| Library / Tipiṭaka / তিপিটক • Tipiṭaka / পেতৰত্থু-অট্ঠকথা • Petavatthu-aṭṭhakathā |
১৪. ভোগসংহরণপেতিৰত্থুৰণ্ণনা
14. Bhogasaṃharaṇapetivatthuvaṇṇanā
মযং ভোগে সংহরিম্হাতি ইদং ভোগসংহরণপেতিৰত্থু। তস্স কা উপ্পত্তি? ভগৰতি ৰেল়ুৰনে ৰিহরন্তে রাজগহে কির চতস্সো ইত্থিযো মানকূটাদিৰসেন সপ্পিমধুতেলধঞ্ঞাদীহি ৰোহারং কত্ৰা অযোনিসো ভোগে সংহরিত্ৰা জীৰন্তি। তা কাযস্স ভেদা পরং মরণা বহিনগরে পরিখাপিট্ঠে পেতিযো হুত্ৰা নিব্বত্তিংসু। তা রত্তিযং দুক্খাভিভূতা –
Mayaṃbhoge saṃharimhāti idaṃ bhogasaṃharaṇapetivatthu. Tassa kā uppatti? Bhagavati veḷuvane viharante rājagahe kira catasso itthiyo mānakūṭādivasena sappimadhuteladhaññādīhi vohāraṃ katvā ayoniso bhoge saṃharitvā jīvanti. Tā kāyassa bhedā paraṃ maraṇā bahinagare parikhāpiṭṭhe petiyo hutvā nibbattiṃsu. Tā rattiyaṃ dukkhābhibhūtā –
৮০১.
801.
‘‘মযং ভোগে সংহরিম্হা, সমেন ৰিসমেন চ।
‘‘Mayaṃ bhoge saṃharimhā, samena visamena ca;
তে অঞ্ঞে পরিভুঞ্জন্তি, মযং দুক্খস্স ভাগিনী’’তি॥ –
Te aññe paribhuñjanti, mayaṃ dukkhassa bhāginī’’ti. –
ৰিপ্পলপন্তিযো ভেরৰেন মহাসদ্দেন ৰিরৰিংসু। মনুস্সা তং সুত্ৰা ভীততসিতা ৰিভাতায রত্তিযা বুদ্ধপ্পমুখস্স ভিক্খুসঙ্ঘস্স মহাদানং সজ্জেত্ৰা সত্থারং ভিক্খুসঙ্ঘঞ্চ নিমন্তেত্ৰা পণীতেন খাদনীযেন ভোজনীযেন পরিৰিসিত্ৰা ভগৰন্তং ভুত্তাৰিং ওনীতপত্তপাণিং উপনিসীদিত্ৰা তং পৰত্তিং নিৰেদেসুং। ভগৰা ‘‘উপাসকা তেন ৰো সদ্দেন কোচি অন্তরাযো নত্থি, চতস্সো পন পেতিযো দুক্খাভিভূতা অত্তনা দুক্কটং কম্মং কথেত্ৰা পরিদেৰনৰসেন ৰিস্সরেন ৰিরৰন্তিযো –
Vippalapantiyo bheravena mahāsaddena viraviṃsu. Manussā taṃ sutvā bhītatasitā vibhātāya rattiyā buddhappamukhassa bhikkhusaṅghassa mahādānaṃ sajjetvā satthāraṃ bhikkhusaṅghañca nimantetvā paṇītena khādanīyena bhojanīyena parivisitvā bhagavantaṃ bhuttāviṃ onītapattapāṇiṃ upanisīditvā taṃ pavattiṃ nivedesuṃ. Bhagavā ‘‘upāsakā tena vo saddena koci antarāyo natthi, catasso pana petiyo dukkhābhibhūtā attanā dukkaṭaṃ kammaṃ kathetvā paridevanavasena vissarena viravantiyo –
‘‘মযং ভোগে সংহরিম্হা, সমেন ৰিসমেন চ।
‘‘Mayaṃ bhoge saṃharimhā, samena visamena ca;
তে অঞ্ঞে পরিভুঞ্জন্তি, মযং দুক্খস্স ভাগিনী’’তি॥ –
Te aññe paribhuñjanti, mayaṃ dukkhassa bhāginī’’ti. –
ইমং গাথমাহংসূতি অৰোচ।
Imaṃ gāthamāhaṃsūti avoca.
তত্থ ভোগেতি পরিভুঞ্জিতব্বট্ঠেন ‘‘ভোগা’’তি লদ্ধনামে ৰত্থাভরণাদিকে ৰিত্তূপকরণৰিসেসে। সংহরিম্হাতি মচ্ছেরমলেন পরিযাদিন্নচিত্তা কস্সচি কিঞ্চি অদত্ৰা সঞ্চিনিম্হ। সমেন ৰিসমেন চাতি ঞাযেন চ অঞ্ঞাযেন চ, ঞাযপতিরূপকেন ৰা অঞ্ঞাযেন তে ভোগে অম্হেহি সংহরিতে ইদানি অঞ্ঞে পরিভুঞ্জন্তি। মযং দুক্খস্স ভাগিনীতি মযং পন কস্সচিপি সুচরিতস্স অকতত্তা দুচ্চরিতস্স চ কতত্তা এতরহি পেতযোনিপরিযাপন্নস্স মহতো দুক্খস্স ভাগিনিযো ভৰাম, মহাদুক্খং অনুভৰামাতি অত্থো।
Tattha bhogeti paribhuñjitabbaṭṭhena ‘‘bhogā’’ti laddhanāme vatthābharaṇādike vittūpakaraṇavisese. Saṃharimhāti maccheramalena pariyādinnacittā kassaci kiñci adatvā sañcinimha. Samena visamena cāti ñāyena ca aññāyena ca, ñāyapatirūpakena vā aññāyena te bhoge amhehi saṃharite idāni aññe paribhuñjanti. Mayaṃ dukkhassa bhāginīti mayaṃ pana kassacipi sucaritassa akatattā duccaritassa ca katattā etarahi petayonipariyāpannassa mahato dukkhassa bhāginiyo bhavāma, mahādukkhaṃ anubhavāmāti attho.
এৰং ভগৰা তাহি পেতীহি ৰুত্তং গাথং ৰত্ৰা তাসং পৰত্তিং কথেত্ৰা তং অট্ঠুপ্পত্তিং কত্ৰা সম্পত্তপরিসায ধম্মং দেসেত্ৰা উপরি সচ্চানি পকাসেসি, সচ্চপরিযোসানে বহূ সোতাপত্তিফলাদীনি পাপুণিংসূতি।
Evaṃ bhagavā tāhi petīhi vuttaṃ gāthaṃ vatvā tāsaṃ pavattiṃ kathetvā taṃ aṭṭhuppattiṃ katvā sampattaparisāya dhammaṃ desetvā upari saccāni pakāsesi, saccapariyosāne bahū sotāpattiphalādīni pāpuṇiṃsūti.
ভোগসংহরণপেতিৰত্থুৰণ্ণনা নিট্ঠিতা।
Bhogasaṃharaṇapetivatthuvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / পেতৰত্থুপাল়ি • Petavatthupāḷi / ১৪. ভোগসংহরপেতৰত্থু • 14. Bhogasaṃharapetavatthu
