| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੧੦. ਭਿਕ੍ਖੁਨੁਪਸ੍ਸਯਸੁਤ੍ਤવਣ੍ਣਨਾ
10. Bhikkhunupassayasuttavaṇṇanā
੩੭੬. ਦਸਮੇ ਤੇਨੁਪਸਙ੍ਕਮੀਤਿ ਤਸ੍ਮਿਂ ਉਪਸ੍ਸਯੇ ਕਮ੍ਮਟ੍ਠਾਨਕਮ੍ਮਿਕਾ ਭਿਕ੍ਖੁਨਿਯੋ ਅਤ੍ਥਿ, ਤਾਸਂ ਉਸ੍ਸੁਕ੍ਕਾਪੇਤ੍વਾ ਕਮ੍ਮਟ੍ਠਾਨਂ ਕਥੇਸ੍ਸਾਮੀਤਿ ਉਪਸਙ੍ਕਮਿ। ਉਲ਼ਾਰਂ ਪੁਬ੍ਬੇਨਾਪਰਂ વਿਸੇਸਨ੍ਤਿ ਪੁਬ੍ਬવਿਸੇਸਤੋ ਅਪਰਂ ਉਲ਼ਾਰવਿਸੇਸਂ। ਤਤ੍ਥ ਮਹਾਭੂਤਪਰਿਗ੍ਗਹੋ ਪੁਬ੍ਬવਿਸੇਸੋ, ਉਪਾਦਾਰੂਪਪਰਿਗ੍ਗਹੋ ਅਪਰવਿਸੇਸੋ ਨਾਮ। ਤਥਾ ਸਕਲਰੂਪਪਰਿਗ੍ਗਹੋ ਪੁਬ੍ਬવਿਸੇਸੋ, ਅਰੂਪਪਰਿਗ੍ਗਹੋ ਅਪਰવਿਸੇਸੋ ਨਾਮ। ਰੂਪਾਰੂਪਪਰਿਗ੍ਗਹੋ ਪੁਬ੍ਬવਿਸੇਸੋ, ਪਚ੍ਚਯਪਰਿਗ੍ਗਹੋ ਅਪਰવਿਸੇਸੋ ਨਾਮ ਸਪ੍ਪਚ੍ਚਯਨਾਮਰੂਪਦਸ੍ਸਨਂ ਪੁਬ੍ਬવਿਸੇਸੋ, ਤਿਲਕ੍ਖਣਾਰੋਪਨਂ ਅਪਰવਿਸੇਸੋ ਨਾਮ। ਏવਂ ਪੁਬ੍ਬੇਨਾਪਰਂ ਉਲ਼ਾਰવਿਸੇਸਂ ਜਾਨਾਤੀਤਿ ਅਤ੍ਥੋ।
376. Dasame tenupasaṅkamīti tasmiṃ upassaye kammaṭṭhānakammikā bhikkhuniyo atthi, tāsaṃ ussukkāpetvā kammaṭṭhānaṃ kathessāmīti upasaṅkami. Uḷāraṃ pubbenāparaṃ visesanti pubbavisesato aparaṃ uḷāravisesaṃ. Tattha mahābhūtapariggaho pubbaviseso, upādārūpapariggaho aparaviseso nāma. Tathā sakalarūpapariggaho pubbaviseso, arūpapariggaho aparaviseso nāma. Rūpārūpapariggaho pubbaviseso, paccayapariggaho aparaviseso nāma sappaccayanāmarūpadassanaṃ pubbaviseso, tilakkhaṇāropanaṃ aparaviseso nāma. Evaṃ pubbenāparaṃ uḷāravisesaṃ jānātīti attho.
ਕਾਯਾਰਮ੍ਮਣੋਤਿ ਯਂ ਕਾਯਂ ਅਨੁਪਸ੍ਸਤਿ, ਤਮੇવ ਆਰਮ੍ਮਣਂ ਕਤ੍વਾ ਉਪ੍ਪਜ੍ਜਤਿ ਕਿਲੇਸਪਰਿਲ਼ਾਹੋ। ਬਹਿਦ੍ਧਾ વਾ ਚਿਤ੍ਤਂ વਿਕ੍ਖਿਪਤੀਤਿ ਬਹਿਦ੍ਧਾ વਾ ਪੁਥੁਤ੍ਤਾਰਮ੍ਮਣੇ ਚਿਤ੍ਤੁਪ੍ਪਾਦੋ વਿਕ੍ਖਿਪਤਿ। ਕਿਸ੍ਮਿਞ੍ਚਿਦੇવ ਪਸਾਦਨੀਯੇ ਨਿਮਿਤ੍ਤੇ ਚਿਤ੍ਤਂ ਪਣਿਦਹਿਤਬ੍ਬਨ੍ਤਿ ਏવਂ ਕਿਲੇਸਪਰਿਲ਼ਾਹੇ ਚ ਲੀਨਤ੍ਤੇ ਚ ਬਹਿਦ੍ਧਾવਿਕ੍ਖੇਪੇ ਚ ਉਪ੍ਪਨ੍ਨੇ ਕਿਲੇਸਾਨੁਰਞ੍ਜਿਤੇਨ ਨ વਤ੍ਤਿਤਬ੍ਬਂ, ਕਿਸ੍ਮਿਞ੍ਚਿਦੇવ ਪਸਾਦਨੀਯੇ ਪਸਾਦਾવਹੇ ਬੁਦ੍ਧਾਦੀਸੁ ਅਞ੍ਞਤਰਸ੍ਮਿਂ ਠਾਨੇ ਕਮ੍ਮਟ੍ਠਾਨਚਿਤ੍ਤਂ ਠਪੇਤਬ੍ਬਂ। ਚਿਤ੍ਤਂ ਸਮਾਧਿਯਤੀਤਿ ਆਰਮ੍ਮਣੇ ਸਮ੍ਮਾ ਆਧਿਯਤਿ ਸੁਟ੍ਠੁ ਠਪਿਤਂ ਠਪਿਯਤਿ। ਪਟਿਸਂਹਰਾਮੀਤਿ ਪਸਾਦਨੀਯਟ੍ਠਾਨਤੋ ਪਟਿਸਂਹਰਾਮਿ, ਮੂਲਕਮ੍ਮਟ੍ਠਾਨਾਭਿਮੁਖਂਯੇવ ਨਂ ਕਰੋਮੀਤਿ ਅਤ੍ਥੋ। ਸੋ ਪਟਿਸਂਹਰਤਿ ਚੇવਾਤਿ ਮੂਲਕਮ੍ਮਟ੍ਠਾਨਾਭਿਮੁਖਞ੍ਚ ਪੇਸੇਤਿ। ਨ ਚ વਿਤਕ੍ਕੇਤਿ ਨ ਚ વਿਚਾਰੇਤੀਤਿ ਕਿਲੇਸવਿਤਕ੍ਕਂ ਨ વਿਤਕ੍ਕੇਤਿ, ਕਿਲੇਸવਿਚਾਰਂ ਨ વਿਚਾਰੇਤਿ। ਅવਿਤਕ੍ਕੋਮ੍ਹਿ ਅવਿਚਾਰੋਤਿ ਕਿਲੇਸવਿਤਕ੍ਕવਿਚਾਰੇਹਿ ਅવਿਤਕ੍ਕਾવਿਚਾਰੋ। ਅਜ੍ਝਤ੍ਤਂ ਸਤਿਮਾ ਸੁਖਮਸ੍ਮੀਤਿ ਗੋਚਰਜ੍ਝਤ੍ਤੇ ਪવਤ੍ਤਾਯ ਸਤਿਯਾ ‘‘ਸਤਿਮਾਹਮਸ੍ਮਿ ਸੁਖਿਤੋ ਚਾ’’ਤਿ ਪਜਾਨਾਤਿ।
Kāyārammaṇoti yaṃ kāyaṃ anupassati, tameva ārammaṇaṃ katvā uppajjati kilesapariḷāho. Bahiddhā vā cittaṃ vikkhipatīti bahiddhā vā puthuttārammaṇe cittuppādo vikkhipati. Kismiñcideva pasādanīye nimitte cittaṃ paṇidahitabbanti evaṃ kilesapariḷāhe ca līnatte ca bahiddhāvikkhepe ca uppanne kilesānurañjitena na vattitabbaṃ, kismiñcideva pasādanīye pasādāvahe buddhādīsu aññatarasmiṃ ṭhāne kammaṭṭhānacittaṃ ṭhapetabbaṃ. Cittaṃ samādhiyatīti ārammaṇe sammā ādhiyati suṭṭhu ṭhapitaṃ ṭhapiyati. Paṭisaṃharāmīti pasādanīyaṭṭhānato paṭisaṃharāmi, mūlakammaṭṭhānābhimukhaṃyeva naṃ karomīti attho. So paṭisaṃharati cevāti mūlakammaṭṭhānābhimukhañca peseti. Na ca vitakketi na ca vicāretīti kilesavitakkaṃ na vitakketi, kilesavicāraṃ na vicāreti. Avitakkomhi avicāroti kilesavitakkavicārehi avitakkāvicāro. Ajjhattaṃ satimā sukhamasmīti gocarajjhatte pavattāya satiyā ‘‘satimāhamasmi sukhito cā’’ti pajānāti.
ਏવਂ ਖੋ, ਆਨਨ੍ਦ, ਪਣਿਧਾਯ ਭਾવਨਾ ਹੋਤੀਤਿ ਏવਂ, ਆਨਨ੍ਦ, ਠਪੇਤ੍વਾ ਭਾવਨਾ ਹੋਤਿ। ਇਮਸ੍ਸ ਹਿ ਭਿਕ੍ਖੁਨੋ ਯਥਾ ਨਾਮ ਪੁਰਿਸਸ੍ਸ ਮਹਨ੍ਤਂ ਉਚ੍ਛੁਭਾਰਂ ਉਕ੍ਖਿਪਿਤ੍વਾ ਯਨ੍ਤਸਾਲਂ ਨੇਨ੍ਤਸ੍ਸ ਕਿਲਨ੍ਤਕਿਲਨ੍ਤਕਾਲੇ ਭੂਮਿਯਂ ਠਪੇਤ੍વਾ ਉਚ੍ਛੁਖਣ੍ਡਂ ਖਾਦਿਤ੍વਾ ਪੁਨ ਉਕ੍ਖਿਪਿਤ੍વਾ ਗਮਨਂ ਹੋਤਿ; ਏવਮੇવ ਅਰਹਤ੍ਤਂ ਪਾਪੁਣਿਤੁਂ ਉਗ੍ਗਹਿਤਕਮ੍ਮਟ੍ਠਾਨਸ੍ਸ ਕਾਯਪਰਿਲ਼ਾਹਾਦੀਸੁ ਉਪ੍ਪਨ੍ਨੇਸੁ ਤਂ ਕਮ੍ਮਟ੍ਠਾਨਂ ਠਪੇਤ੍વਾ ਬੁਦ੍ਧਗੁਣਾਦਿਅਨੁਸ੍ਸਰਣੇਨ ਚਿਤ੍ਤਂ ਪਸਾਦੇਤ੍વਾ ਕਮ੍ਮਨਿਯਂ ਕਤ੍વਾ ਭਾવਨਾ ਪવਤ੍ਤਾ, ਤਸ੍ਮਾ ‘‘ਪਣਿਧਾਯ ਭਾવਨਾ ਹੋਤੀ’’ਤਿ વੁਤ੍ਤਂ। ਤਸ੍ਸ ਪਨ ਪੁਰਿਸਸ੍ਸ ਉਚ੍ਛੁਭਾਰਂ ਯਨ੍ਤਸਾਲਂ ਨੇਤ੍વਾ ਪੀਲ਼ੇਤ੍વਾ ਰਸਪਾਨਂ વਿਯ ਇਮਸ੍ਸ ਭਿਕ੍ਖੁਨੋ ਕਮ੍ਮਟ੍ਠਾਨਂ ਮਤ੍ਥਕਂ ਪਾਪੇਤ੍વਾ ਅਰਹਤ੍ਤਂ ਪਤ੍ਤਸ੍ਸ ਫਲਸਮਾਪਤ੍ਤਿਸੁਖਾਨੁਭવਨਂ વੇਦਿਤਬ੍ਬਂ।
Evaṃ kho, ānanda, paṇidhāya bhāvanā hotīti evaṃ, ānanda, ṭhapetvā bhāvanā hoti. Imassa hi bhikkhuno yathā nāma purisassa mahantaṃ ucchubhāraṃ ukkhipitvā yantasālaṃ nentassa kilantakilantakāle bhūmiyaṃ ṭhapetvā ucchukhaṇḍaṃ khāditvā puna ukkhipitvā gamanaṃ hoti; evameva arahattaṃ pāpuṇituṃ uggahitakammaṭṭhānassa kāyapariḷāhādīsu uppannesu taṃ kammaṭṭhānaṃ ṭhapetvā buddhaguṇādianussaraṇena cittaṃ pasādetvā kammaniyaṃ katvā bhāvanā pavattā, tasmā ‘‘paṇidhāya bhāvanā hotī’’ti vuttaṃ. Tassa pana purisassa ucchubhāraṃ yantasālaṃ netvā pīḷetvā rasapānaṃ viya imassa bhikkhuno kammaṭṭhānaṃ matthakaṃ pāpetvā arahattaṃ pattassa phalasamāpattisukhānubhavanaṃ veditabbaṃ.
ਬਹਿਦ੍ਧਾਤਿ ਮੂਲਕਮ੍ਮਟ੍ਠਾਨਂ ਪਹਾਯ ਬਹਿ ਅਞ੍ਞਸ੍ਮਿਂ ਆਰਮ੍ਮਣੇ। ਅਪ੍ਪਣਿਧਾਯਾਤਿ ਅਟ੍ਠਪੇਤ੍વਾ। ਅਥ ਪਚ੍ਛਾ ਪੁਰੇ ਅਸਂਖਿਤ੍ਤਂ વਿਮੁਤ੍ਤਂ ਅਪ੍ਪਣਿਹਿਤਨ੍ਤਿ ਪਜਾਨਾਤੀਤਿ ਏਤ੍ਥ ਕਮ੍ਮਟ੍ਠਾਨવਸੇਨ વਾ ਸਰੀਰવਸੇਨ વਾ ਦੇਸਨਾવਸੇਨ વਾ ਅਤ੍ਥੋ વੇਦਿਤਬ੍ਬੋ।
Bahiddhāti mūlakammaṭṭhānaṃ pahāya bahi aññasmiṃ ārammaṇe. Appaṇidhāyāti aṭṭhapetvā. Atha pacchā pure asaṃkhittaṃ vimuttaṃ appaṇihitanti pajānātīti ettha kammaṭṭhānavasena vā sarīravasena vā desanāvasena vā attho veditabbo.
ਤਤ੍ਥ ਕਮ੍ਮਟ੍ਠਾਨੇ ਤਾવ ਕਮ੍ਮਟ੍ਠਾਨਸ੍ਸ ਅਭਿਨਿવੇਸੋ ਪੁਰੇ ਨਾਮ, ਅਰਹਤ੍ਤਂ ਪਚ੍ਛਾ ਨਾਮ। ਤਤ੍ਥ ਯੋ ਭਿਕ੍ਖੁ ਮੂਲਕਮ੍ਮਟ੍ਠਾਨਂ ਗਹੇਤ੍વਾ ਕਿਲੇਸਪਰਿਲ਼ਾਹਸ੍ਸ વਾ ਲੀਨਤ੍ਤਸ੍ਸ વਾ ਬਹਿਦ੍ਧਾવਿਕ੍ਖੇਪਸ੍ਸ વਾ ਉਪ੍ਪਜ੍ਜਿਤੁਂ ਓਕਾਸਂ ਅਦੇਨ੍ਤੋ ਸੁਦਨ੍ਤਗੋਣੇ ਯੋਜੇਤ੍વਾ ਸਾਰੇਨ੍ਤੋ વਿਯ ਚਤੁਰਸ੍ਸਚ੍ਛਿਦ੍ਦੇ ਸੁਤਚ੍ਛਿਤਂ ਚਤੁਰਸ੍ਸਘਟਿਕਂ ਪਕ੍ਖਿਪਨ੍ਤੋ વਿਯ વਿਪਸ੍ਸਨਂ ਪਟ੍ਠਪੇਤ੍વਾ ਅਤਿਟ੍ਠਨ੍ਤੋ ਅਲਗ੍ਗਨ੍ਤੋ ਅਰਹਤ੍ਤਂ ਪਾਪੁਣਾਤਿ, ਸੋ ਪੁਰੇਸਙ੍ਖਾਤਸ੍ਸ ਕਮ੍ਮਟ੍ਠਾਨਾਭਿਨਿવੇਸਸ੍ਸ ਪਚ੍ਛਾਸਙ੍ਖਾਤਸ੍ਸ ਅਰਹਤ੍ਤਸ੍ਸ ਚ વਸੇਨ ਪਚ੍ਛਾ ਪੁਰੇ ਅਸਂਖਿਤ੍ਤਂ વਿਮੁਤ੍ਤਂ ਅਪ੍ਪਣਿਹਿਤਨ੍ਤਿ ਪਜਾਨਾਤਿ ਨਾਮ।
Tattha kammaṭṭhāne tāva kammaṭṭhānassa abhiniveso pure nāma, arahattaṃ pacchā nāma. Tattha yo bhikkhu mūlakammaṭṭhānaṃ gahetvā kilesapariḷāhassa vā līnattassa vā bahiddhāvikkhepassa vā uppajjituṃ okāsaṃ adento sudantagoṇe yojetvā sārento viya caturassacchidde sutacchitaṃ caturassaghaṭikaṃ pakkhipanto viya vipassanaṃ paṭṭhapetvā atiṭṭhanto alagganto arahattaṃ pāpuṇāti, so puresaṅkhātassa kammaṭṭhānābhinivesassa pacchāsaṅkhātassa arahattassa ca vasena pacchā pure asaṃkhittaṃ vimuttaṃ appaṇihitanti pajānāti nāma.
ਸਰੀਰੇ ਪਨ ਪਾਦਙ੍ਗੁਲੀਨਂ ਅਗ੍ਗਪਬ੍ਬਾਨਿ ਪੁਰੇ ਨਾਮ, ਸੀਸਕਟਾਹਂ ਪਚ੍ਛਾ ਨਾਮ। ਤਤ੍ਥ ਯੋ ਭਿਕ੍ਖੁ ਪਾਦਙ੍ਗੁਲੀਨਂ ਅਗ੍ਗਪਬ੍ਬਅਟ੍ਠਿਕੇਸੁ ਅਭਿਨਿવਿਸਿਤ੍વਾ ਬ੍ਯਾਭਙ੍ਗਿਯਾ ਯવਕਲਾਪਂ ਮੋਚੇਨ੍ਤੋ વਿਯ વਣ੍ਣਸਣ੍ਠਾਨਦਿਸੋਕਾਸਪਰਿਚ੍ਛੇਦવਸੇਨ ਅਟ੍ਠੀਨਿ ਪਰਿਗ੍ਗਣ੍ਹਨ੍ਤੋ ਅਨ੍ਤਰਾ ਕਿਲੇਸਪਰਿਲ਼ਾਹਾਦੀਨਂ ਉਪ੍ਪਤ੍ਤਿਂ વਾਰੇਤ੍વਾ ਯਾવ ਸੀਸਕਟਾਹਾ ਭਾવਨਂ ਪਾਪੇਤਿ, ਸੋ ਪੁਰੇਸਙ੍ਖਾਤਾਨਂ ਅਗ੍ਗਪਾਦਙ੍ਗੁਲਿਪਬ੍ਬਾਨਂ ਪਚ੍ਛਾਸਙ੍ਖਾਤਸ੍ਸ ਸੀਸਕਟਾਹਸ੍ਸ ਚ વਸੇਨ ਪਚ੍ਛਾ ਪੁਰੇ ਅਸਂਖਿਤ੍ਤਂ વਿਮੁਤ੍ਤਂ ਅਪ੍ਪਣਿਹਿਤਨ੍ਤਿ ਪਜਾਨਾਤਿ ਨਾਮ।
Sarīre pana pādaṅgulīnaṃ aggapabbāni pure nāma, sīsakaṭāhaṃ pacchā nāma. Tattha yo bhikkhu pādaṅgulīnaṃ aggapabbaaṭṭhikesu abhinivisitvā byābhaṅgiyā yavakalāpaṃ mocento viya vaṇṇasaṇṭhānadisokāsaparicchedavasena aṭṭhīni pariggaṇhanto antarā kilesapariḷāhādīnaṃ uppattiṃ vāretvā yāva sīsakaṭāhā bhāvanaṃ pāpeti, so puresaṅkhātānaṃ aggapādaṅgulipabbānaṃ pacchāsaṅkhātassa sīsakaṭāhassa ca vasena pacchā pure asaṃkhittaṃ vimuttaṃ appaṇihitanti pajānāti nāma.
ਦੇਸਨਾਯਪਿ ਦ੍વਤ੍ਤਿਂਸਾਕਾਰਦੇਸਨਾਯ ਕੇਸਾ ਪੁਰੇ ਨਾਮ, ਮਤ੍ਥਲੁਙ੍ਗਂ ਪਚ੍ਛਾ ਨਾਮ। ਤਤ੍ਥ ਯੋ ਭਿਕ੍ਖੁ ਕੇਸੇਸੁ ਅਭਿਨਿવਿਸਿਤ੍વਾ વਣ੍ਣਸਣ੍ਠਾਨਦਿਸੋਕਾਸવਸੇਨ ਕੇਸਾਦਯੋ ਪਰਿਗ੍ਗਣ੍ਹਨ੍ਤੋ ਅਨ੍ਤਰਾ ਕਿਲੇਸਪਰਿਲ਼ਾਹਾਦੀਨਂ ਉਪ੍ਪਤ੍ਤਿਂ વਾਰੇਤ੍વਾ ਯਾવ ਮਤ੍ਥਲੁਙ੍ਗਾ ਭਾવਨਂ ਪਾਪੇਤਿ। ਸੋ ਪੁਰੇਸਙ੍ਖਾਤਾਨਂ ਕੇਸਾਨਂ ਪਚ੍ਛਾਸਙ੍ਖਾਤਸ੍ਸ ਮਤ੍ਥਲੁਙ੍ਗਸ੍ਸ ਚ વਸੇਨ ਪਚ੍ਛਾ ਪੁਰੇ ਅਸਂਖਿਤ੍ਤਂ વਿਮੁਤ੍ਤਂ ਅਪ੍ਪਣਿਹਿਤਨ੍ਤਿ ਪਜਾਨਾਤਿ ਨਾਮ।
Desanāyapi dvattiṃsākāradesanāya kesā pure nāma, matthaluṅgaṃ pacchā nāma. Tattha yo bhikkhu kesesu abhinivisitvā vaṇṇasaṇṭhānadisokāsavasena kesādayo pariggaṇhanto antarā kilesapariḷāhādīnaṃ uppattiṃ vāretvā yāva matthaluṅgā bhāvanaṃ pāpeti. So puresaṅkhātānaṃ kesānaṃ pacchāsaṅkhātassa matthaluṅgassa ca vasena pacchā pure asaṃkhittaṃ vimuttaṃ appaṇihitanti pajānāti nāma.
ਏવਂ ਖੋ, ਆਨਨ੍ਦ, ਅਪ੍ਪਣਿਧਾਯ ਭਾવਨਾ ਹੋਤੀਤਿ ਏવਂ, ਆਨਨ੍ਦ, ਅਟ੍ਠਪੇਤ੍વਾ ਭਾવਨਾ ਹੋਤਿ। ਇਮਸ੍ਸ ਹਿ ਭਿਕ੍ਖੁਨੋ ਯਥਾ ਨਾਮ ਪੁਰਿਸਸ੍ਸ ਗੁਲ਼ਭਾਰਂ ਲਭਿਤ੍વਾ ਅਤ੍ਤਨੋ ਗਾਮਂ ਅਤਿਹਰਨ੍ਤਸ੍ਸ ਅਨ੍ਤਰਾ ਅਟ੍ਠਪੇਤ੍વਾવ ਉਚ੍ਚਙ੍ਗੇ ਪਕ੍ਖਿਤ੍ਤਾਨਿ ਗੁਲ਼ਖਣ੍ਡਾਦੀਨਿ ਖਾਦਨੀਯਾਨਿ ਖਾਦਨ੍ਤਸ੍ਸ ਅਤ੍ਤਨੋ ਗਾਮੇਯੇવ ਓਤਰਣਂ ਹੋਤਿ, ਏવਮੇવ ਅਰਹਤ੍ਤਂ ਪਾਪੁਣਿਤੁਂ ਆਰਦ੍ਧਭਾવਨਸ੍ਸ ਕਾਯਪਰਿਲ਼ਾਹਾਦੀਨਂ ਉਪ੍ਪਤ੍ਤਿਂ વਾਰੇਤ੍વਾ ਕਮ੍ਮਟ੍ਠਾਨਭਾવਨਾ ਪવਤ੍ਤਾ, ਤਸ੍ਮਾ ‘‘ਅਪ੍ਪਣਿਧਾਯ ਭਾવਨਾ’’ਤਿ વੁਤ੍ਤਾ। ਤਸ੍ਸ ਪਨ ਪੁਰਿਸਸ੍ਸ ਤਂ ਗੁਲ਼ਭਾਰਂ ਅਤ੍ਤਨੋ ਗਾਮਂ ਨੇਤ੍વਾ ਞਾਤੀਹਿ ਸਦ੍ਧਿਂ ਪਰਿਭੋਗੋ વਿਯ ਇਮਸ੍ਸ ਭਿਕ੍ਖੁਨੋ ਕਮ੍ਮਟ੍ਠਾਨਂ ਮਤ੍ਥਕਂ ਪਾਪੇਤ੍વਾ ਅਰਹਤ੍ਤਂ ਪਤ੍ਤਸ੍ਸ ਫਲਸਮਾਪਤ੍ਤਿਸੁਖਾਨੁਭવਨਂ વੇਦਿਤਬ੍ਬਂ। ਇਮਸ੍ਮਿਂ ਸੁਤ੍ਤੇ ਪੁਬ੍ਬਭਾਗવਿਪਸ੍ਸਨਾ ਕਥਿਤਾ। ਸੇਸਂ ਸਬ੍ਬਤ੍ਥ ਉਤ੍ਤਾਨਮੇવਾਤਿ।
Evaṃ kho, ānanda, appaṇidhāya bhāvanā hotīti evaṃ, ānanda, aṭṭhapetvā bhāvanā hoti. Imassa hi bhikkhuno yathā nāma purisassa guḷabhāraṃ labhitvā attano gāmaṃ atiharantassa antarā aṭṭhapetvāva uccaṅge pakkhittāni guḷakhaṇḍādīni khādanīyāni khādantassa attano gāmeyeva otaraṇaṃ hoti, evameva arahattaṃ pāpuṇituṃ āraddhabhāvanassa kāyapariḷāhādīnaṃ uppattiṃ vāretvā kammaṭṭhānabhāvanā pavattā, tasmā ‘‘appaṇidhāya bhāvanā’’ti vuttā. Tassa pana purisassa taṃ guḷabhāraṃ attano gāmaṃ netvā ñātīhi saddhiṃ paribhogo viya imassa bhikkhuno kammaṭṭhānaṃ matthakaṃ pāpetvā arahattaṃ pattassa phalasamāpattisukhānubhavanaṃ veditabbaṃ. Imasmiṃ sutte pubbabhāgavipassanā kathitā. Sesaṃ sabbattha uttānamevāti.
ਅਮ੍ਬਪਾਲਿવਗ੍ਗੋ ਪਠਮੋ।
Ambapālivaggo paṭhamo.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੧੦. ਭਿਕ੍ਖੁਨੁਪਸ੍ਸਯਸੁਤ੍ਤਂ • 10. Bhikkhunupassayasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੧੦. ਭਿਕ੍ਖੁਨੁਪਸ੍ਸਯਸੁਤ੍ਤવਣ੍ਣਨਾ • 10. Bhikkhunupassayasuttavaṇṇanā
