| Library / Tipiṭaka / တိပိဋက • Tipiṭaka / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā |
၃. ဘိက္ခုနုပသ္သယသိက္ခာပဒဝဏ္ဏနာ
3. Bhikkhunupassayasikkhāpadavaṇṇanā
၁၆၂. တတိယသိက္ခာပဒေ – အညတ္ရ သမယာ ဩဝဒတိ အာပတ္တိ ပာစိတ္တိယသ္သာတိအာဒီသု အဋ္ဌဟိ ဂရုဓမ္မေဟိ ဩဝဒန္တသ္သေဝ ပာစိတ္တိယံ, အညေန ဓမ္မေန ဒုက္ကဋန္တိ ဝေဒိတဗ္ဗံ။ ဧကတောဥပသမ္ပန္နာယာတိ ဘိက္ခုနိသင္ဃေ ဥပသမ္ပန္နာယ, ဘိက္ခုသင္ဃေ ဥပသမ္ပန္နာယ ပန ဩဝဒတော ပာစိတ္တိယမေဝ။ ဣတော ပရမ္ပိ ယတ္ထ ယတ္ထ ‘‘ဧကတောဥပသမ္ပန္နာ’’တိ ဝုစ္စတိ, သဗ္ဗတ္ထ အယမေဝ အတ္ထော ဒဋ္ဌဗ္ဗော။ သေသံ ဥတ္တာနမေဝ။
162. Tatiyasikkhāpade – aññatra samayā ovadati āpatti pācittiyassātiādīsu aṭṭhahi garudhammehi ovadantasseva pācittiyaṃ, aññena dhammena dukkaṭanti veditabbaṃ. Ekatoupasampannāyāti bhikkhunisaṅghe upasampannāya, bhikkhusaṅghe upasampannāya pana ovadato pācittiyameva. Ito parampi yattha yattha ‘‘ekatoupasampannā’’ti vuccati, sabbattha ayameva attho daṭṭhabbo. Sesaṃ uttānameva.
ကထိနသမုဋ္ဌာနံ – ကာယဝာစတော, ကာယဝာစာစိတ္တတော စ သမုဋ္ဌာတိ, ကိရိယံ, နောသညာဝိမောက္ခံ, အစိတ္တကံ, ပဏ္ဏတ္တိဝဇ္ဇံ, ကာယကမ္မံ, ဝစီကမ္မံ, တိစိတ္တံ, တိဝေဒနန္တိ။
Kathinasamuṭṭhānaṃ – kāyavācato, kāyavācācittato ca samuṭṭhāti, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
ဘိက္ခုနုပသ္သယသိက္ခာပဒံ တတိယံ။
Bhikkhunupassayasikkhāpadaṃ tatiyaṃ.
ဣဒံ ပနေတ္ထ မဟာပစ္စရိယံ ဝုတ္တံ ပကိဏ္ဏကံ – အသမ္မတော စေ ဘိက္ခု အတ္ထင္ဂတေ သူရိယေ ဘိက္ခုနုပသ္သယံ ဥပသင္ကမိတ္ဝာ အဋ္ဌဟိ ဂရုဓမ္မေဟိ ဩဝဒတိ, တီဏိ ပာစိတ္တိယာနိ။ အညေန ဓမ္မေန ဩဝဒတော ဒ္ဝေ ဒုက္ကဋာနိ, ဧကံ ပာစိတ္တိယံ။ ကထံ? အသမ္မတမူလကံ ဒုက္ကဋံ, ဥပသ္သယံ ဂန္တ္ဝာ အညေန ဓမ္မေန ဩဝဒနမူလကံ ဒုက္ကဋံ, အတ္ထင္ဂတေ သူရိယေ ဩဝဒနမူလကံ ပာစိတ္တိယန္တိ။ သမ္မတသ္သ အတ္ထင္ဂတေ သူရိယေ တတ္ထ ဂန္တ္ဝာ အဋ္ဌဟိ ဂရုဓမ္မေဟိ ဩဝဒန္တသ္သ ဧကာ အနာပတ္တိ, ဒ္ဝေ ပာစိတ္တိယာနိ။ ကထံ? သမ္မတတ္တာ အနာပတ္တိ, အတ္ထင္ဂတေ သူရိယေ ဩဝဒနမူလကံ ဧကံ, ဂန္တ္ဝာ ဂရုဓမ္မေဟိ ဩဝဒနမူလကံ ဧကန္တိ ဒ္ဝေ ပာစိတ္တိယာနိ။ တသ္သေဝ အညေန ဓမ္မေန ဩဝဒတော ဧကာ အနာပတ္တိ, ဧကံ ဒုက္ကဋံ, ဧကံ ပာစိတ္တိယံ။ ကထံ? သမ္မတတ္တာ အနာပတ္တိ, ဂန္တ္ဝာ အညေန ဓမ္မေန ဩဝဒနမူလကံ ဒုက္ကဋံ, အတ္ထင္ဂတေ သူရိယေ ဩဝဒနမူလကံ ပာစိတ္တိယန္တိ။ ဒိဝာ ပန ဂန္တ္ဝာ ဩဝဒတော သမ္မတသ္သ စ အသမ္မတသ္သ စ ရတ္တိံ ဩဝဒနမူလကံ ဧကံ ပာစိတ္တိယံ အပနေတ္ဝာ အဝသေသာ အာပတ္တာနာပတ္တိယော ဝေဒိတဗ္ဗာတိ။
Idaṃ panettha mahāpaccariyaṃ vuttaṃ pakiṇṇakaṃ – asammato ce bhikkhu atthaṅgate sūriye bhikkhunupassayaṃ upasaṅkamitvā aṭṭhahi garudhammehi ovadati, tīṇi pācittiyāni. Aññena dhammena ovadato dve dukkaṭāni, ekaṃ pācittiyaṃ. Kathaṃ? Asammatamūlakaṃ dukkaṭaṃ, upassayaṃ gantvā aññena dhammena ovadanamūlakaṃ dukkaṭaṃ, atthaṅgate sūriye ovadanamūlakaṃ pācittiyanti. Sammatassa atthaṅgate sūriye tattha gantvā aṭṭhahi garudhammehi ovadantassa ekā anāpatti, dve pācittiyāni. Kathaṃ? Sammatattā anāpatti, atthaṅgate sūriye ovadanamūlakaṃ ekaṃ, gantvā garudhammehi ovadanamūlakaṃ ekanti dve pācittiyāni. Tasseva aññena dhammena ovadato ekā anāpatti, ekaṃ dukkaṭaṃ, ekaṃ pācittiyaṃ. Kathaṃ? Sammatattā anāpatti, gantvā aññena dhammena ovadanamūlakaṃ dukkaṭaṃ, atthaṅgate sūriye ovadanamūlakaṃ pācittiyanti. Divā pana gantvā ovadato sammatassa ca asammatassa ca rattiṃ ovadanamūlakaṃ ekaṃ pācittiyaṃ apanetvā avasesā āpattānāpattiyo veditabbāti.
ပကိဏ္ဏကကထာ နိဋ္ဌိတာ။
Pakiṇṇakakathā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၃. ဩဝာဒဝဂ္ဂော • 3. Ovādavaggo
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၃. ဘိက္ခုနုပသ္သယသိက္ခာပဒဝဏ္ဏနာ • 3. Bhikkhunupassayasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၃. ဘိက္ခုနုပသ္သယသိက္ခာပဒဝဏ္ဏနာ • 3. Bhikkhunupassayasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၃. ဘိက္ခုနုပသ္သယသိက္ခာပဒဝဏ္ဏနာ • 3. Bhikkhunupassayasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၃. ဘိက္ခုနုပသ္သယသိက္ခာပဒံ • 3. Bhikkhunupassayasikkhāpadaṃ
