| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༡༢. བྷིཀྑུཔཎཱམིཏཔཉྷོ
12. Bhikkhupaṇāmitapañho
༡༢. ‘‘བྷནྟེ ནཱགསེན, བྷཱསིཏམྤེཏཾ བྷགཝཏཱ ‘ཨཀྐོདྷནོ ཝིགཏཁིལོཧམསྨཱི’ཏི, པུན ཙ ཏཐཱགཏོ ཐེརེ སཱརིཔུཏྟམོགྒལླཱནེ སཔརིསེ པཎཱམེསི, ཀིཾ ནུ ཁོ, བྷནྟེ ནཱགསེན, ཏཐཱགཏོ ཀུཔིཏོ པརིསཾ པཎཱམེསི, ཨུདཱཧུ ཏུཊྛོ པཎཱམེསི, ཨེཏཾ ཏཱཝ ཛཱནཱཧི ཨིམཾ ནཱམཱཏི? ཡདི, བྷནྟེ ནཱགསེན, ཀུཔིཏོ པརིསཾ པཎཱམེསི, ཏེན ཧི ཏཐཱགཏསྶ ཀོདྷོ ཨཔྤཊིཝཏྟིཏོ, ཡདི ཏུཊྛོ པཎཱམེསི, ཏེན ཧི ཨཝཏྠུསྨིཾ ཨཛཱནནྟེན པཎཱམིཏཱ། ཨཡམྤི ཨུབྷཏོ ཀོཊིཀོ པཉྷོ ཏཝཱནུཔྤཏྟོ, སོ ཏཡཱ ནིབྦཱཧིཏབྦོ’’ཏི།
12. ‘‘Bhante nāgasena, bhāsitampetaṃ bhagavatā ‘akkodhano vigatakhilohamasmī’ti, puna ca tathāgato there sāriputtamoggallāne saparise paṇāmesi, kiṃ nu kho, bhante nāgasena, tathāgato kupito parisaṃ paṇāmesi, udāhu tuṭṭho paṇāmesi, etaṃ tāva jānāhi imaṃ nāmāti? Yadi, bhante nāgasena, kupito parisaṃ paṇāmesi, tena hi tathāgatassa kodho appaṭivattito, yadi tuṭṭho paṇāmesi, tena hi avatthusmiṃ ajānantena paṇāmitā. Ayampi ubhato koṭiko pañho tavānuppatto, so tayā nibbāhitabbo’’ti.
‘‘བྷཱསིཏམྤེཏཾ, མཧཱརཱཛ, བྷགཝཏཱ ‘ཨཀྐོདྷནོ ཝིགཏཁིལོཧམསྨཱི’ཏི, པཎཱམིཏཱ ཙ ཐེརཱ སཱརིཔུཏྟམོགྒལླཱནཱ སཔརིསཱ, ཏཉྩ པན ན ཀོཔེན, ཨིདྷ, མཧཱརཱཛ, ཀོཙིདེཝ པུརིསོ མཧཱཔཐཝིཡཱ མཱུལེ ཝཱ ཁཱཎུཀེ ཝཱ པཱསཱཎེ ཝཱ ཀཋལེ ཝཱ ཝིསམེ ཝཱ བྷཱུམིབྷཱགེ ཁལིཏྭཱ པཏཏི, ཨཔི ནུ ཁོ, མཧཱརཱཛ, མཧཱཔཐཝཱི ཀུཔིཏཱ ཏཾ པཱཏེཏཱི’’ཏི? ‘‘ན ཧི, བྷནྟེ, ནཏྠི མཧཱཔཐཝིཡཱ ཀོཔོ ཝཱ པསཱདོ ཝཱ, ཨནུནཡཔྤཊིགྷཝིཔྤམུཏྟཱ མཧཱཔཐཝཱི, སཡམེཝ སོ ཨལསོ ཁལིཏྭཱ པཏིཏོཏི། ཨེཝམེཝ ཁོ, མཧཱརཱཛ, ནཏྠི ཏཐཱགཏཱནཾ ཀོཔོ ཝཱ པསཱདོ ཝཱ, ཨནུནཡཔྤཊིགྷཝིཔྤམུཏྟཱ ཏཐཱགཏཱ ཨརཧནྟོ སམྨཱསམྦུདྡྷཱ, ཨཐ ཁོ སཡཾ ཀཏེནེཝ ཏེ ཨཏྟནོ ཨཔརཱདྷེན པཎཱམིཏཱ།
‘‘Bhāsitampetaṃ, mahārāja, bhagavatā ‘akkodhano vigatakhilohamasmī’ti, paṇāmitā ca therā sāriputtamoggallānā saparisā, tañca pana na kopena, idha, mahārāja, kocideva puriso mahāpathaviyā mūle vā khāṇuke vā pāsāṇe vā kaṭhale vā visame vā bhūmibhāge khalitvā patati, api nu kho, mahārāja, mahāpathavī kupitā taṃ pātetī’’ti? ‘‘Na hi, bhante, natthi mahāpathaviyā kopo vā pasādo vā, anunayappaṭighavippamuttā mahāpathavī, sayameva so alaso khalitvā patitoti. Evameva kho, mahārāja, natthi tathāgatānaṃ kopo vā pasādo vā, anunayappaṭighavippamuttā tathāgatā arahanto sammāsambuddhā, atha kho sayaṃ kateneva te attano aparādhena paṇāmitā.
‘‘ཨིདྷ པན, མཧཱརཱཛ, མཧཱསམུདྡོ ན མཏེན ཀུཎཔེན སཾཝསཏི, ཡཾ ཧོཏི མཧཱསམུདྡེ མཏཾ ཀུཎཔཾ, ཏཾ ཁིཔྤམེཝ ནིཙྪུབྷཏི ཐལཾ ཨུསྶཱརེཏི། ཨཔི ནུ ཁོ, མཧཱརཱཛ, མཧཱསམུདྡོ ཀུཔིཏོ ཏཾ ཀུཎཔཾ ནིཙྪུབྷཏཱི’’ཏི? ‘‘ན ཧི, བྷནྟེ, ནཏྠི མཧཱསམུདྡསྶ ཀོཔོ ཝཱ པསཱདོ ཝཱ, ཨནུནཡཔྤཊིགྷཝིཔྤམུཏྟོ མཧཱསམུདྡོ’’ཏི། ‘‘ཨེཝམེཝ ཁོ, མཧཱརཱཛ, ནཏྠི ཏཐཱགཏཱནཾ ཀོཔོ ཝཱ པསཱདོ ཝཱ, ཨནུནཡཔྤཊིགྷཝིཔྤམུཏྟཱ ཏཐཱགཏཱ ཨརཧནྟོ སམྨཱསམྦུདྡྷཱ, ཨཐ ཁོ སཡཾ ཀཏེནེཝ ཏེ ཨཏྟནོ ཨཔརཱདྷེན པཎཱམིཏཱ།
‘‘Idha pana, mahārāja, mahāsamuddo na matena kuṇapena saṃvasati, yaṃ hoti mahāsamudde mataṃ kuṇapaṃ, taṃ khippameva nicchubhati thalaṃ ussāreti. Api nu kho, mahārāja, mahāsamuddo kupito taṃ kuṇapaṃ nicchubhatī’’ti? ‘‘Na hi, bhante, natthi mahāsamuddassa kopo vā pasādo vā, anunayappaṭighavippamutto mahāsamuddo’’ti. ‘‘Evameva kho, mahārāja, natthi tathāgatānaṃ kopo vā pasādo vā, anunayappaṭighavippamuttā tathāgatā arahanto sammāsambuddhā, atha kho sayaṃ kateneva te attano aparādhena paṇāmitā.
‘‘ཡཐཱ, མཧཱརཱཛ, པཐཝིཡཱ ཁལིཏོ པཏཱིཡཏི, ཨེཝཾ ཛིནསཱསནཝརེ ཁལིཏོ པཎཱམཱིཡཏི། ཡཐཱ, མཧཱརཱཛ, སམུདྡེ མཏཾ ཀུཎཔཾ ནིཙྪུབྷཱིཡཏི , ཨེཝཾ ཛིནསཱསནཝརེ ཁལིཏོ པཎཱམཱིཡཏི། ཡཾ པན ཏེ, མཧཱརཱཛ, ཏཐཱགཏོ པཎཱམེསི, ཏེསཾ ཨཏྠཀཱམོ ཧིཏཀཱམོ སུཁཀཱམོ ཝིསུདྡྷིཀཱམོ ‘ཨེཝཾ ཨིམེ ཛཱཏིཛརཱབྱཱདྷིམརཎེཧི པརིམུཙྩིསྶནྟཱི’ཏི པཎཱམེསཱི’’ཏི། ‘‘སཱདྷུ, བྷནྟེ ནཱགསེན, ཨེཝམེཏཾ ཏཐཱ སམྤཊིཙྪཱམཱི’’ཏི།
‘‘Yathā, mahārāja, pathaviyā khalito patīyati, evaṃ jinasāsanavare khalito paṇāmīyati. Yathā, mahārāja, samudde mataṃ kuṇapaṃ nicchubhīyati , evaṃ jinasāsanavare khalito paṇāmīyati. Yaṃ pana te, mahārāja, tathāgato paṇāmesi, tesaṃ atthakāmo hitakāmo sukhakāmo visuddhikāmo ‘evaṃ ime jātijarābyādhimaraṇehi parimuccissantī’ti paṇāmesī’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
བྷིཀྑུཔཎཱམིཏཔཉྷོ དྭཱདསམོ།
Bhikkhupaṇāmitapañho dvādasamo.
པཎཱམིཏཝགྒོ ཏཏིཡོ།
Paṇāmitavaggo tatiyo.
ཨིམསྨིཾ ཝགྒེ དྭཱདས པཉྷཱ།
Imasmiṃ vagge dvādasa pañhā.
