| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੫. ਭੀਤਾਸੁਤ੍ਤવਣ੍ਣਨਾ
5. Bhītāsuttavaṇṇanā
੭੫. ਪਞ੍ਚਮੇ ਕਿਂਸੂਧ ਭੀਤਾਤਿ ਕਿਂ ਭੀਤਾ? ਮਗ੍ਗੋ ਚਨੇਕਾਯਤਨਪ੍ਪવੁਤ੍ਤੋਤਿ ਅਟ੍ਠਤਿਂਸਾਰਮ੍ਮਣવਸੇਨ ਅਨੇਕੇਹਿ ਕਾਰਣੇਹਿ ਕਥਿਤੋ। ਏવਂ ਸਨ੍ਤੇ ਕਿਸ੍ਸ ਭੀਤਾ ਹੁਤ੍વਾ ਅਯਂ ਜਨਤਾ ਦ੍વਾਸਟ੍ਠਿ ਦਿਟ੍ਠਿਯੋ ਅਗ੍ਗਹੇਸੀਤਿ વਦਤਿ। ਭੂਰਿਪਞ੍ਞਾਤਿ ਬਹੁਪਞ੍ਞ ਉਸ੍ਸਨ੍ਨਪਞ੍ਞ। ਪਰਲੋਕਂ ਨ ਭਾਯੇਤਿ ਇਮਸ੍ਮਾ ਲੋਕਾ ਪਰਂ ਲੋਕਂ ਗਚ੍ਛਨ੍ਤੋ ਨ ਭਾਯੇਯ੍ਯ। ਪਣਿਧਾਯਾਤਿ ਠਪੇਤ੍વਾ। ਬਹ੍વਨ੍ਨਪਾਨਂ ਘਰਮਾવਸਨ੍ਤੋਤਿ ਅਨਾਥਪਿਣ੍ਡਿਕਾਦਯੋ વਿਯ ਬਹ੍વਨ੍ਨਪਾਨੇ ਘਰੇ વਸਨ੍ਤੋ। ਸਂવਿਭਾਗੀਤਿ ਅਚ੍ਛਰਾਯ ਗਹਿਤਮ੍ਪਿ ਨਖੇਨ ਫਾਲੇਤ੍વਾ ਪਰਸ੍ਸ ਦਤ੍વਾવ ਭੁਞ੍ਜਨਸੀਲੋ। વਦਞ੍ਞੂਤਿ વੁਤ੍ਤਤ੍ਥਮੇવ।
75. Pañcame kiṃsūdha bhītāti kiṃ bhītā? Maggo canekāyatanappavuttoti aṭṭhatiṃsārammaṇavasena anekehi kāraṇehi kathito. Evaṃ sante kissa bhītā hutvā ayaṃ janatā dvāsaṭṭhi diṭṭhiyo aggahesīti vadati. Bhūripaññāti bahupañña ussannapañña. Paralokaṃ na bhāyeti imasmā lokā paraṃ lokaṃ gacchanto na bhāyeyya. Paṇidhāyāti ṭhapetvā. Bahvannapānaṃ gharamāvasantoti anāthapiṇḍikādayo viya bahvannapāne ghare vasanto. Saṃvibhāgīti accharāya gahitampi nakhena phāletvā parassa datvāva bhuñjanasīlo. Vadaññūti vuttatthameva.
ਇਦਾਨਿ ਗਾਥਾਯ ਅਙ੍ਗਾਨਿ ਉਦ੍ਧਰਿਤ੍વਾ ਦਸ੍ਸੇਤਬ੍ਬਾਨਿ – ‘‘વਾਚ’’ਨ੍ਤਿ ਹਿ ਇਮਿਨਾ ਚਤ੍ਤਾਰਿ વਚੀਸੁਚਰਿਤਾਨਿ ਗਹਿਤਾਨਿ, ‘‘ਮਨੇਨਾ’’ਤਿਪਦੇਨ ਤੀਣਿ ਮਨੋਸੁਚਰਿਤਾਨਿ, ‘‘ਕਾਯੇਨਾ’’ਤਿ ਪਦੇਨ ਤੀਣਿ ਕਾਯਸੁਚਰਿਤਾਨਿ। ਇਤਿ ਇਮੇ ਦਸ ਕੁਸਲਕਮ੍ਮਪਥਾ ਪੁਬ੍ਬਸੁਦ੍ਧਿਅਙ੍ਗਂ ਨਾਮ। ਬਹ੍વਨ੍ਨਪਾਨਂ ਘਰਮਾવਸਨ੍ਤੋਤਿ ਇਮਿਨਾ ਯਞ੍ਞਉਪਕ੍ਖਰੋ ਗਹਿਤੋ। ਸਦ੍ਧੋਤਿ ਏਕਮਙ੍ਗਂ, ਮੁਦੂਤਿ ਏਕਂ, ਸਂવਿਭਾਗੀਤਿ ਏਕਂ, વਦਞ੍ਞੂਤਿ ਏਕਂ। ਇਤਿ ਇਮਾਨਿ ਚਤ੍ਤਾਰਿ ਅਙ੍ਗਾਨਿ ਸਨ੍ਧਾਯ ‘‘ਏਤੇਸੁ ਧਮ੍ਮੇਸੁ ਠਿਤੋ ਚਤੂਸੂ’’ਤਿ ਆਹ।
Idāni gāthāya aṅgāni uddharitvā dassetabbāni – ‘‘vāca’’nti hi iminā cattāri vacīsucaritāni gahitāni, ‘‘manenā’’tipadena tīṇi manosucaritāni, ‘‘kāyenā’’ti padena tīṇi kāyasucaritāni. Iti ime dasa kusalakammapathā pubbasuddhiaṅgaṃ nāma. Bahvannapānaṃ gharamāvasantoti iminā yaññaupakkharo gahito. Saddhoti ekamaṅgaṃ, mudūti ekaṃ, saṃvibhāgīti ekaṃ, vadaññūti ekaṃ. Iti imāni cattāri aṅgāni sandhāya ‘‘etesu dhammesu ṭhito catūsū’’ti āha.
ਅਪਰੋਪਿ ਪਰਿਯਾਯੋ – વਾਚਨ੍ਤਿਆਦੀਨਿ ਤੀਣਿ ਅਙ੍ਗਾਨਿ, ਬਹ੍વਨ੍ਨਪਾਨਨ੍ਤਿ ਇਮਿਨਾ ਯਞ੍ਞਉਪਕ੍ਖਰੋવ ਗਹਿਤੋ, ਸਦ੍ਧੋ ਮੁਦੂ ਸਂવਿਭਾਗੀ વਦਞ੍ਞੂਤਿ ਏਕਂ ਅਙ੍ਗਂ। ਅਪਰੋ ਦੁਕਨਯੋ ਨਾਮ ਹੋਤਿ। ‘‘વਾਚਂ ਮਨਞ੍ਚਾ’’ਤਿ ਇਦਮੇਕਂ ਅਙ੍ਗਂ, ‘‘ਕਾਯੇਨ ਪਾਪਾਨਿ ਅਕੁਬ੍ਬਮਾਨੋ, ਬਹ੍વਨ੍ਨਪਾਨਂ ਘਰਮਾવਸਨ੍ਤੋ’’ਤਿ ਏਕਂ, ‘‘ਸਦ੍ਧੋ ਮੁਦੂ’’ਤਿ ਏਕਂ, ‘‘ਸਂવਿਭਾਗੀ વਦਞ੍ਞੂ’’ਤਿ ਏਕਂ। ਏਤੇਸੁ ਚਤੂਸੁ ਧਮ੍ਮੇਸੁ ਠਿਤੋ ਧਮ੍ਮੇ ਠਿਤੋ ਨਾਮ ਹੋਤਿ। ਸੋ ਇਤੋ ਪਰਲੋਕਂ ਗਚ੍ਛਨ੍ਤੋ ਨ ਭਾਯਤਿ। ਪਞ੍ਚਮਂ।
Aparopi pariyāyo – vācantiādīni tīṇi aṅgāni, bahvannapānanti iminā yaññaupakkharova gahito, saddho mudū saṃvibhāgī vadaññūti ekaṃ aṅgaṃ. Aparo dukanayo nāma hoti. ‘‘Vācaṃ manañcā’’ti idamekaṃ aṅgaṃ, ‘‘kāyena pāpāni akubbamāno, bahvannapānaṃ gharamāvasanto’’ti ekaṃ, ‘‘saddho mudū’’ti ekaṃ, ‘‘saṃvibhāgī vadaññū’’ti ekaṃ. Etesu catūsu dhammesu ṭhito dhamme ṭhito nāma hoti. So ito paralokaṃ gacchanto na bhāyati. Pañcamaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੫. ਭੀਤਾਸੁਤ੍ਤਂ • 5. Bhītāsuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੫. ਭੀਤਾਸੁਤ੍ਤવਣ੍ਣਨਾ • 5. Bhītāsuttavaṇṇanā
