| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
8. பி⁴க்கு²ஸுத்தங்
8. Bhikkhusuttaṃ
28. ஸாவத்தி²யங் விஹரதி…பே॰… ‘‘தத்ர கோ²…பே॰… இத⁴, பி⁴க்க²வே, பி⁴க்கு² ஜராமரணங் பஜானாதி, ஜராமரணஸமுத³யங் பஜானாதி, ஜராமரணனிரோத⁴ங் பஜானாதி, ஜராமரணனிரோத⁴கா³மினிங் படிபத³ங் பஜானாதி, ஜாதிங் பஜானாதி…பே॰… ப⁴வங் பஜானாதி… உபாதா³னங் பஜானாதி… தண்ஹங் பஜானாதி… வேத³னங் பஜானாதி… ப²ஸ்ஸங் பஜானாதி… ஸளாயதனங் பஜானாதி… நாமரூபங் பஜானாதி… விஞ்ஞாணங் பஜானாதி… ஸங்கா²ரே பஜானாதி, ஸங்கா²ரஸமுத³யங் பஜானாதி , ஸங்கா²ரனிரோத⁴ங் பஜானாதி, ஸங்கா²ரனிரோத⁴கா³மினிங் படிபத³ங் பஜானாதி.
28. Sāvatthiyaṃ viharati…pe… ‘‘tatra kho…pe… idha, bhikkhave, bhikkhu jarāmaraṇaṃ pajānāti, jarāmaraṇasamudayaṃ pajānāti, jarāmaraṇanirodhaṃ pajānāti, jarāmaraṇanirodhagāminiṃ paṭipadaṃ pajānāti, jātiṃ pajānāti…pe… bhavaṃ pajānāti… upādānaṃ pajānāti… taṇhaṃ pajānāti… vedanaṃ pajānāti… phassaṃ pajānāti… saḷāyatanaṃ pajānāti… nāmarūpaṃ pajānāti… viññāṇaṃ pajānāti… saṅkhāre pajānāti, saṅkhārasamudayaṃ pajānāti , saṅkhāranirodhaṃ pajānāti, saṅkhāranirodhagāminiṃ paṭipadaṃ pajānāti.
‘‘கதமஞ்ச, பி⁴க்க²வே, ஜராமரணங்? யா தேஸங் தேஸங் ஸத்தானங் தம்ஹி தம்ஹி ஸத்தனிகாயே ஜரா ஜீரணதா க²ண்டி³ச்சங் பாலிச்சங் வலித்தசதா ஆயுனோ ஸங்ஹானி இந்த்³ரியானங் பரிபாகோ – அயங் வுச்சதி ஜரா. யா தேஸங் தேஸங் ஸத்தானங் தம்ஹா தம்ஹா ஸத்தனிகாயா சுதி சவனதா பே⁴தோ³ அந்தரதா⁴னங் மச்சு மரணங் காலகிரியா க²ந்தா⁴னங் பே⁴தோ³ களேவரஸ்ஸ நிக்கே²போ; இத³ங் வுச்சதி மரணங். இதி அயங் ச ஜரா இத³ஞ்ச மரணங். இத³ங் வுச்சதி, பி⁴க்க²வே, ஜராமரணங். ஜாதிஸமுத³யா ஜராமரணஸமுத³யோ; ஜாதினிரோதா⁴ ஜராமரணனிரோதோ⁴. அயமேவ அரியோ அட்ட²ங்கி³கோ மக்³கோ³ ஜராமரணனிரோத⁴கா³மினீ படிபதா³. ஸெய்யதி²த³ங் – ஸம்மாதி³ட்டி²…பே॰… ஸம்மாஸமாதி⁴.
‘‘Katamañca, bhikkhave, jarāmaraṇaṃ? Yā tesaṃ tesaṃ sattānaṃ tamhi tamhi sattanikāye jarā jīraṇatā khaṇḍiccaṃ pāliccaṃ valittacatā āyuno saṃhāni indriyānaṃ paripāko – ayaṃ vuccati jarā. Yā tesaṃ tesaṃ sattānaṃ tamhā tamhā sattanikāyā cuti cavanatā bhedo antaradhānaṃ maccu maraṇaṃ kālakiriyā khandhānaṃ bhedo kaḷevarassa nikkhepo; idaṃ vuccati maraṇaṃ. Iti ayaṃ ca jarā idañca maraṇaṃ. Idaṃ vuccati, bhikkhave, jarāmaraṇaṃ. Jātisamudayā jarāmaraṇasamudayo; jātinirodhā jarāmaraṇanirodho. Ayameva ariyo aṭṭhaṅgiko maggo jarāmaraṇanirodhagāminī paṭipadā. Seyyathidaṃ – sammādiṭṭhi…pe… sammāsamādhi.
‘‘கதமா ச, பி⁴க்க²வே, ஜாதி…பே॰… கதமோ ச, பி⁴க்க²வே, ப⁴வோ… கதமஞ்ச, பி⁴க்க²வே, உபாதா³னங்… வேத³னா… ப²ஸ்ஸோ… ஸளாயதனங்… நாமரூபங்… விஞ்ஞாணங்….
‘‘Katamā ca, bhikkhave, jāti…pe… katamo ca, bhikkhave, bhavo… katamañca, bhikkhave, upādānaṃ… vedanā… phasso… saḷāyatanaṃ… nāmarūpaṃ… viññāṇaṃ….
‘‘கதமே ச, பி⁴க்க²வே, ஸங்கா²ரா? தயோமே, பி⁴க்க²வே, ஸங்கா²ரா – காயஸங்கா²ரோ, வசீஸங்கா²ரோ, சித்தஸங்கா²ரோ. இமே வுச்சந்தி, பி⁴க்க²வே, ஸங்கா²ரா. அவிஜ்ஜாஸமுத³யா ஸங்கா²ரஸமுத³யோ; அவிஜ்ஜானிரோதா⁴ ஸங்கா²ரனிரோதோ⁴. அயமேவ அரியோ அட்ட²ங்கி³கோ மக்³கோ³ ஸங்கா²ரனிரோத⁴கா³மினீ படிபதா³. ஸெய்யதி²த³ங் – ஸம்மாதி³ட்டி²…பே॰… ஸம்மாஸமாதி⁴.
‘‘Katame ca, bhikkhave, saṅkhārā? Tayome, bhikkhave, saṅkhārā – kāyasaṅkhāro, vacīsaṅkhāro, cittasaṅkhāro. Ime vuccanti, bhikkhave, saṅkhārā. Avijjāsamudayā saṅkhārasamudayo; avijjānirodhā saṅkhāranirodho. Ayameva ariyo aṭṭhaṅgiko maggo saṅkhāranirodhagāminī paṭipadā. Seyyathidaṃ – sammādiṭṭhi…pe… sammāsamādhi.
‘‘யதோ கோ², பி⁴க்க²வே, பி⁴க்கு² ஏவங் ஜராமரணங் பஜானாதி, ஏவங் ஜராமரணஸமுத³யங் பஜானாதி, ஏவங் ஜராமரணனிரோத⁴ங் பஜானாதி, ஏவங் ஜராமரணனிரோத⁴கா³மினிங் படிபத³ங் பஜானாதி, ஏவங் ஜாதிங் பஜானாதி…பே॰… ப⁴வங்… உபாதா³னங்… தண்ஹங்… வேத³னங்… ப²ஸ்ஸங்… ஸளாயதனங்… நாமரூபங்… விஞ்ஞாணங் … ஸங்கா²ரே… ஸங்கா²ரஸமுத³யங்… ஸங்கா²ரனிரோத⁴ங்… ஏவங் ஸங்கா²ரனிரோத⁴கா³மினிங் படிபத³ங் பஜானாதி. அயங் வுச்சதி, பி⁴க்க²வே, பி⁴க்கு² தி³ட்டி²ஸம்பன்னோ இதிபி, த³ஸ்ஸனஸம்பன்னோ இதிபி, ஆக³தோ இமங் ஸத்³த⁴ம்மங் இதிபி, பஸ்ஸதி இமங் ஸத்³த⁴ம்மங் இதிபி, ஸெக்கே²ன ஞாணேன ஸமன்னாக³தோ இதிபி, ஸெக்கா²ய விஜ்ஜாய ஸமன்னாக³தோ இதிபி, த⁴ம்மஸோதங் ஸமாபன்னோ இதிபி, அரியோ நிப்³பே³தி⁴கபஞ்ஞோ இதிபி, அமதத்³வாரங் ஆஹச்ச திட்ட²தி இதிபீ’’தி. அட்ட²மங்.
‘‘Yato kho, bhikkhave, bhikkhu evaṃ jarāmaraṇaṃ pajānāti, evaṃ jarāmaraṇasamudayaṃ pajānāti, evaṃ jarāmaraṇanirodhaṃ pajānāti, evaṃ jarāmaraṇanirodhagāminiṃ paṭipadaṃ pajānāti, evaṃ jātiṃ pajānāti…pe… bhavaṃ… upādānaṃ… taṇhaṃ… vedanaṃ… phassaṃ… saḷāyatanaṃ… nāmarūpaṃ… viññāṇaṃ … saṅkhāre… saṅkhārasamudayaṃ… saṅkhāranirodhaṃ… evaṃ saṅkhāranirodhagāminiṃ paṭipadaṃ pajānāti. Ayaṃ vuccati, bhikkhave, bhikkhu diṭṭhisampanno itipi, dassanasampanno itipi, āgato imaṃ saddhammaṃ itipi, passati imaṃ saddhammaṃ itipi, sekkhena ñāṇena samannāgato itipi, sekkhāya vijjāya samannāgato itipi, dhammasotaṃ samāpanno itipi, ariyo nibbedhikapañño itipi, amatadvāraṃ āhacca tiṭṭhati itipī’’ti. Aṭṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 7. பச்சயஸுத்தவண்ணனா • 7. Paccayasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. பி⁴க்கு²ஸுத்தவண்ணனா • 8. Bhikkhusuttavaṇṇanā
