| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
5. භීතාසුත්‌තවණ්‌ණනා
5. Bhītāsuttavaṇṇanā
75. කිං සූධ භීතාති එත්‌ථ සු-ඉධාති නිපාතමත්‌තන්‌ති ආහ ‘‘කිං භීතා’’ති? මග්‌ගො ච නෙකායතනප්‌පවුත්‌තොති අනෙකකාරණං නානාවිධාධිගමොකාසං කත්‌වා පවුත්‌තො කථිතො. තෙනාහ ‘‘අට්‌ඨතිංසාරම්‌මණවසෙනා’’තිආදි. එවං සන්‌තෙති එවං සබ්‌බසාධාරණානෙකායතනෙහි නිබ්‌බානගාමිමග්‌ගස්‌ස තුම්‌හෙහි පවෙදිතත්‌තා ලබ්‌භමානෙ ඛෙමෙ මග්‌ගෙ කිං භීතායං ජනතා උප්‌පථභූතා විපරීතදිට්‌ඨිතො ගණ්‌හීති අත්‌ථො? එවං දෙවතා යථිච්‌ඡාය පුරිමද්‌ධෙන අත්‌තනා යථාචින්‌තිතමත්‌ථං සත්‌ථු පවෙදිතා, පච්‌ඡිමද්‌ධෙන අත්‌තනො සංසයං පුච්‌ඡති. බහුපඤ්‌ඤාති පුථුපඤ්‌ඤ. උස්‌සන්‌නපඤ්‌ඤාති අධිකපඤ්‌ඤා. ඨපෙත්‌වාති සංයමෙත්‌වා. සංවිභාගීති ආහාරපරිභොගෙ සම්‌මදෙව විභජනසීලො. තෙනාහ ‘‘අච්‌ඡරායා’’තිආදි. වුත්‌තත්‌ථමෙව හෙට්‌ඨා.
75.Kiṃ sūdha bhītāti ettha su-idhāti nipātamattanti āha ‘‘kiṃ bhītā’’ti? Maggo ca nekāyatanappavuttoti anekakāraṇaṃ nānāvidhādhigamokāsaṃ katvā pavutto kathito. Tenāha ‘‘aṭṭhatiṃsārammaṇavasenā’’tiādi. Evaṃ santeti evaṃ sabbasādhāraṇānekāyatanehi nibbānagāmimaggassa tumhehi paveditattā labbhamāne kheme magge kiṃ bhītāyaṃ janatā uppathabhūtā viparītadiṭṭhito gaṇhīti attho? Evaṃ devatā yathicchāya purimaddhena attanā yathācintitamatthaṃ satthu paveditā, pacchimaddhena attano saṃsayaṃ pucchati. Bahupaññāti puthupañña. Ussannapaññāti adhikapaññā. Ṭhapetvāti saṃyametvā. Saṃvibhāgīti āhāraparibhoge sammadeva vibhajanasīlo. Tenāha ‘‘accharāyā’’tiādi. Vuttatthameva heṭṭhā.
මනෙනාති මනොගහණෙන. පුබ්‌බසුද්‌ධිඅඞ්‌ගන්‌ති පුබ්‌බභාගසුද්‌ධිභූතං අඞ්‌ගං. චතූසූති වුත්‌තඅඞ්‌ගපරියාපන්‌නං. යඤ්‌ඤඋපක්‌ඛරොති දානස්‌ස සාධනං. එතෙසු ධම්‌මෙසූති එතෙසු සද්‌ධාදිගුණෙසු. යථා හි සද්‌ධො පච්‌චයං පච්‌චුපට්‌ඨපෙත්‌වා වත්‌ථුපරිච්‌චාගස්‌ස විසෙසපච්‌චයො කම්‌මඵලස්‌ස පරලොකස්‌ස ච පච්‌චක්‌ඛතො විය පත්‌තියායනතො, එවං මුදුහදයො. මුදුහදයො හි අනුදයං පත්‌වා යං කිඤ්‌චි අත්‌තනො සන්‌තකං පරෙසං දෙති. යො ච සංවිභාගසීලො, සො අප්‌පකස්‌මිම්‌පි අත්‌තනො සන්‌තකෙ පරෙහි සාධාරණභොගී හොති. වදඤ්‌ඤූ වදානියතාය යාගිනොව යුත්‌තං යුත්‌තකාලං ඤත්‌වා අත්‌ථිකානං මනොරථං පූරෙතීති වුත්‌තං ‘‘ඉති…පෙ.… චතූසූති ආහා’’ති.
Manenāti manogahaṇena. Pubbasuddhiaṅganti pubbabhāgasuddhibhūtaṃ aṅgaṃ. Catūsūti vuttaaṅgapariyāpannaṃ. Yaññaupakkharoti dānassa sādhanaṃ. Etesu dhammesūti etesu saddhādiguṇesu. Yathā hi saddho paccayaṃ paccupaṭṭhapetvā vatthupariccāgassa visesapaccayo kammaphalassa paralokassa ca paccakkhato viya pattiyāyanato, evaṃ muduhadayo. Muduhadayo hi anudayaṃ patvā yaṃ kiñci attano santakaṃ paresaṃ deti. Yo ca saṃvibhāgasīlo, so appakasmimpi attano santake parehi sādhāraṇabhogī hoti. Vadaññū vadāniyatāya yāginova yuttaṃ yuttakālaṃ ñatvā atthikānaṃ manorathaṃ pūretīti vuttaṃ ‘‘iti…pe… catūsūti āhā’’ti.
වාචන්‌තිආදීනි තීණි අඞ්‌ගානි තිවිධසීලසම්‌පත්‌තිදීපනතො. සම්‌පන්‌නසීලො හි පරලොකං න භාසෙය්‍ය. සද්‌ධො එකං අඞ්‌ගං පයොගාසයසුද්‌ධිදීපනතො. සුද්‌ධාසයස්‌ස සම්‌මාපයොගෙ ඨිතස්‌ස කථං පරලොකතො භයන්‌ති. දුකවසෙන චතුරඞ්‌ගයොජනා දුකනයො. එතෙසු චතූසු ධම්‌මෙසු ඨිතොති එතෙසු යථාවුත්‌තදුකසඞ්‌ගහෙසු චතූසු ගුණෙසු පතිට්‌ඨිතො.
Vācantiādīni tīṇi aṅgāni tividhasīlasampattidīpanato. Sampannasīlo hi paralokaṃ na bhāseyya. Saddho ekaṃ aṅgaṃ payogāsayasuddhidīpanato. Suddhāsayassa sammāpayoge ṭhitassa kathaṃ paralokato bhayanti. Dukavasena caturaṅgayojanā dukanayo. Etesu catūsu dhammesu ṭhitoti etesu yathāvuttadukasaṅgahesu catūsu guṇesu patiṭṭhito.
භීතාසුත්‌තවණ්‌ණනා නිට්‌ඨිතා.
Bhītāsuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 5. භීතාසුත්‌තං • 5. Bhītāsuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 5. භීතාසුත්‌තවණ්‌ණනා • 5. Bhītāsuttavaṇṇanā
