| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
6. භොජනඞ්‌ගපඤ්‌හො
6. Bhojanaṅgapañho
6. ‘‘භන්‌තෙ නාගසෙන, ‘භොජනස්‌ස තීණි අඞ්‌ගානි ගහෙතබ්‌බානී’ති යං වදෙසි, කතමානි තානි තීණි අඞ්‌ගානි ගහෙතබ්‌බානී’’ති? ‘‘යථා, මහාරාජ, භොජනං සබ්‌බසත්‌තානං උපත්‌ථම්‌භො, එවමෙව ඛො, මහාරාජ, යොගිනා යොගාවචරෙන සබ්‌බසත්‌තානං මග්‌ගුපත්‌ථම්‌භෙන භවිතබ්‌බං. ඉදං, මහාරාජ, භොජනස්‌ස පඨමං අඞ්‌ගං ගහෙතබ්‌බං.
6. ‘‘Bhante nāgasena, ‘bhojanassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti? ‘‘Yathā, mahārāja, bhojanaṃ sabbasattānaṃ upatthambho, evameva kho, mahārāja, yoginā yogāvacarena sabbasattānaṃ maggupatthambhena bhavitabbaṃ. Idaṃ, mahārāja, bhojanassa paṭhamaṃ aṅgaṃ gahetabbaṃ.
‘‘පුන චපරං, මහාරාජ, භොජනං සබ්‌බසත්‌තානං බලං වඩ්‌ඪෙති, එවමෙව ඛො, මහාරාජ, යොගිනා යොගාවචරෙන පුඤ්‌ඤවඩ්‌ඪියා වඩ්‌ඪිතබ්‌බං. ඉදං, මහාරාජ, භොජනස්‌ස දුතියං අඞ්‌ගං ගහෙතබ්‌බං.
‘‘Puna caparaṃ, mahārāja, bhojanaṃ sabbasattānaṃ balaṃ vaḍḍheti, evameva kho, mahārāja, yoginā yogāvacarena puññavaḍḍhiyā vaḍḍhitabbaṃ. Idaṃ, mahārāja, bhojanassa dutiyaṃ aṅgaṃ gahetabbaṃ.
‘‘පුන චපරං, මහාරාජ, භොජනං සබ්‌බසත්‌තානං අභිපත්‌ථිතං, එවමෙව ඛො, මහාරාජ, යොගිනා යොගාවචරෙන සබ්‌බලොකාභිපත්‌ථිතෙන භවිතබ්‌බං. ඉදං, මහාරාජ, භොජනස්‌ස තතියං අඞ්‌ගං ගහෙතබ්‌බං. භාසිතම්‌පෙතං, මහාරාජ, ථෙරෙන මහාමොග්‌ගල්‌ලානෙන –
‘‘Puna caparaṃ, mahārāja, bhojanaṃ sabbasattānaṃ abhipatthitaṃ, evameva kho, mahārāja, yoginā yogāvacarena sabbalokābhipatthitena bhavitabbaṃ. Idaṃ, mahārāja, bhojanassa tatiyaṃ aṅgaṃ gahetabbaṃ. Bhāsitampetaṃ, mahārāja, therena mahāmoggallānena –
‘‘‘සංයමෙන නියමෙන, සීලෙන පටිපත්‌තියා;
‘‘‘Saṃyamena niyamena, sīlena paṭipattiyā;
පත්‌ථිතෙන භවිතබ්‌බං, සබ්‌බලොකස්‌ස යොගිනා’’’ති.
Patthitena bhavitabbaṃ, sabbalokassa yoginā’’’ti.
භොජනඞ්‌ගපඤ්‌හො ඡට්‌ඨො.
Bhojanaṅgapañho chaṭṭho.
