| Library / Tipiṭaka / তিপিটক • Tipiṭaka / চরিযাপিটক-অট্ঠকথা • Cariyāpiṭaka-aṭṭhakathā |
৪. ভিসচরিযাৰণ্ণনা
4. Bhisacariyāvaṇṇanā
৩৪.
34.
চতুত্থে যদা হোমি, কাসীনং পুরৰরুত্তমেতি ‘‘কাসী’’তি বহুৰচনৰসেন লদ্ধৰোহারস্স রট্ঠস্স নগরৰরে বারাণসিযং যস্মিং কালে জাতসংৰড্ঢো হুত্ৰা ৰসামীতি অত্থো। ভগিনী চ ভাতরো সত্ত, নিব্বত্তা সোত্তিযে কুলেতি উপকঞ্চনাদযো ছ অহঞ্চাতি ভাতরো সত্ত সব্বকনিট্ঠা কঞ্চনদেৰী নাম ভগিনী চাতি সব্বে মযং অট্ঠ জনা মন্তজ্ঝেননিরততায সোত্তিযে উদিতোদিতে মহতি ব্রাহ্মণকুলে তদা নিব্বত্তা জাতাতি অত্থো।
Catutthe yadā homi, kāsīnaṃ puravaruttameti ‘‘kāsī’’ti bahuvacanavasena laddhavohārassa raṭṭhassa nagaravare bārāṇasiyaṃ yasmiṃ kāle jātasaṃvaḍḍho hutvā vasāmīti attho. Bhaginī ca bhātaro satta, nibbattā sottiye kuleti upakañcanādayo cha ahañcāti bhātaro satta sabbakaniṭṭhā kañcanadevī nāma bhaginī cāti sabbe mayaṃ aṭṭha janā mantajjhenaniratatāya sottiye uditodite mahati brāhmaṇakule tadā nibbattā jātāti attho.
৩৫.
35.
বোধিসত্তো হি তদা বারাণসিযং অসীতিকোটিৰিভৰস্স ব্রাহ্মণমহাসালস্স পুত্তো হুত্ৰা নিব্বত্তি। তস্স ‘‘কঞ্চনকুমারো’’তি নামং করিংসু। অথস্স পদসা ৰিচরণকালে অপরো পুত্তো ৰিজাযি। ‘‘উপকঞ্চনকুমারো’’তিস্স নামং করিংসু। ততো পট্ঠায মহাসত্তং ‘‘মহাকঞ্চনকুমারো’’তি সমুদাচরন্তি। এৰং পটিপাটিযা সত্ত পুত্তা অহেসুং। সব্বকনিট্ঠা পন একা ধীতা। তস্সা ‘‘কঞ্চনদেৰী’’তি নামং করিংসু। মহাসত্তো ৰযপ্পত্তো তক্কসিলং গন্ত্ৰা সব্বসিপ্পানি উগ্গহেত্ৰা পচ্চাগঞ্ছি।
Bodhisatto hi tadā bārāṇasiyaṃ asītikoṭivibhavassa brāhmaṇamahāsālassa putto hutvā nibbatti. Tassa ‘‘kañcanakumāro’’ti nāmaṃ kariṃsu. Athassa padasā vicaraṇakāle aparo putto vijāyi. ‘‘Upakañcanakumāro’’tissa nāmaṃ kariṃsu. Tato paṭṭhāya mahāsattaṃ ‘‘mahākañcanakumāro’’ti samudācaranti. Evaṃ paṭipāṭiyā satta puttā ahesuṃ. Sabbakaniṭṭhā pana ekā dhītā. Tassā ‘‘kañcanadevī’’ti nāmaṃ kariṃsu. Mahāsatto vayappatto takkasilaṃ gantvā sabbasippāni uggahetvā paccāgañchi.
অথ নং মাতাপিতরো ঘরাৰাসেন বন্ধিতুকামা ‘‘অত্তনো সমানজাতিকুলতো তে দারিকং আনেস্সামা’’তি ৰদিংসু। সো ‘‘অম্ম, তাত, ন ময্হং ঘরাৰাসেন অত্থো। ময্হঞ্হি সব্বো লোকসন্নিৰাসো আদিত্তো ৰিয সপ্পটিভযো, বন্ধনাগারং ৰিয পলিবুদ্ধনং, উক্কারভূমি ৰিয জিগুচ্ছো হুত্ৰা উপট্ঠাতি, ন মে চিত্তং কামেসু রজ্জতি, অঞ্ঞে ৰো পুত্তা অত্থি, তে ঘরাৰাসেন নিমন্তেথা’’তি ৰত্ৰা পুনপ্পুনং যাচিতোপি সহাযেহি যাচাপিতোপি ন ইচ্ছি, অথ নং সহাযা ‘‘সম্ম, কিং পন ত্ৰং পত্থযন্তো কামে পরিভুঞ্জিতুং ন ইচ্ছসী’’তি পুচ্ছিংসু। সো তেসং অত্তনো নেক্খম্মজ্ঝাসযং আরোচেসি। তেন ৰুত্তং ‘‘এতেসং পুব্বজো আসি’’ন্তিআদি।
Atha naṃ mātāpitaro gharāvāsena bandhitukāmā ‘‘attano samānajātikulato te dārikaṃ ānessāmā’’ti vadiṃsu. So ‘‘amma, tāta, na mayhaṃ gharāvāsena attho. Mayhañhi sabbo lokasannivāso āditto viya sappaṭibhayo, bandhanāgāraṃ viya palibuddhanaṃ, ukkārabhūmi viya jiguccho hutvā upaṭṭhāti, na me cittaṃ kāmesu rajjati, aññe vo puttā atthi, te gharāvāsena nimantethā’’ti vatvā punappunaṃ yācitopi sahāyehi yācāpitopi na icchi, atha naṃ sahāyā ‘‘samma, kiṃ pana tvaṃ patthayanto kāme paribhuñjituṃ na icchasī’’ti pucchiṃsu. So tesaṃ attano nekkhammajjhāsayaṃ ārocesi. Tena vuttaṃ ‘‘etesaṃ pubbajo āsi’’ntiādi.
তত্থ এতেসং পুব্বজো আসিন্তি এতেসং উপকঞ্চনকাদীনং সত্তন্নং জেট্ঠভাতিকো অহং তদা অহোসিং। হিরীসুক্কমুপাগতোতি সুক্কৰিপাকত্তা সন্তানস্স ৰিসোধনতো চ সুক্কং পাপজিগুচ্ছনলক্খণং হিরিং ভুসং আগতো, অতিৰিয পাপং জিগুচ্ছন্তো আসিন্তি অত্থো। ভৰং দিস্ৰান ভযতো, নেক্খম্মাভিরতো অহন্তি কামভৰাদীনং ৰসেন সব্বং ভৰং পক্খন্দিতুং আগচ্ছন্তং চণ্ডহত্থিং ৰিয, হিংসিতুং আগচ্ছন্তং উক্খিত্তাসিকং ৰধকং ৰিয, সীহং ৰিয, যক্খং ৰিয, রক্খসং ৰিয, ঘোরৰিসং ৰিয, আসিৰিসং ৰিয, আদিত্তং অঙ্গারং ৰিয, সপ্পটিভযং ভযানকভাৰতো পস্সিত্ৰা ততো মুচ্চনত্থঞ্চ পব্বজ্জাভিরতো পব্বজিত্ৰা ‘‘কথং নু খো ধম্মচরিযং সম্মাপটিপত্তিং পূরেয্যং, ঝানসমাপত্তিযো চ নিব্বত্তেয্য’’ন্তি পব্বজ্জাকুসলধম্মপঠমজ্ঝানাদিঅভিরতো তদা অহং আসিন্তি অত্থো।
Tattha etesaṃ pubbajo āsinti etesaṃ upakañcanakādīnaṃ sattannaṃ jeṭṭhabhātiko ahaṃ tadā ahosiṃ. Hirīsukkamupāgatoti sukkavipākattā santānassa visodhanato ca sukkaṃ pāpajigucchanalakkhaṇaṃ hiriṃ bhusaṃ āgato, ativiya pāpaṃ jigucchanto āsinti attho. Bhavaṃ disvāna bhayato, nekkhammābhirato ahanti kāmabhavādīnaṃ vasena sabbaṃ bhavaṃ pakkhandituṃ āgacchantaṃ caṇḍahatthiṃ viya, hiṃsituṃ āgacchantaṃ ukkhittāsikaṃ vadhakaṃ viya, sīhaṃ viya, yakkhaṃ viya, rakkhasaṃ viya, ghoravisaṃ viya, āsivisaṃ viya, ādittaṃ aṅgāraṃ viya, sappaṭibhayaṃ bhayānakabhāvato passitvā tato muccanatthañca pabbajjābhirato pabbajitvā ‘‘kathaṃ nu kho dhammacariyaṃ sammāpaṭipattiṃ pūreyyaṃ, jhānasamāpattiyo ca nibbatteyya’’nti pabbajjākusaladhammapaṭhamajjhānādiabhirato tadā ahaṃ āsinti attho.
৩৬. পহিতাতি মাতাপিতূহি পেসিতা। একমানসাতি সমানজ্ঝাসযা পুব্বে মযা একচ্ছন্দা মনাপচারিনো মাতাপিতূহি পহিতত্তা পন মম পটিক্কূলং অমনাপং ৰদন্তা। কামেহি মং নিমন্তেন্তীতি মহাপিতূহি ৰা একমানসা কামেহি মং নিমন্তেন্তি। কুলৰংসং ধারেহীতি ঘরাৰাসং সণ্ঠপেন্তো অত্তনো কুলৰংসং ধারেহি পতিট্ঠপেহীতি কামেহি মং নিমন্তেসুন্তি অত্থো।
36.Pahitāti mātāpitūhi pesitā. Ekamānasāti samānajjhāsayā pubbe mayā ekacchandā manāpacārino mātāpitūhi pahitattā pana mama paṭikkūlaṃ amanāpaṃ vadantā. Kāmehi maṃ nimantentīti mahāpitūhi vā ekamānasā kāmehi maṃ nimantenti. Kulavaṃsaṃ dhārehīti gharāvāsaṃ saṇṭhapento attano kulavaṃsaṃ dhārehi patiṭṭhapehīti kāmehi maṃ nimantesunti attho.
৩৭. যং তেসং ৰচনং ৰুত্তন্তি তেসং মম পিযসহাযানং যং ৰচনং ৰুত্তং। গিহিধম্মে সুখাৰহন্তি গিহিভাৰে সতি গহট্ঠভাৰে ঠিতস্স পুরিসস্স ঞাযানুগতত্তা দিট্ঠধম্মিকস্স সম্পরাযিকস্স চ সুখস্স আৰহনতো সুখাৰহং। তং মে অহোসি কঠিনন্তি তং তেসং ময্হং সহাযানং মাতাপিতূনঞ্চ ৰচনং একন্তেনেৰ নেক্খম্মাভিরতত্তা অমনাপভাৰেন মে কঠিনং ফরুসং দিৰসং সন্তত্তফালসদিসং উভোপি কণ্ণে ঝাপেন্তং ৰিয অহোসি।
37.Yaṃtesaṃ vacanaṃ vuttanti tesaṃ mama piyasahāyānaṃ yaṃ vacanaṃ vuttaṃ. Gihidhamme sukhāvahanti gihibhāve sati gahaṭṭhabhāve ṭhitassa purisassa ñāyānugatattā diṭṭhadhammikassa samparāyikassa ca sukhassa āvahanato sukhāvahaṃ. Taṃ me ahosi kaṭhinanti taṃ tesaṃ mayhaṃ sahāyānaṃ mātāpitūnañca vacanaṃ ekanteneva nekkhammābhiratattā amanāpabhāvena me kaṭhinaṃ pharusaṃ divasaṃ santattaphālasadisaṃ ubhopi kaṇṇe jhāpentaṃ viya ahosi.
৩৮. তে মং তদা উক্খিপন্তন্তি তে ময্হং সহাযা মাতাপিতূহি অত্তনো চ উপনিমন্তনৰসেন অনেকৰারং উপনীযমানে কামে উদ্ধমুদ্ধং খিপন্তং ছড্ডেন্তং পটিক্খিপন্তং মং পুচ্ছিংসু। পত্থিতং মমাতি ইতো ৰিসুদ্ধতরং কিং নু খো ইমিনা পত্থিতন্তি মযা অভিপত্থিতং মম তং পত্থনং পুচ্ছিংসু – ‘‘কিং ত্ৰং পত্থযসে, সম্ম, যদি কামে ন ভুঞ্জসী’’তি।
38.Te maṃ tadā ukkhipantanti te mayhaṃ sahāyā mātāpitūhi attano ca upanimantanavasena anekavāraṃ upanīyamāne kāme uddhamuddhaṃ khipantaṃ chaḍḍentaṃ paṭikkhipantaṃ maṃ pucchiṃsu. Patthitaṃ mamāti ito visuddhataraṃ kiṃ nu kho iminā patthitanti mayā abhipatthitaṃ mama taṃ patthanaṃ pucchiṃsu – ‘‘kiṃ tvaṃ patthayase, samma, yadi kāme na bhuñjasī’’ti.
৩৯. অত্থকামোতি অত্তনো অত্থকামো, পাপভীরূতি অত্থো। ‘‘অত্তকামো’’তিপি পাল়ি। হিতেসিনন্তি ময্হং হিতেসীনং পিযসহাযানং। কেচি ‘‘অত্থকামহিতেসিন’’ন্তি পঠন্তি, তং ন সুন্দরং।
39.Atthakāmoti attano atthakāmo, pāpabhīrūti attho. ‘‘Attakāmo’’tipi pāḷi. Hitesinanti mayhaṃ hitesīnaṃ piyasahāyānaṃ. Keci ‘‘atthakāmahitesina’’nti paṭhanti, taṃ na sundaraṃ.
৪০. পিতু মাতু চ সাৰযুন্তি তে ময্হং সহাযা অনিৰত্তনীযং মম পব্বজ্জাছন্দং ৰিদিত্ৰা পব্বজিতুকামতাদীপকং ময্হং ৰচনং পিতু মাতু চ সাৰেসুং। ‘‘যগ্ঘে, অম্মতাতা, জানাথ, একন্তেনেৰ মহাকঞ্চনকুমারো পব্বজিস্সতি, ন সো সক্কা কেনচি উপাযেন কামেসু উপনেতু’’ন্তি অৰোচুং। মাতাপিতা এৰমাহূতি তদা ময্হং মাতাপিতরো মম সহাযেহি ৰুত্তং মম ৰচনং সুত্ৰা এৰমাহংসু – ‘‘সব্বেৰ পব্বজাম, ভো’’তি, যদি মহাকঞ্চনকুমারস্স নেক্খম্মং অভিরুচিতং, যং তস্স অভিরুচিতং, তদম্হাকম্পি অভিরুচিতমেৰ, তস্মা সব্বেৰ পব্বজাম, ভোতি। ‘‘ভো’’তি তেসং ব্রাহ্মণানং আলপনং। ‘‘পব্বজাম খো’’তিপি পাঠো, পব্বজাম এৰাতি অত্থো। মহাসত্তস্স হি পব্বজ্জাছন্দং ৰিদিত্ৰা উপকঞ্চনাদযো ছ ভাতরো ভগিনী চ কঞ্চনদেৰী পব্বজিতুকামাৰ অহেসুং, তেন তেপি মাতাপিতূহি ঘরাৰাসেন নিমন্তিযমানা ন ইচ্ছিংসুযেৰ। তস্মা এৰমাহংসু ‘‘সব্বেৰ পব্বজাম, ভো’’তি।
40.Pitu mātu ca sāvayunti te mayhaṃ sahāyā anivattanīyaṃ mama pabbajjāchandaṃ viditvā pabbajitukāmatādīpakaṃ mayhaṃ vacanaṃ pitu mātu ca sāvesuṃ. ‘‘Yagghe, ammatātā, jānātha, ekanteneva mahākañcanakumāro pabbajissati, na so sakkā kenaci upāyena kāmesu upanetu’’nti avocuṃ. Mātāpitā evamāhūti tadā mayhaṃ mātāpitaro mama sahāyehi vuttaṃ mama vacanaṃ sutvā evamāhaṃsu – ‘‘sabbeva pabbajāma, bho’’ti, yadi mahākañcanakumārassa nekkhammaṃ abhirucitaṃ, yaṃ tassa abhirucitaṃ, tadamhākampi abhirucitameva, tasmā sabbeva pabbajāma, bhoti. ‘‘Bho’’ti tesaṃ brāhmaṇānaṃ ālapanaṃ. ‘‘Pabbajāma kho’’tipi pāṭho, pabbajāma evāti attho. Mahāsattassa hi pabbajjāchandaṃ viditvā upakañcanādayo cha bhātaro bhaginī ca kañcanadevī pabbajitukāmāva ahesuṃ, tena tepi mātāpitūhi gharāvāsena nimantiyamānā na icchiṃsuyeva. Tasmā evamāhaṃsu ‘‘sabbeva pabbajāma, bho’’ti.
এৰঞ্চ পন ৰত্ৰা মহাসত্তং মাতাপিতরো পক্কোসিত্ৰা অত্তনোপি অধিপ্পাযং তস্স আচিক্খিত্ৰা ‘‘তাত, যদি পব্বজিতুকামোসি, অসীতিকোটিধনং তৰ সন্তকং যথাসুখং ৰিস্সজ্জেহী’’তি আহংসু। অথ নং মহাপুরিসো কপণদ্ধিকাদীনং ৰিস্সজ্জেত্ৰা মহাভিনিক্খমনং নিক্খমিত্ৰা হিমৰন্তং পাৰিসি। তেন সদ্ধিং মাতাপিতরো ছ ভাতরো চ ভগিনী চ একো দাসো একা দাসী একো চ সহাযো ঘরাৰাসং পহায অগমংসু। তেন ৰুত্তং –
Evañca pana vatvā mahāsattaṃ mātāpitaro pakkositvā attanopi adhippāyaṃ tassa ācikkhitvā ‘‘tāta, yadi pabbajitukāmosi, asītikoṭidhanaṃ tava santakaṃ yathāsukhaṃ vissajjehī’’ti āhaṃsu. Atha naṃ mahāpuriso kapaṇaddhikādīnaṃ vissajjetvā mahābhinikkhamanaṃ nikkhamitvā himavantaṃ pāvisi. Tena saddhiṃ mātāpitaro cha bhātaro ca bhaginī ca eko dāso ekā dāsī eko ca sahāyo gharāvāsaṃ pahāya agamaṃsu. Tena vuttaṃ –
৪১.
41.
‘‘উভো মাতা পিতা ময্হং, ভগিনী চ সত্ত ভাতরো।
‘‘Ubho mātā pitā mayhaṃ, bhaginī ca satta bhātaro;
অমিতধনং ছড্ডযিত্ৰা, পৰিসিম্হা মহাৰন’’ন্তি॥
Amitadhanaṃ chaḍḍayitvā, pavisimhā mahāvana’’nti.
জাতকট্ঠকথাযং (জা॰ অট্ঠ॰ ৪.১৪.৭৭ ভিসজাতকৰণ্ণনা) পন ‘‘মাতাপিতূসু কালংকতেসু তেসং কত্তব্বকিচ্চং কত্ৰা মহাসত্তো মহাভিনিক্খমনং নিক্খমী’’তি ৰুত্তং।
Jātakaṭṭhakathāyaṃ (jā. aṭṭha. 4.14.77 bhisajātakavaṇṇanā) pana ‘‘mātāpitūsu kālaṃkatesu tesaṃ kattabbakiccaṃ katvā mahāsatto mahābhinikkhamanaṃ nikkhamī’’ti vuttaṃ.
এৰং হিমৰন্তং পৰিসিত্ৰা চ তে বোধিসত্তপ্পমুখা একং পদুমসরং নিস্সায রমণীযে ভূমিভাগে অস্সমং কত্ৰা পব্বজিত্ৰা ৰনমূলফলাহারা যাপযিংসু। তেসু উপকঞ্চনাদযো অট্ঠ জনা ৰারেন ফলাফলং আহরিত্ৰা একস্মিং পাসাণফলকে অত্তনো ইতরেসঞ্চ কোট্ঠাসে কত্ৰা ঘণ্টিসঞ্ঞং দত্ৰা অত্তনো কোট্ঠাসং আদায ৰসনট্ঠানং পৰিসন্তি। সেসাপি ঘণ্টিসঞ্ঞায পণ্ণসালতো নিক্খমিত্ৰা অত্তনো অত্তনো পাপুণনকোট্ঠাসং আদায ৰসনট্ঠানং গন্ত্ৰা পরিভুঞ্জিত্ৰা সমণধম্মং করোন্তি।
Evaṃ himavantaṃ pavisitvā ca te bodhisattappamukhā ekaṃ padumasaraṃ nissāya ramaṇīye bhūmibhāge assamaṃ katvā pabbajitvā vanamūlaphalāhārā yāpayiṃsu. Tesu upakañcanādayo aṭṭha janā vārena phalāphalaṃ āharitvā ekasmiṃ pāsāṇaphalake attano itaresañca koṭṭhāse katvā ghaṇṭisaññaṃ datvā attano koṭṭhāsaṃ ādāya vasanaṭṭhānaṃ pavisanti. Sesāpi ghaṇṭisaññāya paṇṇasālato nikkhamitvā attano attano pāpuṇanakoṭṭhāsaṃ ādāya vasanaṭṭhānaṃ gantvā paribhuñjitvā samaṇadhammaṃ karonti.
অপরভাগে ভিসানি আহরিত্ৰা তথেৰ খাদন্তি। তত্থ তে ঘোরতপা পরমধিতিন্দ্রিযা কসিণপরিকম্মং করোন্তা ৰিহরিংসু। অথ নেসং সীলতেজেন সক্কস্স ভৰনং কম্পি। সক্কো তং কারণং ঞত্ৰা ‘‘ইমে ইসযো ৰীমংসিস্সামী’’তি অত্তনো আনুভাৰেন মহাসত্তস্স কোট্ঠাসে তযো দিৰসে অন্তরধাপেসি। মহাসত্তো পঠমদিৰসে কোট্ঠাসং অদিস্ৰা ‘‘মম কোট্ঠাসো পমুট্ঠো ভৰিস্সতী’’তি চিন্তেসি। দুতিযদিৰসে ‘‘মম দোসেন ভৰিতব্বং, পণামনৰসেন মম কোট্ঠাসং ন ঠপিতং মঞ্ঞে’’তি চিন্তেসি। ততিযদিৰসে ‘‘তং কারণং সুত্ৰা খমাপেস্সামী’’তি সাযন্হসমযে ঘণ্টিসঞ্ঞং দত্ৰা তায সঞ্ঞায সব্বেসু সন্নিপতিতেসু তমত্থং আরোচেত্ৰা তীসুপি দিৰসেসু তেহি জেট্ঠকোট্ঠাসস্স ঠপিতভাৰং সুত্ৰা ‘‘তুম্হেহি ময্হং কোট্ঠাসো ঠপিতো, মযা পন ন লদ্ধো, কিং নু খো কারণ’’ন্তি আহ। তং সুত্ৰা সব্বেৰ সংৰেগপ্পত্তা অহেসুং।
Aparabhāge bhisāni āharitvā tatheva khādanti. Tattha te ghoratapā paramadhitindriyā kasiṇaparikammaṃ karontā vihariṃsu. Atha nesaṃ sīlatejena sakkassa bhavanaṃ kampi. Sakko taṃ kāraṇaṃ ñatvā ‘‘ime isayo vīmaṃsissāmī’’ti attano ānubhāvena mahāsattassa koṭṭhāse tayo divase antaradhāpesi. Mahāsatto paṭhamadivase koṭṭhāsaṃ adisvā ‘‘mama koṭṭhāso pamuṭṭho bhavissatī’’ti cintesi. Dutiyadivase ‘‘mama dosena bhavitabbaṃ, paṇāmanavasena mama koṭṭhāsaṃ na ṭhapitaṃ maññe’’ti cintesi. Tatiyadivase ‘‘taṃ kāraṇaṃ sutvā khamāpessāmī’’ti sāyanhasamaye ghaṇṭisaññaṃ datvā tāya saññāya sabbesu sannipatitesu tamatthaṃ ārocetvā tīsupi divasesu tehi jeṭṭhakoṭṭhāsassa ṭhapitabhāvaṃ sutvā ‘‘tumhehi mayhaṃ koṭṭhāso ṭhapito, mayā pana na laddho, kiṃ nu kho kāraṇa’’nti āha. Taṃ sutvā sabbeva saṃvegappattā ahesuṃ.
তস্মিং অস্সমে রুক্খদেৰতাপি অত্তনো ভৰনতো ওতরিত্ৰা তেসং সন্তিকে নিসীদি। মনুস্সানং হত্থতো পলাযিত্ৰা অরঞ্ঞং পৰিট্ঠো একো ৰারণো অহিতুণ্ডিকহত্থতো পলাযিত্ৰা মুত্তো সপ্পকীল়াপনকো একো ৰানরো চ তেহি ইসীহি কতপরিচযা তদা তেসং সন্তিকং গন্ত্ৰা একমন্তং অট্ঠংসু। সক্কোপি ‘‘ইসিগণং পরিগ্গণ্হিস্সামী’’তি অদিস্সমানকাযো তত্থেৰ অট্ঠাসি। তস্মিঞ্চ খণে বোধিসত্তস্স কনিট্ঠো উপকঞ্চনতাপসো উট্ঠায বোধিসত্তং ৰন্দিত্ৰা সেসানং অপচিতিং দস্সেত্ৰা ‘‘অহং সঞ্ঞং পট্ঠপেত্ৰা অত্তানঞ্ঞেৰ সোধেতুং লভামী’’তি পুচ্ছিত্ৰা ‘‘আম, লভসী’’তি ৰুত্তে ইসিগণমজ্ঝে ঠত্ৰা সপথং করোন্তো –
Tasmiṃ assame rukkhadevatāpi attano bhavanato otaritvā tesaṃ santike nisīdi. Manussānaṃ hatthato palāyitvā araññaṃ paviṭṭho eko vāraṇo ahituṇḍikahatthato palāyitvā mutto sappakīḷāpanako eko vānaro ca tehi isīhi kataparicayā tadā tesaṃ santikaṃ gantvā ekamantaṃ aṭṭhaṃsu. Sakkopi ‘‘isigaṇaṃ pariggaṇhissāmī’’ti adissamānakāyo tattheva aṭṭhāsi. Tasmiñca khaṇe bodhisattassa kaniṭṭho upakañcanatāpaso uṭṭhāya bodhisattaṃ vanditvā sesānaṃ apacitiṃ dassetvā ‘‘ahaṃ saññaṃ paṭṭhapetvā attānaññeva sodhetuṃ labhāmī’’ti pucchitvā ‘‘āma, labhasī’’ti vutte isigaṇamajjhe ṭhatvā sapathaṃ karonto –
‘‘অস্সং গৰং রজতং জাতরূপং, ভরিযঞ্চ সো ইধ লভতং মনাপং।
‘‘Assaṃ gavaṃ rajataṃ jātarūpaṃ, bhariyañca so idha labhataṃ manāpaṃ;
পুত্তেহি দারেহি সমঙ্গি হোতু, ভিসানি তে ব্রাহ্মণ যো অহাসী’’তি॥ (জা॰ ১.১৪.৭৮) –
Puttehi dārehi samaṅgi hotu, bhisāni te brāhmaṇa yo ahāsī’’ti. (jā. 1.14.78) –
ইমং গাথং অভাসি। ইমঞ্হি সো ‘‘যত্তকানি পিযৰত্থূনি হোন্তি, তেহি ৰিপ্পযোগে তত্তকানি দুক্খানি উপ্পজ্জন্তী’’তি ৰত্থুকামে গরহন্তো আহ।
Imaṃ gāthaṃ abhāsi. Imañhi so ‘‘yattakāni piyavatthūni honti, tehi vippayoge tattakāni dukkhāni uppajjantī’’ti vatthukāme garahanto āha.
তং সুত্ৰা ইসিগণো ‘‘মারিস, মা কথয, অতিভারিযো তে সপথো’’তি কণ্ণে পিদহি। বোধিসত্তোপি ‘‘অতিভারিযো তে সপথো, ন, ত্ৰং তাত, গণ্হসি, তৰ পত্তাসনে নিসীদা’’তি আহ। সেসাপি সপথং করোন্তা যথাক্কমং –
Taṃ sutvā isigaṇo ‘‘mārisa, mā kathaya, atibhāriyo te sapatho’’ti kaṇṇe pidahi. Bodhisattopi ‘‘atibhāriyo te sapatho, na, tvaṃ tāta, gaṇhasi, tava pattāsane nisīdā’’ti āha. Sesāpi sapathaṃ karontā yathākkamaṃ –
‘‘মালঞ্চ সো কাসিকচন্দনঞ্চ, ধারেতু পুত্তস্স বহূ ভৰন্তু।
‘‘Mālañca so kāsikacandanañca, dhāretu puttassa bahū bhavantu;
কামেসু তিব্বং কুরুতং অপেক্খং, ভিসানি তে ব্রাহ্মণ যো অহাসি॥
Kāmesu tibbaṃ kurutaṃ apekkhaṃ, bhisāni te brāhmaṇa yo ahāsi.
‘‘পহূতধঞ্ঞো কসিমা যসস্সী, পুত্তে গিহী ধনিমা সব্বকামে।
‘‘Pahūtadhañño kasimā yasassī, putte gihī dhanimā sabbakāme;
ৰযং অপস্সং ঘরমাৰসাতু, ভিসানি তে ব্রাহ্মণ যো অহাসি॥
Vayaṃ apassaṃ gharamāvasātu, bhisāni te brāhmaṇa yo ahāsi.
‘‘সো খত্তিযো হোতু পসয্হকারী, রাজাভিরাজা বলৰা যসস্সী।
‘‘So khattiyo hotu pasayhakārī, rājābhirājā balavā yasassī;
সচাতুরন্তং মহিমাৰসাতু, ভিসানি তে ব্রাহ্মণ যো অহাসি॥
Sacāturantaṃ mahimāvasātu, bhisāni te brāhmaṇa yo ahāsi.
‘‘সো ব্রাহ্মণো হোতু অৰীতরাগো, মুহুত্তনক্খত্তপথেসু যুত্তো।
‘‘So brāhmaṇo hotu avītarāgo, muhuttanakkhattapathesu yutto;
পূজেতু নং রট্ঠপতী যসস্সী, ভিসানি তে ব্রাহ্মণ যো অহাসি॥
Pūjetu naṃ raṭṭhapatī yasassī, bhisāni te brāhmaṇa yo ahāsi.
‘‘অজ্ঝাযকং সব্বসমন্তৰেদং, তপস্সিনং মঞ্ঞতু সব্বলোকো।
‘‘Ajjhāyakaṃ sabbasamantavedaṃ, tapassinaṃ maññatu sabbaloko;
পূজেন্তু নং জানপদা সমেচ্চ, ভিসানি তে ব্রাহ্মণ যো অহাসি॥
Pūjentu naṃ jānapadā samecca, bhisāni te brāhmaṇa yo ahāsi.
‘‘চতুস্সদং গামৰরং সমিদ্ধং, দিন্নঞ্হি সো ভুঞ্জতু ৰাসৰেন।
‘‘Catussadaṃ gāmavaraṃ samiddhaṃ, dinnañhi so bhuñjatu vāsavena;
অৰীতরাগো মরণং উপেতু, ভিসানি তে ব্রাহ্মণ যো অহাসি॥
Avītarāgo maraṇaṃ upetu, bhisāni te brāhmaṇa yo ahāsi.
‘‘সো গামণী হোতু সহাযমজ্ঝে, নচ্চেহি গীতেহি পমোদমানো।
‘‘So gāmaṇī hotu sahāyamajjhe, naccehi gītehi pamodamāno;
সো রাজতো ব্যসনমালত্থ কিঞ্চি, ভিসানি তে ব্রাহ্মণ যো অহাসি॥
So rājato byasanamālattha kiñci, bhisāni te brāhmaṇa yo ahāsi.
‘‘তং একরাজা পথৰিং ৰিজেত্ৰা, ইত্থীসহস্সস্স ঠপেতু অগ্গে।
‘‘Taṃ ekarājā pathaviṃ vijetvā, itthīsahassassa ṭhapetu agge;
সীমন্তিনীনং পৰরা ভৰাতু, ভিসানি তে ব্রাহ্মণ যা অহাসি॥
Sīmantinīnaṃ pavarā bhavātu, bhisāni te brāhmaṇa yā ahāsi.
‘‘ইসীনঞ্হি সা সব্বসমাগতানং, ভুঞ্জেয্য সাদুং অৰিকম্পমানা।
‘‘Isīnañhi sā sabbasamāgatānaṃ, bhuñjeyya sāduṃ avikampamānā;
চরাতু লাভেন ৰিকত্থমানা, ভিসানি তে ব্রাহণ যা অহাসি॥
Carātu lābhena vikatthamānā, bhisāni te brāhaṇa yā ahāsi.
‘‘আৰাসিকো হোতু মহাৰিহারে, নৰকম্মিকো হোতু গজঙ্গলাযং।
‘‘Āvāsiko hotu mahāvihāre, navakammiko hotu gajaṅgalāyaṃ;
আলোকসন্ধিং দিৰসং করোতু, ভিসানি তে ব্রাহ্মণ যো অহাসি॥
Ālokasandhiṃ divasaṃ karotu, bhisāni te brāhmaṇa yo ahāsi.
‘‘সো বজ্ঝতং পাসসতেহি ছম্হি, রম্মা ৰনা নীযতু রাজধানিং।
‘‘So bajjhataṃ pāsasatehi chamhi, rammā vanā nīyatu rājadhāniṃ;
তুত্তেহি সো হঞ্ঞতু পাচনেহি, ভিসানি তে ব্রাহ্মণ যো অহাসি॥
Tuttehi so haññatu pācanehi, bhisāni te brāhmaṇa yo ahāsi.
‘‘অলক্কমালী তিপুকণ্ণপিট্ঠো, লট্ঠীহতো সপ্পমুখং উপেতু।
‘‘Alakkamālī tipukaṇṇapiṭṭho, laṭṭhīhato sappamukhaṃ upetu;
সকচ্ছবন্ধো ৰিসিখং চরাতু, ভিসানি তে ব্রাহ্মণ যো অহাসী’’তি॥ (জা॰ ১.১৪.৭৯-৯০) –
Sakacchabandho visikhaṃ carātu, bhisāni te brāhmaṇa yo ahāsī’’ti. (jā. 1.14.79-90) –
ইমা গাথাযো অৰোচুং।
Imā gāthāyo avocuṃ.
তত্থ তিব্বন্তি ৰত্থুকামকিলেসকামেসু বহলং অপেক্খং করোতু। কসিমাতি সম্পন্নকসিকম্মো। পুত্তে গিহী ধনিমা সব্বকামেতি পুত্তে লভতু, গিহী হোতু, সত্তৰিধেন ধনেন ধনিমা হোতু, রূপাদিভেদে সব্বকামে লভতু। ৰযং অপস্সন্তি মহল্লককালেপি অপব্বজিত্ৰা অত্তনো ৰযং অপস্সন্তো পঞ্চকামগুণসমিদ্ধং ঘরমেৰ আৰসতু। রাজাভিরাজাতি রাজূনং অন্তরে অতিরাজা। অৰীতরাগোতি পুরোহিতট্ঠানতণ্হায সতণ্হো। তপস্সিনন্তি তপসীলং, সীলসম্পন্নোতি নং মঞ্ঞতু। চতুস্সদন্তি আকিণ্ণমনুস্সতায মনুস্সেহি পহূতধঞ্ঞতায ধঞ্ঞেন সুলভদারুতায দারূহি সম্পন্নোদকতায উদকেনাতি চতূহি উস্সন্নং। ৰাসৰেনাতি ৰাসৰেন দিন্নং ৰিয অচলং, ৰাসৰতো লদ্ধৰরানুভাৰেনেৰ রাজানং আরাধেত্ৰা তেন দিন্নন্তিপি অত্থো। অৰীতরাগোতি অৰিগতরাগো কদ্দমে সূকরো ৰিয কামপঙ্কে নিমুগ্গোৰ হোতু।
Tattha tibbanti vatthukāmakilesakāmesu bahalaṃ apekkhaṃ karotu. Kasimāti sampannakasikammo. Putte gihī dhanimā sabbakāmeti putte labhatu, gihī hotu, sattavidhena dhanena dhanimā hotu, rūpādibhede sabbakāme labhatu. Vayaṃ apassanti mahallakakālepi apabbajitvā attano vayaṃ apassanto pañcakāmaguṇasamiddhaṃ gharameva āvasatu. Rājābhirājāti rājūnaṃ antare atirājā. Avītarāgoti purohitaṭṭhānataṇhāya sataṇho. Tapassinanti tapasīlaṃ, sīlasampannoti naṃ maññatu. Catussadanti ākiṇṇamanussatāya manussehi pahūtadhaññatāya dhaññena sulabhadārutāya dārūhi sampannodakatāya udakenāti catūhi ussannaṃ. Vāsavenāti vāsavena dinnaṃ viya acalaṃ, vāsavato laddhavarānubhāveneva rājānaṃ ārādhetvā tena dinnantipi attho. Avītarāgoti avigatarāgo kaddame sūkaro viya kāmapaṅke nimuggova hotu.
গামণীতি গামজেট্ঠকো। তন্তি তং ইত্থিং। একরাজাতি অগ্গরাজা। ইত্থীসহস্সস্সাতি ৰচনমট্ঠতায ৰুত্তং। সোল়সন্নং ইত্থিসহস্সানং অগ্গট্ঠানে ঠপেতূতি অত্থো। সীমন্তিনীনন্তি সীমন্তধরানং, ইত্থীনন্তি অত্থো। সব্বসমাগতানন্তি সব্বেসং সন্নিপতিতানং মজ্ঝে নিসীদিত্ৰা। অৰিকম্পমানাতি অনোসক্কমানা সাদুরসং ভুঞ্জতূতি অত্থো। চরাতু লাভেন ৰিকত্থমানাতি লাভহেতু সিঙ্গারৰেসং গহেত্ৰা লাভং উপ্পাদেতুং চরতু। আৰাসিকোতি আৰাসজগ্গনকো। গজঙ্গলাযন্তি এৰংনামকে নগরে। তত্থ কির দব্বসম্ভারা সুলভা। আলোকসন্ধিং দিৰসন্তি একদিৰসেন একমেৰ ৰাতপানং করোতু। সো কির দেৰপুত্তো কস্সপবুদ্ধকালে গজঙ্গলনগরং নিস্সায যোজনিকে মহাৰিহারে আৰাসিকো সঙ্ঘত্থেরো হুত্ৰা জিণ্ণে ৰিহারে নৰকম্মানি করোন্তোৰ মহাদুক্খং অনুভৰি, তং সন্ধাযাহ।
Gāmaṇīti gāmajeṭṭhako. Tanti taṃ itthiṃ. Ekarājāti aggarājā. Itthīsahassassāti vacanamaṭṭhatāya vuttaṃ. Soḷasannaṃ itthisahassānaṃ aggaṭṭhāne ṭhapetūti attho. Sīmantinīnanti sīmantadharānaṃ, itthīnanti attho. Sabbasamāgatānanti sabbesaṃ sannipatitānaṃ majjhe nisīditvā. Avikampamānāti anosakkamānā sādurasaṃ bhuñjatūti attho. Carātu lābhena vikatthamānāti lābhahetu siṅgāravesaṃ gahetvā lābhaṃ uppādetuṃ caratu. Āvāsikoti āvāsajagganako. Gajaṅgalāyanti evaṃnāmake nagare. Tattha kira dabbasambhārā sulabhā. Ālokasandhiṃ divasanti ekadivasena ekameva vātapānaṃ karotu. So kira devaputto kassapabuddhakāle gajaṅgalanagaraṃ nissāya yojanike mahāvihāre āvāsiko saṅghatthero hutvā jiṇṇe vihāre navakammāni karontova mahādukkhaṃ anubhavi, taṃ sandhāyāha.
পাসসতেহীতি বহূহি পাসেহি। ছম্হীতি চতূসু পাদেসু গীৰায কটিভাগে চাতি ছসু ঠানেসু। তুত্তেহীতি দ্ৰিকণ্টকাহি দীঘলট্ঠীহি। পাচনেহীতি রস্সপাচনেহি, অঙ্কুসকেহি ৰা। অলক্কমালীতি অহিতুণ্ডিকেন কণ্ঠে পরিক্খিপিত্ৰা ঠপিতায অলক্কমালায সমন্নাগতো। তিপুকণ্ণপিট্ঠোতি তিপুপিল়ন্ধনেন পিল়ন্ধিতপিট্ঠিকণ্ণো কণ্ণপিট্ঠো। লট্ঠিহতোতি সপ্পকীল়াপনং সিক্খাপযমানো লট্ঠিযা হতো হুত্ৰা। সব্বং তে কামভোগং ঘরাৰাসং অত্তনা অত্তনা অনুভূতদুক্খঞ্চ জিগুচ্ছন্তা তথা তথা সপথং করোন্তা এৰমাহংসু।
Pāsasatehīti bahūhi pāsehi. Chamhīti catūsu pādesu gīvāya kaṭibhāge cāti chasu ṭhānesu. Tuttehīti dvikaṇṭakāhi dīghalaṭṭhīhi. Pācanehīti rassapācanehi, aṅkusakehi vā. Alakkamālīti ahituṇḍikena kaṇṭhe parikkhipitvā ṭhapitāya alakkamālāya samannāgato. Tipukaṇṇapiṭṭhoti tipupiḷandhanena piḷandhitapiṭṭhikaṇṇo kaṇṇapiṭṭho. Laṭṭhihatoti sappakīḷāpanaṃ sikkhāpayamāno laṭṭhiyā hato hutvā. Sabbaṃ te kāmabhogaṃ gharāvāsaṃ attanā attanā anubhūtadukkhañca jigucchantā tathā tathā sapathaṃ karontā evamāhaṃsu.
অথ বোধিসত্তো ‘‘সব্বেহি ইমেহি সপথো কতো, মযাপি কাতুং ৰট্টতী’’তি সপথং করোন্তো –
Atha bodhisatto ‘‘sabbehi imehi sapatho kato, mayāpi kātuṃ vaṭṭatī’’ti sapathaṃ karonto –
‘‘যো ৰে অনট্ঠংৰ নট্ঠন্তি চাহ, কামেৰ সো লভতং ভুঞ্জতঞ্চ।
‘‘Yo ve anaṭṭhaṃva naṭṭhanti cāha, kāmeva so labhataṃ bhuñjatañca;
অগারমজ্ঝে মরণং উপেতু, যো ৰা ভোন্তো সঙ্কতি কঞ্চি দেৰা’’তি॥ (জা॰ ১.১৪.৯১) –
Agāramajjhe maraṇaṃ upetu, yo vā bhonto saṅkati kañci devā’’ti. (jā. 1.14.91) –
ইমং গাথমাহ।
Imaṃ gāthamāha.
তত্থ ভোন্তোতি ভৰন্তো। সঙ্কতীতি আসঙ্কতি। কঞ্চীতি অঞ্ঞতরং।
Tattha bhontoti bhavanto. Saṅkatīti āsaṅkati. Kañcīti aññataraṃ.
অথ সক্কো ‘‘সব্বেপিমে কামেসু নিরপেক্খা’’তি জানিত্ৰা সংৰিগ্গমানসো ন ইমেসু কেনচিপি ভিসানি নীতানি, নাপি তযা অনট্ঠং নট্ঠন্তি ৰুত্তং, অপিচ অহং তুম্হে ৰীমংসিতুকামো অন্তরধাপেসিন্তি দস্সেন্তো –
Atha sakko ‘‘sabbepime kāmesu nirapekkhā’’ti jānitvā saṃviggamānaso na imesu kenacipi bhisāni nītāni, nāpi tayā anaṭṭhaṃ naṭṭhanti vuttaṃ, apica ahaṃ tumhe vīmaṃsitukāmo antaradhāpesinti dassento –
‘‘ৰীমংসমানো ইসিনো ভিসানি, তীরে গহেত্ৰান থলে নিধেসিং।
‘‘Vīmaṃsamāno isino bhisāni, tīre gahetvāna thale nidhesiṃ;
সুদ্ধা অপাপা ইসযো ৰসন্তি, এতানি তে ব্রহ্মচারী ভিসানী’’তি॥ (জা॰ ১.১৪.৯৫) –
Suddhā apāpā isayo vasanti, etāni te brahmacārī bhisānī’’ti. (jā. 1.14.95) –
ওসানগাথমাহ।
Osānagāthamāha.
তং সুত্ৰা বোধিসত্তো –
Taṃ sutvā bodhisatto –
‘‘ন তে নটা নো পন কীল়নেয্যা, ন বন্ধৰা নো পন তে সহাযা।
‘‘Na te naṭā no pana kīḷaneyyā, na bandhavā no pana te sahāyā;
কিস্মিং ৰুপত্থম্ভ সহস্সনেত্ত, ইসীহি ত্ৰং কীল়সি দেৰরাজা’’তি॥ (জা॰ ১.১৪.৯৬) –
Kismiṃ vupatthambha sahassanetta, isīhi tvaṃ kīḷasi devarājā’’ti. (jā. 1.14.96) –
সক্কং তজ্জেসি।
Sakkaṃ tajjesi.
অথ নং সক্কো –
Atha naṃ sakko –
‘‘আচরিযো মেসি পিতা চ ময্হং, এসা পতিট্ঠা খলিতস্স ব্রহ্মে।
‘‘Ācariyo mesi pitā ca mayhaṃ, esā patiṭṭhā khalitassa brahme;
একাপরাধং খম ভূরিপঞ্ঞ, ন পণ্ডিতা কোধবলা ভৰন্তী’’তি॥ (জা॰ ১.১৪.৯৭) –
Ekāparādhaṃ khama bhūripañña, na paṇḍitā kodhabalā bhavantī’’ti. (jā. 1.14.97) –
খমাপেসি।
Khamāpesi.
মহাসত্তো সক্কস্স দেৰরঞ্ঞো খমিত্ৰা সযং ইসিগণং খমাপেন্তো –
Mahāsatto sakkassa devarañño khamitvā sayaṃ isigaṇaṃ khamāpento –
‘‘সুৰাসিতং ইসিনং একরত্তং, যং ৰাসৰং ভূতপতিদ্দসাম।
‘‘Suvāsitaṃ isinaṃ ekarattaṃ, yaṃ vāsavaṃ bhūtapatiddasāma;
সব্বেৰ ভোন্তো সুমনা ভৰন্তু, যং ব্রাহ্মণো পচ্চুপাদী ভিসানী’’তি॥ (জা॰ ১.১৪.৯৮) –
Sabbeva bhonto sumanā bhavantu, yaṃ brāhmaṇo paccupādī bhisānī’’ti. (jā. 1.14.98) –
আহ।
Āha.
তত্থ ন তে নটাতি, দেৰরাজ, মযং তৰ নটা ৰা কীল়িতব্বযুত্তকা ৰা ন হোম। নাপি তৰ ঞাতকা, সহাযা হস্সং কাতব্বা। অথ ত্ৰং কিস্মিং ৰুপত্থম্ভাতি কিং উপত্থম্ভকং কত্ৰা, কিং নিস্সায ইসীহি সদ্ধিং কীল়সীতি অত্থো। এসা পতিট্ঠাতি এসা তৰ পাদচ্ছাযা অজ্জ মম খলিতস্স অপরাধস্স পতিট্ঠা হোতু। সুৰাসিতন্তি আযস্মন্তানং ইসীনং একরত্তিম্পি ইমস্মিং অরঞ্ঞে ৰসিতং সুৰসিতমেৰ। কিংকারণা? যং ৰাসৰং ভূতপতিং অদ্দসাম। সচে হি মযং নগরে অৰসিম্হা, ন ইমং অদ্দসাম। ভোন্তোতি ভৰন্তো। সব্বেপি সুমনা ভৰন্তু তুস্সন্তু, সক্কস্স দেৰরঞ্ঞো খমন্তু, কিংকারণা? যং ব্রাহ্মণো পচ্চুপাদী ভিসানি যস্মা তুম্হাকং আচরিযো ভিসানি অলভীতি। সক্কো ইসিগণং ৰন্দিত্ৰা দেৰলোকং গতো। ইসিগণোপি ঝানাভিঞ্ঞাযো নিব্বত্তেত্ৰা ব্রহ্মলোকূপগো অহোসি।
Tattha na te naṭāti, devarāja, mayaṃ tava naṭā vā kīḷitabbayuttakā vā na homa. Nāpi tava ñātakā, sahāyā hassaṃ kātabbā. Atha tvaṃ kismiṃ vupatthambhāti kiṃ upatthambhakaṃ katvā, kiṃ nissāya isīhi saddhiṃ kīḷasīti attho. Esā patiṭṭhāti esā tava pādacchāyā ajja mama khalitassa aparādhassa patiṭṭhā hotu. Suvāsitanti āyasmantānaṃ isīnaṃ ekarattimpi imasmiṃ araññe vasitaṃ suvasitameva. Kiṃkāraṇā? Yaṃ vāsavaṃ bhūtapatiṃ addasāma. Sace hi mayaṃ nagare avasimhā, na imaṃ addasāma. Bhontoti bhavanto. Sabbepi sumanā bhavantu tussantu, sakkassa devarañño khamantu, kiṃkāraṇā? Yaṃ brāhmaṇo paccupādī bhisāni yasmā tumhākaṃ ācariyo bhisāni alabhīti. Sakko isigaṇaṃ vanditvā devalokaṃ gato. Isigaṇopi jhānābhiññāyo nibbattetvā brahmalokūpago ahosi.
তদা উপকঞ্চনাদযো ছ ভাতরো সারিপুত্তমোগ্গল্লানমহাকস্সপঅনুরুদ্ধপুণ্ণআনন্দত্থেরা, ভগিনী উপ্পলৰণ্ণা, দাসী খুজ্জুত্তরা, দাসো চিত্তো গহপতি, রুক্খদেৰতা সাতাগিরো, ৰারণো পালিলেয্যনাগো, ৰানরো মধুৰাসিট্ঠো, সক্কো কাল়ুদাযী, মহাকঞ্চনতাপসো লোকনাথো।
Tadā upakañcanādayo cha bhātaro sāriputtamoggallānamahākassapaanuruddhapuṇṇaānandattherā, bhaginī uppalavaṇṇā, dāsī khujjuttarā, dāso citto gahapati, rukkhadevatā sātāgiro, vāraṇo pālileyyanāgo, vānaro madhuvāsiṭṭho, sakko kāḷudāyī, mahākañcanatāpaso lokanātho.
তস্স ইধাপি হেট্ঠা ৰুত্তনযেনেৰ দস পারমিযো নিদ্ধারেতব্বা। তথা অচ্চন্তমেৰ কামেসু অনপেক্খতাদযো গুণানুভাৰা ৰিভাৰেতব্বাতি।
Tassa idhāpi heṭṭhā vuttanayeneva dasa pāramiyo niddhāretabbā. Tathā accantameva kāmesu anapekkhatādayo guṇānubhāvā vibhāvetabbāti.
ভিসচরিযাৰণ্ণনা নিট্ঠিতা।
Bhisacariyāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / চরিযাপিটকপাল়ি • Cariyāpiṭakapāḷi / ৪. ভিসচরিযা • 4. Bhisacariyā
