| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၁၀. ဘိက္ခုသုတ္တံ
10. Bhikkhusuttaṃ
၂၆၈. ‘‘ဒ္ဝေပိ မယာ, ဘိက္ခဝေ, ဝေဒနာ ဝုတ္တာ ပရိယာယေန, တိသ္သောပိ မယာ ဝေဒနာ ဝုတ္တာ ပရိယာယေန, ပဉ္စပိ မယာ ဝေဒနာ ဝုတ္တာ ပရိယာယေန, ဆပိ မယာ ဝေဒနာ ဝုတ္တာ ပရိယာယေန, အဋ္ဌာရသာပိ မယာ ဝေဒနာ ဝုတ္တာ ပရိယာယေန, ဆတ္တိံသာပိ မယာ ဝေဒနာ ဝုတ္တာ ပရိယာယေန, အဋ္ဌသတမ္ပိ မယာ ဝေဒနာ ဝုတ္တာ ပရိယာယေန။ ဧဝံ ပရိယာယဒေသိတော, ဘိက္ခဝေ, မယာ ဓမ္မော။ ဧဝံ ပရိယာယဒေသိတေ ခော, ဘိက္ခဝေ, မယာ ဓမ္မေ ယေ အညမညသ္သ သုဘာသိတံ သုလပိတံ န သမနုမညိသ္သန္တိ, န သမနုဇာနိသ္သန္တိ, န သမနုမောဒိသ္သန္တိ, တေသံ ဧတံ ပာဋိကင္ခံ – ဘဏ္ဍနဇာတာ ကလဟဇာတာ ဝိဝာဒာပန္နာ အညမညံ မုခသတ္တီဟိ ဝိတုဒန္တာ ဝိဟရိသ္သန္တီတိ။ ဧဝံ ပရိယာယဒေသိတော, ဘိက္ခဝေ, မယာ ဓမ္မော။ ဧဝံ ပရိယာယဒေသိတေ ခော, ဘိက္ခဝေ, မယာ ဓမ္မေ ယေ အညမညသ္သ သုဘာသိတံ သုလပိတံ သမနုမညိသ္သန္တိ သမနုဇာနိသ္သန္တိ သမနုမောဒိသ္သန္တိ, တေသံ ဧတံ ပာဋိကင္ခံ – သမဂ္ဂာ သမ္မောဒမာနာ အဝိဝဒမာနာ ခီရောဒကီဘူတာ အညမညံ ပိယစက္ခူဟိ သမ္ပသ္သန္တာ ဝိဟရိသ္သန္တီတိ။
268. ‘‘Dvepi mayā, bhikkhave, vedanā vuttā pariyāyena, tissopi mayā vedanā vuttā pariyāyena, pañcapi mayā vedanā vuttā pariyāyena, chapi mayā vedanā vuttā pariyāyena, aṭṭhārasāpi mayā vedanā vuttā pariyāyena, chattiṃsāpi mayā vedanā vuttā pariyāyena, aṭṭhasatampi mayā vedanā vuttā pariyāyena. Evaṃ pariyāyadesito, bhikkhave, mayā dhammo. Evaṃ pariyāyadesite kho, bhikkhave, mayā dhamme ye aññamaññassa subhāsitaṃ sulapitaṃ na samanumaññissanti, na samanujānissanti, na samanumodissanti, tesaṃ etaṃ pāṭikaṅkhaṃ – bhaṇḍanajātā kalahajātā vivādāpannā aññamaññaṃ mukhasattīhi vitudantā viharissantīti. Evaṃ pariyāyadesito, bhikkhave, mayā dhammo. Evaṃ pariyāyadesite kho, bhikkhave, mayā dhamme ye aññamaññassa subhāsitaṃ sulapitaṃ samanumaññissanti samanujānissanti samanumodissanti, tesaṃ etaṃ pāṭikaṅkhaṃ – samaggā sammodamānā avivadamānā khīrodakībhūtā aññamaññaṃ piyacakkhūhi sampassantā viharissantīti.
‘‘ပဉ္စိမေ, ဘိက္ခဝေ, ကာမဂုဏာ။ပေ.။ ဌာနံ ခော ပနေတံ, ဘိက္ခဝေ, ဝိဇ္ဇတိ ယံ အညတိတ္ထိယာ ပရိဗ္ဗာဇကာ ဧဝံ ဝဒေယ္ယုံ – ‘သညာဝေဒယိတနိရောဓံ သမဏော ဂောတမော အာဟ, တဉ္စ သုခသ္မိံ ပညပေတိ။ တယိဒံ ကိံသု, တယိဒံ ကထံသူ’တိ? ဧဝံဝာဒိနော, ဘိက္ခဝေ, အညတိတ္ထိယာ ပရိဗ္ဗာဇကာ ဧဝမသ္သု ဝစနီယာ – ‘န ခော, အာဝုသော, ဘဂဝာ သုခညေဝ ဝေဒနံ သန္ဓာယ သုခသ္မိံ ပညပေတိ။ ယတ္ထ ယတ္ထ, အာဝုသော, သုခံ ဥပလဗ္ဘတိ ယဟိံ ယဟိံ 1, တံ တံ တထာဂတော သုခသ္မိံ ပညပေတီ’’တိ။ ဒသမံ။
‘‘Pañcime, bhikkhave, kāmaguṇā…pe… ṭhānaṃ kho panetaṃ, bhikkhave, vijjati yaṃ aññatitthiyā paribbājakā evaṃ vadeyyuṃ – ‘saññāvedayitanirodhaṃ samaṇo gotamo āha, tañca sukhasmiṃ paññapeti. Tayidaṃ kiṃsu, tayidaṃ kathaṃsū’ti? Evaṃvādino, bhikkhave, aññatitthiyā paribbājakā evamassu vacanīyā – ‘na kho, āvuso, bhagavā sukhaññeva vedanaṃ sandhāya sukhasmiṃ paññapeti. Yattha yattha, āvuso, sukhaṃ upalabbhati yahiṃ yahiṃ 2, taṃ taṃ tathāgato sukhasmiṃ paññapetī’’ti. Dasamaṃ.
ရဟောဂတဝဂ္ဂော ဒုတိယော။
Rahogatavaggo dutiyo.
တသ္သုဒ္ဒာနံ –
Tassuddānaṃ –
ရဟောဂတံ ဒ္ဝေ အာကာသံ၊ အဂာရံ ဒ္ဝေ စ အာနန္ဒာ။
Rahogataṃ dve ākāsaṃ, agāraṃ dve ca ānandā;
သမ္ဗဟုလာ ဒုဝေ ဝုတ္တာ၊ ပဉ္စကင္ဂော စ ဘိက္ခုနာတိ။
Sambahulā duve vuttā, pañcakaṅgo ca bhikkhunāti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၉-၁၀. ပဉ္စကင္ဂသုတ္တာဒိဝဏ္ဏနာ • 9-10. Pañcakaṅgasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၉-၁၀. ပဉ္စကင္ဂသုတ္တာဒိဝဏ္ဏနာ • 9-10. Pañcakaṅgasuttādivaṇṇanā
