| Library / Tipiṭaka / តិបិដក • Tipiṭaka / សំយុត្តនិកាយ (អដ្ឋកថា) • Saṃyuttanikāya (aṭṭhakathā) |
៥. ភីតាសុត្តវណ្ណនា
5. Bhītāsuttavaṇṇanā
៧៥. បញ្ចមេ កិំសូធ ភីតាតិ កិំ ភីតា? មគ្គោ ចនេកាយតនប្បវុត្តោតិ អដ្ឋតិំសារម្មណវសេន អនេកេហិ ការណេហិ កថិតោ។ ឯវំ សន្តេ កិស្ស ភីតា ហុត្វា អយំ ជនតា ទ្វាសដ្ឋិ ទិដ្ឋិយោ អគ្គហេសីតិ វទតិ។ ភូរិបញ្ញាតិ ពហុបញ្ញ ឧស្សន្នបញ្ញ។ បរលោកំ ន ភាយេតិ ឥមស្មា លោកា បរំ លោកំ គច្ឆន្តោ ន ភាយេយ្យ។ បណិធាយាតិ ឋបេត្វា។ ពហ្វន្នបានំ ឃរមាវសន្តោតិ អនាថបិណ្ឌិកាទយោ វិយ ពហ្វន្នបានេ ឃរេ វសន្តោ។ សំវិភាគីតិ អច្ឆរាយ គហិតម្បិ នខេន ផាលេត្វា បរស្ស ទត្វាវ ភុញ្ជនសីលោ។ វទញ្ញូតិ វុត្តត្ថមេវ។
75. Pañcame kiṃsūdha bhītāti kiṃ bhītā? Maggo canekāyatanappavuttoti aṭṭhatiṃsārammaṇavasena anekehi kāraṇehi kathito. Evaṃ sante kissa bhītā hutvā ayaṃ janatā dvāsaṭṭhi diṭṭhiyo aggahesīti vadati. Bhūripaññāti bahupañña ussannapañña. Paralokaṃ na bhāyeti imasmā lokā paraṃ lokaṃ gacchanto na bhāyeyya. Paṇidhāyāti ṭhapetvā. Bahvannapānaṃ gharamāvasantoti anāthapiṇḍikādayo viya bahvannapāne ghare vasanto. Saṃvibhāgīti accharāya gahitampi nakhena phāletvā parassa datvāva bhuñjanasīlo. Vadaññūti vuttatthameva.
ឥទានិ គាថាយ អង្គានិ ឧទ្ធរិត្វា ទស្សេតព្ពានិ – ‘‘វាច’’ន្តិ ហិ ឥមិនា ចត្តារិ វចីសុចរិតានិ គហិតានិ, ‘‘មនេនា’’តិបទេន តីណិ មនោសុចរិតានិ, ‘‘កាយេនា’’តិ បទេន តីណិ កាយសុចរិតានិ។ ឥតិ ឥមេ ទស កុសលកម្មបថា បុព្ពសុទ្ធិអង្គំ នាម។ ពហ្វន្នបានំ ឃរមាវសន្តោតិ ឥមិនា យញ្ញឧបក្ខរោ គហិតោ។ សទ្ធោតិ ឯកមង្គំ, មុទូតិ ឯកំ, សំវិភាគីតិ ឯកំ, វទញ្ញូតិ ឯកំ។ ឥតិ ឥមានិ ចត្តារិ អង្គានិ សន្ធាយ ‘‘ឯតេសុ ធម្មេសុ ឋិតោ ចតូសូ’’តិ អាហ។
Idāni gāthāya aṅgāni uddharitvā dassetabbāni – ‘‘vāca’’nti hi iminā cattāri vacīsucaritāni gahitāni, ‘‘manenā’’tipadena tīṇi manosucaritāni, ‘‘kāyenā’’ti padena tīṇi kāyasucaritāni. Iti ime dasa kusalakammapathā pubbasuddhiaṅgaṃ nāma. Bahvannapānaṃ gharamāvasantoti iminā yaññaupakkharo gahito. Saddhoti ekamaṅgaṃ, mudūti ekaṃ, saṃvibhāgīti ekaṃ, vadaññūti ekaṃ. Iti imāni cattāri aṅgāni sandhāya ‘‘etesu dhammesu ṭhito catūsū’’ti āha.
អបរោបិ បរិយាយោ – វាចន្តិអាទីនិ តីណិ អង្គានិ, ពហ្វន្នបានន្តិ ឥមិនា យញ្ញឧបក្ខរោវ គហិតោ, សទ្ធោ មុទូ សំវិភាគី វទញ្ញូតិ ឯកំ អង្គំ។ អបរោ ទុកនយោ នាម ហោតិ។ ‘‘វាចំ មនញ្ចា’’តិ ឥទមេកំ អង្គំ, ‘‘កាយេន បាបានិ អកុព្ពមានោ, ពហ្វន្នបានំ ឃរមាវសន្តោ’’តិ ឯកំ, ‘‘សទ្ធោ មុទូ’’តិ ឯកំ, ‘‘សំវិភាគី វទញ្ញូ’’តិ ឯកំ។ ឯតេសុ ចតូសុ ធម្មេសុ ឋិតោ ធម្មេ ឋិតោ នាម ហោតិ។ សោ ឥតោ បរលោកំ គច្ឆន្តោ ន ភាយតិ។ បញ្ចមំ។
Aparopi pariyāyo – vācantiādīni tīṇi aṅgāni, bahvannapānanti iminā yaññaupakkharova gahito, saddho mudū saṃvibhāgī vadaññūti ekaṃ aṅgaṃ. Aparo dukanayo nāma hoti. ‘‘Vācaṃ manañcā’’ti idamekaṃ aṅgaṃ, ‘‘kāyena pāpāni akubbamāno, bahvannapānaṃ gharamāvasanto’’ti ekaṃ, ‘‘saddho mudū’’ti ekaṃ, ‘‘saṃvibhāgī vadaññū’’ti ekaṃ. Etesu catūsu dhammesu ṭhito dhamme ṭhito nāma hoti. So ito paralokaṃ gacchanto na bhāyati. Pañcamaṃ.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៥. ភីតាសុត្តំ • 5. Bhītāsuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៥. ភីតាសុត្តវណ្ណនា • 5. Bhītāsuttavaṇṇanā
