| Library / Tipiṭaka / ཏིཔིཊཀ • Tipiṭaka / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā |
༣. བྷིཀྑུནུཔསྶཡསིཀྑཱཔདཝཎྞནཱ
3. Bhikkhunupassayasikkhāpadavaṇṇanā
༡༦༢. ཏཏིཡསིཀྑཱཔདེ – ཨཉྙཏྲ སམཡཱ ཨོཝདཏི ཨཱཔཏྟི པཱཙིཏྟིཡསྶཱཏིཨཱདཱིསུ ཨཊྛཧི གརུདྷམྨེཧི ཨོཝདནྟསྶེཝ པཱཙིཏྟིཡཾ, ཨཉྙེན དྷམྨེན དུཀྐཊནྟི ཝེདིཏབྦཾ། ཨེཀཏོཨུཔསམྤནྣཱཡཱཏི བྷིཀྑུནིསངྒྷེ ཨུཔསམྤནྣཱཡ, བྷིཀྑུསངྒྷེ ཨུཔསམྤནྣཱཡ པན ཨོཝདཏོ པཱཙིཏྟིཡམེཝ། ཨིཏོ པརམྤི ཡཏྠ ཡཏྠ ‘‘ཨེཀཏོཨུཔསམྤནྣཱ’’ཏི ཝུཙྩཏི, སབྦཏྠ ཨཡམེཝ ཨཏྠོ དཊྛབྦོ། སེསཾ ཨུཏྟཱནམེཝ།
162. Tatiyasikkhāpade – aññatra samayā ovadati āpatti pācittiyassātiādīsu aṭṭhahi garudhammehi ovadantasseva pācittiyaṃ, aññena dhammena dukkaṭanti veditabbaṃ. Ekatoupasampannāyāti bhikkhunisaṅghe upasampannāya, bhikkhusaṅghe upasampannāya pana ovadato pācittiyameva. Ito parampi yattha yattha ‘‘ekatoupasampannā’’ti vuccati, sabbattha ayameva attho daṭṭhabbo. Sesaṃ uttānameva.
ཀཐིནསམུཊྛཱནཾ – ཀཱཡཝཱཙཏོ, ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཾ, ནོསཉྙཱཝིམོཀྑཾ, ཨཙིཏྟཀཾ, པཎྞཏྟིཝཛྫཾ, ཀཱཡཀམྨཾ, ཝཙཱིཀམྨཾ, ཏིཙིཏྟཾ, ཏིཝེདནནྟི།
Kathinasamuṭṭhānaṃ – kāyavācato, kāyavācācittato ca samuṭṭhāti, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
བྷིཀྑུནུཔསྶཡསིཀྑཱཔདཾ ཏཏིཡཾ།
Bhikkhunupassayasikkhāpadaṃ tatiyaṃ.
ཨིདཾ པནེཏྠ མཧཱཔཙྩརིཡཾ ཝུཏྟཾ པཀིཎྞཀཾ – ཨསམྨཏོ ཙེ བྷིཀྑུ ཨཏྠངྒཏེ སཱུརིཡེ བྷིཀྑུནུཔསྶཡཾ ཨུཔསངྐམིཏྭཱ ཨཊྛཧི གརུདྷམྨེཧི ཨོཝདཏི, ཏཱིཎི པཱཙིཏྟིཡཱནི། ཨཉྙེན དྷམྨེན ཨོཝདཏོ དྭེ དུཀྐཊཱནི, ཨེཀཾ པཱཙིཏྟིཡཾ། ཀཐཾ? ཨསམྨཏམཱུལཀཾ དུཀྐཊཾ, ཨུཔསྶཡཾ གནྟྭཱ ཨཉྙེན དྷམྨེན ཨོཝདནམཱུལཀཾ དུཀྐཊཾ, ཨཏྠངྒཏེ སཱུརིཡེ ཨོཝདནམཱུལཀཾ པཱཙིཏྟིཡནྟི། སམྨཏསྶ ཨཏྠངྒཏེ སཱུརིཡེ ཏཏྠ གནྟྭཱ ཨཊྛཧི གརུདྷམྨེཧི ཨོཝདནྟསྶ ཨེཀཱ ཨནཱཔཏྟི, དྭེ པཱཙིཏྟིཡཱནི། ཀཐཾ? སམྨཏཏྟཱ ཨནཱཔཏྟི, ཨཏྠངྒཏེ སཱུརིཡེ ཨོཝདནམཱུལཀཾ ཨེཀཾ, གནྟྭཱ གརུདྷམྨེཧི ཨོཝདནམཱུལཀཾ ཨེཀནྟི དྭེ པཱཙིཏྟིཡཱནི། ཏསྶེཝ ཨཉྙེན དྷམྨེན ཨོཝདཏོ ཨེཀཱ ཨནཱཔཏྟི, ཨེཀཾ དུཀྐཊཾ, ཨེཀཾ པཱཙིཏྟིཡཾ། ཀཐཾ? སམྨཏཏྟཱ ཨནཱཔཏྟི, གནྟྭཱ ཨཉྙེན དྷམྨེན ཨོཝདནམཱུལཀཾ དུཀྐཊཾ, ཨཏྠངྒཏེ སཱུརིཡེ ཨོཝདནམཱུལཀཾ པཱཙིཏྟིཡནྟི། དིཝཱ པན གནྟྭཱ ཨོཝདཏོ སམྨཏསྶ ཙ ཨསམྨཏསྶ ཙ རཏྟིཾ ཨོཝདནམཱུལཀཾ ཨེཀཾ པཱཙིཏྟིཡཾ ཨཔནེཏྭཱ ཨཝསེསཱ ཨཱཔཏྟཱནཱཔཏྟིཡོ ཝེདིཏབྦཱཏི།
Idaṃ panettha mahāpaccariyaṃ vuttaṃ pakiṇṇakaṃ – asammato ce bhikkhu atthaṅgate sūriye bhikkhunupassayaṃ upasaṅkamitvā aṭṭhahi garudhammehi ovadati, tīṇi pācittiyāni. Aññena dhammena ovadato dve dukkaṭāni, ekaṃ pācittiyaṃ. Kathaṃ? Asammatamūlakaṃ dukkaṭaṃ, upassayaṃ gantvā aññena dhammena ovadanamūlakaṃ dukkaṭaṃ, atthaṅgate sūriye ovadanamūlakaṃ pācittiyanti. Sammatassa atthaṅgate sūriye tattha gantvā aṭṭhahi garudhammehi ovadantassa ekā anāpatti, dve pācittiyāni. Kathaṃ? Sammatattā anāpatti, atthaṅgate sūriye ovadanamūlakaṃ ekaṃ, gantvā garudhammehi ovadanamūlakaṃ ekanti dve pācittiyāni. Tasseva aññena dhammena ovadato ekā anāpatti, ekaṃ dukkaṭaṃ, ekaṃ pācittiyaṃ. Kathaṃ? Sammatattā anāpatti, gantvā aññena dhammena ovadanamūlakaṃ dukkaṭaṃ, atthaṅgate sūriye ovadanamūlakaṃ pācittiyanti. Divā pana gantvā ovadato sammatassa ca asammatassa ca rattiṃ ovadanamūlakaṃ ekaṃ pācittiyaṃ apanetvā avasesā āpattānāpattiyo veditabbāti.
པཀིཎྞཀཀཐཱ ནིཊྛིཏཱ།
Pakiṇṇakakathā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝིབྷངྒ • Mahāvibhaṅga / ༣. ཨོཝཱདཝགྒོ • 3. Ovādavaggo
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༣. བྷིཀྑུནུཔསྶཡསིཀྑཱཔདཝཎྞནཱ • 3. Bhikkhunupassayasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༣. བྷིཀྑུནུཔསྶཡསིཀྑཱཔདཝཎྞནཱ • 3. Bhikkhunupassayasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༣. བྷིཀྑུནུཔསྶཡསིཀྑཱཔདཝཎྞནཱ • 3. Bhikkhunupassayasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༣. བྷིཀྑུནུཔསྶཡསིཀྑཱཔདཾ • 3. Bhikkhunupassayasikkhāpadaṃ
