| Library / Tipiṭaka / ཏིཔིཊཀ • Tipiṭaka / པརིཝཱརཔཱལི༹ • Parivārapāḷi |
༨. བྷིཀྑུནོཝཱདཝགྒོ
8. Bhikkhunovādavaggo
༤༥༠. ‘‘ཀཏིཧི ནུ ཁོ, བྷནྟེ, ཨངྒེཧི སམནྣཱགཏསྶ བྷིཀྑུནོ བྷིཀྑུནིསངྒྷེནེཝ ཀམྨཾ ཀཱཏབྦ’’ནྟི? ‘‘པཉྩཧུཔཱལི, ཨངྒེཧི སམནྣཱགཏསྶ བྷིཀྑུནོ བྷིཀྑུནིསངྒྷེནེཝ ཀམྨཾ ཀཱཏབྦཾ, ཨཝནྡིཡོ སོ བྷིཀྑུ བྷིཀྑུནིསངྒྷེན། ཀཏམེཧི པཉྩཧི? ཝིཝརིཏྭཱ ཀཱཡཾ བྷིཀྑུནཱིནཾ དསྶེཏི, ཨཱུརུཾ དསྶེཏི, ཨངྒཛཱཏཾ དསྶེཏི, ཨུབྷོ ཨཾསཀཱུཊེ དསྶེཏི, ཨོབྷཱསཏི, གིཧཱི སམྤཡོཛེཏི – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏསྶ བྷིཀྑུནོ བྷིཀྑུནིསངྒྷེནེཝ ཀམྨཾ ཀཱཏབྦཾ། ཨཝནྡིཡོ སོ བྷིཀྑུ བྷིཀྑུནིསངྒྷེན།
450. ‘‘Katihi nu kho, bhante, aṅgehi samannāgatassa bhikkhuno bhikkhunisaṅgheneva kammaṃ kātabba’’nti? ‘‘Pañcahupāli, aṅgehi samannāgatassa bhikkhuno bhikkhunisaṅgheneva kammaṃ kātabbaṃ, avandiyo so bhikkhu bhikkhunisaṅghena. Katamehi pañcahi? Vivaritvā kāyaṃ bhikkhunīnaṃ dasseti, ūruṃ dasseti, aṅgajātaṃ dasseti, ubho aṃsakūṭe dasseti, obhāsati, gihī sampayojeti – imehi kho, upāli, pañcahaṅgehi samannāgatassa bhikkhuno bhikkhunisaṅgheneva kammaṃ kātabbaṃ. Avandiyo so bhikkhu bhikkhunisaṅghena.
‘‘ཨཔརེཧིཔི, ཨུཔཱལི, པཉྩཧངྒེཧི སམནྣཱགཏསྶ བྷིཀྑུནོ བྷིཀྑུནིསངྒྷེནེཝ ཀམྨཾ ཀཱཏབྦཾ, ཨཝནྡིཡོ སོ བྷིཀྑུ བྷིཀྑུནིསངྒྷེན། ཀཏམེཧི པཉྩཧི? བྷིཀྑུནཱིནཾ ཨལཱབྷཱཡ པརིསཀྐཏི, བྷིཀྑུནཱིནཾ ཨནཏྠཱཡ པརིསཀྐཏི, བྷིཀྑུནཱིནཾ ཨཝཱསཱཡ པརིསཀྐཏི, བྷིཀྑུནིཡོ ཨཀྐོསཏི པརིབྷཱསཏི, བྷིཀྑཱུ བྷིཀྑུནཱིཧི བྷེདེཏི – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏསྶ བྷིཀྑུནོ བྷིཀྑུནིསངྒྷེནེཝ ཀམྨཾ ཀཱཏབྦཾ, ཨཝནྡིཡོ སོ བྷིཀྑུ བྷིཀྑུནིསངྒྷེན།
‘‘Aparehipi, upāli, pañcahaṅgehi samannāgatassa bhikkhuno bhikkhunisaṅgheneva kammaṃ kātabbaṃ, avandiyo so bhikkhu bhikkhunisaṅghena. Katamehi pañcahi? Bhikkhunīnaṃ alābhāya parisakkati, bhikkhunīnaṃ anatthāya parisakkati, bhikkhunīnaṃ avāsāya parisakkati, bhikkhuniyo akkosati paribhāsati, bhikkhū bhikkhunīhi bhedeti – imehi kho, upāli, pañcahaṅgehi samannāgatassa bhikkhuno bhikkhunisaṅgheneva kammaṃ kātabbaṃ, avandiyo so bhikkhu bhikkhunisaṅghena.
‘‘ཨཔརེཧིཔི, ཨུཔཱལི, པཉྩཧངྒེཧི སམནྣཱགཏསྶ བྷིཀྑུནོ བྷིཀྑུནིསངྒྷེནེཝ ཀམྨཾ ཀཱཏབྦཾ, ཨཝནྡིཡོ སོ བྷིཀྑུ བྷིཀྑུནིསངྒྷེན། ཀཏམེཧི པཉྩཧི? བྷིཀྑུནཱིནཾ ཨལཱབྷཱཡ པརིསཀྐཏི, བྷིཀྑུནཱིནཾ ཨནཏྠཱཡ པརིསཀྐཏི, བྷིཀྑུནཱིནཾ ཨཝཱསཱཡ པརིསཀྐཏི, བྷིཀྑུནིཡོ ཨཀྐོསཏི པརིབྷཱསཏི, བྷིཀྑཱུ བྷིཀྑུནཱིཧི སམྤཡོཛེཏི – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏསྶ བྷིཀྑུནོ བྷིཀྑུནིསངྒྷེནེཝ ཀམྨཾ ཀཱཏབྦཾ, ཨཝནྡིཡོ སོ བྷིཀྑུ བྷིཀྑུནིསངྒྷེནཱ’’ཏི།
‘‘Aparehipi, upāli, pañcahaṅgehi samannāgatassa bhikkhuno bhikkhunisaṅgheneva kammaṃ kātabbaṃ, avandiyo so bhikkhu bhikkhunisaṅghena. Katamehi pañcahi? Bhikkhunīnaṃ alābhāya parisakkati, bhikkhunīnaṃ anatthāya parisakkati, bhikkhunīnaṃ avāsāya parisakkati, bhikkhuniyo akkosati paribhāsati, bhikkhū bhikkhunīhi sampayojeti – imehi kho, upāli, pañcahaṅgehi samannāgatassa bhikkhuno bhikkhunisaṅgheneva kammaṃ kātabbaṃ, avandiyo so bhikkhu bhikkhunisaṅghenā’’ti.
༤༥༡. ‘‘ཀཏིཧི ནུ ཁོ, བྷནྟེ, ཨངྒེཧི སམནྣཱགཏཱཡ བྷིཀྑུནིཡཱ ཀམྨཾ ཀཱཏབྦ’’ནྟི? པཉྩཧུཔཱལི, ཨངྒེཧི སམནྣཱགཏཱཡ བྷིཀྑུནིཡཱ ཀམྨཾ ཀཱཏབྦཾ། ཀཏམེཧི པཉྩཧི? ཝིཝརིཏྭཱ ཀཱཡཾ བྷིཀྑཱུནཾ དསྶེཏི, ཨཱུརུཾ དསྶེཏི, ཨངྒཛཱཏཾ དསྶེཏི, ཨུབྷོ ཨཾསཀཱུཊེ དསྶེཏི, ཨོབྷཱསཏི, གིཧཱི སམྤཡོཛེཏི – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏཱཡ བྷིཀྑུནིཡཱ ཀམྨཾ ཀཱཏབྦཾ།
451. ‘‘Katihi nu kho, bhante, aṅgehi samannāgatāya bhikkhuniyā kammaṃ kātabba’’nti? Pañcahupāli, aṅgehi samannāgatāya bhikkhuniyā kammaṃ kātabbaṃ. Katamehi pañcahi? Vivaritvā kāyaṃ bhikkhūnaṃ dasseti, ūruṃ dasseti, aṅgajātaṃ dasseti, ubho aṃsakūṭe dasseti, obhāsati, gihī sampayojeti – imehi kho, upāli, pañcahaṅgehi samannāgatāya bhikkhuniyā kammaṃ kātabbaṃ.
‘‘ཨཔརེཧིཔི , ཨུཔཱལི, པཉྩཧངྒེཧི སམནྣཱགཏཱཡ བྷིཀྑུནིཡཱ ཀམྨཾ ཀཱཏབྦཾ། ཀཏམེཧི པཉྩཧི? བྷིཀྑཱུནཾ ཨལཱབྷཱཡ པརིསཀྐཏི, བྷིཀྑཱུནཾ ཨནཏྠཱཡ པརིསཀྐཏི, བྷིཀྑཱུནཾ ཨཝཱསཱཡ པརིསཀྐཏི, བྷིཀྑཱུ ཨཀྐོསཏི པརིབྷཱསཏི, བྷིཀྑུནིཡོ བྷིཀྑཱུཧི བྷེདེཏི – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏཱཡ བྷིཀྑུནིཡཱ ཀམྨཾ ཀཱཏབྦཾ།
‘‘Aparehipi , upāli, pañcahaṅgehi samannāgatāya bhikkhuniyā kammaṃ kātabbaṃ. Katamehi pañcahi? Bhikkhūnaṃ alābhāya parisakkati, bhikkhūnaṃ anatthāya parisakkati, bhikkhūnaṃ avāsāya parisakkati, bhikkhū akkosati paribhāsati, bhikkhuniyo bhikkhūhi bhedeti – imehi kho, upāli, pañcahaṅgehi samannāgatāya bhikkhuniyā kammaṃ kātabbaṃ.
‘‘ཨཔརེཧིཔི, ཨུཔཱལི, པཉྩཧངྒེཧི སམནྣཱགཏཱཡ བྷིཀྑུནིཡཱ ཀམྨཾ ཀཱཏབྦཾ། ཀཏམེཧི པཉྩཧི? བྷིཀྑཱུནཾ ཨལཱབྷཱཡ པརིསཀྐཏི, བྷིཀྑཱུནཾ ཨནཏྠཱཡ པརིསཀྐཏི, བྷིཀྑཱུནཾ ཨཝཱསཱཡ པརིསཀྐཏི, བྷིཀྑཱུ ཨཀྐོསཏི པརིབྷཱསཏི, བྷིཀྑུནིཡོ བྷིཀྑཱུཧི སམྤཡོཛེཏི – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏཱཡ བྷིཀྑུནིཡཱ ཀམྨཾ ཀཱཏབྦ’’ནྟི།
‘‘Aparehipi, upāli, pañcahaṅgehi samannāgatāya bhikkhuniyā kammaṃ kātabbaṃ. Katamehi pañcahi? Bhikkhūnaṃ alābhāya parisakkati, bhikkhūnaṃ anatthāya parisakkati, bhikkhūnaṃ avāsāya parisakkati, bhikkhū akkosati paribhāsati, bhikkhuniyo bhikkhūhi sampayojeti – imehi kho, upāli, pañcahaṅgehi samannāgatāya bhikkhuniyā kammaṃ kātabba’’nti.
༤༥༢. ‘‘ཀཏིཧི ནུ ཁོ, བྷནྟེ, ཨངྒེཧི སམནྣཱགཏེན བྷིཀྑུནཱ བྷིཀྑུནཱིནཾ ཨོཝཱདོ ན ཋཔེཏབྦོ’’ཏི? ‘‘པཉྩཧུཔཱལི, ཨངྒེཧི སམནྣཱགཏེན བྷིཀྑུནཱ བྷིཀྑུནཱིནཾ ཨོཝཱདོ ན ཋཔེཏབྦོ། ཀཏམེཧི པཉྩཧི? ཨལཛྫཱི ཙ ཧོཏི, བཱལོ ཙ, ཨཔཀཏཏྟོ ཙ, ཙཱཝནཱདྷིཔྤཱཡོ ཝཏྟཱ ཧོཏི, ནོ ཝུཊྛཱནཱདྷིཔྤཱཡོ – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏེན བྷིཀྑུནཱ བྷིཀྑུནཱིནཾ ཨོཝཱདོ ན ཋཔེཏབྦོ།
452. ‘‘Katihi nu kho, bhante, aṅgehi samannāgatena bhikkhunā bhikkhunīnaṃ ovādo na ṭhapetabbo’’ti? ‘‘Pañcahupāli, aṅgehi samannāgatena bhikkhunā bhikkhunīnaṃ ovādo na ṭhapetabbo. Katamehi pañcahi? Alajjī ca hoti, bālo ca, apakatatto ca, cāvanādhippāyo vattā hoti, no vuṭṭhānādhippāyo – imehi kho, upāli, pañcahaṅgehi samannāgatena bhikkhunā bhikkhunīnaṃ ovādo na ṭhapetabbo.
‘‘ཨཔརེཧིཔི, ཨུཔཱལི, པཉྩཧངྒེཧི སམནྣཱགཏེན བྷིཀྑུནཱ བྷིཀྑུནཱིནཾ ཨོཝཱདོ ན ཋཔེཏབྦོ། ཀཏམེཧི པཉྩཧི? ཨཔརིསུདྡྷཀཱཡསམཱཙཱརོ ཧོཏི, ཨཔརིསུདྡྷཝཙཱིསམཱཙཱརོ ཧོཏི, ཨཔརིསུདྡྷཱཛཱིཝོ ཧོཏི, བཱལོ ཧོཏི, ཨབྱཏྟོ, ན པཊིབལོ ཨནུཡུཉྫིཡམཱནོ ཨནུཡོགཾ དཱཏུཾ – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏེན བྷིཀྑུནཱ བྷིཀྑུནཱིནཾ ཨོཝཱདོ ན ཋཔེཏབྦོ།
‘‘Aparehipi, upāli, pañcahaṅgehi samannāgatena bhikkhunā bhikkhunīnaṃ ovādo na ṭhapetabbo. Katamehi pañcahi? Aparisuddhakāyasamācāro hoti, aparisuddhavacīsamācāro hoti, aparisuddhājīvo hoti, bālo hoti, abyatto, na paṭibalo anuyuñjiyamāno anuyogaṃ dātuṃ – imehi kho, upāli, pañcahaṅgehi samannāgatena bhikkhunā bhikkhunīnaṃ ovādo na ṭhapetabbo.
‘‘ཨཔརེཧིཔི, ཨུཔཱལི, པཉྩཧངྒེཧི སམནྣཱགཏེན བྷིཀྑུནཱ བྷིཀྑུནཱིནཾ ཨོཝཱདོ ན ཋཔེཏབྦོ། ཀཏམེཧི པཉྩཧི? ཀཱཡིཀེན ཨནཱཙཱརེན སམནྣཱགཏོ ཧོཏི, ཝཱཙསིཀེན ཨནཱཙཱརེན སམནྣཱགཏོ ཧོཏི, ཀཱཡིཀཝཱཙསིཀེན ཨནཱཙཱརེན སམནྣཱགཏོ ཧོཏི, བྷིཀྑུནཱིནཾ ཨཀྐོསཀཔརིབྷཱསཀོ ཧོཏི, བྷིཀྑུནཱིཧི སདྡྷིཾ སཾསཊྛོ ཝིཧརཏི ཨནནུལོམིཀེན སཾསགྒེན – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏེན བྷིཀྑུནཱ བྷིཀྑུནཱིནཾ ཨོཝཱདོ ན ཋཔེཏབྦོ།
‘‘Aparehipi, upāli, pañcahaṅgehi samannāgatena bhikkhunā bhikkhunīnaṃ ovādo na ṭhapetabbo. Katamehi pañcahi? Kāyikena anācārena samannāgato hoti, vācasikena anācārena samannāgato hoti, kāyikavācasikena anācārena samannāgato hoti, bhikkhunīnaṃ akkosakaparibhāsako hoti, bhikkhunīhi saddhiṃ saṃsaṭṭho viharati ananulomikena saṃsaggena – imehi kho, upāli, pañcahaṅgehi samannāgatena bhikkhunā bhikkhunīnaṃ ovādo na ṭhapetabbo.
‘‘ཨཔརེཧིཔི , ཨུཔཱལི, པཉྩཧངྒེཧི སམནྣཱགཏེན བྷིཀྑུནཱ བྷིཀྑུནཱིནཾ ཨོཝཱདོ ན ཋཔེཏབྦོ། ཀཏམེཧི པཉྩཧི? ཨལཛྫཱི ཙ ཧོཏི, བཱལོ ཙ, ཨཔཀཏཏྟོ ཙ, བྷཎྜནཀཱརཀོ ཙ ཧོཏི ཀལཧཀཱརཀོ, སིཀྑཱཡ ཙ ན པརིཔཱུརིཀཱརཱི – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏེན བྷིཀྑུནཱ བྷིཀྑུནཱིནཾ ཨོཝཱདོ ན ཋཔེཏབྦོ’’ཏི།
‘‘Aparehipi , upāli, pañcahaṅgehi samannāgatena bhikkhunā bhikkhunīnaṃ ovādo na ṭhapetabbo. Katamehi pañcahi? Alajjī ca hoti, bālo ca, apakatatto ca, bhaṇḍanakārako ca hoti kalahakārako, sikkhāya ca na paripūrikārī – imehi kho, upāli, pañcahaṅgehi samannāgatena bhikkhunā bhikkhunīnaṃ ovādo na ṭhapetabbo’’ti.
༤༥༣. ‘‘ཀཏིཧི ནུ ཁོ, བྷནྟེ, ཨངྒེཧི སམནྣཱགཏེན བྷིཀྑུནཱ བྷིཀྑུནཱིནཾ ཨོཝཱདོ ན གཧེཏབྦོ’’ཏི? ‘‘པཉྩཧུཔཱལི, ཨངྒེཧི སམནྣཱགཏེན བྷིཀྑུནཱ བྷིཀྑུནཱིནཾ ཨོཝཱདོ ན གཧེཏབྦོ། ཀཏམེཧི པཉྩཧི? ཀཱཡིཀེན ཨནཱཙཱརེན སམནྣཱགཏོ ཧོཏི, ཝཱཙསིཀེན ཨནཱཙཱརེན སམནྣཱགཏོ ཧོཏི, ཀཱཡིཀཝཱཙསིཀེན ཨནཱཙཱརེན སམནྣཱགཏོ ཧོཏི, བྷིཀྑུནཱིནཾ ཨཀྐོསཀཔརིབྷཱསཀོ ཧོཏི, བྷིཀྑུནཱིཧི སདྡྷིཾ སཾསཊྛོ ཝིཧརཏི ཨནནུལོམིཀེན སཾསགྒེན – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏེན བྷིཀྑུནཱ བྷིཀྑུནཱིནཾ ཨོཝཱདོ ན གཧེཏབྦོ།
453. ‘‘Katihi nu kho, bhante, aṅgehi samannāgatena bhikkhunā bhikkhunīnaṃ ovādo na gahetabbo’’ti? ‘‘Pañcahupāli, aṅgehi samannāgatena bhikkhunā bhikkhunīnaṃ ovādo na gahetabbo. Katamehi pañcahi? Kāyikena anācārena samannāgato hoti, vācasikena anācārena samannāgato hoti, kāyikavācasikena anācārena samannāgato hoti, bhikkhunīnaṃ akkosakaparibhāsako hoti, bhikkhunīhi saddhiṃ saṃsaṭṭho viharati ananulomikena saṃsaggena – imehi kho, upāli, pañcahaṅgehi samannāgatena bhikkhunā bhikkhunīnaṃ ovādo na gahetabbo.
‘‘ཨཔརེཧིཔི, ཨུཔཱལི, པཉྩཧངྒེཧི སམནྣཱགཏེན བྷིཀྑུནཱ བྷིཀྑུནཱིནཾ ཨོཝཱདོ ན གཧེཏབྦོ། ཀཏམེཧི པཉྩཧི? ཨལཛྫཱི ཙ ཧོཏི, བཱལོ ཙ, ཨཔཀཏཏྟོ ཙ, གམིཀོ ཝཱ ཧོཏི, གིལཱནོ ཝཱ – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏེན བྷིཀྑུནཱ བྷིཀྑུནཱིནཾ ཨོཝཱདོ ན གཧེཏབྦོ’’ཏི།
‘‘Aparehipi, upāli, pañcahaṅgehi samannāgatena bhikkhunā bhikkhunīnaṃ ovādo na gahetabbo. Katamehi pañcahi? Alajjī ca hoti, bālo ca, apakatatto ca, gamiko vā hoti, gilāno vā – imehi kho, upāli, pañcahaṅgehi samannāgatena bhikkhunā bhikkhunīnaṃ ovādo na gahetabbo’’ti.
༤༥༤. ‘‘ཀཏིཧི ནུ ཁོ, བྷནྟེ, ཨངྒེཧི སམནྣཱགཏེན བྷིཀྑུནཱ སདྡྷིཾ ན སཱཀཙྪིཏབྦོ’’ཏི? ‘‘པཉྩཧུཔཱལི, ཨངྒེཧི སམནྣཱགཏེན བྷིཀྑུནཱ སདྡྷིཾ ན སཱཀཙྪིཏབྦོ། ཀཏམེཧི པཉྩཧི? ན ཨསེཀྑེན སཱིལཀྑནྡྷེན སམནྣཱགཏོ ཧོཏི, ན ཨསེཀྑེན སམཱདྷིཀྑནྡྷེན སམནྣཱགཏོ ཧོཏི, ན ཨསེཀྑེན པཉྙཱཀྑནྡྷེན སམནྣཱགཏོ ཧོཏི, ན ཨསེཀྑེན ཝིམུཏྟིཀྑནྡྷེན སམནྣཱགཏོ ཧོཏི, ན ཨསེཀྑེན ཝིམུཏྟིཉཱཎདསྶནཀྑནྡྷེན སམནྣཱགཏོ ཧོཏི – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏེན བྷིཀྑུནཱ སདྡྷིཾ ན སཱཀཙྪིཏབྦོ། པཉྩཧུཔཱལི, ཨངྒེཧི སམནྣཱགཏེན བྷིཀྑུནཱ སདྡྷིཾ སཱཀཙྪིཏབྦོ། ཀཏམེཧི པཉྩཧི? ཨསེཀྑེན སཱིལཀྑནྡྷེན སམནྣཱགཏོ ཧོཏི, ཨསེཀྑེན སམཱདྷིཀྑནྡྷེན སམནྣཱགཏོ ཧོཏི, ཨསེཀྑེན པཉྙཱཀྑནྡྷེན སམནྣཱགཏོ ཧོཏི , ཨསེཀྑེན ཝིམུཏྟིཀྑནྡྷེན སམནྣཱགཏོ ཧོཏི, ཨསེཀྑེན ཝིམུཏྟིཉཱཎདསྶནཀྑནྡྷེན སམནྣཱགཏོ ཧོཏི – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏེན བྷིཀྑུནཱ སདྡྷིཾ སཱཀཙྪིཏབྦོ།
454. ‘‘Katihi nu kho, bhante, aṅgehi samannāgatena bhikkhunā saddhiṃ na sākacchitabbo’’ti? ‘‘Pañcahupāli, aṅgehi samannāgatena bhikkhunā saddhiṃ na sākacchitabbo. Katamehi pañcahi? Na asekkhena sīlakkhandhena samannāgato hoti, na asekkhena samādhikkhandhena samannāgato hoti, na asekkhena paññākkhandhena samannāgato hoti, na asekkhena vimuttikkhandhena samannāgato hoti, na asekkhena vimuttiñāṇadassanakkhandhena samannāgato hoti – imehi kho, upāli, pañcahaṅgehi samannāgatena bhikkhunā saddhiṃ na sākacchitabbo. Pañcahupāli, aṅgehi samannāgatena bhikkhunā saddhiṃ sākacchitabbo. Katamehi pañcahi? Asekkhena sīlakkhandhena samannāgato hoti, asekkhena samādhikkhandhena samannāgato hoti, asekkhena paññākkhandhena samannāgato hoti , asekkhena vimuttikkhandhena samannāgato hoti, asekkhena vimuttiñāṇadassanakkhandhena samannāgato hoti – imehi kho, upāli, pañcahaṅgehi samannāgatena bhikkhunā saddhiṃ sākacchitabbo.
‘‘ཨཔརེཧིཔི, ཨུཔཱལི, པཉྩཧངྒེཧི སམནྣཱགཏེན བྷིཀྑུནཱ སདྡྷིཾ ན སཱཀཙྪིཏབྦོ། ཀཏམེཧི པཉྩཧི? ན ཨཏྠཔཊིསམྦྷིདཱཔཏྟོ ཧོཏི, ན དྷམྨཔཊིསམྦྷིདཱཔཏྟོ ཧོཏི, ན ནིརུཏྟིཔཊིསམྦྷིདཱཔཏྟོ ཧོཏི, ན པཊིབྷཱནཔཊིསམྦྷིདཱཔཏྟོ ཧོཏི, ཡཐཱཝིམུཏྟཾ ཙིཏྟཾ ན པཙྩཝེཀྑིཏཱ – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏེན བྷིཀྑུནཱ སདྡྷིཾ ན སཱཀཙྪིཏབྦོ། པཉྩཧུཔཱལི , ཨངྒེཧི སམནྣཱགཏེན བྷིཀྑུནཱ སདྡྷིཾ སཱཀཙྪིཏབྦོ། ཀཏམེཧི པཉྩཧི? ཨཏྠཔཊིསམྦྷིདཱཔཏྟོ ཧོཏི, དྷམྨཔཊིསམྦྷིདཱཔཏྟོ ཧོཏི, ནིརུཏྟིཔཊིསམྦྷིདཱཔཏྟོ ཧོཏི, པཊིབྷཱནཔཊིསམྦྷིདཱཔཏྟོ ཧོཏི, ཡཐཱཝིམུཏྟཾ ཙིཏྟཾ པཙྩཝེཀྑིཏཱ – ཨིམེཧི ཁོ, ཨུཔཱལི, པཉྩཧངྒེཧི སམནྣཱགཏེན བྷིཀྑུནཱ སདྡྷིཾ སཱཀཙྪིཏབྦོ’’ཏི།
‘‘Aparehipi, upāli, pañcahaṅgehi samannāgatena bhikkhunā saddhiṃ na sākacchitabbo. Katamehi pañcahi? Na atthapaṭisambhidāpatto hoti, na dhammapaṭisambhidāpatto hoti, na niruttipaṭisambhidāpatto hoti, na paṭibhānapaṭisambhidāpatto hoti, yathāvimuttaṃ cittaṃ na paccavekkhitā – imehi kho, upāli, pañcahaṅgehi samannāgatena bhikkhunā saddhiṃ na sākacchitabbo. Pañcahupāli , aṅgehi samannāgatena bhikkhunā saddhiṃ sākacchitabbo. Katamehi pañcahi? Atthapaṭisambhidāpatto hoti, dhammapaṭisambhidāpatto hoti, niruttipaṭisambhidāpatto hoti, paṭibhānapaṭisambhidāpatto hoti, yathāvimuttaṃ cittaṃ paccavekkhitā – imehi kho, upāli, pañcahaṅgehi samannāgatena bhikkhunā saddhiṃ sākacchitabbo’’ti.
བྷིཀྑུནོཝཱདཝགྒོ ནིཊྛིཏོ ཨཊྛམོ།
Bhikkhunovādavaggo niṭṭhito aṭṭhamo.
ཏསྶུདྡཱནཾ –
Tassuddānaṃ –
བྷིཀྑུནཱིཧེཝ ཀཱཏབྦཾ, ཨཔརེཧི ཏཐཱ དུཝེ།
Bhikkhunīheva kātabbaṃ, aparehi tathā duve;
བྷིཀྑུནཱིནཾ ཏཡོ ཀམྨཱ, ན ཋཔེཏབྦཱ དྭེ དུཀཱ།
Bhikkhunīnaṃ tayo kammā, na ṭhapetabbā dve dukā;
ན གཧེཏབྦཱ དྭེ ཝུཏྟཱ, སཱཀཙྪཱསུ ཙ དྭེ དུཀཱཏི༎
Na gahetabbā dve vuttā, sākacchāsu ca dve dukāti.
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / པརིཝཱར-ཨཊྛཀཐཱ • Parivāra-aṭṭhakathā / བྷིཀྑུནོཝཱདཝགྒཝཎྞནཱ • Bhikkhunovādavaggavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / བྷིཀྑུནོཝཱདཝགྒཝཎྞནཱ • Bhikkhunovādavaggavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / བྷིཀྑུནོཝཱདཝགྒཝཎྞནཱ • Bhikkhunovādavaggavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཝོཧཱརཝགྒཱདིཝཎྞནཱ • Vohāravaggādivaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / བྷིཀྑུནོཝཱདཝགྒཝཎྞནཱ • Bhikkhunovādavaggavaṇṇanā
