Library / Tipiṭaka / তিপিটক • Tipiṭaka / ধম্মপদ-অট্ঠকথা • Dhammapada-aṭṭhakathā

    ২৫. ভিক্খুৰগ্গো

    25. Bhikkhuvaggo

    ১. পঞ্চভিক্খুৰত্থু

    1. Pañcabhikkhuvatthu

    চক্খুনা সংৰরোতি ইমং ধম্মদেসনং সত্থা জেতৰনে ৰিহরন্তো পঞ্চ ভিক্খূ আরব্ভ কথেসি।

    Cakkhunāsaṃvaroti imaṃ dhammadesanaṃ satthā jetavane viharanto pañca bhikkhū ārabbha kathesi.

    তেসু কির একেকো চক্খুদ্ৰারাদীসু পঞ্চসু দ্ৰারেসু একেকমেৰ রক্খি। অথেকদিৰসং সন্নিপতিত্ৰা ‘‘অহং দুরক্খং রক্খামি, অহং দুরক্খং রক্খামী’’তি ৰিৰদিত্ৰা ‘‘সত্থারং পুচ্ছিত্ৰা ইমমত্থং জানিস্সামা’’তি সত্থারং উপসঙ্কমিত্ৰা, ‘‘ভন্তে, মযং চক্খুদ্ৰারাদীনি রক্খন্তা অত্তনো অত্তনো রক্খনদ্ৰারমেৰ দুরক্খন্তি মঞ্ঞাম, কো নু খো অম্হেসু দুরক্খং রক্খতী’’তি পুচ্ছিংসু। সত্থা একং ভিক্খুম্পি অনোসাদেত্ৰা, ‘‘ভিক্খৰে, সব্বানি পেতানি দুরক্খানেৰ, অপি চ খো পন তুম্হে ন ইদানেৰ পঞ্চসু ঠানেসু অসংৰুতা, পুব্বেপি অসংৰুতা, অসংৰুতত্তাযেৰ চ পণ্ডিতানং ওৰাদে অৰত্তিত্ৰা জীৰিতক্খযং পাপুণিত্থা’’তি ৰত্ৰা ‘‘কদা, ভন্তে’’তি তেহি যাচিতো অতীতে তক্কসিলজাতকস্স ৰত্থুং ৰিত্থারেত্ৰা রক্খসীনং ৰসেন রাজকুলে জীৰিতক্খযং পত্তে পত্তাভিসেকেন মহাসত্তেন সেতচ্ছত্তস্স হেট্ঠা রাজাসনে নিসিন্নেন অত্তনো সিরিসম্পত্তিং ওলোকেত্ৰা ‘‘ৰীরিযং নামেতং সত্তেহি কত্তব্বমেৰা’’তি উদানৰসেন উদানিতং –

    Tesu kira ekeko cakkhudvārādīsu pañcasu dvāresu ekekameva rakkhi. Athekadivasaṃ sannipatitvā ‘‘ahaṃ durakkhaṃ rakkhāmi, ahaṃ durakkhaṃ rakkhāmī’’ti vivaditvā ‘‘satthāraṃ pucchitvā imamatthaṃ jānissāmā’’ti satthāraṃ upasaṅkamitvā, ‘‘bhante, mayaṃ cakkhudvārādīni rakkhantā attano attano rakkhanadvārameva durakkhanti maññāma, ko nu kho amhesu durakkhaṃ rakkhatī’’ti pucchiṃsu. Satthā ekaṃ bhikkhumpi anosādetvā, ‘‘bhikkhave, sabbāni petāni durakkhāneva, api ca kho pana tumhe na idāneva pañcasu ṭhānesu asaṃvutā, pubbepi asaṃvutā, asaṃvutattāyeva ca paṇḍitānaṃ ovāde avattitvā jīvitakkhayaṃ pāpuṇitthā’’ti vatvā ‘‘kadā, bhante’’ti tehi yācito atīte takkasilajātakassa vatthuṃ vitthāretvā rakkhasīnaṃ vasena rājakule jīvitakkhayaṃ patte pattābhisekena mahāsattena setacchattassa heṭṭhā rājāsane nisinnena attano sirisampattiṃ oloketvā ‘‘vīriyaṃ nāmetaṃ sattehi kattabbamevā’’ti udānavasena udānitaṃ –

    ‘‘কুসলূপদেসে ধিতিযা দল়্হায চ,

    ‘‘Kusalūpadese dhitiyā daḷhāya ca,

    অনিৰত্তিতত্তাভযভীরুতায চ।

    Anivattitattābhayabhīrutāya ca;

    ন রক্খসীনং ৰসমাগমিম্হসে,

    Na rakkhasīnaṃ vasamāgamimhase,

    স সোত্থিভাৰো মহতা ভযেন মে’’তি॥ (জা॰ ১.১.১৩২) –

    Sa sotthibhāvo mahatā bhayena me’’ti. (jā. 1.1.132) –

    ইমং গাথং দস্সেত্ৰা ‘‘তদাপি তুম্হেৰ পঞ্চ জনা তক্কসিলাযং রজ্জগহণত্থায নিক্খন্তং মহাসত্তং আৰুধহত্থা পরিৰারেত্ৰা মগ্গং গচ্ছন্তা অন্তরামগ্গে রক্খসীহি চক্খুদ্ৰারাদিৰসেন উপনীতেসু রূপারম্মণাদীসু অসংৰুতা পণ্ডিতস্স ওৰাদে অৰত্তিত্ৰা ওলীযন্তা রক্খসীহি খাদিতা জীৰিতক্খযং পাপুণিত্থ। তেসু পন আরম্মণেসু সুসংৰুতো পিট্ঠিতো পিট্ঠিতো অনুবন্ধন্তিং দেৰৰণ্ণিং যক্খিনিং অনাদিযিত্ৰা সোত্থিনা তক্কসিলং গন্ত্ৰা রজ্জং পত্তো রাজা অহমেৰা’’তি জাতকং সমোধানেত্ৰা, ‘‘ভিক্খৰে, ভিক্খুনা নাম সব্বানি দ্ৰারানি সংৰরিতব্বানি। এতানি হি সংৰরন্তো এৰ সব্বদুক্খা পমুচ্চতী’’তি ৰত্ৰা ধম্মং দেসেন্তো ইমা গাথা অভাসি –

    Imaṃ gāthaṃ dassetvā ‘‘tadāpi tumheva pañca janā takkasilāyaṃ rajjagahaṇatthāya nikkhantaṃ mahāsattaṃ āvudhahatthā parivāretvā maggaṃ gacchantā antarāmagge rakkhasīhi cakkhudvārādivasena upanītesu rūpārammaṇādīsu asaṃvutā paṇḍitassa ovāde avattitvā olīyantā rakkhasīhi khāditā jīvitakkhayaṃ pāpuṇittha. Tesu pana ārammaṇesu susaṃvuto piṭṭhito piṭṭhito anubandhantiṃ devavaṇṇiṃ yakkhiniṃ anādiyitvā sotthinā takkasilaṃ gantvā rajjaṃ patto rājā ahamevā’’ti jātakaṃ samodhānetvā, ‘‘bhikkhave, bhikkhunā nāma sabbāni dvārāni saṃvaritabbāni. Etāni hi saṃvaranto eva sabbadukkhā pamuccatī’’ti vatvā dhammaṃ desento imā gāthā abhāsi –

    ৩৬০.

    360.

    ‘‘চক্খুনা সংৰরো সাধু, সাধু সোতেন সংৰরো।

    ‘‘Cakkhunā saṃvaro sādhu, sādhu sotena saṃvaro;

    ঘানেন সংৰরো সাধু, সাধু জিৰ্হায সংৰরো॥

    Ghānena saṃvaro sādhu, sādhu jivhāya saṃvaro.

    ৩৬১.

    361.

    ‘‘কাযেন সংৰরো সাধু, সাধু ৰাচায সংৰরো।

    ‘‘Kāyena saṃvaro sādhu, sādhu vācāya saṃvaro;

    মনসা সংৰরো সাধু, সাধু সব্বত্থ সংৰরো।

    Manasā saṃvaro sādhu, sādhu sabbattha saṃvaro;

    সব্বত্থ সংৰুতো ভিক্খু, সব্বদুক্খা পমুচ্চতী’’তি॥

    Sabbattha saṃvuto bhikkhu, sabbadukkhā pamuccatī’’ti.

    তত্থ চক্খুনাতি যদা হি ভিক্খুনো চক্খুদ্ৰারে রূপারম্মণং আপাথমাগচ্ছতি, তদা ইট্ঠারম্মণে অরজ্জন্তস্স অনিট্ঠারম্মণে অদুস্সন্তস্স অসমপেক্খনেন মোহং অনুপ্পাদেন্তস্স তস্মিং দ্ৰারে সংৰরো থকনং পিদহনং গুত্তি কতা নাম হোতি। তস্স সো এৰরূপো চক্খুনা সংৰরো সাধু। এস নযো সোতদ্ৰারাদীসুপি। চক্খুদ্ৰারাদীসুযেৰ পন সংৰরো ৰা অসংৰরো ৰা নুপ্পজ্জতি, পরতো পন জৰনৰীথিযং এস লব্ভতি। তদা হি অসংৰরো উপ্পজ্জন্তো অস্সদ্ধা অক্খন্তি কোসজ্জং মুট্ঠসচ্চং অঞ্ঞাণন্তি অকুসলৰীথিযং অযং পঞ্চৰিধো লব্ভতি। সংৰরো উপ্পজ্জন্তো সদ্ধা খন্তি ৰীরিযং সতি ঞাণন্তি কুসলৰীথিযং অযং পঞ্চৰিধো লব্ভতি।

    Tattha cakkhunāti yadā hi bhikkhuno cakkhudvāre rūpārammaṇaṃ āpāthamāgacchati, tadā iṭṭhārammaṇe arajjantassa aniṭṭhārammaṇe adussantassa asamapekkhanena mohaṃ anuppādentassa tasmiṃ dvāre saṃvaro thakanaṃ pidahanaṃ gutti katā nāma hoti. Tassa so evarūpo cakkhunā saṃvaro sādhu. Esa nayo sotadvārādīsupi. Cakkhudvārādīsuyeva pana saṃvaro vā asaṃvaro vā nuppajjati, parato pana javanavīthiyaṃ esa labbhati. Tadā hi asaṃvaro uppajjanto assaddhā akkhanti kosajjaṃ muṭṭhasaccaṃ aññāṇanti akusalavīthiyaṃ ayaṃ pañcavidho labbhati. Saṃvaro uppajjanto saddhā khanti vīriyaṃ sati ñāṇanti kusalavīthiyaṃ ayaṃ pañcavidho labbhati.

    কাযেন সংৰরোতি এত্থ পন পসাদকাযোপি চোপনকাযোপি লব্ভতি। উভযম্পি পনেতং কাযদ্ৰারমেৰ। তত্থ পসাদদ্ৰারে সংৰরাসংৰরো কথিতোৰ। চোপনদ্ৰারেপি তংৰত্থুকা পাণাতিপাতঅদিন্নাদানকামেসুমিচ্ছাচারা। তেহি পন সদ্ধিং অকুসলৰীথিযং উপ্পজ্জন্তেহি তং দ্ৰারং অসংৰুতং হোতি, কুসলৰীথিযং উপ্পজ্জন্তেহি পাণাতিপাতাৰেরমণিআদীহি সংৰুতং। সাধু ৰাচাযাতি এত্থাপি চোপনৰাচাপি ৰাচা। তায সদ্ধিং উপ্পজ্জন্তেহি মুসাৰাদাদীহি তং দ্ৰারং অসংৰুতং হোতি, মুসাৰাদাৰেরমণিআদীহি সংৰুতং। মনসা সংৰরোতি এত্থাপি জৰনমনতো অঞ্ঞেন মনেন সদ্ধিং অভিজ্ঝাদযো নত্থি। মনোদ্ৰারে পন জৰনক্খণে উপ্পজ্জমানেহি অভিজ্ঝাদীহি তং দ্ৰারং অসংৰুতং হোতি, অনভিজ্ঝাদীহি সংৰুতং হোতি। সাধু সব্বত্থাতি তেসু চক্খুদ্ৰারাদীসু সব্বেসুপি সংৰরো সাধু। এত্তাৰতা হি অট্ঠ সংৰরদ্ৰারানি অট্ঠ চ অসংৰরদ্ৰারানি কথিতানি। তেসু অট্ঠসু অসংৰরদ্ৰারেসু ঠিতো ভিক্খু সকলৰট্টমূলকদুক্খতো ন মুচ্চতি, সংৰরদ্ৰারেসু পন ঠিতো সব্বস্মাপি ৰট্টমূলকদুক্খা মুচ্চতি। তেন ৰুত্তং – ‘‘সব্বত্থ সংৰুতো ভিক্খু, সব্বদুক্খা পমুচ্চতী’’তি।

    Kāyena saṃvaroti ettha pana pasādakāyopi copanakāyopi labbhati. Ubhayampi panetaṃ kāyadvārameva. Tattha pasādadvāre saṃvarāsaṃvaro kathitova. Copanadvārepi taṃvatthukā pāṇātipātaadinnādānakāmesumicchācārā. Tehi pana saddhiṃ akusalavīthiyaṃ uppajjantehi taṃ dvāraṃ asaṃvutaṃ hoti, kusalavīthiyaṃ uppajjantehi pāṇātipātāveramaṇiādīhi saṃvutaṃ. Sādhu vācāyāti etthāpi copanavācāpi vācā. Tāya saddhiṃ uppajjantehi musāvādādīhi taṃ dvāraṃ asaṃvutaṃ hoti, musāvādāveramaṇiādīhi saṃvutaṃ. Manasā saṃvaroti etthāpi javanamanato aññena manena saddhiṃ abhijjhādayo natthi. Manodvāre pana javanakkhaṇe uppajjamānehi abhijjhādīhi taṃ dvāraṃ asaṃvutaṃ hoti, anabhijjhādīhi saṃvutaṃ hoti. Sādhu sabbatthāti tesu cakkhudvārādīsu sabbesupi saṃvaro sādhu. Ettāvatā hi aṭṭha saṃvaradvārāni aṭṭha ca asaṃvaradvārāni kathitāni. Tesu aṭṭhasu asaṃvaradvāresu ṭhito bhikkhu sakalavaṭṭamūlakadukkhato na muccati, saṃvaradvāresu pana ṭhito sabbasmāpi vaṭṭamūlakadukkhā muccati. Tena vuttaṃ – ‘‘sabbattha saṃvuto bhikkhu, sabbadukkhā pamuccatī’’ti.

    দেসনাৰসানে তে পঞ্চ ভিক্খূ সোতাপত্তিফলে পতিট্ঠহিংসু, সম্পত্তানম্পি সাত্থিকা ধম্মদেসনা অহোসীতি।

    Desanāvasāne te pañca bhikkhū sotāpattiphale patiṭṭhahiṃsu, sampattānampi sātthikā dhammadesanā ahosīti.

    পঞ্চভিক্খুৰত্থু পঠমং।

    Pañcabhikkhuvatthu paṭhamaṃ.

    ২. হংসঘাতকভিক্খুৰত্থু

    2. Haṃsaghātakabhikkhuvatthu

    হত্থসংযতোতি ইমং ধম্মদেসনং সত্থা জেতৰনে ৰিহরন্তো একং হংসঘাতকং ভিক্খুং আরব্ভ কথেসি।

    Hatthasaṃyatoti imaṃ dhammadesanaṃ satthā jetavane viharanto ekaṃ haṃsaghātakaṃ bhikkhuṃ ārabbha kathesi.

    সাৰত্থিৰাসিনো কির দ্ৰে সহাযকা ভিক্খূসু পব্বজিত্ৰা লদ্ধূপসম্পদা যেভুয্যেন একতো ৰিচরন্তি। তে একদিৰসং অচিরৰতিং গন্ত্ৰা ন্হত্ৰা আতপে তপ্পমানা সারণীযকথং কথেন্তা অট্ঠংসু। তস্মিং খণে দ্ৰে হংসা আকাসেন গচ্ছন্তি। অথেকো দহরভিক্খু সক্খরং গহেত্ৰা ‘‘একস্স হংসপোতকস্স অক্খিং পহরিস্সামী’’তি আহ, ইতরো ‘‘ন সক্খিস্সামী’’তি আহ। তিট্ঠতু ইমস্মিং পস্সে অক্খি, পরপস্সে অক্খিং পহরিস্সামীতি। ইদম্পি ন সক্খিস্সসিযেৰাতি। ‘‘তেন হি উপধারেহী’’তি দুতিযং সক্খরং গহেত্ৰা হংসস্স পচ্ছাভাগে খিপি, হংসো সক্খরসদ্দং সুত্ৰা নিৰত্তিত্ৰা ওলোকেসি। অথ নং ইতরং ৰট্টসক্খরং গহেত্ৰা পরপস্সে অক্খিম্হি পহরিত্ৰা ওরিমক্খিনা নিক্খামেসি। হংসো ৰিরৰন্তো পরিৰত্তিত্ৰা তেসং পাদমূলেযেৰ পতি। তত্থ তত্থ ঠিতা ভিক্খূ দিস্ৰা, ‘‘আৰুসো, বুদ্ধসাসনে পব্বজিত্ৰা অননুচ্ছৰিকং ৰো কতং পাণাতিপাতং করোন্তেহী’’তি ৰত্ৰা তে আদায গন্ত্ৰা তথাগতস্স দস্সেসুং।

    Sāvatthivāsino kira dve sahāyakā bhikkhūsu pabbajitvā laddhūpasampadā yebhuyyena ekato vicaranti. Te ekadivasaṃ aciravatiṃ gantvā nhatvā ātape tappamānā sāraṇīyakathaṃ kathentā aṭṭhaṃsu. Tasmiṃ khaṇe dve haṃsā ākāsena gacchanti. Atheko daharabhikkhu sakkharaṃ gahetvā ‘‘ekassa haṃsapotakassa akkhiṃ paharissāmī’’ti āha, itaro ‘‘na sakkhissāmī’’ti āha. Tiṭṭhatu imasmiṃ passe akkhi, parapasse akkhiṃ paharissāmīti. Idampi na sakkhissasiyevāti. ‘‘Tena hi upadhārehī’’ti dutiyaṃ sakkharaṃ gahetvā haṃsassa pacchābhāge khipi, haṃso sakkharasaddaṃ sutvā nivattitvā olokesi. Atha naṃ itaraṃ vaṭṭasakkharaṃ gahetvā parapasse akkhimhi paharitvā orimakkhinā nikkhāmesi. Haṃso viravanto parivattitvā tesaṃ pādamūleyeva pati. Tattha tattha ṭhitā bhikkhū disvā, ‘‘āvuso, buddhasāsane pabbajitvā ananucchavikaṃ vo kataṃ pāṇātipātaṃ karontehī’’ti vatvā te ādāya gantvā tathāgatassa dassesuṃ.

    সত্থা ‘‘সচ্চং কির তযা ভিক্খু পাণাতিপাতো কতো’’তি পুচ্ছিত্ৰা ‘‘সচ্চং, ভন্তে’’তি ৰুত্তে ‘‘ভিক্খু কস্মা এৰরূপে নিয্যানিকসাসনে পব্বজিত্ৰা এৰমকাসি, পোরাণকপণ্ডিতা অনুপ্পন্নে বুদ্ধে অগারমজ্ঝে ৰসমানা অপ্পমত্তকেসুপি ঠানেসু কুক্কুচ্চং করিংসু , ত্ৰং পন এৰরূপে বুদ্ধসাসনে পব্বজিত্ৰা কুক্কুচ্চমত্তম্পি ন অকাসী’’তি ৰত্ৰা তেহি যাচিতো অতীতং আহরি।

    Satthā ‘‘saccaṃ kira tayā bhikkhu pāṇātipāto kato’’ti pucchitvā ‘‘saccaṃ, bhante’’ti vutte ‘‘bhikkhu kasmā evarūpe niyyānikasāsane pabbajitvā evamakāsi, porāṇakapaṇḍitā anuppanne buddhe agāramajjhe vasamānā appamattakesupi ṭhānesu kukkuccaṃ kariṃsu , tvaṃ pana evarūpe buddhasāsane pabbajitvā kukkuccamattampi na akāsī’’ti vatvā tehi yācito atītaṃ āhari.

    অতীতে কুরুরট্ঠে ইন্দপত্তনগরে ধনঞ্চযে রজ্জং কারেন্তে বোধিসত্তো তস্স অগ্গমহেসিযা কুচ্ছিস্মিং পটিসন্ধিং গহেত্ৰা অনুপুব্বেন ৰিঞ্ঞুতং পত্তো তক্কসিলাযং সিপ্পানি উগ্গহেত্ৰা পিতরা উপরজ্জে পতিট্ঠাপিতো অপরভাগে পিতু অচ্চযেন রজ্জং পত্ৰা দস রাজধম্মে অকোপেন্তো কুরুধম্মে ৰত্তিত্থ। কুরুধম্মো নাম পঞ্চসীলানি, তানি বোধিসত্তো পরিসুদ্ধানি কত্ৰা রক্খি। যথা চ বোধিসত্তো, এৰমস্স মাতা অগ্গমহেসী কনিট্ঠভাতা উপরাজা পুরোহিতো ব্রাহ্মণো রজ্জুগাহকো অমচ্চো সারথি সেট্ঠি দোণমাপকো মহামত্তো দোৰারিকো নগরসোভিনী ৰণ্ণদাসীতি এৰমেতেসু একাদসসু জনেসু কুরুধম্মং রক্খন্তেসু কলিঙ্গরট্ঠে দন্তপুরনগরে কলিঙ্গে রজ্জং কারেন্তে তস্মিং রট্ঠে দেৰো ন ৰস্সি। মহাসত্তস্স পন অঞ্জনসন্নিভো নাম মঙ্গলহত্থী মহাপুঞ্ঞো হোতি। রট্ঠৰাসিনো ‘‘তস্মিং আনীতে দেৰো ৰস্সিস্সতী’’তি সঞ্ঞায রঞ্ঞো আরোচযিংসু। রাজা তস্স হত্থিস্স আনযনত্থায ব্রাহ্মণে পহিণি। তে গন্ত্ৰা মহাসত্তং হত্থিং যাচিংসু। সত্থা তেসং যাচনকারণং দস্সেতুং আহ –

    Atīte kururaṭṭhe indapattanagare dhanañcaye rajjaṃ kārente bodhisatto tassa aggamahesiyā kucchismiṃ paṭisandhiṃ gahetvā anupubbena viññutaṃ patto takkasilāyaṃ sippāni uggahetvā pitarā uparajje patiṭṭhāpito aparabhāge pitu accayena rajjaṃ patvā dasa rājadhamme akopento kurudhamme vattittha. Kurudhammo nāma pañcasīlāni, tāni bodhisatto parisuddhāni katvā rakkhi. Yathā ca bodhisatto, evamassa mātā aggamahesī kaniṭṭhabhātā uparājā purohito brāhmaṇo rajjugāhako amacco sārathi seṭṭhi doṇamāpako mahāmatto dovāriko nagarasobhinī vaṇṇadāsīti evametesu ekādasasu janesu kurudhammaṃ rakkhantesu kaliṅgaraṭṭhe dantapuranagare kaliṅge rajjaṃ kārente tasmiṃ raṭṭhe devo na vassi. Mahāsattassa pana añjanasannibho nāma maṅgalahatthī mahāpuñño hoti. Raṭṭhavāsino ‘‘tasmiṃ ānīte devo vassissatī’’ti saññāya rañño ārocayiṃsu. Rājā tassa hatthissa ānayanatthāya brāhmaṇe pahiṇi. Te gantvā mahāsattaṃ hatthiṃ yāciṃsu. Satthā tesaṃ yācanakāraṇaṃ dassetuṃ āha –

    ‘‘তৰ সদ্ধঞ্চ সীলঞ্চ, ৰিদিত্ৰান জনাধিপ।

    ‘‘Tava saddhañca sīlañca, viditvāna janādhipa;

    ৰণ্ণং অঞ্জনৰণ্ণেন, কলিঙ্গস্মিং নিমিম্হসে’’তি॥ (জা॰ ১.৩.৭৬) –

    Vaṇṇaṃ añjanavaṇṇena, kaliṅgasmiṃ nimimhase’’ti. (jā. 1.3.76) –

    ইমং তিকনিপাতে জাতকং কথেসি। হত্থিম্হি পন আনীতেপি দেৰে অৰস্সন্তে ‘‘সো রাজা কুরুধম্মং রক্খতি, তেনস্স রট্ঠে দেৰো ৰস্সতী’’তি সঞ্ঞায ‘‘যং সো কুরুধম্মং রক্খতি, তং সুৰণ্ণপট্টে লিখিত্ৰা আনেথা’’তি পুন কালিঙ্গো ব্রাহ্মণে চ অমচ্চে চ পেসেসি। তেসু গন্ত্ৰা যাচন্তেসু রাজানং আদিং কত্ৰা সব্বেপি তে অত্তনো অত্তনো সীলেসু কিঞ্চি কুক্কুচ্চমত্তং কত্ৰা ‘‘অপরিসুদ্ধং নো সীল’’ন্তি পটিক্খিপিত্ৰাপি ‘‘ন এত্তাৰতা সীলভেদো হোতী’’তি তেহি পুনপ্পুনং যাচিতা অত্তনো অত্তনো সীলানি কথযিংসু। কালিঙ্গো সুৰণ্ণপট্টে লিখাপেত্ৰা আভতং কুরুধম্মং দিস্ৰাৰ সমাদায সাধুকং পূরেসি। তস্স রট্ঠে দেৰো পাৰস্সি, রট্ঠং খেমং সুভিক্খং অহোসি। সত্থা ইমং অতীতং আহরিত্ৰা –

    Imaṃ tikanipāte jātakaṃ kathesi. Hatthimhi pana ānītepi deve avassante ‘‘so rājā kurudhammaṃ rakkhati, tenassa raṭṭhe devo vassatī’’ti saññāya ‘‘yaṃ so kurudhammaṃ rakkhati, taṃ suvaṇṇapaṭṭe likhitvā ānethā’’ti puna kāliṅgo brāhmaṇe ca amacce ca pesesi. Tesu gantvā yācantesu rājānaṃ ādiṃ katvā sabbepi te attano attano sīlesu kiñci kukkuccamattaṃ katvā ‘‘aparisuddhaṃ no sīla’’nti paṭikkhipitvāpi ‘‘na ettāvatā sīlabhedo hotī’’ti tehi punappunaṃ yācitā attano attano sīlāni kathayiṃsu. Kāliṅgo suvaṇṇapaṭṭe likhāpetvā ābhataṃ kurudhammaṃ disvāva samādāya sādhukaṃ pūresi. Tassa raṭṭhe devo pāvassi, raṭṭhaṃ khemaṃ subhikkhaṃ ahosi. Satthā imaṃ atītaṃ āharitvā –

    ‘‘গণিকা উপ্পলৰণ্ণা, পুণ্ণো দোৰারিকো তদা।

    ‘‘Gaṇikā uppalavaṇṇā, puṇṇo dovāriko tadā;

    রজ্জুগাহো চ কচ্চানো, দোণমাপকো চ কোলিতো॥

    Rajjugāho ca kaccāno, doṇamāpako ca kolito.

    ‘‘সারিপুত্তো তদা সেট্ঠী, অনুরুদ্ধো চ সারথী।

    ‘‘Sāriputto tadā seṭṭhī, anuruddho ca sārathī;

    ব্রাহ্মণো কস্সপো থেরো, উপরাজানন্দপণ্ডিতো॥

    Brāhmaṇo kassapo thero, uparājānandapaṇḍito.

    ‘‘মহেসী রাহুলমাতা, মাযাদেৰী জনেত্তিকা।

    ‘‘Mahesī rāhulamātā, māyādevī janettikā;

    কুরুরাজা বোধিসত্তো, এৰং ধারেথ জাতক’’ন্তি॥ –

    Kururājā bodhisatto, evaṃ dhāretha jātaka’’nti. –

    জাতকং সমোধানেত্ৰা ‘‘ভিক্খু এৰং পুব্বেপি পণ্ডিতা অপ্পমত্তকেপি কুক্কুচ্চে উপ্পন্নে অত্তনো সীলভেদে আসঙ্কং করিংসু, ত্ৰং পন মাদিসস্স বুদ্ধস্স সাসনে পব্বজিত্ৰা পাণাতিপাতং করোন্তো অতিভারিযং কম্মমকাসি, ভিক্খুনা নাম হত্থেহি পাদেহি ৰাচায চ সংযতেন ভৰিতব্ব’’ন্তি ৰত্ৰা ইমং গাথমাহ –

    Jātakaṃ samodhānetvā ‘‘bhikkhu evaṃ pubbepi paṇḍitā appamattakepi kukkucce uppanne attano sīlabhede āsaṅkaṃ kariṃsu, tvaṃ pana mādisassa buddhassa sāsane pabbajitvā pāṇātipātaṃ karonto atibhāriyaṃ kammamakāsi, bhikkhunā nāma hatthehi pādehi vācāya ca saṃyatena bhavitabba’’nti vatvā imaṃ gāthamāha –

    ৩৬২.

    362.

    ‘‘হত্থসংযতো পাদসংযতো,

    ‘‘Hatthasaṃyato pādasaṃyato,

    ৰাচাসংযতো সংযতুত্তমো।

    Vācāsaṃyato saṃyatuttamo;

    অজ্ঝত্তরতো সমাহিতো,

    Ajjhattarato samāhito,

    একো সন্তুসিতো তমাহু ভিক্খু’’ন্তি॥

    Eko santusito tamāhu bhikkhu’’nti.

    তত্থ হত্থসংযতোতি হত্থকীল়াপনাদীনং ৰা হত্থেন পরেসং পহরণাদীনং ৰা অভাৰেন হত্থসংযতো। দুতিযপদেপি এসেৰ নযো। ৰাচায পন মুসাৰাদাদীনং অকরণতো ৰাচায সংযতো। সংযতুত্তমোতি সংযতত্তভাৰো, কাযচলনসীসুক্খিপনভমুকৰিকারাদীনং অকারকোতি অত্থো। অজ্ঝত্তরতোতি গোচরজ্ঝত্তসঙ্খাতায কম্মট্ঠানভাৰনায রতো। সমাহিতোতি সুট্ঠু ঠপিতো। একো সন্তুসিতোতি একৰিহারী হুত্ৰা সুট্ঠু তুসিতো ৰিপস্সনাচারতো পট্ঠায অত্তনো অধিগমেন তুট্ঠমানসো। পুথুজ্জনকল্যাণকঞ্হি আদিং কত্ৰা সব্বেপি সেখা অত্তনো অধিগমেন সন্তুস্সন্তীতি সন্তুসিতা, অরহা পন একন্তসন্তুসিতোৰ। তং সন্ধাযেতং ৰুত্তং।

    Tattha hatthasaṃyatoti hatthakīḷāpanādīnaṃ vā hatthena paresaṃ paharaṇādīnaṃ vā abhāvena hatthasaṃyato. Dutiyapadepi eseva nayo. Vācāya pana musāvādādīnaṃ akaraṇato vācāya saṃyato. Saṃyatuttamoti saṃyatattabhāvo, kāyacalanasīsukkhipanabhamukavikārādīnaṃ akārakoti attho. Ajjhattaratoti gocarajjhattasaṅkhātāya kammaṭṭhānabhāvanāya rato. Samāhitoti suṭṭhu ṭhapito. Eko santusitoti ekavihārī hutvā suṭṭhu tusito vipassanācārato paṭṭhāya attano adhigamena tuṭṭhamānaso. Puthujjanakalyāṇakañhi ādiṃ katvā sabbepi sekhā attano adhigamena santussantīti santusitā, arahā pana ekantasantusitova. Taṃ sandhāyetaṃ vuttaṃ.

    দেসনাৰসানে বহূ সোতাপত্তিফলাদীনি পাপুণিংসূতি।

    Desanāvasāne bahū sotāpattiphalādīni pāpuṇiṃsūti.

    হংসঘাতকভিক্খুৰত্থু দুতিযং।

    Haṃsaghātakabhikkhuvatthu dutiyaṃ.

    ৩. কোকালিকৰত্থু

    3. Kokālikavatthu

    যো মুখসংযতোতি ইমং ধম্মদেসনং সত্থা জেতৰনে ৰিহরন্তো কোকালিকং আরব্ভ কথেসি। ৰত্থু ‘‘অথ খো কোকালিকো ভিক্খু যেন ভগৰা তেনুপসঙ্কমী’’তি সুত্তে (সং॰ নি॰ ১.১৮১; সু॰ নি॰ কোকালিকসুত্ত; অ॰ নি॰ ১০.৮৯) আগতমেৰ। অত্থোপিস্স অট্ঠকথায ৰুত্তনযেনেৰ ৰেদিতব্বো।

    Yomukhasaṃyatoti imaṃ dhammadesanaṃ satthā jetavane viharanto kokālikaṃ ārabbha kathesi. Vatthu ‘‘atha kho kokāliko bhikkhu yena bhagavā tenupasaṅkamī’’ti sutte (saṃ. ni. 1.181; su. ni. kokālikasutta; a. ni. 10.89) āgatameva. Atthopissa aṭṭhakathāya vuttanayeneva veditabbo.

    কোকালিকে পন পদুমনিরযে উপ্পন্নে ধম্মসভাযং কথং সমুট্ঠাপেসুং ‘‘অহো কোকালিকো ভিক্খু অত্তনো মুখং নিস্সায ৰিনাসং পত্তো, দ্ৰে অগ্গসাৰকে অক্কোসন্তস্সেৰ হিস্স পথৰী ৰিৰরং অদাসী’’তি। সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰ, পুব্বেপি কোকালিকো ভিক্খু অত্তনো মুখমেৰ নিস্সায নট্ঠো’’তি ৰত্ৰা তমত্থং সোতুকামেহি ভিক্খূহি যাচিতো তস্স পকাসনত্থং অতীতং আহরি।

    Kokālike pana padumaniraye uppanne dhammasabhāyaṃ kathaṃ samuṭṭhāpesuṃ ‘‘aho kokāliko bhikkhu attano mukhaṃ nissāya vināsaṃ patto, dve aggasāvake akkosantasseva hissa pathavī vivaraṃ adāsī’’ti. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte ‘‘na, bhikkhave, idāneva, pubbepi kokāliko bhikkhu attano mukhameva nissāya naṭṭho’’ti vatvā tamatthaṃ sotukāmehi bhikkhūhi yācito tassa pakāsanatthaṃ atītaṃ āhari.

    অতীতে হিমৰন্তপদেসে একস্মিং সরে কচ্ছপো ৰসতি। দ্ৰে হংসপোতকা গোচরায চরন্তা তেন সদ্ধিং ৰিস্সাসং কত্ৰা দল়্হৰিস্সাসিকা হুত্ৰা একদিৰসং কচ্ছপং পুচ্ছিংসু – ‘‘সম্ম, অম্হাকং হিমৰন্তে চিত্তকূটপব্বততলে কঞ্চনগুহায ৰসনট্ঠানং, রমণিযো পদেসো, গচ্ছিস্সসি অম্হেহি সদ্ধি’’ন্তি। ‘‘সম্ম, অহং কথং গমিস্সামী’’তি? ‘‘মযং তং নেস্সাম, সচে মুখং রক্খিতুং সক্খিস্সসী’’তি। ‘‘রক্খিস্সামি, সম্মা গহেত্ৰা মং গচ্ছথা’’তি। তে ‘‘সাধূ’’তি ৰত্ৰা একং দণ্ডকং কচ্ছপেন ডংসাপেত্ৰা সযং তস্স উভো কোটিযো ডংসিত্ৰা আকাসং পক্খন্দিংসু। তং তথা হংসেহি নীযমানং গামদারকা দিস্ৰা ‘‘দ্ৰে হংসা কচ্ছপং দণ্ডেন হরন্তী’’তি আহংসু। কচ্ছপো ‘‘যদি মং সহাযকা নেন্তি, তুম্হাকং এত্থ কিং হোতি দুট্ঠচেটকা’’তি ৰত্তুকামো হংসানং সীঘৰেগতায বারাণসিনগরে রাজনিৰেসনস্স উপরিভাগং সম্পত্তকালে দট্ঠট্ঠানতো দণ্ডকং ৰিস্সজ্জেত্ৰা আকাসঙ্গণে পতিত্ৰা দ্ৰেধা ভিজ্জি। সত্থা ইমং অতীতং আহরিত্ৰা –

    Atīte himavantapadese ekasmiṃ sare kacchapo vasati. Dve haṃsapotakā gocarāya carantā tena saddhiṃ vissāsaṃ katvā daḷhavissāsikā hutvā ekadivasaṃ kacchapaṃ pucchiṃsu – ‘‘samma, amhākaṃ himavante cittakūṭapabbatatale kañcanaguhāya vasanaṭṭhānaṃ, ramaṇiyo padeso, gacchissasi amhehi saddhi’’nti. ‘‘Samma, ahaṃ kathaṃ gamissāmī’’ti? ‘‘Mayaṃ taṃ nessāma, sace mukhaṃ rakkhituṃ sakkhissasī’’ti. ‘‘Rakkhissāmi, sammā gahetvā maṃ gacchathā’’ti. Te ‘‘sādhū’’ti vatvā ekaṃ daṇḍakaṃ kacchapena ḍaṃsāpetvā sayaṃ tassa ubho koṭiyo ḍaṃsitvā ākāsaṃ pakkhandiṃsu. Taṃ tathā haṃsehi nīyamānaṃ gāmadārakā disvā ‘‘dve haṃsā kacchapaṃ daṇḍena harantī’’ti āhaṃsu. Kacchapo ‘‘yadi maṃ sahāyakā nenti, tumhākaṃ ettha kiṃ hoti duṭṭhaceṭakā’’ti vattukāmo haṃsānaṃ sīghavegatāya bārāṇasinagare rājanivesanassa uparibhāgaṃ sampattakāle daṭṭhaṭṭhānato daṇḍakaṃ vissajjetvā ākāsaṅgaṇe patitvā dvedhā bhijji. Satthā imaṃ atītaṃ āharitvā –

    ‘‘অৰধী ৰত অত্তানং, কচ্ছপো ব্যাহরং গিরং।

    ‘‘Avadhī vata attānaṃ, kacchapo byāharaṃ giraṃ;

    সুগ্গহীতস্মিং কট্ঠস্মিং, ৰাচায সকিযাৰধী॥

    Suggahītasmiṃ kaṭṭhasmiṃ, vācāya sakiyāvadhī.

    ‘‘এতম্পি দিস্ৰা নরৰীরিযসেট্ঠ,

    ‘‘Etampi disvā naravīriyaseṭṭha,

    ৰাচং পমুঞ্চে কুসলং নাতিৰেলং।

    Vācaṃ pamuñce kusalaṃ nātivelaṃ;

    পস্সসি বহুভাণেন, কচ্ছপং ব্যসনং গত’’ন্তি॥ (জা॰ ১.২.১২৯-১৩০)।

    Passasi bahubhāṇena, kacchapaṃ byasanaṃ gata’’nti. (jā. 1.2.129-130);

    ইমং দুকনিপাতে বহুভাণিজাতকং ৰিত্থারেত্ৰা, ‘‘ভিক্খৰে, ভিক্খুনা নাম মুখসংযতেন সমচারিনা অনুদ্ধতেন নিব্বুতচিত্তেন ভৰিতব্ব’’ন্তি ৰত্ৰা ইমং গাথমাহ –

    Imaṃ dukanipāte bahubhāṇijātakaṃ vitthāretvā, ‘‘bhikkhave, bhikkhunā nāma mukhasaṃyatena samacārinā anuddhatena nibbutacittena bhavitabba’’nti vatvā imaṃ gāthamāha –

    ৩৬৩.

    363.

    ‘‘যো মুখসংযতো ভিক্খু, মন্তভাণী অনুদ্ধতো।

    ‘‘Yo mukhasaṃyato bhikkhu, mantabhāṇī anuddhato;

    অত্থং ধম্মঞ্চ দীপেতি, মধুরং তস্স ভাসিত’’ন্তি॥

    Atthaṃ dhammañca dīpeti, madhuraṃ tassa bhāsita’’nti.

    তত্থ মুখসংযতোতি দাসচণ্ডালাদযোপি ‘‘ত্ৰং দুজ্জাতো, ত্ৰং দুস্সীলো’’তিআদীনং অৰচনতায মুখেন সংযতো। মন্তভাণীতি মন্তা ৰুচ্চতি পঞ্ঞা, তায ভণনসীলো। অনুদ্ধতোতি নিব্বুতচিত্তো। অত্থং ধম্মঞ্চ দীপেতীতি ভাসিতত্থঞ্চেৰ দেসনাধম্মঞ্চ কথেতি। মধুরন্তি এৰরূপস্স ভিক্খুনো ভাসিতং মধুরং নাম। যো পন অত্থমেৰ সম্পাদেতি, ন পাল়িং, পাল়িংযেৰ সম্পাদেতি, ন অত্থং, উভযং ৰা পন ন সম্পাদেতি, তস্স ভাসিতং মধুরং নাম ন হোতীতি।

    Tattha mukhasaṃyatoti dāsacaṇḍālādayopi ‘‘tvaṃ dujjāto, tvaṃ dussīlo’’tiādīnaṃ avacanatāya mukhena saṃyato. Mantabhāṇīti mantā vuccati paññā, tāya bhaṇanasīlo. Anuddhatoti nibbutacitto. Atthaṃ dhammañca dīpetīti bhāsitatthañceva desanādhammañca katheti. Madhuranti evarūpassa bhikkhuno bhāsitaṃ madhuraṃ nāma. Yo pana atthameva sampādeti, na pāḷiṃ, pāḷiṃyeva sampādeti, na atthaṃ, ubhayaṃ vā pana na sampādeti, tassa bhāsitaṃ madhuraṃ nāma na hotīti.

    দেসনাৰসানে বহূ সোতাপত্তিফলাদীনি পাপুণিংসূতি।

    Desanāvasāne bahū sotāpattiphalādīni pāpuṇiṃsūti.

    কোকালিকৰত্থু ততিযং।

    Kokālikavatthu tatiyaṃ.

    ৪. ধম্মারামত্থেরৰত্থু

    4. Dhammārāmattheravatthu

    ধম্মারামোতি ইমং ধম্মদেসনং সত্থা জেতৰনে ৰিহরন্তো ধম্মারামত্থেরং আরব্ভ কথেসি।

    Dhammārāmoti imaṃ dhammadesanaṃ satthā jetavane viharanto dhammārāmattheraṃ ārabbha kathesi.

    সত্থারা কির ‘‘ইতো মে চতুমাসচ্চযেন পরিনিব্বানং ভৰিস্সতী’’তি আরোচিতে অনেকসহস্সা ভিক্খূ সত্থারং পরিৰারেত্ৰা ৰিচরিংসু। তত্থ পুথুজ্জনা ভিক্খূ অস্সূনি সন্ধারেতুং নাসক্খিংসু, খীণাসৰানং ধম্মসংৰেগো উপ্পজ্জি। সব্বেপি ‘‘কিং নু খো করিস্সামা’’তি ৰগ্গবন্ধনেন ৰিচরন্তি। একো পন ধম্মারামো নাম ভিক্খু ভিক্খূনং সন্তিকং ন উপসঙ্কমতি। ভিক্খূহি ‘‘কিং, আৰুসো’’তি ৰুচ্চমানো পটিৰচনম্পি অদত্ৰা ‘‘সত্থা কির চতুমাসচ্চযেন পরিনিব্বাযিস্সতি, অহঞ্চম্হি অৰীতরাগো, সত্থরি ধরমানেযেৰ ৰাযমিত্ৰা অরহত্তং পাপুণিস্সামী’’তি এককোৰ ৰিহরন্তো সত্থারা দেসিতং ধম্মং আৰজ্জেতি চিন্তেতি অনুস্সরতি। ভিক্খূ তথাগতস্স আরোচেসুং – ‘‘ভন্তে, ধম্মারামস্স তুম্হেসু সিনেহমত্তম্পি নত্থি, ‘সত্থা কির পরিনিব্বাযিস্সতি, কিং নু খো করিস্সামা’তি অম্হেহি সদ্ধিং সম্মন্তনমত্তম্পি ন করোতী’’তি। সত্থা তং পক্কোসাপেত্ৰা ‘‘সচ্চং কির ত্ৰং এৰং করোসী’’তি পুচ্ছি। ‘‘সচ্চং, ভন্তে’’তি। ‘‘কিং কারণা’’তি? তুম্হে কির চতুমাসচ্চযেন পরিনিব্বাযিস্সথ, অহঞ্চম্হি অৰীতরাগো, তুম্হেসু ধরন্তেসুযেৰ ৰাযমিত্ৰা অরহত্তং পাপুণিস্সামীতি তুম্হেহি দেসিতং ধম্মং আৰজ্জামি চিন্তেমি অনুস্সরামীতি।

    Satthārā kira ‘‘ito me catumāsaccayena parinibbānaṃ bhavissatī’’ti ārocite anekasahassā bhikkhū satthāraṃ parivāretvā vicariṃsu. Tattha puthujjanā bhikkhū assūni sandhāretuṃ nāsakkhiṃsu, khīṇāsavānaṃ dhammasaṃvego uppajji. Sabbepi ‘‘kiṃ nu kho karissāmā’’ti vaggabandhanena vicaranti. Eko pana dhammārāmo nāma bhikkhu bhikkhūnaṃ santikaṃ na upasaṅkamati. Bhikkhūhi ‘‘kiṃ, āvuso’’ti vuccamāno paṭivacanampi adatvā ‘‘satthā kira catumāsaccayena parinibbāyissati, ahañcamhi avītarāgo, satthari dharamāneyeva vāyamitvā arahattaṃ pāpuṇissāmī’’ti ekakova viharanto satthārā desitaṃ dhammaṃ āvajjeti cinteti anussarati. Bhikkhū tathāgatassa ārocesuṃ – ‘‘bhante, dhammārāmassa tumhesu sinehamattampi natthi, ‘satthā kira parinibbāyissati, kiṃ nu kho karissāmā’ti amhehi saddhiṃ sammantanamattampi na karotī’’ti. Satthā taṃ pakkosāpetvā ‘‘saccaṃ kira tvaṃ evaṃ karosī’’ti pucchi. ‘‘Saccaṃ, bhante’’ti. ‘‘Kiṃ kāraṇā’’ti? Tumhe kira catumāsaccayena parinibbāyissatha, ahañcamhi avītarāgo, tumhesu dharantesuyeva vāyamitvā arahattaṃ pāpuṇissāmīti tumhehi desitaṃ dhammaṃ āvajjāmi cintemi anussarāmīti.

    সত্থা ‘‘সাধু সাধূ’’তি তস্স সাধুকারং দত্ৰা, ‘‘ভিক্খৰে, অঞ্ঞেনাপি মযি সিনেহৰন্তেন ভিক্খুনা নাম ধম্মারামসদিসেনেৰ ভৰিতব্বং। ন হি ময্হং মালাগন্ধাদীহি পূজং করোন্তা মম পূজং করোন্তি নাম, ধম্মানুধম্মং পটিপজ্জন্তাযেৰ পন মং পূজেন্তি নামা’’তি ৰত্ৰা ইমং গাথমাহ –

    Satthā ‘‘sādhu sādhū’’ti tassa sādhukāraṃ datvā, ‘‘bhikkhave, aññenāpi mayi sinehavantena bhikkhunā nāma dhammārāmasadiseneva bhavitabbaṃ. Na hi mayhaṃ mālāgandhādīhi pūjaṃ karontā mama pūjaṃ karonti nāma, dhammānudhammaṃ paṭipajjantāyeva pana maṃ pūjenti nāmā’’ti vatvā imaṃ gāthamāha –

    ৩৬৪.

    364.

    ‘‘ধম্মারামো ধম্মরতো, ধম্মং অনুৰিচিন্তযং।

    ‘‘Dhammārāmo dhammarato, dhammaṃ anuvicintayaṃ;

    ধম্মং অনুস্সরং ভিক্খু, সদ্ধম্মা ন পরিহাযতী’’তি॥

    Dhammaṃ anussaraṃ bhikkhu, saddhammā na parihāyatī’’ti.

    তত্থ নিৰাসনট্ঠেন সমথৰিপস্সনাধম্মো আরামো অস্সাতি ধম্মারামো। তস্মিংযেৰ ধম্মে রতোতি ধম্মরতো। তস্সেৰ ধম্মস্স পুনপ্পুনং ৰিচিন্তনতায ধম্মং অনুৰিচিন্তযং, তং ধম্মং আৰজ্জেন্তো মনসিকরোন্তোতি অত্থো। অনুস্সরন্তি তমেৰ ধম্মং অনুস্সরন্তো। সদ্ধম্মাতি এৰরূপো ভিক্খু সত্ততিংসভেদা বোধিপক্খিযধম্মা নৰৰিধলোকুত্তরধম্মা চ ন পরিহাযতীতি অত্থো।

    Tattha nivāsanaṭṭhena samathavipassanādhammo ārāmo assāti dhammārāmo. Tasmiṃyeva dhamme ratoti dhammarato. Tasseva dhammassa punappunaṃ vicintanatāya dhammaṃ anuvicintayaṃ, taṃ dhammaṃ āvajjento manasikarontoti attho. Anussaranti tameva dhammaṃ anussaranto. Saddhammāti evarūpo bhikkhu sattatiṃsabhedā bodhipakkhiyadhammā navavidhalokuttaradhammā ca na parihāyatīti attho.

    দেসনাৰসানে সো ভিক্খু অরহত্তে পতিট্ঠহি, সম্পত্তানম্পি সাত্থিকা ধম্মদেসনা অহোসীতি।

    Desanāvasāne so bhikkhu arahatte patiṭṭhahi, sampattānampi sātthikā dhammadesanā ahosīti.

    ধম্মারামত্থেরৰত্থু চতুত্থং।

    Dhammārāmattheravatthu catutthaṃ.

    ৫. ৰিপক্খসেৰকভিক্খুৰত্থু

    5. Vipakkhasevakabhikkhuvatthu

    সলাভন্তি ইমং ধম্মদেসনং সত্থা ৰেল়ুৰনে ৰিহরন্তো অঞ্ঞতরং ৰিপক্খসেৰকং ভিক্খুং আরব্ভ কথেসি।

    Salābhanti imaṃ dhammadesanaṃ satthā veḷuvane viharanto aññataraṃ vipakkhasevakaṃ bhikkhuṃ ārabbha kathesi.

    তস্স কিরেকো দেৰদত্তপক্খিকো ভিক্খু সহাযো অহোসি। সো তং ভিক্খূহি সদ্ধিং পিণ্ডায চরিত্ৰা কতভত্তকিচ্চং আগচ্ছন্তং দিস্ৰা ‘‘কুহিং গতোসী’’তি পুচ্ছি। ‘‘অসুকট্ঠানং নাম পিণ্ডায চরিতু’’ন্তি। ‘‘লদ্ধো তে পিণ্ডপাতো’’তি? ‘‘আম, লদ্ধো’’তি। ‘‘ইধ অম্হাকং মহালাভসক্কারো, কতিপাহং ইধেৰ হোহী’’তি। সো তস্স ৰচনেন কতিপাহং তত্থ ৰসিত্ৰা সকট্ঠানমেৰ অগমাসি । অথ নং ভিক্খূ ‘‘অযং, ভন্তে, দেৰদত্তস্স উপ্পন্নলাভসক্কারং পরিভুঞ্জতি, দেৰদত্তস্স পক্খিকো এসো’’তি তথাগতস্স আরোচেসুং। সত্থা তং পক্কোসাপেত্ৰা ‘‘সচ্চং কির ত্ৰং এৰমকাসী’’তি পুচ্ছি। ‘‘আম, ভন্তে, অহং তত্থ একং দহরং নিস্সায কতিপাহং ৰসিং, ন চ পন দেৰদত্তস্স লদ্ধিং রোচেমী’’তি। অথ নং ভগৰা ‘‘কিঞ্চাপি ত্ৰং লদ্ধিং ন রোচেসি, দিট্ঠদিট্ঠকানংযেৰ পন লদ্ধিং রোচেন্তো ৰিয ৰিচরসি। ন ত্ৰং ইদানেৰ এৰং করোসি, পুব্বেপি এৰরূপোযেৰা’’তি ৰত্ৰা ‘‘ইদানি তাৰ, ভন্তে, অম্হেহি সামং দিট্ঠো, পুব্বে পনেস কেসং লদ্ধিং রোচেন্তো ৰিয ৰিচরি, আচিক্খথ নো’’তি ভিক্খূহি যাচিতো অতীতং আহরিত্ৰা –

    Tassa kireko devadattapakkhiko bhikkhu sahāyo ahosi. So taṃ bhikkhūhi saddhiṃ piṇḍāya caritvā katabhattakiccaṃ āgacchantaṃ disvā ‘‘kuhiṃ gatosī’’ti pucchi. ‘‘Asukaṭṭhānaṃ nāma piṇḍāya caritu’’nti. ‘‘Laddho te piṇḍapāto’’ti? ‘‘Āma, laddho’’ti. ‘‘Idha amhākaṃ mahālābhasakkāro, katipāhaṃ idheva hohī’’ti. So tassa vacanena katipāhaṃ tattha vasitvā sakaṭṭhānameva agamāsi . Atha naṃ bhikkhū ‘‘ayaṃ, bhante, devadattassa uppannalābhasakkāraṃ paribhuñjati, devadattassa pakkhiko eso’’ti tathāgatassa ārocesuṃ. Satthā taṃ pakkosāpetvā ‘‘saccaṃ kira tvaṃ evamakāsī’’ti pucchi. ‘‘Āma, bhante, ahaṃ tattha ekaṃ daharaṃ nissāya katipāhaṃ vasiṃ, na ca pana devadattassa laddhiṃ rocemī’’ti. Atha naṃ bhagavā ‘‘kiñcāpi tvaṃ laddhiṃ na rocesi, diṭṭhadiṭṭhakānaṃyeva pana laddhiṃ rocento viya vicarasi. Na tvaṃ idāneva evaṃ karosi, pubbepi evarūpoyevā’’ti vatvā ‘‘idāni tāva, bhante, amhehi sāmaṃ diṭṭho, pubbe panesa kesaṃ laddhiṃ rocento viya vicari, ācikkhatha no’’ti bhikkhūhi yācito atītaṃ āharitvā –

    ‘‘পুরাণচোরান ৰচো নিসম্ম,

    ‘‘Purāṇacorāna vaco nisamma,

    মহিল়ামুখো পোথযমন্ৰচারী।

    Mahiḷāmukho pothayamanvacārī;

    সুসঞ্ঞতানঞ্হি ৰচো নিসম্ম,

    Susaññatānañhi vaco nisamma,

    গজুত্তমো সব্বগুণেসু অট্ঠা’’তি॥ (জা॰ ১.১.২৬) –

    Gajuttamo sabbaguṇesu aṭṭhā’’ti. (jā. 1.1.26) –

    ইমং মহিল়ামুখজাতকং ৰিত্থারেত্ৰা, ‘‘ভিক্খৰে, ভিক্খুনা নাম সকলাভেনেৰ সন্তুট্ঠেন ভৰিতব্বং, পরলাভং পত্থেতুং ন ৰট্টতি। পরলাভং পত্থেন্তস্স হি ঝানৰিপস্সনামগ্গফলেসু একধম্মোপি নুপ্পজ্জতি, সকলাভসন্তুট্ঠস্সেৰ পন ঝানাদীনি উপ্পজ্জন্তী’’তি ৰত্ৰা ধম্মং দেসেন্তো ইমা গাথা অভাসি –

    Imaṃ mahiḷāmukhajātakaṃ vitthāretvā, ‘‘bhikkhave, bhikkhunā nāma sakalābheneva santuṭṭhena bhavitabbaṃ, paralābhaṃ patthetuṃ na vaṭṭati. Paralābhaṃ patthentassa hi jhānavipassanāmaggaphalesu ekadhammopi nuppajjati, sakalābhasantuṭṭhasseva pana jhānādīni uppajjantī’’ti vatvā dhammaṃ desento imā gāthā abhāsi –

    ৩৬৫.

    365.

    ‘‘সলাভং নাতিমঞ্ঞেয্য, নাঞ্ঞেসং পিহযং চরে।

    ‘‘Salābhaṃ nātimaññeyya, nāññesaṃ pihayaṃ care;

    অঞ্ঞেসং পিহযং ভিক্খু, সমাধিং নাধিগচ্ছতি॥

    Aññesaṃ pihayaṃ bhikkhu, samādhiṃ nādhigacchati.

    ৩৬৬.

    366.

    ‘‘অপ্পলাভোপি চে ভিক্খু, সলাভং নাতিমঞ্ঞতি।

    ‘‘Appalābhopi ce bhikkhu, salābhaṃ nātimaññati;

    তং ৰে দেৰা পসংসন্তি, সুদ্ধাজীৰিং অতন্দিত’’ন্তি॥

    Taṃ ve devā pasaṃsanti, suddhājīviṃ atandita’’nti.

    তত্থ সলাভন্তি অত্তনো উপ্পজ্জনকলাভং। সপদানচারঞ্হি পরিৰজ্জেত্ৰা অনেসনায জীৰিকং কপ্পেন্তো সলাভং অতিমঞ্ঞতি হীল়েতি জিগুচ্ছতি নাম। তস্মা এৰং অকরণেন সলাভং নাতিমঞ্ঞেয্য। অঞ্ঞেসং পিহযন্তি অঞ্ঞেসং লাভং পত্থেন্তো ন চরেয্যাতি অত্থো। সমাধিং নাধিগচ্ছতীতি অঞ্ঞেসঞ্হি লাভং পিহযন্তো তেসং চীৰরাদিকরণে উস্সুক্কং আপন্নো ভিক্খু অপ্পনাসমাধিং ৰা উপচারসমাধিং ৰা নাধিগচ্ছতি। সলাভং নাতিমঞ্ঞতীতি অপ্পলাভোপি সমানো উচ্চনীচকুলে পটিপাটিযা সপদানং চরন্তো ভিক্খু সলাভং নাতিমঞ্ঞতি নাম। তং ৰেতি তং এৰরূপং ভিক্খুং সারজীৰিততায সুদ্ধাজীৰিং জঙ্ঘবলং নিস্সায জীৰিতকপ্পনেন অকুসীততায অতন্দিতং দেৰা পসংসন্তি থোমেন্তীতি অত্থো।

    Tattha salābhanti attano uppajjanakalābhaṃ. Sapadānacārañhi parivajjetvā anesanāya jīvikaṃ kappento salābhaṃ atimaññati hīḷeti jigucchati nāma. Tasmā evaṃ akaraṇena salābhaṃ nātimaññeyya. Aññesaṃ pihayanti aññesaṃ lābhaṃ patthento na careyyāti attho. Samādhiṃ nādhigacchatīti aññesañhi lābhaṃ pihayanto tesaṃ cīvarādikaraṇe ussukkaṃ āpanno bhikkhu appanāsamādhiṃ vā upacārasamādhiṃ vā nādhigacchati. Salābhaṃ nātimaññatīti appalābhopi samāno uccanīcakule paṭipāṭiyā sapadānaṃ caranto bhikkhu salābhaṃ nātimaññati nāma. Taṃ veti taṃ evarūpaṃ bhikkhuṃ sārajīvitatāya suddhājīviṃ jaṅghabalaṃ nissāya jīvitakappanena akusītatāya atanditaṃ devā pasaṃsanti thomentīti attho.

    দেসনাৰসানে বহূ সোতাপত্তিফলাদীনি পাপুণিংসূতি।

    Desanāvasāne bahū sotāpattiphalādīni pāpuṇiṃsūti.

    ৰিপক্খসেৰকভিক্খুৰত্থু পঞ্চমং।

    Vipakkhasevakabhikkhuvatthu pañcamaṃ.

    ৬. পঞ্চগ্গদাযকব্রাহ্মণৰত্থু

    6. Pañcaggadāyakabrāhmaṇavatthu

    সব্বসোতি ইমং ধম্মদেসনং সত্থা জেতৰনে ৰিহরন্তো পঞ্চগ্গদাযকং নাম ব্রাহ্মণং আরব্ভ কথেসি।

    Sabbasoti imaṃ dhammadesanaṃ satthā jetavane viharanto pañcaggadāyakaṃ nāma brāhmaṇaṃ ārabbha kathesi.

    সো কির সস্সে খেত্তে ঠিতকালেযেৰ খেত্তগ্গং নাম দেতি, খলকালে খলগ্গং নাম দেতি, খলভণ্ডকালে খলভণ্ডগ্গং নাম দেতি, উক্খলিককালে কুম্ভগ্গং নাম দেতি, পাতিযং ৰড্ঢিতকালে পাতগ্গং নাম দেতীতি ইমানি পঞ্চ অগ্গদানানি দেতি, সম্পত্তস্স অদত্ৰা নাম ন ভুঞ্জতি। তেনস্স পঞ্চগ্গদাযকোত্ৰেৰ নামং অহোসি। সত্থা তস্স চ ব্রাহ্মণিযা চস্স তিণ্ণং ফলানং উপনিস্সযং দিস্ৰা ব্রাহ্মণস্স ভোজনৰেলাযং গন্ত্ৰা দ্ৰারে অট্ঠাসি। সোপি দ্ৰারপমুখে অন্তোগেহাভিমুখো নিসীদিত্ৰা ভুঞ্জতি, সত্থারং দ্ৰারে ঠিতং ন পস্সতি। ব্রাহ্মণী পন তং পরিৰিসমানা সত্থারং দিস্ৰা চিন্তেসি – ‘‘অযং ব্রাহ্মণো পঞ্চসু ঠানেসু অগ্গং দত্ৰা ভুঞ্জতি, ইদানি চ সমণো গোতমো আগন্ত্ৰা দ্ৰারে ঠিতো। সচে ব্রাহ্মণো এতং দিস্ৰা অত্তনো ভত্তং হরিত্ৰা দস্সতি, পুনপাহং পচিতুং ন সক্খিস্সামী’’তি। সা ‘‘এৰং অযং সমণং গোতমং ন পস্সিস্সতী’’তি সত্থু পিট্ঠিং দত্ৰা তস্স পচ্ছতো তং পটিচ্ছাদেন্তী ওনমিত্ৰা পুণ্ণচন্দং পাণিনা পটিচ্ছাদেন্তী ৰিয অট্ঠাসি। তথা ঠিতা এৰ চ পন ‘‘গতো নু খো নো’’তি সত্থারং অড্ঢক্খিকেন ওলোকেসি। সত্থা তত্থেৰ অট্ঠাসি। ব্রাহ্মণস্স পন সৰনভযেন ‘‘অতিচ্ছথা’’তি ন ৰদেতি, ওসক্কিত্ৰা পন সণিকমেৰ ‘‘অতিচ্ছথা’’তি আহ । সত্থা ‘‘ন গমিস্সামী’’তি সীসং চালেসি। লোকগরুনা বুদ্ধেন ‘‘ন গমিস্সামী’’তি সীসে চালিতে সা সন্ধারেতুং অসক্কোন্তী মহাহসিতং হসি। তস্মিং খণে সত্থা গেহাভিমুখং ওভাসং মুঞ্চি। ব্রাহ্মণোপি পিট্ঠিং দত্ৰা নিসিন্নোযেৰ ব্রাহ্মণিযা হসিতসদ্দং সুত্ৰা ছব্বণ্ণানঞ্চ রস্মীনং ওভাসং ওলোকেত্ৰা সত্থারং অদ্দস। বুদ্ধা হি নাম গামে ৰা অরঞ্ঞে ৰা হেতুসম্পন্নানং অত্তানং অদস্সেত্ৰা ন পক্কমন্তি। ব্রাহ্মণোপি সত্থারং দিস্ৰা, ‘‘ভোতি নাসিতোম্হি তযা, রাজপুত্তং আগন্ত্ৰা দ্ৰারে ঠিতং ময্হং অনাচিক্খন্তিযা ভারিযং তে কম্মং কত’’ন্তি ৰত্ৰা অড্ঢভুত্তং ভোজনপাতিং আদায সত্থু সন্তিকং গন্ত্ৰা, ‘‘ভো গোতম, অহং পঞ্চসু ঠানেসু অগ্গং দত্ৰাৰ ভুঞ্জামি, ইতো চ মে মজ্ঝে ভিন্দিত্ৰা একোৰ ভত্তকোট্ঠাসো ভুত্তো, একো কোট্ঠাসো অৰসিট্ঠো, পটিগ্গণ্হিস্সসি মে ইদং ভত্ত’’ন্তি। সত্থা ‘‘ন মে তৰ উচ্ছিট্ঠভত্তেন অত্থো’’তি অৰত্ৰা, ‘‘ব্রাহ্মণ, অগ্গম্পি ময্হমেৰ অনুচ্ছৰিকং, মজ্ঝে ভিন্দিত্ৰা অড্ঢভুত্তভত্তম্পি, চরিমকভত্তপিণ্ডোপি ময্হমেৰ অনুচ্ছৰিকো। মযঞ্হি, ব্রাহ্মণ, পরদত্তূপজীৰিপেতসদিসা’’তি ৰত্ৰা ইমং গাথমাহ –

    So kira sasse khette ṭhitakāleyeva khettaggaṃ nāma deti, khalakāle khalaggaṃ nāma deti, khalabhaṇḍakāle khalabhaṇḍaggaṃ nāma deti, ukkhalikakāle kumbhaggaṃ nāma deti, pātiyaṃ vaḍḍhitakāle pātaggaṃ nāma detīti imāni pañca aggadānāni deti, sampattassa adatvā nāma na bhuñjati. Tenassa pañcaggadāyakotveva nāmaṃ ahosi. Satthā tassa ca brāhmaṇiyā cassa tiṇṇaṃ phalānaṃ upanissayaṃ disvā brāhmaṇassa bhojanavelāyaṃ gantvā dvāre aṭṭhāsi. Sopi dvārapamukhe antogehābhimukho nisīditvā bhuñjati, satthāraṃ dvāre ṭhitaṃ na passati. Brāhmaṇī pana taṃ parivisamānā satthāraṃ disvā cintesi – ‘‘ayaṃ brāhmaṇo pañcasu ṭhānesu aggaṃ datvā bhuñjati, idāni ca samaṇo gotamo āgantvā dvāre ṭhito. Sace brāhmaṇo etaṃ disvā attano bhattaṃ haritvā dassati, punapāhaṃ pacituṃ na sakkhissāmī’’ti. Sā ‘‘evaṃ ayaṃ samaṇaṃ gotamaṃ na passissatī’’ti satthu piṭṭhiṃ datvā tassa pacchato taṃ paṭicchādentī onamitvā puṇṇacandaṃ pāṇinā paṭicchādentī viya aṭṭhāsi. Tathā ṭhitā eva ca pana ‘‘gato nu kho no’’ti satthāraṃ aḍḍhakkhikena olokesi. Satthā tattheva aṭṭhāsi. Brāhmaṇassa pana savanabhayena ‘‘aticchathā’’ti na vadeti, osakkitvā pana saṇikameva ‘‘aticchathā’’ti āha . Satthā ‘‘na gamissāmī’’ti sīsaṃ cālesi. Lokagarunā buddhena ‘‘na gamissāmī’’ti sīse cālite sā sandhāretuṃ asakkontī mahāhasitaṃ hasi. Tasmiṃ khaṇe satthā gehābhimukhaṃ obhāsaṃ muñci. Brāhmaṇopi piṭṭhiṃ datvā nisinnoyeva brāhmaṇiyā hasitasaddaṃ sutvā chabbaṇṇānañca rasmīnaṃ obhāsaṃ oloketvā satthāraṃ addasa. Buddhā hi nāma gāme vā araññe vā hetusampannānaṃ attānaṃ adassetvā na pakkamanti. Brāhmaṇopi satthāraṃ disvā, ‘‘bhoti nāsitomhi tayā, rājaputtaṃ āgantvā dvāre ṭhitaṃ mayhaṃ anācikkhantiyā bhāriyaṃ te kammaṃ kata’’nti vatvā aḍḍhabhuttaṃ bhojanapātiṃ ādāya satthu santikaṃ gantvā, ‘‘bho gotama, ahaṃ pañcasu ṭhānesu aggaṃ datvāva bhuñjāmi, ito ca me majjhe bhinditvā ekova bhattakoṭṭhāso bhutto, eko koṭṭhāso avasiṭṭho, paṭiggaṇhissasi me idaṃ bhatta’’nti. Satthā ‘‘na me tava ucchiṭṭhabhattena attho’’ti avatvā, ‘‘brāhmaṇa, aggampi mayhameva anucchavikaṃ, majjhe bhinditvā aḍḍhabhuttabhattampi, carimakabhattapiṇḍopi mayhameva anucchaviko. Mayañhi, brāhmaṇa, paradattūpajīvipetasadisā’’ti vatvā imaṃ gāthamāha –

    ‘‘যদগ্গতো মজ্ঝতো সেসতো ৰা,

    ‘‘Yadaggato majjhato sesato vā,

    পিণ্ডং লভেথ পরদত্তূপজীৰী।

    Piṇḍaṃ labhetha paradattūpajīvī;

    নালং থুতুং নোপি নিপচ্চৰাদী,

    Nālaṃ thutuṃ nopi nipaccavādī,

    তং ৰাপি ধীরা মুনি ৰেদযন্তী’’তি॥ (সু॰ নি॰ ২১৯)।

    Taṃ vāpi dhīrā muni vedayantī’’ti. (su. ni. 219);

    ব্রাহ্মণো তং সুত্ৰাৰ পসন্নচিত্তো হুত্ৰা ‘‘অহো অচ্ছরিযং, দীপসামিকো নাম রাজপুত্তো ‘ন মে তৰ উচ্ছিট্ঠভত্তেন অত্থো’তি অৰত্ৰা এৰং ৰক্খতী’’তি দ্ৰারে ঠিতকোৰ সত্থারং পঞ্হং পুচ্ছি – ‘‘ভো গোতম , তুম্হে অত্তনো সাৰকে ভিক্খূতি ৰদথ, কিত্তাৰতা ভিক্খু নাম হোতী’’তি। সত্থা ‘‘কথংরূপা নু খো ইমস্স ধম্মদেসনা সপ্পাযা’’তি উপধারেন্তো ‘‘ইমে দ্ৰেপি জনা কস্সপবুদ্ধকালে ‘নামরূপ’ন্তি ৰদন্তানং কথং সুণিংসু, নামরূপং অৰিস্সজ্জিত্ৰাৰ নেসং ধম্মং দেসেতুং ৰট্টতী’’তি, ‘‘ব্রাহ্মণ, নামে চ রূপে চ অরজ্জন্তো অসজ্জন্তো অসোচন্তো ভিক্খু নাম হোতী’’তি ৰত্ৰা ইমং গাথমাহ –

    Brāhmaṇo taṃ sutvāva pasannacitto hutvā ‘‘aho acchariyaṃ, dīpasāmiko nāma rājaputto ‘na me tava ucchiṭṭhabhattena attho’ti avatvā evaṃ vakkhatī’’ti dvāre ṭhitakova satthāraṃ pañhaṃ pucchi – ‘‘bho gotama , tumhe attano sāvake bhikkhūti vadatha, kittāvatā bhikkhu nāma hotī’’ti. Satthā ‘‘kathaṃrūpā nu kho imassa dhammadesanā sappāyā’’ti upadhārento ‘‘ime dvepi janā kassapabuddhakāle ‘nāmarūpa’nti vadantānaṃ kathaṃ suṇiṃsu, nāmarūpaṃ avissajjitvāva nesaṃ dhammaṃ desetuṃ vaṭṭatī’’ti, ‘‘brāhmaṇa, nāme ca rūpe ca arajjanto asajjanto asocanto bhikkhu nāma hotī’’ti vatvā imaṃ gāthamāha –

    ৩৬৭.

    367.

    ‘‘সব্বসো নামরূপস্মিং, যস্স নত্থি মমাযিতং।

    ‘‘Sabbaso nāmarūpasmiṃ, yassa natthi mamāyitaṃ;

    অসতা চ ন সোচতি, স ৰে ভিক্খূতি ৰুচ্চতী’’তি॥

    Asatā ca na socati, sa ve bhikkhūti vuccatī’’ti.

    তত্থ সব্বসোতি সব্বস্মিম্পি ৰেদনাদীনং চতুন্নং, রূপক্খন্ধস্স চাতি পঞ্চন্নং খন্ধানং ৰসেন পৰত্তে নামরূপে। মমাযিতন্তি যস্স অহন্তি ৰা মমন্তি ৰা গাহো নত্থি। অসতা চ ন সোচতীতি তস্মিঞ্চ নামরূপে খযৰযং পত্তে ‘‘মম রূপং খীণং…পে॰… মম ৰিঞ্ঞাণং খীণ’’ন্তি ন সোচতি ন ৰিহঞ্ঞতি, ‘‘খযৰযধম্মং মে খীণ’’ন্তি পস্সতি। স ৰেতি সো এৰরূপো ৰিজ্জমানেপি নামরূপে মমাযিতরহিতোপি অসতাপি তেন অসোচন্তো ভিক্খূতি ৰুচ্চতীতি অত্থো।

    Tattha sabbasoti sabbasmimpi vedanādīnaṃ catunnaṃ, rūpakkhandhassa cāti pañcannaṃ khandhānaṃ vasena pavatte nāmarūpe. Mamāyitanti yassa ahanti vā mamanti vā gāho natthi. Asatā ca na socatīti tasmiñca nāmarūpe khayavayaṃ patte ‘‘mama rūpaṃ khīṇaṃ…pe… mama viññāṇaṃ khīṇa’’nti na socati na vihaññati, ‘‘khayavayadhammaṃ me khīṇa’’nti passati. Sa veti so evarūpo vijjamānepi nāmarūpe mamāyitarahitopi asatāpi tena asocanto bhikkhūti vuccatīti attho.

    দেসনাৰসানে উভোপি জযম্পতিকা অনাগামিফলে পতিট্ঠহিংসু, সম্পত্তানম্পি সাত্থিকা ধম্মদেসনা অহোসীতি।

    Desanāvasāne ubhopi jayampatikā anāgāmiphale patiṭṭhahiṃsu, sampattānampi sātthikā dhammadesanā ahosīti.

    পঞ্চগ্গদাযকব্রাহ্মণৰত্থু ছট্ঠং।

    Pañcaggadāyakabrāhmaṇavatthu chaṭṭhaṃ.

    ৭. সম্বহুলভিক্খুৰত্থু

    7. Sambahulabhikkhuvatthu

    মেত্তাৰিহারীতি ইমং ধম্মদেসনং সত্থা জেতৰনে ৰিহরন্তো সম্বহুলে ভিক্খূ আরব্ভ কথেসি।

    Mettāvihārīti imaṃ dhammadesanaṃ satthā jetavane viharanto sambahule bhikkhū ārabbha kathesi.

    একস্মিঞ্হি সমযে আযস্মন্তে মহাকচ্চানে অৰন্তিজনপদে কুররঘরং নিস্সায পৰত্তপব্বতে ৰিহরন্তে সোণো নাম কোটিকণ্ণো উপাসকো থেরস্স ধম্মকথায পসীদিত্ৰা থেরস্স সন্তিকে পব্বজিতুকামো থেরেন ‘‘দুক্করং খো, সোণ, যাৰজীৰং একভত্তং একসেয্যং ব্রহ্মচরিয’’ন্তি ৰত্ৰা দ্ৰে ৰারে পটিক্খিত্তোপি পব্বজ্জায অতিৰিয উস্সাহজাতো ততিযৰারে থেরং যাচিত্ৰা পব্বজিত্ৰা অপ্পভিক্খুকত্তা দক্খিণাপথে তিণ্ণং ৰস্সানং অচ্চযেন লদ্ধূপসম্পদো সত্থারং সম্মুখা দট্ঠুকামো হুত্ৰা উপজ্ঝাযং আপুচ্ছিত্ৰা তেন দিন্নং সাসনং গহেত্ৰা অনুপুব্বেন জেতৰনং গন্ত্ৰা সত্থারং ৰন্দিত্ৰা কতপটিসন্থারো সত্থারা একগন্ধকুটিযংযেৰ অনুঞ্ঞাতসেনাসনো বহুদেৰ রত্তিং অজ্ঝোকাসে ৰীথিনামেত্ৰা রত্তিভাগে গন্ধকুটিং পৰিসিত্ৰা অত্তনো পত্তসেনাসনে তং রত্তিভাগং ৰীতিনামেত্ৰা পচ্চূসসমযে সত্থারা অজ্ঝিট্ঠো সোল়স অট্ঠকৰগ্গিকানি (সু॰ নি॰ ৭৭২ আদযো) সব্বানেৰ সরভঞ্ঞেন অভণি। অথস্স ভগৰা সরভঞ্ঞপরিযোসানে অব্ভানুমোদেন্তো – ‘‘সাধু সাধু, ভিক্খূ’’তি সাধুকারং অদাসি। সত্থারা দিন্নসাধুকারং সুত্ৰা ভূমট্ঠকদেৰা নাগা সুপণ্ণাতি এৰং যাৰ ব্রহ্মলোকা একসাধুকারমেৰ অহোসি।

    Ekasmiñhi samaye āyasmante mahākaccāne avantijanapade kuraragharaṃ nissāya pavattapabbate viharante soṇo nāma koṭikaṇṇo upāsako therassa dhammakathāya pasīditvā therassa santike pabbajitukāmo therena ‘‘dukkaraṃ kho, soṇa, yāvajīvaṃ ekabhattaṃ ekaseyyaṃ brahmacariya’’nti vatvā dve vāre paṭikkhittopi pabbajjāya ativiya ussāhajāto tatiyavāre theraṃ yācitvā pabbajitvā appabhikkhukattā dakkhiṇāpathe tiṇṇaṃ vassānaṃ accayena laddhūpasampado satthāraṃ sammukhā daṭṭhukāmo hutvā upajjhāyaṃ āpucchitvā tena dinnaṃ sāsanaṃ gahetvā anupubbena jetavanaṃ gantvā satthāraṃ vanditvā katapaṭisanthāro satthārā ekagandhakuṭiyaṃyeva anuññātasenāsano bahudeva rattiṃ ajjhokāse vīthināmetvā rattibhāge gandhakuṭiṃ pavisitvā attano pattasenāsane taṃ rattibhāgaṃ vītināmetvā paccūsasamaye satthārā ajjhiṭṭho soḷasa aṭṭhakavaggikāni (su. ni. 772 ādayo) sabbāneva sarabhaññena abhaṇi. Athassa bhagavā sarabhaññapariyosāne abbhānumodento – ‘‘sādhu sādhu, bhikkhū’’ti sādhukāraṃ adāsi. Satthārā dinnasādhukāraṃ sutvā bhūmaṭṭhakadevā nāgā supaṇṇāti evaṃ yāva brahmalokā ekasādhukārameva ahosi.

    তস্মিং খণে জেতৰনতো ৰীসযোজনসতমত্থকে কুররঘরনগরে থেরস্স মাতু মহাউপাসিকায গেহে অধিৰত্থা দেৰতাপি মহন্তেন সদ্দেন সাধুকারমদাসি। অথ নং উপাসিকা আহ – ‘‘কো এস সাধুকারং দেতী’’তি? অহং, ভগিনীতি। কোসি ত্ৰন্তি? তৰ গেহে অধিৰত্থা, দেৰতাতি। ত্ৰং ইতো পুব্বে ময্হং সাধুকারং অদত্ৰা অজ্জ কস্মা দেসীতি? নাহং তুয্হং সাধুকারং দম্মীতি। অথ কস্স তে সাধুকারো দিন্নোতি? তৰ পুত্তস্স কোটিকণ্ণস্স সোণত্থেরস্সাতি। কিং মে পুত্তেন কতন্তি? পুত্তো তে অজ্জ সত্থারা সদ্ধিং একগন্ধকুটিযং ৰসিত্ৰা ধম্মং দেসেসি, সত্থা তৰ পুত্তস্স ধম্মং সুত্ৰা পসন্নো সাধুকারমদাসি। তেনস্স মযাপি সাধুকারো দিন্নো। সম্মাসম্বুদ্ধস্স হি সাধুকারং সম্পটিচ্ছিত্ৰা ভূমট্ঠকদেৰে আদিং কত্ৰা যাৰ ব্রহ্মলোকা একসাধুকারমেৰ জাতন্তি। কিং পন, সামি, মম পুত্তেন সত্থু ধম্মো কথিতো, সত্থারা মম পুত্তস্স কথিতোতি? তৰ পুত্তেন সত্থু কথিতোতি। এৰং দেৰতায কথেন্তিযাৰ উপাসিকায পঞ্চৰণ্ণা পীতি উপ্পজ্জিত্ৰা সকলসরীরং ফরি।

    Tasmiṃ khaṇe jetavanato vīsayojanasatamatthake kuraragharanagare therassa mātu mahāupāsikāya gehe adhivatthā devatāpi mahantena saddena sādhukāramadāsi. Atha naṃ upāsikā āha – ‘‘ko esa sādhukāraṃ detī’’ti? Ahaṃ, bhaginīti. Kosi tvanti? Tava gehe adhivatthā, devatāti. Tvaṃ ito pubbe mayhaṃ sādhukāraṃ adatvā ajja kasmā desīti? Nāhaṃ tuyhaṃ sādhukāraṃ dammīti. Atha kassa te sādhukāro dinnoti? Tava puttassa koṭikaṇṇassa soṇattherassāti. Kiṃ me puttena katanti? Putto te ajja satthārā saddhiṃ ekagandhakuṭiyaṃ vasitvā dhammaṃ desesi, satthā tava puttassa dhammaṃ sutvā pasanno sādhukāramadāsi. Tenassa mayāpi sādhukāro dinno. Sammāsambuddhassa hi sādhukāraṃ sampaṭicchitvā bhūmaṭṭhakadeve ādiṃ katvā yāva brahmalokā ekasādhukārameva jātanti. Kiṃ pana, sāmi, mama puttena satthu dhammo kathito, satthārā mama puttassa kathitoti? Tava puttena satthu kathitoti. Evaṃ devatāya kathentiyāva upāsikāya pañcavaṇṇā pīti uppajjitvā sakalasarīraṃ phari.

    অথস্সা এতদহোসি – ‘‘সচে মে পুত্তো সত্থারা সদ্ধিং একগন্ধকুটিযং ৰসিত্ৰা সত্থু ধম্মং কথেতুং সক্খি , ময্হম্পি কথেতুং সক্খিস্সতিযেৰ । পুত্তস্স আগতকালে ধম্মস্সৰনং কারেত্ৰা ধম্মকথং সুণিস্সামী’’তি। সোণত্থেরোপি খো সত্থারা সাধুকারে দিন্নে ‘‘অযং মে উপজ্ঝাযেন দিন্নসাসনং আরোচেতুং কালো’’তি ভগৰন্তং পচ্চন্তিমেসু জনপদেসু ৰিনযধরপঞ্চমেন গণেন উপসম্পদং আদিং কত্ৰা (মহাৰ॰ ২৫৯) পঞ্চ ৰরে যাচিত্ৰা কতিপাহং সত্থু সন্তিকেযেৰ ৰসিত্ৰা ‘‘উপজ্ঝাযং পস্সিস্সামী’’তি সত্থারং আপুচ্ছিত্ৰা জেতৰনা নিক্খমিত্ৰা অনুপুব্বেন উপজ্ঝাযস্স সন্তিকং অগমাসি।

    Athassā etadahosi – ‘‘sace me putto satthārā saddhiṃ ekagandhakuṭiyaṃ vasitvā satthu dhammaṃ kathetuṃ sakkhi , mayhampi kathetuṃ sakkhissatiyeva . Puttassa āgatakāle dhammassavanaṃ kāretvā dhammakathaṃ suṇissāmī’’ti. Soṇattheropi kho satthārā sādhukāre dinne ‘‘ayaṃ me upajjhāyena dinnasāsanaṃ ārocetuṃ kālo’’ti bhagavantaṃ paccantimesu janapadesu vinayadharapañcamena gaṇena upasampadaṃ ādiṃ katvā (mahāva. 259) pañca vare yācitvā katipāhaṃ satthu santikeyeva vasitvā ‘‘upajjhāyaṃ passissāmī’’ti satthāraṃ āpucchitvā jetavanā nikkhamitvā anupubbena upajjhāyassa santikaṃ agamāsi.

    থেরো পুনদিৰসে তং আদায পিণ্ডায চরন্তো মাতু উপাসিকায গেহদ্ৰারং অগমাসি। সাপি পুত্তং দিস্ৰা তুট্ঠমানসা ৰন্দিত্ৰা সক্কচ্চং পরিৰিসিত্ৰা পুচ্ছি – ‘‘সচ্চং কির ত্ৰং, তাত, সত্থারা সদ্ধিং একগন্ধকুটিযং ৰসিত্ৰা সত্থু ধম্মকথং কথেসী’’তি। ‘‘উপাসিকে, তুয্হং কেন ইদং কথিত’’ন্তি? ‘‘তাত, ইমস্মিং গেহে অধিৰত্থা দেৰতা মহন্তেন সদ্দেন সাধুকারং দত্ৰা মযা ‘কো এসো’তি ৰুত্তে ‘অহ’ন্তি ৰত্ৰা এৰঞ্চ এৰঞ্চ কথেসি। তং সুত্ৰা ময্হং এতদহোসি – ‘সচে মে পুত্তো সত্থু ধম্মকথং কথেসি, ময্হম্পি কথেতুং সক্খিস্সতী’তি। অথ নং আহ – ‘তাত, যতো তযা সত্থু সম্মুখা ধম্মো কথিতো, ময্হম্পি কথেতুং সক্খিস্সসি এৰ। অসুকদিৰসে নাম ধম্মস্সৰনং কারেত্ৰা তৰ ধম্মং সুণিস্সামি, তাতা’’’তি। সো অধিৰাসেসি। উপাসিকা ভিক্খুসঙ্ঘস্স দানং দত্ৰা পূজং কত্ৰা ‘‘পুত্তস্স মে ধম্মকথং সুণিস্সামী’’তি একমেৰ দাসিং গেহরক্খিকং ঠপেত্ৰা সব্বং পরিজনং আদায অন্তোনগরে ধম্মস্সৰনত্থায কারিতে মণ্ডপে অলঙ্কতধম্মাসনং অভিরুয্হ ধম্মং দেসেন্তস্স পুত্তস্স ধম্মকথং সোতুং অগমাসি।

    Thero punadivase taṃ ādāya piṇḍāya caranto mātu upāsikāya gehadvāraṃ agamāsi. Sāpi puttaṃ disvā tuṭṭhamānasā vanditvā sakkaccaṃ parivisitvā pucchi – ‘‘saccaṃ kira tvaṃ, tāta, satthārā saddhiṃ ekagandhakuṭiyaṃ vasitvā satthu dhammakathaṃ kathesī’’ti. ‘‘Upāsike, tuyhaṃ kena idaṃ kathita’’nti? ‘‘Tāta, imasmiṃ gehe adhivatthā devatā mahantena saddena sādhukāraṃ datvā mayā ‘ko eso’ti vutte ‘aha’nti vatvā evañca evañca kathesi. Taṃ sutvā mayhaṃ etadahosi – ‘sace me putto satthu dhammakathaṃ kathesi, mayhampi kathetuṃ sakkhissatī’ti. Atha naṃ āha – ‘tāta, yato tayā satthu sammukhā dhammo kathito, mayhampi kathetuṃ sakkhissasi eva. Asukadivase nāma dhammassavanaṃ kāretvā tava dhammaṃ suṇissāmi, tātā’’’ti. So adhivāsesi. Upāsikā bhikkhusaṅghassa dānaṃ datvā pūjaṃ katvā ‘‘puttassa me dhammakathaṃ suṇissāmī’’ti ekameva dāsiṃ geharakkhikaṃ ṭhapetvā sabbaṃ parijanaṃ ādāya antonagare dhammassavanatthāya kārite maṇḍape alaṅkatadhammāsanaṃ abhiruyha dhammaṃ desentassa puttassa dhammakathaṃ sotuṃ agamāsi.

    তস্মিং পন কালে নৰসতা চোরা তস্সা উপাসিকায গেহে ওতারং ওলোকেন্তা ৰিচরন্তি। তস্সা পন গেহং সত্তহি পাকারেহি পরিক্খিত্তং সত্তদ্ৰারকোট্ঠকযুত্তং, তত্থ তেসু তেসু ঠানেসু চণ্ডসুনখে বন্ধিত্ৰা ঠপযিংসু। অন্তোগেহে ছদনস্স উদকপাতট্ঠানে পন পরিখং খণিত্ৰা তিপুনা পূরযিংসু। তং দিৰা আতপেন ৰিলীনং পক্কুথিতং ৰিয তিট্ঠতি, রত্তিং কঠিনং কক্খল়ং হুত্ৰা তিট্ঠতি। তস্সানন্তরা মহন্তানি অযসঙ্ঘাটকানি নিরন্তরং ভূমিযং ওদহিংসু। ইতি ইমঞ্চারক্খং উপাসিকায চ অন্তোগেহে ঠিতভাৰং পটিচ্চ তে চোরা ওকাসং অলভন্তা তং দিৰসং তস্সা গতভাৰং ঞত্ৰা উমঙ্গং ভিন্দিত্ৰা তিপুপরিখায চ অযসঙ্ঘাটকানঞ্চ হেট্ঠাভাগেনেৰ গেহং পৰিসিত্ৰা চোরজেট্ঠকং তস্সা সন্তিকং পহিণিংসু ‘‘সচে সা অম্হাকং ইধ পৰিট্ঠভাৰং সুত্ৰা নিৰত্তিত্ৰা গেহাভিমুখী আগচ্ছতি, অসিনা নং পহরিত্ৰা মারেথা’’তি। সো গন্ত্ৰা তস্সা সন্তিকে অট্ঠাসি।

    Tasmiṃ pana kāle navasatā corā tassā upāsikāya gehe otāraṃ olokentā vicaranti. Tassā pana gehaṃ sattahi pākārehi parikkhittaṃ sattadvārakoṭṭhakayuttaṃ, tattha tesu tesu ṭhānesu caṇḍasunakhe bandhitvā ṭhapayiṃsu. Antogehe chadanassa udakapātaṭṭhāne pana parikhaṃ khaṇitvā tipunā pūrayiṃsu. Taṃ divā ātapena vilīnaṃ pakkuthitaṃ viya tiṭṭhati, rattiṃ kaṭhinaṃ kakkhaḷaṃ hutvā tiṭṭhati. Tassānantarā mahantāni ayasaṅghāṭakāni nirantaraṃ bhūmiyaṃ odahiṃsu. Iti imañcārakkhaṃ upāsikāya ca antogehe ṭhitabhāvaṃ paṭicca te corā okāsaṃ alabhantā taṃ divasaṃ tassā gatabhāvaṃ ñatvā umaṅgaṃ bhinditvā tipuparikhāya ca ayasaṅghāṭakānañca heṭṭhābhāgeneva gehaṃ pavisitvā corajeṭṭhakaṃ tassā santikaṃ pahiṇiṃsu ‘‘sace sā amhākaṃ idha paviṭṭhabhāvaṃ sutvā nivattitvā gehābhimukhī āgacchati, asinā naṃ paharitvā mārethā’’ti. So gantvā tassā santike aṭṭhāsi.

    চোরাপি অন্তোগেহে দীপং জালেত্ৰা কহাপণগব্ভদ্ৰারং ৰিৰরিংসু। সা দাসী চোরে দিস্ৰা উপাসিকায সন্তিকং গন্ত্ৰা, ‘‘অয্যে, বহূ চোরা গেহং পৰিসিত্ৰা কহাপণগব্ভদ্ৰারং ৰিৰরিংসূ’’তি আরোচেসি। ‘‘চোরা অত্তনা দিট্ঠকহাপণে হরন্তু, অহং মম পুত্তস্স ধম্মকথং সুণামি, মা মে ধম্মস্স অন্তরাযং করি, গেহং গচ্ছা’’তি তং পহিণি। চোরাপি কহাপণগব্ভং তুচ্ছং কত্ৰা রজতগব্ভং ৰিৰরিংসু। সা পুনপি গন্ত্ৰা তমত্থং আরোচেসি। উপাসিকাপি ‘‘চোরা অত্তনা ইচ্ছিতং হরন্তু, মা মে অন্তরাযং করী’’তি পুন তং পহিণি। চোরা রজতগব্ভম্পি তুচ্ছং কত্ৰা সুৰণ্ণগব্ভং ৰিৰরিংসু। সা পুনপি গন্ত্ৰা উপাসিকায তমত্থং আরোচেসি। অথ নং উপাসিকা আমন্তেত্ৰা, ‘‘ভোতি জে ত্ৰং অনেকৰারং মম সন্তিকং আগতা, ‘চোরা যথারুচিতং হরন্তু, অহং মম পুত্তস্স ধম্মকথং সুণামি, মা মে অন্তরাযং করী’তি মযা ৰুত্তাপি মম কথং অনাদিযিত্ৰা পুনপ্পুনং আগচ্ছসিযেৰ। সচে ইদানি ত্ৰং আগচ্ছিস্সসি, জানিস্সামি তে কত্তব্বং, গেহমেৰ গচ্ছা’’তি পহিণি।

    Corāpi antogehe dīpaṃ jāletvā kahāpaṇagabbhadvāraṃ vivariṃsu. Sā dāsī core disvā upāsikāya santikaṃ gantvā, ‘‘ayye, bahū corā gehaṃ pavisitvā kahāpaṇagabbhadvāraṃ vivariṃsū’’ti ārocesi. ‘‘Corā attanā diṭṭhakahāpaṇe harantu, ahaṃ mama puttassa dhammakathaṃ suṇāmi, mā me dhammassa antarāyaṃ kari, gehaṃ gacchā’’ti taṃ pahiṇi. Corāpi kahāpaṇagabbhaṃ tucchaṃ katvā rajatagabbhaṃ vivariṃsu. Sā punapi gantvā tamatthaṃ ārocesi. Upāsikāpi ‘‘corā attanā icchitaṃ harantu, mā me antarāyaṃ karī’’ti puna taṃ pahiṇi. Corā rajatagabbhampi tucchaṃ katvā suvaṇṇagabbhaṃ vivariṃsu. Sā punapi gantvā upāsikāya tamatthaṃ ārocesi. Atha naṃ upāsikā āmantetvā, ‘‘bhoti je tvaṃ anekavāraṃ mama santikaṃ āgatā, ‘corā yathārucitaṃ harantu, ahaṃ mama puttassa dhammakathaṃ suṇāmi, mā me antarāyaṃ karī’ti mayā vuttāpi mama kathaṃ anādiyitvā punappunaṃ āgacchasiyeva. Sace idāni tvaṃ āgacchissasi, jānissāmi te kattabbaṃ, gehameva gacchā’’ti pahiṇi.

    চোরজেট্ঠকো তস্সা কথং সুত্ৰা ‘‘এৰরূপায ইত্থিযা সন্তকং হরন্তানং অসনি পতিত্ৰা মত্থকং ভিন্দেয্যা’’তি চোরানং সন্তিকং গন্ত্ৰা ‘‘সীঘং উপাসিকায সন্তকং পটিপাকতিকং করোথা’’তি আহ। তে কহাপণেহি কহাপণগব্ভং, রজতসুৰণ্ণেহি রজতসুৰণ্ণগব্ভে পুন পূরযিংসু। ধম্মতা কিরেসা, যং ধম্মো ধম্মচারিনং রক্খতি। তেনেৰাহ –

    Corajeṭṭhako tassā kathaṃ sutvā ‘‘evarūpāya itthiyā santakaṃ harantānaṃ asani patitvā matthakaṃ bhindeyyā’’ti corānaṃ santikaṃ gantvā ‘‘sīghaṃ upāsikāya santakaṃ paṭipākatikaṃ karothā’’ti āha. Te kahāpaṇehi kahāpaṇagabbhaṃ, rajatasuvaṇṇehi rajatasuvaṇṇagabbhe puna pūrayiṃsu. Dhammatā kiresā, yaṃ dhammo dhammacārinaṃ rakkhati. Tenevāha –

    ‘‘ধম্মো হৰে রক্খতি ধম্মচারিং,

    ‘‘Dhammo have rakkhati dhammacāriṃ,

    ধম্মো সুচিণ্ণো সুখমাৰহাতি।

    Dhammo suciṇṇo sukhamāvahāti;

    এসানিসংসো ধম্মে সুচিণ্ণে,

    Esānisaṃso dhamme suciṇṇe,

    ন দুগ্গতিং গচ্ছতি ধম্মচারী’’তি॥ (থেরগা॰ ৩০৩; জা॰ ১.১০.১০২)।

    Na duggatiṃ gacchati dhammacārī’’ti. (theragā. 303; jā. 1.10.102);

    চোরাপি গন্ত্ৰা ধম্মস্সৰনট্ঠানে অট্ঠংসু। থেরোপি ধম্মং কথেত্ৰা ৰিভাতায রত্তিযা আসনা ওতরি। তস্মিং খণে চোরজেট্ঠকো উপাসিকায পাদমূলে নিপজ্জিত্ৰা ‘‘খমাহি মে, অয্যে’’তি আহ। ‘‘কিং ইদং, তাতা’’তি? ‘‘অহঞ্হি তুম্হেসু আঘাতং কত্ৰা তুম্হে মারেতুকামো অট্ঠাসি’’ন্তি। ‘‘তেন হি তে, তাত, খমামী’’তি। সেসচোরাপি তথেৰ ৰত্ৰা, ‘‘তাতা, খমামী’’তি ৰুত্তে আহংসু – ‘‘অয্যে, সচে নো খমথ, পুত্তস্স ৰো সন্তিকে অম্হাকং পব্বজ্জং দাপেথা’’তি। সা পুত্তং ৰন্দিত্ৰা আহ – ‘‘তাত, ইমে চোরা মম গুণেসু তুম্হাকঞ্চ ধম্মকথায পসন্না পব্বজ্জং যাচন্তি, পব্বাজেথ নে’’তি। থেরো ‘‘সাধূ’’তি ৰত্ৰা তেহি নিৰত্থৰত্থানং দসানি ছিন্দাপেত্ৰা তম্বমত্তিকায রজাপেত্ৰা তে পব্বাজেত্ৰা সীলেসু পতিট্ঠাপেসি। উপসম্পন্নকালে চ নেসং একেকস্স ৰিসুং ৰিসুং কম্মট্ঠানমদাসি। তে নৰসতা ভিক্খূ ৰিসুং ৰিসুং নৰসতকম্মট্ঠানানি গহেত্ৰা একং পব্বতং অভিরুয্হ তস্স তস্স রুক্খস্স ছাযায নিসীদিত্ৰা সমণধম্মং করিংসু।

    Corāpi gantvā dhammassavanaṭṭhāne aṭṭhaṃsu. Theropi dhammaṃ kathetvā vibhātāya rattiyā āsanā otari. Tasmiṃ khaṇe corajeṭṭhako upāsikāya pādamūle nipajjitvā ‘‘khamāhi me, ayye’’ti āha. ‘‘Kiṃ idaṃ, tātā’’ti? ‘‘Ahañhi tumhesu āghātaṃ katvā tumhe māretukāmo aṭṭhāsi’’nti. ‘‘Tena hi te, tāta, khamāmī’’ti. Sesacorāpi tatheva vatvā, ‘‘tātā, khamāmī’’ti vutte āhaṃsu – ‘‘ayye, sace no khamatha, puttassa vo santike amhākaṃ pabbajjaṃ dāpethā’’ti. Sā puttaṃ vanditvā āha – ‘‘tāta, ime corā mama guṇesu tumhākañca dhammakathāya pasannā pabbajjaṃ yācanti, pabbājetha ne’’ti. Thero ‘‘sādhū’’ti vatvā tehi nivatthavatthānaṃ dasāni chindāpetvā tambamattikāya rajāpetvā te pabbājetvā sīlesu patiṭṭhāpesi. Upasampannakāle ca nesaṃ ekekassa visuṃ visuṃ kammaṭṭhānamadāsi. Te navasatā bhikkhū visuṃ visuṃ navasatakammaṭṭhānāni gahetvā ekaṃ pabbataṃ abhiruyha tassa tassa rukkhassa chāyāya nisīditvā samaṇadhammaṃ kariṃsu.

    সত্থা ৰীসযোজনসতমত্থকে জেতৰনমহাৰিহারে নিসিন্নোৰ তে ভিক্খূ ওলোকেত্ৰা তেসং চরিযৰসেন ধম্মদেসনং ৰৰত্থাপেত্ৰা ওভাসং ফরিত্ৰা সম্মুখে নিসীদিত্ৰা কথেন্তো ৰিয ইমা গাথা অভাসি –

    Satthā vīsayojanasatamatthake jetavanamahāvihāre nisinnova te bhikkhū oloketvā tesaṃ cariyavasena dhammadesanaṃ vavatthāpetvā obhāsaṃ pharitvā sammukhe nisīditvā kathento viya imā gāthā abhāsi –

    ৩৬৮.

    368.

    ‘‘মেত্তাৰিহারী যো ভিক্খু, পসন্নো বুদ্ধসাসনে।

    ‘‘Mettāvihārī yo bhikkhu, pasanno buddhasāsane;

    অধিগচ্ছে পদং সন্তং, সঙ্খারূপসমং সুখং॥

    Adhigacche padaṃ santaṃ, saṅkhārūpasamaṃ sukhaṃ.

    ৩৬৯.

    369.

    ‘‘সিঞ্চ ভিক্খু ইমং নাৰং, সিত্তা তে লহুমেস্সতি।

    ‘‘Siñca bhikkhu imaṃ nāvaṃ, sittā te lahumessati;

    ছেত্ৰা রাগঞ্চ দোসঞ্চ, ততো নিব্বানমেহিসি॥

    Chetvā rāgañca dosañca, tato nibbānamehisi.

    ৩৭০.

    370.

    ‘‘পঞ্চ ছিন্দে পঞ্চ জহে, পঞ্চ চুত্তরি ভাৰযে।

    ‘‘Pañca chinde pañca jahe, pañca cuttari bhāvaye;

    পঞ্চসঙ্গাতিগো ভিক্খু, ওঘতিণ্ণোতি ৰুচ্চতি॥

    Pañcasaṅgātigo bhikkhu, oghatiṇṇoti vuccati.

    ৩৭১.

    371.

    ‘‘ঝায ভিক্খু মা পমাদো,

    ‘‘Jhāya bhikkhu mā pamādo,

    মা তে কামগুণে রমেস্সু চিত্তং।

    Mā te kāmaguṇe ramessu cittaṃ;

    মা লোহগুল়ং গিলী পমত্তো,

    Mā lohaguḷaṃ gilī pamatto,

    মা কন্দী দুক্খমিদন্তি দয্হমানো॥

    Mā kandī dukkhamidanti dayhamāno.

    ৩৭২.

    372.

    ‘‘নত্থি ঝানং অপঞ্ঞস্স, পঞ্ঞা নত্থি অঝাযতো।

    ‘‘Natthi jhānaṃ apaññassa, paññā natthi ajhāyato;

    যম্হি ঝানঞ্চ পঞ্ঞা চ, স ৰে নিব্বানসন্তিকে॥

    Yamhi jhānañca paññā ca, sa ve nibbānasantike.

    ৩৭৩.

    373.

    ‘‘সুঞ্ঞাগারং পৰিট্ঠস্স, সন্তচিত্তস্স ভিক্খুনো।

    ‘‘Suññāgāraṃ paviṭṭhassa, santacittassa bhikkhuno;

    অমানুসী রতী হোতি, সম্মা ধম্মং ৰিপস্সতো॥

    Amānusī ratī hoti, sammā dhammaṃ vipassato.

    ৩৭৪.

    374.

    ‘‘যতো যতো সম্মসতি, খন্ধানং উদযব্বযং।

    ‘‘Yato yato sammasati, khandhānaṃ udayabbayaṃ;

    লভতী পীতিপামোজ্জং, অমতং তং ৰিজানতং॥

    Labhatī pītipāmojjaṃ, amataṃ taṃ vijānataṃ.

    ৩৭৫.

    375.

    ‘‘তত্রাযমাদি ভৰতি, ইধ পঞ্ঞস্স ভিক্খুনো।

    ‘‘Tatrāyamādi bhavati, idha paññassa bhikkhuno;

    ইন্দ্রিযগুত্তি সন্তুট্ঠি, পাতিমোক্খে চ সংৰরো॥

    Indriyagutti santuṭṭhi, pātimokkhe ca saṃvaro.

    ৩৭৬.

    376.

    ‘‘মিত্তে ভজস্সু কল্যাণে, সুদ্ধাজীৰে অতন্দিতে।

    ‘‘Mitte bhajassu kalyāṇe, suddhājīve atandite;

    পটিসন্থারৰুত্যস্স, আচারকুসলো সিযা।

    Paṭisanthāravutyassa, ācārakusalo siyā;

    ততো পামোজ্জবহুলো, দুক্খস্সন্তং করিস্সতী’’তি॥

    Tato pāmojjabahulo, dukkhassantaṃ karissatī’’ti.

    তত্থ মেত্তাৰিহারীতি মেত্তাকম্মট্ঠানে কম্মং করোন্তোপি মেত্তাৰসেন তিকচতুক্কজ্ঝানে নিব্বত্তেত্ৰা ঠিতোপি মেত্তাৰিহারীযেৰ নাম। পসন্নোতি যো পন বুদ্ধসাসনে পসন্নো হোতি, পসাদং রোচেতিযেৰাতি অত্থো। পদং সন্তন্তি নিব্বানস্সেতং নামং। এৰরূপো হি ভিক্খু সন্তং কোট্ঠাসং সব্বসঙ্খারানং উপসন্ততায সঙ্খারূপসমং, পরমসুখতায সুখন্তি লদ্ধনামং নিব্বানং অধিগচ্ছতি, ৰিন্দতিযেৰাতি অত্থো।

    Tattha mettāvihārīti mettākammaṭṭhāne kammaṃ karontopi mettāvasena tikacatukkajjhāne nibbattetvā ṭhitopi mettāvihārīyeva nāma. Pasannoti yo pana buddhasāsane pasanno hoti, pasādaṃ rocetiyevāti attho. Padaṃ santanti nibbānassetaṃ nāmaṃ. Evarūpo hi bhikkhu santaṃ koṭṭhāsaṃ sabbasaṅkhārānaṃ upasantatāya saṅkhārūpasamaṃ, paramasukhatāya sukhanti laddhanāmaṃ nibbānaṃ adhigacchati, vindatiyevāti attho.

    সিঞ্চ ভিক্খু ইমং নাৰন্তি ভিক্খু ইমং অত্তভাৰসঙ্খাতং নাৰং মিচ্ছাৰিতক্কোদকং ছড্ডেন্তো সিঞ্চ। সিত্তা তে লহুমেস্সতীতি যথা হি মহাসমুদ্দে উদকস্সেৰ ভরিতা নাৰা ছিদ্দানি পিদহিত্ৰা উদকস্স সিত্ততায সিত্তা সল্লহুকা হুত্ৰা মহাসমুদ্দে অনোসীদিত্ৰা সীঘং সুপট্টনং গচ্ছতি, এৰং তৰাপি অযং মিচ্ছাৰিতক্কোদকভরিতা অত্তভাৰনাৰা চক্খুদ্ৰারাদিছিদ্দানি সংৰরেন পিদহিত্ৰা উপ্পন্নস্স মিচ্ছাৰিতক্কোদকস্স সিত্ততায সিত্তা সল্লহুকা সংসারৰট্টে অনোসীদিত্ৰা সীঘং নিব্বানং গমিস্সতি। ছেত্ৰাতি রাগদোসবন্ধনানি ছিন্দ। এতানি হি ছিন্দিত্ৰা অরহত্তপ্পত্তো ততো অপরভাগে অনুপাদিসেসনিব্বানমেৰ এহিসি, গমিস্সসীতি অত্থো।

    Siñca bhikkhu imaṃ nāvanti bhikkhu imaṃ attabhāvasaṅkhātaṃ nāvaṃ micchāvitakkodakaṃ chaḍḍento siñca. Sittā te lahumessatīti yathā hi mahāsamudde udakasseva bharitā nāvā chiddāni pidahitvā udakassa sittatāya sittā sallahukā hutvā mahāsamudde anosīditvā sīghaṃ supaṭṭanaṃ gacchati, evaṃ tavāpi ayaṃ micchāvitakkodakabharitā attabhāvanāvā cakkhudvārādichiddāni saṃvarena pidahitvā uppannassa micchāvitakkodakassa sittatāya sittā sallahukā saṃsāravaṭṭe anosīditvā sīghaṃ nibbānaṃ gamissati. Chetvāti rāgadosabandhanāni chinda. Etāni hi chinditvā arahattappatto tato aparabhāge anupādisesanibbānameva ehisi, gamissasīti attho.

    পঞ্চ ছিন্দেতি হেট্ঠাঅপাযসম্পাপকানি পঞ্চোরম্ভাগিযসংযোজনানি পাদে বদ্ধরজ্জুং পুরিসো সত্থেন ৰিয হেট্ঠামগ্গত্তযেন ছিন্দেয্য। পঞ্চ জহেতি উপরিদেৰলোকসম্পাপকানি পঞ্চুদ্ধম্ভাগিযসংযোজনানি পুরিসো গীৰায বদ্ধরজ্জুকং ৰিয অরহত্তমগ্গেন জহেয্য পজহেয্য, ছিন্দেয্যাতি অত্থো। পঞ্চ চুত্তরি ভাৰযেতি উদ্ধম্ভাগিযসংযোজনানং পহানত্থায সদ্ধাদীনি পঞ্চিন্দ্রিযানি উত্তরি ভাৰেয্য। পঞ্চসঙ্গাতিগোতি এৰং সন্তে পঞ্চন্নং রাগদোসমোহমানদিট্ঠিসঙ্গানং অতিক্কমনেন পঞ্চসঙ্গাতিগো ভিক্খু ওঘতিণ্ণোতি ৰুচ্চতি, চত্তারো ওঘে তিণ্ণোযেৰাতি ৰুচ্চতীতি অত্থো।

    Pañcachindeti heṭṭhāapāyasampāpakāni pañcorambhāgiyasaṃyojanāni pāde baddharajjuṃ puriso satthena viya heṭṭhāmaggattayena chindeyya. Pañca jaheti uparidevalokasampāpakāni pañcuddhambhāgiyasaṃyojanāni puriso gīvāya baddharajjukaṃ viya arahattamaggena jaheyya pajaheyya, chindeyyāti attho. Pañca cuttari bhāvayeti uddhambhāgiyasaṃyojanānaṃ pahānatthāya saddhādīni pañcindriyāni uttari bhāveyya. Pañcasaṅgātigoti evaṃ sante pañcannaṃ rāgadosamohamānadiṭṭhisaṅgānaṃ atikkamanena pañcasaṅgātigo bhikkhu oghatiṇṇoti vuccati, cattāro oghe tiṇṇoyevāti vuccatīti attho.

    ঝায ভিক্খূতি ভিক্খু ত্ৰং দ্ৰিন্নং ঝানানং ৰসেন ঝায চেৰ, কাযকম্মাদীসু চ অপ্পমত্তৰিহারিতায মা পমজ্জি। রমেস্সূতি পঞ্চৰিধে চ কামগুণে তে চিত্তং মা রমেস্সু। মা লোহগুল়ন্তি সতিৰোস্সগ্গলক্খণেন হি পমাদেন পমত্তা নিরযে তত্তং লোহগুল়ং গিলন্তি, তেন তং ৰদামি ‘‘মা পমত্তো হুত্ৰা লোহগুল়ং গিলি, মা নিরযে ডয্হমানো ‘দুক্খমিদ’ন্তি কন্দী’’তি অত্থো।

    Jhāya bhikkhūti bhikkhu tvaṃ dvinnaṃ jhānānaṃ vasena jhāya ceva, kāyakammādīsu ca appamattavihāritāya mā pamajji. Ramessūti pañcavidhe ca kāmaguṇe te cittaṃ mā ramessu. Mā lohaguḷanti sativossaggalakkhaṇena hi pamādena pamattā niraye tattaṃ lohaguḷaṃ gilanti, tena taṃ vadāmi ‘‘mā pamatto hutvā lohaguḷaṃ gili, mā niraye ḍayhamāno ‘dukkhamida’nti kandī’’ti attho.

    নত্থি ঝানন্তি ঝানুপ্পাদিকায ৰাযামপঞ্ঞায অপঞ্ঞস্স ঝানং নাম নত্থি। পঞ্ঞা নত্থীতি অঝাযন্তস্স ‘‘সমাহিতো ভিক্খু যথাভূতং জানাতি পস্সতী’’তি ৰুত্তলক্খণা পঞ্ঞা নত্থি। যম্হি ঝানঞ্চ পঞ্ঞা চাতি যম্হি পুগ্গলে ইদং উভযম্পি অত্থি, সো নিব্বানস্স সন্তিকে ঠিতোযেৰাতি অত্থো।

    Natthi jhānanti jhānuppādikāya vāyāmapaññāya apaññassa jhānaṃ nāma natthi. Paññā natthīti ajhāyantassa ‘‘samāhito bhikkhu yathābhūtaṃ jānāti passatī’’ti vuttalakkhaṇā paññā natthi. Yamhi jhānañca paññā cāti yamhi puggale idaṃ ubhayampi atthi, so nibbānassa santike ṭhitoyevāti attho.

    সুঞ্ঞাগারং পৰিট্ঠস্সাতি কিস্মিঞ্চিদেৰ ৰিৰিত্তোকাসে কম্মট্ঠানং অৰিজহিত্ৰা কম্মট্ঠানমনসিকারেন নিসিন্নস্স। সন্তচিত্তস্সাতি নিব্বুতচিত্তস্স। সম্মাতি হেতুনা কারণেন ধম্মং ৰিপস্সন্তস্স ৰিপস্সনাসঙ্খাতা অমানুসী রতি অট্ঠসমাপত্তিসঙ্খাতা দিব্বাপি রতি হোতি উপ্পজ্জতীতি অত্থো।

    Suññāgāraṃ paviṭṭhassāti kismiñcideva vivittokāse kammaṭṭhānaṃ avijahitvā kammaṭṭhānamanasikārena nisinnassa. Santacittassāti nibbutacittassa. Sammāti hetunā kāraṇena dhammaṃ vipassantassa vipassanāsaṅkhātā amānusī rati aṭṭhasamāpattisaṅkhātā dibbāpi rati hoti uppajjatīti attho.

    যতো যতো সম্মসতীতি অট্ঠতিংসায আরম্মণেসু কম্মং করোন্তো যেন যেনাকারেন, পুরেভত্তাদীসু ৰা কালেসু যস্মিং যস্মিং অত্তনা অভিরুচিতে কালে, অভিরুচিতে ৰা কম্মট্ঠানে কম্মং করোন্তো সম্মসতি। উদযব্বযন্তি পঞ্চন্নং খন্ধানং পঞ্চৰীসতিযা লক্খণেহি উদযং , পঞ্চৰীসতিযা এৰ চ লক্খণেহি ৰযং। পীতিপামোজ্জন্তি এৰং খন্ধানং উদযব্বযং সম্মসন্তো ধম্মপীতিং ধম্মপামোজ্জঞ্চ লভতি। অমতন্তি তং সপ্পচ্চযে নামরূপে পাকটে হুত্ৰা উপট্ঠহন্তে উপ্পন্নং পীতিপামোজ্জং অমতনিব্বানসম্পাপকত্তা ৰিজানতং পণ্ডিতানং অমতমেৰাতি অত্থো।

    Yatoyato sammasatīti aṭṭhatiṃsāya ārammaṇesu kammaṃ karonto yena yenākārena, purebhattādīsu vā kālesu yasmiṃ yasmiṃ attanā abhirucite kāle, abhirucite vā kammaṭṭhāne kammaṃ karonto sammasati. Udayabbayanti pañcannaṃ khandhānaṃ pañcavīsatiyā lakkhaṇehi udayaṃ , pañcavīsatiyā eva ca lakkhaṇehi vayaṃ. Pītipāmojjanti evaṃ khandhānaṃ udayabbayaṃ sammasanto dhammapītiṃ dhammapāmojjañca labhati. Amatanti taṃ sappaccaye nāmarūpe pākaṭe hutvā upaṭṭhahante uppannaṃ pītipāmojjaṃ amatanibbānasampāpakattā vijānataṃ paṇḍitānaṃ amatamevāti attho.

    তত্রাযমাদি ভৰতীতি তত্র অযং আদি, ইদং পুব্বট্ঠানং হোতি। ইধ পঞ্ঞস্সাতি ইমস্মিং সাসনে পণ্ডিতভিক্খুনো। ইদানি ‘‘তং আদী’’তি ৰুত্তং পুব্বট্ঠানং দস্সেন্তো ইন্দ্রিযগুত্তীতিআদিমাহ। চতুপারিসুদ্ধিসীলঞ্হি পুব্বট্ঠানং নাম। তত্থ ইন্দ্রিযগুত্তীতি ইন্দ্রিযসংৰরো। সন্তুট্ঠীতি চতুপচ্চযসন্তোসো। তেন আজীৰপারিসুদ্ধি চেৰ পচ্চযসন্নিস্সিতঞ্চ সীলং কথিতং। পাতিমোক্খেতি পাতিমোক্খসঙ্খাতে জেট্ঠকসীলে পরিপূরকারিতা কথিতা।

    Tatrāyamādi bhavatīti tatra ayaṃ ādi, idaṃ pubbaṭṭhānaṃ hoti. Idha paññassāti imasmiṃ sāsane paṇḍitabhikkhuno. Idāni ‘‘taṃ ādī’’ti vuttaṃ pubbaṭṭhānaṃ dassento indriyaguttītiādimāha. Catupārisuddhisīlañhi pubbaṭṭhānaṃ nāma. Tattha indriyaguttīti indriyasaṃvaro. Santuṭṭhīti catupaccayasantoso. Tena ājīvapārisuddhi ceva paccayasannissitañca sīlaṃ kathitaṃ. Pātimokkheti pātimokkhasaṅkhāte jeṭṭhakasīle paripūrakāritā kathitā.

    মিত্তে ভজস্সু কল্যাণেতি ৰিস্সট্ঠকম্মন্তে অপতিরূপসহাযে ৰজ্জেত্ৰা সাধুজীৰিতায সুদ্ধাজীৰে জঙ্ঘবলং নিস্সায জীৰিককপ্পনায অকুসীতে অতন্দিতে কল্যাণমিত্তে ভজস্সু, সেৰস্সূতি অত্থো। পটিসন্থারৰুত্যস্সাতি আমিসপটিসন্থারেন চ ধম্মপটিসন্থারেন চ সম্পন্নৰুত্তিতায পটিসন্থারৰুত্তি অস্স, পটিসন্থারস্স কারকা ভৰেয্যাতি অত্থো। আচারকুসলোতি সীলম্পি আচারো, ৰত্তপটিৰত্তম্পি আচারো। তত্থ কুসলো সিযা, ছেকো ভৰেয্যাতি অত্থো। ততো পামোজ্জবহুলোতি ততো পটিসন্থারৰুত্তিতো চ আচারকোসল্লতো চ উপ্পন্নেন ধম্মপামোজ্জেন পামোজ্জবহুলো হুত্ৰা তং সকলস্সাপি ৰট্টদুক্খস্স অন্তং করিস্সতীতি অত্থো।

    Mitte bhajassu kalyāṇeti vissaṭṭhakammante apatirūpasahāye vajjetvā sādhujīvitāya suddhājīve jaṅghabalaṃ nissāya jīvikakappanāya akusīte atandite kalyāṇamitte bhajassu, sevassūti attho. Paṭisanthāravutyassāti āmisapaṭisanthārena ca dhammapaṭisanthārena ca sampannavuttitāya paṭisanthāravutti assa, paṭisanthārassa kārakā bhaveyyāti attho. Ācārakusaloti sīlampi ācāro, vattapaṭivattampi ācāro. Tattha kusalo siyā, cheko bhaveyyāti attho. Tato pāmojjabahuloti tato paṭisanthāravuttito ca ācārakosallato ca uppannena dhammapāmojjena pāmojjabahulo hutvā taṃ sakalassāpi vaṭṭadukkhassa antaṃ karissatīti attho.

    এৰং সত্থারা দেসিতাসু ইমাসু গাথাসু একমেকিস্সায গাথায পরিযোসানে একমেকং ভিক্খুসতং নিসিন্ননিসিন্নট্ঠানেযেৰ সহ পটিসম্ভিদাহি অরহত্তং পত্ৰা ৰেহাসং অব্ভুগ্গন্ত্ৰা সব্বেপি তে ভিক্খূ আকাসেনেৰ ৰীসযোজনসতিকং কন্তারং অতিক্কমিত্ৰা তথাগতস্স সুৰণ্ণৰণ্ণং সরীরং ৰণ্ণেন্তা থোমেন্তা পাদে ৰন্দিংসূতি।

    Evaṃ satthārā desitāsu imāsu gāthāsu ekamekissāya gāthāya pariyosāne ekamekaṃ bhikkhusataṃ nisinnanisinnaṭṭhāneyeva saha paṭisambhidāhi arahattaṃ patvā vehāsaṃ abbhuggantvā sabbepi te bhikkhū ākāseneva vīsayojanasatikaṃ kantāraṃ atikkamitvā tathāgatassa suvaṇṇavaṇṇaṃ sarīraṃ vaṇṇentā thomentā pāde vandiṃsūti.

    সম্বহুলভিক্খুৰত্থু সত্তমং।

    Sambahulabhikkhuvatthu sattamaṃ.

    ৮. পঞ্চসতভিক্খুৰত্থু

    8. Pañcasatabhikkhuvatthu

    ৰস্সিকা ৰিয পুপ্ফানীতি ইমং ধম্মদেসনং সত্থা জেতৰনে ৰিহরন্তো পঞ্চসতে ভিক্খূ আরব্ভ কথেসি।

    Vassikāviya pupphānīti imaṃ dhammadesanaṃ satthā jetavane viharanto pañcasate bhikkhū ārabbha kathesi.

    তে কির সত্থু সন্তিকে কম্মট্ঠানং গহেত্ৰা অরঞ্ঞে সমণধম্মং করোন্তা পাতোৰ পুপ্ফিতানি ৰস্সিকপুপ্ফানি সাযং ৰণ্টতো মুচ্চন্তানি দিস্ৰা ‘‘পুপ্ফানং ৰণ্টেহি মুচ্চনতো মযং পঠমতরং রাগাদীহি মুচ্চিস্সামা’’তি ৰাযমিংসু। সত্থা তে ভিক্খূ ওলোকেত্ৰা, ‘‘ভিক্খৰে, ভিক্খুনা নাম ৰণ্টতো মুচ্চনপুপ্ফেন ৰিয দুক্খতো মুচ্চিতুং ৰাযমিতব্বমেৰা’’তি ৰত্ৰা গন্ধকুটিযং নিসিন্নোৰ আলোকং ফরিত্ৰা ইমং গাথমাহ –

    Te kira satthu santike kammaṭṭhānaṃ gahetvā araññe samaṇadhammaṃ karontā pātova pupphitāni vassikapupphāni sāyaṃ vaṇṭato muccantāni disvā ‘‘pupphānaṃ vaṇṭehi muccanato mayaṃ paṭhamataraṃ rāgādīhi muccissāmā’’ti vāyamiṃsu. Satthā te bhikkhū oloketvā, ‘‘bhikkhave, bhikkhunā nāma vaṇṭato muccanapupphena viya dukkhato muccituṃ vāyamitabbamevā’’ti vatvā gandhakuṭiyaṃ nisinnova ālokaṃ pharitvā imaṃ gāthamāha –

    ৩৭৭.

    377.

    ‘‘ৰস্সিকা ৰিয পুপ্ফানি, মদ্দৰানি পমুঞ্চতি।

    ‘‘Vassikā viya pupphāni, maddavāni pamuñcati;

    এৰং রাগঞ্চ দোসঞ্চ, ৰিপ্পমুঞ্চেথ ভিক্খৰো’’তি॥

    Evaṃ rāgañca dosañca, vippamuñcetha bhikkhavo’’ti.

    তত্থ ৰস্সিকাতি সুমনা। মদ্দৰানীতি মিলাতানি। ইদং ৰুত্তং হোতি – যথা ৰস্সিকা হিয্যো পুপ্ফিতপুপ্ফানি পুনদিৰসে পুরাণভূতানি মুঞ্চতি, ৰণ্টতো ৰিস্সজ্জেতি, এৰং তুম্হেপি রাগাদযো দোসে ৰিপ্পমুঞ্চেথাতি।

    Tattha vassikāti sumanā. Maddavānīti milātāni. Idaṃ vuttaṃ hoti – yathā vassikā hiyyo pupphitapupphāni punadivase purāṇabhūtāni muñcati, vaṇṭato vissajjeti, evaṃ tumhepi rāgādayo dose vippamuñcethāti.

    দেসনাৰসানে সব্বেপি তে ভিক্খূ অরহত্তে পতিট্ঠহিংসূতি।

    Desanāvasāne sabbepi te bhikkhū arahatte patiṭṭhahiṃsūti.

    পঞ্চসতভিক্খুৰত্থু অট্ঠমং।

    Pañcasatabhikkhuvatthu aṭṭhamaṃ.

    ৯. সন্তকাযত্থেরৰত্থু

    9. Santakāyattheravatthu

    সন্তকাযোতি ইমং ধম্মদেসনং সত্থা জেতৰনে ৰিহরন্তো সন্তকাযত্থেরং নাম আরব্ভ কথেসি।

    Santakāyoti imaṃ dhammadesanaṃ satthā jetavane viharanto santakāyattheraṃ nāma ārabbha kathesi.

    তস্স কির হত্থপাদকুক্কুচ্চং নাম নাহোসি, কাযৰিজম্ভনরহিতো সন্তঅত্তভাৰোৰ অহোসি। সো কির সীহযোনিতো আগতো থেরো। সীহা কির একদিৰসং গোচরং গহেত্ৰা রজতসুৰণ্ণমণিপৰাল়গুহানং অঞ্ঞতরং পৰিসিত্ৰা মনোসিলাতলে হরিতালচুণ্ণেসু সত্তাহং নিপজ্জিত্ৰা সত্তমে দিৰসে উট্ঠায নিপন্নট্ঠানং ওলোকেত্ৰা সচে নঙ্গুট্ঠস্স ৰা কণ্ণানং ৰা হত্থপাদানং ৰা চলিতত্তা মনোসিলাহরিতালচুণ্ণানং ৰিপ্পকিণ্ণতং পস্সন্তি, ‘‘ন তে ইদং জাতিযা ৰা গোত্তস্স ৰা পতিরূপ’’ন্তি পুন সত্তাহং নিরাহারা নিপজ্জন্তি, চুণ্ণানং পন ৰিপ্পকিণ্ণভাৰে অসতি ‘‘ইদং তে জাতিগোত্তানং অনুচ্ছৰিক’’ন্তি আসযা নিক্খমিত্ৰা ৰিজম্ভিত্ৰা দিসা অনুৰিলোকেত্ৰা তিক্খত্তুং সীহনাদং নদিত্ৰা গোচরায পক্কমন্তি। এৰরূপায সীহযোনিযা আগতো অযং ভিক্খু। তস্স কাযসমাচারং দিস্ৰা ভিক্খূ সত্থু আরোচেসুং – ‘‘ন নো, ভন্তে, সন্তকাযত্থেরসদিসো ভিক্খু দিট্ঠপুব্বো। ইমস্স হি নিসিন্নট্ঠানে হত্থচলনং ৰা পাদচলনং ৰা কাযৰিজম্ভিতা ৰা নত্থী’’তি। তং সুত্ৰা সত্থা, ‘‘ভিক্খৰে, ভিক্খুনা নাম সন্তকাযত্থেরেন ৰিয কাযাদীহি উপসন্তেনেৰ ভৰিতব্ব’’ন্তি ৰত্ৰা ইমং গাথমাহ –

    Tassa kira hatthapādakukkuccaṃ nāma nāhosi, kāyavijambhanarahito santaattabhāvova ahosi. So kira sīhayonito āgato thero. Sīhā kira ekadivasaṃ gocaraṃ gahetvā rajatasuvaṇṇamaṇipavāḷaguhānaṃ aññataraṃ pavisitvā manosilātale haritālacuṇṇesu sattāhaṃ nipajjitvā sattame divase uṭṭhāya nipannaṭṭhānaṃ oloketvā sace naṅguṭṭhassa vā kaṇṇānaṃ vā hatthapādānaṃ vā calitattā manosilāharitālacuṇṇānaṃ vippakiṇṇataṃ passanti, ‘‘na te idaṃ jātiyā vā gottassa vā patirūpa’’nti puna sattāhaṃ nirāhārā nipajjanti, cuṇṇānaṃ pana vippakiṇṇabhāve asati ‘‘idaṃ te jātigottānaṃ anucchavika’’nti āsayā nikkhamitvā vijambhitvā disā anuviloketvā tikkhattuṃ sīhanādaṃ naditvā gocarāya pakkamanti. Evarūpāya sīhayoniyā āgato ayaṃ bhikkhu. Tassa kāyasamācāraṃ disvā bhikkhū satthu ārocesuṃ – ‘‘na no, bhante, santakāyattherasadiso bhikkhu diṭṭhapubbo. Imassa hi nisinnaṭṭhāne hatthacalanaṃ vā pādacalanaṃ vā kāyavijambhitā vā natthī’’ti. Taṃ sutvā satthā, ‘‘bhikkhave, bhikkhunā nāma santakāyattherena viya kāyādīhi upasanteneva bhavitabba’’nti vatvā imaṃ gāthamāha –

    ৩৭৮.

    378.

    ‘‘সন্তকাযো সন্তৰাচো, সন্তৰা সুসমাহিতো।

    ‘‘Santakāyo santavāco, santavā susamāhito;

    ৰন্তলোকামিসো ভিক্খু, উপসন্তোতি ৰুচ্চতী’’তি॥

    Vantalokāmiso bhikkhu, upasantoti vuccatī’’ti.

    তত্থ সন্তকাযোতি পাণাতিপাতাদীনং অভাৰেন সন্তকাযো, মুসাৰাদাদীনং অভাৰেন সন্তৰাচো, অভিজ্ঝাদীনং অভাৰেন সন্তৰা, কাযাদীনং তিণ্ণম্পি সুট্ঠু সমাহিতত্তা সুসমাহিতো, চতূহি মগ্গেহি লোকামিসস্স ৰন্ততায ৰন্তলোকামিসো ভিক্খু অব্ভন্তরে রাগাদীনং উপসন্ততায উপসন্তোতি ৰুচ্চতীতি অত্থো।

    Tattha santakāyoti pāṇātipātādīnaṃ abhāvena santakāyo, musāvādādīnaṃ abhāvena santavāco, abhijjhādīnaṃ abhāvena santavā, kāyādīnaṃ tiṇṇampi suṭṭhu samāhitattā susamāhito, catūhi maggehi lokāmisassa vantatāya vantalokāmiso bhikkhu abbhantare rāgādīnaṃ upasantatāya upasantoti vuccatīti attho.

    দেসনাৰসানে সো থেরো অরহত্তে পতিট্ঠহি, সম্পত্তানম্পি সাত্থিকা ধম্মদেসনা অহোসীতি।

    Desanāvasāne so thero arahatte patiṭṭhahi, sampattānampi sātthikā dhammadesanā ahosīti.

    সন্তকাযত্থেরৰত্থু নৰমং।

    Santakāyattheravatthu navamaṃ.

    ১০. নঙ্গলকুলত্থেরৰত্থু

    10. Naṅgalakulattheravatthu

    অত্তনা চোদযত্তানন্তি ইমং ধম্মদেসনং সত্থা জেতৰনে ৰিহরন্তো নঙ্গলকুলত্থেরং আরব্ভ কথেসি।

    Attanācodayattānanti imaṃ dhammadesanaṃ satthā jetavane viharanto naṅgalakulattheraṃ ārabbha kathesi.

    একো কির দুগ্গতমনুস্সো পরেসং ভতিং কত্ৰা জীৰতি, তং একো ভিক্খু পিলোতিকখণ্ডনিৰত্থং নঙ্গলং উক্খিপিত্ৰা গচ্ছন্তং দিস্ৰা এৰমাহ – ‘‘কিং পন তে এৰং জীৰনতো পব্বজিতুং ন ৰর’’ন্তি। কো মং, ভন্তে, এৰং জীৰন্তং পব্বাজেস্সতীতি? সচে পব্বজিস্সসি , অহং তং পব্বাজেস্সামীতি। সাধু ভন্তে , সচে মং পব্বাজেস্সথ, পব্বজিস্সামীতি। অথ নং সো থেরো জেতৰনং নেত্ৰা সহত্থেন, ন্হাপেত্ৰা মাল়কে ঠপেত্ৰা পব্বাজেত্ৰা নিৰত্থপিলোতিকখণ্ডেন সদ্ধিং নঙ্গলং মাল়কসীমাযমেৰ রুক্খসাখাযং ঠপাপেসি। সো উপসম্পন্নকালেপি নঙ্গলকুলত্থেরোত্ৰেৰ পঞ্ঞাযি। সো বুদ্ধানং উপ্পন্নলাভসক্কারং নিস্সায জীৰন্তো উক্কণ্ঠিত্ৰা উক্কণ্ঠিতং ৰিনোদেতুং অসক্কোন্তো ‘‘ন দানি সদ্ধাদেয্যানি কাসাযানি পরিদহিত্ৰা গমিস্সামী’’তি তং রুক্খমূলং গন্ত্ৰা অত্তনাৰ অত্তানং ওৰদি – ‘‘অহিরিক, নিল্লজ্জ, ইদং নিৰাসেত্ৰা ৰিব্ভমিত্ৰা ভতিং কত্ৰা জীৰিতুকামো জাতো’’তি। তস্সেৰং অত্তানং ওৰদন্তস্সেৰ চিত্তং তনুকভাৰং গতং। সো নিৰত্তিত্ৰা পুন কতিপাহচ্চযেন উক্কণ্ঠিত্ৰা তথেৰ অত্তানং ওৰদি, পুনস্স চিত্তং নিৰত্তি। সো ইমিনাৰ নীহারেন উক্কণ্ঠিতউক্কণ্ঠিতকালে তত্থ গন্ত্ৰা অত্তানং ওৰদি। অথ নং ভিক্খূ তত্থ অভিণ্হং গচ্ছন্তং দিস্ৰা, ‘‘আৰুসো, নঙ্গলত্থের কস্মা এত্থ গচ্ছসী’’তি পুচ্ছিংসু। সো ‘‘আচরিযস্স সন্তিকং গচ্ছামি, ভন্তে’’তি ৰত্ৰা কতিপাহেনেৰ অরহত্তং পাপুণি।

    Eko kira duggatamanusso paresaṃ bhatiṃ katvā jīvati, taṃ eko bhikkhu pilotikakhaṇḍanivatthaṃ naṅgalaṃ ukkhipitvā gacchantaṃ disvā evamāha – ‘‘kiṃ pana te evaṃ jīvanato pabbajituṃ na vara’’nti. Ko maṃ, bhante, evaṃ jīvantaṃ pabbājessatīti? Sace pabbajissasi , ahaṃ taṃ pabbājessāmīti. Sādhu bhante , sace maṃ pabbājessatha, pabbajissāmīti. Atha naṃ so thero jetavanaṃ netvā sahatthena, nhāpetvā māḷake ṭhapetvā pabbājetvā nivatthapilotikakhaṇḍena saddhiṃ naṅgalaṃ māḷakasīmāyameva rukkhasākhāyaṃ ṭhapāpesi. So upasampannakālepi naṅgalakulattherotveva paññāyi. So buddhānaṃ uppannalābhasakkāraṃ nissāya jīvanto ukkaṇṭhitvā ukkaṇṭhitaṃ vinodetuṃ asakkonto ‘‘na dāni saddhādeyyāni kāsāyāni paridahitvā gamissāmī’’ti taṃ rukkhamūlaṃ gantvā attanāva attānaṃ ovadi – ‘‘ahirika, nillajja, idaṃ nivāsetvā vibbhamitvā bhatiṃ katvā jīvitukāmo jāto’’ti. Tassevaṃ attānaṃ ovadantasseva cittaṃ tanukabhāvaṃ gataṃ. So nivattitvā puna katipāhaccayena ukkaṇṭhitvā tatheva attānaṃ ovadi, punassa cittaṃ nivatti. So imināva nīhārena ukkaṇṭhitaukkaṇṭhitakāle tattha gantvā attānaṃ ovadi. Atha naṃ bhikkhū tattha abhiṇhaṃ gacchantaṃ disvā, ‘‘āvuso, naṅgalatthera kasmā ettha gacchasī’’ti pucchiṃsu. So ‘‘ācariyassa santikaṃ gacchāmi, bhante’’ti vatvā katipāheneva arahattaṃ pāpuṇi.

    ভিক্খূ তেন সদ্ধিং কেল়িং করোন্তা আহংসু – ‘‘আৰুসো নঙ্গলত্থের, তৰ ৰিচরণমগ্গো অৰল়ঞ্জো ৰিয জাতো, আচরিযস্স সন্তিকং ন গচ্ছসি মঞ্ঞে’’তি। আম, ভন্তে, মযং সংসগ্গে সতি অগমিম্হা, ইদানি পন সো সংসগ্গো ছিন্নো, তেন ন গচ্ছামাতি। তং সুত্ৰা ভিক্খূ ‘‘এস অভূতং ৰত্ৰা অঞ্ঞং ব্যাকরোতী’’তি সত্থু তমত্থং আরোচেসুং। সত্থা ‘‘আম, ভিক্খৰে, মম পুত্তো অত্তনাৰ অত্তানং চোদেত্ৰা পব্বজিতকিচ্চস্স মত্থকং পত্তো’’তি ৰত্ৰা ধম্মং দেসেন্তো ইমা গাথা অভাসি –

    Bhikkhū tena saddhiṃ keḷiṃ karontā āhaṃsu – ‘‘āvuso naṅgalatthera, tava vicaraṇamaggo avaḷañjo viya jāto, ācariyassa santikaṃ na gacchasi maññe’’ti. Āma, bhante, mayaṃ saṃsagge sati agamimhā, idāni pana so saṃsaggo chinno, tena na gacchāmāti. Taṃ sutvā bhikkhū ‘‘esa abhūtaṃ vatvā aññaṃ byākarotī’’ti satthu tamatthaṃ ārocesuṃ. Satthā ‘‘āma, bhikkhave, mama putto attanāva attānaṃ codetvā pabbajitakiccassa matthakaṃ patto’’ti vatvā dhammaṃ desento imā gāthā abhāsi –

    ৩৭৯.

    379.

    ‘‘অত্তনা চোদযত্তানং, পটিমংসেথ অত্তনা।

    ‘‘Attanā codayattānaṃ, paṭimaṃsetha attanā;

    সো অত্তগুত্তো সতিমা, সুখং ভিক্খু ৰিহাহিসি॥

    So attagutto satimā, sukhaṃ bhikkhu vihāhisi.

    ৩৮০.

    380.

    ‘‘অত্তা হি অত্তনো নাথো, কো হি নাথো পরো সিযা।

    ‘‘Attā hi attano nātho, ko hi nātho paro siyā;

    অত্তা হি অত্তনো গতি।

    Attā hi attano gati;

    তস্মা সংযমমত্তানং, অস্সং ভদ্রংৰ ৰাণিজো’’তি॥

    Tasmā saṃyamamattānaṃ, assaṃ bhadraṃva vāṇijo’’ti.

    তত্থ চোদযত্তানন্তি অত্তনাৰ অত্তানং চোদয সারয। পটিমংসেথাতি অত্তনাৰ অত্তানং পরিৰীমংসথ। সোতি সো ত্ৰং, ভিক্খু, এৰং সন্তে অত্তনাৰ গুত্ততায অত্তগুত্তো, উপট্ঠিতসতিতায সতিমা হুত্ৰা সব্বিরিযাপথেসু সুখং ৰিহরিস্সসীতি অত্থো।

    Tattha codayattānanti attanāva attānaṃ codaya sāraya. Paṭimaṃsethāti attanāva attānaṃ parivīmaṃsatha. Soti so tvaṃ, bhikkhu, evaṃ sante attanāva guttatāya attagutto, upaṭṭhitasatitāya satimā hutvā sabbiriyāpathesu sukhaṃ viharissasīti attho.

    নাথোতি অৰস্সযো পতিট্ঠা। কো হি নাথো পরোতি যস্মা পরস্স অত্তভাৰে পতিট্ঠায কুসলং ৰা কত্ৰা সগ্গপরাযণেন মগ্গং ৰা ভাৰেত্ৰা সচ্ছিকতফলেন ভৰিতুং ন সক্কা, তস্মা কো হি নাম পরো নাথো ভৰেয্যাতি অত্থো। তস্মাতি যস্মা অত্তাৰ অত্তনো গতি পতিট্ঠা সরণং, তস্মা যথা ভদ্রং অস্সাজানীযং নিস্সায লাভং পত্থযন্তো ৰাণিজো তস্স ৰিসমট্ঠানচারং পচ্ছিন্দিত্ৰা দিৰসস্স তিক্খত্তুং নহাপেন্তো ভোজেন্তো সংযমেতি পটিজগ্গতি, এৰং ত্ৰম্পি অনুপ্পন্নস্স অকুসলস্স উপ্পাদং নিৰারেন্তো সতিসম্মোসেন উপ্পন্নং অকুসলং পজহন্তো অত্তানং সংযম গোপয, এৰং সন্তে পঠমজ্ঝানং আদিং কত্ৰা লোকিযলোকুত্তরৰিসেসং অধিগমিস্সসীতি অত্থো।

    Nāthoti avassayo patiṭṭhā. Ko hi nātho paroti yasmā parassa attabhāve patiṭṭhāya kusalaṃ vā katvā saggaparāyaṇena maggaṃ vā bhāvetvā sacchikataphalena bhavituṃ na sakkā, tasmā ko hi nāma paro nātho bhaveyyāti attho. Tasmāti yasmā attāva attano gati patiṭṭhā saraṇaṃ, tasmā yathā bhadraṃ assājānīyaṃ nissāya lābhaṃ patthayanto vāṇijo tassa visamaṭṭhānacāraṃ pacchinditvā divasassa tikkhattuṃ nahāpento bhojento saṃyameti paṭijaggati, evaṃ tvampi anuppannassa akusalassa uppādaṃ nivārento satisammosena uppannaṃ akusalaṃ pajahanto attānaṃ saṃyama gopaya, evaṃ sante paṭhamajjhānaṃ ādiṃ katvā lokiyalokuttaravisesaṃ adhigamissasīti attho.

    দেসনাৰসানে বহূ সোতাপত্তিফলাদীনি পাপুণিংসূতি।

    Desanāvasāne bahū sotāpattiphalādīni pāpuṇiṃsūti.

    নঙ্গলকুলত্থেরৰত্থু দসমং।

    Naṅgalakulattheravatthu dasamaṃ.

    ১১. ৰক্কলিত্থেরৰত্থু

    11. Vakkalittheravatthu

    পামোজ্জবহুলোতি ইমং ধম্মদেসনং সত্থা ৰেল়ুৰনে ৰিহরন্তো ৰক্কলিত্থেরং আরব্ভ কথেসি।

    Pāmojjabahuloti imaṃ dhammadesanaṃ satthā veḷuvane viharanto vakkalittheraṃ ārabbha kathesi.

    সো কিরাযস্মা সাৰত্থিযং ব্রাহ্মণকুলে নিব্বত্তিত্ৰা ৰযপ্পত্তো পিণ্ডায পৰিট্ঠং তথাগতং দিস্ৰা সত্থু সরীরসম্পত্তিং ওলোকেত্ৰা সরীরসম্পত্তিদস্সনেন অতিত্তো ‘‘এৰাহং নিচ্চকালং তথাগতং দট্ঠুং লভিস্সামী’’তি সত্থু সন্তিকে পব্বজিত্ৰা যত্থ ঠিতেন সক্কা দসবলং পস্সিতুং, তত্থ ঠিতো সজ্ঝাযকম্মট্ঠানমনসিকারাদীনি পহায সত্থারং ওলোকেন্তোৰ ৰিচরতি। সত্থা তস্স ঞাণপরিপাকং আগমেন্তো কিঞ্চি অৰত্ৰা ‘‘ইদানিস্স ঞাণং পরিপাকং গত’’ন্তি ঞত্ৰা ‘‘কিং তে, ৰক্কলি, ইমিনা পূতিকাযেন দিট্ঠেন, যো খো, ৰক্কলি, ধম্মং পস্সতি, সো মং পস্সতি। যো মং পস্সতি, সো ধম্মং পস্সতী’’তি (সং॰ নি॰ ৩.৮৭) ৰত্ৰা ওৰদি। সো এৰং ওৰদিতোপি সত্থু দস্সনং পহায নেৰ অঞ্ঞত্থ গন্তুং সক্কোতি। অথ নং সত্থা ‘‘নাযং ভিক্খু সংৰেগং অলভিত্ৰা বুজ্ঝিস্সতী’’তি উপকট্ঠায ৰস্সূপনাযিকায রাজগহং গন্ত্ৰা ৰস্সূপনাযিকদিৰসে ‘‘অপেহি, ৰক্কলি, অপেহি, ৰক্কলী’’তি পণামেসি। সো ‘‘ন মং সত্থা আলপতী’’তি তেমাসং সত্থু সম্মুখে ঠাতুং অসক্কোন্তো ‘‘কিং ময্হং জীৰিতেন, পব্বতা অত্তানং পাতেস্সামী’’তি গিজ্ঝকূটং অভিরুহি।

    So kirāyasmā sāvatthiyaṃ brāhmaṇakule nibbattitvā vayappatto piṇḍāya paviṭṭhaṃ tathāgataṃ disvā satthu sarīrasampattiṃ oloketvā sarīrasampattidassanena atitto ‘‘evāhaṃ niccakālaṃ tathāgataṃ daṭṭhuṃ labhissāmī’’ti satthu santike pabbajitvā yattha ṭhitena sakkā dasabalaṃ passituṃ, tattha ṭhito sajjhāyakammaṭṭhānamanasikārādīni pahāya satthāraṃ olokentova vicarati. Satthā tassa ñāṇaparipākaṃ āgamento kiñci avatvā ‘‘idānissa ñāṇaṃ paripākaṃ gata’’nti ñatvā ‘‘kiṃ te, vakkali, iminā pūtikāyena diṭṭhena, yo kho, vakkali, dhammaṃ passati, so maṃ passati. Yo maṃ passati, so dhammaṃ passatī’’ti (saṃ. ni. 3.87) vatvā ovadi. So evaṃ ovaditopi satthu dassanaṃ pahāya neva aññattha gantuṃ sakkoti. Atha naṃ satthā ‘‘nāyaṃ bhikkhu saṃvegaṃ alabhitvā bujjhissatī’’ti upakaṭṭhāya vassūpanāyikāya rājagahaṃ gantvā vassūpanāyikadivase ‘‘apehi, vakkali, apehi, vakkalī’’ti paṇāmesi. So ‘‘na maṃ satthā ālapatī’’ti temāsaṃ satthu sammukhe ṭhātuṃ asakkonto ‘‘kiṃ mayhaṃ jīvitena, pabbatā attānaṃ pātessāmī’’ti gijjhakūṭaṃ abhiruhi.

    সত্থা তস্স কিলমনভাৰং ঞত্ৰা ‘‘অযং ভিক্খু মম সন্তিকা অস্সাসং অলভন্তো মগ্গফলানং উপনিস্সযং নাসেয্যা’’তি অত্তানং দস্সেতুং ওভাসং মুঞ্চি। অথস্স সত্থু দিট্ঠকালতো পট্ঠায তাৰমহন্তোপি সোকো পহীযি। সত্থা সুক্খতল়াকং ওঘেন পূরেন্তো ৰিয থেরস্স বলৰপীতিপামোজ্জং উপ্পাদেতুং ইমং গাথমাহ –

    Satthā tassa kilamanabhāvaṃ ñatvā ‘‘ayaṃ bhikkhu mama santikā assāsaṃ alabhanto maggaphalānaṃ upanissayaṃ nāseyyā’’ti attānaṃ dassetuṃ obhāsaṃ muñci. Athassa satthu diṭṭhakālato paṭṭhāya tāvamahantopi soko pahīyi. Satthā sukkhataḷākaṃ oghena pūrento viya therassa balavapītipāmojjaṃ uppādetuṃ imaṃ gāthamāha –

    ৩৮১.

    381.

    ‘‘পামোজ্জবহুলো ভিক্খু, পসন্নো বুদ্ধসাসনে।

    ‘‘Pāmojjabahulo bhikkhu, pasanno buddhasāsane;

    অধিগচ্ছে পদং সন্তং, সঙ্খারূপসমং সুখ’’ন্তি॥

    Adhigacche padaṃ santaṃ, saṅkhārūpasamaṃ sukha’’nti.

    তস্সত্থো – পকতিযাপি পামোজ্জবহুলো ভিক্খু বুদ্ধসাসনে পসাদং রোচেতি, সো এৰং পসন্নো বুদ্ধসাসনে সন্তং পদং সঙ্খারূপসমং সুখন্তি লদ্ধনামং নিব্বানং অধিগচ্ছেয্যাতি। ইমঞ্চ পন গাথং ৰত্ৰা সত্থা ৰক্কলিত্থেরস্স হত্থং পসারেত্ৰা –

    Tassattho – pakatiyāpi pāmojjabahulo bhikkhu buddhasāsane pasādaṃ roceti, so evaṃ pasanno buddhasāsane santaṃ padaṃ saṅkhārūpasamaṃ sukhanti laddhanāmaṃ nibbānaṃ adhigaccheyyāti. Imañca pana gāthaṃ vatvā satthā vakkalittherassa hatthaṃ pasāretvā –

    ‘‘এহি ৰক্কলি মা ভাযি, ওলোকেহি তথাগতং।

    ‘‘Ehi vakkali mā bhāyi, olokehi tathāgataṃ;

    অহং তং উদ্ধরিস্সামি, পঙ্কে সন্নংৰ কুঞ্জরং॥

    Ahaṃ taṃ uddharissāmi, paṅke sannaṃva kuñjaraṃ.

    ‘‘এহি ৰক্কলি মা ভাযি, ওলোকেহি তথাগতং।

    ‘‘Ehi vakkali mā bhāyi, olokehi tathāgataṃ;

    অহং তং মোচযিস্সামি, রাহুগ্গহংৰ সূরিযং॥

    Ahaṃ taṃ mocayissāmi, rāhuggahaṃva sūriyaṃ.

    ‘‘এহি ৰক্কলি মা ভাযি, ওলোকেহি তথাগতং।

    ‘‘Ehi vakkali mā bhāyi, olokehi tathāgataṃ;

    অহং তং মোচযিস্সামি, রাহুগ্গহংৰ চন্দিম’’ন্তি॥ –

    Ahaṃ taṃ mocayissāmi, rāhuggahaṃva candima’’nti. –

    ইমা গাথা অভাসি। সো ‘‘দসবলো মে দিট্ঠো, এহীতি চ অৰ্হানম্পি লদ্ধ’’ন্তি বলৰপীতিং উপ্পাদেত্ৰা ‘‘কুতো নু খো গন্তব্ব’’ন্তি গমনমগ্গং অপস্সন্তো দসবলস্স সম্মুখে আকাসে উপ্পতিত্ৰা পঠমপাদে পব্বতে ঠিতেযেৰ সত্থারা ৰুত্তগাথা আৰজ্জেন্তো আকাসেযেৰ পীতিং ৰিক্খম্ভেত্ৰা সহ পটিসম্ভিদাহি অরহত্তং পত্ৰা তথাগতং ৰন্দমানোৰ ওতরিত্ৰা সত্থু সন্তিকে অট্ঠাসি। অথ নং সত্থা অপরভাগে সদ্ধাধিমুত্তানং অগ্গট্ঠানে ঠপেসীতি।

    Imā gāthā abhāsi. So ‘‘dasabalo me diṭṭho, ehīti ca avhānampi laddha’’nti balavapītiṃ uppādetvā ‘‘kuto nu kho gantabba’’nti gamanamaggaṃ apassanto dasabalassa sammukhe ākāse uppatitvā paṭhamapāde pabbate ṭhiteyeva satthārā vuttagāthā āvajjento ākāseyeva pītiṃ vikkhambhetvā saha paṭisambhidāhi arahattaṃ patvā tathāgataṃ vandamānova otaritvā satthu santike aṭṭhāsi. Atha naṃ satthā aparabhāge saddhādhimuttānaṃ aggaṭṭhāne ṭhapesīti.

    ৰক্কলিত্থেরৰত্থু একাদসমং।

    Vakkalittheravatthu ekādasamaṃ.

    ১২. সুমনসামণেরৰত্থু

    12. Sumanasāmaṇeravatthu

    যো হৰেতি ইমং ধম্মদেসনং সত্থা পুব্বারামে ৰিহরন্তো সুমনসামণেরং আরব্ভ কথেসি। তত্রাযং অনুপুব্বী কথা –

    Yohaveti imaṃ dhammadesanaṃ satthā pubbārāme viharanto sumanasāmaṇeraṃ ārabbha kathesi. Tatrāyaṃ anupubbī kathā –

    পদুমুত্তরবুদ্ধকালস্মিঞ্হি একো কুলপুত্তো সত্থারা চতুপরিসমজ্ঝে একং ভিক্খুং দিব্বচক্খুকানং অগ্গট্ঠানে ঠপেন্তং দিস্ৰা তং সম্পত্তিং পত্থযমানো সত্থারং নিমন্তেত্ৰা সত্তাহং বুদ্ধপ্পমুখস্স ভিক্খুসঙ্ঘস্স মহাদানং দত্ৰা, ‘‘ভন্তে, অহম্পি অনাগতে একস্স বুদ্ধস্স সাসনে দিব্বচক্খুকানং অগ্গো ভৰেয্য’’ন্তি পত্থনং ঠপেসি। সত্থা কপ্পসতসহস্সং ওলোকেন্তো তস্স পত্থনায সমিজ্ঝনভাৰং ৰিদিত্ৰা ‘‘ইতো কপ্পসতসহস্সমত্থকে গোতমবুদ্ধসাসনে দিব্বচক্খুকানং অগ্গো অনুরুদ্ধো নাম ভৰিস্সসী’’তি ব্যাকাসি। সো তং ব্যাকরণং সুত্ৰা স্ৰে পত্তব্বং ৰিয তং সম্পত্তিং মঞ্ঞমানো পরিনিব্বুতে সত্থরি ভিক্খূ দিব্বচক্খুপরিকম্মং পুচ্ছিত্ৰা সত্তযোজনিকং কঞ্চনথূপং পরিক্খিপিত্ৰা অনেকানি দীপরুক্খসহস্সানি কারেত্ৰা দীপপূজং কত্ৰা ততো চুতো দেৰলোকে নিব্বত্তিত্ৰা দেৰমনুস্সেসু কপ্পসতসহস্সানি সংসরিত্ৰা ইমস্মিং কপ্পে বারাণসিযং দলিদ্দকুলে নিব্বত্তো সুমনসেট্ঠিং নিস্সায তস্স তিণহারকো হুত্ৰা জীৰিকং কপ্পেসি। অন্নভারোতিস্স নামং অহোসি। সুমনসেট্ঠীপি তস্মিং নগরে নিচ্চকালং মহাদানং দেতি।

    Padumuttarabuddhakālasmiñhi eko kulaputto satthārā catuparisamajjhe ekaṃ bhikkhuṃ dibbacakkhukānaṃ aggaṭṭhāne ṭhapentaṃ disvā taṃ sampattiṃ patthayamāno satthāraṃ nimantetvā sattāhaṃ buddhappamukhassa bhikkhusaṅghassa mahādānaṃ datvā, ‘‘bhante, ahampi anāgate ekassa buddhassa sāsane dibbacakkhukānaṃ aggo bhaveyya’’nti patthanaṃ ṭhapesi. Satthā kappasatasahassaṃ olokento tassa patthanāya samijjhanabhāvaṃ viditvā ‘‘ito kappasatasahassamatthake gotamabuddhasāsane dibbacakkhukānaṃ aggo anuruddho nāma bhavissasī’’ti byākāsi. So taṃ byākaraṇaṃ sutvā sve pattabbaṃ viya taṃ sampattiṃ maññamāno parinibbute satthari bhikkhū dibbacakkhuparikammaṃ pucchitvā sattayojanikaṃ kañcanathūpaṃ parikkhipitvā anekāni dīparukkhasahassāni kāretvā dīpapūjaṃ katvā tato cuto devaloke nibbattitvā devamanussesu kappasatasahassāni saṃsaritvā imasmiṃ kappe bārāṇasiyaṃ daliddakule nibbatto sumanaseṭṭhiṃ nissāya tassa tiṇahārako hutvā jīvikaṃ kappesi. Annabhārotissa nāmaṃ ahosi. Sumanaseṭṭhīpi tasmiṃ nagare niccakālaṃ mahādānaṃ deti.

    অথেকদিৰসং উপরিট্ঠো নাম পচ্চেকবুদ্ধো গন্ধমাদনে নিরোধসমাপত্তিতো ৰুট্ঠায ‘‘কস্স নু খো অজ্জ অনুগ্গহং করিস্সামী’’তি চিন্তেত্ৰা ‘‘অজ্জ মযা অন্নভারস্স অনুগ্গহং কাতুং ৰট্টতি, ইদানি চ সো অটৰিতো তিণং আদায গেহং আগমিস্সতী’’তি ঞত্ৰা পত্তচীৰরমাদায ইদ্ধিযা গন্ত্ৰা অন্নভারস্স সম্মুখে পচ্চুট্ঠাসি। অন্নভারো তং তুচ্ছপত্তহত্থং দিস্ৰা ‘‘অপি , ভন্তে, ভিক্খং লভিত্থা’’তি পুচ্ছিত্ৰা ‘‘লভিস্সাম মহাপুঞ্ঞা’’তি ৰুত্তে ‘‘তেন হি, ভন্তে, থোকং আগমেথা’’তি তিণকাজং ছড্ডেত্ৰা ৰেগেন গেহং গন্ত্ৰা, ‘‘ভদ্দে, ময্হং ঠপিতভাগভত্তং অত্থি, নত্থী’’তি ভরিযং পুচ্ছিত্ৰা ‘‘অত্থি, সামী’’তি ৰুত্তে ৰেগেন পচ্চাগন্ত্ৰা পচ্চেকবুদ্ধস্স পত্তং আদায ‘‘ময্হং দাতুকামতায সতি দেয্যধম্মো ন হোতি, দেয্যধম্মে সতি পটিগ্গাহকং ন লভামি। অজ্জ পন মে পটিগ্গাহকো চ দিট্ঠো, দেয্যধম্মো চ অত্থি, লাভা ৰত মে’’তি গেহং গন্ত্ৰা ভত্তং পত্তে পক্খিপাপেত্ৰা পচ্চাহরিত্ৰা পচ্চেকবুদ্ধস্স হত্থে পতিট্ঠপেত্ৰা –

    Athekadivasaṃ upariṭṭho nāma paccekabuddho gandhamādane nirodhasamāpattito vuṭṭhāya ‘‘kassa nu kho ajja anuggahaṃ karissāmī’’ti cintetvā ‘‘ajja mayā annabhārassa anuggahaṃ kātuṃ vaṭṭati, idāni ca so aṭavito tiṇaṃ ādāya gehaṃ āgamissatī’’ti ñatvā pattacīvaramādāya iddhiyā gantvā annabhārassa sammukhe paccuṭṭhāsi. Annabhāro taṃ tucchapattahatthaṃ disvā ‘‘api , bhante, bhikkhaṃ labhitthā’’ti pucchitvā ‘‘labhissāma mahāpuññā’’ti vutte ‘‘tena hi, bhante, thokaṃ āgamethā’’ti tiṇakājaṃ chaḍḍetvā vegena gehaṃ gantvā, ‘‘bhadde, mayhaṃ ṭhapitabhāgabhattaṃ atthi, natthī’’ti bhariyaṃ pucchitvā ‘‘atthi, sāmī’’ti vutte vegena paccāgantvā paccekabuddhassa pattaṃ ādāya ‘‘mayhaṃ dātukāmatāya sati deyyadhammo na hoti, deyyadhamme sati paṭiggāhakaṃ na labhāmi. Ajja pana me paṭiggāhako ca diṭṭho, deyyadhammo ca atthi, lābhā vata me’’ti gehaṃ gantvā bhattaṃ patte pakkhipāpetvā paccāharitvā paccekabuddhassa hatthe patiṭṭhapetvā –

    ‘‘ইমিনা পন দানেন, মা মে দালিদ্দিযং অহু।

    ‘‘Iminā pana dānena, mā me dāliddiyaṃ ahu;

    নত্থীতি ৰচনং নাম, মা অহোসি ভৰাভৰে॥ –

    Natthīti vacanaṃ nāma, mā ahosi bhavābhave. –

    ভন্তে এৰরূপা দুজ্জীৰিতা মুচ্চেয্যং, নত্থীতি পদমেৰ ন সুণেয্য’’ন্তি পত্থনং ঠপেসি। পচ্চেকবুদ্ধো ‘‘এৰং হোতু মহাপুঞ্ঞা’’তি ৰত্ৰা অনুমোদনং কত্ৰা পক্কামি।

    Bhante evarūpā dujjīvitā mucceyyaṃ, natthīti padameva na suṇeyya’’nti patthanaṃ ṭhapesi. Paccekabuddho ‘‘evaṃ hotu mahāpuññā’’ti vatvā anumodanaṃ katvā pakkāmi.

    সুমনসেট্ঠিনোপি ছত্তে অধিৰত্থা দেৰতা ‘‘অহো দানং পরমদানং, উপরিট্ঠে সুপতিট্ঠিত’’ন্তি ৰত্ৰা তিক্খত্তুং সাধুকারমদাসি। অথ নং সেট্ঠি ‘‘কিং মং এত্তকং কালং দানং দদমানং ন পস্সসী’’তি আহ। নাহং তৰ দানং আরব্ভ সাধুকারং দেমি, অন্নভারেন পন উপরিট্ঠস্স দিন্নপিণ্ডপাতে পসীদিত্ৰা মযা এস সাধুকারো পৰত্তিতোতি। সো ‘‘অচ্ছরিযং ৰত, ভো, অহং এত্তকং কালং দানং দদন্তো দেৰতং সাধুকারং দাপেতুং নাসক্খিং, অন্নভারো মং নিস্সায জীৰন্তো একপিণ্ডপাতেনেৰ সাধুকারং দাপেসি, তস্স দানে অনুচ্ছৰিকং কত্ৰা তং পিণ্ডপাতং মম সন্তকং করিস্সামী’’তি চিন্তেত্ৰা তং পক্কোসাপেত্ৰা ‘‘অজ্জ তযা কস্সচি কিঞ্চি দিন্ন’’ন্তি পুচ্ছি। ‘‘আম, সামি, উপরিট্ঠপচ্চেকবুদ্ধস্স মে অজ্জ ভাগভত্তং দিন্ন’’ন্তি। ‘‘হন্দ, ভো, কহাপণং গহেত্ৰা এতং ময্হং পিণ্ডপাতং দেহী’’তি? ‘‘ন দেমি, সামী’’তি। সো যাৰ সহস্সং ৰড্ঢেসি, ইতরো সহস্সেনাপি নাদাসি। অথ নং ‘‘হোতু, ভো, যদি পিণ্ডপাতং ন দেসি, সহস্সং গহেত্ৰা পত্তিং মে দেহী’’তি আহ। সো ‘‘অয্যেন সদ্ধিং মন্তেত্ৰা জানিস্সামী’’তি ৰেগেন পচ্চেকবুদ্ধং সম্পাপুণিত্ৰা, ‘‘ভন্তে সুমনসেট্ঠি, সহস্সং দত্ৰা তুম্হাকং পিণ্ডপাতে পত্তিং যাচতি, কিং করোমী’’তি পুচ্ছি।

    Sumanaseṭṭhinopi chatte adhivatthā devatā ‘‘aho dānaṃ paramadānaṃ, upariṭṭhe supatiṭṭhita’’nti vatvā tikkhattuṃ sādhukāramadāsi. Atha naṃ seṭṭhi ‘‘kiṃ maṃ ettakaṃ kālaṃ dānaṃ dadamānaṃ na passasī’’ti āha. Nāhaṃ tava dānaṃ ārabbha sādhukāraṃ demi, annabhārena pana upariṭṭhassa dinnapiṇḍapāte pasīditvā mayā esa sādhukāro pavattitoti. So ‘‘acchariyaṃ vata, bho, ahaṃ ettakaṃ kālaṃ dānaṃ dadanto devataṃ sādhukāraṃ dāpetuṃ nāsakkhiṃ, annabhāro maṃ nissāya jīvanto ekapiṇḍapāteneva sādhukāraṃ dāpesi, tassa dāne anucchavikaṃ katvā taṃ piṇḍapātaṃ mama santakaṃ karissāmī’’ti cintetvā taṃ pakkosāpetvā ‘‘ajja tayā kassaci kiñci dinna’’nti pucchi. ‘‘Āma, sāmi, upariṭṭhapaccekabuddhassa me ajja bhāgabhattaṃ dinna’’nti. ‘‘Handa, bho, kahāpaṇaṃ gahetvā etaṃ mayhaṃ piṇḍapātaṃ dehī’’ti? ‘‘Na demi, sāmī’’ti. So yāva sahassaṃ vaḍḍhesi, itaro sahassenāpi nādāsi. Atha naṃ ‘‘hotu, bho, yadi piṇḍapātaṃ na desi, sahassaṃ gahetvā pattiṃ me dehī’’ti āha. So ‘‘ayyena saddhiṃ mantetvā jānissāmī’’ti vegena paccekabuddhaṃ sampāpuṇitvā, ‘‘bhante sumanaseṭṭhi, sahassaṃ datvā tumhākaṃ piṇḍapāte pattiṃ yācati, kiṃ karomī’’ti pucchi.

    অথস্স সো উপমং আহরি ‘‘সেয্যথাপি, পণ্ডিত, কুলসতিকে গামে একস্মিং ঘরে দীপং জালেয্য, সেসা অত্তনো তেলেন ৰট্টিং তেমেত্ৰা জালাপেত্ৰা গণ্হেয্যুং, পুরিমপদীপস্স পভা অত্থীতি ৰত্তব্বা নত্থী’’তি। অতিরেকতরা, ভন্তে, পভা হোতীতি। এৰমেৰং পণ্ডিত উল়ুঙ্কযাগু ৰা হোতু, কটচ্ছুভিক্খা ৰা, অত্তনো পিণ্ডপাতে পরেসং পত্তিং দেন্তস্স যত্তকানং দেতি, তত্তকং ৰড্ঢতি। ত্ৰঞ্হি একমেৰ পিণ্ডপাতং অদাসি, সেট্ঠিস্স পন পত্তিযা দিন্নায দ্ৰে পিণ্ডপাতা হোন্তি একো তৰ, একো তস্সাতি।

    Athassa so upamaṃ āhari ‘‘seyyathāpi, paṇḍita, kulasatike gāme ekasmiṃ ghare dīpaṃ jāleyya, sesā attano telena vaṭṭiṃ temetvā jālāpetvā gaṇheyyuṃ, purimapadīpassa pabhā atthīti vattabbā natthī’’ti. Atirekatarā, bhante, pabhā hotīti. Evamevaṃ paṇḍita uḷuṅkayāgu vā hotu, kaṭacchubhikkhā vā, attano piṇḍapāte paresaṃ pattiṃ dentassa yattakānaṃ deti, tattakaṃ vaḍḍhati. Tvañhi ekameva piṇḍapātaṃ adāsi, seṭṭhissa pana pattiyā dinnāya dve piṇḍapātā honti eko tava, eko tassāti.

    সো ‘‘সাধু, ভন্তে’’তি তং অভিৰাদেত্ৰা সেট্ঠিস্স সন্তিকং গন্ত্ৰা ‘‘গণ্হ, সামি, পত্তি’’ন্তি আহ। তেন হি ইমে কহাপণে গণ্হাতি। নাহং পিণ্ডপাতং ৰিক্কিণামি, সদ্ধায তে পত্তিং দম্মীতি। ‘‘ত্ৰং সদ্ধায দেসি, অহম্পি তৰ গুণে পূজেমি, গণ্হ, তাত, ইতো পট্ঠায চ পন মা সহত্থা কম্মমকাসি, ৰীথিযং ঘরং মাপেত্ৰা ৰস। যেন চ তে অত্থো হোতি, সব্বং মম সন্তিকা গণ্হাহী’’তি আহ। নিরোধা ৰুট্ঠিতস্স পন দিন্নপিণ্ডপাতো তদহেৰ ৰিপাকং দেতি। তস্মা রাজাপি তং পৰত্তিং সুত্ৰা অন্নভারং পক্কোসাপেত্ৰা পত্তিং গহেত্ৰা মহন্তং ভোগং দত্ৰা তস্স সেট্ঠিট্ঠানং দাপেসি।

    So ‘‘sādhu, bhante’’ti taṃ abhivādetvā seṭṭhissa santikaṃ gantvā ‘‘gaṇha, sāmi, patti’’nti āha. Tena hi ime kahāpaṇe gaṇhāti. Nāhaṃ piṇḍapātaṃ vikkiṇāmi, saddhāya te pattiṃ dammīti. ‘‘Tvaṃ saddhāya desi, ahampi tava guṇe pūjemi, gaṇha, tāta, ito paṭṭhāya ca pana mā sahatthā kammamakāsi, vīthiyaṃ gharaṃ māpetvā vasa. Yena ca te attho hoti, sabbaṃ mama santikā gaṇhāhī’’ti āha. Nirodhā vuṭṭhitassa pana dinnapiṇḍapāto tadaheva vipākaṃ deti. Tasmā rājāpi taṃ pavattiṃ sutvā annabhāraṃ pakkosāpetvā pattiṃ gahetvā mahantaṃ bhogaṃ datvā tassa seṭṭhiṭṭhānaṃ dāpesi.

    সো সুমনসেট্ঠিস্স সহাযকো হুত্ৰা যাৰজীৰং পুঞ্ঞানি কত্ৰা ততো চুতো দেৰলোকে নিব্বত্তিত্ৰা দেৰমনুস্সেসু সংসরন্তো ইমস্মিং বুদ্ধুপ্পাদে কপিলৰত্থুনগরে অমিতোদনস্স সক্কস্স গেহে পটিসন্ধিং গণ্হি, অনুরুদ্ধোতিস্স নামং অকংসু। সো মহানামসক্কস্স কনিট্ঠভাতা, সত্থু চূল়পিতু পুত্তো পরমসুখুমালো মহাপুঞ্ঞো অহোসি। একদিৰসং কির ছসু খত্তিযেসু পূৰে লক্খং কত্ৰা গুল়েহি কীল়ন্তেসু অনুরুদ্ধো পরাজিতো পূৰানং অত্থায মাতু সন্তিকং পহিণি। সা মহন্তং সুৰণ্ণথালং পূরেত্ৰা পূৰে পেসেসি। পূৰে খাদিত্ৰা পুন কীল়ন্তো পরাজিতো তথেৰ পহিণি। এৰং তিক্খত্তুং পূৰেসু আহটেসু চতুত্থে ৰারে মাতা ‘‘ইদানি পূৰা নত্থী’’তি পহিণি। তস্সা ৰচনং সুত্ৰা ‘‘নত্থী’’তি পদস্স অসুতপুব্বতায ‘‘নত্থিপূৰা নাম ইদানি ভৰিস্সন্তী’’তি সঞ্ঞং কত্ৰা ‘‘গচ্ছ নত্থিপূৰে আহরা’’তি পেসেসি। অথস্স মাতা ‘‘নত্থিপূৰে কির, অয্যে, দেথা’’তি ৰুত্তে ‘‘মম পুত্তেন নত্থীতি পদং ন সুতপুব্বং, কথং নু খো নত্থিভাৰং জানাপেয্য’’ন্তি সুৰণ্ণপাতিং ধোৰিত্ৰা অপরায সুৰণ্ণপাতিযা পটিকুজ্জিত্ৰা ‘‘হন্দ, তাত, ইমং মম পুত্তস্স দেহী’’তি পহিণি। তস্মিং খণে নগরপরিগ্গাহিকা দেৰতা ‘‘অম্হাকং সামিনা অন্নভারকালে উপরিট্ঠস্স পচ্চেকবুদ্ধস্স ভাগভত্তং দত্ৰা ‘নত্থীতি পদমেৰ ন সুণেয্য’ন্তি পত্থনা নাম ঠপিতা। সচে মযং তমত্থং ঞত্ৰা অজ্ঝুপেক্খেয্যাম, মুদ্ধাপি নো সত্তধা ফলেয্যা’’তি চিন্তেত্ৰা দিব্বপূৰেহি পাতিং পূরযিংসু। সো পুরিসো পাতিং আহরিত্ৰা তস্স সন্তিকে ঠপেত্ৰা ৰিৰরি। তেসং গন্ধো সকলনগরং ফরি। পূৰো পন মুখে ঠপিতমত্তোৰ সত্তরসহরণিসহস্সানি ফরিত্ৰা অট্ঠাসি।

    So sumanaseṭṭhissa sahāyako hutvā yāvajīvaṃ puññāni katvā tato cuto devaloke nibbattitvā devamanussesu saṃsaranto imasmiṃ buddhuppāde kapilavatthunagare amitodanassa sakkassa gehe paṭisandhiṃ gaṇhi, anuruddhotissa nāmaṃ akaṃsu. So mahānāmasakkassa kaniṭṭhabhātā, satthu cūḷapitu putto paramasukhumālo mahāpuñño ahosi. Ekadivasaṃ kira chasu khattiyesu pūve lakkhaṃ katvā guḷehi kīḷantesu anuruddho parājito pūvānaṃ atthāya mātu santikaṃ pahiṇi. Sā mahantaṃ suvaṇṇathālaṃ pūretvā pūve pesesi. Pūve khāditvā puna kīḷanto parājito tatheva pahiṇi. Evaṃ tikkhattuṃ pūvesu āhaṭesu catutthe vāre mātā ‘‘idāni pūvā natthī’’ti pahiṇi. Tassā vacanaṃ sutvā ‘‘natthī’’ti padassa asutapubbatāya ‘‘natthipūvā nāma idāni bhavissantī’’ti saññaṃ katvā ‘‘gaccha natthipūve āharā’’ti pesesi. Athassa mātā ‘‘natthipūve kira, ayye, dethā’’ti vutte ‘‘mama puttena natthīti padaṃ na sutapubbaṃ, kathaṃ nu kho natthibhāvaṃ jānāpeyya’’nti suvaṇṇapātiṃ dhovitvā aparāya suvaṇṇapātiyā paṭikujjitvā ‘‘handa, tāta, imaṃ mama puttassa dehī’’ti pahiṇi. Tasmiṃ khaṇe nagarapariggāhikā devatā ‘‘amhākaṃ sāminā annabhārakāle upariṭṭhassa paccekabuddhassa bhāgabhattaṃ datvā ‘natthīti padameva na suṇeyya’nti patthanā nāma ṭhapitā. Sace mayaṃ tamatthaṃ ñatvā ajjhupekkheyyāma, muddhāpi no sattadhā phaleyyā’’ti cintetvā dibbapūvehi pātiṃ pūrayiṃsu. So puriso pātiṃ āharitvā tassa santike ṭhapetvā vivari. Tesaṃ gandho sakalanagaraṃ phari. Pūvo pana mukhe ṭhapitamattova sattarasaharaṇisahassāni pharitvā aṭṭhāsi.

    অনুরুদ্ধোপি চিন্তেসি – ‘‘ন মং মঞ্ঞে ইতো পুব্বে মাতা পিযাযতি। ন হি মে অঞ্ঞদা তায নত্থিপূৰা নাম পক্কপুব্বা’’তি। সো গন্ত্ৰা মাতরং এৰমাহ – ‘‘অম্ম, নাহং তৰ পিযো’’তি। তাত, কিং ৰদেসি, মম অক্খীহিপি হদযমংসতোপি ত্ৰং পিযতরোতি। সচাহং, অম্ম, তৰ পিযো, কস্মা মম পুব্বে এৰরূপে নত্থিপূৰে নাম ন অদাসীতি। সা তং পুরিসং পুচ্ছি – ‘‘তাত, কিঞ্চি পাতিযং অহোসী’’তি। আম, অয্যে, পূৰানং পাতি পরিপুণ্ণা অহোসি, ন মে এৰরূপা দিট্ঠপুব্বাতি। সা চিন্তেসি – ‘‘পুত্তো মে কতপুঞ্ঞো, দেৰতাহিস্স দিব্বপূৰা পহিতা ভৰিস্সন্তী’’তি। সোপি মাতরং আহ – ‘‘অম্ম, ন মযা এৰরূপা পূৰা খাদিতপুব্বা, ইতো পট্ঠায মে নত্থিপূৰমেৰ পচেয্যাসী’’তি। সা ততো পট্ঠায তেন ‘‘পূৰে খাদিতুকামোম্হী’’তি ৰুত্তকালে সুৰণ্ণপাতিং ধোৰিত্ৰা অঞ্ঞায পাতিযা পটিকুজ্জিত্ৰা পহিণতি, দেৰতা পাতিং পূরেন্তি। এৰং সো অগারমজ্ঝে ৰসন্তো নত্থীতি পদস্স অত্থং অজানিত্ৰা দিব্বপূৰেযেৰ পরিভুঞ্জি।

    Anuruddhopi cintesi – ‘‘na maṃ maññe ito pubbe mātā piyāyati. Na hi me aññadā tāya natthipūvā nāma pakkapubbā’’ti. So gantvā mātaraṃ evamāha – ‘‘amma, nāhaṃ tava piyo’’ti. Tāta, kiṃ vadesi, mama akkhīhipi hadayamaṃsatopi tvaṃ piyataroti. Sacāhaṃ, amma, tava piyo, kasmā mama pubbe evarūpe natthipūve nāma na adāsīti. Sā taṃ purisaṃ pucchi – ‘‘tāta, kiñci pātiyaṃ ahosī’’ti. Āma, ayye, pūvānaṃ pāti paripuṇṇā ahosi, na me evarūpā diṭṭhapubbāti. Sā cintesi – ‘‘putto me katapuñño, devatāhissa dibbapūvā pahitā bhavissantī’’ti. Sopi mātaraṃ āha – ‘‘amma, na mayā evarūpā pūvā khāditapubbā, ito paṭṭhāya me natthipūvameva paceyyāsī’’ti. Sā tato paṭṭhāya tena ‘‘pūve khāditukāmomhī’’ti vuttakāle suvaṇṇapātiṃ dhovitvā aññāya pātiyā paṭikujjitvā pahiṇati, devatā pātiṃ pūrenti. Evaṃ so agāramajjhe vasanto natthīti padassa atthaṃ ajānitvā dibbapūveyeva paribhuñji.

    সত্থু পন পরিৰারত্থং কুলপটিপাটিযা সাকিযকুমারেসু পব্বজন্তেসু মহানামেন সক্কেন, ‘‘তাত, অম্হাকং কুলা কোচি পব্বজিতো নত্থি, তযা ৰা পব্বজিতব্বং, মযা ৰা’’তি ৰুত্তে সো আহ – ‘‘অহং অতিসুখুমালো পব্বজিতুং ন সক্খিস্সামী’’তি। তেন হি কম্মন্তং উগ্গণ্হ, অহং পব্বজিস্সামীতি। কো এস কম্মন্তো নামাতি? সো হি ভত্তস্স উট্ঠানট্ঠানম্পি ন জানাতি, কম্মন্তং কিমেৰ জানিস্সতি, তস্মা এৰমাহ। একদিৰসঞ্হি অনুরুদ্ধো ভদ্দিযো কিমিলোতি তযো জনা ‘‘ভত্তং নাম কহং উট্ঠাতী’’তি মন্তযিংসু। তেসু কিমিলো ‘‘কোট্ঠেসু উট্ঠাতী’’তি আহ। সো কিরেকদিৰসং ৰীহী কোট্ঠম্হি পক্খিপন্তে অদ্দস, তস্মা ‘‘কোট্ঠে ভত্তং উপ্পজ্জতী’’তি সঞ্ঞায এৰমাহ। অথ নং ভদ্দিযো ‘‘ত্ৰং ন জানাসী’’তি ৰত্ৰা ‘‘ভত্তং নাম উক্খলিযং উট্ঠাতী’’তি আহ। সো কিরেকদিৰসং উক্খলিতো ভত্তং ৰড্ঢেন্তে দিস্ৰা ‘‘এত্থেৰেতং উপ্পজ্জতী’’তি সঞ্ঞমকাসি, তস্মা এৰমাহ। অনুরুদ্ধো তে উভোপি ‘‘তুম্হে ন জানাথা’’তি ৰত্ৰা ‘‘ভত্তং নাম রতনুব্বেধমকুল়ায মহাসুৰণ্ণপাতিযং উট্ঠাতী’’তি আহ। তেন কির নেৰ ৰীহিং কোট্টেন্তা, ন ভত্তং পচন্তা দিট্ঠপুব্বা, সুৰণ্ণপাতিযং ৰড্ঢেত্ৰা পুরতো ঠপিতভত্তমেৰ পস্সতি, তস্মা ‘‘পাতিযংযেৰেতং উপ্পজ্জতী’’তি সঞ্ঞমকাসি, তস্মা এৰমাহ। এৰং ভত্তুট্ঠানট্ঠানম্পি অজানন্তো মহাপুঞ্ঞো কুলপুত্তো কম্মন্তে কিং জানিস্সতি।

    Satthu pana parivāratthaṃ kulapaṭipāṭiyā sākiyakumāresu pabbajantesu mahānāmena sakkena, ‘‘tāta, amhākaṃ kulā koci pabbajito natthi, tayā vā pabbajitabbaṃ, mayā vā’’ti vutte so āha – ‘‘ahaṃ atisukhumālo pabbajituṃ na sakkhissāmī’’ti. Tena hi kammantaṃ uggaṇha, ahaṃ pabbajissāmīti. Ko esa kammanto nāmāti? So hi bhattassa uṭṭhānaṭṭhānampi na jānāti, kammantaṃ kimeva jānissati, tasmā evamāha. Ekadivasañhi anuruddho bhaddiyo kimiloti tayo janā ‘‘bhattaṃ nāma kahaṃ uṭṭhātī’’ti mantayiṃsu. Tesu kimilo ‘‘koṭṭhesu uṭṭhātī’’ti āha. So kirekadivasaṃ vīhī koṭṭhamhi pakkhipante addasa, tasmā ‘‘koṭṭhe bhattaṃ uppajjatī’’ti saññāya evamāha. Atha naṃ bhaddiyo ‘‘tvaṃ na jānāsī’’ti vatvā ‘‘bhattaṃ nāma ukkhaliyaṃ uṭṭhātī’’ti āha. So kirekadivasaṃ ukkhalito bhattaṃ vaḍḍhente disvā ‘‘etthevetaṃ uppajjatī’’ti saññamakāsi, tasmā evamāha. Anuruddho te ubhopi ‘‘tumhe na jānāthā’’ti vatvā ‘‘bhattaṃ nāma ratanubbedhamakuḷāya mahāsuvaṇṇapātiyaṃ uṭṭhātī’’ti āha. Tena kira neva vīhiṃ koṭṭentā, na bhattaṃ pacantā diṭṭhapubbā, suvaṇṇapātiyaṃ vaḍḍhetvā purato ṭhapitabhattameva passati, tasmā ‘‘pātiyaṃyevetaṃ uppajjatī’’ti saññamakāsi, tasmā evamāha. Evaṃ bhattuṭṭhānaṭṭhānampi ajānanto mahāpuñño kulaputto kammante kiṃ jānissati.

    সো ‘‘এহি খো তে, অনুরুদ্ধ, ঘরাৰাসত্থং অনুসাসিস্সামি, পঠমং খেত্তং কসাপেতব্ব’’ন্তিআদিনা নযেন ভাতরা ৰুত্তানং কম্মন্তানং অপরিযন্তভাৰং সুত্ৰা ‘‘ন মে ঘরাৰাসেন অত্থো’’তি মাতরং আপুচ্ছিত্ৰা ভদ্দিযপমুখেহি পঞ্চহি সাকিযকুমারেহি সদ্ধিং নিক্খমিত্ৰা অনুপিযম্বৰনে সত্থারং উপসঙ্কমিত্ৰা পব্বজি। পব্বজিত্ৰা চ পন সম্মাপটিপদং পটিপন্নো অনুপুব্বেন তিস্সো ৰিজ্জা সচ্ছিকত্ৰা দিব্বেন চক্খুনা একাসনে নিসিন্নোৰ হত্থতলে ঠপিতআমলকানি ৰিয সহস্সলোকধাতুযো ওলোকনসমত্থো হুত্ৰা –

    So ‘‘ehi kho te, anuruddha, gharāvāsatthaṃ anusāsissāmi, paṭhamaṃ khettaṃ kasāpetabba’’ntiādinā nayena bhātarā vuttānaṃ kammantānaṃ apariyantabhāvaṃ sutvā ‘‘na me gharāvāsena attho’’ti mātaraṃ āpucchitvā bhaddiyapamukhehi pañcahi sākiyakumārehi saddhiṃ nikkhamitvā anupiyambavane satthāraṃ upasaṅkamitvā pabbaji. Pabbajitvā ca pana sammāpaṭipadaṃ paṭipanno anupubbena tisso vijjā sacchikatvā dibbena cakkhunā ekāsane nisinnova hatthatale ṭhapitaāmalakāni viya sahassalokadhātuyo olokanasamattho hutvā –

    ‘‘পুব্বেনিৰাসং জানামি, দিব্বচক্খু ৰিসোধিতং।

    ‘‘Pubbenivāsaṃ jānāmi, dibbacakkhu visodhitaṃ;

    তেৰিজ্জো ইদ্ধিপত্তোম্হি, কতং বুদ্ধস্স সাসন’’ন্তি॥ (থেরগা॰ ৩৩২, ৫৬২) –

    Tevijjo iddhipattomhi, kataṃ buddhassa sāsana’’nti. (theragā. 332, 562) –

    উদানং উদানেত্ৰা ‘‘কিং নু খো মে কত্ৰা অযং সম্পত্তি লদ্ধা’’তি ওলোকেন্তো ‘‘পদুমুত্তরপাদমূলে পত্থনং ঠপেসি’’ন্তি ঞত্ৰা পুন ‘‘সংসারে সংসরন্তো অসুকস্মিং নাম কালে বারাণসিযং সুমনসেট্ঠিং নিস্সায জীৰন্তো অন্নভারো নাম অহোসি’’ন্তিপি ঞত্ৰা –

    Udānaṃ udānetvā ‘‘kiṃ nu kho me katvā ayaṃ sampatti laddhā’’ti olokento ‘‘padumuttarapādamūle patthanaṃ ṭhapesi’’nti ñatvā puna ‘‘saṃsāre saṃsaranto asukasmiṃ nāma kāle bārāṇasiyaṃ sumanaseṭṭhiṃ nissāya jīvanto annabhāro nāma ahosi’’ntipi ñatvā –

    ‘‘অন্নভারো পুরে আসিং, দলিদ্দো তিণহারকো।

    ‘‘Annabhāro pure āsiṃ, daliddo tiṇahārako;

    পিণ্ডপাতো মযা দিন্নো, উপরিট্ঠস্স তাদিনো’’তি॥ –

    Piṇḍapāto mayā dinno, upariṭṭhassa tādino’’ti. –

    আহ । অথস্স এতদহোসি – ‘‘যো সো তদা মযা উপরিট্ঠস্স দিন্নপিণ্ডপাততো কহাপণে দত্ৰা পত্তিং অগ্গহেসি, মম সহাযকো সুমনসেট্ঠি কহং নু খো সো এতরহি নিব্বত্তো’’তি। অথ নং ‘‘ৰিঞ্ঝাটৰিযং পব্বতপাদে মুণ্ডনিগমো নাম অত্থি, তত্থ মহামুণ্ডস্স নাম উপাসকস্স মহাসুমনো চূল়সুমনোতি দ্ৰে পুত্তা, তেসু সো চূল়সুমনো হুত্ৰা নিব্বত্তো’’তি অদ্দস। দিস্ৰা চ পন চিন্তেসি – ‘‘অত্থি নু খো তত্থ মযি গতে উপকারো, নত্থী’’তি। সো উপধারেন্তো ইদং অদ্দস ‘‘সো তত্থ মযি গতে সত্তৰস্সিকোৰ নিক্খমিত্ৰা পব্বজিস্সতি, খুরগ্গেযেৰ চ অরহত্তং পাপুণিস্সতী’’তি। দিস্ৰা চ পন উপকট্ঠে অন্তোৰস্সে আকাসেন গন্ত্ৰা গামদ্ৰারে ওতরি। মহামুণ্ডো পন উপাসকো থেরস্স পুব্বেপি ৰিস্সাসিকো এৰ। সো থেরং পিণ্ডপাতকালে চীৰরং পারুপন্তং দিস্ৰা পুত্তং মহাসুমনং আহ – ‘‘তাত, অয্যো, মে অনুরুদ্ধত্থেরো আগতো, যাৰস্স অঞ্ঞো কোচি পত্তং ন গণ্হাতি, তাৰস্স গন্ত্ৰা পত্তং গণ্হ, অহং আসনং পঞ্ঞাপেস্সামী’’তি। সো তথা অকাসি। উপাসকো থেরং অন্তোনিৰেসনে সক্কচ্চং পরিৰিসিত্ৰা তেমাসং ৰসনত্থায পটিঞ্ঞং গণ্হি, থেরোপি অধিৰাসেসি।

    Āha . Athassa etadahosi – ‘‘yo so tadā mayā upariṭṭhassa dinnapiṇḍapātato kahāpaṇe datvā pattiṃ aggahesi, mama sahāyako sumanaseṭṭhi kahaṃ nu kho so etarahi nibbatto’’ti. Atha naṃ ‘‘viñjhāṭaviyaṃ pabbatapāde muṇḍanigamo nāma atthi, tattha mahāmuṇḍassa nāma upāsakassa mahāsumano cūḷasumanoti dve puttā, tesu so cūḷasumano hutvā nibbatto’’ti addasa. Disvā ca pana cintesi – ‘‘atthi nu kho tattha mayi gate upakāro, natthī’’ti. So upadhārento idaṃ addasa ‘‘so tattha mayi gate sattavassikova nikkhamitvā pabbajissati, khuraggeyeva ca arahattaṃ pāpuṇissatī’’ti. Disvā ca pana upakaṭṭhe antovasse ākāsena gantvā gāmadvāre otari. Mahāmuṇḍo pana upāsako therassa pubbepi vissāsiko eva. So theraṃ piṇḍapātakāle cīvaraṃ pārupantaṃ disvā puttaṃ mahāsumanaṃ āha – ‘‘tāta, ayyo, me anuruddhatthero āgato, yāvassa añño koci pattaṃ na gaṇhāti, tāvassa gantvā pattaṃ gaṇha, ahaṃ āsanaṃ paññāpessāmī’’ti. So tathā akāsi. Upāsako theraṃ antonivesane sakkaccaṃ parivisitvā temāsaṃ vasanatthāya paṭiññaṃ gaṇhi, theropi adhivāsesi.

    অথ নং একদিৰসং পটিজগ্গন্তো ৰিয তেমাসং পটিজগ্গিত্ৰা মহাপৰারণায তিচীৰরঞ্চেৰ গুল়তেলতণ্ডুলাদীনি চ আহরিত্ৰা থেরস্স পাদমূলে ঠপেত্ৰা ‘‘গণ্হথ, ভন্তে’’তি আহ। ‘‘অলং, উপাসক, ন মে ইমিনা অত্থো’’তি। ‘‘তেন হি, ভন্তে, ৰস্সাৰাসিকলাভো নামেস, গণ্হথ ন’’ন্তি? ‘‘ন গণ্হামি, উপাসকা’’তি। ‘‘কিমত্থং ন গণ্হথ, ভন্তে’’তি? ‘‘ময্হং সন্তিকে কপ্পিযকারকো সামণেরোপি নত্থী’’তি। ‘‘তেন হি, ভন্তে, মম পুত্তো মহাসুমনো সামণেরো ভৰিস্সতী’’তি। ‘‘ন মে, উপাসক, মহাসুমনেনত্থো’’তি। ‘‘তেন হি, ভন্তে, চূল়সুমনং পব্বাজেথা’’তি। থেরো ‘‘সাধূ’’তি সম্পটিচ্ছিত্ৰা চূল়সুমনং পব্বাজেসি। সো খুরগ্গেযেৰ অরহত্তং পাপুণি। থেরো তেন সদ্ধিং অড্ঢমাসমত্তং তত্থেৰ ৰসিত্ৰা ‘‘সত্থারং পস্সিস্সামী’’তি তস্স ঞাতকে আপুচ্ছিত্ৰা আকাসেনেৰ গন্ত্ৰা হিমৰন্তপদেসে অরঞ্ঞকুটিকায ওতরি।

    Atha naṃ ekadivasaṃ paṭijagganto viya temāsaṃ paṭijaggitvā mahāpavāraṇāya ticīvarañceva guḷatelataṇḍulādīni ca āharitvā therassa pādamūle ṭhapetvā ‘‘gaṇhatha, bhante’’ti āha. ‘‘Alaṃ, upāsaka, na me iminā attho’’ti. ‘‘Tena hi, bhante, vassāvāsikalābho nāmesa, gaṇhatha na’’nti? ‘‘Na gaṇhāmi, upāsakā’’ti. ‘‘Kimatthaṃ na gaṇhatha, bhante’’ti? ‘‘Mayhaṃ santike kappiyakārako sāmaṇeropi natthī’’ti. ‘‘Tena hi, bhante, mama putto mahāsumano sāmaṇero bhavissatī’’ti. ‘‘Na me, upāsaka, mahāsumanenattho’’ti. ‘‘Tena hi, bhante, cūḷasumanaṃ pabbājethā’’ti. Thero ‘‘sādhū’’ti sampaṭicchitvā cūḷasumanaṃ pabbājesi. So khuraggeyeva arahattaṃ pāpuṇi. Thero tena saddhiṃ aḍḍhamāsamattaṃ tattheva vasitvā ‘‘satthāraṃ passissāmī’’ti tassa ñātake āpucchitvā ākāseneva gantvā himavantapadese araññakuṭikāya otari.

    থেরো পন পকতিযাপি আরদ্ধৰীরিযো, তস্স তত্থ পুব্বরত্তাপররত্তং চঙ্কমন্তস্স উদরৰাতো সমুট্ঠহি। অথ নং কিলন্তরূপং দিস্ৰা সামণেরো পুচ্ছি – ‘‘ভন্তে, কিং ৰো রুজ্জতী’’তি? ‘‘উদরৰাতো মে সমুট্ঠিতো’’তি । ‘‘অঞ্ঞদাপি সমুট্ঠিতপুব্বো, ভন্তে’’তি? ‘‘আমাৰুসো’’তি। ‘‘কেন ফাসুকং হোতি, ভন্তে’’তি? ‘‘অনোতত্ততো পানীযে লদ্ধে ফাসুকং হোতি, আৰুসো’’তি। ‘‘তেন হি, ভন্তে, আহরামী’’তি। ‘‘সক্খিস্সসি সামণেরা’’তি? ‘‘আম, ভন্তে’’তি। তেন হি অনোতত্তে পন্নগো নাম নাগরাজা মং জানাতি, তস্স আচিক্খিত্ৰা ভেসজ্জত্থায একং পানীযৰারকং আহরাতি। সো সাধূতি উপজ্ঝাযং ৰন্দিত্ৰা ৰেহাসং অব্ভুগ্গন্ত্ৰা পঞ্চযোজনসতং ঠানং অগমাসি । তং দিৰসং পন নাগরাজা নাগনাটকপরিৰুতো উদককীল়ং কীল়িতুকামো হোতি। সো সামণেরং আগচ্ছন্তং দিস্ৰাৰ কুজ্ঝি, ‘‘অযং মুণ্ডকসমণো অত্তনো পাদপংসুং মম মত্থকে ওকিরন্তো ৰিচরতি, অনোতত্তে পানীযত্থায আগতো ভৰিস্সতি, ন দানিস্স পানীযং দস্সামী’’তি পণ্ণাসযোজনিকং অনোতত্তদহং মহাপাতিযা উক্খলিং পিদহন্তো ৰিয ফণেন পিদহিত্ৰা নিপজ্জি। সামণেরো নাগরাজস্স আকারং ওলোকেত্ৰাৰ ‘‘কুদ্ধো অয’’ন্তি ঞত্ৰা ইমং গাথমাহ –

    Thero pana pakatiyāpi āraddhavīriyo, tassa tattha pubbarattāpararattaṃ caṅkamantassa udaravāto samuṭṭhahi. Atha naṃ kilantarūpaṃ disvā sāmaṇero pucchi – ‘‘bhante, kiṃ vo rujjatī’’ti? ‘‘Udaravāto me samuṭṭhito’’ti . ‘‘Aññadāpi samuṭṭhitapubbo, bhante’’ti? ‘‘Āmāvuso’’ti. ‘‘Kena phāsukaṃ hoti, bhante’’ti? ‘‘Anotattato pānīye laddhe phāsukaṃ hoti, āvuso’’ti. ‘‘Tena hi, bhante, āharāmī’’ti. ‘‘Sakkhissasi sāmaṇerā’’ti? ‘‘Āma, bhante’’ti. Tena hi anotatte pannago nāma nāgarājā maṃ jānāti, tassa ācikkhitvā bhesajjatthāya ekaṃ pānīyavārakaṃ āharāti. So sādhūti upajjhāyaṃ vanditvā vehāsaṃ abbhuggantvā pañcayojanasataṃ ṭhānaṃ agamāsi . Taṃ divasaṃ pana nāgarājā nāganāṭakaparivuto udakakīḷaṃ kīḷitukāmo hoti. So sāmaṇeraṃ āgacchantaṃ disvāva kujjhi, ‘‘ayaṃ muṇḍakasamaṇo attano pādapaṃsuṃ mama matthake okiranto vicarati, anotatte pānīyatthāya āgato bhavissati, na dānissa pānīyaṃ dassāmī’’ti paṇṇāsayojanikaṃ anotattadahaṃ mahāpātiyā ukkhaliṃ pidahanto viya phaṇena pidahitvā nipajji. Sāmaṇero nāgarājassa ākāraṃ oloketvāva ‘‘kuddho aya’’nti ñatvā imaṃ gāthamāha –

    ‘‘সুণোহি মে নাগরাজ, উগ্গতেজ মহব্বল।

    ‘‘Suṇohi me nāgarāja, uggateja mahabbala;

    দেহি মে পানীযঘটং, ভেসজ্জত্থম্হি আগতো’’তি॥

    Dehi me pānīyaghaṭaṃ, bhesajjatthamhi āgato’’ti.

    তং সুত্ৰা নাগরাজা ইমং গাথমাহ –

    Taṃ sutvā nāgarājā imaṃ gāthamāha –

    ‘‘পুরত্থিমস্মিং দিসাভাগে, গঙ্গা নাম মহানদী।

    ‘‘Puratthimasmiṃ disābhāge, gaṅgā nāma mahānadī;

    মহাসমুদ্দমপ্পেতি, ততো ত্ৰং পানীযং হরা’’তি॥

    Mahāsamuddamappeti, tato tvaṃ pānīyaṃ harā’’ti.

    তং সুত্ৰা সামণেরো ‘‘অযং নাগরাজা অত্তনো ইচ্ছায ন দস্সতি, অহং বলক্কারং কত্ৰা আনুভাৰং জানাপেত্ৰা ইমং অভিভৰিত্ৰাৰ পানীযং গণ্হিস্সামী’’তি চিন্তেত্ৰা, ‘‘মহারাজ , উপজ্ঝাযো মং অনোতত্ততোৰ পানীযং আহরাপেতি, তেনাহং ইদমেৰ হরিস্সামি, অপেহি, মা মং ৰারেহী’’তি ৰত্ৰা ইমং গাথমাহ –

    Taṃ sutvā sāmaṇero ‘‘ayaṃ nāgarājā attano icchāya na dassati, ahaṃ balakkāraṃ katvā ānubhāvaṃ jānāpetvā imaṃ abhibhavitvāva pānīyaṃ gaṇhissāmī’’ti cintetvā, ‘‘mahārāja , upajjhāyo maṃ anotattatova pānīyaṃ āharāpeti, tenāhaṃ idameva harissāmi, apehi, mā maṃ vārehī’’ti vatvā imaṃ gāthamāha –

    ‘‘ইতোৰ পানীযং হাস্সং, ইমিনাৰম্হি অত্থিকো।

    ‘‘Itova pānīyaṃ hāssaṃ, imināvamhi atthiko;

    যদি তে থামবলং অত্থি, নাগরাজ নিৰারযা’’তি॥

    Yadi te thāmabalaṃ atthi, nāgarāja nivārayā’’ti.

    অথ নং নাগরাজা আহ –

    Atha naṃ nāgarājā āha –

    ‘‘সামণের সচে অত্থি, তৰ ৰিক্কম পোরিসং।

    ‘‘Sāmaṇera sace atthi, tava vikkama porisaṃ;

    অভিনন্দামি তে ৰাচং, হরস্সু পানীযং মমা’’তি॥

    Abhinandāmi te vācaṃ, harassu pānīyaṃ mamā’’ti.

    অথ নং সামণেরো ‘‘এৰং, মহারাজ, হরামী’’তি ৰত্ৰা ‘‘যদি সক্কোন্তো হরাহী’’তি ৰুত্তে – ‘‘তেন হি সুট্ঠু জানস্সূ’’তি তিক্খত্তুং পটিঞ্ঞং গহেত্ৰা ‘‘বুদ্ধসাসনস্স আনুভাৰং দস্সেত্ৰা মযা পানীযং হরিতুং ৰট্টতী’’তি চিন্তেত্ৰা আকাসট্ঠদেৰতানং তাৰ সন্তিকং অগমাসি। তা আগন্ত্ৰা ৰন্দিত্ৰা ‘‘কিং, ভন্তে’’তি ৰত্ৰা অট্ঠংসু। ‘‘এতস্মিং অনোতত্তদহপিট্ঠে পন্নগনাগরাজেন সদ্ধিং মম সঙ্গামো ভৰিস্সতি, তত্থ গন্ত্ৰা জযপরাজযং ওলোকেথা’’তি আহ। সো এতেনেৰ নীহারেন চত্তারো লোকপালে সক্কসুযামসন্তুসিতপরনিম্মিতৰসৰত্তী চ উপসঙ্কমিত্ৰা তমত্থং আরোচেসি। ততো পরং পটিপাটিযা যাৰ ব্রহ্মলোকং গন্ত্ৰা তত্থ তত্থ ব্রহ্মেহি আগন্ত্ৰা ৰন্দিত্ৰা ঠিতেহি ‘‘কিং, ভন্তে’’তি পুট্ঠো তমত্থং আরোচেসি। এৰং সো অসঞ্ঞে চ অরূপিব্রহ্মানো চ ঠপেত্ৰা সব্বত্থ মুহুত্তেনেৰ আহিণ্ডিত্ৰা আরোচেসি। তস্স ৰচনং সুত্ৰা সব্বাপি দেৰতা অনোতত্তদহপিট্ঠে নাল়িযং পক্খিত্তানি পিট্ঠচুণ্ণানি ৰিয আকাসং নিরন্তরং পূরেত্ৰা সন্নিপতিংসু। সন্নিপতিতে দেৰসঙ্ঘে সামণেরো আকাসে ঠত্ৰা নাগরাজং আহ –

    Atha naṃ sāmaṇero ‘‘evaṃ, mahārāja, harāmī’’ti vatvā ‘‘yadi sakkonto harāhī’’ti vutte – ‘‘tena hi suṭṭhu jānassū’’ti tikkhattuṃ paṭiññaṃ gahetvā ‘‘buddhasāsanassa ānubhāvaṃ dassetvā mayā pānīyaṃ harituṃ vaṭṭatī’’ti cintetvā ākāsaṭṭhadevatānaṃ tāva santikaṃ agamāsi. Tā āgantvā vanditvā ‘‘kiṃ, bhante’’ti vatvā aṭṭhaṃsu. ‘‘Etasmiṃ anotattadahapiṭṭhe pannaganāgarājena saddhiṃ mama saṅgāmo bhavissati, tattha gantvā jayaparājayaṃ olokethā’’ti āha. So eteneva nīhārena cattāro lokapāle sakkasuyāmasantusitaparanimmitavasavattī ca upasaṅkamitvā tamatthaṃ ārocesi. Tato paraṃ paṭipāṭiyā yāva brahmalokaṃ gantvā tattha tattha brahmehi āgantvā vanditvā ṭhitehi ‘‘kiṃ, bhante’’ti puṭṭho tamatthaṃ ārocesi. Evaṃ so asaññe ca arūpibrahmāno ca ṭhapetvā sabbattha muhutteneva āhiṇḍitvā ārocesi. Tassa vacanaṃ sutvā sabbāpi devatā anotattadahapiṭṭhe nāḷiyaṃ pakkhittāni piṭṭhacuṇṇāni viya ākāsaṃ nirantaraṃ pūretvā sannipatiṃsu. Sannipatite devasaṅghe sāmaṇero ākāse ṭhatvā nāgarājaṃ āha –

    ‘‘সুণোহি মে নাগরাজ, উগ্গতেজ মহব্বল।

    ‘‘Suṇohi me nāgarāja, uggateja mahabbala;

    দেহি মে পানীযঘটং, ভেসজ্জত্থম্হি আগতো’’তি॥

    Dehi me pānīyaghaṭaṃ, bhesajjatthamhi āgato’’ti.

    অথ নং নাগো আহ –

    Atha naṃ nāgo āha –

    ‘‘সামণের সচে অত্থি, তৰ ৰিক্কম পোরিসং।

    ‘‘Sāmaṇera sace atthi, tava vikkama porisaṃ;

    অভিনন্দামি তে ৰাচং, হরস্সু পানীযং মমা’’তি॥

    Abhinandāmi te vācaṃ, harassu pānīyaṃ mamā’’ti.

    সো তিক্খত্তুং নাগরাজস্স পটিঞ্ঞং গহেত্ৰা আকাসে ঠিতকোৰ দ্ৰাদসযোজনিকং ব্রহ্মত্তভাৰং মাপেত্ৰা আকাসতো ওরুয্হ নাগরাজস্স ফণে অক্কমিত্ৰা অধোমুখং নিপ্পীল়েসি, তাৰদেৰ বলৰতা পুরিসেন অক্কন্তঅল্লচম্মং ৰিয নাগরাজস্স ফণে অক্কন্তমত্তে ওগলিত্ৰা দব্বিমত্তা ফণপুটকা অহেসুং। নাগরাজস্স ফণেহি মুত্তমুত্তট্ঠানতো তালক্খন্ধপমাণা উদকৰট্টিযো উগ্গঞ্ছিংসু। সামণেরো আকাসেযেৰ পানীযৰারকং পূরেসি। দেৰসঙ্ঘো সাধুকারমদাসি। অথ নাগরাজা লজ্জিত্ৰা সামণেরস্স কুজ্ঝি, জযকুসুমৰণ্ণানিস্স অক্খীনি অহেসুং। সো ‘‘অযং মং দেৰসঙ্ঘং সন্নিপাতেত্ৰা পানীযং গহেত্ৰা লজ্জাপেসি, এতং গহেত্ৰা মুখে হত্থং পক্খিপিত্ৰা হদযমংসং ৰাস্স মদ্দামি, পাদে ৰা নং গহেত্ৰা পারগঙ্গাযং খিপামী’’তি ৰেগেন অনুবন্ধি। অনুবন্ধন্তোপি নং পাপুণিতুং নাসক্খিযেৰ। সামণেরো গন্ত্ৰা উপজ্ঝাযস্স হত্থে পানীযং ঠপেত্ৰা ‘‘পিৰথ, ভন্তে’’তি আহ। নাগরাজাপি পচ্ছতো আগন্ত্ৰা, ‘‘ভন্তে অনুরুদ্ধ, সামণেরো মযা অদিন্নমেৰ পানীযং গহেত্ৰা আগতো, মা পিৰিত্থা’’তি আহ। এৰং কির সামণেরাতি। ‘‘পিৰথ, ভন্তে, ইমিনা মে দিন্নং পানীযং আহট’’ন্তি আহ। থেরো ‘‘খীণাসৰসামণেরস্স মুসাকথনং নাম নত্থী’’তি ঞত্ৰা পানীযং পিৰি। তঙ্খণঞ্ঞেৰস্স আবাধো পটিপস্সম্ভি। পুন নাগো থেরং আহ – ‘‘ভন্তে, সামণেরেনম্হি সব্বং দেৰগণং সন্নিপাতেত্ৰা লজ্জাপিতো, অহমস্স হদযং ৰা ফালেস্সামি, পাদে ৰা নং গহেত্ৰা পারগঙ্গায খিপিস্সামী’’তি। মহারাজ, সামণেরো মহানুভাৰো, তুম্হে সামণেরেন সদ্ধিং সঙ্গামেতুং ন সক্খিস্সথ , খমাপেত্ৰা নং গচ্ছথাতি। সো সযম্পি সামণেরস্স আনুভাৰং জানাতিযেৰ, লজ্জায পন অনুবন্ধিত্ৰা আগতো। অথ নং থেরস্স ৰচনেন খমাপেত্ৰা তেন সদ্ধিং মিত্তসন্থৰং কত্ৰা ‘‘ইতো পট্ঠায অনোতত্তউদকেন অত্থে সতি তুম্হাকং আগমনকিচ্চং নত্থি, ময্হং পহিণেয্যাথ, অহমেৰ আহরিত্ৰা দস্সামী’’তি ৰত্ৰা পক্কামি।

    So tikkhattuṃ nāgarājassa paṭiññaṃ gahetvā ākāse ṭhitakova dvādasayojanikaṃ brahmattabhāvaṃ māpetvā ākāsato oruyha nāgarājassa phaṇe akkamitvā adhomukhaṃ nippīḷesi, tāvadeva balavatā purisena akkantaallacammaṃ viya nāgarājassa phaṇe akkantamatte ogalitvā dabbimattā phaṇapuṭakā ahesuṃ. Nāgarājassa phaṇehi muttamuttaṭṭhānato tālakkhandhapamāṇā udakavaṭṭiyo uggañchiṃsu. Sāmaṇero ākāseyeva pānīyavārakaṃ pūresi. Devasaṅgho sādhukāramadāsi. Atha nāgarājā lajjitvā sāmaṇerassa kujjhi, jayakusumavaṇṇānissa akkhīni ahesuṃ. So ‘‘ayaṃ maṃ devasaṅghaṃ sannipātetvā pānīyaṃ gahetvā lajjāpesi, etaṃ gahetvā mukhe hatthaṃ pakkhipitvā hadayamaṃsaṃ vāssa maddāmi, pāde vā naṃ gahetvā pāragaṅgāyaṃ khipāmī’’ti vegena anubandhi. Anubandhantopi naṃ pāpuṇituṃ nāsakkhiyeva. Sāmaṇero gantvā upajjhāyassa hatthe pānīyaṃ ṭhapetvā ‘‘pivatha, bhante’’ti āha. Nāgarājāpi pacchato āgantvā, ‘‘bhante anuruddha, sāmaṇero mayā adinnameva pānīyaṃ gahetvā āgato, mā pivitthā’’ti āha. Evaṃ kira sāmaṇerāti. ‘‘Pivatha, bhante, iminā me dinnaṃ pānīyaṃ āhaṭa’’nti āha. Thero ‘‘khīṇāsavasāmaṇerassa musākathanaṃ nāma natthī’’ti ñatvā pānīyaṃ pivi. Taṅkhaṇaññevassa ābādho paṭipassambhi. Puna nāgo theraṃ āha – ‘‘bhante, sāmaṇerenamhi sabbaṃ devagaṇaṃ sannipātetvā lajjāpito, ahamassa hadayaṃ vā phālessāmi, pāde vā naṃ gahetvā pāragaṅgāya khipissāmī’’ti. Mahārāja, sāmaṇero mahānubhāvo, tumhe sāmaṇerena saddhiṃ saṅgāmetuṃ na sakkhissatha , khamāpetvā naṃ gacchathāti. So sayampi sāmaṇerassa ānubhāvaṃ jānātiyeva, lajjāya pana anubandhitvā āgato. Atha naṃ therassa vacanena khamāpetvā tena saddhiṃ mittasanthavaṃ katvā ‘‘ito paṭṭhāya anotattaudakena atthe sati tumhākaṃ āgamanakiccaṃ natthi, mayhaṃ pahiṇeyyātha, ahameva āharitvā dassāmī’’ti vatvā pakkāmi.

    থেরোপি সামণেরং আদায পাযাসি। সত্থা থেরস্স আগমনভাৰং ঞত্ৰা মিগারমাতুপাসাদে থেরস্স আগমনং ওলোকেন্তো নিসীদি। ভিক্খূপি থেরং আগচ্ছন্তং দিস্ৰা পচ্চুগ্গন্ত্ৰা পত্তচীৰরং পটিগ্গহেসুং। অথেকচ্চে সামণেরং সীসেপি কণ্ণেসুপি বাহাযম্পি গহেত্ৰা সঞ্চালেত্ৰা ‘‘কিং, সামণের চূল়কনিট্ঠ, ন উক্কণ্ঠিতোসী’’তি আহংসু। সত্থা তেসং কিরিযং দিস্ৰা চিন্তেসি – ‘‘ভারিযং ৰতিমেসং ভিক্খূনং কম্মং আসীৰিসং গীৰায গণ্হন্তা ৰিয সামণেরং গণ্হন্তি, নাস্স আনুভাৰং জানন্তি, অজ্জ মযা সুমনসামণেরস্স গুণং পাকটং কাতুং ৰট্টতী’’তি। থেরোপি আগন্ত্ৰা সত্থারং ৰন্দিত্ৰা নিসীদি। সত্থা তেন সদ্ধিং পটিসন্থারং কত্ৰা আনন্দত্থেরং আমন্তেসি – ‘‘আনন্দ, অনোতত্তউদকেনম্হি পাদে ধোৰিতুকামো , সামণেরানং ঘটং দত্ৰা পানীযং আহরাপেহী’’তি। থেরো ৰিহারে পঞ্চমত্তানি সামণেরসতানি সন্নিপাতেসি। তেসু সুমনসামণেরো সব্বনৰকো অহোসি। থেরো সব্বমহল্লকং সামণেরং আহ – ‘‘সামণের, সত্থা অনোকত্তদহউদকেন পাদে ধোৰিতুকামো, ঘটং আদায গন্ত্ৰা পানীযং আহরা’’তি। সো ‘‘ন সক্কোমি, ভন্তে’’তি ন ইচ্ছি। থেরো সেসেপি পটিপাটিযা পুচ্ছি, তেপি তথেৰ ৰত্ৰা পটিক্খিপিংসু। ‘‘কিং পনেত্থ খীণাসৰসামণেরা নত্থী’’তি? অত্থি, তে পন ‘‘নাযং অম্হাকং বদ্ধো মালাপুটো, সুমনসামণেরস্সেৰ বদ্ধো’’তি ন ইচ্ছিংসু, পুথুজ্জনা পন অত্তনো অসমত্থতাযেৰ ন ইচ্ছিংসু। পরিযোসানে পন সুমনস্স ৰারে সম্পত্তে, ‘‘সামণের, সত্থা অনোতত্তদহউদকেন পাদে ধোৰিতুকামো, কুটং আদায কির উদকং আহরা’’তি আহ। সো ‘‘সত্থরি আহরাপেন্তে আহরিস্সামী’’তি সত্থারং ৰন্দিত্ৰা, ‘‘ভন্তে, অনোতত্ততো কির মং উদকং আহারাপেথা’’তি আহ। ‘‘আম, সুমনা’’তি। সো ৰিসাখায কারিতেসু ঘনসুৰণ্ণকোট্টিমেসু সেনাসনকুটেসু একং সট্ঠিকুটউদকগণ্হনকং মহাঘটং হত্থেন গহেত্ৰা ‘‘ইমিনা মে উক্খিপিত্ৰা অংসকূটে ঠপিতেন অত্থো নত্থী’’তি ওলম্বকং কত্ৰা ৰেহাসং অব্ভুগ্গন্ত্ৰা হিমৰন্তাভিমুখো পক্খন্দি।

    Theropi sāmaṇeraṃ ādāya pāyāsi. Satthā therassa āgamanabhāvaṃ ñatvā migāramātupāsāde therassa āgamanaṃ olokento nisīdi. Bhikkhūpi theraṃ āgacchantaṃ disvā paccuggantvā pattacīvaraṃ paṭiggahesuṃ. Athekacce sāmaṇeraṃ sīsepi kaṇṇesupi bāhāyampi gahetvā sañcāletvā ‘‘kiṃ, sāmaṇera cūḷakaniṭṭha, na ukkaṇṭhitosī’’ti āhaṃsu. Satthā tesaṃ kiriyaṃ disvā cintesi – ‘‘bhāriyaṃ vatimesaṃ bhikkhūnaṃ kammaṃ āsīvisaṃ gīvāya gaṇhantā viya sāmaṇeraṃ gaṇhanti, nāssa ānubhāvaṃ jānanti, ajja mayā sumanasāmaṇerassa guṇaṃ pākaṭaṃ kātuṃ vaṭṭatī’’ti. Theropi āgantvā satthāraṃ vanditvā nisīdi. Satthā tena saddhiṃ paṭisanthāraṃ katvā ānandattheraṃ āmantesi – ‘‘ānanda, anotattaudakenamhi pāde dhovitukāmo , sāmaṇerānaṃ ghaṭaṃ datvā pānīyaṃ āharāpehī’’ti. Thero vihāre pañcamattāni sāmaṇerasatāni sannipātesi. Tesu sumanasāmaṇero sabbanavako ahosi. Thero sabbamahallakaṃ sāmaṇeraṃ āha – ‘‘sāmaṇera, satthā anokattadahaudakena pāde dhovitukāmo, ghaṭaṃ ādāya gantvā pānīyaṃ āharā’’ti. So ‘‘na sakkomi, bhante’’ti na icchi. Thero sesepi paṭipāṭiyā pucchi, tepi tatheva vatvā paṭikkhipiṃsu. ‘‘Kiṃ panettha khīṇāsavasāmaṇerā natthī’’ti? Atthi, te pana ‘‘nāyaṃ amhākaṃ baddho mālāpuṭo, sumanasāmaṇerasseva baddho’’ti na icchiṃsu, puthujjanā pana attano asamatthatāyeva na icchiṃsu. Pariyosāne pana sumanassa vāre sampatte, ‘‘sāmaṇera, satthā anotattadahaudakena pāde dhovitukāmo, kuṭaṃ ādāya kira udakaṃ āharā’’ti āha. So ‘‘satthari āharāpente āharissāmī’’ti satthāraṃ vanditvā, ‘‘bhante, anotattato kira maṃ udakaṃ āhārāpethā’’ti āha. ‘‘Āma, sumanā’’ti. So visākhāya kāritesu ghanasuvaṇṇakoṭṭimesu senāsanakuṭesu ekaṃ saṭṭhikuṭaudakagaṇhanakaṃ mahāghaṭaṃ hatthena gahetvā ‘‘iminā me ukkhipitvā aṃsakūṭe ṭhapitena attho natthī’’ti olambakaṃ katvā vehāsaṃ abbhuggantvā himavantābhimukho pakkhandi.

    নাগরাজা সামণেরং দূরতোৰ আগচ্ছন্তং দিস্ৰা পচ্চুগ্গন্ত্ৰা কুটং অংসকূটেন আদায, ‘‘ভন্তে, তুম্হে মাদিসে দাসে ৰিজ্জমানে কস্মা সযং আগতা, উদকেনত্থে সতি কস্মা সাসনমত্তম্পি ন পহিণথা’’তি কুটেন উদকং আদায সযং উক্খিপিত্ৰা ‘‘পুরতো হোথ, ভন্তে, অহমেৰ আহরিস্সামী’’তি আহ। ‘‘তিট্ঠথ তুম্হে, মহারাজ, অহমেৰ সম্মাসম্বুদ্ধেন আণত্তো’’তি নাগরাজানং নিৰত্তাপেত্ৰা কুটং মুখৰট্টিযং হত্থেন গহেত্ৰা আকাসেনাগঞ্ছি। অথ নং সত্থা আগচ্ছন্তং ওলোকেত্ৰা ভিক্খূ আমন্তেসি – ‘‘পস্সথ, ভিক্খৰে, সামণেরস্স লীলং, আকাসে হংসরাজা ৰিয সোভতী’’তি আহ। সোপি পানীযঘটং ঠপেত্ৰা সত্থারং ৰন্দিত্ৰা অট্ঠাসি। অথ নং সত্থা আহ – ‘‘কতিৰস্সোসি ত্ৰং, সুমনা’’তি? ‘‘সত্তৰস্সোম্হি, ভন্তেতি। ‘‘তেন হি, সুমন, অজ্জ পট্ঠায ভিক্খু হোহী’’তি ৰত্ৰা দাযজ্জউপসম্পদং অদাসি। দ্ৰেযেৰ কির সামণেরা সত্তৰস্সিকা উপসম্পদং লভিংসু – অযঞ্চ সুমনো সোপাকো চাতি।

    Nāgarājā sāmaṇeraṃ dūratova āgacchantaṃ disvā paccuggantvā kuṭaṃ aṃsakūṭena ādāya, ‘‘bhante, tumhe mādise dāse vijjamāne kasmā sayaṃ āgatā, udakenatthe sati kasmā sāsanamattampi na pahiṇathā’’ti kuṭena udakaṃ ādāya sayaṃ ukkhipitvā ‘‘purato hotha, bhante, ahameva āharissāmī’’ti āha. ‘‘Tiṭṭhatha tumhe, mahārāja, ahameva sammāsambuddhena āṇatto’’ti nāgarājānaṃ nivattāpetvā kuṭaṃ mukhavaṭṭiyaṃ hatthena gahetvā ākāsenāgañchi. Atha naṃ satthā āgacchantaṃ oloketvā bhikkhū āmantesi – ‘‘passatha, bhikkhave, sāmaṇerassa līlaṃ, ākāse haṃsarājā viya sobhatī’’ti āha. Sopi pānīyaghaṭaṃ ṭhapetvā satthāraṃ vanditvā aṭṭhāsi. Atha naṃ satthā āha – ‘‘kativassosi tvaṃ, sumanā’’ti? ‘‘Sattavassomhi, bhanteti. ‘‘Tena hi, sumana, ajja paṭṭhāya bhikkhu hohī’’ti vatvā dāyajjaupasampadaṃ adāsi. Dveyeva kira sāmaṇerā sattavassikā upasampadaṃ labhiṃsu – ayañca sumano sopāko cāti.

    এৰং তস্মিং উপসম্পন্নে ধম্মসভাযং কথং সমুট্ঠাপেসুং, ‘‘অচ্ছরিযং আৰুসো, এৰরূপো হি নাম দহরসামণেরস্স আনুভাৰো হোতি, ন নো ইতো পুব্বে এৰরূপো আনুভাৰো দিট্ঠপুব্বো’’তি। সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে, ‘‘ভিক্খৰে, মম সাসনে দহরোপি সম্মা পটিপন্নো এৰরূপং সম্পত্তিং লভতিযেৰা’’তি ৰত্ৰা ধম্মং দেসেন্তো ইমং গাথমাহ –

    Evaṃ tasmiṃ upasampanne dhammasabhāyaṃ kathaṃ samuṭṭhāpesuṃ, ‘‘acchariyaṃ āvuso, evarūpo hi nāma daharasāmaṇerassa ānubhāvo hoti, na no ito pubbe evarūpo ānubhāvo diṭṭhapubbo’’ti. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte, ‘‘bhikkhave, mama sāsane daharopi sammā paṭipanno evarūpaṃ sampattiṃ labhatiyevā’’ti vatvā dhammaṃ desento imaṃ gāthamāha –

    ৩৮২.

    382.

    ‘‘যো হৰে দহরো ভিক্খু, যুঞ্জতি বুদ্ধসাসনে।

    ‘‘Yo have daharo bhikkhu, yuñjati buddhasāsane;

    সোমং লোকং পভাসেতি, অব্ভা মুত্তোৰ চন্দিমা’’তি॥

    Somaṃ lokaṃ pabhāseti, abbhā muttova candimā’’ti.

    তত্থ যুঞ্জতীতি ঘটতি ৰাযমতি। পভাসেতীতি সো ভিক্খু অত্তনো অরহত্তমগ্গঞাণেন অব্ভাদীহি মুত্তো চন্দিমা ৰিয লোকং খন্ধাদিভেদং লোকং ওভাসেতি, একালোকং করোতীতি অত্থো।

    Tattha yuñjatīti ghaṭati vāyamati. Pabhāsetīti so bhikkhu attano arahattamaggañāṇena abbhādīhi mutto candimā viya lokaṃ khandhādibhedaṃ lokaṃ obhāseti, ekālokaṃ karotīti attho.

    দেসনাৰসানে বহূ সোতাপত্তিফলাদীনি পাপুণিংসূতি।

    Desanāvasāne bahū sotāpattiphalādīni pāpuṇiṃsūti.

    সুমনসামণেরৰত্থু দ্ৰাদসমং।

    Sumanasāmaṇeravatthu dvādasamaṃ.

    ভিক্খুৰগ্গৰণ্ণনা নিট্ঠিতা।

    Bhikkhuvaggavaṇṇanā niṭṭhitā.

    পঞ্চৰীসতিমো ৰগ্গো।

    Pañcavīsatimo vaggo.




    Next: ২৬. ব্রাহ্মণৰগ্গো • 26. Brāhmaṇavaggo




    Related texts:



    তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / ধম্মপদপাল়ি • Dhammapadapāḷi / ২৫. ভিক্খুৰগ্গো • 25. Bhikkhuvaggo


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact