| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
5. பி⁴க்கு²ஸுத்தங்
5. Bhikkhusuttaṃ
186. ஸாவத்தி²னிதா³னங். அத² கோ² அஞ்ஞதரோ பி⁴க்கு² யேன ப⁴க³வா தேனுபஸங்கமி…பே॰… ஏகமந்தங் நிஸின்னோ கோ² ஸோ பி⁴க்கு² ப⁴க³வந்தங் ஏதத³வோச – ‘‘‘பொ³ஜ்ஜ²ங்கா³, பொ³ஜ்ஜ²ங்கா³’தி, ப⁴ந்தே, வுச்சந்தி. கித்தாவதா நு கோ², ப⁴ந்தே, ‘பொ³ஜ்ஜ²ங்கா³’தி வுச்சந்தீ’’தி? ‘‘போ³தா⁴ய ஸங்வத்தந்தீதி கோ², பி⁴க்கு², தஸ்மா ‘பொ³ஜ்ஜ²ங்கா³’தி வுச்சந்தி. இத⁴, பி⁴க்கு², ஸதிஸம்பொ³ஜ்ஜ²ங்க³ங் பா⁴வேதி விவேகனிஸ்ஸிதங் விராக³னிஸ்ஸிதங் நிரோத⁴னிஸ்ஸிதங் வொஸ்ஸக்³க³பரிணாமிங்…பே॰… உபெக்கா²ஸம்பொ³ஜ்ஜ²ங்க³ங் பா⁴வேதி விவேகனிஸ்ஸிதங் விராக³னிஸ்ஸிதங் நிரோத⁴னிஸ்ஸிதங் வொஸ்ஸக்³க³பரிணாமிங். தஸ்ஸிமே ஸத்த பொ³ஜ்ஜ²ங்கே³ பா⁴வயதோ காமாஸவாபி சித்தங் விமுச்சதி , ப⁴வாஸவாபி சித்தங் விமுச்சதி, அவிஜ்ஜாஸவாபி சித்தங் விமுச்சதி. விமுத்தஸ்மிங் விமுத்தமிதி ஞாணங் ஹோதி. ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாதி. போ³தா⁴ய ஸங்வத்தந்தீதி, பி⁴க்கு², தஸ்மா ‘பொ³ஜ்ஜ²ங்கா³’தி வுச்சந்தீ’’தி. பஞ்சமங்.
186. Sāvatthinidānaṃ. Atha kho aññataro bhikkhu yena bhagavā tenupasaṅkami…pe… ekamantaṃ nisinno kho so bhikkhu bhagavantaṃ etadavoca – ‘‘‘bojjhaṅgā, bojjhaṅgā’ti, bhante, vuccanti. Kittāvatā nu kho, bhante, ‘bojjhaṅgā’ti vuccantī’’ti? ‘‘Bodhāya saṃvattantīti kho, bhikkhu, tasmā ‘bojjhaṅgā’ti vuccanti. Idha, bhikkhu, satisambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ…pe… upekkhāsambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Tassime satta bojjhaṅge bhāvayato kāmāsavāpi cittaṃ vimuccati , bhavāsavāpi cittaṃ vimuccati, avijjāsavāpi cittaṃ vimuccati. Vimuttasmiṃ vimuttamiti ñāṇaṃ hoti. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānāti. Bodhāya saṃvattantīti, bhikkhu, tasmā ‘bojjhaṅgā’ti vuccantī’’ti. Pañcamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. பி⁴க்கு²ஸுத்தவண்ணனா • 5. Bhikkhusuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5. பி⁴க்கு²ஸுத்தவண்ணனா • 5. Bhikkhusuttavaṇṇanā
