| Library / Tipiṭaka / तिपिटक • Tipiṭaka / महाविभङ्ग-अट्ठकथा • Mahāvibhaṅga-aṭṭhakathā |
३. भिक्खुनुपस्सयसिक्खापदवण्णना
3. Bhikkhunupassayasikkhāpadavaṇṇanā
१६२. ततियसिक्खापदे – अञ्ञत्र समया ओवदति आपत्ति पाचित्तियस्सातिआदीसु अट्ठहि गरुधम्मेहि ओवदन्तस्सेव पाचित्तियं, अञ्ञेन धम्मेन दुक्कटन्ति वेदितब्बं। एकतोउपसम्पन्नायाति भिक्खुनिसङ्घे उपसम्पन्नाय, भिक्खुसङ्घे उपसम्पन्नाय पन ओवदतो पाचित्तियमेव। इतो परम्पि यत्थ यत्थ ‘‘एकतोउपसम्पन्ना’’ति वुच्चति, सब्बत्थ अयमेव अत्थो दट्ठब्बो। सेसं उत्तानमेव।
162. Tatiyasikkhāpade – aññatra samayā ovadati āpatti pācittiyassātiādīsu aṭṭhahi garudhammehi ovadantasseva pācittiyaṃ, aññena dhammena dukkaṭanti veditabbaṃ. Ekatoupasampannāyāti bhikkhunisaṅghe upasampannāya, bhikkhusaṅghe upasampannāya pana ovadato pācittiyameva. Ito parampi yattha yattha ‘‘ekatoupasampannā’’ti vuccati, sabbattha ayameva attho daṭṭhabbo. Sesaṃ uttānameva.
कथिनसमुट्ठानं – कायवाचतो, कायवाचाचित्ततो च समुट्ठाति, किरियं, नोसञ्ञाविमोक्खं, अचित्तकं, पण्णत्तिवज्जं, कायकम्मं, वचीकम्मं, तिचित्तं, तिवेदनन्ति।
Kathinasamuṭṭhānaṃ – kāyavācato, kāyavācācittato ca samuṭṭhāti, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
भिक्खुनुपस्सयसिक्खापदं ततियं।
Bhikkhunupassayasikkhāpadaṃ tatiyaṃ.
इदं पनेत्थ महापच्चरियं वुत्तं पकिण्णकं – असम्मतो चे भिक्खु अत्थङ्गते सूरिये भिक्खुनुपस्सयं उपसङ्कमित्वा अट्ठहि गरुधम्मेहि ओवदति, तीणि पाचित्तियानि। अञ्ञेन धम्मेन ओवदतो द्वे दुक्कटानि, एकं पाचित्तियं। कथं? असम्मतमूलकं दुक्कटं, उपस्सयं गन्त्वा अञ्ञेन धम्मेन ओवदनमूलकं दुक्कटं, अत्थङ्गते सूरिये ओवदनमूलकं पाचित्तियन्ति। सम्मतस्स अत्थङ्गते सूरिये तत्थ गन्त्वा अट्ठहि गरुधम्मेहि ओवदन्तस्स एका अनापत्ति, द्वे पाचित्तियानि। कथं? सम्मतत्ता अनापत्ति, अत्थङ्गते सूरिये ओवदनमूलकं एकं, गन्त्वा गरुधम्मेहि ओवदनमूलकं एकन्ति द्वे पाचित्तियानि। तस्सेव अञ्ञेन धम्मेन ओवदतो एका अनापत्ति, एकं दुक्कटं, एकं पाचित्तियं। कथं? सम्मतत्ता अनापत्ति, गन्त्वा अञ्ञेन धम्मेन ओवदनमूलकं दुक्कटं, अत्थङ्गते सूरिये ओवदनमूलकं पाचित्तियन्ति। दिवा पन गन्त्वा ओवदतो सम्मतस्स च असम्मतस्स च रत्तिं ओवदनमूलकं एकं पाचित्तियं अपनेत्वा अवसेसा आपत्तानापत्तियो वेदितब्बाति।
Idaṃ panettha mahāpaccariyaṃ vuttaṃ pakiṇṇakaṃ – asammato ce bhikkhu atthaṅgate sūriye bhikkhunupassayaṃ upasaṅkamitvā aṭṭhahi garudhammehi ovadati, tīṇi pācittiyāni. Aññena dhammena ovadato dve dukkaṭāni, ekaṃ pācittiyaṃ. Kathaṃ? Asammatamūlakaṃ dukkaṭaṃ, upassayaṃ gantvā aññena dhammena ovadanamūlakaṃ dukkaṭaṃ, atthaṅgate sūriye ovadanamūlakaṃ pācittiyanti. Sammatassa atthaṅgate sūriye tattha gantvā aṭṭhahi garudhammehi ovadantassa ekā anāpatti, dve pācittiyāni. Kathaṃ? Sammatattā anāpatti, atthaṅgate sūriye ovadanamūlakaṃ ekaṃ, gantvā garudhammehi ovadanamūlakaṃ ekanti dve pācittiyāni. Tasseva aññena dhammena ovadato ekā anāpatti, ekaṃ dukkaṭaṃ, ekaṃ pācittiyaṃ. Kathaṃ? Sammatattā anāpatti, gantvā aññena dhammena ovadanamūlakaṃ dukkaṭaṃ, atthaṅgate sūriye ovadanamūlakaṃ pācittiyanti. Divā pana gantvā ovadato sammatassa ca asammatassa ca rattiṃ ovadanamūlakaṃ ekaṃ pācittiyaṃ apanetvā avasesā āpattānāpattiyo veditabbāti.
पकिण्णककथा निट्ठिता।
Pakiṇṇakakathā niṭṭhitā.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महाविभङ्ग • Mahāvibhaṅga / ३. ओवादवग्गो • 3. Ovādavaggo
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / ३. भिक्खुनुपस्सयसिक्खापदवण्णना • 3. Bhikkhunupassayasikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / ३. भिक्खुनुपस्सयसिक्खापदवण्णना • 3. Bhikkhunupassayasikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / ३. भिक्खुनुपस्सयसिक्खापदवण्णना • 3. Bhikkhunupassayasikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / ३. भिक्खुनुपस्सयसिक्खापदं • 3. Bhikkhunupassayasikkhāpadaṃ
