| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
ভিক্খুপদভাজনীযৰণ্ণনা
Bhikkhupadabhājanīyavaṇṇanā
তস্মাতি যস্মা পন-সদ্দং অপনেত্ৰা অনিযমেন পুগ্গলদীপকং যো-সদ্দমেৰ আহ, তস্মা। এত্থাতি ইমস্মিং যো-সদ্দে। পন-সদ্দস্স নিপাতমত্তত্তা যো-সদ্দস্সেৰ অত্থং পকাসেন্তো ‘‘যো কোচীতি ৰুত্তং হোতী’’তি আহ। যো কোচি নামাতি যো ৰা সো ৰা যো কোচীতি ৰুত্তো। ৰাসধুরযুত্তো ৰাতি ৰিপস্সনাধুরযুত্তো ৰা। সীলেসূতি পকতীসু।
Tasmāti yasmā pana-saddaṃ apanetvā aniyamena puggaladīpakaṃ yo-saddameva āha, tasmā. Etthāti imasmiṃ yo-sadde. Pana-saddassa nipātamattattā yo-saddasseva atthaṃ pakāsento ‘‘yo kocīti vuttaṃ hotī’’ti āha. Yo koci nāmāti yo vā so vā yo kocīti vutto. Vāsadhurayutto vāti vipassanādhurayutto vā. Sīlesūti pakatīsu.
ভিক্খতীতি যাচতি। লভন্তো ৰা অলভন্তো ৰাতি যো কোচি ভিক্খতি ভিক্খং এসতি গৰেসতি, সো তং লভতু ৰা মা ৰা, তথাপি ভিক্খতীতি ভিক্খূতি অযমেত্থ অধিপ্পাযো। অরিযায যাচনাযাতি ‘‘উদ্দিস্স অরিযা তিট্ঠন্তি, এসা অরিযান যাচনা’’তি এৰং ৰুত্তায অরিযযাচনায, ন কপণদ্ধিকৰণিব্বকযাচকানং ৰিয ‘‘দেহি দেহী’’তি এৰং পৰত্তযাচনায। ভিক্খাচরিযন্তি উঞ্ছাচরিযং। অজ্ঝুপগতত্তাতি অনুট্ঠিতত্তা। কাজভত্তন্তি কাজেহি আনীতং ভত্তং। অগ্ঘফস্সৰণ্ণভেদেনাতি অগ্ঘাদীনং পুরিমপকতিৰিজহেন। পুরিমপকতিৰিজহনঞ্হেত্থ ভেদোতি অধিপ্পেতং। ধোৰিত্ৰা অপনেতুং অসক্কুণেয্যসভাৰং মলং, তথা অপনেতুং সক্কুণেয্যসভাৰা জল্লিকা। ভিন্নপটধরোতি নিব্বচনং ভিন্নপটধরে ভিক্খু-সদ্দস্স নিরুল়্হত্তা কতং।
Bhikkhatīti yācati. Labhanto vā alabhanto vāti yo koci bhikkhati bhikkhaṃ esati gavesati, so taṃ labhatu vā mā vā, tathāpi bhikkhatīti bhikkhūti ayamettha adhippāyo. Ariyāya yācanāyāti ‘‘uddissa ariyā tiṭṭhanti, esā ariyāna yācanā’’ti evaṃ vuttāya ariyayācanāya, na kapaṇaddhikavaṇibbakayācakānaṃ viya ‘‘dehi dehī’’ti evaṃ pavattayācanāya. Bhikkhācariyanti uñchācariyaṃ. Ajjhupagatattāti anuṭṭhitattā. Kājabhattanti kājehi ānītaṃ bhattaṃ. Agghaphassavaṇṇabhedenāti agghādīnaṃ purimapakativijahena. Purimapakativijahanañhettha bhedoti adhippetaṃ. Dhovitvā apanetuṃ asakkuṇeyyasabhāvaṃ malaṃ, tathā apanetuṃ sakkuṇeyyasabhāvā jallikā. Bhinnapaṭadharoti nibbacanaṃ bhinnapaṭadhare bhikkhu-saddassa niruḷhattā kataṃ.
উপনিস্সযসম্পন্নন্তি পুব্বে অট্ঠপরিক্খারদানূপনিস্সযসম্পন্নং। যো হি চীৰরাদিকে অট্ঠ পরিক্খারে পত্তচীৰরমেৰ ৰা সোতাপন্নাদিঅরিযস্স পুথুজ্জনস্সেৰ ৰা সীলসম্পন্নস্স দত্ৰা ‘‘ইদং পরিক্খারদানং অনাগতে এহিভিক্খুভাৰায পচ্চযো হোতূ’’তি পত্থনং পট্ঠপেসি, তস্স তং সতি অধিকারসম্পত্তিযং বুদ্ধানং সম্মুখীভাৰে ইদ্ধিমযপরিক্খারলাভায সংৰত্ততীতি ৰেদিতব্বং। ব্রহ্মঘোসন্তি উত্তমঘোসং, ব্রহ্মুনো ঘোসসদিসং ৰা ঘোসং। ব্রহ্মচরিযন্তি সাসনব্রহ্মচরিযং মগ্গব্রহ্মচরিযঞ্চ। দুক্খস্স সম্মা অন্তকিরিযাযাতি যোজেতব্বং। ভণ্ডূতি মুণ্ডো। ৰাসীতি দন্তকট্ঠচ্ছেদনৰাসি। বন্ধনন্তি কাযবন্ধনং। যুত্তো ভাৰনানুযোগো অস্সাতি যুত্তযোগো, তস্স যুত্তযোগস্স, ভাৰনানুযোগমনুযুত্তস্সাতি ৰুত্তং হোতি। ইরিযাপথসম্পন্নতাৰিভাৰনত্থং ‘‘সট্ঠিৰস্সিকত্থেরো ৰিযা’’তি ৰুত্তং। বুদ্ধোৰ পব্বজ্জাচরিযো উপসম্পদাচরিযো চ অস্সাতি বুদ্ধাচরিযকো। পঠমবোধিযম্পি পঠমকালেযেৰ সেসউপসম্পদানং অভাৰোতি আহ ‘‘পঠমবোধিযং একস্মিং কালে’’তি। পঞ্চ পঞ্চৰগ্গিযত্থেরাতি পঞ্চৰগ্গিযত্থেরা পঞ্চ। তীণি সতন্তি তীণি সতানি, গাথাবন্ধসুখত্থং ৰচনৰিপল্লাসো কতো। একো চ থেরোতি অঙ্গুলিমালত্থেরং সন্ধায ৰুত্তং। ন ৰুত্তাতি অট্ঠকথাযং ন ৰুত্তা। তত্থাতি ৰিনযপাল়িযং।
Upanissayasampannanti pubbe aṭṭhaparikkhāradānūpanissayasampannaṃ. Yo hi cīvarādike aṭṭha parikkhāre pattacīvarameva vā sotāpannādiariyassa puthujjanasseva vā sīlasampannassa datvā ‘‘idaṃ parikkhāradānaṃ anāgate ehibhikkhubhāvāya paccayo hotū’’ti patthanaṃ paṭṭhapesi, tassa taṃ sati adhikārasampattiyaṃ buddhānaṃ sammukhībhāve iddhimayaparikkhāralābhāya saṃvattatīti veditabbaṃ. Brahmaghosanti uttamaghosaṃ, brahmuno ghosasadisaṃ vā ghosaṃ. Brahmacariyanti sāsanabrahmacariyaṃ maggabrahmacariyañca. Dukkhassa sammā antakiriyāyāti yojetabbaṃ. Bhaṇḍūti muṇḍo. Vāsīti dantakaṭṭhacchedanavāsi. Bandhananti kāyabandhanaṃ. Yutto bhāvanānuyogo assāti yuttayogo, tassa yuttayogassa, bhāvanānuyogamanuyuttassāti vuttaṃ hoti. Iriyāpathasampannatāvibhāvanatthaṃ ‘‘saṭṭhivassikatthero viyā’’ti vuttaṃ. Buddhova pabbajjācariyo upasampadācariyo ca assāti buddhācariyako. Paṭhamabodhiyampi paṭhamakāleyeva sesaupasampadānaṃ abhāvoti āha ‘‘paṭhamabodhiyaṃ ekasmiṃ kāle’’ti. Pañca pañcavaggiyattherāti pañcavaggiyattherā pañca. Tīṇi satanti tīṇi satāni, gāthābandhasukhatthaṃ vacanavipallāso kato. Eko ca theroti aṅgulimālattheraṃ sandhāya vuttaṃ. Na vuttāti aṭṭhakathāyaṃ na vuttā. Tatthāti vinayapāḷiyaṃ.
ৰেল়ুৰনমহাৰিহারে গন্ধকুটিযং নিসিন্নোযেৰ ভগৰা মহাকস্সপত্থেরস্স অত্তানং উদ্দিস্স পব্বজিতভাৰং ৰিদিত্ৰা তস্স পচ্চুগ্গমনং করোন্তো তিগাৰুতং মগ্গং এককোৰ গন্ত্ৰা বহুপুত্তনিগ্রোধমূলে পল্লঙ্কং আভুজিত্ৰা নিসিন্নো অত্তনো সন্তিকং আগন্ত্ৰা পরমনিপচ্চকারং দস্সেত্ৰা ‘‘সত্থা মে ভন্তে ভগৰা, সাৰকোহমস্মি, সত্থা মে ভন্তে ভগৰা, সাৰকোহমস্মী’’তি তিক্খত্তুং অত্তনো সাৰকত্তং সাৰেত্ৰা ঠিতস্স মহাকস্সপত্থেরস্স নিপচ্চকারমহত্ততং অত্তনো চ মহানুভাৰতং দীপেতুং যস্স অঞ্ঞস্স অজানংযেৰ ‘‘জানামী’’তি পটিঞ্ঞস্স বাহিরকস্স সত্থুনো এৰং সব্বচেতসা সমন্নাগতো পসন্নচিত্তো সাৰকো এৰরূপং পরমনিপচ্চকারং করেয্য, তস্স ৰণ্টচ্ছিন্নতালপক্কং ৰিয গীৰতো মুদ্ধাপি ৰিপতেয্য, সত্তধা ৰা ফলেয্যাতি দস্সেন্তো ‘‘যো খো, কস্সপ, এৰং সব্বচেতসা সমন্নাগতং সাৰকং অজানংযেৰ ৰদেয্য ‘জানামী’তি, অপস্সংযেৰ ৰদেয্য ‘পস্সামী’তি, মুদ্ধাপি তস্স ৰিপতেয্য, সত্তধা ৰা ফলেয্য, অহং খো, কস্সপ, জানংযেৰ ৰদামি ‘জানামী’তি, পস্সংযেৰ ৰদামি ‘পস্সামী’’’ (সং॰ নি॰ ২.১৫৪) তি ৰত্ৰা জাতিমদমানমদরূপমদপ্পহানত্থং তীহি ওৰাদেহি মহাকস্সপত্থেরং ওৰদন্তো ‘‘তস্মাতিহ তে কস্সপা’’তিআদিমাহ।
Veḷuvanamahāvihāre gandhakuṭiyaṃ nisinnoyeva bhagavā mahākassapattherassa attānaṃ uddissa pabbajitabhāvaṃ viditvā tassa paccuggamanaṃ karonto tigāvutaṃ maggaṃ ekakova gantvā bahuputtanigrodhamūle pallaṅkaṃ ābhujitvā nisinno attano santikaṃ āgantvā paramanipaccakāraṃ dassetvā ‘‘satthā me bhante bhagavā, sāvakohamasmi, satthā me bhante bhagavā, sāvakohamasmī’’ti tikkhattuṃ attano sāvakattaṃ sāvetvā ṭhitassa mahākassapattherassa nipaccakāramahattataṃ attano ca mahānubhāvataṃ dīpetuṃ yassa aññassa ajānaṃyeva ‘‘jānāmī’’ti paṭiññassa bāhirakassa satthuno evaṃ sabbacetasā samannāgato pasannacitto sāvako evarūpaṃ paramanipaccakāraṃ kareyya, tassa vaṇṭacchinnatālapakkaṃ viya gīvato muddhāpi vipateyya, sattadhā vā phaleyyāti dassento ‘‘yo kho, kassapa, evaṃ sabbacetasā samannāgataṃ sāvakaṃ ajānaṃyeva vadeyya ‘jānāmī’ti, apassaṃyeva vadeyya ‘passāmī’ti, muddhāpi tassa vipateyya, sattadhā vā phaleyya, ahaṃ kho, kassapa, jānaṃyeva vadāmi ‘jānāmī’ti, passaṃyeva vadāmi ‘passāmī’’’ (saṃ. ni. 2.154) ti vatvā jātimadamānamadarūpamadappahānatthaṃ tīhi ovādehi mahākassapattheraṃ ovadanto ‘‘tasmātiha te kassapā’’tiādimāha.
তত্থ (সং॰ নি॰ অট্ঠ॰ ২.২.১৫৪) তস্মাতিহাতি তস্মা ইচ্চেৰ ৰুত্তং হোতি, যস্মা অহং জানন্তোৰ ‘‘জানামী’’তি পস্সন্তো এৰ চ ‘‘পস্সামী’’তি ৰদামি, তস্মাতি অত্থো। তি-কার হ-কারা নিপাতা। ইহাতি ৰা ইমস্মিং সাসনে, ত-কারো পদসন্ধিৰসেন আগতো। এৰং সিক্খিতব্বন্তি ইদানি ৰুচ্চমানাকারেন সিক্খিতব্বং। তিব্বন্তি বহলং মহন্তং। হিরোত্তপ্পঞ্চাতি হিরী চ ওত্তপ্পঞ্চ। পচ্চুপট্ঠিতং ভৰিস্সতীতি উপসঙ্কমনতো পঠমতরমেৰ উপট্ঠিতং ভৰিস্সতি। তথা হি সতি তেসং পুরতো অস্স সগারৰসপ্পতিস্সৰতা সণ্ঠাতি। যো চ থেরাদীসু হিরোত্তপ্পং উপট্ঠপেত্ৰা উপসঙ্কমতি, থেরাদযোপি তং সহিরিকা সওত্তপ্পা চ হুত্ৰা উপসঙ্কমন্তীতি অযমেত্থ আনিসংসো। কুসলূপসংহিতন্তি কুসলনিস্সিতং, অনৰজ্জধম্মনিস্সিতন্তি অত্থো। অট্ঠিং কত্ৰাতি অত্তানং তেন ধম্মেন অট্ঠিকং কত্ৰা, তং ৰা ধম্মং ‘‘এস ময্হং ধম্মো’’তি অট্ঠিং কত্ৰা। মনসি কত্ৰাতি চিত্তে ঠপেত্ৰা। সব্বচেতসা সমন্নাহরিত্ৰাতি চিত্তস্স থোকম্পি বহি গন্তুং অদেন্তো সব্বেন সমন্নাহারচিত্তেন সমন্নাহরিত্ৰা। ওহিতসোতোতি ঠপিতসোতো, ধম্মে নিহিতসোতোতি অত্থো। এৰঞ্হি তে সিক্খিতব্বন্তি ঞাণসোতঞ্চ পসাদসোতঞ্চ ওদহিত্ৰা ‘‘মযা দেসিতং ধম্মং সক্কচ্চমেৰ সুণিস্সামী’’তি এৰঞ্হি তে সিক্খিতব্বং। সাতসহগতা চ মে কাযগতাসতীতি অসুভেসু চেৰ আনাপানে চ পঠমজ্ঝানৰসেন সুখসম্পযুত্তা কাযগতাসতি। যো চ পনাযং তিৰিধো ওৰাদো, থেরস্স অযমেৰ পব্বজ্জা চ উপসম্পদা চ অহোসি।
Tattha (saṃ. ni. aṭṭha. 2.2.154) tasmātihāti tasmā icceva vuttaṃ hoti, yasmā ahaṃ jānantova ‘‘jānāmī’’ti passanto eva ca ‘‘passāmī’’ti vadāmi, tasmāti attho. Ti-kāra ha-kārā nipātā. Ihāti vā imasmiṃ sāsane, ta-kāro padasandhivasena āgato. Evaṃ sikkhitabbanti idāni vuccamānākārena sikkhitabbaṃ. Tibbanti bahalaṃ mahantaṃ. Hirottappañcāti hirī ca ottappañca. Paccupaṭṭhitaṃ bhavissatīti upasaṅkamanato paṭhamatarameva upaṭṭhitaṃ bhavissati. Tathā hi sati tesaṃ purato assa sagāravasappatissavatā saṇṭhāti. Yo ca therādīsu hirottappaṃ upaṭṭhapetvā upasaṅkamati, therādayopi taṃ sahirikā saottappā ca hutvā upasaṅkamantīti ayamettha ānisaṃso. Kusalūpasaṃhitanti kusalanissitaṃ, anavajjadhammanissitanti attho. Aṭṭhiṃ katvāti attānaṃ tena dhammena aṭṭhikaṃ katvā, taṃ vā dhammaṃ ‘‘esa mayhaṃ dhammo’’ti aṭṭhiṃ katvā. Manasi katvāti citte ṭhapetvā. Sabbacetasā samannāharitvāti cittassa thokampi bahi gantuṃ adento sabbena samannāhāracittena samannāharitvā. Ohitasototi ṭhapitasoto, dhamme nihitasototi attho. Evañhi te sikkhitabbanti ñāṇasotañca pasādasotañca odahitvā ‘‘mayā desitaṃ dhammaṃ sakkaccameva suṇissāmī’’ti evañhi te sikkhitabbaṃ. Sātasahagatā ca me kāyagatāsatīti asubhesu ceva ānāpāne ca paṭhamajjhānavasena sukhasampayuttā kāyagatāsati. Yo ca panāyaṃ tividho ovādo, therassa ayameva pabbajjā ca upasampadā ca ahosi.
কসিণারম্মণং রূপাৰচরজ্ঝানং রূপসঞ্ঞা। সঞ্ঞাসীসেন হেত্থ ঝানং ৰুত্তং, তদেৰ চ উদ্ধুমাতকপটিভাগারম্মণত্তা ‘‘উদ্ধুমাতকসঞ্ঞা’’তি ৰুত্তং। সোপাকসামণেরো ভগৰতা পুট্ঠো ‘‘এতে দ্ৰে রূপাৰচরভাৰেন একত্থা, ব্যঞ্জনমেৰ নান’’ন্তি আহ। আরদ্ধচিত্তোতি আরাধিতচিত্তো। গরুধম্মপটিগ্গহণাদিউপসম্পদা উপরি ৰিত্থারতো সযমেৰ আৰি ভৰিস্সতি।
Kasiṇārammaṇaṃ rūpāvacarajjhānaṃ rūpasaññā. Saññāsīsena hettha jhānaṃ vuttaṃ, tadeva ca uddhumātakapaṭibhāgārammaṇattā ‘‘uddhumātakasaññā’’ti vuttaṃ. Sopākasāmaṇero bhagavatā puṭṭho ‘‘ete dve rūpāvacarabhāvena ekatthā, byañjanameva nāna’’nti āha. Āraddhacittoti ārādhitacitto. Garudhammapaṭiggahaṇādiupasampadā upari vitthārato sayameva āvi bhavissati.
কল্যাণপুথুজ্জনাদযোতি এত্থ বহূনং নানপ্পকারানং সক্কাযদিট্ঠিআদীনং অৰিহতত্তা জনেতি, তাহি ৰা জনিতোতি পুথুজ্জনো, কল্যাণো চ সো পুথুজ্জনো চাতি কল্যাণপুথুজ্জনো, সো আদি যেসং সোতাপন্নাদীনং তে কল্যাণপুথুজ্জনাদযো। কল্যাণগ্গহণেন চেত্থ অন্ধপুথুজ্জনং নিৰত্তেতি। দ্ৰিধা হি পুথুজ্জনা অন্ধপুথুজ্জনো কল্যাণপুথুজ্জনোতি। ৰুত্তঞ্হেতং –
Kalyāṇaputhujjanādayoti ettha bahūnaṃ nānappakārānaṃ sakkāyadiṭṭhiādīnaṃ avihatattā janeti, tāhi vā janitoti puthujjano, kalyāṇo ca so puthujjano cāti kalyāṇaputhujjano, so ādi yesaṃ sotāpannādīnaṃ te kalyāṇaputhujjanādayo. Kalyāṇaggahaṇena cettha andhaputhujjanaṃ nivatteti. Dvidhā hi puthujjanā andhaputhujjano kalyāṇaputhujjanoti. Vuttañhetaṃ –
‘‘দুৰে পুথুজ্জনা ৰুত্তা, বুদ্ধেনাদিচ্চবন্ধুনা।
‘‘Duve puthujjanā vuttā, buddhenādiccabandhunā;
অন্ধো পুথুজ্জনো একো, কল্যাণেকো পুথুজ্জনো’’তি॥ (দী॰ নি॰ অট্ঠ॰ ১.৭; ম॰ নি॰ অট্ঠ॰ ১.২; সং॰ নি॰ অট্ঠ॰ ২.২.৬১; অ॰ নি॰ অট্ঠ॰ ১.১.৫১)।
Andho puthujjano eko, kalyāṇeko puthujjano’’ti. (dī. ni. aṭṭha. 1.7; ma. ni. aṭṭha. 1.2; saṃ. ni. aṭṭha. 2.2.61; a. ni. aṭṭha. 1.1.51);
ভদ্রায পঞ্ঞায ভদ্রায ৰিমুত্তিযাতি যোজেতব্বং। সীলেনাতিআদীসু সীলন্তি চতুপারিসুদ্ধিসীলং। সমাধীতি ৰিপস্সনাপাদকা অট্ঠ সমাপত্তিযো। পঞ্ঞাতি লোকিযলোকুত্তরঞাণং। ৰিমুত্তীতি অরিযফলৰিমুত্তি। ৰিমুত্তিঞাণদস্সনন্তি একূনৰীসতিৰিধং পচ্চৰেক্খণঞাণং। যথাসম্ভৰেন চেত্থ যোজনা ৰেদিতব্বা। কল্যাণপুথুজ্জনস্স হি সীলাদযো তযো এৰ সম্ভৰন্তি, অরিযানং পন সব্বেপি সীলাদযো। সারো ভিক্খূতিপি কল্যাণপুথুজ্জনাদযোৰ ৰুত্তাতি আহ ‘‘তেহিযেৰ সীলসারাদীহী’’তিআদি। অথ ৰা নিপ্পরিযাযতো খীণাসৰোৰ সারো ভিক্খু নামাতি আহ ‘‘ৰিগতকিলেসফেগ্গুভাৰতো ৰা’’তিআদি।
Bhadrāya paññāya bhadrāya vimuttiyāti yojetabbaṃ. Sīlenātiādīsu sīlanti catupārisuddhisīlaṃ. Samādhīti vipassanāpādakā aṭṭha samāpattiyo. Paññāti lokiyalokuttarañāṇaṃ. Vimuttīti ariyaphalavimutti. Vimuttiñāṇadassananti ekūnavīsatividhaṃ paccavekkhaṇañāṇaṃ. Yathāsambhavena cettha yojanā veditabbā. Kalyāṇaputhujjanassa hi sīlādayo tayo eva sambhavanti, ariyānaṃ pana sabbepi sīlādayo. Sāro bhikkhūtipi kalyāṇaputhujjanādayova vuttāti āha ‘‘tehiyeva sīlasārādīhī’’tiādi. Atha vā nippariyāyato khīṇāsavova sāro bhikkhu nāmāti āha ‘‘vigatakilesapheggubhāvato vā’’tiādi.
যোপি কল্যাণপুথুজ্জনো অনুলোমপটিপদায পরিপূরকারী সীলসম্পন্নো ইন্দ্রিযেসু গুত্তদ্ৰারো ভোজনে মত্তঞ্ঞূ জাগরিযানুযোগমনুযুত্তো পুব্বরত্তাপররত্তং বোধিপক্খিযানং ধম্মানং ভাৰনানুযোগমনুযুত্তো ৰিহরতি ‘‘অজ্জ ৰা স্ৰে ৰা অঞ্ঞতরং সামঞ্ঞফলং অধিগমিস্সামী’’তি, সোপি ৰুচ্চতি সিক্খতীতি সেখোতি আহ ‘‘পুথুজ্জনকল্যাণকেন সদ্ধি’’ন্তি। সত্ত অরিযাতি চত্তারো মগ্গট্ঠা, হেট্ঠিমা চ তযো ফলট্ঠাতি ইমে সত্ত অরিযা। তিস্সো সিক্খাতি অধিসীলাদিকা তিস্সো সিক্খা। সিক্খাসু জাতোতি ৰা সেখো। অরিযপুগ্গলো হি অরিযায জাতিযা জাযমানো সিক্খাসু জাযতি, ন যোনিযং। সিক্খনসীলোতি ৰা সেখো, পুগ্গলাধিট্ঠানায ৰা কথায সেখস্স অযন্তি অনঞ্ঞসাধারণা মগ্গফলত্তযধম্মা সেখপরিযাযেন ৰুত্তা। অসেখোতি চ যত্থ সেখভাৰাসঙ্কা অত্থি, তত্থাযং পটিসেধোতি লোকিযনিব্বানেসু অসেখভাৰানাপত্তি দট্ঠব্বা। সীলসমাধিপঞ্ঞাসঙ্খাতা হি সিক্খা অত্তনো পটিপক্খকিলেসেহি ৰিমুত্তত্তা পরিসুদ্ধা, উপক্কিলেসানং আরম্মণভাৰম্পি অনুপগমনতো এতা সিক্খাতি ৰত্তুং যুত্তা, অট্ঠসুপি মগ্গফলেসু ৰিজ্জন্তি, তস্মা চতুমগ্গহেট্ঠিমফলত্তযসমঙ্গিনো ৰিয অরহত্তফলসমঙ্গীপি তাসু সিক্খাসু জাতোতি তংসমঙ্গিনো অরহতো ইতরেসং ৰিয সেখত্তে সতি সেখস্স অযন্তি, সিক্খা সীলং এতস্সাতি চ সেখোতি ৰত্তব্বো সিযাতি তং নিৰত্তনত্থং ‘‘অসেখো’’তি যথাৰুত্তসেখভাৰপটিসেধো কতো। অরহত্তফলেহি পৰত্তমানা সিক্খা পরিনিট্ঠিতসিক্খাকিচ্চত্তা ন সিক্খাকিচ্চং করোন্তি, কেৰলং সিক্খাফলভাৰেনেৰ পৰত্তন্তি, তস্মা তা ন সিক্খাৰচনং অরহন্তি, নাপি তংসমঙ্গী সেখৰচনং, ন চ সিক্খনসীলো, সিক্খাসু জাতোতি চ ৰত্তব্বতং অরহতি, হেট্ঠিমফলেসু পন সিক্খা সকদাগামিমগ্গৰিপস্সনাদীনং উপনিস্সযভাৰতো সিক্খাকিচ্চং করোন্তীতি সিক্খাৰচনং অরহন্তি, তংসমঙ্গিনো চ সেখৰচনং সিক্খনসীলা, সিক্খাসু জাতাতি চ ৰত্তব্বতং অরহন্তি ‘‘সিক্খন্তীতি সেখা’’তি অপরিযোসিতসিক্খানং দস্সিতত্তা, ‘‘ন সিক্খতীতি অসেখো’’তি ইমিনা পরিযোসিতসিক্খো দস্সিতো, ন সিক্খায রহিতোতি আহ – ‘‘সেক্খধম্মে অতিক্কম্ম …পে॰… খীণাসৰো অসেখোতি ৰুচ্চতী’’তি। ৰুদ্ধিপ্পত্তসিক্খো ৰা অসেখোতি এতস্মিং অত্থে সেখধম্মেসু এৰ ঠিতস্স কস্সচি অরিযস্স অসেখভাৰাপত্তীতি অরহত্তমগ্গধম্মা ৰুদ্ধিপ্পত্তা চ যথাৰুত্তেহি অত্থেহি সেখাতি কত্ৰা তংসমঙ্গিনো অগ্গমগ্গট্ঠস্স অসেখভাৰো আপন্নোতি? ন, তংসদিসেসু তব্বোহারতো। অরহত্তমগ্গতো হি নিন্নানাকরণং অরহত্তফলং ঠপেত্ৰা পরিঞ্ঞাকিচ্চকরণং ৰিপাকভাৰঞ্চ, তস্মা তে এৰ সেখা অগ্গফলধম্মভাৰং আপন্নাতি সক্কা ৰত্তুং। কুসলসুখতো চ ৰিপাকসুখং সন্ততরতায পণীততরন্তি ৰুদ্ধিপ্পত্তা চ তে ধম্মা হোন্তীতি তংসমঙ্গী অসেখোতি ৰুচ্চতীতি।
Yopi kalyāṇaputhujjano anulomapaṭipadāya paripūrakārī sīlasampanno indriyesu guttadvāro bhojane mattaññū jāgariyānuyogamanuyutto pubbarattāpararattaṃ bodhipakkhiyānaṃ dhammānaṃ bhāvanānuyogamanuyutto viharati ‘‘ajja vā sve vā aññataraṃ sāmaññaphalaṃ adhigamissāmī’’ti, sopi vuccati sikkhatīti sekhoti āha ‘‘puthujjanakalyāṇakena saddhi’’nti. Satta ariyāti cattāro maggaṭṭhā, heṭṭhimā ca tayo phalaṭṭhāti ime satta ariyā. Tisso sikkhāti adhisīlādikā tisso sikkhā. Sikkhāsu jātoti vā sekho. Ariyapuggalo hi ariyāya jātiyā jāyamāno sikkhāsu jāyati, na yoniyaṃ. Sikkhanasīloti vā sekho, puggalādhiṭṭhānāya vā kathāya sekhassa ayanti anaññasādhāraṇā maggaphalattayadhammā sekhapariyāyena vuttā. Asekhoti ca yattha sekhabhāvāsaṅkā atthi, tatthāyaṃ paṭisedhoti lokiyanibbānesu asekhabhāvānāpatti daṭṭhabbā. Sīlasamādhipaññāsaṅkhātā hi sikkhā attano paṭipakkhakilesehi vimuttattā parisuddhā, upakkilesānaṃ ārammaṇabhāvampi anupagamanato etā sikkhāti vattuṃ yuttā, aṭṭhasupi maggaphalesu vijjanti, tasmā catumaggaheṭṭhimaphalattayasamaṅgino viya arahattaphalasamaṅgīpi tāsu sikkhāsu jātoti taṃsamaṅgino arahato itaresaṃ viya sekhatte sati sekhassa ayanti, sikkhā sīlaṃ etassāti ca sekhoti vattabbo siyāti taṃ nivattanatthaṃ ‘‘asekho’’ti yathāvuttasekhabhāvapaṭisedho kato. Arahattaphalehi pavattamānā sikkhā pariniṭṭhitasikkhākiccattā na sikkhākiccaṃ karonti, kevalaṃ sikkhāphalabhāveneva pavattanti, tasmā tā na sikkhāvacanaṃ arahanti, nāpi taṃsamaṅgī sekhavacanaṃ, na ca sikkhanasīlo, sikkhāsu jātoti ca vattabbataṃ arahati, heṭṭhimaphalesu pana sikkhā sakadāgāmimaggavipassanādīnaṃ upanissayabhāvato sikkhākiccaṃ karontīti sikkhāvacanaṃ arahanti, taṃsamaṅgino ca sekhavacanaṃ sikkhanasīlā, sikkhāsu jātāti ca vattabbataṃ arahanti ‘‘sikkhantīti sekhā’’ti apariyositasikkhānaṃ dassitattā, ‘‘na sikkhatīti asekho’’ti iminā pariyositasikkho dassito, na sikkhāya rahitoti āha – ‘‘sekkhadhamme atikkamma…pe… khīṇāsavo asekhoti vuccatī’’ti. Vuddhippattasikkho vā asekhoti etasmiṃ atthe sekhadhammesu eva ṭhitassa kassaci ariyassa asekhabhāvāpattīti arahattamaggadhammā vuddhippattā ca yathāvuttehi atthehi sekhāti katvā taṃsamaṅgino aggamaggaṭṭhassa asekhabhāvo āpannoti? Na, taṃsadisesu tabbohārato. Arahattamaggato hi ninnānākaraṇaṃ arahattaphalaṃ ṭhapetvā pariññākiccakaraṇaṃ vipākabhāvañca, tasmā te eva sekhā aggaphaladhammabhāvaṃ āpannāti sakkā vattuṃ. Kusalasukhato ca vipākasukhaṃ santataratāya paṇītataranti vuddhippattā ca te dhammā hontīti taṃsamaṅgī asekhoti vuccatīti.
সব্বন্তিমেন পরিযাযেনাতি সব্বন্তিমেন পরিচ্ছেদেন। উপসম্পদাকম্মস্স অধিকারত্তা ‘‘পঞ্চৰগ্গকরণীযে’’তি ৰুত্তং। পঞ্চন্নং ৰগ্গো সমূহোতি পঞ্চৰগ্গো, পঞ্চপরিমাণযুত্তো ৰা ৰগ্গো পঞ্চৰগ্গো, তেন কত্তব্বং কম্মং পঞ্চৰগ্গকরণীযং। যাৰতিকা ভিক্খূতি যত্তকা ভিক্খূ। কম্মপ্পত্তাতি কম্মারহা পারাজিকং অনাপন্না অনুক্খিত্তা চ। উপসম্পদাকম্মস্স পঞ্চৰগ্গকরণীযত্তা পঞ্চেৰ ভিক্খূ কম্মপ্পত্তা এত্তকেহিপি কম্মসিদ্ধিতো, ইতরে ছন্দারহা। ঞত্তিচতুত্থেনাতি এত্থ কিঞ্চাপি ঞত্তি সব্বপঠমং ৰুচ্চতি, তিস্সন্নং পন অনুস্সাৰনানং অত্থব্যঞ্জনভেদাভাৰতো অত্থব্যঞ্জনভিন্না ঞত্তি তাসং চতুত্থাতি কত্ৰা ‘‘ঞত্তিচতুত্থ’’ন্তি ৰুচ্চতি। ব্যঞ্জনানুরূপমেৰ অট্ঠকথাযং ‘‘তীহি অনুস্সাৰনাহি একায চ ঞত্তিযা’’তি ৰুত্তং, অত্থপ্পৰত্তিক্কমেন পন ‘‘একায ঞত্তিযা তীহি অনুস্সাৰনাহী’’তি ৰত্তব্বং। ৰত্থুঞত্তিঅনউস্সাৰনসীমাপরিসসম্পত্তিসম্পন্নত্তাতি এত্থ ৰত্থূতি উপসম্পদাপেক্খো পুগ্গলো, সো ঠপেত্ৰা ঊনৰীসতিৰস্সং অন্তিমৰত্থুং অজ্ঝাপন্নপুব্বং পণ্ডকাদযো চ একাদস অভব্বপুগ্গলে ৰেদিতব্বো। ঊনৰীসতিৰস্সাদযো হি তেরস পুগ্গলা উপসম্পদায অৰত্থু, ইমে পন ঠপেত্ৰা অঞ্ঞস্মিং উপসম্পদাপেক্খে সতি উপসম্পদাকম্মং ৰত্থুসম্পত্তিসম্পন্নং নাম হোতি।
Sabbantimena pariyāyenāti sabbantimena paricchedena. Upasampadākammassa adhikārattā ‘‘pañcavaggakaraṇīye’’ti vuttaṃ. Pañcannaṃ vaggo samūhoti pañcavaggo, pañcaparimāṇayutto vā vaggo pañcavaggo, tena kattabbaṃ kammaṃ pañcavaggakaraṇīyaṃ. Yāvatikā bhikkhūti yattakā bhikkhū. Kammappattāti kammārahā pārājikaṃ anāpannā anukkhittā ca. Upasampadākammassa pañcavaggakaraṇīyattā pañceva bhikkhū kammappattā ettakehipi kammasiddhito, itare chandārahā. Ñatticatutthenāti ettha kiñcāpi ñatti sabbapaṭhamaṃ vuccati, tissannaṃ pana anussāvanānaṃ atthabyañjanabhedābhāvato atthabyañjanabhinnā ñatti tāsaṃ catutthāti katvā ‘‘ñatticatuttha’’nti vuccati. Byañjanānurūpameva aṭṭhakathāyaṃ ‘‘tīhi anussāvanāhi ekāya ca ñattiyā’’ti vuttaṃ, atthappavattikkamena pana ‘‘ekāya ñattiyā tīhi anussāvanāhī’’ti vattabbaṃ. Vatthuñattianaussāvanasīmāparisasampattisampannattāti ettha vatthūti upasampadāpekkho puggalo, so ṭhapetvā ūnavīsativassaṃ antimavatthuṃ ajjhāpannapubbaṃ paṇḍakādayo ca ekādasa abhabbapuggale veditabbo. Ūnavīsativassādayo hi terasa puggalā upasampadāya avatthu, ime pana ṭhapetvā aññasmiṃ upasampadāpekkhe sati upasampadākammaṃ vatthusampattisampannaṃ nāma hoti.
ৰত্থুসঙ্ঘপুগ্গলঞত্তীনং অপরামসনানি পচ্ছা ঞত্তিট্ঠপনঞ্চাতি ইমে তাৰ পঞ্চ ঞত্তিদোসা। তত্থ ‘‘অযং ইত্থন্নামো’’তি উপসম্পদাপেক্খস্স অকিত্তনং ৰত্থুঅপরামসনং নাম। ‘‘সুণাতু মে, ভন্তে, সঙ্ঘো’’তি এত্থ ‘‘সুণাতু মে, ভন্তে’’তি ৰত্ৰা ‘‘সঙ্ঘো’’তি অভণনং সঙ্ঘঅপরামসনং নাম। ‘‘ইত্থন্নামস্স উপসম্পদাপেক্খো’’তি উপজ্ঝাযস্স অকিত্তনং পুগ্গলঅপরামসনং নাম। সব্বেন সব্বং ঞত্তিযা অনুচ্চারণং ঞত্তিঅপরামসনং নাম। পঠমং কম্মৰাচং নিট্ঠাপেত্ৰা ‘‘এসা ঞত্তী’’তি ৰত্ৰা ‘‘খমতি সঙ্ঘস্সা’’তি এৰং ঞত্তিকিত্তনং পচ্ছা ঞত্তিট্ঠপনং নাম। ইতি ইমেহি দোসেহি ৰিমুত্তায ঞত্তিযা সম্পন্নং ঞত্তিসম্পত্তিসম্পন্নং নাম।
Vatthusaṅghapuggalañattīnaṃ aparāmasanāni pacchā ñattiṭṭhapanañcāti ime tāva pañca ñattidosā. Tattha ‘‘ayaṃ itthannāmo’’ti upasampadāpekkhassa akittanaṃ vatthuaparāmasanaṃ nāma. ‘‘Suṇātu me, bhante, saṅgho’’ti ettha ‘‘suṇātu me, bhante’’ti vatvā ‘‘saṅgho’’ti abhaṇanaṃ saṅghaaparāmasanaṃ nāma. ‘‘Itthannāmassa upasampadāpekkho’’ti upajjhāyassa akittanaṃ puggalaaparāmasanaṃ nāma. Sabbena sabbaṃ ñattiyā anuccāraṇaṃ ñattiaparāmasanaṃ nāma. Paṭhamaṃ kammavācaṃ niṭṭhāpetvā ‘‘esā ñattī’’ti vatvā ‘‘khamati saṅghassā’’ti evaṃ ñattikittanaṃ pacchā ñattiṭṭhapanaṃ nāma. Iti imehi dosehi vimuttāya ñattiyā sampannaṃ ñattisampattisampannaṃ nāma.
ৰত্থুসঙ্ঘপুগ্গলানং অপরামসনানি সাৰনায হাপনং অকালে সাৰনন্তি ইমে পঞ্চ অনুস্সাৰনদোসা। তত্থ ৰত্থাদীনং অপরামসনানি ঞত্তিযং ৰুত্তসদিসানেৰ। তীসু পন অনুস্সাৰনাসু যত্থ কত্থচি এতেসং অপরামসনং অপরামসনমেৰ, সব্বেন সব্বং পন কম্মৰাচং অৰত্ৰা চতুক্খত্তুং ঞত্তিকিত্তনমেৰ। অথ ৰা পন কম্মৰাচব্ভন্তরে অক্খরস্স ৰা পদস্স ৰা অনুচ্চারণং ৰা দুরুচ্চারণং ৰা সাৰনায হাপনং নাম। সাৰনায অনোকাসে পঠমং ঞত্তিং অট্ঠপেত্ৰা অনুস্সাৰনকরণং অকালে সাৰনং নাম। ইতি ইমেহি দোসেহি ৰিমুত্তায অনুস্সাৰনায সম্পন্নং অনুস্সাৰনসম্পত্তিসম্পন্নং নাম।
Vatthusaṅghapuggalānaṃ aparāmasanāni sāvanāya hāpanaṃ akāle sāvananti ime pañca anussāvanadosā. Tattha vatthādīnaṃ aparāmasanāni ñattiyaṃ vuttasadisāneva. Tīsu pana anussāvanāsu yattha katthaci etesaṃ aparāmasanaṃ aparāmasanameva, sabbena sabbaṃ pana kammavācaṃ avatvā catukkhattuṃ ñattikittanameva. Atha vā pana kammavācabbhantare akkharassa vā padassa vā anuccāraṇaṃ vā duruccāraṇaṃ vā sāvanāya hāpanaṃ nāma. Sāvanāya anokāse paṭhamaṃ ñattiṃ aṭṭhapetvā anussāvanakaraṇaṃ akāle sāvanaṃ nāma. Iti imehi dosehi vimuttāya anussāvanāya sampannaṃ anussāvanasampattisampannaṃ nāma.
ৰিপত্তিসীমালক্খণং সমতিক্কন্তায পন সীমায কতং সীমাসম্পত্তিসম্পন্নং নাম। যাৰতিকা ভিক্খূ কম্মপ্পত্তা, তেসং অনাগমনং, ছন্দারহানং ছন্দস্স অনাহরণং, সম্মুখীভূতানং পটিক্কোসনন্তি ইমে পন তযো পরিসদোসা, তেহি ৰিমুত্তায পরিসায কতং পরিসসম্পত্তিসম্পন্নং নাম।
Vipattisīmālakkhaṇaṃ samatikkantāya pana sīmāya kataṃ sīmāsampattisampannaṃ nāma. Yāvatikā bhikkhū kammappattā, tesaṃ anāgamanaṃ, chandārahānaṃ chandassa anāharaṇaṃ, sammukhībhūtānaṃ paṭikkosananti ime pana tayo parisadosā, tehi vimuttāya parisāya kataṃ parisasampattisampannaṃ nāma.
উপসম্পদাকম্মৰাচাসঙ্খাতং ভগৰতো ৰচনং উপসম্পদাকম্মকরণস্স কারণত্তা ঠানং, যথা চ তং কত্তব্বন্তি ভগৰতা অনুসিট্ঠং, তথা কতত্তা তদনুচ্ছৰিকং যথাৰুত্তং অনূনং ঞত্তিঅনুস্সাৰনং উপ্পটিপাটিযা চ অৰুত্তং ঠানারহং। যথা কত্তব্বন্তি হি ভগৰতা ৰুত্তং, তথা অকতে উপসম্পদাকম্মস্স কারণং ন হোতীতি ন তং ঠানারহং। তেনাহ ‘‘কারণারহেন সত্থুসাসনারহেনা’’তি। ইমিনা ঞত্তিঅনুস্সাৰনসম্পত্তি কথিতাতি ৰেদিতব্বা। ‘‘সমগ্গেন সঙ্ঘেনা’’তি ইমিনা পন পরিসসম্পত্তি কথিতাৰ। ‘‘অকুপ্পেনা’’তি ইমিনা পারিসেসতো ৰত্থুসীমাসম্পত্তিযো কথিতাতি ৰেদিতব্বা। অট্ঠকথাযং পন অকুপ্পলক্খণং একত্থ সম্পিণ্ডেত্ৰা দস্সেতুং অকুপ্পেনাতি ইমস্স ‘‘ৰত্থুঞত্তিঅনুস্সাৰনসীমাপরিসসম্পত্তিসম্পন্নত্তা অকোপেতব্বতং অপ্পটিক্কোসিতব্বতং উপগতেনা’’তি অত্থো ৰুত্তো। কেচি পন ‘‘ঠানারহেনাতিএত্থ ‘ন হত্থচ্ছিন্নো পব্বাজেতব্বো’তিআদি (মহাৰ॰ ১১৯) সত্থুসাসনং ঠান’’ন্তি ৰদন্তি।
Upasampadākammavācāsaṅkhātaṃ bhagavato vacanaṃ upasampadākammakaraṇassa kāraṇattā ṭhānaṃ, yathā ca taṃ kattabbanti bhagavatā anusiṭṭhaṃ, tathā katattā tadanucchavikaṃ yathāvuttaṃ anūnaṃ ñattianussāvanaṃ uppaṭipāṭiyā ca avuttaṃ ṭhānārahaṃ. Yathā kattabbanti hi bhagavatā vuttaṃ, tathā akate upasampadākammassa kāraṇaṃ na hotīti na taṃ ṭhānārahaṃ. Tenāha ‘‘kāraṇārahena satthusāsanārahenā’’ti. Iminā ñattianussāvanasampatti kathitāti veditabbā. ‘‘Samaggena saṅghenā’’ti iminā pana parisasampatti kathitāva. ‘‘Akuppenā’’ti iminā pārisesato vatthusīmāsampattiyo kathitāti veditabbā. Aṭṭhakathāyaṃ pana akuppalakkhaṇaṃ ekattha sampiṇḍetvā dassetuṃ akuppenāti imassa ‘‘vatthuñattianussāvanasīmāparisasampattisampannattā akopetabbataṃ appaṭikkositabbataṃ upagatenā’’ti attho vutto. Keci pana ‘‘ṭhānārahenātiettha ‘na hatthacchinno pabbājetabbo’tiādi (mahāva. 119) satthusāsanaṃ ṭhāna’’nti vadanti.
‘‘ঞত্তিচতুত্থেন কম্মেনা’’তি ইমস্মিং অধিকারে পসঙ্গতো আহরিত্ৰা যং কম্মলক্খণং সব্বঅট্ঠকথাসু পপঞ্চিতং, তং যথাআগতট্ঠানেযেৰ দস্সেতুকামো ইধ তস্স অৰচনে তত্থ ৰচনে চ পযোজনং দস্সেতুং ‘‘ইমস্মিং পন ঠানে ঠত্ৰা’’তিআদিমাহ।
‘‘Ñatticatutthena kammenā’’ti imasmiṃ adhikāre pasaṅgato āharitvā yaṃ kammalakkhaṇaṃ sabbaaṭṭhakathāsu papañcitaṃ, taṃ yathāāgataṭṭhāneyeva dassetukāmo idha tassa avacane tattha vacane ca payojanaṃ dassetuṃ ‘‘imasmiṃ pana ṭhāne ṭhatvā’’tiādimāha.
অট্ঠসু উপসম্পদাসু এহিভিক্খূপসম্পদা সরণগমনূপসম্পদা ওৰাদপটিগ্গহণূপসম্পদা পঞ্হব্যাকরণূপসম্পদাতি ইমাহি উপসম্পদাহি উপসম্পন্নানং লোকৰজ্জসিক্খাপদৰীতিক্কমে অভব্বত্তা গরুধম্মপটিগ্গহণূপসম্পদা দূতেনূপসম্পদা অট্ঠৰাচিকূপসম্পদাতি ইমাসঞ্চ তিস্সন্নং উপসম্পদানং ভিক্খুনীনংযেৰ অনুঞ্ঞাতত্তা ঞত্তিচতুত্থেনেৰ কম্মেন উপসম্পন্নো গহিতোতি ৰেদিতব্বো। তথা হি এহিভিক্খূপসম্পদা অন্তিমভৰিকানংযেৰ, সরণগমনূপসম্পদা পরিসুদ্ধানং, ওৰাদপটিগ্গহণপঞ্হব্যাকরণূপসম্পদা মহাকস্সপসোপাকানং, ন চ তে ভব্বা পারাজিকাদিলোকৰজ্জং আপজ্জিতুং, গরুধম্মপটিগ্গহণাদযো চ ভিক্খুনীনংযেৰ অনুঞ্ঞাতা, অযঞ্চ ভিক্খু, তস্মা এত্থ ঞত্তিচতুত্থেন উপসম্পন্নোৰ গহিতোতি ৰেদিতব্বো।
Aṭṭhasu upasampadāsu ehibhikkhūpasampadā saraṇagamanūpasampadā ovādapaṭiggahaṇūpasampadā pañhabyākaraṇūpasampadāti imāhi upasampadāhi upasampannānaṃ lokavajjasikkhāpadavītikkame abhabbattā garudhammapaṭiggahaṇūpasampadā dūtenūpasampadā aṭṭhavācikūpasampadāti imāsañca tissannaṃ upasampadānaṃ bhikkhunīnaṃyeva anuññātattā ñatticatuttheneva kammena upasampanno gahitoti veditabbo. Tathā hi ehibhikkhūpasampadā antimabhavikānaṃyeva, saraṇagamanūpasampadā parisuddhānaṃ, ovādapaṭiggahaṇapañhabyākaraṇūpasampadā mahākassapasopākānaṃ, na ca te bhabbā pārājikādilokavajjaṃ āpajjituṃ, garudhammapaṭiggahaṇādayo ca bhikkhunīnaṃyeva anuññātā, ayañca bhikkhu, tasmā ettha ñatticatutthena upasampannova gahitoti veditabbo.
পণ্ণত্তিৰজ্জেসু পন সিক্খাপদেসু অঞ্ঞেপি এহিভিক্খূপসম্পদায উপসম্পন্নাদযো সঙ্গহং গচ্ছন্তি। তেপি হি সহসেয্যাদিপণ্ণত্তিৰজ্জং আপত্তিং আপজ্জন্তিযেৰ। যদি এৰং পণ্ণত্তিৰজ্জেসুপি সিক্খাপদেসু ‘‘অযং ইমস্মিং অত্থে অধিপ্পেতো ভিক্খূ’’তি ঞত্তিচতুত্থেনেৰ কম্মেন উপসম্পন্নো কস্মা ৰুত্তোতি? সব্বসিক্খাপদৰীতিক্কমারহত্তা সব্বকালিকত্তা চ। এহিভিক্খূপসম্পদাদযো হি ন সব্বসিক্খাপদৰীতিক্কমারহা অসব্বকালিকা চ। তথা হি অট্ঠসু উপসম্পদাসু ঞত্তিচতুত্থকম্মূপসম্পদা দূতেনূপসম্পদা অট্ঠৰাচিকূপসম্পদাতি ইমা তিস্সোযেৰ থাৰরা, সেসা বুদ্ধে ধরমানেযেৰ অহেসুং। তেনেৰ চ ভিক্খুনীৰিভঙ্গেপি (পাচি॰ ৬৫৮) ‘‘তত্র যাযং ভিক্খুনী সমগ্গেন উভতোসঙ্ঘেন ঞত্তিচতুত্থেন কম্মেন অকুপ্পেন ঠানারহেন উপসম্পন্না, অযং ইমস্মিং অত্থে অধিপ্পেতা ভিক্খুনী’’তি দূতেনূপসম্পদায অট্ঠৰাচিকূপসম্পদায চ উপসম্পন্নং অন্তোকত্ৰা উভতোসঙ্ঘেন ঞত্তিচতুত্থেনেৰ কম্মেন উপসম্পন্না ভিক্খুনী ৰুত্তা, ন গরুধম্মপটিগ্গহণূপসম্পদায উপসম্পন্না তস্সা উপসম্পদায পাটিপুগ্গলিকভাৰতো অসব্বকালিকত্তা। গরুধম্মপটিগ্গহণূপসম্পদা হি মহাপজাপতিযা এৰ অনুঞ্ঞাতত্তা পাটিপুগ্গলিকাতি, তস্মা সব্বসিক্খাপদৰীতিক্কমারহং সব্বকালিকায ঞত্তিচতুত্থকম্মূপসম্পদায উপসম্পন্নমেৰ গহেত্ৰা সব্বসিক্খাপদানি পঞ্ঞত্তানীতি গহেতব্বং। যদি এৰং পণ্ণত্তিৰজ্জেসু সিক্খাপদেসু চ এহিভিক্খূপসম্পন্নাদীনম্পি সঙ্গহো কথং ৰিঞ্ঞাযতীতি? অত্থতো আপন্নত্তা। তথা হি ‘‘দ্ৰে পুগ্গলা অভব্বা আপত্তিং আপজ্জিতুং বুদ্ধা চ পচ্চেকবুদ্ধা চ, দ্ৰে পুগ্গলা ভব্বা আপত্তিং আপজ্জিতুং ভিক্খূ চ ভিক্খুনিযো চা’’তি (পরি॰ ৩২২) সামঞ্ঞতো ৰুত্তত্তা এহিভিক্খূপসম্পন্নাদযোপি অসঞ্চিচ্চ অস্সতিযা অচিত্তকং পণ্ণত্তিৰজ্জং সহসেয্যাদিআপত্তিং আপজ্জন্তীতি অত্থতো আপন্নন্তি অযমেত্থ সারো। যং পনেত্থ ইতো অঞ্ঞথা কেনচি পপঞ্চিতং, ন তং সারতো পচ্চেতব্বং।
Paṇṇattivajjesu pana sikkhāpadesu aññepi ehibhikkhūpasampadāya upasampannādayo saṅgahaṃ gacchanti. Tepi hi sahaseyyādipaṇṇattivajjaṃ āpattiṃ āpajjantiyeva. Yadi evaṃ paṇṇattivajjesupi sikkhāpadesu ‘‘ayaṃ imasmiṃ atthe adhippeto bhikkhū’’ti ñatticatuttheneva kammena upasampanno kasmā vuttoti? Sabbasikkhāpadavītikkamārahattā sabbakālikattā ca. Ehibhikkhūpasampadādayo hi na sabbasikkhāpadavītikkamārahā asabbakālikā ca. Tathā hi aṭṭhasu upasampadāsu ñatticatutthakammūpasampadā dūtenūpasampadā aṭṭhavācikūpasampadāti imā tissoyeva thāvarā, sesā buddhe dharamāneyeva ahesuṃ. Teneva ca bhikkhunīvibhaṅgepi (pāci. 658) ‘‘tatra yāyaṃ bhikkhunī samaggena ubhatosaṅghena ñatticatutthena kammena akuppena ṭhānārahena upasampannā, ayaṃ imasmiṃ atthe adhippetā bhikkhunī’’ti dūtenūpasampadāya aṭṭhavācikūpasampadāya ca upasampannaṃ antokatvā ubhatosaṅghena ñatticatuttheneva kammena upasampannā bhikkhunī vuttā, na garudhammapaṭiggahaṇūpasampadāya upasampannā tassā upasampadāya pāṭipuggalikabhāvato asabbakālikattā. Garudhammapaṭiggahaṇūpasampadā hi mahāpajāpatiyā eva anuññātattā pāṭipuggalikāti, tasmā sabbasikkhāpadavītikkamārahaṃ sabbakālikāya ñatticatutthakammūpasampadāya upasampannameva gahetvā sabbasikkhāpadāni paññattānīti gahetabbaṃ. Yadi evaṃ paṇṇattivajjesu sikkhāpadesu ca ehibhikkhūpasampannādīnampi saṅgaho kathaṃ viññāyatīti? Atthato āpannattā. Tathā hi ‘‘dve puggalā abhabbā āpattiṃ āpajjituṃ buddhā ca paccekabuddhā ca, dve puggalā bhabbā āpattiṃ āpajjituṃ bhikkhū ca bhikkhuniyo cā’’ti (pari. 322) sāmaññato vuttattā ehibhikkhūpasampannādayopi asañcicca assatiyā acittakaṃ paṇṇattivajjaṃ sahaseyyādiāpattiṃ āpajjantīti atthato āpannanti ayamettha sāro. Yaṃ panettha ito aññathā kenaci papañcitaṃ, na taṃ sārato paccetabbaṃ.
নিরুত্তিৰসেনাতি নিব্বচনৰসেন। অভিলাপৰসেনাতি ৰোহারৰসেন। অনুপ্পন্নায কম্মৰাচাযাতি অনুপ্পন্নায ঞত্তিচতুত্থকম্মৰাচায। গুণৰসেনাতি সীলাদিতংতংগুণযোগতো। এত্থ চ ভিন্দতি পাপকে অকুসলে ধম্মেতি ভিক্খূতি নিব্বচনং ৰেদিতব্বং।
Niruttivasenāti nibbacanavasena. Abhilāpavasenāti vohāravasena. Anuppannāya kammavācāyāti anuppannāya ñatticatutthakammavācāya. Guṇavasenāti sīlāditaṃtaṃguṇayogato. Ettha ca bhindati pāpake akusale dhammeti bhikkhūti nibbacanaṃ veditabbaṃ.
ভিক্খুপদভাজনীযৰণ্ণনা নিট্ঠিতা।
Bhikkhupadabhājanīyavaṇṇanā niṭṭhitā.
