| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၄. ဘိသာလုဝဒာယကတ္ထေရအပဒာနဝဏ္ဏနာ
4. Bhisāluvadāyakattheraapadānavaṇṇanā
ကာနနံ ဝနမောဂ္ဂယ္ဟာတိအာဒိကံ အာယသ္မတော ဘိသာလုဝဒာယကတ္ထေရသ္သ အပဒာနံ။ အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိသ္သယာနိ ပုညာနိ ဥပစိနန္တော ဝိပသ္သိသ္သ ဘဂဝတော ကာလေ ဟိမဝန္တသ္သ သမီပေ အရညာဝာသေ ဝသန္တော ဝနမူလဖလာဟာရော ဝိဝေကဝသေနာဂတံ ဝိပသ္သိံ ဘဂဝန္တံ ဒိသ္ဝာ ပသန္နမာနသော ပဉ္စဘိသာလုဝေ အဒာသိ။ ဘဂဝာ တသ္သ စိတ္တံ ပသာဒေတုံ ပသ္သန္တသ္သေဝ ပရိဘုဉ္ဇိ။ သော တေန စိတ္တပ္ပသာဒေန ကာလံ ကတ္ဝာ တုသိတာဒီသု သမ္ပတ္တိမနုဘဝိတ္ဝာ ပစ္ဆာ မနုသ္သသမ္ပတ္တိဉ္စ အနုဘဝိတ္ဝာ ဣမသ္မိံ ဗုဒ္ဓုပ္ပာဒေ ဧကသ္မိံ ကုလဂေဟေ နိဗ္ဗတ္တော ဝိဘဝသမ္ပတ္တိံ ပတ္တော တံ ပဟာယ သာသနေ ပဗ္ဗဇိတော နစိရသ္သေဝ အရဟတ္တံ ပာပုဏိ။
Kānanaṃvanamoggayhātiādikaṃ āyasmato bhisāluvadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle himavantassa samīpe araññāvāse vasanto vanamūlaphalāhāro vivekavasenāgataṃ vipassiṃ bhagavantaṃ disvā pasannamānaso pañcabhisāluve adāsi. Bhagavā tassa cittaṃ pasādetuṃ passantasseva paribhuñji. So tena cittappasādena kālaṃ katvā tusitādīsu sampattimanubhavitvā pacchā manussasampattiñca anubhavitvā imasmiṃ buddhuppāde ekasmiṃ kulagehe nibbatto vibhavasampattiṃ patto taṃ pahāya sāsane pabbajito nacirasseva arahattaṃ pāpuṇi.
၁၃. သော တတော အတ္တနော ပုဗ္ဗကမ္မံ သရိတ္ဝာ သောမနသ္သဇာတော ပုဗ္ဗစရိတာပဒာနံ ပကာသေန္တော ကာနနံ ဝနမောဂ္ဂယ္ဟာတိအာဒိမာဟ။ တံ ဟေဋ္ဌာ ဝုတ္တတ္ထမေဝ။ ဝသာမိ ဝိပိနေ အဟန္တိ ဝိဝေကဝာသော အဟံ ဝသာမီတိ သမ္ဗန္ဓော။ သေသံ ဥတ္တာနတ္ထမေဝာတိ။
13. So tato attano pubbakammaṃ saritvā somanassajāto pubbacaritāpadānaṃ pakāsento kānanaṃ vanamoggayhātiādimāha. Taṃ heṭṭhā vuttatthameva. Vasāmi vipine ahanti vivekavāso ahaṃ vasāmīti sambandho. Sesaṃ uttānatthamevāti.
ဘိသာလုဝဒာယကတ္ထေရအပဒာနဝဏ္ဏနာ သမတ္တာ။
Bhisāluvadāyakattheraapadānavaṇṇanā samattā.
ဆဋ္ဌဘာဏဝာရဝဏ္ဏနာ နိဋ္ဌိတာ။
Chaṭṭhabhāṇavāravaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၄. ဘိသာလုဝဒာယကတ္ထေရအပဒာနံ • 4. Bhisāluvadāyakattheraapadānaṃ
