| Library / Tipiṭaka / ತಿಪಿಟಕ • Tipiṭaka / ಮಹಾವಿಭಙ್ಗ-ಅಟ್ಠಕಥಾ • Mahāvibhaṅga-aṭṭhakathā |
೩. ಭಿಕ್ಖುನುಪಸ್ಸಯಸಿಕ್ಖಾಪದವಣ್ಣನಾ
3. Bhikkhunupassayasikkhāpadavaṇṇanā
೧೬೨. ತತಿಯಸಿಕ್ಖಾಪದೇ – ಅಞ್ಞತ್ರ ಸಮಯಾ ಓವದತಿ ಆಪತ್ತಿ ಪಾಚಿತ್ತಿಯಸ್ಸಾತಿಆದೀಸು ಅಟ್ಠಹಿ ಗರುಧಮ್ಮೇಹಿ ಓವದನ್ತಸ್ಸೇವ ಪಾಚಿತ್ತಿಯಂ, ಅಞ್ಞೇನ ಧಮ್ಮೇನ ದುಕ್ಕಟನ್ತಿ ವೇದಿತಬ್ಬಂ। ಏಕತೋಉಪಸಮ್ಪನ್ನಾಯಾತಿ ಭಿಕ್ಖುನಿಸಙ್ಘೇ ಉಪಸಮ್ಪನ್ನಾಯ, ಭಿಕ್ಖುಸಙ್ಘೇ ಉಪಸಮ್ಪನ್ನಾಯ ಪನ ಓವದತೋ ಪಾಚಿತ್ತಿಯಮೇವ। ಇತೋ ಪರಮ್ಪಿ ಯತ್ಥ ಯತ್ಥ ‘‘ಏಕತೋಉಪಸಮ್ಪನ್ನಾ’’ತಿ ವುಚ್ಚತಿ, ಸಬ್ಬತ್ಥ ಅಯಮೇವ ಅತ್ಥೋ ದಟ್ಠಬ್ಬೋ। ಸೇಸಂ ಉತ್ತಾನಮೇವ।
162. Tatiyasikkhāpade – aññatra samayā ovadati āpatti pācittiyassātiādīsu aṭṭhahi garudhammehi ovadantasseva pācittiyaṃ, aññena dhammena dukkaṭanti veditabbaṃ. Ekatoupasampannāyāti bhikkhunisaṅghe upasampannāya, bhikkhusaṅghe upasampannāya pana ovadato pācittiyameva. Ito parampi yattha yattha ‘‘ekatoupasampannā’’ti vuccati, sabbattha ayameva attho daṭṭhabbo. Sesaṃ uttānameva.
ಕಥಿನಸಮುಟ್ಠಾನಂ – ಕಾಯವಾಚತೋ, ಕಾಯವಾಚಾಚಿತ್ತತೋ ಚ ಸಮುಟ್ಠಾತಿ, ಕಿರಿಯಂ, ನೋಸಞ್ಞಾವಿಮೋಕ್ಖಂ, ಅಚಿತ್ತಕಂ, ಪಣ್ಣತ್ತಿವಜ್ಜಂ, ಕಾಯಕಮ್ಮಂ, ವಚೀಕಮ್ಮಂ, ತಿಚಿತ್ತಂ, ತಿವೇದನನ್ತಿ।
Kathinasamuṭṭhānaṃ – kāyavācato, kāyavācācittato ca samuṭṭhāti, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
ಭಿಕ್ಖುನುಪಸ್ಸಯಸಿಕ್ಖಾಪದಂ ತತಿಯಂ।
Bhikkhunupassayasikkhāpadaṃ tatiyaṃ.
ಇದಂ ಪನೇತ್ಥ ಮಹಾಪಚ್ಚರಿಯಂ ವುತ್ತಂ ಪಕಿಣ್ಣಕಂ – ಅಸಮ್ಮತೋ ಚೇ ಭಿಕ್ಖು ಅತ್ಥಙ್ಗತೇ ಸೂರಿಯೇ ಭಿಕ್ಖುನುಪಸ್ಸಯಂ ಉಪಸಙ್ಕಮಿತ್ವಾ ಅಟ್ಠಹಿ ಗರುಧಮ್ಮೇಹಿ ಓವದತಿ, ತೀಣಿ ಪಾಚಿತ್ತಿಯಾನಿ। ಅಞ್ಞೇನ ಧಮ್ಮೇನ ಓವದತೋ ದ್ವೇ ದುಕ್ಕಟಾನಿ, ಏಕಂ ಪಾಚಿತ್ತಿಯಂ। ಕಥಂ? ಅಸಮ್ಮತಮೂಲಕಂ ದುಕ್ಕಟಂ, ಉಪಸ್ಸಯಂ ಗನ್ತ್ವಾ ಅಞ್ಞೇನ ಧಮ್ಮೇನ ಓವದನಮೂಲಕಂ ದುಕ್ಕಟಂ, ಅತ್ಥಙ್ಗತೇ ಸೂರಿಯೇ ಓವದನಮೂಲಕಂ ಪಾಚಿತ್ತಿಯನ್ತಿ। ಸಮ್ಮತಸ್ಸ ಅತ್ಥಙ್ಗತೇ ಸೂರಿಯೇ ತತ್ಥ ಗನ್ತ್ವಾ ಅಟ್ಠಹಿ ಗರುಧಮ್ಮೇಹಿ ಓವದನ್ತಸ್ಸ ಏಕಾ ಅನಾಪತ್ತಿ, ದ್ವೇ ಪಾಚಿತ್ತಿಯಾನಿ। ಕಥಂ? ಸಮ್ಮತತ್ತಾ ಅನಾಪತ್ತಿ, ಅತ್ಥಙ್ಗತೇ ಸೂರಿಯೇ ಓವದನಮೂಲಕಂ ಏಕಂ, ಗನ್ತ್ವಾ ಗರುಧಮ್ಮೇಹಿ ಓವದನಮೂಲಕಂ ಏಕನ್ತಿ ದ್ವೇ ಪಾಚಿತ್ತಿಯಾನಿ। ತಸ್ಸೇವ ಅಞ್ಞೇನ ಧಮ್ಮೇನ ಓವದತೋ ಏಕಾ ಅನಾಪತ್ತಿ, ಏಕಂ ದುಕ್ಕಟಂ, ಏಕಂ ಪಾಚಿತ್ತಿಯಂ। ಕಥಂ? ಸಮ್ಮತತ್ತಾ ಅನಾಪತ್ತಿ, ಗನ್ತ್ವಾ ಅಞ್ಞೇನ ಧಮ್ಮೇನ ಓವದನಮೂಲಕಂ ದುಕ್ಕಟಂ, ಅತ್ಥಙ್ಗತೇ ಸೂರಿಯೇ ಓವದನಮೂಲಕಂ ಪಾಚಿತ್ತಿಯನ್ತಿ। ದಿವಾ ಪನ ಗನ್ತ್ವಾ ಓವದತೋ ಸಮ್ಮತಸ್ಸ ಚ ಅಸಮ್ಮತಸ್ಸ ಚ ರತ್ತಿಂ ಓವದನಮೂಲಕಂ ಏಕಂ ಪಾಚಿತ್ತಿಯಂ ಅಪನೇತ್ವಾ ಅವಸೇಸಾ ಆಪತ್ತಾನಾಪತ್ತಿಯೋ ವೇದಿತಬ್ಬಾತಿ।
Idaṃ panettha mahāpaccariyaṃ vuttaṃ pakiṇṇakaṃ – asammato ce bhikkhu atthaṅgate sūriye bhikkhunupassayaṃ upasaṅkamitvā aṭṭhahi garudhammehi ovadati, tīṇi pācittiyāni. Aññena dhammena ovadato dve dukkaṭāni, ekaṃ pācittiyaṃ. Kathaṃ? Asammatamūlakaṃ dukkaṭaṃ, upassayaṃ gantvā aññena dhammena ovadanamūlakaṃ dukkaṭaṃ, atthaṅgate sūriye ovadanamūlakaṃ pācittiyanti. Sammatassa atthaṅgate sūriye tattha gantvā aṭṭhahi garudhammehi ovadantassa ekā anāpatti, dve pācittiyāni. Kathaṃ? Sammatattā anāpatti, atthaṅgate sūriye ovadanamūlakaṃ ekaṃ, gantvā garudhammehi ovadanamūlakaṃ ekanti dve pācittiyāni. Tasseva aññena dhammena ovadato ekā anāpatti, ekaṃ dukkaṭaṃ, ekaṃ pācittiyaṃ. Kathaṃ? Sammatattā anāpatti, gantvā aññena dhammena ovadanamūlakaṃ dukkaṭaṃ, atthaṅgate sūriye ovadanamūlakaṃ pācittiyanti. Divā pana gantvā ovadato sammatassa ca asammatassa ca rattiṃ ovadanamūlakaṃ ekaṃ pācittiyaṃ apanetvā avasesā āpattānāpattiyo veditabbāti.
ಪಕಿಣ್ಣಕಕಥಾ ನಿಟ್ಠಿತಾ।
Pakiṇṇakakathā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಿಭಙ್ಗ • Mahāvibhaṅga / ೩. ಓವಾದವಗ್ಗೋ • 3. Ovādavaggo
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ೩. ಭಿಕ್ಖುನುಪಸ್ಸಯಸಿಕ್ಖಾಪದವಣ್ಣನಾ • 3. Bhikkhunupassayasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ೩. ಭಿಕ್ಖುನುಪಸ್ಸಯಸಿಕ್ಖಾಪದವಣ್ಣನಾ • 3. Bhikkhunupassayasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ೩. ಭಿಕ್ಖುನುಪಸ್ಸಯಸಿಕ್ಖಾಪದವಣ್ಣನಾ • 3. Bhikkhunupassayasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೩. ಭಿಕ್ಖುನುಪಸ್ಸಯಸಿಕ್ಖಾಪದಂ • 3. Bhikkhunupassayasikkhāpadaṃ
