| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
12. பி⁴க்கு²பணாமிதபஞ்ஹோ
12. Bhikkhupaṇāmitapañho
12. ‘‘ப⁴ந்தே நாக³ஸேன, பா⁴ஸிதம்பேதங் ப⁴க³வதா ‘அக்கோத⁴னோ விக³தகி²லோஹமஸ்மீ’தி, புன ச ததா²க³தோ தே²ரே ஸாரிபுத்தமொக்³க³ல்லானே ஸபரிஸே பணாமேஸி, கிங் நு கோ², ப⁴ந்தே நாக³ஸேன, ததா²க³தோ குபிதோ பரிஸங் பணாமேஸி, உதா³ஹு துட்டோ² பணாமேஸி, ஏதங் தாவ ஜானாஹி இமங் நாமாதி? யதி³, ப⁴ந்தே நாக³ஸேன, குபிதோ பரிஸங் பணாமேஸி, தேன ஹி ததா²க³தஸ்ஸ கோதோ⁴ அப்படிவத்திதோ, யதி³ துட்டோ² பணாமேஸி, தேன ஹி அவத்து²ஸ்மிங் அஜானந்தேன பணாமிதா. அயம்பி உப⁴தோ கோடிகோ பஞ்ஹோ தவானுப்பத்தோ, ஸோ தயா நிப்³பா³ஹிதப்³போ³’’தி.
12. ‘‘Bhante nāgasena, bhāsitampetaṃ bhagavatā ‘akkodhano vigatakhilohamasmī’ti, puna ca tathāgato there sāriputtamoggallāne saparise paṇāmesi, kiṃ nu kho, bhante nāgasena, tathāgato kupito parisaṃ paṇāmesi, udāhu tuṭṭho paṇāmesi, etaṃ tāva jānāhi imaṃ nāmāti? Yadi, bhante nāgasena, kupito parisaṃ paṇāmesi, tena hi tathāgatassa kodho appaṭivattito, yadi tuṭṭho paṇāmesi, tena hi avatthusmiṃ ajānantena paṇāmitā. Ayampi ubhato koṭiko pañho tavānuppatto, so tayā nibbāhitabbo’’ti.
‘‘பா⁴ஸிதம்பேதங், மஹாராஜ, ப⁴க³வதா ‘அக்கோத⁴னோ விக³தகி²லோஹமஸ்மீ’தி, பணாமிதா ச தே²ரா ஸாரிபுத்தமொக்³க³ல்லானா ஸபரிஸா, தஞ்ச பன ந கோபேன, இத⁴, மஹாராஜ, கோசிதே³வ புரிஸோ மஹாபத²வியா மூலே வா கா²ணுகே வா பாஸாணே வா கட²லே வா விஸமே வா பூ⁴மிபா⁴கே³ க²லித்வா பததி, அபி நு கோ², மஹாராஜ, மஹாபத²வீ குபிதா தங் பாதேதீ’’தி? ‘‘ந ஹி, ப⁴ந்தே, நத்தி² மஹாபத²வியா கோபோ வா பஸாதோ³ வா, அனுனயப்படிக⁴விப்பமுத்தா மஹாபத²வீ, ஸயமேவ ஸோ அலஸோ க²லித்வா பதிதோதி. ஏவமேவ கோ², மஹாராஜ, நத்தி² ததா²க³தானங் கோபோ வா பஸாதோ³ வா, அனுனயப்படிக⁴விப்பமுத்தா ததா²க³தா அரஹந்தோ ஸம்மாஸம்பு³த்³தா⁴, அத² கோ² ஸயங் கதேனேவ தே அத்தனோ அபராதே⁴ன பணாமிதா.
‘‘Bhāsitampetaṃ, mahārāja, bhagavatā ‘akkodhano vigatakhilohamasmī’ti, paṇāmitā ca therā sāriputtamoggallānā saparisā, tañca pana na kopena, idha, mahārāja, kocideva puriso mahāpathaviyā mūle vā khāṇuke vā pāsāṇe vā kaṭhale vā visame vā bhūmibhāge khalitvā patati, api nu kho, mahārāja, mahāpathavī kupitā taṃ pātetī’’ti? ‘‘Na hi, bhante, natthi mahāpathaviyā kopo vā pasādo vā, anunayappaṭighavippamuttā mahāpathavī, sayameva so alaso khalitvā patitoti. Evameva kho, mahārāja, natthi tathāgatānaṃ kopo vā pasādo vā, anunayappaṭighavippamuttā tathāgatā arahanto sammāsambuddhā, atha kho sayaṃ kateneva te attano aparādhena paṇāmitā.
‘‘இத⁴ பன, மஹாராஜ, மஹாஸமுத்³தோ³ ந மதேன குணபேன ஸங்வஸதி, யங் ஹோதி மஹாஸமுத்³தே³ மதங் குணபங், தங் கி²ப்பமேவ நிச்சு²ப⁴தி த²லங் உஸ்ஸாரேதி. அபி நு கோ², மஹாராஜ, மஹாஸமுத்³தோ³ குபிதோ தங் குணபங் நிச்சு²ப⁴தீ’’தி? ‘‘ந ஹி, ப⁴ந்தே, நத்தி² மஹாஸமுத்³த³ஸ்ஸ கோபோ வா பஸாதோ³ வா, அனுனயப்படிக⁴விப்பமுத்தோ மஹாஸமுத்³தோ³’’தி. ‘‘ஏவமேவ கோ², மஹாராஜ, நத்தி² ததா²க³தானங் கோபோ வா பஸாதோ³ வா, அனுனயப்படிக⁴விப்பமுத்தா ததா²க³தா அரஹந்தோ ஸம்மாஸம்பு³த்³தா⁴, அத² கோ² ஸயங் கதேனேவ தே அத்தனோ அபராதே⁴ன பணாமிதா.
‘‘Idha pana, mahārāja, mahāsamuddo na matena kuṇapena saṃvasati, yaṃ hoti mahāsamudde mataṃ kuṇapaṃ, taṃ khippameva nicchubhati thalaṃ ussāreti. Api nu kho, mahārāja, mahāsamuddo kupito taṃ kuṇapaṃ nicchubhatī’’ti? ‘‘Na hi, bhante, natthi mahāsamuddassa kopo vā pasādo vā, anunayappaṭighavippamutto mahāsamuddo’’ti. ‘‘Evameva kho, mahārāja, natthi tathāgatānaṃ kopo vā pasādo vā, anunayappaṭighavippamuttā tathāgatā arahanto sammāsambuddhā, atha kho sayaṃ kateneva te attano aparādhena paṇāmitā.
‘‘யதா², மஹாராஜ, பத²வியா க²லிதோ பதீயதி, ஏவங் ஜினஸாஸனவரே க²லிதோ பணாமீயதி. யதா², மஹாராஜ, ஸமுத்³தே³ மதங் குணபங் நிச்சு²பீ⁴யதி , ஏவங் ஜினஸாஸனவரே க²லிதோ பணாமீயதி. யங் பன தே, மஹாராஜ, ததா²க³தோ பணாமேஸி, தேஸங் அத்த²காமோ ஹிதகாமோ ஸுக²காமோ விஸுத்³தி⁴காமோ ‘ஏவங் இமே ஜாதிஜராப்³யாதி⁴மரணேஹி பரிமுச்சிஸ்ஸந்தீ’தி பணாமேஸீ’’தி. ‘‘ஸாது⁴, ப⁴ந்தே நாக³ஸேன, ஏவமேதங் ததா² ஸம்படிச்சா²மீ’’தி.
‘‘Yathā, mahārāja, pathaviyā khalito patīyati, evaṃ jinasāsanavare khalito paṇāmīyati. Yathā, mahārāja, samudde mataṃ kuṇapaṃ nicchubhīyati , evaṃ jinasāsanavare khalito paṇāmīyati. Yaṃ pana te, mahārāja, tathāgato paṇāmesi, tesaṃ atthakāmo hitakāmo sukhakāmo visuddhikāmo ‘evaṃ ime jātijarābyādhimaraṇehi parimuccissantī’ti paṇāmesī’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
பி⁴க்கு²பணாமிதபஞ்ஹோ த்³வாத³ஸமோ.
Bhikkhupaṇāmitapañho dvādasamo.
பணாமிதவக்³கோ³ ததியோ.
Paṇāmitavaggo tatiyo.
இமஸ்மிங் வக்³கே³ த்³வாத³ஸ பஞ்ஹா.
Imasmiṃ vagge dvādasa pañhā.
