| Library / Tipiṭaka / ติปิฎก • Tipiṭaka / มหาวิภงฺค-อฎฺฐกถา • Mahāvibhaṅga-aṭṭhakathā |
๓. ภิกฺขุนุปสฺสยสิกฺขาปทวณฺณนา
3. Bhikkhunupassayasikkhāpadavaṇṇanā
๑๖๒. ตติยสิกฺขาปเท – อญฺญตฺร สมยา โอวทติ อาปตฺติ ปาจิตฺติยสฺสาติอาทีสุ อฎฺฐหิ ครุธเมฺมหิ โอวทนฺตเสฺสว ปาจิตฺติยํ, อเญฺญน ธเมฺมน ทุกฺกฎนฺติ เวทิตพฺพํฯ เอกโตอุปสมฺปนฺนายาติ ภิกฺขุนิสเงฺฆ อุปสมฺปนฺนาย, ภิกฺขุสเงฺฆ อุปสมฺปนฺนาย ปน โอวทโต ปาจิตฺติยเมวฯ อิโต ปรมฺปิ ยตฺถ ยตฺถ ‘‘เอกโตอุปสมฺปนฺนา’’ติ วุจฺจติ, สพฺพตฺถ อยเมว อโตฺถ ทฎฺฐโพฺพฯ เสสํ อุตฺตานเมวฯ
162. Tatiyasikkhāpade – aññatra samayā ovadati āpatti pācittiyassātiādīsu aṭṭhahi garudhammehi ovadantasseva pācittiyaṃ, aññena dhammena dukkaṭanti veditabbaṃ. Ekatoupasampannāyāti bhikkhunisaṅghe upasampannāya, bhikkhusaṅghe upasampannāya pana ovadato pācittiyameva. Ito parampi yattha yattha ‘‘ekatoupasampannā’’ti vuccati, sabbattha ayameva attho daṭṭhabbo. Sesaṃ uttānameva.
กถินสมุฎฺฐานํ – กายวาจโต, กายวาจาจิตฺตโต จ สมุฎฺฐาติ, กิริยํ, โนสญฺญาวิโมกฺขํ, อจิตฺตกํ, ปณฺณตฺติวชฺชํ, กายกมฺมํ, วจีกมฺมํ, ติจิตฺตํ, ติเวทนนฺติฯ
Kathinasamuṭṭhānaṃ – kāyavācato, kāyavācācittato ca samuṭṭhāti, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
ภิกฺขุนุปสฺสยสิกฺขาปทํ ตติยํฯ
Bhikkhunupassayasikkhāpadaṃ tatiyaṃ.
อิทํ ปเนตฺถ มหาปจฺจริยํ วุตฺตํ ปกิณฺณกํ – อสมฺมโต เจ ภิกฺขุ อตฺถงฺคเต สูริเย ภิกฺขุนุปสฺสยํ อุปสงฺกมิตฺวา อฎฺฐหิ ครุธเมฺมหิ โอวทติ, ตีณิ ปาจิตฺติยานิฯ อเญฺญน ธเมฺมน โอวทโต เทฺว ทุกฺกฎานิ, เอกํ ปาจิตฺติยํฯ กถํ? อสมฺมตมูลกํ ทุกฺกฎํ, อุปสฺสยํ คนฺตฺวา อเญฺญน ธเมฺมน โอวทนมูลกํ ทุกฺกฎํ, อตฺถงฺคเต สูริเย โอวทนมูลกํ ปาจิตฺติยนฺติฯ สมฺมตสฺส อตฺถงฺคเต สูริเย ตตฺถ คนฺตฺวา อฎฺฐหิ ครุธเมฺมหิ โอวทนฺตสฺส เอกา อนาปตฺติ, เทฺว ปาจิตฺติยานิฯ กถํ? สมฺมตตฺตา อนาปตฺติ, อตฺถงฺคเต สูริเย โอวทนมูลกํ เอกํ, คนฺตฺวา ครุธเมฺมหิ โอวทนมูลกํ เอกนฺติ เทฺว ปาจิตฺติยานิฯ ตเสฺสว อเญฺญน ธเมฺมน โอวทโต เอกา อนาปตฺติ, เอกํ ทุกฺกฎํ, เอกํ ปาจิตฺติยํฯ กถํ? สมฺมตตฺตา อนาปตฺติ, คนฺตฺวา อเญฺญน ธเมฺมน โอวทนมูลกํ ทุกฺกฎํ, อตฺถงฺคเต สูริเย โอวทนมูลกํ ปาจิตฺติยนฺติฯ ทิวา ปน คนฺตฺวา โอวทโต สมฺมตสฺส จ อสมฺมตสฺส จ รตฺติํ โอวทนมูลกํ เอกํ ปาจิตฺติยํ อปเนตฺวา อวเสสา อาปตฺตานาปตฺติโย เวทิตพฺพาติฯ
Idaṃ panettha mahāpaccariyaṃ vuttaṃ pakiṇṇakaṃ – asammato ce bhikkhu atthaṅgate sūriye bhikkhunupassayaṃ upasaṅkamitvā aṭṭhahi garudhammehi ovadati, tīṇi pācittiyāni. Aññena dhammena ovadato dve dukkaṭāni, ekaṃ pācittiyaṃ. Kathaṃ? Asammatamūlakaṃ dukkaṭaṃ, upassayaṃ gantvā aññena dhammena ovadanamūlakaṃ dukkaṭaṃ, atthaṅgate sūriye ovadanamūlakaṃ pācittiyanti. Sammatassa atthaṅgate sūriye tattha gantvā aṭṭhahi garudhammehi ovadantassa ekā anāpatti, dve pācittiyāni. Kathaṃ? Sammatattā anāpatti, atthaṅgate sūriye ovadanamūlakaṃ ekaṃ, gantvā garudhammehi ovadanamūlakaṃ ekanti dve pācittiyāni. Tasseva aññena dhammena ovadato ekā anāpatti, ekaṃ dukkaṭaṃ, ekaṃ pācittiyaṃ. Kathaṃ? Sammatattā anāpatti, gantvā aññena dhammena ovadanamūlakaṃ dukkaṭaṃ, atthaṅgate sūriye ovadanamūlakaṃ pācittiyanti. Divā pana gantvā ovadato sammatassa ca asammatassa ca rattiṃ ovadanamūlakaṃ ekaṃ pācittiyaṃ apanetvā avasesā āpattānāpattiyo veditabbāti.
ปกิณฺณกกถา นิฎฺฐิตาฯ
Pakiṇṇakakathā niṭṭhitā.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / มหาวิภงฺค • Mahāvibhaṅga / ๓. โอวาทวโคฺค • 3. Ovādavaggo
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / ๓. ภิกฺขุนุปสฺสยสิกฺขาปทวณฺณนา • 3. Bhikkhunupassayasikkhāpadavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / ๓. ภิกฺขุนุปสฺสยสิกฺขาปทวณฺณนา • 3. Bhikkhunupassayasikkhāpadavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / ๓. ภิกฺขุนุปสฺสยสิกฺขาปทวณฺณนา • 3. Bhikkhunupassayasikkhāpadavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / ๓. ภิกฺขุนุปสฺสยสิกฺขาปทํ • 3. Bhikkhunupassayasikkhāpadaṃ
