| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၁၂. ဘိက္ခုပဏာမိတပဉ္ဟော
12. Bhikkhupaṇāmitapañho
၁၂. ‘‘ဘန္တေ နာဂသေန, ဘာသိတမ္ပေတံ ဘဂဝတာ ‘အက္ကောဓနော ဝိဂတခိလောဟမသ္မီ’တိ, ပုန စ တထာဂတော ထေရေ သာရိပုတ္တမောဂ္ဂလ္လာနေ သပရိသေ ပဏာမေသိ, ကိံ နု ခော, ဘန္တေ နာဂသေန, တထာဂတော ကုပိတော ပရိသံ ပဏာမေသိ, ဥဒာဟု တုဋ္ဌော ပဏာမေသိ, ဧတံ တာဝ ဇာနာဟိ ဣမံ နာမာတိ? ယဒိ, ဘန္တေ နာဂသေန, ကုပိတော ပရိသံ ပဏာမေသိ, တေန ဟိ တထာဂတသ္သ ကောဓော အပ္ပဋိဝတ္တိတော, ယဒိ တုဋ္ဌော ပဏာမေသိ, တေန ဟိ အဝတ္ထုသ္မိံ အဇာနန္တေန ပဏာမိတာ။ အယမ္ပိ ဥဘတော ကောဋိကော ပဉ္ဟော တဝာနုပ္ပတ္တော, သော တယာ နိဗ္ဗာဟိတဗ္ဗော’’တိ။
12. ‘‘Bhante nāgasena, bhāsitampetaṃ bhagavatā ‘akkodhano vigatakhilohamasmī’ti, puna ca tathāgato there sāriputtamoggallāne saparise paṇāmesi, kiṃ nu kho, bhante nāgasena, tathāgato kupito parisaṃ paṇāmesi, udāhu tuṭṭho paṇāmesi, etaṃ tāva jānāhi imaṃ nāmāti? Yadi, bhante nāgasena, kupito parisaṃ paṇāmesi, tena hi tathāgatassa kodho appaṭivattito, yadi tuṭṭho paṇāmesi, tena hi avatthusmiṃ ajānantena paṇāmitā. Ayampi ubhato koṭiko pañho tavānuppatto, so tayā nibbāhitabbo’’ti.
‘‘ဘာသိတမ္ပေတံ, မဟာရာဇ, ဘဂဝတာ ‘အက္ကောဓနော ဝိဂတခိလောဟမသ္မီ’တိ, ပဏာမိတာ စ ထေရာ သာရိပုတ္တမောဂ္ဂလ္လာနာ သပရိသာ, တဉ္စ ပန န ကောပေန, ဣဓ, မဟာရာဇ, ကောစိဒေဝ ပုရိသော မဟာပထဝိယာ မူလေ ဝာ ခာဏုကေ ဝာ ပာသာဏေ ဝာ ကဌလေ ဝာ ဝိသမေ ဝာ ဘူမိဘာဂေ ခလိတ္ဝာ ပတတိ, အပိ နု ခော, မဟာရာဇ, မဟာပထဝီ ကုပိတာ တံ ပာတေတီ’’တိ? ‘‘န ဟိ, ဘန္တေ, နတ္ထိ မဟာပထဝိယာ ကောပော ဝာ ပသာဒော ဝာ, အနုနယပ္ပဋိဃဝိပ္ပမုတ္တာ မဟာပထဝီ, သယမေဝ သော အလသော ခလိတ္ဝာ ပတိတောတိ။ ဧဝမေဝ ခော, မဟာရာဇ, နတ္ထိ တထာဂတာနံ ကောပော ဝာ ပသာဒော ဝာ, အနုနယပ္ပဋိဃဝိပ္ပမုတ္တာ တထာဂတာ အရဟန္တော သမ္မာသမ္ဗုဒ္ဓာ, အထ ခော သယံ ကတေနေဝ တေ အတ္တနော အပရာဓေန ပဏာမိတာ။
‘‘Bhāsitampetaṃ, mahārāja, bhagavatā ‘akkodhano vigatakhilohamasmī’ti, paṇāmitā ca therā sāriputtamoggallānā saparisā, tañca pana na kopena, idha, mahārāja, kocideva puriso mahāpathaviyā mūle vā khāṇuke vā pāsāṇe vā kaṭhale vā visame vā bhūmibhāge khalitvā patati, api nu kho, mahārāja, mahāpathavī kupitā taṃ pātetī’’ti? ‘‘Na hi, bhante, natthi mahāpathaviyā kopo vā pasādo vā, anunayappaṭighavippamuttā mahāpathavī, sayameva so alaso khalitvā patitoti. Evameva kho, mahārāja, natthi tathāgatānaṃ kopo vā pasādo vā, anunayappaṭighavippamuttā tathāgatā arahanto sammāsambuddhā, atha kho sayaṃ kateneva te attano aparādhena paṇāmitā.
‘‘ဣဓ ပန, မဟာရာဇ, မဟာသမုဒ္ဒော န မတေန ကုဏပေန သံဝသတိ, ယံ ဟောတိ မဟာသမုဒ္ဒေ မတံ ကုဏပံ, တံ ခိပ္ပမေဝ နိစ္ဆုဘတိ ထလံ ဥသ္သာရေတိ။ အပိ နု ခော, မဟာရာဇ, မဟာသမုဒ္ဒော ကုပိတော တံ ကုဏပံ နိစ္ဆုဘတီ’’တိ? ‘‘န ဟိ, ဘန္တေ, နတ္ထိ မဟာသမုဒ္ဒသ္သ ကောပော ဝာ ပသာဒော ဝာ, အနုနယပ္ပဋိဃဝိပ္ပမုတ္တော မဟာသမုဒ္ဒော’’တိ။ ‘‘ဧဝမေဝ ခော, မဟာရာဇ, နတ္ထိ တထာဂတာနံ ကောပော ဝာ ပသာဒော ဝာ, အနုနယပ္ပဋိဃဝိပ္ပမုတ္တာ တထာဂတာ အရဟန္တော သမ္မာသမ္ဗုဒ္ဓာ, အထ ခော သယံ ကတေနေဝ တေ အတ္တနော အပရာဓေန ပဏာမိတာ။
‘‘Idha pana, mahārāja, mahāsamuddo na matena kuṇapena saṃvasati, yaṃ hoti mahāsamudde mataṃ kuṇapaṃ, taṃ khippameva nicchubhati thalaṃ ussāreti. Api nu kho, mahārāja, mahāsamuddo kupito taṃ kuṇapaṃ nicchubhatī’’ti? ‘‘Na hi, bhante, natthi mahāsamuddassa kopo vā pasādo vā, anunayappaṭighavippamutto mahāsamuddo’’ti. ‘‘Evameva kho, mahārāja, natthi tathāgatānaṃ kopo vā pasādo vā, anunayappaṭighavippamuttā tathāgatā arahanto sammāsambuddhā, atha kho sayaṃ kateneva te attano aparādhena paṇāmitā.
‘‘ယထာ, မဟာရာဇ, ပထဝိယာ ခလိတော ပတီယတိ, ဧဝံ ဇိနသာသနဝရေ ခလိတော ပဏာမီယတိ။ ယထာ, မဟာရာဇ, သမုဒ္ဒေ မတံ ကုဏပံ နိစ္ဆုဘီယတိ , ဧဝံ ဇိနသာသနဝရေ ခလိတော ပဏာမီယတိ။ ယံ ပန တေ, မဟာရာဇ, တထာဂတော ပဏာမေသိ, တေသံ အတ္ထကာမော ဟိတကာမော သုခကာမော ဝိသုဒ္ဓိကာမော ‘ဧဝံ ဣမေ ဇာတိဇရာဗ္ယာဓိမရဏေဟိ ပရိမုစ္စိသ္သန္တီ’တိ ပဏာမေသီ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။
‘‘Yathā, mahārāja, pathaviyā khalito patīyati, evaṃ jinasāsanavare khalito paṇāmīyati. Yathā, mahārāja, samudde mataṃ kuṇapaṃ nicchubhīyati , evaṃ jinasāsanavare khalito paṇāmīyati. Yaṃ pana te, mahārāja, tathāgato paṇāmesi, tesaṃ atthakāmo hitakāmo sukhakāmo visuddhikāmo ‘evaṃ ime jātijarābyādhimaraṇehi parimuccissantī’ti paṇāmesī’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
ဘိက္ခုပဏာမိတပဉ္ဟော ဒ္ဝာဒသမော။
Bhikkhupaṇāmitapañho dvādasamo.
ပဏာမိတဝဂ္ဂော တတိယော။
Paṇāmitavaggo tatiyo.
ဣမသ္မိံ ဝဂ္ဂေ ဒ္ဝာဒသ ပဉ္ဟာ။
Imasmiṃ vagge dvādasa pañhā.
