bhikkhunovādavaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / භික්‌ඛුනොවාදවග්‌ගවණ්‌ණනා • Bhikkhunovādavaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / භික්‌ඛුනොවාදවග්‌ගවණ්‌ණනා • Bhikkhunovādavaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / වොහාරවග්‌ගාදිවණ්‌ණනා • Vohāravaggādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / භික්‌ඛුනොවාදවග්‌ගවණ්‌ණනා • Bhikkhunovādavaggavaṇṇanā
