| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
7. பி⁴க்கு²ஸங்க⁴பரிஹரணபஞ்ஹோ
7. Bhikkhusaṅghapariharaṇapañho
7. ‘‘ப⁴ந்தே நாக³ஸேன, பா⁴ஸிதம்பேதங் ப⁴க³வதா ‘ததா²க³தஸ்ஸ கோ², ஆனந்த³, ந ஏவங் ஹோதி ‘‘அஹங் பி⁴க்கு²ஸங்க⁴ங் பரிஹரிஸ்ஸாமீ’’’தி வா, ‘‘மமுத்³தே³ஸிகோ பி⁴க்கு²ஸங்கோ⁴’’தி வா’தி. புன ச மெத்தெய்யஸ்ஸ ப⁴க³வதோ ஸபா⁴வகு³ணங் பரிதீ³பயமானேன ப⁴க³வதா ஏவங் ப⁴ணிதங் ‘‘ஸோ அனேகஸஹஸ்ஸங் பி⁴க்கு²ஸங்க⁴ங் பரிஹரிஸ்ஸதி, ஸெய்யதா²பி அஹங் ஏதரஹி அனேகஸதங் பி⁴க்கு²ஸங்க⁴ங் பரிஹராமீ’’தி. யதி³, ப⁴ந்தே நாக³ஸேன, ப⁴க³வதா ப⁴ணிதங் ‘ததா²க³தஸ்ஸ கோ², ஆனந்த³, ந ஏவங் ஹோதி ‘‘அஹங் பி⁴க்கு²ஸங்க⁴ங் பரிஹரிஸ்ஸாமீ’’தி வா, ‘‘மமுத்³தே³ஸிகோ பி⁴க்கு²ஸங்கோ⁴’’தி வா’தி, தேன ஹி அனேகஸதங் பி⁴க்கு²ஸங்க⁴ங் பரிஹராமீதி யங் வசனங், தங் மிச்சா². யதி³ ததா²க³தேன ப⁴ணிதங் ‘ஸோ அனேகஸஹஸ்ஸங் பி⁴க்கு²ஸங்க⁴ங் பரிஹரிஸ்ஸதி, ஸெய்யதா²பி அஹங் ஏதரஹி அனேகஸதங் பி⁴க்கு²ஸங்க⁴ங் பரிஹராமீ’தி, தேன ஹி ததா²க³தஸ்ஸ கோ², ஆனந்த³, ந ஏவங் ஹோதி ‘அஹங் பி⁴க்கு²ஸங்க⁴ங் பரிஹரிஸ்ஸாமீ’தி வா, ‘மமுத்³தே³ஸிகோ பி⁴க்கு²ஸங்கோ⁴’தி வாதி தம்பி வசனங் மிச்சா², அயம்பி உப⁴தோ கோடிகோ பஞ்ஹோ தவானுப்பத்தோ, ஸோ தயா நிப்³பா³ஹிதப்³போ³’’தி.
7. ‘‘Bhante nāgasena, bhāsitampetaṃ bhagavatā ‘tathāgatassa kho, ānanda, na evaṃ hoti ‘‘ahaṃ bhikkhusaṅghaṃ pariharissāmī’’’ti vā, ‘‘mamuddesiko bhikkhusaṅgho’’ti vā’ti. Puna ca metteyyassa bhagavato sabhāvaguṇaṃ paridīpayamānena bhagavatā evaṃ bhaṇitaṃ ‘‘so anekasahassaṃ bhikkhusaṅghaṃ pariharissati, seyyathāpi ahaṃ etarahi anekasataṃ bhikkhusaṅghaṃ pariharāmī’’ti. Yadi, bhante nāgasena, bhagavatā bhaṇitaṃ ‘tathāgatassa kho, ānanda, na evaṃ hoti ‘‘ahaṃ bhikkhusaṅghaṃ pariharissāmī’’ti vā, ‘‘mamuddesiko bhikkhusaṅgho’’ti vā’ti, tena hi anekasataṃ bhikkhusaṅghaṃ pariharāmīti yaṃ vacanaṃ, taṃ micchā. Yadi tathāgatena bhaṇitaṃ ‘so anekasahassaṃ bhikkhusaṅghaṃ pariharissati, seyyathāpi ahaṃ etarahi anekasataṃ bhikkhusaṅghaṃ pariharāmī’ti, tena hi tathāgatassa kho, ānanda, na evaṃ hoti ‘ahaṃ bhikkhusaṅghaṃ pariharissāmī’ti vā, ‘mamuddesiko bhikkhusaṅgho’ti vāti tampi vacanaṃ micchā, ayampi ubhato koṭiko pañho tavānuppatto, so tayā nibbāhitabbo’’ti.
‘‘பா⁴ஸிதம்பேதங், மஹாராஜ, ப⁴க³வதா ‘ததா²க³தஸ்ஸ கோ², ஆனந்த³, ந ஏவங் ஹோதி ‘‘அஹங் பி⁴க்கு²ஸங்க⁴ங் பரிஹரிஸ்ஸாமீ’’தி வா, ‘‘மமுத்³தே³ஸிகோ பி⁴க்கு²ஸங்கோ⁴’’தி வா’தி. புன ச மெத்தெய்யஸ்ஸாபி ப⁴க³வதோ ஸபா⁴வகு³ணங் பரிதீ³பயமானேன ப⁴க³வதா ப⁴ணிதங் ‘ஸோ அனேகஸஹஸ்ஸங் பி⁴க்கு²ஸங்க⁴ங் பரிஹரிஸ்ஸதி, ஸெய்யதா²பி அஹங் ஏதரஹி அனேகஸதங் பி⁴க்கு²ஸங்க⁴ங் பரிஹராமீ’தி. ஏதஸ்மிஞ்ச, மஹாராஜ, பஞ்ஹே ஏகோ அத்தோ² ஸாவஸேஸோ, ஏகோ அத்தோ² நிரவஸேஸோ. ந, மஹாராஜ, ததா²க³தோ பரிஸாய அனுகா³மிகோ, பரிஸா பன ததா²க³தஸ்ஸ அனுகா³மிகா . ஸம்முதி, மஹாராஜ, ஏஸா ‘அஹ’ந்தி ‘மமா’தி, ந பரமத்தோ² ஏஸோ, விக³தங், மஹாராஜ, ததா²க³தஸ்ஸ பேமங், விக³தோ ஸினேஹோ, ‘மய்ஹ’ந்திபி ததா²க³தஸ்ஸ க³ஹணங் நத்தி², உபாதா³ய பன அவஸ்ஸயோ ஹோதி.
‘‘Bhāsitampetaṃ, mahārāja, bhagavatā ‘tathāgatassa kho, ānanda, na evaṃ hoti ‘‘ahaṃ bhikkhusaṅghaṃ pariharissāmī’’ti vā, ‘‘mamuddesiko bhikkhusaṅgho’’ti vā’ti. Puna ca metteyyassāpi bhagavato sabhāvaguṇaṃ paridīpayamānena bhagavatā bhaṇitaṃ ‘so anekasahassaṃ bhikkhusaṅghaṃ pariharissati, seyyathāpi ahaṃ etarahi anekasataṃ bhikkhusaṅghaṃ pariharāmī’ti. Etasmiñca, mahārāja, pañhe eko attho sāvaseso, eko attho niravaseso. Na, mahārāja, tathāgato parisāya anugāmiko, parisā pana tathāgatassa anugāmikā . Sammuti, mahārāja, esā ‘aha’nti ‘mamā’ti, na paramattho eso, vigataṃ, mahārāja, tathāgatassa pemaṃ, vigato sineho, ‘mayha’ntipi tathāgatassa gahaṇaṃ natthi, upādāya pana avassayo hoti.
‘‘யதா², மஹாராஜ, பத²வீ பூ⁴மட்டா²னங் ஸத்தானங் பதிட்டா² ஹோதி உபஸ்ஸயங், பத²விட்டா² சேதே ஸத்தா, ந ச மஹாபத²வியா ‘மய்ஹேதே’தி அபெக்கா² ஹோதி, ஏவமேவ கோ², மஹாராஜ, ததா²க³தோ ஸப்³ப³ஸத்தானங் பதிட்டா² ஹோதி உபஸ்ஸயங், ததா²க³தட்டா² 1 சேதே ஸத்தா, ந ச ததா²க³தஸ்ஸ ‘மய்ஹேதே’தி அபெக்கா² ஹோதி. யதா² வா பன, மஹாராஜ, மஹதிமஹாமேகோ⁴ அபி⁴வஸ்ஸந்தோ திணருக்க²பஸுமனுஸ்ஸானங் வுட்³டி⁴ங் தே³தி ஸந்ததிங் அனுபாலேதி. வுட்டூ²பஜீவினோ சேதே ஸத்தா ஸப்³பே³, ந ச மஹாமேக⁴ஸ்ஸ ‘மய்ஹேதே’தி அபெக்கா² ஹோதி. ஏவமேவ கோ², மஹாராஜ, ததா²க³தோ ஸப்³ப³ஸத்தானங் குஸலத⁴ம்மே ஜனேதி அனுபாலேதி, ஸத்தூ²பஜீவினோ சேதே ஸத்தா ஸப்³பே³, ந ச ததா²க³தஸ்ஸ ‘மய்ஹேதே’தி அபெக்கா² ஹோதி. தங் கிஸ்ஸ ஹேது? அத்தானுதி³ட்டி²யா பஹீனத்தா’’தி.
‘‘Yathā, mahārāja, pathavī bhūmaṭṭhānaṃ sattānaṃ patiṭṭhā hoti upassayaṃ, pathaviṭṭhā cete sattā, na ca mahāpathaviyā ‘mayhete’ti apekkhā hoti, evameva kho, mahārāja, tathāgato sabbasattānaṃ patiṭṭhā hoti upassayaṃ, tathāgataṭṭhā 2 cete sattā, na ca tathāgatassa ‘mayhete’ti apekkhā hoti. Yathā vā pana, mahārāja, mahatimahāmegho abhivassanto tiṇarukkhapasumanussānaṃ vuḍḍhiṃ deti santatiṃ anupāleti. Vuṭṭhūpajīvino cete sattā sabbe, na ca mahāmeghassa ‘mayhete’ti apekkhā hoti. Evameva kho, mahārāja, tathāgato sabbasattānaṃ kusaladhamme janeti anupāleti, satthūpajīvino cete sattā sabbe, na ca tathāgatassa ‘mayhete’ti apekkhā hoti. Taṃ kissa hetu? Attānudiṭṭhiyā pahīnattā’’ti.
‘‘ஸாது⁴, ப⁴ந்தே நாக³ஸேன, ஸுனிப்³பே³டி²தோ பஞ்ஹோ ப³ஹுவிதே⁴ஹி காரணேஹி, க³ம்பீ⁴ரோ உத்தானீகதோ, க³ண்டி² பி⁴ன்னோ, க³ஹனங் அக³ஹனங் கதங், அந்த⁴காரோ ஆலோகோ கதோ, ப⁴க்³கா³ பரவாதா³, ஜினபுத்தானங் சக்கு²ங் உப்பாதி³த’’ந்தி.
‘‘Sādhu, bhante nāgasena, sunibbeṭhito pañho bahuvidhehi kāraṇehi, gambhīro uttānīkato, gaṇṭhi bhinno, gahanaṃ agahanaṃ kataṃ, andhakāro āloko kato, bhaggā paravādā, jinaputtānaṃ cakkhuṃ uppādita’’nti.
பி⁴க்கு²ஸங்க⁴பரிஹரணபஞ்ஹோ ஸத்தமோ.
Bhikkhusaṅghapariharaṇapañho sattamo.
Footnotes:
