| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
৩. ভিক্খুনুপস্সযসিক্খাপদৰণ্ণনা
3. Bhikkhunupassayasikkhāpadavaṇṇanā
১৬২. ততিযসিক্খাপদে – অঞ্ঞত্র সমযা ওৰদতি আপত্তি পাচিত্তিযস্সাতিআদীসু অট্ঠহি গরুধম্মেহি ওৰদন্তস্সেৰ পাচিত্তিযং, অঞ্ঞেন ধম্মেন দুক্কটন্তি ৰেদিতব্বং। একতোউপসম্পন্নাযাতি ভিক্খুনিসঙ্ঘে উপসম্পন্নায, ভিক্খুসঙ্ঘে উপসম্পন্নায পন ওৰদতো পাচিত্তিযমেৰ। ইতো পরম্পি যত্থ যত্থ ‘‘একতোউপসম্পন্না’’তি ৰুচ্চতি, সব্বত্থ অযমেৰ অত্থো দট্ঠব্বো। সেসং উত্তানমেৰ।
162. Tatiyasikkhāpade – aññatra samayā ovadati āpatti pācittiyassātiādīsu aṭṭhahi garudhammehi ovadantasseva pācittiyaṃ, aññena dhammena dukkaṭanti veditabbaṃ. Ekatoupasampannāyāti bhikkhunisaṅghe upasampannāya, bhikkhusaṅghe upasampannāya pana ovadato pācittiyameva. Ito parampi yattha yattha ‘‘ekatoupasampannā’’ti vuccati, sabbattha ayameva attho daṭṭhabbo. Sesaṃ uttānameva.
কথিনসমুট্ঠানং – কাযৰাচতো, কাযৰাচাচিত্ততো চ সমুট্ঠাতি, কিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি।
Kathinasamuṭṭhānaṃ – kāyavācato, kāyavācācittato ca samuṭṭhāti, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
ভিক্খুনুপস্সযসিক্খাপদং ততিযং।
Bhikkhunupassayasikkhāpadaṃ tatiyaṃ.
ইদং পনেত্থ মহাপচ্চরিযং ৰুত্তং পকিণ্ণকং – অসম্মতো চে ভিক্খু অত্থঙ্গতে সূরিযে ভিক্খুনুপস্সযং উপসঙ্কমিত্ৰা অট্ঠহি গরুধম্মেহি ওৰদতি, তীণি পাচিত্তিযানি। অঞ্ঞেন ধম্মেন ওৰদতো দ্ৰে দুক্কটানি, একং পাচিত্তিযং। কথং? অসম্মতমূলকং দুক্কটং, উপস্সযং গন্ত্ৰা অঞ্ঞেন ধম্মেন ওৰদনমূলকং দুক্কটং, অত্থঙ্গতে সূরিযে ওৰদনমূলকং পাচিত্তিযন্তি। সম্মতস্স অত্থঙ্গতে সূরিযে তত্থ গন্ত্ৰা অট্ঠহি গরুধম্মেহি ওৰদন্তস্স একা অনাপত্তি, দ্ৰে পাচিত্তিযানি। কথং? সম্মতত্তা অনাপত্তি, অত্থঙ্গতে সূরিযে ওৰদনমূলকং একং, গন্ত্ৰা গরুধম্মেহি ওৰদনমূলকং একন্তি দ্ৰে পাচিত্তিযানি। তস্সেৰ অঞ্ঞেন ধম্মেন ওৰদতো একা অনাপত্তি, একং দুক্কটং, একং পাচিত্তিযং। কথং? সম্মতত্তা অনাপত্তি, গন্ত্ৰা অঞ্ঞেন ধম্মেন ওৰদনমূলকং দুক্কটং, অত্থঙ্গতে সূরিযে ওৰদনমূলকং পাচিত্তিযন্তি। দিৰা পন গন্ত্ৰা ওৰদতো সম্মতস্স চ অসম্মতস্স চ রত্তিং ওৰদনমূলকং একং পাচিত্তিযং অপনেত্ৰা অৰসেসা আপত্তানাপত্তিযো ৰেদিতব্বাতি।
Idaṃ panettha mahāpaccariyaṃ vuttaṃ pakiṇṇakaṃ – asammato ce bhikkhu atthaṅgate sūriye bhikkhunupassayaṃ upasaṅkamitvā aṭṭhahi garudhammehi ovadati, tīṇi pācittiyāni. Aññena dhammena ovadato dve dukkaṭāni, ekaṃ pācittiyaṃ. Kathaṃ? Asammatamūlakaṃ dukkaṭaṃ, upassayaṃ gantvā aññena dhammena ovadanamūlakaṃ dukkaṭaṃ, atthaṅgate sūriye ovadanamūlakaṃ pācittiyanti. Sammatassa atthaṅgate sūriye tattha gantvā aṭṭhahi garudhammehi ovadantassa ekā anāpatti, dve pācittiyāni. Kathaṃ? Sammatattā anāpatti, atthaṅgate sūriye ovadanamūlakaṃ ekaṃ, gantvā garudhammehi ovadanamūlakaṃ ekanti dve pācittiyāni. Tasseva aññena dhammena ovadato ekā anāpatti, ekaṃ dukkaṭaṃ, ekaṃ pācittiyaṃ. Kathaṃ? Sammatattā anāpatti, gantvā aññena dhammena ovadanamūlakaṃ dukkaṭaṃ, atthaṅgate sūriye ovadanamūlakaṃ pācittiyanti. Divā pana gantvā ovadato sammatassa ca asammatassa ca rattiṃ ovadanamūlakaṃ ekaṃ pācittiyaṃ apanetvā avasesā āpattānāpattiyo veditabbāti.
পকিণ্ণককথা নিট্ঠিতা।
Pakiṇṇakakathā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৩. ওৰাদৰগ্গো • 3. Ovādavaggo
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৩. ভিক্খুনুপস্সযসিক্খাপদৰণ্ণনা • 3. Bhikkhunupassayasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৩. ভিক্খুনুপস্সযসিক্খাপদৰণ্ণনা • 3. Bhikkhunupassayasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৩. ভিক্খুনুপস্সযসিক্খাপদৰণ্ণনা • 3. Bhikkhunupassayasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৩. ভিক্খুনুপস্সযসিক্খাপদং • 3. Bhikkhunupassayasikkhāpadaṃ
